خيوط الماضي / للكاتبة : ميرة الدلوعة ..

(خيوط الماضي )

اول قصة امارتية اكتبها طبعا خيالية

قصة فيها الكوميدية وفيها الحزن وفيها الرومنسية

وان شاء الله تحبون ابطالها



الفصل الاول

الشارع زحمة والاشارة موقفة شكله حادث جدام ، يمكن من المطر , من البارحة

والمطر يطيح , هذا محمد كان يدرس في كلية المجتمع وقفوه بسبة الانذار ورايح

صحارى مول علشان يقابل ربيعه ناصر يبي يعطيه فلاش فيه العاب وافلام ,
يحاول يتصل له بس مو قادر يلاقي شبكة , واخيرا بعد كم محاولة
محمد: الو , هلا نصور
ناصر : هلا حمود وينك بطيت ياريال
محمد : كاني بالطريج بس شكله حادث جدام , انت وين قاعد
ناصر: هني يم الالعاب اترياك
محمد : يالله الحين تحركت .
وصل محمد باركنات المول , يقفل السيارة بالريموت, يشوف وحدة واقفة يم
سيارتها وحدة ملامحها طفولية قصيرة تضرب الموبايل بايدها ,شكلها متوترة,
يسالها :
محمد : تبين مساعدة؟
الوحدة : ما تستحي على ويهك , ما عندك دم ماعندك خوات , بس تشوفون وحدة
بروحها تتحرشون فيها
محمد : بس بس , كليتيني بقشوري , برايج
ومشى عنها
ركب الدري المتحرك وهو يلعب بموبايله ويمشي يم المحلات ويطالع شكله عاكس
ويعدل شعره اشوي , يدور رفيجه ويشوفه مندمج باللاب توب
محمد : السلام عليك ,
ناصر : ها وين الفلاش؟
محمد : اندوك اذيتني فيه
ناصر : له له شو ها البدلة الفانيلا عنابي ويا جينز ازرق مسكت , توم كروز مو
محمد الحمادي
محمد : اعجبك
ناصر: وينك حمود طافك
محمد : شوصار بعد
ناصر: شلة بنات رايحين السينما تقول رايحين عرس
محمد : هع , عيل شو نسوي هني وراهم .
راحوا السينما ورقموا البنات بالبلوتوث, وخلص الفيلم وظهروا بعد ساعة ونص
وصلوا الباركنات
محمد : ها, ياي بسيارتك ولا اوصلك بطريجي
ناصر : لا وييييين العيوز بالكراج
محمد : اقولك راي , عقها يم الدرام اللي يم بيتكم واحرقها ههههههههههههه
ناصر: مايضحك
محمد : لحينها واقفة !
ناصر: تكلم منو ؟
محمد : مافينا يابوك , يالله سرينا
الوحدة : اقول ؟
محمد : ترمسيني؟
الوحدة : هيه لو سمحت
محمد : امري اختي
الوحدة : التاير مبنجر عني
محمد : وانتي من صجج ؟ واقفة اكثر من ساعة وما طلبتي احد حتى من الشرطة ؟
الوحدة : ما اعرف اتصرف
ناصر : ههههههه يحليلج نعلمج افا عليج
محمد وهو يدز بطن ناصر : انزين قعدي بسيارتي لين اخلص لان السالفة بطول اشوي ومو حلوة وقفتج بالشارع
الوحدة : ومو حلوة اقعد بسيارة ريال غريب
محمد : براحتج بتوقفين اوقفي
الوحدة : بسير داخل المول بخذ لي حاية وبظهر ما بتاخر
محمد : اوكي خذي راحتج
فتحت باب سيارتها وخذت شنطتها ومشت
ناصر : من صجك, نحن صبيان نشتغل عندها
محمد : وشوفيها يمكن تعطينا رقمها ولا تواعدنا
وبعد ساعة نزلت ووقفت عند السيارة شافت انهم مشو
الوحدة: وين راحوا؟ شكلهم ساروا , احسن اصلا مالي ويه اكلمه
.................................................. ...........................
وفي بيتها
الوالدة: وينج يا مهرة تحيرتي وايد
مهرة : التاير بنجر عني ومن جي تاخرت
الوالدة: من متى يترياج بالميلس
مهرة : منو؟
وفتحت باب الميلس وتغيرت ملامحها لعصبية .....
.................................................. ......................


