كاتب الموضوع :
بياض الصبح
المنتدى :
القصص المكتمله
الجزء العاشر
{.. انكســــــــــــــــار ..}
مــــــــــــــالك
دخلت البيت متأخر..كانت خطواتي متردده..وصلت جناحي ومسكت قبضة الباب..لمحت بطرف عيني..غرفة ساره منوره..دعيت من ربي ما يكون اللي ببالي..فتحت باب جناحي بسرعه .. بسرعه توجهت للغرفه .. مظلمه وبارده .. فتحت النور .. ياالقهر ... طلعت لغرفة ساره .. مسكت مقبض الباب بشويش .. وفتح معاي ..اشششششششوى .... دخلت بتردد .. سمعت صوتها بغرفة مكتب ساره .. مشيت بخوووف .. فتحت الباب .. شفتها منسدحه جنب ولدها على فراش ممدوود ع الارض ..
تسولف عليه : يللا نام ..
رفعت عينها وقوست شفايفها كدليل انها مو راضيه على وقفتي .. شوي وبطل حمودي حركه .. وهي عدلت غطاه و قامت بشويش ...طرا علي الف طاري بقومتها .. ليه منومته لحاله .. وش ناويه عليه .. طلعت وهي تحط يدها على صدري تبعدني عن الباب.. ويدها الثانيه ع مفاتيح اللمبات .. خففت منهم ..وانا والله قلبي بركبي من القلق .. سكرت الباب بشويييييييييييش ..
: ام احمد ..
قاطعتني وهي تناظر الباب ..: اشششش باللهي عليك توه نااام..
: طيب باكلمك شلووون ..
ناظرتني بزعل..ناظرت عيونها وبشرتها اللي صارو باصفى وانقى حالتهم .. شعرها الاسود المتبعثر على اكتافها ويوصل لنص ظهرها .. لمعانه سواده اشياااء تدفعني دااايم اغمر خشمي فيه واشمه وامرر يدي عليه استمتع بنعومته ..مسكت خصله من شعرها وقربت منها..
: اشتقت لك ..
ابعدت بجفاا وقالت وهي تتحرك وتطلع من الجناح : بس انا ما اشتقت لك ولا ابيك
لحقتها .. شفتها جالسه بالصاله المقابله للدرج .. او الموزع للغرف مثل ما نسميه.. جلست جنبها ومسكت يدها
سبقتني بالكلام وهي تسحب يدها : مالك من هاللحظه ما .. لك .. خص فيني ...
وقفت وصارت قبالي : قبل لا تفحمني بفلسفة الدراسات النفسيه عن الطلاق العاطفي وغيره .. احمد وصار ينام لحاله .. وانا نفسي عافتك ..
انا للحين ماسك اعصابي : ليه كذاا تكبرين السالفه يا ام احمد .. استهدي بالكريم وخلينا نتفاهم بهدوووء ..
قربت مني ودنقت علي وهي تركي يديها على ذراع الكنبه وقالت : انت .. انهيت .. كلللللللل .. شي بيننا ...... رميته رميته .........
انفلتت معي فـ مسكتها من عضدها ولفيتها بقوة لين قعدتها .. يديها متكتفات .. وشعرها على وجهها ..لصقت فيها ..قلت بغييييييييض
: ما كااان بيننا شي .. انتي تبين تجننيني..لا تقولين لي اغتصبتني انتي مو بنت بنوت ..
قالت وصوتها ونبرتها تحكي الوثوق : سوها سوها مره ثاااانيه الحين ما عندي شي اخسره ..
: انا مابي منك شي .. ابي زوجه .. بـ ذا ..( اشرت على راسها باصبعي ونقلته لصدرها باتجاه قلبها )..وذاااا
صرخت : بس انا ما ابيك ما ابيك ....
انقهررررررررت منها ... قلت : انتي تفكيرك غبي .. ووو يا الله يا الله نفسي اعرف ليش تتوه عندك حروفي ...
فكيتها وقمت .............دخلت الغرفه ............ طاحت عيني على عطوراتي .. تحبين عطري هاه ... مسكت العلبه اللي كلما تنتهي اشتري منها .. عطر اسمه رويلتي..شميته .. تذكرت لما نامت بحضني.. لما شفتها تحضن ثوبي بسببه .. ابيها تحبني انااااا اناااا.. رميت العطر على الجدار ... ما تأثر صقع بالجدار ونزل ع الارض.....ليه ما انكسرت ....... لييييييييه .......كنت اتنفس بعصبيه ........ضرت الجدار بقبضتي ....... زفرت بقوة ...ااااااااااااااااااااااااااااه يا رب .......صكيت على اسناني بقهر .. اخذت معي المنشفه .. وطلعت .. شفتها على قعدتها ... تعلقت عيني بعينها...شوفي عيني .. افهميني..
انكسرت من الفراق و شوف عينـــي = شوف عيني وانت تدري بـ انكسـاري
كــل ما مديت لوصالك يمينــــــــي = رحت تتجاهل يمينــي مع يســـاري
حتى صرت اشوف جرحك في يديني = في يديني لجور صداتك مـــــــــواري
حس فيها لا بلاها حـــــــس فيني = لا تعبـــرها لكـــن رد اعتبــــــــاري
ويـــن مقفي جــعل منت بـمنتويني = بالجفـــا والخــوف وانــواع العـزاري
يا هلي يا نصف ربعي يا خــــديني = يا مــــواني غــــــربتي يا روح داري
يا شموخي يا انكشــافي يا دفينـــي = يا علــــوي يا بقــائـي يا انحـــداري
يا بداياتي يا مــــائي يا اكسجيني = يا اندثاري يا اعتــــــدالي يا ازدهاري
يا بـــلادت حسي و قـــمة حنيني = يا اختيـــاري لا يا عـشـــواء اختياري
من عرفتك وانت ثـــــالث والديني = واللــجوء اليـــك يعني لك فــــــراري
{ضمني}خل الضــــرر بينك و بيني = الضـــــــرر من ضمتك شي اضطـراري
خل يدينــــــك من الجور تحميني = من جمودي عيشني لين انصهــــــاري
كل ما ضاقت بعينـــــي يا معينـي = ابتسمـــــــت و صار لي ليلي نهـاري
لا حكيت احس بـ اشيـــا تعتريني = ويخشع قلــــــبي و تطرياي طــواري
اعشق حكيك و احفظه يا ضنينــي = حــفــظ ابن تيميه لحكي البخــــاري
لين شيطاني تلفظ كلمتينــــــــــي = ورحت مني ماتبي سمع اعتــــــذاري
لا تبكينــــي و تفرح عاذلــــــيني = لاتخســـــرني بعد كبــــــر انتـصاري
لا تخليني بعد فيضه كنينــــــــي = وانت خابرني على الوصـــل انتـحاري
لا تروح بروحتــــك كــــلٍ يجيني = ماني مكـــابر ولا حتى مــــــــداري
انكسرت من الفراق و شوف عيني = شوف عيني و انت تدري بـ انكساري << سعد علوووش
نزلت عينها وقامت لغرفة ساره .. نزلت بسرعه بسرعه رميت ثوبي ورميت حالي بالمويااا ... اخخخ يا ناار جوووفي من بيطفيك ... حركت يديني بقوة افرغ شحنات قهري ....
لمــــــــــار
طلعت من الغرفه بعدما تأكدت انه نزل .. جلست بالصاله الزجاجيه اراقب تحركاته .. يحرك يديه بسرعه .. الله يستر الجو مقبل على الشتا وهو هذاا حاله .. غطس بالمويااا .. ظل حوال الثلاث دقايق ... شفت هالمنظر .. بس قبل تأثرت فيه خفت عليه .. كان هذاك الوقت ولده يبي حنانه .. حطيت يدي على بطني .. بكيته .. بكيت ولدي .. ولدي اللي طااح بسبة ابوه .. شفته يطلع من المسبح .. فـ رجعت بسرعه رميت حالي ع السرير.. سمعت صوت ولدي .. قمت بسرعه .. رحت له .. نومته مره ثانيه .. المكان تغير عليه واكيد بيظل يفزع .. رجعت الغرفه ونمت بعد ما صليت الفجر...
صحيت كالعاده على اذان الظهر ..صليت .. بدلت ..نزلت .. ولدي يقعد وينزل لحاله ..فاضطر انزله وارد البسه .. طلعت الدرج وانا منزله راسي اهاوش حمود .. واجره غصب .. بالاخير مشى وهو مقوس شفايفه ...
: اخخخ ..
عقدت حواجبي .. ناظرت مالك اللي طالع بيده ملفين تبعثرو اوراقهم على الدرج ...شكله هو الثاني كان مدنق .. ناظرني بسرعه لفيت عنه .. نزلت ألم اوراقه ..
: اسفه ما انتبهت ..
اخذ الاوراق بدون ما يرد .. ما تهمني ردة فعله .. مشيت وانا اسحب حمودي : يللا ماما ..
حمودي تنح وتعلق بمالك : هأأأ بابا ..
: تعال ألبس ورح للي تبيه ..
حمودي : بابا
مالك نزل لمستواه : حبيبي شاااطر يللا روح مع ماما .. يللا حبيبي ..لاااامه..
حمودي مشى بطواعيه وهو يأشر لمالك : لامه بابا ..
انقهررررت منه .. سحبته بسرعه .. دخلته الغرفه .. روشته ولبسته بسرررعه...نزلنا وهو يبكي حتى يده ما خلاني امسكها .. كان ابوي ومالك طالعين يسولفون .. وماشين للباب..التفت مالك .. ونزل نفسه وفتح ايديه بعد ما عطى ابوي الملف.. ابوي مبتسم ..ويناظرون لحمودي .. اول ما نزل للصاله ...ررررركض وحضن مالك ...ناظرني مالك وهو يوقف ..كنت اناظره ببروود .. لفيت على ابوي ابتسمت له ..حوطني بذراعه ...
قال : شلونك يباا ..
: حمدلله تمام .. انت شلون صحتك..
رد : الحمدلله يا رب ..انتي امس خرعتيني عليك ..خفت انه يوجعك شي ..
: لالا يباا ما يوجعني شي بس انا عتبانه عليك .. امييي امييي توقف لا ومن اسبوع .. وانا كل يوم اكلمكم ولا تقولون...
