رساله للغوالي لمتابعين الروايه / الاسبوعين هذي عندي ظروف تجبرني اخر البارتات او الغيها
وبما ان بينا مصداقيه ولولا وعدي لكم ولولا شبه اكتمال البارت كان مافكرت انزل الليله
والسبب حصول وفاه لقريبه لي الله يرحمها ويجعل مثواها الجنه والايام الجايه بنشغل مع اهلها
البارت طويل اتمنى تستمتعون فيه
الرجاء عدم طمر السطوررررررر
البارت الثاني والستون
بعد سبوع
عند شوق
من بعد ماجات من عند امها وجدتها متجنبتها ما تكلمها تبيها تحس بكبر سواتها
كانت جالسه بالصاله شافت جدتها طالعتها ام سالم بطرف عينها ومشت من قدامها
كان نفسها تلحق جدتها وتبوسها على راسها وتتاسف منها لكنها متاكده لو سوت هالشي مستحيل تقدر تشوف امها مره ثانيه
عيونها لحقت جدتها الي طالعه على الدرج وام سالم تنتظر شوق تلحقها و تعتذر
منها لانها مشتاااااااقه لحضنها وسوالفها
شوق بصوت عالي وبعصبيه / ااااووووووف وش هالحاله لمتى جدتي بتسفهني وعمي ما يكلمني وانا وش سويت
دخلت عليها ساره وبسخريه / وش في الحلو يكلم نفسه
شوق بضيقه / شوفت عينك جدتي سافهتني وراميتني بغرفتك وعمي مايكلمني
ساره جلست بهدوء / المفروض تفرحين تخلصتي من تحكمهم الحين لو بغيتي تروحين لامك محد بفاتح فمه
شوق بجديه / اقول سارونه بقولك شغله افكر فيها ولازم تصير طيب غصب بتصير
ساره وقفت وقربت من شوق وبحماس / وش تفكرين فيه وتبينه يصير
شوق بجديه / عمي تركي لازم يتزوج امي
ساره / هههههههههههههههههه تركي يتزوج امك
شوق بضيقه / حتى امي مستحيل توافق على عمي لو انه اخر رجل مستحيل تتزوجه
ساره بجديه / انتي تقربين النار من البانزين الي بتحرقهم وتحرقكم
شوق بثقة / متاكده لتم الزواج عمي بيشكرني عليه لكن المشكله بامي
ساره بسخريه / اشوفك واثقه بتركي الي اذا جت سيرت امك ماخلى كلمه شينها ماقالها فيها تبينه يشكرك على زواجه من امك
شوق بجديه / خلي عمي على طرف امي يبي لها حيلة علشان ترضى
ساره بستغراب / ليش متحمسه على زواجهم الكارثه
شوق بضيقه / عاجبك الحرب الي بينهم عمي يسب بامي واذا جيت عند امي تدعي على عمي
وانا بينهم ضايعه احب عمي واحب امي يمكن لتجمعو يخف الكره الي بينهم
ساره بجديه / تركي يدور الفرصه الي يقهر فيها امك وانتي بتحققين له الي يبي وبيقهر امك وانتي تعرفين تركي وقسوته
شوق بحرقه / والله اني مقهوره من الكره والحقد الي بينهم واحنا الضحيه
ساره بجديه / تبين الصراحه حتى انا مقهوره لكن وش بيدينا متعاطفه كثير مع امك
شوق بتصرف الموضوع وداخلها حرقه / يبي لنا طلعه لسوق علشان نتجهز للوظيفه الجديده
ساره بستغراب / المفروض من زمان مدومات ليكون زوجك بعد ماملك سحب عليك
شوق بحقد / مايقدر يسحب علي وبعدين اوراق التوظيف بيدي لكن عذره ان ابوه مات واكيد نسى
ساره بجديه / اتصلي عليه وذكريه اذا كان ناسي
رفعت جواله واتصلت على ركان
عند ركان
جالس بمكتبه ومقابله صقر سمع صوت جواله رفعه ابتسم وهو يشوف رقم شوق
ركان بجديه / الو
شوق بجديه / اشوفك نسيت موضوع الوظيفه
ركان بهدوء وبابتسامه / توقعتك هونتي وقلت جت من ربي
شوق بعصبيه / لا ماهونت متى اداوم
ركان وعيونه على صقر / وعمتك بتجي معك
شوق وعيونها على عمتها / اكيييييييييد
طالع بساعه وبجديه / باقي ساعتين وينتهي الدوام قولي لتركي يجيبكم عندي
