كاتب الموضوع :
همسة حزينة
المنتدى :
القصص المكتمله
الجزء العاشر
دخلت تميم وسلمت على خالتها .... كيفك لولي والله اشتقنالك صار اكتر من مره رحت لعند سلمى وماشفتك هنيك.... ابتسمت لخالتها بود .. معليش خاله اعذرينى والله كتير مشغوله هالكم يوم وانت بتعرفى ان الدكتوراه اخده كل وقتى ............ الله يوفقك حبيبتى ويفتحها بوجهك ............. اهلين وصلتى ........... التفتت تميم للميا النازله على الدرج ... سلمو على بعض .. وقالت لميا لأمها وهى بتشد تميم من ايدها ... ماما نحن عند المسبح خليهم يجيبولنا العصير برا .................... لالا خليها قهوه ................... خلص قهوه ماما لو سمحتى .............. بعد ماقعدو .... اى كيفك يا بنت والله انى زعلانه منك ................. بنرفزه ردت تميم ... لميا مو تبلشى فينى انا من حالى مو طايقه حالى مابكفى اللزقه الى عندى بالمكتب ............. بزعل قالت لميا.. مهما كان مشكلتك مو متل مشكلتى ........ تنهدت تميم وهى بتحط ايدها على ايد لميا ... اسفه لميا لا تزعلى مني معك حق ............ ابتسمت لميا .. بسامحك على شرط تحكي لى شو عامل معك لزقه افندى ............. رفعتلها تميم حاجبها وهى بتقول لما انت تحكي لى اول على روميو افندى ................ احمر وجهها للميا .. شو احكيلك مافى شى ينحكى ................... لكان هيك من الباب للطاق خطبك اكيد فى استلطاف او اعجاب من قبل .................... لا والله يا تميم ابدا .. كتير محترم ومؤدب و خلوق .. ولا مره حكى معى برات الشغل .. ولا مره حسيت من نظراته انه بيكن لى شى .. اصلا الأحتكاك الوحيد الى صار بينى وبينه لما تجرأ معن ومد ايده على بالمستشفى ....حطت ايداها على خدها وهى بتقول بخجل ... ييي اسكتى لهلأ مو مسدقه شو عملت والله خايفه يكون مفكرنى هيك بتصرف عادى مع كل الرجال بتلزق فيهم ...................... ضحكت تميم وهى بتقول .. لا بس بالراكزين منهم ....................... ضربتها لميا على ايدها بخفه .. اسكتى حاج تضحكى والله مالى عرفانه كيف ححط عينى بعينه ................ أبتسمت لها تميم تطمنها .. لا تقلقى لو نازله من عينه ما كان خطبك ............... وانا هيك بفكر انت لو شفتيه كيف بتعالم مع اخته بالمستشفى .. والله بتتمنى اخ متله تعاملهم صريح وواضح مو متل فراس الى كل وقته نقار وعياط مع مياس .. هيك وهو مابعرف نص تصرفاتها برا البيت.................. حرام عليك فراس بحبكم وبعدين مياس بدها شده شوى.................... والله بعرف بس ياريت يحسن اسلوبه معنا منشان نعرف نفضفضله ...................... هلأ تركينا من فراس الى افهمه هلأ انك مرتاحه لسامر ................ ريم اخته لسامر علمتنى صلاة الإستخاره .. مابعرف حاسه حالى مرتاحه ...................... يالله منك يا لميا كلشى عندك مابعرف ماعندك جواب جازم لأى شى دائما متردده ....................... ايه شو اعملك عنجد ما بعرف ............... طيب متى راجعه لدوامك ............. بعد بكره .................منيح هلأ على الأقل بتعرفى انه مابيعارض شغلك .. لميا هالمره لازم تكونى واعيه وقويه وتطالبى بحقوقك كامله وماترضى بالقليل ولا ترضى بالأهانه متل ما رضيتى مع معن .. بترجاك تنسى الضعف الى عايشتيه هون عند اهلك ... تغيرت نبرة تميم وهى بتضغط على ايد لميا بحب .. حبيبتى مو كل مره بتصيب معك اذا كان سامر متل ما قلتى فبترجاك ترسمى صوره حلوه اليك معه من الأول ولا تخسرى نفسك قبل ما تخسريه .............. هزت لميا راسه وهى بتربت على ايد تميم الى بحضنها ....................ممتاز .. يالله انا بستأذن .................. يوه فين لسى ماقعدنا وماحكيتى لى عن اياد افندى ................. اطلعت تميم بلميا وهى بتقول بحالها ... شو اقول لك انى مو عرفانه اشتغل ولا اركز بسببه .. كل الوقت بحاول احارب احاسيس بداخلى طول عمرى بشوفها ضعف آآآه يالميا خليها بالقلب .............. ابتسمت للميا وهى بتقول وقت تانى حبيبتى هلأ لازم اروح للجامعه لأن عندى مليون شغله وانا عديت هيك عالسريع منشان اسلم وأطمن عليك ................... ايه الله لا يحرمنا من سلامك و كلامك ............ يالله مع السلامه
*********
اول يوم دوام بعد اجازتها الطويله كان الكل برحب بعودتها وببارك لها خطوبتها من الدكتور سامر ... الخبر هدا غطى على مشاكلها السابقه بالمستشفى مع معن .. كأن الكل نسى شو صار من شهر .. هيبة الدكتور سامر و شخصيته القويه المحبوبه خلت الجميع يزين كلمته قبل ما يجرح بلميا زوجته قريبا جدا .....
