الجزء الثالث عشر :~

( أمـــــــــــــي )
أمي في لحظة تشعرين أنك شخص في هذا العالم ,, بينما هناك شخص يشعر أنكِ العالم بأسرة..





تعالت أصواتهم حتى عانقت النخيل الشامخه ,, أما هي فقد جلست تداعب طفلها " خالد " بحنان بالغ علـّها تلهي نفسها عن ما تفعله تلك الفاتنة المشاغبه ,, اقترب و شاركهم مجلسهم ,, علمت هي بذلك عندما ملأ صوته الأجش أرجاء المزرعة ( ياااااا ولد ) ,, أسدلن أغطيتهن و رددن أخواته و زوجات أخوته عليه بترحيب ,, ثم بادلنه بسؤال عن الحال و قد استقر في صدر المجلس ..
بينما هي رفعت رأسها لتسرق نظرة عليه قبل أن تبدأ تلك الصبية بألاعيبها !!
رأتها تطبع قبلة على خده الأيمن ,, أطرقت هي رأسها بسرعة حتى لا تكمل المشهد الدامي للشعور ,, ثم حركته يمنة و يسره علّ ما شاهدته لا يترجم الى الدماغ ..
فتكلمت تلك الحبيبة " منيرة " معاتبة ( أبو محممممد ) !!!
و لكنها لم تلبث حتى سمعته يثبت ما رأته بدبلجة قاهرة بمعنى الكلمة عندما قهقه بحب و هيام لتلك الفاتنة و رد مازحا ( هذولي الشاميات ميب مثلكن يالسعوديات )
صاح طفلها و كأنه أحس بحجم القهر الذي ضجت به أضلاع والدته ,, فأشغلت هي نفسها بتهدئته و همس قلبها " يا ربي إني سائلتك إنك تنزع حبه من قلبي "
هو دائما كذلك ,, قاسيا لا يعبأ بآلامها ,, همه الأول و الأخير إشباع غرائزه ..
تزوج من تلك الشامية " فاتن " التي لم تكمل الاثنان و العشرين ربيعا و هو في الأربعين من عمره ,, أغدقها بالكثير من الحب و الأكثر من المال ,, أعطاها فلم تشبع و فضلها فلم تهجع ,, لم تكتفي بليلتها بل صالت وجالت حتى عرف عن أبو محمد أنه زوجا لفاتن وحدها ,, لم تكل و لا تمل حتى رأت هجرانه لتلك الشريكة ,, ثم أعطته بعضا مما عندها و أعطاها كل ما عنده حتى نفذ ما معه من مال و بقايا كرامة و أفضلت قسوته و كرهه لجنسنا نحن النساء ..
أما " موضي " فقد آلمها هجره لقلبها قبل أن يهجر بيته ,, و لكنها احتسبت أجرها عند الله ,, فكأن ربي وسعها برحمته و لبى دعائها من بين تلك النخيل (يا ربي إني سائلتك إنك تنزع حبه من قلبي ) و نزع حبا مؤلما من بين حناياها فاستكانت حتى عاد اليها خائبا فضمدت جروحه و نسيت جروحا غائرة في جوفها ..
عاد اليها بعد أن تركته " الشامية " لأن سببها في الزواج منه قد زال فقد خسر ما معه من مال لأن الجراد قد أكل محصوله فأصبحت أرضا خاوية ,, فـــــــــــكره بلاد الشام بمن فيها !!!
وافق على طلاقها بشرط أن تترك ابنتها له ,, فذهبت تاركة خلفها طفلتها ذات العامين و كأن حنان الأم قد نزع من قلبها ,, فباتت تلك الطفلة يتيمة بلا أم و لا رحمة أب !!
استقبلتها " موضي " و أغدقتها حباً لم تعرفه تلك الطفلة من أمها التي انشغلت عنها بتدبير الآلام لشريكتها ...
" هذه رحمة البشر فكيف برحمة رب البشر "


من طلع عبدالرحمن من الغرفه و أنا أسترجع كلامهم عن أمي "الشامية " ,, كان كل واحد منهم يعطين معلومه عن أمي ,, هدى و محمد و أسماء و عبدالرحمن و عمتي منيره و حتى دلال مرت خالي فهد الشامية ,, إلا أمي موضي عمره ما تكلمت به و دائم اذا سألته تتنهد و تقولي بصوته الحبيب ( الله أعلم بالخفايا يا ميمتي ) ...
مجرد ذكر الشامية بأي سالفه يتبعه سيئه من سيئاته ,, كان كل واحد منهم يتذكر مواقفه السيئه معه و ما يسكتهم إلا عتب أمي موضي و استغفاره ,, تمنيت أسمع أحد منهم يمدحه ,, الكل أجمع على انه كائن مجرد من الانسانية أو حتى جماد ..
ما حسيت الا بإيد انمدت و مسحت دموعي ,, رفعت راسي من سجادتي و شفت فطوم ,, مسحت دموعي بأطراف أصابعي و تكلمت معه : فطوم ماما ليش صاحية ..
حطت ايده على كتفي و تكلمت : خاله لا تصيحين أنا بكرى أعـلـم أبــوي على خـ....ـالي عبدالـ..ـرحمـ....ـن .. و ضاعت حروفه مع دموعه .
سحبته و ضميته لصدري و بديت أكلمه و أنا أسمع شهقاته : لا يا ماما ما يصير نقول لأحد عن اللي صار ,, عارفه فطوم خالي عبدالرحمن تو جاء و قالي أنا آسف رونق .
رفعت راسه و كأنه مستنكره : بس هو ضربتس قوه حتى أنا أوجعتن ايديني منه .
شددت من ضمتي له و تكلمت : يا حياتي أنتي قولي بسم الله و تشوين !!
: فطوم أنتي هنا !!!
رفعت راسي لهند ,, كانت عيونه مورمه و باين انه تعبانه من الصياح ,, حتى صوته يتهدج و هي تحكي ,,
نزلت راسه و مشت بخطوات متردده متجهه لسجادتي ,, ما أخذت وقت و هي متجهه ناحيتي لأن غرفتي صغيره نوعا ما ,, جلست على الأرض بجنب السجاده بينما أنا منسدحه و معي فطوم ...
تكلمت هند بصوت متردد : سامحين و الله إني عجزت أثنيه عن رايه !!
رديت بعد تفكير : وش دراتس يمكنه خيره !!
هند و صوته بدأ يتهدج : أي خيره يا شيخه !!
أنا : لهالدرجه تكرهين أمي !!
ردت هند بسرعه : أصلا ما أعرفه !!!
و كملت : بس اللي يسويه عبدالرحمن يقهر قهررر ...
فطوم : خاله هند ترى خالي عبدالرحمن قال لخاله رونق آسف ...
رفعت هند عيونه لي تدور عن أي شي يخليه تصدق اللي تسمعه لكني ابتسمت ابتسامة قهر و أنا أتخيل عبدالرحمن يعتذر ..
هند : الله يهديه بس !
و نزلت راسه و باست راسي و كملت : رونق رددي معي " اللَّهُمَّ أَنْتَ تَحْكُمُ بَيْنَ عِبَادِكَ فِيمَا كَانُوا فِيهِ يَخْتَلِفُونَ ، لا إِلهَ إِلَّا اللهُ الْعَلِيُّ الْعَظِيمُ ، لا إِلهَ إِلَّا اللهُ الْحَلِيمُ الْكَرِيم سُبْحَانَ اللهِ رَبِّ السَّمَواتِ السَّبْعِ وَرَبِّ الْعَرْشِ الْعَظِيمِ ، الْحَمْدُ للهِ رَبِّ الْعَالَمينَ ، اللَّهُمَّ كَاشِفَ الْغَمِّ مُفَرِّجَ الْهَمِّ ، مُجِيبَ دَعْوَةِ المُضطَرِّينَ إِذَا دَعَوْكَ ، رَحْمنَ الدُّنْيَا وَالآخِرَةِ وَرَحِيمَهُمَا فَارْحَمْني في حَاجَتي هذِهِ بِقَضَائِهَا وَنَجَاحِهَا رَحْمَةً تُغْنِينِي بِهَا عَنْ رَحْمَةِ مَنْ سِوَاكَ "
كنت أردد معه كلمه كلمه و كأني أول مره أسمع هالدعاء ,, بس لااااا هالمره كان وقعه على نفسي غييييير ,, هالمره كان قلبي يهمس به قبل شفايفي ,, و دموعي شاركنّن حسيت بمدى ضعفي كإنسان قدام هالمشاكل ...
فطوم : خلاص لا تصيحين تكفييييين ...
هند : قومي نامي و ارتاحي ...
قمت من مكاني بمساعدة فطوم و انسدحت على فراشي أنا و فطوم ,, غطتنا هند و تكلمت قبل تطلع : لا تفكريين الحين بشي ,, لا أوصيتس عليه يا فطوم ..
فطوم : ان شاء الله .
طلعت هند و غرقت بهواجيسي ,, و ما انتبهت الا على صوت فطومتي ...
فطوم : لا تفكرين بشي ناااااااامي .
ابتسمت ابتسامه باهته و ضميته و رديت : يله ننام .
ــــــــــــــــــــــــــــــــــــــــــــ