شوق بجديه / فيه لبس معين انداوم فيه
ركان بجديه / اليوم بتوقعون على استلام الوظيفه وبكره تدامون
شوق بجديه / طيب
عند ركان
بعد ما انهى اتصاله طالع بصقر
ركان بجديه / زوجتك وزوجتي المصون بيجون
صقر بجديه / نسيت موضوعهم
ركان بابتسامه / زوجتي مكتبها جاهز حصلته بعد حب خشوم ما يفصل بينا الا باب
صقر بضيقه / و زوجتي وين اقلعها
ركان بابتسامه / حط لها مكتب جنبك
صقر بجديه / هذا الناقص وش رايك نتبادل المكاتب
ركان بابتسامه / قلت لك ما حصلت عليه الا بحب خشوم تبيني اتنازل عنه بالساهل
صقر بجديه / والحل وين بحطها
ركان بجديه / حطها مع بنت اخوها
صقر بضيقه / حسبي على زوجتك الي خلتني اسوي شي اكره
ركان بعصبيه / لا تتحسب عليها بالعكس المفروض تشكرها الي بتقربكم من بعض
وقف صقر وبضيقه / انا داخل مكتبي مابي اقابلهم
ركان بستغراب / وش عندك تتهرب من مقابلها
صقر بحرقه / تصدقني لو اقول لك اني مابي اشوفها ومتخوف من شوفتها
ركان بجديه / هي مصيرك وانت مصيرها طيعني واعلن زواجكم قدام الكل وسوي حفله وخذها لبيتك
مشى من قدام ركان وفتح الباب وقبل لا يطلع التفت على صديقه وبحرقه / الله يسامحهم الي اجبرونا على هالزواج مابي اشوفها وانفر منها خلني اتزوجها عمياني قبل لا شوفها
يمكن اذا عاشرتها اقتنعت فيها
طلع من المكتب وركان يفكر بكلام صديقه ومقهور على حاله
عند شوق
التفتت لعمتها وبفرح / ياله بنلبس ونستلم وظيفتنا
ساره بصدمه / نستلمها الحين شلون بقدر اقنع امي تسمح لنا نطلع
شوق بجديه / امي تدري بوظيفتي قال لها عمي تركي وانتي معتبرينك جاسوسه علي
ساره بجديه / اما جاسوسه
شوق بمزح / لو صرتي جاسوسه ونقلتي اخباري لهم بيكون اخر يوم لك بالحياه
ساره بابتسامه / ماني بايعه عمري اذا سلمت منك مراح اسلم منهم لاني دايما كبش فداء لجنابك
نروح لحالنا مع السايق
شوق بجديه / اكيد لا بشوف سالم اخوي يوصلنا
ساره وقفت بجديه / اجل بطلع البس وانتي شوفي اخوك
شوق بضيقه / قبل لاشوف اخوي بطلع لجدتي وبحط عندها خبر
طلعت ساره وشوق دخلت غرفة جدتها شافتها ام سالم صدت عنها
قربت منها شوق وقفت مقابل السرير وبجديه / ركان طلب نجي نستلم وظيفتنا
التفتت لها ام سالم وبسخريه / وليش تعنيتي وحطيتي عندي خبر كان طلعتي بدون ما ندري
شوق بجديه / تعرفيني استاذن بكل شي الا روحتي لامي مستحيل استاذن فيها او اعتذر علشانها
ام سالم بقهر / روحي يا بنت ناصر لوظيفتك ومتى ما حسيتي ان لك جده تعالي لغرفتها
منحرق قلب شوق على جدتها لكن مستحيل تضعف وتعتذر ليش رافضه تعتذر علشانه
مشت من قدام جدتها اخذت لها لبس من الدولاب وطلعت لغرفة ساره
دخلت غرفة الملابس بدون ما تتكلم بحرف والعبره خانقتها من زعل جدتها
طلعت شافت ساره عند الباب وعباتها بيدها
انتبهت ساره لحزن المرسوم على وجه شوق وبجديه / وش صار بينك وبين امي
شوق بحزن / جدتي راسها يابس وانا راسي ايبس مستحيل اعتذر على روحتي لامي وهي مستحيل ترضى الا اذا قطعت علاقتي بامي
ساره بضيقه / وسعي صدرك امي ماتعودت احد يطلع عن شورها وانتي بتصرفك طلعتي عن شورها
شوق بعصبيه وبصوت عالي / يااااااااااااااعلم هذي امي ليش ما يحترمونها علشاني
سحبتها ساره بيدها وبحنان / امشي ننزل وارمي كل شي وراء ظهرك انتي صح وهم غلط
