كاتب الموضوع :
Gal2com
المنتدى :
الارشيف
السلام عليكم ورحمة الله وبركاته اخواتي العزيزات انا تقريبا قربت أخلصها
فعلشان كذا حبيت انزل لكم الفصل الرابع قراءه ممتعه لكم
الفصل الرابع :
وفي بيت نايف بن سعود الدنيا قايمه قاعده بسبب الاخبار اللي وصلتهم وقاعدين على اعصابهم يبون يسمعون اي شي علشان يريح قلوبهم اللي ماعرفت الراحة من يوم صار اللي صار والعيال يسوون اتصالاتهم علشان يشوفون فيصل كان من ضمن الضحايا والا لا .......
هاااااه يابوك حد رد عليك ...
لا يبه محد رد علي .. بس انت هد اعصابك انت فيك الضغط ... لايرتفع عليك
يابوك ياناصر بلاك ماحسيت بالنار اللي فيني بكره بتجربها اذا جاووك عيال بتحس بوجعة كل واحد فيهم وانا ابوك ..
الله يخليك يبه ... بس هدي ... وان شاء الله نسمع الاخبار الطيبه اللي تسرك
يابوك انا ماهوب كاسر خاطري الا امك من يوم درت بالخبر الشين وهي طايحه ودي اريحها علشان تقوم وتـتـطمن على فيصل والا حتى تسمع صوته .. لاكن مااقول الا لاحول ولا قوة إلا باالله اللهم أجرني في مصيبتي
عند البنات :
يمه تكفين قومي .. يمه الله يخليش قومي .. يمه فيصل ان شاء الله بخير بس انتي لاتتروعيين ... يمه قومي فديتش .. قووووووووووومي
خلاص وصايف لاتزيدين أمش وهي اللي فيها مكفيها ...... مها الحين انتي الكبيره المفروض تهدين خواتش وانا خالتش .. اعوذ بالله منكم تفاولـــون بالشين ان شاء الله مافيه إلا الخير مادام ماطلع اسمه يعني طيب بس انتم لاتحاتون الله يهداكم
يمه منى قومي وقيمي خواتش معش وامكم مافيها الا العافيه بس اذا قعدتوا كذا على راسها بتضايقونها زيادة
ياالجازي انتي وخواتش اخذوا بنات خالتكم ورحوا داخل يمكن حد من العيال يجي
وسكتوهم مافيه الاالعافيه ... يله
الجازي : يـــله مها .. منى .. وصايف قوموا معي ان شاء الله نسمع الاخبار الزينه
حصه : منى حياتي قومي فديتش ..
يله يابنات روحوا مع خواتكم ..
............................................................ .....................
وفي المجلس تحت عند نايف وعياله دخلوا عليهم اخوانه وعيالهم
نايف .. سمعتوا شي حد رد عليكم
لا ياخوي يامشعل مابه رد وهذاهم العيال قدامكم من يوم مادرينا وهذي حالتهم
سلطان : لاتخاف ياخوي قريب نسمع اخبار حلوه
مشعل ونايف : يالله ياكريم
عند العيال (سعود ومحمد وتركي وفهد ومشعل وزايد عيال سلطان ) (وسلطان ونايف عيال مشعل ) ( وسعود وناصر وعبد الله عيال نايف ) كل واحد يكلم له واحد بحكم علاقاتهم الكثيره اللي ممكن تساعدهم علشان يوصلون لخبر
سعود بن سلطان : ايه والله الحمد لله .. زين زين يارب لك الحمد والشكر لك البشاره لك على ذا الاخبار الطيبه بتوصلك ان شاء الله ................