وفي بيت محمد
يدخل سيارته والباب دايما مفتوح لانه اخوانه برع واي حزة بيون
ينزل منها موطايق ايده كله وصخة من التاير يفتح باب الصالة وتطلع بويه الخدامة
الخدامة: حمود يبي كدا؟
محمد: كدا عيونج , كملتي 30 سنة والمفروض يعطوج الجواز الاماراتي ولحينج ماتعرفين تقولين غدا؟ غرفي لي اشوي ويبي حجرتي.
ياخذ له شور ويطلع لاف الفوطة على خصره , يتذكر البنت اللي ساعدها اليوم
ويضحك ,
الخدامة: انته مجنون ؟ منو يضحك انت؟
محمد : قولي جملة عدل بالاول, وسمعي دقي الباب قبل ماتدخلين , ريال انا الحين مو ياهل
دانة: حمود
محمد : ها خير انتي الثانية
دانة : ودني العصر بيت رفيجتي علشان بنذاكر
محمد وشاق الويه: أي وحدة فيهم؟
دانة: حلوم
محمد : وع ام اسنان تقويم
دانة: حمود يالله عاد بتوديني ولا اقول لعبود
محمد: خبريه هو لو وحدة ينطلق فيها العين بوديج
دانة : مالت عليك
محمد : ذلفي برع بلبس ملابسي
لبس كندورته مال النوم سوده ومخططة بابيض
تغدا وخلص ونزل الصالة شاف عبدالله قاعد
محمد : هلا عبود شحالك
عبدالله : هلا محمد
وهومندمج بالجرايد
محمد: شو تدور ؟
عبدالله : سلامتك ادور شغل لربيعي
محمد : ما عندك سالفة
دانة : عبود طلبتك
عبدالله : خير , وهو يقلب بالجرايد
دانة : وصلني بيت رفيجتي حلوم بروح اذاكر عندها
عبدالله : شو , وما تعرفي تذاكري بروحج يعني
دانة: في مسائل ما فاهمتها وهي بتشرح لي
محمد : شاطره ام ضروس هع
دانة : حمود لا تعيب على رفيجتي
عبدالله: وليش هي ما اتي تذاكر عندج
دانة : هي يات الاسبوع اللي طاف
عبدالله : ماعندي ها السوالف
ومحمد يلعب بموبايله ويضحك
دانة : حرام عليكم عندي امتحان تقويم
محمد: عندج خلوف خلي يوديج بسيكله هههههههههه
ولا بعد معدلنه مسوي في لصقات وشرايط ههههههههههه
ومشت وهي تنافخ
محمد : انا رايح انام وراي قز بليل
ودخل غرفته وصكر الباب

واشوي الشغالة ياية تراكض عبود عبود الحك
ركض عبدالله للحوش وطلعت دانة لبست شيلتها وركضت
منصدمين من اللي شايفينه...............
.................................................. ...................................

ياترى شو صار بالحوش

تابعوني

الفصل الثاني



وفي المسا وفي بيت مهرة
سارة: وحشتني موووت ,متى بشوفك بعد, ما اقدر على فراقك دقيقة واحدة
الوالدة: ساروه , ساروه وصمخ
سارة: خلاص بدق لج عقب اوكي حبيبتي يالله باي
الوالدة : ماشبعت رضاع من التلفون بس هاي انتي يا الكمبيوتر ولا التلفون
ماشي شغلة ثانية
سارة: بليز ماما تعبانة ابي ارتاح وراي مدرسة
الوالدة : على الاقل اتصلي باختج تطمني عليها
سارة: انا ما احب المجاملات وها الخرابيط ولو بيستوي شي بيوصلنا خبر
الوالدة: فال الله ولا فالج , نامي مامنج فايدة
راحت الصالة تتحرطم وتكلم روحها
الوالدة : ما عندي احد يوديني بشوف تاكسي بطريجي
ولبست عباتها ووقفت بالشارع لين تاكسي وقف لها وركبت وراحت


وفي بيت محمد وهو يكلم ربيعه بالموبايل
محمد : هلا نصور
ناصر : ها وينك ما بتمر علي
محمد : وين بتروح بعد
ناصر : خلنا نتلفف اشوي نشرب شاي كرك
محمد : مسافة الطريج
يقوم يغسل ويهه ويلبس كندورته الثلجية ويلبس كاب عليها
يشوف البيت هادي وهو طالع
محمد: معقولة ينامون ها الحزة
يشغل سيارته وينتبه انه في مكالمات من دانة ومن عبدالله
يتصل على عبدالله
محمد : الو ها عبود خير
عبدالله: وينك انت
محمد : الحين طالع من البيت ,ليش؟.
عبدالله: تعال المستشفى
محمد وهو يرجع السيارة بسرعة ريوس
ويحفر بسرعة , وما حس الا وهو بالمستشفى
يسرع خطواته لين يوصل الغرفة, يفتح الباب
محمد : خير ان شاء الله

