&&&&&&&&&&&&&
البارت الرابع عشر (اتمنى من كل قلبي ينال اعجابكم)
&&&&&&&&&&&&&&&&&&&
رجع البيت وهو يفكر قابلته شهد على الدرج:هلا والله بفصفص
كمل صعوده الدرج ولا رد عليها
شهد:وش فيه هذا
دخل غرفته ورمى نفسه على السرير وهو يحط يديه على عيونه ويضغط عليهم بقوه اليوم كان بالنسبه له يوم لا يمكن ينساه
قام وجلس ونزل غترته عن كتفه وصار يقول لنفسه معقوله اللي صار
قام يأخذ له شور وهو تحت الدش والماء الدافي رجع بذاكرته
وصلو ونزلوا وهم قريبين من الباب انفتح الباب بقوه وهم وقفوا مذهولين
عساف وهو واقف عند الباب وبصراخ:يا حيوانه
حنين من الخوف ولا إراديا خبت أختها وراها وتخبت وراء فيصل ومسكت ثوبه بيد ترتجف
عساف وهو يتقدم والغضب في عيونه و في يده العقال:تطلعين وتدشرين من وراي يا كلبه ياللي ما تربيتي
حنين بصوت خايف:مو انا اللي أدشر انا متربيه أحسن تربيه
وتقدم أكثر ومد يده بيمسكها واليد الثانيه بيضربها
فيصل مسك يده ودفه على وراء :حدك ويا ويلك لو تفكر تمد يدك عليها فاهم ولا لا
عساف وهو توه ينتبه على اللي معاها و بوقاحه:أكيد تدافع عنها مو انت البوي فرند
حنين بصراخ:قص يقص لسانك وش مفكرني صايعه مثلك ومثل أفكارك الوسخه
فيصل وبصوت غضب مكتوم علشان هم في الشارع:احترم نفسك لا تخليني أدفنك بمكانك الحين
عساف وهو معصب:ومسويه فيها شريفه وما تبغين تشتغلين عندي آثاري لك شغلك الخاص ...وهو يلتفت على فيصل:لا وبعد تعرفين تختارين النوعيه الزينه
أم حنين اللي قدرت توصل للباب بكرسيها المتحرك:شب ولا كلمه كله ولا بناتي انا اللي ربيتهم ..وتكمل وعيونها مليانه دموع:وتربيتي عمرها ما تنزل للأرض ابد
عساف بضحكه سخريه:ههههههههه روحي أنتي وتربيتك البنت تسرح مع الحبيب بس عساه دفع لك سعر زين
ما حس إلا بالبقس على وجهه و طايح على الأرض
فيصل وعيونه كلها شرر وبعصبيه وبصوت عالي:والله اللي ما ينحلف بغير اسمه ان ما مشيت لأكون قابرك بمحلك ومخليك عبره يالواطي
عساف وهو يقوم وماسك فكه ويمشي:انا اوريكم انا أعلمكم ...وركب سيارته ومشى بسرعه مخلف وراه غبرة الشارع
أم حنين بصوت ضعيف يعبر عن العجز:ادخلي يا بنتي ادخلي
حنين وهي بتدخل وتنزل لمستوى أمها وصارت تمسح دموعها:لا تبكين يالغاليه انا رفعت الدعوى وقريب بنتخلص منه
أم حنين وهي تمسح على رأس بنتها :حسبي الله عليه فضحنا عن كل الجيران وش بيقولون عنا الحين حسبي الله عليه
حنان :يمه احنا ما سوينا شي غلط
أم حنين :ادري بس الناس مالهم إلا الظاهر وأكيد سمعوا كل الكلام اللي قاله عساف عسى ربي لا يوفقه
حنين:يمه وش هالكلام
أم حنين تنهدت :محنا بناقصين عجن الناس فينا
حنان:وش علينا من كلام الناس يمه كلام الناس لا يودي ولا يجيب
أم حنين دمعت عيونها:يا بناتي ما ابغى احد يجيب سيرتكم بالعاطل والهوشه والكلام اللي صار أكيد بيطلع من وراه
قصص وبلاوي كثيره
فيصل كان طول الوقت مجرد متفرج وسامع وساكت ولما تكلم قال أول ما خطر على باله وهو يتقدم من الباب اللي جالسه عنده الخاله أم حنين
فيصل :خالتي معاها حق الواحد ما له إلا الظاهر والبني ادم ماله إلا سمعته
الخاله أم حنين نزلت عيونها وهي تهز راسها والبنات سكتوا
فيصل قطع الصمت: خالتي يشرفني اطلب القرب منكم وش قلتي
الكل تفاجأ ورفع رأسه
الخاله أم حنين المفاجاه سكتتها وما عرفت وش ترد
البنات صاروا يطالعون بعض
فيصل :خالتي لي الشرف إني اطلب يد بنتك حنين واوعدك إني أحطها وأحطكم في عيوني
حنين طلعت عيونها وأختها حنان تناظرها بذهول
التفتوا على امهم اللي ردت عليه:يا وليدي والله مدري بس إذا كان علشان سالفة كلام الناس.....
