انتظاااااااااااااااااار

الفصـل العشربن






حس رااشد بقلبه يدق بسرعه وهو يشوف عمه عبدالرحيم قاعد في مجلسه
ــ السلام عليكم
ـ وعليكم السلام هلاا راشد تفضل ..
استغرب عبدالرحيم من جيه راشد الي ماكان يدخل بيتهم وايد..
ــ عمي انا جايك في موضوع خاص ..
بو منصور ــ سم .
ــ سم الله الله عدوك.. عمي جيت اخطب ديمه لنفسي..ادري اني جاي بروحي .. بس جدي تعبان وعمي صالح سافر لعند سالم ..وعبدالرحمن سافر امس مع زوجته ومابيرجع الا عقب اسبوع ..
سكت بو منصو ر لمده طويله بعديـن تكلم ــ رااشد ...انا البنت عطيتها لولد خالتها..
انقبض قلب راشد ــ بس انا مارخصتها ..
ــ بس انا عطتيها ..نطرتك تخطب سنين ولا مره جيت تخطب .. والبنت انا واعد امها انها تكون لولد خالها ..وبعدين بينكم فرق بالعمر..
حس راشد بقهر ــ يعني مافي امل ؟؟..
بومنصور ــ انا عطيت كلمه وماني متراجع عنها ..وبنات العرب وايد ..طب وتخير وانا اخطب لك اليوم قبل بكره .
وقف راشد على طوله ـ مشكور ياعمي ..انا مابغيت غير ديمه ..عن اذنك..
طلع راشد مايشوف طريقه وعبدالرحيم ينادي ــ رااشد ..تعوذ من الشيطان وارجع..راااشد ..
لكنه ركب سيارته وانطلق وقت اللي دخل فيه حمد البيت ..
ــ يبه شفيه راشد ؟..
ــ مافيه الا العافيه ..
ــ يبه صج شفيه ولد عمي ..
ــ خطب ديمه وقلت له اني عطيتها لولد خالتها ..
انصدم حمد ــ متى يبه ؟؟ واحنا آخر من يعلم ؟؟
طالع له عبدالرحيم ببرود ــ وشفايدتكم انتم ؟؟..انا ابوها وانا ابخص بمصلحتها ..
رجع عبدالرحيم للمجلس وانصدم حمد وتم واقف بمكانه..وكالعاده ..اتصل بمبارك وخبره كل شي .. وااجتمعوا بغرفه مبارك..
ــ يعني هالبزر محمد احسن من راشد ؟؟ شفيه ابوي جاب العيد ..
مباركـ ــ ابوك ياحمد تكلم باحترام..
ــ وانا اشوف ديمه حالتها زفت .. اتاريهم معطينها لهالمحمد..
مباركـ ،ــ لازم نحل الموضوع بجديه ..
عصب حمد وحذف شماغه على السرير معصب .. قام مبارك وربت على كتفه ــ هونها وبتهون .
ــ انت تعرف راشد .. ذاق الويل منا...من منصور والسواه اللي سواها باخته ...ومنك ..وحركتك يوم حجرت اخته ..والحين اختك وابوك ؟؟ .. مايستاهل والله ..
نزل مبارك راسه منحرج. ــ هونها وبتهون ..بنلقى حل ..
ــ بروح اكلم ديمه ..اشوفها مثل المحكوم عليه بالاعدام من شهر .. ماتاكل ولاتشرب . وكله تصيح ...
مسكه مبارك ــ انت مب حاس بعمرك..من القهر..اهدى الحين ..مايسوى تروح تقول لها ابوي رد راشد بيصير فيها شي والله ..
فجأة سمعوا شي تكسر عند الباب .. طلع مبارك وحمد بسرعه ...
ــ ديمه ..
كانت ديمه شايله قلاصات العصير وجايبتها لغرفة مبارك .. طاحت كلها عند رجولها ..اول ماشافت تعبير الدهشه على ملامح اخوانها ــ آسـ..ف.ه..
نزلت بدون وعي جمعت الزجاج بيدينها مسكها مبارك بقوة ونفض يدها اللي تدمت عن الزجاج ــ يالهبله .. زجاج شلون تشيلينه بيدج.تعورتي ؟؟
كانت يدينها متعوره لكنها ماحست بالالم .. تجمدت احاسيسها ودموعها وهي تشوف الدم .. طلع مبارك قطعت الزجاج من يدها وقبل لايعقمها
ــ بيحرقج ..
هزت راسها ..
حط مبارك المعقم على يدينها لكنها ماحست باي الم .. لف كل يد برباط من علبة الاسعاف الاولي .. وساعده حمد ..وهم ساكتين .. محد علق ..حتى ديمه.كان سكوتها غريب .. قلبها انفطر . راشد ماخون فيها ..للاسف ..ابوها هو اللي خانها..

