كاتب الموضوع :
ام الجوجو
المنتدى :
القصص المكتمله
مساء الخير حبيباتي
اشكر كل وحده تفاعلت معي <<المهم نرجع لى لروايه اتمنى تستمتعون فيهااا
لا تنسون تضغطون ايقونة الشكر اذا اعجبتكم <<فيس يكسر الخاااطر
الحلقــــــة الرابعة
" حبل الوداع "
صار له جم يوم ما سأل ولا دق .. من بعد ذاك اليوم ..حسيته يبي يقولي شي..بس يكتفي بالنظرات الغريبة ...
شكلها دلال نست تقولي انه يحب يقط نظرات غريبة .. وبالذات لما قطني عند باب البيت ..تهقون حس باللي فيني ؟
يتني خلود العصر ..وقعدنا نسولف ونضحك ..وسألتني سؤال مباغت ما توقعته ..
خلود : تحبينه؟؟
طالعته بخوف ..
هناء : منو؟؟
قالت ..
خلود : منو يعني ؟؟ ريلج ؟؟
ما رديت عليه ..لأن التلفون رن ..طالعته وكان سامي ..رديت خزيت خلود وقلت ..
هناء: جبنا سيرة القط ياه ينط ..
وحطيته عند اذني وقلت ..
هناء: السلام عليكم ..
سامي : وعليكم السلام ..
كان صوته مبحوح .. واعليه ..
سامي : اشلونج هناء ؟؟
هناء: اشفيه صوتك ؟؟
سامي: صوتي رايح ..جوكم اعوذ بالله .. حار وايد ..
قلت بابتسامة ..
هناء: انزين ...الناس تمرض بالجو البارد مو الحار ..؟
كح ..بعدين قال ..
سامي: انا مو متعود على الجو ..
قلت وانا اضحك عليه ..
هناء: صحة صحة .. دير بالك على روحك ..
سامي : انا اللي ادير بالي على روحي ؟؟
كأن قط نغزة!!!..بس ما فهمتها ..نزلت راسي وقلت وانا العب باصبعي وخلود لازقة فيني ..
هناء: ئي انت منو عيل ؟؟
عطس فقلت ..
هناء: يرحمك الله ..
سامي : يهدينا ويصلح بالكم .. المهم انا داق عشان اقولج ااختي دلال عازمتج انتي وعمتي واللي يعز عليكم عندها اليوم على العشا..
لااااااا.. دلال مرة ثانية ؟؟ تنهدت من داخلي وخلود استانست ..طالعتها باستنكار عشان تسكت ..بس صوتها طلع .
فقال سامي ..
سامي : منو عندج ؟؟
كنت ماسكة ايد خلوداقعدها وقلت ..
هناء: لا هاذي رفيجتي ..ما قلت لي انت بتيي ؟؟
سامي : اكيد ..العزيمة لي ولج ..ولا ما تبين؟؟
وقالها بلهجة غريبة .. ماادري اشفيه هذا ؟؟
هناء: لا اكيد ابي ..متى اليوم ؟؟
سكت شوي وقال ..
سامي : لو انتبهتي للي كنت اقوله كنت عرفتي اني قلت اليوم ..صح ؟
استنكرت لهجته.. بهاللحظة دخلت امي ..وقالت ..
امي : خلود امج تحت ..
وطلعت هي وخلود ..وقال سامي ..
سامي : طلعت اللي عندج؟؟
قلت بعصبية ..
هناء: ئي طلعت ..عندك مانع ؟؟
سامي:اشفيج ؟؟
هناء: اسأل روحك ..من اول ما حاجيتني وانت تقط نغزات علي ..
سامي : ما قلت شي ..
هناء: سامي إذا عندك شي قولي اياه كاش بالويه لا تقط نغزات تراني ما احبها ..
سكت جنه مصدوم من اسلوبي وكلامي ..وقال بصوت خافت بهمس ..
سامي : ولا انا احبها ..بس شكلج تبين تهاوشين وانا بروحي ما فين صوت ولا شدة .. مع السلامة ..
وصك بويهي ..
الحين انا الغلطانة ولا هو ؟؟
حذفت التلفون ..مالت عليك ..مارح اراضيك لأني مو انا الغلطانة ..واللي ماتوصله بايدك واصله بريلك ..
نزلت تحت وشاركتهم القعدة ..وقلت
هناء: يما ترى دلال عازمتنا على العشا اليوم ..
قالت امي ..
امي: خير ان شاء الله ..عيل قومي تزهبي عشان نروح ..
قلت
هناء: لا انا مابي ..انتوا روحوا ..
طالعتني امي باستغراب وقالت خالتي ام عبدالله ..
ام عبدالله : ينيتي انتي ؟؟ توج تقولين المرآة عازمتكم ..اشحقة ما تروحين ؟؟
قلت بدون اهتمام..
هناء: مالي خلق ..
قالت خلود وهي تحاجي امي ..
خلود : الصراحة خالتي ..بنتج ..ترفع الضغظ ..
امي: ئي والله ..
وطالعتني ..وقالت .
امي: قومي قومي ...روحي بدلي وادق على طلال يودينا ..
قلت بعناد ..
هناء: مابي ..مالي مزاج اطلع انتوا روحوا ..
بطلت امي عيونها على وسع ..وقالت
امي: نروح والعزيمة لج ؟؟
غمضت عيوني ..الحين الهوشة بتبتدي ..قلت بملل ..
هناء: يما مابي اروح..خلاص انا عندي حل ..دقي على دلال واعتذري لها ..
وقفت بعصبية وقالت ..
امي : مالت عليج من بنت .. تبين تفشلينا جدامهم .. روحي بدلي اشوف ولا تكثرين حجي ..
أفففففف ...طلعت ووراي خلود وانا كارهة هالسامي .. هين يا سامي انا اوريك .. لبست بدلة العيد القديمة عمدا وما حطيت مكياج ولا تكشخت ..حتى عطر ما حطيت ..وامي خالتي وخلود كلهم معارضين للبسي ..بس انا اصريت ..
وصلنا خلود وامها بالأول ..ورحنا لبيت الزفت ..طبعا مو بيته بيت اخته .. اول ما دخلنا الحوش ..شفت يهال يلعبون ..ومعاهم الخدامة .. بيتهم فخم ..لما نزلنا من السيارة ..كانت دلال باستقبالنا .. دخلنا البيت ..
والي كان عبارة عن صالة ..مو صالة قولي ملعب كامل .. وثريا شوي وتلمس الأرض معلقة بالسقف ..مااقدر اوصف اكثر من جذي ..
قعدتنا ..
دلال: حيالله من يانا ..حيالله هناء
وطالعتني وهي تبتسم ..فقلت مجاملة..
هناء: الله يحييج ..
قالت امي ..
امي : ما شاء الله ..بيتكم حلو..
قالت دلال وهي تطالع البيت ..
دلال : والله هذا من ذوقج يا ام طلال ..
بهاللحظة دخلوا اليهال ..اثنين ويوا عند امهم ..
دلال : حمودي وينها اختك ؟؟
قال ببراءة وهو يؤشر برة ..
حمودي : خالي معاها ..
طالعتني دلال وقالت ..
دلال : كاهو ياه سامي ..
جني كنت انظره يعني .. نزلت راسي ابتسم ابتسامة استهزاء ..
سمعت صوته وهو داخل وشايل البنت ..
سامي: السلام عليكم ..
وكان صوته على حاله ..
قالت امي ..
امي : وعليكم السلام ..اشلونك يما سامي ؟؟
قال وهو يقعد .ويحط البنت بحظنه ..
سامي: الحمدلله عمتي ..انتوا اشلونكم شخباركم ؟؟
طالعتني امي جنها تقولي "تحجي " بس انا لفيت ويهي .. لو تموت ما رح اراضيك ..
امي : احنا الحمدلله ..هو ..سامي ..اشفيه صوتك ؟
سامي : والله يا عمة ..ماادري..مو متعود على الجو ..
قالت دلال ..
دلال : صارله يومين مصخن .. اقوله روح الطبيب مو راضي ..
قال سامي وهو يحاجي اخته ..
سامي: مااحب المستشفيات ..روحتهم تييب المرض ..
حرام مصخن ..يعني اللي صار بينا من الصخونة اللي يت له ..وانا ما استحي على ويهي اللي ما سألت عنه ..خلاص عذرته ..
قلت اخيرا ..
هناء : اشلونك سامي ؟؟
قال وهو يحاجي امي ..
سامي : إلا عمتي ما قلت لي طلال اشلونه ؟؟
بغيت بهاللحظة الأرض تنشق وتبلعني .. طنشني ولد الـ.... مسكت حبل جنطتي بعصبية بغيت اقوم ازنطه فيه ..
لفيت ويهي عنه ..
امي : طلال الحمدلله ..بخير .. خلاص ما باقي له شي ويتخرج ان شاء الله ..
هني قامت دلال وهي وتقول
دلال : شكله العشا جهز ..حياكم ..
امي قامت ..وسامي وراها ..بس انا كا فيني بركان ...قمت ومسكت ايد سامي ويريته شوي وقلت ..
هناء: اطنشني جدامهم؟؟ ..وانت اللي المفروض تراضيني ؟؟
قرب ويهه مني وقال ببرود وجمود ..
سامي : عشان ثاني مرة تأدبين ولا ترفعين صوتج علي ..
وبعَد ايدي ومشى ..انصدمت من حركته ..انا اوريك ..رحت وراه ودخلت غرفة الطعام ..وقعدت جدامه قاصدة .. امي يمي ودلال براس الطاولة وسامي جدامي .. وسمينا وقعدنا ناكل ..
امي من بين فترة وفترة تسولف مع دلال ..او سامي ..
امي : ما قلت يما ..امك وابوك ليش ما يوا يخطبون هناء منا ..؟
طالعته بانتصار ..لأن اعرفه ما يحب هالطاري ماادري ليش ؟؟
سماي طالع دلال ..ودلال ردت بس بارتباك ..
دلال : والله يا عمة ..امي وابوي مطلقين ..ومايدرون ان سامي تزوج ..
بغيت اغص باللقمة ..مايدرون؟؟
امي قالت باندهاش ..
امي : مايدرون ؟؟ يعني اشلون ما يدرون ؟؟
طالعت دلال سامي اللي كان ياكل بهدوء ولا عليه .. قالت دلال
دلال : الصراحة ..مو موافقين ..
امي هني وقفت ..وقالت بعصبية ..
امي : مو موافقين ؟؟ انتوا ناسبتوا ناس من الشارع عشان امج وابوج ما يوافقون ؟؟
قال سامي ..
سامي :عمتي اهدي .. ابوي مايدري عنا ولا يعرف حتى اشكالنا ... وامي متزوجة واحد ثاني وهي بعد ما تدري عنا ..يعني باختصار امي وابوي مايدرون عنا ..
كملت دلال وقالت ..
دلال : اصلا انا ابوي ميت ..وانا وسامي اخوان من ام .. ابو سامي مطلق امي من 16 سنة ولا يدري عن سامي شي .. وامي تزوجت للمرة الثالثة وبعدها انقطعت اخبارها ..
هدت امي شوي ..وقعدت قالت دلال تراضي امي ..
دلال : انتوا الزين كله يا ام طلال لا تحطين في بالج انكم رخاص انتوا غاليين علينا كافي ان ناسبناكم واخذنا القمر ..
وطالعتني وانا ابتسمت لها ..هدت الأمور ..وقعدنا ناكل بهدوء وردت امي تسولف مع سامي ودلال بعد ما اتعذرت منهم ..
وانا الأفكار تلعب براسي ..عشان جذي يتضايق كل ما اكلمه عن امه وابوه ..
وطالعته ونظراتي ما كانت تخلو من الأنتقام ..هين يا سامي انا تقولي جذي ..انا اعلمك ..
هناء: إلا صج دلال عندكم اخوان من امكم؟؟
قالت ببساطة ..
دلال : وحدة من زوجها الثالث ..
وطالعت سامي إللي بدا ويهه يتغير ..وانا هني ابتسمت ..
وكملت ..
هناء :ما عندج اخوان من ابوج ؟؟
قالت دلال
دلال : كان عندي بس توفت ..بس سامي عنده من ابوه ..
هني قام سامي وقال وهو يقط القفشة بعصبية ..
سامي : الحمد لله ..
وطالع من الغرفة ..طالعته وشبح ابتسامة بويهي ..بعد دقايق سمعت صوت مسج ..بطلته وكان من سامي ..
" حلوة منج.."
عشان تعرف اني مو هينة ...
بعد العشا كنا واقفين بالشارع نودع دلال ..وسامي كان يحاجي طلال ..امي مسكت ايدي وقالت ..
امي: روحي سلمي عليه ..
ودزتني عشان امشي ..تنهدت بضيق وكره ..ورحت ..
كان يتكلم ولما شافني ياية سكت ..وطلال لف ولما شافني قال وهو يبتسم ..
طلال: اخليكم عيل ..
وراح ..
نزل سامي راسه للأرض ويلعب بالرمل بريوله .. وانا واقفة مثل الصنم مو عارفة شقول ..والهوا حار يطق عباتي ويطير شيلتي ..
قلت اخيرا ومضطرة ..
هناء: آسفة ..
وطالعته ..رفع راسه وقال ..
سامي : على شنو ؟؟
قلت بتلعثم ..
هناء: على اللي سويته ..
قال وهو يتجتف ..
سامي : وشنو اللي سويتيه ؟
يا حول ..
قلت بنفاد صبر ..
هناء: اللي سويته بالعشا ..
قال هو ..
سامي : قصدج انج تجرحيني بذكرج لسالفة امي وابوي ؟؟ ..
طالعت انا الأرض ..وقال وهو يتقرب مني ويوقف جدامي بالضبط ..
am I clear?سامي : هناء ..إذا تبين نعيش بسلام لا تيبن لي طاري امي وابوي
هزيت راسي بايجاب وتفهم ..قال
سامي : تجهزيتي ؟؟
الحمدلله غير السالفة ..قلت اتجاوب معاه ..
هناء: ئي ..خلاص تقريبا خلصت كل شي ..
ونزلت راسي وتذكرت عصام ..ماادري شلي خلاني اتذكره ..بس تعوذت من ابليس وطرت صورته من خيالي ..
رفع سامي ويهي بايده وقال بصوت خافت ..
سامي : آسف إذا ضايقتج او بدر مني شي ما عجبج ..
قلت وانا انزل نظراتي للأرض ..
هناء: انا اللي آسفة ذكرتك بشي مو لازم اذكرك فيه ..
قال ..
سامي :حبيبي ..طالعيني ..
انا هني ويهي ولع .. اول مرة يناديني حبيبي .. رفعت نظري له لقيته يبتسم ..
سامي: إذا في يوم ضايقتج ..قوليلي عشان اقط روحي من الدريشة ..
قلت وانا ابتسم بخجل ..
هناء: لا اشدعوة !! .. كل زوجين يمرون بهالأشياء ..
سامي :انا مالي شغل بالباجين ..انا لي شغل فيج وبس ..
وقتك انت بعد .. خلاص درينا انك راضي ..
قلت وانا انزل نظراتي للأرض مرة ثانية ..
هناء: ممكن اروح ؟؟
ضحك بخفة وبعدها كح .. قلت وانا احط جتفي عليه ..
هناء: صحة صحة ..
بعدما انتهت نوبة السعال ..طالعني بعيونه الفاتحة ..
سامي : روحي لا تتأخرين ..
وابتسم لي
رديت البيت وانا اتذكر اللحظة اللي اجمعتنا قبل شوي ..
يا زينه يوم يبتسم ويضحك ..والصراحة يخرع لما يزعل ..
مرت الأيام وباجر ان شاء الله عرسي .. بدا الجهيز الأصلي ..طلال ماسك خيمة الرياييل وعبدالله وعصام وعيال عمي معاه ..وامي وخالتي وخلود وانتصار وبنات خالتي وعمي كلهم بالقاعة مالت العرس ..
امي منعتني اني اشوف القاعة ماادري ليش ..
وبيوم العرس يت الكوافيرة وسوت شغلها ..
بهاليومين ما كان يدق سامي ..بس بينا مسج ..
بعد ما خلصت دزيت مسج حقه وقلت ..
" انا الحين داخلة القاعة "
ونزلت تحت وطلال كان ينطرني ومشينا القاعة ..
دخل معاي طلال وهاني على يباب الحريم امي اولهم طبعا .. ووصولني للكوشة ..باسني طلال على راسي وقال ..
طلال: مابيج تشيلين علي ..مبرووك
قلت ودموعيتنزل وامسك ايد طلال بقوة ..
هناء: طلال لا تروح ..مسامحتك بس لا تروح ..
ضحك هاني وقال ..
هاني : ياحظي ..ريلج بيخترع من ويهج ..طالعي ويهج اشلون صار ؟؟
قلت وانا امسك بقوة اكبر ..
هناء: مالي شغل ..لا تروح طلال..
قال وهو يهديني ..
طلال: هناء شلعتي ايدي ..خلاص يبا انتي الحين مرة متزوجة..بعدين مايصير اقعد بقاعة متروسة حريم ..يلا عاد ..
وسحب ايده واخذ هاني وراحوا .. بعد ساعة دخل سامي .. اللي كنا الصراحة هيبة .. لابس بشت ومتكشخ ..طالع احلى ..
ويا قعد يمي ..
باسني على راسي وحط ايده وقال دعاء الرسول ..
وقفنا كلنا نصور وخلود اللي ما تستحي ماادري شلي ياها اليوم وقفت يم طلال ..بس طلال طالعها باستنكار ووقف يم امي بالناحية الثانية ..
احسن تستاهل .. بغيت اضحك بس مسكت عمري ..
مسك ايدي سامي وطالعنا من القاعة ..ورحنا شقته ...
قال وهو يبطل الباب ..
سامي : حياج ..
ودخلت .. قعدت عند اول قنفة ..وانا خلاص مستحية حدي .. قعد يمي سامي ..وظلينا ساكتين ..بس قلت ..
هناء: يوعــ....
سامي : ما تبــ....
تكلمنا بوقت واحد ..ضحكنا وقال سامي ..
سامي : ما تبني تاكلين ؟
قلت وانا ابتسم ..
هناء: بغيت اقولك جذي بعد ..خلاص بروح ابدل وامسح الميكب اب واييك ..
رحت داخل وفصخت الثوب ومسحت المكياج ..وعدلت شعري ..وطلعت من الغرفة ..شفته مزهب العشا وقاعد ينطرني ..قلت
ناء: ليش عابلت على روحك ..كنت سويته انا ؟؟
قال وهو يطالعني بتفحص ..
سامي :طولتي داخل وانا يوعان قلت اسوي عشا احسن ..
ويا ليته كان عشا محترم ..جبن ومربى وجاي وخبز ..لا تعبت عمرك .. قلت وانا اضحك ..
هناء: الحين هذا عشا ؟؟
قال وهو يطالع الأكل ..
سامي : والله بغيت ادق على المطعم بس تلفون مقطوع والموبايل ناسيه عند دلال ..
قلت وانا امد ايدي للخبز..
هناء: انت شكلك تحب دلال وايد ؟؟
قال وهو يصب الجاي ..
سامي : امي هاذي الي ما يابتني .. هي اللي ربتني ..
قلت وانا آكل ..
هناء: بس تصدق اول مرة ادري انكم اخوان من ام ..
طالعني شوي بعدين قال ..
سامي : ما احس جذي انا ...وما تفرق عندي اصلا ..
قلت وانا اهز راسي بتفهم ..
هناء: بس شفت دلال ما شفت اختك اللي من ابوك ؟؟
قلت هالسؤال وانا ناسية اللي وصاني عليه .. قال وهو يهد المطارة ..
سامي : هناء..
وطالعني باستنكار ..قلت بسرعة ..
هناء :آسفة ..آسفة .خلاص وعد ما اييب لك طاريهم ..
وسكتنا ..قلت ..
هناء: انزين ليش ما تبي احد اييب طاريهم ؟؟
هد الخبزة وبغى يقوم .. قلت وانا امسك ايده ..
هناء: خلاص خلاص .. والله ما اسألك سؤال يخصهم ..
وقعد وهز راسه كأنه يقول "مو صاحية" ..
اليوم الثاني رحت بيت اهلي اودعهم ..لأني مسافرة .. كنت ابجي بجي جنه ميت لي احد .. وطلعنا انا وسامي المطار ..
كنا سامي مستنانس انه بيفارق الكويت ..لهدرجة ما يحب اهله ؟؟؟
رطبنا الطيارة ..ولأي ما احب اقعد ساكتة ..قعدت اسولف مع سامي ..
هناي: ما قلت لي بأي ولاية بنسكن ؟؟
سامي: نيوجيرسي ..
هناء: واشمعنة نيوجيرسي ؟؟
سامي : لأن اغلب العرب والمسلمين فيها ..وانا عايش هناك اصلا ..
اهاا ... قلت
هناء: انزين ..عند ربع هناك ؟؟
طالعني كأن سؤالي غبي وقال ..
سامي : عيل تبين اعيش بروحي احاجي الطوف ؟؟
قلت وانا اضحك على جملته الأخيرة ..
