بسم الله
قبل لاتقرون الكلام الي تحت بنوه ان الطالبه هذي عقلت بنسبة 80 بالميه يعني استروا على ما واجهتوا
- إيش كآن فصلك في أول إبتدآئي .. ؟ يعني ( أ , ب , ج ) ..
اليوم الاول 1/4
اليوم الثاني 1/5
بعد اسبوعين 1/7
- أول مدرس/ه جآكم بالفصل ( بأول إبتدائي ) .؟على الأقل الإسم الأول ..
ما اذكر من اسماء مدرسات الا ابله رباب
مدرسة تربيه اسلاميه..اذكرها لانها كانت تربطني بحزام المريول بالكرسي
لما يحضر المفتش درسها..وصدقوني لو قلت الابله معذوره
- أول مشكله أو مشآده حصلت بينك و بين أحد التلآميذ .. ؟
يوه تقصدون اول بطوله كنت بثانيه ابتدائي وطبعا من دخلت المدرسه
وانا متفرعنه على اي احد اقدر اتفرعن عليه
وكان معاي بالصف بنت حجم كتكوتي قصيييره وعاملتها كيس ملاكمه..الى ان فاض الكيل بالبنت وطلع عندها قريبه برابعه وهههه الكتكوته قريبتها شاحنه 8 عجلات
طبعا الحجم يغلب الشجاعه وبالفرصه كنت محد قدي وانا اوري قريباتي ازرار المريول مقطعه..يعني فالنهايه فخر انه تنازلت بنت من رابعه وتخانقت وياي...فكري من الطفوله مافياوي
- من كآن يلبسك ( ثوبك / مريولك ) بالإبتدائي .. ؟
امي ومرات اختي الكبيره
ما اذكر بس اذكر اني انا الي البس الجوتي ويوه اول يوم وكل شي جديد والتزحلق عالسجاد
- كم قلم ضيعت بأول إبتدآئي و هل كآن ( أبوك / أمك ) تهآوشك عليه..؟
ما كنت كثير اضيع اقلامي خل نقول كنت اضيعهم بطريقتي اذكر اني كنت ابريهم قلم ورى الثاني الى ان يختفون من الوجود
الى ان دخلت صف ثالث او رابع وصار لازم نكتب بالحبر
- هل بكيت بأول يوم درآسه .. أو خليت ( أبوك / أمك ) يدآوم معآك .. ؟
لا ما بكيت لان كنت رايحه مع بنت عمتي وبنت ثانيه من قرايبنا ولاني افرح الساعات لما اتهرب من مراقبة الوالده فعادي..بس لما عمتي قررت تمشي وبدت بنتها تتمسك فيها وتبكي وقريبتي الثانيه بدت المناحه
وشوي الا العدوى بالساحه كلها..فتوقعت ان هذا الشرط الاول للقبول فالمدرسه فتباكيت خخخخ
بجد ما اذكر اني بكيت بس كنت اطالع نوافير الدموع من حولي وكلي ريبة مستريبه بان اهلي قرروا فالنهايه انهم طفشوا مني وحان وقت الخلاص.
- هل كنت تغآر من أحد التلآميذ .. مع ذكر السبب ؟
فيه اذكر بنت قررت المدرسه تحطها عالكرسي الي جنب بنت عمتي بدالي ومن يومها العلاقات الدبلوماسيه مقطوعه
وللحين اذكر اسمها ناديه
- بالمتوسط .. هل حسيت إنك كبرت .. ؟
احلى واربك عمر كل شي فاهمينه بس فاهمينه غلط!!!
وهو مرحلة الاكتشافات الخطيره
وكتابة الشعر والخواطر وطاف بالامتحان اذا السهره فيها فلم للبطل المحبوب
- كيف كآن شكل كتبك الثآنوية .. ( مكتوب عليهآ شعر , مرسوم عليهآ , نظيفة ) .. ؟
تصلح طوفه محول كهربا
شخابيط واوراق متقطعه وطبعا اثار عصير او بيبسي
وملاحظات مشخبط فوقها عن الي يدور فالصف لزميلتي الي جنبي
- هل خآلفت الأنظمه .. كم مره .. إذكر لنآ إحدى المخآلفات .. !
