الفصل الخامس

وفي المستشفى وهم رايحين يزورون خليفة

خليفة: هلا ابوي شحالك

الوالد: ها خلوف دعموك

خليفة: شونسوي حريم مايعرفو يسوقون

محمد يطالعه معصب: حريم ولا انت الدفش سوق بالرصيف شو محدرنك على الشارع

خليفة: لاف رايح الدكان

عبدالله: يالله خلوف باجر بظهروك وبترجع المدرسة

خليفة : وناسة برجع البيت , واشوي بوز

الوالد : ها خير ليش ها البوز بعد

خليفة: ما ابا اروح المدرسة

الوالد : لا تروح بيعطيك الدكتور رخصة اسبوع

خليفة : يبييييييي

محمد وهو سرحان يشوف باقة الورد الذبلانة اللي يابتها مهرة ويذكر الكفتريا

والحوار اللي دار بينهم وهو يكلم نفسه: بثبت لج يا مهرة اني ريال وعندي هدف

الوالد: شوبلاك محمد

محمد : ها, لا سلامتك الوالد.

خليفة وهو شاق الويه: انا اعرف

محمد : جب احسن لك

عبدالله: يالله الوالد وراي معهد

الوالد : يالله سرينا

محمد وهو يهدد بايده لخليفة من بعيد: ماعليه الريل الثانية انا بكسرها لك

خليفة وهو خايف: خلاص خلاص

محمد يمشي ويفكر: ليش افكر فيها وايد وليش اغير حياتي علشان وحدة ما اعرفها

محمد: ابوي روحوا انتوا بتريا نصور يمر علي

الوالد: بنوصلك عنده

محمد : لا خبرته بمر علي توكلوا انتوا

..............................................











وفي بيت مهرة حزة المسا

الوالدة : امول , وين مهاري ماشفتها اليوم من الغدا

امل : عندها تحضير وايد

الوالدة : الله ينجحها

امل وهي تضحك: اماية ما عندها امتحان تحضر درس

الوالدة : وسارو وينها بعد

امل : شو عرفني عنها

مهرة وهي بغرفتها تحاول تشغل عمرها بالبطاقات والاقلام وتكتب وتمسح وتدخل عليها سارة منزلة راسها

سارة : مهاري مشكورة على الشيلة

ومهرة مسوية عمرها ما تسمع

سارة: مهرو عاد والله اسفة , انتي خليتني اقول هذاك الكلام

مهرة: خلاص خليها على الشبرية وطلعي

سارة: تبيني اساعدج ؟

مهرة : لا مشكورة بس مرة ثانية لما بكلمج صخي مكانج

سارة وهي تبوسها على خدها : ان شاء الله يا احلى اخت في ها الدنيا

وعلى دخلة امل : بس قصت عليج بكم بوسة

سارة: ما احد يسوي مشاكل غيرج سيري الجامعة وفكينا

امل : ذلفي حجرتج احسن لج

امل وهي ترتب البطاقات للمهرة ولين تاكدت انه سارة طلعت

امل: ماسالتج مساعة لانج كنتي معصبة

مهرة : عن شو

امل : دقيتي على الرقم؟

مهرة : هيه مغلق

امل : يمكن ماشي تغطية

مهرة : خلاص دقي انتي

امل: لا والله لا ما احب ها السوالف ورقمي يكون عنده وبعدين ياذيني بالاتصالات

مهرة: خلاص ولا انا بتصل شفتيها كيف اليوم بس مجرد قلت لها بحرمج من كل شي شو سوت

امل : قصدج لما بضيع بتتصرفين

مهرة:الله يهديها ان شاء الله

امل : باجر الخميس يبالنا نروح مكان نبات فيه يومين

مهرة: وين يعني

امل : شورايج المبزرة اللي في العين

مهرة : سيارتي باجر بيطلعونها , خلاص لما برجع من المدرسة بنريح اشوي وبنظهر كلنا يبالنا نغير جو

امل : اوكي حلو بسير اخبر امي وانتي خبري البرنسيز

مهرة وهي تبتسم : ان شاء الله

.................................................. .................













وفي بيت سالم

سالم وهو قاعد بحديقة بيتهم يقرا كتاب واخته حليمه تقترب منه وهي تتصل

لدانة وماراضية ترد عليها

حليمة: وايد حساسة دانو

سالم: شوبلاها دانة

حليمة : ماشي زعلت مني ليش قلت لها انك بتتزوج

سالم: وليش استعيلتي وقلتي لها , بعدي بحاول اخبر امي عنها

حليمة : بتشك انكم علىى علاقة

سالم : أي علاقة يالله تطالعني واطالعها من بعيد

حليمة : بس على الاقل فاهمين بعض واحسكم نفس الشخصية

سالم : ان شاء الله امي تفهمني وتحس فيني

حليمة : تحبها؟

سالم باستهبال: ومنو مايحب امه

حليمة : حركات , قصدي دانوا

سالم: اصغر عيالج اسمها دانة
حليمة: من اولها امعه

.................................................. ........................













وفي يوم الخميس في مدرسة مهرة

الفرَاشة : ابلة مهرة

مهرة : نعم

الفرَاشة: مديرة يطلبك

مهرة : خير ان شاء الله

تدق الباب

مهرة : السلام عليكم

ام نواف : هلا ابلة مهرة تفضلي

مهرة : خير ان شاء الله طلبتيني

ام نواف: اليوم وقعنا على افتتاح نوع من انواع المنتجات الصحية واحنا اللي بنكون

راعين الحفل ومعداته وتصويره وترتيبه والحفل بكون في بوظبي يوم الاحد فانا

قلت مدامج ابلة علوم وشاطرة بتنسيق الحفلات فاخلي الاختيار لج احسن

مهرة: انا؟

ام نواف: لازم من اليوم تروحين بوظبي وتباتين هناك وباجر الجمعة والسبت على الاقل ترتبين الامور وبعدين احنا بنطرش كم صف

مهرة : وليش انا

ام نواف: المعلمات الثانيات عندهم بيوت وعيال ومسؤولية واتمنى ماتخيبي ظني فيج

مهرة : ان شاء الله بس وين المكان

ام نواف: فندق بينونة تقدري تحجزي لج هناك وتشتغلي نفس الوقت

مهرة : ان شاء الله اكون عند حسن ظنكم

وهي طالعة من المكتب شافت واحد قاعد في غرفة الضيوف , سالت المديرة:

مهرة: منو ها ولي امر؟

ام نواف : لا هذا صاحب الحفل وهو اللي رشح مدرستنا تقدري تكلميه وتاخذي التفاصيل

مهرة وهي تمد ايدها: السلام عليكم معاك ابلة مه.... محمد

محمد وهو يبتسم: وعليكم السلام ابلة مهرة

مهرة: شو تسوي هني

محمد : ابوي كلفني ها الشغلة وحبيت مدرستكم تشارك وطبعا منتجات صابون وما صابون اتوقع علوم

مهرة وهي تبتسم: وانت عادي ؟ تقول ماتحب الشغل

محمد: لازم احدد لي هدف صح ولا لا

مهرة : صح

محمد وهو يمد ايده لمهرة: اشكر تعوانكم معنا وفرصة سعيدة ان نعمل معكم

وهي مبتسمة تمد ايدها

مانعرف شو اللي ينتظرهم وشو علاقتهم بتصيرواكيد احداث حلوة بها اليومين اللي بيقضوها مع بعض في العاصمة ابوظبي وبالتحديد في فندق بينونة



..................................................




