"في الرياض"
يطرق باب بيت أبناء العم, تأتي الخادمة وتفتح الباب, تندفع نواعم ويتبعها سعد وتركي
تركي: ياولد...ياولد...يا بنت..تربيت تربيت..
سعد: ياولد...أبو عزوز ...ياهوه وينكم...؟
_يطل أبو عبدالعزيز من خلف الدرج من بين أغصان أشجار الزينة وينادي_:
بذيا... تعال...مالمك أحد... بس ترى العيال معي...
خل نواعم تروح تخب البنات يخلصن علينا... بنروح نلقى لنا مكانن زين...
تركي: أروح ياعم؟
فيصل: إيه... بس لامن تشوت لا تلومن...ههههه... تركي...أشوف الكوبرا..
إخس من مسويه لك...ههههههههه
تركي: ليه مزبوطة...أنا...
فيصل: تخسى...أخبرك عجزت تزبطه... وهذي سكبة..
عبدالمجيد: لاتصير نواعم...خبري بك أنت وأبوك منتب راعين هالحركات...
تركي: الله ياخذكم جن...ماتخلون شي...ولد الجيران ...وأنا بطلع شفته عند الباب...
عاد ناديته وقلت إسكب لي هالغترة ... خويك عليمي...ههههههه
سعد: وأنت مبسوط إنك عليمي...فشلتنا...
تركي: عادي..عادي يبه... ذولا عماني وعيالهم...
وبعدين تلقاهم كلهم مايعرفون يربطون الكرفته...
ذاك المرة انا قعدت اعلم عزوز يوم جاء يسافر....
سلمان: المطوع ولد جيرانكم ماغيره؟!!
تركي: ومن أعرف من الجيران غيره... ما أعرف إلا سواويقهم....
أبو عبدالعزيز: مايصير يا وليدي.. لازم تعرف الجيران...
سعد: سبحان اللي يطلع الحي من الميت...
تصدقون إن أبو هالولد عمري ما شفته بالمسجد بأي وقت...
وله أخو الله لا يبلانا... والله لامن صار هو وربعه بالحارة...أنادي الحارس يقفل البيبان بالمفاتيح...
سلمان: وراه يا عم ...حراميه!! ماعندهم فلوس...
سعد: ماضيعهم إلا هالفلوس يكحون دراهم...مير الله لا يبلانا أخنث...
تركي: أعوذ بالله يبه...حرام عليك هذا جارك.. ولازم تستر عليهم...
ترا مايصير...كلامك ذا مب سهل... ولو أحد تكلم بي كذا مارضيت..
سعد: لامن صرت زيه...خلهم يتكلمون زي ما يبون...
فيصل: لا يا سعد...كلام تركي صحيح...أعراض الناس مب لعبه...
تركي: مجيد ...يا لهم بنت...تهبل... لاتفوتك...
فيصل: هــــــــــــــــــــــو !!! وين المواعظ اللي تو!!
تركي: طيب وش أسوي هي تطلع كاشفة... وتوقف عند البوابة بدون عباة حتى..
لا وتسألن تقول لي...أنت سواق ذولا...
لعنه تلعنه... أنا سواق...
مجيد: ههههههههههههههههههههههههههههههههههههههه
عنده نظر...
تركي: وشو!!
مجيد: لا أقول... يمكن تحسبك المرافق السوري...ولا التركي الطباخ...كلش جايز..
ام عبد الله_تنزل بالدرج وخلفها البنات وأم عبدالعزيز_:
من اللي يلعن ذا؟
تركي: مب أحد...وشلونتس يمه ترا تأخرنا...
أم عبدالله: اللي يلعن ترقى لعنته للسماء ولامن ما إستحق الملعون اللعنه رجعت للاعن...
مير وين أمك؟ حتى بالعيد ما تنشاف...؟
سعد: عنده مناوبه... بتجي اليوم بالليل...
أم عبدالله: وش عاد.. فرحة العيد بالنهار.. يقطعه من شغله اللي تحرم عياله فرحة العيد معه...
الحين الله لا يقلب روسكم... محتاجين كم ألف تاخذهن من الشغل...
والله ماتسوى جلسته مع عياله...مير قلوبن عليها أقفالها...
أم عبد العزيز: خالتي يالله هذا السيارة بالباب...خلينا نطلع...
نواعم_تهمس في إذن تركي وهي خارجة_: كل يوم بنسمع هالموال...
تركي_بصوت واضح_: كلامها صح...ما...
نواعم:أص... فضحتنا...
_يهمس تركي_: ما قالت شي غلط...
حتى العيد مانشوفها... مب ذي حالة...
*********
"في القصيم"
يدخل أحد الأطفال لغرفة البنات ويصرخ:
إلحقوا بدو يذبحون الذبايح...
_تقافزن البنات عدا شوق وليلى ونرجس, أخذن الشراشف وتغطين بها وأخذن يطللن بالساحة المقابلة للمزرعة اللتي تتم بها عملية الذبح...
ليلى: ودي أشوفهم ...بس أخاف...ليه أنتم ماتحبون؟
شوق: أحسن شي بالعيد الذبح.. بس أنا لامن شفت الدم الكثير دخت...
نرجس: أنا أخاف...الصوت اللي يطلع لامن جت تطلع روحه ...لامن بدا يقول كخخ.. يرعبن كلي...ما أنام بالليل..
_تدخل نجلاء وتبعثر حقيبة عذبة وتخرج كاميرا فيديو وتغادر راكضة ثم تلتفت
وتعود لليلى قائلة_:
ليووووووووووووووووووول... لايفوتس... شي...ولا فيلم تاريخي...
قومي ترا يمكن مانجي نعيد هنا مرتن ثانية....
قومي ...قوووووووووومي_وتشدها بيدها فتتبعها ليلى_
نرجس: يا أختي احب هالبنت... فله...
شوق: بس عذبة تكانة أكثر... ومبين على عذبة إن قلبه طيب أكثر..
هذي الشر من عيونه يطلع...
نرجس: لا تغتابين البنت...
شوق: مو قصدي شر..شر.. لا... الشقاوة... واللعب....ترحل ديرة...
إلا ما لاحظتي شي...
نرجس: لا.. وشو..
شوق: عذبة... مبسوطة...غير يوم نشوفه بالعزاء...
نرجس: يا ملحتس...أكيد عزاء...بتضحك...
شوق: لا مب قصدي... يوم يموت أخوه وأمه...ما صاحت كثير...
بس بتل وجهه فيه الحزن مرسوم...لكن بعد ماشفته بعزاء الشايب..
قلت الله يعين وش بتسوي بعدين.. لكن وجهه أحسن من أول...
نرجس: ................مادري بس كن بوجهه شي مادري وشو...مريضة..
شوق: لا..المسؤولية...تحملت المسؤولية...شي طبيعي..
بس والله إني انبسط لامن شفته تنكت وتضحك...
أحسه مسكينه ما ورا ما شافت...إن شاء الله هذا نصيبه من الهم...
نرجس: شفتي خطيبه؟
شوق: إيه شفته بالعزاء... دخل المطبخ ويصارخ" بسرعة القهاوي تأخرت...
ست شغالات وطباختين ولا تنفعن.."ويلج ...شكله حار ... بس مزيون..
نرجس: يووووووووووه...احلى واحد..تذكرين يوم تدخل سيارتنا يوم كانوا كلهم واقفين يستقبلوننا..
قزيتهم قز... واحد واحد...
شوق: وأنا أشوفتس لزقتي بالدريشة...رحمة إنه مضلله...ولا قالوا ذي ماعمره شافت رجال..
نرجس: يختي .. ودي آخذ منهم... وناااااااسة...
شوق: لا... ماتدرين عنهم... لاتغرتس الأشكال... الله من أبو أحد تحسينه مبسوط
وهو اتعس إنسان...
نرجوسه...وصفي لي إياهم...
نرجس: أبو عبدالعزيز...عادي...ماعليه طويل شوي.. وله عوارض..ومشيب شوي..
سعد... أسمر... حنطي.. له كرش..عيونه مدورة وله شارب... وشكله وديع..
فيصل .. وما ادراك ما فيصل... وش هالطول... وش العرض..جسم شي..
عيونه لوزية...مثل عيووون مين...مثل عيون حصة عمتي...
وهدب.. وعوارض..وبرونزي... بس أحسه غلط يصير مع عذبة...
شوق: ليه؟
نرجس: طويل مرة... وعذبة تميل للقصر إما كانت قصيرة...
شوق: عادي... لا تكونين حاطتن عينتس عليه...
نرجس:لا!!
ربي يعوضه عن هالدب..مشاريوه
شوق: الدب مزيون...تقول نجلاء...مشاري وبندر وفيصل أجمل رجالنا...
وليلى ومنى بنت خالته وخالته فاتن أحلى حريمنا...
إيه ومن شفتي شفتي مجيد..؟..دايم تتكلم به نجلاء..
نرجس: إيه مجيد.. مب طويل مرة... وابيض ويلبس نظارات,
وسمين شوي, وحليو...مب مرة...له سكسوكة
أما بدعتهم..تركي...مادري منين طالع...
شوق: ليه شين قوه..؟
نرجس: لا... بنيه والسلام... ههههههه ... أبيض, وجسمه متوسط,
والشارب صغنن والوجه اللي تقل مليص.. وعيونه ووقفته.. بنيه والسلام..
شوق: إيه يقول محمد عنه إنه ماكنه قصيمي...
نرجس: أما عيال خال البنات... شفتهم ثلاثتهم واقفين جميع جنب أبوهم...
شوق: يقولن إن فاتن وخواته كأنه فيهم عرق سوري...
عشان أبوهن الظاهر سوري مادري عايش بسوريا...
نرجس: إيه فاتن الله يرحمه مبين شوي بلهجته..تذكرين كلامه..
بس فاتن لا... وخالهم شايب وش حليله...عادي لاهوب أبيض ولادلته سوريا...