كل اللي في المجلس انتبه لمكالمة سعود يبون يعرفون عن ايش يتكلم .... خلص سعود مكالمته وقام وقابل عمه وقال له تستاهل سلامة فيصل ياعمي .. فيصل طيب ومافيه الا العافيه توني مكلم واحد أخوه يسكن في نفس مدينة فيصل وكان هناك وعرفلي كل شي .. ويوم سألته اذا سمع اسم فيصل بن نايف من ضمن المصابين والا المقتولين قال لا ماسمع وتاكد لي بعد ... هاااااااه ياعمي ارتاح بالك ... وقام وحب راس عمه وضمه بقوة .. الشيبه عقب ماجاته الاخبار ارتاح وخنقته العبره وضم سعود له ... الله يفرح قلبك مثل مافرحة قلبي يارب .. الحمد لله يارب .. الحمد لله يله والعيال من حوله رجعت لهم روحهم وقام كل واحد فيهم يسلم على عمانهم وعلى عيال عمانهم ويتحمدون لهم بسلامة فيصل ...
قام نايف من المجلس يبي يروح للنسوان داخل يبشرهم بسلامة فيصل
وين يانايف ..
باآآآروح افرح المره والبنات
في الصاله نوره قاعدة تبكي بدون صوت ومنيره تهديها سمعوا واحد يتنحنح
يـــــاولــــد .. يـــــاولــــد
حـيـاك يـــابـوســــــعود .. ادخــــل مــابـه الابنــاتــك ومرتك ونسوان اخوانك
جاء وقعد جنب نوره وحط يده على كتفها وهو يحب راسها ... ويلمها له يهديها
آفا ..آفا يانوره ويش خليتي عجل لبناتش انتي العاقله الكبيره .. خلاص هدي واسمعي مني .. جايب لش خبر بيسرش ويريح بالش ... تستاهلين سلامة فيصل
نوره : والله ولدي بخير ... اكيد والا تبي تسكتني
نايف : لاوالله توه سعود مكلم له واحد وعلمه بان فيصل ماهوب من المصابين ولا المقتولين ... الحمد لله
نوره : الحمد لله .. الحمد لله ... يارب لك الشكراللي رديت لي قطعة قلبي وقامت تبكي من فرحتها بسلامة ولدها ........
البنات يوم سمعوا بالخبر صاحوا بصوت عالي فرحانين بسلامة فيصل ... بس كان فيه شخص كان يبكي بسكات محد منتبه لها الا اختها شيخه كلن مستانس وفرحان بسلامة فيصل وهي كانت بعالم ثاني انتفضت على شيوخ تكلمهاوتقولها
تستاهلين سلامته يالعنود الله ريح قلبش وطمنش
العنود : الحمد لله ارتاحت عمتي كانت متروعه عليه واجد
شيخة : علينا .. عمتش والا انتي
العنود : بلا سخافـه .. وخلي سخافتش بعدين
شيخة : عادي ويش فيها رجلش .. مافيها شي
العنود : اوووووووه اسكتي بس لاتفضحينا
شيخة : معليه مصيري صايدتش الأيام بيننا ياحلوووووووووو
العنود : امشي نبارك للبنات ونهنيهم سلامة فيصل
راحوا لمرة عمهم وباركولها وهنوها سلامة فيصل وسلموا على بنات عمهم وطبعا تغير الجو اللي كان من ساعات بسيطه جو طاغي عليه الحزن والالم الى جوكله ضحك ووناسه وفرحه بغاليهم وماخلى الجو من عبط البنات ومناقرهم
............................................................ .............................
وهم طالعين من بيت نايف أخوه إلتفت سلطان على ولده سعود ... سعود وانا ابوك ليه ماتجي معنا البيت ابيك بسالفه ويمكن تطوووووووول علشان كذا شرايك تمسي عندنا اليوم غرفتك جاهزه ومرتبه مثل ماتركتها ...
سعود : ان شاء الله بس بمر البيت آخذلي ملابس وأوراق مهمة وبجيكم
سلطان : على خير ان شاء الله
............................................................ ......................
تستاهل سلامة أخوك ياسعود ...
