كاتب الموضوع :
♫ معزوفة حنين ♫
المنتدى :
القصص المكتمله
* الجــزء الواحد والعشــرون *
طالعت مبنى الشرطة مستغرب انا متأكد ماعمري عطيتهم رقم بيتي .. وشلون اعرفوه
تنهدت ودخلت المبنى وبراسي الف سؤال وسؤال .. وش مسوي انا
ما اذكر سويت شي
توجهت لمكتب الضابط بعد ما دلوني وقالوا لي انتظر الين يخلص اللي عند الضابط ثم ادخل عليه
وصلت عند المكتب وانا الافكار توديني وتجيبني .. اللي ببطنه ريح مايستريح
انا هوشاتي كثيرة .. لا يكون احد مشتكي علي وانا مادري .. بس من يوم دخلت المستشفى صاير مسالم .. لي شهر تقريبا ماتهاوشت مع احد .. من هذا اللي توه ينتبه ويشتكي
ووقفت بمكاني بصدمة وانا اشوف اللي قدامي .. وتأكدت شكوكي .. وش جاب هذا هنا .. اكييييييد هذا اللي مشتكي علي مافيه غيره يعرفني
يوسف احد زملائي بالجامعة .. بنفس شعبتي جالس على الكراسي قريب من مكتب الضابط اللي دلوني لمكتبه و بحظنه طفل
قطبت حواجبي احاول اتذكر .. ما اذكر اني تهاوشت مع يوسف هذا .. يتبلى علي والا وش قصته ... بس .. مابيني وبينه كلام لا داخل الجامعة ولا خارجها اللهم اعرف اسمه وانه بنفس شعبتي
احم .. كملت طريقي لين وقفت قدامه .. واول ماشافني يوسف وقف وهو شايل الطفل وتوني انتبه انها بنت من لبسها واستغربت اكثر لما شفت هالبنت وجهها مليان خدوش وتوها باكيه
يوسف مستغرب = عمر !! وش جابك هنا ( ومد يده يصافحني )
رفعت نظري ليوسف ( وصافحته وانا مستغرب ) والصراحة ارتحت لسؤاله .. لو هو اللي مشتكي علي ماسأل هالسؤال
عمر مستغرب = مدري الصراحة .. استدعوني بالتلفون وجيت .. وانت عسى ماشر اشوفك هنا
جلس يوسف على الكرسي
جلست بجنبه انتظر اللي قبلي يخلص من عند الضابط
يوسف بتنهيدة = والله مدري وش اقولك يارجال الدنيا صار مافيها امان
قطبت حواجبي وسألته
عمر = ليه ؟
التفت لي يوسف والبنت بحظنه
يوسف = وقفت سيارتي عند البقاله ونزلت ابي غرض بسيط ..وخليت بنت اختي نايمة ورا بالسيارة ( واشر على البنت ) قلت شوي اشتري غرضي وارجع على طول .. والله وكيلك .. يوم طلعت من البقالة مالقيت سيارتي .. اختفت .. يمين يسار مالقيتها
شهقت متحمس معه
عمر بصدمة = لا تقووووول ... وبنت اختك بالسيارة ؟
كمل يوسف منقهر
يوسف = اييييه ... انا ماهمتني السيارة بستين داهية .. انهبلت .. مدري وش اسوي البنت فيها .. وعلى طول اتصلت على الشرطة
نزلت نظري للبنت .. تقريبا عمرها سنة او اقل ورفعت نظري له و سألته متحمس
عمر = طيب اشوفها معك الحين وشلون لقيتوها ؟
يوسف بتنهيدة = الحمد الله .. ربك كريم .. اللي سرق السيارة صدم .. الكلب على حسب كلامه يقول مادريت ان فيه احد بالسيارة .. بس يلعبها على مين .. والله لأطلعها من عيونه .. واللي يقهر ماتضرر من الصدمة اللي هالبنية ( واشر على بنت اخته ) القزار اللي بجنبها تكسر عليها
عمر مستغرب = طيب اشوفك جالس برا .. ليه ماتنهي موضوعك مع الضابط
يوسف وهو يكشر بوجهه = نحتري ولي امر اللي سرق سيـ ( وسكت فجأة وكأنه تذكر شي والتفت لي بصدمه ) لا يكون انت اخوه .. اللي نحتريه اسمه عمر
ضحكت عليه وعلى غبائه
عمر = هههههههههه يوسف انا مالي اخوان ..