مير ولده بندر المزيون بس مخربه إنه أبيض.. أبيض قوة...هههههه كنه عذبة ...
إيه خلين أكمل لتس قبل ما يجون... وسلمان..أظنه سلمان...عصل مصل..
ماتشتهين تناظرين بوجهه...حامت تسبدي...
أنتي ما شفتيهم؟
شوق: لا... والله أنا طارت عيوني بالبيت.. والحدايق المقسمة,
والخيام, والجلسات, ومير يوم لفت السيارة لقسم الحريم, تنحت...
مادريت إن بيتهم كذا ..أحسب اللي يجون بالمسلسلات نصابين...
نرجس: الغريبة إنهم مستانسين بذا... إيه صح ما كد رحتي لمهم..
أكيد من اليوم ورايح زيارتهم من أهم مشاوير الرياض..
شوق: بسألتس سؤال واحد ممكن!!
نرجس: تفضلي...
شوق: من علمتس بأساميهم...؟
نرجس: ههههههههههههههه.... صورتهم بجوال أمي...
ووريتهم أخوي عبود... وعلمن كل واحد من يصير...
شوق: ورين إياهم!!
نرجس: هههههه...تبين يذبحونن...مسحته...أصلا سألت عبودي أول مادخلت...
قبل لا تطلب أمي جواله....
شوق: والله يا أنتي داهيه...بس مو مبين عليتس!!
******
"في الساحة المقابلة للمزرعة"
يطللن البنات على الرجال وهم يذبحون الأضاحي...
يمسك خالد _ إبن العمة_ بالخروف وينحني الخال ويذكيه, فيما
بقية الأبناء السبعة والأحفاد ينشغلون بسلخ العدد الكبير من الذبائح...
نجلاء: خالي... ودي أمسكه...
_يلتفت خالد ويصرخ ليسمع صوته_:
فيه عمال.... لو ما فيه عمال خليتس تذبحين معنا...
_تقرص عذبة نجلاء هامسة_أص... إستحي على وجهتس...
الخال: ميخالف... تعالي... فلاح... سيد...ولي...روحوا شوي وبناديكم...
خالد: يبه...!!
الخال: وشي نجلاء...صغيره...
خالد: بس ...عذبة...عذبة...
_إنتفضت عذبة وإرتعبت وتلعثمت فلم ترد_
وهمست لليلى: وش يبي..أستحي أرد...
ليلى: نعم... وش تبي..؟
خالد: أنتي ليلى منتب عذبة...عذبة ميخالف تذبح...
عذبة: لا... أهله ما يرضون ....
نجلاء_تهمس_: لاتكذبين... وش دراهم عن...
عادي البدويات هن اللي يسلخن...عماتي يذبحن هن...بروح..
عذبة: لا...كلمة تردينه مب أزين لتس...
نجلاء: خلاص ياخال... مابي..
الخال_وهو منهمك بسحب الذبيحة_:
طيب....
_يحضرخالد الخروف التالي ويسحبه الخال نحو البنات...هربن جميعهن
عدا عذبة ونجلاء وحصة وهيلة, إلتفتت عذبة فرأت ليلى تفر للداخل بلا غطاء...
وخالد يتابع الموقف وهو يضحك بقوة..._
الخال: تعالي يا نجلاء... تعالي...
مب على كيف عذيب...أنا خالتس قبل لاتصير هي بنت خالتس...
تعالي...تعالي بذا... وخر يا خالد وقف بذا إيه .. تعالي...
نجلاء: ...لا...ما أقدر...
الخال: أقول تجين ولا أقوم أسحبتس أنا...
نجلاء: أخاف أوسخ ملابسي...
الخال: مب مشكلة الملابس...حصة تغسلن..موب يا حصة...
حصة: إيه...أنا اغسلهن...
عذبة: روحي يا نجلاء بس لا تفتشين....
الخال: وانتي يا عذيب إفتشي ترا كل اللي بذا أخوانتس...وعيالهم
مرضعتس المرحومة قبل موته بشهر...
سحبت حصة الشرشف عن رأس عذبة فإلتفت جميع الشباب...
تغير وجه عذبة وإحمر فدخلت بسرعة...
فيما إنكبت نجلاء تساعد الخال في ذبح الذبيحة...
*********
"في الغرفة"
دخلت عذبة تركض...وإرتمت بحجر ليلى
ليلى: وش فيك بعد!! لحقك الخروف؟
عذبة: يا خزياه...أوريه...حصوه الحمارة...
ليلى: ليه...
نرجس: وش سوت لتس؟
عذبة: سحبت شرشفي...كلهم إلتفتوا...فشلت...
ليلى: مير هم محارمك...أهون مني أنا اللي هجيت بلا شرشف...
ياربيه...والله بموت من الفشله..
عذبة: وخالد ذا أنا شكلي بموته...
شوق: وش سوا عمي...
عذبة: عليه ضحكه ما أدري وش تبي...
ليلى: الحين هو ولد العمة ولا ولد خالي...وجعتوا روسنا ... شلون يصير عمكم...
وولد عمتكم جميع...
عذبة: ليلى... خالتي يوم ماتت زوجة خالي كانت هي ما تجيب عيال...
أخذت حصة وخالد...هم كانوا صغار... خالد عمره أضن ثلاث سنين..
وحصة عمره سته شهور... وبعدين ربتهم عنده ببيته, وبعدين بعد ما توفى زوجه
رجعت لبيت أخوه.. وصارت هي بمكان أمهم...
ليلى: طيب.... زوجته الثانيه مازعلت...؟
عذبة: هـــــــــو!! وش عليتس منه زعلت ولا لا...
نرجس: لا..مازعلت بالعكس...تعامل عمتي مثل أم زوجه,
وتعامل خالد وحصة زي اولاده...
تدرين إنه تضرب خالد بالنعلة لامن عيا يحل دروسه...
وتدرين يوم تهاوشت حصة مع الشغالة, قامت ولبست مجاوله
الشغالة تقول أخاف تسحر البنت....
ليلى: سبحان الله!! ربي ما يضيع أحد...
عذبة: إي والله ربي ما يضيع أحد..
_تدخل نجلاء وملابسها تغطت جميعها بالدم, وتحمل سكيناً , فصرخت_:
يااااااااااااااااع...وين الضحية الثانية...ليلى تعالي قبل لا أجي لتس...
_صرخت ليلى ولحقتها نجلاء ففرت للفناء وهناك إصطدمت بشيء
ضخم, فوقع عليها فخذي خروف مسلوخان, ووقف خالد وأعطاها ظهره,
وأشر للشباب بأن يقفوا_
ليلى: يممممممممممممممممممممممممممممممممممممه!!
عذبة....عذبة... آآآآآآآآآآآآآآآآآآآآآآآآآآآآآآآآآآآآآآآآى
وشو ذا ... يمه...من انت...؟
وشو ...عذبة...تعالي..
خالد_ يصرخ_:
عمى...ماتشوفين...طويلان..إنقلعي من داخل بوه العيال وراي...
قومي خلين آخذ اللحم...
ليلى_وهي تبكي_: عذبة ..نجلاء..
وع..يمه ..وخر اللحم يا حمار..
خالد_بغضب_: قومي قام طحلتس...
الشباب معهم ثقيل... تقلعي منداخل...عذبة!!
_قدمت عذبة تركض وتتبعها نجلاء متغطية_
عذبة: بسم عليتس...هبلته...
نجلاء إمسكي..إمسكي..
نجلاء: وأنت الحين ليش ماتشيله؟
خالد_وهو مدير وجهه عنها_: بلاه زين لبسه... صدره مفتوح!!
ليلى: إنطم...
نجلاء: أص...واعيباه....إمسك الخروف..ياخروف.._وهي تمد فخذي الخروف لخالد_
خالد: ليتنا من حجنا سالمين!! تعلمه الأدب وتقلل أدبه..
عذبة: معليش... طول بالك.. لا تواخذهن..
خالد: خليهن يتقلعن بسرعة... تعالوا يا شباب سلموا على عمتكم..
عذبة: وجع!! خالد!! وع إيدينكم كله دم..
خالد: أحسن شي للي يتغلون!!
_ليلى دخلت غرفة البنات ونجلاء تعضد لها ,
فلما جلست وهي تولول حرجاً مما حدث مع خالد وقفت نجلاء _
وقالت: يااااااااااااااااع يا ضحيتي التالية..
_ صرخت ليلى من جديد, والبنات لم يستطعن التحرك او التدخل
بسبب نوبة الضحك الهيسترية_
*********
"في المخيم"
الضيوف يتوافدون, والخيام موزعة بشكل مرتب بحيث كل عائلة من الضيوف لها
خيمة مستقلة, لها باب يخرج على الساحة الداخلية والمخصصة للنساء, وباب آخر يخرج خارجاً
ليدخل ليكون للرجال, وخيمتان كبيرتان جداً للنساء في أول الساحة,
وفي آخر الساحة خيمة بمثل حجمهما خصصت لتقديم الطعام,
وثلاث خيام كبيرة للرجال تبعد قليلاً عن النسساءوتوجد خيمة متوسطة تقريباً
في مكان إستراتيجي, بقربها من خيام المخصصة لإعداد الطعام,
ولها أربعة أبواب لساحة مستقلة, تحيط بها كثبان رملية ناعمة,
وأربعة ابواب للساحة النساء.. إستولى الشباب على هذه الخيمة..
وهذا ما اثار غضب البنات...
نورة: ............عيد شين...مابوه عمي ولا سعود ولا خالة فاتن...
ولا بناتهم بعد!!
وكملت بالمخيم...الحين ليش ياخذون الخيمة ذي عليهم قاصر خيام...!!
نجود: أقول نورة إمشي معي للكرفان.. بغير ملابسي إنحشرت...
نواعم: بروح معكن...أنا ودي ادري هذولا الناس اللي ما يتذكرون إنهم يعرفوننا
إلا لامن جاء المخيم...والله زهق... ليش ما يقتصر على خوالي اللي بالقصيم..
