مساااكم الله ب النوووور والسرور


بسومه ام ديمه لا خلى ولا عدم ي غناتي
الله يبارك بعمرك ويفرحك بطفلتك ويجعل بوه البركه
وطريقة امتس راح اجربه وعسى تجيب فايده
وتريحن وتريح ه الصغير من احراجات اللي تصير له قدام أخته

ي حي الغزلان ورا حيكم نيم وفي سبات

مريت بيوت جاراتي
ياعساهم متهنين كلياتهم


فيدو
حمدالله على السلامه


نودي ي بعدي وحشتين مره
وش هالزين يانودتي وش هالقصيد الحلو


سارونه
سلامتس من امتعاص رجلتس
امتعصت حلوه ذالكلمه عجبتن ي سارونه وابي اضيفه لقاموسي
هع هع

ي ام الوردي بوحه
لا غاب صوتك طاري الشوق ما غاب
بوحتي تولهت عليتس مره
ويا زين مسيرتكم ب يوم الاتحاد
حركات والله
الله يمد بعماركم شعب الامارات ب الطاعه والفرح والمسرات

شجونه
ﻻ شيء أجمل من أن تنام بِ سلام ع وساده أمنياتك
تغفوبهدوء ، تتنفس بطمأنينه مطلقه ، وَﻻ تهذي بِ آحدهم

وأنا اقول ي زين نومة راحة البال وانت متطمن أن احبابك بخير
عسى نوماتك يا شجونتي كله راحه وطمأنينه ابديه وحسن طاعه

حنو
يا بعد أهلي وجيراني كلهم
مشتاقتن ي حنو لتس واجد
وكيكة الشوكلاته تستاهل بؤتس يا حلوه
اقول حنو خلي بالتس من شغالتكم ترا هي راس المال حبيه واجد واجد واجدزين
هع هع هع


خطوره
الله يوفقتس حبيبتي
سهاله ان شالله الله لا يضيع تعبتس
خطوره والله ان لتس فقده مشتاقتن لتس بعد أنتي

كوين
ي صقيقتي الصدوق واكبر حكاياتي
وينتس ي قاطعه ما تقولين لتس صديقه تحبتس حيل
كوينه تسلم ام ابو البطاله اللي خلت منتس مبدعه
تعجبينن يا كوين ب ثقافتس وهدوءتس اللي ما يلوق الا لتس


غسووووووووووووووووووووووووووووووووقه
ي بعد كل من لي
غسوقه برد القصيم يناديتس
وشعيب الخويشات والغضا تقول لكم وينكم عنا
وينتس ي بعدي بيتس له يومين ماله حس


هيول
ي بعدي مشكوره ي غلاي
ي قلبي سكروبه ماتشكي اعراض نفسيه والحمدلله
ممكن داخله خوف وبشي يخص الروضه وهذا هو الاحتمال الكبير حيث انه من درست وهي صارت حالته كذا
هذاني مع الاخصاييه ححقت الروضه نتباحث معه المشكله
وهي وعدتن تشوف كيف يومه بالروضه
والله يعين

بسومه
ي بعد قلبي
الله يهنيتس بحياتس ويرزقتس راحة البال ويخليلتس بنيتس وتشوفينه عروس
ويطيل عمرتس بالطاعه والمسرات
بسومه والله قدر ظغط ماهيب شينه زين اي جامعه انتي حتى اجي لمكم
واعطيهم الشهاده ويعطون قدر ظغط صغيرون على قد اللقيمة البنات
هع هعه هع هع


جود
ماشاء الله تبارك الله
ابداع مدونتك ي جود رغم صغر سنك
الله لا يضركم ي بعدي
استمتعت اليوم بقرأيته
صدق صدق ماخاب ذوق من دلن على مدونتس
رائعه بسم الله عليتس

