الفصـل الخامس عشر



فتح عيونه بتثاقل...مب مستوعب شقالت امه ...
ــ شنوو؟؟...
ــ بروح بيتهم قوم وصلني ..
رفع جاسم نفسه غصب ــ بيت منو هالحزه ؟؟
كان مب قادر يفتح عيونه ويركز بالساعه اللي كانت تقريبا 9 الصبح ...
ام جاسم ــ شفيك ماسمعتني ؟؟قوم ودني بيت خطيبتك بشوفها..
فتح جاسم عيونه على كبر ــ نعم ؟
طالعت له امه معصبة ــ ونعامه ... شنومااتسمع ؟؟
جاسم ـ وين رايحه للناس من الصبح ؟؟؟..
ام جاسم ـ بشوف جنتي ... مرت وليدي ..
استغرب جاسم ـ اتصلتي وحددتي موعد ؟؟
ــ لا طبعا ..ابشوفها عالطبيعه هالايام المكياج يسوي معجزات .. ابشوفها قاعده من النووم متعاجزه ..
ضحك جاسم ــ يعني وان مااعجبتج يعني شبتسوين ؟؟
ام جاسم ــ خليني اشوف بالاول بعدين احكم ..بلوه .. والله بلوه ..
جاسم ـت اووه ..اليوم جمعه .. هم يجتمعون كل جمعه في بيت جدهم ..
طالعت له امه معصبه ــ شدراك ؟؟لايكون من البنات اللي...
قبل لاتكمل امه ــ تعرفيني مب راعي هالسوالف...بس صالح عمها ياكثر ماكان يعتذر عن عزايمي له يوم الجمعه لانه لمة الاهل عندهم ..
ام جاسم ـ خير وبركه .. على الاقل اتناقش مع جدتها عن الترتيبات ..والموعد ..
جاسم ــ يمه فديتج ..لاتطفشين الناس...وتعاملينهم إنا احسن منهم ..ترى مستواهم مثل مستوانا وازود ...
ام جاسم ــ يصير خير ..قوم تسبح وغير ملابسك وانا ناطرتك تحت ..محد غيرك يدل دربهم ..
هز جاسم راسه موافق..ماصار لهم ايام اعلنوا عن الموافقه وامه مرتزة من لصبح تبي تشوف البنت ..
دخل الحمام واخذ وقته يبي يطول على امه عن لاتروح للناس من وهل وطول في الحلاقه والتسبح واللبس وشوي يمر غرفه اخته يحطط مكياج .. .يبي بس عذر علشان يطول .. تبخر وتدهن بالعود وطلع وانصدم ..

امه وامنه وبثينه ..وريان تحت متزهبين يروحون معاه ..

ــ نعم نعم نعم ... على وين العزم ؟؟

امنه ـ بروح اشوف خطيبتك..
بثينه ــ وانا بعد ..
طالع ريان منصدم ريان تطالع حوله اي شي الا هو .ـ مافيها شي نبي نشوفها..
جاسم بهدوء غريب ــ ماباخذ الا امي..
ام جاسم ـ مافي شي ياوليدي خلهم يروحون معاي..
جاسم ــ يمه شفيج محمله العرب كلهم !.
ــ هذي خطبه وزيارتنا لازم تكون جماعه ..جدتك وعتك كانوا بيجون بس ماصح لهم .. ..يلا جدامي..
طالع بثينه ومالقى يطلع حرته الا فيها ــ هالمفعوصه ماتروح ...
بثينه ــ لييش؟؟؟ ولا عشان ابوي مايقدر الا على امي؟؟؟
طالعها مبقق عيونه ــ ايه ..عشان جي ..غرفتج يله !
عصبت بثينه واركضت فوق تصيح....
كان وده ريان ماتروح ... لكن ..ماله امر عليها .. هي تبي تعاني .. بكيفها!!...
طلع قبلهم ..

طالعت آمنه لريان ــ متأكده تبين تجين ؟؟
ريان ــ ايه ..
والعبره اخنقتها ..
ام جاسم ــ ياريان .. والله اني كنت ناويه اخطبج انتي ويكون يومج انتي..بس هو سبقني وراح لجده ...ماعبر احد ماعبرني ولا عبر ابوه ..وجده مااستشار احد .. وبوه ....مسكين للحين مجروح ..عز عليه ياخذ غريبه ...وبنات عمامه وخواله حوله ..
ريان ــ يا خالتي نصيب .ونصيبي مو معاه ..يمكن مع غيره .. وانا مقتنعه بهالشي .. بس أبي أشوفها .. أبي أقعد معاها .. أبي أقتنع باختياره .. علشان يرتاح قلبي .وأعرف انه اختار صح ..
آمنه ــ بتعذبين عمرج بس ...
ريان ــ أبي أتطمن ..وهو خلاص .. ماشرا قلبي ..وصار أخو ..وبس ..

ام جاسم ـ أبطينا عليه .. خل نقوم ..توكلنا على الله ..

__________________

في بيت عبدالرحيم ..

كانت ديمه متملله حدها .. المها في المطبخ وخديجه معاها ..ونوف كالعاده ماجت ..وفاطمه ..في محرابها مثل ماتسميه المها..
جدتها جنبها ــ قومي مسدي ريولي يا بنت ..
ديمه ـ جده .. ملاااانه .. ماافيني..
ــ وين أمج ؟
ديمه ــ تعرفين تجتمع عند اهلها كل جمعه .
ام عبدالرحيم ـ وليش مارحتي معها ؟
ديمه ـ ايه هذا الناقص ..اقابل هذيك الوجيه ..لا ياجده ..هذا بيت اهلي..مالي غنى عنه وما أبدلكم ابد ..
ام عبدالرحيم ــايه اصيله اصيله ..اقول..قومي مسدي رجولي وخلي هالسوالف عنج ...مابتنفعج ..
دخلت المها شايله دله القهوة ــ اي ماتبدلينا ؟؟اشك ..عند اول مواجهه بتبيعيننا بتبن ..
ديمه ـ كلي تبن بس..
الجده ــ ديموه استحي على وجهج تكلمين الاكبر منج بهالطريقة ..
ديمه ـ جده لاتطفشوني الجمعه الجايه اروح بيوت خوالي!..
الجده ــ اقول ..اذا بتمين على هالاخلاق روحي ومع ألف سلامه ..أنا مااربي قليلات أدب!..
ديمه ـ أفاااا ..وتقدرين ؟؟
ام عبدالرحيم ـ لا والله مااقدر قلبي مايطاوعني..ومابلاقي حد يمسد ريولي مثلج ..بس كلمة وطلعت ..
احضنت ديمة جدتها بحنان ... في الوقت اللي تطالعهم المها باستغراب
ــ انا ماافتكيت من صالح وخدوج تنشبون لي انتم بعد !!...
ضحكت ديمه وهي تطالع الباب كان راشد عند الباب ..
ــ جده ..ضيوف ..
ــ المها ..استقبليهم ..

كانت المها لابسه شيلتها السودا وجلابيه لونها فستقي حريريه ومطرزه بالشك جابتها لها جدتها لما ردت من الامارات المره اللي طافت ..
ــ انزين جده ..
مرت سلة العطور اللي عند الباب وحطت منها .. وشيكت على شكلها وطلعت تستقبل الضيوف ..
وديمه شالت دله القهوة رجعتها دخل ورجعت زادت البخور على الجمر اللي كان في طرف الصالة ..
ــ تفضلوا ..
دخلت المها وقلطت ضيوفهم .. وبعدين راحت المطبخ مستغربة من البنات اللي جاين مع الحرمة ...لو حرمه بروحها اكيد تعرف جدتها ..لكن بنات ؟؟..