ويقاطعها فيصل :لا يا خاله مو السالفه كلام الناس انا اللي ابغى أناسبكم إلا إذا كنت فيني عيب أو
الخاله تقاطعه:لا والله يا وليدي انت كامل والكامل الله ورجال والنعم فيك بس....وسكتت وهي تطالع بنتها حنين
حنين طالعت أمها وبين على وجهها الضيقه
فيصل:من حقكم يا خاله تفكرون وتسالون وإذا وصلني الرد ووافقتوا انا راح أجيب الأهل ورقمي تلقينه مع الانسه حنين
طلع وتركهم على حالهم يطالعون بعض بدون أي ردت فعل
&&&&&&&&&&&&&&
دخلوا البيت بعد ما تعشوا وتكلموا كثير
عبير:بكره لازم نروح لامي
سحر:من عيوني ان شاء الله
وقفهم صوت أبوهم
ابو خالد:بدري كان تاخرتوا أكثر
التفتوا لأبوهم اللي كانت ميساء واقفه وراه وتبتسم بانتصار
عبيروهي تطالع ساعة يدها:يبه تو الساعه 8
ابو خالد:لا والله ان شاء الله كنتي تبغين تقعدين أكثر من كذا المفروض بعد المغرب رجولكم ما تعتب برا البيت
عبير:بس ...وسكتت وهي تلتفت على سحر اللي مسكت يدها وضغطت عليها
سحر:آسفين يبه وان شاء الله ما تتكرر
عبير استغربت بس سكتت وهي ناويه تعرف ليش سحر اعتذرت وبسهوله ولا حتى ناقشت مو من عوايدها
ابو خالد:بنشوف
سحر:عن إذنك..ومسكت يد
عبير وصعدوا لفوق
ميساء بقهر:هذا اللي طلع معاك هوشه بسيطة
ابو خالد:وش تبغين أسوي لهم اذبحهم يعني وبعدين معاهم حق تو الناس
ميساء:الواحد لازم ينتبه على بناته زين ويضغط عليهم علشان ما يغلطون بكره
ابو خالد بعصبيه:ما هو بنات عبدالمحسن اللي يغلطون هو صدق انا ما ادري عنهم وما اقعد معاهم كثير بس متأكد ان بناتي يعرفون الصح من الغلط
ميساء حست انها غلطت وخلته يعصب قربت ومسكت يده:حبيبي انت فهمت غلط بس انا خايفه عليهم
ابو خالد:ماله داعي خوفك
ميساء:طيب حبيبي انت الحين مو زعلان صح ما راح تزعل من ميسو
ابو خالد بابتسامه:فديت ميسو أكيد لا
ميساء بدلع:حبيب قلبي انت
ابو خالد :ما أنحرم من هالوجه القمر ابد
&&&&&&&&&&&&
أول ما دخلوا الغرفه
عبير:أول مره أبوي يسال وين رحنا وليه تأخرنا
سحر وهي تفسخ عبايتها :هي اللي قالت له وعبته من جهتنا
عبير شهقت:هالمعفنه صدق تقهر ..والتفتت على سحر باستغراب:بس أنتي غريبه اعتذرتي
سحر:انا فاهمه حركاتها هي تبغى تصير مشاكل بينا وبين أبونا وآنا مستحيل أحقق لها اللي في بالها
عبير:اها الحين فهمت والله انك مو هينه يا أختي
سحر وهي تبتسم بمكر:ما بعد شفتي شي
عبير بإحراج:أقول سحوره ...يعني يصير..أنام عندك
سحر:أكيد وبعدين أنتي ليه تظنين إني ممكن أخليك تنامين لحالك
عبيروهي تضم أختها:يخليك لي يارب
سحر وهي بدورها تضمها:ويخليك لي أنتي بعد
&&&&&&&&&&&&
لبست بجامتها وراحت لغرفة إخوانها تتطمن عليهم قبل لا تنام
دخلت غرفتهم ولقتهم نايمين باستهم على روسهم
