كاتب الموضوع :
سنديان
المنتدى :
القصص المكتمله
>>>>>>الجزء العشرين<<<<<<
وصل فهد عند القصر وقرر يدق على شوق عشان يخبرها انه وصل عندهم....
دق عليها ولقى الجوال مغلق استغرب وصل عند البوابه بعد ما فتح له الحارس دخل ووقف السياره عند البوابه الداخليه ....
دخل الصاله ولقى ام ناصر مع رغد قاعدين....
فهد:السلام عليكم
ام ناصر ورغد:وعليكم السلام
فهد(وهو يجلس):شلونكم خالتي؟
ام ناصر:بخير انت شخبارك وشخبار الاهل؟
فهد:كلنا بخير امي تسلم عليك
ام ناصر:الله يسلمه
فهد:شلونك رغد؟
رغد(موسيعتها الفرحه بشوفة فهد):تماام ,شخبار رحاب؟
فهد:بخير ,اقول خالتي وين الباقين ولا مافي احد بالبيت؟
ام ناصر:والله شوق رايحه المطار وناصر فوق الحين ينزل
فهد(باستغراب):بالمطار شوق شتسوي بالمطار؟؟
رغد:اليوم بتسافر
فهد:بتســــافر؟؟
ام ناصر:ايه بتسافر شفيك ياولدي مستغرب؟
فهد(انتبه لنفسه):لا ابد سلامتك,بس انتوا ما راح تسافرون معاها؟
رغد:احنا بروح ايطاليا بعد بكره
فهد:وليش كل واحد لحاله روحوا مع بعض؟
ام ناصر(وهي تتفرج على المجله):والله شوق راحت مع عمها سلطان واحنا بروح ايطاليا لان ابو ناصر هناك عنده شغل فبروح اشوفه
فهد:الله يهداك خالتي عاد عمي سلطان بوديهم هناك وبهيتهم
ام ناصر:لا انا قلت لشوق تدق على كل يوم واذا صار شي لا سمح الله تدق على على طول
فهد:خير انشاء لله
رغد:انتوا متى بتسافرون؟
فهد(بدون نفس بعد ما درى ان الي جاي عشانها مو موجوده):الاسبوع الجاي يوم السبت
رغد:بتروحون سويسرا
فهد(يعني كانها ما تدري سخيفه):ايه,اقول خالتي شوق وين مسافره؟
ام ناصر:اسبانيا
فهد:ممم طيب انا بطلع اشوف ناصر فوق شكله مطول
ام ناصر:روح يمه البيت بيتك
طلع فهد باصنصير وهو يتوعد بشوق اجل توعدني اجي اليوم واتفاجاء بانها مسافره بس لو اقدر اتهرب من سفرة سويسرا كان لحقتها هناك بس ابوي بسوي سالفه خليها ترجع هنا انا اعلمها .....
****************************
في الطياره....(بعد ساعه من الرحله).....
شوق:اقول عمي
سلطان:سمي
شوق:سم الله عدوك,بس بغيت اسال ليش حطتيتنا درجة الافق انا ابي درجه اولى
سلطان:وشنو الفرق؟
شوق:لا فرق هم ينزلون قبلنا وانا ما تعودت اكون الثانيه
سلطان:مالقيت حجز كان زحمه ,تبيني احطك سياحيه
شوق:ييو اعوذ بالله بس بالرجعه حطنا درجه اولى
سلطان:تامرين امر
مرت المضيفه تشيك على المسافرين...
هديل:لو سمحت
المضيفه:نعم
هديل:ممكن عصير اورنج
المضيفه:اكيد حالا يكون عندك
هديل ابتسمت لها...