خديجه ــ شفيج ؟؟
ــ جونا ضيوف .. شلون بالاكل ؟
خديجه ــ يكفي وزياده جدي اليوم الصبح جايب له خروف وطبخته جدتي كله عالغدا .. لاتنسين بيجون سالم وعبير وعامر بعد شوي ..
المها ــ غريبه .. كلمت العنود قالت بيروحون دبي ..
خديجه ـ بيروحونها بس مروا الدوحه كم ساعه ..طيارتهم فالليل .. راح صالح يجيبهم ..
المها ــ بودي الماي والعصير .. وانتي جيبي الشاي والقهوة ..
واول مادخلت المها
ــ حيالله ام جااسم ..تو مانور البيت ..
ــ منور بأهله ..
وقفت المها متصنمه عند الباب ..
ام عبدالرحيم ــ تعالي يالمها سلمي على ام جاسم .. جاسم ولدنا وقريب باذن الله يصير نسيبنا .. تعالي ليش مستحية .. اسمحي لنا يا ام جاسم مهوي بجلابية البيت وريحه الطباخ ..
ام جاسم ـ لا والله بالعكس غلطتنا جينا بدون موعد ..
حست المها باحساس بشع قدمت لهم الماي والعصير .. وطلعت وراحت المطبخ على طول وهي منزله راسها ..
دخلت المطبخ وشوي وتصيح..
خديجه ــ شفيج ؟؟
ــ ضيوفنا هم اهل جااسم ..ففففففففففففففف...
خديحه شهقت ـ لااااا... وشافوج جي ؟؟
هزت المها راسها بصدمة ادخلت ديمه وهي مبتسمه ــ الحمدالله اخيرا شي يغير الروتين !..
طالعت لها المها بعصبية ـ مب وقتج ..ودي الجاي والقهوة والحلو..انا بطلع عند فاطمة الاقي لي بدله البسها واسنع شكلي...صكي باب الصالة العود ولا ماانتبهتي ان البنات للحين بنقاباتهم ؟.
وراحت لغرفة فاطمة بدون ماتسمع الرد ..
ــ فاطمة .,,
ــ هلا حياج الغرفه مفتوحه ..
المها ــ انقذيني .. اهل جاسم تحت وشافوني بهالبهدله ..
فاطمة ـ خذي دش سريع ..وأنا بطلع لج بدله من عندي..

دخلت المها واخذت دش سريع بعد خمس دقايق اطلعت لفاطمة اللي عطتها بدلة قميص ساتان ابيض مع تنورة حمرا .. فيها حركات تجنن أطرافها دانتيل ..

نشفت شعرها عالسريع بالسشوار وحطت لها كحل وقلوس ناتشرال خفيف .. وبلاشر ..
ــ انزلي..
ــ بس هالمكياج ؟؟ ..
فاطمة ـ انتي تجننين ماشاء الله عليج من دون شي ..والحين ..احلى ..خليج طبييعه ..
واعطتها عطر تحط منه .. ولبستها عقد بسيط و حلق لؤلؤي وخاتم لؤلؤي..
ــ انزلي تراج ابطيتي عليهم ..
طلعت لهم المها مبتسمة كارهه الموقف لكن مجبورة ..
ــ السموحه تأخرت ..
وجلست عند جدتها اللي طالعت لها برضا .. انبهرت ام جاسم بالمها .. ونفس الشي ريان وآمنه .. تموا يسمون عليها..
ريان ـ تدرسين ؟؟
كانت ديمه جالسه ــ ايه فالجامعه .. ادارة ..
آمنة ـ كم عمرج ؟؟..

ديمه ــ عمرها 21 سنة .. بس ماشاء الله عليها بتتخرج بعد سنة .. ومعدلها ماشاء الله ثـ...
قاطعتها ام عبدالرحيم ــ ديمه قومي داخل نادي خديجه تجي تسلم ..
ديمه ــ جده خدووج مقابله الغدا ..
ام عبدالرحيم ــ اجل قومي اتصلي بنوف ..
حست ديمه أن جدتها قاعده تصرفها فقامت واتصلت بنوف وخبرتها السالفه ..



سكرت نوف التلفون وهي مبتسمة والتفت حصلت منصور واقف ..

ــ هذي ديوم ..تقول لي ان اهل جاسم اليوم طبوا عليهم ..وان وجه المها صار تلفزيون ..
ابتسم منصور وحس انه بعيد عن اهله وايد ــ مسكينه ..
نوف ــ ممكن لو سمحت يعني تاخذني لهم ؟؟جدتي طلبتني بالاسم ..يا انها تبيني ولا تبيب تصرف ديوم هههه..
صحك منصور وقال ــ اكيد الثانية مع انه اكيد مايستغنون عنج في هاليوم ..بدلي ملابسك وانا ناطر ..

دخلت نوف الغرفه وبدلت ملابسها ..طول هالاسبوع كانت تطلع مع منصور لكل مكان تعمقت علاقتهم ببعض ..لكن قلبها للحين ماتطمن ..طلعت من غرفتها وطلع من غرفته ..
ــ جاهزه ؟
هزت راسها بابتسامة ..
___________________

عند المها ..كانت المها تفكر اميه فكره في راسها ..كانت في لحظة تقرر انها تقول لهم ولدكم مابيه ..وفي اللحظة الثانية تقول لا فضيحه .. تقول في خاطرها ..هو مب شاريني هو يبي يكسر شموخي .وفي اللحظة الثانية تقول لو يبي يذلني ماطرش اهله !!.. وتمت على هالحال سرحانه مب وياهم بالمره ..
كانت ريان تطالعها بنظرات حزينة .. وتتأملها ..البنت جميلة ..ومثقفة .لكنها مب اقل منها .. ليش جاسم مااختارها ؟؟.. هو ين شاف البنت هذي علشان يتحدى الكل لأجلها !!...
طالت ام جاسم اللي كانت تسولف ويا ام عبدالرحيم ونظرات الاعجاب واضحه في عيونها ..وآمنه كانت مبتسمة عادي ..محد حاس بالنار اللي في قلبها ..

طلعت فاطمة وسلمت عالجماعه وجلست معاهم ..وهي ملاحظة شرود المها .. اشرت للمها انها تقوم وتروح معاها للمطبخ ..
دخلت المها المطبخ وهي حاسه بضيق ..
ــ شفيج ؟..
المها ــ مخنوقه ..
ــ انزين من اللي كانت قاعده حذاج ؟
ــ هذي ريان ..بنت خالتهم ..
ــ انزين ليش تطالعج جي؟؟
ــشلون تطالعني؟
ــ كأنج ماخذه شي لها َ!.

المها ـ ماتهمني..انا في راسي مية موال وآخر همي هي ..
قربت منها خديجه ــ شالحلا شالحلا .. لا شكلج طيحيتيهم من اولها ..
المها ـوالله انج رايقه ..
طلعت عنهم وراحت فوق لغرفة فاطمة ..
فاطمة ـ شفيها لايكون مغصوبه ؟
خديجه ــ عاد ما ادري شنو في راسها ..شالكشخه أول مره أشوفج ببدلة ..
فاطمة ــ عيونج الحلوة ..عاد ام عبدالرحيم نادتني افتشلت انزل بجلابية ..لبست هالبدله .
كانتت فاطمة حاطة شيله على جتوفها وفاجه شعرها ونازل على جتوفها ..ولمسة مكياج خفيفة قميص حريري احمر وتنورة كاروهات احمر اسود ..

ــ خل اساعدج ..
وتمت تساعد خديجه فالمطبخ في ترتيب السلطات والعصاير والاكل..

