بسم الله الرحمن الرحيم
أحبائي الأعضاء هذا البارت العاشر صار بين يدينكم و اتمنى من كل قلبي انه ينال اعجابكم ..

قراءة ممتعة للجميع

( الــــجـــــزء الـــعــــاشـــــر )

ما بقى الا يوم على ملكة عبدالرحمن , سارة كانت طول الوقت بغرفتها حتى صارت ما عاد تداوم و أخذت اجازة مرضية , و مو راضية تطلع من غرفتها و بس تبكي , دخلوا أميرة و شهد عشان يغيرون جو سارة شوي و كانوا عندها بغرفتها , سارة هدت شوي بس ما كانت تشاركهم بالحديث و لا شي بس ساكتة

بهالوقت فيصل كان مخطط انه يسوي شي شرير , كان قبل كم يوم ماخذ رقم سارة من جوال غدير , و هم طالعين من الشركة

فيصل: عبدالرحمن الله يعافيك أبي جوالك بدق على واحد من الشباب و جوالي طفى مافيه بطارية

عبدالرحمن طلع جواله من جيبه و عطاه فيصل , اخذ فيصل الجوال و كتب رسالة من جوال عبدالرحمن و أرسلها لسارة

سارة كانت جالسة بغرفتها و البنات يحاولون يواسونها , جاها مسج و فتحته و فجأة جلست تصيح و حطت راسها ع المخدة و انفجرت صياح , البنات يطالعونها و مايدرون وش السالفة و متفاجئين ليه سارة فجأة صارت تبكي و انهارت مرة ثانية بعد ما كانت هادية , شهد و أميرة جلسوا يضمونها و يهدونها بعدين أميرة اخذت جوال سارة بتشوف وش المسج اللي جا و خلاها تسوء حالتها لهالدرجة

محتوى المسج: ( السلام عليكم .. سارة انا عبدالرحمن .. انا عارف انك مصدومة بسبب خطبتي بس انا فكرت بعلاقتنا كثير و حسيت اننا مو متناسبين أبداً و ما في أي شي مشترك بيننا غير الحب والحب لحاله ما يكفي , انا بشوف نصيبي و انتي شوفي نصيبك و لو سمحتي بعد إذنك لا تعترضين حياتي او حياة خطيبتي و انا اوعدك اني ما اقرب منك )

طبعا اللي كان كاتب المسج و مرسله لسارة هو فيصل عشان يخلي سارة تحقد عليه و تكرهه و ما تقرب منه , بعد ما ارسل المسج مسحه بسرعة و رجع لعبدالرحمن جواله

أميرة لما قرت المسج استغربت وش اللي قلب حال عبدالرحمن فجأة هو ما كان كذا , هو ما يحب يأذي احد كيف يقدر يأذي البنت اللي يحبها , و حست ان الموضوع فيه سر.


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــ

بنفس الوقت بالمجلس تحت , نواف كان معصب مرة و عيونه حمرا من العصبية و يصرخ : و لاااااااا كلمة ما ابي اسمع منك و لاا كلمة فااهم

خالد: والله ما سويت شي

نواف: مخدراااات ؟؟ تتعاطى مخدرااات يااكللب ؟؟ هذي اخرتها معك

خالد جا بيدافع عن نفسه بس نواف ألجمه و عطاه كف قوي

خالد عصب: انا مو كذاب و انا ما تعاطيت شي و عادل يعرف الحقيقة كلها تبي تتأكد اسأله

نواف بدا يهدأ بس يتنفس بقوة: وش دخل عادل بالموضوع؟؟

خالد: لانه هو اللي ساعدني , والحمدلله اني علمته هو ما علمتك انت

نواف: و ليه ما علمتني؟؟ حتى لو كنت بريء يرضيك يجي واحد من اخوياك للبيت و يوصيني اعطيك كيس فيه مخدرات؟؟؟ ليه انت ما جيت و فهمتني الموضوع

خالد: انت عصبي و خفت انك ما تصدقني

نواف: طيب وش يثبت لي ان كلامك صح و انك فعلاً بريء؟

خالد مسك جواله و دق على عادل : ألو هلا عادل انت بالبيت؟؟ طيب ممكن تجينا للبيت ضروري انا و نواف نبيك بموضوع , مشكور اوكي ننتظرك

قفل خالد من عادل : سمعت هذا انا دقيت على عادل و سمعتني بنفسك و الحين بيجي و اسأله عن اللي تبي

بعد شوي جا عادل و سلم عليهم و فهم نواف الموضوع ان خالد بريء و الولد اللي يتاجر بالمخدرات جالسين يراقبونه و كلها كم يوم و يمسكونه

نواف: الحمدلله اهم شي يعني خالد طالع من الموضوع

عادل: ايه لا تخاف عليه اكيد طالع منه

نواف: جزاك الله خير و يعطيك العافية يا عادل ما قصرت

عادل: وش دعوة خالد اخوي و لازم اوقف معه وقت الشدة , يالله الحين انا استأذن عندي شغل للوالد لازم اخلصه , تامروني على شي ؟

نواف: ابد سلامتك

عادل: الله يسلمك

نواف: اقول عادل

عادل: سم

نواف: سم الله عدوك , زين تذكرت ترى الاربعاء الجاي ان شاء الله ملكة أميرة و نبيك تكون شاهد و لا عليك أمر

عادل حس كأن كلام نواف طعنات بقلبه سكت شوي : معليش اعذروني مشغول يوم الاربعاء ما اقدر عندي شغل بالمزرعة

نواف: معذور يا اخوي , بس والله كنت ابيك تحضر الفرحة معنا

عادل يحس كأن قلبه ينعصر كل ما تكلم نواف: معليه احضر فرحتكم بزواجك ان شاء الله , يالله فمان الله

نواف و خالد: بحفظ الكريم

طلع عادل من بيتهم و هو يحس نفسه ضايع و مشتت و مو متخيل كيف راح يمر عليه اليوم اللي بتتملك فيه أميرة قلبه .