ابوي بابتسامه : هههههه يا ابوووك والله قلنا نسويها مفاجأه وكل ما كلمك واحد مننا قال لك ارجعي وانتي مره مزكمه ومره غدير ومره بندر ... عجزنا عنك سوينا لك اكشن وقلنا مالك تعبان ولا تحركتي ..
استحيت منه : يبااااااا لا تضيع الموضوع .. قلي متى اتدسم الشوارب بهالمناسبه ...
مالك بنبرة غرررريبه : مو لازم نسوي عشااا .. انا اقول نوزع على المساكين افضل ..
ما ناظرته بس أيدت فكرته : فكره حلوه ... احسن بعد دفعت بلاااا...
ابوي يرفع يديه كنه مستسلم : هه اتفقو آل مالك عليا ..
جانا صوت امي وانا اتسعت ابتسامتي يا زين خطوتك ع القاع يمااا : اجيك اناا افزع لك..
: ههههههه يماا هي حرب السالفه ..
امي تحضن ذراع ابوي : مثل ما وافقتي رجالك .. بوافق رجالي ..
: هههههههه طيب يا رجالي تكلم ..
ناظرنا لمالك اللي حتى وجهه متغير .. نزل حمودي وطلع .......
امي لحقته بسرعه ومسكت يده :شفيك تعبااان ليه وجهك كذاا ..
قال بصوت مهزوز : اااا ما في شي تطمني اناا بس تذكرت شغله مهمه .. يباا انا طالع المكتب على طوول طيب ..........
طلع بسرعه ........ ابوي طلع وراه وانا امي ظلينا واقفات شوي قلت لها
: يماا يا زين زولك الله يخليلي يااك يا رب
امي : ههههههههه بنت انا امك مو زوجك تغازليني ... تعالي تعالي ناكل لنا لقمه ذولا مادري متى يردون..
: يللا
عمــــــــر
: يا الله يا ساره االبارح رحتي .. لأ ما في روحه اليوم..
ساره بدلع : حبيبي عشااان خااطري ..
لفيت عنها وانا ارمي قميص البيجاما..: اسف يا قلبي اليوم ما عندي شي بنروح نتمشى مع بعض والا ما تبين ...
حوطتني من ورى بيديها الصغيره وقالت : ياااااي صدق ...
: ههههههه يا بنت ابعدي الحين اطيح ..
تقدمت وطلعت لي غيار جديد وناولتني اياه ..صارت بين الكبت وبيني .. التفت وابتسمت ... قرصت خدها وانا اروح ارمي الغيار ع السرير .. وابدى لبس ..
: وين تبين نروح تحبين مكان معين والا عاااادي..
جلست قبالي لاني لبست خلاص ..وقالت بدلعها المعتاد : كيفك حبيبي اللي تبيه ..
غمزت لها وانا اقعد جنبها : انا ابيك ولو عليا ما اطلع من البيت ما احب اطلع كثييير ..
نزلت راسها وهي تلعب باصابعها : عمـــــــر
مسكت يدها وبستها : عيونه ..
دق جوالي بهالاثناء .. طلعته " نور عيني يتصل "... ميلت ساره علي عشان تشوف مين ..
قالت وهي مبوزه : لازم تغير اسم مالك ...
غمزت لها بضحكه : تغارين من اخوووك..
رفعت حاجبها بدللللع : رد رد قبل لا يقطع ..
:ههههه طييييب ...
" :هلااااا
مالك : سلام
: وعليكم السلام ..
مالك : فاضي ..
: هههههههه اخاف اقولك تسكر بوجهي..
مالك بنرفزه : مو فاضي ... طيب قلي متى تفضى حضرتك ..
: اعصابك اعصابك ... بكره ان شاااء بعد صلاة العصر امرك زين كذاا
مالك : اففففففف ... ان شاااء الله سلام
: هلا بك "
التفت عليها : روحي ألبسي يللا...
قامت تلبس عبايتها على بنطلون جينز وبلوزه وردي ..
قلت بدون رضى : قلبي بتطلعين كذاا
ساره ببراءه : ليه عبايتي فيها شي ..
: يا قلبي ما ابيك تلبسين بناطيل واشيااء مثل كذااا بروحات السوق والاماكن العامه ...
رمت عبايتها بدون نقاش .. وراحت للكبت طلعت تنوره واتجهت للحمام .. لحقتها ومسكت يدها
: سوسو زعلتي..
رفت حواجبها ببراءه وقالت : لالا عاادي بسسس ما احس فيها شي خصوصاً وعبايتي مسكره ..
: مادمتي طعتيني ما راح تنتاقش كثير بدلي بالغرفه انا استناك بالمجلس..
طلعت عنها .. جلست بالمجلس .. وانا ادندن ..يشهد الوجد المصفى بالزلال ان راعي الخير هو دايم سعيد وان اللي يسعى الى الحب الحلال هو على ميثاق من ربه اكيد ...
طلعت ساره علي مثل القمر .. ليلة تمامه ... ابتسمت لها وهي مدت علي ثوبي وهمست : حطيت اغراضك فيه وعطرته ..
: يا بعد عمري ..
بستها على خدها وهمست لها : جيبي لي شماغي وعقالي..
عضت على شفتها باحراج وقالت : ابشر .....
نزلنا عند تسجيلات القادسيه .. تمشينا عند الاشرطه .. خذت شرطان قرآن للقطامي والعجمي .. وانا مديت يدي وعطيتها شريط عبد الولي الاركاني ..
همست : تعرفه صوته حلوو ..
قاطعنا صوت رجال من ورانا : عمر !!
لفيت عليه مستغرب : سم !!!!!!!!!
الرجال يبتسم باحراج : انت المنشد عمر ؟؟
: إي نعم سم اخوي ..
مد يده يصافحني .. صافحته ..قال لي باحراج : اسف ما بغيت احرجك بس حبيت اسلم عليك انا اسمي بدر ااممممم صديق يوسف اخو مالك اللي طلع معك بالمقابله ..
مسكت ساره يدي ورصت عليها ..قلت وانا التفت عنها.. صارت كلها ورى ظهري وقلت باستغراب
: هلا بك .. انت تدري عن يوسف ..
بدر : ايييه دريت بس بعد ايش .. اممممممم بغيتك تقول لمالك لاني والله منحرج منه .. انوو يوسف لما قالهم انه بيروح يعتمر ... كان رااايح السعودي الالماني يتأكد من ان الورم اللي فيه خبيث وحلفني ما اتكلم .. انا ندمان احس لي يد بموته ..
قلت باندفاع : لااااااااااااا يارجال اهو مات حادث مو من الورم ..
قاطعني وقال : لالا سألت الدكاتره وقالو انو واضح انه ميت من الاختناق .. بسبب ضيق التنفس ... انا خايف مالك ما يسامحني ..
: يا رجال استهدي بالله هذا يومه .. ع العموم .. اذا تبي اجمعك بمالك وابوه تقول لهم ...
بدر : اممممم مادري والله ما عندي الشجاعه الكافيه اقابلهم ...
: عطني رقمك وانا اردلك خبر.. هذا اذا تثق فيني ..
بدر: يا ليت والله ... سجل ..*******050
: يالله عن اذنك وان شاااء الله بيننا اتصال ..
بدر: اسف عطلتك .. جيت باشتري شريط لك شفتك .. فرصه سعيده ..
ابتسمت له .. وانا اصافحه مره ثانيه ..مسكت يد ساره وطلعنا نحاسب ما سلمت من المحاسبين .. اللي استلموني ..اناشيدك حلوه متى جديدك ..مبروك الزواج..
ركبنا السياره ..تكلمت ساره : الله يرحمك يا يوسف ..
: آمين يا رب .. امممممممممم قلبو لا تفكرين كثيييير قولي لي وين حابه نروح الحينا ..
ساره :اممممممممم نروح الكورنيش ..
: سرينا ..
مـــــــــــــــــالك
<< الحقيقه مثل النحلة!|! تحمل في جوفها العسل !|!وفي ذنبها إبرة>>
قهرتني ترد على خلق الله كلهم وانا حاقرتني ..طلعت فوق .. شفتها واقفه بالصاله الزجاجيه .. متكتفه شكلها تنتظرني .. اتجهت لها
: السلام ..
ردت وهي تقعد : وعليكم السلام ..تفضل ..
قعدت قبالها وقلت : خير ان شااء الله ..
ابتسمت على جنب وقالت وهي تتقدم بحيث صارت جالسه على طرف الكنبه وسانده باكواعها على ركبها ومشبك ايديها ببعض ..: خير خير... متى تحب اخطب لك..
قلت باستهزئ : يا حلاتك وانتي تقولينها ..
قاطعتني بجديه : اتكلم جد ..
تكلمت بنفس نبرتها :وانا حرمت الحريم على نفسي من عقبك ..
لمار : ما بنُيَ على باطل فهو باطل ...
رديت بتفهم : صحيح .. بس انا مابي اتزوج..
لمار : لا تنتظرني ألين لك .. اللي بيننا كسرته .. بلحظة ...... طييييييش.......
بلعت ريقي بتوتر كنت باقوم بس استوقفتني : يا ريت تظل مكانك .. اذا حااب ان النقاش ينتهي بهدوووء مثل ما بدى فيه ..
غرست اصابعي بشعري وقلت : اسمعيني يا بنت الناس.. اللي باقوله يظل بيني وبينك الين الله يفرجها ...
تنهدت وكملت : انا مابي اتزوج ..لاني ... لاني ...
ناظرتها وانا انزل يدي وامررها على رقبتي وامررها على وجهي ..
عقدت حواجبها وقالت بدون رضى : منت واثق اني احفظ سرك ..
قلت بسرعه : لالا .. بسسسس ..
قمت بسرعه وجلست جنبها .. عدلت جلستها .. تكتفت وهي تتأفف..
نطقت : لمار ..انا.. انا.. مكتفي باحمد ولد .. لاني .. ما اجيب عيال .....
التفت علي بقوة وهي فاتحه عيونها للاخير : ايش ....... يا الله ........