___________


في المجلس..رجعوا من صلاة الجمعة والكل يسولفون عن رمضان ونيتهم في رمضان ..
بو عبدالرحيم ــ انا ناوي اعتكف لي اسبوع فالمسجد ..
صالح ــ وانا وياك يايبه .. بس خله آخر اسبوع ..
بو عبدالرحيم ــ لا يبه .. انت بنملجك على خطيبتك وتفرغ لعرسك بيكون بعد العيد باسبوع ..
انصدم صالح ــ بس بدري يايبه ..
بو عبدالرحيم ـ ياولد ي خل افرح فيك واتطمن عليك .. انا قلت لام عبدالرحيم تعطي البنت خبر يمكن حد من خوالها يجي ..
ــ مثل ماتامر يبه ..
ابتسم جاسم ــ يعني بنفرح فيك يا بو جسوم ؟؟
صالح ــ ان شاء الله ..
حس جاسم ان صالح للحين ماخذ منه موقف فذبلت ابتسامته ..
ــ وانتيا مبارك ..متى ناوي ؟؟..
مبارك ــ أنا بأمر راشد !..
ابتسم راشد بخبث ــ وانا اقول بدري. خلنا نفضى اول لصالح ونقوم فيه بعدين نتفضى لك..
طالعه مبارك بحزن ــ قلنا بأمرك ..مب تحت رحمتك عاد !..
صالح بخبث ــ جبتها لنفسك !..
بو عبدالرحيم ــ صالح .. قوم شوف الغدا زهب ولا لا ء..
قام صالح وراح للمطبخ من الباب الخارجي .. وانصدم من شاف البنت اللي تضحك مع خديجه .ماقدر يشيل عينه عنها ..
انتبهت فاطمة اركضت داخل ..
خديجه ــ صلووح ..
وهي كاتمه ضحكه شكبرها ..
ــ هلا ..
ــ مب عادتك ماتنحنح ..
ــ من هذي؟؟..
حست انه مذهول..
خديجه بعبط ــ من اهل جاسم ..
طالع لها منصدم بعدين كان بيطلع قالت خديجه ـ امزح معاك ... هذي مدامتك المستقبلية !
ارتاحت ملامحه ــ حسيت ..

وسرح وغمض عيونه شوي ــ يا حلاتها ..
خديجه ــ واو ..نقول حبينا ؟..
ابتسم ــ مبدئيا .. الغدا جاهز ؟.
خديجه وهي مستانسه ــ يب ..
وقف صالح عند الصحن اللي كانت تجهزه واكل منه شوي ..
ــ اهم شي تعرف تطبخ ..شنو هذي؟
خديجه ـ سلطة يونانية..
ــ طعمها غريب .. شحاطه عسل؟؟
خديجه ــ سوت له درسر من عسل وليمون وملح ومدري شحطت بعد ..
جلس صالح ــ حطي الغدا .. انا باكل السلطة هذي ..
سحبت خديجه الصحن من جدامه ــ قوم ود السفره وناد الشباب يشيلون الغدا ..
صالح ــ انتي قد هالحركه ؟؟
خديحه بابتسامه ــونص...
هز راسه وراح المجلس واشر لمبارك ..
مبارك ــنعم ..
ــ روح المطبخ يبونك ..
ــ انزين ..
وابتسم بخبث ووقف شوي برا ..

كانت خديجه لابسه ملفعها بس مع الحر والطباخ كانت متبهدله وخصله شعرها لاصقة على وجهها ..
ــ ها شتبوون ..
بطلت عيونها على كبر ..
ابتسم مبارك وتشقق وكانت اول مره يشوفها من حطت له الورقه فالسيارة ..
ــ قال لي صالح انج تبيني ..
ضاع صوت خديجه من الاحراج وقلب وجهها احمر ــ لا سلامتك ..
ــ تدرين الرسالة ...احلى شي اهداني اياه احد في حياتي..
حست خديجه قلبها بيوقف .. ــ انا قلت لصالح يناديكم تشلون الغدا ..
مبارك بخبث ــ اها ..
خديجه تبي تضيع الموضوع ـ جا سالم ؟.
مبارك ـ لا .. ولا بيجي .. تكنسلت طيارتهم .خديجه ..
ــ نعم ..
ــ انعم الله عليج .. احبج ..
وطلع مبارك من المطبخ وهو مبتسم ..
كان صالح واقف بره ويعيب ــ خديجه ...احبج ....امحق رومانسية ..خديجه ..احبج ..
ــ وانت تتسمع ؟؟
صالح ــ هي جابتها لنفسها ومااعطتني السلطة ادخل داخل مره ثانية وجيب السلطة اليونانية .
مبارك ــ ومن قص عليك وقال لك اني بوقف معاك ضدها ؟؟..
ــ والله انكم الاثنين ..حمير..
ــ طالعين عليك هههه..
صالح ــ انزين ..ان ماقنعت رشود ان عرسكم يكون بعد سنتين ولا ثلاث ..
ــ لا الله يخليك .. على الراس صالح ..بروحه رشود حاطني براسه !
صالح ــ ايه اعتدلوا ..يله روح ناد الشباب يشيلون الاكل ..ترا ابوي يوعان ..
في هالوقت خديجه اطلعت بعد ما طلبت من الخدامات تودي الاكل وتجهزه ..
وراحت غرفة فاطمة واستعارت منها شي تلبسه بعد ماخذت دوش سريع ..

_____

كانت نوف جالسه مبتسمه ..عجبتها ام جاسم ..واعجبتها امنه لكن قلبها مب مرتاح للريان ..احتقان عيونها ..تعبير المتذمر على ملامحها .. اتفقوا ان الزواج بعد ماتتخرج المها السنة الجاية ..والملجة باذن الله في عيد الاضحـى ..وبعد ماحطوا الغدا وتغدوا ..نادت نوف المها تجي تسلم على ام جاسم قبل لاتطلع ..واول ماطلعت اطلعت المها لغرفة فاطمة ..
نوف ــ ها ياجدتي..شرايج ؟؟
ام عبدالرحيم ــ الحمدالله يانوف مرتاحه ومتفائلة خير..
نوف ــ ان شاء الله خير..
جت خديجه وكانت كاشخه ــ وين رااحو ؟
ــ راحو بيتهم ..وينج ليش تأخرتي؟؟..
خديجه ــ وهم على طول راحوا بعد الغدا ؟؟..
نوف ــ تغدوا وشربوا الشاي والقهوة وراحوا .انتي وين اختفيتي؟؟..
خديجه ــ اخذت دووش سريع ..
نوف ـ اشك سريع .. كل هاي تسبح ؟
خديجه ـ لين شسورت شعري وحطيت ميكياج ...ياربي ..كان ودي اشوفهم ..
نوف ــ لاحقة ..وين المها ؟..
ــ فوق ..مدري شفيها مب على بعضها ..
نوف ـ مالومها .. انحطت في موقف بايخ المفروض يحددون موعد ..
ام عبدالرحيم ــ هذي عوايد الحريم لابغوا يشوفون بنت لولدهم يروحون لها بدون موعد يدخلون على غفلة .. بس الحمدالله المها حلوة ومرتبه ونظيفه وماعليها كلام ..
نوف ـ صج حريم ..
خديجه ــ وانا كشخت الحين لمن ؟؟
ام عبدالرحيم ــ لنا بعد لمن ..ولا مالنا رب نشوف متعدله ومتكحله هالكحل الغاوي؟؟..
ــ فديتج جده ..آمري بس وانا اكشخ لج كل يوم ..
نزلت فاطمة بعد مالبست جلابية والبست شيلتها والنقاب ..
ــ قالت لي المها انهم راحو .ام عبدالرحيم شرايج ؟؟
ام عبدالرحيم ــ توني اقول لنوف اني متفائلة خير كافي انهم شاريين البنت ..والولد صديق صالح واهله ناس طيبه..
فاطمه ــالله يوفقهم آمين ..
_____________________

