صباح الفل
الحمد لله أنفك السحر و بدأت اقرأ الرواية ومبدئياً رأيي في العمة والجدة :: انهم استغلاليتين لأن فرض الزواج على شخصين بدي الطريقة ابتزاز .. الاتنين بحاجة للورث لكن حرام مقابله ينجبروا على علاقة انسانية غصب عنهم ممكن يجبروهم يتقابلو ووقتها لو أعجبوا ببعض يتزوجو لكن على طول ينجبروا على الزواج حرام .. والغريب يحصل دا النوع من الابتزاز المادي أو العاطفي كتير في الروايات وعادي يكملو الزواج بينما ينتقدوا الزيجات المرتبة عندنا مع انه هنا تشوفيه لو ما عجبكم بكيفك لأنك كيف حتعرفي بوجوده وهو كيف حيعرف بوجودك غير بدي الطريقة و قليل ما يتزوجو الناس عن حب عندنا وتكون طريقة المعرفة شريفة مثلاً بنت عمه قريبته جارته لما كانو صغار عرفو بعض وبقي أثر الإعجاب في القلب وماشابه بأي طريقة محترمة ..
بينما هم اللي يكشفو على بعض وتقدر تلقى ألف راجل في أي مكان الكل يشوفها وتشوفه يعاملوهم بدي الطريقة!!؟
أما بالنسبة للبطل اللي قالوا عنه انه مو رومانسي في البداية أنا برأيي انه رومانسي جداً لأن معنى كلمة رومانسي عاطفي وانه يقبل بالابتزاز وينجبر يتزوج وهو مو حاب الزواج وكمان من وحدة الله أعلم حتطلع حلوة أو وحشة نفسيتها طيبة أو لا ودا كله مقابل انه ما يفرط في بنت أخوه أشوف ان تصرفه دا قمة في الانسانية و انه انسان قلبه كبير جداً وكله عاطفة وحنان ونفس الشي بالنسبة للبطلة اللي بتضحي بنفسها وعمرها كله مقابل علاج جدتها دي قمة العاطفة ,, قلوبهم الرقيقة هي اللي جمعتهم ..

أما انه مايعرف يتكلم كلام حلو ولا يتصرف معاها تصرفات تدل على حبه فدي طبيعة بشرية فيه ناس كده قلوبهم مليانة حب بس ما يعرفو طريقة اظهاره للطرف الآخر ..يحتاجو اننا نعلمهم ونصبر عليهم لأن تغيير الطباع مو سهل على النفس ..

>>>> يتبع

انا رايى نغير ونناقش رواية احتضننى اللهب لانها بجد روعة

عاد ذي قاريتها فرررش هاااه بنات نناقشها ؟

دحين دوبي منتيهة من مطلوب زوجة و أم تقومو تغيروها :( ؟

بس زي ماقلتو ما بقي منها شي ,, وفعلاً مقطع إحضاره للزهور ومقطع عيد ميلاده أثروا في نفسي كتير .. البطل حنون مع ان تصرفاته جافة بس رقيق القلب لكن ما عجبني فيه وفيها ثقتهم الهشة ببعض مع انه كل واحد أكد للتاني انه لا يمكن يخونه ,,برأيي الكلمة ميثاق ..

أما أحتضنني اللهب فاكرتها مع اني قرأتها من سنوات ...و أشوف ان اللي جمعهم هو الرغبة مو الحب يعني لو كانت وحشة ما أسرته لا شخصيتها ولا نظرتها ولا روحها ووو ونفس الشي هو .. لأن الحب يجي من موقف لو بسيط يأثر فيكي الطرف التاني بتصرفه فيأسرك ,, أما كيف ينقال انه حبها أو انها حبته بس لأنهم شافو بعض وكل واحد ينفر من تصرفات التاني .
كان شاكك انها متورطة مع أبوها وحبها !! وكان شايفته كيف يسيء معاملتها وحبته !!و أصلاً كيف مشيت معاه في أول ليلة وهي مخطوبة وبكره زواجها؟ أنا حسيت انهم ناس حكمتهم شهواتهم مع اعتذاري للفظ الوحش ..بس مو دا الحب ..لكن بعد كده ممكن صار فيه حب بينهم مع العشرة ..و اللي وصفوه في الرواية ما كانت مشاعر حب بل مشاعر شهوانية بحته كانو بيوصفو غرائزهم قرفوني ههههههههههههههه لا تزعلو مني بس دا إحساسي ودا رأيي أنا أحب الحب العذري الرومانسي مو الشهواني اللي تسيطر عليه الغرائز مش المشاعر ,, ما أعرف كيف كملتها مره كنت مقروفة ولما أنتهيت منها أتخلصت منها حتى ما تشوفها أختي الصغيرة وتقرأها ..
تلقاكم تقولوا ليتها ما علقت :D ليتها كملت نوم ,, بس بجد الرواية لولا طريقة تعارفهم ووصفهم الجريء كان ينقال عنها رواية مميزة لو اللي ترجمها مترجم الروايات القديمة .... سامحوني دا رأيي أتمنى انه ما يكون ضايقكم .. لا تكرهوني .
مع حبي نلو