كاتب الموضوع :
ملاذالرووح*
المنتدى :
الارشيف
البارت الرابع
^
^
^
^
طلال
اعلن ابوي اليوم الفااجعه عمي واهله بينقلون والله النشبه وكملها انه بيسكنون
في نفس الحي كملت !!
وش هالبلشه !!!! افففففففففف ...
وشفيك تنافخ ..هالكلمه طلعتي من دوامت افكاري واعصابي
قلت لها وانا قافله معي : ليه ماسمعتي المصيبه الجديده
شقهت نجود وحطت يدها على صدرها: بسم الله علينا وش مصيبته ؟؟
قلت :عمك واهله بينقلون هنا
نطت فرحانه وقالت : ايه ابوي قال لنا اليوم الصبح ..عضيت لساني من القهر
الحين هي فرحانه بهم قلت لها وانا معصب : وانتي توزعينن هالابتسامه من الفرحه فيهم
قالت لي بحالميه تبط الكبد :هذا عمي واهله يعني اهلنا اكيد بكون فرحانه
قلت لها وانا قافله معي: الله والاهل عاد من زينهم يفششللللللون
قالت لي بدفااع عنهم وحواجبه معقوده: وانت وش دراك انت تكلم كذا وانت ماتعرف الا عمي
قلت : الا شفتهم يوم عمي عزم معزبه عند ابله وجوو اهل الديره ياشين
الاشكال تحففففف تفشللللل
قالت لي بشغف استطلاع : ليه وش شفت
قلت لها بلا مبالاه : شفتهم لابسين ثياب صفر قالب لونها من الشمس
وتحت الثياب بناطيل رياضه !!
شفت عيونها طايره فيني وكملت .. يشربون من نفس الطاسه حقت اللبن والماء
ورا بعض وازياده على كذا يمسكو الابل وكلو بيدينهم بدون مايغسلووون
..قاطعتني وهي تحط يدها على فمها وقالت بصوت مكتوم :بس اقرفتني الله يقرفك انت واياهم
هنا تحولت عصبيتي لضحك على تعابير وجها وركضها لغرفتها
^
^
^
^
لمياء
رفعت السماعه بعد ما تعبت من البكاء ابي احد يحس فيني يدور حل معي
ما ابي اضيع وارجع لنفس البيت مابي ارجع لحكرة اخوي علي مالقيت الا
هي اللي معي دقيت رقم بيتها وانا انتظرها ترد بفارغ الصبر
ماصدقت سمعت صوتها انفجرت ابكي وقلت : تكفييييين سلمى الحقيني
سمعت صوتها المفزوع : لمياء وشفيك ؟
قلت لها وانا احاول اسيطر على نفسي : تكفيييين فيصل عرف كل شىء
سمعت شهقتها وقالت بهمس : وش عرفه ؟
قلت لها : الورقه لقاها بجيب الجاكيت
قالت لي : وش اللي حطه بجيب الجاكيت يالغبيه ؟؟
قلت لها :انا حطيتها بسرعه في الجاكيت يوم سمعت صوته داخل علي
ولاني مالقيت الا هو قدامي وقلت في نفسي انه الحين صيف وماراح ينلبس الجاكيت
وبحطها فيه فيه لين احرقها وكل يوم اقول بكره بحرقها ولا قمت التهيت بطالعتنا
وجمعتنا ونسيتها
قالت لي : انتي غبيه المفروض من الاساس على طول تحرقينها وماتدخلينها معك البيت
قلت لها وانا حاسه انا قافله بوجه : خلاااص سلمى واللي يعافيك دبري لي حل
تنهد وقالت :طيب دكتورتك وش تقول ؟
قلت لها : تقول انتي السبب في اللي صار تحملي اغلاطك
قالت لي : طيب غيري الدكتوره
قلت لها : ما اعرف الحريم يمدحونها هي ...
ماسمعت لسلمى صوت وناديتها :سلمى ..
ردت : نعم
قلت: ليش سكتي ابي حل ساعديني تكفين فيصل بيطلقني ورجعت ابكي كنت خايفه من هالفكره
قالت : لمياء انتي تقولين زوجك يحبك وحنوووون صح
قلت لها : ايه
قالت: استغلي هالنقطه !