الله يسلمش ياهيا .. الحمد لله ارتحت الحين ... من الصبح وانا قاعد على أعصابي ... من يوم ماسمعت الخبر
هيا : بس الحين هو طيب وقريب بيرحع لكم ... الا ياسعود كم باقي له
سعود : شهر بالكثير ... وعقب بيرجع
وفي هاللحظة رن جوال سعود وهو يفسخ غترته ويوم شاف الرقم حطه سايلنت .. الحركة هذي مافاتت هيا بس سوت انها مااهتمت ... بعد شوي رجع يرن ... وسعود سو نفس الشيء... هنا الوساوس قامت تلعب في راسها وتذكرت كلام تحذيرات أختها وقامت الشكوك تاخذها وتجيبها وقامت تتعوذ من ابليس وشلت غترة سعود تعلقها وسمعت تلفون سعود يرن مره ثالثه قام سعود يبي يطلع برا علشان يرد سمع صياح هيا عليه لاتعب حالك وتطلع برا حرام تعني روحك كلمها هنا عادي عدني وحده من قطع الاثاث اللي ماليه الغرفه ... سعود انصدم من رد فعل هيا وصياحها عليه من غير سبب ...
سعود : من هوله ذا الكلام ..
هيا : من هو لله يعني لك وللحيوانه اللي تكلمها .. طول قعدتنا وهي طايحة اتصالات وانت سافهها علشانك قاعد معي ... كفوك الخياس مايبي الاالخياااااا وقطع كلمتها كف سعود على خدها ... قعدت مصدومه منه وعقبها قامت تصايح عليه بصوت عالي ...
هيا : تضربني .. تضربني ... ياجعل يدك الكسر ياسعود هذي آخرتها انضرب ومنك علشان الحيوانه اللي تكلمها ... مشكور وماقصرت ياولد خالي .
سعود : اقطعي يامره ويش الحيوانه اللي اكلمها
هيا : لاوالله والاتصالات اللي تجيك وتحطها صامت علشان لااسمعك ولاادري عنك
هذي آآآآآآخرتها تغازل عجل ايش خليت للبزارين اللي اصغر منك
سعود : تــعـقـبين .... وانا ولد ابوي ارد نفسي للسوء . ماسويتها وانا بزر اسويها الحين في ذا العمر .... انجنييييتي يامره ويش ذا الحكي ..
هيا : ايه انجنييت انا خلاص مليت وتعبت ماصارت حياه اللي انا اعيشها سكت وكتمت كثير وقلت يابنت اصبري بكره بيتغير وبتحلى ايامي لاكن ماصار شي من اللي ابيه وكانت تتكلم وصوت شهقاتها تتعالى ... وآخرتها تضربني ياسعود وليش علشاني ادافع عن ابسط حقوقي ... ادري انك ماتبيني وانك مجبور علي علشان ابوي الشيبه بغاك لي .. بس انا مالي ذنب .. ايش ذنبي اذا كنت مجبوره على شخص ماعرفته الامن كلام اللي حولي ... ايش ذنبي لما اهملتني وهمشتني في حياتك ولاكأن لي ووجود ... ماتقولي شنو ذنبي علمني ياسعود عمرك ماعجبك اي شي اسويه ... عمرك ماحسستني بغلاتي عندك ..
سعود : الله الحين طلعت انا الظالم اللي مايخاف ربه ياهيا ... مشكوره يابنت عمتي يجي منش أكثر .. لكن دام حنا بدينا بالصراحه خل ننهيها بالصرحه انا ماانكر اني اخذتش مجبور بس مع العشره تعودت على حسش معي صارت من بينا ألفة بس انتي اللي هدمتي كل شي ... انتي اللي خليتي نفسش مهمشه ماعاد اهتميتي بشيء نسيتيني ونسيتي عيالش ... نسيتي اني ابي مره تهتم فيني احسها تداريني اهملتيني .. ابي وحده اناقشها وتناقشني آخذ برآيها لكن عمرش ماحسستيني انش مهتمه ... اذا كنت انا غلطان فلا تنسين اغلاطش بعد ... توقعت اني خذت انسانه متعلمه متفهمه لكن لا ماشفت هالشيء... حتى وظيفتش خليتيها وعشتي في الظل ... كل هذا وماتبيني اتغير .. اللي مثلي تلقينه متزوج الحين ولو سويتها صدقيني محد بيحاسبني لأن هذا من حقي بس قلت لاهاذي مهما كان لحمي ودمي بنت عمتي ... بس لأسف مابين بـعـينش وآآآآخرتها تشكين بي بالسوء ... مااقول الله يسامحش .... للأسف طول عشرتي معش توقعت انش عرفتيني لكن طلعت غلطان ......
