كاتب الموضوع :
بياض الصبح
المنتدى :
القصص المكتمله
[البارت الثاني عشر,,,,,
/////////////////////////////////////////////////////////////////////
يوم دخلوا عيال عمتها كانت هيفاء بالخيمة اللي بالحديقة تجهز عدة الشوي وطبعا كانت بعبايتها ومعها عبدالله..ماتدري ليش انقبض قلبها يوم دخلوا وماجا معهم خالد!!!هي ماتبي تشوفه بس عبدالله من رجع من عندهم قبل يومين وهو يقولها انه شاف البابا..وحست انها متضايقة انه ماجا..اكيد مايبي يشوف عبدالله!!!!
مها/هاااي يالسرحانة؟
رفعت راسها ولقت خالد وجنبه مها وكان خالد يناظرها....
هيفاء/اهلا..ماانتبهت كنت ارتب العدة علشان بيطلعون يشون....الباقي داخل لاتوقفون بالحر؟؟؟
عبدالله/بابا..ماما هيفاء شوفي بابا؟
مها حست ان وجودها هنا بيسبب بركان..بس بعد اذا راحت يمكن يكون فيه زلزال..واحتارا توقف لو تروح؟؟واختارت انها تمشي..رغم ان كلمة عبدالله كسرت خاطرها.......
عبدالله يهز امه/ماما شوفي بابا خالد مثل اللي بالصورة؟
لو رفعت راسها بيلمح خالد دموعها بعينها وهي ماتبيه يشوف انها من دونه ذليلة!!!بسك ياعبدالله لاتعيدها ابوك قلبه صخر ومايحس حرام عليك لاتعذبني وانت تقولها وهو مو مهتم لها!!!!
عبدالله راح لخالد اللي بعده واقف مكانها ماتحرك وهو حاس بشي غريب قاعد يصير له....
مسك عبدالله يده....
عبدالله/بابا خالد ماسويت سلام؟
خالد تنحنح....
هيفاء بدون ماترفع راسها/عبود تعال؟
خالد كان هذا الشي اللي يبيه..انه يسمع صوتها ليش مايدري؟؟؟
خالد/قولها اسمي عبدالله مو عبود؟
عبدالله يكلم امه بصوت عالي وكانه فخور ان ابوه عطاه وجه/اسمي عبدالله مو عبود؟
لف على ابوه اللي كانت عيونه بعيون هيفاء/بابا وديني الالعاب؟
هيفاء في بالها(والله ان ماسكت اللحين ياعبود الا اذبحك خلاص كافي!!)
خالد بدون اهتمام اللي ذبح هيفاء/بعدين...
عبدالله بتذلل/متى؟
خالد بدون نفس/بعدين بخلي عمك احمد يوديك؟
هيفاء/عبود تعال هنا؟؟قالتها بعصبية ورفعت راسها لقت خالد يناظرها..
عبود بدى يبكي/لا ابي اقعد عند بابا خالد؟؟
هني صارت الوهقة عند الاثنين هيفاء تبيه يجي ومايكلم خالد لايفشلها!!!وخالد مايبي يرد عليه او يكلمه!!!
بس خالد حس باحساس غريب نوعا ما..اول مرة يحسه..حس انه وده يقهر ها الهيفاء اللي شافت نفسها بها السنتين!!!لازم يكسر كلمتها؟؟؟؟؟
هيفاء ماعطت خالد مجال وقفت ومسكت يد عبدالله بتدخل معه...بس خالد يوم شافها ماسكته هو بعد مسك يد عبدالله.....
هيفاء/خير ان شاءالله؟
خالد/نعم..في خدمة؟
هيفاء/اترك يد ولدي؟
خالد/يصير ولدي بعد؟
هيفاء تخصرت/ياسلاممممممم...من متى ان شاءالله؟
مارد عليها خالد واكتفى انه يناظرها بس ويشوف التغيرات اللي صارت فيها؟
هيفاء/متى اكتشفت انه ولدك ياخالد؟
خالد حمل عبدالله بدون مايناظره ومشى...وبدون مايلف عليها قال.../انا مااكتشفت الاوراق الرسمية تقول كذا؟؟؟؟؟
*************************************هنادي تهمس لمها/خالد تقبل وجود عبدالله؟معقولة؟
مها وهي تناظر بخالد اللي مقعد عبدالله بحضنه وهو مو جايب له طاري/تصدقين علمي علمك ياهنادي؟؟؟قبل يومين ماكان متقبله...بس سبحان الله مدري شصار؟
هنادي/الله يصلحه ان شاءالله..ولا احد عاقل بها الدنيا عنده ولد حبوب مثل عبود ومايحبه!!!ماله حق بصراحة؟
مها/هنادي...هيوفة مادخلت..شتسوي في الحديقة بروحها؟
هنادي/بروحها..لا مااظن اذا لاحظتي في شخص مو موجود معنا رغم انه كان موجود بس شكله معها؟؟؟
في الحديقة وتحديدا عند عمود الخيمة كانت هيفاء واقفة ومتسندة على العمود ومغمضة عيونها....
محمد/احم احم احم...
فتحت عيونها وهي شبه مفزوعة وبس شافت محمد ابتسمت... واعتدلت في وقفتها..
محمد بحنية/نعسانة روحي دارك ونامي لاتنامين علينا وانتي واقفة!!!
هيفاء تنهدت..
محمد/فيك شي؟
هيفاء/لا..
محمد/بصراحة وبدون لف ودوران مضايقك وجوده هنا؟؟؟
لفت هيفاء وجهها للجهة الثانية/لا عادي...وجوده مايشكل أي شي بحياتي!!!
محمد/وليش قاعدة هنا بروحك ياهيفاء؟
هيفاء/مدري يمكن سرحت شوي وانا واقفة لاتشغل بالك اللحين بدخل؟
محمد/هيفاء متاْكدة مافيه شي؟
هيفاء/أي متاكدة انت لاتشغل بالك...
