البارت الثلاثون والاخير ..
ــــــــــــــــــــــــــــــــــــ
هلااااااا والله بأم محمد
العنود : هلا فيك
سعود : ولدتس ذا نتفه مدري وشلون تقضبونه
العنود : يجيك وتمصلح عندي تبيني ازوجه من بناتك معصي من الحين اقولها
سعود : ليه قالو لتس ابي بناتي هاللي مابعد لقيت امهن تجيهن حاله نفسيه
العنود : حاله نفسيه من ابوهن ما الومهن
راكان اللي دخل عرض: احلى سكتيه هههههههههه..حمدلله على السلامه يأم محمد
العنود : الله يسلمك
سعود : يثقل لساني مقدر اقول لها ام محمد عنيد ويخب عليها
العنود تنفص عيونها : خير سعودوه وش يخب
سعود: هههههه عنيد اتشت معها
العنود : اقول بدخل قبل لايرتفع ضغطي ..دخلت للبيت وهي تفكر غريبه امي وينها هي وجوجو مو بالعاده ...
جوجو: هلاااااااا والله بالحامل والمحمول
العنود : بسم الله علي من وين طلعتي
جوجو : من الدرج من وين طلعت
العنود : وين امي ؟
جوجو: امي فوق تسوي لتس اكل
العنود : يووووه ما ابي خليها تنزل والا رقيت عليها
جوجو : خير ترقين الحين امي وابوي من ولدتي وهم كل يوم وهم بالسوقه يجهزون سرير ورعتس ومفرشتس وانتي تقولين بطس فوق !!
العنود مطيره عيونها : تعالي سطريني احسن !!
ـــــــــــ
فتحت عيونها ببطء تناظر حولها تشوف وجيه كساها الحزن تبغى تسئلهم عن اللي صار هو حقيقه او حلم خافت تسمع شىء هي ماتبيه ترددت حركت فمها بصوت هامس يكاد ينسمع وفك يرتجف ودموعها تنزل بغزاره : مـ مـ اجد و شلـ وونه ؟
ابوماجد يمسح على راسها : يبوي انتي وشلونك ؟
حركة راسها بالايجاب : ماجد
ابو ماجد : الحمدلله طيب الحين
عهود : هوو حي
ابو ماجد : ايه الحمدلله
عهود صارت تبكي : احمد ك يارب بشوفه وابعدت عنها الشرشف مسكها ابوها :يابوي ماتحركين من هنا انتي تعباانه
عهود تحرك راسها بالنفي : لا لا انا طيبه بروح اشوف ماجد مشتاقه له
ابو ماجد :بتروحين له ان شالله بس ارتااحي
عهود : ارتاح لاشفته فكت الجلكوز من يدها ولبست عباتها وطلعت بسرعه وهي فرحانه بالخبر ..
*اول ماسمعت جهاز توقف القلب حسيت قلبي توقف انا شعور صعب ان اخوي واقرب اخواني واغلاهم افقده كأني فقدت روحي ..ماعرفت وش صار بعد ماصرخت بصوتي رافضه اني اصدق ان جهاز القلب توقف نبضه ..يعني اخوي مات مات على انها صغيره حيل هالكلمه الا انها قاااسيه في معناها خاصه لما يكون الشخص غااالي على قلبك مره ..فتحت عيوني ناظرت في وجيه اللي حولي كلهم كانت ملامحهم حزينه ترددت اسئل عنه لكن بعد ماسئلت قال ابوي انه طيب مدري اضحك او ابكي تخالطت علي المشاعر كنت بين مصدقه ومكذبه قمت ورحت له بسرعه قرب من غرفته شفت ممرضه معه بالغرفه وحوليه الاجهزه دعيت من كل قلبي يكون يومي قبل يومه ويشفيه ربي لنا التفت على اللي جنبي شفت مهاا سئلتها وش صار بعد مافقدت الوعي قالت لي ان الطبيب دخل عليه وحط عليه جهاز الصدمات الكهربائيه حتى يرجع النبض والحمدلله رجع بعد ثاني محاوله وسئلتها عن ساره قالت انها طيبه بعد ما اعطوها مهدئات رجعت اتمعن في ماجد شفت ملامحه كاسيها الجمود صرت ادعي بداخلي ربي يشفيه لنا ولا يحرمنا وقفته وسطنا ..
