الفصـل الثامـن
فتحت عيونها بتثاقل غريب ..حست بهموم الدنيا على راسها .. اليوم .. اليوم عرسها !.. ماتدري ليش مب فرحانه .. احمد شكله طيب .. بس .. توها في اول العمر ..توها 17 سنه .. توها مااختبرت شي من هالدنيا ..حياتها كلها دراسه وبس ..ماجربت انها تعتمد على نفسها ولاجربت الاستقلالية ..
تصير زوجه ؟؟ .. تفني عمرها لاسعاد رجل واحد ؟؟؟. . تكرس له كل ابتساماتها وضحكاتها وحياتها ؟؟وهي حتى مب متأكده من مشاعرها تجاهه ؟؟ .. للحين ماجربت اشياء وايد ..بيحرمها مسمى الزوجه منها !!.. مااستمتعت بمراهقتها لانها تكفلت باخوانها ..ومابتستمتع بشبابها لانها بتتكفل بزوج !... حست ان المهمه ثقيله ..كل البنات يفرحون بهاليوم ..يخافون ..لكنها ..حاسه ببرود فظيع ومشاعرها تبلدت .. شنو الزواج ؟؟.. هل بينقذها من وحدتها الحالية ؟؟. هل بترتاح ؟؟ هل الزواج مجرد اسئله ؟؟. او اجوبه ؟
تمت في فراشها وهي تطالع الساعه 9 الصبح .. تراقب الثواني وهي تمر ... يمكن ينفتح الباب ..ويطل احد يصحيها من حلم البقظة اللي هي فيه .. من هالتراخي البشع اللي سكن اوصالها ..
عند الساعه 11 ونص .. انفتح الباب ببطء.. طل راس مبتسم ..
ــ لسه نايمه ياعروووسه !!
فجأة نطت من مكانها بكل نشاط وركضت لحضن سالم اخوها ..
ــ اف اف .. بل شفيج ؟
كانت تصيح بقوة في حضنه .. كان لابس شيرت ابيض وجينز ..
ــ نقعتي قميصي دموع .. شفيج وراج عرس ولا عزا !!
ــ جب زين ..
ابتعدت عنه وعطته ظهرها ..
ــ عنووده .. توني واصل من لندن .. وهلكان .. توقعت الاقيج في الصالون ..بس قالت لي لخدامه انج ماصحيتي..وراج عرس .. مب ناويه ..لحظة وين الحنا ؟؟ .
العتود ـ اي حنا ؟
سالم ـ حنة يدينج ؟؟... مب عرووس ؟؟.. ماسويتي ليله حنا ؟؟ .
العنود ـ وين أسوي ياحسره .. من بيسويها لي .. امي ولا ..خليني ساكته ارحم ..
زعل سالم .. قال مبتسم ــ يلا زهبي عمرج بوديج الصالون عشان يادوب ارجع وانام ..
العنود ــ لا .. بتجي مالت الصالون للفندق .. برجع احاول انام .. تو بدري العرس بيبدأ متأخر .. وانا مابظهر للعالم الا الساعه 11 وشي ... روح نام بصحيك الساعه 3 .. علشان .. نتغدى ونيلس مع بعض شوي ..
ابتسم لها حب جبينها .. وطلع .. نزل تحت اتصل على خاله صالح ..واخذ رقم بنت خاله نوف ..
ــ السلام عليكم بنت خالي شلونج ؟
كانت نوف مستغربه من هالصوت .. ــ هلا .. من سالم .؟ ؟
ــ ايه ..
ــ هلا عاش من سمع صوتك .. شخبارك ؟رديت عشان العرس؟
ــ اي والله .. وتخيلي شنو لقيت ؟ .
نوف ـ شنو ؟ .
ــ العنود نايمه .. ولا كأن وراها عرس !
ـ لاتقول ؟؟ماراحت الصالون ؟؟.
ــ لا ....تقول بيوونها في الفندق ..
ــ الله يعينها .. بجيكم قبل المغرب انا وخواتي وبنت عمنا .. بنسلم عليها ونكون معاها ..
ــ ففيكم الخير والله .. نوف ..
ــ لبيه ..
ــ العنود مب متحنية ..
ـ ليش ؟؟ ..
ــ ماادري .. بس اللي اعرفه ان كل عروس لازم تحنى ..
ــ لاتخاف .. بنجي العصاري انا والبنات ونزهب كل شي .. لاتشيل هم ..
سكت سالم شوي بعدين قال ــ ماابيها تكون اقل من اي وحده ثانية ..
نوف ـ لاتحاتي ..
سالم ــ فيج الخير والله .. اعذريني ..بس ماابي احسس اختي انها بروحها ..
نوف ـ قلت لك لاتحاتي يا سالم .. مابتكون بروحها ..
سالم ـ جزاج الله الف خير .. استأذنج الحين لان توني وصل وتعبان ..
نوف ـ يعطيك العافيه .. يلا مع السلامه ..
سالم ــ مع السلامه .
صكرت نوف من عند سالم .. اركضت للطابق اللي فوق
ــ بناااات ..بنات . .
طلعت المها وخديجه مستغربين ــ خير.؟
نوف ـ جدامنا كم ساعه نخطط فيها لليلة حنه للعنود .
طالعت لها المها صدمه ـ انتي شتقولين ؟. شلون وعرسها الليله ؟؟..
نوف ـ ماادري .. يالله .. لازم نخطط .. اول شي نبي حريم .. مم ديمه وانا وانتم ..اربعه .. ابي حرمتين كبار .. عمتي طيبه انا غاسله يدي منها .. من تقترحون ؟ .
خديجه ـ يدتي و..فاطمه بنت خالها .. صرنا ست ..
المها ـ رفيجتي نورة .. سبع ..
نوف ـ ورفيجيتي مريم .. ثمان .. اوك .. يلزمنا حرمتين ونكمل عشر ..اعتقد العنود وجارتها واخت زوجها ساره .. لا حلو العدد اكتمل .. الحين نبي حجوزات صالون ..
المها ـ بس اليوم العرس مايمدينا !
نوف ـ العرس متى بيبتدي ؟؟ .
المها ـ تقريبا الساعه تسع ..
نوف ــ بيمدينا .. اوك .. بنبدأ الليله الساعه ثلاث العصر ونخلص الساعه سبع .. وبعدين ساعه للتجهيز .والساعه تسع نتوجهه للقاعه ونترك العنود مع الكوافيره ..الحين ..كل وحده تجري اتصالاتها .وشوفي لي احسن حنايات ..وابي اكثر من وحده ..علشان تخلص بسرعه ومايضيع الوقت ننتظر الدور ..خديجه اتصلي في راعيه الدي جي .. وعطيتها رقم بيت العنود .. وخي من مزرعتنا مشموم وريحان ..حطيه في سله ..وجهزي البخور..