محمد/طيب خلينا ندخل.....
وقفت جنبه ومشوا مع بعض بشويش.....
هيفاء وقفت ولف لها محمد لقاها تناظره....
محمد/شفيك؟
هيفاء/محمد....معقولة خالد ياخذ عبدالله عنده؟؟؟؟
محمد سكت.......
هيفاءبخوف/شنو؟
محمد/واذا اخذه ياهيفاء شبيصير!!!يظل عبدالله ولده؟
هيفاء ناظرته بخوف وبدت دموعها تتجمع بعيونها..
محمد/هيفاء...الولد بالاول وبالاخير ماله غير ابوه..
قاطعته هيفاء باشارة من يدها/لاتكمل يامحمد لاتكمل؟؟؟ياليتك ظليت ساكت ولاقلت ها الكلام اللي مثل السم!!!!!!
محمد/انتي ماتقدرين تمنعينه؟
هيفاء بقوة واصرار/ماراح ياخذ لو حلم بالموت!!!!هذا ولدي يامحمد ولدي!!!ولدي بروحي انا اللي حملته وولدته وربيته وكبرته...صحيح ماكنت حاسة بالامومة معه من البداية بس انا متعلقة فيه وكل مايجي يوم اعوضه عن الايام اللي فاتت...بس خالد لا والف لا!!!ماله شي من خالد...ماله غير الاسم وبس!!!!!
**************************************ام عبدالله/ومتى بيردون الاهل ان شاءالله؟
خالد/ان شاءالله ها الاسبوع...
ابو محمد/مااخذوا راحتهم..انا قلت لااختي لاتحاتين العيال كبروا وشايلين اعمارهم بس عيت مارضت الاتجي ها الاسبوع...
خالد/انا قلت لها روحي اسبوع جدة وش بيضرك بس ماهي راضية تقول ايام الاختبارت ماتحب تكون غايبة عن البيت....ان شاءالله بالصيفية تعوضها بسفرة اطول..
ابو محمد/ان شاءالله..
ام عبداللله/مابيستوي عشانا يابو محمد؟
ابو محمد/يالله ياعيال قوموا طلعوا جدتكم جاعت مافيها صبر؟
الجدة/أي ووالله اني مافيني صبر اكلتي من بعد صلاة الضهر للحين قاعدة بجوعي؟
مشاري بسرعة/جدتي!!!!حطي عينك بعيني اشوف!!!!انا يوم اني شفت هيفاء جاية من دوامها العصر وحاطة لها دلة القهوة والتمر لقيت معها تاْكلين!!!!!رحت ورحت ورحت وبعدين شفتك عند الثلاجة تاكلين دانيت عبود!!!!!!وين اللي جوعانة شوي وتشربين البيبسي حقي!!!!!!
ام عبدالله وقفت/زين...زين يامشاريوه تراقبني!!!!ماابي عشى بنام بجوعي الليلة وخلها بذمتك؟؟؟؟
ابو محمد/يامشاري زين كذا يوم زعلت جدتك!!!قوم راضها بس!!!
مشاري/ههه يبى وانا شقلت هاذي الحقيقة؟
خالد/ههههههههههههههه جدتي ماتهون عن سوالفها؟؟
مشاري/ههههه تصدق ياخالد مسوية افلام مرعبة لنا واكشنات ماتتخيلها...
خالد/ههههههه يالله عاد شوي شوي عليها ترى ماارضى عليها؟
مشاري/واااع هذا ذوقك ياخالد جدتي!!!!والله انك اثبت انك مو صاحي اللحين احد يحب جدتي؟؟؟؟؟؟
محمد/اقول لايكثر بس وقوم ساعدهم يالله؟
لفوا خالد ومشاري على محمد اللي توه داخل..وكان ابو محمد طلع مع عمر واحمد وماانتبهوا لهم وهم يضحكون.....
مشاري/راحت عليك جدتي يامحمد؟؟سوت اكشن جديد وقالت انها زعلانة وماتبي عشى وبتنام بدون عشى الليلة؟
محمد قعد جنبهم/اعطيني مليون وماراح اصدق؟؟؟
خالد/هههههه
محمد/تلاقيها خاشة لها شي بدارها وتبي تاكله وماعرفتت تتحجج وبغتها من الله وقامت تاكله...
مشاري/شلون راحت عن بالي هاذي بالله؟؟؟؟
خالد/من صدقكم انتوا؟
مشاري/قوم معي علشان تتاْكد بنفسك؟؟
خالد/وين بتروح؟
مشاري/بقتحم عليها غرفتها؟؟؟اكيد انها تاْكل اللحين ها الزعلانة؟؟؟
خالد/وافرض انها مارضت تدخل او مافتحت لك الباب وخلته مقفل؟
مشاري/خالد منت صاحي؟؟؟جدتي ماتقفل الباب تخاف تموت والباب مقفل عليها وبعدين انا مااستخدم معها سياسة لو سمحتي انا عند الباب؟؟ماتشوفني الا اعصار داخل لها؟؟؟
************************************هنادي/تصدقون ظلمته؟
مها/لا مانصدق؟؟؟انا عن نفسي مااصدق؟
هنادي/كان يفكر انه يسوي مشروع وانا ظليت مزعلة نفسي وقاهرة نفسي على الفاضي؟
مها/ولو ما كان المفروض يبيعه ومايقولك ...حتى لو كانت نيته زينة مثل ماتقولين يعني انتي شريكته والمفروض كل شي يكون بينكم مو يسوي الشي وبعدها يعطيك خبر..يعني لايشاور ولاهم يحزنون؟
هنادي/مهاوي!!تبين تخربين بيني وبينه!!!قلت لك انا ندمانة اني تسرعت وزعلت وماسالته عن السبب؟
مها لفت على هيفاء اللي كانت ساكتة وماعلقت بشي/سمعي اختك شتقول؟؟انا مدري لمتى بتظلين كذا طيوبة قلب ياهنادي؟؟؟؟
هنادي/هيفاء...شفيك سرحانة؟
هيفاء/ولاشي..
