صحت رجوى من الغفوه اللي اخذتها...و شافت عزيز نايم جنبها...
هي من فرحتها...و الراحه الكبيره اللي تحس فيها ما قدرت تهدأ و تسكن و تنام...
تأملته...تحس طيبة الدنيا فيه...و تحسد نفسها عليه...
عطاها كل اللي حلمت فيه من صغرها...و اللي ما تجرأت تحلم فيه...
رجوى بهمس= نام و ارتاح و أنا بأفكر كيف اعطيك كثر ما عطيتني..بس اللحين بأروح اشوف فروخي و اتطمن عليهم..و ارجع لك عزوزي
تركته...و قامت تتلمس طريقها للباب...
و أول ما طلعت فتح عيونه وهو مبتسم على كلامها...
و يحس بحياته اللي من سنين عاشها بوحده...تمتلي حب...و فرح...
••
••
••
دخلت للقسم الخاص بأهلها...و هي تظن بتلقاهم نايمين...
بس سمعت أصواتهم...و صراخهم...من قبل تدخل حتى...
دخلت للصاله و أول ما شافوها...صرخوا بفرحه...و ركضوا يضمونها...و سووا لها زفه ثانيه...
و قمر تردد بطرب كلمات الزفه اللي حفظتها من أول مره...من كثر فرحتها...
رجوى تضحك= ول عليك شكتها كلها..لااا خلاص ابشرك لك مستقبل طقاقه
قمر= رجوى شوفي البيت روووعه..كبير..مو قادرين ننام..تعبنا و حنا ندور فيه
بسمه بفرح= رجوووى تعالي شوفي غرفتي..لي لحااالي..تهبل
شافت رجوى كل الأنوار مشغله...و حماسهم زاد حماسها بعد...و راحت معهم تدور في كل الغرف...
و رجعوا للصاله عند أمهم...
أم مشعل= الله يوفقك و يسعدك يا رجوى
رجوى= آمين
شهد تتذكر= ليه تركتي عزيز و جيتي؟
قمر تشهق= لا يكون تهاوشتم!!
ضربتها شهد بالخداديه..و هي تطالعها بغيض...
شهد= فال الله و لا فالك..صدق ما تعودت على الخير
رجوى تضحك= هههه تلومينها هاذي عشرة عمر بيننا و بين الفقر..والله حتى أنا ما هان علي اتركه هههه
مشعل يكشر= عسانا ما نشوفه مره ثانيه