الشيبان الأربعة وأحفادهم.. واللي بالشرقية..العجوز وعيالها..
وعيال عماني اللي بالرياض...الشايبين وأحفادهم...
بس كلن ينسف...ما أحبها ذي...
نورة: وش عليتس منهم...هم على راستس... وبعدين اللي تقولينهم هم اللي جايين
حريمهم... وأما البقية الباقية رجال وشباب وعيال... وش علينا منهم..
نواعم: إيه لو ماكانوا كثيرين ما إستقووا...
نجود: لا... ترا بعد العيد فيه زواجات كثيرة ...أتوقع مب قاعد إلا حنا وأهل الشمال...
نواعم: اهل الشمال بيجون!!!
نورة: إيه عمتنا...بتجي هي وبناته.. وإثنين من عياله وعوايلهم...
نواعم: وش الطاري!! خابرته تقول إنه ما يحصل لهم...بعيدين..
نجود: تحسفت عقب ما مات عمي..دايم كان يعزمه...وهي تعذر..
بس الحين تحسفت وبتجي...
نورة: ياحليلهم بناته... ماتقولين عجز... والله إنهن أخف دم من البنات...
إلا متى بيجون عذيب وخواته...
نواعم: كلمت عذبة تقول يمكن بعد يومين...
نورة: يووووووووووه طويلة...!!
**********
"في الشركة"
يدخل فيصل مسرعاً لمكتب المحاسب فيقف المحاسب ويأخذ منه الأوراق ..
فيصل: الحين قسم المحاسبة خلص كل المطلوب منه؟
المحاسب: آه.. ياسيدي كله تمام التمام.. والشباب اللي جبتوهم جديد..
جدعان وشغيلة... بس لو بتديهم حوافز!!
فيصل: وانت وش دخلك ؟ ممكن شوي جوالك ..
بدق على جوالي مادري وين حطيته..
المحاسب: من عنيا اهووووه يا سيدي..
_نظر فيصل للسجل ثم برزت عيناه, وصرخ_
ليش تتصل على عذبة!!!؟
المحاسب: لأ.. ما إتصلت بعزبة هانم..والله..
فيصل: لاتكذب..هذا رقمه... أمس ...
ماشاء الله متصله عليك هي بعد.. ماشاء الله رسالة منها..
" شكرا يا مصطفى...ولكني أريد المزيد.."
المحاسب: والله ما فيش...
_يمسك فيصل المحاسب بتلابيبه, ويضرب به بالجدار بعنف ويصرخ_:
يا رجال تقول لي وش تبي ... يا مقتول اليوم...
المحاسب: ياسيدي... مافيش...
فيصل: إسمع !! هذي زوجتي... إذا ما قلت لي الآن وش تبي بك..
بدون لف ولا دوران... ولا برميك من هالشباك...
_وسحبه للنافذة التي تعلو خمسة طوابق, وأخرج رأسه _
المحاسب: حاضر ياسيدي... حاضر...
فيصل: تقول كل شي... و لو تكذب بكلمة... بيتم عيالك...
ولو تهج لآخر الدنيا... فااااااهم
المحاسب: كل حاجة... والله العظيم..كل حاجة... بئول كل حاجة!!
*******
,,,,,,,,,,,,,,,,,,,,,,,,,,,,,,,,,,,,,,,,,,,,,,,
"الجزء الرابع عشر"
أحس الدم بدا يغلي بعروقي, ماتخيلت أبداً إني أبلقى رقمه بجوال رجل!!
وأعيد قراية الرقم..إي والله هو جوال عذبة.. رفعت راسي له وودي أذبحه بيدي ذي..
الله ياخذه... يا انا أجرمت فيه... يحسبن غبي بصدقه... يقول مافي شي..
مايدري إنه بنت عمي وخطيبتي... لو عندي رشاش فضيته على صدره..
ومير يوم قريت الرسالة خلاص... إسودت الدنيا بوجهي..عذبة وش عنده به..
مسكته وطلعته من الدريشة وهددته, خليته يشوف الموت عشان ما يكذب علي..
صارت عذيب موكلته يدور علي شي يودين بستين داهيه على قولته...
تبي شي يدينن.. ويبعدن عن وجهه... عذبة تبي تسجنن عشان تعيش..
وصل به حب الإنتقام لهدرجة!! آخر ما توقعته منه...
صح..هي عنيدة.. قوية.. شرسة.. بس رحوم..
ليش تبي تدمرن...ليه وصل به الجنون لهدرجة!!
عبدالمجيد: عم!! مو معقولة بتنتقم منك..أنت ما سويت له شي..
فيصل: والله مادري... بس قهرتن بهالحركة... شبت تسبدي..
مجيد..!!
هذي مب سهله...مب سهله..
هه واللي تجرأت على التفكير بهالشي...
ممكن تتجرأ تسوي أكثر...صح..؟
..وبيده تسوي اكثر..
عبدالمجيد: فيصل... هونها وتهون... هالمصري يحب يبالغ..
وشو توديك بستين داهية...أكيد السالفة وما به..إنه تبي تطمئن على شغلها..
وبتعرف منهو الأمين من الحرامي...وبعدين من باب حركات الحريم..
مب هي تبي تتزوجك...أكيد تبي تتأكد من أمانتك...ولاهب لاقيتن عليك شي..
فيصل: لقت ... ولقت كثير..وخطير بعد...ممكن تدمرنا كلنا..
عبدالمجيد: عليك!!!
فبصل: لا..علي مالقت..بس ما يعوقه..بسيطة.... تخلق شي...
عبدالمجيد: ياشيخ!! وش دعوى... ماتسويه عذيب...والله لو حنا وين!!
فيصل: أنت ماتعرفه...عذبة حاقدة علي...
حاقدة... وهي الحين تلبس ثوب مب ثوبه...وكل يوم تصير أقوى من اللي قبله..
عذيب عمره ما آذت أحد... بس اللي فكرت بأذى قد هالأذى...
معناته إنه واصلة مرحلة متاخرة من الحقد...والإنتقام...
للأسف أعترف لك يا مجيد إني بديت أخاف منه..
عبدالمجيد: تخااااااااااااااااااف!!
لا... الموضوع صدقن لايعدو عن كونه تحاول تتاكد من سير العمل..
من حقه ياخي تنتبه لحلاله... ولا تنسى إنه أمانه عنده...
وسع صدرك وإعتبره مدير جديد...
ولا تنسى إن أغلب الشي له... واللي يدر ذهب مخليه عمي لبنته..
واللي الله بالخير مخليه لنا...
فلذلك تحمل ويمكن هذا بداية المشوار...يعني الله يعينك زوجتك بتصير ومديرتك..
فيصل: تخسى!!!
مابقى إلا فيصل تديره عذيب!!
والله لأكسر خشمه...أصلاً هي يبي له كم ضربه تعدل مزاجه...
عبدالمجيد: بتروح تلفعه!!!
فيصل: لا...هههههه... هذي ماتجي بالقوة...
هذي الضربة اللي ما تذبحه...تقويه..
تدري ساعات أقول من كثر ما دقته المصايب...صار به قوة غير طبيعية..
كل ضربة بدل ما تضعفه تقويه وتقويه..وبيجي يوم وبتدمرنا كلنا لو خليناه...
ولا واجهناه...وحاولنا نثنيه...
راسه يابس...
بس...هي مسكينه...مسكينه مرة...مرة..مرة..
تجي بالعاطفة...ألين له شوي وتركع لي...
عذبة تفتقد الحنان... أعطيه الحنان وآخذ اللي أبي...
عبدالمحيد: يوووووووووه... والله مافهمت عليك...
فيصل: بتفهم بعدين!!
بس خل فيصل يطبخ الموضوع على نار هاديه...
مجيد...تقول إنه تقول ماتبي تملك الحين...
عبدالمجيد: إيه سمعت أمي تقول إن خواته ضايقتن صدروهن عشان
جدهن, وماتبي تحسسهن بإنشغاله عنهن...
فيصل: والله مب سهله...
مير أنت بتروح للمخيم اليوم...؟
عبدالمجيد: إيه..تراهم يسألون عنكم...
وترى راشد وربعه جايين وجايبين معهم عدة الصيد...
بس مب مطولين... بيروحون بعد يومين...
فيصل: صيد!! أجل نخلي الشغل ونلحقكم...
بخليه بكبد سعد..هههههههه
**********
"في القصيم"
في المطبخ عذبة تخفق رغوة الكابتشينو, وحصة تغلي الحليب..
عذبة: توقعي من علمن أسوي الرغوة بالخلاط اليدوي؟
حصة: أمتس الله يرحمه...
عذبة: ههههههه أمي ماتعرف تطبخ أصلاً...
ماتدخل المطبخ...لا..أحد ثاني..
حصة: أمممممم بنت ولا ولد...
عذبة: ولد...
حصة: إممم ولد!! مشاري!!
عذبة: هه..لـ..لأ .. ماطولت معه عشان يعلمن...
سعود ... سعود اللي علمن شلون أسويه...
دخل من البر مرة وكان عندي إمتحان... وجاء يهايط..والله أنا أسنع منكن..
وأنا بفتح مقهى.. وأنا بسوي وأنا بقول..
بعدين قلت له وش السالفة..قال لي أعلمتس بشرط..
حصة: هذا مادتن له أمي سلك...كلش بشرط..
عذبة: أفا عليتس... وشرط إني أسوي أي أمر يأمر فيه..
وانا الملقوفة وافقت عشان أعرف وش سر المقهى والسنع..
وبعدين علمن إن واحد من الشباب سوى لهم ...
وعشان هو يبي أحد يسوي له فلازم يعمل الضجة, وتطيح على راسي..
حصة: أجل ما ذاكرتي..؟
عذبة: لا..مو المشكلة المذاكرة.. المشكلة الأوامر الجهنمية...
يلف بي كل المطبخ عشان يقول نحتاج نسكافيه...