العشاء - ندى - الساعة عشر و نصف .
ضغطت على زر الاتصال بعد ما اخترت اسم " رونق " و انتظرت الرد...
انتظرت أسمع صوت الحبيبه رونق ,, لحظات و وصلن صوت الـ نـــعــــم ,, لكنه هالمرة غريبه ,, نزلت الجوال و ركزت بالاسم اللي على الشاشة ,, رونق أكيد هذا جوال رونق ,, رفعته لمستوى أذني و ما سمعت غير تنفس سريع ,, تجرأت و تكلمت : ألووو ....
وصلن صوت غاضب : أقسم بالله يا ندى لو انتس تحت ايدي كان عرفت أربيتس ..
ما استغرقت غير ثواني حتى عرفت الصوت ,, انشلت ايدي و أنا أسمع كلامه و أستوعبه ,, هذا خالي عبدالرحمن ,, و أنا كلمت على جوال رونق ,, يعني ..... شـــ.....ــــاف الجوال ..
طاح الجوال من ايدي و طلعت بسرعه من الغرفه ,, وصلت للدرج و أنا ألهث من الخوف و التعب ,, قلبي بياكلن على رونق ,, بقول لأمي لا وش أقول لأمي أقوله إننا عطينا رونق جوال و إن خالي عبدالرحمن شافه لا لا قوه صعبه ...
: ندى وش بتس تعبانه ؟؟!!!!
رفعت راسي لنادية أختي و أنا أفكر ,, وش اللي صار لي ياربي ,, حاسه اني خايفه على رونق يا ربي لا يذبحه خالي عبدالرحمن ,, وش أسوي , وش أسـ ...... فيصل إيه فيصل هو الوحيد اللي يعرف بالجوال غيري أنا و أمجاد .
نادية : ندى جوالتس يرن وش بتس ؟!!
من سمعت صوت نادية تحركت من مكاني و اتجهت لغرفتي أركض ,, أخذت جوالي و ضغطت على زر الرد وتكلمت : أمجااااااد إهئ إهئ .
أمجاد : وش بتس بسم الله ؟؟!
أنا : إهئ إهئ .
أمجاد : ندى تكلمي وش بتس ؟؟
أنا : خالي عبدالرحـ...ـمـ....ـن شـ.......ـاف الجوال !!
أمجاد : هاااااه .
أنا : وش نسوي أخاف يذبحه خالي ؟؟؟
أمجاد : و أنتي وش دراتس ؟
أنا : دقيت و رد علي خالي عبدالرحمن و كان معصب ...
تنهدت أمجاد و ردت : لا حول و لا قوة الا بالله ,, تدرين أبقول لأبوي !!
أنا : لاااا أنتي صاحيه و الله لو يدري خالي محمد كان ذبحنا , أنتي قولي لفيصل هو اللي يعرف بسالفة الجوال ..
أمجاد : ايه صح هذي وشلون فاتتن !!!
أنا : طيب خلاص كلميه الحين و ردي لي ..
أمجاد : خلاص مع السلامة ..