مها/منو مزعلك؟
هيفاء/ما احد..
مها/وليش صافنة ها الصفنة ومالك خلق شي؟؟؟
هيفاء/عادي مافي شي بس كنت افكر كذا بموضوع ..لاتشيلون هم...شكنا نتكلم فيه؟
//////////////////////////////////////////////////////////////وصلوا عند غرفة الجدة بعد مااخذ مشاري طريق لخالد ووقفوا عند الباب..
خالد بشويش/انا اقول لاتفتحه بقوة يمكن ماتكون تسوي شي وتكون انت الغلطان افتحه بشويش احسن واضمن؟؟
مشاري بنفس الهدوء/شورك وهداية الله....
دخل مشاري على اصابعه ووراه خالد وعبود اللي كان مثل ذيل خالد..ولقوا الجدة مدخلة راسها تحت السرير واستغربوا ....بس تحت السرير ظلمة ومابيشوفون...
خلوا عبود يدخل راسه لانه اصغر منهم وماسمعوا الاصرخة عبود ووراها صرخة الجدة!!!!!!!!!!!!!
///////////////////////////////////////////////////////////////مرام/تعالي نطقعد بالخيمة نسولف مع خالي...
هند/أي بس استحي احمد هناك وخالد...
مرام/لا ماهو هناك خالد شوفي..ولا محمد بعد..كاهو محمد واقف عند الباب يكلم...ولا مشاري هنا..مافي غير عمر واحمد..يالله احمد اللحين بيروح لربعه الليلة الخميس وهو مايطول هنا يروح يسهر مع اصحابه....
هند/أي بس انا استحي...
مرام/يالله امشي ابوك موجود شمنه تستحين؟
تقدموا هند ومرام وطبعا كانوا لابسين عبيهم ومتنقبين لان محمد مايرضى يقعدون كذا بدون نقاب على وجوهم طبعا عدا هيفاء ..وبيت عمتهم اذا جاوا لهم البيت يتنقبون مثلهم....
مرام/يعطيك العافية خالي..
لف لها ابو محمد/الله يعافيك يابنيتي.....مرام صح؟
مرام/أي.....
ابو محمد/مشاءالله صرتي عروس؟
مرام/خالي لاتحرجني....
كان احمد يعدل بالاصياخ على المشوى وهو كل شوي يرفع عيونه ويسرق منها نظرة....كانت بالنسبة له حلم مابيتحقق ابدا بس مع ذلك فضل انه يظل يحلم فيه.......
هند/يبى..
احمد اللي رفع راسه قبل خاله وانحرجت هي يوم شافت احمد يطالعها....
ابو محمد/خير يبى؟
هند تلعثمت في البداية/كنت اقول...يعني...
ابو محمد/وش فيك؟
رفعت راسها تشوف احمد بعده يناظرها لولا لقته بعدها يناظرها..لفت على الجهة الثانية...
هند/بعد مانخلص الامتحانات بتحج لنا الشاليه مثل ماوعدتنا؟
ابو محمد/بعد ماتنجحون يبى؟
هند بحزن/يبى بعد الامتحانات مو بعد النتيجة؟؟مايصير؟
احمد/ليش ماانتي واثقة من نفسك بتنجحين؟
هند بخوف من احمد ومن نظراته/بلى..
احمد/معناته ضامنة الشاليه.....
مرام/خالي احسب حسابي ترى بكون معكم...
ابو محمد/وانت ياعمر بتكون معنا؟
عمر الوحيد اللي كان ساكت ومو جاي باختياره كان نسخة مكررة من ابوه في كرها لبيت خاله يجي بس كذا تحصيل حاصل...سكت ومارد على خاله مثل مايسوي دايما!!!!!
///////////////////////////////////////////////////////////////////
الجدة بصراخ/لحقوا علي شبح تحت فراشي!!!
خالد/جدتي هذا عبود؟؟؟؟؟
رفعت راسها ولقت خالد...../شتسوي انت مع ولدك بداري؟؟؟
خالد/ها..انا جاي ...صوت عبدالله للحين يبكي وخالد كان يناظره ويناظرها وهي في قمة عصبيته...
الجدة/ووجعة شكنت تسوي بغرفتي ياخلود؟؟
خالد/جاي اصالحك انا؟؟
مشاري نزل لمستوى عبدالله..
مشاري بحنية/عبود شفيك؟؟ليه تبكي؟؟
عبدالله طلع نفسه من تحت السرير وهو يصارخ مو بس يبكي..كان بيده كيس الا كل اللي شراه امس من البقالة وكان يدوره طول اليوم وهم مفكرين عليه انه اكله كله وناسي وهو مصر انه ماشافه يوم كان يشاهد؟؟؟اللحين عرف سر اختفاء الكيس....شيبساته وبرنجلزه وشوكلاتاته وحلوياته كلها راحت...وقعد يبكي ويصارخ انه يبيهم ويضرب رجله بالارض..
مشاري/حشى لله مو صاحية سارقة اكل الولد ويوم يسال عنه ماتكلمتي؟؟؟؟شيسكته اللحين؟
الجدة بخوف/مشاري واللي يعافيك روح معه البقالة بالسرعة واشتري له اللي يبيه؟
مشاري بدت روحه الشرانية تطلع/اولا فلوس ماعندي يعني لازم اروح اطلب من هيفاء وهيفاء بتسالني ليه ابيهم ها الحزة واحنا بنتعشى؟؟؟واذا عرفت انك اخذتي كيس ولدها واكله بتطيحين من عيونها ياجدتي؟؟؟ثانيا/حتى لو افترضنا اني باروح اشتري له هذا في حالة انك تعطيني مغريات طبعا لااروح انشر الخبر واطلع جوالي واصورك وافضحك بالتلفزيون فعبدالله ورث من ابوه خلود صفة ذميمة جدا وهي انه بمجرد يبكي مايسكر فمه اصلا يظل يبكي طول الوقت ولو شنو تعطينه؟؟؟؟؟
خالد كان يناظر في مشاري وهو شاك بانه يقصده ولف عليه مشار وقال بثقة/طبعا انت المقصود لاتخاف!!!
