ايام الطفوله ومادراك مايام الطفوله ( البرائة والامان )
الا ليت الطفوله تعود يوما واحكي لها مافعل بي الزمان >>>>>> المثل محرفته
طفولتي كانت بريئة وكنت فالتها على الاخر كنت عربجيه كان اكبر مني ولد واصغر مني ولد يعني الانوثه ميح وشلت بنات الحاره نفسي عربجيات خوات عيال
طفولتي ( مستحيل اقول لعيالي عنها مابي اطيح من عينهم ) دايما اقول لهم صيرو مثلي كنت بنت مطيعه ماعذبت امي وكنت اساعدها وكلن كان يذكرني بالخير ( واكيد العكس كان صحيح )
نبداء بطفولي للحين عالقه بذاكرتي
اول ماقوم قبل لا غسل وجهي اطير واشغل التلفزيون وكان مافي غير السعوديه الي ماتفتح الا عشر لكن انا فاتحته من الساعه ست ومنبطحه تحته
بالبدايه كنت اضن انها زحمة ناااااااااااااااااس والي اشوفه روسهم ( كنت عبقريت زماني )
واذا شفت الالوان افرح اعرف انه باقي شوي ويفتح التلفزون اقعد اعد معهم الوقت
كنت احب اسمع القران كنت معجبه بصوت القارئ الخياط
بهالوقت تصحى امي وتفطرني الفطور كان اغلب الاحيان الفطور خبز وسمن والخميس معروف بالتميس والفول
بعد مافطر ابداء يومي بنشاط اطلع من البيت لشلت العداله عاد نتجمع ونطلع برى ندوج ما نخلي سكه ولا طريق الا نمره سبحان الله كان امان محد يطالع فينا
كنت انا بديقارد الشله وكنت بايعته تصرفاتي تسبق تفكيري وكنت احب اكشخ قدامهم اني بطله
النبيطه كانت سلاحي وودايما معي اخذها من اخواني او اصلحها بنفسي لاني كنت حريفه بسواتها وحط بدال اللصق الاسود ابيض ( دعوة السلام )
ودايما لبسي كله جيوب احط الحصى والنبيطه داخله مانسى وحده طلعت راسها من باب بيتها تهاوشني وانا اخذ النبيله وحط فيها الحصاه واركز عليها وارميها وفلعتها كنت صويبه اصيب الهدف ( كنت بنت قشرى )
كنت ام الفزعه اي وحده تتهاوش مع احد تناديني و اصير لها طرزان ( مانسى يوم بطيت راس ولد بطوبه ) شفته ينازع خفت وانحشت وتركته لكنه قطو بسبع ارواح بالليل جايب امه معه يشكيني عند امي
ارجع البيت العصر وقت راحتي من دوجتي بالشوارع مو طيب فيني موعد كرتونتي المفضله ولازم يكون فيه شي اكله وانا اتابع
اغلب الاحيان ربيان نسمه للحين احبه لانه يذكرني بايام خوالي
وعصير سنتوب
واحبانا بدال العصير شاني وببسي
وهذي الشغلات كنت اشتريهم
والله شكولاتات ايام زمان لها طعم غيررررررررررررررر
اكيد ودكم تعرفون بنت بالانوثه والنعومه الي كنت فيها وش كانت تحب اتابع من افلام الكرتون
كرتونتي المفضله وبلا منازع قراند يزر اشوفها باستمتاع انسى كل الي حولي وابن امه يفتح حلقه ويخرب علي متابعتي ( احياني عقلي الطفولي يتمنى اني مثله عندي مركبه وبيدي الصحن الدوار بدال النبيطه والبس لبسه واحارب بحارتنا ) >>>>> هم ناقصين
URL]http://www.youtube.com/watch?v=7De_3zf2LNo[/URL]
اذا شفتها الحين تخنقني العبره واتذكر طفولتي ( الي الكل تعوذ مني فيها )
امي غطتني بدري علشان ترحم العالم من شري ولله لو بكيفي كان طلعت وفرفرت بشوارع بغطاي لكن ( خوف من ابوي )
حبيت ادخل واقول لكم طفولتي السعيده مدامه اسبوع الطفوله
اختكم نسايم نجد
17-04-11, 04:55 AM
جديد مواضيع قسم قهوة ليلاس
العرض العادي