نزلت ساره وشوق ساكته دخلت غرفة الضيوف
الي استقر فيها اخوها شافته نايم
قربت منه / سالم قوم
فتح سالم عيونه بتعب / وش عندك
شوق بجديه / ركان كلم طلب منا نجي نستلم وظيفتنا
لما شافت اخوها صحى طلعت من الغرفه
وسالم دخل الحمام اخذ شور سريع وبعدها طلع لقى شوق وعمته ينتظرونه
بعد نص ساعه وصلو لشرطه كانت شوق فرحانه وساره متخوفه
دخلو واخذت جواله من الشنطه واتصلت على ركان
شوق بجديه / وصلنا وين نروح
ركان بجديه / تعالو لمكتبي
شوق بسخريه / وشلون بعرف مكتبك من بين كل هالمكاتب
ركان بجديه / اجل بطلع لكم
قفل من شوق وطلع من مكتبه شافهم واقفين بعد خطوات من مكتبه قرب منهم
ركان بابتسامه / اهلين
شوق بنفس شينه / وينه مكتبنا
سالم بجديه / متى يخلص دوامهم علشان ارجعهم للبيت
ركان طنش شوق / الساعه 3 يخلص الدوام واذا ما تقدر تجي انا بوصلهم بطريقي
قطعت كلامه شوق وبعصبيه / مشكورررر سالم بيرجعنا للبيت
سالم منقهر من اسلوب اخته / خلاص ثلاث الا ربع واقف عند الباب
شوق بجديه / ننتظرك
طلع سالم وركان مشى قدامهم
مشو وراه بهدوء
اشر لمكتب مقفل وبجديه / هذا مكتبكم ويفصله عن مكتبي باب ياليت تنتبهون لهشي وتحطونه في بالكم
شوق بعصبيه / ياليت تغيره مانبي مكتبنا جنب مكتبك
ركان بعصبيه / اذا ما تبينه اجلسي في بيتكم احسن وياليت لما تتكلمين معي تتكلمين بادب ورسميه احنا بمكان شغل ومابي احد يعرف من تكونين بالنسبه لي فاهمه
شوق بعصبيه وبقهر / فاهمه
ركان بجديه / وياليت ماتنطقين اسمي حاف
شوق بقهر / ممكن نوقع على استلام الوظيفه
ركان بجديه / تعالو لمكتبي وقعو الاوراق وبعدها ارجعو لمكتبكم
مشى ركان وشوق وراه وهي تغلي قهر من ركان
وساره منشده لجماله ورجولته ومنقهره من معاملة شوق له
دخلو مكتب ركان وهو دخل وجلس بمكتبه ومد ورقتين
اخذتهم شوق ومدت الورقه لعمتها اخذتها منها ساره وصارت تقراء المعلومات
ركان عيونه على شوق و في نفسه / مشتاق لك ومشتاق لعصبيتك ياليتك تشيلين نقابك واشوف وجهك وارتوي بشوفته
شوق عيونها بورقتها رفعت عيونها شافت ركان مسرح فيها
شوق بسخريه / نوقع باصابعنا
سحب القلم من المقلمه ومده لها
سحبته من يده بقسوه ووقعت ورقتها ومدت القلم لساره بعد ما وقعت عمتها اخذت الاوراق وحطتهم على مكتب ركان
شوق بقهر / ممكن نروح لمكتبنا
اشر باصبعه للباب الداخلي / ادخلو مكتبكم من هالباب
شوق وعيونها على الباب وبعصبيه / بنطلع من الباب الي دخلنا معه
ركان بعصبيه / لولا وجود عمتك كان صار لي تصرف ثاني يله تسهلو على مكتبكم
طلعت شوق وقبلها ساره ودخلو المكتب وانفجرت ساره بوجه شوق
ساره بعصبيه / كان ضربتيه ولا دستي ببطنه الحين وش سوى علشان تعاملينه هالمعامله اقلها احشميه قدامي خليتيني وسطكم بنص هدومي من الفشيله
شوق مشت وجلست على مكتبها وبسخريه / بغلي واعامله بطريقتي
ساره قربت منها وحطت ايدينها على مكتب شوق وبعصبيه / بغل ينطحك ان شا ء الله
مدري الخبل وش شايف فيك علشان يسكت لك والله لو غيره قطع لسانك الي كله سم
شوق بسخريه / اجلسي على مكتبك وخليه يولي
جلست ساره بهدوء / يا لخبله ما تشوفين جماله وهيبته و رزته والله انه فارس احلام كل بنت ترى معاملتك له بطيره من ايدينك وبعدها تتحسفين
شوق بعصبيه / يوم المنى لطار وجعله ما يرجع وياليت تقفلين السالفه