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــ


أنا مدري وش إحساسك
ومدري وش تظنيني
أنا الصادق في عينك كنت
و صرت الكاذب الخوّان
أنا أخطيت ما انكر ولافيه عذر يكفيني
سِـوا اني احبك حيل واني دايما ً انسان
انا ادري بمدى جرحك
وادري الحظ جافيني
يطول الوقت ماأخطي
وإذا أخطيت كل شي ٍ بان
انا شفت الزهر مايل
وظنيته يناديني
قطفته .. يوم ضميته .. لقيته للأسف ذبلان
عرفت انك زهر عمري
عرفت انك بساتيني
وغيرك قيض مايروى .. سرابٍ يشقي العطشان

اليوم ملكة عبدالرحمن الوضع كان مضطرب جداً , و بالنسبة لبعض أبطالنا كان عزا اكثر من انه يكون فرح

الساعة ثلاثة العصر

ام عبدالرحمن تبكي بالصالة و غدير عندها تهديها

أم عبدالرحمن: ياربي وين راح عبدالرحمن من امس ما بعد رجع للبيت و جواله مقفل أخاف صار له شي و الا سوا بنفسه شي

غدير : لا ان شاء الله لا تفاولين عليه و بعدين عبدالرحمن كبير رجال وش يسوي بنفسه لا تخافين بس تلقينه متضايق شوي و ماله خاطر يشوف احد

أم عبدالرحمن: اصلا ابوكم مب مرتاح لين يضيع واحد منكم مني هذا طبعه يسوي اللي يبيه ما يفكر بغيره و لا يشاور احد

وكملت صياحها و غدير تهدي فيها

أما عبدالرحمن كان راكن سيارته بأحد الشوارع من امس و هو داخلها و كان تفكيره مشلول , كان يودع آخر لحظاته و ذكرياته مع سارة تذكر كل اللحظات الحلوة و المرة اللي جمعتهم من الطفولة و لحد ما كبروا

و بالنسبة لسارة كانت منسدحة بسريرها جسد بلا روح , أخذت كل الحبوب المنومة عشان تقدر تنسى الواقع المر اللي جالسه تعيش فيه , تنام و دمعتها على خدها أو تصحى و هي مفزوعة من كابوس و تجلس تبكي لحد ما تتعب و تنام


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــ

قبل المغرب بساعة دخل عبدالرحمن للبيت و شكله حوسة و حول عيونه أسود و باين انه واحد تعبان أو سهران صار له كم يوم

أم عبدالرحمن فزت من مكانها: عبدالرحمن وينك ليه من امس ما جيت للبيت خفت عليك

عبدالرحمن: معليش يمه امس نسيت ابلغكم اني كنت بنام برى البيت

غدير تطالعه و هي شفقانه على حال اخوها اللي ما يسر عدو و لا صديق

غدير: عبدالرحمن شكلك تعبان فيك شي؟؟ أجيب لك شي تاكله شكلك ما اكلت من امس

عبدالرحمن: لا مافيني الا العافية و لا جوعان

نزل أبو عبدالرحمن من فوق: أخيرا شرف العريس الهارب , خير وين كنت , و بعدين بالله هذا شكل واحد ملكته بعد شوي , يالله اخرتنا روح حلق و غير هالثوب اللي كنه ثوب شحاذ و انزل بسرعة

عبدالرحمن ما تكلم و لا كلمة كأنه يكلم جماد

أحمد: انا اتكلم معك يالله رح وش فيك متنح كنه ميت لك احد

عبدالرحمن ما قدر يتحمل ابوه اكثر و مشى و خلاه و طلع لغرفته

بعد المحاولات من ام عبدالرحمن و فيصل و الاقناع , وافق عبدالرحمن و راح للحلاق و لبس ثوب جديد و طلع معهم

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــ


علمتني وشلون احب
علمني كيف انســــــــــى
يابحر ضايع فيـــــــه
الشط والمرســـــــــــــى
علمتني وشلون احن
علمني كيف اقســـــــــى

سيرعلي ..
بس امسح دموعي وروح
سير علي ..
جب لي معك قلـــب وروح

عيت يــــــــــــــــدي
على وداعك تهتــــدي
بس انت علمني الجفـــــــــــــــا
دامني عجزت اعلمك كيف الوفا


بعد المغرب , عند سارة , أميرة دخلت عندها و سارة كانت بحالة يرثى لها

سارة و دموعها على خدها: الحين اكيد قاعدين يكتبون العقد

و انفجرت صياح

أميرة: سارونة حبيبتي خلاص لا تفكرين كذا , انتي جالسة تتعبين نفسك

سارة: سارونة حبيبتي هذي كلمة عبدالرحمن دايم يقولها لي

أميرة بينها و بين نفسها (ياربي الله يعينك و ينسيك اياه , يابعد عمري اختي حالها يقطع القلب)

سارة: اكيد بعد ما يملكون بيدخل يسلم عليها وش بيقول لها , بيبتسم لها؟ بيطالعها مثل ماكان يطالعني؟

أميرة: سارة خلاص حرام تسوين بنفسك كذا ارحمي حالك

سارة: ارحم نفسي و هو مارحمني؟ وشلون طاوعه قلبه يتركني و يروح نذل اكرهه الله لا يهنيه و لا يسعده

ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــ

في بيت ابو عبدالمحسن , بعد ما ملكوا قالوا لعبدالرحمن يدخل يسلم على البنت

عبدالرحمن دخل عند البنت و هو متثاقل دخلته عليها , كان دايم يتخيل أدق التفاصيل اللي بيجتمع فيها مع سارة , كان مقهووور لانه كان راسم بمخيلته اشياء كثير منها يتخيل انه يدخل على سارة يوم ملكتهم و يبارك لها و يمزح معها شوي و يطالعها و هي خجلانة