دانة : شوف كيف معلقين بريله كلها جبس , مايسمع الكلام
خليفة: انا شو يخصني انا راكب سيكلي وماشفت السيارة زين
محمد: مو منك من ها السيكل , لو مركب لك في اشارة زين علشان يعرفون وين بتلف
عبدالله: ها ماوقته الحين, الحين الشرطي يبي يسوي تحقيق مع اللي داعمنه وما احد
كبير غيرك الوالد مشغول وفي بوظبي باجر بيوصل
محمد وهو يصكر فصمه : احم وين اوقع
دانة : انت ما ممثل علشان ياخذون توقيعك
عبدالله : سير برع تفاهم مع الشرطي
محمد وهو طالع من الغرفة لقى الشرطي ماسك دفتر وعاطنه ظهره
محمد : لو سمحت اخوي
الشرطي : هلا من متى نتريا
مهرة: شو ها الصدفة
محمد : انتي ؟
الشرطي : تعرفون بعض؟ مع انه خوانك ما عرفوها
محمد : لا انا وياها نشتغل بنفس المكان
مهرة تطالعه مستغربة
محمد : منو الغلطان خلوف اقصد اخوي ولا الاخت ؟
الشرطي : الاخت كان تسرع في الشعبية
الوالدة: مهرة فديتج شو صار لج
مهرة : اماية ماصار شي بس الولد تعور
الشرطي : تفاهموا ولحقوني المركز
محمد : هلا الوالدة شحالج
الوالدة : ها اللي داعمته زين مافيه شي
مهرة: اماية الولد داخل الغرفة هذا اخوه العود
محمد: هيه خالوه اسمي محمد واخوي خلوف اقصد خليفه
الوالدة: بسير اشوفه
محمد : لا تحاتين بتنازل عن الحادث
مهرة: ليش ؟
محمد : لا مو حلوة بعد ناخذ ونعطي ونكبر الموضوع نحن اهل طال عمرج
مهرة :نعم؟
محمد : لا اسولف معاج
مهرة: بصراحة ما عرفتك بالكندورة
محمد : ايه صح بس لو كنت لابس كندوره في المول خسي اركب لج التاير
وضحكت مهرة : خقاق انت هههههههه
محمد : شونسوي علشان ما يخترب برستيجي
الوالدة : ها يالله مهاري نروح
مهرة: ياية مع منو اماية
الوالدة : تاكسي, ليش وين سيارتج
مهرة : موقفة في الشرطة
محمد: عادي بنروح المركز مع بعض وبدربي بوصلكم
الوالدة: لا مانبي نعبل عليك
محمد : لا ولو خالوه حاضرين
طلع عبدالله من الغرفة
عبدالله : محمد وصل بطريجك دانه البيت
محمد: لا ما اقدر عقب ما اوصل الاهل بروح عند نصور
عبدالله وهو يهز الراس : الاهل؟
وفي المركز وقعوا على التنازل والموافقة بين الطرفين
وفي السيارة
الوالدة: تعبناك معانا
محمد: لا تعب ولا شي تبون شي مرة لا يردكم الا لسانكم
هذا رقمي خالوه تراني شروات ولدج
الوالدة: ماتقصر والله
محمد: اقول مهرة
وهي تطالعه بنص عين
مهرة : شو
محمد: أي منطقة بيتكم
مهرة : بعد الدوار لف يمين
الوالدة : كله منه هو اللي فر مخج
مهرة: اماية غيري السالفة
الوالدة : هي وانا صاجة من قعدتي معاه صار اللي صار
مهرة: اماية بنتفاهم في البيت
ومحمد مستغرب مع منو قعدت
ولما وصلوا البيت
نزلت الوالدة وهي تتحرطم
الوالدة: اكيد سارو ترمس بالتلفون ماتصدق نظهر اشوي وهي ركضة

مهرة: شكرا محمد مرتين
محمد : افا عليج نحن في الخدمة تامرين امر
لما دخلت محمد تم يطالعها حس انه مايبي يفارقها شو ها الصدفة الحلوة اللي جمعته فيها مرتين نفس اليوم
ما حس الا وتلفونه يرن
محمد : هلا نصور
ناصر: ماصار كرك تطبخه شو
محمد: ااه احلى كرك شربته نصور
ناصر: يا الخاين ماتقدر تصبر اشوي وين أي مطعم
محمد: شنو كرك حليب اشوي ومر اشوي وحلو اشوي
ناصر: شو تخربط انته
محمد : ها يالله يايك وبقولك السالفة كلها .