كنت مثاليه
مثاليه بارتكاب كل المخالفات..حتى اخواني العيال ما جات طلبات استدعاء كثر الي صارت معاي وللحين مو فاهمه ليش كانو يستدعونهم..يعني مره نسيت شنطتي بالباص وراح فيها..خلوني متعمده واستدعوا ابوي(وعز الطلب لانه الله يرحمه عنده كل شي عاااادي وبنته مظلومه وعلى نيتها ..فياخذني ونمر اقرب مطعم واكمل معاه مشاويره..الى ان ارد وتدري امي..الله يهديهم الامهات نصيرات الدراسه).
واكثر المخالفات بسبب التاخير بدخول الفصل
او اني جايبه شغلات ممنوعه(كوكايين هروين والذي منه) خخخخخ لا يعني مهربه قطوتي مره معاي.ومره لما طحت بروايات عبير كنت اقراها خلال حصة الاجتماعيات.
- إذكر لنا بعض الألقاب التي أطلقت على المدرسين .. مع ذكر السبب .؟
مدرسات الرياضيات لهم نصيب الاسد من كرهي لهالماده ومدرساتها دايما نفسياتهم موشي
ابله نفيسه= نفيسه الفطيسه
ابله ايناس= فلونه
هههههههه وابله فلونه كانت جايتنا احتياط وسمعت البنات الي هي تدرسهم يسمونها ابله فلونه وهي والحق ينقال نسختها..المهم لما ردت ابلتنا سالتنا منو الابله الي كانت ماخذه مكانها البنات يقولون ابله ايناس والفهيمه حضرتنا تقول ابله فلونه(والله على نيتي عبالي اسمها)طبعا اسمعتني لاني كنت مصره ان هذا اسمها وتم استدعاء ولي امري..شفتوا لما قلتلكم كانوا يخالفوا بس ودهم يخالفون.
- هل أخذت رئاسة فصل أو مسرحية أو إذاعة أو مآ شآبه
رهيبه الاسئله فعلا ذكرتني بالذي مضى..انا مابقى نشاط الا واشتركت فيه قبل استقر بكرة الطائره..كنت فالاذاعه والمسرح والموسيقى والمكتبه وفيه بعد كم نشاط بس فالنهايه خيروني اما المسرح اسمعوا الدراما كنت بالصف الاول اوالثاني متوسط = الخامس او السادس
المهم دوري كان الحجاج بن يوسف الثقفي وحاطيلي لحيه من ليف المواعين المهم فاليوم الي كنت انطره على نار خاصه ان ممثلي المفضل بيحضر عرضنا (الفنان عبدالرحمن العقل لانه كان المسؤول عن الانشطه الطلابيه فالمسارح الكويتيه اظنه لازال حتى هذا اليوم)
قبل وصوله بساعات الحجاج تخانق مع امير المؤمنين الوالي نسيت اسمه وتضاربوا ولان الحجاج اسرف بالعنف تم فصله من المسرحيه(اكثر خناقه تحسفت اني اشتركت فيها وماتوقعت يفصلوني من المسرحيه..يعني دوري مهم ورئيسي)
وتوقعوا شصار استدعوا ولي امري(سخيفين)وكنت ابكي بحرقه ماشفت عبدالرحمن العقل.
- هل يوجد ألقاب أطلقت عليك .. ( إعترف ) .. ؟
تصدقون ما اذكر مو معقوله اكيد فيه اممممم بشيك مع قريباتي لاني فعلا ناسيه
- أين كآن مقعدك في الصف الأول ثآنوي .. ؟
ووووووووورررررررى اخر شي حيث يسهل ارتكاب واخفاء الجرائم والبعد عن انظار المدرسات(بنات انا فيه جمله كنت اكرها ..لما تقول ابلة الرياضيات الي ما راح ترفع ايدها راح اخليها تقوم تجاوب ..ولما ارفع ايدي ابي السلامه تقوم بمنتهى الخبث تقولي..فلانه جاوبي)الي اعرفه الحرب خدعه مو الدرس !!!!
- في أي سنه إلتقيت بأعز أصدقائك .. ؟
لما عرفت اجمع حرفين ويطلع لهم معنى
لانهم قرايبي يعني عارفتهم من فتحت عيوني عالدنيا..بس فيه بنتين تعرفت عليهم بثانيه ثانوي=الحادي عشر
ورغم ان العلاقات انقطعت بفعل الانتقال الا اني مستحيل انساهم..