المها ـ انزين انا بتصل في الكل .. بس اللبس ..
نوف ــ كلنا بنلبس اخضر ..عندكم فساتين وجلابيات خضرا ؟؟
المها ـ انا عندي وخديجه عندها .. وبتصل في الكل الزم عليهم بس العنود لبسها كله وردي !!
نوف ـ لاتشيلين هم العنود .. انا شريت لها دراعه خضرا بالذهبي من فتره حق جهازها .. المهم اللمه والجمعه الطيبه .. خديجه وصي الخدامات عالجاي والقهوة ..والمها اطلبي من البتيل كيك . وبوفيه صغير .. يلا انا بروح اجهز نص اغراضي ماعندنا وقت ..
بعد مانتهوا من حجز كل شي ..
انزلت المها لابسه جلابية خضرا طالعه جنان عليها وسحت شعرها ..
ـ نوف اعتقد ان بس العروس لازم تلبس اخضر !!
نوف ـ يمكن .. بس احلى ان كلنا نتحنى ونلبس اخضر عشان ماتحس العنود انها بروحها ..
كانت نوف لابسهجلابية خضرا لونها زمردي .. وعليه ثوب نشل اسود وطالع شكلها انيق محترم .. نزلت خديجه اللي كانت لابسه جلابيه خضرا .. وعليها حزام ذهب من العيار الثقيل .. عرفت نوف هالحزام وابتسمت .. كان لامها الله يرحمها .. واستغربت ان خديجه ماباعته .. خصوصا ان موضته راحت من زمان ..
المها ــ حزام ذهب ؟؟ شقالوا لج ؟؟ في الثمانينات ؟؟ .
نوف ـ عمر موضه الذهب ماصارت قديمه .. توقعت انج بعتيه ؟ .
خديجه ـ ابيعه ؟؟ لا طبعا .. عطتني اياه الله يرحمها لسبب بسيط . انه هدية ابوي الله يرحمه لها يوم ولدتني .. يعني .. اشتراه لها اليوم اللي جيت فيه للدنيا .. ص جاني لوبعته يجيب ثروه لانه ثقيل .. بس..الذكرى وماادراك مالذكرى .
ابتسموا لها اخواتها .. وفجأة صرخت المها وهي تضحك ـ نسسيييت ..
ـ شفيج ؟
المها ــ جهزوا عمركم اليوم بنشوف افلام هندية لايف !
خديجه ـ شلون ؟.
المها ـ ديووم فديتها بتجي بعد شوي عشان تروح معانا وبصير نذله معاها واحذفها في السيت اللي جدام @!!.
ضحكوا خواتها من قلب وقالت خديجه ـ لا رحنا وطي اخوي مابيشوف طريقه من الشوق !!
نوف ـ يامسكين .. تدرون طرت على بالي نكته ..
خديجه ـ ماعندنا وقت بس يله تحجي ..
نوف ــ يوقل لج في واحد ركب التاكسي وقعد زوحته جدام ليش؟؟ .
المها ـ ليش؟؟
نوف ـ عشان مايطالعها راعي التاكسي بالمنظرة هههه ..
اضحكوا عليها وراحوا السيارة .. كان مبارك برا ونزل ديمه ورجع بيتهم ..
عجلوا البنات خطواتهم وادخلوا كلهم في السيت الوراني ..
ــ ووجـــع !! وحده تنزل وتقعد جدام ماني بسواق عندكم !!.
ابتسموا الفريق وسووا دعايه لكلوز اب نوف ــ لاتشيل هم له ناسه !!
راشد مافهم لكنه شاف خيال اقترب .. وانفتح الباب الوراني ..
المها باستعباط ــ اووه ديمه ..مالج مكان ايلسي جدام ..
تخزبقت ديمه وصار وجهها الوان ــ شنوو..لا .. سواا لي مكان ..
خديجه ـ ديوم انجلعي جدام يلا .. بنتأخر على العنود ..
طالعت لها ديمه بصدمه .. وفجت حلجها على كبر وهي تطالع راشد اللي على وجهه ابتسامه كانت تقدر تشوفها من على الجنب ..
ــ ماابي ..
راشد فهم حركة خواته وقال مسوي فيها مصب ـت يلا صكي الباب ترا الهوا البارد بيطلع براا .. شموقفج في القايله ادخلي..
صكرت ديمه الباب بقوة وفتحت باب الجدام وقال لها راشد ببرود ــ شوي شوي على باب سيارتي .. تراها جديده !!..
اركب ديمه معصبه .. والكل ورى مبتسمين وينغزون بعض .. لكن خاب ظنهم في الدقايق الاولى لان راشد ساكت وديمه ساكته معصبه حدها ..
وبعدين ملوا بعد عشر دقايق خصوصا ان بيت العنود يبعد تقريبا عشرين دقيقه عن بيتهم مع الزحمه والاشارات ..
المها تهمس لخديجه ـ فشلت الخطه .. هذا فيلم ياباني ممل ^|^ على الاقل لو يلست انا جدام كان قلبت في قنوات الاغاني بدل هالمحطه الي حاكين عليها كلها اخبار .
خديجه بهمس ـ لاحقه على الاغاني الدي جي اوريد ي وصلت للبيت العنود تضبط كل شي... وصراحه .حرام الافلام اليابانية كلها اكشن .. هذا فيلم ملباري!!.
راشد وهو يسمع همس بس مب قادر يلقط الكلمات ـ عن شنو تتساسرون ؟
المها ـ عن الافلام .. نسأل أيها ممله !!.. الياباني ولا الملباري... عشان يكون الوصف دقيق ..
راشد ـ عمرج حضرتي فيلم خليجي ؟
المها ـ نو ! .
راشد ـ هو الاكثر ملل ..
المها ـ اها .. عيل فيلمنا اليوم خليجي من الدرجه العاشره !
ضحك راشد وفهم قصدها .. اتاريهم مب مقعدينها جدام من فراغ ..
بعد دقايق قال ــ شخبارج دريمه ؟؟
عصبت ديمه ــ اسمي ديمه ووجـ....
راشد ـ انا قلت ديمه .. ماقلت شي ثاني ..
وطالع المنظرة وغمز لخواته يجارونه ..