.................................................. ........................................

بدا محمد يعجب بمهرة

وهل في صدفة ثانية بتجمعهم


تابعوني

لجزء الثالث

في اليوم الثاني قعدت مهرة متكاسلة خذت لها شور وطلعت من المسبح والفوطة لافتها بشعرها تذكرت ما عندها سيارة , اتصلت لربيعتها

مهرة: صباح الخير

اسماء: هلا مهاري صباح الورد

مهرة : اقول اسوم ترومين تطوفين علي ؟ سيارتي محجوزة

اسماء : ليش شو صار بعد؟

مهرة : بخبرج بالدرب

ولبست ملابسها وعبايتها ونظارتها الشمسية ودخلت سيديات شرحها بشنطة اللاب توب

في الصالة

مهرة : صباح الخير

الوالدة : صباحج حبيبتي

مهرة : وينها سارونة مابتروح المدرسة اليوم؟

الوالدة: ما راضية تنش

مهرة: خلاص خلها تروح بالباص

الوالدة: لا تنسي الساعة 10 موعدنا بالمحكمة

مهرة: بشوف على حسب المديرة اذا جدمت حصصي بترخص منها

اكيه اسوم وصلت من رخصتج

وركبت السيارة

مهرة: هلا اسوم اسفة تاخرت عليج

اسماء: لا حبيبتي عادي , بس ها طمنيني شو صار

وتحركت السيارة لين ماوصولوا المدرسة

طبعا مهرة معلمة علوم في مدرسة للاولاد بس من المرحلة الاولى للخامس

تحب وظيفتها لدرجة عادي انها تخسر أي شي بس علشان تحافظ عليها

لما تلتقي بطلابها دايما الابتسامة بويها تضحك وتساعد وتعاون وتحب تشغل وقتها باي شي لكن حقيقتها شي ثاني شخصيتها شخصية ثانية مع الايام بنعرفها















تدخل على الاخصائية

مهرة : السلام عليكم

الاخصائية: هلا ابلة مهرة

مهرة : بغيت الوكيلة ما اشوفها

الاخصائية : راحت العيادة بنتها تعبانة شوي , اقول مهرة بتروحين معانا زيارة لطالب مريض

مهرة: منو؟

الاخصائية : خليفة الحمادي صف رابع \2

مهرة : خليفة؟

وبلحظة تذكرت مهرة خليفة اخو محمد وابتسمت

الاخصائية : شوفيج

مهرة: لا سلامتج بس اليوم ما اقدر لان عندي موعد

الاخصائية : باجر الزيارة بس ابغي احصي العدد واي صف بروح

مهرة: لا ما اقدر لانه اليوم بترخص

وطلعت مهرة من عندها وهي مبتسمة

................................................