أمجاد ....
سكرت من ندى و كلمت على أخوي فيصل ,, كنت أكلم و أنا أدور بالغرفه ,, خايفه و متوتره و كل شي ,, ما مر الا ثواني و سمعت الرد : إن الهاتف المطلوب لا يمكن الاتصال به الآن ..............
تأففت بقهر و تحلطمت : هذا وين راح أوووووف !!
عدت الاتصال و نفس الشي ,, يا ربي وين راح ,, ما فيه إلا أروح أسأل أمي عنه ,, طلعت من غرفتي و اتجهت لتحت ,, دخلت الصالة و لقيت أبوي ,, اتجهت له و حبيت راسه ..
أنا : وش أخبارك يبه ؟
أبوي : بخير الحمد لله ,, وراتس تركضين ملحوقه ؟
رديت بارتباك : هاه لا بس .... وين أمي ؟
رد علي أبوي و هو يرفع صوت التلفزيون : بالمطبخ ,, و التفت يهاوش عبدالله و نوف : أوووص أنت وياه .
اتجهت للمطبخ و دخلت على أمي ....
أنا : يمه وين فيصل ؟؟
أمي : وش تبين به ؟!!
أنا : أبيه شوي ,, وينه ؟؟!!!
أمي : أماوه طالع اليوم للبر .
أنا : كييييييف !!!
و كملت : يمه طيب ليش ما يرد على جواله ؟؟
أمي : كاشتين بمكان بعيد و الجوال ما يوصل هناك ..
أنا : أوهووووه يا ربي وش أسوي ؟؟!
التفتت أمي علي و ردت : وش تسوين بإيش ؟؟!!!
قمت و رديت : و لا شي خلاص .
سمعت صوت أمي و أنا طالعه : أنتي منتب طبيعيه اليوم ...
وقفت و التفت على أمي : ما بي شي بس لااا لااااااااا ما بي شي ....
أمي : لا ترقين اصبري شوي و نتعشى .
أنا : ما أبي شي أبروح أنام .
ـــــــــــــــــــــــــــــــــــــــــــــــــــــــــــ
الثلاثاء - مي - الساعه 11 بالليل ..
خلصنا من الطواف و مشينا متجهين لباب الملك عبدالعزيز طالعين من الحرم ,, كان تركي مستعجل بمشيته و أنا أمشي وراه و كل فتره و الثانيه يلتفت يتأكد إني معه ,, كنت أمشي جسد بلا روووووح من يوم سمعت بخبر مرض أسماء و أنا موب طايقه الدنيا بكبره ,, دموعي ماليه وجهي و قلبي ياكلن عليه ,, خايفه يصير له شي ,, خايفه عليه و الله خآآآآآآيفه ....
: رونـ .... قصدي مي اشربي من ماء زمزم ...
رفعت راسي لتركي و أنا أتجاهل الإسم اللي سبق اسمي ,, خلاص تعودت عليه كل ما بغى ينادين ناداه هي بالغلط ,, أنا عارفه إن قلبه مع رونق بس ما بيدي شي أسويه عشان يحبن ,, ما أقدر أتحكم بقلبه ,, حتى قلبي اللي مال له عجزت أحاول أصده بس ما قدرت ,, و الله حبيته ,, إيه حبيته غصبن عن ,, هو اللي عاملن باحترام و أجبرن على حبه ,, حتى أنا ما قصرت معه بس قلبه عند رونق موب عندي !!!
مد لي تركي كاس ماء : اشربي و تعوذي من الشيطان ,, ان شاء الله إنه تبي تقوم بالعافيه ..
أخذت الكاس من ايده و سميت بالله و شربته ,, تمنيت من ربي إنه يجعل به شفاء صدري من الهموم و من الذنوب ...
طلعنا من الحرم متوجهين للفندق كان بالي مع أسماء ,, لا زم أروح أشوفه لازم ....
أنا : تركي .
تركي : هلا .
أنا : أأأ... خلنا نرجع للقصيم ..
تركي : ما صار لنا اسبوع وش تــ...
قاطعته : تركي الله يخليك و الله ما أقدر أقعد و أسماء تعبانه ..
تركي : طيب نصبر لين نصلي الجمعة و نمشي ..
أنا : بس أســمـ...
قاطعن تركي : وش تبي تسوين له يعني ,, اجلسي هنا و ادعيله ..
تنهدت و رديت : طيب.... بس ترا أباخذ له ماء زمزم .
تركي : إن شاء الله .......
ــــــــــــــــــــــــــــــــــــــــــــــــــــــــــــ ـــــــــ
يوم الأربعاء - هند - الساعه 8:5 الصبح
تحركت من مكاني و أنا تعبانه ,, حاسه راسي مصدع ,, طول الليل و نومي متقطع ,, التفت أشوف عبدالرحمن لكن ما لقيته بمكانه ,, طول الليل و هو يتقلب باين انه ما نام حتى يوم طلع يصلي الفجر ما رجع ,, قمت و غسلت و دخلت لغرفة عزوز ,, تطمنت على البزران ,, كانوا كلهم نايمين ,, نزلت تحت و اتجهت لغرفة رونق ,, دخلت عليه و لقيته قاعده على سجادته و ما انتبهت لي ,, قربت له و حبيت راسه ,, رفعت راسه لي و ابتسمت لي ابتسامه باهته ,, جلست قباله على السجاده و حطيت ايدي على ايده ..
و همست له حتى لا تقوم فطوم : وش أخبارتس ؟!!
ردت رونق بهدوء : بخير الحمد لله ..
أنا : شكلتس ما نمتي ..
رونق : أنام و أقوم ... و سكتت شوي و كملت : الحمد لله على كل حال استخرت و ربي يبي يكتب لي الخيره ان شاء الله .
أنا : ربي عنده الفرج بس لا تضيقين صدرتس ..
رونق : يا ربي لك الحمد ... نزلت راسه و رجعت رفعته : تراي جوعانه ..
أنا : يخسى الجوع الحين أسوي القهوه و الفطور ..
قمت و رحت للمطبخ و سخنت الماء و سويت القهوه و الشاهي ,, سويت فول و بيض و طلعت نواشف ,, شوي الا و تدخل علي رونق ..
رونق : أساعدتس بشي ..
أنا : لا تتعبين نفستس ما بقى شي قضيت ..
رونق و هي تجلس على الكرسي : خلين أسوي أي شي المهم أشغل نفسي و ما أفكر .
شلت قدر البيض و الخبز و حطيتهن على الطاوله : أجل خوذي سوي للبزران سندويشات ..
بدت شغله و هي باين عليه انه تحاول تطرد أي تفكير بالموضوع ..
ـــــــــــــــــــــــــــــــــــــــــــــــــــــــــ
الأربعاء - الظهر - أسماء
فكيت نقابي بعد ما طلع الدكتور ,, كنت متمدده على السرير و أفكر بسلطان غريبه اليوم تأخر ,, هو يدري إن عندي جلسة علاج اليوم بما إن علاجي يوم من ورى يوم ,, و اليوم اللي ما يكون فيه جلسة علاج يجيب بناتي معه أما اليوم فيبي يجي لحاله ,, يعني ما عنده البنات يأخرنّه ,, تنهدت و همست : يا ربي إنه يكون بصحه و عافيه ..
: السلام عليكم ..
التفت لأغلى صوت بهالدنيا و ابتسمت غصب عنّ و أنا أشوف الابتسامه ماليه وجهه ,, قرب و سلم علي و حبّ راسي ,, جلس على طرف السرير و إيده تتحسس جبهتي : هاه بشري اليوم وش أخبارتس ؟
أنا : الحمد لله ..
سلطان : لا الحمد لله اليوم منور الوجه ..
زادت ابتسامتي و أنا أسمع كلامه البعيد عن الصحه و تكلمت : وراك تأخرت ؟؟
رفع ايده و أشر على الكيس اللي فيه و رد : جوعااان بس مالي نفس قلت خل أجيب الغدا نتغدى أنا وياتس و تفتحين نفسي للأكل ..
تجاهلت كلامه و جمله وحده علقت بذهني : وراك مالك نفس ؟؟
سلطان : أبد الله يسلمتس بس فاقد غآآآآآلي ..
ابتسمت و أنا عارفه معنى كلامه ,, هذا سلطان عارفه انه شايل همي بس ما يبي يقول لي و يخوفن ,, فيتهرب بأجوبته هذي ..
سلطان : طيب ما تبين تشوفين وش الغداء يمكن ما يعجبتس ..
أنا : دام سلطاني اللي جايبه أكيد بيعجبن !!
قهقه و ملت ضحكته المكان و رد : لاااا لاا أنا ما أقدر على هالكلام خلاص مابي غدا شبعت ..
أنا : سلطااااان ..
سلطان : خلاص نتغدى بس لا تضيعين علومي بهالكلام ..
عضيت على شفايفي أخفي ابتسامتي و أنا أرد : لا يا شيخ .
ـــــــــــــــــــــــــــــــــــــــــــــــــــــ
الأربعاء - العصر - فيصل
وقفت سيارتي و أخذت شماغي بين ايديني ,, حاس نفسي تعبان و بي نووووم ,, دخلت البيت و كان هادي ,, رحت للمطبخ و لقيت أمي سلمت عليه و حبيت راسه ..
أمي : اصبر أسوي لك شي تاكله .
أنا : بي نووووم يمه هلكان .
أمي : طيب بس كل لك شوي ..
أنا : و الله اني تعبان يمه و الا موب سهل علي أرد لتس طلبتس ..
أمي : خلاص رح نم و أقومك لا أذن المغرب .
طلعت من المطبخ و أنا دايخ ,, ما أشوف قدامي الا فراشي ,,
: فيصااااااااال ..
نزيت من الصرخه و رفعت راسي معصب ,, هذي أمجاد ...
أنا : أنتي يالعجوز تصرخين كذا و الله لو هو عبدالله كان سطرته .
أمجاد : فيصل .
اتجهت للدرج و أنا أتجاهل صوته ...
أمجاد : رونق أأ.. خالي عبدالرحمن شاف الــ......
ما كملت لأني التفت عليه ..
أنا : رونق وش به تكلمي بسرعه ...
أمجاد : خالي عبدالرحمن عرف بالجوال اللي معه ..
دفيت التحفه اللي بجنبي و طاحت و تكسرت ,, كنت معصب و الدنيا كله قدامي سوداء ,, أكيد ذبحه كله منهن هالكلبات .
أنا : كله منكن أنتن اللي عطيتنّه اياوه ..... لا لا منّ أنا ,, أنا اللي سمحت لبزران يتدخلون بالسالفه ....
أمجاد : خلاص لا تتحسف كل شي صار و .......
قاطعته : من متى ؟؟
أمجاد : أمس دقت ندى عليه و رد عليه خالي عبدالرحمن ..
أنا : وراتس ما علمتين ؟
أمجاد : كلمتك بس جوالك مقفل ..
أنا : أوووووف ما فيه ارسال ...
تحركت من مكاني و أخذت مفتاحي اللي على الطاوله و اتجهت للباب ,, سمعت صوت أمي تنادين ,, يآآآآ الله و الله موب ناقصتس يمه ..
التفت و رديت و أنا أشوفه طالعه من المطبخ : سمي ..
أمي : وين رايح منتب نايم ..
أنا : أبطلع شوي و راجع .. و طلعت بسرعه قبل لا تقول شي ...
أمي : أمجاد أخوتس وش به ؟؟
أمجاد : ما أدري ما أدري !! و رقت بسرعه لغرفته تتحاشي أي أسأله تصعب عليه اجابته ............
.
.
.
.
ركبت بسيارتي و انطلقت لبيت عمي عبدالرحمن ,, كانت الشياطين تنطط قدامي و أنا أتخيل الكم الهائل من الضرب اللي أخذته رونق من عبدالرحمن ,, تذكرت شكله بعزاء أمي موضي و ابوي عبدالله ,, ارتعبت من الصوره و تعوذت من الشيطان و أنا أحاول أطرد الصوره من بالي .....
وصلت و نزلت من سيارتي رنيت الجرس ,, ثواني و سمعت صوت عزيز : ميييين ؟؟
أنا : فيصل .
فتح الباب و شقت و جهه الابتسامه وهو يسلم : هلاااا فيصااال ..
أنا : هلا عزيز وش أخبارك ؟؟
عزيز : الحمد لله .
أنا : وين أبوك ؟
عزيز : رايح من زماااان !!
تأففت بقهر ,, هذا وقته يرووووح .
: فيصل .
التفت للصوت و لقيت قدامي عمي عبدالرحمن ..
تكلمت بسرعه قبل لا يعصب علي : هلا عم ممكن أكلمك شوي داخل ..
عبدالرحمن : أنت كفو الواحد يدخلك لبيته .. دخلتك و ما جبت لي خير ..
قاطعته و أنا أحاول أفهمه : و الله يا عم لو ما أنا بواثق به كان ما ...
قاطعن بعصبيه : أي واثق يا شيخ و كأنك موب عارف سالفته ..
كان يصارخ بصوت عالي وهذا اللي لفت نظر واحد من الجيران سحبته مع ايده و دخلته للحوش و سكرت باب الشارع و تكلمت و أنا كاتم النار اللي بصدري : أنت اللي موب عارف السالفه صح ..
عبدالرحمن : لا يا شيخ وشي ان شاء الله السالفه الصحيحه اللي أنت تعرفه و أنا ما أعرفه ..
أنا : ضربته صح ؟!!
عبدالرحمن : و لو أذبحه مالك شغل ..
تكلمت بعصبيه : بس رونق مظلومه .
تكلم عبدالرحمن بنبره تهكميه : لا أصير بس أنا اللي ظالمه ..
تنرفزت من نبرته المستهزأه و عصبت و رديت بدون لا أفكر : لا مي ,, مي هي اللي تسببت له بكل هذا ,, رونق ما كلمت ,, مي اللي كلمت رجال غريـ......
قطع كلمتي الكف اللي جان على وجهي و تكلم و هو معصب حده : براا يا كلب برااااااا ..
و كمل و هو عاض على سنونه : ما بقى الا أنت تجي تسبه ...
حاولت أقوم من الأرض لكن ايده سبقتن و سحبن و رمان بالشارع و كمل كلامه : و لو انك صادق كان أثبت كلامك بدون لا تسب مي يا كلب ...
رمى عليّ شماغي و تفل على وجهي و سكر الباب بكل قوته ...

