كاتب الموضوع :
نسايم نجد
المنتدى :
القصص المكتمله من وحي قلم الاعضاء
البارت الخامس عشر والسادس عشر
عند هند
منغمسه في دراسة الاوراق قطع عليها محمد وهو يمد عليها البندول
هند بحب / تسلم يالغالي تعبتك معي
محمد / الله يسلمك كم هند عندنا توصين على شي راجع لرجال مابي اطول عليهم
هند / سلامتك
تركها محمد و جتها غاده صديقتها
غاده / هنوده انتي هنا وانا لفيت الدنيا ادور عليك
هند / حبيت اطلع من جو النوم الي داخل قلت اخلص بعض الاوراق المهمه
غاده بحب / حتى الشغل جايبته هنا ارحمي حالك ولبدنك عليك حق
هند / شسوي الشغل بدمي مالقى راحتي الا بالشغل
غاده / مليت من سوالف الحريم وهذي الي اسمها موضي مابلعتها رافعه خشمها مدري على شنو
هند / مسرع محكمتي عليها ما يمدي حتى سوالف ماسولفنا معها انشغلنا بالغداء
غاده / عندي فراسه بالناس
هند / يعيني يام فراسه اقول غاده وينها
غاده / اختك هذي ما تشبع نوم عجزت اصحيها مو راضيه تقوم الله يصبرك على تقويمها
هند / بسم الله عليها لا تنحتينها اعرف عينك والقبر
غاده / ولا يهم اروح اتفل عليها علشان ما تصيبها عيني
هند / ههههههههه علشان تذبحك غاده تتقرف من بدون شي
في بيت الشعر
صحى عبدالرحمن من النوم كان تعبان امس ما نام عدل وطول بالنومه التفت حوله مالقاهم استغرب طلع من بيت الشعر لقاهم باسطين برا الكل جالس
عبدالرحمن / السلام
الكل / وعليكم السلام
عبدالرحمن / ليه ماصحيتوني من النوم
ابو بسام / واضح عليك التعب قلنا نخليك ترتاح
عبدالرحمن / وش ينومني اليلة
ابو نواف / معليك بنسهر الليله التفت على جاسم / الا وين اهلك
جاسم / الله يطول بعمرك اخوي واهلي رايحين الديره وانا جاي مع خالتي زوجة عمي وعمي معزوم بالبر يمكن يجي بكره
ابو نواف / ودي اتعرف عليهم انت لحية غانمه
جاسم / تسلم ياعم
ابو نواف يمزح مع جاسم / لو عندي بنت زوجتك اياه
جاسم / تسلم ياعم نسبك ينشرى
نواف / ابوي فتح سيرة الزواج الحين بيستلمنا واحد واحد
ابو نواف بجديه / وانتم ليه ما تتزوجون كل واحد مكون نفسه وش تنتظرون قولو لي
نواف يبتسم بوجه ابوه / مو انا قايل لكم ياطويل العمر انا الموضوع قاعد ادرسه وقريب اقولك اخطب لي
ابو نواف بفرح / الساعه المباركه وانا ابوك
ابو نواف / وانت يا محمد ما شاء الله مكون نفسك وش تنتظر
محمد / تو الناس ياعم قبلي خالد وانا ما تزوج قبل الكبير والي بتزوجها ما لقيتها للحين
جاسم فرح وبنفسه يقول / ماهو متزوج ولا خاطب اجل الي كانت معه منه الحمد لله انها ماهي زوجته اكيد اخته الحين ارتحت وش فيك يا جاسم وش عليك منها تزوجت ولا لا الله يستر لا يكون حبيتها ابتسم صورتها مو راضيه تنمسح من راسي
نواف يصرخ / جااااااااااااسم وش فيك اليوم مسبه منت مع العالم ابوي يسالك ليه للحين ما تزوجت
جاسم / يا عم مضرب عن الزواج
ابو نواف / وش له الاضراب
جاسم / شاري راحتي يا عم اغلب الحريم حنه وطلبات تكسر الظهر ولا ترحم الزوج
ابو نواف / مو كلهن مثل اصابيع يدك ماهن سواء
جاسم / اخاف حظي يرميني في وحده من النوعيه الي اخاف منها
ابو نواف / الله يرزقك بالي تعجبك
جاسم لما سمع الدعوه ظهرت صورة هند قدام عيونه
جاسم / امين
محمد يكلم ابوه
محمد / يبه انا طالع توصي على شي
عبدالرحمن / وين وانا ابوك
محمد / موعد زيارتنا لخالي بدر
عبد الرحمن / الله يبارك فيك وانا ابوك سلم عليه
محمد / يوصل يالغالي ياله استاذن
في قسم الحريم
ام بسام ونوره و ام نواف و موضي جالسات يسولفن والبنات جالسات على حنب يسولفن
ام بسام / شرفتينا ياموضي بزيارتك
موضي / تسلمين
ام نواف / انا ولدي نواف صديق جاسم الا جاسم ماله نيه يرجع لطب حرام يترك وظيفته وهو كان الكل يشهد بشطارته
موضي / من بعد الحادثه الي صارت له بالمستشفى وهو كاره الطب ولا يحبنا اناقشه بالموضوع
نوره / شنهي الحادثه
موضي / سو عمليه لولد عمره 5 سنوات ومات بين ايدينه وهي اول عمليه يسويها تفشل وحط سبب وفاة الولد عليه جلس فتره متاثر وحالته ما يعلم فيها الا الله لكن الحين الحمد لله
ام بسام / الحياه والموت بيد الله الاطباء اسباب
نوره / والنعم بالله
ام نواف / الله يوفقه ويرجعه لعقله والله ان ولدي نواف متضايق من تركه لطب
موضي / كلنا متضايقن لكن من يسمع
عند البنات
غاده 2 / ماماتي ابي اتسبح بالبركه
غاده 1 / أي والله سميتي
غاده 2 / مدري ليش ماماتي سمتني على اسمك
غاده 1 قامت تسبل بعيونها/ ما يبيلها شطاره ياذكيه لانها تحبني وتبيك تطلعين علي لكن خساره ليس كل مايتمناه المرء يدركه
غاده 2 / بسم الله علي اشبهك كان منتحره من زمان