طير يوسف عيونه فيني متفاجئ من المعلومة الجديدة بالنسبة له .. انا وهو مانعرف بعضنا مرة .. اللهم كل واحد يعرف اسم الثاني .. انا بالنسبة لي ماعرف حتى اسم عائلته وهو اكيد مثلي مايعرف اسم عائلتي
يوسف = صدق ؟ ابد مالك اخوان ؟
عمر = ابد مالي اخوان ولا حتى اخوات
يوسف = اهاا .. اجل تشابه اسماء
هزيت راسي بايه ولا علقت
رجع يوسف يسألني
يوسف = عمر يعني انت وحيد امك وابوك ؟
هزيت راسي بايه
عمر = وحيد امي .. ابوي متوفي
يوسف = من زمان ماشفتك بالجامعة ؟
عمر = ايه ماخذ اجازة مرضية شهر ( والتفتت له ) متهاوش مع احد الشباب وعطاني المقسوم ودخلت المستشفى .. والحين الحمد الله تحسنت بس ماني راجع للجامعة الحين .. نبي نحلل الاجازة ههههههه
ضحك يوسف وهو يعلق علي
يوسف = ههههههههه لايكون متهاوش مع احد الحين ومستدعينك
رجع علي التساؤلات مرة ثانية .. انا ليش هنا ..
عمر بتنهيدة = مدري .. اتصل علي واحد من الشرطة وقال تعال .. وجيت مدرعم
يوسف = ههههههههههههه مطيع لولاة الامر ماشاء الله عليك هههههههههههههه
ضحكت
عمر = انت تشوف هههههههههههههه
وقعدنا نسولف عن الجامعة واسأله وش اخذتوا ووش ما اخذتوا
لين اخيرا طلعوا اللي قبلنا
استأذني يوسف يدخل قبلي عشان يخلص منهم بسرعة ويرجع البنت لاهلها
يوسف = معليش ابدخل للضابط قبلك ودي ارجع البنت لامها بسرعة
مديت يدي له يعني تفضل
عمر = خذ راحتك ماوراي شي .. وعن حقك لا تتنازل
يوسف = ايه اكيد
وقام ودخل للمكتب
طلعت جوالي من جيب بنطلوني وقعدت العب .. احتري دوري
= عمر سعود ؟
رفعت راسي للعسكري اللي واقف قدامي ويسأل
عمر = ايه انا عمر سعود
العسكري = نحتريك من اليوم وانت جالس هنا .. يله ادخل
التفتت لباب المكتب اللي دخله يوسف مستغرب ورجعت التفت للعسكري
عمر = واللي داخل ؟
.. بس هالعسكري معصب حبتين
العسكري = ادخل انت الحين
قمت ودخلت المكتب وشفت الضابط جالس ورا مكتبه .. ويوسف جالس على الكنبه قدام مكتب الضابط وبحظنه البنية
شهق يوسف يوم شافني وعلى طول التفت للضابط بصدمة
يوسف = هذا اخوه ؟
اشر الضابط بيده ليوسف يهديه
الضابط = هد شوي ( والتفت لي ) تفضل وعطنا بطاقتك
جلست على الكنبة قبال يوسف وبيننا طاولة صغيرة .. ونطالع بعضنا مستغربين
اخذ الضابط التلفون وضغط فيه زرين .. شوي وجاه رد
الضابط = يله هاته الحين ( وسكر السماعة والتفت لي بنفاذ صبر ) عطنا بطاقتك ورانا اشغال
التفتت له توني انتبه اني ماعطيته بطاقتي .. طلعت محفظتي وعطيته بطاقتي والتفتت ليوسف واشرت له يعني شسالفه
التفت يوسف للضابط يسأله
يوسف مستغرب وهو يشر لي = لو سمحت هذا ماله اخوان
رفع الضابط راسه ليوسف متفاجئ
الضابط = نعم ؟ ( والتفت لي على طول ) مالك اخوان ؟
عمر = ايه .. الحين وش دخلني انا باللي سرق سيارة يوسف
ابتسم الضابط ابتسامه جانبيه .. وسألني سؤال يقاله كونان على غفله
الضابط وهو يشر ليوسف = وانت وش دراك ان هالرجال مسروقة سيارته الا من اخوك
عصبت و كشرت بوجهي له و اشرت على يوسف بنفس طريقة الضابط
عمر = هو قالي قبل شوي .. وقلتلك انا مالي اخوان ... لا تتبلون علي
فجأة سمعنا طرقات على الباب ودخل عسكري وسمعته يضرب التحية
التفتت للعسكري من باب الفضول
وشهقت بقوة وقمت واقف ماني مصدق
عمر = رااااااااااايد
منزل راسه بانكسار والعسكري ماسكه مع ذراعه ... واول مانطقت باسمه رفع راسه لي
وصاح بشهقه
رايد = عوووووومرررر
وسحب ذراعه من العسكري وتوجه لي بخطوات سريعه وارتمى علي بثقل و يديه على خصري يرصني بقوة
تراجعت على ورا وتدراكت نفسي بسرعة قبل اطيح وسندت يدي على طاولة الضابط .. ورايد يرص يديه بخصري ويضغط جسمه علي
غمضت عيوني بألم مصدوم من شكل رايد
ثوبه الابيض تحول للون بني من وساخته والجيب الامامي مشقوق نصه ويتدلى وصاير اسمر اكثر اكثر اكثر اكثر من قبل وشاحب
والشعر اشهب ونحفاااااااان اكثر ماهو نحفان
اعتدلت واقف ولفيت يدي حول رايد ويدي الثانية ارص راسه على صدري
واخذت نفس اهدي نفسي .. عورني بطني من داخل .. الجرح التئم بس أي ثقل او حركة مفاجئه يعورني
مسحت على شعر رايد وانا اسمعه يبكي على صدري ويردد
رايد = عمر لا تخليني .. لا تخليني .. طلعني من هنااااا تكفى طلعني من هناااا
رفعت يدي ومسحت على شعري بقهر .. توني فهمت السالفة
رفع رايد راسه يطالعني ودموعه على خده
رايد = عمر طلعني .. لا تخليني .. تكفى عمر ( وغطى وجهه بصدري يشاهق )
سكتت متألم
صاير اسمر .. ووجهه شاحب وفمه يابس والهالات تحت عيونه
بصعوبة طلع صوتي وانا اسأل نفسي مليون مرة .. وين كان
عمر بألم = رايد وين كنت .. ليه طلـــ
وماقدرت اكمل .. مو وقت العتب الحين ..