- مدرس تقول له ( شكرا من القلب و يعطيك العافية ) .. ؟
خخخخ استاذ يسري رأفت مدرس الرياضيات الي كان يعطيني دروس خصوصيه بالمرحله الثانويه ماشاءالله عليه للحين يعطي دروس(شكرا لانه عرف شلون يفهمني الرياضيات ومايأس)
- كم مره أخذت إنذار منع من دخول المدرسة إلا بولي أمر و مآ كآن السبب و كم مره أخذت تعهد و بين الأسباب .. ؟
كثيرررر بس اذكر مره لاني قررت مع بنتين لما كنت بالمتوسطه ان احنا نركب باص الثانويه ونشيك عالمدرسه المستقبليه(هالحركه طلعت المستقبل من عينا وخلتنا خبر كان..ابوي اول مره عشان المدرسه يعطيني المقسوم وكل طراق بتعلومه)
- مدرس تمشكلت معه .. مع ذكر السبب .. ؟
ابله امال اجتماعيات (كرهتها كره)وهي كانت السبب بنقلي من المدرسه كنت برابعه متوسط =ثامن
وفي اول يوم لها وحنا بالطابور صاحت فينا وهي كانت ضخمه وحركتها غريبه..رحت اقلدها بالضبط..انا فكرتها راحت وهي كانت واقفه وراي طبعا شرشحت فيني وانا عشان موقفي مايطلع بايخ قدام الطابور قلتلها لا انتي تهميني ولا اكبر راس..ودوني مباشره للاخصائيه وانا نافشه ريشي يعني موخايفه ولا هامني..واول مادخلت غرفة الاخصائيه صدمه!!!خالي موجود(يعني لو باتمان ومرسليله اشاره مايمديه يوصل بخمس دقايق)طلع جاي عشان اوراق وحده من خواته..انا شفته قلبت فاتن حمامه(بريئه يابيه)ومكسورة الجناح.خالي ضبط الامور وبعد اسبوع حصلتلي مشكله مع نفس الابله وتم نقلي بطلب من امي.)بس مالوم الابله حتى لو غلطت البنات المراهقات صعبيين وعله)
- أطرف موقف حدث لك في حيآتك المدرسية ؟ ..
ما اقدر احدد كتييييييير وبصراحه الموضوع تحفه وخلاني استوعب حلاوة ايام الدراسه
قررت مره من للفضول بس انضم لبنات المقصف وبعد ساعه مليت وصرت من باب التغيير ابيع للبنات الاكل مجانا..وانتشر خبر(روبن هود نصير المظاليم)وصاروا البنات يمدون ايدهم ثقه من غير فلوس وانا فرحانه بالابتسامات التأمريه..(وحلال عمك لايهمك) على نهاية اليوم زادت شهرتي ووصلت ابواب الاداره..طبعا الموقف التقليدي استدعاء ولي امري وفرضت المدرسه علي شهر كامل اكون ضمن البنات الي مشاركين في بيع مجلة كلها رسوم كارتونيه ابيعها للبنات وقت الفرصه(شنو تعاسه ومنتهى الذل)
والله المواقف كثيره بس هذا الي خطرلي الحين
-صور اي شي من ممتلكات الخاصه بالمدرسه ونزلها ؟(كتاب - مريول
- شنطه -الخ)
بنات ملاحظين السفينه مت من الضحك لما طلعت اشيائي القديمه امس ولقيتها
هذي شهدة نهاية السنه لثالثه ابتدائي وجنبها بطاقه اهدتها زميلة اختي لها ضمن هديه بمناسبة ميلادها وكنت انا بالابتدائيه وما صدقت عرضتها اختي علي لانها سفينة قراصنه بالبعد الثلاثي(وزمان كانت تعتبر تحفه)..عصابة اللهو الخفي ملاحظين معاي ان مصيري محدد من الطفوله خخخخخ
الشخص الي اختاره بعدي حياتي وقلبي هبه هببتي ايه ايام الدراسه بانتظارك..
18-01-11, 02:51 AM
متااكده انك تتكلمي عن نفسك 
جديد مواضيع قسم قهوة ليلاس
العرض العادي