هناء: موقصد ..بس شكلك انطوائي ..
سامي: بس بالكويت ..اما بأمريكا غير ..
هناء: واشمعنة ؟؟ بس عشان اهلك فيها ؟؟
وحطيت ايدي على حلجي ..اشقلت ؟؟ اشسويت ؟؟
طالعني سامي بنفاد صبر وقال ..
سامي : ما عندي اهل فيها .. وبعدين للمرة الألف قلت لج لا تيبين طاري اهلي ..
هناء: آسفة ...
مارد علي وغمض عيونه شكله بينام .. مالت عليك ..وطلعت لساني له ..
الله يستر من طبعه ..
مرة زين ..مرة شين ..مرة شحالته مرة اييب المرض ..
انا ما يهمني ابي اكمل دراستي وخلاص ..
تسندت على الكرسي وغمضت عيوني انشد الراحة ..
ماادري شنو رح تشيل الأيام لي من مفاجأت ..
انا الحين مقبلة على مرحلة يديدة ومعاي سامي ..
والله يستر من هالسامي ..
الحلقـــة الخـــــامسة
"نقطة وصول"
طارت الطيارة وانا كلي امل بالسعادة ...التفت ناحية سامي لقيته مغمض عيونه شكله نايم ..لفيت للدريشة اطالع السحب وغمضت عيوني اتخيل نفسي طايرة ومتعلقة بالسما مثلهم بدون اجنحة .. الله لو يتحقق هدا ..
بطلت عيوني وانا ابتسم على خيالي الخصب .. حسيت ان في عيون تطالعني ولفيت وكانت عيون سامي
حرقتني بنظراتها ...
قال بصوته الهادي وهو يؤشر برة ..
nice …right?سامي:
هزيت راسي وانا منحرجة لا يكون شافني وانا ابتسم ..بيقول عني مينونة ..يا فشلتي ...
شفته يقوم ويمسك الجنطة ويطلع كتاب ويردها داخل مرة ثانية .. وقعد وبطله ... طالعت غلاف الكتاب ..وكان عن عنوانه غريب ما فهمته ...بس شكله يتكلم عن الإقتصاد وتعلقها بالسياسة ..
انزين بدل ما تقرا ليش ما تسولف وياي ملل الطيارة .. أفففف ..
لفيت للدريشة بقهر ..احاجي منو انا الحين ؟؟
ماقدرت اصبر ..قلت وانا التفت له ..
هناء: الحلو الكتاب ؟؟
قال بدون ما يبعد عيونه عن الكتاب ..
سامي : لو مو حلو ما كنت قريته..
عضيت شفايفي بقهر ..حتر ما كلف على روحه يطالعني وانا اكلمه ..ولا ردوده مثل ويهه ..مالت عليك ..
قلت وانا احاول محاولة ثانية ...
هناء: انزين ما قلت لي ..عندك احد يستقبلنا هناك ؟؟
قال وبنفس الحركة ..
سامي : عامر رفيجي هناك قلت له اني بيي ..
هناء: تثق فيه ؟؟
واخير طالعني وقال ..
سامي : اكيد ..
ورد للكتاب ..يا اخي حاجني ..كلمني .. زهقت انا اللي اتكلم ..بس شكلك يا سامي ما تيي إلا بالغصب ..
هناء: من متى تعرفه ؟؟
طالعني باستغراب وقال ..
who?سامي:
لا الريال مو معاي بالمرة .. قلت بقهر وانا الف عنه ..
هناء: محد..سلامتك
سمعته يقول ..
سامي: قصدج عامر ؟؟ من الثانوية ..كنا ندرس مع بعض ..
ابتسمت خفية ولفيت له ..وقلت
هناء: بامريكا ولا الكويت ؟
قال وهو يرد للكتاب ..لالالالاااااا...
سامي : بامريكا..
قلت باندهاش ..
هناء: انت دارس الثانوية بامريكا ؟؟
لف لي ولما شافني مندهشة قال ببساطة ..
so what ?سامي:
قلت بحماس ..
هناء: لا يعني ..بس احس الحياة هناك غير ..
طالعني شوي بعدين قال وابتسامة طفيفة على ويهه ..
سامي : صج الحياة هناك غير ..بس ما تغني عن الديرة ..
قلت ..
هناء: لا الديرة غير ...اهلك معاك واصحابك ..بس بامريكا تعتمد على روحك ..مو بس امريكا دول اوروبا تقريبا ..
صك الكتاب وقال ..
سامي : بس بدون اهل ..تعتمدين على روحج بس اهلج بعيدين عنج ..وهذا اصعب شي ..
حسيته يتكلم بحساسية ..كأن الكلام نابع من قلبه ..
هناء : وانت ما عشت ويا اهلك ؟؟
طالعني مصدوم من سؤالي ...فتداركت نفسي وقلت اغير الموضوع قبل ما يعصب وامسك الكتاب واطالع
غلافه ..
هناء : ما قلت لي عن شنو يتكلم الكتاب ؟؟
قال وهو يبعد الكتاب عني بضيق ..
سامي :اقتصاد والسياسة ..
حسيته زعل ..
قلت ..
هناء: وانت تحب السياسة ؟؟
قال وهو يصك الكتاب بقوة ..ويطالعني ..
سامي : لأ ..ولا اشتهيها ..
وقام رد الكتاب لمكانه وقعد ونام ...
افففففف ..بالله هاذي حاله؟؟
سلمت امري لله وسندت ظهري للطيارة ونمت ..
بطلت عيوني وشفت الناس تتجه للباب ..عدلت قعدتي ولفيت للدريشة شفت الطيارات والناس رايحة رادة ..وصلنا ..
الطيارة فظت تقريبا واحنا لسة قاعدين ..
لفيت لسامي لقيته لسة نايم ..تنهدت بعصبية ..وقعدت اهزه اصحيه ..
هناء : سامي ..سامي قوم وصلنا ..
بطل عيونه وطالع حواليه بعدين طالعني وقال وهو يرد خصله من شعره ورا ..
سامي : ما حسيت بالوقت ..قومي ..
وقمنا وطلعنا من الطيارة .. واتجهنا للمطار .. لقينا هناك عامر رفيجه .. وصلنا البيت ..طبعا الطريق شوي بعيد ..بس لهيت عمري بالمناظر الطبيعية ..سبحان الخالق ...
وسامي وعامر يسولفون جنهم مو شايفين بعض من قرون ..كلها شهر ..
وقفت السيارة ومعاها وقفت سوالفهم اللي دوخت راسي ..بس تصدقون لاحظت ان عامر هو اللي يتكلم اكثر شي وسامي يسمع او يرد على اسئلته ..وااااي حتى مع ربعك ؟؟
وقفنا جدام بيت حلو .. بسيط حديقة وسياج يحيط فيها ..راح عامر ..ودخلنا الحديقة .. بطل سامي الباب ودخل هو اول بعدين انا ..انبهرت بالأثاث ..لونه حلو .. ازرق وبيج ..
بس سامي قال ..
what this?سامي:
وقالها باستنكار .. طالعته وقلت ..
هناء: شنو ؟؟
تنهد وراح للتفلون ودق رقم .. وتكلم بس ما سمعته ..بس سمعت صوت ضحكته اللي اول مرة اسمعها .. يا حليله ..يازين ضحكته ..مو جني اتغزل فيه ؟؟
مسكت الجنطة ..وتجدمت من سامي اللي صك السماعة ..وقلت..
هناء: وين الغرف ؟؟
قال وهو يمد ايده للجنطة ويشيلها عني ..
سامي : تعالي ..
دلني وكانت غرفة روعة ..كان لون الشراشف والأغطية ذهبي وبيج ..ماادري شسالفة البيج..
قلت بانبهار ..
هناء: حلووو..
ابتسم وقال ..
سامي : عجبج ؟؟
قلت بحماس ..
هناء : اكيد ...البيت كله حلو ..
مسكني من ايدي بغتة ..وسحبني وراه وقال ..
سامي : ما وريتج المطبخ ولا الحديقة اللي برا ..وبالفعل كانت تستحق صورة ..
بعد ما شفت البيت ..رحت فوق ورتبت الملابس وصفتهم بالكبت..دخل سامي علي وقال ..
سامي : لا تعبالين على عمرج ..صوفي بتسويه ..
طالعته باستنكار .
هناء : ومنو صوفي هاذي ؟؟
طالعني باستغراب وقال ..
سامي : الخدامة ..
استحتيت على عمري ..لأني ظنيت فيه ظن السو..
قلت بارتياك وانا امسك قطعة من الملابس..
هناء: مابي خدم ..انا ما احب الغرب يدخلون بيتي ..
طالعني بملامح جامدة وقال ..
سامي : صوفي مو غريبة .
هديت اللي كنت ماسكته وقلت وانا اتخصر ..
هناء : اكيد متعود عليها ..
قال ببرود ...
سامي : طبعا ..هي اللي تسوي لي شغل البيت كله ..ولا تبيني اعيش بفوضى ؟؟
قلت وانا اتقرب منه وضيق حدقة عيني ..
هناء: من اليوم ورايح ما رح تعيش بفوضى ..
طالعني بتمعن وركز عينه بعيني ..وظلينا جذي لدقايق وانا الدم واصل لراسي من الفشيلة بس مابي ابين له اني هونت ..فدققت بعينه ..وقال اخيرا وهو يبتسم ..
as you likeسامي:خلاص...
ومسك الملابس وقعد يرتبهم ..فقلت
هناء: شقاعد تسوي ؟؟
قال وهو يحط الملابس بالكبت ..
سامي : اساعدج ..
قلت ..
هناء: ماله داعي ..انا برتبهم ..
قال وهو يصفط قطعة ثانية ..
سامي : انتي مو احسن مني ..
اعجبت بتصرفه الصراحة ... ابتسمت وقلت ..
هناء: شكلك من مناصري المرأة ..
قال باستغراب ..
سامي : شكو؟؟
قلت وانا امسك قطعة ثالثة ..
هناء: عمري ما شفت ريال يساعد مراة..
سامي : ولا انا ..بس تعودت اني ارتب ملابسي بنفسي ..
احبطت ..عبالي بيقولي ..انا وانت واحد ..مالت على حظي ...الريال ريال ما تغير حتى لو راح المريخ ..
خلصنت ترتيب ...سمعنا صوت التلفون يرن..ما تحرك سامي ..وكمل ترتيب ..رن مرة ثانية ..قلت
هناء: التلفون..
قال بدون اهتمام ..
I knowسامي:
تدري وما ترد ؟؟
هناء: روح رد عليه ..
صك الكبت ولف لي وقال ..
سامي : ردي انتي ..مالي خلق انزل تحت ..
نزلت تحت ورفعت السماعة وقلت ..
hellow هناء:
hi …is sami here?: الطرف الثاني
حرمة ...ولا تبي سامي بعد ..طالعت فوق وقلت بخاطري ..هاذي اولها ..ناديت عليه ..وعطيته السماعة ..ووقفت وراه اسمع شنو يقول ..وكان يتكلم بالعربي ..
سامي : هلا ..
"............................"
تغير ويهه ..بعدين تنهد بعصبية وقال ..
سامي : اشلون عرفتي رقمي ؟؟
"................................."
قال بعصبية..
سامي : لا تحاولين ..ولا تفكرين اصلا ..
وصك السماعة بقوة ..بغى يكسرها ...ومشى ..قلت
هناء: منو اللي كانت على التلفون ؟؟
طالعني بحدة واخذ نفس بعدين قال ..
no oneسامي:
وصعد فوق ...اشفيه عصب ؟؟؟
ما حبيت اضغط عليه ..رحت المطبخ اسوي لنا لقمة ..صعدت فوق اناديه عشان ياكل ..لقيته قاعد على السرير سرحان ..
قلت بصوت خافت شوي..
هناء: سامي ..
مارد علي ...
ناديته واخيرا لف لي ..قلت
هناء: ماتبي تاكل ؟؟
غمض عيونه بتعب وتنهد فقلت بحنان..
هناء: مهما كان الإتصال مزعج لا تخليه يضايقك ..
بطل عيوني وطالعني لثواني بعدين قال وهو يمسك ايدي برقة ..
سامي : دامج وياي مافي شي يضايقني ..
بطلت عيوني على وسع ..هيييه ..دخلنا بالمغازل ؟؟ ... اول مرة يقولي هالكلام..
مرر ايده على خدي وقال بصوت عذاب ...
سامي : حبيبي مابيج تزعلين مني اذا ما كنت متجاوب وياج في اي شي ..
وبعد ايده وقال ..
سامي :انا بس ..بعض المرات اكون مشوش ..
ابستمت له بخجل وقلت .
هناء: عادي انا اللي مابيك تزعل من لقافتي ...
قال وهو يلعب بشعري الأسود...
سامي : احلى لقافة ..
نزلنا تحت وقعدنا ناكل بهدوء ..كنت آكل وفكري شغال ..أسرني بكلامه ...تذكرت اللي صار فوق ..طل رومانسي الأخ ...
فاجأني يقول ..
سامي : هنوتي .. لازم تدخلين معهد ..تاخذين كورس باالإنجليزي ..
هنوتي؟؟!!! مسرع طيح الميانة .. قلت
هناء: انت علمني ..
سامي : ودي ..بس هناك احسن .. بعدين انا كلها اسبوع وارد الشغل ..
قلت اساله ..
هناء : انت تشتغل هني بعد ؟
قال ..
سامي : اكيد ..عندي مكتب فاتحه مع عامر شراكة ..
هزيت راسي بانبهار ..وقلت
هناء: تدرس وتشتغل ..
وكمل ..
سامي : واحضر مشروع التخرج ..
كل هذا ..اشلون يقدر ؟؟؟
خلصنا الأكل .. وشلت الصحون..انظفهم.. شفته داخل المطبخ وراي ..ويلبس المريلة ..ويقول ..
سامي : قلت لج انتي مو احسن مني
ضحكت عليه ..وقعدنا نغسل الصحون والجلاصات ونظفنا المطبخ بالمرة ...سمعنا طق الباب ..
قلت وانا اطالع الساعة اللي تشير للسبع المغرب...
هناء: عازم احد ؟؟
قال وهو يفصخ المريلة ..
سامي : محد يدري اني راد إلا عامر ..
وراح للباب ..انا غسلت ايدي وصعدت فوق اتسبح وابدل ..لما خلصت نزلت تحت ..لقيت سامي قاعد مع واحد شكله بالأربعينات ..وكان الصراحة حليو..بس منو هذا ؟؟
اتجهت للمطبخ .. وزهبت شوية اكل وجاي..دخل سامي بهاللحظة ...وقال بحنق ..
سامي : زين أنج زهبتي شي ..
واخذ الصينية مني ..وقالي .
سامي : تعالي سلمي على الريال ..
انصدمت ..اسلم على ريال غريب عني ؟؟!!!
قلت باعتراض واستنكار ..
هناء: وين اسلم عليه ؟؟
قال بنفاد صبر ..
سامي : تعالي وانا اقولج ..
طلعت وراه ..حط سامي صينية الجاي ..وقال وهو يؤشر على الريال ..
سامي : اعرفج ..ابوي ..
طالعته وعيوني وشوي وتطلع من مكانها ..
ابوه!!!!
قلت اتدارك الموضوع ..
هناء: هلا اا..هلاعمي ..
وقعدت يم سامي اللي لاف ويهه عن ابوه ..
ابو سامي : هلا يا بنتي ..اشلونج ؟؟..شخبارج ؟؟
هناء : الحمدلله ..انت اشلونك عمي ؟؟
بو سامي : انا بخير ...ما قالي سامي انه متزوج وحدة حلوة .
ابتسمت بخجل ..وقلت
هناء: تسلم ..
قال سامي وصوته لا يخلو من السخرية..
سامي: زين انك عرفت اني تزوجت اصلا ..
طالعته ..كفخته بايده بدون ما يلاحظ عمي ..فقال عمي ..
عمي: انت ما قلت ..لولا عامر ما كنت عرفت ..
لف له وقال بنرفزة..
سامي : انت اصلا تعرف اخباري من عامر ..ليش يايني عيل ؟؟
شهقت وحطيت ايدي على فمي مصدومة من كلام سامي ..ليش يحاجي ابوه جذي ؟؟
قلت اغير الموضوع قبل ما يكبر ..
هناء: إلا صج عمي ..ليه ما يبت عيالك معاك ؟؟
لف لي سامي بعصبية ..انا هني بلعت لساني ..بدل ما اكحلها عميتها ..
فقال عمي ..
عمي : مرة ثانية ان شاء الله يا بنتي ..
وقام وقال ..
عمي : يلا اشوفكم على خير ..
قال سامي بدون ما يقوم ..
سامي : هذا إذا كان في مرة ثانية ...
هذا وبعدين معاه ؟!!!
طلع عمي..وقلت انا باستنكار..
هناء: ليش تحاجي ابوك جذي ؟؟
قال بعصبية ..
سامي : توه ايي يسأل ...
ووقف ..فقلت انا ..
هناء: ولو انت المفروض ما تكلمه جذي ..هذا ابوك ..
قال ..
سامي :وهذا اللي قاهرني انه ابوي ...
قلت ..
هناء: انت شنو سالفتك بالضبط ويا اهلك؟؟
قال بحدة ..
it’s none of busnesesسامي :
وصعد فوق .. والله حالة ...انا اتمنى اشوف ابوي وهو يحاجيه جذي ؟؟
رحت نمت..وانا في بالي جملة وحدة ترن" لازم اعرف قصة سامي ويا اهله"
اليوم الثاني ..قمت على صوت تلفون ..وكان اذان ...تقلبت الناحية الثانية ..وكان المكان فاضي ...قمت ادور سامي بنظري ..بعدت اللحاف وقمت توضيت ...وصليت ... هم سامي ما كان موجود ..نزلت تحت لقيته قاعد على الكرسي ومنزل راسه وببساطة نايم ..ولاب توب جدامه طافي ...
قعدته وقلت ..
هناء: اذن الفير ..
قام وراح الحمام عزكم الله ..ورديت انا نمت .. قمت على الساعة ثمان .. والبيت كان فاضي ...
قعدت انبش في الملفات اللي بالمكتبة ..وكانت كلها عن شغله ... هديتهم ... لفت انتباهي صور مصفوفة بعناية على احد رفوف المكتبة ..وكان فيها سامي لما تخرج ..ولما كان بالمدرسة ..وما ربعه ..وبين مدرسينه .. واخيرا وهو رضيع وشايلته وحدة..اكيد امه ...اكيد طفولته كئيبة بدون امه ..
سمعت صوت الباب يتبطل .ودخل سامي لابس لبس الرياضة ... ابتسم لي وقال
سامي : صح النوم ..
هناء: وينك؟؟
سامي :كنت العب رياضة برة ..
هزيت راسي بتفهم ..ورحت سويت الريوق ...علمني انه رح ياخذني اليوم المعهد يسجلني .. بعد ما خلصنا بدلت وطلعت معاه شوي نتمشى لين تطق الساعة عشر موعد التسجيل ...
الجو كان بديع ..مشينا ..لين وصلنا لحديقة عامة تطل على البحر ...
سامي : هني عاد كنت دايما ايي لما اتضايق ولا اكون مستانس ..
طالعت البحر وقلت ..
هناء:معاك حق تيي هني مافي احلى من البحر...
كان الهوا يلعب بطرف شيلتي ..والهوا يطق ويهي برقة ..
ما ادري إذا حياتي بتظل هادية جذي ولا رح تواجهني عقبات ..
طالعت سامي اللي كان يطالع البحر بعد ..
شنو قصتك بالضبط يا سامي ؟؟
غامض مثل البحر اللي جدامنا ...ما ادري رح نتفق في يوم ..ولا بالنهاية كل واحد رح ...
"اشفيج تطالعيني ؟"
انتبهت على صوته ..وقلت ..
هناء: هلا ؟؟
طالعني وركز عيونه بعيوني ..وقال ..
سامي : اقول اشفيج تطالعني ؟؟
صدقت عمرك انت ؟؟ قلت وانا ارد اشوف البحر ..
هناء : ما كو شي ..
سكتنا بعدين قلت..
هناء : متى تسجيلي؟؟؟
طالع الساعة وقال ..
سامي : بعد ساعة ..
هناء : لا..تسجيل الجامعة ..
سامي : اممممم...تقريبا بعد شهر ..تو الناس ..
هزيت راسي بتفهم ...قال هو ..
سامي : انت اخترتي المحاسبة ولا هم حطوج فيها ؟؟
هناء: هم ..
سامي: عاد المحاسبة صعبة كلها رياضيات ويبيلها مخ ..
وانا ما عندي مخ ؟؟
قلت بصوت مستنكر ..
هناء: الحمدلله انا ذكية ..
ابتسم وقال ..
سامي:يا واثق ..
قلت بعصبية مو في محلها ...
هناء: شاك بجذي ؟؟؟
طالعني وما رد علي ..فقلت بحدة ..
هناء : إذا شايفني غبية اشحقة تزوجتني ؟؟
السؤال ابدا مو وقته ..والهوشة اصلا مالها داعي بس نرفزني بأسلوبه ..