وبعد الدوامات وفي بيت محمد

عبدالله: سونيتا

الخدامة: شو يبا عبود

عبدالله : جهزي ملابس خلوف داخل شنطة

الخدامة: زين

محمد قاعد من النوم ببجامته العنابية يعدل شعره



محمد : سونيتا وين الغدا

الخدامة: زين حمود

محمد: طاع هاي اصغر عيالها

عبدالله يبتسم: حمود ودا ملابس خلوف المستشفى عندي معهد الساعة 4ونص

محمد : اوكي

وبعد العصر لبس بدلة سبورتية بعدين تذكر كلام مهرة ابتسم وبدلها

لبس كندورة بنية فاتحه وغتره وعقال ونعاله المندوس ولبس نظارته الشمسية البنية

ركب السيارة وبطل الفتحة لانه الجو مغيم وبارد

يمشي بالسيارة اشوي اشوي بهدوء كانه الشارع زحمة , لكنه فاضي

وصل المستشفى نزل من السيارة ومشى بالممر لحد ما وصل الغرفة

محمد : هلاااااااخلوف

خليفة : غريبة حمود يايني توقعت عبود

محمد : انت ماتستحي على ويهك كلها ها الشنب واللحية وحمود

خليفة : ها يبت ملابسي

محمد وهو يضرب الطاولة: شييييييت, تصدق اني ياي علشان هاي السالفة

خليفة : ها منو ماخذ عقلك؟

تك تك

مهرة: السلام عليكم

محمد يفصخ النظارة مو مصدق من اللي يشوفه هل هو في حلم

مهرة وهي داخلة بباقة الورد

مهرة وهي متعجبة: ماتعرفون تسلمون ههههه

محمد: وعليكم السلام اخت مهرة

مهرة: شخبارك خليفة اليوم

خليفة: زين بس شو عرفج اني هني

مهرة : لاني انا اللي دعمتك

خليفة: قولي والله

محمد : احم شو ما عاجبنكم يعني

مهرة: شحالك محمد

محمد : تمام الله يسلمج

مهرة: كاشخ بالكندورة

محمد: احم ريال شو تبيني البس مثلا تنورة وقميص

مهرة: ههههههههه

خليفة: ابلة مهرة

مهرة: هلا خليفة

خليفة : ما احد سال عني في المدرسة

مهرة : امبلا وباجر بزورونك

محمد: ابلة؟

مهرة: هيه انا معلمته مال العلوم

محمد : ماشاء الله اللي يشوفج يقول انج طالبة مو معلمة

مهرة : تسلم وانت وين تشتغل

محمد : انا ...

خليفة: ماشي شغله حتى الكلية وقفوه قاعد في البيت

محمد: دواك في البيت , احم لا ماعليج منه انا بس اخذ بريك من الدراسة

مهرة: والله؟

الممرضة : بنبدل الجبس لخليفة ممكن برع

محمد ومهرة: اوكي

محمد : اقول مهرة ممكن نقعد بالكفتريا لين يخلص

مهرة : لا بروح البيت حبيت اطمن على خليفة

محمد : اشوي بس

مهرة : اوكي

محمد : شو تشربين

مهرة: عصير اناناس

وبعد سكوت ونظرات محمد لمهرة , هي ما ارتاحت للوضع ,

مهرة: تعرف من شفتك توقعت انك تشتغل وشغلة قوية بعد

محمد : كيف حكمتي

مهرة: من السيارة اللكزس وملابسك ولا بس مظاهر وديون الدنيا عليك

محمد: لا ديون ولاشي الحمدلله الوالد مدير شركة للصابون وما مقصر معانا

وما يحب يفرض علينا شي احنا مانبي نسويه, مثل عبد الله اخوي يدرس ويشتغل لانه يحب يعتمد على نفسه , اختي دانة بنت تدرس في المدرسة في يوم بي الريال وبياخذها وخلوف العمر جدامه

مهرة: ومحمد؟

محمدوهو يبتسم: ما احب اشتغل أي شي لاني ما اعرف أي شي حتى دراسة مافالح

مهرة: معقولة ما عندك هدف في حياتك؟

محمد: لا والله ما في بالي شي

مهرة : لما تنام شو تقول عن باجر

محمد: متى بطلع مع نصور ههههههههه

مهرة : من صجك

محمد: ليش؟

مهرة : بعد ماتطلع وين تروحون اماكن معينة ولا أي مكان

محمد : على حسب البنات وين متجمعين اكثر هههههه

مهرة : يعني عندك هدف بطلعتك

محمد : وهذا تسمينه هدف؟

مهرة: المهم انك ليش تطلع علشان شي واحد هو تغازلون بنات وهذا هو الهدف

محمد: اسولف معاج لا تصدقيني عن تاخذين فكرة سيئة عني

مهرة: ومنو اكون علشان تهتم برايها

محمد وهو مستحي : ما اعرف

مهرة: انا تاخرت ولازم امشي

محمد: اوصلج

مهرة : لا عادي مشكور, سلم على خليفة

وراحت ومحمد تضايق ليش قال لها سالفة البنات

ما حس الا وهو يركب السيارة ويفصخ الغترة ويفكر بكلامها

حس انه رخيص وتافه وماله معنى فتح فصمته اللي فوق

اتصل ناصر

ناصر : وينك حمود

محمد وبضيج: موجود

ناصر : شوفيك

محمد: لا ماشي سلامتك

ناصر : بتي صالة البليارد نلعب

محمد: بشوف

صكر التلفون ومايذكر قال لناصر باي ولا صكره بويهه عقله مو معاه

كله تفكيره بها المهرة اللي قلبت حياته

.................................................. ...................

وفي بيت مهرة

سارة: مهرة مهرة وديني المكتبة ضروري

مهرة: ما عندي سيارة

امل: كلها يصير وانا بالجامعة

مهرة: امول متى وصلتي ومنو يابج

امل : رفيجتي مع امها

وحضنتها امل كانت القريبة من مهرة ودايما الناس يشكون انهم توام بالملامح وبالجسم بس مهرة ملامحها طفولية وامل جادة اشوي

تقعد معاها بالغرفة تحكي لها شو صاروامل منفعلة معاها وسارة استغلت سوالفهم علشان تروح ترمس بالتلفون

.................................................. ...........................................

