الجزء الخامس و العشرون


الاثنين

جده
الساعة الـ 08:00 مساء

مجتمعين قدام التلفزيون و كل شخص تفكيره بحياته كيف بتكون ؟ وش يخبي له بكرة من أحزان و الا أفراح أم نواف\ هند يمه أنتي محتاجه شي من السوق ؟
هند\ لا يمه ما ابي شي ؟
أم نواف\ بس العيد قريب يا ابنيتي ولازم تشتري لك شي جديد
هند\ عندي يمه كثير ملابس ما لبستها و لا شافها احد
نواف\ طيب روحي معنى يمكن تشوفين شي يعجبك
هند\ لا والله نواف ما احتاج شي حرام اشتري و أنا عندي الي يكفيني اصلا توهم من شهرين مشتريتهم و لا لبستهم
نواف\ الي يريحك
هند\ خذوا أنتم يمه كل الي تبون و منوله خليها تشتري كل الي نفسها فيه حتى لو تبين فلوس ترى فيه عندي
أم نواف\ معي الي يكفيني يمه خلي فلوسك يمكن تحتاجينها أنتي يوم
هند\ أنا ما احتاجها الان اصرفيها وربك يرزقنا اصلا انا بقدم على شغل الان مع رؤى
أم نواف\ بتشتغلين ؟
هند\ ايه يمه وش فيها ؟
أم نواف\ بس انتي توك .....وسكتت
هند بألم\ توي ايش يمه مطلقة قصدك و كلام ناس وين هذولا الناس عنا لما نحتاج لريال وين الناس عني وانا اتزوجت بس عشان احافظ لكم على البيت و ما ننطرد بالشارع وين الناس هذولا بيكلونا و الا بيسكنونا راح يتكلمون وقت بس بالنهاية بيسكتون

الكل انصدم و سكت من الي قالته اتزوجت بس عشان احافظ لكم على البيت!!!!!!

******************

الخبر
الساعة الـ 11:00 مساء

متمدد على الكنبة و يقراء الجريدة اليوم مصدع من الصباح و ماله نفس لطلعه ابد حتى دوامه بالقوة قدر يخلصه .. قرب منه و سحب الجريدة من يده يوسف\ مصدع و تقراء ارحم عيونك شوي
سعود وهو يمسد بيده على جبينه\ والله مادري من ايش ذا الصداع ما هو راضي يخف
يوسف\ اخذت بندول ؟
سعود\ ثنتين ولا خف
يوسف\ أجل روح نام
سعود\ شكل ما فيه حل الا كذا
يوسف\ يمكن ما نمت زين أمس نام لين السحور و اصحيك
سعود\ يا خوفي تنام انت كمان و يروح علينا السحور
يوسف و هو ياخذ مفتاحه و شماغه\ لا اصلا انا بطلع مشوار مع الأهل و ارجع على وحده و نص و اصحيك لا تخاف
سعود\ زين يالله نشوفك
يوسف\ ان شاء الله .....

****************

جده
الساعة الـ 12:10 صباحا

حست بالندم بعد ما قالت لهم انها اتزوجت عشانهم لكن اش تسوي فقدت اعصابها و الحمد لله ما قالت اكثر من كذا و الا صدق بتندم على تصرفها .... سمعت باب غرفتها يدق \ ادخل
نواف\ صاحيه هنوده ؟
هند\ ايه بغيت شي ؟
نواف و هو يدخل و يسكر الباب\ ايه بسولف معك شوي
هند و بالها حست هو وش بيقول\ تفضل اسمعك
نواف\ انتي ليش ما قلتي لي انك مغصوبه على الزواج لما جيت اسالك ؟
هند\ وش ينفع السؤال الان ,؟
نواف\ انك دفعتي حياتك ثمن لطمع نورة
هند\ وش عرفك ؟
نواف\ انتي تدرين من كنتي متزوجه سلمان فيصل الـ......... ولد صاحب اكبر شركة نقل في المدينه و ينبع و الشمال الغربي كله
هند ما تفاجات من كلامه كانت متوقعه اهل سلمان باين عليهم الترف لما زاروها \ الحين انتهينا انا ما اخذت منه شي و هو يعرف كذا
نواف\ بس الاكيد ان ابوي اخذ لنورة اضعاف الي نتوقعه
هند\ قلت لك هو يعرف اني مااخذت شي من الفلوس الي دفعها لابوي
نواف\ هو قالك شي ؟
هند\ هم يعرفون كل شي نورة هي الي قالت لهم عني و خطبوني و اندفعت الفلوس من ام سلمان لنورة عرفت كل شي بس اهم حاجه امي و جدتي لا يعرفون بشي
نواف\ اكيد ما راح اقولهم بس احس اني ما قدرت اكون رجال البيت الي يحميكم يا هند بعد الي صار لك
هند\ لا تقول كذا عن نفسك انت وش بيدك تسوي الي صار صار و خلاص انا نسيت و ببداء صفحة جديدة
نواف\ عشان كذا لازم تطلعين من جو البيت هذا و لا تهتمين لكلام الناس اشتغلي و انا بنفسي اوديك تقدمين اوراقك ....

**********

الخبر
الساعة الـ 02:00 فجرا

جالسين الشباب على السفره يتسحرون تعدوا الفترة الاخيرة على وجود علي بينهم اكثر من اول بحكم زواج سيف و انشغاله ببيته صار علي يطلع مع سعود و يوسف طول الوقت \ الحمد لله
سعود\ ما اكلت ؟
علي\ لا والله شبعت اللهم لك الحمد
يوسف\ تسوي رجيم شكلك اكلك زي ما هو ؟
علي\ هههههههه أي رجيم و انا تقول هيكل عظمي متحرك بس تعودت ما اكثر سحور شي خفيف و خلاص
سعود\ هو احسن اصلا صحيا يقولون انك تاكل شي خفيف
علي\ ايه صح
يوسف\ ياليت سيف معنى الحين ما عاد ينشاف
علي\ هههههههه ايه والله تقول محد اعرس الا هو
سعود\ خلوه يستانس قبل يجوه عيال
يوسف\ عقبالنا يارب
علي\ انت و ناصر حاله مستقطعين على العرس و لا تتزوجون بس كلام
يوسف\ انا عندي كم شغله قبل العرس لازم تخلص و اخوك انت السبب واقف بطريقة
علي\ لا والله الوالدة وافقت تزوجه قبلي لكن كل ما قالوا له نخطب لك البنت الفلانيه قال لا ذي ما اباها و ذي مدري وش فيها
يوسف\ ههههههههه خله يتنقى الرجال براحته
علي و هو يوقف\ بكيفه يالله استاذنكم انا
سعود\ وين تو الناس
علي\ من عمرك ورانا دوام بنام لي كم ساعة
سعود\ انت لو تسمع كلامي و تجيب عفشك و تسكن عندنا يا سلام
علي\ هههههههه و وين انام بالصالة ؟
سعود\ غرفنا تشيل سريرين الي تباه منى نام معه
علي\ تسلم والله بفكر و ارد لكم خبر ....


*******************

الجزء السادس و العشرون



الأربعاء

مرت أيام الشهر الفضيل بأسرع ما يكون و الكل يعيش أيام رمضان الأخيرة برجاء إن صيامهم و قيامهم سجل في صحائف حسناتهم أيام مرت و مابقى على العيد الا يومين فيها أتوظفت هند مع رؤى في مركز تأهيلي قريب من بيتهم و بدت عملها فيه من أسبوع كان العمل مريح لها لأنه يخلوا من وجود الرجال فيها رجع سعود عند أهله إجازة و ترك الشرقية بكل همومها .....

جده
الساعة الـ 05:40 مساء


طعم الجلسة الأسريه غير من أمس يحس بروعة الفطور برمضان مع أمه و أخواته و عيالهم اليوم عازمهم كلهم عنده في البيت أشتاق لسوالف أزواجهم .
سعود\ بسرعه يأتي وين العصير ؟
يأتي\ اوكيه مستر أنا يسوي
أم سعود\ خف عليها يمه وش تلحق عليه
سعود\ وين بناتك و شغالاتهم ما يساعدونها مخلينك انتي في المطبخ ؟
أم سعود\ أم فارس و بناتها ما يقصرون يحضرون لنا السفرة بالصالة و أم عزام بنتها الصغيرة تصيح و راحت تنيمها
سعود\ وشغالتها وين ؟
أم سعود\ ما جابتها معها
سعود\ طبعا عوايدها أصلا ما تغير خوف أنا نستفيد منها لو بكأس مويه
أم سعود\ عاد وش نسوي لها يمه الله يهديها
في ها اللحظة دخلت عليهم سحر و هي أكبر بنات أم فارس عمرها 19 سنه تدرس بالجامعة \ مرحبا خالي الله جابك شوف جدتي ما هي راضية تسمع الكلام و تجلس بالصالة متعبه نفسها بالمطبخ و كل شي جاهز أصلا
سعود\ هههههه أنا اقولك وديها لين الصالة وأربطي الكرسي بالطاولة عشان ما تحرك
سحر\ فكرة يالله جدتي بيأذن الله يهديك و أنتي هنا
أم سعود\ نقلوا لمكة في التلفزيون
سحر و هي تدف كرسي جدتها\ إيه والله نقلوا .......