طالعني وملامح خالية من التعبير ..وقال بهدوء ..
سامي : حبا في غباءج ..
وقام وقال ..
سامي : قومي نتمشى ..
قلت بعناد..
هناء: مابي ..روح بروحك..
سكت وما قال شي وتحرك وخلاني .. طالعته يبتعد ..مايهمني ...ورديت طالعت البحر ..وريدت طالعته مرة ثانية لقيته بعد وايد .. خفت ..وقمت وانا اقول ..
هناء: سامي ..لحظة ..
خلاني اركض لين عنده ..وقلت وانا الهث من التعب ..
هناء: اشفيك انت ما تصدق احد قالك روح رحت ؟؟؟
مارد علي وكمل مشي ..وانا تحركت وظليت يمه ...حط ايده بمخابيه ..وانا قعدت اراقبه خلسة .. سامي يشبه ابوه حيل ..نسخة منه ..
شفته يغمض عيونه ويوقف ..اخذ نفس وبعدها بطل عيونه ..
قلت انا ..
هناء: الجو حلو ..
طالعني ورد طالع الفراغ ..
مطنشني على الآخر .. قلت وانا مليت من الطناش..
هناء : آسفة ..
ما تحرك ولا لف لي اصلا ..بس قال وهو يطالع الفراغ ..
سامي : شكلها حياتنا بتمشي على كلمة " آسف "
وطالعني بعدها .. ماحبيت نظرة السخرية اواستخفاف النابعة من عيونه ..
تمشينا واحنا ساكتين .. مرت الساعة بسرعة ورحنا المعهد وسجلت فيه ..وردينا البيت ..
وطول الوقت سامي كان ساكت .. لين الحين زعلان يعني ؟؟ ما انا اعتذرت منه ..
سويت الغدا مع انه مافي شي ينطبخ بالبيت ..بس اعتمدت على الخضرة القليلة اللي كانت بالثلاجة ..
وصعدت فوق انادي سامي ..
وصلت للباب مديت ايدي ابطله ..سمعت ..
" شهر ما اشوفج ؟؟ ظلم هذا .. لا لا باجر ابي اشوفج مالي شغل "
إلى زوجي العزيز مع التحيه ... الكاتبه : ليل العشاق منقولة للامانة
--------------------------------------------------------------------------------
الحلقـــــــة السادسة
" الحقيقة "
حسيت بالبراكين الغضب تفجرت فيني وبخارها طالع من اذوني مثل الرسوم ..مسكت مقبض الباب بقوة وعصبية ودخلت الغرفة ...وهو كان شاق الحلج ويضحك لما شافني داخلة عليه بهالطريقة اختفت ضحكته وطالعني باستغراب ..بعدين انتبه للتلفون وقال ..
I will talk to you later …ok? Bye . سامي:
وصك التلفون وطالعني ووقف تجدمت انا بعصبية وقلت ..
هناء : اشرايك تعزمها بعد ؟؟
طالعني بدهشة مو مو مستوعب وقال بهدوء ..
سامي : منو؟؟
ثرت انا وقلت ..
هناء: إلا كنت تكلمها قبل شوي ...
كان يناظرني مو مستوعب بس تغيرت ملامحه إلا استخفاف هز راسه بحسرة وقال ..
سامي : عواطفج تسبق تفكيرج ..
وتجدم لي بس عداني ..انا جملته الأخيرة نرفزتني وتجاهله لي خلاني انعمي وامسك ذراعه والفه ناحيتي واقول بثورة..
هناء: انا اكلمك لا تهدني وتمشي ..
سحب ايده وطالعني بحدة وراح للتلفون ودق الرقم ..وحطه على سبيكر وياه الصوت ..
الطرف الثاني : سامي شوفي ازعجتني ..
كانت مرة ولهجتها شامية .. طالعته بحدة وقهر ..وهو يبادلني النظرة بنظرة باردة .. قال وهو لسة يطالعني ..
سامي : صوفي .. جم عمرج ؟؟
تجتفت انا ولسة كنت ارمقه بنظراتي الحادة ..
قالت صوفي ..
صوفي : لشو تسأل ؟؟
قال وهو يقعد ..
سامي : قولي وانا بعدين اقولج ليش ...
صوفي : خمس وخمسين ..قولي بأة لشو تسأل ؟؟
صعقت .. عيوز... نزلت انظاري للأرض مفتشلة .. سمعت سامي يقول ..
سامي : بس عبالي ان عيد ميلادج قرب .. خلاص ماما مع السلامة ..
وصك السماعة .. كان السكوت سيد الموقف .. رفعت راسي لقيته يطالعني ..وكانت نظرات تذوب الصخر ..تمنيت اكون تراب تطيره الهوا ..تمنيت ويا ليت تتحقق الأمنيات لما نتمنها ..اكون وحدة من الكماليات اللي بالغرفة ...
بغيت اتكلم بس مو عارفة شقول .. لو تكلمت مارح تكفي .. لو بينت له اني متأسفة مارح يعذرني ..بس قلت بتلعثم وتحت انظاره ...
هناء: آسـ...
شفته يقوم ويطلع من الغرفة ..بكل هدوء .. خلاني واقفة مثل الهبلة ..وهذا اشد من التعصيب او الطق ..
حسيت نفسي ولا شي .. تنهدت وطلعت وراه لازم ابرر له ولا رح يفهمني غلط ..نزلت تحت لقيته قاعد على القنفة وكان معطيني ظهره ..شديت على روحي ..واخذت نفس ..
توكلنا على الله ..
تقدمت وقعدت يمه وقلت وانا اطالعه ..
هناء: سامي .. آسف على اللي قلته ..بس والله ما كنت اقصد ..انا عبالي انك ..
قاطعني وقال بحدة هادية ..
سامي : اني اكلم وحدة ؟؟
نزلت راسي اطالع اصابعي ..بس قلت ..
هناء: عمتني الغيرة ..
ما سمعت إلا ضحك ..رفعت راسي وقلت ببلاهة ..
هناء: على شنو تضحك ؟؟
قال وهو يحاول يمسك روحه من الضحك ..
سامي : تدرين هناء انج تضحكين .. أي غيرة اللي تكلمين عنها؟؟؟ انتي الحين يعني غيرانة علي ؟؟
يستهزأ فيني ؟؟
قلت بعصبية عمياء ..
هناء: وانت شنو شايفها ؟؟
وقف وقال ..
سامي : شايفها يا عمري ..انج تدورين علي الزلة ...شايفها يا حياتي ..انج تبين مشكلة من لاشيء ..
وقرب مني بغتة واحاطني بجسمه المايل علي لجدام لدرجة ويهه صار قريب وايد وقال وهو يحط عينه بعيني ..
سامي : لا تقصين على روحج هناء ..
ارتبكت من قربه بس قلت ..
هناء: ليش ادور عليك الزلة ..انا ما بيني وبينك شي ..
بعد وقال وهو يقعد مكانه مرة ثانية بس هالمرة يطالعني ..
سامي: صح ما بينا شي عشان تدورين علي الزلة ...بس ما لاحظتي انج بس قاعدة تسوين مشاكل من اول ما تزوجنا ؟؟ بدينا بالهوشة اللي صارت بالتلفون ...بعدين الحين .. والمستقبل ماادري شنو رح تسوين ..
معاه حق ما احس بنفسي وانا افتعل المشاكل ...سكت مارديت عليه ..وهو بعد تنهد وسكت ..وظلينا جذي لثواني .. بس انا قلت ..
هناء: سامي خل نبدأ صفحة يديدة ..
لف لي وطالعني شوي وقال ..
سامي : حياتنا صفحة جديدة بس رح تظل صفحة جديدة للابد ؟؟
العصر كنا في نتمشى بعد ما هدينا وصفينا النفوس .. كنت اتأمله ..ماادري ليش .. واحد حليو ومملوح وكل بنت تتمنى واحد مثله ..غني وعنده خير ..ليش اختارني انا من بد البنات ؟؟؟ ..ما شافني إلا مرة وحدة ..وثاني يوم ياه خطبني .. انزين خلود بنت عمته ليش ما تزوجها ؟؟ الأقربون اولى بالمعروف ..
غريب هالإنسان ..احسه غامض ..وبحر عميق في اسرار ..والأسرار هاذي مارح تطلع إلا لما انا انبش وراه ...
اموت واعرف شنو قصتك يا سامي ؟؟ وشنو قصتك ويا اهلك ؟؟
بس مع هذا حنون ..طيب ..ما يحب الفشخرة والتظاهر جدام الناس .. اللي يشوف ملابسه الحين ما يقول واحد ولد عز ..
يعتمد على نفسه يدرس ويشتغل بنفس الوقت ...مو نفس شباب هالوقت اللي ما همهم إلا المغازل والحب والخرابيط..
طيبته واخلاقه العالية هي اللي تجذبني ناحيته .. ماحسيت بنفسي غلا وانا اسند راسي بذراعه ..
حسيته طالعني بس رد طالع جدام ...مو اقولكم حنون ..وصلنا لمرفأ للقوارب الصيد .. شد على اصابع ايدي اللي انا شبكتهم بين اصابعه وقال ..
سامي : شايفة القوارب اللي جدامج ؟؟ اشتريت واحد منهم ورحت رحلة صيد مرة مع عامر ..وكنت يومها قاعد .....
كان يحكي وانا اطالعه اشلون يتكلم ..واضحك على تعليقاته على نفسه او على ربعه ... يتكلم مثل اليهال ..
لا شعوريا مديت ايدي وبعد خصلة كانت على عينه وهو يتكلم ..وقف عن الكلام وطالعني بعيونه الفاتحة ودقق بعيوني ..
ابتسمت انا وقلت ..
هناء: كمل ليش وقفت ؟؟
مسك ايدي وحطها على صدره ..وقال ..
سامي : ما تخيلت في يوم اني القة وحدة ارتاح لها مثلج..
طالعت الرض خجلا وقلت ..
هناء: ليش ؟؟...عندك عامر ..
سامي : انا قلت وحدة ..عامر ريال ..
ضحكت انا خبالي ..ما انتبهت عليه .. طالعني وانا اضحك وهو يبتسم ...
قلت ..
هناء: اشفيك تطالعني ؟
شد على ايدي بس برقة وقال بحنان..
سامي : ما ...
قطع كلامه صوت تلفونه ..
سامي : منو المزعج اللي يدق الحين ؟؟
طالعت حوالي وقلت ..
هناء: الناس عصر رد على تلفونك .
مسك تلفونه ..وطالعه باستغراب وقال ..
سامي: رقم غريب ..
رفع السماعة ورد وقال ..
sami spaeking سامي:
تغير ويهه وصار بلون الدم .. قال بعصبية يحاول يخفيها ...
سامي : وانا قلت لأ ... مابي اشوف احد فيكم ...غصب ؟؟
وصك التلفون بعصبية بغى يكسره ..شفته يفرك جبهته بتوتر..فقلت ..
هناء: سامي ..منو اللي كان يكلمك ؟؟
لف لي بحدة ..وعيونه ترسل سهام نارية لي..خفت ورجعت خطوة ورا ... قال هو
سامي : ناس ثقال دم ...
ارتحت لما شفته يتجاوب معاي .. قلت بحنان ..
هناء: انت قلتها ناس ثقال دم ..لا تهتم ..ولا تحط في بالك ..
قال وهو يطالعني بضعف ..
سامي : تعبت وانا احاول ابتعد عنهم ..ليش مو راضيين يخلوني في حالي ..ليش ؟؟
كنت اجزم ان اهله اللي ما يحب طاريهم ..قلت اخفف عنه ..
هناء: سامي ...لا تضايق نفسك بنفسك ...خلك بعيد عنهم ..
هو راسه بتفهم ..سكت شوي اشوفه ليما هدأ شوي ..بعدين قلت وانا امسك ايده ..واخليه يمشي ..
هناء : تعال يلا كملي عن سالفتك ويا عام وربعك يوم اجرتوا واحد من القوارب ..
طالعني وابتسم ابتسامة باهتة وقال..
سامي : قطيت عامر من القارب و...
وكملنا سوالف لين وصلنا للمطعم تعشينا وردينا للبيت ...وهذا كان مؤشر يرفع من رصيد حبي لسامي اللي انولد بهاليوم ...
مر الأسبوع بسرعة ..وانا بين البيت والمعهد ..وسامي انشغل بالمكتب ..والدراسة مابقى عليها إلا ثلاث اسابيع ..
واهلي طبعا ما نسيتهم بينا تلفون ..وبعض المرات اكلمهم على المسنجر ...والبرد بدا عندنا لأن في نص تسعة تقريبا ..بدت الدنيا تبرد ...وانا داخل البيت اغطي روحي بلحاف او البس جاكيت ..وسامي يتطنز
هو متعود انا لأ ...
في يوم عزمني سامي برة كترضية لأنشغاله عني بمكتبه ..وصج هاليوم كان مغيم وانذار للهطول الأمطار..
لبست وطالعنا بالسيارة نتمشى والطريق كان طويل مرينا على جبال واودية .. وبالردة ..
سامي : لا عاد لازم تتعلمين اشلون تحجين انجليزي ..
هناء:ئي بس مو بينا ..يعني لا تكلميني انجليزي ..
طالعني باستخفاف ..وقال
سامي : لا والله ؟؟ لازم تتعلمين اشلون تنطقين الكلمات عدل ..ولا اشلون بتحجين العالم والناس وانتي تكلمين حالج حال الهنود ..
ضحكت على تعلقيهوبنفس الوقت طقيته على جتفه وقلت ..
هناء: بايخة ..
ابتسم هو ..بعدين حسيت انه خفف السرعة ...قلت باستغراب ..
هناء: ليش تخفف السرعة ؟؟
قال وهو يبركن يمين ..
سامي : شكله خلص البنزين ...لااا
وطق السكان ع الخفيف رافض الوضع ...طالعنا حوالينا وقلت ..
هناء: الطريق طويل ..يبيلنا ساعة بعد عشان نوصل البيت ..
هز راسه وهو يقول ..
سامي : وهذا الطريق فاضي مافي احد ...
قعدنا بالسيارة ننطر على الأقل احد يمر علينا ..بس للأسف خاب املنا .. طلع سامي ووقف عند باب السيارة يحاول يدق على اي احد ..بس ماكو ارسال ... رد دخل سامي السيارة ..وقالي ..
سامي : ماكو ارسال ..
هناء: والحل ؟؟
طالعني وفك زرار القميص وقال ..
سامي : ماكو إلا ان ننطر احد يمر علينا ..
وهذا الواقع ..مر الوقت ..وبدت الدنيا تظلم والهوا بدا يشتد .. وانا بديت ابرد ..انكمشت على روحي احاول اضم نفسي واحط الجاكيت علي عدل ما اخلي هوا يدخل او يطلع ..
سامي : بردانة ؟؟
طالعته وهزيت راسي بايجاب ..شفته يفضخ جاكيته وربطة اللي رابطها حوالين رقبته ويعطيني اياهم ..
قلت باعتراض ..
هناء: اووه سامي ..لا انت بعد رح تبرد ..
قال وهو يبتسم ..
سامي : ما يغلى عليج ..
اخذتهم ولبستهم فوق الأكوام اللي لابستهم ..
سامي : جذي احسن ؟؟
هناء: ئي ..
لف وطالع حواليه ..
سامي : لو ادري ان بيصير جذي ما كنت طلعتج ..
هناء: انت ماتدري الله شنو كاتب .
سامي : صح ..بس انا صاحب السيارة ولازم اجيك عليها فيها بنزين ولا لأ ..
قلت وانا اصك الدريشة من البرد ..
هناء : صار اللي صار الحين ..وثانيا انت معاي مو انا بروحي اللي علقت ..
سامي : انتي امانة هناء..إذا صار فيج شي اهلج مارح يسامحوني ..
قلت امزح..
هناء : اهاا ..يعني مو حبا فيني ..خوف من اهلي ..
ضحك بخفة وقال ..
سامي : انتي حياتي كلها اشلون ما اخاف عليج ..بس الخوف الأكبر اهلج ..
ابتسمت على ضحكته وقلت ..
هناء: لا تخاف اهلي بس رح يشنقونك ويقطونك لجلاب السكة ..
قال ووهو يضحك ..
سامي : بس ؟؟ لا طيبين اهلج ..
ضحكت على اسلوبه .. بس شفته يضم ايدينه لبعض ويفركهم ناشد الحرارة ..قلت وانا حاسمة امري وامد ايدي لجاكيته افصخه..
هناء: اخذ ..انت رح تموت من البرد واهلك بيذبحوني عشانك ..
انتبهت للي قلته ..لفيت ببطء مابي اشوف علامات الغضب عليه .بس شفت العكس .. لقيته هادي ..ويقول ..
سامي : هذا إذا دروا اني مت ..
تعجبت منه ..ليش ماخذ موقف معادي من اهله ...قلت وانا بايعتها ..
هناء: سامي ..انت ليش متحامل على اهلك؟؟
وعرفت درجة حماقتي من تعبيرات اللي انرسمت على ويهه وقال بحنق ..
سامي : لا تضيقين خلقي بهالسالفة ..تراني مالي خلق ..
بلعت لساني وسكت .. وحاولت افصخ الجاكيت بس هو قال بضيق ..
سامي : خليه ..
نبرة صوته خليتني اسمع كلامه بطواعية ...واخلي الجاكيت ..واستقر نظري على الشارع..بس خذتني الأفكار ..
البني آدم يتمنى يلقى اهل وهو ما يحب يسمع طاريهم ..والله غريب ...
غمضت عيوني ..النوم لعب لعبته ..ونمت ..
قمت على صوت سعال ..شفت سامي قاعد يسعل ..قلت وانا احط ايدي على جتفه واقول .
هناء: قلت لك رح تبرد..
طالعني وقال ..
سامي : قمتي ؟؟ بسرعة تنامين انتي ..
ولمحنا ضوء ايي من ورانا ..لف سامي وقال وهو يطالع الشاحنة اللي تقرب ..
سامي : قومي خل نوقف راعي الشاحتة هاذي ..
وقام وانا وراه ... طلعنا للشارع ..والدنيا ظلام ..وقف سامي بنص الشارع ..واضطر صاحب الشاحنة ان يوقف ..
بعد اخذ وعطى رضى صاحب الشاحنة..وركبنا ..بس وين..ورا ..بالدبة ..ولأن ما باليد حيلة ركبنا ..وحرك ..
سامي : شكلنا ما رح نوصل إلا الفير ..
طالعت الساعة اللي كانت 12 ونص نص الليل ..وبعدين طالعت حوالي ..الصناديق مالية المكان ..تسندت على احد الصناديق ..وخبيت ايديني بالمخابي ..وقلت لسامي ..
هناء: باجر وراك دوام ؟؟
قال وهو يحط ايده على جبهته وبفركها بتعب ..
سامي : للاسف..
وسند راسه على واحد من الصناديق ..بهيئة توحي للناظر انه تعبان او فيه شي ..
قلت بخوف ..
هناء: سامي ..اشفيك؟؟
طالعني وقال وهو يغمض عيونه ..
سامي : راسي مصدع شوي ..
قلت بامتعاض ..
هناء: قلت لك رح تمرض ..
وكح بعد جملتي ...وقال
سامي : عادي مو اول مرة امرض..
ورد يكح ..قمت من مكاني ..ورحت قعدت يمه ..وفصخت الجاكيت وغطيته فيه ..عدل من قعدته وقال لي باعتراض بس بصوت واهن ..
سامي : ماابيه اخذيه ..تدفي فيه ..
ما سمعت كلامه وغطيته عدل .. ابتسم لي بتعب وقال ..
سامي : حبيبتي ماابيه رح تمرضين جذي ..
قلت وانا اصك سحاب الجاكيت ..
هناء : مو مشكلة نمرض مع بعض ...
كح للمرة الرابعة ..تحسست جبينه لقيته دافي ..
هناء: بسرعة تمرض ...خل السحاب مصكوك..
قال مثل اليهال ..
سامي : ان شاء الله يما ..
بعدها مال علي وحط راسه على صدري وهو يتنفس بعمق كأنه يطرد الأحزان والهموم من صدره ..
ماادري مهما ضحك ولا ابتسم احسه من داخل كومة من الحزن وياليت اعرف شنو هي ؟؟؟
طبعا انا تلونت بالوان الطيف السبعة ..بس خليته على راحته ...
سمعت صوت نفسه انتظم..حسيته نام .. طالعته لقيته فعلا نايم ..
ابتسمت على شكله ..يا حليته ..بس يا ليتك يا سامي تخليني اعرفك عدل ..لك الف ويه ..وما اعرف بأي اسلوب اعاملك ..
حسيت بالشاحنة وقفت وباب الدبة يتبطل ..ناديت سامي ..
هناء: سامي ..سامي قوم ..
بطل عيونه بتثاقل ..بعدين انتبه لراعي الشاحنة الواقف يطالعنا ..اشرلي سامي انزل لأن وصلنا نيوجيرسي .. انتبهت للباصات الواقفة وعرفت انا في محطة الباصات ..حاسبنا راعي الشاحنة ..ومشينا للشباك التذاكر نقطع تذكرة وركبنا الباص ..وبعد دقايق حرك ..قلت انا
هناء: كل هذا عشان نوصل البيت ..يا زين الكويت صغيرة وما تضيع فيها ..