الجدة بترجي/خليه هنا معي بالدار لين تروح وترد ومابيدرون عنه؟
مشاري/من وين....
الجدة قامت بسرعة ورفعت مخداتها وطلعوا الفلوس وزاغت عيون مشاري...بس في لحظة سكرتهم ولفت لخالد/اقول يمه خالد انا ماعندي فلوس اللحين تقدر تعطي مشاري سلف وبعدين بالعيد اردهم لك..
حاول خالد انه يكتم ضحكته بس بعد ما مشاري فطس من الضحك ماقدر انه مايضحك..
خالد/ههه ان شاءالله ولايهمك..
فتح محفظته وعطى مشاري الفلوس...
مشاري/خلاص عبود بروح اشتري لك زين لاتبكي خليك هنا بروح بسرعة وبرد زين؟
عبدالله/لالالالا
مشاري/يالله عبود لاتبكي ترى اذا بكيت بكرة مااروح معك نلعب كورة؟؟
طلع مشاري وجا خالد بيطلع..
عبدالله/بابا خالد...
خالد كمل طريقه وكاْنه مايسمعه...
عبدالله/بابا خالد.....
الجدة بحزم/خالد!!
وقف خالد مكانه...ولف لجدته...
الجدة بحزم وكانها انسانة ثانية/ماتسمعه يناديك؟
خالد بضيق بعد ماانتهى وقت اللعب والضحك ودخل وقت الجد/وش تبين مني اسويله؟
الجدة/كلمه!!ساله شيبي!!!لعن بودارك انت صدق متبري منه وماتبيه!!!
خالد بانفعال/جدتي انا ماقلت ها الحكي ولاتقوليني ايه؟؟؟
الجدة/صحيح انت ماقلته بس هي قالته وكانت صادقة فيه؟؟؟
خالد/نعم!!!!!هي قالته؟؟؟ياسلام..وش قالت بعد؟؟؟
الجدة/وش فيك تصارخ كذا؟؟؟
خالد/هي ليش قالت كذا بالله؟؟؟علشان تستدر عطفكم وحبكم؟؟؟هي وش عرفها اصلا انا وش ناوي عليه ولا مشاعري بتكون ناحيته شلون؟؟؟
عبدالله/بابا..
خالد/روح انت زين بعد ماني فاضي لك؟؟؟؟
///////////////////////////////////////////////////////////////طبعا بتدور احداث الليلة كلها داخل بيت بومحمد.,,,,
كانت هيفاء الوحيدة اللي قاعدة معهم بجسدها مو بعقلها وتفكيرها!!!!!
كان فكرها مشغول ومو فاضي ابدا لسوالفهم لانه كان يفكر بشي اهم خالد وتصرفاته معها الليلة وككيف كانت لهجته وهو يكلمها!!!خالد عمره ماحبها بحياته ولاراح يحبها ولاهي بعد تحلم انها تكون بيوم من الايام حبيبته!!!!!
صحيح قبل لايتزوجون كان يعاملها مثل مها كل مالتقوا بس يوم انهم تزوجوا تغيرت الامور بينهم بشكل مو طبيعي..خالد صار انسان ثاني يكرهها او بالمعنى الصحيح يرفض وجودها بحياته علشان يرضي ابوه!!!!!
وعبدالله بعد!!!عبدالله مايل لاابوه وهذا الشي اللي ماتوقعته......معقولة انه ياخذه معه!!!!لا ابدا مو معقولة!!خالد اصلا ماهو متقبل وجود ولد له بالدنيا يقوم ياخذه عنده!!!لا هاذي فكرة مستبعدة جدا بس الاهم من هذا كله انه عبدالله ما يتعلق فيه....
مها كانت راكعة عند ركبة هيفاء وبالموت انتبهت لها هيفاء...
هيفاء بخوف وفشيلة/شفيك؟؟
مها بتشكيك/انتي اللي شفيك؟
هيفاء باندفاع/مافيني شي؟
مها/متاْكدة؟
هيفاء/أي..
مها/شصار بينك وبين خالد يوم تركتكم مع بعض؟؟؟؟
هيفاء لفت وجهها للجهة الثانية وتنهدت..
مها بحنان/هيفاء..
قاومت دموعها ...ماكانت تبيهم ينزلون والكل يعرف ان خالد يحتقرها ومو طايق يشوفها...
مها/خالد زعلك بشي؟
هيفاء بثبات/لا..
مها/احلفي؟؟
هيفاء/ما انتي واثقة من اخوك يامها؟
مها/مدري بس سرحانك اليوم مو طبيعي من شفتي خالد وانتي حالك مقلوب....
هيفاء/ولاشي صدقيني يامها...
مها/مو مصدقتك؟
هيفاء/يمكن...يمكن اني شفته بعد ها الوقت الطويل.......مدري..
مها/ماتدرين شنو؟كملي!!!
هيفاء اكتفت بانها تتنهد وكاْن ها التنهيدات صارت اجوبة لكل الاسئلة اللي يبونها.....ووقفت وراحت عند النافذة......
مها يوم شافتها كذا فضلت انها تتركها بحالها واذا راقت هي بتتكلم بحالها....
//////////////////////////////////////////////////////////////////مشاري بعد مارجع من البقالة راح على طول دربه لغرفة الجدة..وفتح الباب...
مشاري بصوت عالي/انا جي......سكت وماتكلم....
مشاري تقرب منهم...
مشاري/جدتي شفيك؟
كانت الجدة حاضنة عبدالله وهو نايم بحضنه وباقي اثار الدموع بعدها بعينه....كان شكله شكل ملاك صغير نازل من السماء..كانت ضامته لصدرها وهي تبكي بقهر.....
