لســــــــلام عليكم ورحمة الله وبركاته
تفضلوا البارت الثاني
وانتظر ردودكم حتى أكمل لو كانت أعجبتكم
وهالجزئين مجرد تعريف بالشخصيات الاساسية
**(/**^^^ البارت الثـــــاني **)))**&^^/&&
وقف ابراهيم والعصبية تطلع من عيونه : مو ذنبنا ياولد
عمها انك توك تدري؟ ماتكلمت الا يوم الملكة ؟؟
مو معقوله انك توك تدري والا بس تبي تخربها ؟؟
ماجد بعصبية وهو يأشر على نفسه : انت تكذبني؟؟
ابراهيم التفت على ابو فيصل وهو يحاول يضبط اعصابه
:: وش قلت ياعمي ؟؟ بتلغي ملكتي الليله على بنتك ؟
ابو فيصل كان بيرد عليه لولا ان ابوه ( الجد ابو
صالح ) قاطعه :: يابو ابراهيم وياولدي ابراهيم
ماندري وش انقول لكم بس هذا ولد عمها وهو الاولى
بها
الغلط مو منه الغلط منا لانا ماعطيناه خبر وهو مسافر
نسبكم ينشرى يابو ابراهيم بس انت عارف ولد العم اولى
وقف ابو ابراهيم وهو معصب :: حصل خير
انتوا احرار فبنتكم
واشر لعياله واخوانه يقومون وطلع رغم الحاحات
ابو فيصل انه يجلس
تقدم ماجد لجده ابو صالح وحبه على راسه وجلس جمبه
وهم يستنون ابو فيصل يرجع بعد مايوصل ابو ابراهيم
واللي معه للباب
دخل ابو فيصل وهو مبتسم :: لو انك مبكر ياولدي
كان مافشلتنا مع الرجال
وقف ماجد وراح لبو فيصل وهو مبتسم وباس راسه
:: والله ياعمي اني مادريت الا بعد مارجعت من
السفر والعذر والسموحه بس مابغيت
بنت عمي تطلع وانا موجود
ابتسم له ابو فيصل :: بارك الله فيك ياولدي
ومانيب لاقي احسن منك لبنتي
سمعوا صوت الجرس واستغربوا من اللي جاي؟
وقف عبدالعزيز :: انا بشوف مين ..
دقيقه ورجع ومعه المملك
ابوفيصل استحى منه مايدري وش يقول :: تفضل تفضل
ياشيخ
جلس الشيخ وبعد ماشرب فنجاله :: وين المعرس
كان ابو فيصل بيعتذر له بس ابو صالح
قاطعه وهو يأشر على ماجد : هذا هو المعرس
ماجد حس بارتباك ممزوج مع فرح ومشاعر عجز
يستوعبها ::...........
الشيخ يكلم ماجد : تعال جمبي ياولدي
وقف ماجد وراح له والفرحة مو سايعته حس ان المسافة بعييييييدة على مايوصل لجمب الشيخ
جلس جمب الشيخ وهو يحاول مايظهر اي تعبير على وجهه :: ..........
الشيخ بوقار :: ووين ابو العروس ؟؟
التفت له ابو فيصل وهو فرحان بس مصدوم وخايف
على العنود وش بتكون ردة فعلها :: سم ياشيخ
*********************
كانت دلال تسوي الشاي وهي سرحاااانه وتفكر
بأخت زوجها ( العنود ) كيف انها بتتملك اليوم
وزواجها اكيد بيكون قريب وكيف انه بيخلى عليها البيت
هي ساكنة مع اهل زوجها ومايسليها
الا العنود وعبير ( عبير خالت زوجها وعايشه عندهم عمرها 23 )
حست باحد جاي التفتت :: شوي ويجهز الشاي
فيصل جلس على الطاولة وتنهد :: .......
