يا بلادي انا فيكي عايش ليه كده من غير كيان
غيري ليه 2000 مكان و انا لسه مش لاقي مكان
ليه صراخك وسط خوفك كله متحول لسان
صوته بس صداه في وسط الصحرا غطا على صوت الاذان

انا نفسي يا بلدي مرة اعيش بعيد عن المجاري
مش واخدها في حضني و القى ابني جنبي دمه جاري
سم طعمك جوه حلقي و لسه طعم السم ساري
خايف ابكي و اقول بحبك تهمتي تبقى الجنان

اذا كنت عشان عيونك قمت هديت المظالم
و في ثواني لاقيت في سجنك اي حد غير اللي ظالم
ياللي شكل تراب ملامحك لسه مجهول المعالم
وصفي ليكي بكل حزني شخص مهزوز او جبان

طبعك انتي غريب يا ارضي لسه برضه واطيه راسك
طيب بذلك ده بترضي . . مش في دمعك ده خلاصك
اللي باس راسك يا بلدي يبقى ليه زي اللي داسك
و اللي على شرفك محافظ زيه زي حد خان

امي فيكي يا ارضي تايهة خايفة على عرض البنات
و التعالب فيكي جايه تنهش الماضي اللي فات
و القيم و الحب فيكي حاجة من وسط الحاجات
نفسي ابطل ابكي مرة بس يظهر دمعي هان

برضه هديلك تحية و ارفع الراية لفوق
و ابقى متعشم في قلبك نفسي من نومته يفوق
نفسي جو العتمه يمشي و القي جاي بعده الشروق
نفسي وصفك جوه عيني يبقى صورة للحنان

غربتي في مصر .... من اعمالي