مشاعل:اقول راشد انت زرت اسبانيا قبل؟
راشد:لا بس اصدقائي هناك
مشاعل:يعني رايح عشانهم مو عشاني
راشد:ههه لا والله عشانك بس هم رايحن اسبانيا قبل وبالصدفه انا بعد بروح هناك
مشاعل:اها طيب هم كم واحد
راشد:وليش تسالين انشاء لله؟
مشاعل:اسال بس لا حوول
راشد:ماتعرفين كم مدة الرحله؟
مشاعل:11ساعه
راشد(وهو يطالع ساعته):يعني نوصل هناك الساعه10 الصبح
مشاعل:Yap
راشد:مشاعل انتي فيك شي؟
مشاعل:لا ليش؟
راشد:مدرى شكلك زعلانه
مشاعل:لا عادي
بعدت عيونها عنه عشان ما يعرف شنو فيها طاحت عيونها على سلطان الي كان لاف وجه يطالعها....
شافته يبتسم لها ابتسامه وترتها بعدت عيونها عنه عشان راشد ما يلاحظ...
راشد(انتبه لسلطان):ميشو منو هذا؟
مشاعل:ها...هذا عم شوق
راشد(طالع فيه بنظرات اشمئزاز وبادله سلطان نفس النظرات):وليكون بيلزق فيكم طول الرحله؟
مشاعل:لا هو قال بيوصلنى الفندق واذا احتجناه ندق عليه هو بتمشى لحاله
راشد:وليش يطالع فيك كذا ؟
مشاعل:يعني شسوي اغمض عيون الناس خله كيفه
راشد:انا هالرجال ما حبيته ابد
مشاعل اكتمت ضحكتها على كلامه ...
راشد:ليش تضحكين؟
مشاعل(وهي تخفي ابتسامه):انا ضحكت من قال؟
راشد:مبين انك تكتمين ضحكتك
مشاعل:بصراحه(ما قدرت تتحمل وضحكت)ههههههه
راشد(وهو يقرصها من خصرها):تضحكين على ارجوز قدامك
مشاعل(وهي تبعد ايده):هههه راششد بس هههه الحين الناس يطالعونا خلاص ههههههه
سلطان:اففف
شوق:شفيك عمي؟
سلطان:هذي صديقتك مسويه لنا مسرحيه
شوق(وهي تطالعها مع راشد):خلها على راحتها
سلطان:حلفي زين؟
شوق:عادي عمي انت متعود على هالحركات
سلطان:مو هنا اذا وصلنا اسبانيا يسون الي يبونه
شوق:وشنو الفرق؟
سلطان:لان الطياره هدوؤء وهم مزعجين بضحكهم
شوق:هههههه شدعوه
سلطان:حلاتك وانتي ساكته
شوق:طيب قولي كم الفرق بين السعوديه واسبانيا؟
سلطان:11ساعه
شوق:يييو الله يعين
سلطان:شرايك تنامين لين نوصل
شوق:احلى طرده هههههه
طالعها سلطان بنظرات خافت منها....
شوق:طيب لا تطالعني كذا خلاص بنام,تصبح على خير
سلطان(بدون نفس):وانتي من اهله
************************
في القصر عند طلال.....
كان طلال يسبح بالبركه وساره قاعده وحاطه رجولها بالماي ....
طلال:سوسو حبيبتي انزلي اسبحي معاي
ساره(بدلع):لا بعدين شعري يخرب
طلال(وهو يقرب عندها):لا شعرك حلو ما راح يخرب تعالي بس
ساره:طيب بس ترى ما اعرف مثلك
طلال:مومشكله اعلمك
قرب طلال عند ساره ومسكها من خصرها ونزلها للبركه ....
جاء نزار عندهم وهو ماسك سماعة التلفون....
نزار:طال عمرك استاذ فهد يبي يكلمك
ساره:يعني ما تشوفه مشغول خليه يكلمه بعدين
نزار(وده يصفقها على لقفتها):هو يقول يبيك ضروري
ساره:عادي ق....