اممم ماتلاحظون حبيباتي
أني ما صرت مثل الاول
حاشن كسل موب صاحي الله يقطعه مع هالبرد
أسالكم تجيكم حالات مثل اللي ه الحين جتن
يعني تحسون ب ملل من كل شيء ولا تدرون وشهو
يعني يجيكم ملل من قومة الصبح من الدوام من الشغل سوى بالبيت ولا بالعمل
يجيكم ملل حتى من الزيارات وصلة الارحام
من القرايه من التصفح على النت من مشاهدة التي في من الطبخ من النفخ
ملل من معابلت ه البزران يعني ملل من كل شي
وغير كذا ودكم ب ملل يملل حياتكم
تجيكم هالحاله ولا لا
باستر اخذت إجازه من الشغل والسبب متملله
قلت ل ام يوسف مديرتنا الفاضله الله يطول عمره ب الطاعه
ابي إجازه يا حضرة المديره
قالت ام يوسف بخصوص قلت ابد متملله بققت ام يوسف عيونه
ثم قالت توكلي على مكتبتس وتعوذي من الشيطان
قلت الله يهداتس مسرع ما صدقتي
امزح معتس يا حوبي لتس عندي ظرف طاري ضروري يقول لزومن إجازه
مراجعات مستشفى تخبرين البرد قايم بدوره بالبزران
ومعاملات بنكيه ضروري اقضيه مجمدته من اسبوع وغير وغيره وسدحت له
كم عذر حتى تقبل وتوافق تعطين إجازه

بس تهقون اني كذبت عليه قاعد يأنبنن ضميري الحي ويقول يا ستذووووب اعترفي وراتس ما قلتي الصدق
بس والله جد قلت له الصدق يا ضميري وهي ما صدقت الصدق وبققت عيونه
طيب وش فيه اذا الواحد قال انه متملل ويبي إجازه
ليه ما يصدقونه ويعطون بدال ما نسدح اسباب يمكن تكون واهيه للإجازه

وش فيه الانسان ما يجي له حاله ويتملل من نفسه عاد يا كيف شغله والكرف اليومي
ترا الانسان مو اله مكينه شغاله بس تعطي تعطي
أنا اشوف حتى ألاله الماكينه يجي يوم وتملل من نفسه ترا يكون بعلمكم اذا خربت وهنقت ترا هي متملله
بس هي تخدعكم بخرابه
الزبده من كل هالحكي ان باستر عندي إجازه من الشغل بسبب الملل
بس المشكله الملل اللي حاشن مو راضي يصدق أني متملله لين الحين
بس تعرفون وش سويت حتى يصدق الملل اني متملله وتصدق مديرتي وكل الناس

شوفوا وش سويت


مسكت التلفون رغم أني متملله منه وكلمت رفيقتي ام هليل ولاني من زمااان ماكلمته..واسترجعنا ذكريات جيرتنا مع بعض اول..ومرت 3 ساعات وانا وياه اخذ وعطى ومشاورات وبحث عن حاله الملل اللي صابتن
وبعد جد ولعب ههههههه اقصد مشاورات واستشارات انصحتن جارتي وصديقتي الصدوقه ام هليل راعيه كسر الروتين
وقاهرة الملل ومهجدته
قالت لي اسمعي يا غيومه وطبقي كلامي ب يدينه ورجلينه

اولا قالت لي اطلعي لسور بيتكم اي الحوش وافرشي لتس فرشة وانسدحي على ظهرتس و تأملي النجوم واسترخي شوي من الملل وعدي كل نجوم
الليل وحتى نجوم القايله

ثمن نصحتن ام هليل اني اقص اطراف شعري كل مازهقت واروح عند المراية وقص وقص واقص الاطراف شوي شوي و قالت لي هاه انتبهي ترا لاتوهقين لغديتي صلغه مالتس شعر ويسرقتس الملل وتغدين بسبته صلعه
هع هع هع
ثم قالت لي ام هليل لكسر الرتين هي فاتحه مكتب بهالخصوص
كعكعكععكع
روحي للهايبر ولا لسوبرماركت وامسكي عربه ودوروا فيها ودرعمي ب خلق الله وقولوا اووه آسفة مادريت كله من الملل الله يقطع ابليسه

ثم قالت لي امسكي ريموت كونترول واحذفي كل القنوات من الرسيفر ورجعي حطيهم من جديد (هذا وجهي ان رجعتي منهم شي

ثمن نصحتن اسوي عصير برتقال واشربيه واقري مجلة اطفال ميكي او وماجد قالت اختاري هالثنتين وماهنا غيره._^