كانت تبي تساله وشفيه بس تراجعت باللحضه الاخيرة
حطت الابريق بالصينية وجهزت معه البيالات
دخلت عبير وهي تضحك ومستانسه بس اول ماشافت
فيصل متضايق قربت عنده :: ولد اختي الوسيم شفيه؟
انقهرت ان عبيروه قادرة تسولف مع فيصل وانا لا وهي السبب في ثلاث ارباع اللي صار
ابتسملها فيصل :: لا مو متضايق ولا شي
بس مادري وش اقولك ممم العنود اليوم ملكتها على
ولد عمي ماجد مو على ابراهيم
توسعت عيون عبير على الاخر :: ايييييييش؟
فيصل :: اللي سمعتيه والحين جدي مرسلني
انادي العنود للمدخل عشان تقول للشيخ انها موافقه
التفتوا مصدومين على العنود اللي واقفة وراهم ::
وش تقولون ؟؟؟؟؟
وقف فيصل يبي يشرحلها الموقف :: العنود ابيك
تهدين اعصابك وتستوعبين وش بقول
العنود ودموعها على خدها :: وش استوعب ؟؟
لعبة انا عندكم ؟؟
دخل ابو صالح :: لا منتيب لعبة يابنيتي
انتي الغالية واغلى احفادي انت وماجد وانت عارفة
فانا بغيت تصيرين له وماأظن انتس بترفضين طلبي
حست العنود انها بدوامة مالها اخر
قربت من جدها :: بس ياجدي
قاطعها ابو صالح بصرامة :: يالعنود يابنتي
انا عطيت ماجد كلمة قدامهم كلهم وقدام ابو ابراهيم
وجماعته بعد والشيخ هذا هو يستنى عند الباب
بترديني؟؟
مسحت العنود دموعها وهي تقول :: اللي تامر به
ياجدي
مسح ابو صالح على راسها :: هذ1 ظني فيتس
وانا ابوتس يالله نروح للشيخ تقولين له موافقه
......///////////,,,،،،،’’’’,,,
* العنود *
رجعت من عند الشيخ وانا مخدره سلم علي جدي
وابوي واخوي فيصل وباركولي وانا مو مستوعبة شي
طول عمري وانا اتخيل هاللحضة
لحظة ملكتي على ماجد وكنت افرح وانا اتخيلها
واستناها بصبر
ولما مابغيتها وكرهتها جتني غصب ؟؟
وصلت لعند مها اللي ناظرتني بصدمه :: صحيح
اللي سمعته ؟؟ دلال وعبير يقولون انك تملكتي على
ماجد؟؟
وقتها انهرت بحضن مها ابكي من كل قلبي
تمنيت ان امي تكون عايشه عشان احضنها
وتخفف على هاللحضة وتقولي وش مفروض اسوي
جلستني مها على الكنبة وهي وتمسح دموعي :: قدر
الله وماشاء فعل .. يمكن انها خيره لك ياعنودة
ابتسمت ولا رديت عليها وش فايدة الكلام الحين ؟؟
بس كان ودي اعرف وش اللي صار ؟
وش اللي قلب كل شي كذا ؟؟
لقيت فيصل شايل صينية الشاي وقفت ورحت له بسرعه
:: فيصل تكفى قل لي وش اللي صار؟؟
ليش كل شي انقلب
عدل فيصل شماغه :: ولا شي بس ماجد حير عليك
وقال بنت عمي انا اولى بها ومادريت ان ملكتها اليوم
وجدي هو اللي قرر ان ملكتك تصير اليوم
سمعت مرت ابوي ام مروان من وراي تقول :: انا قلت من اول
وش يخلي ابراهيم ولد التاجر ياخذك انتي ؟ هههه شكله صار غلطان
ولما حس انه غلطان انسحب وانحاش
رد عليها فيصل بغضب ::مرت ابوي .. خلك بحالك وباحترامك
لوت ام مروان ثمها بقهر وراحت
فيصل :: ماعليك منها انتي عارفه انــــ
قاطعته بابتسامه :: عارفه عارفه ياخوي
....///////,,,,,//,,....