نطرت تعليق منه بس ما سمعت رد ..طالتعه لقيته نايم بعمق ..وانا اتبعته وسندت راسي ونمت ...
" هناء..هناء"
قمت على صوت سامي ..طالعت برة لقيت البيت جدامي ..
نزلنا ..وسامي كان يمشي ببطء..وعيونه مغمضة ..
قلت استعجله وانا واقفة عند الباب ..
هناء: سامي يلا ..الجو بارد برة ..
مارد علي وكان يمشي مترنح ..خفت ..وركضت عنده ..وقلت وانا اوقف جدامه ..
هناء: سامي ..اشفيك تمشي جذي ؟؟
حط راسه على جبهته وقال ..
سامي : راسي ماني قادر احرك ضلع من جسمي ..
حطيت ايدي على راسه وكان والع ..يشع حرارة ..مسكته من ذراعه وحثثته على المشي ..دخلنا البيت ..هدني سامي وارتمى على الكرسي ..وفجأة سمعنا صوت المطر ..حمدلله وصلنا قبل ما ينزل المطر ..
فصخت الجاكيت وبسرعة رحت فوق ويبت لحاف وغطيت فيه سامي عدل بعد ما عدلت من قعدته ..
ورحت المطبخ وسويت كمادات ..
كله مني انا اللي اخذت منه الجاكيت ..يعني لازم اقوله اني بردانة ؟؟
حطيت كمادة على جبهته ..ورحت للدفاية وعليت عليها..إذا جذي قبل الشتا عيل اشلون قبل الشتا نفسه ؟؟؟!!!
بعد ربع ساعة شلت الكمادة وتحسست راسه ولسة حار .. مررت الكامدة على طول راسه ..سمعت همهمة منه ..
قلت وانا اقرب منه ..
هناء: سامي ..سامعني ..
قال ..
سامي : لا تقربين ...
استغربت اشفيه ؟؟...اكيد يهذي ..بطل عيونه وطالعني وقال وهو يطلع ايده من تحت اللحاف ..ويمسك ايدي ويقول ..
سامي : حبيبي قربي ..
تقربت وهو كمل ..
سامي : لا تبعدين عني ..
وضغط على ايدي ..
قلت ..
هناء: سامي ..حاس بشي ؟؟
مارد علي ..غمض عيونه بعدين بطلهم وقال ..
سامي : ابي ابوي وامي ..
ين الريال .. الحمى اثرت عليه ...قلت وانا احط ايدي على راسه وامررها على شعره ...
هناء: حبيبي ..انت تعبان لازم ترتاح ..
قال وهو مطنش كلامي ..
سامي : ليش يسوون فيني جذي ؟؟
بطلت عيوني على وسع وقلت
هناء:سامي اسم الله عليك ..نام حبيبي نام ..
قال بصوت متحشرج ..
سامي : مايدرون انهم يذبحوني جذي ...انا ولدهم حرام اللي يسوونه فيني ..
هني لمعت الدنيا بضوء البرق ..وانا لمحت او جني اتوهم دمعة نزلت من عيونه واستسلمت ومشت على خده ..
بطلت الأبجورة القريبة علينا ..وفعلا طلعت ما اتوهم ...غمض عيونه والدمعة لسة تشق طريقها على خده ..
شكلها المشكلة اللي بينه وبين اهله جايدة ..
شلي صار؟؟؟
وليش سامي حاقد عليهم جذي ؟؟
ودي اعرف ..بس منو وين ؟؟
بعد ما تأكدت ان سامي نام ..قعدت انا على القنفة اللي يمه وقعدت افكر بطريقة تخليني اعرف المشكلة ..
ما حسيت بروحي إلا على صوت التلفون ...بطلت عيوني ..اوووه نمت ...تذكرت سامي طالعته لقيته نايم بس الكمادة طايحة على الأرض ...
رحت للتلفون ورديت وكانت صوفي ..علمتها بأن سامي مريض بعد ربع ساعة شفت وحدة جدام الباب ..
وكانت لابسة تنورة قصيرة لتحت الركبة وشال حوالين رقبتها ..بطلت لها الباب ..ودخلت ..قالت ..
صوفي: صباح الخير يا بنتي ..
ابتسمت لها وقلت ..
هناء: هلا يا خالة ..حياج ..
دخلت ..وقالت على طول ..
صوفي : وينو سامي؟؟
اشرت لها على سامي النايم على القنفة ..شكلها من الخوف ما شافتها ..لهدرجة تحبه ؟؟
راحت لعنده ولمست راسه ..وقالت بارتياح ..
صوفي : الحمدلله ..شكلو خف ..
هزيت راسي بتفهم ..ورحت المطبخ وقلت ..
هناء: شنو تشربين يا خالة ؟؟
قالت وهي تدخل وراي ..
صوفي : لا تعبي نفسك ..انا بسوي كل شي ..انتي روحي عدي مع جوزك ..
احسن ريحتني ...طلعت من المطبخ ..وقعدت يم سامي ..وماعدت دقايق إلا وصوفي مسوية الريوق ويايبته ..
قعدنا نتريق ونسولف..وعرفت ان صوفي كانت تشتغل عند ابو سامي اول بعدين سامي طلب منها انه تيي عنده ..فقلت ..
هناء: ليش ؟؟
صوفي : سامي متعود على اكلي ومتعود كما انو انا يلي ارتب له البيت ..بعدين انا اللي كنت اوقف مغو بوج بيو..
وقفت عن الكلام كأنها قالت شي غلط ..بس انا استغليت الفرصة وقلت ..
هناء: كانت في خلافات بين سامي وابوه ؟؟
قالت بارتباك ..
صوفي: متل اي اب وابنو ..
تتذيكين علي يا صوفي ؟؟
قلت ..
هناء: ام سامي ما شفتها ولا مرة ...
صوفي : عندها بيت وجوز ما تأدر تخليه..
قلت بخبث ..
هناء: في ام تخلي ولدها وما تسال عنه ؟؟!!!!
صوفي : الت لك انو عندها بيت تاني ..وهي ساكنة بولاية تانية كمان ..
بغيت اقط عليها سؤال ثاني بس شفت صوت من ناحية سامي ..طالعته وكان مبطل عيونه ..ابتسم لما شاف صوفي وقال بصوت ناعس ..
سامي : صباح الخير على احلى صوفي ..
وقام وهو يبعد اللحاف عنه ..
دعيت بهاللحظة انه ما يكون سمعني وانا اسال صوفي ...
قعد وقالت صوفي وهي تقعد يمه ..
صوفي : تأبرني ..قوم غسل وجك وتعى افطر معنا ..
قام وماسك اللحاف ومر علي وقال وهو يمسك خشمي ويهزه بمزح..
سامي : اشلون حبيبتي هناء؟
ابتسمت له ..يا حلاته يوم يكون رايق ..قلت
هناء: صباح الخير ..
قال وهو يعدي ..
سامي : احلى صباح لاحلى جوري عندي ..صباح النور ..
وقرب مني وهمس بأذني وقال ..
سامي : تأكدتي انها مثل امي ؟؟!!
قصده على امس ..طقيته ع الخفيف بجتفه وهو ضحك بخفة وراح فوق ..الحمدلله خفت الحرارة ..
ماادري شلي خلاني اتعلق فيه بسرعة .. طيبته وحنانه هي خلتني اكيد ..
والله يا سامي لو اعرف سرك برتاح ورح احبك اكيد ..بس قولي ليش تكره اهلك ؟؟؟
طالعت صوفي وهي تجهز الريوق مرة ثانية لسامي ..
وانتي يا صوفي بعرف السالفة منج بعرفها ..تتذكين علي قبل شوي ؟؟!!!
شكلي بشتغل كونان على تالي عمري ..
بس تستاهل يا سامي ..عشانك اقلب شارلكهومز لو تبي ..
بس اعرف ...
شنو قصتك بالضبط؟؟؟
الحلقــــــــة السابعة
" حياتي معك"
خفت حرارة سامي مع الأدوية والمضادات الحيوية .. قعدته غصب بالبيت لأن حالته ما تسمح ..وللأني حاسة بالذنب لأني انا السبب ..
سامي : خلاص مابي ..زهقت والله هناء ..
قلت بعناد واصرار ..
هناء: لأ ..ماكو طلعة .. انا بعد قاعدة في البيت ما اشتكيت ..
طالعني بنص عين وقال ..
سامي : انا مومتعود على القعدة جذي ..جني عاجز ..
عطيته ظهري وقلت وانا اتجه للمطبخ ..
هناء: انت كله مو متعود انا بعرف على شنو انت متعود ؟؟؟
دخلت المطبخ بعد ما قلت جملتي فسمعت صوته وهو يقول ..
every thing exept setting at home like womenسامي:
طليت له براسي من الدريشة اللي تطل على الصالة ..
هناء: انت بعد !!!!
طالعني باستغراب وقال وهو يحط جلاص الماي على الطاولة ..
سامي : شنو ؟؟
طلعت من المطبخ وقلت ...
هناء: طلعت من اللي يقولون ان المرأة مالها فايدة بالحياة ..إذا الله كتب عليها القعدة في البيت ..اشحقة تعيب ؟؟ المرأة حلاتها قعدتها في البيت مو...
قاطعني لأني كنت اتكلم بسرعة ...
... منو قالج اني اعيب على المرأة ؟؟إذا كلامي ضايقج ..خلاص يبا آسفين بسwait …waitسامي :
لا تعصبين .. ما تسوى علينا كلمة قلناها ..
تخصرت وقلت باستنكار ..
هناء: دايما النقاش عقيم وياكم انتوا يا الرياييل ..
طالعني باستخفاف وقال ..
سامي : منو قال ؟؟ انتي جربتي تناقشيني في شي وما عجبتج ؟؟
قلت وانا اقعد يمه وحط ريل على ريل ..
هناء: مادام قلت جذي تحمل اللي بييك ..اشتعرف عن الشعر العربي ؟؟
قال وهو يبعد اللحاف عنه ..ويقعد مثلي ..بحماس.
سامي : اساليني وانا اجاوبج ..
فكرت ..بما اني اعشق الشعر العربي بكل انواعه ..قلت بمكر ..
هناء: منو قال ..الرأي قبل شجاعة الشجعان ..هو الأول وهي المحل الثاني ؟؟
سامي : المتنبي ..فإذا هم اجتمعا لنفس حرة ...بلغت من العلياء كل مكان ..ولربما طعن الفتى اقرانه ..بالرأي قبل تطاعن الأقران ..
وطالعني بنص عين وقال ..
سامي : تبيني اكمل ؟؟
الصراحة انصدمت منه ..ما توقعت يعرف ..قلت بمحاولة ثانية ..
هناء: ومنو قال وإذا الشعب اراد الحياة ...
قاطعني وكمل عني ..
سامي : فلابد ان يستجيب القدر ..ولابد لليل ان ينجلي ..ولابد للقيد ان ينكسر ..ابو قاسم الشابي ...
وطالعني بنص عين ..
قلت وانا ادزه ع الخفيف واقوم عنه ..
هناء: ما تنغلب ..
ضحك بصوته التعبان وقال ..
سامي : انزين تعالي ..انتي تحديتيني وانا ما تحديتج ..تعالي ..
قلت وانا ازهب العشا ..
هناء: تحداني بشنو ؟؟ بالشعر لا تحاول لأني انا اشطر منك بالشعر ..
قال وهو يقوم ..
... اشرايج بالسياسة ؟؟Ok سامي:
قلت وانا ااشر بملعقة خشبية ..
هناء: لأ ..سياسية ما افهم فيها ..
قال وهو يتسند على باب المطبخ ..
سامي : و تلومونا إذا قلنا عنكم ما تعرفون شي ؟؟
طالعته وعيوني مبققة عليه مو متوقعة رده ..
هناء: انا ما اعرف شي ؟؟
وما نطرته يرد علي ..هديت الملعقة الخشبية وتقربت منه بعصبية ..
هناء: شكرا يا استاذ سامي ..ايي منك اكثر ..يعني انت تشوفيني جذي ؟؟ ما عليه ..
وطفت جدامه بس هو مسكني من ايدي وخلاني الف له اطالعه ..وقال ..
سامي : واااي انتي محد يتغشمر معاج ..خلاص يبا ..انت منو قال ما تعرفين ؟؟انتي تعرفين واحسن مني بعد .. وانا ما اقلل من قيمة المرأة ..المرأة اخت وزوجة ...
وكملت عنه بعصبية ..
هناء: وام..وهذا اهم شي ..هي اللي يابت وهي اللي ترضع وهي تربي ..وتصبر على عيالها ..
وسحبت ايدي عنه بعصبية ..ورديت المطبخ ..كل هذا صار وانا انطر منه تعليق .. لفيت لقيت مكان اللي واقف فيه فاضي ..
وين راح ؟؟ طلعت من المطبخ ..لقيته قاعد ومبطل التلفزيون .. رديت المطبخ وسويت العشا ..وحطيته بالطاولة وقلت وانا اسوي روحي زعلانة ..
هناء: العشااااا
لف لي وطالعني بعيونه اللي دايما تذبحني بنظراتها ..وقال ..
سامي : اسمع ماني اصمخ ..
قلت ارد عليه ..
هناء: حمدلله انك تسمع عبالي فالح تتطنز بس..
طالعني باستنكار ..وقال وهو يقوم وايير الكرسي يبي يقعد عليه ..
سامي : اللهم لك الحمد ..
قلت بعصبية بس بمزح..
هناء: ليه شايفني مينونة؟؟
قال بنفاد صبر وهو يرد الكرسي مكانه ..
سامي : خلاص ..مانبي ناكل ..هونت ..
وراح فوق ...الحين انا المفروض ازعل مو هو .بعدين انا كنت العب معاه ..اشفيه زعل ؟؟ ..رحت وراه ..اشوف سالفته ..
طقيت الباب محد رد ..دخلت ..لقيت الغرفة فاضية ..وين راح ؟؟؟ ..دورت بكل مكان ..بس مالقيته ..وانا رادة الصالة شفت ظل احد وعرفت ان هو ..واقف على برندة ( البلكونة) ..وساند كوعه عليه .. والهوا بارد ..وهو مريض .. تجدمت وانا احط الشيلة على راسي لأنها مكشوفة الييران يقدرون يطالعونا ..
قلت بهدوء يقطع هدوء الليل ..
هناء: سامي ..
طالعني بعيونه بدون مايلف لي ..ورد طالع الفراغ ومارد علي ..
ماادري شلي خلاه يزعل ..هو بعد كان يتطنز وانا قبلت طنازته بكل رحابة صدر...
تجدمت اكثر وقلت وانا ادقق بويهه وهو لسة يطالع الفراغ ..
هناء: سامي الجو بارد دش داخل رح تمرض اكثر ..
مارد علي بس كل اللي سواه اخذ نفس وعمض عيونه ..قلت
هناء: زعلت ؟؟
طالعني وما قدرت اشوف عدل لأنه ظلمة ..وقال ..
سامي : لأ طبعا انا ما ازعل منج ..
قلت متشككة..
هناء: متأكد ؟؟
سامي: متأكد من شنو بالضبط ؟؟ اني زعلان منج ؟؟ ولا زعلان ؟؟؟
قلت ببلاهة ..
هناء: اشتفرق ؟؟
وقال وهو يلف لي بكل جسمه ..
سامي : تفرق وايد ..انا إذا زعلت منج رح اقولج بس إذا كنت زعلان مارح اضايقج وياي واقولج..
يا الله ..تفكيره اشلون صاير .. انا عنده بالدرجة الأولى .. ومن وين الاقي واحد احسن منه ..بس ليش مو قادرة احبه ..ليش؟؟ واحد كامل والكامل الله ..بس والله ماني قادرة احبه ...كل منك يا عصام ..حبك لسة في قلبي ما مات..مع اني اعرف انك تحب اختي اسما ..بس ما اقدر انساك ..ما اقدر ..
غمضت عيوني على هالذكرى بس بطلتهم من لمسة سامي لإيدي وهو اييرني ناحيته ويقول بحنان..
سامي: شنو يفكر فيه حبيبي ؟؟
ابتسمت له من بين احزاني مجاملة وقلت ..
هناء: ولا شي ..
تطايرت مني خصلة من سعري وتسللت من تحت الشيلة ..فقال سامي وهو يدخلها ..
سامي : شعرج هذا وايد مينني ..
قلت وانا اعدله بعد تدخيل سامي له ..
هناء: قول ما شاء الله ..
قال يمزح ..
سامي : على شنو ؟؟ منو قالج اصلا اني احسدج عليه ؟
طقيته على صدره معصبة من اللي قاله ..
هناء: بايخ ..
ضحك هو ومسك ايدي وباسها وقال ..
سامي : اصلا هو اللي خلاني اتعلق فيج واخطبج ..
احمرت خدودي خجلا وقلت بحيا ..
هناء: وانت اشلون شفت شعري قبل ما تتزوجني ؟؟
سامي : لما شفتج نظرة شرعية ..انا ما كنت ابي اشوفج اصلا بس اخوج اصر ..
اول مرة ادري ..قلت وانا اعدل الشيلة ..
هناء: وانت ليش ما كنت تبي تشوفني ؟؟
قال وهو يبتسم ابتسامة اللي تعذبني ..
سامي : شفتج بالسوق مرة ..وتعلقت فيج ...
انا بهاللحظة لا تسالون عني ..ويهي صار مثل الطماطة ...بس قلت وانا اخفي الخجل اللي اعتراني ..
هناء: ذاك اليوم دعيت عليك دعاوي ..
وضحكت على هالذكرى ..قال باستغراب وهو يبتسم على ضحكي ..
سامي : دعيتي علي ؟؟
هزيت راسي بايجاب وقلت ..
هناء: بعد ما صار الموقف بينا يريت خلود وقعدت اقولها هذا واحد ما يستحي ..ما نزل عيونه ..وهلم جرة ..
بطل عيونه على وسع من الصدمة وقال وهو يبتسم من هول اللي قلته .ز
سامي : حرام عليج ..ما خليتي كلمة ما قلتيها علي ...
تقرب مني اكثر هالمرة ليما انفاس بدت واضحة لي ..
سامي: بس حلالج ..قولي اللي تبينه .
ارتبكت من كثر ما هو قريب مني وقلت وانا اغير الوضوع ..
هناء: تعال تعشى ..انا مو مسوية الأكل على الفاضي ..
ردينا للصالة وتعشينا وقال ..
سامي: تدرين من اول ما تزوجت وزني زاد ..
طالعته ادقق بجسمه وقلت .
هناء: ما اشوفك متنت ..
سامي: ئي لأني جدامج اربع وعشرين ساعة ...
كمل وقال ..
I must play sport like beforeسامي:
وطالعني وقال ..
سامي : انتي بعد لازم تلعبين ..شنو تاكلين الثلاجة كلها ؟؟
طالعته برعب وقلت وانا اهد القفشة ..
هناء: لاااا؟؟؟ متنت؟؟
قال وهو ياكل ..
سامي : اممم...يعني ..بس مبين عليج منتفخة ..
ريدت آكل وانا مقررة قرار..
اليوم الثاني ..الصبح بطلت عيوني بكسل .. سمعت صوت ..قعدت وشفت سامي مبدل ملابسه وماسك تلفونه ...
قلت باستغراب ..
هناء: على وين من صباح الله خير ؟؟
قال وهو يحط التلفون بجيبه ..
سامي : بروح اركض شوي ..
كان لابس كاب وشعره طالع من ورا شكله رهيب ..ولابس هيدفون وقعد يلبس جوتي الرياضة ..قلت ..وانا اقوم من السرير ..
هناء: بروح معاك ..
وهذا اللي كنت مقررته امس بليل ..
طالعني وقال ..
سامي : معزمة؟
قلت وانا ادخل الحمام عزكم الله..
Sureهناء:
وصكيت الباب ..غسلت اسناني وتوضيت لان صلاة الفير طافتني ..قلت من داخل الحمام ..
هناء: ليه ما صحيتني لصلاة الفير ؟
قال ..
سامي : اولا لا تتكلمين داخل الحمام مو زين ..بعدين انا قعدتج بس انت نومج ثقيل ..
سكت وما رديت عليه ..صح مو زين اتكلم داخل الحمام ...فجأة تذكرت اللي صار امس على البلكونة.. ما انكر اني حبيته في لحظة..بس بعدين ما ادري امتزجت مشاعري ناحيته بمشاعري ناحية عصام ..انا ما اقول اني مو مرتاحة مع سامي ..ما رح القى احسن منه بس ماادري احس ان في شي ناقصني ...احس بفراغ من بعد ما اكتشفت ان عصام يحب اسما ..
سمعت صوت سامي من برة ..
hurry up سامي: هناء..
غسلت ويهي بسرعة ..وطلعت من الحمام ..صليت الفير ..ولبست بنطولون جينز وبلوزة ..وطلعت من غرفة الملابس وسامي لسة ينطر ..كنت لابسة شيلتي وكنت متجهة للعباتي ..بس سامي قال باستنكار ..