كل كلامهم مسموع عند ركان الي مولع قهر من شوق واعجبه كلام ساره الي كان بصفه
ركان بعصبيه / انا بغل ويوم المنى لطرت هين يا بنت ناصر وعد لكسر هالراس
بعد اربع اشهر وعشر ايام
بعد العزاء نقلت نوف لفلتها وكملت العده فيها
ركان كاره وجودها معه بالبيت وفرح لما طلبت منه تسكن بفلتها وبسرعه وافق
شوق وساره فرحانات بوظيفتهم بالمباحث وساره استقرت بمكتب شوق وصار اغلب وقتهم فاضيات جالسات على قهوه وحلى واحيان يجيبون فطور معهم
مابعد استلمو التحقيقات او جتهم قضايا مهمه
حاول ركان يطفش شوق بكثر الاوامر لكنها كانت فاهمه قصده وزاد تمسكها بالوظيفه
وبالمقابل ركان زاد قهر منها ومتوعدها بطريقه جديده يطفشها فيها
صقر متجنب ساره وحول دوامه عكس دوامها
ومنى على حالها عايشه بعالم الاموات رافضه تصحى
وام صقر رافضه تطلع من المستشفى الا مع بنتها واضطرو يجيبون لها سرير تنام فيه عند بنتها
ونجود سافرت مع بدر رجع بموعد الزواج وتفاجئ بالي صار كان بيرجع وياجل الزواج لسنه الجايه لكن صقر وام صقر رفضو واصرو على اتمام الزواج وكان على الضيق طلعت فيها ام سالم وحضرت العشاء وودعت بنتها وبعده رجعت للمستشفى
ديما نقلت لجامعه الرياض وتحس بفراغ كبير بعد سفر نجود لكن وجود مرام مخفف عليها
مرام وامها استقرو بالرياض ونقلت بنفس جامعة ديما
اليوم طلعت نوف ومنى من العده
عند نوف
بالصباح خلصت عدتها
كانت جالسه بالصاله لها مده طويله ماشافت بنتها ولا شافت عيالها
ومتاكده ان تركي مانعم يزورونها
وقفت وطلعت لغرفتها و دخلت الحمام اخذت شور ولبست لها بنطلون جنز وسيع وبلوزه ورديه توصل للفخذ حطت لها مكياج خفيف ناويه تبداء حياتها من جديد
نوف بحقد / لازم ابداء حياه جديده بدون ماحتاج فيها لاحد من اليوم بوقف ضدك يا تركي الكلب وبرجع كل شي اخذته مني وبتشوف نوف وش بتسوي فيك
فتحت باب غرفتها ونزلت تحت وطلعت من فلتها ووصلت للباب الفاصل لفلة مها رفعت جوالها واتصلت على مها وتاكدت انها لحالها دخلت وستقبلتها مها بابتسامه
مها بفرح / الله وش هالزين الله لا يعيد الاحزان
نوف بابتسامه / اللهم امين ابي اشم هواء بطلع مشتاقه اشوف الشارع
مها بابتسامه / على ان الوقت متاخر لكن لعيونك راح اطلع واعزمك بالمطعم الي تختارينه
نوف بابتسامه / اجل بتعشيني بمطعم صيني
مها بابتسامه / اجل بلبس عباتي وبلحقك
رجعت نوف لفلتها اخذت حجابها ولبسته وطلعت بال شارع تنتظر مها التفت لفلة تركي
نوف بحقد / من بكره حربي بتبدا معك
سمعت صوت التفتت شافت مها تركب السياره قربت من السياره وركبت وراء جنب مها
نوف بحقد / اليوم طلعت من العده وابيك ترفعين قضيه على الزفت تركي
مها بجديه / من يومين رافعتها واكيد بكره بيجيه استدعاء
نوف بحقد / ابي عيالي وقبلها كل املاكي
ابي اشوفه مفلس
مها بجديه / لا تنسين نصيب سالم بالشركه واكيد بيساعده اخوه يوقف من جديد
نوف بجديه / يمكن اخوه يبيع لي نصيبه ويفتك من وجودي بالشركه
مها بصدمه / وجودك بالشركه
نوف بجديه / بدير نصيبي بنفسي واحتمال كبير ادير الشركه بدال سالم لان نصيبي هو الاكبر
مها بجديه / انتبهي انتي بالسعوديه وكل القوانين واللوائح ضدك
نوف بعصبيه / اووووووف يهالسعوديه الي كل شي فيها ممنوع