تابعوني

الفصل السادس

وفي بيت مهرة وهي تحطي اغراضها داخل الشنطة

امل : ليش عاد
مهرة : شو اسوي مضطرة
امل : والله سخافة بعد لو مكان حلو بنقول , بوظبي عاد وياريت بنطلع ولا شي كله
بتراكضين لمؤتمركم واحنا بنتم محبوسين في الهوتيل
مهرة : وتخيلي اروح بروحي مو حلوة
امل : بس انا السبت بروح الجامعة
مهرة : عادي بوديج ساعة بين بوظبي والعين
امل : اماية بتمل وايد
مهرة: عندها اهلها في بوظبي بوديكم هناك ولما اخلص شغلي برجعكم
امل : الملل بعينه
مهرة وهي تبتسم : تحملوني شوي
امل : ان شاء الله شو نسوي بعد مانرضى بنتنا تسير روحها وتبات برع البيت
مهرة وهي تضحك : استويتي اماية ههههههههه








وفي بيت محمد وهو يحطي بروشه ومعجونه داخل شنطته السبورتية ويصفر وتدخل دانة عليه
دانة : ياعيني اشوفك متحمس للرحلة
محمد : رحلة عمل لو سمحتي
دانة : السموحة غلطنا
محمد : يبي فوطتي بالحمام تكرمين
دانة : اووووووف متى تتزوج وتفكنا
محمد وهو شاق الويه: ان شاء الله قريب
دانة : ادور لك
محمد : استريحي ما ابي من طرفج علشان اتزوجها وتطيح بالسهر معاج
دانة : يعني في وحدة في بالك
محمد وهي يطلع اااه من صدره: بس اتاكد انها تبيني بخبرج منو
دانة : اعرفها ؟
محمد : وايد تسالين شوفي شغلج ,يبي مشطي من التسريحة وعطوري لين احطي بدلي
عبدالله: ها محمد بتروح
محمد : هيه وادعيلنا
عبدالله : بيض الويه لا تفشل ابوي عاد
محمد ويدق قلبه وسرحان ويقول بخاطره: مدام معاي مهرة كل شي تمام
سونيتا : حمود شيل كراض
محمد وهو يهز الراس : شلي اللاب توب وبعدين تعالي شيلي شنطة.

وبعد ماسلم عليهم تم يطالع البيت كانه اول مرة يطلع منه
وهو يشغل السيارة دانة وعبدالله واقفين عند باب الصالة يسلمون عليه
محمد وهو يفتح الجامة مال السيارة: ناقص ترشون الورد على السيارة مثل الهنود
دانة : ههههه اول مرة نحسك رايح الشغل والبيت ما حلو بدونك تيك كير حمود
محمد وهو يمد ايده : حياكم
ويحرك سيارته ويطلعها من الفيلا وماخذ معاه وايد من الاحلام والاماني في بوظبي

...........................................
وفي بيت مهرة
مهرة: يالله اماية بنتاخر بروحها بوظبي واشوي بياذن المغرب
الوالدة : ما رايمة من ريولاتي تعورني وايد
مهرة : يبتي قهوتج وسحتج
الوالدة : هيه حبيبتي بشوف بوكي داخل مخباي ولا
وهي تدور طاحت بطاقة بس مو واضح الاسم عليها لانها انغسلت مع الخوار
مهرة: هذا كرت عليه رقم ! منو عطاج؟
الوالدة : ما احيد احد عطاني
مهرة : مي بي محمد الحمادي لانه الرقم وقبيلته الواضح
الوالدة : فريه بالزبالة
مهرة: لا اماية محتاجة رقمه , ابي اعرف كيف بنلتقي هناك
امل : يالله مهاري وين ساره
مهرة : روحوا نادوها بنتاخر
وياية تركض وتلبس شيلتها : سوري سوري كنت اكوي الشيلة واطلع موبايلي من الجرج
امل : لازم ولدج معاج
سارة : مايخصج انتي , دومج حاشره نفسج فيني
الوالدة : حشرتونا يالله ركبوا السيارة ورانا درب
مهرة : احس الجو مغيم الله يستر بالطريج
.............
وفي سيارة محمد وهو مشغل اغنية الجسمي انت كافي وقاعد يهز الراس ويرن تلفونه
محمد : الو
ناصر : انته من تا الاولاني
محمد وهو يضحك: هلا راشد الماجد
ناصر : من صجك حمود
محمد : شوفيك
ناصر : انا اخر من يعلم اتصل لك كله مغلق واتصلت لعبود و خبرني بالسالفة
كلها ؟
محمد : والله كل شي صار بسرعة وتعرف ما احب اكسر كلمة الوالد
ناصر : انزين لو قلت لي بخاويك بالسيرة
محمد: شو رايحين البر
ناصر : خلاص غيروك علينا
محمد: شوفيك اليوم ؟ صدقه سلطان لما يقول انك حرمتي لزقة يعني وين ما اروح وراي
ناصر: لا على الاقل عطنا خبر بالسلامة ابوي والله يحفظك
محمد : لحظة نصور اشوف رقم غريب يدق علي ........ تيت

محمد: الو
مهرة : الو محمد؟
محمد : هلا
مهرة : ما عرفتني
محمد : منو معاي
مهرة : مهرة معاك
محمد وهو يعدل قعدته بالكرسي: مرحب الساع
مهرة : حبيت اسالك متى بتوصل ؟
محمد : والله الحين ظاهر بالدرب قولي عقب ساعتين ونص
مهرة : اول ماتوصل خبرني علشان نشوف القاعة وين وباجر بنبدي الشغل
محمد : ولا يهمج بس تحملي جدام مطر
مهرة : اوكي باي
محمد : باي
يطول على الاغنية

أنت كافي وماأبي غيرك أبد***أنت كافي وأنت بزياده علي
أوعدكـ ماتلتفت عيني لأحد*** أيش أبي أكثر مادامكـ أنت لي


أنت واحد بس تغني عن بلد***حيى حبكـ يابعد روحي يا حياه
تنعمي عيني أذا خزت أحد***تنقطع لو صافحت غيركـ ايديا