رصيت راسه بصدري اضمه وانا احاول امنع دموعي تنزل
رص رايد يديه حولين خصري بقوة كأنه خايف اتخلى عنه ويردد نفس الكلام
رايد = طلعني عمر .. لا تخليني
التفتت ليوسف اللي جالس وفاتح فمه علينا ماهو فاهم شي .. وانا ورايد واقفين قدامه والضابط ورانا
ودي احل المشكلة بيني وبينه بدون تدخل الشرطة بس كيف ورايد ممسوك عندهم
ابعدت رايد عني ومسكت اكتافه وانحنيت شوي لمستواه .. وسألته منقهر
عمر بألم = ليييييه سرقت السيارة ؟
طالعني رايد وهو يشاهق
رايد بصوت باكي = غصب عني
اعتدلت واقف وانا اطالعه .. مدري وشلون احل المشكلة الحين
تنحنحت و التفتت للضابط اللي جالس وراي ولفيت يدي على اكتاف رايد وقربته مني .. وابتسمت ذيك الابتسامة العريضة عساها تلين القلوب
عمر = ماصار الا خير
قطب الضابط حواجبه معصب
الضابط = وش اللي ماصار الا خير ... ( واشر على رايد ) هذا اخوك والا لا ؟
سكتت ونزلت نظري لرايد
رفع رايد راسه لي شوي يطالعني وهمس
رايد = انا قلت لهم انك اخوي
طيرت عيوني فيه وهمست له
عمر = خبل انت .. اسمي واسمك يختلفون
رايد بحزن = وش اسوي ماعرف الا انت وخفت يجيبون عمي ( ونزل راسه بانكسار )
طالعت الضابط مدري وش اقوله ..توني قايل مالي اخوان
الضابط = هذا اخوك والا لأ ؟
اخذت نفس وجاوبت
عمر = لا بس خلــني افهمك
التفت الضابط لرايد معصب وصارخ عليه
الضابط = وتكذب علينا بعد .. ليه عطيتنا رقم هالرجال ( واشر علي )
دفعت رايد بيدي وخليته يوقف وراي وجلست على الكنبة وقاطعت الضابط احاول اهديه
عمر = آآآآ.. تقدر تقول انا ولي امره .. ( وسألت وانا عارف الجواب ) فهموني الحين وش المشكلة وان شاء الله نحلها
هنا انفعل يوسف معصب
يوسف = المشكلة انه هالكلب ( واشر على رايد ) سرق سيارتي وبنت اختي فيها
رد رايد وهو واقف ورانا
رايد = والله مادريت ان في احد ورا
التفتت لرايد منقهر من فهاوته
عمر = ثاني مرة اذا بغيت تسرق سيارة شف اذا فيها احد والا لأ
ونقزت يوم ضرب الضابط الطاولة بقوة معصب
الضابط = وتعلمه بعد
يوسف بعصبية = عمر اشوفك تشجعه
التفتت لهم منحرج
عمر = لا لا .. آآآآآ .. اقصد
وقاطعني الضابط يكلم رايد بعصبية
الضابط = هاااااات رقم ابوك
نزل رايد راسه بألم
رايد = قلت لك ابوي متوفي
الضابط = هات رقم عمك .. خالك .. قريبك .. ولا تلف وتدور
رفع رايد راسه
رايد بحزن = عمر هنا ( واشر علي )
الضابط = تستهبل انت .. تبي تكذب علينا بعد .. شايفنا مخفات عندك
تدخلت اهدي الضابط
عمر = لحظة خلني افهمك .. انا اقربله ( وحاولت اجيب أي صلة قرابه مالها دخل في الاسم ) انا ... آآآ .. ولد خالته
يوسف = بس هو يقول انك اخوه واتصلوا عليك
التفتت ليوسف اترجاه وامسح على ذقني
عمر = معليش يوسف امسحها بوجهي هالمرة .. والحمد الله على سلامة بنت اختك
الضابط يكلمني
الضابط = حنا الى الحين ماسجلنا بياناته .. اتصل على ولي امره خلصونا
التفتت للضابط
عمر = هاه .. ايه بياناته .. عندي ( ومديت رجلي وطلعت بوكي و طلعت كرت عايلة رايد ومديتها على الضابط ) هاه شفت يوم اقولك انا ولي امره
سمعت شهقت رايد ودار حولين الكنبه اللي انا جالس عليها ووقف فوق راسي وسحب الكرت من يدي قبل ياخذها الضابط مني