ابتسمت ورجعت اسندت ظهرها للكنبه وابتسامتها تتسع .. تتسع .. بعدها : هههههههههههههه ااااااااه تنرحم يا مالك وربي تنرحم..
: انا ما امزح معك ..
قربت مني وقالت : تدري ليش كنت ابيك واحب عطرك وما امنع قربك ..
ما رديت .....كنت اناظر عيونها ليه هـ الحقد كله عشان ايش .........مسكت يدي وحطتها على بطنها .. ارتبكت من حركتها ..
قالت وعيونها يلمعن نذير للدموع :لان ولدك هو اللي يبيك..ولدك اللي رميته بنفسك..(رصت على يدي اللي على بطنها)..هنا كاان..بس كان يبيك يحب كل شي فيك ..
عطشان .. محروم .. كذا حالتي بعد هالجمله.. (( انتا يا استاز ما فيك تجيب ولاد )).. كان كلمات الدكتور ترن باذني .. امووت بالاطفال وانحرمت منهم احتسبت الاجر باليتيم ولد اخوي .. بس كلامها .. الواقـــــــــــــــــع.. ما قدرت الا اني ..همست بصدمه
: ولدي ؟؟؟!!!؟؟؟!!!...بس انتي ..
قالت بصراخ : بالاول رميتني وسببت لي نزيف .. وبالثانيه....( فترة صمت )... غصبتني.....وحرمتني منه ... انت السبب ... اكرهك اكرهك...
قامت بسرعه .......مسحت على وجهي بتوتر ..
: ولدي ولدي..يعني اناا .. يعني ..
غمضت عيوني . . شفت .. كل شي صاار .. استفراغها بشكل يومي الصبح ... ريحة العطر ... حضني .. قربها مني .. عصبيتها .. غيرتها ..ولدي ولدي ...اااااااااااااااااااه..تذكرت .. اكيد نزفت وشالت الشرشف عشان ما اشوف الدم ..الالم والمغص..كلمتها لحظة طيش طيرت نتايج لحظة ضعف.. حركتها وعذرها ثاني يوم من رميتها .. اتجهت لجناح ساره وفتحت الباب.. سمعت نحيبها ..فتحت باب الغرفه .. شفتها ماسكه بطنها وجالسه على السرير ..قربت منها جلست جنبها ...
لمار : اطلع براا .. لا تخليني اضطر اقفل الباب ..
: ليه ما قلتي لي..
لمار : ليش انت خليته يثبت بالاول ...
: يا روح مالك لا تبكين ..
حطت ايديها على اذانها وصرخت : ابعد عني يا مالك لا تذبحني اكثر .........
مسكت ايديها وشديتها لصدري وضميتها : كذا يا لمار وثقتي العهد ..
ضربتني على صدري : اطلع من راسي اطلع ...
كنت محتاجها .. احس اني ضعيف بدونها ... همست لها وانا ابعدها وامسح دموعها
: تكفين آخر طلب..ضميني ..
وقفت قدامها وقومتها ... ضميتها بكل حاجتي بكل ضعفي ........حسيت بدموعها تبلل صدري .. خليني اسحب همك اذا انتي ما سحبتي همي ... ضميتها بحنان ...
همست : ابكي عني وعنك .. دموعي متمردات .. كل شي متمرد علي حتى انتي ...
ابعدتها ومسحت دموعها وحضنت وجهها بايدي وبستها على جبينها ... ورجعت حطيت راسها على صدري ......بس هي ابعدت ...مسحت على شعرها وهي تناظرني .....
لمـــــــــار
ارتبكت من حركته .. حسيته رح يتمادى ... نزلت مني دمعة خوف .. مسحها قبل لا تكمل طريقها على خدي ..
همس : ادري وجودي يزعجك .. بس وجودك يريحني .. عن اذنك ..
ما وصل الباب وانا رميت حالي ع السرير .. وبكيييييييييييييت بكيييييييييت ......اكيد رح تكون حياتنا مختلفه .. لانه هو مختلف بس هو رمى ولدي .. ولدي ااااااااه..حسيت بيده تمسح على ظهري... بعدها جلس جنبي وحاول يقومني ...
: اتررررركني يا مالك ........ ارحمنييييييي خلااااااااااااص مو متحمله تصرفاتك...........
طلع ............ما حسيت بنفسي الا مع الاذان ......... صحيت وصليت ... انتظرت لين طلع للدوام ... ودخلت الغرفه برتبها ...واضح لي انه نايم بمكاني اول ... مخدة حمودي مايله شكله حاضنها ... رتبت الغرفه بسرعه..هويتها ... شلت الخداديات والثوب والبيجاما .....طاحت عيني على عطره ... شلته من الارض حطيته ع التسريحه .. طلعت للمكتب رتبته وهويته...غرفة القعده .. رتبتها .. سكرت اللاب توب وشبكته بالشاحن ... طلعت..
رحت غرفة ساره وحطيت راسي ع المخده ... من هي اللي تصلح لمالك ... ظليت افكر افكر .... ما حسيت بعمري الا مع اذان الظهر .... قمت بسرعه .. صليت .. شفت ولدي توه قاعد .. غيرت له وراح تحت .. اخذت دش سريع .. لبست بنطلون اسود وقميص بيج عليه كلام بالاسود بكم قصير .. شعري مفتوح كالعاده بس طوقته عشان يرجع ورى لاني باسوي الغدااا.. اخذت معاي بكله وربطتها على معصمي ..
نزلت .. شفت امي بالمطبخ .. سوت الغداا .. وانا معها .. صار وقت الغداا .. جاا عمي وبعد ربع ساعه سمعنا صوت الباب.. راح حمودي يركض .. وشوي ودخل مالك شايله يسولف عليه .. نزله على الكرسي المخصص له جنبي ..وجلس .. صار جالس عن يساري..وحمودي عن يميني..وامي قباله وابوي على راس الطاوله ...حبست انفاسي لما ميل علي
همس : فرغي المجلس العصر بتجي غرفة حمود ..
همست له : ليش مكلف على عمرك ما يحتاج ..
رد علي بنفس النبره : احمد ولدي مو معقول يظل يتوسد الارض وانا راسي يشم الهواا ..
: هه ولدك .. ولدك راح ...
رمى الملعقه وقام بسرعه .. امي تناديه ولا رد ...
قلت لها :يماا خليه يقول ماكل براا
امي مو راضيه بس كملت اكل ... حسيت ان الاكل ماله طعم يا غبائي ليه قلت كذااا .. والا احسسسسسسن خله يذوق ....خلصو اكل اشرفت ع الشغل وسويت شاي..حطيته بغرفة الجلوس ورحت فوق ... فتحت المنتدى وقريت قصايده الاخيره كلها عن الشوق ..قمت فتحت المكتب .. وشلون ارتبه شلت الفرشه وحطيتها على السرير.. الغرفه طويله وفيها مكتب وثلاث كنبات متفرقات .. شوي وسمعت طق ع الباب ..فتحت الباب وانا واقفه وراه ..
دخل مالك وناظرني بعتب : السلام ..
: وعليكم السلام..
قرب مني ومسك ذراعي صراحه خفت ..قال : هدي هدي بس كنت باقولك انا ما كنت ادري ولو اني دريت مصير هالنطفه ما يكمل نموها..
نزلو دموعي وقاطعته : بس انت انت ما حسيت باللي انا حسيت فيه ما شفته ما تحسسه مثلي ..تدري كان ولد .. ذكر .. كان يحبك مثل حمودي .. لالا اكثر اكثر يبي يحضنك ويشم عطرك حتى وهو ببطني ..
مسح دموعي وانا اتكلم وقال : تكفين خلاص لا تعذبيني اكثر .. اممممممم ابي اشوف غرفة حمودي..
: رح شفها ..
اتجه لها ورحت وراه .. ظل واقف عند الباب ...... كان لابس بنطلون اسود وقميص اسود عليها كتابات بالابيض من قدام ..ولابس كاب اسود .. مبين لون بشرته بصفااء رائع .. لف علي وابتسم .. ابتسمت له ببروود ..
قال وهو يقلب الكاب ويخلي الجزء الظاهر على ورى: اول كنتي تتصنعين البرود والحين البرود لابسك لبس..
ما رديت عليه .. تكيت ع الجدار وراي وتكتفت .. سرحت بوجهه... شفته يتقدم لي .. رفعت رجلي وتكيتها على الجدار وراي .. احس انو وقفتي وقفة عرابجه ..وقف قدامي وصار قبالي ما بين وبينه الا خطوتين .. حرك رجله وضرب ركبتي بركبته نزلت رجلي وهو يسند بكفه على الجدار ... ارتبكت ..
: مالك!!!!!
قرب مني وغمر وجهه بشعري وهمس وهو يتكي بيده الثانيه يعني حاصرني : بنفسي اعبر لك عن شوقي ...
دفيته بس ما نجحت الا بانه ابعد وجهه عني وقال : شفيك مو مسوي لك شي..
قلت بنرفزه : لا تقرب لي ...
قال بتأكيد وهو يمرر اصبعه برقه على خدي: مو مسوي لك شي شفييييك..
قلت بخوف وربكه وانا ابعد يده : مالك ..
بلعت ريقي بخوف .. يعني لو قرب اتوقع اني راح اتفاعل معاه خصوصاً اني متضايقه ...ابتسم لي وهش على خشمي برقه بنفس الحركه اللي يسويها لساره .. قرب مني وسوى حركه قهرتني .. مديت يدي باعطيه كف بس مسك يدي .. ولفها .. صرت معطيتها ظهري..صحيح انه ما عورني بس من الخوف احس كل خلاياي تشنجت ..
همس باذني من بين اسنانه : لالا يا حلوه مو كل مره تصفعيني و اسكت لك .. تمام كذاا وضحت الامور ..
باسني على خدي بقوة وطلع ......مسحت وجهي بقوة ....... اكرهك اكرهك............دخلت الغرفه قعدت ع السرير.. شوي ودخل حمودي ..
حمودي : ماما بابا ابيييك<< بابا يبيك
قلت بملل : لاااااه وش يبي
حمودي : بابا غفه<< غرفه..
: وشو ماما ..
حمودي يحرك يديه يشرح : بابا ابيك غفه ...