نجلا / ههههههههه سكتيها غدويه الله يقويك على ام السان
غاده 1 / اقول نجلوه لاتخليني افتح كرشتك وطلع ولدك فديته
هند / غدوويه مافي سباحه وبعدين وش فيكم على غاده هي صادقه مسميه غاده عليها لاني اموت فيها من صغرنا وحنا بوجيه بعض
غاده1 / فديتهم نذرن علي ان جاني ابن الحلال الي للحين ماله نيه يجي اني بسمي بنتي هند
نجلا / من كثر منتي مشفوحه على العرس خاف منك واهون عن الجيه
غاده 1 بمزح / يا معرس اظهر وبان عليك الامان
الكل / ههههههههههههههههههههههه
نجلاء / وش رايكم نشوي
غاده 1 / أي والله نبي نستمتع بشوي بقول لمي تكلم ابوي يجيب عده الشوي من عندهم
عند الرجال
الشياب جالسين برا على كل سوالفهم بالشغل والشركات و الاسهم نواف وجاسم تململو من السوالف بالشغل دخلو بيت الشعر
في بيت الشعر
نواف / جاسم وش رايك فيني وانا اخوك
جاسم / وش عندك على السؤال
نواف / الحين جاوبني
جاسم / انت صديقي من المتوسط لو مافيك خير ما صادقتك صداقتك تنشر بالغالي
نواف وهو يفرك يده من التوتر / تسلم معليك زود
جاسم / وش فيك متوتر قول الي عندك ياخوي انا اعين وعاون
نواف / لو اخطب بيرضون فيني
جاسم / يرضون وهم مغمضين بعد ويحمدون ربهم انك خاطب بنتهم
نواف / وصلنا خير انا جاسم من حبي لك ابي اربط علاقتنا بنسب
جاسم / تخطب مني في من
نواف بقهر / اخطب امك ماقول الا مالت على الغباء
جاسم / ههههههههههههههه بشاور الوالده ان رضت احد يحصل عم مثلك
نواف بعصبيه / وتبن جسوووووووم اتكلم من جدي من اليوم اتصبصب عرق وحضرتك تمزح وتضحك الزبده يشرفني اخطب اختك الي مدري وش اسمها لي زوجه
جاسم / ههههههههههه حلوه تخطب ماتعرف اسم العروس اسمها الجوهره
نواف / انا اتكلم من جدي انا اخطب اختك الجوهره وابيها زوجه لي ماني بمستعجل بالرد
جاسم فرحان بخطبت نواف لاخته لانه يتمنى من زمان ان نواف يتزوج اخته لانه يعرف اخلاقه ولولا الحياء كان اخطبه لخته
جاسم / انا عني موافق واكيد فيصل موافق لانك تعرف قدرك عندي وعنده لازم نشاور البنت والله يقدم الي فيه حيره
نواف / امين
عند الحريم
كانت هند جالسه مع موضي ونوره وام بسام اتركتهم وراحت للمطبخ تشرف على الشغالات وام نواف عند بنتها نجلاء
موضي / نوره هند بنتك
نوره / بنتي برضاعه و اعز من بناتي انا ربي مارزقني ببنات وهي بنتي
موضي / ماشاء الله عليها تشتغل
نوره / ايه تملك شركات الفهد
تطايرت عيون موضي في نفسها هذي هند الفهد الي الكل يتكلم عنها مو باين عليها شكلها صغيره بالعمر وجمال وغنى توقعتها عجوز اكبر مني الفلوس تصغر وتجمل
جت غاده عند هند وموضي مركزه عيونها عليهن
غاده / ماماتي تطلعين معنا برا بنشوي داخل كتمه برا الجو خطير
هند / بطلع بعد شوي انتبهي على نفسك وانا امك
استغربت موضي ان هند لها بنت بالعمر كانهم خوات
موضي / هذي بنتك ياهند
هند / ايه
نوره انقهرت من هند انها قالت بنتي هي معجبه بجاسم من كلام ام نواف كان ودها انه يخطبها لكن بتصرفاتها هذي اطير العرسان
موضي / ماشاء الله يخليها لك الي يشوفكم يقول خوات
هند / تسلمين
جت ام بسام وام نواف جلسن مع موضي قامت نوره مولعه من هند
نوره / هند تعالي معي المطبخ نجهز اغراض العشاء
هند / حاضر
دخلت نوره وهند المطبخ وكانت نوره معصبه
نوره بعصبية / وبعدين معك وش الي قايلته للحرمه
هند مستغربه / وش قلت ما ذكر اني قلت شي غلط
نوره / ان غاده بنتك
هند / وهذا الصدق غاده بنتي
نوره / ليه منتي بمقتنعه ان غاده اختك
هند بجديه / خاله قولي الي يدور براسك بدال ما تلفين و ادورين
نوره / ياهند يا عيوني لما تقولين ان غاده بنتك مراح احد يتقدم يخطبك
هند بعصبيه / وهذا المطلوب كم مره قلت لكم زواج مراح اتزوج ارتاحو وريحوني فكوني من اعاده الكلام
نوره بحب/ لمتى يا هند تبقين بدون زواج غاده بتتزوج وحنا مراح ندوم لك
هند / مراح اتزوج لين اموت انتي عارفه اسبابي لرفضي لزواج
نوره بحنان / يا قلبي انا اعرف اسبابك وتخوفك من الزواج لكن مو كل الرجال راشد شوفي خالك واخوانك ينحطون على الجرح يبرا
هند بضيق/ دخيلك خالتي اذا لامي الله يرحمها غلى بقلبك انسي هالموضوع لانه يضايقني فوق ما تتصورين خالتي اعرفي واقتنعي ان الموت عندي افضل مليون مره من الزوج
نوره باستسلام / وعرفتي تمسكيني بيدي الي توجعني بكيفك الي عقله براسه يعرف خلاصه ياله روحي عند البنات ونسي الكلام الي قلته الله يهديك
هند / الله لايحرمني منك ياحن واطيب قلب
نوره / ولا منك
رجعت نوره عند الحريم وهند بالمطبخ تسوي لها شي تشربه سوت لها كاس حليب بالنسكافيه جلست على كرسي بالمطبخ تشرب الحليب لما خلصت