وقالت البسي ملابس ابو الشباب ثوبه وغترة وطبي عليه وهو نايم وخرعيه وشوفي وش يسوي
هع هع هع
عز الله بيشغل الموتر اقصد العقال
اخخخخخخخخ

ادخلي غرفتتس وحطي فل ميكأب كأنتس عروس وتشببي والبسي ثوب زواجتس وقومي اردحي وعوضي رقص ذيك الايام اكيد انتس مارقصتي بذاك اليوم فرصه وجت لتس
اخخخخخخخخخخخخخخخخخ استحي

وقالت افضل وسيله لطرد الملل امسكي دفتر تلوين اطفال واقعدي لوني ...ههههههههه

واذا وصل الملل عندتس اف ادخلي غرفتس ثاني مره وافتحي درج هدومتس وقعدي قيسي ملابسك بدلة ورا الثانية< يمكن يأذن الصبح ماخلصتي من كثرهم

ونصحتن ب هالمرهم تقول انه فعال ويعطي نتايج جديده وهو اركبي السيارة وهي موقفة داخل البيت وكأنك تسوقين
وحققي هالحلم قبل ما تموتين ومجلس الوزرا ما طبقه تلاحقي على عمرتس
هع هع هع هع هع

ثمن نصحتن بنصيحه جيده جدا تصلح لهتون هع هع هع وكل الدبدوبات اللي مثل حالتنا قالت اطلعي ونزلي السلم اي الدرج عشرين مرة .. منها تتمشين ومنها تسوين ريجيم عاجبتس كرشتس مع القعدة والفراغة
تلحلحي سوي شي زين بدنياتس
امممم ام هليل بالعدال ي ام الرشاقه مو كنتس خابزته وعاجنته

واخيرن قالت لي اطلعي السور اي الحوش ..وصيدي حشرة لطيفة (زهيوي ولا برعصي ولا نمله ولا دوده صغنونه وحطيها بعلبة وقعدي راقبيها.
هع هع هع يا ويلي من ربي آخرته صرت مربية اقصد معذبه حشرات

هذي نصايح ام هليل لطرد الملل وابوه وامه
لو دريت ان النصايح بتجيب فايده وتطرد الملل كان ما خذت إجازه ووخنت ضميري المهني اللي معذبن من كذبتي
بسبب الإجازه
والدليل ان الملل طار وبح وراح عني من طبقت نصايح ام هليل طاردت الملل ومهجدته
وهذاني ما شاء الله علي ما فيني غير العافيه والملل مثل ما قلت لكم بح
والدليل هذاني سهرانتن لين الحين اكتب لكم هالتقرير
بسسسسسسسسسسسسسسسسسسسسسسسسسسسسس
المشكله باستر اخذتن إجازه والملل ما راح يجين
وش السواة الحين يعني بكره يومي فاضي كله ماراح يجين ملل ولا حاجه يعني ابي اطفش
وش اسويييييييييييييييييييييييييييييييي
قولولي برايكم
احد عاجبه يومه ؟؟ وعلى قولت امي لا معجبنا العجب ولا الصوم برجب

وسلامه تسلمكم خالين من ملل يضيقكم
وبراد على قلوبكم
هذره انصوص الليالي

الحمد لله رب العالمين، الرحمن الرحيم، مالك يوم الدين، لا إله إلا الله يفعل ما يريد، اللهم أنت الله لا إله إلا أنت الغني، ونحن الفقراء، أنزل علينا الغيث، واجعل ما أنزلت لنا قوة وبلاغا إلى حين
اللهم اسقنا غيثا، مغيثا، مريئا، مريعا، نافعا غير ضار، عاجلا غير آجل
اللهم اسقِ عبادك وبهائمك وانشر رحمتك، وأحيِ بلدك الميت
اللهم غثنا يرحمنا ويحي قلوبنا



ي رب صباحكم يكون نزول المطر مع صلاة المصلين ودعاء الوجلين الخائفين
والذاكرين الشاكرين ل ربهم كثيرا