مها بعصبيه / وبعدين كم مره قلت لك لاسمع منك هالكلام السعوديه الي مو عاجبتك مهتمه بمصلحتك اكثر منك والي تسويه من خوفها على بناتها
نوف بزعل / ما يسوى علي الكلمه الي قلتها اكلتيني
مها بعصبيه / واذا عدتيها ذبحتك
وصلو للمطعم الصيني نزلت مها وبعده نوف اختارو لهم طاوله بعيده علشان ياخذون راحتهم
عند شوق
منسدحه بغرفة ساره وتفكيرها بموضوع امها وعمها سمعت صوت
فتحت الباب شافت عمها يدخل غرفته طلعت وقربت من غرفته وطقت الباب بهدوء
عند تركي
دخل غرفته ونزل غترته
سمع صوت طق على الباب / ادخلي
دخلت شوق وبارتباك / عمي فاضي بكلمك بموضوع
التفت لها تركي وبجديه / ادخلي وقولي موضوعك
دخلت شوق وجلست على كرسي التسريحه وصارت تفرك يدها بتوتر
عيون تركي عليها وبستغراب / خير وش الموضوع الي مخليك متوتره
شوق بخوف وارتباك / امي طلعت من الحداد
تركي بحقد / ليكون اعرست وجايه تحطين عندي خبر
شوق بقوة / ابيك تتزوجهااااااا
تركي بسخريه / نعم ما سمعت عيدي الي قلتيه
شوق بقوه / ابيك تتزوج امي
وبتردد / وتنفذ وصية ابوي
تركي بحقد وعصبيه / وصية ابوك امك دفنتها بزواجها من ابو ركان
شوق برجاء / طالبتك ياعمي تتزوج امي وتنهون الحرب الي بينكم
تركي بحقد وبعصبيه / الحرب الي بينا بتستمر لين ادخل قبري والي سوته امك في اخوي وفيني مستحيل اقدر اغفره لها واسامحها عليه
شوق ودموعها تنزل / ابوي ظلم امي والي قاله مو فيها واذا تزوجتها بتكشف هالشي بنفسك تكفى ياعمي لا تردني وتزوجها اذا مو علشانها علشان عيالك اخوك وزواجك منها بيكون على وراق وهذا طلب ابوي وبكيفك لو تزوجت عليها ثلاث اهم شي تتزوج امي
طالع بشوق ورحمها ومتاكد انها خايفه ان امها تتزوج وتفضحهم
تركي بحقد وكره / وامك بتوافق علي
شوق بفرح / امي خلها علي بتوافق
تركي بحقد وكره / اكيد بتوافق انا عندها زوج عمرها ماتحلم فيه
شوق بزعل وقهر / لهدرجه امي طايحه من عينك اذا انت زوج امي ما تحلم فيه حتى امي كلن يتمناها وانت الكسبان لوافقت عليك وفوقه تحب يدك وجه وقفا انها تصير زوجتك
تركي / ههههههههههههههه اما كسبان ان امك توافق جعلها ما وفقت ماهمتني وبعمرها مراح تهمني
شوق بضيقه / عمي انت موافق ولا لا
تركي بحقد / اكيد لا لكن علشانك بحاول افكر بهالموضوع
شوق وقفت / طيب متى اخذ ردك
تركي / ههههههههههه يعني مصره ترمين امك بحلقي
وبغرور وحقد / انا تركي الضامي اتزوج الفيله وتذبحني مثل ماذبحت ابوك
شوق باصرار / امي ما ذبحت احد وبكره بالليل باخذ ردك
بعد ما خلصت كلمتها وقفت ومشت قدام عمها
قبل لا تطلع التفتت لعمها وبجديه / عمي زوج نوف عطاك عمره
طلعت شوق بدون ماتنتظر رد عمها بتتاكد ان عمها غبي اذا مافهم الاشاره تتمنى انه يعرف ان حبيبته هي نفسها زوجة ناصر اخوه
نفسها تكشف له هوية امها لكنها عاهدت نفسها ماتكشف شي لعمها الا اذا هو اكتشفه بنفسه وهذا زاد عذابها بعد موت ضاحي
عند تركي
كلمت شوق زرعت بقلبه الامل من فرحته حاس قلبه بيوقف نفسه يضحك بصوت عالي ويبكي من كثر السعاده الي يحس فيها
تركي بفرح / اخير صرتي حره الحين اقدر افكر فيك واحبك بدون ماحس اني مذنب
يفرحتك يا تركي بموت غريمك
لكن شلون بقدر اوصل لها واخطبها وقبله اغير نظرتها عني لازم تعرف اني احبها والي فيني اكبر من الحب
طيرتي النوم من عيوني ياشوق بخبرك الزين
ام صقر