سحبت شماغي و شلت نفسي و ركبت سيارتي و أنا منقهر من عمي عبدالرحمن ,, نفسي أذبحه ,, بس ..... بس رونق ,, ياربي وش أسوي له ,, طاحت دمعتي و أنا أتذكر كل شي سويته عشانه ,, من يوم سمعت بسالفته و أنا شاك إن فيه إنّ في السالفه ,, لكن لما سمعت بالسالفه الحقيقيه من أمجاد تأكدت إنه صحيحه ,, ما كنت محتاج دليل عشان أتأكد إن رونق بريئه ,, أنا عارف إن القرآن بصدره يحكمه بكل اللي تسويه ,, رونق تعرف الحلال و الحرام و أهم ما عليه بالدنيا طاعة ربي ....
تذكرت إني لمّا سمعت بالسالفه ما ركدت ,, حلفت على نفسي إني لا أثبت برائته على إيدي ..
مسكت مي و حاولت به تقر باللي سوته لكنه أنكرت ,, كانت تظن إني شاك ,, لكن أنا متأكد من براءة رونق و إدانة مي ..
فتشت غرفة مي بغيابه أكثر من مرة أحاول ألقى أي رقم يدلن على أي خيط ممكن يوصلن لبراءة رونق ..
حاولت أتناقش بموضوع امكانية براءة رونق قدام أبوي ,, لكني ما تعرضت بالكلام لمي بأي شي لا بالخير و لا بالشر ,, و ردة فعل أبوي مثل ما توقعت عصب علي و قال لي بالحرف الواحد " حنا سمعنا ما أحد قالنا و لا عمري أشوفك فاتح هالموضوع مره ثانية "
ما وقفت عند كذا كلمت رونق لما كانت بالمستشفى و سألته عن رقم الكلب اللي فضحه لكنه ما تعرفه ..
رحت لبيت أبوي عبدالله المعروض للبيع و فتشت بغرفة مي و غرفة رونق و مالقيت أي أثر لأي شي ممكن يدلن عليه ...

