كاتب الموضوع :
صدووود
المنتدى :
القصص المكتمله من وحي قلم الاعضاء
صباح الخيرات ........ياصباح الاشواق صدودة ........وربي كلامك عن قرب نهاية رحلتنا موجع حيل بس هذا شي وارد ولابد يكون بيوم .... متأكدة انو نهايتك ماراح تختلف عن بدايتك وبنفس القوة .......يعز علينا فراق راواية عشنا معاها جميع مراحلها وجنون المشاعر الي تداخلت مع مشاعرنا .........عشنا الوجع والظلم والعذاب والحرمان بأبشع الطرق مااخفيك كثير مواقف لليوم محفورة بعقلي ولليوم راكزة بذاكرتي دايم اللحظات المؤثرة ماتنمحي من الذكرة ... اول رواية اقراها اكون كارهة لشخصية البطل ومشمئزة منه لنهاية الرواية للاسف ولا شي من الي انكشف زحزح ذرة من الاحتقار لشخصيته لانو مبرراته ابدا مالها دخل بالي سواه
هموس كل كلامك الي كتبتيه عن المجرم مايبرر ولا يعطيه الحق في الي سواه ............ماله حق مهما كانت ظروفه وهو اعترف لهديل بنفسه انو انتقم منها لكل الي مر فيه مو بس لموت اخوه مع اني ارجع واقول القانون ماانوجد عبث ولعبة واعتقد القصاص مو شي بسيط ومايبرد القلب ...........محروق قلبه على اخوه يطلب تطبيق الشرع مثل ماانذكر بكتاب الله اعتقد كل شي واضح اما انتقامه وفكرته مايسويها الا الهمج وضعاف النفوس الي مايعترفون بشي اسمه قانون وتطبيق الشريعة بالعكس انتي بكلامك اذنتيه اكثر واكثر لو كل من انقتل له اخو او قريب اخذ حقه بأيده ضاع الامان الي عايشين فيه والدنيا صارت بس قاتل ومقتول ..........رجعنا لزمن الجاهلية بتفكيره وتخلفه اجل شترك للي عايشين لليوم على قاعدة الثار والانتقام من يكبر الولد سن معين دخلوه بسلسة الثار الي ماتنتهي ......
هذا هو متعلم وواعي والمفروض يكون تفكيره ارقى واسمى امثاله المفروض يبنون الافكار البنائة ويتبنونها ويكونو قدوة لغيرهم .............ماحد قاله يتنازل عن دم اخوه يبي حقه ياخذه مثل ماهو مفروض مو يخطط ويكون همه الانتقام من بنت بنت مو ولد انتي شايفة الامر عادي ؟؟؟؟؟؟؟؟
اما بالنسبة لماضيه والظلم الي عاشه والطعنة الي جاته من صديقة .........هذا امر من ربه كتبه له وياما ناس لليوم بالسجون يعيشون مظلوميات اعظم من هل هذا يعني انهم لما يطلعون يدورون لهم احد يطلعون عقدهم عليهم ...
عذر اقبح من ذنب ........ماله عذر لو يحط معلقات كل الي صار له من ماضي مايخص احد ولا له حق يطلع بلاويه في غيره .........
هو موبس ظلم هديل هو ظلم زوجته الاولى الي بنفسه اعترف انها بنت ناس قدرته وصبرت على اجحافه وتقصيره بحقها ماكفاه ظلمه لها وتطليقها بسهولة وكأنها هم على قلبه حملت لقب مطلقة بدون ذنب منها ..........يمكن الي صار له مع هديل دعوة منها لانو حرق قلبها .........لا وحتى بنته اهملها ولا اهتم لمصلحتها طلق امها ورماها عليه يوم انو عارف حاله مو طبيعي ليه يبلش بنات الناس موحرام الي سواه مايعرف المجتمع ونظرته للمطلقة حتى لو مالها ذنب بطلاقها يرمون عليها تهم تهد جبال
وربي مووجه لازوجة ولا عيال لانو مارحم الي اضعف منه وموت بنته رحمة لها شتبي بأبو قاسي قلبه حجر ماهمته ولا فكر بمصلحتها انو من حقها تعيش حياة طبيعية مثل باقي الي بعمرها لو كانو اهلها الحياة بينهم جحيم ومستحيلة كان عذرناه بس الحرمة حتى بعد اهماله لها كان عندها استعداد تعيش معاه لو بادر بتغيير حياته ماله عذر لامع الاولى الي همشتوها وماذكرتوها يارابطة غازي ولا مع الثانية الي اجرم فيها اكثر بأعذار ماتقنع طفل
اما من ناحية انو كان بيرجعها لاهلها بس هم اعلنو خبر موتها هنا الطامة الاكبر على مجرمكم .........بعد ماعرف انو هو حرم البنت من اهلها تسبب من حرمانها العيش من جديد في بلدها سواء عنده او عند اهلها ولو يبي كان عرف يفبرك عذر ماراح يعجز مثل ماعرف يخطط ياخذ هديل يقدر هو مو ناقص لاخبث ولا نفوذ
ولو تغاضينا عن فكرة ترجيعها مو الي صار المفروض يحسسه بالذنب اكثر وانو هديل امانة بعنقه مو المفروض يعوضها ويحن عليها ..........بس هو ايش سوى بالمقابل وبعد ماعرف الي عرفه من سوايا ابوها عذبها دمرها بأبشع الطرق كل الي سواه فيها كان بعد خبر موتها الي اشاعه ابوها ...........يعني كل الاعذار مالها اي معنى الذنب كبير هو مارحمها قام يعذبها علشان يبيها تنسب اسمها لغير ابوها واهلها .........
