جنون الحب .. اعتذر لكم ان البارت كان قصير جداً بس ان شاء الله بعوضكم ببارت طويل المرة الجاية بإذن الله

نشوف اذا توقعاتك تكون بمحلها أو لا

و أسعدني تفاعلك مع الرواية بس بنفس الوقت حزنت لعدم تواجدك هالفترة لاني بفقدك كثير وافقد ردودك العذبة

تروحين وترجعين لنا بالسلامة يارب

هاي ^J^
بارت مرا حلو ^_^
توقعاتي : عبدالرحمن ماراح يآخذ ساره بالبساطه هذي ما أتوقع :( بس بالأخير راح يآخذها ^_^
وفيصل : أنا خايفه من إنه يلعب بمشاعر أميره ^_^
بالتوفيق حياتي ^_^

الاحلى متابعتكم له

و راح نشوف ان شاء الله اذا توقعاتك صح او لا

نورتيني ياقمر

بسم الله الرحمن الرحيم

اليوم نزلت لكم البارت الخامس و أتمنى انه ينال اعجابكم

قراءة ممتعة

(الجـــزء الخـــامــــس)

- ودي فيك فيك .. لكن الخجل أقوى .. و خوفي من المصارحة تجيب الزعل
خلني حابس احاسيسي و ســاكت ..... و شــوفتـــــك مبســــوط تكــــفيني


عادل كان راجع للبيت و يتذكر الحوار اللي دار بينه و بين صديقه سعود قبل شوي

سعود: عادل تبي الصراحة انت مالك داعي أنا اشوف انك متحسس من الموضوع بزيادة يعني انت ليه سلبي و قررت من راسك ان البنت ماتبيك و مستحيل توافق عليك؟

عادل: لأني عارفها كويس اعرف اطباعها من يوم كانت طفلة حافظها وعارف طريقة تفكيرها مستحيل توافق

سعود: وليه مستحيل توافق انت جربت ياخي و هي قالت لا؟؟

عادل: هالبنت يا سعود أحبها وما تتخيل وش كثر أموت فيها و ما اتخيل نفسي ارتبط ببنت او اخطب واتزوج وحدة غيرها كل احلامي معها هي و لو تزوجت غيري ما راح أسامح نفسي و بلوم نفسي اني ما جربت حظي معها

سعود: طيب جرب ما راح تخسر شي

عادل: الا راح أخسر , و بخسر كثير بعد لو ما وافقت , أنا مو مستعد اخسرها و لا أخسر وجودها بحياتي حتى لو كنت اشوفها من بعيد وتواصلي معها من بعيد عشان كذا ما ابي اخطبها و ترفضني وتصير تتصدد عني و تاخذ عني فكرة مو حلوة و هالشي بعد ممكن يأثر على علاقتها بأختي , انا محتار فهمت قصدي؟؟ مدري وش راح تكون ردة فعلها مدري.

سعود: طيب انا عندي الحل

عادل: اللي هو؟

سعود: مو انت تقول ان علاقتها بأختك مرة قوية؟

عادل: ايه

سعود: خلاص انت جس نبضها قول لاختك تسألها عن رايها فيك و تسوي كأنها تقترح عليها تخطبها لك من نفسها هي و اذا البنت ما تقبلت الموضوع تقلب الموضوع مزح و كأنها بس جالسة تمزح معها

عادل: رايك كذا؟؟

سعود: ايه و ان شاء الله البنت بتاخذ الامور بجدية و تفكر فيك صدق وتوافق عليك ونفرح فيكم

عادل: ان شاء الله يارب

وصل عادل للبيت و الموضوع هذا كان شاغل كل تفكيره , دخل للصالة لقى شهد جالسة ع اللاب توب

عادل: السلام عليكم

شهد: وعليكم السلام

عادل: وش أخبارك

شهد: تمام

عادل: ليه سهرانة ما وراك جامعة بكرة؟

شهد: الا بس ماراح اروح الا متأخرة هذا اذا رحت لاني جالسة اكلم أميرة بالماسنجر عندها اوف بكرة و تقول لي تعالي افطري عندي

عادل: قوليلها لا بكرة بروح للجامعة

شهد: الا يمكن اروح لها بكرة ماعندي شي مهم

عادل: لا مافيه تضيعين محاضراتك

شهد: قلت لأميرة عادل يقول لا تغيبين بكرة قالت قوليله ترانا بالجامعة خلاص كبرنا

عادل: قوليلها انتم ما تنعطون وجه خلاص قربت الاختبارات وهي بعد خلها تذاكر مو تجي بكرة حل الواجب والا سولي البحث مافهمت شي اكيد مافهمت شي و هي ما تحضر