**************

جده
الساعة الـ 06:30 مساء


من بعد ما أفطرت دخلت مع جدتها الغرفة تصلي المغرب شافتها تمدد رجولها على السجادة و تهمزها بيدها قربت منها و جلسة تهمز لها رجولها\ جدتي رجولك لسى تعورك حتى بعد ما فرشتي الغرفه ؟
أم محمد\ لا يمه الحمد لله أحسن من أول بس فيه باقي ألم خفيف
هند\ الله يهديك لو تسمعين كلامي و تخليني أوديك المستشفى
أم محمد\ أنا ما أحب المستشفيات و لا ريحتها يمه خليني على رحمة ربك هو وجع خفيف و يروح
هند\ بس يعطونك شي يشيل هالألم مرة وحده و خلاص
أم محمد\ خليك مني الحين و طمنيئني كيف شغلك عسى مرتاحه فيه ؟
هند\ أي والله الحمد لله جدتي مرة مرتاحه
أم محمد\ أحسن من الأول يعني ؟
هند\ أكيد أحسن بكثير و أحسن شي أنه ما فيه رجال صح راتبه أقل بس الحمد لله
أم محمد\ الحمد لله الفلوس الي تجي بالحلال و راحة نفس تسعد أهلها مهما كانت قليله ......


*****************

الخبر
الساعة الـ 09:00 مساء

ماسكة الجوال بيد و الكرت باليد الثاني تحط رقمة في الشاشة و ترجع تمسحه تكتب رسائل شوق و غرام و قبل ما تضغط على أرسال تمسحها هي و عدته و لا يمكن تخلف وعدها له و ترجع تدق هذي رغبته ولأزم تحترمها مهما كانت تحمل في قلبها من شوق و حب تحاول تسيطر عليها رجعت الكرت مكانه بالصندوق و قفلت جوالها بالمرة و وقفت قدام الشباك تتأمل الشارع و الناس .. يا ترى كيف عرفت يا يوسف إني بالمستشفى و أرسلت لي الورد معقول تكون فعلا عرفت أنا من أكون و من بنته عشان كذا أبتعدت و الا أنت تراقبني من غير ما أدري بك معقول كلام سعود يكون صح و أنا الي شكيت أنك مثل باقي الشباب خوان معقول أنا فعلا شرفي يؤصل يوسف ؟

(( ساره من يوم أستلمت الورد ما حاولت تتصل على يوسف وتعرف منه كيف عرف بأمر مرضها لإنها بكل بساطة خافت و بداء الشك يذبحها فكرت بكل الي تعرفهم و تتوقعهم قرايبها أصحاب أخوانها أخوان صديقاتها و حتى جيرانهم لكن بدون فائدة الكل جاء ببالها الا يوسف ولد خالتها ))

**************

جده
الساعة الـ 11:30 مساء

طلع الصالة بعد ما كان بغرفة أمه يتطمئن عليها قبل تنام لها كم ساعة قبل السحور و جلس قدام التلفزيون وين ما كان فارس جالس\ نأمت جدتي ؟
سعود\ إيه نامت
فارس\ بس ما تكون تعبت اليوم ؟
سعود\ لا حمد لله باين عليها إنها بخير أصلا هي تستأنس على جمعتكم تعرفها
فارس\ الحمد لله أحس انوا حركتها و نفسيتها كمان صارت أفضل من دخلت مركز التأهيل
سعود\ إيه والله اشوف كذا لكن هي متى موعدها الأحد هذا ما فيه ؟
فارس\ الأحد بيكون ثاني العيد و هم ما يداوموا أول تلات أيام الثلاثاء فيه
سعود\ تمام أجل أنا بوديها
فارس\ براحتك بس ترى مركز نسائي مو تفضحنا و تدخل
سعود و هو يناظرة بنص عين\ يعني مرة ما يدخلون الرجال لو بس عند الرسيبشن ؟
فارس\ ههههههههه هو حدك
سعود\ و أنت وين تبى تدخل كمان ؟
فارس\ الأسبوع الي فات جدتي هلكتني و هي تمدح الي سوت لها العلاج تقول بنت ناس و ما فيه أخف من يدها
سعود\ و أنت تبي تشوفها ؟
فارس\ تقدر تقول
سعود وهو يأخذ الريموت و يطفئ التلفزيون\ قم خلنا نطلع بس بلا سوالفك الي مالها داعي .......

****************




السبت

جده

الساعة الـ 05:00 فجرا


اليوم أول أيام العيد بعد شهر أنقضى بلمح البصر بعد صوم و صلاة و صدقات و تقرب لله جاء اليوم الي تتوزع فيه الدرجات على العباد ما بين فائز بفضل ربه و خاسر بشر أعماله ,,,,,,

تنهدت و هي تحط يدها على ظهرها أخيرا خلصت كل شغلها في البيت سمعت صوت جدتها طالعه من غرفتها و هي تكبر و تهلل قربت منها هند و بأستها على خدها \ صباح الخير جدتي و كل سنه و أنتي بخير
أم محمد\ وأنتي بخير يا يمه صاحية من بدري ؟
هند\ لا والله جدتي لسى ما نمت
أم محمد\ الله يهديك يمه ليش مانمتي لك لو ساعة ؟
هند\ تو خلصت شغلي الحين والله لارجعت من الصلاة أنام
أم محمد\ و أخوانك صيحوا و الا لسى ؟
هند\ راحوا المسجد يصلون الفجر و أمي تصحي منال
أم محمد\ زين يمه عجلوا نبي نروح لصلاة العيد من بدري عشان نحصل لنا مكان
هند\ أبشري أنتي خلاص أنا جهزت لك كل شي بس باقي تلبسين
أم محمد\ الله يخليك يا يمه الحين أنا بروح البس
هند\ زين وأنا بطلع أخذ دش سريع و أبدل و انزل لكم .....

*************

جده
الساعة الـ 08:00 صباحا

طلع من مصلى العيد و شاف له مكالمتين بالجوال أستغرب ما هي من عوايدة يدق عليه كذا من بدري دخل السيارة ينتظر أمه و شغالتها يطلعون (( طبعا أم سعود متعودة تحظر صلاة العيد كل سنه لكنها هالمرة كانت رافضة فكرة إنها تروح مسجد الحي بكرسي متحرك لو لا سعود الي قدر يقنعها تروح عشان خاطرة ))
رجع اتصل عليه و رد من ثاني رنه سعود\ الوو
سيف\ السلام عليكم و كل سنه وأنت بألف خير و من العايدين
سعود\ وعليكم السلام و أنت بألف خير و من الفائزين وش ذا الحماس كله مرة وحده و حده و حده علي
سيف\ ههههههههه متحدين من يهنيئك بالعيد أول بشر عسى محد سبقني ؟
سعود\ هههههه وأنا اقول وش عنده سيف يدق و حنا لسى ما خلصنا خطبة العيد
سيف\ ههههههههه لا والله لا متحدين و لأ شي بس جيت ببالي و قلت اعيد عليك
سعود\ الله يعيده عليكم بالخير عاد العيد هذا لأزم أجمع صرتوا أثنين
سيف\ ههههه لا وأنت الصادق ثلاثه
سعود\ والله
سيف\ أي والله أبشرك ناصر جاي بالطريق و عاد أنت أول واحد من الشباب يدري
سعود\ مبروك والله يتربى بعزك يا أبو ناصر
سيف\ الله يبارك فيك و عقبال عندك أنت و الشباب
سعود\ اميين يارب ........

*************

جده
الساعة الـ 04:00 عصرا

صحت من نومها متكاسله مهما الواحد ينام بالظهر ما يسوى نوم الليل و راحته رفعت شعرها بالشباصة صاير طويل و متعب مع العمل الظاهر لأزم تقصه بدلت و نزلت الصالة تشوف أهلها هي متأكدة إن محد جاء يعيد عليهم من أقاربهم و حتى جيرانهم ما تسأل عنهم الا أم منذر و شافوها بالمسجد و عيدوا على بعض \ سلام
فهد\ وعليكم السلام
هند\ وين الناس ما فيه الا أنت ؟
فهد\ نواف نائم و أمي عند جدتي بغرفتها تصلي
هند\ و منال وين ؟
فهد\ كانت هنا قبل شوي وراحت تلعب في غرفتها
هند\ حد جاء او أتصل ؟
فهد\ لا
هند وهي توقف\ زين بروح أشوف أمي و جدتي ما بتروح تصلي انت ؟
فهد\ الا رايح بس صحوا نواف على أربع و نص
هند\ ليش ؟
فهد\ يقول بيطلعنا المغرب
هند\ اوكيه ....