حصة: وين شغالتكم؟
عذبة: الساعة وحدة!! مافيه أحد إلا أنا ونجلاء...
وسويته أخيراً... بعد ما وصلت السقف ملاخيطي..
وصار بالنهاية ثلاث أكواب كابتشينو...
عاد الله يرحمه قال لي لو نشريه من مقهى يوصل سعره عشرين ريال...
كل واحد يعني بيصير الحساب جميع ستين ريال...
وسويناو ما كلف عشرة ريال.!!
حصة: إي والله صادق...
عذبة: ماكلف عشرة ريال.... بس الصابون والجهد اللي تكلفنه الخدامات وهن ينظفن المطبخ عقبنا كلف أكثر من الستين!!
_تدخل نجلاء مسرعة ومعها هيلة_
نجلاء: بسرعة هاتن قطتكن...
عشرة... عشرة
حصة: وجع !! كل يوم عشرة حنا على بنك!!
نجلاء: لا..على مزرعة!!
عذبة ترى ناصر مر من هنا قبل شوي..أشك إنتس عرفتيه..
هيلة: صايرن لقسة...ما بين به إلا عيونه... يزرن تقل كشافات..
عذبة: بسم الله على أخوي إذكري ربتس!!
وشو لقسه!!
نجلاء: صايرن كله بني!! طين في طين...وجاي هو وكشرته يقول
الفلوس اللي معي ماينفعن غير العيال!!
ولا عنده نيه يقول أغير ملابسي...ماهمه إلا القروش..
هيلة: مشروع رجل اعمال ناجح!!
نجلاء: أي ناجح وهو آخذ من بوك عذبة خمس ميه...
وجايبه لم خالتي مها ويقول له أبي خمسة..عيو ياخذون ذي..
يقولون دبا...ماتنفع!!
والله كمخة أخوتس!!
حصة: ليته جاي لمي وانا أبدله الخمس ميه بخمسة!!
عذبة: وشلون وصل لبوكي ..أكيد فيه أحد نافشن شنطتي!!نجلاء!!
نجلاء: ....أقول ..هاتي العشرة يا حصة.. ولا مافيه بلع!!
هيلة: ترى أختس ليلى نيمه...بتدفعين عنه...أخاف تزعل زي أمس تقول ليش ما
قومتون ...أدفع معكم!!
عذبة: اليوم القطة لا تجمعونه..أنا بروح لامن طلعن الحريم..
وأتقضى للسهرة...خلوه علي..
هيلة: أقول إنجزي.. البنات بيعين...قبل أمس نفس العرض عرضته ليلى وعيو..
بس تعملين خير لو تتقضين أنتي..
فكة من لحلحة عمي خالد والعيال...
نجلاء: ترا الحريم يبن الزنجبيل بالحيالة...يقولون ما صار زنجبيل!!
حصة: إيه نسينا...عذبة شبي على الماء بسرعة..
نجلاء: عذبة.. حصة مافيه بلع!!
هيلة:إيه.. أول من يهجم على الكاكاو هالثنتين!!!!!
*********
"قبيل الشروق في المزرعة"
البنات يشربن القهوة , ويجلسن تحت النخيل الباسقة, الأجواء تميل للبرودة,
أصوات العصافير والحيوانات تثير شجون البعض فيما تخيف البعض الآخر...
نرجس: بناااااااااااااااات جيبن باقي الجالكسي وإخوانه....
هيلة: لا يا شيخة...قومي كسار...أنتي وليلى وشوق ماغير قاعدات, وحنا نكرف...
شوق: لا...والله أنا اللي فرشت بالحيالة ...لحالي قبل ما يذن الفجر...مخاطرة..
نرجس: معتس عمي خالد وعزوز والدحمي...كلهم كانوا بذا...
هيلة: ههههههه...مرتن ثانية لا تسوين نفستس مخاطرتن عشاننا...ليلى..
وش بتس تلفتين؟
ليلى: أنتم متأكدين إن البقر ماتجي هنا...والدجاجات يخافون منكم!!؟
خايفة تجي البقرة ..صوتها قريب....
حصة: ياااااااااااااااااااااااااااي... بسم الله عن بقرتنا منتس.....
_إلتفت فرأت عذبة تشيح بوجهها وتتأمل السماء, تلعب بخصلات شعرها,
إقتربت من عذبة وهمست_:
وش عنده عذيب ...ضايقن صدرتس من كلام المداوية...؟
عذبة: أي مداوية....؟
حصة: البدوية صديقة عمتي...صديقة أمتس...
عذبة: إيه اللي قالت لي انتي مبطونة...روحي للمستشفى يشوفون علّتس...؟
حصة: إيوووووووووووه...لايضيق صدرتس...قرق عجز...
عذبة: قلتي أنتي إنه مداوية...يعني طبيبة شعبية؟
حصة: إيه... بس مب شرط يكون كلامه صحيح...
لكن روحي سوي كشف أريح لتس..
عذبة: لا مبطونة ولاش... أصلا وجهي تعبان من الهم والمصايب اللي جت..
يعني بتسلم علي... مير الحمدلله... وين نجلاء؟
حصة: شوفيه هناك تحارش البقر...والله ياهي ماتخاف...
_تصرخ ليلى_:
كتكوووووووووووووووت....وخروه بعيد...يمه...
هيلة: يالطيف!!! عذيب ونهايته مع أختس...
تخاف من كتكوت...!!!
هش..
رح لأمك الدجاجة...
هذي الزرافة..._تحدث الكتكوت_
ليلى_بغضب_: أنا زرافة!!!
أوريك يا هيلوة يا خرتيت عصل على ما قالت نورة...
هيلة: ههههههه...مير نورة هذي فلة... ياحبي له ...
أيام العزاء إنبسطنا عليه...مفهيه..حين تصيح مع نجلاء وحينن تطنز...
قطعت مصراني...ليه ما جبتوه معكم؟
ليلى_بتأثر_: إيه يحق لتس ياهيلة...اللي يده بالماء مو مثل اللي يده بالنار..
لو كان أبوتس اللي مات مالتس خلق...حتى تسمعين شي...
ونورة لو تحس بربع اللي نحس به ما قعدت تنكت وحنا بقمة ألمنا...
_تصرخ نجلاء من بعيد_
عذوووووووووووب...متى بنروح لم المخيم؟؟
نورة تقول ملينا طفش...
عذبة: سلمي لي عليه وقولي تقول عذبة اليوم العصر إن شاء الله بالمخيم...
ليلى: عذبة!! مانبي نروح المخيم...وناسة هنا...خلينا نجلس..
عذبة: والله حبيبتي أنا مو لعبة عندتس...أنتي عارفة ليش خليت حجز بندر الحين...أقول؟
ليلى: يؤ...بندر حليل شوي ... كلمي قولي بأجل الحجز لاخر يوم بعطلة العيد..
عذبة: قولي والله..حليل شوي!!
حبيبتي الرجال مآخذ إجازة من شغله عشاننا ...
والله يا أني مأجلته...
عيب!!
*********
"في المخيم"
أقبلت سيارة البنات, وسيارة خلفها تحمل الأغراض, خرجت نورة تؤشر لهم بجانب الخيمة,
وحين رأتها نجلاء أخرجت رأسها من النافذة, قرصتها عذبة قائلة:
دخلي راستس...شوفي الملعب مليان شباب...ماتستحين!!
نجلاء: أي..عذبة تكفين لا تقبصين...أنتي حليلة إلا لامن قبصتي...
ليلى: يؤيؤيؤ...جو العشاق.. شوفوا فيصل ومجيد جو يضحكون!!
نجلاء: إيه وشوفي بعد وراهم راشد...تشوفينه زين!!
ليلى: من زين راشد...!!
عذبة: إسكتي يسكت عنتس...
_وقفت السيارة ووقف فيصل بجانب باب عذبة, فيما ذهب عبدالمجيد وراشد لينزلا الأغراض_
عذبة_همست_: وه وش يبي ذا...
ناصر: ياثلام...فيثل!! وينك رحنا للقصيم...ولعبت مع الخرفان...
فيصل: هلا والله نصوري... وينك..خليتنا!!
ناصر: عذبة وخري عن الباب أبنذل...وخري ثوي..
عذبة: طيب...إنزل...
_قفز ناصر على فيصل وضمه, وأخذ فيصل يرفعه عاليا ثم يقبله,
نزلت عذبة , وأخذت ترفع عبائتها على رأسها , ثم ضم فيصل ناصر وقال له وهو ينظر لعذبة بعيون مغرمة _:
نصوري المخيم ما ينفع بلاكم...
تو ما تنور...
ناصر: وثو حنا ثمث ولا لمبة.....
فيصل: لا...أنتم الغلا كله...
_أدارت عذبة ظهرها متوجهه للمخيم فقال فيصل_:
عذبة...شلونتس... زين تذكرتوا إن لكم أهل وناس يحبونكم ويبون العيد معكم..
العيد ماينفع بدون الغالين..
_تصرخ نجلاء_:أقول إنجزوا...خلاص..دارين إنك ولهت علينا..
بس وخر عن الباب...مانب نازله من عند الشباب....
عليهم قز...مادري وش يناظرون أول مرة يشوفون حريم ينزلن من سيارة...
فيصل: نجلووووووووووه...أص..عيب..
نجلاء: أقول ...فيصل نبي الخيمة حقت العيال..
فيصل: ولا حتى تحلم بيها..
نجلاء: هين يالهروشه أنا أوريكم...
******
تصل نجلاء لنورة ويأخذن بعضهن بالأحضان...
نورة: نجلاء حبيبتي...زماااااااااااااان ما شفتك...
نجلاء: نورة عنيا....أشتقت ليكي كتيـــــــــــــــــــر...
نورة: نجلاء...لازم ناخذ خيمتهم...قهرررررررررر...
ترى خيمتهم تتيح لنا اللعب بالدباب ليل نهار, وتتيح تشغيل الطق أثناء نوم العجز والشيبان..