_______________________________
قربت المها من خديجه وهي تطالع فوق ..
ــ من يومين في غرفته ..شفيه ؟
خديجه والدموع في عينها ــ خطب ديمه وعمي مااعطاه اياها ..
شهقت المها بقوة ،ــ شلووووون ؟؟؟ وانا آخر من يعلم ؟؟ من قال لج ؟
ــ مبارك ..
سكتت المها .. هي الحين جدام حقيقتين ..رفض عمها لراشد .وخديجه تكلم مبارك..
ـ تكلمينه ؟؟؟..
ــ اي .. خذ الاذن من راشد و..نكلم بعض من ملجنا ..

ــ وانا آخر من يعلم ؟
خديجه ــ ليش انا ماسألتج عن جاسم ..
ــ شفيه بعد العله ..
ــ ليش مايكلمج؟؟ راشد قال ان جاسم خذ الاذن منه ..
انصدمت المها وقالت بسخريه ـ لا ..هع الا اذا كان يتصل على جوالي القديم ..هع ..مايدري انه متكنسل ...خخخخخ..احسن شي ..
خديجه ـ ايه صح .. ماعندج جوال ..
ــ شتتكلمون عنه انتي ومبارك؟
طالعت لها خديجه بابتسامه ــ حاليا ..عن مشاكل الرعيه ..صالح ..وديمه وراشد ..للحين ماتتطرقنا لاي شي شخصي ..
ضحكت المها بقوة ــ حللللوة مشاكل الرعيه .. بس لاتتكلمون عني رجااء ..
خديجه ــ انتي خلاص ..تم نفيك الى بيت جاسم ..ماعدتي من الرعيه ..
ــ بل .. فال الله ولا فالج ..والحين ..شنسوي بديم ورشود؟
ــ مادري .. عمي رده .. ومادري شنو قال له
ــ كل شي توقعته الا ان عمي يرده ..عمي يؤمن بشده ان مصير البنت لابن عمها !
خديجه ــ ويؤمن شده بمقوله الرجل مسير باوامر زوجته !
سكتت المها ,,ارفعت تلفون البيت اتصلت في ديمه ..لكن ديمه ماترد ..
ـ بكره اشوفها في الجامعه ..
خديجه ــ ان شاء الله ..
ــ بتسوين حفله ملجه؟
ــ لا .. مبارك يقول مايحتاج .. العرس عقب عرسج بشوي ..
انصدمت المها ــ شنو؟
ــ العرس بعد عيد الاضحى ..
ـ ليش من قال عرسي في عيد الاضحى ؟؟ كيفهم هم ؟؟
ــ للاسف .. اي .. جدي اتفق مع جاسم ومبارك ..وعبدالرحمن ماخالف قولهم ولا راشد ..وجدتي تقول خير البر عاجله ..بس بيسوون لج حفله ملجه لانه اهل المعرس يبون يكشخون فيج ..
شحب لون المها ..حست السالفه قريب .. ــ يصير خير ..شوف من بيحضرها !

ــ هيا .
التفت له هيا ــ نعم ..
ــ شاي لو سمحتي..
ارجعت هيا التفت عنه وكملت قراية الجريده
ــ الدكتور قال مب زين لك ..عندك نقص في الحديد ..
ــ مصدع وعند ي مؤتمرواخر شي افكر فيه الحديد ..رجاااء ..شاااي.
قامت هيا متملله وحطت الجريده وسوت له شاي وردت ..
ــ تفضل
ــ شكرا.. اطرش لج السواق ياخذج السوق؟
ــ ماحب اسواق مصر.
ــ انزين تطلعين مع العيال ..
ــ مالي خلق ..
ــ شفيج؟
طالعت له ــ مافيني الا الخير.
ــ وجهج مايبشر بخير..
ــ عبدالرحمن . .حبيبي...شرايك نروح صقليه ..
طالع لها عبدالرحمن ــ وكلمة حبيبي ماتعرفينها الا لما تبين شي؟..لا مابي اروح ..الجو بيكون بارد عالعيال ..
ــ اف اف .. العيال العيال .. لاعت جبدي تراا..
طالعت لها بنظره بارده ــ هيا اصطلبي ..ولاتنسين انج حامل ..
ــ ايه ..عالطاري..
استغرب عبدالرحمن ــ شنو؟
ــ ترا الولد نزل ..
ــ شتقصدين ؟
ــ طاح من كم اسبوع ..
طالع لها منصدم ـ نعم؟؟؟..وانا آخر من يعلم ؟
ــ نسيت اقول لك ..
وقف على حيله ..وقرب منها ..وضربها على كتفها .. طاحت على الارض منصدمه .. تطالع له بصدمه قال لها بقهر ــ مادري متى تعقلين.
طالعت له بكره ـ اكرهههههك...اكررررهك ..طلقني .. انا مالي عيشه معاك..
ــ خل نرجع الدوحه .ولي معاج كلام ثاني ..
تركها وطلع برا الشقه . تمت تصيح ومسكت تلفونها واتصلت بعمتها طيبه اللي كانت جايه مع صالح علشان سالم ..
__________