دخل و سلم: السلام عليكم

ديما و هي منزلة راسها : و عليكم السلام

عبدالرحمن: مبروك

قالها و هو يحسها كأنها غصة بحلقه , و باليالله طلعت منه

ديما حمر و جهها و ابتسمت بخجل: الله يبارك فيك

جالس و هو يحس نفسه جالس على نار , يتمنى تخلص هاللحظات او يكون مجرد كابوس و يصحى من نومه و ينتهي

عبدالرحمن حس انه طول و هو ساكت و حس نفسه ماله داعي , انحرج من البنت: الله يقدرني و اسعدك و تكونين مبسوطة معي

ديما كانت ساكتة و مييته خجل من عبدالرحمن كان شعورها فعلاً شعور بنت مخطوبة و قبل شوي كانت ملكتها , اما هو كان شعوره مختلف تماما كان كأنه ميت له احد

جلس شوي و قام: يالله انا استأذن , مع السلامة

ديما بصوت واطي: مع السلامة

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــ

انتهى اليوم البائس اللي كان مليء بالدموع و الحزن , الا على سارة لسه مانتهى يومها , بالليل الساعة 12 كانت بسريرها و دموعها تنزل و ماسكة جوالها و تطالع رقم عبدالرحمن و تذكرت لما طلبت رقمه من غدير عشان اذا خطبها و قبل ما يملك عليها بيوم تبي تفاجئه و تتصل عليه و تكون اول وحدة تبارك له و تذكرت لما كانت هي و غدير و اميرة بمكتبة جرير و يشترون كاتالوجات عشان تختار موديل فستان شبكتها , غمضت عيونها بقوة و كأنها تبي كل هالذكريات تطير من راسها و توقف تفكير فيه و تحاول تغصب نفسها تنام , يمكن بكرة تنساه.

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــ

بدت سارة تداوم من يوم الاثنين بعد محاولات شاقة من أميرة و شهد و ام نواف و اخيرا وافقت تداوم

يوم الثلاثاء , بالمستشفى كانت سارة بمكتب المدير

سارة: بس يا دكتور انا اصلا ما كنت موجودة انا طلعت بدري

المدير: بس الدكتورة هدى تقول انها كلفتك انتي انك تقفلين المكتب يعني المفتاح كان معك انتي كيف بيكون احد ثاني دخل مكتبها و اخذ الملفات

سارة: صح دكتور بس المكتب كان مفتوح تقريبا ساعتين يعني ممكن بهالوقت أي احد يدخل

المدير: انتي بتتورطين ورطة كبيرة لو مالقينا هالملفات

بهالوقت دخل الدكتور طلال لمكتب المدير

طلال: السلام عليكم

المدير و سارة: و عليكم السلام

طلال: دكتورة سارة كنت أسأل عنك و قالوا لي انك هنا

المدير: انت عارف عن اللي صار بخصوص الملفات اللي كانت موجودة بمكتب الدكتورة هدى؟

طلال: ايه سمعت فيها

المدير: الحين الدكتورة سارة متورطة بالموضوع لانها هي اللي كانت معها المفاتيح

طلال: عذراً دكتور بس شكله فيه لبس بالموضوع

المدير: كيف وش قصدك ما فهمت

طلال: بصراحة المفاتيح كانت معي انا , الدكتورة سارة عطتني اياهم

سارة بهالوقت استغربت منه ليه يسوي كذا و يطلعها من السالفة و يورط نفسه

المدير: جد هالكلام يا دكتورة؟

الدكتور طلال تكلم قبل ما تتكلم سارة: ايه جد

المدير: طيب ليه ما قلتي لي من البداية ؟

الدكتور طلال: يا دكتور تعرف الدكتورة سارة بنت محترمة و مهذبة و ما كانت حابة تورطني مع اني قلت لها قولي لهم ان المفاتيح كانت معي

المدير: خلاص دام الدكتور طلال طلع هو اللي ماخذ منك المفاتيح خلاص روحي انتي يا دكتورة سارة و ماراح نحاسبك على هالشي مع انك انتي مسؤولة لانك انتي اللي عطيتيه المفاتيح

سارة: شكراً دكتور

المدير: العفو

سارة: عن اذنكم

طلعت من مكتب المدير و هي مرة مقهورة و دخلت لوكر البنات و جلست ع الكرسي و جلست تصيح بقهر : هذا اللي ناقصني انا احاول اروح للمستشفى عشان انسى و تتغير نفسيتي ناقصني مشاكل حتى هنا اوف
و كملت صياح

بعدها بشوي طلعت و صادفت الدكتور طلال

سارة: دكتور طلال

طلال: سمي

سارة: شكراً لانك ساعدتني, بس لو سمحت مرة ثانية لا تتدخل بمشاكلي انا ما طلبت منك تساعدني و لا تفكر هالشي بيقربك مني

طلال: بس انا سويت هالشي كمعروف مو لاني فكرت اقرب منك

سارة: مهما كان غرضك من فضلك لا تتدخل فيني و لا بشغلي

طلال: اوكي اسف لو كنت ازعجتك بتصرفي و اوعدك ماراح يتكرر هالشي

سارة: ياليت

وراحت و تركته , سارة بينها و بين نفسها( طلعت كل عصبية الايام اللي فاتت فيه , ماكان لي داعي هذاه جزاه ساعدني و الا كان انا لحد الحين متورطة , بس ولو ما ابيه يتمادى معي محد قال له يتدخل فيني)

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــ

ريم اخت سلطان كانت عند أميرة لان أميرة بكرة ملكتها على سلطان

أميرة: ياربي ما يكفيني اسبوع واحد بين الملكة و الشبكة , الحين من وين بدبر فستان لازم جاهز المفروض خليت الشبكة بعد شهر

ريم: حراام عليك يالظالمة بتعذبين اخوي شهر بين الملكة و الشبكة , و بعدين انتي صار لك مخطوبة شهر تقريبا ليه ما جهزتي نفسك