كان احمد والعنود يتمشون بالاسواق .. والعنود كل مره تشتري هديه لبنات خوالها ولساره وام احمد..مسك احمد الفاتورة ...
ــ مب كأنج فلستيني؟؟شنطة بخمسة الاف يورو؟؟..
ابتسمت ــ شسوي .. لازم الصوغه ..ومن ذكر ماحقر .و.
قاطعها احمد ــ فديتج يستاهلون ..بس انا مب شايل معاي الا مبلغ محدد ..ومادفعت للفندق للحين ..خليه نشتري من السوق الحره نفس البضاعه لان الكريدت كارد اللي عندي لمتها محدود..
العنود ــ لا انا خلصت شريت للكل ..
احمد ــ بس انا ماشريت ...بقى اجيب لابوج وابوي وامي وسارونه ..وخالي والشله كلها ..
العنود ــ اوك اشتر لهم الحين...ترى الكريدت كارد ماخذيت منه ولاشي كله من الكريدت مالي..
طالع لها معصب ــ شنو؟؟..انتي جايبه كريدت معاج؟
العنود ــ ايه ..من زمان عندي ..ابوي فتح لي حساب الصيف اللي طاف..
احمد ــ بس خلاص..انا زوجج ومسؤول عنج ..وماتاخذين الا من الكريدت حقي ..ورجعي البطاقة لابوج..
العنود ـ بس هي لي باسمي..
احمد ــ خلاص لاتستخدمينها ..منتي بحاجتها ..
سكتت العنود مستغربه ليش معصب ..ابوها ومافيها شي لو سوا لها حساب ..
العنود ــ براحتك ..
وتم طول الوقت ..معصب..
______________
دخل جاسم المطبخ بعد ماراحت ريان وهو من داخل متشوق يسمع راي امه ..
جاسم ـ ها يمه..شرايج؟؟

ام جاسم ــ شينه ....ياوليدي ماعرفت تختار...
انصدم جاسم ــ صج يمه؟..شينه ؟؟.
ام جاسم ــ ايه ..لو جايب يح اكثر..كله مب حلو..
طالع لها جاسم بخيبه ــ انتي تتكلمين عن اليح ؟؟...اسألج عن خطيييييييييييييبتي ..
ابتسمت ام جاسم وهي تقطع اليح
ــ ياوليدي البنت قمر مقعد .. واهل ناس طيبين ..
ـ عجبتج ؟
ــ وواايد واعجبت آمنه بعد ..
ــ على شنو اتفقتوا ؟..
ــ العرس بعد التخرج والملجة في عيد الاضحى ..
عصب جاسم ــ شنو يمه بعيد ..
طالعت له امه باستغراب ــ انت على شنو مستعجل الملجه بعد ثلاث شهور والعرس بعد سنه تقريبا..وقت معقول..
جاسم ــ واايد ..انا ..
سكت شوي.بعدين رجع سأل امه ـــ تكلمت ؟؟..
ام جاسم ــ شلون ؟؟
جاسم ــ تكلمت معاكم؟
ــ لاء يا وليدي...شاني خذي الفاكهه وديها بابا.. ولا انطقت حرف ساكته وسرحانه .ماغير الترحيب ..يوم دخلنا رحبت فينا وهلت ..
جاسم ــ وريان ؟
ــ شفيها ؟
ــ ماسوت شي يفشل؟
ــ لا والله البنت ماسوت ولا قالت كلمة .. ليش هالكلام؟
ــ مافي شي..
وطلع من المطبخ مستغرب..توقعت تسوي لها حركه ولا تقول كلمة ..بس ...شوراج ياريان ؟؟..

____________-

اول ايام رمضان .. كان الكل مجتمع في بيت ابو عبدالرحيم يباركون ويهنون بعض بهالشهر ..البنات ديمه والمها ونوف وفاطمة وخديجه في المطبخ .. وام عبدالرحيم وام منصور في الصالة ..
ام عبدالرحيم ــ شخبار هلج ؟
ــ يسلمون عليج خالتي..
ــالله يسلمهم ..يله يابنات الاذان بيأذن .. هيا وين ؟؟
ام منصور ــ هيا في غرفة طيبه ..
ــ شيسووون ؟.
ام منصور ـ عندهم مشروع وقاعدات يتناقشون فيه .
دخلت عبير وجهها اصفر ــ يا جده متى يأذن ..
ام منصورــ وانتي ليش صايمه عادج صغيره !..
عبير ــ يا خالتي اناا اصوم من عمري 7سنينن بس السنه الجو حار واليوم طويل..
ام عبدالرحيم ـــ اجر ان شاء الله هانت ربع ساعه ويأذن ..وين اخوج ؟
ــ مع حمد ولد خالي يلعبون سووني...
ــ روحي قولي للبنات جدتي تستعجلكم ..ماباقي عالفطور شي..خل يحطون اللبن والماي والتمر ..عالسفره ..
عبير ـ ان شاء الله جده ..
قامت عبير وراحت المطبخ البنات كانوا محتشرين ومعاهم فاطمه ويجهزون كل شي ..
ــ زحممه ..
نوف ـ حبيبتي عبير روحي الصالة ..
عبيرــ رايحه بس جدتي تقول جهزوا الماي والتمر واللبن .. ماباقي شي عالاذان ..
المها ــ ودينا للمجلس وبنودي للصالة .. اف الله يعين السنه الدوام بيبدا في رمضان والجامعه مشاوير من مبنى لمبنى ..لا كدينا خير..
ديمه ــ المها لاتنشغلين عني ترا ماعرف شي ..ابيج تعلميني كل شي..
المها ــ لا حبيبتي بالجامعه تعتمدين على نفسج انا مب مسؤوله عنج ..تسجلين المواد وتسألين وين الكتب والي يسأل مايتوهش. وتسألين القاعات وين ..تعبي شوي..
ــ لكن بكون صايمه
ــ وانا صايمه بساعدج وادلج لكن كل شي تسوينه بروحج .
خديجه ـ لاحقين على حشره الجامعه الاذان بيأذن .تحركوا ..
نوف ــ دام خلصنا وطرشنا اكل المجلس الصالة مايبي له شي..

المها ــ كل من هالخدامه من متى قلت لها تجهزالصحون..
خديجه ـ خفي عليها هي بعد صايمه واول يوم اكيد دايخه وتعبانه .....


على الفطور اجتمعوا طيبه وهيا والبنات كانت هيا تتكلم مع طيبه ولا سائلة في احد من اللي حولها .. ام عبدالرحيم تتكلم مع فاطمه ومستانسه على طباخها وام منصور تطالعها بكره .. ديمه والمها يتذوقون من كل الاصناف وينتقدون الاكل ..
ـالمها ـ فديت حكمناالعنود ..
ديمه ـ اي والله ..هي صار لها اسبوع من جت من السفر مازارتنا ولا مره ..
نوف ــ كلمتها امس .. كانت مشغوله كل يوم عزايم من اهل احمد وخواله .كل يوم تروح الصالون تخيللووا..
المها ـ شالسالفه ليش؟؟؟..
نوف ـ تعرفين نصهم سيدات اعمال ..ولازم انها تكشخ كل يوم ..
المها ــ الله يهنييها..
وطالعت طيبه نظرة استغراب ..

ــ عمتي..شخبار العنود..
طالعت لها طيبه مستغربه ــ مادري..
وارجعت تتكلم مع هيا عنالميزانبة والحسابات ..
وصل لنوف مسج

من :

ماعلموك ؟
إنه في غيابك
يلف دنياي السكون

وفي وجودك
تضحك احزاني وتهون..


اشتقــت لج ..



ابتسمت ..
وطرشت مسج .


((في غيـــــــــــبتك
تثقل علي الدقايق

والوقت مع غيرك ماعاد
ينطاق.
ربطتني مابين عهد
ووثايق
وخليتني بس للقصايد
والأوراق
واليوم أقولك دون
الخلايق:



ماعيني لغيرك من
النـاس
تشتـــــــــــــــاق ))



المها ــ اقول نوفه ..تفطري مب وقت مسجات ...
انحرجت نوف ..وصار وجهها احمر ..
ــ جب زين..
ديمه ــ نوفو ..خل اخوي يتفطر حرام طول اليوم دوام والحين بالشته بالمسجات ..
طالعت لها نوف ــ اقول .افطروا بالعافية على قلوبكم ..هذي سوالف كبار..