مسحت دمعتي و صرخت بصوت ملأ السياره : و الله ثم و الله ما أستسلم ..

تعبت من الدوران بالشوارع بدون هدف ,, سمعت أذان المغرب ,, نزلت و توضيت للصلاة و انضميت للصفوف ,, كبرنا و صلينا و بعد الصلاة تسننت و طلعت من المسجد ..
بديت أمشي داخل الحاره على رجليني ,, تعبان بس يهون التعب الجسدي عند تعب الروح ,, ما أدري وش أسوي ,, و الله خايف عليه من عمي عبدالرحمن هي بس لو هي عندنـ......إيه لقيته ...
رجعت لسيارتي أركض و ما فيه بلساني إلا الحمد و الثناء على الله ,,
ركبت السيارة و انطلقت لبيتنا .........
دخلت البيت و عيوني تفتش عن أبوي ,, و صلت الصاله و لقيته يتقهوى ,, نزلت و حبيت راسه و جلست بجنبه ..
أبوي : وش أخبارك و أخبار كشتتكم ؟؟
أنا : ما شاء الله استانسنا .
أبوي : كان نمت لك شوي العصر شكلك تعبان .
أنا : طلعت شوي إلا ...
أبوي : وش عندك تكلم ؟؟
أنا : يبه وراه ما تجيب رونق تعيش عندنا ..
نزل راسه و وضوق عيونه و رجع رفعه و تكلم بهدوء : و أنت وش طاري عليك ؟
أنا : بس أخاف عمي عبدالرحمن أأأ ....
أبوي : وش فيه عمك عبدالرحمن ؟؟
لما ما رديت تجهم وجهه و تكلم بصوت أعلى : أنت مسوي شي صح ؟؟
أنا : كـ..ـنـت خايف على رونق ووو عطيته جوال ..
تجهم وجه أبوي و رد بعصبيه : إيييييش ؟!!
رديت أدافع عن نفسي : لا صرتوا منتب مسوين شي لهالمسيكينه أنا منب ساكت ,, و الله لو تموت ما دريتوا عنه !!
فز أبوي من مكانه و صرخ عليّ : و أنت وش دخلك ؟؟
قمت و أنا أحاول أهدي أبوي : يبه تكفى و الله إنكم ظالمينه .
أبوي : أنا حذرتك من قبل إنك ما تفتح هالموضوع ..
أنا : يبه اهدأ و الله إنه .......
أبوي : باااااااااس كافي ...
و كمل : بعدين مالك شغل به هي عند عبدالرحمن و أخوه أرحم به منك !!!
طلع أبوي من البيت و أخواني كلهم مستغربين عصبيته ,, أما أنا شلت نفسي و رحت لغرفتي ,, تعبت من هالهم و الله تعبت ,, و الله ما أترك رونق بهمه ,, و الله لا أسوي كل شي اقدر عليه أو حتى ما أقدر ,, ما فيه غيره عمي خالد هو الوحيد اللي سحب نفسه من الموضوع لازم أكلمه عن حالة رونق عسى يرحمه و يرجـــــــــع ..
ــــــــــــــــــــــــــــــــــــــــــــــــــــــــــــ ــ
نهى - الأربعاء - العشاء 9:30
من يوم جيت من أسماء و أنا مسكره على نفسي بغرفتي ,, و الله لو دريت إن جلسة العلاج اليوم كان ما رحت ,, كان شكله مرهقه و تعبانه ,, و حتى وجهه مصفر يآآآآآه ,, الله يعينه ..
من طلعنا منه و أنا دمعتي ما وقفت و الله إن شكله يهد القلب ,, وصلنا للبيت و لقيت أبوي بالصاله باين أنه عنده شي قربت له و حبيت راسه ,, كلمن بموضوع عزام و الله موب وقته وعدته خير و إني أبرد عليه بعدين ,, رحت لغرفتي و سكرت الباب ,, نمت على بطني و دفنت وجهي بمخدتي و أطلقت العنان لدموعي ,, خل تطيح و الله تعبت من الكبت ,, صرخت بصوت مخنوق و أنا أتكلم : يا ربي لا يجيَه شي يا ربي و الله أنه غاليه بالحيييييل على قلبي ..

: نهى تعالي تعشي ..
سمعت صوت أمي و رديت بصوت مخنوق : مااابي يمه .
كأنه حست بصوتي و قربت راسه للباب و تكلمت بهمس حتى لا يسمع أبوي الصوت و يضيق صدره لهمي : ربي يبي يفرج همتس يمه بس أنتي قومي توضي و صلي لتس ركعتين اطلبي بهن الله ..
و سكتت شوي و لما ما سمعت رد كملت : قومي يا ميمتي و صيحي على سجادتس ربي هو اللي يبي يسمع لتس و يستجيب دعائتس ..
قمت و اتجهت للحمام و توضيت و طلعت ,, لبست جلال الصلاة و كبرت لله بقلب خاشع و روح مطمأنه لذكر الله ..
ــــــــــــــــــــــــــــــــــــــــــــــــــــــــــــ
رونق - الخميس- الصبح 10:15
تروشت و طلعت ,, ربطت شعري بدون لا أنشفه ,, كنت أحس بالرجفه بجسمي ,, مع إني توي متقهويه يعني الرجفه موب من الجوع بس ما ادري يمكن خوف ,, ايه خوف و الله خايفه من اللي يبي يصير ,, خايفه وشلون أبودع هالمكان ,, وشلون أبتقبل أمي بعد اللي سوته بي ,, يعني معقوله تروح و تتركن و أنا طفله ,, ما فكرت بحاجتي له ,, وش عذره ؟؟ و أي عذر بيشفع له غلطته ,, حاسه نفسي موب متقبلته كبدايه و موب عارفه كيف أبعيش معه ,, طيب يمكن أبوي منعه إنه تاخذن ,, ايه صح يمكن ,, أنا عارفه أبوي و عارفه شدته ,, بس حتى لو أبوي أخذن منه بالغصب ليه ما حاولت تدورن أو تسأل عنّ ,, و الله عجيييييب أمرك يالشامية ......