أميرة: وش اسوي ياختي من وين بجيب فستان , و بعدين نسيتي كان عندي اختبارات

ريم: يانصابة انتي من يوم عرفتك ماعمرك خيطتي فستان كل فساتينك جاهزة ماتحبين التفصيل , خلاص ابدي من يوم الخميس ان شاء الله دورري لك فستان , بعدين تعالي قولي لي ليش ما تبين تسلمين على اخوي بكرة وشو بس يملك و يروح ما يشوفك

أميرة: ايه انا من اول عندي هذي القناعة اقول اذا ملكت ماراح اخليه يشوفني الا يوم الشبكة عشان يشوفني و انا مررره كاشخه و شكلي واو , لانهم دايم يقولون الطلة الاولى هي اللي تثبت في بال الشخص , مع انه شافني بالشوفة الشرعية بس ماقرب مني و لا سولفنا يعني ما تعتبر شي

ريم: والله يالدبه طلع عندك افكار شيطانية

أميرة: ههههههههههه

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــ

انتهى البارت

يا ترى ايش التطورات اللي راح تصير بسالفة سارة و عبدالرحمن..

و كيف راح تمر شبكة أميرة ..

انتظر توقعاتكم و آرائكم و انتقاداكم بفارغ الصبر ..

تحياتي للجميع

بسم الله الرحمن الرحيم

هذا البارت الجديد نزلته و اعتذر لانه قصير نوعاً ما

قراءة ممتعة


( الـــجــــزء الــحـــادي عـــشــــر )


- أموت و اعشقك ..
و أرجع و أعشقك ..
و أموت و أحيا من الموت ..
لجل أعشقك ثاني..


اليوم الأربعاء , يعني اليوم ملكة أميرة و سلطان , عادل كان متضايق كثير , طلع للمزرعة من الصباح عشان ما يشوف أي احد من اهلها او أي شي لتجهيزات ملكة أميرة.

عادل بالمزرعة كان عند الخيول و كان بالتحديد عند الفرس اللي كانت أميرة عاجبتها لما جتهم مرة للمزرعة و سماها أميرة بس ماكان أحد يعرف عن هالاسم غيره , كان يمسح على شعر الفرس و أخذها و ركب عليها و صار يسرع بقوة و يتذكر أميرة و يسرع أكثر و هو معصب و مقهوور ( عادل بينه و بين نفسه : ليه انا متضايق ليه هالبنت تهمني كثير ليييييه , أبي انساها كيف بقدر انساها لازم القى لي حل انا لازم ابعد عنها لازم انقطع عن أي شي يربطني أو يذكرني فيها خلاص انا لازم ادبر لي بعثة , بسافر بهرب من أي شي يذكرني فيها , خلاص هالفكرة لازم احطها ببالي و لازم انفذها , اليوم بروح لمكتب البعثات يدبرون لي بعثة)

رجع للاسطبل و دخل الفرس و قفل الاسطبل و طالع جواله لقى اربع مكالمات من عبدالمحسن , رجع عادل اتصل عليه

عادل: هلا عبدالمحسن

عبدالمحسن: هلا فيك وينك مختفي من اول اليوم

عادل: ابد بس رايح للمزرعة

عبدالمحسن: مع الاهل؟

عادل: لا لحالي

عبدالمحسن:خلاص اجل بطلع الحين و اجيك

عادل: حياك الله

عبدالمحسن: الله يحييك , يالله مع السلامة

عادل: مع السلامة

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــ

- يا غيابه .. ليش أنا ما أقوى لغيابه ...
غيره من الناس راحوا.. و ما شكيت إلا غيابه ...


اما عند أميرة كانوا كل البنات مجتمعين شهد و ريم و سارة و غدير و بعد ما وقعت على عقد الزواج صاروا يزغردون و يسولفون و يضحكون , بعدين شغلوا اغاني و جلسوا يرقصون

سارة كانت هادية بس كانت تسوي نفسها طبيعية عشان ما تخرب على أميرة فرحتها , بس بنفس الوقت متضايقة من وجود غدير معهم , اولا لانها زعلانه عليها و شايله بقلبها لانها خبت عليها خطبة عبدالرحمن و ثاني شي لان مجرد وجودها يذكرها بعبدالرحمن , غدير كانت منتبهه لتصرفات سارة معها , بعد شوي سارة دخلت للمجلس و لحقتها غدير

غدير: سارة ممكن اتكلم معك شوي

سارة ببرود: هلا غدير

غدير: شوفي يا سارة انا والله ما كنت اعرف عن خطبة عبدالرحمن و لا شي لحد ما خطبوا و خلصوا ماكنت ادري عن شي اقسم لك بالله , و بعد ما عرفت كنت افكر كيف اقول لك و اوصل لك الخبر بس انتي جيتي و سبقتيني و كنتي وقتها عارفة عن خطبته

سارة امتلت عيونها دموع و جلست تصيح

غدير حضنتها: والله يا سارة و ربي ما كنت اتمنى بنت ثانية لاخوي غيرك والله اني تهاوشت معه لما دريت انه خطب , لا تزعلين مني الله يخليك انا مالي اخوات غيرك انتي و اميرة

سارة: صعب علي اللي صار والله صعب ماني قادرة اشيله من راسي , حرام عليه ليه سوا فيني كذا ليه

غدير دمعت عيونها بس ما كانت تقدر تقول لسارة السبب الحقيقي لان عبدالرحمن حلفها ما تعلم سارة عن السبب

غدير: كلنا معك و ان شاء الله ما راح نخليك بنكون دايم معك لحد ما تنسينه

سارة: كيف بنسااه كيييف الله يصبرني بس


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــ

في المزرعة

عبدالمحسن: من جدك انت يا عادل ؟ تترك السعودية كلها عشان هالبنت؟؟

عادل: ايه الحين انت اكيد بتقول عني هذا مو عادل اللي اعرفه . بس انا جالس اتعذب يمكن اذا بعدت عنها انساها بس كذا كل شي يذكرني فيها , كلل شي كل زاوية ببيتنا حتى بتذكرني فيها , بروح مكان مالها ذكرى فيه

عبدالمحسن: طيب انت تتوقع انك بهالطريقة بتنساها؟

عادل: ان شاء الله , ان شاء الله بقدر انساها بترك كل شي عشان انساها , المشكلة ان قلبي ماقدر اتركه لو اقدر اترك قلبي كان تركته مع كل شي

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــ
بعد كم يوم بالمطعم كانت روان و لمياء جالسين , طبعاً لمياء كانت كل الفترة اللي راحت تتقرب من روان لحد ما صادقتها و صارت روان اغلب مشاويرها مع لمياء.