طلال(يقاطعها):معليش حبيبي انا متعود على اتصالته ,نزار عطني اكلمه
نزار:تفضل طال عمرك
طلال:هلا والله
فهد:هلا فيك,ليه ما ترد على جوالك؟
طلال:انا بالبركه والجوال داخل مو عندي
فهد:تسبح لحالك؟
طلال:لا قاعد مع القمر
فهد:ههههه وانت ما تخلص من سوالفك
طلال:ههههههه
فهد:اسمعني انا طفشان ومضايق وساكه فيني الدنيا
طلال(عرف انه شوق سوت فيه المقلب):افااا ليه بس
فهد:خليني اشوفك اول بعدين اقولك
طلال:اوكي وين تبي؟
فهد:ممم تعال كوستا كافيه
طلال:نص ساعه وانا عندك باي
ساره:بتروح الحين؟
طلال:يعني ما سمعتيني اقوله نص ساعه وجايك
ساره(وهي تحط ايدها على رقبته):حبيبي خلك معاي شوي
طلال:معليش المره الجايه حبي انا بروح الحين(باسها على خدها)لاتزعلين
طلع طلال من البركه وراح بدل ملابسه لبس بنطلون جينز وتي شيرت نشف شعره بالفوطه بسرعه لبس الكاب لبس نظراته واخذ الجوال والمفاتيح ونزل للصاله...
طلال:نــــزار
نزار:سم طال عمرك
طلال:ساره في البركه خلها ساعه وبعدين طلعها الا اذا هي طلعت قبل بس على العموم خلها تطلع بره البيت واذا قالت لك شي قولها عمي طلال قالي كذا لا تخليها تجلس هنا انا ما اضمنها
نزار:حاضر طال عمرك
طلع طلال للparkingشغل سيارته البروش وطلع....
**************************
في الطياره كان وقت العشى....
سلطان:ما تبين تاكلين؟
شوق:لا شكرا
سلطان:ترى الرحله طويله بتجوعين؟
شوق:خلاص اذا جعت باكل
سلطان:ايه مو طيارة ابوك متى ما بغيتي تاكلين
شوق:عمي انت ما عليك اصلا من يعرفون انا بنت مين بيجبون الكابتن بنفسه بيجيب لي الاكل
سلطان:هذا مشكلتكم يا عايلة الهيماني كلكم مغرورين
شوق:ليه انشاء لله انت مو من العايله؟
سلطان:لا
شوق طالعت فيه باستغراب وسكتت....
راشد:مشاعل ..ميشو...حبيتي
مشاعل:ممم
راشد:قومي يلا بسك نوم
مشاعل:اففف خلني ابي اناااام
راشد:انزين قومي بوريك شي
مشاعل فتحت عيونها بثقل ورجعت شعرها لورى....
راشد:صدقوا لما قالو الحلو حلو لو قام من النوم والشين شين لو كحل عيونه
مشاعل:راااشد يلا عاد شنو بتوريني؟
راشد:ما تبين تاكلين؟
مشاعل طالعت فيه وهي منقهره ودها تصطره...
راشد:هههه شفيك تطالعيني كذا؟
مشاعل(معصبه):قاطع على النوم وتحن فوق راسي عشان اكل
راشد:ايه شفيها؟
مشاعل:والله ما اقوم من النوم عشان اكل
راشد:انزين ليش تحلفين؟
مشاعل:اجل اقطع نومي واحلامي السعيده عشان اكل من جد سخافه
راشد:هههههههه
مشاعل:اسمع لا تقومني الا لما نوصل
لفت عنه وغطت نفسها بالبطانيه ورجعت ناامت...
*****************************
في كوستا كافيه....
فهد:تو الناس كان ما جيت
طلال:هههههه والله مو قصدي
فهد:اكيد القمر على قولتك اشغلتك
طلال:تخسي الا هي تشغلني انا بمزاجي انشغل فيها
فهد:ليه ما تحبها؟
طلال:ههههههه احبها طبعا لا انا احب وحده مثل هذي
فهد:ليه هي هالدرجه رايحه فيها
طلال:هذي مستعده تنام بحضن أي واحد اذا بيعطيها فلوس
فهد:هههههه الله يقطع ابليسك
طلال:ما علينا منها,قولي شفيك مضايق؟
فهد:والله ياطلال منقهر
طلال:خير انشاء لله
فهد:أي خير يا عمي,تخيل وعادتني اجي اخطبها اليوم ولما اجي القها مسافره
طلال:من هي؟
فهد:بنت عمي شوق منو غيرها
طلال تذكر انه شوق المفروض تدق عليه قبل لا تركب الطياره طالع ساعته وكانت الساعه2ونص يعني الحين هي بالطياره....