شهد: طيب بقولها

عادل: ويالله قفلي الماسنجر و روحي نامي

بعد دقيقتين

شهد: عادل عادل أميرة تقول شوف صفحة المحادثة كاتبتلك شي

طالع عادل الشاشة و لقى اميرة معبية كل صفحة المحادثة رمز ورود و كاتبه ( بليييييييييييييييز عدول بس بكرة الله يخليك و وعد نصير دافورات و نحضر كل يوم بس خلها تجيني بكرة )

عادل ابتسم لما شاف كلامها : مجنونة هالبنت , طيب خلاص قوليلها بس آخر مرة مو كل يوم

شهد: يسسس يس ثاانكس

عادل: شهد

شهد: هلا

عادل: ابي منك شغله

شهد: ايش

عادل: أول قفلي الماسنجر و قولي للخبلة اللي عندك باي وانا اقول لك

شهد: طيب ثواني بس تخلص السالفة و اقول لها باي

بعد شوي قفلت شهد اللاب توب : ايه وش الشغلة

عادل قال لشهد الموضوع

شهد: عادل انت تتكلم من جدك ؟؟

عادل: ايه من جد

شهد: ليه تبي تتزوجها

عادل: وشو ليه بتزوج والا ماتبيني اتزوج يعني

شهد: الا بس عاد اميرة؟؟

عادل: ليه وش فيها أميرة ؟ عندك انتقاد عليها؟

شهد: لا والله بالعكس بس استغربت انك تفكر تتزوجها

عادل: عاد انا ابيك ما تبينين لها انه اقتراحي كأنها فكرة وليدة اللحظة وجت على بالك و قلتيها لها و أبيك تشوفين ردة فعلها و مثل ما قلت لك اذا حسيتي ان الموضوع ماعجبها اقلبيه مزح وسكري ع الموضوع , يالله انا بروح أنام تصبحين على خير

بعد ما راح عادل شهد قعدت تفكر بينها وبين نفسها ( معقول عادل يحب اميرة؟؟ ما قد بين عليه هالشي و لا حتى حسس أميرة أو لمح لها بحبه لها ) .

ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــ

- بينما اشخاص ثانيين و بنفس الوقت قاعدين يرسمون مؤامرة
بالإستراحة فيصل كان جالس مع أصحابه و جالس بالركن مع أقرب واحد له من أصحابه

فيصل: أبي أدبرها صح و أبي واحد ينوثق فيه

حازم: أهم شي انت احبكها صح

فيصل: لا ماعليك خويك ذيب هذي انا حابكها صح بس ابي اختار الشخص المناسب

حازم: شوف انا احس فارس بيجيبها صح تعرفه قدها و يدبر اموره صح

فيصل: لا لا فارس ما ينفع

حازم: ليه

فيصل: انا ابي واحد يعجبها شكله أبيه رزة و شخصية

حازم: تدري عاد والله اجل مافيه الا زياد

فيصل: زياد؟؟ أي زياد؟؟

حازم: زياد اللي يجينا للاستراحة بين فترة و فترة ولد خالة عبدالعزيز

فيصل: اييه عرفته والله صادق وسيم بتتمناه تمني بس المشكلة كيف راح اثق فيه و كيف بعرف انه بيضبطها صح و حتى لو بيضبطها وش يضمن لي انه بيوافق ممكن يسوي نفسه اخلاق وما يرضى و يفضحنا

حازم: لا ماعليك انا بخليه يوافق بقول لعبدالعزيز يخليه يجي يوم الخميس الجاي

فيصل: اجل خلاص بعتمد عليك

حازم: ولا يهمك اعتمد

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــ

صباح اليوم اللي بعده كانت شهد عند أميرة وحست انه الوقت المناسب تقول لها

شهد: ياحبي لك يا أميرة والله اني احببكم انتي و سارونة

أميرة: والله حتى حنا نموت فيك انتي اكثر من اخت

شهد: احيانا اتمنى اننا ببيت واحد

أميرة: تخيلي عاد واااو وناسة

شهد: تصدقين عاد فيه طريقة ممكن تحقق الحلم

أميرة: ايش

شهد: وش رايك تتزوجين اخوي عادل

أميرة: ههههههههههههههههههههه شوف البنت وش تقول هههههههههههههههههههههه والله ضحكتيني يامجنونة

شهد اعتفس وجهها بس حاولت تسوي طبيعية: ههههه طيب عادي فكري فيها وش فيه اخوي

أميرة: هههههههههههههههه من جدك انتي تبيني اتزوج عادل والله مدري كيف الفكرة جتك , عادل لو انه اخر واحد بالعالم ما فكرت فيه و لا افكر اتزوجه

شهد: ليه انتي تحسين انه شخص مو كويس؟؟

أميرة: شهد وش فيك قلبتي الموضوع جد ؟ آسفة والله ما قصدت بس عادل ما ينفع اتزوجه عادل اخوي الكبير يا خبلة

