المنتدى :
كتب المسرح والدراسات المسرحية
كاظم نعمة اللامي , مسرحية من يقبض ممن
مسرحية
من يقبض ممن
تأليف
كاظم نعمة اللامي
(المسرح خالي من اي ديكور وبلا مقدمة موسيقية يدخل رجل غريب الأطوار من ناحية الملبس والشكل وثمة ذيل طويل يخط من خلفه ماسكا مسدسا)
القاتل :الحك أبويه الحك آخر ما توصل إليه العقل في بلدنا جمعية للقتل ليس لدينا فرع آخر نتميز بالاستقلالية ما منتمين لأي حزب كي لا نسيس نسويلك الهوايل مستعدين نخلصك من أعداءك بكل سرية وبكل بساطه مقابل إتعاب زهيدة الأصل بالموضوع مو المادة دافعنا خدمة الوادم عمي خدمة الي ما يكدرون يصفون ضحاياهم أما لجبنهم أو لخوفهم من الضحية أو من تشويه صورتهم الزاهية بالمجتمع نستقبل جميع الاعمار وجميع الاتجاهات سياسية مدنية عسركية مصخمة ملطمة حاظرين المهم افلوسك حاظرة ابوية اذن توكلنا على (يصمت)على الشيطان انته مدير بدائرة واكو واحد ينافسك يريد ياخذ منصبك احنا حاظرين طلقة بالكله وتنحل المشكله جلاق اصلي علياخه نطيح كل الوساخه وراها ترتاح منه تريد منصب واحد هم سهله نكتله و مانطي مهله زوجتك مضوجتك عادي يابو هادي سم بالحمرة والمكياج والى خبر كان ولا حاضر ولا غايب ولامتأخر ولا مسواك ولا وديني لهلي ولا الجهال يريدون فلان شي وفلان شي ولا تراقبك وين جنت وين رحت ولازم تستقبل امي وتضحك بوجهه وانت ولا سن عدك والاهم من هذا كله ترتاح من طلبات التجميل ارفع خشمي سوي حواجبي تاتو كبر(يأشر على صدره مع ضحكة ماجنة )سويلي شفط يا وزير النفط(يمسح على بطنه) ارفعلي (يؤشر على عجيزته مع عظ الشفاه ونفخ الخدين) بعد حاظرين لكلشي اتحب وحده وهي ما تحبك سهلة تصوير مدبلج بالموبايل تهددها بيه وهناك تشوفهه هيه واهلهه وكرايبهه جوه رجليك احنا ما عدنا خطوط لا حمر ولا سمر على اي شخصية ما دام تدفع باليمين نداريك يمين ويسار سياسي لسانه طويل وما يؤمن بالديمقراطية وبتداول السلطة عبوة لاصقة وبالوجه باصقة نصنع منه سبح نبيعها بسوريه انته ممثل المخرج متعبك بسيطه كلش بسيطه حزه بالليطه تغير كل الخريطه من اساسيات عملنا هو الصدق والامانة حقيقة مهنة مشرفة انته ما دامك تخدم هذا المجتمع الزوج اذن انته من الناس المحسوبين على المؤمنين خير الناس من نفع الناس وهنيالك يا فاعل الخير (يقوم بهز راسه كما يفغل الدراويش)الله حي الله حي الله الله بس يمكن واحد يسال جا والناس المقتولين شنو ذنبهم سؤال وجيه بس مو وجيه عبد الغني هاذا الضحية ما دامه يعيش بهذا البلد اذن يعيش مأساة وتلكاه مبتلي اولا بزبونا الي اجا في سبيل تصفيته يعني عنده مشاكل فأحنا انخلصه من مشكلته وجن الفلوس الي نستلمهه مالت نفرين وخلصنا الطرفين من مشكلة تاكل وتشرب وياهم ليل مع نهار اذن احنا نتفرد بمبدا عظيم هو الخدمة المتواصلة والمباشرة بس مو مثل خدمة الهواتف النقالة المحتالة الي هيه عبارة عن كملات تمص دماء المساكين من ابناء هذا الشعب المستوي (يقوم بالغناء يا مستوي يا مستوي انا بحبك يا مستوي) ربما يسال واحد ويكول تكدرون اتصفون اكثر من شخص حبيبي عدنا قابلية نصفي شعوب باكملها وبضغطة زر مو ايد (يقوم بالضحك الهستيري يهم بالخروج)
رجل :(يدخل متأففا) يعني معقوله اكو ابلدنا ناس من ها الشاكلة لا مستحيل هيجي صار الحال مؤامرات قتل سلب نهب واحد يحفر للثاني لا مستحيل اني احلم اكيد احلم (يعود ا)
القاتل : لا انته ما تحلم انته تعيش بصلب الواقع الحياة المتطورة اصبحت تؤمن بالاختصاص واختصاصنه يرفع الجهد والمسؤلية عن كاهل الموطن
الرجل : (يستدير اليه)شنو انته نازل من الجحيم