**************

الخبر
الساعة الـ 07:00 مساء

دخلوا البيت و هم مستعدين لي أي ردت فعل بتكون من أبوهم هو مشتاق لجمعتهم و سوالفهم مشتاق لأمه و اخوأنه أشتاق للبيت و الخبر و شوارعها و كل شي فيها و الثاني مهيئ نفسه للكلام الي بيسمعه من أمه و أبوه وأنه هو السبب الي بعده عنهم \ جاهز
\ ايه
\ خلك هنا لين اكلمك اوكيه
\ اوكيه

دخل عليهم و هم مجتمعين بالصالة يوسف\ السلام عليكم
الكل أتفاجاء فيه ودخوله البيت و ردوا السلام الا ابوه الي اكتفى بنظره له و رجعها لتلفزيون بدون ما يقول شي قامت أم أحمد و هي فرحانه بيوسف و دخلته البيت\ هلا يمه حياك كنت متأكدة أنك بتجي و ما عليك أبوك أحيان يسوي حاجات ما يدري عنها
أبو أحمد\ ليش شايفتني مجنون و الا أنتي راضية يوم أنه ضيع أخوه عند الغرب ؟
قامت منار و هي تحاول تهدئ الموضوع بينهم قبل ما يكبر\ تعال يوسف اجلس حياك أجيب لك عصير ؟
يوسف\ أنا معاي ضيف و عشانه دخلت و هو يرفع صوته حياك أدخل ما في حد غريب
دخل محمد و هو كان واقف بمكان قريب و سمع كل الي قالوه أتوقعهم تغيروا في الكم شهر الي غابها لكنه اكتشف إن مشاكلهم زادت و حطوا السبب كله على يوسف الي يعتبره أكثر من أخ بالنسبه له\ السلام عليكم
فرحوا بحظوره بينهم و قاموا يسلمون عليه و يحضنونه وسط دموع أمه بشوفته و فرحة أمل بوجوده \ كنت متأكدة أنك بتجي
محمد\ و أنا اقدر ما أحضر ملكة أول خوأتي
أرتسمت على وجهه بسمة نصر أبو أحمد\ عرفت أن مالك مستقبل بالدراسة الا أن ترجع هنا ؟
محمد بشموخ و هو يطالع بعيون يوسف\ أنا جاي إجازة أسبوع لعيون أمل و لأني الشهر الجاي بدخل الجامعة معاد عندي إجازة الا شهر بالسنه أجيكم فيه و ان شاء الله كلها كم سنه و أرجع بشهادة و أنا رافع رأسكم بي ......


***************

الجزء السابع و العشرون



الثلاثاء
جده
الساعة الـ 05:00 عصرا


اليوم رجعت لدوامها بعد إجازة العيد المركز بداء دوامه من أمس لكن بحكم أن ما عندها حالات يوم الأثنين قضت يومها بالبيت كأفضل حل .. اليوم عندها حالتين وحدة الساعة خمس و الثانية سبع دخلت الغرفة و شافتها قدامها أبتسمت لها ترتاح لوجودها مع هالإنسانه و تحس إنها تتعامل مع شخص قريب لها ما هو مريضة عندها و بس\السلام عليكم كل سنه و أنتي بخير ياخالة
أم سعود\ و عليكم السلام وأنتي بألف خير يا بنتي
هند\ هااه كيف كان عيدك ؟
أم سعود\ الحمد لله زين من الله
هند\ تمام جاهزة لتمارين من جديد ؟
أم سعود\ ان شاء الله بس لي كم يوم أحس بوجع بظهري مدري من ايش
هند\ يمكن لنك وقفتي التمارين ؟
يأتي\ لا أنا يسوي كل يوم زي أنت يقول
هند\ طيب متى أكثر شي تحسين ألم لما تجلسين او لما تنامين على ظهرك ؟
أم سعود\ لا والله يا بنتي اكثر شي يوم اجلس و جلسة السيارة هي الي توجعني اكثر
هند\ أنتي تطلعي السيارة بنفس الكرسي و الا تجلسي على نفس مقاعد السيارة ؟
أم سعود\ لا عيالي يجلسوني على المقعد و الكرسي يحطوه بالشنطة
هند و هي تلتفت ليأتي\ كيف يجلس من كرسي لسيارة ؟
يأتي\ يشيلي ماما خفيف ما في مشكله
هند\ أنتي يشيلي ؟
يأتي\ أنا ما يشيل لوحدي يشيل مع مستر فارس بس مستر سعود هو يقدر شيل ماما لوحدها
و هو أنا أعرف فارس من سعود هند\ زين كيف هو يشيل زي أنا و أنتي يشيل الحين من كرسي لسرير ؟
يأتي\ لا يشيل جسم كله
هند\ زين يا خالة لأزم اشوف اليوم كيف تطلعين السيارة الظاهر الألم إلي بظهرك منه ........


*************

الخبر
الساعة الـ 05:45 مساء

اليوم أسعد يوم عندها اليوم ملكتها على الشخص إلي تتمنأه من سنين أخيرا بتصير ملكه هو بس الأيام الأخيرة حست بغلاتها عند أخوانها محمد إلي أخذ إجازة و جاء من بريطانيا و استحمل كلام أبوه بس عشانها و يوسف الي استحمل الطرده من البيت و رجع عشان يسهر معها و يطمئنها أبتسمت من قلبها\ لو تعرفين شكثر أحس إن يوسف اكثر من أخ لي
ساره و قلبها انقبض من الإسم\ يوسف من ؟
أمل\ سلامات يوسف أخوي اش فيك ؟
ساره\ هااه لا بس وش جاب طارية الحين ؟
أمل\ جاء ببالي الله يسعده أصلا هو الي بيودينا الإستراحة أنا و أنتي
ساره\ هو ؟
أمل\ أيه هو وش فيها ذيك المرة لما كنت بشوف الفستان و عبد الرحمن ما وداك قالي شوفيها لو تبي تروح معنى عادي نمرها بس عاد بنات عمك زاروكي و حتى يوم اتنومتي هو إلي جابنا لك في المستشفى
ساره و الشك بداء يذبحها\ وين راح يوم جابكم للمستشفى ؟
أمل\ عادي جلس تحت لين خلصنا
ساره\ اهاا بس هو ما هو ساكن عندكم صح لأني اجيكم على طول ما عمري صادفته
أمل و هي تتكلم بعفوية\ لا يوسف ذا من دخل الجامعة تعرف على سعود واحد جاي يدرس من جده و من يومها و هو صاير زي ظله ما يفارقه أربع و عشرين ساعة معه حتى أيام مرت كان يروح معه جده و ينام عنده بالبيت و الأن هم ساكنين شقة من بعض
هنا كل شي في ساره أنشل خلاص الدنيا أنتهت بعيونها يوسف الي حبيته هو ولد خالتي و راح أطلع معه بعد شوي و هو عارف أني كنت أكلمه كانت تطالع الفراغ و عيونها بدت تغرق بالدموع
أمل\ فيك شي ؟
ساره قالتها و هي تمشي بسرعه\ لا بروح الحمام شوي عن أذنك .........


*************

جده
الساعة الـ 06:00 مساء

واقف بالسيارة ينتظر أمه تطلع له شافها طالعه لكن معها وحده من طريقة لبسها باين إنها تشتغل بالمركز أستغرب من وجودها ما قاله فارس إنهم يجون لين السيارة لبس نظارته الشمسيه و نزل سعود\ هلا يمه خلصتي ؟
أم سعود\ أيه يمه بس البنت تبي تشوف كيف اطلع السيارة تقول يمكن الوجع الي بظهرك منه
سعود\ و أنتي من متى ظهرك يوجعك ؟
أم سعود\ من كم يوم يمه بس
سعود\ زين .. و هو يوجه كلامه لهند\ يعني قصدك أنه طريقة طلوعها السيارة غلط و تسبب لها ألم ؟
هند\ يمكن اذا كنتم تشيلونها بدون ما تبذل هي أي جهد
سعود\ أيه هو كذا
هند\ كذا غلط و تسير التمارين الي نسويها مالها داعي اذا ما أعتمدت على نفسها في كل حركة عضلاتها الأن بدت تنشط معنى لأزم تستخدمها بالطريقة الصح عشان ما تترقد مرة ثانيه
سعود\ زين كيف تطلع ؟
هند\ راح أبدا ادربها من اليوم طبعا تحتاج مساعده أول
قربت هند من أم سعود و بكذا قربت اكثر من سعود كانت تحس أنفاسها تختنق من قربها له و تحاول تسيطر على دقات قلبها لكنها مضطرة تكلمت و هي تطبق كل خطوة تقولها \ اوكيه أول شي تنزل رجولها من الكرسي على الأرض القدم لأزم تلامس الأرض عشان ثقل جسمك كله ينزل برجولك كذا خالتي أمسكي بيدك في الباب الحين بقوتك كلها
أم سعود\ زين
هند\ الأن ممكن تمسكها أخوي من الجهة الثانيه و تساعدها ترفع نفسها من الكرسي خالتي أنتي لأزم ترفعين نفسك بعد بيدك و دوري بجسمك عشان تجلسين قولي بسم الله
أم سعود\ بسم الله
ورفعت نفسها مع سعود طبعا لكن الي صار أن أم سعود انفلتت يدها الي كانت ماسكة فيها الباب كان وجها راح يضرب بالباب و تنجرح لو لا أن هند مسكتها بسرعه ..
حس بقشعريرة تسري في جسمه من لمسته ليدها ما قدر يقاوم أنه يرفع عيونه فيها وأنتبه لون عيونها الي كان مشرق اكثر بإنعكاس أشعة شمس الغروب عليها بهت في منظرها ثواني و كانت النظارة الشميسة بلونها الأسود معطيته الإريحية أنها ما تنتبه لنظرت عيونه خذ نفس عميق و سحب أمه لحضنه ورفعها بكل قوته لمقعد السيارة ..
حست بالإحراج من لمسته و قربه لها لدرجة كانت تسمع أنفاسه تحسها تختلط بأنفاسها و من الموقف ككل تبي تهرب من المكان بأسرع وقت \ اتعورتي خالتي ؟
أم سعود\ لا يا بنتي
هند\ زين أدري صعب عليك من أول مرة لكن شوي شوي بتدربين زين
أم سعود\ ان شاء الله
سكرت هند الباب و مشت مرت غصب بطريقها من شنطة السيارة وين ما كان سعود يحط الكرسي
أستجمع قواه و همس سعود\ آسف
هند ما قدرت تنطق بحرف هزت رأسها و مشت
سعود لاشعورين التفت يطالعها لين دخلت المركز و أبتسم على نفسه و تفكيرة دخل السيارة و مشى في طريقه .....