قربت وحضنته بقوة ...بوسته بقوة على خدوده الورديه .. شلته وانا حاضنته وهو صار يتدلع عليا .. صار وجهي بوجه حمود... طلعت وانا ابوسه ..
: يا ربي يدنن .. وسو ماما ..
حمودي يتدلع : ماما ..
: يا حياتي يا عمري يا كلي يا عيوني ..
حسيت بايدين تمسك ذراعي ..ميلت شفت مالك اللي قال : جو العمال ادخلي داخل ..
حركت يدي بانزعاج التفت عنه وقلت : انا بروح المجلس تحت ...
رد بتهكم واضح : يكون احسن مدام ......
نزلت مع حمودي وصرنا نلعب .. وحنا نسمع اصوات العمال والخشب ومره صوت مالك ... بعد ساعتين اذن العصر ... وجات امي
امي : شـ صاير شـ هـ اللجه ..
: ما في شي يماا مالك شرى غرفه لحمود وبنحطها بمكتب ساره لاني عودته خلص ينام لحاله ..
امي : اييييي بتصيرون عرسان رسمي
استحييت منها دنقت على ولدي وكملت معه لعب... شويات ودخل ابوي ..
ابوي : تعالن شفنها ..
قمنا وانا شايله حمودي ..وصرت ارميه فوق واقول
: عنده غرفه حلوه تبيره تبيره..
شوي ومالك يناديه : حمووودي
نزلته وقلت كني مستعجله : بابا...بابا
تنح حمود .. قمت اسوي حالي بروح قبله .. وراح يركض.. دخلت لغرفة حمودي ...
:واااااااااااو روووعه ...
كانت غرفة اطفال بمعنى الكلمه يعني اغرررراء للنوم مو بس نووم..
دخل مالك وقال وهو ينزل حمودي : ها شلون عجبتكم..
حضنت ذراعه وقلت : تجنن تجنن يعطيك العافيه وين الكنب ..
ناظرته .. شفته يناظرني بابتسامه واستغراب .. قال:خلاص بعته خليتهم ياخذونه معهم ...
طلع ابوي وهو يضحك على تصرفاتي وامي تتفحص الغرفه .. قمت وسويت حاجه عشان اقهره ... رفعت نفسي وبسته على خده ...
: مشكووووور مشكوووووووور
امي تناظرنا بضحكه : اقول اركدي كل هذا انكم بتنامون لحالكم شكله غاثكم ..
طاااح وجهي .. تركت يده ونزلت راسي ........سمعت ضحكته تتردد باذني مثل الاجراس .....سمعت صوت الباب .. رفعت راسي ما لقيت غيره وين حمودي وامي ...
جلس ع السرير ..قال والابتسامه ما زالت على شفايفه : عجبتك ..
رجعت اتكلم ببرود : حلوه يعطيك العافيه ......
قال لي : توك تبوسين وتضحكين ما في احسن منك ..
: تبيني ابين لاهلي اننا مو متفقين نو واااي ......
قال بصدمه : كل هالفرحه تمثييييييييييل ....
: لا والله الفرحه صدق بس الاضافات انت تعرفها ....... عن اذنك .....
بالليل
ســـــــــــــــــاره
: ليه طيب خذني معك ..
عمر وهو يسكر ازارير بيجامته : يا قلبي يا روحي يا عيوني انا رايح مع الفرقه يعني شغل مو لعب..
تخصرت : ليه الروحه معي لعب ..
رد بضجر : سوسو بعد روحي انتي ..كوب عصير توت انا عند التلفزيون..
طلع لحقته بسرعه ووقفت بينه وبين التلفزيون ..
قلت بدلع : اهون عليك حبيبي تتركني بلحالي..
قال بابتسامه : لا والله بس شـ اسوي شغل السالفه شغل ..
: طيب لا تروح خلهم يروحون لحالهم..
رد وهو يتنهد : يا قلبي انتي يا روحي ..روحي جيبي عصير والا اي شي بـ بلل ريقي ..تعباااااااااان..
: نو . نو . بالاول بطل تروح معهم ...
عقد حواجبه وصار يهز رجله ويناظرني بغضب ..........ظلينا ساكتين شويات ......
قال بهدوووء..: مادام النفس عليك طيبه ... تحركي ....
مسكت بطني من الخوف .. شكله يا مامي يخووووووووف .. رحت بسرعه وصبيت كوب توت وكوب مويا وحطيتهم بصينيه ورجعت حطيتهم عنده ..ما مد يده و لاتحرك...خفت خفت ......... صار بطني يوجعني اكثر ..... يا رب بس ما يصير بحملي شي... كان عاقد حواجبه ويناظر التلفزيون على قناة المجد الوثائقيه والمشكله الصوت مكتوم...
: عمر ما..............
قاطعني بعصبيه : اششش.....
اخ يا بطني ... حوطتها بذراعي ... اه توجعني بقوة .... عقدت حواحبي من الالم .... رفع عينه وناظرني ..
قال بنفس النبره : شفيك..
: ما في شي..
رحت الغرفه وجلست ع الارض ..... اه يا بطني ...... عضيت على اصبعي من الوجع وصدرت مني اهات خفيفه ...... شوي وسمعت خطواته على الرخام ...قمت بسرعه وجلست على الاريكه تبع السرير ...
دخل بنفس النظره وقال :شـ عندك هنا .. بك شي...
نزلو دموعي مو قادره اتحمل ..قرب مني والاهتمام بان على وجهه ..لمني من كتوفي وقال : عمري اش يوجعك..
اسندت راسي لكتفه وهمست : بطني........
حط يده على بطني وبدى يقرى عليا ... ارتخيت ... يا حلاة صوته ..... عدل جلسته وقال لي : سوسو بعد روحي انتي بعد قلبي .. انا رايح ثلاث ايام بس مو مطووول ان شااء الله .. عمري اسمعيني وافهميني .. ادري انك ما تبين اروح ولا انا والله ودي اروح عنك بس الظروف .. امممم في عشرة الالف في الصندوق بالغرفه لااحتجتي شي وو الفيزا كارد وكرت البنك معك ..
مسك يدي وحضنها بيديه الثنتين ..وهمس لي : محتاجه شي ناقصك شي .. توصين على شي من جده.
قلت بدون رضى ودلع : سلامتك ...
قال لي وهو يقرص خدي : ثاني مره لاصرت تعبان لا تناقشيني طيب..
قمت وقفت وتكتفت وعطيته ظهري : حاضر اوامر ثانيه ..
لمني من ورى وهمس باذني : لاتعطيني ظهرك مره ثانيه ... ووو جيعان سوي لي حاجه خفيفه اتسممها قبل لا انخمد...
حرك يديه بيفكهم بس مسكتهم ولصقت فيه : لاتقول عن حالك كذاا مره ثانيه ..
باسني على كتفي وقال : يللا جوعاااااااااان..
: خسى الجوع حبيبي..
فكني وتعداني......... رحت المطبخ ..سويت شااي وحضرت له من الخفايف الموجوده ع قولة ( اللي قال) بيض وطماط ...اكل وشبع...راح يغسل ايديه وانا رحت اغسل المواعين.. خلصت ورحت له ما لقيته بالمجلس طفيت النور والتلفزيون ورحت ..غرفتنا ...شكله نام ... تمددت جنبه وعطيته ظهري عشان انام على جنبي الايمن..ماحسيت الا بيده تلفني وتجرني .... عورني عقدت حواجبي بدلع وعصبيه
: عمـــر عورتني...
حضني وهو مغمض عيونه وقال : قلت لك لا تعطيني ظهرك ...احبك ....
دفنت وجهي بصدره... اموت فيك يا عمر الله يخليك لي ان شااء الله .... يعجبني كل شي فيك .... عيونه السود الواسعه شفايفه بياضه خشمه الطويل ... بعد عمري وسيم وجذاب ...وأخلاقه الحلوه عصبيته ضحكه خوفه علي أحبه
همست له : حبيبي نمت ...
ما رد اكيد نام... لفيت عنه وانا حريصه انو يده ما تبعد عني ... عطيته ظهري وقريت الاذكار ونمت بسرررررررعه ........
صحيت على همسات خفيفه .. فتحت عيوني بصعوبه ...شفت عمر ..ابتسمت له ... رجعت غمضت رجع يناديني اكيد صلاه ...جلست وانا نص نايمه ..قلت
: اذن الفجر ؟؟...
قال لي وهو يلبس ثوبه : لأ انا بروح أأذن ... قومي لا تفوتك الصلاه ...
قمت توضيت ولبست جلالي .. قريت قرآن وانا يا الله يا الله مفتحه عيوني ....شوي وسمعت صوته ...
الله اكبر الله اكبر الله اكبر الله اكبر
اشهد ان لااله الا الله اشهد ان لا اله الا الله
اشهد ان محمداً رسول الله اشهد ان محمداً رسول الله
حي على الصلاه حي على الصلاه
حي على الفلاح حي على الفلاح
الصلاة خير من النوم
الصلاة خير من النوم
الله اكبر الله اكبر
لا اله الا الله
دق جوالي ورحت له بسرعه ..." عمري يتصل " ...
" هلا حبيبي
عمر بصوت واطي : قاعده..
: إي ما نمت ..
عمر : زين سلام ..
: سلام "
بوست الجوال ... احبه احبه ... تسننت وصليت ... رجعت انسدحت .... ما حسيت بعمري الا و عمر يصحيني ...
عمر: ساره ساره ...
فتحت عيوني بكسل وابتسمت بس هو معصب ..عدلت جلستي وناظرت الساعه ...الصلاه .....قمت بسرعه وصليت .......لفيت عليه وبلعت ريقي ...
قال بنرفزه : كل يوم اجي نايمه نايمه وبعدين شلون اتسمم انااااااا.........
: حبيبي والله مو بيدي .. نومي صاير ثقيل ... امي قالت لي من الحمل ....
قال بنفس النبره : الحين بالله عليك شـ اتسمم انا ؟ عيشه تقصر العمر.....
كتمت عبرتي .... وانا اشوف نظراته الناريه اللي موجهها لوجهي ... نزلت راسي وانا الملم حالي وقلت
: عطيني ربــ..........
صرخ علي ... فتلقائي نزلت دمعه حااره على خدي وانا ارجع ورى : مابي منك شي... جهزتي شنطتي...