الجوهره:ياربي مو قادره اطلع هالطلال من تفكيري يالله هو مو هين صحيح انا تعودت أواجه وما اخاف بس مو هالنوع من المواجهات بعد أسبوع راح يكون زوجي يالله يا كبر هالكلمه إذا كانت الكلمه بروحها تخنقني كيف هجل الواقع يعني أعيش معاه في مكان واحد في بيت واحد وأنام معاه في مكان واحد
زفرت بقوه وحست بيد على كتفها:ميري
ميري:ايش في ليه ما في نوم
الجوهره بابتسامه:ولا شي
ميري:انت فكر في هزا يوم ملكه انت في كوف
الجوهره:لا
ميري:ما في كوف ان شاء الله كل شي امشي تمام
الجوهره تنهدت: الله يسهل ... يله تصبحين على خير
ميري:انت شوف خير ان شاء الله
وطلعت وراحت غرفتها وهي راح تحاول تنام وتطلع كل الأفكار من راسها
&&&&&&&&&&&
شمس الصباح
في كل صباح تشرق الشمس
لتنهي كل ما صار في الليل من همس
وتعلم انتهاء الأمس
وبداية يوم جديد كله انس
سحر بصراخ:عبير اصحي ..اصحي يا دبه
عبير:هممهم وش فيك
سحر :صباح الخير يله اصحي
عبير: ليه اصحى وآنا ما عندي محاضرات خليني أنام
سحر :علشان كذا اصحي لأنك بتروحين معاي
عبير وهي تجلس وباستغراب:وين
سحر وهي تعدل بلوزتها:الشغل
عبير طلعت عيونها:ايش
&&&&&&&&&&
قاعدين على الطاوله ويفطرون والسوالف شغاله بينهم
أم عبدالمجيد:ها يا بنيتي اليوم بتروحين السوق
الجوهره:ايه ياخالتي يالله يمديني اخلص أغراضي واشتري لنوف فستان ودلول معانا بعد
ماجد بحالميه:هو دلول بتروح
عبدالمجيد بكوعه في خصر ماجد :أثقل
ماجد:ما قلنا شي
الجوهره وهي ماسكه ضحكتها:ايه بتروح
ماجد:قولي لها تشتري فستان احمر يعبر عن الحب و....يمسك خصره:أي
عبدالمجيد:أقول قم نروح الشغل
الجوهره وام عبدالمجيد:ههههههههه
ماجد وعبدالمجيد يحبون رأس امهم:مع السلامه
شوي ويرجع ماجد ويطل من الباب:الجوهره لا أوصيك احمر
الجوهره:ههههههه طيب
أم عبدالمجيد تهز راسها :الله يهديك يا وليدي ويثبت عقلك
ويرن جوال الجوهره
الجوهره:هلا والله
دلول:صباح الخير يا عسل
الجوهره:ههههه صباح النور والسرور
دلول:ها أخبارك جاهزه للشوبنق ترى العصر بمر عليك
الجوهره:لا لا انا اللي بمر عليك
دلول:اوكي
الجوهره:يله بروح اخذ لي قيلوله
دلول:طيب بروح أعذب علوي شوي قبل ما يروح المدرسه
الجوهره:ههههههه اوكي
دلول:باااي
الجوهره:باااي
&&&&&&&&&&&&
صحى شاف اللي جنبه زي العاده يضيق ويسكر ويقضي الليل ما يدري عن نفسه و يصحى الصبح جنبه وحده ما يعرفها قام وخذ له شور وطلع لسعد
سعد:ها أخبار المزاج
خالد:زفت
سعد:حتى بعد وناسة أمس
خالد:اففففف أحس راسي ثقيل
سعد:ههههه ثقلتها أمس بقوه
خالد :أقول سعد ابغى سيارتك
سعد:تحت أمرك بس وين سيارتك انت
خالد:بتعطيني إياها ولا لا
سعد:خلاص يا أخي ما قلنا شي أخذها
خالد :مشكور
سعد:يله قوم خلنا نفطر ترى بموت من الجوع
خالد:يله
&&&&&&&&&&&&&
وقفوا عند باب المؤسسه
عبير:يالله منك يا سحر والله مو عدله