عيونها على سرير بنتها الي نحفت كثير وصارت هيكل عظمي
ام صقر بصوت حزين / يمك ارحميني اذا تسمعيني قومي طولتي وانتي نايمه طلعتي من العده وانتي راقده
تعرفين دمعة امك غاليه وعلشانك نزلت اذا تبين رضاي قومي
منى تسمع امها ودموعها تنزل على خدها حاولت تفتح عيونها علشان امها لكنها محاوله فاشله مثل المحاولات الي قبل
مدت ام صقر يدها على جبين بنتها وصارت تقراء بعض ايات الرقيه
فتحت منى عيونه وحست الضوء يوجعها ورجعت قفلتها
منى بصوت متقطع / يم ه لا تبكين
ام صقر رمت نفسها على بنتها وصارت تبكي بحرقه / الحمد لله على سلامتك تو ماردت لي روحي
منى صارت تبكي بحرقه وام صقر حضنتها بقوه متاكده مصيبة بنتها موجعه وهي ام وحاسه بهالشي
ام صقر بصوت باكي / احتسبي الاجر علشان يشفعون لك عند ربك
ماتسمع غير شهقات بنتها الموجعه
ام صقر بصوت باكي / قطعتي قلب امك خفي على نفسك وخفي علينا
منى بصوت باكي / ليش مامت معهم وش لي بالدنيا بدونهم
ام صقر بصوت باكي / احنا لك ونبيك بوسطنا مثل ماربي ياخذ يعطي
لو درو اخوانك وبنتك برجعتك بيفرحون
صارت ما تسمع الا صوت شهقات بنتها الي متمسكه بحضن امها وغرقته بدموعها
ام صقر بصوت باكي / قومي يمك توضي وصلي وبيتوسع صدرك وتاكدي ان عيالك عند ربي الي ارحم منك عليهم
منى بصوت باكي / يمه ابي ديما جيبوها لي
ام صقر بصوت باكي / الحين اتصل فيها وبتجيك
ام صقر رفعت جواله واتصلت على صقر
عند صقر
كان متمدد على سريره سمع صوت جواله شاف رقم امه / هلا يمه
صار يسمع صوت بكي امه بخوف / يمه ليش تبكين منى صار لها شي
ام صقر تحاول تتكلم من بين دموعها / اختك صحت وتبي بنتها
وقف صقر من الفرحه / لحمد لك يارب الحين جايكم
قفل من امه وطلع من غرفته وطق باب غرفة ديما
طلعت له ديما لابسه بجامه / هلا خالي
صقر بابتسامة فرح / ابشرك امك صحت وطالبه تشوفك
ديما جاوبته بدموعها
صقر بحنان / ليش تبكين المفروض تفرحين برجعت امك
ديما بصوت باكي / ماني بمصدقه ان امي رجعت لنا كل يوم انام وخايفه
وصارت تشاهق / خايفه لصحيت اسمع خبرها
صقر حضنها / تعوذي من ابليس امك مافيها الا العافيه وكلنا ندري لكن الي فيها منها ماتبي تقوم
ديما سحبت نفسها من حضن خالها / دقائق بالبس وبنطلع لها
صقر بجديه / بنتظركم تحت
دخلت ديما شافت مرام نايمه ماحبت تصحيها لبست عبا تها فوق بجامتها وطلعت من الغرفه ونزلت شافت خالها واقف بالصاله التفت صقر
صقر بجديه / وينها بنت خالتك
ديما بجديه / نايمه
صقر بجديه / اجل يله مشينا
بعد ربع ساعه وصلو للمستشفى نزلو ودخلو المستشفى وقبل لا تدخل غرفة امها
مسك صقر يدها و برجاء / لا تنهارين قدام امك الي فيها يكفيها
ديما ودموعها تنزل / ان شاء الله
صقر بحنان / امسحي دموعك قبل لا تدخلين عليها
دخلت ديما وصقر واقف برى
شافت امها تبكي بحضن جدتها صارت تبكي ونست كلام صقر لها
ديما بصوت باكي / يمه
سحبت منى نفسها من حضن امها وبصوت باكي وبحرقه / راحو خوانك ياديما
ديما ركضت لمها ورمت نفسها بحضن منى وبصوت باكي / يمه انا بحاجتك لا تتركيني
منى بصوت باكي / الي صار عقوبه من ربي على تركي لك
ديما وهي بحضن امها وبنحيب / كنت غلطان والحين رجعت لك البنت الي تتمنينها والله مازعلك والي تبينه مني بسويه