هيا : كل هذا بقلبك ياسعود .... مشكور وماقصرت .. ممكن توديني بيت هلي
سعود : تعوذي من بليس ... وخلينا نتفاهم ..
هيا : تكفى ياسعود ... ودني بيت هلي .. الكلام بينا خلص ولا عاد لي قعدة في ذا البيت هلي اللي ربوني طول ذا السنين ماراح يعجزون مني ذاالحين ...
سعود : ياهيا ..اناااااااااااا
هيا : واللي يرحم والديك ماابي اسمع شيء . بتوديني والا اكلم سواق امي
سعود : خلاص .. بوديش بس بكره ... علشان ماتروعين امش في ذا الليل .
هيا : خلاص بكره والحين انا بااروح ارقد عند العيال ...
سعود : خليش في غرفتش انا اللي برقد بالصاله ... وطلع سعود واول ماسكر باب الغرفة سمع صوت بكاها اللي حرق قلبه واحزنه كثير مهما كان ماراح ينسى عشرتهم مع بعض غير كذا بنت عمته وحس انه قسى عليها .
............................................................ ..........................
شنو القلب ومن متى ذا الكلام يبه
من شهرين عقب ماسويت التحاليل
وليش ماقلت لي ... ولأمنت عادني ولدك
الله يسامحك ياسعود ... ويش ذا الكلام .. انت اول فرحتي وسندي ياسعود
زين وشنوقالو لك .. يعني ماعطوك اسم دكتور تراسله والا نطرش تقاريرك له
والله وانا ابوك يمدحون لي دكتور في الهند .. بس ماتذكر اسمه
خلاص يبه انا باتصرف .. يلله تآمر على شيء..
ايه يابوك .. انك تغفر ... رب العباد يغفر زلات العباد واحنا بشر ماحنا باحسن منه ... ابيك تنسى ياسعود ... العمر راح ومابقى كثر اللي جاي .. ابيك تدفن الماضي ... تعيش حاضرك
سعود : اذا انا نسيت انت بتنسى ... وطلع من مجلس ابوه وفي قلبه آلآلآف الغصات ... ( الله يهداك ياسعود لين متى بتقعد تعاقبني بذنب مالي فيه )
............................................................ ....................
بعد الأحداث بشهرين :
وفي مطار الدوحة الدولي اعلن عن وصول الطائره القادمه من واشنطن العائدة لأرض الوطن تحمل معها مغتربنا الذي هدته أشواقه لهله وربعه وديرته اللي عشق كل شي فيها من ترابها لبحرها لهواهها حتى حرارة جوها كل شي غير
اهلها الطيبين اصدقائه اللي عرفهم سنين عمره .. نزل من على سلم الطائره ولسان حاله يقول :
من غــــلاتك زان لي نظم القصيد والحروف تناثرت لجل الكلام
لو اسافر واغترب عنك بعيد تنقبض روحي وعيني ما تنام
وسط قلبي عااايش حبك وحيد يــاذري للعز والناس الكرام
سـاري اســـمـك مع مــجـري لـو نزل دمي كتب اسمك وحاام
يــاثري الاجداد والعوز المجيد يـبـقى نورك ساطع وسط العتاام
)منقول )
طلع جواله وكلم له سياره كروه علشان توصله بيتهم وفي طريقه من المطار إلى بيتهم قاعد يشوف الشوارع تغيرت عن آخر مره جاء فيها للدوحة والعمران تطور ... بيوت انهدت وبيوت قامت ... وبعد ساعة وقفت سيارة الأجره عند بيت نايف ونزل منها فيصل عقب ماحاسب وشل شنطته ودخل بيتهم بخطوات سريعه ...