^
^
^
^
شهد
تخلصت من سعود واسئلته اللي ماتخلص .. ورحت اغسل وجهي مره حتى يخفف
انتفاخ واحمرار عيوني من البكاء وبعدها رحت اشيل
مريولي المرمي من على الارض وملابس سعود المرميه على فراشه ورتبت
فراشه وفراشي وطلعت اجهز الغداء لاهل البيت ..دخلت على اسماء
وقالت بعجرفتها: اقوول هييييه انتي شوفي على الساعه 4 تكون القهوه مع حلا وفطاير
جااهزه لاننا بنطلع سااامعه وابي كل شىء يكون مضبط على اصوله وااضح !!
لاتفشليني مع صديقاتي ..حركت راسي بالموافقه وانا بداخلي اتمنى احط اصابعي
بعيونها على نظرتها لي وحكيها المتعجرف ...
غسلت يديني وبديت في تجهيز طلبات الهانم اسموه حتى ما تسويلي سالفه مع العقرب امها
ماجت الساعه اربع الا وكل شىء جاهز ومرتب ومغلف رحت اصلي ..عارفه
اني اخرتها بس هذي اسموه ام اربعه واربعين والله تلعن خيري وانا الى الان تعبانه من
طق امها لي ..
البيت فضى على وزهقت ماعندي احد احكي عليه ولا شغله تشغلني عن التفكير
في امي اللي حاسه بفقداه يوم عن يوم ...
زفرت بضيق وانا اتذكرها واتذكر اخر يوم شفتها فيه ..قمت بسرعه اسوي
لي كوفي حتى اغير مزاجي ما ابي ابكي تعبت من البكاء تعبت من الضيقه تاففت من
حالي .. اخذت الكوب وانا افكر بشىء الا بصوت الباب ينفتح !!
من جاي عمتي وبنات موب جايين الحين ..وابوي وصالح كلهم مسافرين !!
حسيت بالرعب بدى يسري بعروقي ..
^
^
^
^
ام محمد
بعد ماعرفت بخبر البيت وانا اهوجس وين اترك اهلي وناسي وديرتي
واروح لديره مااعرف احد فيها ..
جابن البنات القهوه وصارت تسولف هويا مع جدتها وعمتها وانا قلبي
مهوب معهن .. بس الغريب ان نوير ساكته مالها حس مجلده على غير
العاده !! العاده لسانها مايبرد من الحتسي !!؟ نشدتها نوير وشبلاتس
ماش البنت تهوجس بعيد مهيب يمي رفعت حسي : نويييير
التفتت لي : هلا يمه سمي تبين شىء!!
ناظرت فيها وقلت : وشعندتس ساكته مهيب من عوايدتس
قالت لي : ابد مافيني شىء
قالت خالتي (الجده ) : انتن اللي وشبلاكن ساكتات ماخاشرتنا في السوالف
قلت وانا اتنهد :والله ياخالتي اهوجس في الشديد (النقل)
الجده : يامتس مافي يدينا فتيح (حل) كلنا مانبي الشديد بس محمد
وسعد يبون يدورون رزقهم
^
^
^
^
نوير
هم يهوجسون في الشديد وانا اهوجس في اللي نسيته .!!!!!
آخ انا مدري وين كان عقلي يوم اني اضايق منيره ...
والله من ذكرتني هويا بالسبب وانا افكر في منور
و كدرها الواضح بس انا مدري وش اللي غط على
قلبي وخلاني انسى ابوهااا ..
على ان افعاله ماتنسى ..... ياعزتي لقلبتس يامنور
طفاقتي الزايده وفرحتي بها الشديد (النقل)خلتني ما اعرف
افكر في منور وابوها والله لو انه ابو(ن) لي تسان من مبطي تبريت منه
الله والابو !! من زينه متبع المصريه تجرجره في كل ديره
^
^
^
^
هويا
كنت اعاين في نوير وانا عارفه وش بقلب نوير وش مكدرها ... النقل امنيتها من مبطي
وتحرى هالحزه (هالوقت) حتى تروح لرياض تبي تسوي مثل كل البنات اللي
تشوفهن بالتلفزون من لبس وغيره من المظاهر اللي اغلبها من الغرب
مثلها مثل باقي البنات .. لكن هالشىء نسّاها منيره تؤم روحها صديقتها وبنت عمتها
واختها اللي من وعت على الدنيا وهي معها مشاركتها في كل شىء لكن فرحتها
بامنيتها اللي تحققت خلتها تنسى منيره وابوها اللي يترصد
لعمتي انه ياخذ منيره منها ويقهرها فيها ..