* ماجد *
خلصت الملكة وانا للحين ماصدقت اللي صار
شي مثل الحلم .. ابد ماتوقعت اني بملك على العنود بهالسرعة
ركبت السيارة وتوي بشغل الا بعمي عبدالعزيز يأشرلي ويطق
قزازة السيارة :: أفتح يالمعرس
ابتسمت من قلبي وانا افتحله
واول ماركب التفت لي :يالله وصلني للبيت وبالطريق قل لي كل شي
من دقت عليك جنوه لقبل مااجي
ضحكت على حماسه:: هههههه ووش تبيني اقولك زيادة ؟؟ هذا اللي صار له
تنهد عبدالعزيز وقال بصرامة :: اقول ماجد وش ناوي تسوي مع عنود ؟؟ مهما كنت انت صديقي
هذي بنت اخوي الغالية ومارضى عليها
حسيت بشي كتم على انفاسي لما ذكرني بشي انا اصلا مانسيته :: اذا هي غالية عندك
اجل وش تكون بالنسبة لي؟؟ هذي عنود ياعبدالعزيز عنووود عارف وش يعني عنود لي؟؟
اذا انت خايف عليها مره فانا خايف عليها الف مره
انا للحين مهوب عارف وش بقولها او وش بتكون علاقتنا للحين احس اعصابي محروقه من هذاك
اليوم اااه بس
وصلنا البيت والتفت علي عبدالعزيز :: هونها وتهون يامجود عنود انا اعرفها قلبها طيب
وان شاء الله انها بترضى بس انت لاتستعجل على شي ابد
ابتسمت له وانا اودعه ونزل للبيت
وانا رجعت لبيتنا
....///////,,,,,//...........
* العنود *
كنت جالسه ارتب مخدات الصالة بسرعة وانا سرحانة ابي اخلص بسرعة ابي اختلي بنفسي
ابي افكر وابي استوعب هاللي صار لي
رفعت اخر مخده والتفت ابي اروح للدرج برقى لغرفتي
بس انصدددمت وانا اشوف المخدات اللي رتبتها كلللها على الارض
رفعت راسي لمروان يبتسم بحركة تقهرني مروان هذا اخوي من ابوي وعمره تسع سنين
العنود ::مروان حرام عليك ليش سويت كذا ؟؟ انا ظهري تكسر ابي انام وانت تحوس كل اللي
رتبته ؟؟
مروان يحرك حواجبة بحركة طفولية تقهر:: ماما تقولي الخدامات اللي مثلك مايتعبون
عادي يشتغلون طول الوقت وانـــ
سكت بعد ماسمعنا الصرخة اللي هزت الصالة بغضب : مروااااااااااااااان
مروان تلعثم ونزل راسه :: نن نننعم
فيصل وهو يقرب لمه وبعيونه غضب ::وش هالكلام ؟؟ انت اللي حست الصالة؟؟
تدخلت ابي انهي السالفه :: لا مو هـــ
قاطعني فيصل بعصبية :: عنود أنتي اسكتي
سكت وانا خايفة لاتكبر المشكلة كالعاده
سحب مروان من كتفه وهزه :: رد .. انت اللي حستها كذا؟
مروان بصوت يرجف :: اييه
دفه علي بقوه :: حب راسها واعتذر لها يالله اشوف
قرب يحب راسي وانا راحمته مهما كان اخوي وطفل وهذي كلها تعليمات امه :: انا اسف
قرب لنا فيصل ورجع يسحبه من بلوزته : هالمرة بسكت بس والله يامروان ان عدتها مره ثانيه
تشوف شي مايرضيك فاهم ؟؟؟؟
اشر مروان براسه :: ايييه
كمل فيصل بعصبيه :: وان دريت انك قلت لامك عن هاللي صار لاتلوم الا نفسك
والا قووول ماعليه قولها وخلني اشوف وش بتسوي مرت ابوي اللي مربيتك احسن تربية
ويالله روح ناااااام
....,’////////،’,,,,,,,,,,,,