قراها وانفاسه سريعة وصاح
رايد = عمر هذا اثباتي ( وضحك ماهو مصدق ) هذا اثباتي .. وهذي اسمائنا
التفتت وراي اطالعه وتوني اتذكر انه مايدري عن اثباته .. وتنهدت متأثر من شكله .. يمسح دموعه عشان يشوف ويرجع يقرا الكرت ماهو مصدق نفسه
قمت واقف وصار بيني وبينه الكنبه .. تعب رايد شهور عشان هالكرت
عمر = ايه رايد هذا اثباتك .. اخذته من عمك ذاك اليوم
رفع رايد راسه يطالعني شوي
ولا شعوريا دخل البطاقة بجيبه الامامي اللي نصه مشقوق ومسك جيبه بيديه الثنتين كأنه خايف احد ياخذه منه
رايد = خلاص ابيه معي
درت حولين الكنبة بس رايد تراجع على ورا وهو يطالعني .. لين لصق ظهره بالمكتبة اللي وراه
رايد = خلاص معي معي
مسكت رايد مع اكتافه اهديه
عمر = رايد مو الحين .. عط اثباتك الضابط خله يشوف شغله
طالعني رايد شوي والتفت للضابط وكأنه انتبه لنفسه شوب و نزل راسه
فكيت يديه وسحبت الكرت من جيبه بدون مايقاوم .. متساهل معي
عطيت الكرت الضابط وهو مستغرب من رايد ويسألني
الضابط مستغرب = ممكن اعرف وش المشكلة
نزلت نظري لرايد وهو منزل راسه بانكسار ولفيت يدي حولين اكتافه وقربته مني
عمر = عنده مشاكل مع عمه وماكل حلاله
سكتوا ..
اما رايد بكى بصمت وهو منزل راسه
الضابط = لا حول ولا قوة الا بالله ... طيب اصلحوا بينهم .. ورجعوه .. شف هذا بدايتها سارق سياره .. هذا مراهق وماله الا عمه لين يحلها الله من عنده
سكتت ومارديت
طالع الضابط رايد شوي وبعدها راح يسجل بياناته
التفتت ليوسف ولقيته يطالع رايد وساكت
شوي وحول نظره علي
ضربت على صدري بصمت ( وكأني اقوله عشان خاطري )
وقعدنا نطالع بعض اتمنى يفهمني
قطع علينا الضابط وهو يكلمني
الضابط = عليكم تصليح سيارة يوسف ورايـ
قاطعته
عمر = ابي يوسف شوي على جنب اذا مافيه مانع واوعدك نحلها بيننا
قام يوسف قبل يرد الضابط ومعه بنت اخته
يوسف = طيب موافق
وطلعنا انا وهو برا المكتب
عمر بترجي = يوسف امسـ
وقاطعني يوسف يسألني
يوسف = اول شي علمني .. انت صدق ولد خالته ؟
سكتت شوي وتنهدت
عمر = لا
يوسف بعصبية = انت الحين مستوعب وش سوا هذا .. لو ماصدم ومسكته الشرطة كان ضاعت بنت اختي
مسحت على شعري مدري وش ارد عليه
عمر = يوسف تكفى .. سيارتك مستعد اصلحها بـ
يوسف بصرخة = ماهمتني السيارة بستين داهيه .. بس هالولد لازم يتربى
حطيت يدي على كتفه احاول اقنعه
عمر = لا تصير انت والظروف عليه ... رايد شاف اللي ماشافه غيره .. امه وابوه وبعض اخوانه ماتوا بحادث سيارة .. وعمه ماكل حلاله وبايع بيتهم وياكل راتب ابوه وفوقهم الضمان الاجتماعي .. وليته اكتفى .. قام وطرده حتى من اثباته حارمه .. قدامك قبل شوي ماصدق نفسه يوم شاف كرتهم معي .. يوسف .. رايد ثلاث اسابيع مختفي والله اعلم وش صار عليه .. ومدري وش اللي خلاه يسرق سيارتك ( وسكتت اهدي نفسي متأثر وصورة رايد ببالي ) تكفى لا تظلمه اكثر ماهو مظلوم
لف يوسف وجهه عني
يوسف = حسبي الله ونعم الوكيل
عمر = تنازل عنه .. خل هالضابط يسكت
سكت يوسف يشاور نفسه
واخيرا هز راسه مقتنع
يوسف = ابتنازل عنه شكر لله على سلامة بنت اختي
ابتسمت ومسحت على راس البنيه ..