••-------•?••?•{n}•?••?•--------••

•• بـعــد شـهـــر ••

مرت عليهم الأيام بفرح...كل لحظه أحلى من الثانيه...
كل واحد فيهم عوض الثاني عن اللي شافه...و عانى منه...
كل واحد كان محتاج للثاني...و اكتملوا مع بعض...
رجوى...و اخوانها ملوا حياته بكل فرح...و سعاده فكر يعيشها...
لكنه لازم يتطمن عليهم...و يضمن ما يتنكدون بعده...لو في يوم ما عاد موجود معهم...
و عشان كذا كان ينتظر رجوى في مكتبه...و ابتسم وهو يشوفها تدخل عنده...
تأمل ملامحها الحلوه و اللي تزيد حلاها هالضحكه الدايمه عليها...
جلست جنبه تطالعه بحماس...
رجوى= نعم..وش الدرس اللي بنتعلمه اليوم؟
من أسبوعين اقنعها...إن جلستها في البيت كذا مالها داعي و بتمل منها...و سجلها بمعهد للحاسب الآلي...
و اليوم قال لها إن فيه أشياء يبي يعلمها لها...و هي تحمست...لأنها تحب أي شي يجي منه...
عزيز بجديه= أبيك تعرفين كل شي عن شغلي..و اللي لنا..و...
رجوى تضحك= لا عزوزي عاد كل شي و لا هذا..على فكره ترى أنت آخذ فيني مقلب على بالك عندي مخ..ترى والله عطيته اجازه من زمان
عزيز= أنا بأعلمك حبه حبه..و متأكد إنك بتعرفين..أنتي ذكيه بس ما لك صبر على التعليم
رجوى تبرطم= الحاسب و هضمناها..و لا تحمست إلا عشان النت و اسولف مع البنات بالمسن..لكن وش أبي في شغلك؟؟
عزيز بإصرار= لا زم تعرفين كل اللي لك..و كيف تتصرفين فيه و....
كمل كلامه...لكن هي توها تستوعب...و تبدلت ضحكتها لضيق بان على ملامحها...و غير نظرتها...لنظره مقهوره...منصدمه...
عزيز بإستغراب= رجوى! وش فيك؟ ما يسوى كل هذا ضيق من الشغل؟ لا تخافين ساعه بس في اليوم
رجوى بغيض و بصراحه= و بيمديك تعلمني على الشغل قبل تموت؟
طالعها بصدمه وهو يشوفها عرفت أسبابه...و كانت أقوى منه...و قالتها بكل صراحه...
امتلت عيونه بالحزن...و صد عنها...ما يبي يطالع هالضيق اللي هدم ضحكتها...و فرحها اللي كان يشع منها...
رجوى توقف بقهر= يعني صح؟؟ أنت ناوي تعلمني عشان كذا؟؟ بتتركني و تروووح!!
عزيز يتنهد بحزن= مو كذا يا رجوى..أنا كنت..يعني..لو...
رجوى تقاطعه= لو ايش؟؟..(و بتهديد كأنه بيده) يا ويلك تفكر تتركنا..انسى القوه اللي تتخيل إنها عندي..أنا ما عاد فيني حيل لشي..رميت عليك كل همي..و تعبي..و حزني و أنت اخذتني بكل هذا...(و برجاء) عزيز تكفى..عزيز الله يخليك لا تتركنا..لو تركتني والله ما تحمل..والله نضيع..(و بغيض) و أنت السبب أنت بتآخذ ذنبنا..ليه تعلمنا كيف نعيش براحه..ليه تعزنا و تغنينا عن الكل و بعدين تتركنا..حنا مو الناس اللي قبل..دفنا ذيك الارواح الذليله المحتاجه هناك في الحاره..معك عشنا حياة غير..حياة تعبنا و حنا نتمناها...مو يوم تحققت تهدمها..(جلست جنبه و تمسكت بيدينه بقوه) الله يخليك لا تتركنا
ضمها له بقوه...و دمعة حزن تنزل من عيونه...
طول عمره يعرف بتعبه...متخيل نهايته مثل أبوه...و متقبل الأمر لأنه ما عنده اللي يزعل على فقده...
لكن اللحين...عنده ناس تحتاجه...وهو يتمنى عمره يطول بينهم...

••-------•?••?•{n}•?••?•--------••

بعد ساعات...صحت و شافت نفسها في الغرفه...
تذكرت كيف صاحت بحضنه لين غفت بدون ما تحس...
رجعت تتذكر كلامه...تتخيل لو تعب...لو تركها و راح حتى هو عن دنيتها...
كيف بتتصرف...كيف بتعيش بدونه...
ما تخيلت الحياة بعده...عمرها ما فكرت بشعورها اتجاهه من يوم تزوجت...
غرقت بالفرح...و الراحه...و لا اهتمت لشي ثاني...
لكن اللحين...و هي تتذكر كل يوم مر عليهم...
كل لحظه جمعتهم...
اهتمامه...حبه...حنانه...
ملامحه...نظراته...صوته...
عرفت إنها تحبه...تحبه أكثر ما أحبت أبوها لأنه حسسها بالأبوه و الأمان...
تحبه كأنه اخوها لأنه علمها كيف يكون لها سند تستند عليه...
تحبه كأنه أمها و هي تشوف حنانه و عطفه و خوفه عليها...
تحبه زوج...و حبيب...و عاشق...تعلمت معه الحب الآمن...و الدلع...و الحياة الحلوه...
و اللحين كلها خوف من فقده...
مين لها بعده...
مين يقبل فيها مع اخوانها و عيوبها...
مين يعطي مثله و لا يفكر يآخذ...
ظلت شارده لوقت طويل تفكر...و تفكر...
و نطت من سريرها بسرعه تسوي اللي ناويه عليه...