سامي : بتطلعين جذي ؟؟؟
خل استعبط عليه ..اشوف ردة فعله ..رحت للتسريحة وانا اعدل شيلتي ..
هناء:ئي ..اشفيها ؟؟
وطالعته من المنظرة وصورته منعكسة عليها انطر رده ..قال بهدوء وهو يفصخ الكاب ويلعب بشعره
سامي: فيها بلاوي ..لبسي عباتج ولا ماكو طلعة .
وطلع من الغرفة ...ابتسمت لا تحولت ابتسامتي لضحكات ...كتمتها لا يسمعني..لبست عباتي ..ونزلت تحت ..لقيته ينطرني ...طالعني وقال ..
سامي : الحمدلله عقلتي ..
ابتسمت وقلت وانا العب بكابه ..
هناء: خبلة انا اطلع جذي ؟؟
قال وهو يقوم ..
سامي : عشان جذي ما رديت عليج الرد اللي يبرد القلب لأني ادري انج مو خبلة ..
وطلعنا من البيت ..قعدنا نركض طول الطريج ..من اول من طلعنا من الباب لين وصلنا للحديقة العامة ..
انقطع نفسي ..وسامي ما شاء الله عليه مو حاس بشي ..قلت وانا اركع ركوع الصلاة الهث ..
هناء: ســـ...سام..سامي ..انقطــ...ع ..نفسي ..
وقعدت على اقرب كرسي اتنفس ..وقف وقال وهو ايي عندي ..
سامي : انتي عزمتي ..قومي يلا ..
وقف جدامي فقلت ردا على كلامه ..
هناء: انت قلت لي امس
كملت وانا اقلد صوته ..
هناء: انتي بعد لازم تلعبين ..شنو تاكلين الثلاجة كلها ؟؟
ورديت لصوتي وقلت .
هناء: منو قال جذي انا ولا انت ؟؟
ضحك واول مرة اشوفه يضحك من قلبه ..وقلت باستنكار.
هناء: على شنو تضحك ؟؟
ما قدر يمسك نفسه ..وقال وهو يضحك
سامي : آآه بطني .. من صجج ؟؟ يعني ..هههه..يعني انتي طالعة عشان انا قلت لج جذي ؟؟ لا تقولين ئي ترى رح اطيح بالأرض من الضحك ..
طالعته معصبة ولفيت عنه ..وهو هني ما صدق رد يضحك ..بس الصراحة ..يا زين ضحكته .. يا حلات ويهه وهو يضحك ... قام هو وقال وهو يمسك نفسه لايضحك ..
سامي : قومي ..قومي ..تراني برد اضحك ..
ومشى عني ..ولأن الطريق فاضي ما في احد ..قلت بأعلى صوتي ..
هناء: ما رح امشي ...
لف لي وقال بهدوء ..
ok set there until I finish سامي:
يعرف نقطة ضعفي ..قمت بعصبية ورحت له ..وقلت ..
هناء: هاذي آخر مرة تهددني فيها ..
قال وهو يلف الكاب على ورا ..
realy?!!! سامي :
وبدا يركض وانا هزيت راسي باستنكار وبديت اركض ...بعد نص ساعة ..بديت احس الدنيا تدور حوالي ..
غمضت عيوني وبطلتها ..وكملت ..بس بعد ثواني ..زاد على الدوار ..قلت بضعف وانا امد ايدي لسامي .
هناء: سا...سامي ..
بس الأخ كان سابقني بالأمتار ...انا خلاص مو قادرة اتكلم ..وقفت بمكاني ..والدنيا تدور حوالي ..ليما قعدت على الأرض بوهن ..
بس الدوار ما رحمني ... ماحسيت بروحي لما طحت على ظهري ..وغمضت عيوني املا بانتهاء هالدوار ..
بطلتهم لقيت سامي فوق راسي وماسكني من ظهري يقعدني ..ويقول بخوف ..
سامي: اسم الله عليج ..هناء ..اشفيج ؟؟
قلت وانا احط ايدي على جبهتي بصوت اشك انه سمعه ..
هناء: حا...ح...ـاسة ...بد...وخــ...ــة
وبعدها ما حسيت بشي ...بطلت عيوني ..لقيت سامي منومني على الكرسي وحاط راسي على فخذه ..
اعتقد اني فقدت وعيي لثواني ..غمضت عيوني واخذت نفس وقلت لسامي اللي قاعد يبطل بطل الماي ..
هناء: خلاص ما يحتاي...انا..انا مافيني شي ..
طالعني وقال بعد ما قدر يبطل البطل..
سامي: شربي ..تراج دايخة..
ومد لي علبة الماي .. بس وخرها لما شاف ايدي ممدودة وقال ..
سامي : لا تعبين نفسج . شربي ..
وشربني بنفسه .. شربت ليما ارتويت ..وقلت وانا احس بتحسن ..
هناء: خلاص الحين احس اني احسن..
طالعني يتأكد وقال بعدين ..
سامي: متأكدة ؟؟
هزيت راسي بايجاب وانا احاول اطرد الصداع ..
هناء: ئي ..
قمنا .. ومشينا للبيت ..وعند الباب ..لف لي سامي وقال ..
سامي : شكلج لسة دايخة ..
قلت وانا اطمنه ..
هناء: لا تخاف مافيني إلا العافية ..
ودخلنا الحديقة اللي تحيط بالبيت ..بس فجأة مسكني سامي وشالني ..قلت وانا اصرخ ..
هناء: سامي ..سامي نزلني ...نزلني ..
قال وهو مطنش كلامي ..
سامي : شكلج دايخة .. خلاص الحين بندخل البيت ..
قلت وانا ارافس مثل اليهال ..
هناء: لا لا ..نزلني ..نزلني اقولك ..
دخلنا البيت ..وهو لسة شايلني.. فقلت باعتراض ..
قلت وانا مو مصدقة انا دخلنا البيت ..
هناء: خلاص ..نزلني ..دخلنا ..
بس طنشني ..وصعد فوق فقلت بصراخ قوي..
هناء: نزلني ..نزلني ..
دخلنا الغرفة وحطني على السرير ...وقال ..
سامي : حسبي الله على ابليسج بطيتي اذني ..
قلت وانا انسدح على السرير واغطي ويهي باللحاف منحرجة من الموقف وويهي صاير احمررررر..
هناء: لا تسوي جذي مرة ثانية ..
ما سمعت منه رد .. بعدت اللحاف ببطء ولين وصل لمستوى عيوني صرت منقبة .. لقيته يطالعني ويبتسم ويحاول يكتم ضحكته .. قلت وانا ارد اغطي ويهي مرة ثانية ..
هناء: اطلع برة بنام ..
سمعت ضحكته وبعدها صك الباب..
بعدت اللحاف ..طالعت الباب اللي طلع منه سامي ..وتذكرت اللي صار ..فشلني حسبي الله على العدو ...
رحت الحمام عزكم الله وغسلت ويهي ..وبدلت هدومي ..ورديت السرير لأني لسة احس بتعب ..بس ما مداني انسدح إلا الباب تبطل .. ودخل سامي .. ومعاه صينية .. قلت وانا اقعد على السرير ..
هناء: شنو هذا ؟
قال وهو يحطها على فخذي ..
سامي : ريوق ..ادري مرقعبس هذا اللي عرفت اسويه ..
يا الله طيب ..وحنون..وفوق كل هذا يحبني اكثر من نفسه ولو ما قالها صريحة .. بس مبين من عيونه ..
والله ما ادري من وين اروح من عيونك يا سامي ..
طلعني من شرودي وقال ..
سامي: اكل هني مو بويهي ..يلا اكلي ..
مديت ايدي وخذيت من الجبن ..بس ما كليتها قلت له ..
هناء: اخذ اكل ..
طالعني بعدين طالع الخبزة وقال ..
سامي : الأكل لج مو لي ..
قلت بعناد وسويت روحي زعلانة ..
هناء: ما تبي تاخذ من ايدي ..خلاص
ورديت الخبزة لصينية .. فقال وهو ياكل الخبزة ..
سامي : خلاص كله ولا زعل هنوتي ..
ابتسمت له ورديت آكل ..
ماادري ين متى بظل على هالحالة .. حابه لحظة بعدين احتسف باجي اليوم .. احترت قلبي متلخبط وعقلي يحبه ..
طالعته وهو يسولف لي وانا ابتسم عليه..
يا ترى يا سامي ..منو اللي رح يفوز بحبك ؟؟؟
قلبي ..ولا عقلي ؟؟؟
الحلقــــة الثامنـــة
" المفاجأة"
مرت الأيام بسرعة وياه يوم الدوام...اليوم بسجل بالجامعة .. قمت مبجر حاسة بحماس مع شوية خوف .. صليت الفير وجهزت الريوق وسامي لسة نايم..امس تأخر باليية وياه نص الليل ..بعد ما خلصت الريوق صعدت الدار شان اصحي سامي ..
لف لي بكسل وقال ..
سامي : شلي مقومج من الصبح؟؟
وطالع الساعة وكانت ست ونص.. قلت وانا اير اللحاف عنه ..
هناء: قوم قوم صل الفير وتعال تريق ..يلا ..
غمض عيونه وقال وهو يسحب اللحاف مني ..
سامي : بصلي بس برد انام ..
قلت باعتراض ..
هناء: شنو ترد تنام ؟؟ ومتى بتقوم ؟؟ انا اليوم تسجيلي ..
ما لقيت رد منه ..شكله رد نام .. هزيته بملل ..
هناء: سامي ..يلا قووووم..
بطل عيونه وطالعني شوي بعدين قال بهدوء ..
سامي : تراج مزعجة .. Let me sleep ..
وغمض عيونه ...طنشني .. انا اوريك يا سامي ..تقربت من راسه ومسكت شعره وشديته حيل ..
سامي : اااي ...هناء هدي شعري ...
قلت بعناد وانا اشد اكثر ..
هناء: ماكو ..قوم يلا ..
مسك ايدي وقال وهو يحاول يبعدها عن شعره ..
سامي : هناء قطعتي شعري ..هديه ..خلاص خلاص بقوم ..
هديت شعره ..وقال وهو يمسح على مكان الشد ..
سامي : حرام عليج ..مجرمة ..
قلت بكبرياء ..
هناء: عشان مرة ثانية لما اقولك قوم ..تقوم ..
طالعني بحقد ..نظراته خلتني اضحك ..قال بضيق ..
سامي : مايضحك ...قرعتيني ...
وهذا ما زاد إلا من ضحكي ..حذفني بالمخدة ..بس تفاديتها ..وطلعت من الغرفة وانا اضحك ..نزلت تحت ..وقعدت على الطاولة انطره ...حطيت ايدي على خدي وسرحت ..اشتقت لأهلي...لأمي وطيبتها ..وطلال وحنانه ..وهاني ومشاغبته ولقافته ..واسما وبرودها وطيبتها ...
حياتي حلوة لو انا اقدرها واحس بطعمها ..بس حب عصام الأولي معذبني ومخليني ضايعة بينه وبين حب سامي اللي قدمه لي سامي بطبق من ذهب .. والله ادري اني مقصرة معاه ..بس مو قادرة احبه مثل أي حب زوجة لزوجها ..طول سنين اللي حبيت فيها عصام كنت احس اني مالكة الكون .. ولما اكتشفت انه يعتبرني مثل اخته حسيت اني ولا شي ..حبي راح هباءا منثورا .. والأدهى والأمر انه يبي اسما ..واسما منو اختي ..لو وحدة غيرها كنت كافحت عشان ابعدها عنه ..بس هاذي اختي وانا ما اقدر ادمر مستقبلها ..وعصام يحبها وحاجزها من زمان ..ليه ما وضحت يا عصام كنت ما كلفت على عمري وملت لك ..بس الله عالم بالنفوس .. والله العالم متى رح احب سامي ..ويقدرني اني انسى عصام وما افكر فيه للأني متزوجة وهذا ما يصير ...
طالعت السلم لقيت سامي ياي ..نزلت ايدي وعلدت من قعدتي وحمدت ربي ما شافني وانا سرحانة ..قال وهو يقعد بملل ..
سامي : اصبحنا واصبح الملك لله ..
قلت وانا اصب الجاي له ..
هناء: يا الله صباح خير ..
قال ..
سامي : شنو بنقلبها ابتهال ؟؟
ابتسمت وقلت ..
هناء: اشلون شعرك ؟؟
ومديت له الجلاص ..قال وهو ياخذه..
سامي: بقصه عشان لا تشدينه مرة ثانية ..ادري انتي اصلا محترة من شعري ..
قلت وانا اسوي صمونة له ..
هناء: نعم !!!! لا تصدق عمرك وايد ..مداح نفسه يبيله رفسه ..
اخذ الصمونة ومارد علي ..بعدين قال ..
سامي: اليوم تسجليج ..بس بسجلج وبروح كليتي .. انا اليوم عندي محاضرات ..ويمكن اتأخر عليج واطرش لج عامر مع مرته وياج بالكلية فتعالي معاهم ..اوكي ؟؟
ما عجبتني الفكرة لاني اول مرة ارطلع مع ناس غير سامي .. قلت باستسلام..
هناء: اوكي .. بس متى بتخلص ؟؟
سامي: اليوم بستلم جدولي ..ولما اخلص ادق عليج ..
طلعنا من البيت وقفلنا المفتاح وعطاني سامي النسخة ..ومشينا الجامعة متوكلين على الله ومعتمدين عليه ومسميين باسمه .. عسى يكون يوم الأول لي ولسامي فاتحة خير علينا ..
وصلنا الجامعة وسامي طبعا معطيني محاضرة بالجامعة وطريقتها في التعامل مع الطلبة المستجدين ..
بركن سامي السيارة ونزلنا ..دخلنا الحرم الجامعي ..انا عيوني تعلقت بالناس الرايحة والرادة ..اللي لابسة بس خامة وناسية الباجي ..واللي لبسها جنها ياية كزينو ..واللي ياية وشعرها ستلايت ..مو بس البنات حتى الشباب ..
فجأة دعمت شي ..وكان سامي..قلت له ..
هناء: اشحقة وقفت ؟
قال وهو يقرا اعلان على الطوفة ..
سامي: تسجليج يبدأ الساعة ثمان ..
هناء: حلو ..
طالعت الساعة وكانت سبع نص ..قال سامي وهو يطالعني ..
سامي: حلو بالنسبة لج اما انا لأ ..محاضرتي تبدأ ثمان ..
لاااااااا...شنو اقعد بروحي ؟؟ قلت بخوف ..
هناء: خلاص عيل لا تروح محاضرتك ..
قال وهو يتخصر ..
سامي: لا والله ؟؟ واشرايج اسجلج المواد بعد وحضر المحاضرة بدالج ؟؟
قلت اترجاه ..
هناء: سامي ..الله يخليك لا تروح وتخليني بعدين اقعد بروحي ..
قال ببساطة..
سامي : قعدي .. بعدين تعالي ..انا مو كل يوم بيي معاج ..اليوم وبس ..مهمتي من اليوم ورايح رح تقتصر على توصيلج لباب الجامعة ..
قلت..
هناء: اوووووف ...يعني لازم يكون عندك محاضرة ؟؟
سامي : ولازم يكون عندج تسجيل ؟؟
هناء: والله هذا مستقبلي ..
قال يقلد صوتي .
سامي: ومستقبلي انا بعد ..
ورد لصوته الطبيعي..
سامي: يلا انا بروح يمديني الحق على المحاضرة ..
مسكت ايده بخوف وقلت ..
هناء: سامي ..
سحب ايده وقال ..
it’s over hana: سامي
وراح عني ..قلت بعصبية ..
هناء: وين بتروح انا بوريك في البيت ..
شفته يسوي لي باي من بعيد ..طقيت ريولي بالأرض من الحرة ..ومشيت اتبع اللافتات ..لين وصلت لقاعة التسجيل اللي انصدمت من كثر الناس اللي فيها .. زحمة..وقفت بالطابور وانا ماسكة اوراقي اللي حاطتهم بملف ..
خلاص انا الحين بصير طالبة في هالجامعة الجبيرة بطلابها ومبانيها ..والله يعيني على دراستها ...لازم اكرف عشان اخلص وانجح عشان ارد لأهلي ...
وحدة : اووووف على هالزحمة ..وايد ناس ..
وحدة ثانية : طبعا لازم يكون زحمة ..اول يوم .
التفت وراي ولقيت بنتين متحجبات وعرفت انهم عرب .. تلقيفت وقلت اكلمهم ..
هناء: السلام عليكم .
طالعوني وما ردوا علي ..شنو مو مسلمين هذول ..قلت وانا اكمل ..
هناء: اا..بس بغيت اعرف ..متى تبدأ المحاضرات ؟؟
طالعوني بتفحص ..وقالت وحدة منهم ..
وحدة : على حسب جدولج ..
ابتسمت بارتباك لهم من نظراتهم اللي شوي وتحرقني ..ولفيت عنهم ..حمدلله والشكر اشفيهم يطالعوني جذي ؟؟ اول مرة يشوفون وحدة ؟؟؟
وصلت اخيرا وعطيتهم الملف ..بعدها عطوني الجدول ..وعرفت بعدها انه اول محاضرة الساعة عشر ..
يعني بقعد ساعتين لا شغل ولا مشغلة ..
طلعت من القاعة وقعدت على واحد من هالكراسي اللي موجودة بالحرم الجامعي ..
قعدت اطالع الرايح والراد واعلق على فلان وعلان ..واضحك على هذا وهاذي .. فجأة حسيت احد يتقرب مني ..نزلت راسي ..يمكن رح يعديني ويمشي ..بس وقف جدامي وقال
الشاب : السلام عليكم ..
عربي !!!!! رفعت راسي وقلت ..
هناء: وعليكم السلام ..
الشاب : انا بس بغيت اتعرف ..
لا والله ؟؟
قلت وانا اقوم عنه ..
هناء: تعرف على وحدة غيري..
ومشيت بس هو وقف جدامي ..وقال ..
الشاب : الأخت كويتية ؟؟
اففففف ...مارديت عليه ومشيت عنه ..بس ما خلاني قام يمشي معاي وقال ..
الشاب : انزين بس بغيت اعرف اسمج ..مبين عليج وحدة هادية ..
طالعته بحقد وقلت ..
هناء: انت وبعدين معاك ..بتذلف ولا اهفك بهالجنطة ؟؟
ضحك وقال ..
الشاب : اشتقت لهلأسلوب ..بس تدرين شكلنا بتخصص واحد ..
لفيت ويهي عنه مشيت ..صج قليل ادب حتى هني ؟؟
الشاب : انزين اخذي رقمي ..
وقعد يقول الرقم .. وانا عمك اصمخ .. وسمعته يقول ..
الشاب :اسمي عصام العالي ..
عصام!!!!!
بس انتبهت لصوت التلفون ..وكان سامي ..
هناء: هلا سامي ..
سامي : هلا فيج ..ها خلصتي ؟؟
هناء: ئي ومحاضرتي الساعة عشر ..
سامي : اها ..انا الحين رايح المكتب ..إذا خلصتي دقي علي اوكي ..
هناء: انت مو تقول انك رح تتاخر؟؟
سامي : دقي علي عشان ادق على عامر ايي ياخذج ..انا الساعة 11 عندي محاضرة وما اخلص إلا اربع وبعدها عندي المكتب ...فدقي لا تنسين ..
نط الشاب جدامي فجأة وقالي ..
الشاب : حلو عندج تلفون ..
سمعت سامي يقول ..
سامي : منو هذا؟؟
اربكني الشاب الخبل ..فقلت لسامي ..
هناء: محد انا ...انا بالقاعة ..وو ..والناس حولي .
سكت شوي بعدين قال بنفس الوقت اللي قال فيه الشاب ..
عصام : تحاجين منو؟؟
قلت بدون قصد ..
هناء: مالك شغل ..
بغيت ارد على سامي بس شفته صكه بويهي ..يا ويلي ..اكيد عرف ..شلي خلاني ارد على هالخبل ..
قلت بعصبية ..
هناء: شوف ..يا تقلب ويهك ..يا مارح تشوف خير ..
ابتسم وقال .
عصام : ريلاكس يا حلوة ..بس بغينا نتعرف..بعدين انا قصدي شريف...
مشيت عنه لما شفت ان ماكو فايدة ..بس هو ما خلاني في حالي ...يلحقني من مكان لمكان ..
هناء: يا اخي مابي اكلمك غصب ؟؟ بعدين انت ما عندك محاضرات ولا ياي تلعب ؟؟
قال وهو يحط ايدينه بمخابيه ..
عصام : عندي ..الساعة عشر ..وانتي ؟؟
قلت بحنق ..
هناء: مالك شغل ..ويلا انقلع ..
وعديته ..شفته يمد ايده بس انا بعدت بسرعة وقلت له بعصبية وتهديد..
هناء: ولا تفكر حتى ..
ومشيت بسرعة عنه ..كنت خايفة ومرعوبة ..فجأة دعمت شي غمضت عيوني من الألم وطالعت فوق لقيته سامي بهيبته وطوله اللي يغطي الشمس ..
قلت متفاجأة ..
هناء: سامي !!!!