* دلال *
رقيت غرفتي وغيرت ملابسي وانا من اربع ايام وانا على اعصابي خايفه من فيصل
صار لي اربع ايام من قصيت شعري الله لايعيد هاليوم وانا لا ليلي ليل ولا نهاري نهار
فيصل يعشق شعري بشكل جنوني ومن تزوجنا تقريبا من سنة وانا اطلب منه اقص شعري
بس هو رافض
الين مالعبت بعقلي خالته المصونه عبير واقنعتني اني لاقصيته واعجبه ماراح يزعل
وان ماعجبه مصيره يزعل يوم بالكثير بعدين يرضى
اقتنعت ورحت معها المشغل وانا مقنعة فيصل اني بس بسوي بديكير ومنيكير
توي جالسه على الكرسي والكوافيره تسالني لوين تبين شعرك وكيف القصه
الا وتتدخل الخبله عبيروه :: الين كتوفها ومدرج
ضربت صدري بفجعة :: من صدقك انتي ؟؟ تبين انام اليوم وفيصل مشوهني ؟؟
عبير وهي تتأفف :: اوووف منك احنا وش قلنا
التفت عنها وانا اكلم الكوافير :: ماعليك منها .. قصي شعري الين نهاية ظهري وبدون
تدريج
عبير وهي تضرب راسي :: هي انتي من جدك؟ جايبتني من البيت عشان كم سانتي؟؟
كان قلتيلي اقصهم لك بالبيت وخلصنا
اشرت للكوافير تبدا قص لين نهاية ظهري وانا ارد على عبير : اولا هذي مو كم سانتي
هذي حوالي الشبر يعني نعمة والله يستر وش بيصير
صحيت من سرحاني على صرخة فيصل :: مرووووااااااااااان
انتفضت بمكاني هو ناقص عصبيه عشان يعصبونه زيادة اوووووف من يوم ماقصيت شعري
ولسانه ماجى على لساني بس اللي سواه انه قرب مني وهو مصدوم ويناظر شعري
ثم لعوني بنظات حارقة
ويدينه تحفر بذراعي :: تستغفليني ؟؟؟
نكزت من مكاني وانا اسمع باب الجناح ينفتح
عقلي الباطني امرني بسرعه اني اروح تحت الفراش واندس واسوي نفسي نايمة
وسويت كذا بسرعه وانا ارجف تحت المفرش واحاول اهدي انفاسي
فتح باب الغرفة وسكره وراه وسمعت حركة بسيطه بالغرفه اكيد انه يغير ملابسه
ثم طفى النور وجا انسدح جمبي وهو معطيني ظهره ونااااام
....///////,،،،’,’’’,,,,,,
* ماجـــــــد *
وصلت البيت وانا احسني طاير من الفرح بس هالاحساس مخربه شي يمكن يشبه
الخوف والقلق
دخلت الصالة وحصلت مها جالسه قدام التلفزيون وجمبها نصوري يلعب بالريموت
جلست على الكنبة وانا انزل شماغي جمبي::ليش مانمتي؟؟
مها :: االيوم ماصحيت الا متأخر وابد مااافيني النوم
شلت نصوري بحضني وانا ارد عليها :: من يوم ماتخرجتي وانتي حايسه ايامك حوس
نوم وسهر واكل ولا شغل ولا مشغلة
مها حطت يدها على راسها :: الله الله كلها ترم مرتاحه فيه بعد كرف اربع سنين ونص
ومسكثرها علي
قلتلها وانا العب بشعر نصوري :: لا مستكثرها عليك ولا شي عليك بالعافيه بس اهم شي
رتبي نومك مو كل يوم على هالموال صلاة العصر والظهر بوقت واحد وحتى اكل منتب قادرة
تجلسن معنا على سفرة وحدة
مها :: طيب ان شاء الله بحاول والله عاد حتى انا مليت من اللخبطة
ماجد :: ناصر ليش للحين مانام ؟؟ امه وابوه وينهم؟؟