ديمه ـ لا قلت دريمه ..
راشد ـ لا قلت ديمه .. يمكن سمعتيني غلط ..
لفت ديمه معصبه عنه ..
ــ ديمه ..
ــ نعم .
ـ مارديتي ..
ـ على شنو ؟
ــ سألتج شخبارج ؟؟ .
طالعت له كن يركز على السواقه ..شكله عذاب ..عاقد حواجبه الكثيفه وعلى وجهه نظرة جديه ماحبتها ..نست انه في جمهور ثلاثي قاعد وراها ..
التفت لها في نفس اللحظة والتقت عيونهم.وتموا يطالعون بعض لثواني .
صرخت المها ــ الله عالحــب .,.
همست خديجه وهي تمتم ضحكتها ــ انجبي . الله يخسج ..
انحرجت ديمه ولفت ويهها تطالع من المنظرة .. وابتسم راشد للشله اللي ورى وكان وجهه قلب وردي .
حست نوف انها بتختنق وهي تكتم ضحكتها ..
ـــ راشد فديتك انزل للجمعية جيب لنا مناديل مرطبه ووليمون وزيت زيتون لزوم الحنا ..
ــ تامرين امر..
اول ما صفط ونزل ودخل الجمعيه انفجر الكل في الضحك والتفت عليهم ديمه بشنتطها تطقهم فيها وهي معصبه وهم ميتين من الضحك ..
ــ انا اراويج مهوي ..يالجلبه .
المها ـ لو سمحت انا مب جلبه ..انا المها على سنجه رمح يا دريمااا .. هههههه
كانت خديجه ونوف يضحكون لين دمعت عيونهم ..
ديمه ـ انزلي مهوي انزلي والله مااقعد جدام هذا انا حلفت !!!.
قالت المها وهي تطالع خوتها بنغزة بنزل .. يله ايلسي مكاني..خدوج خليني انزل ..
انزلت خديجه ودخلت ديمه السيارة فدفعتها خديجه للوسط وادخلت السيارة .
ديمه ـ لا لا لا ..ماايلس في النص لا عاد كافي رازه الوجهه جدام ..
المها ــ ايه فديتج خديجه بعدين اخوي مابيشوف طريجه جدام بياخذنا ريويس لين بيتنا ههههههههه...
ديمه ـ مهوي عاد بس عاد !!!
نوف ـ صج مهوي ..خلاص عاد ..بتموتينا ضحك خلي شي للطريق هههه...
طالعت لها ديمه ـــ خيبه هذا وانتي اعقلهم !!والله انكم محرومات عاطفيا !!!
رجع راشد في هاللحظة وهو يشوف المها مرتزة جدام ..
ــ هلا هلا .. شالتغييرات العسكرية !خذي ..وارتزعي ورى .
المها ــ اجباري مب اختياري...
راشد ــ اهااا .
ابتسم ورفع عيونه للملنظرة كانت مرتزة في النص وعيونها باينه كان نقابها مرتب عليها ..ابتسم.. وفجأة نز ..
كانت المها شغلت الراديوا على اعلى شي وكانت اغنية فايز السعيد ((جيتك على الموعد )) ..
ــ اف بدى الزعاج ..
طالعت له المها بدلع ــ بذمتك مب احلى دلع ..!
راشد ـ مااحلف بغير ربي ..وبيني وبينج ..دلع بعض الناس اخف على قلبي دلعج من العيار الثقيل !
المها بصدمه ــ افااا ...
راشد ــ زعلتي؟
المها سوت عمرها زعلانه ..
راشد ـ احسن كثري منها .. عشان يخف الصداع علي شوي ..صوتج يسبب لي صداع !!
المها ـ ديوم .. ديمه ..ديـــــــــــــــمه وصمخ !!
رصت ديمه على ضروسها بعصبيه ونطقت ـ وعله كاني ورى !!سامعتج ..
المها ـ شنو كنتي تقولين لي من قبل شوي عن راشد !!
ديمه ـ ماكنت اقول شي !.
المها ـ بلى ..ذكرتي كلمات ثقل دم وغلاسه ونكد ...وشنو ..
طالعت لها ديمه وبققت عيونها وفهمت لعبة المها ..وقالت ببرود
ـ راشد ريال كريم ومحشوم من كل اللي ذكرتيه ..لاتقوليني شي ماقلته .
المها ـ امبلى ..قلتي ..شي..
ديمه ببرودـ ماجبت طاري راشد ..بس قلت عنج انج مطفوقه شوي ..لزومج ريموت كنترول ..
ضحك راشد وطالع للمها اللي التفت لديمه تتوعدها
ــ وانقلب السحر عالساحر !!
قالت المها بغيض ـ قالوها بالامثال ... لاحبتك عيني ...ماضامك الدهر ..
طالعت لها ديم نظره ناريوة ابتسمت المها وهي تطالع راشد اللي فجأة تجمدت ملامحه ..وكنه سرح بعالم خاص فيه .. طالعت لديمه مستغره لكن ديمه كانت منزله راسها .. نوف تطالع من الدريشه ..وخديحه ممغمضه عيونها ..
استغربت المها شفيها الامه قلبوا الجو نكد ..تمت تقلب في قنوات الراديو ..دقايق ووصلوا بيت العنود ..
نزلت نوف اول وحده والباقي تموا ينزلون الاغراض ..راحت فوق على طول .. طقت الباب .. ودخلت كانت العنود للحين جالسه في فراشها بتكاسل .. ..
ــ العنود .. اليوم عرسج والساعه قربت ال2 ..وللحين نايمه !!
ــ هلا .. هلا نوف .. ابي انام .. وبس مابي عرس مابي اعيش ابي انام وبس!!
سحبت نوف الغطا عنها ــ في ليله حنا تحت ..شلون تنامين وبنات خوالج هنا وجدتج وقريبتها ؟؟.
رفعت العنود راسها ـ ليله حنا ؟؟. المفروض تكون امس مب اليوم ..
نوف ــ ايه ..وماقدرنا نسويها امس بنسويها اليوم ..قومي لحنايات وصلوا ..والدي جي وكل شي ..قومي ..كم مره بتعرسين ؟هي مره وحده بس ..قومي تحني ..
قامت نوف لكبت وطلعت الدراعه الخضرا الكشخه حيل ومذهبه .. وطلعت صندوق ذهب العنود .. وساعدتها وحطت لها العود والمشموم في ضفيرتين في شعرها ضحكت العنود على شكلها وفتحتهم
ــ ماعاد احد يسوي ضفاير....