ــمن يتصل فيج ؟
ــ هياا..الظاهر انها الحين في مصر ..
سالم ــ هيا من؟
ــ بنت خالك و زوجه عبدالرحمن ولد خالك..
طلعت طيبه برا وردت على المكالمه ..كان صالح جالس مكتئب ..
ــ ها خالي ..متى العرس..
طالع له صالح ــ بعيد الاضحى ا ن شاء الله
سالم ــ لحقت تدور عرووس ؟؟..
انصدم صالح ــ تقصدني.
ــ ايه ..ليش على بالك من ؟
ــ على بالي مبارك..
ـــ لا مبارك اتصل بي وعزمني عالعرس وان شاء الله اقدر احضر ..
ــ ههههههههه ماشاء الله عليه عزم قبل لايشاور احد ..
ــ لاتغير الموضوع ..متى ناوي؟
طالع له صالح بحزن ــ خلاص ..خذت نصيبي من الدنيا ..
انصدم سالم ــ عمي شتقول ...توك باول العمر..
ــ خلاص ياسالم لاتفتح الموضوع .
قام صالح ودخل الحمام .. تم سالم مستغرب ..دخلت طيبه ــ بروح اشوف هيا في الفندق..
ــ بتطولين؟
هزت راسها بلأ .. ــ ترا اخوانك عبير وعامر في بيت ابوك من ايام مع العنود ..كلمهم ..
انصدم سالم ــ العنود في بيت ابوي ؟..
ــ ايه ..احمد اصر عليها تقعد هالاسبوع هناك .. خصوصا انها مشتاقه لعمور وعبير.. فطلب مني ارخص لهم يروحون هناك..
سالم ــ ابي ارووح .. يمه اسالي الدكتور ابي ارد الدوحه .ضقت من هالمكان ..
طيبه ــ ان شاء الله ..عن اذنك ..ساعه وبرجع ..
طلعت طيبه من الغرفه في نفس الوقت اللي طلع فيه صالح وكان متوضي..
ــ وين راحت امك؟
ــ بتشوف هيا ..
ــ اهاا.. انزين بصلي وارجع اساعدك تصلي..
ــ لا بس ..خل الممرض يجيني محتاجه. تعلمت اصلي بروحي بس مساعده بسيطه من الممرض ..
ــ انزين ..
طلع صالح للمسجد وهو مكتئب ... يتزوج؟.,..لا ..خلاص ..
__________________