في ربيعه أنا معاكـ وفي رغد***أنا في نعمه وفي عيشه هنيه
نجم غيركـ ينزل ونجمكـ صعد ***أصلا أنت الي امتلكت الجاذبيه



يتحرك مو حاس بالوقت لين حس ان المطر يزيد , وقف عند شيشة غنتوت اللي
تفصل دبي وبوظبي , عب السيارة بترول ونزل الواحة يشتريله ماي , شاف
كنتاكي , طلب له مايتي زنجر وجبة مع بوب كورن , قعد على الطاولة المقابل
للمطعم , ويطالع الجو يحس انه يزيد , خاف على مهرة كان متردد يتصل لها
بس يبي يطمن عليها وهو ماسك الموبايل يدخل المكالمات المستلمة ويطلع , دق
وقال اللي فيها فيها , ماشلت التلفون , حس انه توتر دق مرة ثانية

مهرة : الو
محمد : هلا مهرة عرفتيني
مهرة : اكيد خزنت رقمك عندي
محمد : اسمحيلي بس حبيت اطمن عليج وين واصلة
مهرة : موقفة بشيشة علشان المطر
محمد : أي وحدة
مهرة : بعد مركز بن بطوطة
محمد : بعدج وايد بتتاخري
مهرة : لا عادي بس ما اعرف اسوق بالمطر وبليل
محمد : برجع اوصلكم
مهرة : لا والله , وين عايشين
محمد : المشكلة ما اقدر اقولج رجعي لانج وصلتي نص المسافة
مهرة : عادي بتريا لين يخف المطر
محمد : اول ما تحركين خبريني
مهرة : ااوكي
مهرة وهي تصك موبايلها حست بشعور غريب اول مرة تحس باحد يخاف عليها
ويهتم فيها
ومحمد يطالع الساعة مايبي يتحرك لين يتاكد انها تحركت وبعد ساعة خف المطر
طرشت مهرة له مسج انها تحركت , قام هو شغل سيارته وتحرك , ومشى الوقت
لين وصل الفندق وطبعا الوالد حاجز له من اول
استقبله اللي يشتغلون في الفندق ((Service Hotelsخذوا مفتاح سيارته وطلعوا
اغراضه وودوها غرفته عطوه المفتاح وركب المصعد لحد ما وصل الغرفة
خذا له شور وهو يحس انه موبايله يرن يوايق براسه من الحمام يطالع الموبايل
يشوفه مو والع , يكمل سبوحه يخلص وهو لاف الفوطة على خصره يشوف مسج
من مهرة انها وصلت , يلبس على السريع بدلة ويمشط شعره ويرش عطره المميز
ينزل لتحت يسال الــ (reception) وين قاعة الحفلات , فلماشاف القاعة ,
عجبته كبيرة وايد فيها طاولات وايد وستاير كبار والمسرح كبير , وهو مندمج
يطالع وايده على خصره
مهرة : احم
محمد وهو يلتفت: هلا حمدلله على السلامة
مهرة : الله يسلمك
محمد : لو ريحتي اشوي وباجر الصبح نتقابل
مهرة : لا ما احب ااجل شغلي علشان مرة وحدة بتعشى وبريح وبفكر اغير الوان
الستاير وفرش الطاولات ووين بحطي طاولة البوفيه وشاشة العرض اخليها بالوسط
ولا على جنب والسماعات والاضاءات
محمد : شوي شوي يا بنت الحلال
مهرة : هههههههههههه
محمد : ماشاء الله عليج من نظرة وحدة خططتي لكل شي
مهرة : قل اعوذ برب الفلق متعودة
محمد : خلاص عيل عقب صلاة الجمعة تغدي وتعالي نفس القاعة
مهرة وهي تبتسم : اوكي
محمد : ها اوصلج رومج
مهرة : لا مشكور اعرف دربي
محمد : اوكي نركب الاصنصير وكل واحد يروح دربه
استحت مهرة: اوكي يالله
وهم يمشون يسولوفون وين بحجزون الاكل ووين بيختارون الفراش
وركبوا المصعد دق على الطابق 7 وهي 10 ولما وصلوا الطابق 5 دخل واحد
لبناني يطالع مهرة وهي تطالع المنظرة اللي في المصعد , تضايقت عطته ظهرها
واللبناني شاق الويه واشوي يرفع راسه والا محمد يطالعه بنظرة عصبية
محمد : في شي الاخ
اللبناني : لا مافي شي
وقف محمد يم مهرة حتى ماقدر اللبناني يشوفها
وصل الطابق 7
محمد : بتنزل ؟
اللبناني : لا انا رايح تحت الكوفي
محمد : انزل هني وروح الباب الثاني نحن رايحين فوق
اللبناني : مو مشكلة بستنا اشوي
محمد وهو يصك المصعد
مهرة وهي تطالعه تبي تقوله طوف طابقه بس سكتت لانها حست بالامان معاه
ولما وصلوا الطابق 10 نزلوا
ومحمد يطالع الزلمة لين صكر الباب ومهرة تضحك
مهرة: شوفيك محمد تعودنا على ها السوالف
محمد : بس لا اذا تميتوا بروحكم عادي يسوي بج شي
مهرة : صح كلامك
ضغط على المصعد
محمد : عقب الصلاة موعدنا
مهرة : تصبح على خير
محمد : وانتي من اهله
ومشت بالممر ومحمد يطالعها وبقلبه يقول لو بايدي مابخليج تطلعين مكان علشان
ما احد يشوفج ويضايقج وهي ماسكة ايدها وتقول يا بخت اللي يحبها محمد صدق
انه في غيره على اهله او أي احد قريب منه او غريب شراتي
وهي تدخل الغرفة تبي تلتفت للمصعد تشوفه واقف ولا لا وهي تفتح الباب رفعت
راسها شافته ماد ايده من بعيد , ابتسمت ودخلت وتمت ورا الباب مبتسمة حاضنة
المفتاح بصدرها


............................