ما رديت .. حوطت بطني بذراعي .. ولصقت بالجدار... قرب مني وملامحه تبدلت بسرعه ..قال : ساره شـ فيك ...
: بطني بطني ...الحين اسوي لك اللي تبي تكفى لا تعصب ...
قال وهو يتنهد : لا حول ولا قوة الا بالله .. استغفر الله يارب.. روحي بدلي وألبسي عباتك بنروح نتغدى بمطعم ........
: مو زعلان مني ...
قال وهو يسحب شماغه من على الكنبه : اكذب عليك ان قلت لك مو زعلان ، الا زعلان يا الله ألبسي بسرعه ...
جلست على السرير ودموعي ينزلوا ...شوي وسمعت صوته : بسرعه مت من الجوع ...
طلعت عليه وفتح عيونه للاخير : ليش ما لبستي...
قلت له بخوف : روح انت اتغدى انا مابي..
ضرب الطاوله بيده وهو يسحب المفاتيح .. طلع ورزع الباب وراه .......رتبت البيت بسرعه وطلعت شنطته وحطيت اغراضه .. وطلعت شنطه صغيره وحطيت فيها كم لبس لي واغراضي الخاصه .. وحطيتها على جنب ..فتحت المويا ع الغساله..سويت كيكه وحطيتها بالفرن... رجعت للغساله وسكرت المويا حطيت تايد واريال .. حطيت ملابس عمر البيضاا.. وعزلت الملون عن غيره .. رجعت للفرن وطلعت الكيكه ...خلصت شغلي وهو ما رد ... فرصه بعد .. تروشت ولبست لي فستان قصير ناعم ... كرشي بدت تطلع رغم اني ببدايةالشهر الثالث ... حطيت كحل وقلوس والا بفتحت الباب .. مشطت شعري ولميت نصه على ورى وخليت بعض الخصل المتمرده على وجهي ..طلعت من الغرفه وهو طلع من المطبخ .... اول ما شافني ابتسم .. بس رجع عقد حواجبه بزعل وراح المجلس ...رحت المطبخ .. جايب غداا ...رحت له ووقفت عند الباب ..لاحظت انه يتجنب يناظرني ..
قلت بزعل : تغديت ؟...
رد بتحفظ : تغديت ...
: تشرب شي..
عمر : لا شكراً .. جهزتي شنطتي ..
جلست جنبه وحضنت ذراعه ..ما عطاني وجه ... احس اعصابي انفلتت ... مسكت يده وصرت ألعب باصابعه .. صار يناظرني بطرف عينه ...
قال بتهكم : عجبتك ..
قلت بدلع : إي مره عاجبتي ...
عمر بدون نفس : خذيها لك ...
ميلت عليه بدلع وزودته حبتين : ابي صاحبها بعد ...
تنهد ولف عني.. لفيت وجهه ولصقت فيه وقلت بدلع
: عمررري لا تزعل مني كل من ولدك ...
رفع حواجبه وقال وهو كاتم ابتسامته بشكل واضح : انتي كل شي تحطينه بولدي المسكين ...
عقدت حواجبي وبوزت : عمـــــر ..
عمر و انفلتت منه : يا عيون عمر ......
:ههههههههههههه لا حول ولا قوة الا بالله العلي العظيم ......
ضحك عمر على ضحكتي وقال وهو يقرص خدي : يالعوبا قدرتي علي..
: لاني احبك ...
رفع حواجبه بضحكه ..وميل علي ويسحب يدي اللي ماسكه يده ويتأبطها ... : احبببك ..
ابتسمت بدلع .. وحطيت راسي على كتفه ..
: عموري .. اممممممم جهزت شنطتك ... عندي سوعال ..
عمر بضحكه : اسعلي ..
: ممممممممم من جهز معك الشقه ..
رد : قصدك الاثاث...
رديت وانا اتكي بفكي على كتفه : ايوه ..
قال : من يعني انا ووو الديوانيه اختارها مالك .. سوسو باقولك شي بس ان سويتي سالفه يا ويلك ...
ابعدت عنه بس هو جرني ولف علي .. وثبتي ع الكنبه.. وقال : امممممممممم المهرجان بالغربيه ... لمدة اسبوع .....
قلت باندفاع : نعععععععععم اسبوع يالظالم ...
قال : والله مو بيدي .. بعدين رح اكون مشغول والا اخذتك معي .......
نزلو دموعي بقهر ...مسحهم لي وانا اعدل جلستي .. ظليت مبوزه ....
عمر : قلبي خلاص لا تزعليني منك بعدين عشان نشتاق لبعض...
: ما احبك....
عمر : هههههههههههههههههههههه يا بعد روحي ...
: تكلمني كل يوم ويا ويلك تنام وما تدق وووووووو نم زين و لاتحضن المخده ولا تنسى ....
قاطعني بضحكه : بس بس بس... هههههههه يا حبني لك والله ......
: تحبني ..
ميل علي : اموت فيك ...
: اجل لا تروح...
عمر يضرب راسه بيده وهو يستند للكنبه : يا لييييييييييييل .........
ثاني يوم
مــــــــــــالك
جلست جنب ساره..وقلت لها
: بسك يا قلبي مو رايح يحارب هو ..
عمر مسح دموعها وهمس لها : خلاص سوسو قطعتي قلبي ...
ناظرت الساعه لازم نطلع الحين.. وقفت وقلت وانا ادنق على راسها وابوسه
: عشان خاطري كفايه دموع .. دلوعتي ما تبين تقعدين عندنا ...
ساره بدلعها : الاااااا بس خلووو عمر هنااااا...
حسيت اني مالي داعي .. فأشرت لعمر اني بالسياره وطلعت ...ركبت سيارتي .. اخذ ربع ساعه وطلع ...ركب جنبي وهو يتنهد ..على طول حركت السيارة ..
: سكتت ..؟؟
عمر بدون نفس : يا اخي تقهههر ...
: افا يا ذاا العلم ...
عمر : لعلمك من امس وانا امهد لها ولو اني داري من قبلها كان ما قصرت بس هي احيان تخربها.. خصوصا انها صايره عصبيه مره وما تبيني ابعد عنها بسبت الحمل ......
سبحان الله .. نفس الاعراض ... عصبيه وتحب عمر ...
عمر : مالك لا تروح بعيد تراك تسوق ..
: خايف على عمرك ...
عمر : الروح غاليه وانا اخوك...
: معك حق ...
شغلت المسجل .. وطلع شريط حن الفؤاد ... انشودة معنى الامل .. بسرعه طفيته ...
عمر : شفييييييك..
: هاا .. لا ولا شي متى ترد ان شااء الله ....
عمر : امممممممم يوم الجمعه ان ربي رااد...
: الله من الاربعا للجمعه ......
عمر : عااد شـ اسوي ..
: انشد...
ضرب عمر كفي بكفه ..وضحكنا مع بعض ..........
عمر : صاير دمك خفيف ...
: قال السماءُ كئيبةً وتجهمـــــــــــا * قُلت ابتسمْ يكفي الـتجهمُ في السماا
قال : الصبا ولى فقلت له : ابتســــم * لن يُرِجع الأســـــفُ الصبا المتصرما
قال التي كانت سمائي في الهـــــــوى * صارت لنفسي في الغـــــــرامِ جهنما
خانت عهودي بعدما ملكتــــــــــهــا * قلي فـ كيــــــــفَ أطيقُ ان اتبسما
قلت ابتسم واطرب فلو قارنتهــــــــــا * قضيت عمركَ كله متــــــــــــألمـااا
قال العدا حولي علت صيحــــــــاتهم * أأسرُّ و الأعداء حولي في الحمــــى ؟
قلت ابتسم لم يطلبوك بـــــــذمهــــم * لو لم تكن منهم أجلَّ وأعظمـــــــــا
قال الليالي جرعتني علقمــــــــــــــا * قلت ابتسم ولئن جُرعت العلقمــــــا
فلعل غيرك ان رآك مرنمــــــــــــــــاً * طرح الكآبة جانباً وترنمـــــــــــــا
اتُراكَ تغنمُ بالتبرمِ دِرهمـــــــــــــــــاً * ام انت تخسرُ بالبشاشةِ مغنمـــــــا
يا صاح لا خطرٌ على شفتيـــــــــك أن * تتلثما والوجه ان يتحطمـــــــــــاا
فاضحك فان الشهب تضحكُ والدجــى * متلاطمٌ ولذا نحب الانجمــــــــاااا
عمر: الله الله تكلم مالك الاحساس...
: هذا لايليا ابو ماضي ...
عمر وهو ينزل من السياره لاننا وصلنا خلاص .: الااا علمت المدام انك مالك الاحساس..
هزيت راسي بلأ ... وصلنا الشباب فهد و حمود و عادل و غانم مدير الفرقه شخص حازم لابعد درجه .. سلمت عليهم ..جلست عندهم الين طارووو ..........
رجعت البيت .. باشوف ساره .. شفتها مبوزه وجالسه عندها لمار .. لابسه تيور جينز وبلوزه احمر نص كم ... يا حلاة الاحمر عليها يجنن ... جلست جنب ساره بعدما سلمت ..
: سوسو قلبي .. حبيبت اخوها زعلانه ...
ساره هزت راسها بايه ... قرصت خدها .. وبستها على راسها ..
: خلاص دلوعتي .. قومي معي بامشيك ...
ساره قامت بزعل ودخلت داخل : مابي....
مديت يدي ع الكنبه وقلت للمار : تكفين لا تخلينها تبكي ... شفيك...
رفعت راسها : هلا .. وشو ..
: يوجعك شي..
هزت راسها بلأ وقامت ...ناديتها : ام احمد
لفت علي وهي تتكتف : نعم ..
: الله ينعم عليك ويرحم والديك .. الحين ساره موجوده شلون ..
ابتسمت على جنب ونزلت عيونها .. وقفت قدامها ورفعت وجهها ..
: خايفه تنامين عندي..
ابعدت يدي وقالت ببرود: قلت لك تنرحم ...
لفت عني ..مسكت ذراعها : انا اللي راحمك واللي خلقك والله وربي اني اقدر اسوي الي ابيه واخليك تمشين مثل مابي بسسسس مابي اغصبك على شي........