••-------•?••?•{n}•?••?•--------••

شافته يدخل للبيت بوقت متأخر...و راحت بتكلمه...
ما صار يجلس في البيت إلا للنوم بس...
من أيام ما تكلم مع أحد...و تهاوش مع أمه أول ما فتحت له طاري الزواج...
كان مثل الآله المبرمجه للشغل و بس...
مشاعل= أسيف
أسيف يلتفت لها= بعدين يا مشاعل مالي خلق اكلم أحد
مشاعل= و ليه كل هذا؟ خلاص ما تبي تتزوج أنا اقول لأمي ما تفتح معك هالسالفه مره ثانيه بس يا أسيف.....
أسيف يقاطعها= مشاعل تعبان و أبي أنام..عندي بكره سفر من الصبح
تركها و راح و هي تطالعه بضيق...ما تدري لو حاله بيتعدل بيوم...وش اللي ممكن يعدله...

••-------•?••?•{n}•?••?•--------••

رجع للبيت بوقت متأخر عن عمد...ما يدري كيف بيشوفها بعد اللي قاله لها...
أهم سبب خلاه يختارها هو قوتها...لكن يوم عرفها...
شاف إن الزمن حملها كثير...و هي تظاهرت بالقوه و صبرت...و جاء حتى هو يبي يحملها همومه...
ما أحد رحم عمرها الصغير...و العنا اللي شالته على أكتافها من سنين...
تنهد بتعب...و طلع للغرفه و شافها جالسه على السرير...
طالعها بحب...و حزن...و اعتذار عن شي مو بيده...
مدت له يدها...وهو تقدم و حط يده بيدها و جلس جنبها...
رجوى كانت تطالعه...كل لمحه بوجهه...كل تعبير بعيونه...
يأكد لها المشاعر الكبيره اللي ملت قلبها اتجاهه...لين ما بقى أي محل لغيره...
رجوى= فكرت في الكلام اللي قلته..موافقه بأتعلم كل شي عن الشغل
هذا اللي كان يبيه...من أول ما تزوجها وهو ناوي على هالشي...
و قوتها هاذي اللي اختارها عشانها...
لكن ما يدري ليه حس بضيق وهو يسمعها تتقبل الأمر بسرعه...
ما يدري لأنها تعودت بسرعه على فكرة فراقه...أو لأنه هو اللي مو متحمل الفكره...
رجوى= بس بأتعلم عشان أساعدك في الشغل اللي تجيبه هنا..و بالمقابل أنا بأعلمك شي ثاني..و بتطيعني غصب
عزيز يطالعها بإستغراب...و ترقب...
رجوى= أنا بحثت في النت كثير..و كلمت أبومنى و اخذت منه اسم الدكتور اللي متابع حالتك و كلمته..من اليوم..لا من هاللحظه..فيه نظام بتمشي عليه..في الأكل..في النوم..و في الشغل و بكل شي في حياتك..علاجك بتآخذه بوقته..و فحوصاتك بتسويها بإنتظام..و ماراح تتعب نفسك أبدا...ما عندي استعداد اخسرك..و لا راح اسمح لك تتركني..تعبت من الفقد..تعبت و أنت بالذات ماراح اخسرك أبدا
طالعها بصدمه من اللي تقوله...
ضحكها...خبالها....جهلها بكل شي...و عمرها الصغير...ما تخيل إنها ممكن تفكر كذا...
ممكن تعيش معه هالحياة الممله...بس عشان يبقى جنبها...
ضمها له وهو يغالب الدموع اللي تحرق عيونه ما تنزل...
عزيز بحب ملأ صوته= الله لا يحرمني منك..أنا بين يديك سوي اللي تبين