وله فناء رائع جداً يتيح النوم تحت أشعة النجوم..وله...
نجلاء: بس..بس ... لاتشبين تسبدي...شكلهم شياطين..
كان عندي أمل بفيصل بس طلع جلف!!
عذبة: بعذره...والله من زين الأسلوب..لو كان بيوافق هون عشان أسلوبتس العذب..
نورة: هلا والله عذبة!! شلونتس..عساتس من عواده..
نجلاء: ليه..؟ عشاني قطعت اللحظات الغرامية!!
عذبة: هههههه..أي غرامية وأي بطيخ..
تدرين يا نجول إنتس دايم تفكينن من أزمات...
نجلاء:طيب وشلون ناخذ الخيمة؟
عذبة: إسمعي أنتي منتب قادرتن على الرجال...
فلذلك حاولي تقوين أحد يقواهم!!
نورة: هــــــــــــــــــو!!!شلون ذي!!
عذبة: إسمعن...من اللي يقوى الرجال بهالمخيم!!
نورة: أممممممممممممممم أمي نورة...!!
نجلاء: ياخطيرة يا عذيب!!
نورة: وأنا أقول ماله إلا رجاله..قصدي حريمه!!
قوووووووووه نقول له...
نجلاء: لا...إصبري أول نساحره وبعدين نحرش بينهم...
أما نجي مباشرة أخاف يقوننا...
عذبة: كفـــــــــــــــــــــــــــــو!!!
*******
"في خيمة النساء الكبرى"
أم عبدالله_تتحدث بالجوال_: إيه..قل لهم ترى المحمد والعلي والعزيز
بيروحون ... لا تكثرون العشيات ويكبن...إيه يا وليدي قدروا النعم!!
لا...راحو.. كل العبيد والدريحم أمس...إيه عشان هالعروس...
محمد العلي بيعرس باتسر..وخالد الدريحم عرسهم بعد أسبوع..
بأمان الله يا وليدي..بعدي والله ...بس لاتنسى..هاه!!
تدخل نجلاء تتبعها نورة وتنادي بصوت عالي منذ دخلت الباب..:
عمتي نووووووووووورة...عمتي نوووووووووورة...
أم عبد الله: هلا والله يابنيتي..جيتوا؟
نجلاء: عمه ولهت عليتس..._وتضمها بقوة وتقبل رأسها ويدها_
والله العيد بلاتس ما ينفع...
تخيلي عمه...حلبت البقرة, ولحقت الدجاج ووطيت كتكوته وطلعت عيونه مسكين..
وتشعمطت على النخلة.. وسويت كل شي ممنوع ببيتنا..ومع كذا يظل العيد معتس..غير...
أم عبدالله: هـــــــــــــــــــــــــو!!
نجلاء: مب مصدقتن عمه!!
أم عبدالله: لا يا بنيتي...مصدقتس... بس قالت لي عذبة إنهم مايشوفن إلا كشتس
طالعتن للمزرعة وداخلتن للحمام...ومستانسة!!
نجلاء: إيه عمه...أنا أقعد بالمزرعة لأني حبيته من كثر ما سولفتي
عن أيام طفولتس به...وبعدين هه عمه ذكرتس..خوذي..
أم عبدالله: مهفه!!! منين أطلعتيه ذي...
نجلاء: أخذته من خالتي خصيصا لتس...عشان بس تعرفين إني مانسيتس..
أم عبدالله: بنيتي والله... أدري بتس..مب تعلمينن...نورة!!
ورا ما تسلمين على عمتس وبناته...
نورة: أتحرى نجلاء تخلص عشان نسلم جميع...
أم عبدالله: هــــــــــــــــــــــــــــــو!! وأنتي مربوطتن به...
قومي يا نجلاء يابنتي سلمي على عمت أبوتس ماجد.. وبناته..
هذي نجلاء اللي غذاه ماجد الله يرحمه...وهذي نورة سميتي...
*************
,................................................
"أمام خيمة الشباب"
نورة: هذي الخيمة المنتظرة!!
نجلاء: إيه هين ... إما طلعناه من عيونكم...
_يخرج عبدالمجيد_:
ياولد...نورة..نجلاء!!
خيـــــــــــــــــــــــــــــــر!!
وش جابكن هنا؟
نجلاء: أولاً...لا تناظر لمين أتغطى زين...
ثانياً ..منتب معايدن...ولا فرحان إني ما عيدت معكم...
عبدالمجيد: ومن متى العيال يعايدون البنات ...!!
نجلاء: طيب!! زين مجيد...
عبد المجيد: لا...لا...لاتزعلين...وش عاد يفكنا..
كل عام وأنتي بألف ألف خير..وش أخبار القصيم؟
نورة: هيه...ماخبرنا العيال يكلمون البنات..
نجلاء: لا..مجيد مب ولد!!
هذا ولد عمي صح مجيد!!؟
عبدالمجيد: صح!!
........ بنات ما يصلح تجون هنا..
يطلع أحد من الشباب يشوفكم..
نورة: أصلا هذي ساحة الحريم...واللي يطلع من هنا معناته ما يستحي على روحه..
عبدالمجيد_يشد شعرها_: أنا ما أستحي على روحي!!
نورة:آآآآآآآآآآآآآآآآآآآآآآآآآآآآآآآآآآآآآآآآآآ... إيه..آآآآآآآآآآآآآآآآآآآآآآآآآآآ
نجلاء: مجيد..واللي يرحم والديك...لا يسمعون الشباب فشله..
ذي أم لسانين ..لامن رحت للبيت إضربه..
ولا لامن طلعوا يلعبون كورة..ويطعسون...
إلا متى بيطلعون؟
عبدالمجيد: _يترك نورة_ بعد شوي..
هذا الشباب يتلبسون...
نورة: لايحوسون الخيمة!! كلن يجدع خلاقينه...كل واحد يتسفت ثوبه بشنطته!!
عبدالمجيد: وش دخلتس بهم هي خيمتس!!
ووش شغله العمال...
نورة: تراهم بقروش!!
نجلاء: خلاص مجيد... رح لا تطلع وحدة من البنات وتقول عنك قليل أدب..
ترى أموت لو سمعت أحد يتكلم بك!!
عبدالمجيد: إيه صدقتي...يالله مع السلامة..نجلاء تبين شي قبل ما أروح..
نورة: إيه نبي الخيمة.!!!
عبدالميجد: وأنا سألتس!!!
_تخرج نورة لسانها _
نجلاء: ماعليك منه.... أبي سلامتك بس...
مجيد...ممكن أطلب طلب صغيرون...
عبدالمجيد: أبشري...
بس إلا الخيمة!!!
نجلاء: لا... ناد نصور ...شفته دخل خيمتكم...هو وأحمد...
_يشير عبد المجيد لعينيه كنايه عن كلمة "من عيوني" ويدخل الخيمة_
نورة: يالحمارة..يضربن بالبيت هاه!!وأوريتس طلعت الرقة لمجيدوه..
نجلاء: يالكمخة ماتعرفين شي أسمه سياسة...
نورة: لا..ما أعرف إلا شيء أسمه الحب!!
نجلاء: نورة..ترى بندور هنا...تبين اناديه أكلمه...وتشوفينه وتملين عيونتس منه!!
نورة: أها... إيه وش تبين بنصور وأحمد!؟
نجلاء: تجنيد عملاء...بس حلو وجهتس أحمر...
نورة:نجــــــــــــــــــــــــــــــــــــــــــل اء...
_يخرجان أحمد وناصر من الخيمة غاضبين_
نورة: وراكم طردوكم!!
ناصر: إيه...أوريهم كلهم!! لامن دا فهد أخليه يلفعهم..كلهم!!
أحمد: وش تبن؟
نجلاء: حنا!! ما ناديناكم.. بس أكيد هم يبون يتخلصون منكم!!
نورة: إيه يا عمري أنتم!!
أحمد: مجيدوه.. يقول لي رح لخيمة البزران!!
نجلاء: ماعنده نظر... إسمع تبين أقهرهم...؟
ناصر: ياليت يا ندلا... بأحبث ترا..
أحمد: إيه!! بس شلون؟
نورة: تعالوا نعلمكم شلون...
********
"بعد نصف ساعة"
أحمد: راحوا كلهم.. روحن للخيمة ... أنا بروح مع عمي فيصل...
ناصر..إنتبه لا ينكشفن!!
ناصر: أفا عليك...أنا ردال...يالله وراي تعالوا...
_يدخل الخيمة ويتلفت , ثم يرى بندر يجلس في الزاوية متكأً على كومة من أكياس النوم مصفوفة بعناية, يشير له بندر بأن يأتي_
ناصر: أث...وث تبي؟
بندر_يخفت صوته_: ليه؟ تعال أبسولف معك...
ماكملت وش صار على قرية النمل اللي هاجمتوه..تراك ماكملت لي...تحمست
ناصر: أنت ثرطي ..ثح..
بندر : إيه.. ليش تبي أقبض على مجرمين؟
ناصر: لا... بث ترى نورة وندلاء بيدخلن الحين..لاتدبذ عليهن..
تراهن أوب حراميه...
بندر: ليه يدخلن...
ناصر: أثلاً خلاث... بدولهن إنك هنا...
مثكينه نورة أوب داخلة..
بندر: ناصر حبيبي أنا شرطي صح!!
ناصر: تدول انت كذا!! مادري عنك؟
بندر: مب صح الشاطرين يسمعون كلام الشرطة..
عشان الشرطة تقبض على الحرامية...وتحمي الوطن؟
ناصر: إيه..
بندر: خلاص..إسمع كلامي وقل لهن ما بالخيمة أحد...
ناصر: ههههههه... ليه...بث بثرط...؟
بندر: وشو؟
ناصر: تغبى أخاف يذعلون علي!!
بندر: طيب...
********
_يخرج ناصر, ويؤشر لهن بيديه_
نورة: إمشي ما فيه أحد...