............................................................ .....................
سلام العشق وأعماقه ...
يضم القلب وأشواقه ..
تجيك الروح مشتاقه ...
وتهديك القصيد ألوان ...
وصايف ووجع فقعتي راسي وطي الصوت والا انقلعي للصاله اللي فوق طبعاً وصايف مسفهه لمها ومكمله مع الأغنيه ...
نسينا كل مواجعنا ...
وبقينا اثنين ما معنا ..
سوى الأشواق تجمعنا ..
بلا هجر وبلا حرمان ...
وصمخ ماتسمعيني صجيتيني الله يصجش ويرجش ... يعني تسفهيني خلاص جنيتي على نفسش... وتقوم مها وتتضارب مع وصايف تبي تاخذ منها الرموت
ووصايف ماتبي تعطيها اياه .. مها تشد في شعر ووصايف ووصايف تعض مها
وشوي سمعوا صوت باب الصالحة ينفتح بس ماانتبهوا للي داخل عليهم لاهين بمعركتهم ... سمعوا ضحكة عمرهم ماضيعوا صاحبها التفتوا الثنتين وبصوت عالي فصووووووووووووووووووووووووووووووووووووووووووووووول
قاموا وضموه وقعدوا يبكون فرحانين بجيته لهم ... وهو قاعد يلوي عليهم ويضحك من اشكالهم المتفاجاءة ... الحين كل ذا شوق لي .. الحين دريت اني غالي عليكم .... شلونكم اربكم بخير وانتوا كذا دايما رحت منكم قلت الحين إذا رجعت لهم بيكونون عقلوا لكن الظاهر هذا بيكون من سابع المستحيلات ...
امي وابي وينهم واخواني ابي اسلم عليهم ... ومنى وينها
مها : امي فوق في غرفتها وابي واخواني عند عمي مشعل ومنى تدرس في غرفتها.
وصايف : هاااه ويش جبت لي هدايا ... انا اللي بختار اول شي تكفى فيصل
فيصل : يالدبه الحين هذا اللي هامش يعني منتي فرحانه بي ... انا بكبري هديه لش.. وشافها زعلت عليه ... هههههه لاتخافين هديتش محفوظه
مها : معليك منها بزر لاتشره عليها ناقصة عقل
وصايف : والله انتي اللي ناقصه عقل وزايدة بالوزن خفي شوي الله يعين اللي بياخذش بيتردى حظه ..
فيصل : خلاص انا باروح اسلم على امي
............................................................ ............................
دخل عليها لقاها على سجادتها تصلي خاشعة بصلاتها ... خلصت صلاتها وسلمت وشافته قاعد قدامها ماصدقت عيونها دعت اسمه ولباها راح صوبها ولوا عليها بقوه وقعد يحب راسها ويديها ويشم ريحتها .... وشلونش ياقلب فيصل ونبضه وهواه اللي يتنفسه .... شلونش يالغاليه
مااشكي من باس وانا امك عقب شوفتي لك .. أن شاء الله خلصت من سنين غربتك والا ذي زياره مثل قبل ..
لا ابشرش تخرجت وولدش صار مهندس
الله يبشرك بالخير ... الحمد لله على رجعتك لي وعقبال ماشوفك معرس واشوف داخل علي بعيالك يالله ياكريم ...
ان شاء الله تشوفينهم .. بس اخاف يطيح كرتي بعدين
ياولدي انت الاصل وهم الفروع وغلاتهم من غلاتك
تعال خل اشوفك واكحل عيني بك ... والله ان مرت علي ايام يوم الحادثه اللي صارت في جامعتك .. ماجاني فيها نوم والهواجيس تلعب بي ... لكن الحين ارتحت برجعتك لي ... سلمت على ابوك واخوانك ..