وفي بيت سالم

الام : خلاص مافي شي يربطنا بينهم

سالم : هيه خلاص بس باقي كم اوراق يبالها توقيع وتنتهي السالفة

الام: زين بنرتاح من ويهم

سالم : مو من زود الزيارات بينا

حليمة: بس عاد خلونا نتعشى على راحتنا كل يوم نفس الموال

الام: خلاص شبعنا , سلوم بعد العشا تعال ابيك بحجرتي

سالم : ان شاء الله

حليمة : اقول سالم

سالم وهو ياكل ويعدل نظارته الطبية : قولي

حليمة: امي تدور لك عروس

سالم غص من الاكل: كح كح

حليمة : صحة صحة اشرب ماي ,بس ما ينعرف منو العروس

.................................................. ..

وفي بيت محمد

دانة: حمود نسيت تشل الملابس مال خلوف

ومحمد يمشي عنها ولكانه سمعها وهي واقفة تطالعه

دانة: شوفيه اخوي اليوم

قعد على شبريته

دقت الباب

دانة: عادي ادخل

محمد : تعالي

دانة: شو بلاك محمد احسك مو طبيعي مريض؟

محمد : لا

دانة : اذا تبي شي خبرني

وهي طالعة

محمد: دانة بسالج سؤال

دانة: تفضل

محمد: اذا ياج معرس شو مواصفاته

دانة: اممم اهم شي يشتغل وعنده بيزات وتكون عنده شهادة علمية على الاقل ها مقبولة و تكون سمعته زينه علشان يحفظ شرفي وشرفه

محمد وهو يهز الراس: ولا شي من اللي قالته فيني

دانة: ليش احد تقدم لي

محمد: بس ها انتوا البنات ماتصدقوا احد يخطبكم ,بس مجرد سؤال ,ذلفي برع ابي اقعد بروحي اشوي

وتم يفكر وما حس بعمره للصبح

.................................................. ........................................

ومثل كل صباح في بيت مهرة تقوم من فراشها تصكر صوت المنبه , ترفع شعرها

عن ويهها , وعلى دقة الباب , تفتح الباب

سارة: صباح الخير

مهرة: وهي تثاوب ااه صباح الخير

سارة: مهرة ابغي شيلتج , اليوم بودونا رحلة وابي اكون كاشخة اشوي

مهرة : ماتبين فلوس

سارة: احم انت كريمة واحنا نستاهل

مهرة: بوصلج المدرسة

سارة: لا عادي ليلو بتمر علي

مهرة : اوكي

بعد ما خذت لها شور ولبست ملابسها , طلعت للصالة

مهرة: غريبة قاعدة من الصبح

امل : شونسوي الا هم يومين ونروح خلونا نتريق معاكم اشوي

مهرة : وامي وين

امل : تسوي شاي حليب , اقول مهاري

مهرة وهي تحطي الجام على التوست : هلا

امل : انتي ماتلاحظين على سارو شي؟

مهرة: مثل شو

امل : وايد ترمس بالتلفون

مهرة: عادي صديقاتها

امل وهي تهز راسها: لا مو صديقاتها

مهرة مستغربة : منو عيل

.................................................. ......................

وفي بيت محمد

سونيتا وهي تدق الباب : حمود حمود نشي باب يجي

محمد وهو نايم بفانيله وشلش : زين زين

قام لبس كندورته مال النوم لانه يعرف عمره بيسلم وبيرد ينام

لان ابوه ماعنده وقت ودايما مشغوول

يالله يفتح عينه وشعره قافط يسلم على ابوه

محمد : هلا ابوي شحالك

الوالد: هلا محمد , بعدك ماغسلت ويهك وياي تسلم

محمد : شونسوي اخاف اطلع ما الاقيك

الوالد : ليش عاد مب شارد انا

عبدالله: هلا ابوي شحالك

الوالد : هلا عبدالله وينك ما اتصلت لي من ذاك اليوم

عبدالله: اسمحلي والله عندي امتحانات بالمعهد ودوام

محمد : زين نشوفه في البيت

الوالد : عيل الحين بخليها على محمد

محمد وهو مستغرب: تخلي علي شو؟

عبدالله: انصحك لا مابيضبطها

محمد: لغز هو ؟ تكلموا صح علشان افهم

الوالد وهو يطالع عبدالله : اوكي

وخبروه السالفة

دخل محمد الحجرة ورقع الباب: عبود شو فاكر نفسه , ما عليه بثبت له كيف بضبطها ولا لا

.................................................. ..............................