في الفندق ــ انا تعبت عمتي ماساتج قاعده تتكرر معاي .. خلاص ابي اتطلق ..
انصدمت طيبه ــ ليش عبدالرحمن يخونج؟
ــ لا .. بس لووح مب بشر..ماقدر اعيش معاه..
ــ هيا تعوذي من الشيطان .. الطلاق مب حل ..
ــ عمتي اكررهه..
ــ بس انتي غلطانه..
ــ عمتي لاتوقفين ضدي ..
ـ هيا ..كنت مفتكرتج اعقل من كذا .. للاسف ..كان مفروض تقولين له ..جي بيطلقج ..
ــ وانا ابيه يطلقني .. مابيه ..اكرههه ..
ــ وعيالج ؟ تبين تكررين ماساتي ؟؟ غمضت عيوني عن كل شي ولما فتحتها لقيت عيالي واحد منهم بين الحيا والموت والثانيه انهيار عصبي حاد؟؟..
ــ عمتي مب انتي السبب ..
ــ انا السبب. العنود ماوقفت معاها ..وهي حاسه بالذنب .. وكانت بتضييع بينها وبين الجنون شعره ..وسالم..ساالم شارد من دراسته وجاي مصر ..سالم الي طول عمره مجتهد وشاطر .. طلاقي من ابوه واهمال ابوه خلاه ولايسأل في احد .. جاي مصر مع ربعه وتارك دراسته في نص السمستر..لانه ماحس ان وراه ناس تهتم .. غلطتي انا وابوه .. تبين عيالج بكره يكرهونج؟..تبينه يضيعون ؟؟..ليش علشان عبدالرحمن مب مخليج على هواج ؟..
ــ مب بس هذا السبب ..هو مايحبني..
ــ انتي تحبينه ؟؟.
سكتت هيا ..كملت طيبه ــ انتي حسستيه باي حب علشان يتفاعل مع مشاعرج؟؟...انا على الاقل انصدمت بخيانه وكرهته .. انتي ماخانج ..وهو اعقل من انه يخونج ..
تذكرت هيا كلامه لما قال انها ماتقوله حبيبي الا لما تبي شي..
ــ يعني تنصحيني بشنو؟
ــ اكسبي قلب ريلج.. حرام .. حرام اللي تسوينه وعبدالرحمن مب قاصره شي ..لاجمال ..ولا رزانه ..وانا اعرف عبدالرحمن طيب .. مايطلع منه الغلط..
وقفت طيبه ، قالت هيا ــ وين رايحه.؟
ــ عندي ولدي فالمستشفى ..لازم اكفر عن اغلاطي في حقهم .. عشت انانيه لفتره طويله .. وربي رحمني وماعاقبني في عيالي.. لاتغمضين عيونج عن عيالج ..لاتصحين في الوقت المتأخر مثلي..عيالج مايستاهلون ..
ونزلت طيبه لعند الصغار وحبتهم.. وطلعت ..
تمت هيا تطالع عيالها وهي تفكر بكلام عمتها..تخيلت ان شي يصير لواحد من عيالها !,,,انقبض قلبها وانزلت دمعه بسرعه .. واجلست على الارض جنب عيالها اللي كانوا يلعبون ..احضنتهم لقلبها .. حست انها اول مره تشم ريحتهم من انولدوا .. تلذذت بحب اطفالها .. لاول مره من سنوات .
__________________________
عند جاسم في غرفته .. كان يحس بتردد .. دخل خليفه اخوه عند وحذف نفسه على السرير ــ ها ..بشنو تفكر ..حبيبه القلب ؟
ــ تقريبا ..
ــ كلمتها ؟
ــ لا ..وبطلمها لين العرس ..بس ابي اطرش لها رساله ..
ــ وشفايده اختك...
ضحك جاسم ــ جبتها .. شفايده اموون ..بخليها تروح لبيتهم .
ــ لا ..خل تواعدها فالجامعه احسن ..
ــ بس امون ثانويه ..
ــ ايه نسيت .. مممم ... بحلها لك ..انطر شوي..تعال يالخبل ليش ماتروح انت؟
ــ نعم ؟
ــ انا اعرف اغلب اللي ملجوا يزورون زوجاتهم .. اتصل براشد واتفق معاه ..
ــ شكلي ..دام صالح محد ..مالي الا راشد ..
__________
نزل راشد من غرفته وكانت المها في الصاله ــ رااشد ..شلونك؟
ـ الحمدالله .. متملل ..شرايج نطلع ؟
استغربت المها معامله راشد والبرود اللي هو فيه ..
ــ انزين ..دقايق البس ..
ــ خذي رااحتج واكشخي على سنجه عشره ...بنطرج في المجلس تعالي لي هناك اذا خلصتي ..
ــ بتم بثوب البيت ؟
ــ لا .. بلبس لي جيتي وذكرتيني ..على بالج نفسكم يالبنات ؟؟ دقيقه و اخلص ..
راح راشد للمجلس .. واطعت المها للغرفتها البست تنورة بيضا مع قميص احمر ساتان نص كم ... وتكحلت ومسكارا ..و لفت شعرها اي كلام بس نزلت غرتها .... حطت قلوس خفيف والبست كعب وانزلت تحت تقول لراشد انها خلصت ..حطت عباتها على يدها وشيلتها حول رقبتها .ونقابها بيدها .
دخلت المجلس وجلست جنب راشد
ــ رشووود ..شوف ابي تاخذني لمكان عائلي ..مابي اتم بنقابي ...اوه نسيت ..ماعزمنا خدووج ..
ابتسم راشد باحراج ..ــ انتي تمي هنا ..وانا بروح اشوفها ..
طلع راشد مستعجل استغربت المها من استعجاله وهي تطالع وراه ..
ــ شفيه؟؟..
اول ما طالعت جدامها صارخت لااااراديا ــ يماااا .. بسم الله الرحمن الرحيم
ونطت من مكانها وكانت بتطيح بسبة الكعب لكن جاسم ماتحرك من مكانه ..