طلعت تبي تختلي بنفسها ما تبي تقابل البنات بعد كلام نوره لانها تحس بخنقه
كانت لابسه بنطلون جنز ماسك على جسمها وبلوزه حمرا ماسكه وشعرها مسويه ظفيره هنديه وكالعاده بدون مكياج
طالعت بيدها ما لقت سلسالها الالماس هدية خالها يوم تخرجت من الثانويه والسلسال غالي عليها اتصلت على البنات تسالهم عنه قالن لها ماشفنه
هند بنفسها / اكيد انه طايح اليوم بحديقة الزهور هو المكان الي اختليت فيه عن البنات
عند الرجال
جاسم كان نايم ببيت الشعر صحى الا الساعه 7 له حوالي الساعه نايم قام متجه للحمام يغسل وجهه ويغير ثوبه المتعفس من النوم
لبس ترنق رياضي رايق عليه راح يدور على الشباب والشياب مالقهم يمكن طلعو عندهم مشوار
تذكر حديقة الزهور بيروح يشوف مكانها الي كانت جالسه فيه
جاسم بنفسه / خلني اروح للمكان الي شفتها فيه تركت روحي هناك من شفتها وانا ماني مع العالم
اه يا جاسم شوفت بنت العبت فيك لعب كاني اول مره اشوف بنات
وصل للمكان الي كانت هند جالسه فيه وصار يمسح على مكان الزرع الي كان متناثر عليه شعرها كانه يمسح على شعرها
وهو جالس كان ظهره جهة قسم الحريم سمع صوتها وهي تكلم فز قلبه يقول بنفسه / صوتها الظاهرانك انجنيت يا جاسم صرت تتخيل صوتها
عند هند
هند كان تتكلم بالجوال مع خالد متصل عليها يطمنها انه وصل وبكره باليل بيكون موجود
شافت بمكان الزهور واحد معرضها ظهره القفا كانه قفى اخوها محمد مشت شوي شوي وحطت يدها على عيونه انتفض جاسم من حركتها وذاب وداخ من ريحت عطرها
هند / حمود وش قاعد تسوي لحالك اكيد اكرفوك الشياب وجاي هنا تتهرب منهم
جاسم مصدوم / ..............
هند / حمود وش بلاك ساكت
جاسم / ..................
هند فكت يدها من عيونه وجلست على ركبتها مقابلته وجهها قريبن من وجهه
جاسم منصدم من الموقف وحالته حاله وصدمته انها تحسبه اخوها نزل راسه بحيت مايبان شي من وجهه هند خافت ان صاير شي وهي عارفه ان اليوم زيارة خالها بدر مدت يدها لوجهه ورفعته الكل انصدم
جاسم صدمته الجمال والانوثه الي مايقدر يقاومها أي رجال كل شي فيها قمة بالاغراء كانه وده يقوم يضمها يبوسها أي شي يطفي ناره بس مافيه الجراءه يخون الي استضافوه وعيونه التهمت كل تفصيلها لعله يرتوي منها هيهات للعاشق ان يكتفي بل يطمع بالمزيد
وهند صدمتها انه طلع مو محمد اخوها وطلع رجال غريب وتذكرت انها قد شافته وعرفت انه ولد اخو راشد انتفضت من العصبيه
هند من غير شعوره وهي تصارخ / جاااااااااسم وش جابك هنا
جاسم تروع منها كيف عرفته رد وهو يحاول يصير طبيعي
جاسم / تكلميني انا
هند صحت على نفسها وانها جالسه مع رجال غريب مو محرم لها ركضت بسرعه ودخلت داخل
جاسم في نفسه زين قدرت امسك نفسي مدريت اني خفيف ممكن تثيرني أي انثى الحين من بيشيلها من راسي انا نظره من بعيد اذبحتني وهذي ماسكه عيوني واااااااه على مسكتها ليتها مطوله شوي ولا ريحت عطرها ولا جسمها ولا شعرها لو اوصفها ظلمتها ولا فمها يشهي ويدوخ ويذبح والله وذبحتك ياجاسم
انا شلون اقدر اقوم من مكاني رجولي ترجف من الي شفته شكلي مراح ارجع البيت الا مستخف والا انا حرمه تلعب بقلبي لعب
وتيارات مشاعرعنيفة قويه حادة وعميقة مزقت قلب جاسم وحولته لشظايا متطايرة يحاول جاسم يكابر لصدها
ما عاشت من تلعب فيك يا جاسم انت تكره الحريم كلهم موضي خالتك ما منهن امان
وهو واقف بيرجع عند الشباب لفت نظره شي يلمع نزل نفسه يشوفه شاف اسواره بناتيه فيه حرف H كانت طايحه بمكانها اليوم تاكد انها لها اخذ الاسواره وطبع بوسه قويه عليها وكانه يبوس صاحبة الاسوره حطها في بوكه مايبيها تضيع على الاقل لقى شي من ريحتها تصبره عن شوفتها
قطع تفكيره صوت جواله كان عمه راشد
راشد / الو
جاسم / هلا عمي
راشد / انت وينك
جاسم / بالاستراحه
راشد / انا جايكم اوصف المكان
جاسم / وين عزيمة البر
راشد / اجلها لبعدين مرضان شوي
جاسم / سلامته
وصف جاسم لعمه مكان الاستراحه على الساعه ثمان راشد جاء وعبدالرحمن كان طالع
بعد ساعه دخل عبدالرحمن مع خوال عياله جلس اول مجت عينه على راشد كل منهم انصدم بالثاني
راشد خاف من عبد الرحمن وراشد جالس جنبه جاسم
اول ماشافه عبدالرحمن ثار جنونه وذكريات الماضي صارت بين عيونه أكل راشد بنظرات كلها حقد وكره ما تكلم ولا كلمه طلع
الكل استغرب طريقة طلعته من المكان بعد دقائق الا عبدالرحمن داخل وبايده مسدس صوبه بوجه راشد كل الرجال الي بالمجلس خافو ان عبدالرحمن يتهور و يذبحه حاولو يمنعونه لكن شكله مصر على ذبحة راشد
عبدالرحمن / جاي يالخسيس بعد كل سواياك
راشد /............
