بانتظارك يالغلأ
لاتطولي علينا
متحمسه
لأميرا
وسارا

دلع بطفولة حياك ياعسل ..

و بحاول ان شاء الله بالاجزاء القادمة تكون أطول

بالنسبة لفيصل شي طبيعي لما الشخص من طفولته تربى على كره ناس محددين و خاصة اذا كان متأثر بأبوه كثير

شكراً لك

جنون الحب .. شكراً لمتابعتك

و من عيوني الثنتين ما راح اطول و بإذن الله اليوم راح انزل البارت الجديد

دمتي بود

بسم الله الرحمن الرحيم

هذا الجزء الرابع من الرواية ادري انه قصير بس اعذروني و أوعدكم انه البارت الجاي بعوضكم ببارت طويل

قراءة ممتعة للجميع


(الجــزء الــرابــــع)

-أحبك قلتها بقلبي .. وباحساسي وبلساني
كثير قلوب ترجيها .. ولكن لا يهمّونك

أحبك ما أبي غيرك .. ولو غيرك ترجّاني
أنا شاريك ما بيعك إذا غيري يسومونك

أموت اشتاق لك كلي .. أبيك تزور أعياني
خفوقي يا غلا ينزف وله واشواق من دونك

أطير من الفرح لا من لفى صوتك وحيّاني
أحس اني أهم الناس لا من قلتلي : شلونك

ألوم النفس لا قلت : بكيت وما أحد جاني
أنا وش عاد يضحكني اذا العالم يبكّونك

إلى منّك تضايقت .. أنا المسؤول والجاني
أنا المفروض ما أرضى أخلّيهم يزعلونك


أحبك زود عن روحي عن اعمامي عن اخواني
وباقي الناس يا عمري .. ترى والله يفدونك


بدأ الترم الثاني و كل واحد من أبطال قصتنا انشغل بدراسته

و بيوم الخميس الظهر في بيت العمة نورة كانوا جالسين بالصالة

أم بدر: ها ياروان لسه مصممة ماتروحين معاي للزواج؟

روان: ايه ماما ماني رايحة

أبو بدر: روحي وسعي صدرك

روان: لا اليوم أنا معزومة في بيت خالي أحمد , غدير عازمتني انا و بنات خالي محمد

أم بدر: وش عندك صايرة لاصقة فيهم هاليومين خابرتك ماتحبينهم الحين تتركين الزواج عشانهم

روان: ماما انا ماني رايحة عشانهم انا رايحة عشان غدير

أبو بدر: ايه روحي عند بنات خوالك خلك متواصلة مع اقاربك احسن

أم بدر: أقول امشي بس معي للزواج فشلتيني كل ما جت مناسبة يسألوني عنك و كل مرة اتعذر لك تعبانة و الا عندها اختبار , خلي الناس يشوفونك خلي الحريم يخطبونك

روان: كيف يعني اروح اسوي لهم عرض ازياء يالله اخطبوني انا اصلا مابي اتزوج و لا ابيهم يخطبوني توني بدري ع الزواج

ام بدر: ايه انتي و بدر مو الحين بدري محسبين حالكم صغار

بدر: يووه الحين جا دوري بالمحاضرة

ام بدر: ايه كم صار عمرك الحين و عندك وظيفة ما شاء الله و مافي شي ينقصك ليه ما تتزوج

بدر: والله عاد الواحد لازم يكون مستعد نفسيا للزواج قبل ما يكون مستعد ماديا

أم بدر: والله اليوم بالزواج بدور لك بنية حلوة اذا بستناك تستعد نفسيا ماراح تعرس ابد

بدر: لا تتعبين نفسك يمه بدال ما ترقصين و تنبسطين تدورين ع الفاضي

أم بدر:لا مو ع الفاضي و الله لا عجبتني وحدة بخطبها و ماعلي منك

روان: يا ماما خليه يقرر يتزوج و انا عندي العروسة جاهزة

بدر: انتي ليتك تسكتين احسن

ام بدر: من هي

روان: غدير يا ماما وش رايك فيها

ام بدر: غدير ما عليها بس ما قد فكرت فيها لبدر

بدر: لا لا عاد ما لقيتوا الا غدير انا لو بتزوج ما اتزوج وحدة تقرب لي و بالذات غدير احسها مثل اختي الصغيرة , و بعدين لحظة انا ما اتذكر اني شكيت لكم من العنوسة