عمر = مشكوووووور يوسف .. والله ما انساها لك .. الحين خلنا ندخل على الضابط
دخلنا المكتب ولقينا رايد واقف ومنزل راسه والضابط ينافخ عليه
تنازل يوسف عن رايد
بس اللي اكلها انا .. سلمني الضابط ورقة تصليح السيارة
وكمل الضابط اكمال الاجراءات المملة .. واول ماخلص من شغله ومد علي الاوراق ومنها كرت رايد
= ابي الاثبات معي
رفعت نظري عن الاوراق اللي معي والتفتت لمصدر الصوت
ولقيت رايد ماد يده ويكلمني وكمل
رايد = لا ترجعها لعمي
مايقدر يصبر لين نطلع من المكتب .. وعشان ماخذ واعطي معه قدام الضابط عطيته الكرت بصمت .. وعلى طول حطها باحد جيوبه الجانبية
و على اذان العصر طلعنا انا ورايد ويوسف من المركز
التفتت ليوسف وصافحته اشكره .. ولاف يدي على اكتاف رايد وهو منزل راسه بحزن
عمر بابتسامة = مشكووووووور يوسف .. والله اللي مايعرفك مايقدرك .. دايم اشوفك قدام خشتي بالجامعة بس مافكرت اتعرف عليك ههههههه
ضحك يوسف
يوسف = هههههههه .. نفس الحاله مافكرت اتعرف عليك ( والتفت لرايد ) اتمنى ماتعيدها
رفع رايد راسه ليوسف وبعدها نزل راسه و غمغم بصوت خفيف يعتذر
نزلت نظري لرايد وانا اكلم يوسف
عمر بابتسامة = لا ان شاء الله مايعيدها
تبادلت مع يوسف ارقام الجوال وركب سيارة لموزين وراح
ضغطت بيدي على كتف رايد وقربته مني وانا فرحان برجعته
عمر = مشينا للبيت
ودفعته قدام عشان يمشي .. مايمشي رايد الا بالدف ... من يوم طلعنا من المكتب وانا بس ادفدفه يمشي
توجهنا لسيارتي وهو الى الحين مارفع راسه .. ووقفنا عند باب الراكب وفتحت الباب له
عمر = يله اركب
بس مارد علي .. واقف بحزن وساكت
عمر = اشيلك يعني واركبك والا وشلون ؟
رفع رايد راسه وعيونه تلمع .. شوي وتنزل دموعه
رايد بحزن وهو يتحسس جيبه اللي فيه الكرت
رايد بصوت مخنوق = خلاص بطاقتي معي .. مابي اثقل عليك
تأففت من حساسيته الزايدة .. مسكتت ذراعه ودفعته داخل السيارة
عمر = ياشيخ اركب
ركبت السيارة وحركت .. التفتت لرايد وانا اسوق .. ولقيته منزل راسه بحزن
طالعت ثوبه .. كيف يمشي بالشارع وهو بهالشكل .. مايتفشل من شكله هذا .. تنهدت .. و طالعت قدام وغيرت وجهتي للسوق
ورجعت التفتت لرايد .. نحفااان .. هو قبل عصاليك والحين نحفان زياده
طالعت قدام شوي ورجعت التفتت له
وين كان طوال هالاسابيع .. وليه سرق السيارة وش يبي فيها .. بيبيعها مثلا والا كيف ؟
وصلنا السوق ووقفت السيارة قدام محل بدلات شبابية .. كل المحلات مقفلة الحين للصلاة .. ناوي اشتري بدله له ونمر الخياط افصل له ثوب
طفيت السيارة وجلسنا ننتظر المحل يفتح
شوي وحس رايد بوقوفنا ورفع راسه يتلفت و بعدها طالعني مستغرب
رايد = ليه وقفت هنا ؟
رديت عليه وانا اشر على المحل قدمنا
عمر = احتري هالمحل يفتح ( والتفتت له ) لا يكون عاجبك شكلك كذا ؟
رايد وهو يهز راسه = لا لا عمر .. مابي شي .. مابي اثقل علييييييك .. يكفي طلعتني .. لا تشتري شي .. مابي شي والله مابي شي
هزيت راسي بايه تسليك .. وسألته وانا اطالعه بتأمل وعاقد يدي قدام صدري ومتساند على الباب
عمر = متغير !!!
نزل رايد راسه وسكت
عمر = صاير وجهك اسود ونحفاااااااان مرة
تنهد رايد وهو الحين منزل راسه
رايد = ماكلت شي من ثلاث ايام الا فطيرتين سـ .. سـ ( وسكتت شوي متردد وكمل ) سارقها من بقاله
طيرت عيوني فيه بصدمة ..