منى بعدتها عن حضنها / ااااااااه ياديما رجعتي لي بعد ما فقدت عيالي
ديما بصوت باكي / يمه اطلعي معنا اللبيت وبنام معك بغرفتك
منى بصوت باكي / امك ماتت يديما والي تشوفينها جثتها
ام صقر بعصبيه / انت حيه قدامنا وموت عيالك مو نهاية الدنيا
جاوبت امها بنحيب وبكي يقطع القلب
شوق صارت تبكي
دخل صقر واوجعه الي يشوفه قرب من اخته وباس راسها / الحمد لله على سلامتك
صقر بحنان / ان الله مع الصابرين
منى زاد نحيبها
صقر جلس ومسك يدها بحنان / بكره بتطلعين وبتنورين بيتنا
منى باصرار بصوت باكي / بطلع لبيتي
ام صقر بصوت باكي / اول اطلعي لبيتنا وبعدها ياخذك صقر لبيتك
صقر بجديه / يمه قلتو لدكتور انها صحت
ام صقر تمسح دموعها / لا ما قلت له شي و ماظنتي انه موجود بهالوقت
صقر بجديه / حتى اذا ماكان موجود نجيبه هو المسئول عن حالتها
طلع صقر ومنى انسدحت ودموعها تنزل بغزاره وديمات تبكي على حال امها وام صقر تبكي على حال بنتها
دقائق دخل صقر ومعه الدكتور ومعه ممرضه قرب من منى الي اول ما شافت الدكتور غطت وجها بالشرشف
الدكتور بابتسامه / الحمد لله على سلامتك
منى / ...........
الدكتور بجديه / الحين بنعطيك ابره مهدئة وبكره الظهر بتكونين بالبيت
منى تجاوبه بشهقاتها
قربت منها الممرضه وغرزت الابره بالمغذي وصارت تراقب دخول المحلول
دقائق ومنى مستسلمه لتاثير المهدئ وغطت بنوم عميق
بعد ما تاكد الدكتور من نوم منى التفت لصقر
الدكتور بجديه / بنتكم يبي لها علاج نفسي ياليت تستعجلون العلاج قبل لا تتازم حالتها
ام صقر بصوت باكي / بنتي مو مجنونه يادكتور
الدكتور بهدوء / ياخاله مو كل من يروح لدكتور نفسي مجنون الضغوطات الي نمر فيها تجبرنا نتعالج عن الدكتور النفسي الي بيكتب لها مهدئات تريح بنتك وهذا اكيد الي تبينه
جاوبته ام صقر بدموعها
طلع الدكتور وصقر قرب من امه وبحنان / يمه لا تبكين بنتك اللهم لك الحمد رجعت لنا وعلاجها سهل
ام صقر بصوت / الله يشفيها
اليوم الثاني
بالشركه
دخل تركي مكتبه وطلب من السكرتير يجيب له قهوه تصحصحه من بعد كلام شوق عن حبيبته طول ليله يحلم احلام ورديه رومنسيه اذن الفجر مانام وبعد ماصلى ماقدر ينام وطيف حبيبته يدغدغ مشاعره
دخل عليه السكرتير بفنجال قهو وباليد الثانيه ظرف
حط القهوه قدام تركي ومد الظرف طالع تركي الظرف مستغربه
تركي بجديه / وش فيه الظرف
السكرتير بجديه / شكله مهم لاني مستلمه من شرطي
تركي بصدمه / شرطي
بسرعه فتح تركي الظرف شاف فيه ورقه فتحها كان استدعاءباسمه من الشرطه والموعد الساعه 2 الظهر
تركي رفع عيونه لسكرتير / ارجع لمكتبك
طلع السكرتير
وتركي يقلب بالورقه يمكن يفهم ليش الشرطه طالبته
تذكر مسئول يعرفه بالشرطه
رفع تلفون المكتب واتصل عليه
تركي بجديه / الو
المسئول بجديه / اهلين
تركي بجديه / ابو سلطان انا تركي اكلمك من الشركه
المسئول ترحيب / اهلين اخبارك يارجال من زمان عنك
تركي بجديه / ابو سلطان جاني استدعاء من الشرطه والموعد الساعه 2 الظهر
المسئول بصدمه / انت مستدعى من الشرطه وش السبب
تركي بجديه / لو اعرف السبب كان ماتصلت فيك وانت تعرفني رجال سيده وماني راعي مشاكل ولا براعي خرابيط وبعمري مدخلت الشرطه
المسئول بجديه / اجل بتصل عليهم وبشوف وش السالفه
تركي برجاء / تكفى يا بو سلطان طمني اخاف احد متبليني