جاسم منصدم من الموقف ومن سكوت عمه ومن النفضه الي جته لما شاف عبدالرحمن
عبدالرحمن / راشد لاتحسبني نسيت سواياك يالجبان تقرص وتنحاش لكن اليوم موتك بيدي برجع الاولي والتالي
قام محمد مسك جواله واتصل على اخته هند لعل وعسى تقدر تتصرف مع عناد ابوه
محمد / الو هند الحقينا
هند خافت / خير وش صاير
محمد / ابوي بالمجلس رفع مسدس بوجه رجال اسمه راشد كل الي بالمجلس ما قدرو عليه اخاف يتهور ويذبحه
هند تروعت وصارت تنتفض عرفت انه راشد ابوها موجود / انا جايه الحين
هند بسرعه لبست عباتها وصارت تركض لان قسم ارجال بعيد عن قسم الحريم
دخلت عليهم هند بصوت عالي / لاااااااا ياخالي
وقفت بوجه خالها صارت بينه وبين راشد الراجيل انصدمو من دخول الحرمه وش علاقتها بالي يصير
هند بالم ووجع وحزن / حطها بصدري ياخالي ولا تلوث يدك بدم راشد
الكل مفجوعين وجاسم عرف انها هند الي با لشركه وعرف ان عمه عامل مصيبه جاسم خجلان منهم
هند ودموعها تنزل / ياخالي لا تخليني ناكره لجميلك انك تنعدم بسبتي ياخالي لو صار لك شي انا اضيع انت عزوتي انت قوتي انت سندي انت اهلي كلهم انت امي ابوي لا تضيع عمرك علشانه اذا بتقتله اقتلني قبله اهون من اني افقدك يالغالي
والتفتت لراشد ناظرته بحقد وكره ورجعت تناظر خالها والله ولي خلقك وخلق غلاك بقلبي لدفعه ثمن سواياه غالي دخيلك ياروح هند ارمي المسدس عنك لا تلوث يدك بدمه
تاثر عبدالرحمن كثير من كلام هند وخنقته العبره
هند / يـ يـ يبه دخيله لاتقتله
اول ما سمعها تناديه يبه الكلمه الي ياما تمنى هند تقولها له نسى الرياجيل الي بالمجلس رمى المسدس وسحب هند وضمها ضمه قويه وصار يبيكي بصوت عالي وهي تبكي وتنتفض
عبدالرحمن / قلتي لي يبه اه لو تدرين ياهند اش كثر فرحتي
هند وهي تشاهق / قلتها وانا كنت اتهرب من قولها ماكنت اتوقع اني اقولها يالغالي وصارت تبكي
كل الي بالمجلس تاثرو وابو بسام وابو نواف تاثرو من بكاء عبد الرحمن لانهم يعرف واش كثر متعلق بهند
جاسم تاثر من الموقف الي صار قدامه و تاكد ان عمه مسوي مصيبه معهم نفسه يعرف وش مسوي ليه يقولون عنه حقير ونذل وعمه ليه مادافع عن نفسه
و زاد اعجابه بهند وقوتها وجرائتها وتعلقها بعبد الرحمن وتعلق عبدالرحمن فيها
مدت هند يدها على دموع خالها ومسحتها بيدها وسحبته بيده وطلعت معه برا الخيمه وقبل ما تطلع التفتت لجاسم
هند بعصبيه وبقوه وقسوة / ياليت تطلعون برا لانكم ضيوف غير مرغوب فيكم مايجي من وراكم الا الشر
وبعد كلمتها طلعت
نواف ركض لجاسم الي لاحظ عليه الانكسار بسبب الي صار وكمل عليه كلام هند
نواف / اعذرها يا خوك ولا تاخذ بخاطرك المقصود عمك ولا انت مالك ذنب
جاسم وهم منفجع من الموقف وخجلان ماله وجه يتكلم ويجلس بعد الي صار طلع مع عمه بدون ولا كلمه
طلعت هند مع خالها يدها بيده وراحت جهة حديقة الورود
هند / خالي اجلس هنا وسع صدرك حقي من راشد باخذه لكن مراح اورط نفسي بدمه والقتل موحل
انا الي مقهوره راشد ذوقني المر وهو سبب ضعفي
عبدالرحمن / هو الي شفتيه بالشركه
هند / ايه ياخال ماقلت لك هو سبب ضعفي
عبدالرحمن / عقب الي شافه الليله مراح يجي له وجه يقابل الرياجيل
هند / فكنا من سيرته متى بنرجع لبيوتنا
عبدالرحمن / بكره بعد صلاة الجمعه
هند / خالي ترى الخميس الجاي فض عمرك على العشاء ضروري
عبدالرحمن / ليه عازمتني
هند بحب / تستاهل من يعزمك لكن عندي عشاء عمل مع عملاء يبون ممولين لشركتهم
عبدالرحمن / ان شاء الله
هند / خالي ابي اقولك شي بيفرحك
عبدالرحمن / قولي
هند / شريت قصر امي الي سرقه راشد كان حاجز عليه البنك وشريته من البنك
قام وباس راسها عبدالرحمن / بعدي بنتي بردتي قلبي براشد سلمت بطنن حملت فيك ولله وثمرة تربيتي فيك الحين بذا الخبر غيرتي مزاجي الي خربه شوفت النذل راشد
هند / الحمد لله اني فرحتك