مر

الوقت

بطيء



تعبت و أنا أنتظر أذان العصر ,, قمت و صليت و كل عضو بجسمي يرجف ,, سجدت و رفعت و سجدت و دعيت بقلب صادق لله " يا ربي عسى أمي تصير مظلومه و عساك تبذر حبه بقلبي "
رفعت من السجود و قريت التشهد و سلمت : السلام عليكم و رحمة الله ,, السلام عليكم و رحمة الله ....
: تقبل الله .
رفعت راسي لهند : منّا و منكم صالح الأعمال ان شاء الله .
سكتنا ,,, ما كان فيه حديث ممكن ينقال بذاك الوقت ,, لكن كانت فيه مشاعر خوف من الواقع و هالمشاعر مشتركه بيني أنا و هند ..
تكلمت أكسر حاجز الصمت : وو وين بنات أسماء .
هند : جاء أبوهن و شالهن لأسماء .
أنا : و أسماء وش أخباره ؟؟
تنهدت هند و ردت : الحمد لله تنتظر رحمة ربي ..
و كملت : أشوفتس ما لبستي ؟!!
أنا : أبلبس أي جلابيه مالي خلق أتلبس .
هند : بكيفتس بس لا تتأخرين تراهم قبل شوي داقين يسألون عن الوصف !!
ارتجفت و أنا أستشعر إن اللحظه الحاسمه جت ....
قمت و لبست جلابيتي و جلست على سريري و قلبي يضرب طبول و أنا أهز رجلي بإرتباك ..



هند ...
دق جوال عبدالرحمن و كان باين إنه يكلم مره و الأكيد أنه الشامية ,, سكر منه و تكلم بجفاء : قوليله ان أمه جت .
ما قدرت أتكلم و أرد عليه لأنه اليوم كله ما دار بيننا كلام أو بالأحرى من قبل أمس و أنا وياوه كأننا أعداء ,,
قمت من مكاني و رحت لرونق دخلت عليه ,, كانت جالسه على فراشه و باين إن فكره بعييييد ,, قربت له و وقفت قدامه و تكلمت : رونق ..
رفعت راسه تنتظر أي كلمه منّ و كملت : رونق أأ .... ما قدرت أنطق أمتس لأنه أقل من أنه تكون أم لرونق ..
كملت : أأ... تراه جت .
غمضت عيونه و عضت على شفته ,, للحظات ثم قامت من مكانه و هي تتنهد و تستغفر مشت رايحه للمجلس و أنا وراه ,, كانت تمشي و جسمه يتمايل ,, خايفه لا تنهار بعد هالكبت و الله خآآآآيفه ...



رونق ...
دخلت المجلس و أنا أتبلع ريقي ,, كانت واقفه بعبايته و متحجبه مجرد حجاب ,, استنكرت قعدته بدون غطا مع وجود أخوي عبدالرحمن ,, أول ما دخلت وقفت بأول المجلس و رجليني ما عادت تتحرك ,, وقفت أشوف الملاك اللي قدامي ,, كان جماله غيييير ما بيّن عليه سنه اللي يشوفه يقول بأول الثلاثين ,, جسمه النحيل و وقفته الشامخه و ملامحه اللي تفوق الجمال نفسه ,, قطع علي تأملاتي حديثهم المرعب !!!



هند ...
كنت أشوفه واقفه و كأنه جماد و أنا خايفه عليه ,, هواشهم صحّان و التفت على عبدالرحمن اللي يصرخ عليه ...
عبدالرحمن بصراخ : بس هذي بنتس ..
فاتن : هه هلاّ افتكرتوا ؟؟
عبدالرحمن : أنتي اللي تركتيّه .
فاتن : و شو بدي أعمل وئتا أنا كنت لساتني شابّه بأول عمري و مين يلي بدو يتحمل بنتي .
جلس عبدالرحمن و حط راسه بين ايدينه : تقدرين تأخذينه الحين .
فاتن : لا ما حزرت أنا هلاّ متجوزه و عندي ولاد ما بديّاها .
فزيت و قربت لفاتن و صرخت عليه : هذي بنتس يا حـــجـــر !!
فاتن بصراخ : إلتلكون ما بدياها ..
عبدالرحمن : وش نسوي به ؟؟
التفتت فاتن لرونق و ردت بصوت قاسي : وينه أبو محمد ؟؟
قام عبدالرحمن و رد بقهر : أبوي مات الله يرحمه و يغفر لــ....
قاطعته فاتن : إيه الله لا يرحمه و لا...
قطع كلمته الكف اللي ارتطم بوجهه .....
لفينا كلنا على رونق اللي تكلمت و عي صاكه سنونه : برآآآ انقلعي برآآآآآآآ ..
فاتن : لك ارموها للكلاب ,, ترباية موضي الله لا يوفئها ..
رونق : برآآآآآآآآآآآآآآآآآآآآآ .
شالت نفسه فاتن و طلعت مع ما تبقى من كرامته وسط انهاشنا كلنا من تصرف رونق و صموده إلى هالحين ..
تحركت رونق و ركضت وراه ..
أنا : رونق وش بتس ؟؟
أنا : رونق لا تكتمين تكلمي ... رونق تكفيييييييين ..
دخلت غرفته و سكرت الباب وقفلته بدون أي همس أو صوت و كأنه جسم انسحبت منه الروح ....

ـــــــــــــــــنهاية الجزء الثالث عشر ..

أحبكم و أحب أحرفكم حينما تسطرونها نصحا لي

الجزء الرابع عشر :
( خطوة في طريق الندم )

إن أول خطوة في طريق الندم كفيلة بترميم جزء من مشاعرهم ...




[ 1 ]

عبدالرحمن ,, العصر

مسكت راسي بين ايديني و أنا أسترجع اللي صار ,, أحداث سريعه و موجعه بنفس الوقت ,, أنا أبفهم وشلون فكرت بذا التفكير كيف أدق على أم رونق كيف أترك المره اللي غدرت بأبوي من سنين ترجع و تأخذ شي من حلال أبوي !!

إيه حلال أبوي هذي بنته و من لحمه و دمه و اللي بيلحقه و هي عند أمه بيلحقنا كلنا ,, الناس يبي يقولون بنت عبدالله العادل سوت و غلطت ميب قايلين بنت الشامية ,, يآآآآآ الله أنا وشلون كنت أفكر ,, و الله لو يدري محمد كان يذبحن ,, و يحق له يذبحن ..

بس لا أنا ما غلطت هي اللي أجبرتن على اللي سويته و كرهتن بدنياي و شككتن بكل شي ,, أجل رونق اللي حافظه كتاب الله بصدره تسوي كذا ؟؟ وش خلت للصايعات !!!