عمر = وش حادك وبيتي مفتوح لك
بكى رايد بصمت ونزل راسه اكثر ورد علي بصوت باكي
رايد = مانسيت شكلك هذاك اليوم ... السكينة وهي تدخل وتطلع ماراحت عن بالي ( ومسح دموعه بيده )
قطبت حواجبي مستغرب
كمل رايد كلامه
رايد بصوت باكي = السكينة عيت تروح عن بالي .. مانسيت شكلك وانت طايح بالارض .. مانسيت جدك وهو خايف عليك .. خفت يلومني ابو فهد اذا عرف السبب.. خفت من مصعب يكرهني .. وخفت منك بعد.. خفت من كل شي .. ( اخذ نفس ورفع راسه يطالع قدام ) ذاك اليوم طلعت من المستشفى مدري وين اروح .. جيت ابروح للرياض بس ماعرف رقم خوالي اصلا كنت متردد مابي اروحلهم .. خوالي مثل عمي .. مثله بالضبط ..
عمر = طيب وين كنت ؟
سكت رايد شوي وهو يطالع اللا شئ
رايد = ساكن مع عمال هنود
شهقت بصدمة
عمر = ووووششش
رايد بحزن = بعد ماطلعت من عندك من المستشفى .. مريت مغسلة عشان اغسل ثوبي كـ .. كـ ( وتتنهد ) كان ثوبي مليان دم منك .. عامل المغسلة استغرب مني وعلمته اني ماعندي بيت ولا مكان ولا أي شي ( ونزل راسه وغطى وجهه بذراعه وبكى بصوت مسموع )
سكتت وانا اطالعه مصدوم .. طوال هالمدة ساكن مع عمال والشباب من استراحة لاستراحة يدورونه
والله اعلم وش نوع هالهنود .. مسلمين ولا مجوس .. بمكان محترم ولا خرابه
انتظرته لين يخلص من نوبة البكاء هذي .. وانتبهت على المحل اللي قدامنا يفتح
رفع رايد راسه وهو يمسح دموعه
رايد بصوت باكي = بعض العمال اللي معنا بالسكن على بالهم ان كل سعودي غني .. قالوا لي لازم ادفع معهم اجار الغرفتين اللي هم ساكنين فيها ..
عمر = ودفعت ؟
رايد = غصب عني دفعت .. ماراح القى غرفة ارخص من غرفتهم
عمر = وانت من وين لك تدفع اصلا ؟
التفت رايد لي بوجه شاحب وحزين
رايد = كان معي الباقي من الخمسمية اللي عطيتنياها
ضربت اصابعي ببعضها
عمر بصدمة = الله .. هذي الى الحين معك
نزل رايد راسه وكمل
رايد = سكنت معهم الاسبوع الاول بس مارتاحوا لي ولا انا ارتحت لهم ... عجزت اصبر عندهم .... واحد حاقد ويكلمني كأني ماكل حلاله .. واللي بس يتأمر علي .. واللي يتكلمون علي ويضحكون .. وبعضهم يعاملني كأني عندي فلوس الدنيا كلها .. وبعضهم عادي .. هذا غير اكلهم كل شي حار ..
عمر = وراعي المغسلة اللي جابك وشلونه معك ؟
رايد = كل وقته بالمغسلة .. اكثر العمال مايجون الا بالليل .. بس بعضهم اللي ( والتفت لي ) يشتغلون اعمال حرة مدري وش بالضبط .. احيان سباكين واحيان بناءين ..
هزيت راسي متفهم وسألته
عمر = طيب وبعدين .؟
رايد = طلعت ادور شغل .. رحت لسوق الخضرة بس لقيت مليان شباب سعوديين وعمال ومالقيت شغل لي ... ثلاث ايام وانا اروح ومالقيت شي ( وتنهد والتفت قدام وكمل ) بنص الاسبوع الثاني طلعت من سكن الهنود
عمر = ليه ؟
رايد = عجزت ارتاح عندهم
عمر = ورحت عند مين ؟
رايد = ماهو عند احد .. بالليل انام بالمزارع .. وبالنهار امشي من مكان لمكان وووو ( وسكت شوي متردد ) اروح للبقالات .. آآآ (ونزل راسه وسكت)
فاهم عليه بس ابيه يقولها
عمر = وش تسوي بالبقالات ؟
رايد بحزن = اول شي كنت ابي اشتغل بس مالقيت عندهم ومن الجوع صرت اسرق
عمر = طوال هالاسبوعين ماتاكل الا من السرق ؟
رفع رايد يده يمسح جبهته منحرج مني
رايد = البقالات والسوبرماركات بسهولة تسرق منها خاصة البقالات احط الفطيرة بمخباتي واطلع بدون مايدري العامل .. والبقالات كثيرة البقالة اللي اسرق منها ماارجع لها
تنهدت من حاله اللي كان فيها ..