عبدالرحمن / أي والله فرحتيني انك رجعتي المال المسروق لاهله
وقف / هند تاخرت على الرياجيل انتبهي على نفسك
دخل عبد الرحمن مجلس ارجال تغيرت نفسيته بعد شراء هند للقصر دخل عليهم يضحك ويسولف
ابو بسام / كانك مبدلينك منت الي من شوي
ابو نواف / هذا سحر من اسحار هند
عبدالرحمن / هههههههههه وش تبون مني اقوم اكوفنكم محلكم علشان تنبسطون
ابو نواف / صاير تخوف اهم شي ان محمد شال المسدس واخفاه ولا كان ذبحتنا ما تنتفاهم انا شباب مابي اضيع عمري بصير معك مسالم
الكل / هههههههههههههههههههههههه
في سيارة جاسم
طلع من الاستراحه كلم خالته وقال لها تطلع في السياره جالسين ساكتين جاسم منقهر من عمه
ويفكر في نفسه / اكيد مسوي بلوه كبيره مع هند هذي والا ليش عبد الرحمن بغى يثور فيه بالمسدس لازم اعرف السر الي مخبيه علينا عمي والله ما صار لي وجه اوريه لنواف بعد الي صار اكيد نواف يعرف بس استحي يمكن البلوى الي مسويها عمي تقطع الوجه اكيد خالتي موضي تعرف السالفه لازم بكره اسئلها لازم اعرف
وصلهم البيتهم نزلهم جاسم ماله خلق يقابل عمه بعد الي صار لانه مايضمن اعصابه يخاف ينفجر بعمه
كمل طريقه لبيت امه دخل البيت مافي احد دخل غرفته دخل الحمام اخذ شور لعل وعسى يطفي قهره وحيرته
حط راسه على المخده مستغرب من قوتها كيف تتعامل مع الرجال بقوه تصرفاتها رجوليه ما تميل ابد لصنف لحريم قوتها وشراستها شخصيتها القويه العنيده المسيطره الي تخوف الرجال
ليش عند عمي تضعف وتنهار ياترى ياعمي وش مسوي لها انا متاكد انه شي كبير الي تخليها تبكي وتنهار ويجيها انهيار عصبي حرمه حديديه تنهار بسبتك ياعمي بنجن اذا ماعرفته متى يجي الصبح وتفك خالتي حيرتي
يوم جاء بينام مر طيف حبيبته قدامه خفق قلبه وبتسم من انتي يالي حطمتي قلبي وذوبتيه الاكيد اخت محمد بس منهي وش اسمها طمعان انك تتزوجها عقب الي صار مستحيل تتزوجها وهم طاردينا اليوم بسبب عمي وهو بافكاره من التعب نام
عند الحريم بالاستراحه
دخلت هند عند الحريم وهي منهار بعد الموقف الي صار وهي تكابر عند خالها جلست بمكان منعزل وصارت تشاهق من البكاء دخلت عليها نوره خافت لما شافتها تبكي
نوره بخوف / هند وش فيك يوجعك شي
هند من كثر البكاء ماتقدر تتكلم / هزت راسها بلا
راحت نوره المطبخ جابت كاس ماء غسلت وجها وشربتها
نوره بحزن / وغلات امك عندك تقولين
هند بوجع / راشد كان هنا
تروعت نوره / وش جابه هنا متى جاء وش يبي
هند / مدري بس خالي بغى يقتله رفع المسدس بوجهه وكلمني محمد ولحقت عليه قبل لا يتهور بدمه
نوره بصراخ / وشوووو عبد الرحمن رفع المسدس بوجه راشد
هند / ايه وخالي مره متاثر حاولت اغير جووه لكن راشد عكر مزاجه اول مره اشوف خالي يبكي شفت وش سوى فينا راشد
نوره تقطع قليها على زوجها وتعرف دموع الرجال غاليه ما ينزلها الا القهر والي سواه راشد بساره وهند فجر القهر بعبد الرحمن
هند / خاله لا تقولين اني قلت لك انا ماقلت لك الا علشان يصير عندك علم لو عصب عليك ولا شي تعذرينه لانك عرفتي السبب
نوره بحزن / هذا الي جانا من ورى راشد
هند بتغير من الحزن / خاله شخبار العشاء بموت من الجوع
نوره / من اليوم البنات يشون شكلهن اكلن العشاء ونسنا
هند / الظاهر الرجال بياكلون من الشوي
نوره / لا مراح يكفيهم لانه كثرو جو اخواني بعد ما زارو بدر
هند / بشري وش صار لما زاروه
نوره / جو من الزياره متاثرين ولا اخذت اخبارهم
هند / اجل كملنا عليهم بالفلم الي بسبت راشد لانهم كانو موجودين لما صارت المشكله بروح عند البنات
نوره متنكده من الكلام الي قالته هند دخلت عند الحريم
وهند راحت عند البنات الي كانن يشون ويضحكن
نجلاء / وينك هند من اليوم ما جلسنا معك
هند / انشغلت شخبار عشانا ليكون اكلتنه
غاده صديقة هند ملاحظه اثار البكي على وجه هند سحبتها على جنب
غاده / هند وش فيك انتي باكيه لا تقولين لا لاني اعرف انك باكيه ليش