نجلاء: مادري ناغصن قلبي...
نورة: نصور حبيبي وقف عند الباب وشف لامن جاء أي واحد علمنا
ناصر: أمرك ثيدي!!
_تدخل نورة ونجلاء للخيمة _
نورة: يووووووه ظلام ما أشوف شي!!
نجلاء: ياذهينه عشانتس جايتن من الشمس...أح شوفي.. جلسة كنب وجلسة أرضية..
نورة: أح... شوفي البنادق... ذولا إرهابيين..أبلغ عنهم!!
نجلاء: إخس... يهكون علينا ... شوفي التلفزيون بثمان سماعات...
شوفي تلفزيون صغير هناك!!
نورة: للسوني...شوفي الطبول...والطيران...صايرين طقاقات..هين لو يدخل أبوي
بذا يكسرهن على روسهم...تعالي نشوف الثلاجة..وجع أكبر من ثلاجتنا مرتين!!
نجلاء: إخس..إخس!! أشرطة اغاني...أعوذ بالله...مايدرون ذولا إن اللي يسمع اغاني يصب بأذنه حديد مصهور يوم القيامة...
نورة: صدز!!! شوفي!! وش هالخير والعز...
حمير ولا يسوون... كراتين شكلاطة...شوفي أنواع البيرة...وبايسن..بيبسي..
عصيرات طااااااااازجة!! شكلهم يضفون كل اللي بالمطبخ!!
نجلاء: نورة.... انا ماراح يغمض لي جفن لحد ما أكوش عليه...
وبأغراضه... وبالذات الدفيفدي والستيرو والطيران...
نورة: نجلاء.... تعالي _وتلتفت على الزاوية وتمد يدها لتأخذ كيس معلق مليء بالأشرطة, فتتلاقى عينيها بعيني بندر فتصرخ_
آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآآآآآآآآآآآآآآآآآآآآآآآآآآآى
_وتركض خارجة_
نجلاء: بندر!!!!!
بندر: وأنتن يالثنتين خراب العالم كله!!
نجلاء: ليش ما قلت يا ولد!!! مو عيب تناظر نورة بدون ما تتغطى!!
بندر_يقف ويمسك بإذن نجلاء ويشدها نحوه_:
العيب الأكبر يا آنسة...إنتس تدخلين خيمة العيال...
إفرضي لو فيه أحد منهم بذا... وش بيقول عنتس!!
هذا إن ربي ستر وما صار شي..
نجلاء: أي...أي...توجع...أح...يعني وش بيصير؟
بندر: شوفي يا نجيل... تعدين ساحة الحريم أمصع رقبتس!!
والله يا نجلاء تراي منب أمزح ...تقلعي يالله...
ناصر: هيه إترك ندلاء!!
نجلاء: أوريك!! ليش ماعلمتنا؟
ناصر: أثلاً ما ثفته...هو ثعير مرررررررة ومتعبي هنا...مادريت!!
نجلاء: إيه باين متغبي هنا!!!من صغره_وهي خارجة وممسكة بأذنها_طحش...أح..
*******
"أمام باب خيمة النساء"
نجلاء: عمه يرضيتس...أخذوا خيمتنا وطردونا...
شوفي إذي حمرا منهم...
نورة: إي يمه...جلدونا والله مجيد نتف شعري بس يوم قلت بنقول لأمي نورة ..
وقال لي " هذي خيمتنا...يرضى اللي يرضى ويزعل اللي يزعل"
نجلاء: إيه عمه... أكيد إنه يقصدتس!!
أنا يا عمه ما همن الخيمة... بس جرحون يا عمه...يوم يطردونن ويقولون تقعلي...
يمه بندر مصع إذني وطردن...ونورة نتف شعره مجيد...
أم عبدالله: أوريهم!! بس صعبة أطردهم من خيمتهم اللي قاعدين به!!
ومعهم ربع مب من الديره... لو على عيالين الجماعة مب مشكلة!!
نجلاء: عمه جرحون!!مارحمون هذا وأنا يتيمة!!
أبوي مات قبل لأطلع على الدنيا, فتيتمت للمرة الأولى..
وأعرست أمي وجدعتن عند خالي برا... وتيتمت للمرة الثانية..
وخالي مات وتيتمت للمرة الثالثة..مات اللي يدافع عن..
قلت ميخالف عندي أخو يدافعن عن...ومات أخوي...وتيتمت للمرة الرابعة
صبرت وقلت أمي فرح..ماتت بعد يومين..وتيتمت للمرة الخامسة..
قلت ربي كريم... وعندي جدي ومااااااات جدي وتيتمت للمرة السادسة..
وما بقى لي غيرتس يا عمه.. لاتخلينن يتيمة وأنتي حيه..
لا تحسسينن بالضعف وإن ما أحد يدافع عن...تكفين يا عمه..تكفين طلبتس ردي كرامتي..
أم عبدالله_تمسح دموعها_: وسعي صدرتس يا بنيتي...
ولا يهمتس أكلم مجيد وأقول لهم يشدون من الخيمة...
*****
_نورة ونجلاء تسيران لخيمة الشباب_
نورة: إخس يا الممثلة... مابقى إلا آهات وتصير نهايه حزينة
لفلم..بس وشلون خليتي أمي تصيح؟
نجلاء: لأني أنا صحت.... ذكرت كل الأحزان اللي مرت علي..
نورة:تصدقين هالخيمة ماتسوى إنه تذكرتس همومتس..
نجلاء:هه.. وأنا نسيت همومي...من اليوم اللي عرفنا فيه إن أبوي ماجد مفقود
وأنا عارفتن إن اللي بعده بيكون أصعب رغم أني كنت صغيرة ..صغيرة على الشقاء...
نورة: مافيه أحد بهالدنيا صغير على الشقاء.. بس الصبر هو المكسب من كل المشاكل..مب انتي قلتي لي ذاك اليوم" لقد خلقنا الإنسان في كبد" سورة البلد 4
يوم إني كنت زعلانه عشاني امي وأبوي...
نجلاء: نورة... للحين أمتس تتخانق مع أبوتس..
نورة: ولبكرا... بس عادي هم أخذوا على هالشي.. وحنا اخذنا بعد...
نجلاء_تقترب من الشراع وتنادي_:
مجيد...مجيد.....
_يخرج عبد المجيد_:
نعم... لا تنادينن مرتن ثانية..أرسلي أحد
كلمي بالجوال...
نورة: جوالك مقفل..
عبدالمجيد: طيب وش تبين؟
نجلاء: مجيد..عزيزي... ترا عمتي نورة..تقول يطلعون من الخيمة..
عبدالمجيد: جد والله!!
أقول تقلعي وكذبي غيره..._ويدخل الخيمة_
نورة: بس..._تقرصها نجلاء_
نجلاء: أص...خليهم...عشان ما يمديهم ياخذون شي!!
نورة: صح!!
*******
تأتي نورة ونجلاء ويسحبان أم عبدالله معهن_
أم عبدالله: إصبرن.... إصبرن وه...ما أقوى ...
نورة: يمه هاوشنا... وقال عنا كذابات..
نجلاء: إيه وفشلنا عند البنات...شوفيهن يقولن عنا كذابات..
شوفي البنات واقفين بعفشهن عن باب الخيمة...
فضن خيمتهن على بالنا بيخافون منتس وبيصير لتس قدر وقيمة..
بس الظاهر يا عمة...عيال هالحين عاقين!!
نورة: يمه... تراهم ناوين شكلهم ناوين يفضون الخيمة.. ويخربونه عشان ما نستانس..
أم عبدالله: أوريهم... بس أنا أبدخل... ولا وحده تدخل يتعورنه العيالين...
ولا واحد بيمد بيده على شي!!_تضحك_ وكل الخيمة باللي به بتصير لكن..
******
_تدخل العجوز الخيمة وهي تلف على وجهها غطوتها الخفيفة, يفز الشباب,
وينظر لها عبد المجيد بذعر_
أم عبدالله: حيا الله عيالي...يا هلا ومرحبا... بأهل الإمارات...وأهل قطر..
يرد أحدهم: حياج ربي يا عمة... شحالج ..
أم عبدالله: الحمدلله... والله إني فرحتن بكم أنتم وعيالنا...
بس أنا شفت هالخيمة ضيقتن عليكم... يقولن البنات إنكم تفرشون تنامون برا..
قلت للعمال يفرشون الخيمة الشرقية...أكبر وأبعد عن إزعاج الدبابات...
يرد الاخر: جزاج ربي بالخير... ماتقصرين ياعمة...
أم عبدالله: وأهل الشرقية وش أخبارهم..وأهل الشمال..وأهل القصيم..
تراكم عيالي...مايرتاح لي جفن وأنتم منتب مرتاحين...
لا تستحون..آي شي تبونه بس آمروا...
راشد: بس يا عمه... نبي نجلس بهالخيمة...
أم عبدالله: هــــــــــــــــــو مرتاحين بذيا؟
يعني أنا عجوز ورايي ما ينفع.. بس تقل إنه حسرتن عليكم..
فشيلة من الحريم... اللي شاورتهن.. وشلون أبقول لهن إنهم عيوا...
فيصل: يمه!! لا تقولين لهن ولا شي...لا ..الخيمة الشرقية أكبر وأحسن...
يالله شباب ....
أم عبدالله: تراي قلت للعمال يجيبون القهوة لكم هناك...
عبدالمجيد: يمه!!
مانبي قهوه الساع عشر بننام...
أم عبدالله: خلاص أقول لهم ينقلون فرشكم ويفرشونه...
_يخرج الشباب الذين من غير العائلة, ويتجه راشد وأحمد وسلمان وعبدالمجيد
ويشرعون بفصل الأسلاك إستعداداً لنقل مافيها للخيمة الأخرى, فيما خرج فيصل
لينادي العمال ليساعدوهم...
أم عبدالله: مجيد!! ولا شي تمد يدك عليه!!