لامالقيتهم ... بس بسلم على ابوي اما العيال بسلم عليهم بكره على الفطور اسويها مفاجأه لهم بس لاتعلمينهم ...
ابشر وانا امك...
............................................................ ....................
ساره قاعده في الصاله تشوف التلفزيون دخلوا عليها خواتها العنود وشيخه وشافوها مندمجة ... في فلم مرعب .. وداخله جو وتعابير وجهها مشدوده مع احداث الفيلم ... جلست شيخه جنبها تبي ترفع ضغطها ... السوري .. السوري
وصمخ ماتسمعين ..
آآآآآآآآآآآآآآوف نعم شتبين .... ماتشوفيني اتابع الفيلم
ادري بس عن شنو يتكلم ...
يتكلم سفاحه تقتل اهلها لأنهم فاقعين كبدها ... لا وابشرش اول ضحيه لها هي أختها السخيفه ...
بل ... هذي احداث الفيلم والا أحداث فيلمش الخاص
فيلمي الحين فكيني بس ... ماصدقت اخلص الامتحانات ... تجين انتي كفايه انه محبوسين لاطلعه ولا سفره ... كلن مسافر ومستانس الا حنا ...
بل ...كلتني مايسوى سؤال ... اروح اسولف مع العنود ابرك لي من مقابل وجهش ...
وراحت وجلست عند العنود وقاموا يسولفون بعدها بشوي دخل عليهم اخوهم سعود قاموا يسلمون عليه ونطت ساره تسلم عليه لان سعود أحب اخوانها لها تحسه ابوها الثاني ..
يا مرحبا ترحيبة البدو لسهيل واعداد ما هبت سحايب مطرها
يا مرحبا يا ريحه الورد والهيل لا هبت النسمة وتطاير عطرها
كل ذي ترحيبه فيني يالسوري .... وقعد وقعدت جنبه السوري ... شلونك يبه ان شاء الله طيب وقامت تقهويه ... طيب يالسوري بشريني عنش نجحتي .. ايه اكيد بس خساره ماحد عبرني بهديه تجبر بخاطري ... افا وانا اخوش آآآآآآآآآآآآمري تدللي ويش تبين هديتش ... انا ماآآآآآآآآبي غير السفر تمللنا نبي نسافر الله يخليك تكفى ... ياسعود ترى تكفى تهز رجال ... سعود قام يضحك على اخته ... نطت لهم شيوخ ايه والله متى آآآآآآخر مره سافرنا فيها جميع مع عماني ...
وانتي يالعنود ماتبين السفر مثلهم ...
تسلم يالغالي انا معكم ان رحتوا رحت وان قعدتوا قعدت ... اهم شيء جمعتكم حولي ....
ولا اخليها في خاطركم دامكم تبون السفر سفرتكم هاااااه وشرايكم ... بشاور عماني والعيال ... بس ماقلتوا لي وين تبون تروحون ..
نطت السوري وشيوخ كل وحده منهم تبي تقول وين تبي تروح بس السوري صكت فم شيوخ وقالت الإمارات ... نبي نروح الإمارات الله يخليك رفيقاتي يمدحون مجمعاتها .... وشيوخ اختنقت من كتمة السوري لها ... عضت يدها علشان تفكها
وجع بغيتي تذبحيني ... عادني ماعشت حياتي حسبي الله عليش ..
سعود سلامااااااااااااااات ياشيخه .. وانتي وين تبين تروحين ....
انا ابي آآآآآآآآآآآآآآآآآآآآآآآآآآآآآآآآآآآروح ...مممممممممممممممم وين ياشيوخ .. التفتت عليها السوري تتهامس معها شيوخ فديتش قولي الإمارات ..