محمد زاد اهتمامه بمهرة

و مهرة بدت تميل له

ياترى لوين بتوصل علاقتهم


تابعوني

الفصل السابع

وفي اليوم الثاني قعدت مهرة على الساعة 11 ونص خذت لها شور وطلعت وسوت
لها فحم على السريع وهي تدخن شعرها دخلت عليها امها
الوالدة : ها حبيبتي العرب يتريونا بنبطي عليهم
مهرة : اوكي ماماتي بس البس البدلة والعباية
الوالدة : ساروه مابتسير بتقعد هني
مهرة : برايها انزين وامل وين
امل : كاني ما حصلت شي اكله بتسلى بالكروسون والاميرة ليش ما قعدت من النوم
مهرة وهي تلف شعرها : بتم هني
وامل الكروسونة بحلقها وفاتحة عينها : بروحها؟
مهرة : انا برجع عقب الغدا لا تخافين
وبعد ربع ساعة نزلوا تحت وفي غرفة الاستقبال تشوف محمد وهو طالع
من البوابة ويرمس بالتلفون والعمال يسلمون عليه , حست بريحه عطره اللي راشنه
على دشداشته الثلجية والغترة الحمرا مع بخور ريحته عربية ممزوج مع كثير من
المشاعر والرجولة اللي تجذب أي بنت في ها الدنيا
وهي طالعة من البوابة تدوره بس ما لقت طيفه كانه شبح واختفى , تفتح سيارتها
بالريموت تركب امها وامل السيارة وهي ساكتة مكانها , امل الوحيدة فاهمة مهرة
لان مهرة مخبرتنها عن أي شي يدور بينها وبين محمد بس ماحبت تفتح الموضوع
جدام امها .
وبعد الصلاة طرش محمد مسج لمهرة عن يوم الجمعة , وهي قاعدة معاهم تطلع
موبايلها من الشنطة تقراه وتبتسم وتطالع الساعة , ماتبي تم تبي تروح , تدور أي حجة ,
مهرة: اسمحيلي خالوه من رخصتج
ام صوغة : ليش بعدنا ما غرفنا الغدا اكلي لج لقمة وروحي
مهرة : لا هم طرشوا لي مسج ولازم اكون موجودة الحين , مرة ثانية
ام صوغة : براحتج حبيبتي انتي ياية علشان الشغل ما بعطلج الله يحفظج
مهرة وهي طالعة امل توقفها
امل : مهرة ممكن اطلب طلب
مهرة: عارفة شو بتقولي ولا تخافين علي
امل : اذا فكرتي تسوين شي ...
مهرة : امل انا كبيرة وفاهمة لا تحاتين
ولبست نظارتها الشمسية وطلعت وامل واقفة تراقبها
بعد نص ساعة عن بيت ام صوغة والفندق تبركن مهرة السيارة وتنزل منها تسرع
خطواتها لين وصلت القاعة شافتها مقفولة استغربت , دقت على محمد مايرد
راحت الغرفة شافت سارة نايمة وهي تطالع موبايلها مارد عليها , تفكر تروح له
الغرفة , تهز راسها وتكلم نفسها : شوفيني ميتة عليه , ليش كل ها يصير لي ,
بس نفس الوقت ما ابي اضيع وقتي وايد شغل ,تطلع من الغرفة وقلبها يدق تضغط
على الاصنصير ويفتح الباب وتدخل وتضغط على رقم 7 تعدل شكلها بالمنظرة
اللي بالمصعد اشوي ويفتح الباب ويطلع لها محمد
محمد : هلا مهرة تغديتي
مهرة مستحية : ها لا ما ابي
محمد : انا رايح المطعم بتين
مهرة وهي مترددة : احسها مو حلوة بحقي
محمد : غداء عمل لا تخافين ما بعضج
مهرة : ههههههه اوكي
ولما نزلوا المطعم قعدوا على الطاولة وطلبوا الاكل وسالهم النادل شو تشربون
محمد : اثنين عصير اناناس
اطالعته وابتسمت وتقول بخاطرها : مانسى لما طلبت بالكفتريا
محمد : اوكي ابلة مهرة
مهرة وهي مستحية : شو
محمد : وين تبينا نروح اول شي
مهرة : بروح بسيارة وحدة؟
محمد : اكيد
مهرة : لا اسفة
محمد : ليش بعد , يالله ادورج واتصل لج كل ساعة انتي وين والمكان واحد
مهرة : بس
محمد : لا تخافين قعدي ورا ما عندي مانع استويلج دريول
مهرة : لا الحشيمة
وبعد مايابوا الاكل تموا ياكلون وهو ساكتين وهو يطالع رقتها كيف تقص قطعة
السمك الفليه بالسكين وتحطيها بحلجها وتاكل اشوي سلطة عقب كل لقمة
ومهرة تفكر ليش مارد عليها لما اتصلت له .
مهرة : اقول محمد
محمد بخاطره يقول : يا عيون محمد : هلا
مهرة : اول شي بنروح لمجموعة من المطاعم نحجز الاكل والفطاير والبارد
وبعدين المفروشات نختار الستاير والفرش
محمد : اوكي وانا اعرف اهني مطاعم روعة
مهرة : ولازم نسوي توزيعات بكياس عبارة عن مجموعة من المنتجات لنفس الصابون هدية للضيوف
محمد : يا سلام عليج مبدعه , انتي لو تشتغلين منسقة حفلات احسن لج
مهرة: خل عنك , انا علشان مدرستي مشاركة شرفها من شرفي
محمد : انا بعد شركة ابوي شرفها من شرفي
مهرة : عقب الاحتفال وين بتروح
محمد : ما اعرف الصراحة
مهرة : حلوة الحياة لما يكون عندك هدف صح؟
محمد : ايه رجعنا للجول مالج
وهي تضحك واشوي تتغير ملامحها تنزل راسها
محمد : شوفيج زعلتي
مهرة : بروح التواليت وبرجع
محمد : خذي راحتج
وتم يترياها 10 دقايق
قام من مكانه ومشى ولما وصل عند الحمام شاف عاملة النظافة طالعة
محمد : Is there a woman in the bathroom
العاملة : NO
خاف محمد اكثر وهو يكلم نفسه : وين راحت ؟
ووصل لغرفة الاستقبال الرئيسية شافها قاعدة مع واحد على كراسي الضيوف وهي
بعصبية تكلمه
كان بيقترب لكنه خاف يكون احد من اهلها وما حب يسويلها سالفة
رجع المطعم يترياها اتصل لها علشان ماتحس انه راقبها
ماردت عليه تم متوتر يطالع البوابة لين وصلت
مهرة : اسفة بمشي
محمد : وين والشغل
مهرة: تعبانة العصر بروح
محمد وهو يوقف ويقترب منها : شوفيج ! صايحة؟
وهي ماتقدر تيود نفسها نزلت راسها : بليز محمد
محمد بجدية يمسك ايدها ويرفع راسها : منو زعلج؟
وهي ترفع عينها ومليانة دموع: الله يخليك خلني بروحي
ومشت عنه
ومحمد واقف يطالعها باستغراب ما يعرف كيف يتصرف