مها وهي ترخي صوتها :: وانت ماتعرف اخوك ومرته؟؟ كنه شي جديد
كل واحد يرميه على الثاني واخر شي يايطيح بيدي والا بيد الشغالة
توي برد عليها الا شفت ماهر جاي :: السلام .. ليش للحين مانمتوا ؟
ماجد :: وعليكم السلام والرحمة .. هذانا بننام بس قبل ماتفكر فينا احنا الكبار فكر
بولدك اللي حتى السنتين ماكملها شوف الساعه كم وللحين مانام
وكالعادة من نفتح هالموضوع مع ماهر يتنرفز ويروح
سحب ناصر من حضني ورمى الريموت اللي كان بيده جمبي ورجع فوق لجناحه
... ////////،،’’,,,,,,,,
* ماهر *
شلت ناصر بحضني وقلبي يتقطع عليه من احطه تحت يلعب ومافي احد عنده واروح
وانا اجلس قلقان الين ماشوفه وارجع اشيله وهو بخير ويضحك
هذا مو برود فيني ولا عدم اهتمام بس مليت من كل الطرق اللي حاولت فيها اني اخلي
زوجتي اميرة تهتم بولدها وتعطيه من وقتها ولو الربع
طول الوقت ترميه علي ماعمرها اهتمت فيه ولا في اكله
لو اقولكم لو تجلس يوم كامل ماتشوفه ولا تطمن عليه عادي عندها
اهم شي تهتم بجمالها وتحضر العزايم وماتفوت الاعراس
ربي معطيها من الجمال شي فوق حد الجمال شي تعجز توصفه
شي يجسد كلمة الجمال بكل ماتعنيه الكلمة من معنى
انوثه طاغيه .. دلع .. شي تحسه ابد مو مصطنع .. شي فطري فيها
بس هي ابد ماستخدمت هالجمال لمصلحتها ..
اهم شي عندها تسمع مدح الناس وقتها بس تكون راضيه عن نفسها
حتى بعلاقتي معها بااااردة الى ابعد الحدوووود احسني عايش مع لوحة حلوه وبس
لاتعطي ولاتاخذ معي ولا حتى احس انها تتنفس
فقلت بكيفه بكره تتغير وتعقل
بس لما انتقل هالشي بعلاقتها مع ولدها عرفت ان هالشي ابد ماينسكت عنه
حاولت بكل الطرق بس ولاطريقة نفعت
الين ماوصلتني الى هالحالة اني ابين لها اني مو مهتم فيه ولا ادري عنه عشان يمكن تحس
شوي وتدري انه مافي غيرها بيسأل عنه مو كالعادة موكلتلي الاهتمام انا والخدامة
وهي كويس لو تذكرت اسمه
دخلت الجناح ثم غرفة النوم وشفتها جالسه عالى الكمدينه وتحط كريم على وجهها يديها
نصور حاول يتفلت مني الين تركته يمشي على الارض وراح لها وانا مستغرب منه
رمى نفسه بحضنها وجلس يبكي
انا هالمشهد حسيته ذوب قلبي حسيت بحرارة دموع بعيني مو راضيه تطلع
استنيت ردة فعلها بس انصدمت وانا اشوفها تلتفت علي حتى من غير لاتقوم من الكرسي
ولا تشيله :: اكيد فيه النوم ميري تقول انه صاحي اليوم بدري ماهر تكفى شيله حطه بسريره
لسى ماحطيت الفيتامين على وجهي
حسيت الارض مو شايلتني من القهر صح ماتوقعتها تبكي بس مهوب كذا
ولا كأنه يبكي؟؟؟
رحت لها من غير حتى مااأرد عليها ولا أناظرها وشلت ناصر
وسدحته بحضني واحاول اسكته وامسح دموعه
وانا العب بشعره كالعادة عشان يعرف ينام
*** غرور الدمع ***
29-08-10, 05:18 AM
ممتاااااذة 
جديد مواضيع قسم الارشيف
العرض العادي