ــ خل ننزل تأخرنا على الشله ..
ــ يلا ..
كان شكل العنود روعه .. طلعت نوف كاميرتها وصورت لها كم صورة ..
اتصلت نوف بالمها ..وقالت لها ان العنود بتنزل ..
نزلت العنود ببطء على موسيقى ليلة الحنا...اغنية. لسمر واسامه العطار.وهي متفاجأه من الجو اللي تحت ..كاتنوا جمعه والحنايات واقفين مبتسمين والمشموم موزع على الارض وريحه البخور والعود قويه ..وعلى جنب بوفيه صغير ..وبنات خوالها موجودات وجدتها اللي تطالها والدموع في عيونها ..جنبها وحده ماعرفتها بس جميله ..
(( ياليله الحنــه ..ويا احـــلى الليالي.. لما التقى ,,عالــحب غالي بــغالي ,.
عز البــدر مع الــ غ ــــلا ودادي ..في ليــله فيها الكوآاكــب تنــادي~ ..
ياليـــــلة الحنـــة ..يا احلــى~ الليالي ..لما التقى عـالحــب .غال بغالي...
من سندس طيبه ترى فوق ثوب
لبس خضر ياروعه الحسن بالي ..
تستاهلنيه والله تستاهلينه ..
يانسمة ترقى سمانا هلال ....
ياليله الحنا ويا احلى الليالي ..
لما التقى عالحب غالي بــغالي ..
حني كفوف غيري حني كفوفي ..
خلي الفرح وداد الروح عالي ..
انت الوداد ياوداد المحبه ..
مبروك لك يا عروس بعرس غالي ...
ياليله الحنا ويا احلى الليالي ..
لما التقى عالحب غالي بغالي....
ياليله فيها الذهب يبتسم لك ..
وانت الغلا يا عروس الدلال ..
عروسة يشهد لها كل غالي ..
يامنية بدر الرفيع المعالي...
ياليله الحنا ويا احلى الليالي ..
لما التقى عالحب غالي بغالي...))
جلست العنود بعد ماسلم الكل عليها ابتسمت وهي تشوف اللون الاخض ر على الكل بكل درجاته .. ووجوهم صافيه مافيها الا الكحل وقبل لاتعلق سبقتها المها ــ ورانا عرس يعني طن مكياج . .فقررنا نحط كحل بس ..
ابتسمت العنود مستحيه لاول مره من اسابيع تحس بتفاؤل غريب ..
قربت منها جدتها وبيدها طاسه فيها ماي ورد وزعفران ..ضحكت العنود
ــ يدتي وراي عرس !!
ضحكت جدتها ــ لاتخافين .... مدي يدينج وريولج ..
استسلمت العنود ومسحت جدتها على يدينها بالزعفران اللي كانت ريحته قويه ولونه قويه مع ماي الورد ...ووبعدين مررت الططاسه عالبنات اللي مسحوا بيدينهم .. وبعدين سلمت يدها للحنايات ..حنايه على يدها اليمين وحنايه على يدها اليار وحنايه لرجولها .. وجلست جنبها جدتها ومدت يدها وقالت ــ حطو لي حنه العياييز مابي هالنقش ..سوي لي قصة ..
قامت الجده تغني
ليله الحنـــا على العذرا سعوود ....نورها مثل البدر والعين سود ..
ليله الحناا على العذرا بهنا ..نالت العز والسعاده والهنا ...
..
حناج عيين يا عنيدي حناج عيين ...لي زفوج على احمد بالج تستحين ..
حناج ورق يا عنيدي حناج ورق ...لي زفوج على احمد زخي من العرق ...
وتموا البنات يغنون معاها المقطع الاخير وهم مستانسين ...وبعدين حطوا الدي جي وهم يسولفون ويشربون ويتحنون .وقبل لايحسون صارت الساعه 4 ..كانت الوحيده اللي خلصت بدري هي العنود اللي جف حناها ..وعصروا البنات عليه ليمون وحطوا له زيت زيتون .. كانت الريحه قويه والسوالف خذتهم .. سولفت الجده عن ليله حناها وعن الجلوه ..وايام زمان ..فاطمه كانت مستمعه بس ماتعرف لهالسوالف ولا قد مره سمعت عنها .. نوف مسوت ليله الحنا وماتذكر السبب ..وغيرت الموضوع عن لحد يتكدر ..خديجه مستانسه على الباكستانية اللي تحط لها الحنا كان شغلها فن ورسمها فن عكس ديمه اللي عصبت على الهنديه اللي كانت ترسم لها هندي
ــ الله يغربلج ماما حطي شي ورد ورق ..كله دواير لاتعقديني عاد !
ــ جين ماما ..
المها كانت مستانسه لان الهنديه اللي عندها رهيبه تحط وتسولف معاها عن الافلام الهنديه
المها ـ جيه والله هيرتيك احلى من سلمان ..
ـ لا سلمان وااجد هلو .. فددددديت قلبه
ضحكت المها ـ وتتفدينه بعد يا ميري....لا والله خذي كلامي هيرتيك احلى . بس انتي مهبت هيه سمان مايشوف غير سلمان .. .. ديمه ليش معصبه ؟
ديمه ــ هذي كله تحط لي نقش هندي عادي فستاني موديل روماني .. ونقش حنه هندي ليش عاد ..بس شكلها ماتفهم ..لا عربي ولا انجلش..
طالعت المها لميري اللي قالت ــ صحيح ماما هذي جديد ..
وبعدين كلمتها بالهندي فهزت الهنديه راسها وغيرت رسماتها لشي بسيط يناسب ومرتب وفنانه ..
العنود ـ مادري ياعرب شلون بشكركم ..
كانت ساره جالسه قرب العنود طالعت ساعتها وقالت ــ انا لازم اروح اشوف الكوشه والتجهيزات .. بما انج وكلتيني في هالسالفه ..
كانت ساره متحنية من قبل رايحه هي وامها للصالون ووتحنوا .. فجلست معاهم تساعدهم تحط في حلج لعنود من هاللقيمات والكيك .. وهي والمها كانت بينهم مواضيع مشتركه عن الجامعه ..فحبت القعده ..
سلمت عليهم وشكروها .. وتموا يطالعون العنود اللي كانت تطالع حناها .. الباهت .. وهي حاطته عالدفايه علشان شوي يدفى ويغمج ..
نوف ـ مب مهم يغمج اليوم .. اليوم العرس .. المهم يغمج بكره المسائية .. لان لبسج هندي بحت!!..