••-------•?••?•{n}•?••?•--------••

•• بـعــد أيــام ••

كان عزيز يزور أمه...اللي مع كل جفاها ما يقدر يقطع فيها...لو يشوفها لحظات تضايقه أكثر من تريحه...
بس ما يبي على كثر النعمه اللي منحها له ربه يقصر بأي واجب عليه...و هاذي مهما كانت أمه...
حتى رجوى راحت معه...تشوف مشاعل...
من أول ما دخلت البيت سيطر عليها شعور غريب...و هي ترجع لها كل الذكريات الحلوه اللي عاشتها هنا...
لكنها اللحين غير ذيك البنت بكل شي...
من أصغر طبع تركته...إلى اعظم شعور تحسه...
و مع كل اللي سواه أسيف فيها...إلا إنها و هي تسمع من مشاعل عنه...
تمنت له الخير...و دعت له من قلبها..يعيش بفرح عمره اللي يضيعه بالشغل...
رجوى= يله بأروح لعزيز
مشاعل= وييين توك جالسه؟
رجوى= بصراحه ما أظمنها أمك تنكد على عزيز و أنا مابي شي يضايقه..أنتي زوريني مع عيالك كلهم والله مشتاقه لهم
مشاعل= لو دروا إنك جايه ندموا إنهم راحوا لعمهم
••
••
••
عند عزيز...كان يحاول قد ما يقدر يتحمل كلام أمه...صدها و جفاها...و صوتها اللي ما يشيل أي حب له...حتى جلستها كانت متملله و تنتظر يروح...
هو دائما ما يطول عندها...بس يلم عليها و يمشي...و يوفر على نفسه الجرح...لكنه ما كان يبي يستعجل رجوى...
لكن أمه ما تحملت أكثر...و هي تسمع دق جوالها...
أم عزيز= هاذي أم تركي شوي و يجوني حريم..خذ مرتك و روحوا مابي الحريم يشوفونها..سمعوا عن الفضيحه مو ضروري يشوفونها..يقولون هاذي اللي رضت فيك
تركته و طلعت...وهو يحس بضيق في قلبه مو مخليه قادر يتنفس...
حس بأحد يدخل عنده...و ارتاح لأنه ظنها رجوى و علاجها اللي محتاجه معها...
لكنه كان أسيف...اللي من زمان ما شافه...واقف يطالعه بغيض...و كره...
أسيف بقهر= ليه جاي هنا؟ أنت مصدق إن أمي تبيك..ما يكفيك اللي اخذت؟؟
ما قدر يتكلم وهو ياله قادر يآخذ أنفاسه...و انتبه أسيف لشكله...و تعبه...
كان بيتحرك يمه يساعده...لكن اللي سمعه شله...و قيد خطواته...و ذكره باللي يتعب يبي ينساه و مو قادر...
عزيز بتعب= ررجـ ـ ـوووى..رررجـ ـ ـوووى
كان يطالعه بضيق...و يشوف حاجته لها بصوته...
الحاجه اللي يحس هو بأضعافها بس ما بيده شي...غير يتحسر على اللي راح...
فز وهو يسمع صرختها...و يلتفت يطالعها بصدمه و هي داخله تركض...
انصدم وهو يشوفها...انصدم من وجودها...
رجوى= عزززيـــززز!!
ركضت و جلست جنبه...تطالعه بخوف...و قلق...
و بيدين مرتجفه تفتح شنطتها...و تطلع الحبوب منها...و تعطيه حبه...
تلفتت بتوتر و شافت كأس الماء اللي على الطاوله و اخذته...و شربته...
صارت أنفاسه تهدأ...و نظراته متعلقه بنظراتها اللي كلها خوف...و عيونها ملتها الدموع...
كانت ماسكه يده بقوه...و يدها الثانيه على صدره...و هي تقرأ عليه...وهو يغمض عيونه براحه...
كل هذا يصير قدامه...وهو واقف يطالعهم بصدمه...حتى أنفاسه ما عرف لو يآخذها للحين أو انقطعت...
شاف خوفها عليه...شاف حبها باين بلهفتها عليه...
شاف رجوى غير اللي يعرفها...
و اللحين يشوف الكره...و اللوم بعيونها و هي تلتفت عليه تطالعه بصدمه...و قهر...
رجوى توقف بعصبيه= أنت ايش؟؟ أخوك تعبان قدامك واقف تتفرج عليه!!(تصـرخ) أنت و أمك مو بشر؟ ما تحسون؟ كل اللي يهمكم نفسكم و بس!! خساره فيكم أحد مثل عزيز..حرام تكونون أهله
التفتت على عزيز...و سندته لين قام...و راحت و هي ماسكته بيدينها...و مو شايفه بالدنيا غيره...
رجوى= بنجلس في السياره لين ادق على السواق يجي يآخذنا
كأنه مو موجود...
ما قدر يتكلم...
و لا يتحرك...و هم يتركونه...
انصدم وهو يشوفه بعد ما ملك اللي خسرها...و خسر معها كل شي حلو بحياته...
ما استوعب وهو يتعب قدامه وش المفروض يسوي...لأنه مو عارف عن تعبه أي شي...و لا تعود يساعد أحد...
و فوق كل هذا صدمته بوجودها...بحبها لعزيز...بكرهها له...
رمى نفسه على الكنب لأن رجلينه ما صارت تشيله...و الضيق يكتم أنفاسه...(راحت رجوى! حتى رجوى اللي اعرفها ما عادت موجوده!!)