مشاري بتاْثر/جدتي شفيك؟
الجدة ناظرته باسى/حرام..والله حرام اللي قاعد يصير لها الولد؟
مشاري /عبدالله!!!!شفيه؟؟؟
الجدة تنهدت وهي تمسح دموعها بملفعها..
مشاري بحنية مو معتادة منه مع جدته/قولي شصاير..والله اللي نزل منك ومن عبدالله دمعة ابكيه العمر كله!!!!
الجدة/............
مشاري بحيرة /ليه نايم معك؟؟وش فيه؟؟قبل ساعة كان ينطرني لين ارجع من البقالة؟؟؟
الجدة/كان يبي ابوه.....وظل يبكي لانه تركه وطلع....
مشاري/وهذا اللي زعله؟؟
الجدة بانفعال ودموعها ماوقفت/انت فاهم يعني شنو الواحد مايبي ولده!!!!
مشاري/ومن قال لك عاد ان عبدالله بيموت اذا ماعبره خالد!!!!!عبدالله ولد بها البيت ياجدتي وكلنا نموت ونشوف ابتساماته ورضاه وضحكته...واذا خالد مايبيه بكيفه ماحد جابره على حبه..كلنا هنا بنكون له الابو والاخو والام والحبيب والصديق!!!شيبي بعد؟؟؟الله لايراوي ذل جده بس ياجدتي وعيشته معنا هنا بتكون اريح لباله منهم!!!!
الجدة/لا يايمه مو صحيح!!!انتوا صحيح تحبونه وتغلونه لانه ولد اختكم..بس يايمه بكرة كل واحد بيتزوج وبيلهى بنفسه وبيته وعياله وامك وابوك ماهم دايمين له....وهيفاء ماراح تقدر تربيه بروحها ..وهو ولد والولد مايقدر على تربيته غير رجال مثله!!فاهمني يامشاري يايمه؟؟؟اختك بتضيع عمرها اذا ظلت مقابلته..بتنهي حياتها وهي بعدها بعمر الورد!!!
مشاري هز راسه بدون اقتناع/انا احبه ياجدتي...عبدالله صار جزء لايتجزء من حياتي...يمكن انتوا تحبونه وتعزونه بس انا ياجدتي لا..انا اموت في عبدالله...انا لاليوه ياجدتي لاليوه؟؟؟؟(كان يقولها بلهجة عبدالله وهو منفعل...)ماراح اسمح لمين ماكان انه ياْذي عبدالله او يزعله حتى لو كانت هيفاء نفسها ياجدتي سامعتني؟؟؟؟؟
قام بطوله وفي يده كيس الحلويات اللي شراهم من البقالة وحمل عبدالله بين يدينه وطلع من الغرفة وسط دهشة الجدة!!!!
//////////////////////////مرت الليلة بحلوها وبمرها على الكل الا اثنين كل واحد فيهم كان قاعد بغرفته وطاير النوم من عيونه وهو محتار بللي صار اليوم وخلونا نبدي بخالد,,,,
خالد من بعد مااستاْذن من بيت خاله انه مشغول وماراح يقدر يردهم البيت معه وهو عند البحر ظل قاعد هناك وهو شارد مو قادر يضبط افكاره على شي محدد ساعة يفكر بهيفاء وساعة يفكر بعبدالله!!!!لين دقت عليه مها الساعة وحدة تقول له انه لازم يرد البيت لانه احمد مو هناك....
رجع لهم البيت بس كان شارد وكل اجوبته كانت مقتضبة وبسرعة قومهم كل واحد على فراشه وراح هو وراهم...استوقفته مها لحظات تساله شفيه وليه هو متغير وقال لها انه مافيه شي بس يفكر بالعمل وقالت له انه ها الشي مو صحيح لانه هيفاء اليوم ماكانت على طبيعتها وهو كان عنده أي شي يسمع فيه بذيك اللحظة الا طاري هيفاء اللي كانت ماخذة تفكيره كله الليلة!!!!!!
دخل غرفته وقعد على فراشه..حاول انه يتقلب ماقدر ...وقف وظل عند النافذة وخلقه ضايق..اكثر شي كان مضايقه تصرفه مع عبدالله من البداية!!!!هو ما كان يبيه بس عناد لهيفاء وعلشان تنكسر كلمتها جاره والنهاية طلع وخلاه وهو يترجاه يسمعه وهو مو عارف شيبي منه.!!!..وزعل جدته منه!!ليه ياخالد ليه!!!ليه تسوي كذا وكاْنك مسحور ؟؟؟؟انت طيبتك مع الناس كلها جات على ها الولد المسكين!!!!
صحيح انا كاره وجوده بس وربي انه غصبا عني!!!مدري ليه حسيت بلحظة من اللحظات اني ....استغفر الله العظيم.....يارب...يارب شسوي...ماابي اظلمه..بس ماني متقبله..يارب لاتزعل مني اهلي علشانه..يارب خليني اسوي الشي الزين لي ولهم واهديني ووفقني!!!!
********اما من جهة هيفاء ماصدقت ان بيت عمتها يطلعون وهنادي تروح بيتها ومشاري ينيم معه عبدالله بغرفته علشان تقفل على نفسها باب غرفتها...
اول ماقفلتها حست بانها شالت هم ثقيل من قلبها...
شالت شيلتها من على راسها وتسندت على الباب بقوة وغمضت عيونها...كانت محتاجة تكون بروحها من اول ماشافت خالد الليلة!!!!!
تماسكت نفسها لين قعد ت على الارض تفجرت عيونها بالدموع...كانت تحاول تكون قوية وهي بينهم بس اللحين ماعاد في احد يوقف بوجه دموعها..