شيخه : شنو تعطيني
السوري : اللي تبين بس قولي الإمارات تكفين
شيخه : يله كسرتي خاطري ... خلاص ياسعود نبي الإمارات
السوري ياسلااااااااااااااااااااااااااااااااااااااااااااااااااام باروح اكلم بدورتي اعلمها آخر الاخبار ..... وراحت منهم والتفت سعود على خواته وين ابوي وخالتي واخواني
ماشوفهم .. امي عند بيت عمتي منيره ... وابوي مع عمي هو اخواني في المجلس
سعود : يله اترخص باآآآآآآآروح لهم تآآآمرون على شي
البنات : تسلم خيرك سابق
............................................................ .........................................
في بيت العمه منيره :
يابنيتي الى متى بتظلين كذا ... صارلش شهرين ولا فيه على لسانش إلا الطلاق
سعود مسوي شيء ضاربش .. قايلش شيء يبنيتي علميني
لا يمه بس خلاص وقف النصيب بينا
مايصير كذا من والطريق ... الله يهداش بس وعيالش تشردينهم بينكم
عيالي عندي وهو متى مابغاهم يجي يشوفهم ...
التفتت منيره على هند زوجة سلطان تبيها تتدخل .. هند كلمت منيره ممكن تخليني معها
مايحتاج يمه مافيه كلام ينخش عنش ... السالفه ومافيها اني مابي سعود ولا هو يبيني فليش ندخل في متاهات واجد والحل قدامنا بس اني متحسفه اني ماطلبته من زمان قبل لااجيب العيال علشان مايضيعون بينا ... ادري ان الطلاق يشتت العليله بس شنسوي هذا نصيبنا .. هذا كل الكلام اللي عندي ولا عندي غيره ..
والتفتت على هند زوجة عمها .... بس انتي كلمي عمي وبلغيه بكلامي ..
هند : بس ياهيا اناااااااااا
خالتي هند إذا تبين تساعديني صدق كلمي عمي بخصوص وظيفتي ابي ارجع لها
خلاص بأقول لعمش مع انه قالي احاول فيش مره ثانيه ...
تسلمين بس مافيه شيء بغير كلامي .... وصدقيني انا مقتنعه باللي اسويه ..
انتهينا بلاسبب.. لا تسألني عن سبب
مافيه سبب.. لا تعاتبني ولا تطري عتب..
انت ياللي من عرفتك ما لقيت الا التعب..
اعترف لك مانسيتك ماقدرت القى للنسيان درب..
آآآه من الفرقى فرقاك صعب..
بس لكن.. لو تمر سنين على أيام البعد
وما أنام الليل وما يرخى هدب
ماتراجع عن قراريللأبد..
روووح ابتعد.. بس خلاص
انتهينا..
(منقول)
............................................................ .............................
وفي مجلس الرياجيل :
دخل عليهم فيصل يبي يسلم على ابوه تفاجأ بالكل قدامه اول مادخل سلم عليهم
السلام عليكم ... كل اللي في المجلس تفاجأ بجيته وقاموا يرحبون به .. سلم عليهم وتحفاهم وسلم على راس ابوه وعمانه .. وجلس جنب ابوه
نايف : الحمد لله على السلامه بشرني عنك ... نجحت اربك خلصت من غربتك
فيصل : الحمد لله خلصت منهم وودعت ديرتهم الله لايردني لها وانا سالم مابغيت
عمه سلطان : مبرووووووك التخرج وعقبال عرسك
فيصل : الله يبارك فيك ياعمي ... العرس بنخليه عقب ماالقى وظيفه واكون نفسي وعقبها العرس بإذن الله ..
عمه مشعل : على خير ان شاء الله ... عجل ياجماعه الخير عشاء فيصل عندي بكره الحاضر يعلم الغايب
فيصل : خيرك سابق ياعمي بس انا ماابي اثقل عليكم
مشعل : انا حلفت ... قول تم وانا عمك
فيصل : تم ولايصير خاطرك الا طيب وقعد يكمل سوالفه مع اخوانه وعيال عمه الين ماسمع عمه سلطان يتكلم ....