يدق الجرس في مدرسة مهرة , تطلع من صفها وشالة معاها الحلاوة والنفاخ

علشان درسها اليوم عن البالون

تسلم على المعلمات في الغرفة وتقعد على كرسيها وتحطي اغراضها عالطاولة

اسماء : مهاري فلوس الجمعية

مهرة: ماتنسين شي ههههه

وهي تطلع البوك طاح الرقم اللي عطتها اياه امل اختها, تمت تطالعه

اسماء: يالله مهرو

مهرة وهي سرحانة: اوكي حشرتينا

اتصلت على الرقم عطاها مغلق , حطت الكرت داخل الشنطة

وتمت تفكر بكلام امل

امل : البارحة سمعت سارة تكلم واحد وتقوله حبيبي

مهرة : معقولة وكيف عرفته

امل : انتوا تعرفون وين تروح ولا مع منو تتكلم والنت الحين متروس من ها السوالف

مهرة: لا تخوفيني اليوم رايحة رحلة مع المدرسة

امل : ومنو وداها

مهرة : ليلى ربيعتها

امل : ومتاكدة انه صفهم اللي رايح رحلة

يدق الجرس وتقوم مهرة من غفلتها

تمسك موبايلها تتصل على مدرسة سارة

مهرة: الو السلام عليكم لو سمحتي حبيت اسال في رحلة اليوم لصفوف تاسع

.................................................. ...................................



هل محمد بتغير علشان مهرة

وسارة سارت الرحلة ولا

تابعوني

الفصل الرابع

دانة وهي تتمشى بالفصحى مع ربيعتها حلوم

حليمة: دانة بخبرج

دانة: شو

حليمه : امي كلمت سلوم عن زواجه

ودانة وهي مستانسة : واخير رضت

حليمة وهي تشرب البيبسي: رضت يزوج بس البنت اللي هي تبيها

دانة: ليش هي اللي بتتزوج ولا ولدها

حليمة : وسلوم متضايج وااايد مايقدر يقولها لا

دانة: اسمحيلي اخوج ما عنده شخصية وما احد بيدمر حياته غير امج

حليمة: ما ارضى تقولين عن امي جي لو امج عايشة وحبت تختار لحمود ولا عبود مابتستانسين؟

دانة وبعصبية: حلوم ما لاداعي تقارني

ونزلت دمعة من دانة

:ياريت امي عايشة بس , على الاقل تقعد معاي , تكلمني , ما عندي احد في البيت

كلهم اولاد وما احد يسمع لي ما احد يقولي تغديتي ما احد يقولي بالتوفيق اذا كان

عندي امتحان لما امرض استحي اروح لخواني اقولهم مريضة

ومشت عنها وحليمة واقفة ماتعرف شو تقول لها





وبعد الدوام وفي بيت مهرة

الوالدة: هلا فديتج بطيتي اليوم عيل

مهرة: هلا اماية , لا سلامتج مريت مدرسة ساروه ايبها معاي

الوالدة: وليش مايات معاج

مهرة: بتي اماية

الوالدة: غرفنا الاكل بدلي ملابسج وتعالي

مهرة وهي تفتح باب غرفتها وبضيق

خذت لها شور ولبست بيجامة كحلية وخلت شعرها المبلول مفتوح

هي دوم ترفع شعرها وتلفه لانه طويل يوصل لركبتها ويضايقها

على غفلة دخلت سارة وهي تحضن امها من ورا

سارة : هلا اماية شحالج يا احلى ام في ها الدنيا

الوالدة: ليش تاخرتي اليوم بعد

سارة: كنا في رحلة

الوالدة : مهاري طافت عليج وما حصلتج

سارة : تستهبل هاي , تعرف اني رايحة رحلة

الوالدة: انزين مخليه لج لقمة علشان تاكليها

سارة: نو ماما ماكلة فاست فود في الدرب

الوالدة : فاس مال الحمة وش ها بعد

سارة: امايه شو عرفج انتي خلج بالعيش والصالونة

وراحت سارة وهي تغني اغنية عادل محمود ابحكيلك عن احوالي

وتفتح باب حجرتها وتشوف مهرة قاعدة على الكرسي وبعصبية تطالعها

.................................................. ............................