كانت تكلم نفسها وهي تشاهق من بين دموعها....كان كلامها في البداية مو مفهوم ابدا !!!بس بعدين صارت تكلم نفسها...ليه ياخالد ليه....شسويت لك علشان تكرهتي وتذلني!!!!ليه دايم تدوسني بقدمك وتمشي علي ليه!!!!انا ماجرحني اسلوبك وتعاليك ياخالد!!!!لا والف لا!!!كل اللي ذبحني كلمة انت قلتها!!!الاوراق الرسمية تقول انه ولدك!!!صارت تردد ها الكلمة بينها وبين نفسها فوق العشرين مرة وكانها تستفهم ها الشي هذا صحيح ولالا؟؟معقولة ياخالد توصل فيك الكراهية انك تتهمني ها الاتهام الخطير!!!!معقولة تقولها بدون ماتحس انك اذا رميتها علي بترمي بوجه قنبلة لوبتفجر بداخلي بركان!!!! الله يسامحك ياخالد الله يسامحك...ويسامح اللي كان السبب بللي انا فيه.....
ورجعت تبكي من جديد بنوبة متصلة وحارة...
هند بها اللحظات كان بالها مشغول بالعيون اللي كانت تطالعها....وقالت مالي الا هيفاء اقوم اسولف معها والمح للموضوع يمكن هي تقولي شي ثاني بدل اللي افكر فيه!!!!
راحت عند غرفة هيفاء وتوها بتمد يدها تدق الباب سمعت صوت هيفاء تبكي وتنوح ووقفت يدها وماتحركت...كانت تكره ها اللحظات اللي هيفاء تكون فيها ضعيفة ومستسلمة للقهر واكيد انها بتلاقي منها كثير ها الايام بما ان خالد هنا!!!!!!
تنهدت وجت بتمشي لقت مشاري مار من هنا...
مشاري بخوف/انتي واقفة شتسوين هنا؟
هند بارتبك/ها ..لا..ولاشي؟
مشاري بتشكيك/شلون ولاشي؟؟؟
هند ناظرت بالباب ولفت له/هيفاء....تبكي؟؟؟
مشاري نزل راسه وهو متاْكد انها مادرت لان جدته وصت عليه مايقول لها بس ليش تبكي!!!
مشاري/معقولة احد سمعنا نتكلم بالموضوع وقال لها؟؟
هند/أي موضوع؟؟؟
مشاري توهق/ها....
هند/شنو؟
مشاري/تعالي بقولك بس وعد لاتفتحين السيرة جنب هيفاء؟؟؟
////////////////////////////////////////////
اليوم الثاني الصباح,,,,
هيفاء/السلام عليكم...
لفوا لها ابو محمد وام محمد وهند ومشاري...
وعليكم السلام والرحمة..
ام محمد/اليوم ماعندك دوام؟وين رايحة؟
هيفاء/يبى..بروح بيت خالتي اذا ماعندك مانع...
ابو محمد كان حاس بتغيرها وشرودها من البارحة....
ابو محمد/زين يبى اذا بتروحين بيت خالتك مافي مشكلة...
هيفاء/ولاتحسبوني على الغذى مابرجع بتغذى هناك؟؟؟؟
ام محمد/......؟؟؟
لفت هيفاء ناحية الدرح/يالله عاد عبود ماصارت ذي جزمة اللي تلبسها؟
نزل عبود وهو بعده مالبس الجزمة.../مااعرف البسها؟
مشاري/بتاْخذينه معك؟
هيفاء/أي..
مشاري/خليه هنا ...بيضايقك؟
هيفاء/لا معليش خالتي من زمان ماشافته بعد......
مسكت يد عبدالله وطلعوا......
ودخلت الجدة.....
ام عبدالله/وين راحت مع ولدها من صبح الله؟
ابو محمد/بيت خالتها.....هيفاء فيها شي من البارحة ماهي طبيعية؟
الجدة تاْشر على مشاري انه مايتكلم وهو وهند يطالعون في بعض؟؟؟
ام محمد/خير ان شاءالله تعرفون شي وخاشينه عني؟؟؟؟
هند/وشدعوة يالغالية بنعرف شي ومابنقولك؟
مشاري يهمس لهند/يعني معقولة جدتي تعرف وامي لا؟؟؟مايصير؟؟؟
//////////////////////////////////////////////////////////////في بيت العواد...
نزلت مها الساعة تسعة وربع....
ولقت خالد قاعد بالصالة ويشرب قهوته وهو سرحان ومبين عليه انه مانام...
مها/صباح الخير؟
لف لها خالد/هلا...صباح النور...
مها/قاعد بدري ماهي عوايدك؟
خالد/انتي ناسية ان طائرة امي وابوي اليوم توصل؟
مها/خالد...طائرتهم توصل بعد صلاة المغرب!!!!انت عارف كم الساعة اللحين؟؟
خالد/والله...شفت ان مافيني نوم قلت اقوم اشوف منو الحلو اللي بيصحى بعدي؟؟
مها/خالد لاتلف وتدور علي!!!!انت فيك شي منت خالي؟؟
خالد/مها لو سمحتي يالغالية...قلت لك مافيني شي فلا ترجعين تساليني؟؟
مها/طيب ممكن اساْلك عن شي ثاني؟؟؟؟
خالد/كل شي ممكن بس ماتساْليني عن اللي فيني؟؟
مها/طيب....شصار بينك وبين هيفاء البارحة بعد ماتركتكم؟
رفع عيونه لها يناظرها بدون مايقول شي ..وبعدها رفع كوب قهوته وبدى يشرب منه...
مها وهي مصرة/خالد اترجاك تقولي؟؟؟هيفاء البارحة كانت سرحانة طول الوقت ..وفيها شي..متغير!!
خالد ماكانه سمع شي......
مها/خالد؟؟
خالد/تغيريت؟
مها باستفهام/مني!!!