________________

كانت المها مع ديمه أول مادخلت العلوم . ...
ــ شوفي ديوم وخري عن ستاربكس ..لاتقعدين فيه ..
ــ ليش ؟؟ ..
ــ مكان استعراض بويات مايسوى عليج .. مستحـــــــــــــــــــيل !
تصنمت المها ووقفت مكانها مب مستوعبة ...
ــ مهووي شفيج ؟
وطالعت ديمه لمكان ماتطالع المها ..كانت نوره رفيجة مها جالسة هناك بهيئة بشعة ..
ــ معقوله !! ..
كانت نورة لابسة عباية لكنها سادة مفتوحه ومطلعه الجينز والشيرت اللي على شكل شماغ قاصة شعرها لين آخره ومسوية سبايكي ..ونظارة رجالية وماده يدها على جتف بنت نعومة فاتحة شعرها وحاطة فل ميكيب..
العبرة اخنقت المها فجرتها ديمة بعيد لكن المها ما انصاعت وراحت تجاه نورة ..
ــ اتقي الله ...
طالعت لها نورة منصدمة وسحبت يدها من على جتف البنت ..االلي طالعت المها بعصبية وقامت سحبت يد نورة وحطتها على جتفها عنادن في المها..
ــ اتقواالله ..حنا في نص رمضان ...انتم قاعدين تجاهرون بالمعصية...
البنت بعصبية ــ اوهو مب فايقين لج ...روحي المصلى ألقي محاضراتج ..
طالعت المها نورة اللي نزلت راسها وكانت تتجنب تطالع المها..
ــ ما اصدق..نوره بعدما كنا من جماعة المصلى ..بعد ماكنتي رفيقتي وصديقتي ..تنقلبين لعاصية ؟متشبهه بالرجال ؟ملعونه ؟؟ ليش!....
طالعت لها نورة بحقد ــ انا كنت شاريتج بس انتي اللي بعتيني...
ــ شنووو؟؟؟ ؟؟.....
نورة ــ ايه ..انا كنت احبج وانفذ كل طلباتج .. واعطيج على هواج ...لكن انتي تركتيني..
حست المها بقرف وطالعت لها منصدمة ــ ماهقيت اني اختار الناس الغلط..لكن يوم اخترتج صديقة ..كانت اكبر غلطة...بويا!!!....مسترجله؟؟ليش؟؟؟؟؟؟؟خلصوا الرياييل !!...
ولفت وتركتها وراحت وهي تمسح دموعها مصدومه ..
ديمه ــ لاتبجين وتعورين راسج ماتستاهل!.
المها ــ انا متحسفة على كل دقيقةوثقت بها بسر ولا بخاطر..روحي كلاسج ....
ديمه ــ مادله ..وين ..
المها ــ روحي مبنى التأسيسي..
ــ وين هذا بعد !!...
اضحكت المها ن ورى خاطرها ،،...
ــ تعالي..والله بيطلع هالكعب من خاطرج اليوم...
استغربت ديمه مو فاهمه ..
المها ــ تعالي بتفهمين ...
في الطريق كل مرة تسأل ديمه وهي تأشر على المباني ـ ـهذا ؟؟ هذا ؟
لين اوصلت ورجولها متورمة من المشي ..
ــ الله يقطع الكعب ومن اخترع الكعب ..
ضحكت المها اللي كانت لابسة فلات ومريحه راسها ..
المها ــ دخلي ودوري قاعتج ..انا بروح مبنى الادارة عندي اولى ..بتلاقيني الساعه 11 في كافتيريا التأسيسي بجي انطرج..
ديمـة ـ بينا كول ..
المها ـ ماعندي تلفون ..
ديمه ـ للحين ماطلعتي واحد ؟؟
المها ـ لا .. ولا بطلع ..لين اقتنع ان له فايده ..
ديمه ـ واذا انا في ورطه !!..
المها ــ بنات الاجاويد مابيقصرون معاج .. البشر عاشوا الاف السنين بدون تلفون ..واعتقد انا نقدر نعيش بدونه ايام ..
ديمه ـ والله انج مب صاحيه !!..
المها ــ مع السلامة .
تركتها وتمت تصيح وهي في الطريق وتناشق على مصير نورة ..

كانت خديجه في الدوام ..أحلى مافي رمضان ان الشغل بس خمس ساعات ...كانت مركزة بالمحاليل والبنات رايحين جايين يسألونها ..
دخل صالح متضايق ـ خديجه تعالي.
اتبعته خديجه ــ خير ؟..
ــ الخير بوجهج ..تعالي انا ملاحظ اان البنات يستغلونج وتسوين لهم شغلهم..
ــ لا ماسويت انا ساعدتهم بس..
صالح ــ انتي كله تقولين شغل شغل..وانا اعرف ان شغلج مب وايد لانج ماتأجلينه ..لكن البنات كله سوالف ويحذفون عليج الشغل..
خديجه ــ حرام اخاف يغلطون و.,..
قاطعها صالح ــ خلهم يغلطون ..لازم يتحملون نتايج شغلهم ..انتي مب مسؤوله الا عن شغلج..وانا ملاحظ انه هذا كله مب شغلج ...
خديجه اسكتت ...حس صالح انها تضايقت ..
ــ كدوج .. في كتاب قرأته هو السبب في نجاحي في شغلي....
ــ كتاب ؟
ــ ايه اسمه القرد..
استغربت خديجه ــ القرد ؟؟..
ــ ايه .. الفكره منه بسيطه ..تخيل ان العمل المكتبي قرد ..وانت مدير..كل مايدخل عليك موظف بقرده ..اول شي يقول لك ماعرف فتقول له انا احل الازمه ..فهالقرد يركب ظهرك ..ومع دخول كل موظف للمكتب..تتزابد عدد القرود على ظهري...يعني الشغل يزداد ...فهمتي؟؟؟...
هزت خديحه راسها ــ لكن شالحل؟؟؟...
صالح ــ الحل الله يسلمج .انه لما يدخل الموظف بعمله او قرده ..تطالع المعامله ...تراويه الشغل المطلوب وتتركه يطلع بقرده ...فهمتي؟؟..
ابتسمت خديجه ـــ ايه فهمت جي ماتتراكم القرود فالمكتب وكل موظف يهتم بشغله بدل قعده الشاي والقهوة ...
ــ عليج نووور...يلا روحي ردي القرود اللي عندج كل لراعيه ومااابيج تسلمين الا قردج انتي .....
ــ تامر...
طلعت من عنده واجمعت الملفات اللي عندها بالمكتب .ومرت على كل مكتب وعلمتهم الطريقة واللي تتهرب انها ماتعرف تقول لها انها تتبع الخطوات وبتعرف....ورجعت الكتب تحس بخفه ...
______________________

قبل وقت الفطور كانت نوف ناطره منصور تطالع الساعه اليوم تعبانه في الطبخ ..وهو تأخر ....وماتقدر تاكل من دونه ..
رن تلفونها ..لما قرت اسم منصور ردت بسرعه .
ـ الو ..
ــ هلا حياتي..
ــ هلا فيك .. وينك ..
ــ اسمحي لي مابقدر اجي ..عندي شغل والله ..
ـ خلاص .. براحتك ..
ــ تفطري.. وخشي لي من الاكل الطيب اللي مسويته ..
ـ تامر ..
ـ مايامر عليج عدو ..
سكر التلفون وهو حاس بشوق لها ..غريبه ..ارتاح لها وايد ..حبها ..حب رقتها و هدوءها ..