طالعني بعدين طالع الشاب ..وقال وهو يفصخ نظارته الشمسية ..
سامي: انت ؟؟
يعرفه ؟؟
عصام : سامي !!!
بعد ؟؟؟ ..ما شاء الله طلعوا يعرفون بعض ..كنت واقفة بالنص بينهم جني نملة بين عامودين .. قال سامي بعصبية ..
سامي: خير ؟؟ شكو لاحقها ؟؟
قال عصام ببرود..
عصام : وانت شنو اللي حارك ؟؟
بعدني سامي وخلاني وراه وقال ..
سامي: انت ما تيوز ؟؟ محد يسلم منك ؟؟
قال عصام بحدة ..
عصام : مالك شغل .بعدين اشفيك تدافع عنها؟؟ اخاف تصير لك وانا ما ادري ..
تجدم سامي من عصام لدرجة كبيرة ..خفت انه يصكه بكس ولا شي ..
بس قال بهدوء ..
سامي : ان شفتك تكلمها ولا تطالعها ولا حتى بالغلط..رح اتصرف معاك تصرف ثاني ..سامع ؟؟
تجدم عصام بعد لين صاروا ويه لويه ..وقال بنبرة استهزاء...
عصام: قول انك حاط عينك عليها وخلاص ..
سامي: انا مو مثلك ..صايع ما عندي شي اسويه غير المغازل والدوارة بالسكيك جني متشرد ..
عصب عصام وقال وهو يقرب اكثر من سامي اللي واقف مثل الجبل ما تزحزح..
عصام : احترم نفسك ..انا احسن منك يا ولد الشوارع ..ولا تبيني اذكرك ؟؟
شفت ويه سامي قلب احمر ..وقال بصوت خافت اقرب للهمس وبتهديد ..
سامي : اسمع..اذلف عن ويهي قبل ما تطلع شياطيني لاني بديت اعصب ..
قال عصام ..
عصام : والله؟؟ خفت ...لا تسوي روحك شريف وانك ماكنت جذي ..ولا نسيت بنت خالتك ؟؟
هني رفع سامي ايده وعطاه كف سدحه بالأرض ..حطيت ايدي على فمي من الخرعة .. بس تجدمت من سامي اللي كان يطالع عصام بحقد .. ومسكت ايده وقلت بخوف ..
هناء: سامي ..سامي امش .. خلنا بعيد عن المشاكل ..
قام عصام وقال وهو يتحسس مكان الطراق ..
عصام : بردها لك ..صدقني مردودة..
مسكني سامي ومشينا مبتعدين عن المكان ..وانا ماادري ليش واشلون صار جذي ..وقفنا بمكان هادي ..وقال سامي ..
سامي: شنو قالج ؟
قلت وانا لسة خايفة ومرعوبة من الموقف ..
هناء: منو هذا ؟؟ وليش سويت جذي ؟؟ ومن وين تعرفه ؟
مارد علي ..ولما شافني خايفة ..حظن ويهي بايدينه وقال بهدوء..
سامي : لا تخلين الأشكال هاذي تخوفج .. اهدي ..
هزيت راسي وهو بين كفوفه .. وقلت بصوت مرتجف .
هناء: انزين ..قولي ..منو هذا ؟؟
نزل ايدينه ..وقال ببرود..
سامي : واحد خبل .. المهم ..روحي محاظرتج بعد شوي بتبدا ..
طالعت الساعة وكانت عشر إلا عشر...وصلني لباب القاعة ..دخلت وانا افكاري مشوشة .. قعدت على اول كرسي ..ريولي مو شايلتني من الموقف .. اول مرة اشوف سامي جذي ..الصراحة يخوف ..صج لين قالوا..اتقي شر الحليم إذا غضب ..خفت يعطيني طراق بعد عصام .. بس الله ستر .. لمحت عصام داخل القاعة بس هو ما شافني ..بدت المحاظرة ..طبعا اولها تعريف بالدكتور .. وبعدها دخلنا بالدرس ..من اولها دراسة ..عطانا اشياء خفيفة ..ومر الوقت وخلصت المحاظرة.. بدوا الطلاب يطلعون وانا قعدت انطر ليما تخف الزحمة عند الباب ..وما حسيت إلا بصوت وراي ..
عصام: منو عندنا ؟؟ حبيبة سامي ؟؟
عرفته من صوته النشاز .. ما رديت عليه ولميت اغراضي وطلعت ..انصدمت لما شفت سامي قاعد برة ..
مشيت لعنده وقلت ..
هناء: شنو تسوي هني ؟؟
كان يلعب بموبايله ولما كلمته حطه بمخباته ورفع راسه وقال ..
سامي : خلصتي ؟؟
قلت ..
هناء: ئي ..مارديت علي ؟؟
وقف وقال ..
سامي : ما عندي شي قلت اقعد انطرج ..
بغيت ارد بس سمعت صوته النشاز مرة ثانية ..
عصام : الله ..مداكم؟؟ ما شاء الله ما اقدر احسدكم الصراحة ..بس الصراحة سامي ذوقك حلو ..ولا متحجبة بعد ؟؟ الصراحة نيالك ..الحلو للحلو..
وطالعني ..هني سامي تحرك بس انا مسكته لا نسوي مشاكل على الفاضي ..ييرته وراي وعصام لسة يتكلم ..ليما قال ..
عصام : رح اشتاقلج لباجر هناء ..مااقدر انام لين اشوفج باجر ..
فلت ايدي سامي ..وهجم على عصام مثل الأعصار .. وقعد يقول وهو ماسك الياقة مالت قميصه ..
سامي : انت ما تقولي اشتبي مني ؟؟ لاحقني وين مارحت .. حتى هني ؟؟
بعد عصام ايد سامي بقوة وقال بسخرية ..
عصام: والله انا مابي منك شي ..خالتي اللي تبي ..وبنت خالتك ... اللي انت قصيت ..
حط سامي ايده على رقبه عصام ولزقه بالوفه وقال وهو يضغط عليها..
سامي : اذا تبي ترجع لبيتكم سالم ابعد عني ..وبنت خالتك اللي انت مفتخر فيها وشايفها مظلومة تراها اكبر نصابة ..
وبعده عن الطوفة وحذفه بالقاع ..وقال ..
سامي : آخر مرة احذرك ..بعدها بدفنك وانت حي ..
ومشى ..انا ظليت جامدة في مكاني ..اطالع عصام اللي كان يطالع سامي بحقد ..هني تذكرت سامي ومشيت وراه ..قلت وانا احاول امشي معاه ..
هناء: سامي ..منو عصام ؟؟ ومن تعرفه ؟؟
مارد علي ..كان ماشي وهو حاط ايدينه بمخابيه ..قلت ..
هناء: ليش انتوا تكرهون بعض ؟؟
لاجواب ..
هناء: من اهلك هو صح ؟؟
هني لف لي وقال بعصبية ..
سامي : بس سكتي عني ..
بلعت لساني ومعاه الأسئلة اللي كنت ابي اسالهم اياه ..ومشينا للكفتيريا .. قعدنا ..ما كنت اتوقع اول يوم لي رح يكون بهالصورة .. هواش وخناق ..قطع حبل افكاري بصوته المتضايق ..
سامي : ما تبين تاكلين ؟
قلت وانا اطالع الطاولة ..
هناء: لأ ..
ما علق بعدها ..رفعت راسي لقيته يطالع الفراغ ..ويهه مليان تعابير بس مو عارفة اقراهم .. ليش مو راضي تقولي ..ويقولون عنك هادي ..انت وين والهدوء وين .. طالعته وكان سارح ..يطالع الفراغ ..قلت ..
هناء: سامي ..
مارد علي .. ناديته مرة ثانية وهالمرة طقيت الطاولة ..اخترع وطالعني بعصبية فقلت ..
هناء: اشفيك صارلي ساعة اناديك ؟؟
لف ويهه عني وقال بشرود ..
سامي : ماكو شي ..
ولف لي ..
سامي : متى محاظرتج الثانية ؟؟
هناء: الساعة وحدة ..
طالع ساعته وتنهد بضيق ..قلت ..
هناء: مارحت محاظرتك ؟؟
ردل طالع الفراغ وقال بملل ..
سامي : لأ..
هناء: ليش ؟؟
سامي : مالي مزاج ..
هناء: ليش ؟؟
وقال ..
سامي : بس جذي ..
هناء: بتضيع عليك دروس جذي ..انزين متى تروح المكتب ؟؟
مارد علي ..ورد سرح ..قلت ..
هناء: سامي ..
لف لي وطالعني بعين نارية .وقال بحدة ..
سامي : ما تلاحظين اسئلتج كثرت ؟؟
الصراحة خفت من نظراته ..ولو انه ما رفع صوته ..بلعت ريجي وسكت ..
بدت المحاظرة الثانية ..وللمرة الثانية وصلني سامي للباب القاعة ..بس هالمرة ما كان عصام موجود والحمدلله..بعد المحاظرة طبعا كنت محملة بالواجبات ..ردينا البيت ..وسامي طول الوقت ساكت سرحان ..
صليت الظهرودخلت المطبخ اسوي الغدا مع اني مكسرة ..بس شفت سامي واقف عند الباب ويقول ..
سامي :ماله داعي تسوين شي ..انا مابي مااشتهي ..
صكيت باب الثلاجة ..وقلت باستغراب من حالته ..
هناء : سامي ..اشفيك؟؟
تنهد ونزل راسه الأرض وقال ..
سامي :كدرني الله ياخذه ..عمري ما كرهت احد قد ما كرهت البني آدم هذا ..
تجدمت وقلت ..
هناء: ليش ؟؟ شلي بينك وبينه ؟؟
سامي : ولا شي ..بس هوشات قبل لما كنا يهال ...
طالعته ودققت فيه وقلت ..
هناء: يصير لك هو صح؟؟
مارد في البداية بس قال باستسلام لاني حاصرته ..
سامي : ئي ..ولد خالتي ..
كان يتكلم وهو منزل راسه ..قلت وانا ارفع ذقنه بايدي ...
هناء: واشفيك تقولها وانت زعلان ؟؟ المفروض تفرح .
سامي : افرح على شنو ؟؟ على ولد خالة صايع ما عنده هدف في الحياة إلا مراكض وراي ..ولا على بنت خالتي الثانية اللي تتمسكن لين تتمكن ولا على ام عصام وام عالية اللي مايعرفون في الدنيا هاذي غير الفلوس هم و..
سكت ياخذ نفس وقال بكتم الألم داخله ..
سامي : هناء ..لا تفتحين علي الجروح خليها مسكرة ..
وراح فوق ..
كسر خاطري ..رحت وراه ..دخلت الدار..لقيته منسدح على السرير..
قعدت يمه ..وقلت وانا اطلع صورة محتفظة فيها بالكوميدنو ..
هناء: طالع الصورة هاذي ..
قعد واخذ الصورة ..كنا انا وخلود وطلال وعصام وعبدالله وانتصار مصورين لما كنا صغار ..
قال وعيونه ما شالها عن الصورة ..
سامي: حلوة ..هذول اهلج ؟؟
هناء: انا واخوي ..وعبدالله ولد الجيران وعصام ولد خالتي وخلود بنت عمتك ..
ابتسم ابتسامة طفيفة ..وقال ..
سامي : ياحلوج وانتي صغيرة ..
قلت وانا ااشر على خلود ..
هناء: وخلود بعد ..الناس عبالهم انا حنا توأم..دايما يغلطون بينا ..
دقق سامي بخلود وقال ..
سامي : لا تشابهج تصدقين ؟؟
يا الوقت المناسب ..قلت بهدوء..
هناء: سامي ..
لف لي بدون ما يقول شي ..فقلت ..
هناء : ممكن اسألك سؤال ؟؟
هز راسه بايجاب وقلت وانا منزلة راسي اطالع ريولي العب فيهم ..
هناء: ليش تزوجتني ؟؟
نطرن رده بس طول ..رفعت راسي لقيته يطالعني بنظرات ما فهمتها ..نزل عيونه للصورة وقال ..
سامي : انتي شنو رايج ؟؟
قلت بدون تفكير ..
هناء: ماادري ..
قال بخيبة امل ..
سامي: ما تدرين ؟؟
قلت اصلح اللي قلته ..
هناء: يعني ..ما ..
وسكت ...ضاعت الكلمات مني .. طالعته ابيه يكمل ..بس حط الصورة بالسرير وقال ..
سامي : قلت لج مرة وبعيدها ..اول ما شفتج تعلقت فيج ...
ابتسمت وقلت ..
هناء: ادري ..بس انت ماشفتني إلا مرة وحدة ..
مرر ايده لى شري يلعب فيه ..وقال ..
سامي : وهاذي كافية ..
قلت وانا امسك ايده واحظنها بكف ايدي ..
هناء: انزين ..ليش ما تزوجت خلود ؟؟
طالعني مستغرب من كلامي وموفاهم السؤال ..فقلت اوضح ..
هناء: قصدي هي اولى ..
سحب ايده وقال..
سامي : يعني إذا بنت عمتي خلاص اولى ؟؟ بعدين هذا زواج مو سالفة اولى ولا مو اولى ..
سكت وطالعته بانبهار ..ابتسمت وقلت ..
هناء: افحمتني..
قال وهو يحط ايده على صدغي ..
سامي: الناس تفكر بهذا ..مو بهذا ..
واشر على قلبه ..
بغى يقوم بس مسكت ايده وقلت ..
هناء: سؤال ثاني ..
طالعني مستغرب وقال بملل ..
سامي : اشفيج اليوم ؟؟
قلت وانا اقعده ..
هناء: الله يخليك بس سؤال..
قال وهو يهز راسه بضجر ..
سامي : قولي ..
ارتبكت ..انا عارفة سؤالي بييب معاه مشاكل بس بايعتها ..
هناء: شلي كان بينك وبين بنت خالتك ؟؟
انصدم من سؤالي ..نزل راسه بعدين رفعه طالعني بعدها لف ناحية الدريشة وقال بهدوء ..
سامي : ما كنا بيني وبينها شي ..
حسيته يقص علي ..قلت ..
هناء: انزين اشحقة عصام قال جذي ؟؟
لف لي بحدة وقال بعصبية ..
سامي : وانتي اشلون عرفتي اسمه ؟؟
عبالي بيقولي مالج شغل ..ما استوعبت سؤاله ..كرر ..
سامي : اشلون عرفتي اسمه ؟؟
قلت بارتباك من نظراته ..
هناء: انت قلت لي ..
وقف جدامي وقال ..
سامي : انا ما قلت لج اسمه ..اشلون عرفيته ؟
هناء: كان ..اقصد هو اللي قالي ..
غمض عيونه جنه مايبيني اعرف شي وقال ..
سامي : وشنو قالج بعد ؟؟
هناء :ولا شي ..بس هذا اللي صار ..
بطل عيونه وطالعني ..ومشى ..قلت بصوت عالي ابيه يسمع ..
هناء: مارديت علي ..
قال وهو يبطل الباب وما طالعني ..
سامي : رديت ..
طلع وصك الباب.. يقهر هالسامي ..ما تقدرين تاخذ منه لا حق ولا باطل ..
من القهر انسدحت على السرير وانا قاعدة افكر باللي صار اليوم .. وما حسيت بروحي إلا وانا نايمة ..
قمت على الساعة ثلاث .. وانا حاسة بكسل ..مالي خلق شي .. نومة العصر تعب .. دورت بعيوني على سامي مالقيته ..قمت غسلت ويهي وصليت العصر ..ونزلت تحت ..وانا نازلة سمعت صوت سامي شكله يكلم احد .لما وصلت لآخر درجة ..لمحت ريال قاعد ومعطيني ظهره صعدت فوق بسرعة ..منو هذا ؟؟
طنشت ..يوعنة ابي آكل ..بس الأخ قاعد تحت ..مسكت كتبي وبطلت واحد فيهم ..تصفحته ..مااقدر ادرس وانا يوعانة .. بس ركزت شوي واندمجت ..قمت احل الواجب والمسائل اللي بالكتاب ..
سمع صوت الباب يتبطل ..وكان سامي ..
قلت وانا عيني على الكتاب ..
هناء: راح ؟؟
سامي :ئي ..
قالها وهو ينتهد ..رفعت راسي عن الكتاب ..منزل راسه كأن هموم الدنيا على راسه ..قلت اطلعه من حالته ..
هناء: كليت ؟؟
هز راسه بالنفي وهو لسة منزل راسه ..
هديت القلم وتسندت على الكرسي ..
هناء: ليه ؟؟
رفع راسه وطالعني وقال بهدوء ..
سامي : قلت لج ما اشتهي ..قومي اكلي انتي..انتي مو ماكلة شي من الصبح ..
قمت من مكاني وقعدت يمه ..وقلت ..
هناء: مارح آكل إلا لما تيي تاكل معاي ..
طالعني بضيق وقال .
سامي : هناء قلتج مو مشتهي والله ..قومي آكلي انتي ..
ابتسمت له بدلع وقلت ..
هناء : وإذا قلت لك انا عازمتك برة ..
ابتسم مجاملة لي بس كانت ابتسامته باهتة ..
سامي : تدلين مطعم عاد ؟؟
هناء: لأ ..عليك التوصيل وانا علي الفلوس ..
قال بنفس الأبتسامة ..
سامي: من وين ؟؟
حطيت راسي على جتفه وقلت ..
هناء: منك..انا وانت واحد ..
رفعت راسه عن جتفه وقلت..
هناء: صح ؟؟
وقمت وكملت ..
هناء: يلا قوم ..
بدلنا وطلعنا وطول الطلعة احاول اطلعه من حالته ..الصراحة يكسر الخاطر ..اهله متحاملين عليه ..شي صعب تعرف ان اهلك ما يحبونك ..
سامي : ما قلتلي اشسويتي بالكلية ؟؟؟
قلت وانا اشبك ايدي بايده واطالع البحر ..
هناء: ولا شي ..كان يوم عادي سجلت واخذت محاظرتين ..
ما علق ..وانا عجبني منظر البحر وقت الغروب ..قلت وعيوني على البحر ..
هناء: الله يا حلاة البحر ..تصدق احب البحر بالنهار بليل اكره ..
قال وهو يعدل الكاب ماله ..
سامي : ليه ؟؟ احلى شي البحر بليل ..
هناء: لا مو حلو ..احسه غدار بليل ما تعرف شنو فيه ..حتى السباحة فيه بليل مو حلوة ..ما تشوف شي ..
وقف يمي وقال وهو بطالع البحر ..
سامي : مو يقولون البحر غدار ..
هني تذكرت عصام ..حسيت بالغدر مع انه ما سوا لي شي ..انا اللي حبيت وانا دفعت الثمن آخر شي ..
قلت وكانت نابعة من قلبي ..
هناء: بس مو نفس غدر البشر ..
حسيته يطالعني ..بس طنشت وقعدت اطالع البحر ...غمضت عيوني واخذت اشتنشق نسيم اللي يهب علينا ..
سمعت سامي يقول ..
سامي: شكلج جربتي ..
بطلت عيوني ولفيت له وقلت باستغراب ..
هناء: جربت شنو؟؟
سامي : الغدر..
رديت طالعت البحر وانا احاول اطرد عصام من مخيلتي ..وقلت بشرود..
هناء: قول عشتيه لحظة بلحظة..
وانتبهت للي قلته ..ولين ..طالعت سامي بس كان يطالع البحر ..الحمدلله ما انتبه ..بس خابت ظنوني ..
سامي : في احد معين غدر فيج ؟؟
ارتبكت وقلت .ز
هناء: لا ..بس رفيجة لي كنت احبها حيل وغدرت فيني ..
سامي: وهي كانت تحبج ؟؟
ما طالعني لما قال جملته ..قلت وانا اطالع تحت ...محقق ..
هناء: ما ادري ..بس اكتشفت بالنهاية انه حب من طرف واحد ..يعني كان عبالي انها تحبني ..بس طلعت غلطانة ..
ونطت جدامي صورة عصام ..غمضت عيوني اطرد صورته لأنه ما يجوز..رفعت راسي وبطلت عيوني لقيت سامي يطالعني ...وجهت ويهي شطر البحر اتهرب من نظراته ..سمعته يقول ..
سامي : هذا مو غدر ..
طالعته مو فاهمة اللي قاله ..فكمل يوضح ..
سامي: يعني اللي كنت تحبينها ما كانت تدري انج تحبينها صح ؟؟ يعني هذا مو غدر ..انتي اللي تحسسين نفسج انها غدرت فيج ..ولا هي ما سوت شي لأنها مثل ما قلتي ما كانت تدري بحبج لها ..
وحط عينه بعيني كأنه عرف شنو اللي في بالي ..وقال بهمس ..
سامي : صح ولا لأ؟
طالعت عيونه الفاتحة ..حسيت انها كشفتني واني محل شك .. بعثرت نظراتي ..قال سامي ..
سامي: لا تظلمين البنت ما تدري عنج هي ..
وشد على ايدي وقال ..
سامي : امشي خل نروح نقعد على الرمل ..
ورحنا للشاطئ وقعدنا فيه ..الشمس تعلن رحيلها ..قلت وانا في بالي لسة سالفة الغدر ..