القاتل :لا جحيم ولا رحيم اني منك وبيك اني من هذا الشعب المطحون اني صناعة محلية ميه بالميه اهلك وناسك صنعوني صنعتني مصالحكم وطمعكم صنعني جشع الاباء وعقوق الابناء وحب المال والمناصب صنعتني الطائفية والعنصرية فاني مو ملام
الرجل :انته سرطان ياكل البلد انته لازم تنمحي من على الارض
القاتل :ما تكدراني قدر هذا البلد اني مصنوع في مصنع الاهي
الرجل :(يهجم على القاتل يمسكه من يديه وكما في مصارعة الزورخانه يسقط الرجل )
القاتل :مو كتلك ما تكدرلي
الرجل:(ينهض وهو يمسك ضهره ويخرج وهو يعرج)
يجي يوم وتنتهي
القاتل : (يضحك) اه اه (يحس بالم )اني جوعان الجوع راح يكتلني اريد دماغ بشري شما اقتل اجوع للقتل اكثر مثل نار بوسط غابة ما ادري نوعية الضحايا مو خوش الضاهر هيج بس اني اتعذب اتالم مثل مدمن مخدرات ما كو واحد ينقذني من هذا الجوع
رجل :(يدخل رجل متوجها الى القاتل)اشلونك استاد
القاتل (بشوق)هله ومية هله اي اجا الرزق (فاركا يديه)
رجل :استاد اني امر بمشكله ومحد يكدر يحلها غيرك
القاتل : اني ما اسمع المشكلة المهم تريد تكتل منو واسعارنا معروفة معلكة باللافته
الرجل : اخوي مضايقني كلش يزاودني على ورث ابوي
القاتل :لا تكمل افتهمت بس انطيني صورته والباقي راقي يا عراقي
الرجل :هو هسه يجي يمر منا وانا اكلك شوف شغلك
القاتل: سهله بس انطيني اجرتي وهيه دفتر
الرجل : ابو الستين
القاتل: حبيبي لا تستغبي دفتر يورو
الرجل : (يمد يده في جيبه ويعطيه شدة نقود ياخذها القاتل )
القاتل : شكرا
الرجل : (يخرج شدة اخرى )وهاي هدية مني
القاتل : امبين هذا صدك مدمرك
الرجل : كلش كلش .... زين اكدر اشتغل وياكم بعد الظهر
القاتل : لا احنا ما نشغل ويانه واحد يغدر باخو اعذرني داد
المعوق : (يدخل على كرسي المعوقين)
الرجل : اني راح انسحب اجا ذاك هو
القاتل: هذا ابو العربانة
الرجل : اي
القاتل : روح انته (يقترب منه المعوق)
المعوق : كيف الحال استاذ
القاتل : شوف الغبي اجا برجليه بس هذا اخو غير مجرم يريد يصفي هذا المعوق المسكين
المعوق : اني سمعت عن شغلكم وجايك بشغله اتسويهه الي
القاتل : احنا بخدمتكم خطيه ما يدري شراح ايصير بيه
المعوق : عندي اخوي ابن امي وابوي اريد اقضي عليه لان منافسني على الورث وزوجته عاجبتني اهواي فاريدهه اتصير من نصيبي
القاتل : حلو طلع اضرب من اخوه وتريدني اكتل اخوك وتنطيني دفتر يورو والثاني هدية وعندك رغبة تشتغل ويانه
الرجل : اي صحيح انته ذكي (يخرج شدتين يسلمه واحدة بعد اخرى)هاي اتعابك وهاي هدية الك
القاتل : (ياخذ الشدتين ويضعهم تحت ملابسه ويخرج مسدسا ) واني انطيك هاي الهدية (يرميه بثلاث برصاصات يرديه قتيلا رصاصة مع كل كلمة)اهم شي الصدق والامانة والاخلاص (ينفخ مسدسه ويقى حاملا اياه)
الرجل : (يدخل الرجل مهرولا) اشكرك (يمد يده للقاتل يتصافحان) خلي نتخلص من اثار الجريمة (يخرج العربة والمعوق خارج المسرح ويعود)
القاتل : حبيبي تعذرني اخوك قبل لا يموت طلب مني طلب
الرجل : شنو
القاتل: اقتلك
الرجل : (يبدو عليه الخوف) اشلون مو اني صاحبك ودفعتلك الي ردته
القاتل : (يخرج مسدسا)
الرجل : لا تقتلني شتريد انطيك (يحاول الهرب يخرج من المسرح)
القاتل : (يصوب مسدسه على الرجل) اهم شي الصدق (طلقة) والامانة (طلقة) والاخلاص (طلقة مع صرخة للضحية ينفخ مسدسه)اي خوش رزق اليوم ها اشكلتوا شغله حلوه مو.... صحيح شكلهه مو هالكد بس تتعلم عليهه وتتعود وتصير احلى من العسل خلي انشوف جدول الاعمال(يخرج دفتر صغير من جيب بنطلونه) ورانا شغل اهواي الله يساعدني على هالتعب (يمسح جبينه يفتح الدفتر) اها.... عملية صعبة بس مو مشكله شيل الكلب حط الكله كلنا احنا ما عدنه خطوط لا حمر ولا سمر(يعيد الدفتر الى جيبه)