شهد: ما قلبته جد و لا شي بس تراني استهبل لا تصدقين عاد تخيلي أقول لعادل الفكرة

أميرة: بيذبحك والله ههههههههه بيقول وش فيها شهد انجنت

شهد ابتسمت ابتسامة صفرا وحاولت تغير الموضوع : ايه بعد وش اخر اخباركم



ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــ

وقت الظهر بالمستشفى وتحديداً عند سارة كان وقت البريك وكانت سارة جالسة مع وحدة من البنات اللي تعرفت عليها بالمستشفى

نور: سارة وش رايك بدكتور طلال

سارة: امم هو رزة و يعجب بنات كثير بس مدري ماهضمته

نور: حرااام عليك والله يجنن هذا لو يخطبني بموت على طول بوافق

سارة: مدري احسه يحب يترزز قدام البنات كل مامريت قدامه يستملح ويجلس يسألني كيف التدريب و بس يبي يفتح سالفة

نور: لاا دكتور طلال مررة ثقيل ولو سوا كذا من باب انه بس يسأل من لطفه بس مو قصده شي ثاني و الله لو انا يسألني بجلس اطقها سواليف معه عشان اتفرج عليه اكبر قدر ممكن ههههههههه

سارة: والله مدري عنه


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــ

من بكرة الصباح و تحديدا داخل جامعة البنات كانت أميرة جالسة مع صاحباتها ريم و ياسمين

أميرة: بنات وين لميس ما شفتها اليوم و لا كلمتني الصباح

ريم: الا انا دقيت عليها اليوم تقول انها ما راح تجي تقول متهاوشة مع زوجها ومالها خلق الجامعة

ياسمين: زوجها يبط الكبد لو انا مكانها ما اجلس معه ولا دقيقة كل يوم منكد عيشتها

أميرة: لا لو كنتي بنفس ظروفها كان تغير كلامك و الا هي ما سكتت على هالشي من فراغ

ريم: الله يعينها و يهدي زوجها لها

البنات: اميين

ياسمين: انا بروح للكافتيريا احد يبي شي

أميرة: بليز مويه

ياسمين : اوكي

ريم: أمورة وش رايك تجيني للبيت هذا الويك اند

أميرة: لا ياحبيبتي خير الاسبوع اللي فات كنت عندكم انتي تعالي عندي

ريم: طيب و اذا كنتي عندي وش فيها

أميرة: لا ياختي وش بيقولون اهلك عني هذي ماعندها بيت كل يوم رازة وجهها عندنا

ريم: هههههههههه والله انك سخيفة تدرين ا نامي تموت فيك طول الوقت تمدحك تقول سبحان الله هالبنت دخلت قلبي و تمدح فيك قدام سلطان و تقول له وش رايك اخطبها لك

أميرة: ههههههههه يووه احراج

ريم: تخيلي من كثر مانمدحك انا وامي تحمس يسألنا وش شكلها وش تصرفاتها ومدري ايش مابقى شي شكله يفكر يخطبك

أميرة: هههههه انقلعي لا تفشليني و بعد كل هالكلام تبين اجي بيتكم بعد

ريم: والله البنت حياويه و تستحي انا لو منك اطق الكشخة و كل يوم رازة وجهي , احد يحصل له سلطان و يضيع الفرصة من ايده

أميرة: هههههه شف تمدح اخوها


ــــــــــــــــــــــــــــــــــــــــــــــــــ ــــــــــــــــــــــــــــــــــــــ


بالليل يوم الخميس و في استراحة شلة فيصل

حازم: هات البشارة

فيصل: بشارة ايش

حازم: كلمت زياد و اقنعته و كل شي صار تمام

فيصل: من جدك تتكلم؟؟ متى امداك تتكلم معه

حازم: والله جاد ما اكذب بس ما وافق الا بعد ما طلع روحي يا شيخ

فيصل: الحمدلله اهم شي وافق , زين زين اجل الحين خطتي ناجحة مية بالمية


- بمكان ثاني عادل طق باب غرفة شهد
شهد: تفضل

عادل: هلا شهد وش اخبارك

شهد : تمام

عادل: امي وابوي وينهم

شهد: ابوي قال بيروح معزوم و امي راحت عند بيت ام عبدالرحمن

عادل: اها , طيب شهد

شهد: سم

عادل: وش صار على الموضوع

شهد: قصدك أميرة؟

عادل: ايه

شهد:امم جربت و سألتها

عادل: ايه وش صار

شهد: بصراحة جلست تضحك و قالت لي انتي مجنونة لو يكون اخر واحد بالعالم ما فكرت فيه لانه مثل اخوي

عادل كان متوقع رفضها بس ما توقع تقول هالكلام و حس ان الكلام اللي قالته مثل الموية الباردة انسكبت عليه , انجرح منها كثير بس ماحب يبين شي قدام شهد: يالله كنت بنقذ هالخبلة من العنوسة بس مو راضي تتزوج بكيفها ضاعت عليها الفرصة