منو ها الريال اللي ضايق بمهرة

ومحمد شو بدور براسه

تابعوني

الفصل الثامن

صكت باب غرفتها وهي تصيح راحت لسريرها وتنام على بطنها يرن موبايلها
تشوف رقم محمد تصكره بويهه وتفر التلفون وتصيح اكثر , وماحست الا وهي
غافلة بعد ساعة رن تلفون الغرفة , تقعد من النوم والكحل سايح من عينها وشعرها
مفتوح تطالع سارة وهي تشوف التلفزيون وتاكل شيبس , تشيل التلفون ويطلع لها
موظف الاستقبال يخبرها ان السيارة جاهزة علشان تروح تحجز مع محمد , تصكر
تغسل ويهها وتبدل لبسها وتلبس عباتها ونظارتها , ولما وصلت الاستقبال تخبرهم
وين أي سيارة ووداها العامل ولما وصلت السيارة شافت وحدة داخل وما سيارة
محمد
لينا : تعي حبيبتي
مهرة : اسمحيلي مغلطين بالسيارة
لينا : لا حبيبتي الاستاز محمد بعتني معاك انا منسقة الحفلات الاستازة لينا
مهرة : ومحمد ؟
لينا : خلاص هو بعتني ما تخافي
مهرة: وهو يعني مابي
لينا : شوبكي ؟ الاستاز بيقعد هون بيشرف على القاعة وبيشوف عدد الطاولات
والكراسي وبيبعت مهندس الاصوات والاضاءة

حست مهرة ان محمد تضايق من تصرفها وتقول في خاطرها من حقه يزعل منها
وتحركت السيارة .
وبعد ماخلصت من السوق رجعوا الفندق , وهي عقلها كله بمحمد , راحت القاعة
شافته مو موجود تمت تشيك على الصوت والاضاءة لين مر الوقت ويا وقت العشا
راحت فوق غرفتها سبحت وودت سارة معاها المطعم امل في ان تشوفه هناك
وهي تطلب تدور عليه , نفس الوقت ماتبي تتصل له لانه مالها ويه تكلمه يرن تلفونها
مهرة : الو
امل : هلا مهورة
مهرة هلا امولة
امل : وينج لا اتصلتي ولا شي
مهرة : قلت يمكن عاجبتكم القعدة
امل : اماية بتم لكن انا بروح
مهرة : اعرفها اماية ماتحب تنام في فنادق اوكي بتعشى وبيج
امل : بسرعة لا تبطين
مهرة : شو تبين سارة اكل
سارة وهي تقلب بالمنيو : ابي مشاوي وفتوش وحمص باللحمة
مهرة : ان شاء الله
مهرة تشوف محمد يدخل المطعم لابس بدلة سبورتية القميص اسود وعليه كاب
والبنطلون ابيض مليان جيوب يقعد على طاولة جدام بعيد عنهم قاعد يلعب
بالموبايل وهي كل لحظة تطالعه وتنزل راسها , وسارة مستغربة منها تلتفت وراها
سارة: انتي تنخشين عن منو؟
مهرة وهي متوترة : ما احد , يتهيأ لج
مهرة تبي محمد يشوفها بس محمد مشغول بالموبايل
مهرة : بروح التواليت وبرجع
سارة: لا تتتاخرين اخاف بروحي
مهرة : اوكي
مهرة وهي تمشي تسوي عمرها ما شافته , بس هو سوالها طاف
وصلت الحمام وتضايقت وتكلم نفسها : معقولة ماشافني ؟معقولة ما انتبه لي؟
بسرعة تغسل ايدها وتطلع وتشوف طاولته ما احد , تكره نفسها
شوفيج مهرة ليش تهتمين بواحد مثله ليش تفكرين فيه , وصلت طلباتهم تمت تتعشى
ولما خلصت راحت هي وسارة يبون امل من بيت ام صوغة
وهم رادين

امل : حلوة القعدة معاهم فاتكم
مهرة ساكتة
امل : مهاري شوفيج صاخة
مهرة : ماشي افكر بالشغل
سارة : الاحظ مهاري متغيرة ها اليومين
مهرة : كيف ؟
سارة : يعني تسرحين وايد كل ساعة تشيكين على موبايلج
مهرة: والله احاتي اخاف احد يطرش لي شي ضروري
وامل ماعلقت على الموضوع تمت تطالع بنايات بوظبي المرتفعة
ووصلوا الفندق وعطتهم المفتاح من الاستقبال وقالت لهم يلحقوها لين تشوف وين
وصلوا بالترتيبات تشوف العمال ينزلون الستاير والاستاذة لينا تشرف عليهم
تم تسولف معاها لين يات 10 , يا العامل
العامل : الاستاذ محمد موبايله فوق طاولة
لينا : ما دخلني انا
مهرة: انزين انته وديه له
العامل : لا بعدين يمكن يقول انا شيل
مهرة : تراك بتوديه له
العامل : نو مدام ما يريد مشكل
مهرة : عطني انا
العامل : قودام مدام لينا انتي شيل موبايل
مهرة : ما اعرفه شو شاله تجوري
لينا: ليش انتي ما بتعرفي الاستاز محمد ما بحب حدا يمسك اشياءه
مهرة: وانتي شو عرفج
لينا : كتير بشوفه بحفلات لوالده وتصير له هيك مواقف
مهرة : مع اني احسه عادي
وحطت موبايله داخل شنطتها لحد ماخلصوا الشغل على 11 وراحت غرفتها من
التعب خذت لها شور وهي طالعة بروبها رن موبايل امل وسارة ومهرة يطالعون
بعض كل وحدة تقول للثانية شيلي تلفونج بعدين استوعبت مهرة ان موبايل محمد
عندها ولما راحت تشوفه وقف وتذكرت ان لازم تودي الموبايل له بس شافت
الساعة 12 تخاف تقول لامل وتزعل منها وسارة لا ماينفع فتانة ما عرفت بشو
تتحجج لبست ملابسها ولبست عباتها وامل وسارة يطالعوها
امل : على وين؟
مهرة: امم نسيت ساعتي تحت بالقاعة
امل : باجر يبيها
مهرة : اخاف العمال يسرقوها قبل ما اشوفها
سارة : تحملي تراه في سكارة ها الحزة
مهرة : اوكي
ونزلت مهرة وهي خايفة تدع ربها ان يمر عامل ولا شي علشان يعطي الموبايل لمحمد
بس فاضي الجناح , ركبت الاصنصير دقت على 7 وهي تطالع فوق
يفتح الباب تمشي بالممر تحس انه قصير وبسرعة وصلت غرفة محمد تبي تدق
الباب شافته محطي حد على الباب والغرفة مفتوح بابها اشوي تدق الباب
تسمع اغنية اجنبية هادية تفتح اشوي اشوي الباب تنبهر من الغرفة كيف واسعة
الصالة ديكورها ابيض مع احمر والبلكونة مفتوحة عليها ستاير شيفون حمرا
تتحرك وكانها ترقص مع الحان الاغنية تقترب اشوي اشوي تشوف غرفة النوم
ملونة بالابيض والاسود والاضاءة خافته بس من بعيد
ماحست الا ومحمد يطلع من البلكونة لابس قميص كت فيه كاب وبنطلون شورت
وشال كوب عريض بايده , توترت مهرة وهو مو مستوعب منو الياي
مهرة وهي تحطي الموبايل على الطاولة : تلفونك نسيته .
محمد وهو يقترب يشيل الموبايل يطالعه ويطالعها وهي منزلة راسها
مهرة : تصبح على خير محمد
محمد وهو يقترب منها خطوة وهي ترجع على ورا خطوة تزيد خطواته وهي بعد
لحد ماظهرها لصق بالطوفة وهو يحطي ايده على الطوفة وهي شيلتها طاحت
خصلات من شعرها على عينها يقومها بايده ويمسح على خدها ويردد:
محمد : اول ماشفتج اعجبت فيج ولما شفت القدر يحب يجمعنا باكثر من مكان
تعلقت فيج لين حبيتج
مهرة : بس محمد ............
محمد وهو يحطي صبعه بشفايفها : اششششششششش
مهرة يدق قلبها اكثر مشاعرها تلخبطت بين الرفض والقبول التفتت عنه تبي
تمشي عنه مسك ايدها وحضنها من ورا وهي غمضت عينها وهو يرفع شعرها عن
رقبتها ويحطي راسه على كتفها ماحست الا وهي تلتفت تحضنه بقو
وهو حاضنها يهمس باذنها : أحبج أحبج أحبج
فجأة سمعت صوت باذنها : أحبج مهورتي أحبج موووووووووووووووووت
فتحت عينها فجاة ,دزت محمد بعيد , تم يطالعها مستغرب وهي تطالعه ومحطية ايدها بحلقها وتنزل الدمعة من عينها ومحمد : شوفيج