راحت بتطلع من المجلس لكن الباب كان مقفول .. اخترعت ..نزلت راسها بحرج ..
ــ ممكن اتكلم معاج كلمتين؟
رفعت راسها كان واقف وراها متكي على الجدار يطالعها من بعيد .. رجعت مكان اللي كان راشد جالس فيه وحطت رجل على رجل ..ونفس الشي سوسى جاسم رجع لمكانه وحط رجل على رجل ..
ـــ شخبارج؟
حكت المها حواجبها بعصبيه ..
ــ ليش يهمك؟؟
توقع جاسم ردها .
ــ كنتي تقدرين ترفضين .
حست المها بغيض ــ اي كنت اقدر..ورفضت .. لكن ..
ــ لكن شنو ؟.مااعتقد جبروج على التوقيع ..
ـــ صدقني ماكنت بوقع ..لكن ..قلت بعطيك فرصه ..
ضحك جاسم مستغرب ــ فرصه ؟؟.. وليش يابنت يوسف بتعطيني هالفرصه ..
انقهرت من ضحكه ولفت وجهها عنه ــ بس لانك اعترفت لصالح بكل شي ...
سكت فجأه . مرت دقيقه وقال ـ اعترفتي له ؟..
ــ كان لازم ابين سبب رفضي لك..
انصدم جاسم ــ وانا اللي توقعت انج لنتي شوي ..
ــ ليش مستهين باللي سويته ؟.. تخيل الموفق صار لاختك .. ترضى ؟
ـــ انا مب نادم ...
ــ نعم ؟؟
ــ اي ماانكر اللي سويته غلط,,وأكبر غلط.. وماكان مفروض اسويه ..لكن مب ندمان ..
ــ ياوقاحتك يا اخي ..
ابتسم ـ لما تعرفين اسبابي مابتسمينها وقاحه ..
ــ اسباب ؟؟ تتعرض لبنات خلق الله و عندك اسباب بعد ؟ رجاء لاتستهين بذكائي ..ترا انا مب غبيه علشان اقتنع بسخافاتك!..
وكانت بتقوم لكنه مسكها من كتوفها ..تكهربت المها حاولت تنفض يدينه عنها لكنه كان اقوى ..جلسها في مكانها .. وقال وهو يرجع لمكانه ..
ـــ ماخلصت كلامي ..ولا تفهمين الامور على كيفج ..
ــ شـ..تـ..قصد؟؟
قال وهو يحط رجل على رجل ــ ماقصدت ان عندي اسباب للي سويته ..اللي سويته غلط . الشيطان وزني ..وكنت امزح وانصدمت لما قربتي مني كنت بدفعج واقولج استري على عمرج لكن ..لما تبين لي هدفج ..مسكت نفسي ..صج ..صج ذليتيني بهالحركه ..بس انا استاهل ..
ــ عيل شقصدك بالاسباب ؟؟..
ــ قصدت اني مب نادم..لاسبابي الخاصه .الي بعلمج عنها ..
ــ مابي اعرف .. مايهمني ..
لفت ويهها عنه وعقدت يدينها على صدرها ...
تم يطالعها مبهور بشكلها .. لكنه ماحب يبين انبهاره .. نزل عيونه
ــ يمكن مايهمج..لكن يهمني..
طلع الرساله من جيبه ..ــ صج اني استأذن من راشد اني اكلمج..لكن .. انا ببتعد .. بنلتقي ان شاء الله في الملجه .. اللي بعد اسبوعين .. انا مصر البسج الشبكه واحب على راسج .. واتوجج كأغلى انسانه في حياتي ..
حط الرساله وحطها على الطاوله .. وقال وهو يشوفها لافه عنه
ــ في حفظ الرحمن ..
وطلع جاسم من الباب ..تمت المهام تحجره مكانها ...شسالفه قلبها ؟؟.. تحس بمكان يدينه على كتوفها .. ريحته رجعت نفسها اللي مطبوعه في انفاسها ..نفس ريحه الشماغ .. تنفستها من جديد وغمضت عيونها بتنهيده .. لييش.؟.. ليش ياقلبي تعطيه الاعذار؟؟...
مسكت الرساله وحطتها تحت عبايتها وراحت عند الباب ..طقت الباب بقوة ــ رشوووود .. يالخاين ..انا تسوي فيني جي ؟؟
فتح راشد الباب وهو يبتسم بخبث ــ انا عارف انج مابتطيعين ..
عصبت وهي تطقه على جتفه ــ انا اختك يالدب !..
ــ حط يده حوله كتفها ــ انزين يا اختي العزيزه .شرايج بزوجك الجيكر؟
ــ دامك تعرف انه جيكر ليش زوجتني اياه ؟؟..
ــ خفت تطيحين في جبدي.. خخخخخ..
ـ بايخه ..بتطلعني ؟..
طالع لها ببرود ـ لا طبعا .. خديجه نايمه شلون اطلعج واخليها فالبيت بروحها؟..
ــ جيب لها مبارك يحرسها هع ..
ضربها راشد على راسها ــ بااايخه .. يله تعالي المطبخ سوي لي شي ازطه ..
قالت المها بدون وعي ــ اييه هم يحبون وانا ابتلي..
وانتبهت لغلطتها الفادحه .. سكتت فجأه لما وجه راشد قلب اصفر ..
كان بيروح لغرفته لكنها امسكته من يده ــ والله ياخوي ..ديمه مابتكون الا لك !..
طالع لها راشد منصدم ــ انتي قد هالحلفان ؟..
ــ دام هالراس يشم الهواا ..قده ونص ..
ــ المها .. شوراج ..
ــ لاتقلق ..لكن تذكر (( ان كيدهن لعظيم )) .. تعال اسوي لك اندومي .
طالع لها مكتئب ـ اندوومي ؟؟.. ياهل عندج ..
ــ تعال وبتشكرني ,,يكفي عليك اذكرك بطفولتك..
ــ لي شانا عرفت الاندومي وانا صغير؟؟
المها ــ لا .. بس كافي اعطيك شي يحسسك بالطفوله ..
ــ مااقول الا الله يخلف عليك ياجاسم تزوجت بزر !!...