حست نوف بشوق لراشد ...حسته من زمان ماكلمها ... اتصلت عليه تستعبط ...
ــ ألووووو...
ــ هلا نوفه ..
ــ السلام عليكم .
ــ وعليكم السلام ... شفيج مشتطه ..
نوف ــ ههههه ..اي والله ..شرايك تجي تتفطر عند اختك المفضله ؟
استغرب راشد ــ بعلج موجود ؟.؟
اضحكت نوف ــ لا بيتأخر وانا مسويه فطور سنع ..لم قشك قصدي خواتك وتعالوا ..وجيبوا من فطوركم ابي اذوق طبخ كدووج ..
راشد ــ تامرين يالغالية ... يله .. انتم اي فيلا في المجمع ؟؟...
ــ الاخيره ...بتلاقي جدامها سيارة منصور الجكس ..لانه اليوم راح بسياره حمد ..
راشد ـ وش له ماخذ سيارة حمد ؟
ــ حمد مسافر عمره مع ربعه في الجامعه وخلى السياره عندنا ..يلا تعالوا ولاتبطون .
ــ يله دقايق .
سكر راشد وراح خبر البنات اللي استانسوا وايد ورتبوا من طبخهم في صحون وحطوها في السياره ..
رتبت نوف السفرة وشالت لمنصور نصيبه من كل صحن . ..... شغلت التلفزيون وتمت ناطره ...لين رن جرس الفيلا ..وطلت لقته راشد وخواتها ..دخلتهم بسرعه ..
ــ يلا بيأذن بأي لحظة ..
راشد ــ انتي بروحج .؟
نوف ـ منصورعنده شغل ..هو كان ناوي يجي ..بس ..
كانت المها تنزع شيلتها لكن سمعت صوت الباب فرجعتها ..طالع راشد ..دخل منصور شايل بيده صندوق كبير منصدم ...
ابتسمت نوف تخفف التوتر ــ جيييت ..
منصور ـ ايه .. قدرت اطلع .. شلونك راشد ؟
راشد ــ الحمدالله .. شلونك انت ؟
ــ طيب عساك طيب ..شخبارج المها ؟؟خديجه هنا ؟
المها ـ اخباري طيبه ..خديجه فالمطبخ ..
نوف ـ عيل اجلسوا ودقيقه ويكون الفطور جاهز ..
جلس راشد مقابل منصور ..وبعدين قعدت المها..راحت نوف المطبخ شاييله الكيكه اللي جابها منصور ..
خديجه ــ واو .. احب كيكه المنجو ... من جابها ؟
ــ منصور ..
ــ هو هنا ؟
ــ اي ..قال مابيجي بس شكله قدر يطلع بدري..
طلت خديجه من الباب ــ ماتضارب هو وراشد ؟؟
ضحكت نوف ــ لا للحــين ... الكيكه نحلي فيها بعد الاكل شرايج ؟
خديجه ــ ايه انا جايبه دله قهوة وقعده تلفزيون ..حلووو..تعالي نشيل الاكل داخل .. بقى بس صحنين ..
اول مادخلوا تفاجئوا بالمها ومنصور مطيحيين سوالف وراشد معاهم ..
كانت حركه من المها تبي تكسر الجليد تقعد تتكلم مع منصور عن الجامعه وخرابيطها وتم منصور يتكلم عن تجربته ونفس الشي راشد ..
راشد ــ حضر الطعام.. واخيرا ..وين اللبن والتمر ؟؟..
نوف ــ جدامك ... بتصلون هنا ؟؟
راشد ــ حسب منصور ..
منصور ــ لا بنصلي بمسجد برا المجمع .. بس نفطر بنروح ..متوضي راشد ؟
هز راشد راسه بإي ..اول ما انطلق المدفع وشافوه بالتلفزيون .. اكلوا راشد ومنصور التمر وشربوا قلاص لبن وقاموا ..
منصور ..ــ بنروح بسياره عشان نلحق على الصلاه ..
راشد ماعلق لانه ولا مره جا هالمنطقه ولا صلى في مسجدها ..

في المسجد سلم منصور على كم شخص بعدين استوا للصلاة وأدوا فرضهم ..
________________________

خديجه ــ تأخروا ..
كانت المها تاكل كل مرة من كل صحن ..ضحكت نوف عليها ..
المها ــ اليوم خواره فالجامعه احس بموت من الجوع ..مافيني انطرهم..
نوف ــ كلي يا قلبي .. لاتنطرينهم ..
خديجه بعصبية ـ مو حلوة يجون يلاقونج مخلصه الاكل ..
ضحكت نوف عصبت المها ــ ماخلصت شي يا مال العافية على قلبي..وش خلصت ؟ شايفتني اخذ لقمة من هنا ولقمة من هناك ..
نوف ــ الخير وايد ..
خديجه ــ ماقلت شي بس لاجو بتكون شبعانه ترست هالكرش ولا بتاكل ومنصور بيظن انها مستحيه منه و....
دخل منصور ــ لا تخافين هههههه .. كلي يالمها ماعليج مني..
انحرجت خديجه والمها وضحكت نوف ..وراشد مبتسم ..علق منصور ..
ـ على بالي بس ديموه فريده من نوعها اتاريج نسختها !...
ــ يالنسيب .حدك عاد .... لاتشبهني باختك الديناصورة ههههههه
نوف تطالع راشد مبتسمه بخبث ــ حدج عن ديموه والا ردتج للبيت بتكون مأساه ..
فهمت خديجه والمها ووجه راشد صار وردي تموا يضحكون ومنصور يطالعهم مستغرب ـ والله هالضحك وراه سبب !!..
ضحكت نوف ــ سلامتك تفضل كل كل ..
منصور ــ اي ضيعي السالفه ...
تم راشد يبتسم وهو يشوف الضحكه على محيا نوف ..حسها حقيقيه مب تصنع ...اول مره مايشوف الهم في عيونها ..وومنصور ؟؟؟ سبحان مغير الاحوال ..هذا منصور ؟؟ يضحك يسولف ؟...ينكت !!!!!!!! معقوله ؟؟ ونوف ماخذه عليه ؟دعا في خاطره "الله يهنيهم ." .

______________________________

في بيتهم ..
ام منصور ــ ديموه بس ترستي بطنج بهالفيمتوووو....

ديمه ــ ماقدر يمه عطشااااااااااااااااااااااااااااااااااااااااااااااا اااااانه...

عبدالرحيم ــ ههه خليها ..فالليل بتندم بيغثها وماتقدر تاكل وباجر بتموت من الجوع ..
ام منصور ــ بس بارد مب زين ..
مبارك ــ ديموه .. خلاص خلصتي العصير خلي لنا انتي وجهج.
ديمه بعبره ـ لو شايف المسافه اللي رحتها مابتقول جي ...تخيل من العللوم للتأسييسي ..في هالقايله ..وبكعب ...لا والله مالي شغل تاخذني اروح اشتري فلات ..
طالع لها ابوها ــ شنوووو ..شنو هذا ؟؟
ــ يبه تكرم جوتي بس بدون كعب ..
مبارك ــ جهزي روحج عقب التراويح مع اني اشك اني بلاقيج صاحيه ..
ديمه ــ مايهم ..اذا لقيتني نايمه مقاسي 39 ..قول له فلات وجيب اي شي..
مبارك ـ احلفي بس انتي ووجهج ؟..تقومين انا ماروح بروحي...
ام منصور ـ انا بروح معاك اتقضى كم شغله .. ديمه عاد توج ماخليت جوتي فالسوق ماشريتيه ..
ديمه ـ يمه كلها كعب لو ادري مااشتريت ..كلها كعب ...اه رجلي ...
وسحبت عمرها غصب لغرفتها ...
___________

يوم الملجه ...

كان صالح متوتر ..قلبه يدق بقوة .. مب قادر يستوعب ان اليوم ملجته خلاص..طالع الجوال ..ولقى مسج ..
من : جاسم
(( لي متى هذا الجفا ..صرنا اغراب يا صاحبي ..
قلب تعلق بها وفا .. والهوى بالحلال عز مطلبي
ارحم خويك واعرفه ..لاجار الهوى رجع صبي .
مايعرف من الدنيا صفه ....غير حبيبه مذهبي ...)) ,,
ابتسم صالح ... جاسم من خطب المها وهو كل يوم يراسله ..وصالح مايرد عليه ..حس انه صج مشتاق له ..بس خل يتأدب .. صج انه بغاه اليوم شاهد على عقد زواجه ..مسك تلفونه
(( إلى : جاسم .
جيب هويتك وتعال جدام المحكمه ابيك شاهد على زواجي .. ولاتكلمني ..ماصفا قلبي بعد .) ) .