ومتى قرر يخبرها انو زوجها مو بعد مااجرم فيها بعد ايش ليه ماخبرها قبل ماياخذ الي يبي منتظر ابوها وعمها الي اشاعو موتها خوش مبرر مااعتقد انو ابكم ولا هديل ضمخة مايقدر يخبرها انو الي سواه حلال بتقولو نغسيتها تعبانة ومابيقدر يوصل لها المعلومة بقول عذر بايخ لانو مااهتم لمشاعرها وانهيارها اخذ الي يبي منها ومااهتم لدموع ورجاويها همه نفسه وكيف يشبع شهواته منها يعني ابد مالكم اي ثغرة تبرئوه من عظم جرمه
اما موت بنته هذا قضاء وقدر وهل اتعظ وعرف معنى حرقة القلب على الضنى لو انحرق قلبه وعرف لوعة الفقد ماذوقه لغيره شذنب ام علي وكل ليلة تشوف بنتها تتعذب بأحلامها شذنبها وهي مو مرتاحة وقلبها يوجعها على شي هي تجهله وامه يوم التقت فيها وسمعت حكيها وشافت حالتها هل وقفت له هل قالت لامها كل شي بيدها انها توقف بوجه ولدها الي لو لقى من البداية من يوقفه عند حده ماتمادى في اجرامه وعدم مراعاته لمشاعر الناس
لا والاعظم بعد ماربي عطاه ولد من الي ظلمها يفاول عليه بالعمى والشلل .....في ابو يقول الي قاله عن ولده بس علشان يوصل للي يبي شهالتفكير الغبي والقاسي حرق قلب امه عليه وهي الي متعذبة علشان ولدها هل فكر كيف تلقت خبر ولدها الصعب وهي وحيدة ومنبوذة هل فكر كيف انحرق قلبها وعاشت بخوف طول هذيك الفترة علشان يقطع عليها امل نجاح عملية ولدها اي حياة الي يبيها وهو مايفكر الا بخطط توجع قلب هديل هل هذا الانسان يستحق الابوة او يستحق زوجة تحبه .............كان من باب اولى راح يعالج مخه الاعوج بعدين يفكر بزوجة وعيال
وانا متأكدة مليون بالمية ماخبر هديل بالحقيقة الا وهو مخطط انها ماترجع مع هادي لانو الي براسه ماراح يتنازل عنه هو مفتكرها ملكيه خاصة مثلها مثل اي شي يملكه ..........ماهمه رضت والا انرضت المهم هو ايش يبي دايم الانا الي يعاني منها عنده بالدرجة الاولى وتقولون ليه هالحقد اذا هو حاقد على نفسه كيف ماتبون الي حوله يحقدون عليه شايب بعمر جدي وعقله موقادر يدله للطريق الصحيح .......اشياء كثيرة فيه غلط ويبي لها تصحيح اذا مابادر هو وصلحها الي حوله ماهم مجبورين يصلحون له كل انسان محاسب على افعاله
الي مستغربة منه تفكيركم انو الاشياء المادية هي عوض حقيقي لهديل الحين الفلوس والهداية او حتى البيت الجديد عوض وثمن لجروح انسانة ذاقت المر من ايد زوجها معقولة هالشي بنظركم كفيل انو يخلي هديل تحب وترضى بأنسان مريض ومعقد .......مو كل الناس تنشرى بالفلوس والهداية ووسخ الدنيا
نجي لمسفر والي قاعد يسويه هو غلط غلطة كبيرة يوم تزوج خلود وهو عارف انها مازالت بعلاجها واجرم بحقها يوم رضى يملك عليها بدون ماتعرف خلود حقيقته فعلا كلامها الزواج وان كان صحيح بالاوراق بس باطل من الناحية المعنوية هي قبلت بشخص معين انزرع براسها والواقع غير ..........يعني ايش فرقت عن الي يوروها شخص بصورة او حتى بالشوفة الشرعية ويفجعوها بليلة زواجها بشخص اخر بس الفرق انو الاسم حقيقي هل هالزواج صحيح بنات كثير صارو ضحايا لخطط مثل هذي وفيهم الي زوجوها متخلف عقليا لاهي تدري عنه ولا حتى اهلها ضماير الناس ماادري كيف صارت حتى الزواج صار فيه تلاعب اعوذ بالله من البشر