المها ـ صج بتلبسين هندي ؟ .
العنود ــ هيه ..بلبس هندي .. وصيت على بدل من محل في الهند ..كلفتني ثروة ..بس روعه وتستاهل ..
المها ـ وش لونها ؟؟ .
العنود ــ تركوازي ..... حقت الصباحية .. واحمر حق المسائية ..
خديجه ـ ويه الصباحيه بتكون ثقيله عليج ..كله شك وشغل ..
العنود ـ لا .. التركوازية مافيها شغل وايد حرير ..بتعجبكم لي شفتوها ناعمه وايد ..الحمرا هي اللي فيها الشغل كله ..بس من صج راهيه ..
الكل ـ تستاهلين ..
بعد ساعه الكل تفرق ورجعوا البيت وتوجهوا للصالون ماعدا جدتهم ونوف اللي تموا مع العنود .. تموا يوصونها تكرم زوجها .. وتكون له الاخت والصديقه قبل لاتكون له الزوجه ...توجهوا للفندق بعد ما شيكوا كل شي .. وراحت معاهم الجده ..
كان فستان العنود روعه ..والمكياج الي اختارته ناعم وروعه يبين معالمها ..وبدون دفاشه .. زينت نفسها بطقم الماس .. ومسكت الباقه اللي كانت عباره عن ورد جوري وردي مع كريستال شورافسكي حول الاطراف وبين الورد .. وسلاسل لولو طبيعي تدلى منها .. ..
طالعت لها نوف وقرت عليها المعوذات . .كانت العنود متماسكه وهي تشوف العنود وجدتها حولها ..رف قلبها تمنت لو
عبير وامها موجودين .. لكنه مب مكتوب لها للاسف .. حطت مصحف في يدها .. مصحف صغير ..
ــ ماشاء الله عليج .. اللهم صلي على محمد ... ولا أميره بهالجمال .بيستخف احمد عليج ..
ــ متأكده مابخرعه !!
ضحكت نوف ـ هههه لا ماشاء الله عليج تجنين .. ..هو شكله ولد حلال ..حطيه في عيونج .. وافتحي له قلبج ..
طالعت نوف لجدتها اللي كاتمه دمعتها .. اتركتهم واسبقتهم للوبي تتصل بساره والمها علشان يجهزون دخله العروس ..
قربت جدتها منها . ووصتها وصايا الام لبنتها في هالليله .. مسكت يدها وقرت عليها ..
ــ زوجج هو ابوج واخوج وعمج وخالج .. هو سندج ..خلاص طلعتي من تحت شور ابوج .. اخلصي لزوجج وارفعي راسه .. واثبتي له انه لج ربوج صح ..
هزت العنود راسها ..واحضنت جدتها .. وهي تحس نفسها تودعهم .. لعالم جديد ... مجهول ..
انزلت من الجناح .. و تركت نوف ترتب لها اغراضها وترجعهم مع السايق للبيت..وقبل لاتدخل لقت عمها صالح واخوها سالم ناطرينها..سلموا عليها بسرعه ..
ــ سالم ــ صيري خوش حرمه ..انا بسافر باجر..بس بتصل فيج ..
صالح ــ ايه صيري خوش حرمه ..اخوج مطفوق حده !!... الله يوفقج ومبروك ياحياتي..من كان يصدق تتزوجين قبلي !!
ضحكت العنود ...وزينتها ضحكتها ..حب راسها سالم
ـ فديت هالضحكه ..
العنود ــ فديتكم والله ..
نادت المها ــ العنود ببدء الزفه ..
طالعت لخالها ولاخوها ..سلمت عليهم للمرة الثانية .. وابتسم سالم لما شاف يدينها الحنا البرتقالي الغامج ..
ــ حلو حناج ..
العنود ـــ حلت دنياك .. الفضل لك .. مارضيت اني مااتحنى ..
ــ قالت لج نوف ؟
العنود ـ ايه ... ماقصرت معاي..
ودعتهم .. ووقفت في وجهه المدفع .. تحس بحزن كبير ..المفروض العروس ماتلبس ابيض المفروض تلبس اسود ..حزن على فراق اهلها ..فراق غرفتها ..فراق سريرها ..مابتقدر تشوف اهلها الا باستئذان من زوجها ..تودع بيت ابوها ..بيت العز ..وتدخل بيت ماتعرف شنو نهايتها فيه ... اكيد اهل احمد بيعزونها ويرزونها وهم عيال اصل ..لكن . مب كل عروس مثلها محظوظة ..
ابتسمت لما اكتشفت ان الافكار خذتها وانها دخلت على مقطوعه موسيقيه مصحوبه بشعر ووصلت لنص القاعه تقريبا وهي غارقه بافكارها ..ابتسمت وهي تطالع حولها .. ماحست بخوف .. الخوف مب بهاللحظة .. الخوف لما يمسك احمد يدها ...ويكتشف انه تزوج انسانه معقده !!,,
حاولت انها تكتم ضحكتها ماقدرت .. ضحكت على نفسها
وقالت في نفسها (( الحين الناس بتقول هالبنت ماصدقت تعرس مستانسه وتضحك وشوي وترقص!!!))
كتمت ضحكة هيووج في داخلها .. كافي دهشه الناس من ضحكها وهستيريتها ..لو يدرون شقد هي خايفه ؟؟...ما ارفعوا حواجبهم دهشه ..خذت نفس وجمدت ملامحها .. واتجهت وهي رافعه راسها للمنصه ..وهي تشوف بنات خوالها يطالعون لها باعجاب ..ونص القاعه ناس ماتعرفهم ..ناس وايد ..
(( صج لي قالوا . المعاريس اثنين ..والمجانين الفين !!!)) ..
ارفعت حاجبها تعجب .. تقدمت وهي تحس انها تطفو ..اللي تصورها تسبقها في كل لحظة ..لين اوصلت لين مكانها ..اجلست واستسلمت كليا للمصورة ..وماتحس انها بين الناس ..
كانت المها مسويه حشره مع ربعها واخواتها وديمه .. يبون يحسسون العنود انهم حولها انهم فرحانين فيها .. من رقص وتصوير وكلام لكن العنود ماكان حاسه في احد ..
رن تلفون المها مسج ..فتحت التلفون
من :************
افكـر فيج .. وتخونني الافكار .. ياجنية سكنت خاطري شهور... عشقتج ..يمكن يمكن هويتج باصرار .. دخيلج لاتبيع قلبي المغدور ..
افكـر فيج ..افكر في ظبي سكني ..اعشقه ..وافداه .. وعمري كله بطرف رمشه ...مرهوون ..