___________________________


في غرفته بعد ساعه .مسكت الرساله وفتحتها ..طان خطه عادي يشبه خط الرقعه ..والرساله في صفحه وحده ..


بسم الله الرحمن الرحيم ,,

زوجتي العزيز ة :

فقط اعلمي اني لست نادم لانه من خلال تصرفي الاحمق عرفتك ..عرفتك عينيك ..ووجدتك في معمعه الحياه .. فقدت الامل في ان اتزوج بزوجه يرف لها قلبي ..كانت الخيارات امامي بكثره ..لكن لم امل لأي منهن .. وعندما وجدتك اعدتي الى روحي الحياه ..
اجل اخطأت ..لكن لست بنادم لاني عرفتك .. عرفت اي كبرياء تملكين ..عشقت كبرياءك قبل ان اعشقك .. عشقت جرأتك قبل ان اعشقك .. عشقتك قبل ان اعشقك ..

ملاحظة : آسف لاني كسرت ضلعا فيك.,اعدك انه آخر شيء أكسره ..

جاسم .
___________

طالعت المها رساله مره ثانية وقالت باستهزاء ـــ لا وكاتبها بالفصحى ...امحق..
لكنها لقت نفسها تقرأها مره ورى مره .. حست انها حفظتها .. حطت يدها على قلبها ــ لاتخون فيني .. لاتخون .. اتفقنا نكره ...مااتفقنا نحب ..مهما كانت الاسباب ..لا للحب ياقلبي ..لاتنبض بهالسرعه ..ارجووك لا ..