خالد ماكلف على خاطره يناظرها ظل مناظر كوب قهوته..../صارت غير عن قبل السنتين اللي راحوا!!!!صار فيها عناد..كبرياء...مدري شلون اوصفه لك؟
مها/وهذا اللي مضايقك؟
خالد/قلت لك مافي شي مضايقني بس انا كنت افكر بموضوع ثاني...
مها/اللي هو؟
خالد/انا بتزوج وبستقر يامها!!!!!!!!!!
*********************************************في بيت خالة هيفاء..
كانوا قاعدين مع خالتها وبنت خالتها نورة اللي هي اصغر من فاتن ومخطوبة وبعد اشارات من هيفاء لفاتن يالله استاْذنوا وطلعوا فوق غرفة فاتن......
فاتن/شفيك خوفتيني؟
هيفاء/مانمت طول الليل يافاتن؟
فاتن/ليه وش اللي صار؟؟؟
هيفاء/خالد!!!!
فاتن/جعله العمى ان شاءالله!!!!وش مسوي بعد!!!!
هيفاء/........البارحة وقفنا مع بعض...اقصد وقف وانا كنت بالخيمة بروحي.......
فاتن/قال لك شي؟؟؟؟
هيفاء/عبدالله تعلق فيه يافاتن تعلق فيه!!!وطول الوقت وهو يقوله بابا خالد وبابا خالد وهو مو معبره نهائيا!!!!
فاتن/وهذا اللي مزعلك؟؟؟عبدالله ماهو محتاج له...الطفل وين ماكان الطيب موجود بتلاقينه...اما في حالة خالد تطمني ماراح يعجب عبدالله ابدا اذا ظل كذا!!!
هيفاء/انا اموت واعرف ليه كان ....
فاتن/شنو؟
*************************************
هيفاء/انا اموت واعرف ليه كان ....
فاتن/شنو؟
هيفاء/مدري هو يعاندني..ولا يبي يكسر كلامي..ولا شنو بالضبط!!!!انا اقوله عبود تعال وهو يقوله انت اسمك عبدالله مو عبود..,المصيبة ان عبدالله فرحان مووت فيه وكانه فخور انه عطاه وجه؟
فاتن/مااتوقع ان هذا الشي اللي مضايقك مووت ؟؟في شي ثاني صح؟؟
هيفاء تنهدت من قلب وحست بالضعف لحظتها/يقول ان الاوراق الرسمية بس هي اللي تقول عبدالله ولده!!!!!!!!
صارت عيونهم بعيون بعض وهيفاء عجزت تمسك دموعها بذيك اللحظة.....
هيفاء من بين دموعها/كلمة طلعت منه ماطلعت من العدو يافاتن؟؟؟؟؟؟؟
///////////////////////////////مر اليوم سريع بما فيه من روتين عادي ووصلت المغرب طائرة ابو خالد وام خالد بالسلامة وكملوا سهرتهم مع بعض.......
//////////////////////////////////////////////////////////////يوم السبت,,,,
بشركة خالد,,,,
السكرتير/استاذ خالد..الاخ عادل ينتظرك برى...
خالد/هذا ماتخليه ينتظر هذا تدخله علطول؟؟
السكرتير/حاضر استاذ خالد.....
طلع السكرتير وبعد ثواني قصيرة بس دخل عادل وهو يضحك.....
عادل/ان شاءالله بتسوي لي فيها مدير ومواعيد يبى؟؟؟
خالد وهو يضحك/هههههه لايبيلك تسامحنا ها المرة....
عادل بعد ماجلس وناظر بصورة عبدالله ابتسم/علشان ها الولد بس وضحكته مسامحينك؟
خالد يبي يغير الموضوع/انت ماتترك وظيفة الحكومة وتجي تشتغل عندنا هنا؟
عادل/لا يبى واللي يعافيك لو شتعطوني ماراح اجي...مامن ازين من دوام الحكومة..شوف ماجت الساعة ثنتين الا وانا عندك بالشركة بلا دوام طويل بلا دوام ثاني بلا بطيخ!!!
خالد/هههه بكيفك علشان ماتقول اني ماعرضت عليك الموضوع؟
عادل/الا كيف الاهل ياخالد....شخبار رحلتهم؟
خالد/الحمد لله ارتاحوا شوي من جو البيت والعمل....وسالوا عنك البارح,,,بس ترى اليوم ماعندك حجة غذاك وعشاك بيكونون عندنا بالبيت!!!
عادل/ليه عاد؟؟؟
خالد/عمامي ثنينهم وعماتي وازواجهم اليوم اكيد بيجون يتغذون في البيت مع ابوي...عاد انت قبل الكل ياعادل؟؟؟
عادل/لاتحرجني ياخالد الله يخليك؟
خالد/انا من صدقي اتكلم...
عادل/أي بس بتكونون كلكم اهل انا شنو يدخلني بينكم؟
خالد/انت قبل الاهل وانا قلتها ياعادل؟؟؟واذا تبيني اعيدها بعيدها!!
عادل/أي بس انا اليوم ماني بروحي عندي ضيف اصلا!!!
خالد/يبى انت وضيفك حياكم!!!البيت بيتك ياعادل من زمان شفيك؟
عادل/بس يمكن انك ماتتفق مع ضيفي ياخالد ساعتها بمون محرج منك وانا بوسط بيتك؟
خالد/يكفي انه ضيفك ياعادل وبحبه لها السبب بس!!!وبتقبله علشانك ..وش تبي بعد..يبى وعد ماراح يصير الا كل خير....
************************************************في بيت العواد..
مها/يمه..
ام خالد وهي تحوس ترتب بالاغراض/تينا ودي هاذي السلة هناك بالنص....نعم يمه مها؟
مها/يمه عزمتوا خالي وعياله للغذى؟
ام خالد/يوم انه يجيني البارحة كلمته وقلت له بس ماراح يجي وقال العيال اذا بيجون يجون ماعندي مانع....