عصبت المها .. من جاسم .. هذا من وين جاب رقمها ..نفخت بقوة ..قربت منها نورة وهي مبتسمه
ــ اوه كل الحريم مستخفين عليج .. بس انتي كانج شايله الدنيا على راسج ..
المها ـ هذا من وين جاب رقمي؟؟؟...
طالعت نورة للمسج ــ اووووف .. هذا بايعها !!..
المها ـ بقول لعمي واخليه يبيعها عدل ..
نورة ــ لا الله يخليج .. طنشيه مصيرة بيتعب ..
المها ـ لا لازم افضحه كل يوم والثاني مطرش لي مسج ..خل عمي يعرف منو يرافج ..
همست نورة ـ فديتج مهوي هدي اعصابج ووطي صوتج .. ولاتقولين ..استري الريال واستري نفسج لو دروا بسواتج بسيلين يذبحونج ..تكتري عنه .. ولاتردين ..
طالعت لها المها بشك ــ ان عادها .. مابسكت .. بفضحه ..مب انا اللي ترضى بهالافعال ..
نورة ــ هههه ,,, اكيد نعرفج بنت من .. انزين اشوي ارحميه بعدين ترا بينكم ضلوع وكلاوي ..
ــ نورروه !!!.. انجبي عاد ... بتمسكينها علي يعني ؟؟.
نورة ـ لا .. احم ..انزين روقي وامسحي المسج .. الساعه صارت 1 وشي متى بيدخل المعرس؟..
المها ـ اتوقع باي لحظة تعالي نلبس عباياتنا ...
على الناحية الثانية كان جسم وصالح واقفين في القاعه .. راح راشد والشباب وطلع المعرس للقاعه .. وكان صالح بيروح ..لكن جاسم ناداه ..
ــ صالح .. خاويني بسيارتي ..
استغرب صالح .. ركب السيارة معاه وخل سيارته جدام قاعات الدفنه فالشيراتون ..
صالح ــ شفيك ؟؟ .
جاسم ـ لي وصلنا .. بقولك كل شيء ..
انزلوا عند الكورنيش الساعه 1 فالليل الكورنيش فاضي وفي نسيم هوى خفيف ..
مششوا لين عند البحر ووقفوا .. لف جاسم لصالح ــ ياخوك .,انت رفيجي وخوي اللي ماجابته امي ..
صالح ــ خوفتني يا جاسم شفيج ؟؟..
جاسم ـ انت رفيج عمري ..وانا ما ابي اغشك ..ولا ابي اطعنك ..فبقولها لك ..بس اول دخلت عليك ..عطني الامان ..
طالع له صالح منصدم ـ شنو ؟..
جاسم ـ عطني الامان ..
صالح ـ شسوالف البدو هذي شوراك ؟؟ ..
جاسم ـ عطني الامان ..
صالح ــ قول وانت امن ..
جاسم ـ انا عاشق ..
طالع له صالح مستغرب ..كان بيضحك بس في شي مسكه عن الضحك ..كان بيتطنز بس مسك لسانه ..لين نطق جاسم
ــ بنت اخوك !...
مسك يدهــا بحنان .. شد على يدها .. كانت ترتجف .. اهله طايرين فيهم .. ويصورون ويرقصون .. والعنود عيونها في الأرض كاتمة دمعتها ,, حس فيها .. حس بخوفها .. بيدها البارده تحت اصابعه ..
ــ يمه خل نطلع ..
طالعت له امه مبتسمه ــ انزين يمه ..
ساعدتها ساره وجدتها علشان توقف ..مسك يدها وخذها لليموزين اللي تنطرهم برا ..
_______________
طالع صالح لرفيج عمره وبدون وعيي مسكه من رقبته بقوه ودفعه بقوة على السياره وتم ماسكه
ــ انت اعطيتني الامان !!...
شد على رقبته بقوة بعدين ..ارتخت يده .. .. بس دفعه بقوة على السيارة وابتعد عنه ..
ــ صالح .. اسمعني ..
ــ شسمع .؟؟ . انت صاحي ولا شارب فيك شيء اكيد !!..
قرب منه جاسم ــ انت لو ماتهمني ماقلت لك .
صالح ـ وانت مستانس بعمرك !!.. انت تعرف انه مستحيل مستحيل قبيلتنا تعطي لقبيلتكم بعد كل هالمشاكل اللي بيننا ..
جاسم ـ أدري.. مايحتاج تذكرني ..
صالح ـ وبعدين شلون تعشقها وانت ماشفتها الا مره وحده !!.. شلون تتجرأ تتكلم باللون جدامي وعن محارمي!!!.. انت صديق ولا جلب ؟؟. ,
جاسم ــ انا ماعشقتها من نظره .. انا عشقتها من موقف .. انا ..
طالع له صالح ـ موقف ؟ اي موقف ؟؟ بس يوم اللي دعمتها وبعدها ما ..
جاسم ــ من قبل !!.. انا ..
اجحظت عيون صالح وقرب من جاسم بغضب ــ نعم ؟؟.
جاسم ـ صار بيني وبينها موقف من قبل !!!..
مسكه صالح من رقبتها بقوة هالمره ــ انت شتقول ؟؟ .. . متى ؟.
جاسم ـ في سيلين !!...
ارتخت يدين صالح من الصدمه .. ..قام جاسم يشرح
ــ انت قلت بنطلع الثلاثاء ..وتطنزت على جهلي بسيلين ومنطقتها .. فرحت يوم الاثنين لسيلين وتميت ادور في المكان علشان احفظه .. و..
طالع له صالح بنظره قله صبر فكمل
ــ وتفاجئت بشيله تفلعني .. استغربت .. ولما طالعت حوالي لقيت فرس .. اخترعت .. ولما دققت النظر عرفت ان في حد واقف ورى الفرس..
او بالاحرى وحده .. طلبت مني ارجع لها الشيله بس ..
صالح ــ بس شنو؟.
جاسم ـ الشيطان ساومني ..
انتفض صالح من الصدمه قرب منه معصب ــ لايكون ..
جاسم ـ لا ماصار شي .. بس قلت اسألها شتعطيني مقابل الشيله ..
تفاجأ جاسم بلكمه قويه على وجهه .. هزته بقوة وكان بيطيح على الأرض لولا انه تمسك بالسياره ..
عرف انه طاح من عين رفيجه .. لف عنه صالح .. وعطاه ظهره وقال
ــ ان اعرف المها متربيه ماتسوي سواة بنات الشوارع .. بس لازم اسألك شسوت ..