لكن قلبها تم يختلجه مشاعر كثيره .. عاندها ونبض جاسم ...
_______________________

دخل عبدالرحمن الغرفه ــ السلام عليكم ..
ــ وعليكم السلام ..
ـ انا اسف ماقصدت اطقج بس قهرتيني ..
ــ انا اسفه مابلغتك..
جلس على البلكونه .. وتمت هيا تلاعب الصغير..
طالع لها مستغرب ..اول مره تسويها .. بالعاده تعطيه الاكل او تغير له وتخليه يلعب بدون ماتتدخل...
ناداها ..جت لعنده ..
ــ نعم ...
ــ في شي.؟
استغربت هيا ـ لا ..ليش؟؟..
ــ مادري احس فيج شي..
ــ لا مافيني..عبدالرحمن شرايك ناخذ العيال ونروح لعند سالم فالمستشفى..
ــ سالم؟ اي والله سيت انشغلت مع المؤتمر ونسيته ..
ــ نساك الموت امين ..حرام تلاقيه متملل ..شرايك؟
ــ خوش راي ..
ــ خلاص بلبس واجهز الصغار..
هنا تأكد عبدالرحمن ان هيا فيها شي ..ماعتاد منها هالحركات الانسانية ..قام غير ملابسه واتجهوا لسالم اللي استانس بوجود الصغار..
________________________
كانت العنود في قمة وناستها وهي تحس ان في شي رجع لحياتها مثل قبل .كانت تاخذ اخوانها المدرسه وترجع البيت ..تجهز لهم الغدا بمعيه الخدامه ..بعدين تتغدى معاهم ... بعدين تقعد تدرسهم لين المغرب بعدين يلعبون بلاي ستيشن لين حزت نومهم .. تنام مع عبير بالغرفه وعامر ينام بغرفته ..
كانت حزة البلاي ستيشن العنود لابسه بيجامتها اللي عليها تويتي ومسويه شعرها ضفيره على طولها وتلعب كورة مع عامر ..
ــ مابتغلبني .. انا بقووز..
ــ تفوزين طل .. خسرانه 5-1 وتقولين تفوزين ..
ــ انا بساعدها ..
التفت العنود للصوت وابتسمت من قلبها ــ شفت نااس بيساعدووني ..
جلس احمد جنب العنود على الارض واعطته الهاند وامسكت في زنده
ــ وره الويل هالمفعوص اللي يستجري ويسجل اقوال ..
احمد ــ بحاول بس مابضمن الفوز ..
ــ احمد لاتفشلني ..
نزلت راسها فطاحت غرتها على عيونها فمد احمد يده رفعها ..انحرجت العنود وطالعت له مستحيه ..
عبير ــ بس عاد عن الافلام المصريه .. نبي نعرف من يفوز ..
انحرجت العنود ودفنت راسها في ذراع احمد اللي ضحك بقوة
ــ والله انتي بالمره ماعندج حادي بادي .. بغلب اخووج..
عبير ــ اذا العنود شجعتك انا بشجع اخوي ..يله عمووور ورينا الفن ..
ــ أنا اراوويج ..
وتمواا يلعبوون و البنات مسويات فيها تشجيع يصارخون بقوة ويصفقون ..وبالاخير ..فاز عامر .
احمد ــ حظ المبتدئين ..
ضحك عامر ــ اشوف حظك اسعفك ..واضح مالك بالسوني ولا باللعب .. حتى الاعب مضيعه ماتعرف اي واحد يلعب . العنود تلعب احسن منك .
احمد ــ عن االاحراج يا النسيب .. خلني جدام زوجتي فنان .
ضحكت العنود ــ طول عمرك فنان..
عبير ـ اقول تراج ماعرفتيه الا من كم شهر .اي عمرهذا ؟؟..
عصبت العنود ــ عبيرووووه اناا بــ...
لكن قبل لاتكمل ركضت عبير داخل ــ موعد النوم موعد النوم ..
لحقها عامر ــ انا بشرد مع السلامه يالنسيب ..
احمد ــ مع السلامه ..
العنود ــ هالبنت لساانها متبررري منها ..
احمد ــ اشتقت لج ..
انصدمت العنود ..نزلت راسها ..
ــ اليوم رجعت البيت لقيته خاوي..قلت وينها حبيبه قلبي.. والله مشتاق لها .. جيت هنا بس اشم ريحتج واشوف بسمتج واروح بيتنا ..
استحت العنود ــ صج ... بس؟؟
احمد ــ ايه بس .. ابي انعش روحي شوي..
ــ فديتك ..
ـ ها ؟؟.. شو قلتي؟؟...عيدي؟..
العنود انحرجت ــ ماقلت شي ..
ــ الا ..تفديتيني .. يا الله ..من قدي اليوم .. احبج عنودي .
حست العنود انها بدت صفحه جديده مع احمد . قالت له بخجل .
ــ وانا احبك.لا ....الااموت فيك ..
مسك يدها وباس راسها .. راحت كل شكوكه مع هالاعتراف وهالنظره في عيونها ..
ــ متى تردين بيتج ..ترا مصختيها ؟...
حسته يبي يطلع من مو الحب عن لايتهور
ــ ممم امي بترجع بعد شهر ..فاعتقد بنطر جيتها..
عقج احمد حواجبه بعصبيه ــ شهر..شلون بصبر عنج شهر؟؟؟...
ابتسمت بخبث ــ مادري..
مسكها من خصرها ووقفها ــ الله يعيني ..وصليني للباب ..
ــ زعلت حبي؟
ــ لا مازعلت ..المهم رااحتج حبيبتي ..
كان يقول كلماته بانفعال ..قالت بتدلع ــ اي زين .. ترا امي بتجي هي وسالم الاسبوع اللي جاي ..وبتقعد هنا فتره .. .. وابوي قرر يسكن في بيت الضيوف ...هالفتره ..
احمد ــ احللفي!...
العنود ـ والله ..
شال العنود فالهواا ــ احلى خبر والله ..
ــ احم احم ..
استحى احمد شوي ويحذف العنود على الارض ..كان عمه سعيد واقف عند الباب ..
ــ ششـ... لونك عمي.
ــ طيب زان لونك ..شلونك انت؟
هز راسه ــ الحمدالله ..عن اذنك
ــ اقعد تعشى ..
ــ لا تعشيت مع الوالد .. تصبحون على خير..
طلع احمد اول مالف على العنود انقهر انها كاتمه ضحتها ..