شهد تدري انه من داخله انجرح و يكابر بس حبت تنعش الجو: ايه انت بعد اذا رحت للجامعة بدور لك وحدة فلته كل الناس يفتحون افواههم اذا شافوها من جمالها

عادل كان يبي يحسس شهد انه بس جت على باله اميرة لان فكرة الزواج تدور فباله مول انه يبيها تحديدا : يالله اجل شدي حيلك ودوري لي وحدة حلوة على ذوقك

شهد: من عيوني كم عادل عندنا

عادل: يالله انا طالع تامريني على شي

شهد: سلامتك

عادل: الله يسلمك , يالله فمان الله

شهد: بحفظ الكريم

طلع عادل وهو نادم قد شعر راسه لانه اقدم على هالخطوة ( ياليتني ماقلت لشهد تقول لها كنت داري داري انها ماراح توافق حطيت نفسي بموقف مهين , اهنت نفسي ليه كذا يا اميرة جرحتيني و جرحتي كرامتي ياليتني ما سويت هالحركة يااليت )

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــ

يوم الجمعة الساعة ثلاثة العصر في بيت العم احمد كانوا كلهم مجتمعين حول طاولة الطعام يتغدون

أحمد: ام عبدالرحمن وين غديرها ما اشوفها جت تتغدا معنا

أم عبدالرحمن: غدير قالت عندي اختبار صعب ومايمديني اضيع وقتي

احمد: اييه الله يوفقها اجل , ياعبدالرحمن و يا فيصل

عبدالرحمن و فيصل: هلا يبه

ابو عبدالرحمن: ترانا اليوم معزومين على العشا

فيصل: عند مين

ابو عبدالرحمن: عند ابو عبدالمحسن الجابري

عبدالرحمن: معلي شيبه اعذرني ما اقدر اروح معكم اليوم

ابو عبدالرحمن: ليه وش عندك

عبدالرحمن: والله مشغول شوي عندي اوراق لازم اخلصها عشان المناقصة

ابو عبدالرحمن: المناقصة تنتظر شوي بس هالعزيمة انت بالذات لازم تكون موجود

عبدالرحمن: ليه وش معنى انا

ابو عبدالرحمن: لا ابد اقصد اننا كلنا لازم نكون موجودين بيجون ناس كبار بالسوق و انا ابيك تكون بالواجهة

عبدالرحمن: خلاص ابشر ولا يهمك ان شاء الله بكون موجود

ابو عبدالرحمن: وانت بعد يا فيصل لا تدور لي حجة و تقول ما اقدر اجي عشان تروح للاستراحة

فيصل: لا لا يبه وش دعوة دام السالفة فيها شي يخص الشركة انا اول الموجودين

أبو عبدالرحمن: كفو

انتهى البارت الخامس

يا ترى وش المؤامرة اللي فيصل قاعد يحبكها لأميرة ؟؟ و هل راح تنجح مؤامرته؟؟

انتظر ردودكم و آرائكم و توقعاتكم حول القصة

دمتم بود

بسم الله الرحمن الرحيم

مساء الخير لكل الأعضاء الحلوين .. اليوم بنزل لكم البارت السادس و ان شاء الله راح يكون في اوقات محددة لتزيل الأجزاء مبدأيا راح تكون مرتين بالأسبوع اللي هم يومي الأحد و الخميس بإذن الله و هالمواعيد قابلة للتعديل لو كانت تتعارض مع رغباتكم و أتمنى تفيدوني بهالشي .. والحين بتركم مع الجزء السادس اتمنى لكم قراءة ممتعة.


(الجــــزء الســــــــادس)


بيوم من الأيام دخلت ام نواف الصالة و لقت سارة و أميرة و خلودي جالسين

أم نواف: كنت احكي قبل شوي بالتلفون في وحدة اتصلت علي

سارة: مين يمه

أم نواف ابتسمت و التفتت على أميرة : وحدة اتصلت علي تخطب أميرة

أميرة استحت و حاولت ما تبين : هههههههههه تخطبني انا؟؟ ليه وين شايفتني

خلودي: شوفوا اميرة مستانسة تضحك مستعجلة ع الزواج

أميرة: هاهاها ياثقل دمك اضحك لاني مستغربة وين شافتني و انا من زمان ما طلعت

أم نواف: والله مدري استحيت اسألها بس حسب كلامها مبدأيا مواصفات ولدها كويسة

سارة: ايوة وش مواصفاته

أم نواف: عمره 28 مهندس طيران و راح يسكن ببيت لحاله خارج بيت اهله و يصلي بالمسجد ومايدخن

سارة: وااو يا أميرة عريس خمس نجوم ما يتفوت هههههههههههه

أم نواف: أي والله يا أميرة حسب مواصفاته يعتبر احسن اللي خطبوك من قبل و خصوصا عائلتهم مرة كويسة