كان جاسم منسدح متكدر ملان ..من شاف المسج نط على حيله ..
(( الخاين يتزوج وأنا آخر من يعلم ؟. .. ))
قام لكبته ولبس احسن ثيابه وتأكد ان بطاقته الشخصية في بوكه وبععدين طلع مسرع ...
آمنه ـ جاسم وين رايح ..
ــ شتبين .؟
امنه ـ بروح السوق قلت لك امس فالليل نسيت ؟؟ قلت بنروح الصبح ..مابقى شي عالعيد ..اسبوع.. ..
جاسم ــ مب مشكله .. ارجع اخذج ..
ــ انزين وين رايح ؟
ــ مشوار ..عن اللقافه باي .
برطمت امنه وراحت لابوها ــ يبه شفت ولدك خون فيني ..
بثينه ــ قلت لج لاتعتمدين عليه ..
ابو جاسم ـ وين راح ؟
ــ ماقال .. قال بيرد وياخذني بس مع كشخته ..ماصدق .
اقعدت حردانه ..كانت بتروح تشوف عبايتها خلصت ولا لا ..
ابو جاسم ــ خلاص لا رد لي كلام معاه ..
ــ يبه فديت راسك لاتعصب عليه ..عادي ..
ــ وين خليفه ليش مايوديج ؟؟؟
ابتسمت ــ خليفه ؟ليش محسوب علي اخ الاخ ؟؟ تلاقينه طول الليل سهران ومب فاضي يقوم من الصبح ..
ابو جاسم ــ انزين لاتزعلين انا باخذج ..
امنه ــ يسلم راسك يبه ..لارد جاسم بقوله ....
بثينه ـ لو اني منج اروح ازعج خليفه هههههه,,
ضحك بوجاسم على بنته الصغيره ــ والله منتي هينه ...روحي قومي اخوج قولي له الصلاه ..
بثينه ـ يبه الساعه 10 الصبح اي صلاه ...
طالع لهم بو جاسم ــ ليش محد مداوم اليوم ؟
بثينه ــ يبه انا وامنه اتفقنا نغيب ..وجاسم ماراح دوامه ماله خلق.. وخليفوه مادري عنه ... امون طيعيني وقومي وعيه بس ازعاج لا اكثر خخخخ..
وقبل لاتكمل ضحكتها في حد مسك اذونها بقوة ــ آآآآآآآآآآآييييييييييييييييييي
خليفه ـ ازعاج يالبومه !!!!...
بثينه ــ فديتك خوي والله احبك ..يبه افزع لي..
بو جاسم ـ انتي بديتي والبادي اظلم ..شوي شوي على اذونها مالي خلق مستشفيات بهالقايله ...
بثينه ــ اييييي افا يبه .. مصع اذوني ...ايييييي .. خليفوه فديتك اطلب روحي عطيتك بس هد اذونييييييييييي ايييييييييي الشغابات تعورني ا اييييي
امنه ـ خلاص خليفه حن عليها ..
هدها خليفه وقعد جنبهم ومسك الجريده ..ارفعت بثينه يدها ــ اللهم أني صاااائمه !!....
ضحك بو جاسم على دعوتها وتم خليفه يطالعها منصدم ــ اقول .. تدعين انتي وجهج .؟ ياااربي انت الشاهد هي اللي بدت !... ازعاج ها ؟.. انا قلت لامي يوم احملت فيج مانبيها شكلها راعيه مشاكل ...
ادخل تام جاسم وهي شايله المحشي وادواته ..
ــ عليك هياط ..انت تذكر فطورنا امس عشان تذكر حمالي بها !..
خليفه ــ الله محاااشي .. الله .. يمه اموووت في طبخج ..حطي كل حنانج وحبج في هالطبخه خل نتلذذ فيها ..صج لا قالوا ..احن إلى خبز امي ..ومحاشي امي .. ياااه ..
ام جاسم ــ يلا امون يلا بثون كل وحده تغسل يدها وتقرب ...الا جسوم وين راح ؟
خليفه ـ توني مكلمه راح يشهد على ملجه صالح رفيجه ...
امنه ـ وانا اقول اخوي مشتط وحالته حاله ..
خليفه ــ مالومه ..صالح مايكلمه من شهر وشي ... ولا معطيه وجه هههه لا وطرش له مسج لاتكلمني بعدني زعلان عليك ..
استغرب بو جاسم ــ صالح ولدنا .. شاللي مسويه جاسم مسود الويه علشان رفيجه يزعل عليه ؟؟
خليفه ـ ماقال يبه .. حاولت وياه بكل الطرق مارضى يقول .. يقول بينه وبين صالح ..
ابو جاسم ــ الله يهدي سرهم ويصلحهم .. قوم خليفوه خل نروح الجبره ونشتري لنا خروف زين .. نعزم عليه صالح الليله ..
ام جاسم ــ ونعم الراي ..
خليفه ــ ابدل واجيك .. بنطبخه هنا ؟
طالع امه لكن ابوه قال ــ لا مانبي نتعب امك ..نتبها بس تتفن لنا بالحلو والمحاشي الزينه .. يلا ..
ام جاسم ــ يسلم راسك بو جاسم ..امون سمعتي ؟؟ يلا دق على ريان خل تجي وطلعوا مواهبكم ..
امنه ـ ابوي يطلب منج وانتي تحولين علي ..
ام جاسم ـ لاتخافين .. انا بسوي .. يلا نشوف من يفوز ..
امنه ـ احنا طبعا ...
ام جاسم ــ اي نشوف ..
بثينه ـ وناسه ..اهم شي اترس الكرشه حلوياااات هههههههههههه ...
طالع لها خليفه ــ ايه .. امون ماوصيج فيها كديها كد الحمير ...تبون شي ؟
امنه ـ لا سلامتك امس رحت مع امي ميرت البيت .. عامله حسابي وانا اختك ..
تركهم خليفه وطلع واركضت امنه واتصلت بريان ..
ــ 999..
ــ شنو عزيمه ؟
ــ مادري ابوي بيعزم رفيج جاسم اليوم وامي متحديتنا في السويت ..
ريان ـ شبلاها خالتي ماتوب كل مره تتحده نفوز احنا هههههه
ــ يلا عيل تعالي ورزي طولج وجيبي دفتر الوصفات السريه .. وابشرج اليوم عالفطور محااشي من كل الاصناف ..
ريان ــ ودي .. بس ..
ــ شفيج ؟
ــ اليوم بعد العشا بيجونا ناس...
امنه ــ ناس منو ؟؟؟.. ريان تكلمي ..
ريان بعبره ــ بيت عمتي .. بيخطبوني لسالم ...
امنه ــ شنوووووووو,,,,, متى هالكلام ؟
ريان ــ امس اتفقوا امي وامه .. واليوم ..
امنه ـ وانتي موافقه ؟؟ شلوون ؟؟
ريان ـ امس اتصلت عمتي بامي تدور عروس ..واسألتها ان كنت ارضى بسالم ..امي قالت لها حياج ونتفاهم .. ...وما سألتني ... ولما جيت اعاتبها قالت لي اني ضيعت فرص وايد وكل واحد احسن من الثاني وانا انطر جاسم ..بس الحين جاسم بح ... ومافيها تضيع فرصه ثانية وسالم زين وطيب .والخ من هالكلام ..
امنه ــ بس انتي قلت لي ان سالم راعي سوالف وبنات وخرابيط ..شزينه ؟؟
ريان بعبره ــ نصيبي .....
امنه ــ عيل انطري .. شرايج بخليفه ؟
انصدمت ريان ـ شتقولين ؟؟
امنه ـ انطري لحظة ,, يمه تعالي ..
ابعدت التلفون ــ يمه ..ريان بيخطبونها اليوم لسالم ولد عمتها ..
انصدمت ام جاسم ـ مالقت الا هالسفيه ؟؟
امنه ــ يمه ..ريان بنتج ترضينها لهاللي اسمه سالم ؟
ام جاسم ــ لا ماارضاها ..
امنه ــ شرايج نخطبها لخليفه ؟؟...
طالعت لها ام جاسم مصدومه .. ــ بس...
لكن اكسرت خاطرها امنه بنظرات الترجي .. ــ بتصل بخليفه وارجع لج ..