سحر وهي تنزل:أقول انزلي تراكي ذبحتيني انزلي بس
عبير وهي تفتح الباب وتنزل وتلحق بسحر وتوقفها عند باب المؤسسه:والله مو عدله إني أجي معاك وش كبري وأجي معاك لمكان شغلك والله فشيله
سحر تمسك عبير وتسحبها معاها :أقول يله وبعدين انا قلت لك انا بكلم المدير وما راح يصير أي مشاكل
عبير وهي توقفها عند الاصنصير: يالله منك ليش جبتيني معك والله فشيله
سحر :يعني شنو تبغيني أتركك لحالك مع هالميساء و أنتي موقدها
عبير سكتت لأنها عرفه ان أختها معاها حق وهي موقد ميساء
دخلوا الاصنصير ووصلوا للمكتب
دخلت سحر:صباح الخير
ساره:هلا والله وغلا بالطش والرش وماء الورد المرشرش
ونوره:صباح النور
سحر وهي تلتفت على وراء وتدور عبير اللي وقفت عند الباب
طلعت ودخلت المكتب مره ثانيه وهي ماسكه عبير
سحر:بنات أعرفكم أختي عبير راح تقعد معاي اليوم ....وتكمل بكذب:لان الوالده مره تفكيرها قديم وتقول بتطمن علي خلت عبير تجي معاي مكان شغلي عاد تعرفون تفكير كبار السن
ساره وهي تقوم وتسلم على عبير:المهلي ما يولي هلا والله
نوره :مرحبا فيس بينا
سحر:أعرفك هذي ساره وهذي نوره
عبير:آهلين
ساره بهبل:نوره شوفيها يا لبيه تهبل والله
نوره:الحمد لله والشكر بس .....وهي تبوس يدها
عبير ابتسمت عليهم وحست انها ارتاحت لهم وكلام سحر عنهم صحيح
جلست وجلست عبير جنبها وطلعت الملفات تشيك عليهم
سحر وهي تقوم:انا بودي هالملفات وارجع اوكي
عبير بهمس:طيب
سحر وهي تلتفت لساره ونوره:بنات ترى عبير من النوع اللي يستحي حتى من ظله لا أوصيكم
ساره وهي تضرب صدرها:افا عليك ازهليها يا مال العافيه
سحر ابتسمت وطلعت
ساره وهي تقوم وتجلس على مكتب سحر:أقول عبربر أنتي تدرسين
عبير:ايه دراسات إسلاميه
ساره :اكشخ يعني مطوعه
نوره:يالخبله تقول لس دراسات إسلاميه مو مطوعه يالمفهيه
ساره:ايه يعني مطوعه أقول عبربر وش رايس تجين عندنا في الديره هناك عندي صخله مرضانه ما ادري وش فيها تعالي اقري عليها
عبير تحاول تكتم ضحكتها:ههههههههههه
نوره:صخله في عينس والله انس رايحه فيها
ساره:تعالي عندنا الديره واقري عليها وعطيها كم ضربه بالعصا كود الجن اللي فيها يطلعون
عبير:ههههههههههه
نوره:والله ان كان في واحد يبغاله ضربه فهو أنتي يضربونس على راسس الغبي كود تصيرين ذكيه بدل هالغباء
ساره بهبل:ترى انا كنت ذكيه بس وآنا مره ماشيه في الشارع جاتني ضربه على راسي بالكوره من عيال الحاره واستغبيت بعد كذا
نوره:رحم الله امرئ عرف قدر نفسه الحمد لله اعترفتي بلسانس انس جبل من الغباء
ساره:يا لبى قلبي حتى وآنا غبيه أهبل
عبير:ههههههه
عبير في نفسها:والله سحر معاها حق هالثنتين تحفه
&&&&&&&&&&&&&&&
وصلت مكتبه طقت الباب
تركي:تفضل
سحر وهي تدخل:صباح الخير
تركي رفع عينه وبابتسامه:صباح النور
سحر تمد له الملفات :تفضل