زميت شفايفي وطلعت غرفة ساره .. دخلت عليها .. شفتها ممسكه بطنها وتتلوى ع السرير.. بسرعه حضنتها وانا اسمي عليها
: دلوعتي شفيك .......
ساره بين اسنانها : بطني بطنييييييييييي ااااااااه ...
: اوديك الطبيب..
..: ما يحتاج ..
رفعت راسي لها ... وقلت : شوفيها شلون تتلوى ...
مسكتها وخلتها تتمدد على السرير .. وقالت لي : خلها ترتاح .. الانفعالات الزايده يأثرون عليها ..ارتاحي ساره ما في يستاهل هـ اللي تسوينه ..
: شلون نتركها كذاا ...
ردت بتفهم : خلها تنام وبس تصحى شوف شـ يصير ...
: مو تاركها ..
تنهدت وهي تفتح المكيف وتخفف برودته..سكرت الستاير عشان تظلم الغرفه وطلعت ...........
جلست عند راسها وظليت امسح على شعرها .. نامت زي اول لما يخانقها يوسف تجي تبكي عندي الين تنام ......... ظليت على هالحال الين سمعت اذان المغرب ..
: سارونه ... دلوعتي .. قومي ..
شفيها ذي قبل افتح الباب توعى والحين مو راضيه توعى ......فتحت الستاير .. قربت هزيتها بخفه .. فتحت عيونها بكسل وجلست ...ابتسمت لها .. وابتسمت لي...
: اذن المغرب ...
ساره : مسااء الخير ..
: يا مسااااء الخيرات والليرات ..يالله قومي صلي صايره كسووووله...
ساره :هههههههه حرام عليك ....والله صاير نومي ثقيل من الحمل .......
: يا بعد عمري والله .. يا الله سلام ...
أشرت لي مع السلامه بيدها وهي تبتسم ...........
طلعت من الغرفه .. والا بــ لمار داخله نظراتها نظرات مبهمه .... ابتسمت لها وانا اطلع ........وهي بعد ردت الابتسامه ببرود.........
رجعت من الصلاه .. شفت ساره تلاعب حمودي وامي جالسه عندها ..سلمت وجلست جنب ساره ..ميلت عليها ..وبوست حمودي...فتعلق برقبتي..
ساره : يا الله مالك ما صدقت يجيني..
: حمودي نانا ..
حمودي متنح : هأأأأ بااااااباااااا
: يا عيووون ابوك يالغالي .....
ضربته ساره على كتفه ع الخفيف : دب
حمودي زعل ورد وهو يتمسك فيني خنقني : ااااااااااب
:ههههههههههه يا قلبي عليك حمودي خنقتني ...
حمودي فك عني وجلس بحضني ..
: ها يماا شلون عمتي والبنات وماجد..
امي بابتسامه : يا ربي لك الحمد ماعليهم ...
: ليه ما راحت معك لمار ...
امي : كان عندنا عمر وهي ما تبي ...
لصقت ساره فيني وامي تتكلم ... بعد ما خلصت امي جملتها لفيت على ساره ...ابتسمت لها ........
ساره بدلع : حبيبي اخويا الغالي ...
: قوولي ...
ساره : ابييي نجدد الشقه باسبوع ...
عقدت حواجبي : ليه.. عمر قال لك..
ساره وهي تلعب بكمي : لالا ما قال باسويها مفاجأه....
: حلوووو .. الصبح نروح نفتر للي تبين ...
باستني ساره على خدي بدخلت لمار ..حضنت يدي ...: حبيبي يا اخوي ...
التفتنا على لمار :ههههههههههه انتبهوا حمود مشغل الضو الاحمر ....
ناظرناه .. مبوز ومعصب ... صارت ساره تعلق عليه وتقرص خدوده وامي تسولف عليهم .. انا غبت عن العالم ... تعلقت عيني بعينها .. وانتي ما غرتي .. ما عدت اعني لك شي ...كسرت عينها بعد مده .. وهي تسأل امي عن ابوي ... ياااه كذاا كانت فاطمه .. ما تغار ابد ما اعني لها شي ابد .. مجرد زوج تأكله وتنومه..انا ابي زوجه .. تعطي مثل ما تاخذ .. وتاخذ مثل ما تعطي ...
...: مـــــالك..
رديت وانا انزل حمودي اللي انطلق يلعب بكورته :هلا ...
ساره : اسمع ابي ..... ابي نعتق البيت يصير...
: يصير ليه ما يصير ...ألبسي نروح نختار اللون وكل شي ومن بكره يبدوون ...
باستني على خدي بقوة وقامت .. كانت عيوني مع حركاتها .. بس لمار جالسه قبالي .. طاحت عيني عليها ..تنهدت وانا اسند ظهري لورى ...وهي بعد تنهدت وردت على ورى..
امي : ههههههههههه اشكالكم شي ...
: ليه ..!!
لمار بضحكه : ليه يعني لاننا شيييييي..
ابتسمت والا بدخلت ساره : يا الله ...
: يا الله ...تأمرون على شي يا جماعه .........
امي : سلامتك ...
ناظرت لمار .. رفعت حواجبها بمعنى لأ...
: سلام........
طلعت من المجلس وتعلق حمودي فيني .. شلته بس عياا ينزل ..
: حبيبي بابا ..انزل شااطر حمودي ..
تنح : هأأأأأأأأأ
: اففففففف حمودي .. عفيه بابا شااطر روح ماما ..
تعلق برقبتي لان الهبله ساره واقفه ولابسه عبايتها ..
قلت لها : استنيني برااا ثواني بس..
قالت : خلاص انا بـ اقعد بالحديقه ..
: طيب ...
كلمت حموودي: بابا عفيه شااطر ...
حمودي يتدلع : بابا ...
طلعت لمار وقالت : ما رحتو ...
: شوفت عينك ...
قربت وحاولت تسحبه بس متشعبط بقوة .... لصقت فيني وصارت تكلمه ..تحاول فيه بس هو يا قلبي لا تحزن ... آخر شي نزلت وقفته بس هو راكب راسه ..جلست لمار نفس جلستي .. وتسولف وتسولف بان عليها انها بدت تقفل معها .. اخر شي.. سحبته بقوة ..
وقفته وهي تصرخ : بس بس خلاص ..رح ما عليك منه..
: حرام عليك يبكي ...
لمار بدون نفس : فكنا بالله من حنانك الزايد ..خله يبكي بكيفه ...رح ساره تنتظرك..
تكلمت بين اسناني وانا امسك ذراعها لاحظت انها ألتمت على حالها جبانه بس عنييييده : ام احمد لا تكلمتي معي تكلمي عدل .......
طلعت ورزعت الباب وراي ......... رحت مع ساره .. واختارت الالوان والرسومات .. وبعدها رحنا لمحلات اثاث واختارت غرفة نوم خيااااااااااال ...لها اعمده وستاير واشيااء روعه .. حجزناها ع اساس انو اول غرفه تتعتق غرفة النوم.. دفعنا العربون وعطيناهم العنوان .. بنفس المحل اشترت طقم للسرير .. عنابي بوردي جناااااااان...رحنا بعدها كم محل اثاث .. ذوقها مو صعب بسرعه اختارت كنب للمجلس .. والديوانيه ..برضو دفعنا العربون ......
رجعنا البيت حيلنا مهدوووود... جلست ساره بسرعه وهي تفك غطاها .. وانا جلست على الكنبه مابي احرجها وابين تعبي..
ساره : يعطيك العافيه وربي تعبتك..
: تعبك راحه يالغاليه ...
امي : خلصتي اللي تبين ..
ساره: امممم خلصت .. وين لمار ..
امي : راحت تحط العشااا..
: إي والله جيعااااااااااان .....
ساره : وانا بعد ميته جوووع ما تغديت اليوم ..........
رحت المطبخ اشوف لمار .. كانت تقول للشغاله وهي متكيه على الطاوله ..: لا تنسين الملاعق..
الشغاله : هزاا ملاعق مدام ..
لمار بأمر : وديهم ...
: بْسسسس
التفت علي وهي تركي بذراعها ع الكرسي اللي جنبها : نعم...
: الله ينعم عليك .. ليه جالسه لحالك..
لفت عني ورجع تكت بايديها على الطاوله ... جلست جنبها ..كنت بتركى على الطاوله بس
قالت بصوت عالي : لالا انتبه ..
: وشوووووو
لمار : الطاوله كلها لبن ...
: خرعتيني ..
لمار : بسم الله عليك ...
: وانتي ليش متكيه عليها ...
بوزت وهي توريني بلوزتها والبقعه البيضاا عليها : شوف حمود شسوى بي..
ما قدرت امسك نفسي :ههههههههههههههه يا حليلك .. روحي غيري ..
لمار : مابي متكاسله ارقى الدرج..
: في مصعد ..
لمار: ليه حطيتوه ..
: عشان لا كب حمودي عليك لبن تروحين تغيرين ..
لمار : ها ها ها دمك خفيف ..
: طالع عليك ..
وقفت ووقفت معها ... مسحت على البقعه بطرف اصبعي بمكان خطييييييييير ..
قلت : شلون كبه كذاا..
ضربت يدي بنعومه وقالت وخدودها يحمروا
: مو شغلك .. ياللقافه ...
: هههههههههههه يا حلاتك ... احبك ...
لفت عني بقوة .. يا ربي تذوبني هالحركه من زمان عنها ... قربت منها ومديت يدي بامسك خصله من شعرها .. كنت ابي اشمه اموت بريحته ... بس سمعنا صوت عند الباب..طلعت بسرعه .. شفت الشغاله عند الباب .. تنهدت براحه اهم شي مو امي ... جلست ع الكرسي حقها جنب حمودي وبوسته .. وهو على طوول صار يسولف .. كنه يعاتبني ..جلس ابوي وساره وامي .. وانا على قعدتي انتظرها ...
شوي وسمعت امي ..: يماا مالك كل ..الشوربه حلاتها وهي ساخنه ...