دخلت عليها ريم عيادتها وهى بتضحك بمرح ... اهلين كنتنا .................. حضنتها لميا بحب و هى بتقول اهلين فيك ريم وينك يا بنت من زمان ما شفتك .................... والله معك حق بس شو اعمل بسامر عامل لى حضر تجول منشان الدراسه ههههه ..................... ابتسمت لها بحب وقالت الله يوفقك واذا بتحتاجى اى شى انا بالخدمه ................ تسلمى لى .. اصلا انا لولا مساعداتك كنت رحت مييح .. سدقينى انت لازم تشتغلى بالكليه .. طريقتك بالشرح رائعه وبتتحملى سقالة الاسئله هههه ........... ان شاء الله .. اصلا انا هدا الى بدى اياه بس ادعيلى تتيسر البعثه و كله بمشى تمام ............ الله يوفقك يالله عن اذنك عندى مرضى بتستنانى .......... مع السلامه حبيبتى ...
على الساعه 2 اندق باب عيادتها ..... تفضل ...... رفعت راسها منشان تشوف مين ووقفت اول ماشافت سامر داخل وبأيده صينيه ..... السلام عليكم ............ وعليكم السلام اهلا دكتور سامر .............. ابتسمت الممرضه وهى بتقول .. عن أذنكم ............ قال لها سامر وهى طالعه لو سمحتى خلى الباب مفتوح ............... ارتبكت لميا من وجوده وقالت بخجل واضح بصوتها .. تفضل تفضل ............ قعد سامر على الكرسى الى امام مكتبها وهو بقول .. لما ماشفتك بالكفتيريا قلت اجيب لك الغدا لعندك اذا مشغوله ............. وردت خدودها وهى بتقول .. ماكان فى داعى تعذب حالك .............. ابتسم لها بود وهو بقرب الصينه منها .. لا عذاب ولا شى تفضلى ........... تناول سامر فنجان القهوه وهو بقول .... صحه وهنا على قلبك لازم تسترجعى الوزن الى خسرتيه ..................... احمرت خدودها زياده وهى بتقرب منها الصينيه وبتبدا تاكل بخجل قدامه .. بعد كم لقمه بعدت الصينيه وهى بتقول الحمد لله ............... اطلع فيها سامر بأستغراب .. ما اكلتى شى ؟ .............. خلص شبعت ............... ضحك وهو بقول لو شافتك امى الله يرحمها كانت قالت لى نيالك يا سامر عروستك بتاكل متل العصافير............... ابتسمت له بخجل وهى بتقول .. لا والله عنجد شبعت ................... طيب انا رح اخلى الصينه هون يمكن تشتهى شى بعد ما اطلع ...... شالها وحطها على الطاوله التانيه الى بالعياده .... رجع قعد على نفس الكرسى قدامها وهو بتناول شى من جيبه وبقدمه للميا ... تفضلى ................ اخدت لميا العلبه الصغيره الى حطها على مكتبها وهى بتسأل بأستغراب شو هدا ؟.................. خاتم الخطوبه ............ فتحتها وشافت خاتم خطبه ذهب وجنبه خاتم تانى فضه ................. الذهب اليك والفضه الى ................ تناولت الخاتم تبعها وهى متأثره من حركته .... اطلعت فيه بعيون مليانه امتنان .. هلأ كل الناس حتشوف خاتم الخطوبه بأيدها و الكلام الى بدور عن خطبتهم حيأكده هالخاتم و بهيك انحلت كل مشاكلها ......... ابتسم لها بموده وهو بقول يالله البسيه ....... لبسته بأصابع بترجف من تأثرها حاولت تمسك حالها منشان ماتنزل الدموع الى تجمعت بعينها وهى بتشوف سامر بتناول الخاتم التانى وبلبسه بأصبعه وهو بقول .. هلأ صرنا رسميا مخطوبين ............... حس فيها فقام يكب فنجان القهوه تبعه بالزباله منشان يعطيها فرصه تمسح دموعها ... وفعلا لميا استغلت الفرصه ومسحت دموعها واخدت كم نفس يهدوها لحتى رجع سامر وقعد مره تانيه .................. انا استأذنت من الوالد اني ازورك بالعياده كل فتره منشان نتكلم .. فى امور كتير حابب اوضحها معك و نتفاهم عليها من هلأ منشان مانواجه اى مشاكل بالمستقبل .......... نزلت راسها وهى بتقول طيب تفضل شو فى عندك ............. تنهد سامر قبل مايقول بجديه ... اول شى بدى اياه منك انك تنسى معن نهائى ... بقيت لميا منزله راسها وهى بتسمع له ................. لميا ارفعى راسك ....... رفعت راسها على مهل وهى بتتطلع فيه بحزن ......... تغيرت نبرة سامر صارت حنونه و هاديه .. بدى تمزعى هالصفحه من حياتك نهائى .. وانا بوعدك انى ما اجيبلك سيرته ابدا ............ هزت راسها بطيب .............. وبعدين بدى تهتميلى بحالك شوى وبصحتك .......... هزت راسها بطيب ............. ابتسم لها وهو بقول شو هالحوار الى بكون بكلام منى واشاره منك ..............ابتسمت لها بخجل وقالت حاضر دكتور ............... شو هاى دكتور .. انا هلأ سامر وبس ............ هزت راسها بطيب ..... وقف سامر وهو بقول يالله انا بستأذن اكيد عندك مرضى مابدى اعطلك .............. وقفت لميا وهى بتقول ... شكرا على الغدا دكت.. سامر ........... ابتسم لها بود وهو بقول ... ولو مافى شى من واجبك صحه وعافيه على قلبك ... يالله السلام عليكم ............... وعليكم السلام ....... رمت نفسها على الكرسى وعقلها رايح مع سامر ... ماتخيلت بحياتها تقابل رجال بهالأحترام وهاللطف .. وارتاح قلبها زياده لفكرة الأرتباط فيه
*******
رفعت راسها لما شافت فنجان القهوه بينحط على مكتبها .... ابتسم لها اياد وهو بقول .. هدنه شو رايك؟................ هدنة لشو؟................... يعنى صال لنا اسبوعين على شد ورخى و عصبيه .. اذا حنبقى هيك ما حنعرف نكمل المشروع شو رايك نصل لحل وسط منشان نقدر نكمل وكل واحد يكون مرتاح من التانى ............ اخدت الفنجان و شربت منه شوى قبل ماتقول .. اول شى مالك دخل وين بروح ومتى بجى ................. ابتسم لها وهو بقول وانت لا تسألينى مع مين بحكى ................ ماعلقت على كلامه بقيت تطلع فيه من طرف عينها وهى تقول ... تانى شى مابسمح تجيب مين مابدك للشركه من غير ما تستشيرنى هاى شركتى بالأول وبالأخر وانا بقول ممكن وما ممكن ................. وانت لا توقفى على كل طلب بطلبه منشان ما اضطر اجيب موظفينى لعندك ................ وقفت وهى بتقول بحده ... ثالثا مابصير كل ما بقول راى او بعرض فكره بتطلب دراستها و بتحولها لفريقك بشركة بلا حدود ................. وانت لا تتحسسى من ارائي المخالفه لوجهات نظرك ............ شاورتله بأصبعها وهى بتقول بحده .. انت شايفنى اقل منك لأنى مراه وبتشكك بقراراتى ونسيت انى بدير هالشركه الى من انجح الشركات بالبلد من اكتر من 7 سنوات ............... بهدوء رد عليها.. يعنى لازم اقول لك حاضر على كل كلمه بتقوليها منشان ابين انى نصير للمرأه وانى بشوفك ند الى .. فتحى مخك شوى تميم ................ هديت شوى وهى بتقول لا ماقصدى هيك .. انا كل الى بطالب فيه انك ما تستغل نصيبك الأكبر منشان تجبرنى على قرارات مابدى اياها ........ اطلع فيها بجديه وهو بقول موافقك على شرط انك ما تتوترى من كل حركه وكل كلمه بتطلع منى ......... صارت تاكل بشفتها وهى تطلع فيه .. توترى بروح لما بنتصر على الحرب الى بداخلى .. وجودك بالمكتب معى عامل لى ازمه ومشتت تفكيرى .. اسبوعين وكل اليقظه والمنام عنك .. وعيونك رح تذبحنى قبل ما افهم شو بتقول ........... سمعته بيقول وشغله تانيه .. وقفى اكل بشفايفك رح تخلصيهم ............... اخدت نفس وهى بتحاول تتجاهل الأحاسيس الى بداخلها و تسيطر عليها وتغلفها بالقوه الى بتغلف فيها كل تصرفاتها ... مدت ايدها بثقه وهى بتقول ... شركاء ........... اخد ايدها وهو ببتسم ..... شركاء .........