هند / سالفه صارت وانتهت بسلام
غاده / قولي شنهي مراح اتركك لين اتقولين لو اجلس لصبح
هند / قالت كل الي صار لغاده ونبهتها ماتقول لاحد
غاده / كل ذا صار ولا درينا الله يعينك ويصبرك ي وربي بيعوضك على صبرك الحمدلله لحقتي على عمي ابو خالد لا يتورط بدم راشد
هند / الحمد لله خلاص قلت لك خلينا نروح للبنات
راحن للبنات وجلسن سوالف ضحك وتنكيت من غاده لين خلص الشوي جهزن السفره عند الحريم وحطن الشوي والسلطات والمقبلات مع الخبز والببسي
تعشن والحريم الكبار نامن والبنات سهرن سوالف ولعب لين الساعه ثنتين كلهن دخلن غرفه وحده وبسطن فرش على الارض فراش هند بالوسط بين غاده اختها وغاده صديقتها وحاضنه غاده اختها
ام نواف وام بسام ونوره ونجلاء نايمه بغرفه ثانيه وغلاء نايمه بحضن امها
اليوم الثاني بالاستراحه
عن الرجال
صحو على اذان الفجر صلو الشباب رجعو ينامون الشياب فرشو فرشه برا والجو خيال بعد صلاة الفجر جلسو يسولفون
عبد الرحمن يكلم ابو نواف
عبدالرحمن / وش صار بصفقه الي تسربت وخسرتها
ابو نواف / القهر يابو خالد ان فيه موظف خاين بشركتي يسرب معلومات لشركات المنافسه
عبدالرحمن / الله يكفينا الشر صارت الذمه تنشرى بفلوس تلقى شارينه الشركات المنافسه لتهريب المعلومات من شركتك
ابو نواف / على كذا ياخوك بفلس لان الصفقه الي خسرتها كبيره لو بفقد صفقات من هالوزن بتخسر شركتي سمعتها
ابو بسام / مافي حل الا ان تكشف الموظف الخائن وتطرده
ابو نواف / شلو اعرفه كاني ادور ابره بكومة قش
ابو بسام / سهله يبو نواف
ابو نواف / الحقني ياخوك
ابو بسام / ابشر شوف الي دايما تناقشهم بصفقات كل مره اخذ واحد منهم وعطه معلومه مغلوطه ولا اوصيك كثف المراقبه على الموظقين حط كمرات مراقبه بالمكاتب صدقني بسبوع بينكشف
ابو نواف / والله فكره شورك وهداية الله
ابو بسام / نبي على هالجلسه قهوه وفطور تتصل يا بو نواف على ام نواف ولا بتتصل يجبونها
عبدالرحمن / وش لك تتصل فيهم وتقومنهن من نومهن وعده القهوه عندنا الفطور نقوم واحد من الشباب يجيب فطور لنا وللحريم
ابو نواف / والله انك رحوم مع الحريم
عبدالرحمن / وليه ما نرحمهن وهن جابن لنا العيال وماقصرن بحقوقنا
ابو بسام / ابو نواف صدق يويلك لو تسمعتك ام نواف تشيشنا على الحريم
ابو نواف / الله وكبر ماقلنا شي واكلتوني شكلهم معينينكم من انصار حقوق المراه
ابوبسام وعبدالرحمن / ههههههههههه
عند جاسم
جاسم صلى الفجر وبعد الصلاه ركب سيارته بطريقة لبيت عمه وصل البيت فتح الباب بالمفتاح الي معه دخل لقى خالته موضي بالصاله انبسط لماشافها لحالها لقاها فرصه يسالها عن هند وعبد الرحمن مدام عمه للحين ماجاء من الصلاه
جاسم / صباح الخير
موضي / صباح النور وينك مانمت امس هنا
جاسم / نمت في بيتنا
موضي / امكك واخوانك مسافرين وش مجلسك هناك لحالك
جاسم / كنت متضايق
موضي / عسى خير وليش ما تضايق وحنا امس مستانسين بالطلعه
استانس ان خالته سهلة عليه مهمة السؤال
جاسم / خاله ابي اسئلك سؤال وابيك تقولين الصدق
خافت موضي من جديت جاسم قالت / اسئل وليه بكذب
جاسم / تعرفين واحد اسمه عبد الرحمن الفهد بينه وبين عمي مشكله كبيره بسبب بنت اسمها هند تصير بنت اخو عبد الرحمن
صعقت موضي شلون الماضي ظهر لكن مستحيل تقول الصدق لانها بتطلع بعيونهم مجرمه
جاوبت عليه وباين عليها الخوف والارتباك الي ما غاب عن جاسم / وش يعرفني فيه مو كل شي يقوله لي عمك وبذات الي يخص اشغاله
جاسم عرف ان خالته تكذب مستحيل يعرف منها شي ولا من عمه حس بالياس
قام واقف بيطلع لغرفته ماله خلق يشوفهم حس انه عايش بين مجرمين مراح يرتاح لين يعرف لكن كيف وهم مستحيل يقولون
جاسم في نفسه / والحل يا جاسم كيف بتعرف وتبرد نارك ان كان لهم حق عندنا انا بوقف بوجه عمي وارده لهم انا ما حب الظلم مستحيل اوقف مع الظالم لو كان عمي يارب انك تساعدني