***************

الخبر
الساعة الـ 08:00 مساء

كان يسوق السيارة و ما هو قادر يسيطر على نفسه و على المشاعر الي بداخله ساره معه بمكان واحد يحس بحركتها و أنفاسها داخل السيارة معه خاطرة يصرخ و يقولها أحبك أشتقت لك مشاعره اليوم ثائرة و يحس بجنونها ..

بالطرف الثاني ساره كانت تحاول تسيطر على شهقاتها ما تطلع و تنفضح مع أمل إنها جالسة تصيح ..اكيد قاعد يقول باي وجه ذي طالعه معي بعد ما خانت أهلها أكيد قاعد يستحقرني الأن أستاهل من قالي أكلمه من أول أنا و أخذ رقمه ..

بدت تشك في وضعهم أكثر من وقت طلعت ساره من الحمام و هي شاكة فيها واضح عليها أنها صايحه والأن يوسف قدامها متوتر و أنفاسة سريعه أمل\ يوسف
أخر شي أتمناه أنه يسمع أسمه او حتى يتكلم الأن .. الأن أكيد بتعرفني من نبرة الصوت الله يهديك ياأمل ما تشوفين تكلميني الا الأن رد بهدؤ\ نعم
أمل\ أبي قهوة
يوسف ما قدر يسيطر على نفسه لما سمعها\ ههههههههههههههههه الحين ؟
أمل\ أيه بريح أعصابي قبل أوصل
يوسف\ والله أنك أخبل عروس بالدنيا أبشري أشتري لك .........


**************


الجمعة

جده
الساعة الـ 04:00 عصرا

نزل مع الدرج و شنطته بيده اليوم خلاص بيرجع الشرقية و بيودع كل شي بجده بعد عشر أيام إجازة بين أهلة و حبايبه شافها بالصالة و هي تمسح دموعها عنه بطرف شيلتها\ أفى يا أم سعود ليش تصيحين ؟
فارس\ فراقك صعب هههههههه
أم سعود\ عسى عيني ما تفارقه يمه بس كم يوم جلس عندي حسيت أن البيت منور بوجوده الدور الثاني الحين بيظلم بعيوني
فارس\ ما هو كم مرة أقولك خليني أجيب أغراضي و أسكن لك فيه على طول ما تعطيني الا غرفة تحت
أم سعود\ الدور الثاني لسعود و بإذن الله محدن يدخله معه الأ زوجته و عياله
سعود و هو يبوس يد أمه\ بأذن الله يالغالية المهم أنتي لا تصيحين شوفي كم يوم و أنا عندك و خاطري اقعد عندك طول عمري لكن أنتي تعرفين دوامي هناك غصب عني أروح
أم سعود\ الله يحفضك و يخليك لي يا يمه و جعلني أشوفك مرتاح مع الحرمة الي تعرف قدرك و ذي السنه ما خلصت قول أمين
سعود\ أمين شكلك محصله لي وحده يمه
أم سعود\ ان شاء الله يمه والله إنها بنت ما تعوض الله يكتبها من نصيبك
سعود بلحظة جات عيون هند ببأله تمنى يشوفها مرة ثانيه لكن وين ؟\ الله يكتب الي فيه الخير ........

***************

الخبر
الساعة الـ 05:00 عصرا

واقف بالمطار يخلص له أوراق الرجوع ما بين زحمة الناس و انتظارهم في طابور واحد الفترة الأخيرة تعود على المطار و صار حافظ كل ركن فيه صالاته تجمع ناس أشكال و ألوان تجمع دموع و ضحكات و غربة و فراق تجمع قلوب و تشتت قلوب المطار صار بالنسبة له حياة مستقله من المشاعر المتناقضة خلص أوراق أخوه و طلع من وسط الزحمة \تفضل بعد نص ساعة الطيارة
محمد\ تسلم خلاص الله يهديك أرجع الخبر لو انك مخليني اخلص أوراقي بنفسي يمديك قطعت نص الطريق
يوسف\ بنتظر سعود بعد ساعة بيوصل
محمد\ ليش ما جاء بسيارته ؟
يوسف\ لا شحنها تعرف الأن أول الشتاء أمطار و سيول الطريق
محمد\ الله يعيني على برد بريطانيا بس
يوسف\ بتعود
محمد\ ههههههه تصدق صرت أحس نص حياتك بالمطار
يوسف\ ههههههههه أي والله شايف بس
محمد\ يوسف
يوسف\ هلا
محمد\ أنا أعتذر منك على الي سواه أبوي و أوعدك أرفع رأسك يا أخوي
يوسف و هو يربت على كتفه\ أنت لا تفكر الا بدراستك وبس خل الباقي علي بس لا تنسى وعدك و أرفع رأسي فيك يا محمد ......

************

جده
الساعة الـ 06:00 مساء

رتبت أخر ملابسه بالشنطة الكم شهر الي راحت تعودوا على و جوده بينهم صحيح أصغر منها بس يضل هو الرجل و أمان البيت و تحس بالفخر بوجوده جمبها \ باقي لك شي كذا ؟
نواف\ لا خلاص مشكورة والله
هند\ على ايش
نواف\ رتبتي لي الشنطة
هند\ ههههههههه أجل بخليها مثل لما تجينا
نواف\ هههههههه لا يغرك الترتيب بس
هند\ تكفى عاد ما كأنها حوسه
نواف\ لا دققين عاد
هند\ هههه طيب
نواف\ أقول هند
هند\ لبيه
نواف\ مرتاحة بشغلك ؟
هند\ فوق ما تتخيل و بكرة بستلم أول راتب
نواف\ حلو كذا اقدر أروح و أنا مطمئن عليكم
هند\ لا تخاف نحن نعرف ندبر حالنا المهم أنت أهتم بدراستك ننتظر اليوم الي تسير فيه مهندس قد الدنيا
نواف\ ان شاء الله
هند\ أنت متى طيارتك ؟
نواف\ الساعة ثمان
هند\ أجل يالله أنزل عند أمي تلقى الصالة غرقت الحين
نواف\ ههههههههههه الله يعين .........

**************

الخبر
الساعة الـ 06:40 مساء

نزل من السيارة و أستنشق هواء كورنيش الخبر تعود عليه تسع سنوات أسبوعين بس غاب عنه حس بشوق له لدرجة أنه راح له قبل يروح الشقة صار يحس نفسه من أهل المكان \ بداء البرد تصدق
يوسف\ أيه من كم يوم
سعود\ الله يعين
يوسف\ كيف صحة الوالدة طمئني ؟
سعود و لثاني مرة تجي هند ببأله اليوم و أبتسم وهو يتخيل عيونها على البحر\ تمام والله أحسن من أول بعد العلاج الطبيعي
يوسف\ يعني بترجع تمشي ان شاء الله
سعود\ بأذن الله بدت تحرك رجولها على خفيف و نقول يارب
يوسف\ يارب
سعود\ كيف كانت ملكة أختك ؟
يوسف و هو يطالعه بنص عين\ زينه بس أنت مالك دااعي
سعود و هو يتحسس يده مكان لمسة هند\ ههههههههه والله هذاك اليوم أمي عندها موعد و أنا وديتها ما قدرت أجي الشرقيه
يوسف\ حتى محمد جاء من أخر الدنيا و أنت القريب ما جيت
سعود\ والله و هو لسى موجود ؟
يوسف\ لا سافر اليوم قبل ما تجي بساعة و شوي
سعود\ خسارة كان نفسي أشوفه و أسلم عليه .........

************

جده
الساعة الـ 12:00 صباحا

كانت جالسة فوق السرير و تمسح يدينها بالكريم تحسست يدها اليسار مكان لمسة سعود و هي تبتسم .. ماشاء الله الظاهر أن هذا سعود الشغالة قالت هو الي يقدر يشيل أمه لوحده باين من عضلاته يا ترى متزوج أم سعود باين إنها حرمة كبيرة الظاهر عندها بنات قبله ما هو بكرها إلا اذا ما جابته بدري بس لو عندها بنات ما يجون معها لو يوم كل موعد بس أشوف الشغالة تجي معقول ما عندها بنات يصير .. ضربة نفسها بالمخده و أنا اش دخلني فيه آوف لسى أحس بحرارة لمسته كأنه اليوم و الا وقت تأسف باين أنه أختنق لين نطقها .. ضحكت هند على نفسها و طفت النور و نامت . يا ترى بيكتب لك القدر تشوفينه مرة ثانية او لا ؟؟


**************

الجزء الثامن و العشرون


شهر و نص مرت على أبطالنا بلمح البصر الشخص لما يعيش يومه بس لغيرة يحس أن أيامه تتسارع معه ما يقدر يسيطر عليها او يستفيد لنفسه بشي عملهم جهدهم تعبهم حتى مشاعرهم تقدم كبش فداء لسعادة غيرهم و هذا الي نشوفه بأبطال قصتنا الثلاث هند و سعود و يوسف جالسين يقدمون أغلا لحظات عمرهم لجل بسمة و راحة الي حولهم .....