••-------•?••?•{n}•?••?•--------••

•• بـعــد يــوميـن••

دخلت عنده في المكتب اللي من يومين يسوي أشغاله فيه...عشانها منعته من إنه يروح للشركه بعد تعبه في بيت أمه...
عزيز= رجعتوا؟ وش فيها أم مشعل عساها بخير؟
رجوى تجلس على الطاوله قدامه= أم مشعل بخير
عزيز يضحك= تدرين إنك عفستي شغلي مو كافي ما خليتيني اروح للشركه؟
رجوى= عندي لك شي أهم من الشغل
عزيز= أكيد عنك
رجوى= يعني أنا أهم من الشغل؟
عزيز بحب= أنتي أهم من الدنيا كلها
رجوى= هالشي أهم مني..حتى أهم منك
عزيز بإستغراب= وش هالشي؟
رجوى تضحك بفرح و تصرخ= أناااا حااامل
طالعها للحظه يستوعب الفرحه اللي نثرتها فيه...و ضحك معها...
وقف قدامها و ضمها بقوه...و هي تعلقت فيه...
رجوى تضحك= والله ما اتخيل كيف بيطلع..يارب يآخذ كل شي منك مابي يآخذ شي مني
عزيز يبعدها= لا أنا أبيها بنت..و تشبه أمها بكل شي
رجوى= حررااام عليك! لا أبيها حلوه
عزيز بحب= أمها حلوه..يا بختها لو تشبهها

••-------•?••?•{n}•?••?•--------••

•• بـعــد أيــام••

دخلت مشاعل للصاله...و فرحت و هي تشوف أسيف...
مشاعل تجلس= صدق اللي قالته أمي؟ صدق وافقت تتزوج؟
أسيف بدون أي فرح= ايه
مشاعل بحماس= تقول أمي إنك مشترط أنا اللي ادور لك
أسيف بجمود= ايه
مشاعل تفكر= اممم والله فيه بنات كثير ببالي..أنت عندك شي تبيه في البنت اللي بتآخذها؟
أسيف اهتم فجأه= إيه
مشاعل تبتسم= وشو؟
أسيف= بأقولك شي تسوينه و مابي اسمع أي تعليق
مشاعل بإستغراب= وشو؟
أسيف= أبيها تشبه رجوى..(يبتسم بغرابه) أدري ما فيه بنت تشبهها..بس دوري أي وحده فيها أي صفه منها..لو شي واحد..ولو بتلقين فيه وحده فيها أشياء أكثر منها ياليت..أي شي..تشبهها بالملامح..بالشعر..بالخبال..بالضحك...أهم شي فيها شي منها
طالعته بصدمه من الكلام اللي يقوله...ما تدري لو كان يتكلم من عقله...أو صارت له رجوى مثل الهوس اللي ما يشفى منه...

••-------•?••?•{n}•?••?•--------••