روان: يالله بس خلينا نطلع مليت المطعم كئيب

لمياء: عاد كنت بطلب آيس كريم مشتهيته

روان: لاا تكفين انا الحين أمر على محل آيس كريم يجنن مرة قريب من بيتنا بيعجبك

لمياء: اوكي

و هم طالعين من المطعم كان نواف و بدر بيدخلون الكافي اللي جنبه , لمياء كانت كاشفة و لمحها بدر بس هي ما انتبهت له و كانت معها وحدة متغطية و راقبها بعيونه لحد ما شافها تركب سيارة تشبه سيارة اهله , طالع اللوحة و اكتشف انها فعلاً سيارة اهله

بدر بينه و بين نفسه ( هذي لمياء وش مركبها سيارتنا)

بعدين استوعب ان اللي معاها اكيد اخته روان

نواف: بدر , بدر

بدر: هلا

نواف: وش فيك طبيت بوسط سيارتهم

بدر: هذي سيارتنا بس هالحيوانه وش ركبها فيها

نواف بتعجب: من هي

بدر و هو معصب : هالحقيرة لمياء

نواف: طيب تعال ندخل و نتكلم فضحتنا بالشارع

- أما بالسيارة
روان: بعد بكرة شبكة أميرة و عازميني مصدقين انفسهم اني بروح لهم

لمياء: و ليه ما تروحين

روان: بعد حركاتهم القذرة اللي سووها فيني و تبيني اروح لهم

لمياء: براحتك

روان: عاد لمو الحين بنروح للمحل اللي قريب من بيتنا لازم تدخلين عندي

لمياء: لا حبيبتي استحي من اهلك و الوقت متأخر

روان: لا جد لمياء لا تصيري سخيفة ترى بزعل منك

لمياء عجبتها الفكرة: اوكي و انا اقدر أزعل أغلى صديقة عندي

- بالكافي
بدر: يا نواف انا حبيتها و قدمت لها قلبي و كنت اثق فيها ثقة عمياء بالنهاية اكتشف انها تخونني تخيل؟؟ بس الحمدلله ربي كشفها على حقيقتها كنت ناوي اتقدم لها بعد شهر قبل ما اكتشف خيانتها , تخيل ارسلت لي رسالة بالغلط حمودي حبيبي وحشتني

نواف: طيب يمكن البنت تقصد أخوها و الا احد يقرب لها

بدر: طبعا هالفكرة جت ببالي لاني ماكنت متصور انها ممكن بيوم تخونني , بس ضغطت عليها و حققت معها لحد ما اعترفت لي بخيانتها

نواف: اهم شي الحين حاول تخلص روان منها لا تخليها تماشيها

بدر: صح ذكرتني

و مسك جواله بيدق على روان

نواف: بس لا تقول لروان شي قدام البنت بس شوف وش قصتها

بدر اتصل على روان: هلا روان

روان: اهلين

بدر: وينك

روان: بالسيارة راجعة للبيت

بدر: مع مين كنتي طالعة

روان: مع صاحبتي لمو و الحين راجعين للبيت

بدر: ببتجي معك لبيتنا؟؟

روان: ايه مره ونااسه

بدر عصب: طيب مع السلامة

روان: باايو

بدر بعد ما قفل : الحقيرة رايحة لبيتنا هذي اكيد ناوية شر

- روان و لمياء وصلوا للبيت , وروان اخذت لمياء فوق عشان توريها غرفتها

روان: أحلى شي بغرفتي انها بالزاوية يعني بعيدة عن كل الازعاج

لمياء متعمدة و أشرت على الغرفة اللي جنبها : طيب هذي غرفة مين

روان: هذي غرفة اخوي بدر

لمياء طالعت الغرفة و ابتسمت بخبث

دخلوا غرفة روان و جلسوا , بعد شوي

لمياء : روري مره حلو ديكور غرفتك , عارفة انا و اخوي من زمان ندور ديكورات حلوة لغرفنا بس مو لاقين شكلي بسرق تصميم غرفتك

روان: حلالك

لمياء: ههههههه يعني اتمادى و اسرق ديكور غرفة أخوك و اعطي الفكرة لاخوي

روان: ايه اكيد وش دعوى

لمياء: امم طيب وريني بشوفها ممكن؟

روان: ايه طبعا تفضلي

روان اخذت لمياء لغرفة بدر , و لمياء تطالع غرفته بحقد و لما جوا يطلعون من غرفة بدر

لمياء: امم روري ممكن طلب؟؟ اعرف اني مزعجة

روان : لا تقولين كذا تدللي

لمياء: عطشانة ممكن تجيبين لي موية

روان: من عيوني

راحت روان و عيون لمياء تراقبها لحد ما اختفت عن عينها و بسرعة دخلت غرفة بدر و اخذت من مكتبه ورقة و قلم و كتبت على الورقة (وش رايك بالتحدي؟ دخلت بيتكم و اكثر من كذا دخلت غرفتك بعد و غصب عنك و لسه ما شفت شي و راح تشوف اكثر)

و حطت الورقة على المكتب و طلعت .

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــ

- من هو غير الله يعين !
و من هو غير الله لنا ؟ !