اقول ياسعود ملك نيه ترجع بنت عمتك
سعود : والله يايبه هي اللي ماتبي ترجع وانا ماطردتها هي اللي طلعت ومتى ماهدت رجعتها .
الله يلعن ابليس .. انت ماتقول لي ويش سالفتكم لاهي تبي تتكلم ولا انت
يابوك علمنا علشان نساعدك عاجبك وضع عيالك مشردين بينك وبينها
سعود : لا يبه ماهوب عاجبني .. بس انت تطمن مردنا متصالحين .. لاتتضايق
فيصل يلتفت على اخوه ويسأله فيه شي صاير رد عليه سعود سوالف عاديه بيتكلمون فيها بعدين وغير السالفه .... وشوي يدخل عليهم سعود ولد سلطان ... السلام عليكم .. وعليكم السلام حياك يابو سلطان تعال جنبي وانا عمك ..
سعود : الله يحييك ويبقيك ياعمي بشرني عنك وشلون صحتك .. وشلونك يبه وشلونك الحين .
سلطان : طيب طاب حالك .. هااااااااه ويش سويت بموضوعي
سعود : لا خلاص تدبري كل شي .. موعدك محدد عقب شهر وهذا اقرب موعد لقيته .. بس لازم تبلغ العيال .. علشان يكونون على بينه
سلطان : عجل خل نقولهم الحين مع عيال عمك .. اخواني نايف ومشعل يدروون
سعود : تامر يبه .. تحنحن سعود اقول ياعيال فيه موضوع باقوله لكم ..
محمد : وشعندك ياسعود .. شيء بخصوص شغلك ..
سعود : لا الشغل ماشي ومافيه شي ...
تركي وفهد : زين عن شنو
سعود : ابوي من فتره تعب .. قاطعوه العيال والتفتوا على ابوهم ... ابوي وشفيه ... تطمنوا ياعيال مافيني شي بس القلب تعبان شوي وقلت لسعود يححد لي موعد علشان اسوي العمليه .. لاتخافون كلها شريان متسكر والعالم كلهم يسوون العمليه ذي وتنجح ...
سعود : علشان كذا قلنا لكم على اساس يكون عندكم خبر ... والحين انا حددت موعد لأبوي بعد شهر وانا بآآآروح معه باعتبار اني الكبير وماعندي مسؤليات وانتم مشغولين ... محمد قاطع سعود وقاله انا ماعندي التزامات برووووح معك
لااااااااااااااا انت مكان ابوي بالشركه ... والتفت على اخوانه الباقين وانتم بعد مالكم حاجة انت ياتركي ملزوم ببيتك وعيالك وخلك عون لمحمد وفهد ملزوم بجامعته ... وزايد وظيفته ماسكينه ووووو مشع...هنا تكلم مشعل انا فاضي بروووح معك ولا تمانع
سعود : خلاص تم ...
نايف : وانا معكم ماني بمرتاح وانا هنا ماادري بشي واخوي مشعل يمسك الشركه مع العيال ...
سعود : عجل خلاص السفر ان شاء الله بعد اسبوعين يعني لما ترجعون من الإمارات بإذن الله ...
الإمارات من اللي بيسافر ...
سعود : هذي الله يسلمكم هديه السوري بنجاحها طلبتني ولبيتها قلت لها بآآآآشور الربوع هااااه ويش قلتم
العمام : والله ماهي بشينه نـتــخـاوا على الطريق والعيال معنا نتفرج ونغير جو..
سعود : عجل جهزوا انفسكم وانا اسمحوا لي ماني مسافر معكم عندي شوية اشغال .. إذا خلصتها لحقتكم ...
وكلن انشغل بالسوالف والتخطيط للسفر واتفقوا تكون ثلاث اسابيع بين الإمارات وفي الأخير يزورون مكة يعتمرون فيها ............
نهاية الفصل الرابع
ولنا لقاء جديد مع الفصل الخامس واحداث طريفه مسليه ......
|
20-08-10, 10:35 PM
جديد مواضيع قسم الارشيف
العرض العادي