***********
دكتور دكتور عماد ..... التفت عماد اول ماسمع صوة مياس بيناديه .. ابتسم وهو بقول .. نعم انسه مياس ......... قربت لعنده بسرعه وهى بتقول بخجل تفضل دكتور ........ اخد عماد الكرت الى ناولته اياه وفتحه .... ابتسم وهو بقول .. بعتذر صعب احضر ........... قالت بدلع لالا دكتور ارجوك معقوله مابدك تحضر عيد ميلادى والله بزعل ............ رد عليها وهو بقاوم نظرت عيونها الى بتدوبه بدلعها و برائتها مع بعض .. مشغول كتير يا انسه مياس ولو كان عندى وقت مارح اقصر ........ مسكت ايده وهى بتقول بطفوله ... الله يخليك دكتور عماد والله بهمنى وجودك كتير انت مو رح تهدينى لعيد ميلادى خلص خلى الهديه حضورك للحفله .. الله يخليك ...............جاوبها وهو متوتر من لمست ايدها .. بوعدك انى احاول ........... ابتسمت له بمرح خلص انت وعدت وانا بأنتظارك يالله باى ..... ومشيت وهى فرحانه بأنتصارها ....
سألت لميا وهى بتفك اللفافات من شعرها .. بعدين ماقلتى اذا حتحضر ريم ولا لأ ........... ما اعتقد حتحتض بعد ما عرفة جو الحفله ......... التفتت لها مياس وهى بتقول بأستغراب شبه جو الحفله .. بجنن كله مرح و رقص و ضحك والله رح ننبسط كتير ............ مياس .. سامر وريم من مجتمع مختلف عنا يعنى مابتقبلو كل هالهيصه الى عاملتيها ........ التفتت للمرايه منشان تكمل ترتيب شعرها .. الله يعينك يا لميا بتطلعى من حفره بتقعى بتانيه يعنى من تحكم معن لا تحكم سامر ............... لا ما اعتقد سامر متل معن .. سرحت بصورته وهى بتقول سامر متزن و هادى انت لو شفتيه كيف بحكى مع ريم او الممرضات .. انسان محترم كتير ما اعتقد بغلط ابدا ........... ضحكت مياس لكان يحظك اخدتى ملاك ههه ........ ابتسمت لها لميا لا انسان مو ملاك ..... قربت منشان تساعد مياس بشعراتها و عقلها مشغول بالفكره الى حطتها براسها .. معقول سامر متحكم كمان ... معقول الأمل الى حسته قريب يطلع كابوس تانى ..... الله يستر .. الله يسامحك يا مياس على الفكره الى حطيتيها براسى ......