الأثنين
جده
الساعة الـ 05:00 عصرا

خلاص قررت و ما راح تهتم لكلام احد هي تشوفها احسن وحده لولدها كل شي فيها يناسب ولدها تفكيرها طيبة قلبها إهتمامها بأهلها لأزم تكلمه الأن و تقوله اختيارها أخذت جوالها و ضغطت على أسمه ..
سعود\ هلا يمه هلا با الغالية
أم سعود\ السلام عليك هلا بك يمه طمئني عنك ؟
سعود\ و عليكم السلام الحمد لله يمه بألف خير أنتي وش أخبارك و كيف صحتك عسى زينه ؟
أم سعود\ الحمد لله يمه و أبشرك رجلي اليمين صرت احركها أحسن من أول
سعود\ الله يبشرك بالجنه ايه هذي الأخبار الي تفرح
أم سعود\ هذا كله بفضل الله ثم هند
سعود\ هند من ؟
أم سعود\ البنت الي تسوي لي العلاج الله يجزاها الجنه يدها خفيفه و مباركة
سعود\ الحمد لله ما قصرت
أم سعود\ أي والله يمه حتى طلوع السيارة علمتني لين صرت اطلع من نفسي أنا اشهد إنها ما قصرت
سعود حس بنبضه بقلبه\ هي الي جات معك السيارة لما وديتك أنا ؟
أم سعود و هي تحس أن مهمتها بدت تسهل\ إيه يمه تذكرتها
سعود و بباله وهي ذيك العيون تنسي يمه\ إيه يمه
أم سعود\ اجل وش رأيك فيها ؟
سعود\ من أي ناحية يمه
ام سعود\ البنت أخلاق و آدب و جمال و فوق كذا بنت ناس أنا اشوف محد يناسبك زيها يمه تكفى يا سعود خلني اشوف عيالك قبل لا أندفن بالتراب
سعود\ الله يهديك يمه وش هالكلام الله يطول لي بعمرك و تشوفينهم
أم سعود\ أجل خلني اخطبها لك
سعود\ زين يمه الي تشوفيه أنا جاي الأربعاء بإذن الله و يصير خير ......

****************
جده
الساعة الـ 07:30 مساء


دخلت الصالة و بيدها دبدوبها و دارت بعيونها في الجالسين ما هي بينهم صارت تفتقدها و ماتشوفها الا خميس و جمعه و باقي الأيام تشوفها عشر دقائق الصبح قبل ما تروح هي المدرسة و بالليل تنام و هي لسى ما رجعت ..
أم نواف\ تعالي حبيبتي تبين شي ؟
منال\ ابي هند
أم نواف\ بس هند ما تجي الحين يمه ليش تبينها ؟
منال بدت عيونها تدمع\ أبيها زي أول تنيمني و تقولي قصة لين أنام
أم محمد وهي تأشر لمنال تجي جمبها\ تعالي يمه هنا
جت منال و جلسة جمب جدتها بدون ما تتكلم
أم محمد\ أنتي تدرين ليش هند تشتغل ؟
منال\ عشان تجيب فلوس هي تقولي كذا
أم محمد\ و حنا وش نشتري بالفلوس ؟
منال\ نشتري كل شي
أم محمد\ يعني يا يمه هند تشتغل و تتعب عشان تشتري لنا كل الي نبيه تشتري لك ملابس و العاب و كل الي تطلبينه
منال\ بس أبى اشوفها كل يوم
أم محمد\ خلاص لا تقولين تبين شي و تترك هند الشغل و تجلس بالبيت
منال\ لا أنا اباها تشتغل بس اباها تجي بدري
أم محمد\ خلاص نقولها حاولي تجين بدري عشان منال
أم نواف\ بعدين يوم الأربعاء أخر يوم للمدرسة و بتشوفينها طول الإجازة
منال\ طيب
أم نواف و هي توقف\ زين يمه قومي أنا أقولك قصة لين تنامين حبيبتي .....

************

جده
الساعة الـ 08:00 مساء

خلصت حالاتها اليوم لكن باقي لها ساعة في الدوام و لأزم تكملها و تنتظر أبو منذر الي يجيها الساعة تسع اتمللت في الجلسة و قررت تروح تأخذ لفة بالأقسام يمكن تشوف رؤى شافتها جالسة لوحدها بزاوية و باين إنها جالسة بجسمها بس لكن عقلها بعيد \ سلام الي أخذ عقلك يتهنى به
رؤى\ و هو فيه غير الهم يتهنى بعقولنا ؟
هند\ ايش فيك ؟
رؤى\ أخوي ترك العمل
هند\ ليش ؟
رؤى\ اتهاوش مع مديرة و طرده
هند\ لا آله إلا الله و الأن ايش بيسوي ؟
رؤى\ جالس في البيت ينتظر الفرج من الله
هند\ و نعم بالله الله يعوضة بالي احسن منه
رؤى\ امين
هند\ يعني الأن صار كل شي عليك في البيت ؟
رؤى\ ايه بس الحمد لله على كل حال المهم الأن إجار البيت له شهرين ما دفعناه لأزم ندفعه الشهر هذا او ننطرد
هند\ راتبك يكفي إجار و مصاريف شهر ؟
رؤى\ ماأظن يا هند بس أدعيلي ربك يفرجها
هند\ الله كريم لا تشيلي هم أنتي الله يسترها معكم قومي معي نصلي العشاء و أدعي ربك يرزق أخوك بشغل أحسن من الي قبله ......


************

الخبر
الساعة الـ 09:45 مساء

يتقلب في فراشة من ساعة ما هو قادر ينام كلام أمه يتردد في أذنه تبي تخطب له البنت الي سحرته بعيونها و لا قدر ينساها بس يا ترى بتوافق علي بعد ما تعرف أني مطلق و الا بترفض زي الي قبلها ؟ ... طيب أنا مقتنع فيها هي تشتغل و شغلها ما هو عيب بس اخاف إنها تصرف على أهلها و ما تروح معي الشرقية يالله يسرها اخاف أقول ما أبيها و تزعل أمي و ترجع تتعب مرة ثانية بس والله عيونها تذبح حتى صوتها عذاب لو تصير من نصيبي بس يمكن اكون أسعد أنسان أحس كأني أعرفها من زمان الله يسامحك يا يوسف دخلت ذي الفكرة برأسي حتى أسمها هند ههههه والله حلو أسمها هند و سعود يا سلام راكبين على بعض ..... دفن رأسه بالمخدة و هو يتخيل شكل هند و هي بقربه و ملكه لوحده أبتسم لطيفها و غمض عيونه كأنه يحرس طيفها داخل عيونه و يمنعه من الإبتعاد عنه ......


******************

الأربعاء

جده
الساعة الـ 07:30 مساء

دخلت للغرفة الي ينزلوا عبايتهم و يحطوا أعراضهم فيها بالمركز فتحت الكبت بتردد هي خايفة من ردة فعلها بعد الي بتسويه تخاف تزعل منها و تحط بخاطرها و تفهم شكواها لها على أنه عطف من جهتها لكن الحقيقة إنها صارت مثل أختها و ما عملت معها كذا الا من حبها لها و لهلها هي تعرف معنى الشعور أنك تكون بلا سقف بيت يحميك جربت الخوف من النوم بشارع جربت تحمل هم أم و أخوان بلا ماؤى يحميهم صعب تخليها تحس بالي حسته فترة من عمرها أخذت كمية اكسجين كبيرة أشبعت فيها أطرافها و مدت يدها بظرف دسته بشنطتها و رجعت كل شي مثل ما كان سكرت الكبت و طلعت من الغرفة و هي مرتاحة على الي سوته ......