جلست بمكاني .. انتظرتها انتظرتها ما جت ... وقفت والا هذه هي .. شافتني واحمرت خدودها .. يا حلاتك يالعنيده اموووت فييييك ..جلست جنبي .. وحطت بصحني ..غصب عن عين امي اكلت الصحن كله .. ضربت رجلها برجلي .. لفت علي ببرود .. عقدت حواجبي ..رفعت حاجبها وحطت لي بصحني ..
المكتب
: يبااا شلووون .. انت كذاا تحملني المسئوليه
ابوي بحزم : اكيد باحملك اياها مو هذي عمايلك ...
: يباااااااا انا قلته اقتراح مو امر.. بعدين لسى السالفه ما انتهت ...
ابوي بعصبيه : المكتوب مبين من عنوانه ..تنسحب منها والخساير تتحملها ...
: السالفه مي بالخناق .. خلنا نتفاهم معهم نشوف شيصير...وبعدين لسى ما انتهت المده ...
ابوي : مالك .. خلاص انتهى الكلام تلغي هالصفقه وانت اللي تتحمل تكاليفها ..
: اسمح لي يباا .. موب ملغيها.. وهذا انت قلت انا اتحمل الخساير .. يومين بس ان ما صارلك اللي تبي سوى اللي تبيه...
ابوي : نشوف ...
طلعت من مكتب ابوي على فوق ...كل شي مالك المسئول مالك الكبير مالك الي يتحمل .. افففف
جلست ورى مكتبي .. دقيت على لمار .. شوي وسمعت صوتها
" نعم ..
: تعالي مكتبي "
سكرت بسرعه عشان ما تناقشني ..اقل من دقيقتين ودخلت .. مبين مو راضيه ..
لمار : نعم ..
: ابيك تساعديني عندك مانع ...
ظلت واقفه .. قلت باكبر طاقه من الصبر : تفضلي ..
جلست قدامي قلت لها : مو ماكلك تعالي جنبي بـ اشرح لك ذي مو سواليف الارشاد ...
تكتفت وقالت : افهم من مكاني عاادي ..
صبرا جميل والله المستعان ... بديت اشرح لها عن الصفقه والاشياء اللي ابيها تدونها .. والحسابات اضطرت انها تجلس جنبي عشان الملفات اللي ع الاكسل ..اندمجت بسرعه وافادتني كثير ... كنا مندمجين بالشغل .. انا اكتب على يدي .. وهي ع اللاب توب تبعي اللي وصلته بالطابعه ..
لفت علي وقالت : كذاا اوكي ..
قربت منها وناظرت الصفحه ..هي جالسه على كرسي عااادي..ناظرت الورقه واشرت لها ..
قلت لها : شوفي هالرقم غلط ترى كل شي يأثر هالحسابات دقيقه لا تطبعين قبل اشوفها..
قالت لي : احسه كذااا صح مادري الرقم اللي عندك احسه موووو ضابط على الشروط ..
ابعدت ولفيت على المكتب : لالا ارجعي اكتبي مثل ما هو مطلوب ..
تنهدت وقالت : آز يو لآيك ..
بعد ربع ساعه من اصوات طقطقه الكيبورد والاقلام ..قالت : هممم كذاا اوكي..
لفيت الكرسي الدوار ناحيتها وقربت منها فلصق ظهرها بصدري لاني مسكت الفاره وناظرت الصفحه كلها وأشرت على امر بالطباعه ...
: اوكي يعطيك العافيه .. ما قصرتي ...
دنقت وشميت شعرها ..حسيتها تشنجت.. تقدمت عن الكرسي اكثر ولفيت وجهها .. قامت وقفت .. مسكت يدها
همست : لا تروحين ...
ردت: تأخرت لازم تنام بكره وراك دوام ولازم تراجع ذولااا بدري ...
: نامي بالغرفه والله ما اقرب لك ..
فكت يدها ومشت ............
: لمااار ..
وقفت ولفت علي وقالت : بنام عند حمود .. ساره نومها ثقيل من الحمل لا نامت ما قامت فلذلك تطمن ما رح تحس بشي ..
عقدت حواجبي : شلون تعرفين اللي افكر فيه وانتي ما تحبيني ..
حمرت خدودها وهمست : اتوقع اللي قلته شي بديهي ..تصبح على خير..
: وانتي من اهله ..لمااار
لفت وتنهدت ..فقلت : شفيك متضايقه ..
ابتسمت من دون نفس وخدودها احمرو زياده : شوي .. عن اذنك..
: الله معاك ..
اصبر ... ما وراي شي .. ان الله مع الصابرين .. مصيرك بتعرفين قدرك وغلاتك عندي يا لمار ...
^
^
$
...: قلت لك بس انت وراسك اليابس هذي النتيجه ..
: يبااا والله في غلط مستحيل نخسر بهالبساطه .. انا بظل اتتبع الموضوع ..
ابوي بعصبيه : اقووول انقلع عن وجهي يللا و من اليوم ورايح ما تحضر معي اجتماع الا كـ مستمع فااااااهم..
بلعت ريقي : شلون يعني !!
ابوي: يعني القرارات الاداريه مسحوبه منك .. انقلع كمل شغلك ..
: حاضر ..
طلعت لمكتبي اف يا ربي ... اخذت الملف وحطيته على جنب .. وبديت بملف ثاني ... دق جوالي " مالك يتصل " رديت وانا اخذ نفس
" : هلا بـ دلوعتي ..
ساره : سلام
: وعليكم السلام .. ليه صوتك كذاا بك شي..
ساره : توي قاعده من النوم ..
: افااا توووك..
ساره : ملوووك هاا وديت العمال ..
: ههههههههه تصرفين هاا مو مشكله .. ع العموم لا لسى ..اااااا بعد الدوام اتغدى واخذ المفاتيح واوديهم ..
ساره : اوووووكي سلام
: مع السلامه "
ناظرت الساعه ..اف بتقيم الصلاه وهي توها قاعده ..
من دخلت البيت على طول بدلت ملابسي نزلت .. جلست جنب ابوي .. وحطيت بصحني شوي رز .. شفت ابوي يناظر لامي لانها ملتفته لساره ..فبادرته
: يباا تبي سلطه ...
قال بدون نفس يعني نظرته كنه متقرف : مابي منك شي ..
حسيت وجهي احتقن بالدم ..
: ليه يباا ..
ناظرني بغضب وقال بنبره فيها عصبيه واضحه : بدون ليه بس كذاا كنك ما تعرف ...
ناظرت امي اللي غمزت لي عشان ما انفعل ونقلت عيني لساره وقلت بقهر
: حبيبتي روحي جيبي المفاتيح ...
ساره بصدمه وعيونها تنتقل بيني وبين ابوي : ما اكلت ...
وقفت : وينهم انا اجيبهم ..
وقفت لمار وقالت تكلم ساره : انا اروح اجيبهم انتي كملي اكلك ..
طلعت وانا طلعت وراها وقفت عند باب البيت شفتها تنزل من الدرج وهي منزله راسها ..كنها تعد خطواتها رفعت راسها وتعلقت عيني بعينها .. ضميني تكفين .. حطت المفاتيح بيدي ..مسكت يدها .. تنهدتْ وانا بعد تنهدت مالي غير هواا ربي يفرج عني ... سحبت يدي وطلعت ...
طلعت وانا افرغ شحنات غضبي بالسياره سكرت الباب بقوة ورحت لبيت ساره بعدما مريت العمال عشان يلحقوني .. دخلتهم .. ظليت على روسهم الين خلصو غرفة النوم .. وطلعتهم وقفلتها ..ما صارت الساعه 10 بالليل ..الا وهم مخلصين الصاله وجزء من المجلس .. طلعتهم ورديت البيت ..تروشت ونمت..
ثاني يوم
طلعت العمال وقفلت بيت ساره وطلعت .. حوطت بالسياره ..دق جوالي ..
": هلا والله
عمر :سلام ..
: وعليكم السلام..
عمر : انت دااق علي ..
: إيه وينك عن الجوال..
عمر : بموقع المهرجان ..
: اها..
عمر : شعندك ..
: الحين ما ادق الا عندي شي مالت عليك ..
عمر : اووو مالك شفيك احيان احسك غثيث..
: مشكور يالغالي يجي منك اكثر ..
عمر : افاا امزح معك .. شفيك ملووك تكلم ..
: متضايق ..
عمر : ماورى الضيق الا الفرج الصبر بس ..
آه يا عمر منين اجيب الصبر ..
عمر : الووو انت معي ..
: معاك ، وش سويتو بالمهرجان ..
عمر : ما صار شي بكره ان شاااء الله نبدى ..
: ان شااء الله ..
عمر : انت تسوق ..
تنهدت : إي ليه فيها شي يعني ..
عمر : لا بس يالله سكر سكر بدق على اختك اشتقت لها..
: ها ها ها ياااااا بيخك ..
عمر : وين البياخه بالسالفه ..
: السالفه على بعضها باااااااااااايخه اوريك يا معفن .."
سكرت الجوال ودسيته بجيبي .. دق جوالي وطلعته " عمر يتصل " ..رديت وانا نازل من السياره ..
" خير
عمر : ليه تسكر بوجهي وبعدين منو المعفن يا معفن
: اولاً بكيفي ثانياً انت المعفن والا هذي سالفه تنقال..
عمر : ماااالك لا تعقدها اختك حرمتي وشي طبيعي اشتاق لها ..
فتحت باب البيت : اففففف عمر اذا ما انت حااب اسكر بوجهك سكر انت ..
عمر : ول عليك شـ هـ النفس الخايسه ...
رفعت راسي وطاحت عيني على لمار المبتسمه لولدها وهي طالعه من المجلس وتقول له : لا ماما عيب ..
حمودي يتدلع : ماما هوووباا ..
لمار نزلت لمستواه وقرصت خدوده : يا ربي يدنن وسو ماما ..
حمودي مصر : ماما بيبي ..
رفعت راسها وهي تقول له : انت حبيبي والله..
قالتها وهي ترفع عينها ..ناظرتني ببرود وانا ابتسمت باسى تخيلت هالجمله لي اناا ...
..: الوو الووو مالك ..
: هلا هلا ..
عمر : صار لي ساعه اناديك وش هالاصوات عندك ..
: هذا حمودي ..
عمر :اففف رفعت ضغطي مع السلامه ..
قلت بعتب : مع السلامه يالغالي "
: السلام ..