في بيت أبو عادل كانوا جالسين كلهم بالصالة

أم عادل كانت واقفة و توجه كلامها للشغالة: بسرعة وديهم للسيارة عشان يمديه يوصلهم للمحل قبل ما يأذن

أبو عادل: وين بيودي هالصياني

ام عادل: بكرة شبكة أميرة و أنا حلفت على ام نواف اني اشيل عنها الحلا و الا الفطاير عاد قالت لي ان الحلا خلاص طالبينه قلت اجل علي الفطاير

بعد شوي

عادل: يبه


ابو عادل: سم

عادل: سم الله عدوك , يبه انا قررت اكمل الماجستير و ادرس برى

أم عادل و أبو عادل و شهد تفاجئوا بسبب قرار عادل المفاجيء

أم عادل: تتغرب و تروح عننا أدرس هنا

عادل: لا يمه الدراسة هناك أحسن و ماراح اطول ان شاء الله

شهد هي الوحيدة اللي عارفة السبب الحقيقي ورا قرار عادل

شهد بينها و بين نفسها ( لهالدرجة يا عادل تحب أميرة لو تدري عنك اميرة وش سوت)

أبو عادل: و متى بتسافر

عادل: والله مو قبل ثلاث اسابيع بس على ما اضبط اوراقي و اجهز نفسي ان شاء الله

ابو عادل: الله يوفقك يارب

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــ


انتهى البارت

انتظر تفاعلكم و ردودكم و آرائكم حول البارت و احتاج حماسكم يا حلوين

دمتم بخير

رواااايتك خطيييييييييييييييييييييييييييييييييييييييييييييييييييييرة
وحمااااس ..
بس ابسألك عن موعد تنزيل البارتات

صعبة المنال ..

حياك الله يا قمر

موعد تنزيل البارتات يومين بالأسبوع يوم الأحد و الخميس

نورتيني جداً

بسم الله الرحمن الرحيم

هذا البارت نزلته لكم و صار جاهز لحضراتكم

قراءة ممتعة


( الـــجـــــزء الــثـــانــــي عــــشــــر )

- ظلمتي من يجي بعدك ..
يجون و كنهم مقفين..
قهرتي من يجي قبلك..
لو انه شمس تخفينه ..


اليوم شبكة أميرة , كانت سارة عندها فوق و كل البنات تحت لأن أميرة ما رضت يشوفونها قبل ما تكون بكامل زينتها , كان فستانها وردي و ضيق و ماسك على جسمها على القد بالضبط و بدون أكمام و على صدر الفستان منثور كريستال و شعرها كانت الكوافيره مسويته لها ويفي و حاطينه على جنب و الميك اب كان وردي ناعم و مع لون عيونها الأخضر طالعة مرة ملفتة

سارة: مو متخيلة انك صرتي عروسة , ما ابي ابكي

أميرة: اذا بكيتي ببكي معك و بيخرب كل الميك اب و ماراح انزل لهم ترى

سارة: لا لا ما راح ابكي, يالله يا قمر انا بنزل تحت شوي و ارجع لك

بعد نص ساعة سارة رجعت لأميرة

سارة: أموورة يا عمري يالله ترى الحين بيدخل سلطان يلبسك الشبكة تجهزي عشان تنزلين

أميرة كانت مررة خايفة و ايدينها ترتجف : ماقدر ماقدر انزل مررة خايفة يا سارة

سارة: متى بتبطلين خوف يالله لا تخافين و انزلي عادي , ترى الخوف يطلع وجهك غبي بالصور و تتحسفين كل ما شفتي صورك هههههههههههه

أميرة ما كان مودها مود مزح و ضحك اصلا

سارة : يالله أمورة تجهزي انا بروح البس عبايتي و انزل و انتي وقفي عند الدرج اول ما تسمعين الموسيقى بدت انزلي مو تستهبلين خايفة و مدري وشو

أميرة ووجهها معتفس : ان شاء الله

طبعاً البيت كانوا مزينينه كله , كان درابزين الدرج كله ملبسينه ورد لونه وردي و فوشي و صالة البيت كانوا حاطين على جوانبها شمعدانات ورد و شموع و حاطين لها كوشة صغيرة كلها ورد

بدت الموسيقى و نزلت أميرة و هي باين عليها الخوف و الارتباك و عيونهم كلهم عليها و بالذات سلطان كان يطالعها و مو قادر يشيل عيونه عنها كان يطالعها و هو مبسوط انه تزوجها و ان حظه حلو و بيكون طول عمره معها

ريم تقول لاختها حنان : شوفي طالعه تجنن ما شاء الله تاخذ العقل

حنان : ايه ما شاء الله كأنها باربي , يا حظ اخوي بس

يارا: و الله جبتيها توني بقولها تشبه باربي

و كلهم كانوا يسمون عليها و يهللون و يزغردون

أما ام نواف و سارة كانوا مشتغلين صياح و طبعاً كل المكياج خرب

و شهد كانت مبسوطة ان أميرة بتتزوج بس فرحتها كانت ناقصة لأنها تدري ان اخوها عادل الحين مره متضايق لان شبكة أميرة اليوم

وصلت أميرة عند سلطان و سلم عليها و هو متنح فيها لسه مو قادر يبعد عيونه عنها و هي كان وجهها أحمر و مستحية موت , و لما بدا يلبسها صارت من الخوف و الارتباك تتنفس بسرعة و ايدينها ترتجف و هو يلبسها الخاتم

سلطان مسك يدها بقوة و همس بصوت واطي و هو مبتسم : ليه ليه كل هذا خوف

و بدال ما تهدأ ارتبكت اكثر و حمرت خدودها زيادة

بعد ما خلص تلبيس راحت هي و سلطان جوا عشان تصورهم المصورة

اما البنات كملوا رقص

بعد ما طلعت المصورة من عندهم راحت أميرة و جلست ع الكنب و هي ما رفعت عينها له أبدا , جا سلطان و جلس جنبها و هي بعدت شوي