هناء: وانت ما تعرضت لغدر مرة ؟؟
سامي : وايد ..
كنت ابي اتكلم بس سبقني وقال ..
سامي : don't try
ارتسمت خيبة الأمل بمحياي وقلت بضيق ..
هناء: دومك جذي ..
وقمت اتمشى على البحر من الضيق اللي فيني ذكرني بالماضي وما يبيني اعيش الحاضر ..يبط الجبد ..
طالعت ورا لقيته قاعد وفاصخ الكاب ومغمض عيونه ..لين الحين احسه متضايق ..اول مرة اشوف احد يكره اهله ..بس شكله ما يكرهم مني والدرب اكيد سووا له شي ..رحت له ..وقلت وانا اتخصر ..
هناء: تراني تعبت ..
بطل عيونه شكله توه انتبه لي ..
سامي : what؟؟
مسكته من ايده ويريته وقلت بعصبية ..
هناء : احنا يايين عشان نستانس مو عشان نتضايق..امش جدامي يلا ..
ووقف ونفض التراب عنه وقال وهو يلبس الكاب ويبتسم ..
سامي : حاضرين للطيبين ..جم هناء عندي ..
ومشينا على البحر وريولنا بالماي ..قلت وانا اوقف جدامه وامشي عكسه ..
هناء: تدري اني ما اعرف انت اي الألوان تحب ؟؟
قال بسرعة ..
سامي: الأسود..
طالعته متصنعة الخوف ..
هناء: بل ..اسود !!! ليش ؟؟
قال ببساطة ..
سامي: الأسود سيد الألوان ..
قلت ..
هناء: انا اموت على الوردي .. الوردي يدل على النعومة..
طالعني وقال يتطنز ..
سامي : الله والنعومة عاد ..
طقيته على راسه وقلت ..
هناء: مالت عليك ..
ضحك .وانا ماصدقت انه رد لي..قلت ..
هناء: ئي جذي اضحك ..الدنيا ما تسوى ..
ابتسم لي وما علق..
بس فاجئني سؤاله المباغت ..
سامي : حبيتي احد بصدق مرة ؟؟؟
وقفت في مكاني واختفت الضحكة من ويهي ..وحلت بدالها الصدمة ..قال هو
سامي: اشفيج ؟
لازم تذكرني ..قلت وانا مشتتة..
هناء: لا طبعا ..
سامي : واشفيج تقولينها وانتي خايفة؟؟
قلت بسرعة
هناء: مو خايفة ..
طالع البحر وقال ..
سامي : الحب حلو لو فهمناه وعرفنا معناه ..
استغربت من كلامه وقلت ..
هناء: شنو مناسبة الكلام هذا ؟
هز جتوفه دلالة البساطة وقال ..
سامي: ماله مناسبة ...
حكرني بالزاوية ..خبيث ..خل اقوله وارتاح ..حاسته عارف شي ..اقوله احسن ما يعرف بطريقة غلط ..
هناء: ئي حبيت ..
قلتها ونزلت راسي الأرض بسرعة ..رد بعد ما طال السكوت ..
سامي : ممكن اعرف منو ؟؟
بطلت عيوني وكان شكله يحاول يبلع الصدمة ..
قلت بطء..
هناء: عصام ..
حسيته انصدم صدمة قوية ..قال بصوت خافت ..
سامي : عصام !!!
طالعته مو فاهمة شي ..بعدين فهمت ..قلت بسرعة ..
هناء: عصام ولد خالتي انا ..
هدأ شوي ..بس لسة حاسته مشدود الأعصاب..اخذ نفس بعدين قال .
سامي: انا كان قصدي من السؤال انج منو تحبين احد من اهلج ربعج بصدق..
وقفت مثل الشيرة ... حسيت ان الهوا انسحب مني..او انه ما عدا فيه هوا اصلا ..خبلة ..تسرعت ...
مشى عني ..
وعلى الساعة ثمان ردينا البيت ..وطول الوقت احاتشى اتكلم معاه وهو بالمثل ..موقف محرج الصراحة ..
من كثر ما تروح وترد صورة عصام في بالي قمت اقط خيط وخيط ..يالله سترك ..
لما ييت انام ..غطيت روحي ..سمعته يقول..
سامي :ترى حتى البنت تحب..الحب مو عيب ..
تجمدت في مكاني ..وظلت ايدي معلقة في الهوا ماسكة اللحاف ..لفيت له لقيته يبتسم لي بحنان ..خفت اقول شي ويطلع غلط ..
غطيت روحي باللحاف بس سامي سحبه مني وقال وهوقاعد يمي ..
سامي: هناء..لا تستحين..انتي ما سويتي شي غلط ..حبج كان شريف ..
غمضت عيوني مابي اسمع شي ..كمل هو..
سامي : وانا ادري انج ما سويتي شس يغضب رب العالمين ..وحبج كان طاهر..
بطلت عيوني والتفت له متعجبة من كلامه ..
هناء: اشدراك ان حبي كان طاهر؟؟
لو واحد غيره ودرى ان مرته كانت تحب واحد ثاني دفنه ..
حط راسه براسي وقال ..
سامي :حبيبي ..انا اثق فيج ..لو ما اعرف عقلج الكبير ما كنت تزوجتج ..
وغطاني باللحاف وقال ..
سامي :نامي وراج دوام وانا بعد وراي دوام ..
وبدال ما انام ..تجمعت الدموع في عيوني ..ونزلت ..ماادري من واروح من طيبتك يا سامي ..هالبني آدم بيجلطني بمثاليته وحبه الأعمى لي ..
شاف سامي دموعي فقال ..
سامي : هناء..اشحقة تبجين ؟؟
قلت وانا امسح دموعي ..
هناء: لو واحد غيرك ما كان نطر لين الليل ..كان ذبحني لحظتها ..
قال وهو يمسح دموعي معاي ..
سامي: انت قليتها بنفسج ..واحد غيري ..يلا نامي..
ابتسمت له وقلت بلحظة حب اجتاحتني ناحيته ..
هناء: تصبح على خير حبيبي..
قال وهو يتلحف ..
سامي : وانتي من اهله ..
اليوم الثاني كان نفس امس .. ما صار شي جديد اللهم ما شفت عصام الخبل ..وسامي من درى ان عصام نفس تخصصي قال ..
سامي: صج ؟؟ انا اعرف انه كان يدرس طب ..
طب !!!
هناء: وشلي خلاه يدرس محاسبة ؟؟
ابتسم ابتسامة استهزاء وقال ..
سامي : اكيد ما فلح فيها وياه هني يجرب حظه بالمحاسبة ..واحد ما عنده هدف ..امشي ..
ودخلنا الجامعة ..
من اليوم ورايح هو بيوصلني لين القاعة ولما اخلص القاه عندي ..ماادري ما عنده محاضرات ولا شنو ؟؟
في يوم قلته ..
هناء: سامي غلط اللي تسويه ..انت عندك محاضرات بعد ..
قال وعيونه على اللاب توب ..
سامي: ادري حياتي ...انا لما اوصلج اروح محاضرتي واستأذن بآخر عشر دقايق فيها ..
قلت وان ااشرب النسكافيه ..
هناء: والأستاذ ما يقولك شي ؟؟
سامي : يعني ..بعض المرات ..
هناء: الزم ماعليك دراستك ..
حرر عيونه من الشاشة وقال ..
سامي: فداج الدراسة واهلها ..
ابتسمت بخجل ..يغدقني بحبه ..وانا للين الحين ما نبض قلبي ناحيته ..
العصر طلعنا نتمشى بعد ما درست ..وبالردة عند باب البيت ..
هناء: لا والله ؟؟ اشايفني ..مينونة ؟؟
ابتسم وقال ..
سامي : والله انتي ادرى بنفسج ..
ووصلنا للباب حط سامي ايده بخباته وطلع المفتاح ..وبغى يحطه بالقفل بس تحرك الباب وتبطل شوي ..
طالعنا انا وسامي بعض ..قلت ..
هناء: شنو حرامي ؟؟
قال وهو يدز الباب ..
سامي : ماادري خلج برة..
ماسمعت كلامه ودخلت وراه ..وقفت عند عتبه الباب بس ..بطل سامي الليتات ..تفاجأنا بوحدة قاعدة على القنفة واول ما تبطل الليت لفت لنا ..
هني شفت ويه سامي يتلون ..كان يطالع المرة بدهشة ...وقال ..
سامي Mom !!!
الحلقـــــة التاسعــة
"اوراق مخفية"
لما نطق سامي بهالكلمة نقلت عيوني من ويه سامي للمرة اللي قاعدة تطالعنا ..هاذي امه ؟؟؟ واااااو ...رائعة الجمال .. الصراحة ولا ممثلات هوليوود .. حلوة... ما شاء الله ...شعر طويل مصبوغ اشقر ..ومكياج .. ما صدقت انها امه ..هاذي شكلها ما دخلت الثلاثين ..
وقفت
وانا ينيت على جسمها الفنان .. كنت اطالعها مبهورة ..حسيت سامي يطالعني وكانت نظراته شر ..فغضيت بصري ونزلته الأرض ..خفت يزعل مني .. بس شسوي مو بايدي ... حورية تمشي على الأرض ..سبحان الخالق فيما خلق ...
قالت واخيرا انطقت ..
ام سامي : ما رح تسلم على امك يا سامي ؟؟
طالعت انا سامي الي كان منزل راسه بهاللحظة يلعب بالسويج وقال ببرود ..
سامي : اشلونج ؟؟
ورفع راسه يطالعها .. قالت امه وهي تقرب منه اكثر ومعاها كانت ريحة العطر تشتد ..
ام سامي : بخير .. انت اشلونك ؟؟
طالعها سامي بنظرات استهزاء ..تحرك من مكانه وراح قعد على القنفة ..وقال وهو لسة يلعب بالسويج ..
سامي: شنو سر الزيارة الغريبة ؟؟
طالعتني امه بنظرات غريبة ..ولفت لسامي وقالت ..
ام سامي : ما تبي تشوفني ؟؟
ابتسم وقال ..
سامي: حاشى وكلا ..انا مابي اشوفج ؟؟
واشر على روحه بس قالها وهي مليانة سخرية ..
لفت لي امه فجأة لدرجة اني انتفض ماادري ليه ..وقالت وهي تؤشر علي ..
ام سامي : ومنو هاذي .وحدة يديدة؟؟
طلعت عيوني من مكانها من الصدمة وطالعت سامي اللي قال وهو يتعدل بقعدته ويلف لأمه ..
سامي: انا ما عندي وحدة يديدة ولا قديمة ..
تخصرت امه وقالت ..
ام سامي : عيل منو هاذي ؟؟
طالعني سامي بعدين طالع امه وقال ..
سامي: مرتي ..
صعقت ..طالعت سامي بدهشة ..وقالت بصدمة ..
ام سامي : تزو..تزوجت؟؟
قال وهو يرد يلعب بالسويج ..
سامي: من شهرين ..
كان نفسها مسموع من العصبية .. قفصها الصدري ينزل ويرتفع من القهر .. لفت لي وتقربت مني ..وقالت وهي توجه الكلام لي بحقد ..
ام سامي : قدرتي تلعبين بعقله ؟؟ انتي من وين ياية ؟؟ لا نعرف لا اصلج ولا فصلج .. اكيد انتي وحدة من الخمة ..شفتيه غني قلتي خل استفيد منه ..بس سمعي ما رح تحصلين منه ولا بيزة .. واحسلج تردين مكان ما ييتي ..و..
سامي : يماااااا
قاطعها سامي بصوته العالي اللي اول مرة اسمعه ..كمل وقال ..
سامي: هاذي مرتي وما اسمح لأحد ان يهينها ولا بكلمة وحدة .. وإذا على الفلوس تزوجت ولا ما تزوجت انا ما رح اعطيها لكم ..
قالت وهي تؤشر على روحها ..
ام سامي : تبديها علي ؟؟ انا امك .
قال بانفعال مبالغ ..
سامي : امي ؟؟!!!! الحين ياية تقولين انج امي ؟؟ وينج عني من سنين ؟؟ وينج يوم كنت احتاجج وما القاج ؟؟ وينج يوم كنت بدار الأيتام؟؟ وينج يوم ...( اخذ نفس ) ..
وييه صار احمر من القهر ..بلع ريجه وقال وهو يقعد بضعف ويمرر ايده على شعره ..
سامي : يوم اتهمتوني ظلم ...
ورفع راسه وكمل بصوت بائس ..
سامي : صرت يتيم وامي ابوي عايشين ...
دار الأيتام !!!!! سامي كان بدار الأيتام؟؟!!!!..
تجدمت منه امه وقالت بحنان مصطنع ..
ام سامي : يما انا ..
وحطيت اديها على جتفه ..بس سامي بعد ايدها وقال بعصبية ومرارة..
don’t ever touch me:سامي
ووقف ..وقال يوقف يمي ..
سامي: كاهو عرفتي اني تزوجت ..في شي ثاني بعد؟؟
لفت له امه ببطء وقالت ..
ام سامي : ادري انك ما رح تتقبلني ..بس على العموم ..انا ياية عشان عصام ..
ضحك سامي وقال ..
سامي: قالج دلوع امه ؟؟
قالت بعصبية ..
ام سامي : ليش سويت فيه جذي ؟؟ هذا ولد خالتك ..
قال باستعباط ..
سامي : عبالي ولد عمتي ..
قالت امه مستنكرة استهزاءه..
ام سامي : ساااامي ..
ابتسم لها وقال ..
سامي : والله يوم يتأدب ذيج الساعة مارح اضايقه ولا اضايق امه ..ست الحسن ..
وانقلبت ملامحه بسرعة لوجه جامد مافيه تعابير ..
سامي: بس إذا عرفت انه يفكر بس انه يأذيني ..بخليه يلعن الساعة اللي عرفني فيها ..
تقربت منه امه ليما صارت بويهه..وقالت بقهر ..
ام سامي : انت ما تقولي لين متى بتظل على هالحالة ؟؟
قال يستعبط مرة ثانية ..
سامي: ماادري .. اظن ليما تعقلون انتوا ..
ام سامي : شايفنا ميانين ؟
طالع فوق يفكر ..وانا كنت خايفة من العواقب ..اسكت يا سامي مالنا خلق مشاكل ..
سامي: لا .. اشوفكم طماعين ..
قالت امه باستخفاف ..
ام سامي : على شنو ؟؟؟
وطالعتني وكملت ..
ام سامي: على مرتك اللي ماادري من وين يايبها ؟؟
تقرب منها سامي وقال ..
سامي: لأ وانتي الصاجة ..على فلوسي اللي انتوا حاولتوا اتسوون المستحيل عشان تاخذونها مني ..
قالت امه بانفعال ..
ام سامي : انت صدقت ان يدتك كتبت الثروة كلها لك ؟؟
ابتسم وقال..
سامي: وانتي صدقتي اني بعطيج منها ؟؟
انقهرت امه وقالت ..
ام سامي : يدتك اللي مفتخر فيها ..ماتت وما عندها ورث ..
قال باستهبال ..
سامي: والله!!! توني ادري ..
كملت ..
ام سامي : لا تعتقد ان الحلال والخير اللي انت فيه من يدتك ..تراها فلوسي ..
هز راسه بتفهم وهو اصلا يتطنز ..وقال ..
سامي: والحين شنو المطلوب ؟؟
ام سامي : تعتذر من عصام ..
شنوووو؟؟؟
قال سامي ببرود ..
سامي: آسف ..
ام سامي : مديت ايدك عليه وفشلتني جدام امه وما تبي تعتذر ..صج انك قليل ادب وما عرفت اربيك ؟؟
هني انفجر سامي يضحك ..وقال وهو يحاول يجمح نوبة الضحك ..
سامي: ما عرفتي تربيني ؟؟!!!..ليش انتي اصلا ربيتيني ؟؟
وللمرة الثانية انقلبت ملامحه بسرعة بس هالمرة لعصبية وحقد وقال بصوت اشبه بحفيف الحية ..
سامي: انتي ولا شي بحياتي ..ولا شي ..
ودوى في البيت صوت صدى طراق ..كان هذا طراق عطته ام سامي لسامي ..شهقت انا وحطيت ايدي على حلجي.. قالت بعصبية مبالغة ..
ام سامي: طول عمرك بتظل ناكر للجميل .. طالع على ابوك ..حاقد وجاحد للنعمة .. مو انا اللي طلعتك من دار الأيتام ؟؟؟ مو انا اللي سكنتك عندي ومع زوجي وخليتك مثل الملك بعرشه ؟؟
ومسكت جتوفه وهزتهم بقوة ..وكملت بصراخ ..
ام سامي : رد علي ؟؟ مو اناااا؟؟
بعد سامي ايدين امه وقال بنفس صراخها واقوى ..
سامي: لأ ..لأ ..مو انتي ... مو انتي .. لولا صوفي وام عامر الله يحفظها لي كنت الحين لسة طرار قاعد بالشارع ..هي الي ربتني واللي دارتني ...هي اللي خلت لحياتي معنى ..حتى ولدها عامر ..اعتبرني مثل اخوه ..
صرخت امه وقالت ..
ام سامي : لولاي انا ..ما كنت بني آدم واقف جدامي .. و..
قاطعها سامي بأشارة من ايده وقال..
سامي: لا تفتحين مواضيع قديمة ..تراج انتي الخسرانة ..
تنهدت امه ونزلت راسها وقالت بيأس..
ام سامي : انا ماادري لين متى بتظل حاقد علي .. انا امك .
قال سامي بصوت حزين نابع من قلبه ..
سامي: وانا ولدج ..اللي فضلتي عليه ريلج المصون ..اللي وراني نجوم في عز الظهر ..ويوم طلعت من عندج ..رحت لأبوي ..وكانت مرته مثل السوط على ظهري ..اخرتها قطتيني دار الأيتام ..خلتيني اتوهم انج مو امي ..واني ولد شوارع ..تسع سنين ..تسع سنين وانا يتيم جدام نفسي وجدام العالم ..والحقيقة تقول العكس ..
سكت شوي ونزل راسه ..وكمل بعد ما اخذ نفس ..
سامي: بعد ما عرفتي ان يدتي كتبت الثروة كلها باسمي ..طلعتيني من دار الأيتام ..وقلتي لي انج امي ..
وببساطة تبيني اصدقج ..لولا الأوراق اللي تثبت اني ولدج ما كنت صدقتج ..
قاطعتها امه وقالت والدموع بدت تتجمع بعيونها ..
ام سامي : انت ولدي ..وبتظل ولدي ..
قال بنفس النبرة وبس بصوت خافت ..
سامي : وهاذي المشكلة ..اني ولدج ..وانتي امي ..
طالعته امه بنظرات حزن وامل بنفس الوقت يمكن يحن شوية ..بس نزلت راسها ..وردت رفعته وطالعتني ..ومشت ..طلعت برة البيت ..بهدوء ..
وانا واقفة مثل عامود النور ..منصدمة من اللي سمعته .. مذهولة من الموقف اللي صار ..حزينة لسماع قصة مثل هاذي ..في ام تسوي بولدها جذي؟؟ تسع سنين قاطته بدار الأيتام !!!! تسع سنين !!!!
غمضت عيوني واخذت نفس ..الموقف مو راضي ينمحي ..لفيت لسامي النايم .. وبصعوبة نام ..بعد ما بانت الحقيقة قالي كل شي ..
انظلم بحياته ..عاش سنين عمره ما بين امه وابوه ..وعذاب مرت ابوه وزوج امه ..انولد ومكتوب الشقا عليه .. وبعدها بسنة تطلقوا امه اوبوه ..خذته امه وعاش ست سنين عند ريل امه ..اللي وراه الويل ..بعدها اشتكى ابوه وخذاه بقوة المحكمة ..وحطه عنده ..وتأمل سامي من العيشة اليديدة الخير ..بس للأسف ..مرت ابوه كانت مثل الحية ..بس يدته من ابوه كانت مثل البلسم ..هي اللي كانت تضحك وتلعب معاه ..لما دخل الــ11 سنة ..امه ردت تطالب فيه ..وفعلا نجحت ..خذته عندها بس بكل قسوة قطت بدار الأيتام وانكرت انه يكون ولدها ..لما حست يدته بعمايل امه وابوه فيه كتبت الورث كله له ..وماتت ..
ولما درت امه طلعته من دار الأيتام وقعدته عنده ..بس سامي حزتها صار ريال مسؤول عن نفسه ..طلع من بيت امه وقعد مع عامر رفيج عمره ويا امه .. ومن هني قطع مشوار حياته وبدأها صح ..وتناسى اللي صارله ..خلص الثانوية ودخل الجامعة ..وفتح مكتب بفلوس يدته .. وللين الحين امه وابوه يلاحقونه يبون فلوس ..
انا من وجهة نظري اشوف اللي سواه سامي صح من جهة ..ومن جهة ثانية احسه بالغ شوي برده على امه ..لأن مهما صار هاذي امه .. وما يصير يتكلم معاها جذي..
انتبهت على صوت المنبه ..وكانت الساعة خمس ونص ..قمت توضيت وصليت الفير ..دعيت لسامي ولي ..
بعدها رحت اقعده ..