طلع لغرفته وهو محمل من الهموم الي تهد جبال دخل غرفته اتصل باخوه فيصل
يرن جوال فيصل من ثالث رنه رد
جاسم / الو فيصل
فيصل / هلا جاسم كيفك وش مصحيك ها لوقت ياخوك
جاسم بضيق / اه يا فيصل الهم والضيق كابس على صدري
فيصل بخوف / سلامتك من الاه ياخوي قول وش مضايقك خوفتني عليك ومشكلتي بعيد
جاسم / الشي كبير يافيصل ما ينقال بالتلفون
فيصل / الحين بنرجع
جاسم / وجداتك بتنكسر فرحتهن
فيصل / لا ابشرك بيجن معنا قدرت فيهن امي بيجلسن اسبوع عندنا وعليك رجعتهن
جاسم / لا تتاخر علي يا خوك محتاج تفك حيرتي
فيصل / ابشر يا خوك انتبه لنفسك يله بنتجهز لرجعه
جاسم / الله يحفضك انتبه لطريقك
في الديره
سكر فيصل من جاسم وهو يغلي من خوفه على اخوه واضح من صوته ان الشي مو سهل يعرف اخوه وحافظه
طلع فيصل لصاله لقى امه مع جداته والجوهره توها قايمه
فيصل / يمه ممكن تجين ابيك بشغله
قامت ام جاسم مع ولدها ودخلت المطبخ
ام جاسم / خير يا فيصل
فيصل / جهزي اغراضكم بنمشي الحين ضروري
ام جاسم / ليه
فيصل / واحد من الربع تعبان وطلبني الشغل عندهم طيران اليوم بعد العصر ولازم اكون بدري برياض علشان يمدي اتجهز لسفره
ام جاسم / خلاص وانا امك نفطر ونكون جاهزين
فيصل / فديتك يا لغاليه حاولو ما طولون وتخلصون بسرعه
ام جاسم / ان شاء الله يوليدي
الاستراحه
عند الحريم
صحت ام بسام من نومها بسبب حركات بنتها غلا الي نايمه بحضنها بسبب ترفسها
قامت راحت للمطبخ تجهز الفطور علشان تصحي الحريم لقت ام نواف سابقتها للمطبخ وجهزت كل شي
ام نواف رحمت ام بسام لان الشغل امس كله عليها
ام بسام / صباح الخير
ام نواف / صباح النور وش مصحيك امس تعبناك وقلت اليوم اريحك
ام بسام / لا تعب ولا شي الي يشوفك يقول كل يوم متجمعين
ام نواف / والله انك صادقه ماصرنا مثل اول نجتمع كل سبوع كبرو عيالنا وكثرت اشغالهم
ام بسام / أي والله الا وينها نوره
ام نواف / مدري يمكن عند ابو خالد
عند الرجال
عند نوره وعبدالرحمن
اول ما صحت قلبها ماكلها على زوجها لان البارح طول الليل تحاتيه ومعورها قلبها من الي صار بينه وبين راشد
اول ما قامت اتصلت على عبدالرحمن وقالت تبي تشوفه لانها مشتاقه له ومن يومين ماجلست معه
نوره / حبيبي وينك مشتاقه لك لو ماطلبت اشوفك ماطلبت
عبدالرحمن / تسلمين يالغاليه البارح صار موقف بغيت ارتكب جريمه
نوره حطت نفسها ما تدري عن الي صار تبي يطلع الي بقلبه
نوره / سلامتك وش صاير
عبدالرحمن / قال كل الي صار
نوره / الحمدلله الي مرت على خير والحمدلله تدخلت هند ولا كان تهورت وحرمتنا منك وجلست تبكي ترى والله يا عبد الرحمن لو صار لك شي يمكن اموت او استخف تكفى يا لغالي حافظ على نفسك علشاني
عبدالرحمن مسح دموعها / ليه البكي يا لغاليه يا رفيقة دربي يا نور دنيتي يا ام عيالي ما صار شي كل شي انتهاء
رمت نوره نفسها على صدره وتمسكت بخصره
نوره / جعلني ما ذوق حزنك وجعل يومي قبل يومك
عند البنات
قامت هند من النوم وكل تفكيرها بخالها راحت ادور عليه شافته هو ونوره جالسين وهو ضامها
هند / احم احم يا عيني على غزل الشياب
نوره ارفعت نفسها عن حضن عبد الرحمن وهي مستحيه
عبدالرحمن / شياب بعينك الا شباب واحلى شباب عليك اوقات مدري كيف جايه ما خليتينا نتهنا يحبك لتخريب
استحت نوره وولع وجهها احمر
هند بمزح / خالي شوف وجه خالتي صار طماطه
عبدالرحمن يطالع بنوره بيرفع ضغطها / وش الي ذبح قلب خالك الا ذا الخدود الطماطه
هند / ههههههه حرام عليك خالتي ذابت شكلها بيغمى عليها اه من الحب وعمايله
نوره مستحيه وبعصبيه / هنددددددددد خلاص
هند / برجع للبنات مابي اصير عزوله
عبدالرحمن / احسن بعد خلينا ناخذ راحتنا
هند / لا تخلوني استنذل معكم وارسل لكم غاده عاد ان شافتكم بتلزق فيكم
عبدالرحمن / لا والي يعافيك كلش ولا غاده مراح نسلم من لسانها