أميرة: ايه صح وش اسمه يمكن يطلع كل شي فيه زين و اسمه حسنين تبيني اتزوجه لا والله


سارة: وش هالسطحية ههههههههههههه

خلودي: بسيطة قوليله يروح للاحوال يغير اسمه و الا اقول لك وش فيها تصيرين حرم السيد حسنين ههههههههه


أميرة: هاهاها برضو بايخ وماتضحك و حاول مرة ثانية ماتستخف دمك

أم نواف: اسمه زياد

سارة: اووه حركات يازياد حتى اسمه حلو ماتقدرين تقولين لا , خلاص يمه حنا موافقين حتى الدلع تقدرين تدلعينه زيودي والا زوزو زيادي زيود ههههههههههههه

أميرة: جتنا الثانية يعني انا نكتة اليوم ها

أم نواف: أميرة حبيبتي انتي استخيري و امه راح تجي هي وولدها يوم الخميس ان شاء الله و عطتني عنوانهم عشان نواف يسأل عن الولد و بيقابله بعد

أميرة: ان شاء الله خير

ام نواف: الله يكتب لك اللي فيه الخير

سارة: امين


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــ

- ماهو غريب تنام وانت متضايق.... غيرك عجز لا ينام من شدة الضيق
و غيرك يجيه الليل هادي و رايق .... و ينام لو هو ظالم كل المخاليق

في بيت أبو عبدالمحسن و بعد ما خلصوا الناس العشاء بعد ساعة كانوا كل الضيوف راحوا و مابقى بالمجلس غير أبو عبدالرحمن و عياله و أبو عبدالمحسن و عياله

أبو عبدالرحمن: اعذرني يا ابو عبدالمحسن اليوم ما راح أطلع الا اخر واحد من بيتك , ابيك بموضوع

أبو عبدالمحسن: وش دعوة يابو عبدالرحمن البيت بيتك و اذا ما شالك البيت عيوني تشيلك

أبو عبدالرحمن: تسلم

أبو عبدالمحسن: بس وش الموضوع عساه خير

أبو عبدالرحمن: ان شاء الله كل خير , يابو عبدالمحسن أنا احبك في الله و اعزك و أقدرك وانت اخو دنيا قبل ماتكون صديق و بينا عشرة عمر من سنين و أبي هالمعرفة تصير قرابة

بهالوقت فيصل و عبدالرحمن استغربوا كلام ابوهم و مافهموا المقصود

كمل أبو عبدالرحمن: و أنا ما راح ألقى احسن من بناتك لعيالي و أبي بنتك الكبيرة لولدي عبدالرحمن

لما سمع عبدالرحمن كلام أبوه فتح عيونه و انصدم من اللي يسمعه و عصب و جا بيقوم بس فيصل كان بجنبه وانتبه له قبل ما الناس ينتبهون له و مسكه : عبدالرحمن اهدأ عيب مو قدام الناس

عبدالرحمن عدل جلسته و بين انه طبيعي و هادي وهو بداخله ألف بركان ( يقول بينه و بين نفسه: والله ما اتزوج غير سارة يعني على باله أبوي بيحطني تحت الامر الواقع بخضع له مستحيل ماراح اخذ غير سارة لو تنطبق السماء ع الارض)

أبو عبدالمحسن: والله يابو عبدالرحمن يشرفني ازوج بنتي لولدك و هي بحسبة بنتك و عبدالرحمن بحسبة ولدي و أنا بعتبرها ماخذه ولد عمها بس الصراحة مثل ماتعرف الشور و القرار الأول و الأخير يرجع للبنت

أبو عبدالرحمن: أبد خلها تاخذ راحتها و تفكر و لها اللي تبي هي تامر و حنا نلبي

أبو عبدالمحسن: حنا نشتري الرجال و عبدالرحمن و نعم فيه ما راح نلقى احسن منه و انا بشاورها بكرة ان شاء الله و أرد لك

أبو عبدالرحمن: اجل على خير ان شاء الله , يالله حنا نستأذن

أبو عبدالرحمن: وين خلونا نسهر

أبو عبدالرحمن: المرة الجاية ان شاء الله , خبرك اليوم جمعة و بكرة دوامات , يالله تامر على شي

أبو عبدالمحسن: ابد سلامتك

أبو عبدالرحمن: الله يسلمك, يالله فمان الله

أبو عبدالرحمن: بحفظ الكريم

طلعوا من بيت أبو عبدالمحسن و كانوا كلهم جايين بسيارة عبدالرحمن , و قبل ما يركبون السيارة

عبدالرحمن كان يصرخ وعيونه حمرا و كأنه يطلع منها شرار من العصبية : وش اللي سويته يبه انت على بالك بوافق اخذ بنته؟