مها/يعني بيجون ولالا؟؟؟
ام خالد/وانتي وشعليك من عيال خالك؟؟؟؟
مها/ها لا...بس كذا لقافة....يمه ابوي وخالي مايتفقون ابدا...ومايحبون بعض ليه؟؟؟
ام خالد/روحي خلصي شغلك قبل لايجون عماتك تعرفينهم قبل لاياْذن الظهر بتلاقينهم بنص البيت!!!
مها/طيب.....
//////////////////////////////////////////////////////////////وقت الغذى كان البيت ملايان رغم انهم كلهم اهل يعني عمامه ثنين وعيالهم وازواج عماته ثلاثة مع عيالهم,,,,,
خالد/احمد انت وين طالع بها الضهر وتارك المعازيم؟؟
احمد/ها..لا بس انا عازم واحد من ربعي وهو واقف عند الاشارة مايدل البيت اول مرة يجي؟؟
خالد/اكيد عند الاشارة!!!!
احمد بثقة/أي....
خالد/اذا كذا السالفة معليش بس اذا غير كذا ترى بزعل منك؟؟
احمد/لالالا اكيد صدقني..عشر دقايق وانا عندك...
خالد/عشر دقايق!!!ليه عاد الاشارة هنا؟؟؟مامداه احمد يسمع لانه قال كلمته وطلع بسرعة؟؟
سعود/هلا خالد..
لف خالد/هلا والله بولد العم...شلونك
سعود/تمام انت شلونك...شخبار الشركة
خالد/والله الحمد لله..ماشي الحال
سعود/وشخبار الاهل؟
خالد عارف انه يقصد مها /الحمد لله كلهم طيبين ومرتاحين...حياك المجلس لاتوقف بالشمس.....
مرت اكثر من عشر دقايق ودخل احمد...
خالد/تعال هنا...
احمد ببتاسمة/هلا..
خالد/عشر دقايق ها؟؟؟
احمد/شسوي زحمة الطريق.....
عادل من عند الباب/خالد..
لف خالد لعادل وابتسم وهو يمشي ناحيته وقف مكانه!!!تدرون ليش؟؟؟
لان خالد كان يناظر بالضيف اللي جايبه معه عادل....
كانت يد عادل ماسكة يد عبدالله ولد خالد وهو لابس ثوب مثل الرجاجيل...
عادل/اذا بيزعلك وجوده ماله داعي ندخل!!!وصدقني ماراح اكون زعلان؟؟
خالد تنهد وغمض عيونه وصار في باله الموقف اللي قبل يومين بينه وبين هيفاء في بيتهم وبعدين موقف عبدالله مع جدته ويوم يصارخ عليه....
خالد/حياك ياعادل..قلت لك ضيفك ضيفي ومابتضايق من وجوده علشانك انت؟؟وانا رجال وعند كلمتي!!!
ابتسم عادل ومن ورى خالد ابتسم احمد...
عادل يكلم عبدالله/روح سوي سلام لبابا خالد عبادي؟؟؟
عبدالله مسك يد عادل بقوة ولف له/لا...
عادل/ليه؟؟
عبدالله/لا...
عادل/بعدين مافي العاب مثل ماقلت لك؟؟
تردد عبدالله هني....بس فيها السالفة العاب تقدم من خالد ومسك يد وباسها/سلام عليكم بابا خالد....
خالد بدون مايناظره/وعليكم السلام..
عبدالله ماانتظر اكثر رجع لعند عادل بسرعة..
خالد/انت من زمان تشوفه ياعادل...شكله متعود عليك؟
عادل/طبعا من زمان اشوفه واطلع معه..انت ناسي اني عمه ياخالد وانه ولد اعز صديق لي!!!!كنت دايم اخلي احمد يجيبه عندي ونطلع مع بعض...ماتشوفه متعلق فيني....
لف خالد لااحمد اللي ابتسم بدوره..
احمد/يالله ياجماعة لاتوقفون بالشمس!!!!خلونا ندخل علشان نقول لهم يحطون الاكل!!!
***********************************كان المجلس مليان هرج ومرج لين دخل احمد والجو عادي وبعدها دخل عادل وخالد ومعهم عبدالله وتوقفت الانظار كلها عند عبدالله!!!
ابو خالد/عبادي!!!هلا وغلا...تعال سلم...
كان عبدالله يتفحص الوجوه الغريبة اللي يشوفهم لاول مرة بحياته....
ويوم سمع صوت جده فز له وراح بحضنه....
صحيح ابو خالد كان يكره هيفاءو ابوها بس كان يحب عبدالله لانه يعتبره جزء من خالد ومن ها العيلة...
ابو خالد/جايب لك انا من مكة قطار كبير...
عبدالله/وينه؟
ابو خالد ضحك/تغذى بالاول وبعدين بعطيك اياه؟؟
عبدالله/لا اللحين؟
احمد يهمس باْذن عبدالله/خلاص عبادي علشان بعدين بنروح الالعبا انا وانت وعادل زين...
عبدالله يهز راسه بمعنى انه فهم الكلام...
حمد ولد عمتهم/كبر ولدك ياخالد وصار يشبهك؟
خالد اكتفى بانه يبتسم بس بدون أي تعليق....
ابو سعود/تعال هنا ياعبدالله؟
عبدالله مسك بجده مايبي يتحرك..
ابو خالد/قوم سوي سلام حق عمك بوسعود؟؟يالله انت شاطر ولا ترى القطار ماراح اعطيك ا ياه!!
عبدالله قام وهو معصب ماغير يهددونه بالقطار وبالالعاب كل شوي!!!قام ودار على المجلس كله مرة وحدة يسلم عليهم ويبوس فيهم علشان لا كل شوي يقولون له يقوم يسلم على واحد...وبعد ماخلص قعد جنب عمه احمد وهو معصب على الاخر وكلهم ماتوا عليه ضحك.....
//////////////////////////////////////////////////////////////
|
16-08-10, 10:42 PM
جديد مواضيع قسم القصص المكتمله
العرض العادي