(تدخل امراة وبيدها طفل)
المراة : زوجي حبيبي رجعت من الشغل الله يساعدك
القاتل : : زوجتي العزيزة... اووو... ابني فلذة كبدي يرفع الطفل ويقبله يضعه على الارض اي والله الله يساعدني تعبت اليوم تعب المامشيوف بس كله سهل في سبيل العيشة وراحتكم حياتي
المراة : الوارد اشلونه
القاتل : خير بس
المراة : بس شنو
القاتل : (يقترب من ولده يحظنه يبكي )وليدي حبيبي
المراة : (ياستغراب)اليوم مو على بعضك شنو اكو شي صار
القاتل ) : يمسك زوجته من يديها) حبيبتي هواي اشياء صارت وكله هذا يعود لشرف المهنة مهنتي وشغلي يحتاج الصدق والاخلاص والامانة
المراة : عادي شرف المهنة يخليك واثق من نفسك مو تحزن او تبجي
القاتل : بس (يتحرك حركات هستيرية غير واضحة ومبهمة) هاي المرة الدور عليكم انتو لازم تموتون
المراة : ليش (برعب)
القاتل : هاي الوظيفة اللعينة ما اكدر اخالفها لان اساسها الامانة والصدق والاخلاص
المراة : وشنو علاقة موتنا بشغلك
القاتل : اني الراس الجبيرة بجمعية لقتل الناس لتصفية الاعداء افتهمتني
المراة : (تبتسم) انته اليوم مو على بعظك انته تشاقه
القاتل ( يمسك راسه صارخا)لا لا لا اني ما اشاقه اني قاتل قاتل قاتل (يخرج الاموال التي حصل عليها ويخرج المسدس ماسكا اياه بقبضتيه)هاي افلوس القتل هسه صدكتي بس شغلتنا محسوبة عالاعمال الصالحة وكل عمل صالح مصيره الجنه مع الاولياء والصالحين
المراة : (تضحك) يا اولياء يا صالحين انته تذبح البسمه بشفايف الناس انته ادوس على الجرح الدامي للانسان انته تعمق فجوة الفراق بين الفقير والخبزه منو انته كمت ما اعرف حقيقتك حتى أنفاسك لهاثك أشم بيه رائحة ألموت انت تذبح الحريات بهذا العالم الي يريد يعيش كبشر انته تقتل الجميع وماكو فرق بينهم المهم القتل... الدم.... الي عنده استعداد ان يقتل اهله وناسه هذا مستحيل ايكون انسان0تصرخ ) مستحيل
القاتل : ما جنت فد يوم غير انسان انتم ما تعرفون الحقيقة
المراة : انته قاتل الحقيقة انته وحش (تحتضن ابنها)
القاتل : انتي اخرتيني هواي يا حبيبتي الوداع بس راح اكلج منو دفعلي حتى اقتلج صديقتج ورفيقة عمرج ونصفج الثاني مثل ما جنتي اتكولين هاي طلعت اتغار منج لان انتي محبوبة من صديقاتج كلهن وتريد الحب ايصير الهه وحدهه فدفعت المبلغ وما اكدر اخالف الاوامر
المراة: سعاد
القاتل : اي هيه بعينها وعيانها الصدق (رصاصة على المراة) الامانة (رصاصة) الاخلاص (رصاصة وتسقط المراةيقترب منهم اكثر)
الطفل : (يرمي نفسه على امه صارخا) ماما (يهزها يحاول ايقاضها ينهض باتجاه القاتل فيضربه بيديه على بطنه )اني اكرهك اكرهك
القاتل : اي يا ابني وانته هم دفعوا حتى اقتلك (يرمي الطفل برصاصة يسقط فوق امه ينفخ مسدسه)
الوداع يا اغلى من حياتي احبكم احبكم احب الجميع احب الورد احب المطر احب الماي احب الجبل احب الهور احب السما احب الارض (يبكي بحرقة) بس كلولي اشلون اتخلص من الصدق والامانة والاخلاص (يعاود البكاء يرتمي فوق زوجته واطفاله ينهض يقوم بالرقص ويقول وهو يرقص) بقت عملية وحده الهذا اليوم لازم انفذها اي طلبت مني جمعية منافسة ان اقتل نفسي اتريد تسيطر على هذا العمل الانساني ونطتني اجر جبير لان الساحة لازم تكون لواحد واهم شي الصدق (رصاصة) الامانة (رصاصة) الاخلاص (رصاصة يسقط قتيلا)
ستار
مسرحية من يقبض ممن تاليف كاظم نعمة اللامي
|
27-08-10, 08:23 PM
جديد مواضيع قسم كتب المسرح والدراسات المسرحية
العرض العادي