هناء: سامي...
بطل عيونه وطالعني ..ورد غمضهم وقال بكسل ..شكله ما نام ..
سامي: ساعة جم؟؟
هناء : ست إلا ثلث..يلا حبيبي قوم صل الفير ..
بطل عيونه وقال ..
سامي: صباح الخير ..
ابتسمت بحبور..وقلت ..
هناء: صباح النور ..
بعد عنه اللحاف ..وقال بعد ما قعد ..
سامي: هناء..
رفعت راسي لقيته يطالعني بعيونه الفاتحة ومدقق في ويهي ..
قال بجدية ..
سامي : آسف على الكلام اللي قالته امي ..
هناء: ماله داعي الأعتذار ..هاذي بحسبة امي ..
وكملت بمزح ..
هناء : ولو ان شكلها قدي ..
ابتسم ابتسامة باهتة ..وقام يتوضى .. طلعت انا من الغرفة ونزلت المطبخ ازهب الريوق .. نزل سامي بعد ما ناديت عليه وقعدنا نتريق .. لو اني لاحظت انه ما ياكل ..
سامي: ساعة جم بتخلصين اليوم ؟؟
قلت وانا آكل ..
هناء: ساعة 12 ..بتي تاخذني ؟؟
سامي : اكيد ..
طلعنا من البيت ..رحنا لمكان المعهود الجامعة .. وصلني سامي كالمعتاد لباب القاعة وراح ..بدت المحاضرة .. وانا اندمجت فيها .. لما خلصنا ..لميت اغراضي .. وطلعت من القاعة .. استغرب لما ما لقيت سامي موجود ..شكله عنده محاضرة .. خل اقعد يمكن ايي ..هو بين المحاضرات القاه جدامي ..ليما اخلص ونروح البيت ..تعودت على هالشي ..والصراحة اريح ..احسن من اني اشوف ويه العنز عصام ..مع انه ماداوم ..ايي يوم وعشرة لأ .. خلــ..
" الحلو قاعد بروحه !!"
التفت للصوت ..وكان الزفت عصام ..توه على بالي ..اففففف ..لميت قشي وقمت من الطاولة ..
وطبعا هو وراي مثل ظلي ..
عصام : صج اللي سمعته ؟؟ انتي مرت سامي ؟؟ يازين ما اختار .. الصراحة ذوقه حلو .. لو ماادري انج مرته كنت تزوجتج ..
هني انا وصل الدم لراسي ...لفيت له وقلت بعصبية ..
هناء : صج انك قليل ادب ..وهذا انا مرت ولد خالتك يا الخبل تسوي فيني جذي ؟؟
قال بخبث وابتسامة شاقة الحلج ..
عصام : عشان انتي مرته اسوي فيج جذي ..
مارديت عليه وكملت مشيي ..سمعت صوت التلفون ..وكان سامي .. لفيت وراي مالقيته احسن ذلف ..رديت على سامي..
سامي: حبيبي ..انا آسف ما اقدر ايي ..بطرش لج عامر ..هو بيي ياخذ مرته تعالي معاهم ..
هناء: وانت متى بتيي؟؟
سامي : على الساعة وحدة ..ثنتين .. يلا عمري ..مع السلامة ..
حتى ما نطر ارد عليه ..شكله مستعيل .. دخلت المحاضرة الثانية .. وانا في بالي لسة جملة الأهبل عصام .." عشان انتي مرته اسوي فيج جذي " ..شلي بينه وبين سامي ؟؟ فلوس ولا شي ثاني ؟؟
والله سالفتك سالفة يا سامي .. احس انك ما قلت لي القصة كلها .. بعد ما خلصت المحاضرة المملة ..حسيت بايد على جتفي ..عبالي عصام ..فلفيت وانا ناوية شر ..بس طلعت بنت ..الحمدلله ..
قالت ..
: السلام عليكم ..اكيد انتي هناء ..
طالعتها باستغراب وقلت ..
هناء : وعليكم السلام ..بس من وين عرفتيني ؟؟
: انا اسمي شيخة مرت عامر ..انتي هناء مرت سامي رفيج ريلي ..
مديت ايدي اسلم عليها وقلت ..
هناء: هلا والله ..
بعد السلام الكلام عرفت انها نفس تخصصي ..اكبر مني بسنتين ..قعدنا نسولف..الصراحة سوالفها ما تنمل وعقلية منفتحة ومثقفة .. ليما رن موبايلها وقالت لي ان زوجها برة .. كنت مستحية ..اول مرة اركب مع احد غريب ..طول الطريج ساكتة ..ولما وصلت .. صليت الظهر وتسبحت ونزلت اسوي الغدا مع اني مكسرة ..ليما خلصت .. مسكت التلفون ..ودقيت على سامي ..
هناء: وينك فيه ؟
سامي: كاني ياي بعد ربع ساعة ..
هناء: خلاص اوكي ..
حطيت الأكل على الطاولة وغطيته ..وقعدت على القنفة انطره...وخذتني الأفكار .. ودي اعرف سالفته بالكامل ..بس اشلون ؟؟ اشلون ؟؟؟
رفعت راسي وطالعت الساعة ...تأخر ..قال بعد ربع ساعة والحين صارله ساعة إلا ربع ..وقفت ابي اروح للتفلون بس .تبطل الباب وكان سامي ..
قلت وانا اروح له ..
هناء: تاخرت .. وينك؟؟
فصخ نظارته الشمسية وقال وهو يحط مفتاحه على الطاولة اللي يم الباب ..
سامي: خليني اسلم بالأول ..السلام عليكم ..
قلت بسرعة ..
هناء: وعليكم السلام ..
عداني وقعد على القنفة ..وسند راسه على ظهرها ..استغربت منه ..قلت بخوف ..
هناء: سامي ..اشفيك ؟؟
طالعني بعدين قال وهو يتنهد ..
سامي: مافيني شي .. بس خالتي اليوم ماتت ..
بطلت عيوني من الصدمة .. ماتت!!! ..
بس انتبهت لأسلوب سامي ..ويقولها ببرود .. رحت وقعدت يمه وقلت ..
هناء: واشفيك تقولها ببرود جذي ؟؟
ما طالعني ...طنش سؤالي وقال ..
سامي: بروح انام ..قعديني على صلاة العصر ..
قلت بسرعة ..
هناء: ماتبي تاكل ؟؟
لف لي بملل وقال .
سامي: لأ ..ما اشتهي ..
هزيت راسي باستنكار ..حتى ما فكر يقولي نروح نعزيهم ..ولا يقولها ببساطة " خالتي ماتت " ..لو كانت امه شنو رح يسوي ..وتذكرت اللي صار امس ..مرة اقول معاه حق ومرة لأ ..والله محيرني سامي ..
بطلت التلفزيون بقهر ..وقعدت اطالع اي شي .. مر الوقت بطيء ..
" هناء.."
صوت اعرفه دخل حلمي ..بطلت عيوني لقيته سامي واقف فوق راسي ..
سمعته يقول يعاتبني ..
سامي : وهذا انا موصيج تقعديني ...
انحرجت ..صج نسيت ..طالعت التلفزيون اللي كان مبطل ..بعدين لفيت لسامي وقلت ..
هناء: الساعة جم؟؟
سامي : اربع ونص ..قومي صلي ..
وفركت عيوني وقفت بكسل رحت الحمام عزكم الله اللي تحت ما لي خلق اصعد فوق ..توضيت ورديت الصالة ..لقيته لسة قاعد عبالي بيطلع بيروح المسيد اقصد اللي يسمونه مسيد لأنه بيت صغير يصلون فيه كل صلاة ..
قعدت وقلت ببرود مصطنع ..
هناء : ما رح تروح الصلاة ؟؟
قال وهو ساند راسه على ظهر القنفة بطفش ..
سامي: بلى ...
وكمل وهو يرد شعره ورا.
سامي : سمعي ..بنروح عزا خالتي ..اليوم بيودون جثمانها الكويت تندفن هناك .. جهزي روحج ..
وقام طلع من البيت ..فيه الخير ..اخيرا تذكر ..الحمدلله ..ابتسمت برضا ..وتنفست بحماس ..على الأقل اشوف اهله كلهم ..صعدت فوق وصليت العصر ولبست عباتي ونزلت تحت انطره .. وفعلا وصل .. دخل وهو ساكت وركبنا السيارة وهو ساكت ..ماادري شنو فيه ..من سالفة امس ؟؟!! يمكن .. ولا زعلان على خالته ؟؟ ما اعتقد ..سامي يكره اهله ..
وصلنا لعمارة ..التفت لسامي وقلت ..
هناء: أي دور ؟؟
مارد علي ..طالعته عدل .سرحان ..ناديته بهدوء ..
هناء: سامي ..
انتبه علي اخيرا ..ولف لي بدون ما يتكلم وقلت ..
هناء: اشفيك ؟؟
بعثر نظراته وقال بتشتت..
سامي: ماكو...
وسكت ...كأنه يفكر بشي ..
كمل وقال ..
سامي: لو ..لو امي..
غمض عيونه بألم وقال وهو يلوح بايده بعشوائية ..
... الدور الثاني ..شقة سبعة ..forget it …سامي:
طالعته لعلي استشف منه سبب حزنه وشروده .. بس ماكو فايدة ..له قدرة على تغيير ملامحه بجزء من الثانية .. نزلت من السيارة وانا افكر بسؤاله ..شنو كان يبي يقول ؟؟
انكمشت على روحي بسبب تيارات الهوا الباردة ..ومسكت شيلتي لا تطير ..ودخلت البناية وركبت السلالم ..وصلت الشقة طقيت الباب وبعد ثواني فتحت لي ..قلت بذهول ..
هناء: عالية !!!!
طالعتني كأنه ما تذكرتني ..فقلت ..
هناء : انا هناء رفيجة خلود اللي زرتيها في الكويت ..
دققت فيني بعدين تذكرتني ..سلمت علي ودخلتني ..البيت طبعا كان مليان حريم ..بس ما ادري منو هم ..
بس لمحت ام سامي اللي كانت عيونها علي مثل الصقر ..اخترعت من نظراتها لفيت الناحية الثانية اهرب من عيونها ..ولقيت صوفي ..رحت قعدت يمها بعد ما سلمت عليها ..
صوفي : الله يرحمها ...الله يعينا لعالية ..
استغربت وقلت ..
هناء: شكو عالية ؟؟
طالعتني صوفي ببلاهة وقالت ..
صوفي : شنو بنا هناء؟؟ ام عالية هي اللي ماتت ..
بطلت عيوني على وسع ام عالية ؟؟ يعني سامي يصير ولد خالة عالية ؟؟؟
" شلي يايبج هني ؟"
انتهبت على الصوت ..لفيت يميني لقيت ام سامي قاعدة وعينها تقدح شر ..كررت سؤالها بصوت خافت بس بحقد ..
ام سامي: شلي يايبج هني ؟؟
قلت ببساطة ..
هناء: ياية اعزيج بأختج..
ابتسمت بسخرية وقالت ..
ام سامي : مشكورة وما قصرتي ..والحين قومي طلعي برة ..
انصدمت اول مرة انطرد ..صج انها تكرهني بس تطردني ابد ما يت على بالي .. قالت بعصبية بس بصوت واطي ..
ام سامي : قومي قبل ما اطردج جدام الناس هذول كلهم ..
تدخلت صوفي وقالت ..
صوفي : ام سامي ..ما بيصير اللي بتعمليه هاد ..الناس بعزا ..
طقت ام سامي حافة الكرسي بايدها بثورة وقالت وهي تحاول تهدي روحها ..
ام سامي: سكتي انتي يا عيوز النار ..محد خرب ولدي علي إلا انتي ..
ونقلت عيونها لي وقالت ..
ام سامي: قومي ما تسمعين ؟؟
انحرجت الصراحة وحسيت بقلة القيمة .. تندهت بضيق وقمت من مكاني ..وطلعت .. نزلت ووقفت بالشارع ..مسكت تلفوني ودقيت على سامي ..بعد جم رنة سمعت صوتها الأجش ..
سامي : هلا هناء ..
قلت وعيوني على الأرض واعد البلاط ..
هناء: تعال مرني ..
سكت شوي جنه مو فاهم ..بعدين قال ..
سامي: ليش ؟؟ خلص العزا ؟؟
ما عرفت شقول فقلت ..
هناء: ئي ..ئي خلص ..
سكت شوي يستوعب بعدين قال ..
سامي: ثواني واكون عندج ..
وصكيت عنه ..دخلت داخل العمارة احتمي من البرد ... سمعت صوت نعال اكرمكم الله ..التفت ولا هي ام سامي ومعاها عالية ..طالعتني باشمئزاز وانا لفيت عنها ..مابي احتك وياها كافي اللي صار ..قالت عالية وهي تقرب مني ..
عالية : وين هناء ما قعدتي شي ؟؟
طالعت ام سامي بعديننزلت راسي..
عالية : انتي تنطرين احد ؟؟
رفعت راسي ولقيتام سامي عند الباب ماسكة المقبض تبي تطلع..قلت ..
هناء:ئي ..زوجي بيي بعد شوي ..
قالت بتفاجأ ..
عالية : انتي متزوجة ؟؟
قلت وانا ابتسم على ملامح ويهها..
هناء: ئي ..من شهرين تقريبا ..
ابتسمت بفرح وقالت ..
عالية : مبروك ولو انها متأخرة ....
هناء: الله يبارك في عمرج ..بس ..
قاطعتني ام سامي بصوتها ..
ام سامي : يلا عالية ..ورانا درب ..
انحرجت للمرة الثانية ..اشفيها هاذي لهدرجة تكرهني ؟؟؟ ..نقلت بصري لبرة ..ولقيت سامي توه واصل .. تحركت مع عالية وانا اقول ..
هناء: يلا اشوفج على خير ..
ابتسمت لي وقالت ..
عالية: مع السلامة ..
طلعت انا ..وعالية مشت لأم سامي اللي كانت واقفة تطالع سامي ..دخلت السيارة ..
هناء: السلام عليكم..
ما رد علي ..لفيت له بدع ما تعدلت بقعدتي ..لقيته يطالع برة ..ومثل ما توقعت كان يطالع امه ..بس اللي محيرني عالية كانت تطالعنا او تطالع سامي بصدمة ..نقلت بصري لسامي السرحان وقلت ..
هناء: مارح تسلم على امك ؟؟
لف لي اخيرا طالعني شوي بنظرات غريبة ما فهمتها ..تحرك فجأة وطلع من السيارة .. شفته يلف لأمه وعالية ..الفضول ذبحني ..نزلت الجام ..وبطلت تذوني عدل ..
سامي: عظم الله اجرج ..يا بنت خالتي ..
ما ردت عليه اكتفت بأنها نزلت راسها وبدت تبجي ..حظنتها امه وقالت بعصبية ..
ام سامي : روح لمرتك .. مانبي منك شي ..
انصدمت من الموقف ..نزل سامي راسه ..ورفعه مرة ثانية ..طالع امه بعدين عالية ..وتحرك ناحية السيارة ..دخلها وحركنا للبيت ..طول الطريج كان ساكت ...ماادري اشفيه اليوم..
"تبين تروحين البيت ؟"
لفيت له وقلت ..
هناء: ليش ما تبي تروح البيت ؟؟
تنهد بضيق وقال ..
سامي: اشرايج نتمشى بهالجو ..ونرد البيت ..؟
حسيته متضايق ..يتكلم وهو يتنهد كل دقيقة ..قلت وانا ابتسم ..
هناء: ما عليه ..
وكان هذا آخر حوار بينا ليما وصلنا .. وقفنا جدام البحر ..مع ان الجو بارد موت بس الحمدلله اني لابسة تحت العباة لبس ثقيل .. نزلت من السيارة وهو معاي .. لفيت الشيلة عدل حوالين راسي عشان لا تطير ..
لفيت لسامي لقيته سرحان..قلت ..
هناء: ماادري اشفيك اليوم ؟؟
لف لي باستغراب ..
why?? سامي:
هناء: ماادري ..سرحان ..وكله تفكر ..في شي مضايقك ؟؟
طالعني شوي بس ما عرفت نظراته لشنو بتوصل لأنه لابس نظارة شمسية .. نزل راسه للرمل ..بعدين قال بهدوء ..
سامي : ماكو شي ..
تقص علي سامي ؟؟ ...
هناء: زعلان من سالفة امس ؟
لف لي بسرعة جنه مقروص ..بس سألت سؤال اللي شاغل بالي طول الطريج وما قلته لأحد ..
هناء: عالية ليش كانت تبجي ؟؟
فصخ نظارته وقال ببلاهة ..
سامي: علي امها طبعا ..
طالعته بتشكك ..
هناء: كانت عادية قبل ما تيي ..
قال يبي ينهي النقاش ..
how should I know? :سامي
صج ؟؟..
لفيت الناحية الثانية وانا في بالي لازم اعرف شلي بينه وبين عالية ..ليش كانت تبجي ؟؟ ويهها كان مو على بعضه لما شافت سامي .. ليش؟؟
هناء: مسكينة ..امها ماتت وشكلها ما عندها احد ..
قال ..
سامي: عندها امي ..وام عصام ..
لفيت له وكان يتكلم بهدوء ولا جنه مسوي شي ..
بعرف يا سامي صدقني .. قلت ازيد الجرعة ..
هناء: وين كنت قبل ما تييني ؟؟
قال بملل ..
سامي: بعزا الرياييل .بالعمارة اللي يمكم...
لسة ما وصلت للي أبيه ..
هناء: شفت عالية انا لما كنت بالكويت ..
طالعني متفاجأ ..
سامي: تعرفينها ؟
هناء: ئي .. خلود بنت عمتك عزمتني عندها لما عالية ودلال اختك يو عندها .. ومن هني عرفتها ..
هز راسه بتفهم ..وانا كملت ..
هناء: عاد تصدق ..ودي اعرف متزوجة هي ولا لأ ؟؟
قال بضجر ...
سامي: لأ ..مو متزوجة .
وصلنا خير ... يبته لنفسك ..
هناء: اشدراك؟؟
طالعني ببلاهة وقال..
سامي: تصدقين انها بنت خالتي ..ومتربين مع بعض ؟؟
ولف عني ..حسيت نفسي غبية ..سؤالي اهبل ادري ..
قلت بمحاولة ثانية ..
هناء: عاد جبيرة هي .. تقريبا بالثلاثينات ..
سامي : منو قال ؟؟ عالية اصغر مني بثلاث سنين ..
بطلت عيوني على وسع ...اصغر منه ؟؟؟ الله الله ..هلو ..
طالعني باستغراب..
سامي: اشفيج ؟؟
تسندت على ظهر الكرسي بعد ما قعدت ..
هناء: اصغر منك ؟؟ عاد شكلها كبير ..
قعد يمي وقال ..
سامي: الله يخلي الميك اب ..
وهني تذكرت شكلها الميك اب لاعب فيه ولبسها ما تقولون امها ميتة ... بس ما شاء الله ..يعرف عنها كل شي .. بس صح هي بنت خالته ومتربين مع بعض اكيد بيعرف عنها كل شي ..والله اني خبلة .. مو مشكلة هالمرة قدرت تهرب يا سامي بس المرة الياية لأ ..
دق تلفون سامي ..غمض عيونه وتأفف ..اكيد واحد من اهله ..
سامي: هلا يما ..
وااو امه ؟؟ الله يستر ..
سامي: شنو ؟؟
(...........................)
سامي: لأ طبعا ..اخذيها معاج ..
(...........................)
قال بعصبية ...
سامي: وين اقعدها عندي ؟؟
(..........................)
سامي: يا سلام .. الحين بس بيسافر؟ ..هو اخوها خل يدبرها هو ..انا شكو ؟
(..........................)
سامي: يما انتي ما ينخاف عليج .. تخربين بلد ..ما شاء الله ..
(.............................)
سامي : لأ ...مالي شغل ..
(...........................)
قال بحنق ..
سامي : يعني بتدفنون امها بالديرة ليش بالله ما تاخذونها معاكم ؟؟
(................................)
طالع فوق بملل كأنه يدعي ..وقال بصوت خافت ..لا حول ولا قوة إلا بالله ..
سامي : خلاص ..خل تيي ..
وصك التلفون ...وقال بعصبية ..
سامي: انا كنت حاس اليوم ما بيعدي على خير ..
قلت بفضول ..
هناء :خير ؟؟
تأفف للمرة المليون ..وقال ..
سامي: عالية بتيي تقعد عندنا .. جم يوم لين ما ترد امي واخوها ...
عشان جذي منغث ؟؟ قلت بهدوء ..
هناء: حياها الله ..
طالعني وده يذبحني ..بس وقف وقال ..
سامي : قومي خل نروح البيت احسن..
ركبنا السيارة وتوجهنا للبيت .. بس ابي اعرف ليش عالية كانت تبجي لما شافت سامي ؟؟؟ وليش كانت مصدومة ؟؟ اكيد كان بينهم شي ...والأيام بتكشفه ..
ييتج يا عالية عندنا ..رح توضح لي كل شي ..
|
22-02-11, 10:08 PM
جديد مواضيع قسم القصص المكتمله
العرض العادي