فهد:شفيك تطالع الساعه عندك موعد مع احد؟
طلال:ها...لا بس اشوف الساعه كم
فهد:اها تدري عاد مدرى شسوي فيها لما اشوفها
طلال:ما عليك لا تسوي لها شي يا عمي انساها دام هي ما تبيك
فهد(معصب):لا تبيني بس انت اطلع منها
طلال:طيب شفيك معصب؟
فهد:لا معصب ولا شي بس انا تاخرت بروح
طلال:تو الناس؟
فهد:أي تو الناس انا قاعد عند بيت عمي ما اقدر ادخل البيت باخر الليل
طلال:اوكي
فهد:انت وين بتروح الحين؟
طلال:يمكن اروح عند الشباب بالاستراحه
فهد:أي ما وراك شي
طلال:اصلا احسن شي سويته بحايتي اني سكنت بالحالي
فهد:حق خرابيطك الي ما تخلص
طلال:الله يسامحك كل شاك فيني
فهد:اشك فيك يلا مو مشكله مع السلامه
طلال:الله معاك
اول ما طلع فهد دق طلال على شوق ولقى جوالها مغلق عرف انها بالطياره ....
*******************************
في الطياره .....
فتحت شوق عيونها ببطء وشافت نور الشمس.....
سلطان(ببتسامه):صباح الخير
شوق(رفعت شعرها وابتسمت):صباح النور وصلنا؟
سلطان:باقي نص ساعه
شوق عدلت جلستها وربطت شعرها وطلعت المرايا تعدل شكلها....
شوق:والله اني حلوه حتى وانا توني صاحيه من النوم
سلطان:ماخذه مقلب بنفسك
شوق:لا انزين احلف اني مو حلوه
سلطان:لا تزعلين حلوه وتهبلين
شوق:ايه الحين هذا عمي الي احبه
سلطان:المصلحه هههههههه
بعد نص تكلم الكابتن معلن الوصول لمطار مدريد الدولي ....
راشد:مشاعل ....ميشو قومي وصلنا
لفت عليه مشاعل وهي مضايقه من ازعاجه....
راشد(بعد شعرها عن عيونها):انتي قلتي قومني لما نوصل
مشاعل(ابتسمت):.......
راشد:صباح الحب على احلى ميشو بالدنيا
مشاعل:good morning
راشد:يلا قومي صحصي شوي
مشاعل(عدلت جلستها وحطت شعرها على جمب):طويله الرحله
راشد:وين حسيتي فيها كله نايمه
مشاعل:لا يعني انت ما نمت؟
راشد:ما قدرت انام انت كل شوي رفستني
مشاعل:الحين انا رفستك
راشد:ايه ليكون تحلمين انك تتهاوشين معاي؟
مشاعل:كذااب اصلا انا ما اتحرك لما انام
راشد:عليـــنا ترى خلاص شفت كل شي
مشاعل:اقوول عن الاستهبال
راشد:هههههه يا حلوك وانتي معصبه
مشاعل(وهي تطالع هديل):هديل ما قامت؟
راشد:لا من تحركت الطياره وهي نايمه
مشاعل:بتعطيها عين خلها بعد عمري شكلها تعبانه
راشد:لا وانا.....
قاطعه صوت المضيفه ....
المضيفه:لو سمحتوا تفضوا بالنزول الحمد الله على السلامه
قامت مشاعل وفسخت العبايه والغطا وحطتهم بالشنطه الي معها ,كانت لابسه بلوزوه حمرا كت وفيها كتابه بالون الذهبي وبنطلون جينز ضيق وجزمه كعب حمرا ....
راشد:لا صراحه اخاف عليك من العين اذا نزلتي كذا
مشاعل:لا والله وخر خليني اقوم هديل
راحت مشاعل عند هديل .....