ماحست مهرة الا وهي تركض تفتح باب الغرفة تركب الدري بدال المصعد
والدموع بعينها واول ما دخلت الغرفة شافت امل بالصالة ركضت حضنتها
امل : مهاري شوفيج ؟
مهرة منهدة من الصياح : امل احبه والله احبه
امل : تحبين منو؟
مهرة : احب محمد والله احبه
امل تعطي مهرة كف على ويهها وبعصبية تطالعها
مهرة تمسك خدها وتطالع امل ببراءة مثل الياهل اللي سوت شي غلط
امل : مهرة كنتي عنده؟
مهرة وهي ساكتة منزلة راسها
امل وهي تهز كتف مهرة
امل : ردي علي
مهرة وهي تهز راسها : هييه وتصيح
امل : مهرة ليش ؟
مهرة : ماقدرت اقاومه
امل : ليش محمد مايعرف
مهرة : شو
امل : انج متزوجة
مهرة تهز راسها وتصيح اكثر
وامل حاضنة مهرة ماتعرف كيف تهديها ومحمد ماسك شيلة مهرة يشم ريحتها فيها
مايعرف لغز ها الانسانة
.................................................. ...........................

هل مهرة بتترك محمد ؟

ومحمد متى بيعرف انها متزوجة ؟ وشو بكون موقفه

تابعوني

الفصل التاسع

وفي اليوم الثاني وفي غرفة مهرة بالذات تقعد من النوم كانها شاربة ليلة البارحة
من كثر الصداع اللي في راسها طبعا من الصياح اللي صاحته تقعد ترفع شعرها
بالربطة وتتذكر انفاس محمد وايده على خدها وحضنه وما حست الا احد يدق الباب
امل : صباح الخير
مهرة : صباح الخير
امل : يالله زهبي عمرج
مهرة : وين؟
امل : نسيتي اليوم السبت ولازم توديني العين
مهرة : بسبح وبلبس وخلي ساروا تلبس بعد
وفي غرفة محمد
يقعد من النوم وهو على كرسي البلكونة يفتح عينه ويشوف الساعة 10
يربع الحمام بسرعة ياخذ له شور على السريع يلبس كندورته بسرعة يحس انه
ماشي وقت باجر المؤتمر ولازم يرتب بسرعة ويسوون البروفات يلبس ساعته
ويسوي العمامة على السريع ويرش عطره على صدره وايده وهو يشيل تلفونه
يشوف شيلة مهرة طايحة على الغنفة يوقف فجاة يتذكر اللي صار البارحة توقع انه
حلم بس طلع حقيقة يحطي شيلتها بكيس هدايا يشيله معاه يصكر باب الغرفة
ينزل تحت عند الاستقبال يقول لهم يعطون الكيس لغرفة مهرة ويسلموها لها
شخصيا , يروح القاعة يشوف العمال يعلقون الستاير اللي اختارتها مهرة مع
المنسقة ويحركون الطاولات والكراسي يسلم على الاستاذة لينا وعيونه تدور على
مهرة
ومهرة بالسيارة تسوق وعقلها بليلة البارحة
سارة: مهاري
مهرة : خير
سارة : ليش ما لابسة شيلة العباية نفسها ؟
مهرة : حرقتها بالكواية
امل : خلاص عاد تحقيق هو
سارة : ما قلت شي سؤال واحد
مهرة : اماية خبرتوها بنمر عليها ؟
امل : ليش بعد
مهرة : دقي عليها بسرعة
وفي الفندق ومحمد يحاول يتصل لمهرة وهي ماترد عليه
لينا : استاز , خلصنا كل شي باقي البروفة
محمد : انزين خل الانسة مهرة تحضر لازم تكون موجودة
لينا : اوكي
محمد يدز مسج لمهرة ومهرة بالسيارة تقراه ,
الوالدة: اطالعي الشارع عن تدعمين فينا
مهرة: اماية ها من الفندق
سارة وهي ترفع حواجبها: من الفندق ؟
مهرة : سارة انجبي خليني اسوق


وبعد ساعة وصلوا سكن الجامعة مهرة تشيل الكيس لامل وامل حاسة انه مهرة تبي
تقول لها شي ويقعدون بالاستقبال لين يملون اوراق الدخول والوالدة تعطيهم الجواز
امل : ليش تهربين
مهرة : من منو؟
امل : من نفسج
مهرة: ما اعرف
امل : بس الهروب ما هو حل لازم تواجهيه وتخبريه
مهرة : بفتقدج اموله
وحضنتها وصاحت والوالدة تسلم على امل ومهرة لبست نظارتها وطلعت بسرعة
وركبت السيارة حست انه سارة صكت التلفون بسرعة
مهرة نست سالفة سارة وسالفة الرقم بس هي الحين عقلها في اكثر من شغلة
وفي الفندق وعلى الساعة 7 ومحمد متوتر ولينا تساله عن مهرة وهو ما يعرف
يروح الاستقبال ويسالهم
محمد : لو سمحت انا الصبح محطي امانة هني
الاستقبال : مابعرف يمكن كان هون واحد ثاني
محمد : كيس صغير طلبت يعطوه لغرفة 18 الطابق 10
الاستقبال : بس اصحاب الغرفة عملوا شك آوت من الصبح
محمد : شو!
الاستقبال : وهذه امانتك