ي حلو الغياب والإجازه ب وقت البرد له طعم ثاني ما حسيت بمثله
انتم قرائي الاعزاء وخاصه اللي يدامون مع طلعت البكور اي الصبح
ماتلاحظون ان القومه تحلى بالبرد وخاصه يومن تراجف من البرد ودتس ترجع تكمل نومك
ما تحسون ودتس بس يوقف العمر وانتي متلحفتن هالبطانيه مدري الفروه
وحول شبة النار ودله القهوه عن يمينتس وابريق الحليب بالزنجبيل عن يسارتس
ما ناقصتس إلا كم عوشز( لغير الناطقين باللهجه النجديه العوشز نبته بريه مثل الطلح تنبت بالربيع على حد عليماتي
عاد اكمل وما ناقص الا بيت شعر وبر برريريه توسع الصدر على مد الارض
وفياض خضرا وسما زرقا ورشاشن يرطب الارض ويحييه
الموهم هذي هي اجواء البرد وحلاة النومه فيه
وماتلاحظون بعد ان الطبع يغلب التطبع وان بعض العادات والسلوكيات لو يصير ما يصير صعب تغيره
وان اذا الانسان تعود على شي معين صعب يغيره باي ظرف من الظروف ولا باي زمان ومكان
والدليل قومتي هذي من الصبح رغم أني ماخذتن إجازه ومعطله ولا شغله ولا مشغله
وغير كذا سهرانتن البارح بس ابد عجزت انام واقعد بفراشي واستحلي النومه
خلاص تبرمجت على قومت الصبح من فجر ربي شتاء صيف حر برد عطله دوام
يعني قومت الصبح شي اساسي حتى لو عندي إجازه مرضيه ولا عرضيه وتدلع ولا تملل
يعني أنا سبحان الله اشوف ان بركة يومي بقومت الصبح من الفجر
نومت الضحى ولا السحبه لين وقت الظهر يا ربي ما احبه احس لو ابي انوم لين الضحى بس اني ابي اقوم جسمي مكسر
والدنيا قافله في وجهي عكس صحيان الفجر والبكور اللي الرسول الكريم صلى الله عليه وسلم قاله
اللهم بارك لامتي في بكورها
يعني الزبده ان التبكير بالقومه من الصبح تبعث على الانشراح وسعة الصدر
تدرون ان الرسول الكريم عليه افضل الصلاو والسلام كان ما يبعث سريه او جيش إلا من طلعت النهار
سبحان الله يقول رب العزه والجلال { هو الذي جعل لكم الليل لتسكنوا فيه والنهار مبصرا ، إن في ذلك لآيات لقوم يسمعون".

صدقوني قومت الصبح من طلعت الفجر فيه غنايمن كثيره
اوله تطبيق لسنة الكون اللي وضعه ربي ان بالنهار معاش وبالليل سبات
وبركة الصبح لقول الرسول ودعاه للامه (بورك لأمتي في بكورها)
وثانيا واجب الله عليه من صلاة الفجر
لان اللي يحافظ على صلاة أول النهار كاملة من سنتها إلى فريضتها فإنه يبدأ يومه بداية موفقة ثم بعد ينطلق في حاجاته الدنيوية فيصادف من التوفيق ماعمره وجد مثله اما من نام وفاته صلاة الفجر فهو يقوم ضايق النفس كسلان محروما من النجاح في يومه كله

والغنيمة الثالثه بركة أول النهار الوقت اللي تقسم فيه الأرزاق فيحرم ذلك الرزق الإلهي في يومه من نومه

فالصبح أول اليوم وهو يذكر بالبداية سبحان الله بداية الإنسان وبداية الدنيا وبداية كل شيء فيبدأ المؤمن بذكر الله يسأله الإعانة ويستعيذ به من الخذلان والشيطان
وهو وقت هواؤه طيب وفيه السكون والهدوء الهواء لان القلب ب هالوقت يكون أكثر حضورا واستشعارا وخشوع

ف اغتنموا يا حبيباتي قومة الصبح والتبكير مع البكور حتى تغدى حياتكم موفقه ب اذنه تعالى
وهذا والله اعلم
وسلامه تسلم قليباتكم مع هالصباح الحلو اللي مثل طيبكم