سلطان: مبروك أميرة

أميرة و هي منزلة راسها: الله يبارك فيك

سلطان: وش فيك كل ما اقرب منك تبعدين لا تخافين عاجبتني و ماراح افرط فيك و اتهور و اكلك

أميرة راحت فيها و صارت ماتدري وش تقول و حاطة يدينها بحضنها و تلعب بفستانها

سلطان: تراني ما شفت عيونك أبد طالعيني

أميرة و لا كأن في احد يتكلم كملت لعب بيدينها

سلطان مسك دقنها و رفع راسها : طالعيني لا تستحين مني

أميرة لما سلطان رفع راسها و صار وجهها بوجهه استحت منه و ما قدرت تطالعه و غمضت عيونها

سلطان: الحين رفعت راسك عشان اشوف عيونك الحلوين تقومين تغمضينهم

أميرة ما زالت مغمضة عيونها و لا كأنها تسمعه

سلطان: ما راح تفتحين عيونك؟

أميرة و هي مغمضة عيونها هزت راسها ب لا

سلطان: طيب بكيفك انتي جنيتي على نفسك و قرب منها و باس خدها

أميرة لما باسها خافت و ارتجفت و بعدت عنه و حمرت خدودها و برطمت ما عجبها الوضع

سلطان: وش فيك بعدتي و زعلتي تراني خلاص صرت زوجك يا حلوة و خدودك هذي صارت لي ابوسها على كيفي

أميرة لما قال كذا رجعت نزلت راسها و هي بينها و بين نفسها (ياربي مرة جريء و ملسون متى يروح و افتك منه)

سلطان و كأنه قاعد يقرا افكارها: صح صح بعدين اليوم لا تتوقعين انك بتفتكين مني بقعد على قلبك بعوض نفسي عن اللي سويتيه فيني يوم الملكة , اجل اجي و أملك عليك و كاتبين العقد و حركات و آخرتها ما ترضين اجي اسلم عليك حشى لا يكون مملك على نواف و الا خالد انا

أميرة بينها و بين نفسها ( يا ويلي منه هذا من اولها ناشب كذا الله يعيني عليه )

سلطان: أميرة تكلمي بسمع صوتك , حسيت اني جالس اتكلم مع نفسي يالله قولي سلطان يا زوجي مبروك

أميرة طلعت منها ضحكة صغيرة على كلمة زوجي و حاولت تكتم ضحكتها

سلطان : ههههههههه ليه كتمتيها خليها تطلع , على فكرة ضحكتك حلوة مثلك و بعدين خلاص ارحمي الفستان قطعتيه , و حط يده بحضنها بين يدينها : خذي العبي بيدي احسن من الفستان حرام خربتي الفستان من كثر مالعبتي فيه

أميرة رفعت يديينها عن يده و هي خجلانة منه و كملوا سهرتهم على هذا الحال مشاكسات سلطان لأميرة و خجل أميرة منه و استغرابها من تصرفاته الجريئة .

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــ

بعد كم يوم في بيت عمتهم نورة , روان كانت لابسة عبايتها و بتطلع , شافها بدر

بدر: روان

روان: يس

بدر: طالعة ؟

روان: وش شايف انت ؟ لابسة عبايتي يعني ايش بنام مثلا

بدر: وين رايحة

روان: بطلع مع صاحبتي

بدر: مين صاحبتك

روان: افف تحقيق السالفة , و الا لا يكون غيرت شغلك و صرت حارس عند الباب تشوف مين يروح و وين

بدر: انا سألتك باحترام جاوبيني باحترام

روان: طيب خلاص لا تصدع لي راسي بطلع مع لمو

بدر: وش قصتك انتي مع لمياء هذي؟ اسمعي هذي البنت لازم تقاطعينها فااهمه

روان: لا والله؟؟ و من متى صرت أبوي و تتحكم فيني وين اروح و مع مين اجي , ولا يهمك بكرة اروح للأحوال و أغير اسمي روان البدر وش رايك

بدر: روان تكلمي معي بتهذيب و مثل ما قلت لك هذي البنت لازم تتركينها

روان: و ليه ان شاء الله أتركها و بعدين صح صح مرة ثانية إذا سمعت انك مقرب من وحدة من صاحباتي بعلم بابا و افضحك

بدر انصدم : اتقرب من صديقاتك؟؟ وش قاعدة تخرفين انتي

روان: انا أخرف؟ لا تفكرني غبية و اني ما أدري ترى لمياء قالت لي انك الاسبوع اللي فات لما جتنا للبيت دخلت عليها و تتحرش فيها و تبي رقمها و هي هزأتك , فشلتني عند البنت جلست اعتذر منها نص ساعة

بدر: الله يلعنها الحقيرة تجي بيتنا و تتبلى علي بعد

روان: صح تتبلى عليك , اقول يا سيد بدر دور البراءة مو لايق عليك اوكي , يالله تشاااو

راحت روان و بدر منصدم , بينه و بين نفسه (هالبنت من جد ناوية شر و جالسة تتبلى علي عشان ما اقدر امنع روان عنها , بس انا بوقفها عند حدها الكلبة )

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــ

- وش مسوي مع غيري ..
وش الدنيا في قربه قول..
ياروحي انت متهني..
والا بشوق لي مشغول ..