ام بدر:اقو لانا لو جلست معكم و اتناقش بهالموضوع أكثر بيخرب مزاجي , يالله عن اذنكم

- في بيت العم أحمد بعد المغرب كانوا البنات مجتمعات

أميرة: غدير وين القهوة شكلك مو ناوية تقهوينا اليوم

غدير: بلييز ادري اني مالي داعي و ماقهويتكم بس قلت ننتظر لحد ما البنات يجتمعون كلهم

سارة: اذا بننتظر روان ماراح نتقهوى اليوم

غدير: على الاقل ننتظر شهودة فشلة اول مرة تجي بيتنا و بعدين روان أنا لزمت عليها انها ما تتأخر و قالت اوكي

أميرة: ايه طيب نشوف بدري يعني متى 11 او 12 ههههههههههه

سارة و غدير: هههههههههه

- بعد ربع ساعة دخلت شهد عليهم بالمجلس و بعد ما سلمت عليهم
شهد: وش السالفة عندكم حفلة وانا مادري؟

غدير: ليه

شهد: مدري شفت واحد عند الباب ما ميزت هو واحد من اخوانك والا لا بس معاه صندوق كبير شكلها هدية

شوي و يدخلون الشغالات و شايلين الصندوق الكبير و حطوه قدام سارة

البنات مو فاهمين شي و سارة متفاجأة

غدير سألت الشغالات: ايش هذا الصندوق؟

الشغالة: هذا هدية لسارة

غدير: مين جايبها

الشغالة: مافي معلوم

راحت الشغالة والبنات لسه متفاجآت و التموا على سارة: يالله افتحيها خلينا نشوف

فتحت سارة الصندوق و لقت ورقة كبيرة مكتوب عليها : إلى حبيبتي و عمري سارونتي بالعافية على قلبك التشوكلت و لا تعطين البنات منه هذا كله لك انتي بس

طالعت الصندوق و شافت جواته كله مليان تشوكلت و اشكال و الوان

أميرة: واااو شهد شوفي وش جايب عبدالرحمن لسارة عشانه يدري ان اكثر شي تحبه التشوكلت

شهد: مالت علي ما عندي عيال عم رومانسيين بروح ادور لي واحد منهم يمكن يحبني هههههههههههه

غدير: قولوا ما شاء الله لا تعطون اخوي عين , هههههههههه والله يا دحوم طلعت رومانسي من قلب

سارة انبسطت من حركة عبدالرحمن و البنات انواع التعليقات

سارة: طيب طيب تشوفون ما راح اعطيكم و لا حبة

البنات: لا لا خلاص توبة ما راح نعلق هههههههههههههههههههه

غدير: بنات انتبهوا لو دخلت علينا روان كأني انا اللي جايبة التشوكلت لسارة اوكي؟

أميرة: أي والله من جد لو درت وكالة رويترز تفضحهم ما يبقى احد ما يدري انهم يحبون بعض

ــــــــــــــــــــــــــــــــــــــــــــــــــ ـــــــــــــــــــــــــــــــــــــــ

بعد كم يوم كان أبو عبدالرحمن و عبدالرحمن جالسين بالصالة و يدخل عليهم فيصل

فيصل: السلام عليكم

ابو عبدالرحمن : وعليكم السلام

عبدالرحمن:و عليكم السلام و الرحمة, غريبة راجع بدري اليوم شكلك ما رحت للاستراحة

فيصل: أي والله ما رحت ما كان لي خلق و أحس اني حيلي مهدود قلت ارجع للبيت , وبعدين انت اللي غريبة وش مجلسك هنا بالعادة يا نايم هالوقت والا طالع

عبدالرحمن: والله أبد بس بغيت أبوي بموضوع

فيصل: وش الموضوع

عبدالرحمن: ما يخصك موضوع خاص فيني

ابو عبدالرحمن:ها وش القصة يا عبدالرحمن

عبدالرحمن: فيصل ممكن تطلع شوي

فيصل: وش دعوة ماله لزوم أطلع مصيري بعرف السالفة قولها الحين أحسن

أبو عبدالرحمن: عادي قول وش عندك

عبدالرحمن: يبه أبي اكمل نص ديني و اتزوج

أبو عبدالرحمن: ابشر و لا يهمك أول ما اشوف امك بقول لها تدور لك

عبدالرحمن: لا يبه البنت موجودة و انا مختارها من زمان بس كنت انتظر الوقت المناسب

أبو عبدالرحمن: من هي

عبدالرحمن: سارة

أبو عبدالرحمن: وش سارته

فيصل: لا تقول بنت عمي محمد الله يرحمه

عبدالرحمن: ايه سارة بنت عمي محمد الله يرحمه

أبو عبدالرحمن: صاحي انت اخطب لك بنت السورية , والله تبي تعرس اخطب لك أي بنت تبيها من هالعين قبل هالعين بس بنات محمد لا