يمسك محمد الكيس بعصبية , يروح غرفته يفره الكيس على الشبرية
محمد : شوفيها ؟ شو قصدها من ها الحركات ! كل ما احسها تقترب مني تبتعد
اكثر
يرن تلفونه رقم لينا يرد عليها بهدوء: انا ياي الحين
وفي بيت مهرة ينزلون الاغراض ومهرة قاعدة في السيارة مساندة راسها على
الكرسي واشوي تيت تيت, مسج يوصل لمهرة تفتحه : مشكورة
تحطي راسها بالسكان وتصيح ماتعرف ليش هربت وخلت كل شي
وفي الفندق وهم يسوون البروفه يسال لينا
محمد : وين التوزيعات
لينا : أي توزيعات
محمد : الاخت مهرة قالت بتسويها
لينا : مابعرف
محمد وبعصبية : دقي عليها بسرعة موفاضين نحن
لينا : اوكي استاز
يرن تلفون مهرة تشوف اسم لينا
لينا: مرحبا
مهرة: هلا
لينا : شو حبيبتي وينك
مهرة : ضروفي اجبرتني واحنا خلصنا كل شي
لينا : الاستاز بيسال وين التوزيعات
مهرة : ماسويتها , بس هو يتفق مع شركه ابوه ياخذون اشوي منتجات صابون
واشتري الاكياس ووزعوها
لينا : اها , اوكي حبيبتي بس تعي بوكرة ما بتحضري الحفل؟
مهرة : بشوف يمكن اي مع باص المدرسة
لينا : اوكي اسفه على الازعاج
مهرة تبي تسال عن محمد بس تمت ساكتة لين صكت التلفون ونامت
وفي اليوم الثاني وفي فندق بينونة توصل طلبيات البوفيه يغطون عليها
وتشتغل الاضاءة وتفتح ابواب القاعة الكبيرة
ومحمد في قمة كشخته لابس الكندورة السودة والعمامة البيضة ومطرزة باسود
ونعاله بيضه طبعا مندوس وهو قاعد على الكراسي الجدام مع والده
والوالد في قمة الفخر بمحمد بس محمد مو حاس بشي صح انه الاصوات والزحمة
والضجة في القاعة , لكنه تفكيره كله بمهرة وصار الافتتاح وقاموا بعض طلاب
مدرسة مهرة برقص اليولة والتوزيعات دايرة على الطاولات والكل مستانس على
الحفل
وفي بيت مهرة تقعد من النوم فجاة تطالع الساعة 8 ونص تفتح باب حجرتها
بسرعة
مهرة : اماية اماية
الوالدة وهي تصب فنيال قهوة : هلا اماية صباحج
مهرة : اماية ليش ما قعدتيني
الوالدة : كم مرة وعيتج مارضيتي تنشي
مهرة : اليوم الافتتاح
الوالدة : لو تمينا في بوظبي اذا يهمج الحفل
مهرة وهي ترفع شعرها الجدام لورا وبضيق
وفي الختام وقف ابو محمد على المسرح والقى كلمته عن المنتج الصحي
والكل صفق له وطبعا كرم اللي اشترك وساهم بالافتتاح عطى الانسة لينا درع
كافضل منسقة وقلب محمد يدق يقول اكيد اسم مهرة بعدها ولما الوالد نادى باسم
مهرة ما احد راح تم يناديها 3 مرات محمد منزل راسه وهو يبتسم انا بستلمها عنها
لما وقف سمع التصفيق شاف ريال وقف من مكانه ورايح المسرح يستلم الهدية
ومحمد واقف وعلامة الاستفهام براسه سلم على بو محمد واستلم الدرع
ومقدم الحفل اعلن : بما ان الاستاذة مهرة غير موجودة زوجها يستلم الهدية بدل
عنها
ومحمد ماحس بريله قعد بسرعة على الكرسي وهو يطالع ريل مهرة وينزل راسه
ويتذكر كلام ام مهرةالوالدة : كله منه هو اللي فر مخج
مهرة: اماية غيري السالفة
الوالدة : هي وانا صاجة من قعدتي معاه صار اللي صار
مهرة: اماية بنتفاهم في البيت

ولما شافها مع نفس الريال في صالة الاستقبال وهي تكلمه بعصبية

والف سؤال وسؤال براسه حتى انه مانتبه انه مقدم الحفل ينادي باسمه ,
مقدم الحفل : ويعلن مدير الشركة عن تعين الاستاذ محمد الحمادي مدير تنسيق
الحفلات للمنتوجات, الكل يصفق ومحمد يقوم من غفلته ويمشي بخطوات بطيئة
للمسرح يسلم على ابوه بس ملامح محمد ما توحي بالفرح والسعادة , وطبعا خذوا
لهم صورة جماعية
والضيوف كل واحد فيهم خذا له صحن من البوفيه ومحمد قاعد
بالطاولة سرحان

الوالد : الظاهر ما عجبتك الهدية؟
محمد : ها !
الوالد : شوفيك ,حبيت افاجئك بالشغل بس احسك تضايقت
محمد : لا ابوي مشكور وماتقصر والله يخليك لنا
الوالد : زعلان من شي وانا ابوك
محمد : لا , بس تعبان من يومين ما نايم زين احاتي الحفل
الوالد : قواك الله وانا فخور بك ,من رخصتك
محمد وهو يوقف يشوف ريل مهرة بويه , يبي يكلمه بس شو بقوله بس بكل جراءة
محمد : هلا شحالك
علي : هلا اخ محمد
محمد : خير ان شاء الله الانسة اقصد الاخت مهرة ليش ماحضرت
علي : والله علمي علمك انا حاضر الحفل وتفاجات بغيابها
محمد : وليش ما دقيت تطمن عليها
علي : عقب الحفل ان شاء الله
محمد : اتمنى تطمنا تراها اخت عزيزة
علي : ولا يهمك , اسمحلي بستاذن
محمد حاس انه في سر بين علاقة مهرة وريلها طبعا من اسلوب مهرة لما تكلمه
وانها عايشة مع اهلها وريلها مايعرف سبب غياب حرمته يعني في شي