**********

جده
الساعة الـ 08:30 مساء

الظاهر موضوع زواجة هذا ما راح يعدي على خير اذا أرتاح هو عارضوا أخواته و اذا رفض هو وأفقوا خوأته و أمه بينهم ما تدري ترضي من لكن الأن تصدمه كذا بهذا الكلام ما هو قادر يستوعب .
أم سعود \ بس البنت ما في شي يعيبها و أنا مرتاحة لها
أم عزام\ يا يمه تقولين مطلقة و ما في شي يعيبها تعرفين ليش تطلقت طيب ؟
أم سعود\ الزواج نصيب والله ما كتب لها معه نصيب خلاص تطلقت تنعاب
أم عزام\ ايه تنعاب معقول تبين ولدك يأخذ وحدة مطلقة
أم سعود\ و ليش ما يأخذها دامني أحس إنها بتريحه والرجل هو الي طلقها ما هي هي طلقته يمكن العيب منه ما هو منها
أم عزام\ تبقى مطلقة و الله ماأني قادرة اصدق كلامك يمه أم فارس قولي شي
أم فارس\ طيب يمه خلينا نسال عنها و عن أهلها أول
أم سعود\ أنا سألت عنها و البنت ما عليها كلام لا هي و لا أهلها
أم عزام\ يعني أنتي مخططة كل شي بس جاية تقولين لنا
أم سعود\ إيه أجل بستشيركن أنا
أم عزام\ والله تلقينها يوم تعالجك شافتك على نيتك معها قالت خلني اضحك عليها و اخليها تزوجني ولدها
أم سعود\ كلن يرى الناس بعين طبعه يا بنيتي
أم عزام\ وش قصدك يمه ؟
أم سعود\ يعني مفكرة أن البنت من طينتك تسوي المشاكل و ترمي أغلاطها على الناس أنا ما شفت زي أخلاقها معي و مع الكل والله إنها تسوى مها و كل الي جبتيهم لخوك
أم عزام\ بس عاد ما أجيب مطلقات سعود لأزم يتزوج وحدة ما هي مطلقة ما هو أحسن من غيرة ياما رجاجيل طلقوا و اتزوجوا من بنات و عاشوا حياتهم
أم سعود\ و البنات الي جبتيهم و لا وحدة وأفقت على أخوك و على قولك ياما مطلقات اتزوجن و عاشن حياتهن أحسن من أول
أم عزام\ يمه أنتي أكيد تمزحين سعود أنت ليش ساكت قول شي لا تكون موافق بس على الي تقوله أمي ؟
سعود ما هو عارف أصلا وش يقول هند الي سحرته بعيونها و عاش ليالي يحلم بطيفها مطلقة و كانت بحظن رجال ثاني بس أمي تمدحها يا ترى وش العيب الي فيها ما هو واضح لأمي خلى الرجال يعافها و يطلقها ؟
أستغلت أم عزام سكوت سعود و تكلمت\ شفتي يمه حتى سعود ما يبيها هو الي ناقص يتزوج مطلقة أنا ازوجه الي تسواها هي والي جابها
أم سعود و صوتها بدا يرتجف من الغضب و جسمها يهتز \ و أنا قلت سعود ما يتزوج غير هالبنت مدام رأسي يشم الهواء و أشوف من الي كلامه يمشي
سعود لما شاف أمه بدت تزعل خاف عليها يرتفع ضغطها مرة ثانية و تنجلط و السبب أم عزام كافي إنها السبب في الي صار لها أول تكلم يهدي أمه\ خلاص يا الغالية أنا موافق على الي تبينه أتزوجها حتى لو مطلقة أنا بعد مطلق بس لا تزعلين أنتي و تعبين عمرك تكفين أبيك أنتي الي تروحين تخطبينها لي
أم سعود\ الله يرضى عليك يا يمه .......

*************

الخبر
الساعة الـ 09:00 مساء

جالسين يمشون على كورنيش الخبر الجو صاير بارد مرة لكن الملل ذبحهم بالشقة فقرروا يطلعون يمشون شوي .
علي\ ذبحتنا بالبرد يا يوسف
يوسف\ ههههههه أنت ما تحمل شي
علي\ يعني أنت يالي مرة ما تحس بالبرد ؟
يوسف\ أحس بس أحيان ما يأثر علي
علي\ هههههههههه ليه عندك برود مشاعر داخلي ؟
يوسف\ هههههههههه الا جمود خلاص
علي\ افى وين راحوا الي كانوا يدفون مشاعرك ؟
يوسف\ خلاص بطلنا من زمان
علي\ لا والله جد من متى ؟
يوسف\ من قبل رمضان خلاص أفكر أتزوج بس مو الأن يمكن سنه كذا
علي ببأله حلو أنه فتح موضوع الزواج بنفسه\ كلام حلو الله يوفقك بس ها ببالك وحده و الا بتقعد لنا زي ناصر
يوسف للحظة جات ساره بباله لكنه غمض عيونه بسرعه يطرد طيفها \ لا والله محد ببالي بس اكيد ألاهل بيشوفون لي إلا شخباره أخوك لسى ما حصلتوا له عروس تناسبه ؟
علي\ والله تقدر تقول فيه وحده شافوها أخواتي و مدحوها و تحس ناصر ما قال فيها شي
يوسف\ أجل وش منتظرين روح أخطبها له ؟
علي\ منتظرين رأيك طال عمرك
يوسف\ وأنا وش دخلني ؟
علي\ صراحة في ملكة أختك أمي و أختي الكبيرة حضروا و قالوا عن هالبنت و مدحوا فيها و طلعت مع أختي الثانية بالكلية و تعرفها
يوسف\ و من بنته طيب ؟
علي\ أختك يوسف أنت تعرفني من أيام الثانوي و تعرف ناصر و إني أنا تقريبا الي مربيه بعد وفاة ابوي الله يرحمه أنا طالب القرب منك و نبي أختك لأخوي ناصر
يوسف تمنى لو يبؤس علي على رأسه منار كانت اخر حجر بطريق مستقبله والأن تنخطب و من شخص يعتبره أخوه الثاني بعد سعود\ والله ما راح أحصل أحسن منكم نسب لنا و لا عريس مثل ناصر الله يحييكم باي وقت و أعتبر موافقتي جاهزة بس رأي البنت تعرف لأزم
علي\ الله يخليك هذا العشم فيك .....

**********

جده
الساعة الـ 10:30 مساء


جده
الساعة الـ 10:30 مساء

فتحت الخط و هي مبتسمة بخاطرها عارفه وش عندها متصله ذا الوقت بس حبت تستهبل عليها \ هلا وغلا
رؤى\ لا أهلا و لا سهلا
هند\ ههههههههه افى وشعندك معصبه ؟
رؤى\ ما تعرفي ليش يعني ؟
هند\ لا
رؤى\ من الي سويتيه والا تستغبي عليه
هند\ وش سويت أنا فهميني ؟
رؤى\ أنا قلت لك الي صار معي مو عشان أطلب منك فلوس قلت لك بس لإنك مثل أختي و افضفض لك
هند\ أي فلوس أنا ماني فاهمه شي ؟
رؤى\ يعني مو أنتي الي حطيتي فلوس بشنطتي اليوم في المركز ؟
هند\ لا مو أنا
رؤى\ أجل مين ؟
هند\ أختك
رؤى\ كيف ؟
هند\ ما هو تقولي أني مثل أختك و أنتي أختي مارضى عليك تكونين مهمومه و ما اوقف معك و أساعدك أنا احتجتك أيام وأنتي ما قصرتي معي حتى الشغل أنتي قدمتي لي أوراقي فيه و كنتي معي بكل شي
رؤى\ بس صيحتيني بعتبرها سلف و ارجعها لك و ياويلك لو ما تأخديها
هند\ ههههههه ابشري لو بيدي اعطيتك الراتب كله بس أنتي تعرفي البئر و غطأها
رؤى\ يكفي إنك فكرتي في يا هند ما قصرتي والله بس كيف حطيتيها من غير ماأشوفك ؟
هند\ لما كانت عندك مريضة سهله ترى
رؤى\ هههههههه اليوم تعلمتي تحطي من غير ما حد يشوفك بكرة تتعلمي تسرقي
هند\ هههههههههههه الله لا يحوجنى
رؤى\ أي والله
هند\ تعرفي المريضة الي عندي أم سعود ؟
رؤى\ ايواه ايش فيها ؟
هند\ اتخيلي بتزورنا البيت بكرة
رؤى\ ليش انتوا تعرفوها من قبل ؟
هند\ لا بس يوم الثلاثاء قالت لي باجيكم البيت يوم الخميس قلت لها الله يحييك وش أقولها
رؤى\ ما عندك فكرة ايش تبى من دي الزيارة ؟
هند\ لا استحيت أسالها
رؤى\ أكيد تبى تخطبك يا غبية
هند\ هههههههه لا وين نسيتي أني وحده مطلقة وش تبي فيني
رؤى\ وهي تعرف إنك مطلقة ؟
هند\ ايه هي سألتني إذا متزوجة او مخطوبة و قلت لها أني أتزوجة واحد شهرين و اطلقت منه
رؤى\ سألتك ليش اتطلقتوا ؟
هند\ إيه و قلت لها الحقيقة أنا مغصوبين على بعض و الله ما كتب نصيب
رؤى\ اقص لك يدي ادا الموضوع ما فيه خطبة أصلا هي واضح أنك معجبتها و أنتي ما هو ناقصك شي تقولي للقمر أنزل و أجي مكانك
هند\ لا دخلي أفكارك في رأسي يا بنت
رؤى\ بنشوف أسمعي أمي تناديني بقفل دحين و أنتظر أتصالك بكرة تخبريني ليش زارتكم ؟
هند\ أيه اكيد سلمي على أمك
رؤى\ اوكيه باي
هند\ باي

قفلت هند من رؤى و كلامها يدور بعقلها معقول يكون كلام رؤى صح بس تخطبني لمين إلي فهمته من شغالتها و شفته أن عندها ولدين واحد تعودت أشوفه كل مرة معها و واحد شفته بس مرة وحده و اختفى أكيد أنه متزوج و منشغل عن أمه بس الثاني يكسر الخاطر كل موعد أشوفه عند السيارة لين قدرت تطلع من نفسها و بطلت أطلع أنا بس شكله صغير ماأظن تزوجة أمه وحده مطلقة طيب يمكن تخطبني لثاني زوجة ثانية هو واضح أنه كبير أكيد متزوج اوووف يا رؤى شتتي مخي الله يهديك بس .....