عبدالرحمن: يبه انا ابي سارة بالتحديد ما ابي غيرها و بعدين هذا انت قلت بنت اخوك محمد يعني بنت عمي و انا اولى فيها

فيصل:من جدك انت تبي سارة سبحان الله دايم ما يعجبك الا الشي الخايس

عبدالرحمن: فيصل احترم نفسك لو سمحت و أظن هالموضوع بيني وبين ابوي لو سمحت لا تتدخل بشي ما يخصك

فيصل: اوهوو والله بعد ما يرضى ع المدام , آسفين و هذي حبة على هالخشم و لا تزعل علينا ( و ضحك ضحكة استهزاء ) هههههههههههه

عبدالرحمن: لا تتريق و يالله ضف وجهك

أبو عبدالرحمن: خلاص الموضوع انتهى تبي تتزوج ابشر بس بنات محمد نجوم السماء أقرب لك منهم

عبدالرحمن عصب و قام من مكانه: طول عمركم ظالمين عيال عمي محمد و هالشي بالذات انا بسويه هذا حلمي من زمان و ماراح اسمح لكم تخربون علي و بتزوجها ان شاء الله

وطلع من البيت

فيصل ابتسم باستهزاء: تكفى عاد حلمي هههههههههه اللي يشوف حلمه كأنه يتكلم عن نانسي عجرم مو سويرة , الا اقول يبه وش رايك اتزوج أميرة بنت عمي محمد

أبو عبدالرحمن: فيصل خلاص سكر السيرة ماني ناقصك انت ومزحك الثقيل

فيصل حس انها الفرصة المناسبة: يبه تراني صادق وش رايك اتزوج أميرة

أبو عبدالرحمن عصب: فيصل وبعدين معك حالفين اليوم تعصبوني انت واخوك

فيصل: يبه طيب اسمعني شوي

أبو عبدالرحمن: خير

فيصل: انا اتكلم جد اخطب لي أميرة خلني اتزوجها انا مو مثل عبدالرحمن يحب سارة وميت فيها ولو تزوجها يسلمهم الخيط و المخيط عاد تعرفهم هم ما يحتاج الطمع مالي عيونهم بس انا ما احب اميرة ولا اطيقها ,اتزوجها وذيك الساعة اقدر اكوش على كل شي و ارميها واتزوج وحدة تستاهل انها تكون في بيتي و وحدة مننا

أبو عبدالرحمن: والله فكرتك لو ضبطت لا بأس فيها بس ذولا شياطين انا ما قدرت عليهم ما ابيك تدخل معهم بمشاكل نهايتها ما يرضينا

فيصل : لا يبه وش دعوة انا تربيتك بتشوف والله لأوريهم الذل صح

أبو عبدالرحمن: وش استفدنا بكرة عبدالرحمن يقول وش معنى فيصل يتزوج منهم و انا لا و آخرتها يا يتزوجها يا يخرب علينا كل اللي بديناه

فيصل: لا يبه انا ما راح أخطبها الحين انت اخطب لعبدالرحمن اول و دبسه ببنت ثانية و ذيك الساعة انا أخطب اميرة

أبو عبدالرحمن: اصلا انت واثق انهم بيزوجونك

فيصل: ايه هين هذي اتركها علي

انتهى الجزء الرابع تتوقعون وش ناوي فيصل يسوي وياترى مخططات أبو عبدالرحمن و فيصل راح تنجح ؟؟
كل شي راح يبين بالأجزاء القادمة ان شاء الله

أتمنى منكم التفاعل و آرائكم و انتقاداكم وتوقعاتكم حول الرواية

دمتم بود

بارت مره قصير
بس فيه إحداث حلوه
توقعاتي ان فيصل بيتزوج
أمورتي أنا هع
وبتصير بينهم أكشنات وبالأخير بيحبها
اماسارونه ودحومي هم كناري الحب
هذا أخر رد لي
لأني مسافره غصبا عني
وربي مقهوره
في أمان الله