تركي خذاها وهو مستغرب:أنتي خلصتيها
سحر :ايه
تركي:أنتي عندك ظروف كان خليتي أي احد ثاني يسوي الشغل عنك
سحر:ماله داعي
ولفت بتطلع بس وقفت
تركي:في شي
سحر وهي تطالع الأرض ومتوتره:انا اضطريت أجيب أختي معاي الشغل
تركي:وليه ما حطيتيها في حضانه ممنوع احد يجيب أطفال على الدوام وأنتي عارفه النظام
سحر بسرعه:لا هي مو صغيره هي ...هي..عمرها كبير هي في الكليه
تركي رفع حواجبه ومتفاجا:ايش قلتي في الكليه و جايبتها هنا
سحر بنبرة ضيق ما فاتت تركي:كنت مضطره
تركي :شلون يعني مضطره
سحر طالعته وما ردت
تركي حس السالفه كبيره:انسه سحر في شي تبغين تقولينه
سحر طالعته ومبين عليها التردد
تركي قام من مكانه ووقف قدامه وبصوت حنيه:سحر فيك شي
سحر طالعته:مصيبه
تركي عقد حواجبه:وش صاير
سحر وهي تتلفت :ما ادري وش أقول لك بس ما ينفع اقولك اللي ابغاه هنا ما يصلح اقعد اسولف لا احد يلاحظ
تركي:طيب تبغيني اتصل فيك
سحر :لاما ينفع على التلفون ممكن...وبتردد تكمل:إذا ما فيها إزعاج ...يعني اشوفك بعد الدوام
تركي:وين
سحر:بالمطعم (...)
تركي:خلاص ماشي
سحر:مشكور تركي
وطلعت وتركته يفكر وش ممكن يكون اللي صاير
&&&&&&&&&&&
جاء وقت الظهر والكل طالع للغداء
طلال وحمد وهم يسولفون
حمد:أقول لا تلعب علي شايفني غبي عندك الغداء عليك يعني عليك
طلال:هههه لحول يا أخي قدر انا كم يوم وأتملك وأنت مستبخل علي حتى تغديني
حمد :طير يا شيخ من يوم وافقوا عليك وآنا كله أملئ كرشك بهالعزايم
طلال وهو يقطع الشارع :لا تمنن علي بهالعزايم البسيطه
حمد:انا أتمنن ..ويوقف كلامه وهو يصرخ :طلال انتبه .... التفت طلال وشاف سياره جايه اتجاهه وبسرعه كبيره وما حس إلا باللي يسحبه بعيد عنها ويطيح هو وياه على الرصيف
و السياره تكمل مشي على سرعتها
حمد :انت بخير صار لك شي
طلال وعيونه على السياره اللي اختفت:لا ما صار لي شي وأنت
حمد:لا... وقاموا
طلال:كان يبغى يموتني
حمد: من تقصد
طلال: انت تعرف انا اقصد من ولد عمك خالد في احد غيره
حمد سكت وما رد عليه
طلال:والله لأعلمه شغله بس خلني املك وحسابه معاي بعدين
حمد:المهم انك بخير يله
طلال:يله
حمد يرفع الجوال ويتصل:الو مكتب الحراسات لو سمحت ابغى 4 رجال حماية – ايه - بودي غارد
طلال التفت له:ماله داعي
حمد:لحظه....ويكلم طلال:إلا له داعي وما ابغى اسمع ولا كلمه ولا ترى والله لأخرب عليك يوم ملكتك وما أخليك تعرس ابد
طلال ابتسم بخفه وسكت
حمد وهو يرجع يكلم بالجوال:ايه معاك حمد مبارك ذياب – بأسرع وقت – ماشي
صكر جواله :اليوم بيكونون عندك وما ابغاك تطلع إلا هم وياك إذا كان لي غلاه عندك تسوي اللي أقوله لك
طلال طالعه وما رد عليه
&&&&&&&&&&&&&
26-01-11, 04:54 PM
جديد مواضيع قسم القصص المكتمله من وحي قلم الاعضاء
العرض العادي