بعد ثلاث أسابيع من شبكة أميرة بيوم من الأيام كان الليل و كانت سارة مو قادرة تنام حاسة بأرق

سارة: اوف بكرة وراي دوام كيف بداوم و انا ما بعد نمت لحد الحين

و صارت تقلب بجوالها و تتفرج على الصور , و هي تتفرج على الصور كل صورة تمر عليها يكون عبدالرحمن له ذكرى فيها , شافت صورتها و هي شايلة كيكة عيد ميلادها ال 21 و اللي أصر عبدالرحمن ان الكيكة تكون منه , و صورة ثانية لها و هي بالبر و شايلة ورد خزامى كثير كان عبدالرحمن مجمعهم لها , و صورة هدايا تخرجها من عبدالرحمن , و آخر صورة شافتها كانت صورته و هو شايل لوحة كبيرة و كاتب فيها أحبك سارة كان يومها مسويها و جايبها من عند الخطاط و شافته غدير و هو بيدخل اللوحة للمجلس و كان جايب اللوحة هذاك اليوم و بيسويها مفاجأة لها لانها هي و أميرة كانوا بيسهرون عند غدير , نزلت منها دمعة و طاحت على يدها , طلعت من الصور و فتحت سجل الأسماء و صارت تدور على اسم ( بعد عمري) و جلست تطالع الرقم و تقول بينها و بين نفسها ( اشتقت لصوته , اشتقت له كله ابيه يرجع لي ابيه الله يصبرني و انساه) ايدها صارت ترتجف و مسكت جوالها الثاني اللي هو جوال الدوام و قررت تتصل عليه بما انه مستحيل يكون يعرف رقم جوال الدوام , كانت بس تبي تسمع صوته و تقفل , صارت تنقل الارقام و ضغطت الزر الأخضر , بعد شوي جاها صوته

عبدالرحمن: ألو

سارة لما سمعت صوته صارت دموعها تسيل على خدها بدون صوت

عبدالرحمن: ألو ألو , تسمعني؟

سارة مازالت على صمتها تتلذذ بعذابها و هي تسمع صوته اللي ما عاد صار ملكها و طلعت منها تنهيدة صغيرة و هي تبكي

عبدالرحمن فجأة سكت و خيم السكوت للحظات

عبدالرحمن: سارة

سارة لما سمعت عبدالرحمن يناديها تلخبطت (كيف عرف انها انا , معقول حس فيني يعني اكيد لسه يحبني)

عبدالرحمن: سارة انا عارف انك انصدمتي مني و مجروحة و جرحك ما ينبرى بسهولة و انا خيبت ظنك فيني و ما وفيت بالعهد اللي بيننا , بس الشي اللي أبيك تعرفينه اني اقسم لك بربي و ربك اني أحبك و مافي أحد بهالدنيا يقدر ياخذ قلبي من عندك , و الشي اللي صار خارج عن سيطرتي و إرادتي

كان عبدالرحمن يسمعها و هي تبكي و يسمع شهقاتها بين كل لحظة و لحظة

عبدالرحمن: سارة ياعمري خلاص قطعتي قلبي عليك يكفي الله يخليك

سارة استجمعت كل قواها و قالت له: أكرهك
و قفلت بوجهه

بعد شوي ارسل لها مسج

( خذني معك ,,
دمعة و تسكن مدمعك ,,
أو صوت يوصل مسمعك,,
أو أي شــــي ,,
بس خذني معك,, )

سارة كانت تقرا المسج و عيونها مليانة دموع مو قادرة توقف ( ياربي ليه كذا يتلاعب بمشاعري كيف يبين لي كذا انه يحبني موت و هو سوا فيني كذا انا مو مصدقة اللي جالس يصير مو فاهمة تصرفاته )

بعد شوي سارة أرسلت لعبدالرحمن مسج

( أرجوك تنساني و أنا أوعدك بنساك
و انسى اني في حياتك حبيبة
ما دام غيري عايش الحب وياك
ما اريد اكون بوسط قلبك غريبة
كنت افتكر فرحي على كف يمناك
و احلم اعيش العمر منك قريبة
لكن فرقنا القدر يوم لقياك
الله اكبر يوم يالظروف العجيبة
ضحيت في حبك و اضحي لفرقاك
والله يهني من غدت لك حبيبة
لا تعيش بي ذكرى و لا أعيش بذكراك
كلـ(ن) بياخذ في حياته نصيبه )

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــ

- عشقتك قبل ما اشوفك..
و شفتك صرت كلي حلم..
أبي رمشك يغطيني ..
وابيك أقرب من أنفاسي..
يهمك تعرفي انك قتلتي في سنيني الهم..
قتلني ضحكك و جدك قتلني لينك القاسي..


أما بغرفة ثانية بنفس البيت كان الحال مختلف تماماً , كانت أجواء السعادة مالية الغرفة , كانت أميرة تكلم سلطان و كانت مرة مبسوطة معه و مرتاحتله كثير

سلطان: أمورتي أحبك

أميرة: وش كثر

سلطان: كثير كثير كثيييييير , اقول امورتي قولي لي احبك و لا مرة سمعتك تقولينها

أميرة: لا و لا راح اقولها

سلطان يسوي نفسه زعلان: يعني ماتحبيني؟ انا احبك ليه ما تحبيني


أميرة: و مين قال ما أحبك

سلطان: انتي

أميرة شهقت: انا ؟؟؟

سلطان: ايه انتي ليه ما تقولين لي احبك

أميرة: بس كذا

سلطان: شريرة أمورتي تحب تعذبني , طيب طيب أنا أوريك

أميرة: كيف بتوريني

سلطان: اذا جيتك بكرة تعرفين

أميرة: هههههههه كويس انك أفصحت عن مكنونات قلبك و عرفت نواياك , اذا السالفة كذا أجل مافي جية عندي بكرة انا مشغولة

سلطان: والله مو على كيفك اذا ما خليتيني بالطيب أجي انا بالغصب و اخطفك

أميرة: ههههههههه مجنوون

سلطان: مجنووووونك مجنون بحبك , يابنت فيه احد يشوفك و ما يدمنك

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــ
انــــتــــهــــى الـــبـــــارت

انتظر ردودكم و انتقاداتكم و توقعاتكم , على فكرة البارت اللي فات مالقيت حماس كثير من الأعضاء بليز تفاعلوا معي أكثر و أوعدكم كل ما تفاعلتوا اكثر بتكون الاجزاء مشوقة أكثر

اتمنى لكم اوقات طيبة