مرات أحس إني غلطت يوم كلمت الشامية و مرات أحس إني ما سويت إلا الصح ,, ما أدري و الله إني ضآآآآآآيع و موب عارف حتى أفكر ,, عقلي ما يدور به إلا الأحداث اللي صارت قدامي ,, أحداث ما تصير حتى بالخيال ,,
من يصدق إن هذي أم و الله إنه أقسى من الحجر !!

ما أدري وشلون أبوي صبر عليه سنتين ,, يآآآآآالله غريب يبه و الله انك غريب ....

و رونق أبدا ما تخيلت أشوفه بهالقوه !!
معقوله ما تأثرت أو يمكن من شد الألم ما قدرت تعبر عنه ...
زاد الصداع و فتك براسي ,, شددت من قبضتي على راسي و أنا أردد بهمس : يا ربي الطف بنا ياااا رب ...


: عسى ما شر يا بو عبدالعزيز ؟؟

رفعت راسي للصوت اللي قدامي و ابتسمت ابتسامه باهته تعبر عن الضياع اللي أعيشه و تمتمت : الحمد الله ما بي شي بس الضغط شوي مرتفع .

قرب سلطان و جلس بجنبي و تكلم : قم معي للمستشفى .

سندت ظهري و رديت : لا بالله منب رايح ..

و كملت يوم شفت تقطيبة جبينه : شوي و ينزل عارفه ..

: إلا وشلون أسماء ؟؟

سلطان : ان شاء الله انه بخير .

رفعت ظهري و تكلمت باهتمام : و الآثار الجانبيه للعلاج ما بدت تظهر ؟

تنهد سلطان و رد : أنت عارف إنه هالأسبوع أول أسبوع يعني ما أمداه ...بس تدري و الله إني خايف لا تتعب نفسيته لا طاح شعره .

ربت على ايده و رديت : أسماء مؤمنه !

سلطان بانفعال : بس مره .... و كمل : يهمه مظهره و تتتأثر نفسيته و أنت عارف إن المره ضعيفه ..

أنا : يا بن الحلال ان شاء الله إن اللي خلقه قادر على شفاءه ,,

سلطان : و نعم بالله !!!

أنا : طيب وراك ما تخلينا نوديه لألمانيا تتعالج ..

التفت علي سلطان و تنهد و هو يرد : عيت و الله إني حاولت به بس هي عيت تتعالج إلا هنا ,, تدري حتى قلت له خلينا نوديتس للرياض و عيت تقول أبي أتعالج هنا عند بنياتي و جماعتي !!

و فتح ايده على نهاية كلامه لبنته رغد اللي جت تركض لحضن أبوه ...




ـــــــــــــــــــــــــــــــــــــــــــــــــ


هند ,, العصر


طقيت الباب مره و ثنتين و عشر لين تعبن يديني من الطق و طار عقلي من الخوف ,, كنت مرة أترجاه تفتح و مره أهدده إني أبسوي و أسوي إن ما فتحت ,, صحت و صرخت عليه علّ و عسى تحس شوي و تطلع تطمنن عليه لكن ما فــــيــــه أمـــــل !!!

ذكرته ببنات أسماء و ما رد علي إلا صمته المزعج ,, أكلن قلبي وتوقعت أحسن التوقعات السيئه ,, ناديته كآخر أمل لي : رونق تراي أبدق على محمد خل يشوف وش سوى عبدالرحمن و يوقفه عند حده ...

انتظرت و انتظرت و لما ما سمعت أي ردة فعل قمت واقفه و سحبت نفسي سحب و اتجهت للتليفون و بديت أضرب الأرقام ......
ما كملت الأرقام لأن يد امتدت و سحبت السماعه منّ و سكرته ...
رفعت راسي و انصدمت للملامح الجامده اللي قدامي و تكلمت بسرعه : رونق وش بتس خوفتين عليتس ؟!!
.
.
.
.
.
رونق .....

من قفلت الباب و أنا حاسه بثقل الوجع بصدري ,, حاولت أصيح أصرخ لكن لساني ما تحرك ,, حركت ايديني أبكسر أي شي أفرغ به القهر اللي بداخلي لكن حتى ايديني عصتن و كأنه متفقه مع هالدنيا عليّ ,,

حاسه بضيآآآع ,, كلهم تركون أمي موضي و أبوي و أخواني كلهم ما بقالي غيره ,, الانسانه اللي المفروض تكون أقرب الناس لي تنكرت لي و تناست وجودي بهالدنيا ,, من يجي مثله بهالقسا و الكبر ,, أمي الشامية اللي تجاهلت كل كلامهم عنه و حطيت ببالي شي واحد ,, أكيد عبدالله العادل ظالمه مثل ما ظلم أمي موضي من قبله و ظلمن أنا ,, لكنه خيبت آمالي و طلعت أسوأ من كلامهم حتى !!!

طحت بثقلي على الأرض و تسندت على الجدار و أنا أسمع توسلات هند ....

غرقت بأفكاري و بين لحظه و الثانية يختلط صوت هند مع صوت صياحه ,,

رجعت لأفكاري مرة ثانية و ما صحان إلا أحب اسم بهالدنيا " محمد " ,, كانت تهدد إنه تبي تقوله عن سوايا عبدالرحمن ,, بس هو رفض يصدقن بالأول و اتهمن مثلهم بشي ما سويته بحجة إنهم سمعوا شريط تافه و ما يعني شي ,, كيف لو قالت له الحين أخاف يأيد محمد اللي سواوه عبدالرحمن و ذيك الساعه بموت من القهر و الله بموت ,, لا لاآآآآآآ حرام و الله كافي وجع ,, كافي قهر !!


شلت نفسي و طلعت من غرفتي ,, درت نظري أدور هند بالصاله و طاحت عيني عليه رافعه السماعه ,, تناولت السماعه من إيده أحاول أحافظ على حطام أمل يمكن ينجبر مع الوقت و سكرت الخط وأنا مانيب متحمله أي شي ,, كان أي خدش ممكن يتسبب بوفاتي لأنه هو اللي بيكون القشه التي قصمت ظهر البعير !!


: رونق وش بتس خوفتين عليتس ؟!!

رديت و شي كبير بصدري ما أقدر حتى أتنفس منه : لا يدري محمد و أنا ...... أ.. أبصيـــ...ــر بخير ..

توجهت لغرفتي وسط دهشة هند ,, دخلت و سكرت الباب بالمفتاح و طفيت النور و أنا حاسه الدنيا سوداء مثل هالظلام بالضبط !!!

سمعت الآذان و قمت توضيت و صليت و أنا موب قادره أصيح ,, اللي أحسه أكبر من من من ,,,,, و الله ما أدري من إيش بس يمكن أكبر حتى من كرهي لأبوي .....


انسدحت على سجادتي و أنصت لقراءة إمام المسجد القريب للبيت " إنا جعلنا ما على الأرض زينة لها لنبلوهم أيهم أحسن عملا ...."

