السلام عليكم
*
*
إهداء لروح الغالي ..
*
*
آآآه من طيش القصيد ومن شقاه و من هباله
وآآه من شي يحد النفس وازعلها عليه
*
شاعرا لمن ضاق صدره من زعل طوح عقاله
وجر دلوه من قليب الشعر واخرجها رويه
*
.له ثلاث ليال ماذاق المنام ولاهناله
كل ما غمض جفن عين تباعد عن خويه
*
قلت في نفسي ومن ظيم الزمان ومن سواله
ليه لمن ضقت ما جر اللحون السامريه
*
لا ذكرت الشايب الي كنت انا اصغر عياله
كنت احس بقيمتي عنده واحس بمقدريه
*
كنت انام بوسط بشته واتفيا في ظلاله
كان كله لي لحاف عن سموم القيض فيه
*
كنت اعرف انه يعاني بس يكتمها بحاله
اعرفه رجل صبور وضيقته دايم خفيه
*
اذكره انه يوم نادني وهو قاعد لحاله
قال يا ذخري تعال اعطيك من عندي وصيه
*
واذكر انه صد عني بس مادري وش جراله
كان ماوده يبين لوعة الايام ليه
*
اذكر انه قالي لا تاخذ الدنيا جهاله
التجارب فالحياه وكل نفس لها منيه
*
ابن ادم لا تعافا والزمن طاب وصفاله
لا يحسب ان الليالي كلها دايم هنيه
*
ياولدي والجمل لمن برك للحمل شاله
والرغى بعد عقب الهدير يضعف النفس القويه
*
ياولدي وان فعل بك طيب لا تنسى الجماله
كان ما تقدر ترد الطيب لا تجزاه سيه
*
ولا تمن اللي عطيتك ولا تدورلك جزاله
ولا تدور من ضعيف النفس جود ولا عطيه
*
ولا تصير المنخل اللي تتجتمع فيه الحثاله
ولا تصير الخايب اللي صورته دايم رديه
*
عقبها من يوم سافركنت افكروش جراله
كنت احسبه راح طرقي واثرها روحه مديه
*
يوم روح كل عرقا في معاقيلي بكاله
كنت امش الدمع من عيني واقول الله وليه
*
كنت اقول انه يعود بس خانت به لياله
اه من قل العزاء للحين افكر في مجيه
*
والله انه في جنوب القلب مادري شماله
لين اموت ونار البعد في حنايا القلب حيه
*
اتخيل صورته بالحلم واناجي خياله
واتمنى جيته لبآرو الاقراب فيه
*
ليت ابوي حي يرزق لو انا ميت بداله
والله اني ما اتحسف لو غدت عمري ضحيه
*
ياعسى مزنن يلوح البرق في مقدم خياله
يسبقه ريح المطر ويبشر الدار السنيه
*
تتبعه صلف الهبوب وصاخب الرعد يحداله
ويتسابق لا ثرى همال غيثه وبرديه
*
ياعساه لقبر ابوي يصب سيله فوق جاله
لين يصبح من بعد هالقبر كنه مزهريه
*
ياعسى الله يرحمه ويسكنه دار العداله
ياعسى بجنة الفردوس يسكن مع نبيه
*
قلتها وانا اتجمل بالصبر واقول داله
لو حزني ماتكفيه الحروف الابجديه
*
واه من طيش القصيد ومن شقاه ومن هباله
يكشف اسرار القلوب وينبش الجروح النديه
.
.
كلماات لامست الاحسااس ..
الله يرحم شيخ ماأنحنى له راس ..
20-09-10, 08:04 PM
آآه من طيش القصيد ..إهداء للغالي..!!
جديد مواضيع قسم الشعر والشعراء
العرض العادي