(( طبعا هند ما تعرف أن فارس هو ولد بنت أم سعود و هي جدته ما هي أمه مثل ما تظن ))


******************

الجزء التاسع والعشرون



الخميس

جده
الساعة الـ 04:00 عصرا

الغيظ بيذبحها ما احد راضي يفهمها جالسة تاكل بنفسها من القهر و كلام الناس كيف اخوها الوحيد يتزوج وحده مطلقة الي قاهرها ان امها هي الي تبي كذا و اخوها مستسلم و كان الموضوع ما يعنيه ..
ام عزام\ يمه يعني انتي ملزمة على رايك خلاص ؟
ام سعود\ الله لا يعقوني بشر انا مكلمة البنت انا بنجيهم المغرب خلاص و ترى من الحين اقولك ان فتحتي فمك بكلمة كذا و الا كذا قدامهم والله بغضبي عليك
ام عزام\ من الحين لا بديت اشك ان هالبنت مسويه لك بلا اذا يريحك مني رايحة معكم
ام سعود\ بتروحين الدرب معك بتجلسين محدن غاصبك تروحين
ام عزام\ كذا يمه ؟
ام فارس\ خلاص لا تعصبين بامي تروح لناس تعبانه
ام عزام\ عادي هي بتروح لمن يعني وحدة مطلقة تشتغل بمركز معاقين يعني فاهمه حالت امك
خلاص معاد فيه يستحمل كلامها تغلط على زوجها على الناس سكتنا لكن تغلط على امها ما راح يسمح لها سعود\ انا اظن لو ما تروحين معهم افضل لاني ابي موضوع هالزواج يعدي على خير
ام عزام\ يعني قصدك لو رحت ما بيكون فيه خير صح ؟
سعود\ احلا شي يوم الواحد يكون سريع فهم
ام عزام و هي توقف\ زين افهم انها طردة ماشي يا سعود من الحين اقولك مالي شغل بموضوع زواجك بس ما هو تجي بعدين تقول زوجتوني وحدة ما هي من مستواي

قالت كلمتها وطلعت بدون حتى ما تستسمح من امها الي جرحتها بكلمة معاقين
التفت لامه و هو حاس بضيقتها سعود\ الغالية متى واعدتي الناس انتي ؟
ام سعود\ قلت لهم بعد المغرب نحن عندكم
سعود\ زين انتي تعرفين طريق بيتهم عدل يمه ؟
ام سعود و هي تبتسم\ و ليدي فارس هو الي يعرف بيتهم
فارس\ ههههههههه فضحتي سرنا يا جده
سعود\ ههههه وانا اقول من الي ورى موضوع زواجي ذا ؟
فارس\ هههههههه شوف باقي لي كم شهر و اتخرج ابى اتزوج على طول ما هو يقولوا انتظر خالك اول
ام فارس\ ما شفت زي ذا الولد مستعجل على العرس محد بيوافق عليك لين تتوظف
ام سعود\ خليه يا بنيتي الله يوفقة بوظيفة و حرمة سنعه تعرف قدرة .......


*****************

جده
الساعة الـ 06:10 مساء


من ساعة وهي قدام الكبت ماهي عارفة وش تلبس محتارة و مرتبكة هي متعودة تشوف ام سعود على طول بس بملابس العمل ما هو في بيتهم هي ماتدري جايه ليش واذا معها حد او لا .. اوف طلعت كل الملابس و ما هو عاجبني شي البسه مدري ليش مرتبكة كذا كاني اول مرة بشوف ناس .. دخلت عليها منال الغرفة و شافت حوستها
منال وهي تطالع ببراء\ انتي وين بتروحين ؟
هند\ ولا مكان ليش ؟
منال\ ليش ملابسك كلها برى بترجعين عند سلمان
هند انقبض قلبها من ذكرة سلمان من فترة ما جاء ببالها و لا فكرت فيه وش فكر منال فيه الان قربت منها و حضنتها \ لا حبيبتي خلاص سلمان سافر بعيد معاد بروح انا عنده
منال\ حتى يوم يرجع من السفر ما بياخذك ؟
هند\ لا
منال\ طيب رجعي ملابسك
هند\ ههههههههههه ابشري بس وش رايك البس ايش عشان الضيوف ؟
منال\ كلها حلوه
هند\ والله
منال\ انا نسيت الضيوف تحت جدتي قالت لي اقولك تجين
هند\ الله يصلحك يا منوله ليش ما قلتي من اول اووف لسى ما لبسة


تحت بغرفة الضيوف

كانت ام محمد تسولف مع ام سعود و ترحب فيها هي و بنتها ام فارس احساسها ناحيتهم بالارتياح و كانها تعرفهم من زمان لكن هي ما تعرف السبب
الي خلى ام سعود تزورهم بدون معرفة سابقة خصوصا ان ضروفها الصحية ما تساعد كثير و تستخدم الكرسي المتحركة لسى ....
ام محمد\ حيا الله ام سعود نورتوا والله
ام سعود\ الله يحيك
ام نواف و الي كانت داخلة بالقهوة\ حياكم الله البيت بيتكم
ام سعود\ تسلمين يا بنيتي ما شاء الله من شفت هند و اخلاقها قلت اكيد وراها ام سنعة مثلك
ام نواف\ هند بنت جدتها هي الي ربتها
ام سعود\ و النعم والله انا اشهد انك ربيتي يام محمد
ام محمد\ الحمد لله هند من صغرها و هي تنام معي تعلمت مني كل شي
ام فارس\ امي تمدحها على طول شوقتني اشوفها الا هي موجودة ؟
ام نواف\ ايه الحين تنزل ....


,,,,,,,,,,,,,,,

الخبر
الساعة الـ 06:15 مساء

طلع الدرج و هو يغني و مبسوط طبعا ابوه و امه ما هم موجودين يعني اخواته بس الي بالبيت اكيد بيستانس معهم و يفكر يخرجهم كمان
قابلته منار باول الصالة\ حركات تغني و مبسوط وش عندك ؟
يوسف\ هلا يا عروستنا ابد مستانس
منار\ طالع زين انا منار ما هو امل عشان تقول عروستنا
يوسف\ هههههه اشوف انا قالولك احول
منار\ لا بجد مبسوط انت ؟
جات امل على صوتهم\ دوم مبسوط يوسف
يوسف\ هلا بعروستنا القديمة
منار\ وش عندك انت عروستنا و عروستنا القديمة ؟
امل\ احسه محصل لك عريس صح ؟
يوسف\ ههههههه ذكية
منار و هي تبعد عنهم \ ما عندكم سالفة والله
يوسف\ وليش لا يقولون لتزوجة البنت الكبيرة فتحت الباب للي وراها على طول
منار\ اتزوج انت اول
يوسف\ خلاص لا تطمئنت عليك انتي و امل اتزوج
منار\ والله و من نخطب لك ؟
امل\ ساره طبعا
يوسف بلع ريقة بالغصب\ من ساره ؟
امل و هي تطالعة بنص عين\ بنت خالتي اصلا حط بالك هي او العنود بنت عمي محمد
يوسف\ ههههههه لا وش العنود هذي من يفتك من لسانها اعوذ بالله طولها مرتين
منار\ اجل نخطب لك ساره والله انا احبها و احسها تناسبك
يوسف يغير السالفة\ زين خلونا من ذي السالفة الحين وش رايكم نطلع نتعشى برى بدخل ابدل واطلع احصلكم جاهزات
ماكمل كلامة الا اخواته بثواني مختفيات من قدامه يوسف بخاطرة .. يا حب البنات لطلعات هههه آآه بس معقولة اخطب ساره و توافق
علي ما اظن ......

,,,,,,,,,,,,,

جده
الساعة الـ 06:30 مساء

من جلسة و هي تحس ام فارس بتاكلها بعيونها ما تحب حد يطالع فيها بذي الطريقة كانها تتفحصها خلاص وجها صار احمر و باين عليها الضيق
تبى تتنفس براحة لكن هي مضطرة تجلس عشان ام سعود الي تعنت و جات لهم البيت لكن المنقذ جاء من ام سعود نفسها\ هند يا بنيتي
جيبي لي كاسة مويه
قامت هند وهي تبتسم لها\ ابشري خالتي
ام سعود ما كانت عطشانه لكنها حست بضيق هند و هي بخاطرها كلام جايه تقوله و صعب تقوله قدامها\ بما انك يام محمد كبيرة هالبيت انا
جاية لكم اليوم بطلب و اتمنى ما تردوني
ام محمد\ ان قدرنا عليه جاكم يام سعود
ام سعود\ باذن الله تقدرون انا ربي ما عطاني غير ولد واحد بعد بنتين و كل الي اتمناه بالدنيا اني اشوف عياله قبل لا اموت و انا من شفت
هند و هي داخلتن قلبي واليوم جاية اخطبها له و ترى انا اعرف عن هند كل شي و ضروف ولدي تشبه لها لانه تزوج قبل من بنت عمه بس
ما ربك اصلح بينهم
ام محمد\ الله يحيكم و باذن الله كان لكم عندنا نصيب تاخذونه لكن تعرفين لازم اخوها يدري و راي هند قبل كل شي
ام سعود\ حقكم يا ام محمد و الي تبون تسالون عنه حنا حاضرين ما نخبي عنكم شي
ام نواف\ والله يام سعود بما انك تقولين انك تعرفين عن هند كل شي و ما جيتي الا وانتي ساله عنها اكيد تعرفين عن حالة ابوها وانه تقريبا
مايدري عنا بالشهور يعني لو صار لكم عندنا نصيب ما عندنا الا اخوها يتفاهم معه
ام سعود\ اكيد يام نواف ولدي كمان يتيم ابو و ماعنده حد قريب لا خوال و لا عمام لكنه رجال و يعرف لذي الامور باذن الله ما يقصر بشي
على كلام ام سعود الاخير دخلت هند و مدت لها كاسة الموية و بالها كانت تفكر من هذا الي تتكلم عنه ام سعود و ليش ؟