عمر = وسيارة يوسف ليه سرقتها ؟
رفع رايد راسه يطالع قدام
رايد = شفتها مفتوحه قدامي وجا ببالي على طول اسرقها ناوي اكد عليها بس مادري منين طلعت البنت .. سمعت صوتها ورا وارتبكت وصدمت
سكت رايد منزل راسه وسكتت وانا متساند على الباب واطالعه بصمت
اعتدلت جالس و مسكتت الدركسون بيديني الثنتين افكر
الحين الكرت معه ... لازم من الحين يدور على وظيفة .. اثباته كان عندي من اربع اسابيع من دون فايدة .. والشايب عمه كل شوي يسأل جدي عن الكرت.. مع ان جدي عطاه خبر اننا ماندري وين رايد بس هو ماهمه الا الكرت كل شوي يقول لجدي مايعرفني الا انا اذا ضاع الكرت بس جدي يهديه ويسكته ( التفتت لرايد ) مااقدر اقوله شي الحين ونفسيته تعبانه
اخذت نفس متضايق ومحتار كيف اطلعه الحين من نفسيته واخليه يشوف الحياة بمنظر ثاني .. غير المنظر الاسود اللي يشوفه الحين
احم .. التفتت لرايد وابتسمت بمرح
عمر بابتسامة = خلنا من هذا الحين .. يله انزل خلنا ندخل هالمحل
التفت رايد لي بسرعة
رايد = لا لا لا .. والله مابي شي
عمر = اهاا بس ( ونزلت من السيارة ودرت حولينها لين وصلت عند باب رايد وفتحته ) يله انزل ( وسحبته من يده برا السيارة )
رايد بحرج = عمر اذا كان عن ثوبي .. خلاص ابمر حمام مسجد واغسله .. مابي اثقل عليك .. خلاص خلاص
طنشت هذرته وسحبته ودخلنا المحل
حاولت اخليه يختار البنطلون والتيشيرت على ذوقه .. بس كل شوي يعيد علي ( ابغسل ثوبي مابي شي )
اخر شي اضطريت اختار له من ذوقي .. طلعنا من المحل ومرينا الخياط يفصل له ثوب .. طبعا شغال تسحيب برايد
رايد بحرج = لا لا .. عمر مابي ثوب .. خلاص يكفي البنطلون اللي شريتلي
سحبته مع ذراعه ودخلنا محل الخياط
شاف العامل شغله واخذ المقاس واخترنا القماش ... طبعا باختياري انا .. ورايد يتصدد بوجهه عني منحرج ويعيد كلمته مابي ثوب مابي ثوب
طلعنا من السوق وتوجهنا للبيت وعلى اذان المغرب وصلنا
نزلنا من السيارة وفتحت باب البيت والتفتت لرايد فرحان برجعته
عمر = حي الله رايد
ابتسم رايد ابتسامة حزينة ومعه الكيسة
رايد = الله يحييك ( ودخل للحوش )
دخلت وراه وسكرت الباب
ومشيت قدامه وفتحت الباب الداخلي ورايد وراي
فجأة وقف رايد عند عتبة الباب الداخلي وسرح بفكره وعينه على شي معين بالارض .. كأنه شاف شي
ناظرت للمكان اللي يشوفه ومالقيت اي شي .. وعلى طول تذكرت الحادث ... قطبت حواجبي .. اكيد تذكر الحادث اول مادخل البيت .. مسكت ذراعه وسحبته للصاله
عمر = حياك حياك ادخل
ابتسمت وانا اشوف رايد يجلس على الكنبة اللي كان ينام فيها
اخيرا رجع ...