مشاعل:هدوول يلا قومي وصلنا
هديل(وهي تتثاوب):اوكي,بس بروح الحمام افسخ عباتي
مشاعل:ليه افسخيها هنا؟
هديل:نسيتي الحجاب بروح البسه
مشاعل:افف يا هالفيصل روح استناك
هديل:لحظه
راحت هديل الحمام ,التفتت مشاعل على شوق لقتها تعدل شعرها وشافت سلطان يطالعها ابتسمت له غصب عنها لما تشوف عيونه ما تقدر ما تبتسم وهو رد لها الابتسامه ....
شوق كانت لابسه تنوره بربري لنص الساق وبلوزه بنيه وجزمه كعب بنيه خلت شعرها مفتوح بس حطت النظاره فوق راسها...
شوق:صباح الخير ميشو
مشاعل:هلا والله وحشتيني
شوق:me to
مشاعل:الرحله طويله وتعب
شوق:مرره,الا هديل وينها؟
مشاعل:راحت الحمام تلبس الحجاب
شوق:عمي خلاص استننى تحت لما تطلع هديل بنجي
سلطان:اوكي لا تطولين
مشى سلطان جمب مشاعل ولان المكان ما كان وسيع فكان قريب منها مره حست بارتباك وتوتر بمجرد انها تشم ريحة عطره الرجوليه....
طلعت هديل من الحمام ولقت مشاعل وشوق ينتظرونها...
هديل:فكرتكم روحتوا؟
شوق:شلون نروح ونخليك مجنونه انتي
هديل:ههههههه
مشاعل:على فكره طالعه تهبلين
هديل:عيونك الحلوه
كانت هديل لابسه بلوزه رماديه طويله فيها شريطه تنربط على الخصر وبنطلون جينز وجزمه كعب رماديه والحجاب كان بربري رمادي مع كحلي مرره مناسب مع البدله ....
طلعوا البنات من الطياره ولقوا راشد وسلطان يستنونهم برى...
هديل انحرجت من نظرات الكل لها لانها من جد كانت طالعه حلوه وخصوصا انها مو حاطه مكياج >>>جمال رباني خخخ
هديل:مشاعل شفيهم يطالعوني كذا ؟
مشاعل:محلوه يا الخايسه
هديل:مع اني مو حاطه مكياج ولا حتى قلوس
مشاعل:بس بشرتك صافيه مشاء لله
هديل:تسلمين وانتي احلى
دخلوا على مطار مدريد الي كان حلو ونظيف....
سلطان:اكلتوا شي بالطياره؟
شوق:انا ما حطيت شي بفمي
هديل:ولا انا ما شربت الا عصير
مشاعل:وانا طول الوقت نايمه
سلطان:ههههه اجل روحوا اجلسوا على الكافتريا واحنا بنجيب الشنط ونجيكم
شوق:اوكي
سلطان:لا تتحركون من مكانكم ترى ما تعرفون للمطار انتظروا لين اجيكم
شوق:طيب هههه
راحوا راشد وسلطان مع بعض والبنات مشوا لجهة الكافتريا…
مشاعل:بنات اخيرا وصلنا Spain
شوق:انا بروح اطلب شنو تبون؟
هديل:جبيلي أي ساندوش وعصير
مشاعل:انا ابي عصير كوكتيل بس
شوق:اوكي
بعد دقائق رجعت شوق بالطلبات وجلسوا ياكلون ويتفرجون على الرايح والجاي....
كان في المطار شلة شباب خليجين واقفين يطالعون البنات ....
هديل:بنات شفوا هناك الشباب الي ياشرون علينا
شوق:من هذولا؟
هديل:الخليجين الي واقفين عند الجسر
شوق:مممم شكلهم عادي
مشاعل:لا الي لابس كاب بيج شكله حلو
شوق:أي صح
هديل:شوفي ياشرلي افتح البلوتوث
شوق:خليه يولي تونا جاين ما لنا عوار راس
هديل:على قولتك
مشاعل:شوفي الي لابس كاب بيج جاي عندنا
جاء عندهم ووقف عند الطاوله وهو يبتسم....
شوق:خير بغيت شي؟
هديل كانت تشرب العصير وما تطالع فيه....