قرب سعيد ــ ليش مارحتي مع رجلج ؟
ــ قريب يبه ..الحين خليني مع عامر وعبير لين تجي امي..
ــ انزين خل يحطوون لي العشا ترا ميت جووع ..
ـ تآمر يبه .
_____________________
رن التلفون ..وارفعته بلهفه ..
ــ هلا ..
ــ هلا فيج .. شخبارج ؟
ــ الحمدالله ..
ــ انزين ..شلون راشد ؟
ــ على حاله ..بس امس سوى مقلب في مهوي وخلاها تطلع لزوجها بدون ماتدري..
ــ ههههههه ..يجي منه والله ..مايسوي لي مثل هالمقالب؟
ــ لا احلم .. الحمدالله مهوي ماغلطت بشي ولا طلع منها شي بدون ماتدري.
ــ مشتاق اشوفج ..
ــ ............
ــ انزين حبي .. بغيت اقولج .. بما انا مابنسوي ملجه ..ديمه اعرضت علي فكره .. اشوفها حلوة.
ــ فكرة شنو ؟.
نلتقي في محل تصوير خاص ديمه تعرف وحده توثق فيها ..نصور صور فوتوغرافيه البسج فيها طقمج؟. شرايج؟..
ــ ........... مادري..شوري بيد راشد ..
ــ خلاص بكلمه ..بس قلبي يعورني عليه..
ــ ليش؟؟..
ـــ ماهاين علي اشوف البنت اللي يحبها تروح لغيره ..
ــ ها ؟..
انصدمت خديجه ـ كمل مبارك ــ اي.. اعرف انه يحبها .. يله .. نصيب ..
ــ صحيح..عمي مارضى يفتح الموضوع معاك؟
ــ مارضى للاسف ..
ــ الله يعين ..
ــ حبيبتي ..بخليج الحين ..توني راد من المجلس ومتكسر ...اشوفج بكره؟
ــ هههههه ..حلوة اشوفج بكره ..
ــ بكره يجيبج راشد غير؟
ـ ايه بس وين تشوفني انت في قسم وانا في قسم ..
ــ قصدت بالاستيديو..
ــ هااا..مادري..
ــ فديييت المنحرجييين .. خلاص بكلم راشد بكره ..يله تامرين شي؟
ــ سلامتك..
ــ تصبحين على خير .
ــ وانت من هله ..
ــ كدووج ..
ــ لبيه .
ــ لبيتي قلبي ... احبج ..
استحت خديجه حدا وحمدت الله انه مب جنبها ..
ــ فمان الله ..
وصكر وصكرت التلفون ... دخلت المها ــ ايي شعندها اللي تحب ..
ــ انت آخر من يتكلم ..لقاءات وحركات ..
ــ كدووج ياحماره .. من زين اللقاء يعني .
ــ هههههه ..
جلست المها جنب خديجه اللي انتبهت .
ــ رجعتي للشماغ ؟؟
ـ مووضه ..
ــ امحق مووضه ..
لكن المها كانت تحب الريحه .. متمسكه بها ...
ــ اشتقت لصوصي..
طالعت لها خديجه مستغربه : من ؟ .
المها ـ صالح عمي . شفيج ..
ــ صوصج ؟؟ لا فلح الريال ..ريال عود شواربه تارس وجهه صوص ؟
ــ كدووج ..حلي عني !,,
قامت المها وراحت غرفتها ...
خديجه ــ صوصي .. ياويل حالي.. عمي غدا كتكتوت !.

موفق بإذن الله ... لك مني أجمل تحية .