عمر = وش رايك تروح تتروش وتغير هالملابس الوسخة اللي عليك
رفع رايد راسه بصمت .. طالعني شوي وقام وطلع من الصاله ومعه الكيسة
شوي ورجع
رايد بهدوء = وين احط بطاقتي اخاف تضيع ( ودخل يده بجيبه وطلع اثباته )
مديت يدي له
عمر = هاته .. خله معي .. ومتى ما احتجته تلقاه
تقدم رايد لي وعطاني الكرت و طلع وهو يمشي بانكسار
تنهدت .. وشلون اطلعه من حالته هذي
جلست على الكنبة وطلعت جوالي .. واتصلت على اهم رقم عندي بالحياة
بطني
مسمي العامل اللي يجيب الطلبية ( بطني )
طوال وحدتي بهالبيت وانا اطلب من هالمطعم .. والعامل موكيش يجيب الطلبية لي .. لين تعرفت عليه وتعرف علي
وبدل ما اسميه باسمه بجوالي حفظت رقمه باسم ( بطني )
موكيش = هلا بابا اومر
عمر = هلا موكيش .. اليوم هات طلبيتي بدري .. الطلبية نفسها بس زيد عليها نفر ثاني
موكيش = حاضر بابا .. الحين يجيب ؟
عمر = ايه يكون احسن
موكيش = اوكي
سكرت عنه .. وفتحت انشاء رساله وكتبت
( رايد رجع )
وارسلتها رساله جماعية للشباب .. مشعل ومنصور وعبد الله ومصعب
شوي وجاني اتصال من منصور وبعده عبد الله
ومشعلوه الى الحين ماعنده رصيد ارسل علي كول مي .. اتصلت عليه وبعده كلمني مصعب
وكلهم نفس الاسئلة.. وين لقيته وكيف ومتى ووشلونه وووووو
منصور ومصعب قالوا بيجون بس طلبت منهم ينتظرون عشان نفسية رايد
سكرت عن اخر واحد و على طول تذكرت صلاتي .. وتنهدت متضايق من حالي معها .... ماصليت العصر ولا المغرب .. مدري ليه مااحافظ عليها مدام ماني مرتاح
قمت ورحت اصلي بالمجلس ورجعت للصاله ولقيت رايد جالس وعليه بنطلون جنز وتيشيرت ابيض باكمام قصيرة وسرحان
عمر بمرح = اكششششششخ ياولد
رفع رايد راسه لي متفاجئ مني طالعني شوي وبعدها ابتسم ابتسامة صغيرة وماعلق
جلست بجنبه وانا اضرب ظهره على خفيف
عمر = اكيد جوعان .. الحين يجي العشا
ساكت ومارد علي
تنهدت واخذت الريموت وقعدت اقلب بالقنوات ادور شي مسلي او أي مسلسل كوميدي .. ابي رايد يفهّي فيه
ومالقيت الا فيلم اكشن .. شوي شوي .. فهّيت فيه انا
قطع علي رنين جوالي
بطني يتصل بك
قمت وطلعت للباب عند موكيش واخذت الطلبية منه ورجعت لرايد .. وقعدنا نتعشى
وحنا نتعشى بصمت سألني رايد فجأة
رايد = عمر نايف وينه ؟
رفعت راسي وسكتت مدري وش ارد عليه ..
احم
عمر = آآآ .. مسكته الشرطة .. خلاص انسى موضوعه .. ماعليك منه
طالعني رايد شوي وبعدها نزل راسه يكمل اكله .. بدون مايعلق
اضطريت اكذب عليه .. اخاف يتركني بسببه مرة ثانية .. امي ورايد معطين نايف اكبر من حجمه
الثلاثاء .. العصر
جالس بالصاله وداخل على النت
رايد من امس بعد ماتعشى نام على الارض وعليها الى الحين .. حسيت حاله منهد
امس نام بدون مايدري عن نفسه .. لحفته ببطانية وحطيت تحت راسه مخده وخليته
واليوم تغديت كالعادة وحيد
طالعت رايد يوم حسيت بحركته وهو نايم وابتسمت .. اليوم ناوي اجمع الشباب بمناسبة رجوعه
امممم خلني اجهز من الحين .. سكرت الاب توب وطلعت من الصاله عشان ما ازعج رايد
وعزمت منصور ومشعل وعبد الله ومصعب واحمد ..
سكرت عن اخر واحد وسكتت افكر متردد اتصل على يوسف واعزمه والا لا ؟
امممم خلني اعزمه .. اتعرف عليه اكثر واعرفه على رايد
اتصلت عليه وعزمته يسهر الليلة معنا .. ووافق
اتصلت على بطني وطلبت منه يجهز طلبيه وعلمته بعدد الشباب
رجعت للصاله ولقيت رايد الى الحين نايم
نظفت الصاله من بقايا عشانا امس وغداي اليوم وطلعت للسوبرماكت اجهز لسهرتنا
على اذان المغرب رجعت للبيت ودخلت الصاله ومعي الاكياس
ولقيت رايد جالس بالصاله يقلب بالقنوات وحاط بطانيته ومخدته على احد الكنبات
رفعت الاكياس قدامه
عمر = الشباب بيجون يسهرون عندنا ..
قطب رايد حواجبه مستغرب
رايد = الشباب ؟
نزلت الاكياس على الطاولة الصغيرة وجلست بجنبه
عمر = ايه الشباب .. لا يكون نسيتهم .. منصور وعبد الله ومشعل ومصعب واتصلت على جارنا احمد ووووو ( وسكتت شوي ) واتصلت على يوسف
طير رايد عيونه فيني منصدم
رايد = ليه اتصلت عليه .. وين اودي وجهي منه ؟
حطيت يدي على فخذه
عمر = خلنا نتعرف عليه وش خايف منه انت .. هو تراه سامحك .. انت بس لا تكبر الموضوع
لف رايد وجهه عني متضايق
لفيت يدي على اكتافه وقربته مني
عمر = فرفش معنا وانسى همك وعيش حياتك.. ترا كلنا لنا هموم.. والله يحلها من عنده
|
21-02-11, 10:56 PM
جديد مواضيع قسم القصص المكتمله
العرض العادي