عبدالمجيد: يمه!! اغراضنا...
أم عبدالله: مخليتن العمال يفرشون الخيمة وينقلون اللي بخيمة البنات لخيمتكم...
عبد المجيد: بس أباخذ...
أم عبدالله: ولا شي إلا ثيابك... وكورتك...وانت لك حسابن ثاني يا الهر
بندر: مساتس الله بالخير يا أم عبدالله...
أم عبد الله: هلا والله يا بندر...
شلونك... ورا أهلك ما جو؟
بندر: تعرفين أهلي ببيتهم بالقصيم خوالي واهلي هناك!!
أم عبدالله: إي يا بندر تراي آخذتن بخاطري عليك..
بندر: أفا يا عمه...وراه وش سويت؟
أم عبدالله: وراك تغث نجيل...مب حرام عليك
مسيكينه ماله أحد...طول بالك عليه..سفيه..
بندر: يا عمه أنا ماقصدت أغثه .. بس لو نتركهن على كيفهن يضيعن..
**********
"في خيمة الشباب"
يدخل تركي غاضباً ويحمل عوده وهو مكسور لنصفين..
ينظر له سلمان وعبدالمجيد وراشد بذهول, فيجلس ثم ينفجر قائلاً:
لا..ذول مصخنه زيادة...كسروا عودي...
راشد: أنا ما أدري ذيل لو يشتغلن بالإستخبارات أحسن!!
سلمان: أحسن... وش تبي بوه زيادة ذنوب..
عبدالمجيد: للمرة الثانية!! عسى نورة كسرته؟
تركي: هالشيطانتين نجلوه ونوير الكورة!!
سلمان: أها ..إلفقة لأفقع وجهك ببوقس...لا تتكلم عن أختي..
تركي: مجيد...أخ لو ألحطهن بخيزرانه!!
تخيل دخلت الخيمة بأمان الله بعد ما أخذت إ ذن بالدخول..
يوم دخلت آباخذ العود إلتفت لقيت شرشف نجلاء مجخور..
وطالعة بعض الشعرات الملتوية..أنا بعفوية سحبتهن..
وإسم الله علي وعليك!!
أنا مادريت إلا نجلاء تصارخ ونورة تلاشط...
رحت وخليتهن وأخذت العود.. ومير تبدى نجلاء تدغدني بظهري..
وأنت تعرفني ما أتحمل ..أضحك قوة لمن أحد يلمس ظهري..
عبدالمجيد: كذا_ويلمس ظهره_
تركي:خخخخخخخ ...مجيد..ههههه...لالا..خلاص
أقول.. وبعدين طاح العود مني ولقطته نجلاء..أنا جيت أبلحقها أباخذه منها..
بس وقفت البرميل نورة_يضربه سلمان_آي.. ياخي ماكذبت..
وصارت جدار الفصل العنصري بيني وبين نجلاء..
وبلمح البصر قالت نجلاء ياااااااااااااااااااع وضربته وإنكسر نصين..قدام عيوني..
راشد:ههههههه..أحسن أحد قالك تمد يدك على حرمه...
عبدالمجيد: إيه راشد تعلم من الدرس..
سلمان: أي درس؟
راشد: درس المطالعة برابع إبتدائي...والحين كلنه مقهورين من ذيلا..
سلمان:ههههههه...آخذين الكشافات حقاتي...والسماعات حقات مجيد..
والسوني والأشرطة حقت راشد... وكسروا عودك...مجرمااااات
عبدالمجيد: ولأدهى والأمر إنهن طردننا من خيمتنا...
تركي: لازم نأدبهن...
سلمان: يعني شلون...
تركي: أنا أقول لكم..._يدخل فيصل وبندر_
فيصل: وش عنده مجلس الأمم المتحده منعقد...أشوف التأثر بادي على الوجوه..
وشو ذا...عودك من كسره..يبي له حبه راس؟
تركي: أنا كسرته...انا تبت..وهم متأثرين عشاني...
بندر: إيه يا خوي وش تبي به...مير تعال تمشى معنا...
تركي: بتبعدون؟
فيصل: إيه بنمد شوي على رجليننا..بتجي؟
عبدالمجيد: لا... بنجلس نتحراكم...ملل عقب مارحوا أغلب الشباب..
فيصل: أتوقع يحظرون العرس وبيجون..
تركي: مابقي إلا يوم ومن بعده بنمشي...
بندر: ما أحد يفوت هالمخيم لو بقي ساعة..
_ويخرجان_
تركي: أول شي....نبدأ بـــــــــــــ......
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
"الجزء الخامس عشر"
راشد: يوووووووووووه أنته ماتعرفهم..مستحيل وحده بترضى تسويها معانا..
عبدالمجيد: لا...والله فكرة جهنمية...تركي ... أهنئك ...
تركي: بس عليك تقنع وحده تعلمنا...بس أهم شي يعتمد عليها...
راشد: نجلاء...أحسها بتنفع...خبلة..
عبدالمجيد: لا...نجيل ممكن تنقلب علينا...لا تأمنه..اليوم عطتنا درس بالدهاء..
تركي: .............نواعم تخاف...ليلى ألعن...مين ..إيه عذبة!!
راشد: أنت مينون..
عبدالمجيد: كــــــــــــــــــــــــــفــــــــــــــــــــــ ــــــو...
عذبة ممكن تساعدنا...ماعليكم خلو الخطوة ذي علي...
_في خيمة البنات_
نجلاء ونورة يلعبن بالسوني..ونواعم ونجود وليلى وغيداء وغدي_بنات اقاربهم_
يرقصن, عذبة تدخل من الخارج وهي تضحك...
نواعم: ياربيـــــــــــــــــــه مانعدم هالضحكة..إيه..ردي عذبة الأوليه..
عذبة: هاه...ما أسمع..وطي الستريو شوي...
نجود: وش عندتس تضحكين؟
عذبة: ههههههههه...تركي الله يخس بليسه..هوووووه..ياربيه قطع تسبدي..
نجلاء: عذبة...شوفي كراش!! السيارات..
عذبة: الله...بعدكن انا بلعب...هاه..
نورة: لا... أنا ونجلاء..بعدين نجلاء وانا وبعدين انا ونجلاء..وبعدين نجلاء وأنا..
وأنتي إرقصي مع البنات...
نواعم: ليه..وش عنده تروك..ياخبله هالولد..ماشفتي شي...
عذبة: منقهر ويشكي من العفاريت الثنتين.. كسروا عوده...
نواعم: عمى!!! كلش عاد ولا أخوي...
أنتي يا نجيل وش سلطتك على أخوي..
نجلاء: يووووووووووه بدت ذي الثانية...قلتيه اخوتس...هذا سبب وجيه إني أتسلط عليه...لفي...
يا الكمخة راحت علينا_تصرخ في نورة بسبب تضيع فرصة في اللعبة_
نواعم: ها ها ها تصدقين عاد دمك خفيف...
نجلاء: بنت عمتس طالعتن عليتس..
نواعم: بسم الله علي أصير بنت عمتس!!!
نجلاء: لا والله وأنتي الصادزه بسم الله علي أبوي اللي بيصير أخو أبوتس...
من زينكم !!
نواعم: عن الغلط!! والله لأخليك تندمين....
ليلى: أنتي وش فيك...بدينا بالنقرة والهواش...
وأنتي تراك دايم مسببة قلق...دايم دوبك من دوب هالآدميه!!
نواعم: لو ما هي رضيعة فرح كان أدبتها...
نجلاء_بلا مبالاة مصطنعة_: مو حليب فرح اللي مخلين للحين ما واسيتس بالتراب..
نورة: ماعليتس منه.. خليه ...ترا قريب الفوزة..
عذبة: نواعم حبيبتي قفلي الباب هذا...
وأنا بقفل الباب ذا...وأنتي يا نجود قفلي الباب ذا..
إربطوهن زين..
نجود: ليه خايفة...طيب ليش نربط اللي من عند الحريم؟
لو نربط هذا ونخلي اللي من عند الحريم...
عذبة: لا...أنا قلبي مو مرتاح..وبعدين اللي من عند الحريم قريب من خيام العمال..
مو مطمنه...وهذا الباب عند العيال والعيال صاحين...
غيدا: زين بنات انا وغدي بنروح ننام...
نواعم: ليه...تو الناس بدري...وبعدين مو كنتوا بتقعدون للفجر..
غدي:لا..لا أنا .. أمي قالت تجن الساع وحده وشوفي الحين وحده ونص..
أخاف تزعل.._وتخرجان بسرعة_
نجود: تراتس خوفتيهن...
عذبة: بنات وش رايكم أققص لكم قصة...عن عن عن الجن!!
نجلاء: ياسلام....بطفي السوني..بس شوفي ترا اليوم بنام جنبتس..
نورة: الله ... وأنا بنام جنب نجود..
نواعم: لا...عذوب ترا الأطفال بيخافون....
عذبة: لا... لازم يسمعون عشان يقرون وردهم...وخصوصا إن الجن يكثرون بالبر..
_تحلقن البنات حول عذبة وهي تقص لهم قصص مرعبة عن الجن_
_خلف الخيمة_
تركي يمسك بخيزرانه ويؤشر لراشد عند مولدات الكهرب,
ويؤشر لسلمان وعبد المجيد , فإنطلق الإثنان نحو شبك الأغنام, وأقبلا يسيران
مجموعة من الخراف وتوقفا بعيد عن الخيمة بحوالي عشرين متر...
وفي هذه الأثناء كانت عذبة تقص أكثر أجزاء القصة رعباً.._:
والبنت تسمع أصوات حيوانات غريبة وراحت تصارخ محد يسمع صوتها..
الجن مانعين الصوت يوصل لأحد من الجيران...وتسمع الصوت يقرب..ويقرب..
نورة_تصرخ_: عذبة!! إسمعن صوت غريب..
نجلاء: يمـــــــــــــــــــــه ...
أحد اليوم مسوي شي غلط..