ردت امنه للتلفون ــ ها شقلتي ؟..
ريان ــ لكن خليفه .. ما..,,,,ادري...
امنه ـاحسن من سالم ولا لا ؟؟ ..
ريان ــ احسن بوايد .. على الاقل مصلي..سالم معروف عنه مايصلي..بس .مع ..
امنه ـ انتي قلتي جاسم صار مثل اخوج صح ؟؟..
ــ ايه ..
ــ عيل شالمشكله ؟؟
ريان ــ ماادري...
ــ فكري...انزين ..بخليج الحين ..
ريان ــ اوك ..باي ..
رجعت امنه لامها لقتها مبتسمه ,,,ــ ها يمه بشري؟؟
ــ اخوج كان حاطها بباله من زمان وماعنده مانع ..
تنهدت امنه بارتياح ــ اشوووووه .. كلمي خالتي كلميها ..
ام جاسم ـ بكلمها وهزأها .. بايعه بنتها تزوجها لواحد سمعته زفت ؟؟...

____________

جدام المحكمه ..كان جاسم مثل الياهل ..وهو يبارك لصالح ..كاتم ضحكته كاتم خباله ..يبي ينط بس مستحي من الشله ..
جاسم ــ صالح متى العرس ان شاء الله ؟
صالح ــ عقب العيد بشوي ..
كانت فاطمه مع بنت عمتها ام عبدالرحيم راكبين السياره مع مبارك .. ورادين البيت ..
راشد ــ ايه ودخلت القفص الذهبي ..عقبالنا ..
صالح ــ ان شاء الله .. طالع لمبارك ــ متى تحن عليه وتخليه يملج ؟
راشد ــ مادري والله .. مافكرت ههههههه ...
صالح ــ خير البر عاجله ..ولا شلون ؟
راشد ــ صحيح .. بس خلي نخلص منك بعدين يصير خير ..
جاسم ـ وانا ...محد بيحن علي ويزوجني ...
صالح بجفا ــ.. لا .
راشد ــ ليش اخبر اتفقتوا بعد عيد الاضحى ..
جاسم ـ هذي الملجه ..ابي الزواج .. بينقعوني لين اتخرج ..
راشد ــ تبي الزواج والملجه بعيد الاضحى ماعندي مانع ..
صالح ـ لاااا ..
راشد ــ ليش...توك تقول خير البر ..
صالح ــ لاضيت لمبارك ارضى لجاسم...
طالع له راشد مستغرب ــ شفيك ؟ جاسم شمسوي ؟
قلب وجه جاسم اصفر ــ ابد ...ولاشي..
طالع له صالح ..
جاسم ــ بس نبي رضا صالح متى مايبي ..
راشد ــ اجل ابشر ان شاء الله انت و مبارك في عيد الاضحى .. ولاتزعلون..
نط جاسم من الفرحه وطالع له راشد منصدم ــ هذا شبلاه !!..
صالح ــ مافيه شي .. تعال تعال ..خل اتصل بمبارك ابشره ..حرام .. اكل هوا من تهديداتك ..

ورفع التلفون واتصل بمبارك وقال له قرار راشد .ومبارك شوي ويطير من الفرحه ..
ــ اهم شي لاتدعم بمرتي ..
مبارك ـ هههههههههههههههههههههه .. الله يبشرك بالخير .. تدري مو شايف طريقي...
صالح ــ مرتي .. الله يخليك لا تدعم فيها .. اكتم فرحتك لي وصلت بيتكم يصير خير ..
ــانزين .. سلام ..
ام عبدالرحيم ـ شفيك ياولد خضيتنا بسواقتك ..
مبارك ــ سلامتج جده مافيني الا العافية ان شاء الله .....
______________________________


طالعت له مستغربه ــ صليت ..
ــ ايه .. بغيتي شي ؟
كانت هيا قاعده على الكرسي وحاطه رجل على رجل كاشخه احدث كشخه
ــ عبدالرحمن .. مابتغير رايك ؟
طالع لها عبدالرحمن معصب ـ قلت لج لا !
هيا ــ حبيبي كلها شهر ..بس شهر ..
عبدالرحمن ــ لا .. ولاتنسين انج حامل السفر وايد مب زين لج .
هيا ــ حبيبي .. انت وعدتني تفكر في الموضوع ..
عبدالرحمن ــانا شقول لج من الصبح ؟ انتي ماتفهمين ؟ ياما اعطيتج على قد عقلج اقول صغيره . راعيها ..بس هيا تراج مصختيها ..
هيا ــ انت اللي مصختها ..شفيها لو سافرت ؟؟ بروح مع عمتي طيبه ..
عبدالرحمن ــ وانا ؟؟ ,,وعيالج ؟؟
هيا ــ الخدامه موجوده ..
عبدالرحمن ــ انا متزوجج ولا متزوج الخدامه ؟؟... هيا ..انا تعبت .. تعبت من اهمالج من دلعج وتعبت اكثر من لامبالاتج ..
هيا ــ عبدالرحمن .. انا ماسويت شي ... في الصيف ونص الاماكن اللي ابيها قلت لي لا ..
عبدالرحمن ـ هيا لاتصدعين راسي ..مب فاااضي لج ..
ـ عبدالرحمن انت متخلف ..
ــاللهم طولك ياروح .. انتبهي على حملج ..وخلي عنج عمتي طيبه .. تبين تشتغلين حدج الدوحه سفرات يمين يسار مافي...
عصبت هيا ووقفت ــ انت كله جي مخك مقفل ..
ــ احترمي نفسك واحترمي بيتج ..وربي عيالج ..منتي بعازه هالعشر اللي تعطيهم لج عمتج في كل سفره .. بعطيج عشرين بس ارتزعي ببيتج وجابلي عيالج ..
نزلت هيا تجت وصوت كعبها يرج البيت ..استغفر عبدالرحمن وحط راسه يقيل شوي ..
_________________

حزة الفطور . ,,, ام عبدالرحيم ــ تعالي يافاطمه ..اجلسي..
اقعدت فاطمه وكانت لابسه جلابيه عاديه ..وحاطه شيله على راسها عادي..
ــ صالح تعال ,,
ارتبكت فاطمه كانت بتقوم بس امسكتها ام عبدالرحيم وقعدتها ..
ــ ليش تتفطر بروحك كل يوم ..اقعد معانا ..صالح دخل مب مستوعب لين شاف فاطمه ..عرف حركة مرت ابوه وانتبه انها ماسكه فاطمه عن لاتقوم ..
قعد بعيد عن السفره ..يطالع بطرف عينه لفاطمه ...اللي اسرته بجمالها ..
ــ شخباركم ؟
ام عبدالرحيم ـ ردي مهب غريب هذا ريلج .واكيد مايسألني قاعد يسألج ..
فاطمه بصوت مايبين ــ الحمدالله ..
اكل صالح بسرعه وقام علشان يخليها تاخذ راحتها لانها مامدت يدها ..
ام عبدالرحيم ــ وين قايم ؟
صالح ـ الحمدالله ..الله يديم النعمه ..
راح وتم تطالع ام عبدالرحيم فاطمه ــ شفتي مستحاج خلاه يعاف فطوره ..
فاطمه ــ شسوي ...صج انه صار زوجي ..بس ..رجال غريب .مااقدر اكل جدامه لين اتعود عليه ..
ام عبدالرحيم ــ عرسكم قريب يابنتي .. خذوا على بعض ..انتي غريبه وهو غريب.. ص جانا هله وجماعته .. لكن ..دايما معزول بهالغرفه ...
خلصت فاطمة الاكل وقامت ساعدت الخدامات وودته المطبخ ..
وقبل لاتطلع غرفتها ..
ــ فاطمه ..
استحت من سمعت صوته ..قربت منه ــ لبيه ..
ــ لبيتي في منى .. خذي .. هذا تلفونج وخط ... جديد .. ممكن اكلمج اليوم فالليل بعد صلاة القيام ؟
حست باحراج هزت راسها بنعم . ..وقالت ـ عن اذنك ..
ودخلت داخل وصالح يطالع في اثرها ..صج اكبر منه ..لكنها عسل ...