قفل من ابو سلطان
شرب قهوته وداخله خوف من الي بيقوله له ابو سلطان
بعد ربع ساعه سمع صوت جواله رفعه من الطاوله شاف رقم ابو سلطان
تركي بلهفه / بشر يا بو سلطان
ابو سلطان باحراج / مدري وش اقولك
تركي بقلق / قول السالفه بالكامل
ابو سلطان باحراج / السالفه عائليه وياليت تحلونها بعيد عن الشرطه
تركي بصدمه / عائليه ومنهو من اهلي الي مشتكيني فهمني السالفه الله يخليك
المسئول بجديه / ارملة اخوك ناصر رافعه عليك قضية تطالبك بعيالها ونصيبها من شركتكم وكل الي تملكه
تركي بصراخ / وصلت فيها المواصيل تشتكيني عند الشرطه
المسئول بجديه / وحاب ابلغك ان كفتك خسرانه بالقضيه لان عندها اثباتات والي داخلين بالقضيه محامين ما يتناطحون
تركي ووجه صار اسود من القهر / ماقصرت يابو سلطان والمشكله بتنحل بدون شرطه
المسئول بجديه / هذا الي اتمناه مانبي تتشوه سمعتكم بقضايا تافهه وبا مكانك حلها بسهوله
تركي بقهر وحرقه / ماقصرت مع السلامه
بعد مانهى اتصاله بعصبيه حذف الجوال على الجدار
تركي بعصبيه وصراخ / وصلت فيك يالصايعه تشتكيني وبتسحبيني لشرطه بتسوين فيني سواتك لي بفرنسا وبتاخذين مني عيال اخوي غصب عني وفوقه كل نصيبي بالشركه تبيني افلس على ايدك لكن حريمتك مستحيل اضعف واتنازل عن كل شي مثل ماضعفت لك بفرنسا
وبصرااااااااااااخ قهر / هيييييييييييييييييييين اذا ربحتي هالمره بكون الربحان دايم
وقف وطلع من مكتبه وفتح الباب بقوة على مكتب اخوه
سالم استغرب دخول اخوه وانصدم من شكله
وقف سالم وبخوف / وش فيك تركي
تركي مد الورقه بوجه اخوه / شوف فعايل الي ضاربني بسبتها رافعه على تركي الضامي قضيه بتسحب عيالها وبتطرني من الشركه
جلس سالم بهدوء / حقها الي مانعه عنها وزين الي سوته فيك
تركي بعصبيه / حتى بهذي بصفها يا سالم بفهم متى بتنصفني عليها
سالم بهدوء / اقصر الشر وتنازل لها عن كل شي واولهم العيال
تركي بعصبيه / مراح اتنازل عن شي لو الثمن اعدامي
سالم بهدوء / خل عنادك ينفعك وبكره سيرتك بتصيرعلى كل لسان
تركي بعصبيه / لولا الرجوله كان قتلتها لكن وش بيقولون تركي قتل مره والي يحط راسه براس مره يصر مثلها
سالم فرحان و مبسوط من تصرف نوف وعارف اخوه يبي له تاديب وقرص اذن وهذا الي سوته
يمكن اخوه لاشاف قوتها يكف بلاه عنها
تركي بتهدد / اذا اخوك مات وماعرف يربيها والله لربيها وبخليها تلعن الساعه الي حطت راسها براسي
مانتتظر رد اخوه طلع من المكتب وضرب الباب وراه بعصبيه
سالم بابتسامه / الله يهديك ياتركي ذوق لو شي بسيط من سوات اخوك فيها الله يقويها عليك
في المستشفى
فتحت منى عيونها شافت امها جالسه وصقر واقف وديما جالسه بالجهه الثانيه وبهدوء / متى بطلع
صقر بحب / ننتظرك تصحين
منى بهدوء / نادوهم يشلون عني الاسلاك
دخلت الممرضه وقربت من منى وشالت عنها اسلاك المغذي وطلعت وقفت منى
ومن طول سدحتها ووقوفها المفاجئ حست بدوخه وقبل لا تطيح مسكها اخوها
سندها صقر ودخلها الحمام
التفت لديما وبضيقه / ديما تعالي ساعدي امك تغير لبسها
ركضت لهم ديما ودخلت مع امها الحمام وشالت عن امها لبس المستشفى وصارت تلبس امها وكانه تلبس صنم خالي من الروح
لنا لقاء باذن الله الاسبوع الجاي
اختكم نسايم نجد
10-02-12, 04:48 AM
جديد مواضيع قسم الارشيف
العرض العادي