راحت هند عند البنات علشان تقومهن وعلشان يفطرن ويجلسن يسولفن مع بعض معاد بقى وقت وكلن بيرجع لبيته
عند جاسم
رجع بيت امه ينتظرهم هناك على الساعه وحده الظهر كان جاسم منسدح على الكنب والتفكير ذابحه وقلبه معذبه على عشقه الي اندفن اول ما نولد جالس على غداه امس بالاستراحه ماكل شي وباين على شكله التعب والضيق وهو على حاله دخلت ام جاسم وفيصل والجوهره وجداته
جاسم لما شاف جداته فز وراح لهن وباس روسهن وراس امه الجوهره سلمت على اخوها وطلعت فوق لغرفتها بتكمل نومها
جاسم بحب / حيا لله من جانا تو منور المكان
الجده ام راشد / الله يحيك ويبقيك يوليدي
الجده ام موضي / شلونك يوليدي وجهك ماعجبني تعبان يوجعك شي
جاسم / بخير الله يبقيك ما فيني الا العافيه كان راسي يوجعني مدام شفتكم بطيب
الجده ام راشد / دوم بخير الله يفرحني فيك وشوف عيالك مالين هالبيت
ام جاسم / جاسم وش جابك والبيت مافيه احد عمك خالتك فيهم شي
جاسم / جاي استقبلكم وخالتي وعمي معليهم خلاف
فيصل منتبه لحالت جاسم وباين عليه الهم
فيصل / جاسم الله يعافيك ممكن توصلني المطار وغمز له
جاسم عرف ان فيصل يبيه يشكي له
جاسم / طيب
طلعو من البيت ركبو السياره وتوجهو لمطعم
فيصل / قول ما طقيت مشوار ساعات الا علشان تشكي الي مضايقك
جاسم / تسلم يا خوي المشكله بسبت عمك
فيصل / قول انا اسمعك
جاسم / انا قلت لك عن سالفت هند الي بشركه وموقفها مع عمك
فيصل / ايه كمل
جاسم / امس بعزيمه الاستراحه وبالصدفه والقدر ان هند الفهد وعمها فيه
فيصل متحمس سكت يبي جاسم يكمل
جاسم / وكنت معهم بدون عمي وكانو ناس قمه بالذوق والاحترام ومن القراده عزمت عمي وجاء تخيل اول ماشافه عم هند رفع المسدس بوجه عمك ناوي يذبحه
فيصل مصدوم / قول التفاصيل لا تختصر كيف وشلون وعمك صار له شي
جاسم / حكى لفيصل كل شي بالتفصيل
فيصل من الصدمه /...............
جاسم / تكلم وش فيك ساكت
فيصل / الله يعينك كيف تحملت الموقف واضح ان عمك مسوي بلوه مع اهند ليكون
جاسم / ليكون شنو
فيصل / مغتصبها
جاسم / فكرت فيها لو مغتصبها كان ما طلع من عندهم حي ولا وقفت بوسطهم بقوتها وجرائتها ولا همها اكبر شنب
فيصل / وقتك تتغزل ببنت الفهد لازم نعرف وش مهبب عمك لان الي سواه بيلحقنا
جاسم / أي والله
فيصل / مالك الا خالتي موضي اسئلها
جاسم / سئلتها متاكد انها تعرف واضح انها تكذب قالت ماتدري
فيصل / لا حول من الي بيقول لنا وش رايك تروح لهند لمكتبها وتسالها
جاسم / ناوي علي ما شفتها يوم طردتنا ان جيتها يمكن تذبحني
فيصل / اجل انسى
جاسم بحب وهيام / فيصل شفت عندهم حوريه وش حوريه الا ملاك وربي تذبح القلب بشوفتها اول ما شفتها كانت مع اخوها محمد والثانيه يويلي على الثانيه تحسب اني اخوها سكرت عيوني بيدها لا ومسكت راسي ورفعته يويلي يوم رفعته وجت عيني بعينها وربي بغيت اتهور بس ربك ستر
فيصل / ههههه يعني طحت ومحد سمى عليك زين ما تهورت كان انت المذبوح
جاسم / انا شاك انها غاده بنت هند
فيصل / غاده كبر الجوهره 19 فرق بالعمر بينكم اكثر من 15 سنه
جاسم / لا ماتوقع الي شفتها عمرها 19 الي شفتها قمه بالانوثه اتوقع بالعشرينات
فيصل / شيلها من راسك مدام عمك راشد
جاسم / يا ليت يا خوي بس ما قدر كل ما حاول انساها القاني مشدود اكثر لها
فيصل / الله يعينك
جاسم / فيه موضوع بشاورك فيه على اني موافق عليه
فيصل / قول
جاسم / نواف خطب اختك الجوهره
فيصل فرح بالخبر لانه يحب نواف وله معزه بقلبه
فيصل / نواف ما يرفض يا خوك لولا الحياء خطبته للجوهره
جاسم / هذا كلامي باقي راي الجوهره
فيصل / حاول تقنعها اذا ارفضته هي الخسرانه
جاسم / بحاول وانت لا تقصر
فيصل / ان شاء الله
توقعاتكم
لنا لقاء بالبارت الجاي لا تحرموني من ردودكم
اختكم نسايم نجد
|
25-10-10, 06:18 PM
جديد مواضيع قسم القصص المكتمله من وحي قلم الاعضاء
العرض العادي