بدا الناس بالوصول .. الكل مستغرب من كبر الحفله الى عملتها مياس لعيد ميلادها ..21 رقم مصيرى بحياتى ... هيك كانت ترد عالكل وهى تضحك ........... اول ماشافت الدكتور عماد بسلم على ابوها ركضت لعنده بمرح و هى بتقول وعدت ووفيت دكتور اهلا فيك والله كتير فرحت بحضورك .. بابا الدكتور عماد الى خبرتك عنه .. ساعدنى كتير بدروسه الخاصه الى كان يعطينى اياها ................. اهلا فيك دكتور عماد وشكرا لمساعدتك واهتمامك بمياس ............ اهلا فيك سيد ............... ابو فراس ............. والنعم منكم .. التفت لمياس وهو بقول بموده الانسه مياس ذكيه كتير بس بتمنى تولى دراستها مزيد من الأهتمام و الوقت .............. والله يادكتور انا دائما بقول لها نفس الشى بس هى مابتسمع رايح راسها بالسوق .............. مسكت عماد من ايده وهى بتقول يالله حتى بعيد ميلادى حكى على الدراسه بابا الله يخليك لا تخربلى الحفله ........... وشدت عماد وهى بتقول تفضل دكتور خلينى اعرفك على الموجودين ......... استجاب عماد لها ومشى معها وصار يسلم على الناس الى عرفته عليهم ........... بعد فتره .... انسه مياس خلص بكفى انا لازم امشى .... التفتت له مياس وعيونها مستغربه من طلبه .. ليش بكير كتير تمشى هلأ والله بزعل .............. سدقينى عندى شغل .. تناول من جيبه علبه و اعطاها اياها .... تفضلى .. كل سنه وانت سالمه ................ اخدت مياس منه العلبه و بسرعه رجعتها لجيب جاكتيه الداخلى وهى بتحط ايدها بنعومه على صدره وبتقول بصوت ناعم وعيونها بعيونه مابدى .. انا قلت لك وجودك هو هديتى وبعدين الله يخليك بس شوى كمان لحتى اطفى الشموع ......... تنهد عماد وهو بحاول يسيطر على نفسه من لمسة ايدها .... انسه مياس ............. قاطعته بلا انسه خليها مياس احلى .......... اطلع فيها يتأمل وجهها وعيونها الى ساحرينه قبل مايقول بصوت كأنه همس ... مياس ............ بصوت ناعم بدوب الصخر ردت عليه .. آمر ............. مشاعر قويه تحركت ناحيتها وهو بحاول يسيطر عليها منشان ما يتهور ... خلص ببقى شوى كمان ........ لسى مافتحت تمها لترد عليه الا بصوت المسجله بعلى و صاحباتها بشدوها وبربطو خصرها منشان ترقص ... وطبعا مياس روح قلبها انها تكون محط الأنظار .. غمزت لعماد قبل ما تبدا ترقص ......... عيونه ما غادرت جسمها الى بتمايل وبهز على نغمات الغنيه ...... حس كأن الصاله فضيت و مابقى فيها الا مياس الى بترقص بأغراء مستحيل ما يلفت انتباه الحاضرين ... كأن الصمت عم الغرفه الا من صوة خلخالها الى كان بحرك مشاعره ومع كل رنه يرن معه قلبه ... حاول يهدى انفاسه المتسارعه وهو بتخيل جسمها الى متخبى تحت فستانها القصير .... وفجئه تلخبطت كل المشاعر الحلوه هاى وهو بشوف ابن عمها لؤى بدخل على الرقصه و بمسكها من خصرها وبقربها منه ... حس بغضب و غيره كبير بيملى قلبه وهو بشوف ايداه للؤى بتتحرك براحه على ظهرها المكشوف ...... ضم قبضة ايداه بشده وهو بحاول يمسك نفسه منشان مايهاجم لؤى و يبعده عن مياس .... التفت بسرعه وتوجه لأبو فراس و سلم عليه واعتذر انه عنده شغل وبعدها طلع بسرعه .... اول ما خطى برا البيت سمع صوت خلخال مياس مع صوتها بتنده له دكتور عماد وين رايح انت وعدت ما تروح لحتى تشوفنى اطفى الشموع ........... وقف وهو بشوفها بتركض لناحيته ووقفت وعلى وجها علامات الزعل ......... معليش انس .. مياس سدقينى عندى شغل ......... مسكت ايده بأيديها التنتين وهى بتقول وعيونها بعيونها .... دكتور عماد بترجاك ... لا تروح بهمنى كتير وجودك معى اليوم ............ احتار بعيونها والرسائل الى بتحاول توصله اياها من نظراتها .. ياترى انا فهمان صح .. والى بشوفه فى عيونها صح .......... حست مياس بلخبطته فحطت ايده على قلبها وهى بتقول بهمس وعيونها بتلمع من الدموع المتجمعه فيها ... عماد بترجاك تفهم انك بتهمنى ................... كلشى صار واضح وضوح الشمس هلأ بعد تصريحها هدا .. ماعرف كيف يتصرف ولا كيف يشعر كل الى بعرفه ان المشاعر صارت تركض تتوزع و تدغدغ كل خلايا جسمه لحتى فجئه نطق .... بتتزوجينى مياس؟......