وفي بيت محمد يكلم ربيعه

محمد : هلا سلطان شحالك

سلطان : وينك يا ريال مخلي الحرمة بروحها

محمد : أي حرمة؟

سلطان: نصور ومنو غيره هع, تعرف انه ضايع بدونك

محمد : لا والله مشغول ها الايام علشان خلوف بالمستشفى

سلطان : مر اليوم البليارد نترياك

محمد : اوكي

محمد وهو يتصل بناصر

مايشل التلفون

والخدامة تدق الباب

سونيتا: حموووود كدا

محمد وهو يهز راسه : لا حول ياي ياي

وينزل الصالة ويشوف العايلة متيمعة

محمد : شحالج دانو

دانة ساكتة ماترد

محمد : شوفيج بعد تبين تروحين عند ربيعتج

اطالعه بعصبية

محمد: ابوي بتروح العصر معاي نشوف خلوف

الوالد : ليش لا, خلنا نروح كلنا علشان يستانس اشوي

دانة وهي تقوم بضيج: ما بروح عندي امتحان وكمية

الوالد : شوفيها دانة؟

محمد : ها البنات يدورون أي شي علشان يزعلون وبعدين يراضوهم

ما عندهم سالفة

عبدالله : يمكن يايبة درجة مو حلوة بالمادة

محمد : يا حليلك انته

الوالد: بس عاد ,سؤال سالناه ويا كلمة ردي مكانج, بس انا عارف هي تبي اخت تونسها وتسولف معاها

وقام من الطاولة وعبد الله يطالع محمد

عبدالله: شو قصده الوالد

محمد : يا حليلك انته دومك مافاهم الدنيا , الوالد يبي يتزوج ويب عيال قصدي اخوان لنا

عبدالله وهو مستغرب: معقولة

محمد : ها الرياييل يدورون أي شي علشان يتزوجو ويبون عيال

.................................................. ...........................

وفي بيت مهرة

كف من الخاطر على ويه سارة

سارة : اااي ليش تصفعيني

مهرة: ولج ويه تتكلمي , ماتستحي على ويهج , وين كنتي؟

سارة: ودونا رحلة شوفيج

مهرة : اتصلت مدرستج ورحت لهم وصفج موجود ما طلعوا

سارة: ومنو قالج مع الصف , انا رايحة مع ابلة الرياضة

مهرة: سارو لاتخلي ثقتي فيج تهتز واحرمج من كل شي

سارة: مايخصج انتي , اذا انتي معقدة من قبل ليش تعقيدنا معاج

مهرة وهي واقفة منصدمة من كلام اختها

امل تدخل: سارو احترمي نفسج هذه اختج الكبيرة

سارة : واختي الكبيرة جي تعامل اختها الصغيرة

مهرة وبضيج طلعت من الغرفة وامل تلحقها : مهاري مهاري سمعيني

وترقع الباب عليها وتم تصيح ورا الباب وهي مغطية على ويهها وامل تدق الباب لكنها مافتحت لها لانه مو حاسة بالباب

شريط الذكريات يمر جدامها كانها تطالع فيلم جدامها

وهم بعرس بنت خالتهم مخلصين من القاعة شالين الهدايا والورد من العرس

تتصل لاخوها احمد

مهرة: وينك احمد ما اشوف سيارتك زحمة وايد

احمد : يالله تعالوا انا واقفنكم وداق اربع اشاير بسرعة

وكان الجو مطر وهي متغشية مو قادرة تميز السيارة

ركبت السيارة

مهرة: يالله بسرعة حرك هناك يتريوك عند البوابة

علي: نعم ؟

مهرة : ابيييييه

نزلت من السيارة وركضت تدور سيارة اخوها

وتركب حصة السيارة

حصة: ها علاوي شفت بنية نازلة من سيارتك

علي وهو يبتسم : مغلطة عبالها سيارة واحد من اهلها

حصة : وردة هني طايحة

علي: اكيد وردتها



مهرة: حسبي الله عليك يا احميدو خليتني اركب سيارة غريب

احمد : شدراني عنكم لو رجعتوا مع خالوه

والوالدة : مدام عندي ولدي العود شو ابا بالناس

وانقطع الشريط وتذكرت اللقطة المؤلمة

واحمد بكفنه الابيض والكل يصيح جدامه

الوالدة: واعمري عنك يا احمد وا عمري عنك

بتخلينا وبتروح , واعمري ريحتك بعدها بايدي وااااااي يا احمد وااااااااااااااااااي

وينقطع الشريط ومهرة مصكرة على اذنها تحس ان الموقف للحين جدامها ماتبي تسمع صوت امها وهي تون وهي ماتحركت من مكانها قاعدة ورا الباب والدموع بعيونها................



.................................................. ....................


بدت خيوط الماضي تبين لمهرة

ومع الايام بنشوفها واضحة بوضوح الشمس

تابعوني