^
^
^
^
^
^
^
^
فيصل
ربي حط اسامه في طريقي حتى اكتشف لمياء على حقيقتها..
جلست بسيارتي اتذكر اللي صار بكل تفاصيله دخول اسامه علي
وكلامه عن حياته اللي تمر بظروف صعبه اولها مرض والده
وسفر اخوه للبحث عن وظيفه في الخارج ومعاناته من الاجواء في الخارج
و ظروفهم الماديه ماتساعد ...واكتفو بوضع المبلغ القليل فقط لايجار مسكن له
الى ان يلقى وظيفه ..عرضت عليه مساعده ماديه الى ان تعتدل اوضاعهم
لكن رفض وبشده اي مساعده وتعذر انه ماعندهم استعداد يزيدون الديون
اللي جمعوها لسفر اخوه وعلاج ابوه .. عرضت عليه جاكيتات وملابس
خاصه بالسفر للخارج في البدايه عاض لكن مع الحاحي اقتنع ياخذ الجاكيتات فقط
من وافق حسيت بشعور حلوووو قلت له انه راح اجهزهم له وبكره ياخذهم
رجعت البيت بعد ما اكملت الجلسه معه ودخلت الغرفه وبديت اطلع الجاكيتات
والبلوفرات اللي انا موفي حاجتها واللي اغلبها ما انلبس الا مرتين او ثلاثه بالكثير
جمعتهم واعطيتهم الخادمه ميري وطلبت من ميري تغسلهم .. شوي ورجعت ميري
علي بالجاكيت وقالت انه في ورق اذا هي مهمه بالنسبه لي او لا .. مديت يدي على الجاكيت
واخذته منها وطلعت الورقه ..
...
^
^
^
^
شهد
شفته دخل شكله كان مبهذل !! ازارير الثوب من فوق مفتوحه والشماغ على كتفه
افزعني بنبرت صوته الجهوريه لما قال :بتطولين وانتي تطالعيني ماراح تسلمين علي !!
وكمل بسخريه ولا حتى الحمدلله على السلامه !!
تقدمت بهدوء وبروده بسته في خده وهمست بصوت مدري هو سمعه او لا :الحمدلله على السلامه
ناظرني بتفحص وقال لي من طرف خشمه : وين عمتك والبنات ؟
قلت له وانا اتحاشى النظر في وجهه : طالعين للمنتزه
حرك راسه وقال لي اجيب شنطته اللي حطها بالحوش والحقه فيها للغرفه
دخلت الشنطه اللي حسيتها قصمت ظهر من ثقلها ودخلتها غرفته وطلعت اجهز له اكل
بعد اكثر من ساعتين دخلت عمتي والبنات اصواتهم كانت عاليه ..
رحت حتى اشيل الاغراض ترامس القهوه والشاي وباقي الاغراض حتى انظفهن ..
دخلتهن المطبخ وقعد اغسله بعد ما انهيت الغسيل واتجهت لغرفتي
سمعت صرخة اسماء وامال
كنت بطلع بس رجعت اشوف ليش يصارخون بصوت عالي ..
كان محاوطهم بيدينه ويضحك معهن ...
دخلت ابتهال بالنص دفتهم وحطت يدينها حولين رقبته وتبوس راسه وخشمه
اما هو كان طاير من الفر ح وهو وسطهم كنت اشوفهم يبتسمون وابتسم مثلهم
رجعت على ورا وانا افكر بنفسي ...ذقت طعم اليتم وابوي عايش ...
حسيت بخليط من من الالم والغبطه
تمنيت اكون في مكان وحده فيهم اضمه وابوسه واتدلع عليه
تمنيته يعبرني مثل ما عبرهم بهديه معتبره وعلى ذوق صاحبتها وباختيارها
تمنيته يبتسم في وجهي يحضني بعد سفره طويله ...
اتجهت لغرفتي وانا احس بدموعي ماليه عيوني صعبه
ان الانسان يحس باليتم في وجود والديه !!!!!
^
^
^
^
:::::::::::::::
انتظر ارائكم وتعليقاتكم على البارت
ملاذ الروح
|
16-02-11, 02:09 PM
جديد مواضيع قسم الارشيف
العرض العادي