,,,,,,,,,,,,,,,


الجمعة

جده
الساعة الـ 01:20 ظهرا

دخلوا البيت مع بعض بعد ما صلوا الجمعة في المسجد القريب من بيتهم اصواتهم مستانسة و مبسوطة و هذا الي يفرحها اليوم جمعة لكن بدون
مطارات و سفر و فراق ضناها عندها اسبوع كامل (( اجازة عيد الاضحى طبعا )) ابتسمت لهم \ يا هلا بعيالي والله
سعود\ يمه ترى انا ميت جوع حطوا الغداء كان جهز
ام سعود\ جاهز يمه الحين تحطه ياتي
سعود\ احس اليوم نفسي مفتوحة على الاكل
فارس\ ههههههههه من صاحب العيون العسلية والله
سعود بغرابه\ منهو ؟
ام سعود و الي ابتسمت بعد ما فهمت قصد فارس وجهة له كلامها\ الله يهديك يمه روح غسل خل نتغداء بس
سعود مسك فارس من طرف يده\ تعال من قصدك انت ؟
فارس\ هههه الخطيبة
سعود للحظة حس بقشعريرة بجسمة فعلا هند عيونها عسلية بس فارس وش دراه رص على اسنانه و طالعة بنظرة\ وانت وش دراك ؟
فارس كتم ضحكته على ملامح سعود الي باين فيها الغيرة \ ابد الله يسلمك بس كم مرة تجي السيارة مع جدتي ايام كانت تدربها و لمحتها بس
سعود\ اهااا طيب حاول تغض بصرك عن بنات الناس المره الجاية
فارس\ ههههههه ابشر
ام سعود\ الله يهديكم بس قوموا نتغداء برد الاكل وانتم تسولفون
فارس\ والله يا جدتي مهي سوالف كنت بنطق من دحين و المحروسة ما دخلت البيت بكرة الظاهر من باب الحوش بطلعوني
سعود وهو يجلس على سفرة الغداء\ بدري امس خطبنا ما ندري يمكن محد يوافق ...

,,,,,,,,,,,

جده
الساعة الـ 02:30 مساء

كل شعرة بجسمها وقفت سعود يخطبني انا؟ لسى صوته يرن بأذني و لمسته ما نسيتها و أنا ما شفته الا مرة وحده بس وش يبي فيني بلعت ريقها
\ جدتي انتي متاكدة ان ام سعود قالت لكم عرفت عنا كل شي ؟
ام محمد\ ايه يمه ما جات الا سالت عنا
هند\ يعني تعرف اني مطلقة شلون تخطبني لولدها ؟
ام محمد\ يمه هو كمان كان متزوج و مطلق
هند\ و ليش طلق ؟
ام محمد\ يا بنيتي امه تقول ما صار نصيب بينهم و الحرمة راعية سنع ما قالت لنا ليش بنتكم تطلقت عشان نسالها عن ولدها
هند\ مدري يا جدتي قولي انتي وش رايك ؟
ام محمد\ والله ان قلبي ارتاح للحرمة و بنتها و احس انها شاريتك و الا ما جات تخطبك و هي على كرسيها
هند\ حتى انا ارتاح لها و احبها يا جدتي لكن انا بتزوج ولدها و الي اعرفه انه يشتغل بالشرقية و عايش هناك
ام محمد\ انا قلت لنواف يسال عنه اليوم واذا انه رجال سنع و يستاهلك تروحين معه لو لاخر الدنيا يمه و قلبي مرتاح عليك
هند\ انا بستخير و ارد عليك
ام محمد\ و النعم بربك يمه الله يكتب لك الي فيه الخير .....

,,,,,,,,,,,,,,

الخبر
الساعة الـ 03:00 مساء


حس انه استعجل يوم قالهم يفكر يتزوج هالبنات ما يصدقون خبر على طول نشروا الخبر في البيت و عاد امه من يفكه منها الحين
ام احمد\ اخيرا فكرت تريح قلبي يا يوسف و تزوج الي بعمرك عيالهم بالمدرسة و انت جالس بدون حرمة
يوسف\ لسى يمه انا بس قلت افكر اتزوج ما قلت روحوا اخطبوا لي
ام احمد\ و عاد من زود السنع تقول لاخواتك قبل امك
يوسف اللهم جيبك يا طولت البال\ قلت لهم افكر اتزوج بس انتي بقولك روحي اخطبي لي يعني انتي غير عنهم انتي الاساس
ام احمد\ و العروسة جاهزة ساره بنت خالتك والله انها جمال وادب و اخلاق و من زمان نفسي انها تكون من نصيبك
ابو احمد\ من قال يوسف ما ياخذ الا العنود بنت اخوي و الا تبين الناس يقولون ترك بنت عمه للغريب
ام احمد\ لها عيال عم غيره يتزوجونها ما بقى الا يوسف ياخذ العنود
ابو احمد\ وش ناقصها بنت اخوي تفضلين بنت اختك عليها ما هو احسن من اخوانه تزوجوا بنات اعمامهم و شوفيهم مرتاحين ببيوتهم
كان يكتفي بالسمع لا امه جنه و لا ابوه نار جالسين يقررون مصيرة و لا يدرون بالنار الي تشب بقلبه العنود مستحيل يرضى فيها لو كانت اخر
بنت بالدنيا و ساره ماراح ترضى فيه بعد ما عرفت انه مغازلجي و راعي بنات طالع في اخواته الي حس من نظراتهم انهم متلؤمين فيه عمره
ما ارتاح في ذا البيت و لا بيرتاح تنهد و فتح الموضوع الاهم بالنسبة له الان\ الحين خلونا من موضوع زواجي و خلونا في منار ترى جايها
خطيب مكلمني اخوة قبل يومين و يبي راينا
منار بخجل انسحبت من جلستهم لكنها اشرت لاامل تجلس و تخبرها التفاصيل <<<<حركات بنات خخخخ
ابو احمد\ و من هو منهو ولده ؟
يوسف\ تذكر الله يسلمك حمد عبدالله الـ...... الله يرحمه ابو علي خويي الي كانوا جيراننا في حينا الاول
ابو احمد\ ايه اعرفه علي رجال و النعم فيه بس لمن يبيها ؟
يوسف\ لاخوه ناصر يشتغل بالمطار و جاهز لكل شي و ترى هم شافوا منار بملكة امل و بغوها
ابو احمد\ و علي تزوج ؟
يوسف\ لا والله لسى احسه يبي يزوج خواته و يتطمئن عليهن و بعدين يشوف نفسه
ابو احمد\ والله ناصر ذا ما عرفه زين خبري فيه بزر بحضن ابوه لكن بما انك تعرفه زين حدد معهم وقت يجونا فيه و الله يكتب الي فيه الخير ....

,,,,,,,,,,

جده
الساعة الـ 10:00 مساء


قدام البحر واقف و عيونها ما هي راضية تفارق خياله غصب عنه صار يسرح فيها يتذكر لمستها صوتها حركتها السريعة الحقيقة هو يدين لها
ذاك اليوم بسلامة امه لانه تفجاء بسقوطها و كان بيفقد السيطرة على نفسه لو لا ان هند سندت امه من الجهة الثانية رفع جواله و ضغط على رقمه
هو الوحيد الي يحتاجه الان
سعود\ سلام
يوسف\ وعليكم السلام هلا باهل جده
سعود\ هلا بك ليتك تطلع اقرب طيارة و تجي جده
يوسف\ اوب وش فيها النفسية ؟
سعود\ خطبت !
يوسف\ لا والله مبروك الف مبروك
سعود\ الله يبارك فيك وعقبالك
يوسف و هو يتذكر الخيارين الصعبة بين امه و ابوه\ خلك مني الان وشفيك انت خاطب و ماانت مبسوط كذا ؟
سعود\ مدري مبسوط و مااني مبسوط البنت ماعليها كلام بس انها مطلقة
يوسف\ مطلقة كبيرة يعني ؟
سعود\ لا عمرها 23 سنه لكن سالفة زواجها و طلاقها مدري كيف
يوسف\ شلون يعني ؟
سعود\ الي فهمته انها تزوجت واحد من اهل ينبع شهرين و طلقها
يوسف\ عندها عيال ؟
سعود\ لا تو تطلقت قبل رمضان
يوسف\ ما تدري يمكن نصيبك
سعود\ الله كريم
يوسف\ الظاهر هالايام ايام خطبة عند الكل وانا مدري
سعود\ لا يكون علي خطب بس
يوسف\ هههههه هو خطب و ما خطب
سعود\ شلون ؟
يوسف\ خطب اختي لاخوة ناصر
سعود\ لا والله الف مبروك عاد الان مالك حجه لازم تخطب انت بعد
يوسف\ نقول يارب ......