أبو عبدالرحمن: عبدالرحمن قصر حسك ترانا للحين قدام بيت الناس عيب عليك

عبدالرحمن ماقصر صوته بالعكس زادت نبرة صوته حدة: عيب علي أنا؟؟ وين العيب انا اللي بزوجك بنت و اخطب لك وانت ما تدري؟؟ خير شايفني بزر عندك تسوي اللي تبيه وما تشاورني؟ ماراح اتزوجها والله ما اتزوجها على بالك كذا بتورطني و استحي من الناس و اخذ بنتهم لا أنا ما اتزوج وحدة مغصوب عليها

ابو عبدالرحمن: خلاااص يا عبدالرحمن اسكت هالنقاشات بالبيت

عبدالرحمن: لا أبد سلامتك مافي نقاشات و لا شي والموضوع منتهي قبل مانركب السيارة و لا تفكر اني بتزوجها وبكرة تقول لهم خلاص ولدي هون و مايبي يتزوج

فيصل: عبدالرحمن خلاص هات مفتاح السيارة انا بسوق

طلع عبدالرحمن من جيبه المفتاح و عطاه فيصل , ركبوا السيارة و ماكان فيه أي حوار و مافيه الا صوت انفاس عبدالرحمن المتلاحقة و تنهيداته وكل واحد منهم براسه الف فكرة و فكرة

وصلوا للبيت راح فيصل لغرفته و عبدالرحمن و هو رايح وهو مرة متنرفز ناداه ابوه : عبدالرحمن

عبدالرحمن بدون نفس: نعم

أبو عبدالرحمن: تعال ابيك الحقني للملحق

عبدالرحمن: إذا بتكلمني عن موضوع الخطبة فأنا قايل لك الموضوع انتهى من يوم كنا عند باب بيتهم و بعتبر نفسي ما سمعت شي

أبو عبدالرحمن: قلتلك تعال الحقني للملحق

راح ابو عبدالرحمن و جا وراه عبدالرحمن

عبدالرحمن: خير يبه آمرني

أبو عبدالرحمن: ما يامر عليك ظالم أبد بس ولدي خاطب و أبي ابارك له

قرب ابو عبدالرحمن من ولده و جا بيضمه , عبدالرحمن تنرفز من اسلوب ابوه و بعد عنه : يببه لو سمحت أنا قلتلك الموضوع انتهى ليه تبي تنرفزني يعني

ابو عبدالرحمن علا صوته : لا ما انتهى و لا تقول لي بعتبر نفسي ما سمعت لانك سمعت و بتنفذ كلامي و بتتزوج هالبنت فاهم؟؟

عبدالرحمن: انا اللي بتزوج والا انت؟؟ وما اعتقد انه فيه احد بهالزمن يتزوج بالغصب و انا ماراح اتزوج هالبنت و لو سمحت يبه من فضلك لا تتدخل بحياتي الشخصية

ابو عبدالرحمن: و انا قلت بتتزوجها حتى لو غصب عنك يعني خلك مطيع و تزوج هالبنت اللي خطبناها لك اليوم و بلا ما تخليني اضطر اسوي شي مالي خاطر اسويه

عبدالرحمن: يبه انت جالس تكلمني كأنك تتكلم مع طفل عمره خمس سنوات و أسلوب التهديد يخليني اعاند و أصر على رأيي أكثر , و أنا على العموم هددت و الا ماهددت انا ماني موافق و هذا امر مفروغ منه و اللي تبي تسويه هذا انا قدامك ماني خايف من شي

أبو عبدالرحمن: انا ياعبدالرحمن مانيب كاذب عليك و اقول لك اني بضرك مهما كان انت ولدي وما يطاوعني قلبي اسوي شي يضرك بس بحرق لك قلبك شوي على سارة مو هي اللي مطيرتلك عقلك و ماصرت تميز بين الصح والغلط بسببها و ما عاد صرت عبدالرحمن اللي ينوثق فيه و يعتمد عليه , انت تحبها كيفك بس انا تعرفني شي من صوبهم اكرهه تبيني ازوجك وحدة منهم؟؟ لا والله ما صارت

عبدالرحمن: وش قصدك يا يبه من هالكلام؟؟

أبو عبدالرحمن: شوف انا بسوي معك اتفاقية و بعطيك خيارين و بخلي لك حرية الاختيار اتفقنا؟ الاول انك تتزوج هالبنت اللي خطبناها اليوم و انت راضي بهالشي و بدون مشاكل و بكذا تكون اختصرت طريق طويل ممكن يتعبني انا وانت , او انك بتبقى على عنادك ووقتها بتندم , وانت تعرفني زين هذولي ما يهموني و لا اعتبرهم عيال اخوي محمد الله يرحمه , محمد يبقى ذكرى بحياتي لحاااله و ما اعتبر ان عنده عيال و بإشارة وحدة مني أضيع مستقبل البنات و امهم و اسهل شي اطلع اشاعة ان واحد من عيالهم مو من محمد امم وش رايك اختار سارة حبيبتك و الا اقول لك بختار أميرة هي اللي شكلها يناسب اشاعة مثل كذا و شكوك الناس تكون مؤكدة اكثر خاصة اذا شافوا انها مافيها شبه من محمد الله يرحمه وش رايك الحين؟؟ اتوقع انك غيرت رأيك الحين صح