يجهز محمد اغراضه ويفكر كيف يلاقي مهرة , بس يومين وكل شي وضح له
يحاول يتصل لها بس هي ماترد عليه .
.................................................. ...................................
وعلى حزة الظهر وفي بيت مهرة
الوالدة : مهاري
مهرة: شو اماية
الوالدة : علي بالميلس
مهرة : شو يبي ها
الوالدة : بايده كيس
مهرة : اووف حجج
تفتح الباب عليه
وهو قاعد يطالع التلفزيون
مهرة : خير
علي : وعليكم السلام
مهرة: شوتبي مو كفاية لاحقني بوظبي
علي : هيه وحضرت حفلج وقدموا لج ها الهدية
مهرة قلبها يدق : أي هدية؟
علي : درع عن تنسيق الحفلات
مهرة : وليش استلمتها ؟ بصفتك منو؟
علي : ريلج ولا نسيتي
مهرة: وهم شو عرفهم
على : عادي عرفوا اني ريلج ولا ما بيعطوني الهدية
مهرة مو قادرة تصدقه بس الدرع بايده
مهرة: ومحمد ولد المدير كان موجود؟
علي : هيه وكلمني ويبي يطمن عليج
مهرة وهي متوترة: يطمن على شو
علي : ليش ما حضرتي
مهرة : شو رديت عليه
علي: ها ابلة مهرة تلعبين بالنار
مهرة : موقصدي بس مسؤولي يسال عني وطبعا الاجابة ما عندك ومو حلوة بحقك صح؟
علي وهو يمسك ذراعها : خسي انج تشتغلين عند واحد شرات محمد الحمادي
مهرة : وخر ايدك تعورني
علي وهو يرفع صبعه بويها : وتاكدي يا مهروا ذا عرفت بينكم علاقة بذبحه جدام عينج
فر الكيس على الارض وطلع ومهرة قعدت على الارض تصيح , واشوي تدخل غرفتها وتتصل لامل اختها
امل : هلا مهاري
مهرة تصيح
امل : مهرة شو بلاج
مهرة : خلاص
امل : شو خلاص
مهرة : محمد عرف اني متزوجة
امل : كيف
مهرة : عرف وخلاص
امل : وليش مضايقة انتي
مهرة : ما اعرف
امل : انتي من صدقج تحبين واحد شرات محمد , فكري بريلج
مهرة :علي عيوب الدنيا فيه
امل : ومحمد شو! شريف مكة؟ اخس عن ريلج
مهرة : بس علي.....
امل : لاتقارني علي بمحمد الطيور على اشكالها تقع واسمحيلي مهاري انتي تغلطين
وصدقيني بطيحين بحفرة ما احد بظهرج منها
مهرة ساكتة
امل : مهاري خلص بريكي عندي محاضرة الحين بتصل لج عقب سلمي على اماية باي
مهرة وهي بعدها محطيه السماعة على اذنها تفكر بكلام امل
.................................................. ......................
يتبع



وفي بيت محمد
باب الحوش مفتوح كالعادة يبركن سيارته يفتح باب الصالة يحس بهدوء
لانه دانة بالمدرسة وعبدالله بالدوام واشوي
سونيتا : ها حمود كيف هالك
محمد وهو يبتسم : هلا والله من زمان ما احد زكرني حمود
سونيتا : ما هلو بيت انته مافيه
محمد : لحينج ماتتكلمين زين ؟ مشكورة سونيتا يبي اغراضي من السيارة

محمد يدخل غرفته يحطي موبايله على التسريحة ويدخل الحمام ياخذ له شور
يطلع يمشط شعره يلبس كندورته الحليبية يروح الصالة يفرفر بالتلفزيون
دانة : السلام عليكم
محمد : هلا دانو شحالج
دانة : اول ماشفت سيارتك بالحوش استانست
محمد : دوم ان شاء الله
دانة وهي تقعد يمه : شوفيك متغير
محمد : ليش
دانة : احسك كبرت اشوي هههههههه
محمد : ليش كنت ياهل
دانة : لا احسك هادي ولا انت تقطعنا بالتعليقات
محمد : لازم الواحد يتغير
دانة: بليز حمود لا تتغير حلوة سوالفك وشو اخبار الافتتاح

محمد : زين
دانة : وحبيبتك موجودة كانت
محمد : أي حبيبة
دانة : انت قلت بتشوف ردة فعلها اذا تحبك بتخبرني منو هي
محمد : خلاص طلعت متزوجة
دانة : والله؟
محمد وهو ساكت
دانة حست انه ها الشي اللي مغير اخوها حطت ايدها على كتفه
دانة: تغديت ولا تترياني
محمد : لا بنتظر عبود
دانة : ما بيرجع اليوم الاعقب المعهد خلنا نقعد خلوف ونتغدا كلنا
محمد : يالله علشان انام لي اشوي
.................................................. .........................
وفي بيت سالم
سالم : امَي
ام سالم : هلا سالم وهي تشرب الشاي
سالم : ابغي اتزوج
ام سالم : زين اقتنعت
سالم : بس ابي دانة
ام سالم وهي تطالعه بعصبية: أي دانة
سالم : دانة الحمادي
ام سالم : وليش شوفيها بنت مريم زينه البنات واهم شي تشتغل
سالم : بس بعد دانة اخلاق وسمعة واهلها سمعتهم طيبة
ام سالم : سلوم انت تحبها
وعلى دخلة حليمة
حليمة : السلام عليكم
ام سالم : ييتي يا السوسة
حليمة : بسم الله توه اقول السلام
ام سالم : شوف اذا بتخطب ها البنت دور لك ام ثانية تروح وراك الخطبة
سالم : ليش انزين
ام سالم : تكسر كلمتي عيل وتفشلني جدام الاوادم
سالم : ما قلت لج خطبيها لي
ام سالم وهي تمشي : فكر بكلامي
حليمة: لا تضايق اكيد بنلاقي حل
سالم : في حل واحد بس
حليمة: شو
.................................................. .........




وفي بيت مهرة وهم يتغدون يرن التلفون
سارة : الو ,ها شوتبي بعد, اماية تتغدا تبي شي ضروري؟ باجر! اوكي مابنسى
خلاص ما بنسى الحين بقولها يالله باي
الوالدة : ها منو على التلفون
سارة : ها سلوم
مهرة تطالعها : احترمي اخوج العود
الوالدة : شو يبا
سارة : اونه بمر عليج باجر وبخبرج بسالفة
الوالدة : خير ان شاء الله
سارة : ما افتكينا منهم خلاص بالمحكمة كل واحد خذا نصيبه وراح
مهرة : حتى ولو بظل حليمة وسالم اخوانا من الاب ولازم نشاركهم افراحهم
واحزانهم
سارة : ماعندكم سالفة بروح انام اشوي

مهرة تدخل غرفتها تفتح شنطتها تطلع الرقم اللي عطتها امل تدخل الرقم تسوي
اتصال يطلع لها اسم محمد الحمادي تصكره وترد تدخل رقم رقم ويطلع اسم محمد
الحمادي وجاري الاتصال تتاكد من الرقم تشوف الرقم نفسه يرن يرن يشيله محمد
محمد : الو الو مهرة
تنزل دمعه من عينها تحس انه لسانها نقص ومحمد يناديها : الو مهرة ردي علي
مهرة الو
ومهرة من الصدمة مو عارفة ترد او تصكره ومحمد مو فاهم شو السالفة

ياترى مهرة شو بتكون ردة فعلها لمحمد بعد ما عرفت انه حبيب سارة هو حبيبها ...
.................................................. .............................................