لمار وهي ممسكه ايدين ولدها اللي مازال يردد.. ماما بيبي ..: وعليكم السلام .. يعطيك العافيه ..
: الله يعافيك ...
قلتها وعيوني تتنقل بتفاصيلها.. ابتداءاً من تنورتها الملامسه للارض الين بلوزتها الماسكه على جسمها النحيف الين ملامحها الفاتنه .. شفايفها الحمر وخدودها بعد وعيونها السود الوساع ورموشها الكثيفه ...لمسات الخجل واضحه بخدودها وعيونها الخجوله ..احب خجلها ...محتاج لها وابيها بسسسسسس..
حسيت باحد يشد بنطلوني..نزلت عيني لحمودي وابتسمت له,هو يسولف مادري شيقول,نزلت لمستواه وهمست وانا امسح على شعره الاسود الناعم الشي الوحيد اللي طلع له من امه
: بعدين حبيبي ...
مشيت عنه وطلعت فوق ..نزلت اغراضي ودخلت اخذت دش سريع .. وانا نازل .. شفت ساره مبتسمه وهي تكلم بالجوال وتصعد الدرج .. ابتسمت لها وهي اصلا مبتسمه..
وقفت قدام المجلس .. وانا اسمع صوتها : يماا ما يصير كذاا والله حرام عليه ابوي كذاا يحرجه ويحرجنا معه ..
امي بتنهيده : وش اسوي به يا ما تكلمنا بهالموضوع بس ما يسمع من احد ..
لمار : معليه يماا بس ولو الا ما في طريقه تقنعينه بها .. يعني قولي له اذا اخته وامه متعودات انا زوجته وووو ما احب اشوفه ينكسر قدامي ...
غمضت عيوني بفرحه ..دخلت وسلمت وعيني لها .. جلست جنبها.. يا ربي مشتاق لها لي ثلاث ايام ما احتكيت فيها ..
قربت حيل لدرجه اني لما همست باذنها كانت شفايفي ملامسه لشحمة اذنها
: انتي يا بتذبحيني يا بتذبحينيي ...
امي قامت لحمودي ومسكت يده : تعال نروح جدك احسن لنا ..
حمود يتمصلح : ماما هوبا ..
شالته امي وطلعو ...رجعت ناظرت لمار .. شفتها مبوزه وخدودها حمممممر ..
: شفيك ..
عقدت حواجبها : مايصلح نقعد حنا الاثنين بمكان واحد لانك متهور..
قربت منها اكثر ومديت يدي ع الكنبه والثانيه مسكت فيها خصله من شعرها ..
همست: صح عليك..في اماكن لازم مانكون بس اثنين فيها وفي اماكن لازم نكون اثنين بس..
احمرت خدودها ولفت بقوه .. لصقت فيها اكثر ناسي نفسي ..
همست : يا ربي تكفين لا تستحين مني والله اذووب ..
ابعدت عني بسرعه وقالت : شفيك مانت صاحي ..
كان عطرها وقربها وضيقتي وعنادها اسباب تخليني ارد بوله
:مجنون صح ..
نزلت يدي من ع الكنبه وحضنت اكتافها ولصقتها فيني ..
قالت بخوف واضح وهي تحاول تلفت للباب : مالك ..
همست بوله وشوق وانا تايه بسواد عينها الخجوله الخايفه ..
: والله ما انلام فيك لانك على بعضك.. فتنه..فتنه .. الله يصبر قليبي على عنادك اللي .........
.....: مالك ..
لفيت على ابوي اللي يناظرني بحده : خير ان شااء الله ما عندك غرفه وش هالحركات ..
قامت لمار فقلت لها بسرعه لان خطواتها سريعه : لمار نادي ساره ابيها ..
جلست امي جنب ابوي وبحضنها حمودي اللي صار يسولف عليهم ..
جت ساره وجلست جنبي وهمست باذني : مالك شسويت للمار ..
: وش سويت بعد ؟!
ساره بنفس الهمس : كنت اكلم بالجوال ودخلت علي تبكي وتقول انك تبيني صار شي بالشقه ..
: لأ بس ابي اقولك انوووو بكره بياخذون الاثاث بوديك الصبح ع التسعه تاخذين الملابس والاشياء ذياا عشان يجيبون الغرفه .. نادي لمار لا تخلينها بروحها ..
ناظرت ابوي اللي قوس شفايفه ولف عني وهو يكلم امي وصارو يلاعبون حمود .. هذا انت يباا مصلحتك وراحة بالك اولاً .. تماماً مثل يوسف الله يرحمه ..
لفيت على ساره : يللا حبيبتي روحي ناديها..
ساره بهمس : تبكي اقولك ..
: اففففف طيب شوي وراجع لك ..
رحت فوق وفتحت باب غرفة ساره وشفتها .. واقفه جنب الدريشه ومستنده للجدار وبايين اثر الدموع على وجهها..
ان كان هذا زعل علمها يالغالي ،‘،‘، ما كان قصدي ورب البيت ازعلها
علمها واللي يخلي قلبك الخالي ،‘،‘،عن ضيقتي وين وصلت من تجاهلها
: غسلي وجهك وتعالي ..
ناظرتني بجمود وهمست : مابي انزل ..
: تكفين لا تبكين والله تعذبيني ..
حطت ايديها الثنتين على راسها : تعبتني يا مالك والله تعبتني ..
وقفت قدامها ومسكت ايديها وهمست : ضميني........ تكفين ..
هزت راسها بلأ و ابعدت : اتركني ..
: ما تبيني ..
رددت وانا حسيت دموعي متحجرات بعيوني : اكره تصرفاتك اكرهها .. اكرهك ..
تنهدت : مشكوره ..
زفرت بآآه وهي تجلس على ركبها.. تركت ايديها ونزلت لمستواها ..
: لا تضايقين عمرك يا عمري انتي .....
غرست اصابعها بشعرها وتأففت : اففففف اطلع من راسي يابن الناس اطــــــــلع...
وقفت وطاحت عيني على ساره الواقفه ودموعها تنزل بهدوووء .. قربت منها ومسحت دموعها
: افااا بنتي بعد تبكي تبوا تذبحوني انتوا .. يللا يا بعد روح اخوك .. يللا دلوعتي .. روحي خففي عنها مثل ما تسوين لي اول ..
ابتسمت لها وطلعت ..سكرت الباب استندت عليه وانا اسمع صياح لمار وصوت ساره :بس لمار والله عذبتيه وعذبتي عمرك صدقيني ما طلب يضمك الا وهو متضايق..
سمعت صوت لمار المتقطع : خلوه يتزوج ويتركني بحالي يا ليتني اقدر اعيش بدون ام مره ثانيه والا ما ارد هنا ابد بس ماقدر ماقدر ..
رحت غرفتي ملاذي .. اول ادق على عمر يكلمني ينصحني وهالحين لما ادق عليه وشعندك وشتبي والا مشغول وبكره وبعدين مثل اول ما دخل الفرقه كل ما ادق عليه مشغووول واذا ما هو مشغول اطلعله ويدق علي لاتمرني مدير الفرقه طلبني الين استقرت اوضاعه ..فتحت المنتدى تصفحته .. طرت علي مطلع قصيده فتحت صفحه جديده بالوورد عشان انسقها وانزلها ..
الضيقة اللي دايماً تالي عصير ..
.. وش حيلتي وأردها لا تجيني
لا طال ظل العود حزة عشى الطير ..
.. كنها على سجن الحديد تحديني
يضيق صدري كل ما جات وأسير ..
.. ولايخفف سوج رجلي حنيني
لا حولنا مشراف ولا اقدر اطير ..
.. يالله قسمة خير لا تبتليني
وعقارب الساعة توقف عن السير ..
.. ولاكن في (الشرقيه) سواتي حزيني
والعبره اللي تاصل الحلق وتحير ..
.. يا قربها لو قيل لي .. عويني
أمل شوف الناس ورد ومصادير ..
.. واللي يقول اشفيك كنه يهجيني
يعني على ما قيل من باب تصوير ..
.. (لاحدٍ أبي قربه ولا أحدٍ يبيني)
أروح أدور خط مابه دواوير ..
.. وأدور اللي هادها تهتديني
وآخذ مع الهاجوس سجة وتفكير ..
.. وأراجع اللي فات بيني وبيني
وأحسب ذنوبي وأدور التكفير ..
.. عساي ما قصرت في والديني
وعساي ما قارنت من ينفخ الكير ..
.. واللي يحمل المسك جعله قريني
ويطري علي يوم الحشر وأطلب مجير ..
.. ما أعطى كتابي في شقيقة يميني
وإلا طرالي واحد كانه اصغير ..
.. أم أصغر بيومين ولا سنيني
دريت وش قومي وعينت تفسير ..
.. للضيقة اللي من زمن تعتليني
حبه بصدري سالفة سر في بير ..
.. وكن الفواد يقول هذا زبيني
أشفق على علمٍ يجي منه من غير ..
.. لا يسمع اللي سولفوا به ونيني
يا كثرهم غيره ولكن خبر خير ..
.. ما غير شوفه في الوجود يهنيني
رايي كذا يا عاشقين الغنادير ..
.. ماله على وجه البسيطه وزيني
العام أجيهم من حساب المسايير ..
.. واليوم حال عداي وينه وويني
خطاي تعليق الأمل في المدابير ..
.. الين راح وشفت حقري بعيني
صبرٍ جميل وخابر إنها مقادير ..
.. والله على تخفيف حزني عويني
ذي حالتي لين اتغيب الشمس واصير ..
.. معطى سراحي عقب مانا سجيني
واذا امتلى جوف الشجر بالعصافير ..
.. طلبت من رب العباد يهديني
يعتقني المذن عقب ضيقة عصير ..
.. اللي على سجن الفراق اتحديني<<ابن فطيس
الســــــــــــــلام على من اتبع الهدى ودين الحق ليظهره على الدين كله ...
(( صلــــــــــو على محمــــــــــــــــــــــــــــــد ))
اللهم صلي وسلم وبارك على محمد وعلى آله وصحبه أجمعيــــــــــن
|
04-05-11, 01:56 AM
جديد مواضيع قسم القصص المكتمله
العرض العادي