********
بالمرات الى زارها فيها سامر بعيادتها وضح لها عدت شغلات بتهمه كتير الأولى انها رح تسكن معه بنفس البيت الى ساكن فيه هلأ مع اخته ريم ووضح لها انه مهما صار مستحيل يبعد عن ريم الا اذا راحت لبيت زوجها .. طبعا الموضع هدا ما كان مشكله الها ابدا ..... كمان وضح لها انه بحب تكون محتشمه بلبسها و انه معجب هلأ بطريقة لبسها وتعاملها مع الناس بس مع هيك بهمه انها تهتم بالموضوع هدا زياده منشان يرتاح وماتصير مشاكل من ناحية اللبس .. وطبعا تفهمت طلبه و بينت له انها بتفضل هالشى و اذا فى شى زاعجه من لبسها هى رح تتقبل وجهة نظره و تحاول ترضيه بالناحيه هاى ... كمان طلب منها ان حفلة زواجهم ماتكون مختلطه .. وان اغلب التجمعات الإجتماعيه الى حيروحوها ماتكون هيك الا اذا اضطروا فمافى مانع .... وبهى كمان قالت له لميا انها رح تحاول جهدها تنفذ طلبه بس لازم تخبر اهلها بطلبه منشان يجهزو حالهم ......... استغربت كتير لما سألها ... ماعندك شى بدك تستفسرى عنه منى .............. قالت له بارتباك .. بلى ............ طيب تفضلى شو بتستنى ! .......... اطلعت فيه وهى بتاكل بشفتها بتوتر قبل ماتسأل .... انت حتجبرنى على شى ؟ .............. متل شو يعنى ؟ ................. متل الحجاب ........ ابتسم لها وقال لا مارح اجبرك على شى لا حجاب ولا غيره كلشى بينا حيكون بالتفاهم ..واذا ماتفاهمنا .. مره بتمشيلى ومره بمشيلك منشان الحياة تستمر ........... عجبتها كتير فكرته .......... طيب بس باقى شغله وحده حابه اسألك عليها ............. قدم جسمه للامام شوى و قال بأهتمام ... شو هي؟................ على بعثتى شو رايك فيها ؟............. رجع سامر تسند وهو بقول برياحه وهدوء .. هدا مستقبلك وانا مستحيل اوقف بطريقك بس لازم نصل لحل وسط بالموضوع .................. يعنى كيف؟ ................ يعنى عندك مانع تأجليها سنه منشان تطلعى انت و ريم سوى ؟ ................ حست بقلبها رح يوقع من فرحتها وقالت بسرعه وهى حاطه ايدها على قلبها .... لا ماعندى مانع ابدا بالعكس هيك احسن من ما اطلع لحالى ................. ابتسم لها وهو بقوم لكن اتفقنا ........ توجه للباب ولحقته لميا منشان تودعه ...... التفت لها قبل مايطلع وقال بجديه .. لميا الحياة اخد وعطى .. اى شى بدك اياه او بكون ببالك اسألينى .. ارجوك لا تترددى اكيد رح نصل لحل يرضى كل الأطراف ....... ابتسمت له بفرح وهى بتقول خلص بوعدك ........ اجى يطلع بس رجع وهو بقول بمرح ..... نسيت لشو جيت هههه .... ناولها بطاقة بنك و عليها ورقه صغيره .............. شو هدا ؟............ ابتسم وهو بقول العرس باقى له شهر و انا فتحت لك حساب بالبنك ونزلت فيه مهرك و زياده منى منشان تشترى كل الى بخاطرك ............... بس انا مابلزمنى .. معى الى بكفينى و اذا بدى شى بابا بعطينى ............ ابتسم لها بموده وهو بقول .. انا بدى اكون مسؤول عنك من هلأ .. ورح افرح كتير اذا استخدمتى الى نزلته بالرصيد منشان تجهزى حالك ... ابتسم له بحيا وهى بتقول خلص تكرم عينك بخلصه كله ............... ضحك سامر على كلامها وهو بقول يالله السلام عليكم ........... وعليكم السلام ...سكرت الباب وراه وهى بتتسند عليه وبتتنهد بفرح ..... يالله معقوله سامر برزانته و طيبته ولطفه حيصير زوجى ....... اخيرا الدنيا حتبتسم لك يا لميا ......
|
09-05-11, 10:50 AM
جديد مواضيع قسم القصص المكتمله
العرض العادي