نزلت دموعي و أنا أسمع تلاوته العذبه و تمتمت : ياربي يا حبيبي انك تعلم إنه ما يهمن بهالدنيا كله إلا رضاك ,, ياربي أسألك إنك تصلح لي حالي عشان أقدر أعبدك حق عبادتك ....

كانت كلماتي غير مرتبه و أنا أدعي و كأني جاهله و إلا أول مره أدعي ,, بس و الله اللي بقلبي طلع لربي و كأني أكلمه بدون حواجز ,, زاد أنيني و تعالت شهقاتي اللي كأنه الدلو اللي يطلع من بير صدري همومه لكن هيهات هالبير ينفذ لأن الهموم تتجدد و الجروح عيت لا تلتئم !!




ــــــــــــــــــــــــــــــــــــــــــ



خالد .. الصبح
قمت من النوم و أنا كسلان ,, تمغطت على سريري شوي ثم قمت للحمام ,, غسلت و فرشت سنوني و طلعت و لبست ملابسي بسرعه و أنا أناظر ساعتي ,, يا ربي ما أدري وش بي اليوم تأخرت ,, جمعت كتبي و اتجهت للباب ,, سمعت صوت جوالي و كأنه يذكرن إني نسيته ,, رجعت بسرعه و اخذته أبشوف من المتصل لكن الخط انقطع ,, فتحت القفل و لقيت 6 مكالمات لم يرد عليها و كلهن من فيصل ,,
الله يستر وش كل هالمكالمات ترددت الأسئلة بداخلي و أغلبه عن أهلي عسى ما بهم شي و إلا ليش كل هالإتصالات ؟؟

ما أمدان أفكر بسبب هالإتصالات لأن الإتصال انعاد و رديت بسرعه قبل لا ينقطع بخوف : هلا ابو محمد ..

فيصل : خاااالد كان ما رديت أحسن بعد !!
أنا : وش أسوي ياخي كنت نايم نسيت الفرق بالتوقيت !!
فيصل : أوووف و الله راح عن بالي ..
تكلمت بنفاذ صبر : وش اللي صاير ؟!
فيصل : متى بترجع ؟
رديت بملل : توي باقي أربع شهور و نختبر ..
فيصل : طيب اسمع لازم ترجع عشان رونق ..
قاطعته و قلبي طاح من الخوف : رونق وش به ؟؟!!!!!!!!
فيصل : تدري أظنك بسالفته وتدري أكثر إنه حافظة القرآن و ديّنه .
أنا : عارف و بعدين ؟
فيصل بعصبيه : رونق لو قعدت عند عمي عبدالرحمن زيادة يوم خطر عليه تموت .
أنا : فيصل و وجع تكلم خبصت قلبي .
فيصل : منب قايل لك السالفه لين تجي بس ترى رونق مضيومه و اللي عرفتوه عنه كذب أصلا هي عمره ما غلطت هالغلطه .
أنا : فيصلوه و حطبه تكلم رونق وش به ؟
فيصل : أشياء كثيره اللي صارت له أخره عمي عبدالرحمن لقا معه الجوال اللي نكلمه به و الله العالم وش حاله الحين ..
نزلت ايدي بتوتر و رميت الكتب اللي معي ورجعت لغرفتي و انا أتكلم مع فيصل : طيب وراك ما تزوره ؟
فيصل : كنت أزوره بس الحين منعن عمي !!
و كمل كلامه : المفروض انك ما سافرت .
قاطعته : اللي صار أكبر من إننا نتحمله يا فيصل و بعدين أنا هجيت و تركت كل شي ,, رفضت أسمع الشريط اللي موّت أبوي و أمي قهر !!
و رفضت حتى أشوف رونق لأني ما أضمن نفسي ساعته إني أذبحه بيديني ..
تنهدت و كملت : تراي دايم أسأل عنه أمجاد و لا تظن إني مرتاح و أنا هنا .
فيصل : متى بتجي ؟!!
أنا : هي وشلونه ؟

فيصل : من تالي نفسيته بالحضيض كنت دايم أتطمن عليه بالجوال و أزوره ,, أحاول أغير نفسيته و أنا أدري إنه تبتسم عشاننا بس و هذا عكس اللي بقلبه ,, لكن الحين ما أقدر و الله أعلم وش حاله الحين ..

أنا : خلاص أبدور لي أقرب حجز و أجي بس أنت حاول تتطمن عليه و طمنن تكفى ..

فيصل : ان شاء الله بس بلغن متى بتجي .

رديت : بأقرب وقت بحول الله .
سكرت من فيصل و أخذت بوكي و طلعت أدور أقرب حجز للسعودية ..



ــــــــــــــــــــــــــــــــــــــــــــ



نهى ,, المغرب


انقبض قلبي و صدى الكلمة يتردد بداخلي " موافقه "
" موافقه "
" موافقه "


احساس بالخوف تربع بصدري بس ما لبث وقت طويل حتى تبدل لإحساس بالسعاده من شفت الفرحه بعيون أمي و أبوي ,, باركوا لي و دعوا لي بالتوفيق ,, شفت دموع أمي غسلت وجهه و حسيت بقبلات أبوي لإيديني ,, عند هاللحظه بس تأكدت إني ما سويت إلا الصحيح و تندمت على تأخير إدخال هالفرحه على أغلى قلبين بالدنيا ..



ـــــــــــــــــــــــــــــــــــــــــــ


تركي ,, العشاء

مددت إيدين أتمغط بعد ما نزلت من السيارة ,, تعب الطريق و مي الله يهديه أصرت نرجع اليوم ,, و اتجهت لباب البيت و فتحته ,, رجعت لشنطة السيارة و نزلت شناطنا و هي وراي شايله معي بعض الأغراض ,, دخلنا للحوش و ما كان بينهم أي كلام ,, أنا تعبان من الطريق و هي همه بإخته أسماء مكفيه .
رقينا الدرج بما إن بيتنا دور فوقي ,, وصلت الأغراض للغرفه و انسدحت أريح شوي ,, غمضت عيوني شكلي غفيت و ما انتبهت إلا على صوته : تركي تبي تتحمم أجهز لك ملابس ؟

فتحت عيوني و أنا أشوفه قدامي بروبه و شعره لافته بمنشفه ..

و رديت : لا بعد العشاء .

قمت واقف و تكلمت : وش تبين عشاء ؟!
مي : ما أشتهي شي حاسه نفسي تعبانه و أبنام .
رديت : اصبري لا تنامـ.....

و قطعن صوت رنة جوالي ,, انحنيت و أخذته من السرير و أنا أشوف الرقم مستغرب من اتصاله هالوقت و رديت : هلا و الله .

: تركي أنت ببريده ؟؟؟؟؟

رديت و أنا أسمع صوت سلمان ولد عمي : ايه عسى ما شر .
رد و هو يلهث : تعـ...ـال للمستشفى .
تركي : سلمان تكلم وش صاير ؟؟


رد سلمان بكلمات متقاطعه : حادث ... هم صدموا عمود الكهرب ,, العيال صدموا .. الحق عزام و ولد محمد ...............