عبدالرحمن: يبه انت من جدك تتكلم ؟؟ والا هذا بس تهديد عشان تخليني اوافق؟ مستحيل اقتنع انك ممكن تسوي شي مثل كذا , يبه هذولا اهلك عيال اخووك يعني عررضك وشلون ترضاها على نفسك

ابو عبدالرحمن: قلتلك ما يهموني و اذا تبي تتأكد اني جاد بكلامي انا مستعد اخليك تطلع ع الخطة خطوة بخطوة و اذا انت مصمم على رايك لحد الحين تعال عندي بكرة للمكتب و اخليك تسمع مكالمتي مع الرجال اللي بتفق معه يضبط لي الموضوع

عبدالرحمن بهاللحظة عصب و جحظت عيونه و انفجر و ماقدر يتحمل يسمع اكثر: خلاااص خلااص وش هالكلام والله العظيم احس اني بكابوس ياليتني مت قبل ماسمعك تقول هالكلام , معقول فيه بشر مثلك؟؟ مستحييل كيف تفكر انت كيييييف كل هذا حقد و جشع؟ بدال ماتعتبرهم عيالك تسوي فيهم كذا؟ خاف ربك اذا عيال اخوك ما اعتبرتهم عرضك ترى ربي بيجازيك بزوجتك و بنتك حراام اللي تسويه حرام

أبو عبدالرحمن : انا توني مابعد سويت شي و هم الحين تحت رحمتك و القرار قرارك يا تخلصهم من هالشي و الا بكيفك

عبدالرحمن طلع من الملحق وهو معصب : استغفر الله العظيم استغفر الله العظيم

وطلع وراح لغرفته و سكر الباب بقوة و صار يضرب الجدار بيده بقوة : معقولة في ناس بهالشر تهدم بيوت غيرها وتنام مرتاحة وش ذننبهم ؟؟ احب سارة احبها حلمي يضيع بهالسهولة؟؟ حب الطفولة يتبخر ؟ لو درت سارة اني بخطب غيرها وش بيصير فيها ؟ بتكرهني بتتعقد بسببي يااربي وش قاعد يصير انا حتى ما اقدر ابرر لها وش اقول لها ابوي اللي هو عمك بيتبلى على امك؟ استغفر الله العظيم

ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــ

يوم الاثنين في الجامعة أميرة كانت جالسة مع صاحباتها ريم و ياسمين و خلود

ياسمين: شفتوا حنان اللي معنا بمحاضرة الاقتصاد زواجها يوم الخميس الجاي و امي معزومة

خلود: يا حليلها بتتزوج

أميرة: تصدقون انا قبل احسبها متزوجة

ريم وطت صوتها و قالت لأميرة: و انتي وش اخبار عريس الغفلة؟؟

أميرة: وجع اوشش مابي البنات يدرون

ريم: صوتي واطي و دام السالفة كذا و ماتبين احد يدري أجل اكيد في مستجدات امشي معاي

قامت ريم و سحبت أميرة من يدها : أميرة قومي معاي للكافتيريا , بنات احد يبي شي؟

خلود: امم شكلي بجي معكم

ريم: لا لا خليك مع ياسمين ما يصير تجلس لحالها بعدين تحس بالوحدة

ياسمين: اقول خلود اجلسي بس , اعرفها ريموه في بطنها سالفة و بتقولها لأميرة هههههههههه

راحت ريم و معها اميرة: هاا قولي لي وش صار

أميرة تسوي نفسها مو فاهمة : وش صار بأيش؟

ريم: أميرة وجع لا تسوين نفسك مو فاهمة علميني وش صار بسالفة خطبتك

أميرة ترفع ضغط ريم: امم ماصار شي

ريم: ياربي يا أميرة بتقولين والا شلون يالله عاد بعد شوي بتبدأ المحاضرة

أميرة: نواف راح سأل عن الولد و كل الناس مدحوه والشوفة يوم الخميس و بتجي امه معه بالمرة تتعرف علينا و نتعرف عليها

ريم: وااو أميرة بتصيرين عروسة مو مصدقة

أميرة: تدرين انا مررة خايفة و متوترة مدري وش بسوي

ريم: يا شيخة انبسطي و لا تتوترين و لا شي أحد حاصل له عريس لؤطة بهالزمن و يخاف انا لو منك اجهز شنطتي و من عند الباب اركب سيارته و امشي معه هههههههه

أميرة تستهبل و ترفع حاجبها بغرور: ههههههه خبلة و بعدين ليه شايفتني مثلك متشفقة ع الزواج