نايف(وهو يطالع هديل):يالتني مكان المزاز
هديل بس سمعت كلمته الاخيره غصت بالعصير وحطت على الطاوله بسرعه...
هديل:كح كح
نايف(وهو يبتسم):سم الله عليك شفيك؟
هديل:خير انشاء لله شاهالكلام؟؟
نايف(وهو يسحب كرسي جمبهم ويقعد حمب هديل):مو مشكله ما تبين مزاز نصير شي ثاني
هديل(وقفت):صدق قليل الادب ومو متربي,بنات يلا نمشي
نايف:افااا زعلتي,طيب حتى ما عرفتك اسمك
شوق(رفعت النظاره من عيونها وهي معصبه):انت شنو ما تفهم؟
نايف(انبهر من جمال عيونها وفكرها لابسه عدسات):هلا والله بالقمر شلون ما شفتك اول ما جيت
شوق:لانك عمي,يا اخي روح وفكنا
نايف:شلون اروح واخليكم لحالكم ما يصير من بلد وحده لازم نساعدكم
مشاعل:لا ونعم المساعده
نايف(تفاجئ):وانا الي فكرت امريكه
مشاعل:ودريت اني مو امريكيه خلاص روح وفكنا
نايف:تامرون امر بس مو قبل ما تاخذين الرقم
مشاعل:اذا عطيتك تروح
هديل(بصوتها الناعم بس تحاول تعصب):مشاعل انتي من جدك؟
نايف:الحين صوتك كذا وانتي معصبه اجل كيف لما تصيرين رايقه
هديل:مالك دخل بصوتي
نايف:اوكي بس وحده فيكم تعطي الرقم
مشاعل:انا بعطيك عطني جوالك اسجل فيه
مد لها نايف الجوال وسجلت فيه مشاعل الرقم وراح عنهم بعض ما تاكد انه رقمها....
هديل:انتي ليه اعطتيه رقمك؟
مشاعل(وهي تجلس):عشان افتك منه
شوق:خلاص هديل لاتعصبين نفسك ما يستاهل
هديل:اففف تو واصلين ما قلنا بسم الله
شوق:شنو ذمبنا اذا حنا حلوين
مشاعل:هههههههه راايقه
رجع سلطان وراشد مع الشنط .....
سلطان:ها خلصتوا اكل؟
مشاعل:ايه اكلنا
سلطان(ببتسامه جذابه):بالعافيه
مشاعل:الله يعافيك
راشد انقهر منه وحب يذكر مشاعل الي تطالع فيه بنظرات اعجاب بوجوده....
راشد:مشاعل
مشاعل:هلا
راشد:يلا ماراح تمشون
مشاعل:الا يلا بنات
قامت مشاعل ومسك راشد بيدها وطالع سلطان بنظرات وكانه يقوله ان مشاعل لي مو لغيري ,سلطان ابتسم له ابتسامة استهزاء ومشوا كلهم لبرى المطار...
شوق:ها عمي حاجز لنا سياره ولا؟
سلطان :لا بنروح بسيارتي
راحوا عند الparkingووقفوا عند سيارت سلطان كانت Tx4 ...
مشاعل:واااو حلوه سيارتك
سلطان:عيونك الحلوين
شوق:اذكر هذي تاكسي في برطيانيا ركبنا اخر مره كنا هناك
هديل:مثلي ركبتها
مشاعل:لا والله شمعنى انا ما ركبتها
سلطان:الحين بتركبينها
هديل:بس الشنط ما تكفي؟
سلطان:مو مشكله اجيب سياره تشيل الشنط للفندق
شوق:طيب يلا خلينا نروح الحين تعبااانه
سلطان:يلا
دق سلطان على شركة لحجز السيارات وجاب سياره تشيل الشنط وروحوا على الفندق .....
***********************
*تتوقعون شنو بيصر بين راشد وسلطان؟
*شنو المفاجاءه الي بتشوفها شوق باسبانيا؟؟
|
29-07-10, 08:02 AM
جديد مواضيع قسم القصص المكتمله
العرض العادي