جاسم ــ لايروح ظنك بعيد .. هي تلثمت بشعرها وقربت مني ..وسحبت شماغي عن راسي وراحت ..تركتني مذهول .. عافت الشيله اللي ساومتها عليها وذلتني بشماغي اللي ..
طالع له صالح نظره بارده ...
جاسم ـ ماكنت ادري انها بنت اخوك !.
صرخ صالح ــ ولو كانت وحده من الشارع مب بنت اخوي اللي سويته غلط .. غلط غلـــــــــــــــــــــــــــط تفهم !! تساوم بنت ضعيفه على شرفها ؟؟ .. على حجابها ؟؟؟.. افا والله ماعرفت اختار لي رفيج .. مات لي اخو اليوم .. مااات..
جاسم ـ صالح والله اني تندمت وصليت واستغفرت ربي .. والله .. وحتى لما دريت ان هلك كانوا في سيلين ماقدرت اواجهك .. والله .. غبت ايام عنك ..ولما شفت المها ..
قاطعه صالح ـ لاتنطق اسمها !!
ــ لما شفتها .. وطاحت ..واضطريت انقلها .. ماقدرت .. صالح انا ..
صالح ـ انسان حقير ..جلب.. ..
جاسم ــ ............. مالومك .. صالح .. ابي اتزوجها ..
صالح ـ مابيوافقون عليك .. انا مابوافق عليك .. واهم شي .. هي مابتوافق على امثالك !!.
انهار جاسم على الأرض .. كان الأمر له تعذيب .. كان ما يقدر ينام ..يفكر فيها بقوة .. حس انه مريض .. . ومابيرتاح الا لما يصارح صالح اللي اكيد خسره ..
شاف صالح رفيج عمره بهالحاله والضياع اللي على ملامحه .. قرب منه ووقفه على حيله ..
ــ وصلني لسيارتي ..
جاسم بصوت مهزوز ـ مابقدر اسوق ..
طالع له صالح منصدم ــ انت رجال .. لاتخلي العواطف تلعب فيك ..
جاسم ــ صالح ....ماقدر .. خذ السياره وروح ..
عطى المفتاح لصالح ومشى متثاقل على الكورنيش .. جلس عن اقرب كرسي وتم جالس .. طالع له صالح .. اقترب منه .. حط المفتاح بجيبه وقال
ـ بمشي لين الصاله .. مب من بعدها ..
تركه وراح .. وتم يمشي لين الفندق والدنيا ضايقه فيه ..
**************
في فندق الانتركونتينتال في الجناح الفخم .. جلست على الكنبه وهي ترتجف .. .
دخل احمد وهم مبتسم لها .. جلس جبنها ومد يده .. مدت يدا بتردد ..
ــ تدرين .. هذا اسعد يوم في حياتي..
طالعت له العنود وحاولت تبتسم .. علشان تخفي افكارها وخوفها ..
ــ مبروك..
كانت الكلمه أقرب للهمس .. ابتسم وحب راسها
ـ مبروك ياغناتي .. قومي نتعشى ..
مسك يدها وجلسوا على الطاوله .. كلمها كلام غزل وحب واشواق .. وهو يحط لها جزء من السلطة اليونانية والدجاج المشوي ..
ــ العنود .. بغيت اسألج .. وين تبين شهر العسل ..
انحرجت العنود ــ مادري كيفك ..
احمد ـ كان ودي اخذج باريس .. بس مابناخذ راحتنا فيها .. كل العرب مطيحين في باريس هالصيف والاماكن الحلوة فيها زحمه مب طبيعيه من الخليجين .. شرايج في اليونان ؟؟. لاتقولين لي تركيا ومهند ونور وهالخرابيط !!..
ضحكت العنود ــ لا .. مابي تركيا .. ابي مكان هادي . .اي مكان تختاره بشرط .. يكون الجو بارد . لأن اتعسني الحر ولا تقول لبنان !!.
ــ اليونان .. خيار ممتاز ..وو.. انا اوردي جهزت لنا كل شي هناك
العنود ــ اذا جهزت كل شيء ليش تسألني ؟ .
ـ ابي اشوف رايج .. يمكن تبين باريس لاني جهزت لها بعد يمكن بنمرها اخر يومين ..
العنود ـ انا شبعانه من باريس .. كنت اروح لها وايد في السنوات اللي طافت .. ابي مكان جديد ..
احمد ــ شكنتي تحبين اكثر شي في باري؟؟
العنود ـ شوارعها فالليل . .كان منظر خيالي .. واحب الصبح اترق في الكافيهات اللي على الرصيف .. اوه ايام ..
احمد ـ
رومانسية العنود ..
ــ تقريبا , ,كنت احب تقدر تقول اني احب استمتع بابسط الاشياء .. كانت امي تروح السوق كل يوم .. وتتركني في الكافيه ..
ــ الا عالطاري .. ماشفت امج من خطبتج ..
ــ ولا أنا شفتها !!..
طالع لها احمد منصدم . فانزلت دموعها على خدها حاره .. قام لها وحضنها وانهارت تبجي في حضنه
ـ يعني ما حضرت العرس؟ .
ــ ماحضرته .. ولا شفتها وولا سمعت منها كلمة مبروك .. قسى قلبها على من طلقها ابوي .. ماخبرتها قاسيه !!.
أحمد ــ عند الكرامه .. ينسى الانسان اهم الاشياء .. واحيانا ..عند اتفه الاشياء ينسى الانسان كرامته ..اتوقع عمي.. ابوج ..جرها لدرجه انها بتعدت عن كل شيء يخصه ..ولا اكيد هي تحبج .. وتهتم بأمرج .. ا
طالعت له العنود بأمل ..تمنت ان كلامه يكون صحيح . بس اهمال امها لها ماجا وليد اللحظة .. من سنوات وأمها ماتسأل عنها ..ولا عن سالم ولا عن عبير وعامر .. .
احمد ـ يلا كملي عشا .. بكره الصبح بنسافر .. ونبدأ شهر عسلنا ..
______
دحل صالح البيت معصب ..تم واقف في الحديقه ينفخ بقوة ..
ـ عسى ماشر اخوي ؟.
التفت لمصدر لصوت .. كانت فاطمه واقفه في زاوية الحديقة ولابسه نقابها وعباتها كان واضح انها توها جات من الصاله .....
ــ لا ما شر .. بس ضايق الصدر ..
ــ سلامتك.. كلنا متضايقين على العنود .. كسرت خاطري اليوم..