ريم: ههههههههه دبة هذا وانتي مابعد تزوجتي شفتي نفسك اجل بعد الزواج وش بتسوين , ليتك ماخذه اخوي سلطان كان وريتك

اميرة: هههههههههههههه اجل الحمدلله ما اخذته كان افتريتي فيني

ريم: ياحرام ياسلطان اميرة راحت عليك

أميرة: يابنت حتى الشوفة مابعد شفته , اللي يسمعك يقول هذي تزوجت و خلصت وبعدين يمكن ما يعجبني

ريم: شف الغبية ترفس النعمة أقول حوليه علي بس انتي مايصلح لك الزواج انا اتزوجه وانتي حضرتك متى ماقررتي تتزوجين خذي سلطان

أميرة: لا والله تبين تخطفين زوجي

ريم: يمه منك توك تقولين ما بعد صار شي كل شوي على كيفها تقلب الحقائق أعوذ بالله من كيد النساء



ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــ

بعد العصر كانت غدير جالسة تكلم أميرة و أمها دخلت عليها

غدير: اوكي يا عروسة خلاص اجل مروني بعد المغرب ,, لا لا بكون جاهزة ما راح تنتظروني ساعة اوكي يالله بايوو

أم عبدالرحمن: وين بتروحين بعد المغرب

غدير: بروح مع سارة و أميرة للسوق لان اميرة بتشتري لها لبس عشان الشوفة

أم عبدالرحمن: الله يكتب لها كل خير

غدير: آمين

أم عبدالرحمن: ما شفتي عبدالرحمن؟؟

غدير: لا , صاير غريب هاليومين ما عاد اشوفه كثير

أم عبدالرحمن : مضيق صدري لا اكل ياكل معنا ووجهه منقلب مدري وش فيه وش مضيق صدره

غدير: يمكن عشان الشغل و المناقصات كلها كم يوم يخف ضغط الشغل و يرجع لطبيعته ان شاء الله

أم عبدالرحمن: ان شاء الله


ــــــــــــــــــــــــــــــــــــــــــــــــــ ــــــــــــــــــــــــــــــــــ

في العيادة و تحديداً في مكتب بدر دخلت السكرتيرة: دكتور بدر المريضة وصلت اخليها تدخل؟

بدر: ايوة خليها تتفضل, امم كم مريض باقي بعدها؟

السكرتيرة: باقي اثنين

بدر: اوكي خليها تتفضل

دخلت البنت و بصوت واطي: السلام عليكم

بدر: و عليكم السلام . طالع بدر الملف : كيف حالك ياحنان

حنان: انا مو بخير

بدر كان منزل راسه و يطالع الملف و لما ركز بصوتها رفع راسه و طالعها : لمياء؟؟؟؟

لمياء اللي هي مسوية ان اسمها حنان عشان ما يعرفها بدر : بدر الله يخليك سامحني الله يخليك , انا غلطت صح بس والله تبت لا تتركني بدر انا احبك والله ما اقدر استغني عنك

بدر تعمد يناديها بالاسم اللي هي اختارته من راسها لما جت تفتح الملف عشان ما يعرفها و علا صوته و عقد حواجبه : يااحناان انتهت الجلسة و انا اشوف انك مو محتاجة أي علاج نفسي و الحين تقدرين تتفضلين و بما اني ما اخذت معك وقت بكلم الريسبشن الحين يرجعون لك قيمة الكشفية و اخليهم يقفلون الملف و رجاءاً لا ترجعين للعيادة مرة ثانية

لمياء: بدر و اللي يسلمك الله يوفقك سامحني و الله انا ما عاد اغلط انا احبك والله خلاص ماراح احد يدخل حياتي غيرك

بدر يتكلم بأسلوب و لهجة صارمة: المؤمن لا يلدغ من جحر مرتين و انتي لدغتيني و ماراح اسمح لك تلدغيني مرة ثانية و من فضلك تفضلي برى

و فتح لها الباب

لمياء: هذا اللي طلع معك يا بدر؟؟

بدر: ايه و الحين تفضلي برى لاني مشغول و مثل ما انتي شايفة المرضى ينتظرون برى

لمياء: طيب يا بدر راح تشوف و راح تندم على تصرفك هذا والله راح تندم و تشوف

طلعت و صفق الباب وراها بقوة: افففف ناقصني هالاشكال بعد
ــــــــــــــــــــــــــــــــــــــــــــــــــ ــــــــــــــــــــــــــــــــــــ

انتهى الجزء السادس

ياترى وش اللي بين لمياء و بدر؟و ايش ناوية عليه لمياء و كيف راح تنتقم منه
و ايش راح يصير بالشوفة الشرعية وكيف راح تمشي الاوضاع
و عبدالرحمن وش يسوي و كيف بيقرر و ابوه حطه بين نارين؟؟

كل هذا راح نعرفه بالبارت القادم بإذن الله

انتظر توقعاتكم و تفاعلكم و آرائكم

دمتم بصحة و عافية