نجود: يمه... وحنا مشغلين طق في نص الليل ...
عذبة: إيه ترا الشياطين تجمع لامن سمعت الطق...
ليلى: إيه وبعدين شصار عليها؟
عذبة: ولأن الجن ما يبون أحد يشوفهم...طفوا الكهرب عليه ودخلوا...
_خلف الخيمة _
أشر تركي بكلتا يديه لراشد ففصل الكهرب الذي يصل لجهه
خيمة البنات, فصرخن البنات جميعاً بذعر بالغ_
نورة: يمــــــــــــــــــــــــــــــــــــــــــــــــ ــــــــــه!!1
جو..والله جو... يمه جو..نجلاء..كفخيهم...
نجلاء: يمه...ما أقواهم بالكارتيه... بسم الله بسم الله..
الله لا إله إلا هو الحي...
نواعم: دخيل الله عليكم خلونا نطلع...
عذبة: بنات ...شكلهم الجن...فصلوا الكهرب ... بيجون الحين..
بنات قريتوا وردكم اليوم..
نجود: عذبة...وش هالخرابيط!! الجن أصلا يخافون منا...
نورة..لا تخافين...لا تخافين.. ترا هذا أكيد الماطور خرب...
_نورة ممسكه بليلى وتبكيان جميعاً
_في هذه الأثناء سمعن صوت غريب قادم من خارج الخيمة..
والصوت يقترب أكثر فأكثر..._
صرخت نورة: جو!! جو!!
بسم الله والله شوفوهم ..عند عند عند الباب .. ودون لأمي..
أبنام عند امي...
نجود..طلعين..
_تصرخ نواعم من عند الباب المطل على ساحة النساء, عجزت ان تفتحه..
إلتفتت فرأت أجرام غريبة تدخل الخيمة_
نواعم_تصرخ وتقفز قفزات متتالية في مكانها_: والله الجن جو!! دخلوا ...
دخلوا... بسم الله الرحمن...
نورة: أعوذ ببرب الفففلق...أعععععععوووووذ...
نجوووووووووووووووووود...
إفتحي الباب اللي عندتس!!
نجود: عيا يفيتح مسكر من برا...
_وحدث رعب شديد في الخيمة , فأصبحت الخراف مرعوبة تفر من مكان لآخر
وكذلك البنات, وقمة الرعب حين تصطدم بأحد منهن... وحين تهم أحد البنات بالفرار,
تتلقى ضربات موجعة بواسطة عصى رفيعة عند الباب...
نجلاء: يمه !!! شيخ الجن واقف عند الباب معيي علينا نطلع..
نورة: عذبة...ليش ساكته...بموت...آآآآآآآآآآآآآآآآآآآآآآآآآآآ
نواعم: خروف!! والله خروف... بنات هذي خرفان مب جن!!
ليلى: خرفان ولا جن وآآآآآآآآآآآآآآآآآآآآآآآآآآآآآآآآآآآآآآآآآآآآآحد
آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآآآآآ
نجلاء: خرفان!!! إيه خروف..وهذا بعد خروف!!
وه وقف قلبي...
نورة_تمسك بنجلاء_: تعالي هشي الخروف مادري الجني...آآآآآآآآآآآآآآ
وخر..وخر.. ياحيوان...
ليلى_تبعد يد نورة_: أنا بطلع أبطلع وخلي شيخ الجن يسوي اللي يبي!!
تركي_وهو يسدد(لحطات)ضربات مؤلمة ليلى:
شيخ الجن... آآآآآآآآآآآآآآآآآع...إدخلي..
ليلى: آآآآآآآآآآآآآآآآآآآآآآآآآي..يمه..يخرع كله فرو!!!!
_في هذه الأثناء كانت الفرحة تعم الشباب, وعذبة مستغرقة بالضحك,
تركي يسمع صوت من خلفه ورأى الشباب يهربون بسرعة ,
فرأى فيصل وبندر يركضون لخيمة البنات, فرمى الفروة التي كان يغطي بها رأسه,
ودخل للخيمة..
فيصل: وش بهن؟ الله يستر..
بندر: وأنت يالله تمشي اركض...
فيصل: هالحمير ذولا وينهم عنهن..معقولة ما يسمعون صراخهن..
بندر: شف الكهرب مطفى... شكل الماطور خرب..
هه..طلع خروف!!وش السالفة..
_دخل فيصل وبندر للخيمة, فسمعوا أصوات الخراف تتداخل بأصوات صراخ البنات_
بندر: وش بكم...وش جاب الخرفان بذا؟
فيصل: هررررررررر...والله إن كاني أعرف فهو الجني..مجيد..
_يخرجان الخراف ويهدآن من روع البنات_
بندر: وش هالصراخ رأس ماله كم خروف...
فيصل: أح ..من وطيت..؟
عذبة: آآآآآآآآآآآآآآآآآآآآآآآآآآآآآآآآآآآآآآآآآآآآآآآآآي ...رجلي..
فيصل: ههههههههههههههه ... هرررر..نورة..تصدقين أحسبك خروف...
نورة: وجع إن شاء الله..
نواعم: عم!!! متأكد إنهن خرفان؟
بندر: لا جن..أكيد خرفان ... وش رايتس..؟
_في هذه الأثناء تضيء المصابيح...ويتقافزن البنات ليتغطين بأقرب شرشف لهن, وهن متقرفات من وصخ الخراف..يصد بندر ويخرج فيتبعه فيصل,
تشيعهما دعوات البنات, وقهقات عذبة, فيلتفت فيصل قائلاً_:
أنتي الراس الكبير حقهم ...صح!!؟
نورة: إيه يا عم هي اللي خوفتنا بقصة الجن...ومبسوطة الحين..
عذبة: أووووووووووه..ياربيه بطني وجعن...ياربيه أشكالكم تضحك ..تضحك..
فيصل: والله إنتس تستاهلين طراق...
عذبة_بغضب مصطنع_: أنا؟!!
فيصل: لا...نورة اللي تتهمتس ولا أنتي دابتن سليمة ماعليتس من أحد...
عذبة: أشوا...لا عاد ...ما يكفي إنك وطيت رجلي..ولا إعتذرت..
فيصل: آآآآآآآسف يا عمري حقتس علي ولا تزعلين...
نواعم: أووووووووووووووووووووووووه..
ليلى: لا..مايمديني..
نورة: فيصل ... ما أسمعك تقول هالحتسي إلا لأمي نورة...
وش حيت عذبة؟
نجود:نورة!!!!
نجلاء: معليش يا نورة ..بس سؤالتس غبي جداً...
فيصل: وهو كذلك...
_ويؤشر لأحد البنات التي تتغطى بعباءة مغبرة وتجلس بزاوية وتلزم الصمت_
مين ذي؟ لاتصير من الجماعة وهبلوا به الشياطين!؟
نجود : ما أدري بس كلنا موجودين ...مادري مين هي..
نجلاء: إيه يمكنه شيخ الجن؟
فيصل_يقترب من المرأة المتلفعة بخمارها_:
حيا الله المرة..من أنتي؟
أنا أبعتذر نيابتن عن الشباب...
وراه ما تردين...
تتبعة نجلاء, ونورة فتنحني نورة وتسحب غطاءها, فضحكت..
فيما تمسكت المرأة أكثر بخمارها..
فيصل: من أنتي يالمرة ولا أبفتشتس...
ماعليش بس حنا ما نلفي حريمن ما نعرفهن على بناتنا بالليل...
_ويسحب الغطاء, وإذ به تركي_
تركي: والله كلهم معي....وخر وخر...
نورة: وين الخيزرانه اللي كانت معك...
نجلاء: هه..خوذيه وإبردي تسبدتس...
فيصل: وعلى كيفكن...
ما أحد منكن يمد يده...
تركي: هلا... بالغالي... بعدي والله عمي...هم اللي بادين الشر..
فيصل: ما يأدبه غيري...
تركي: طيب...عموا نتفاهم!!...بالهداوه...شوي شوي على البدي والله غالي...ماركة!!
فيصل: بشققه بالعقال على ظهرك يالهيس!!
_ويجره بقميصه خارجاً من الخيمة ويدخل خيمة الشباب الذين تلقو ا
لحطات من عقال بندر_
عبدالمجيد: إنحش...!!تروك إنفذ بجلدك..
فيصل: لا... بتتأدبون كلكم...بس لحطتهم بالعقال...
بندر: وه الكثرة تغلب الشجاعة...
راشد: عسى تبي تطقنا ونسكت لك...إهما اللي نوو النية القشره..
فيصل: بس مو تسون كذا إفرضوا لو سمعوا اللي بالمخيم..
لو وحده منهم فسخت عقله...مايصير...
بس والله عليكم خطة...شي!!
بندر: لا..أحسن إشكرهم... هذولي حريم والتمرجل مب على الحريم..
صح مقالب تسوونه ببعض..ماعليه..بس الحريم لو مهمن كانن
شريات لازم تحملونهن...ولا ليش أنتم رجال!!!
سلمان: والله إنك صادز... بس والله أجرمنا بهن...يستاهلن....ههههه
مجيد...تتوقع يشكون لأمي نورة....
عبدالمجيد: لا...هذي النشبة اللي ما فكرت به...
وش يفكنا عاد؟
وبعدين بندروه ترا مب من حقك تمارس دورك الأمني والتأديبي علينا!!
ترا ما بيننا وبينك شي...كله سنتين...مب عمرك 24 صح؟
أحمد: من هو صغير وهو تقل شايب؟
بندر: الرجال مب بالعمر يا شيخ........
فيصل: صدقت والله....
تركي: طيب .......... فهمنا...خلونا ننبسط بالإنتصار العظيم..
أهم شي لحطتهن...ههههههه....بس الخسارة خرب فتفت علينا!!
************
"
,,,,,,,,,,,,,,,,,,,,,,,,,,,,,,,,,
01-08-10, 05:53 AM
جديد مواضيع قسم القصص المكتمله
العرض العادي