ارجع اقول مراموه ماتستحق من يوثق فيها ويأمنها على سر لانها عارفة اصغر شي عن خلود وهي اول من طعنها بظهرها وبعدها يجي دور الام الي ماخافت على هاليتيمة من صرع او انهيارعصبي من المفاجئة وهي الي اصرت على خداع بنتها لبعد ماتتم الملكة ........خلود اذا مااخذت حقها من الكل راح تكبر عندها عقدة ثانية وهي فقد الثقة حتى بالحريم لانو اقرب ثنتين تلاعبو فيها وفي مشاعرها
غادة وراكان
غادة لو تحب راكان كان وثقت فيه بعد صبره عليها وكل الي قدمه لها ماقدرت تعرف حقيقة مشاعره اتجاهها مجرد تصرف عفوي من راكان تجاه هديل فسرته على شي سخيف بناه لها عقلها المريض احس غادة ماتحب راكان بكل جوارجها لانها بسرعة تحكم عليه ..........تدور الزلة علشان تتركه واذا راكان سامحها بسهولة ماراح تبطل شكوك وافكار مريضة ...........لو كان يحب هديل مو كان تغيرت معاملته لها لبرود على الاقل بعد ماعرف بوجودها مو كان بيزل لسانه وبيكون مقهور انهم زوجوها لغيره وهي كان يبيها واولا بس هي تصدق الي تبي اجل ليه تلومه يوم انو تسرع وصدق الشينة فيها هذا هي من هدية نست كل الي بناه راكان طول السنوات الي راحت
كلمة لرابطة غازي .....ترى هديل مو رامية حالها على غازيكم ولا ماسكته بسلاسل علشان هالهجوم عليها غازيكم الي مفكرها ملك من املاكه وغاصبها على وجودها ورجعتها له يعني بدل ماتهاجموها وهي صاحبة حق عندكم شبيه الرجال خلوه يحررها ويشوف له بقرة تقبل فيه وتكون عديمة احساس مثله لو اهانها ابشع الاهانات راح تركع تحت رجلينه وتطلب رضاه لانو انتو تبون وحدة بهالمواصفات ماتبون وحدة تحفظ لو القليل جدا من ماتبقى من انوثتها وانسانيتها ماتبون وحدة تطالب بأنسانيتها المهدورة على يد غازيكم .........كل هالهجوم وهي مااجرمت بحقه ولا ظلمته هو الي ظلمها علشان يرضي نفسه ومازال على نفس الموال .........اذا انتو تطالبون بطلاقها من غازيكم انا اتفق معاكم على الاقل بيجيها الي يعرف قدرها ويخاف ربه فيها من اول مايربط اسمه في اسمها بياخذها من بيت ابوها بيكون عندها علم انو في من خطبها بينوخذ رايها بالقبول او الرفض بيندفع لها مهر ويمكن بيسوي لها عرس ولو مابغت اقلها حفلة بسيطة بيصونها بيعترف بأنسانيها وانها من لحم ودم انها تحس وتتوجع وتتألم يرحم ضعفها
ترى ماراح تضيع ولا بتخسر وهو خليه مع الاطلال عنده الجذيلة والمخدات يعيش معاهم كفوه على الاقل جماد مثله
صدودة في انتظار ماتحمل لنا باقي حروفك من احداث لابطال روايتك ولاي شاطئ سترسي سفنهم ... في انتظارك
|
02-04-12, 05:58 PM
العرض العادي