لف صالح وجلس على الكرسي ــ نصيبها والله يوفقها ..
حست فاطمه كان صالح مب في مزاج كلام .. لكنها ماقدرت تقول له السبب في وقفتها هنا .. سكتت شوي ..
مرت لحظات اعتقد صالح فيها ان فاطمه راحت لكنه تفاجأ لما لقاها واقفه ..
ــ خير اختي؟..في شي؟.
فاطمه باحراج ــ رجعت البيت .. واكتشف ان محد هنا .. الخدم فالملحق والبيت العود مصكر . وام عبدالرحيم راحت بيت عبدالرحيم ..
ابتسم صالح ـ تخافين تمين بروحج ؟ .
فاطمه ـ لا انا متعوده اتم بروحـي .. بس البيت مقفل !.
طلع صالح مفاتيحه .. كان عنده سيبر لباب البيت ..
ــ اقدر افتح لج الباب بس ..
فاطمه ـ عندي مفتاج غرفتي .. ممكن تسلفني المفتاح ؟..
ــ ليش ما رحت مع امي ؟.
ــ هي تمون ان تبات في بيت ولدها .. لكن انا ماامون ..
ـ شالسالفه انتي من الاهل !.
فاطمه ــ اي صحيح .. بس انا استحي ..
طلع المفتاح من الميداليه وأعطاه لها .
ـ خليه عندج .. انا مااحتاجه غرفتي بره جنب مجلس ابوي ..
ـ تسلم اخوي ..عن اذنك..
دخلت فاطمه داخل وهي مانعه نفسها غصب انها تلتف له .. صج اصغر منها بس تحسه كبير بعقله وكبير بتصرفاته ..
رجع صالح لا فكـاره .رجع لمصيبته في جاسم . .وقرر انه يروح لبيت يوسف ..
ركب سيارته ووصل لهناك كان الباب مفتوح وراشد واقف في الحديقه ..
ــ زيارات تالي الليل ..؟ .
صالح ـ ايه قلت اطل عليكم . وين البنات ؟.
راشد ـ فالبيت .. دخل تلاقينهم فالصاله .. يسولفون في العرس.
تسحب صالح بهوء وسمع اصواتهم
ــ والله من الخوف المسكينه .. بس ضحكها يجنن اهم شي ان المصورة صورت هاللقطه ..
خديجه ــ بس كانت روعه .. الله يوفقها .. ويوفقج امين بريال يحبج..
صرخت المها ـ فال الله ولا فالج .. هذا اللي ناقص ..لا يمه ..انا عنس وعلى الدنيا السلام ..قال حب قال .. ويييييع .
دخل صالح ــ شفيج عالحب ؟؟.
المها ـ هلا بالزول والله ..
صالح ـ اي ضيعي السالفه ..
سلم عليها .وهو متردد يواجهها ولا لا ؟؟. لكنه قرر انه مايواجهها رغم ان اللي سوته غلط .. بس مابيواجهها الا لي اعترفت له ..
المها ـ عمي ليش تطالع لي باجراام؟؟
ضحك .. ــ لا سلامتج .. انا ماتعشيت اليوم شنو في ثلاجتكم ؟ .
لحقته خديجه للمطبخ ــ صالح شفيك؟ .
ــ ولا شي ..
ــ مو علي,, تقص عالدنيا كلها ولا تقص علي .. شفيك ؟ .
صالح ـ مخدوع ومطعون من صاحب . ..
.احسنت الظن فيه وعيا قلبي ييزعل عليه .
خديجه ــ افــــــــــــــــــــا .. عمي يحب !!!..
ضحك صالح بقوة .. ــ صج حريم !!..
خديجه ــ شفيك ؟؟.
صالح ــ صديق لي .. لا اكثر ولا اقل ..
خديجه ـ مب من كثرهم ربعك قصدي صدقانك اقربهم جاسم..
لمعت عيون صالح ..
ــ يعني شايل من جاسم ؟؟ شفيه شسوى ؟؟ .
صالح ـ انتي كله تقريني ؟؟.. قومي انجلعي الصاله سسالفه ماقدر اقولها ولاتجيبن طاري جدام اخواج ..
فتج الثلاجه وطلع توست وجبن وعصير برتقال وراح الصاله لاحق خديجه اللي ابتسمت ..
المها ــ زين ياعمي جبت العده كلها .. انا يووووووووعانه . .
صالح ـ بدل ماتقومين انتي ووجهج وتخدميني ؟؟ .
المها ـ فديتك كله توست وجبن .. لو سويت بيض او شكشوكه شبتسوي ؟ ..
صالح ــ عقابا لج ..قومي سوي لي طبق بيض محترم ..
المها بايتسامه ــ على هالخشم واللـــه .
قامت المها للمطبخ ورجعت بعد عشر دقايق مع طبق بيض شكله رهيب . .
المها ــ ترى محشو بصلصه طماطم حاره .و بمرتديلا وجبن شيدر ..
اكل صالح بلذه ــ تسلم يدينج ماخبرتج طباخه !!.
المها ــ ولا انا توقعت يطلع مني هالفناتق .. خفقت البيض مع الملح والفلفل الاسود وعلى جنب قطعت طماطم قطع صغيرة وقليتها مع بصل وفلفل اخضر بارد وفلفل حار .. قطعت المارتديلا وضفتها عليها .. بعدين في تاوة ثانية حطيت البيض طبقه وخليته شوي وبعدين قلبت الطبقه كامله ..وعلى نص الدائره حطيت الصلصله وحطيت جبن فووقها وقلبت وصكرت الطبقه اللي على طول لصقت في الجبن .. شرايك .؟ ترا اختراع اللحظة ..
صالح ــ تسلم يدينج بس ترى كله بيض وطماط مسويه فيه فناتق الاخت وكاشخه علينا مسويه فيها الشيف اسامه ! !!!..
عصبت المها وانهارت خديجه بالضحك ..
قام صالح يرقع ـ بس هذا طبقي المفضل اذا ابيه بناديج تسوينه .. يلا قربوا اكلي معاي ..
المها ـ انسدت نفسي من الريحه باكل تووست وجبن ..
. طالع لها صالح نظره مافهمتها .. وبعدين كمل اكله . .استغربت المها حست للحظة ان صالح يعرف كل شي وخافت!!... حسته يعرف كل شي نظرته مب طبيعيه ابدا !!...
06-07-10, 09:31 PM
حبوبه وين البارت
جديد مواضيع قسم القصص المكتمله
العرض العادي