ــــــــــــــ
*بعد ماسمعت اللي صار لماجد خفت ايه خفت افقده خفت انحرم منه تذكرت شعوره وهو محروم من زوجته وانحرم الحين من زوجته وولده كنت اقول صح اللي يسويه وانا عارف ان لها مكانه غير بقلبه لكن ماكنت احس بشعوره ايه مكنت احس بشعوره هو يمكن حب زوج لزوجت لكن انا اخو لاخوه عضيده عرفت الحين ليه كان متردد ورافض انه يترك روحه عرفت حسيت باللي كان يحس فيه رغم ان احساسي له هو سندي واخوي واقرب شخص لي لكن هو تؤم روحه زوجته ام ولده كأن يردد لي هالكلمات بس كنت غبي ما اعرف ما افهم ما استوعبتها ما عرفتها الا بعد ماصار اللي صار قادتني رجولي لبيتنا كنت رايح لها بقولها اللي صار لقيتها جالسه على سجدتها تدعيله بالشفاء انحنيت لها وحبيت راسها سئلتها سؤال غبي قلت تحبينه ؟ردت على ودمعها ينزل بغزاره هذا ولدي قطعه مني وشلون ما احبه قلت لها حققي امنيته بالحياااه حققيها طالعة في وهي عارفه وش بقول وقالت لو اعرف ان هذا بيشفيه ماتردد لحظه عشان اسويه مسكت يدها ورفعتها قلت بنحاول وان شالله ربي يقومها بالسلامه حوطتني امي بيديها وصارت تبكي بصوت وتردد كلمات انا السبب اناحرمته من فرحته ..انا ما اصلح اكون ام ..انا قسيت عليه ومن هالكلام حسيت ان امي ضعيفه بس استغلو ضعف شخصيتها ..مسكتها وقلت يالله نروح ونجيبها الحين ناظرت فيني وقالت بيأس بترضى بع اللي سويته فيها ؟قلت لها وانا شاك بكلامي بس احاول قد ما اقدر ارفع من معنويات امي ايه بترضى ..طلعنا من بيتنا بسرعه وكانت امي طول الطريق تدعي ان العنود ماتردنا ..
ـــــــــــــــــــ
بس خلاااص من اليوم وانا اشرب قهو احترقت تسبدي
ام نواف :سلامة تسبدتس
العنود : الله يسلمتس
ام نواف : الا العنود وش جاب لتس رجلتس هديه يوم ولدتي ؟
العنود: عندي احلى واكبر هديه محمد
ام محمد : تعرفين تهربين من النشده بطريقه زينه
العنود : ما اتهرب اقول الصدز
ام محمد : تلتفت على ام خالد اقو ام خالد من اللي خلى ابو محمد رجال ؟
ام خالد مستغربه : وشووو
ام محمد : سمعت انتس تنافخين وتقولين ان ابو محمد ماخلاه رجال الا ناايف رجلتس ؟
ام خالد :ام محمد انتي تعرفيني وتعرفين اللي وصل لتس الحتسي ؟
ام محمد : وحده قالته لي
ام نواف تبلع ريقها : استهدو بالله وراكن تحبطن اعمالكن بها الخرابيط كل وحده تعرف رجلها
ام خالد : لا لحظه انا عارفه من اللي نقلت لتس الخبر بس ماراح اقول منهي بس بقولتس كلمه مبطيه من زمااااااان نقولها (من حتسالك حتسا فيك ) انتي ذكيه يأم محمد وتعرفين
ام نواف : نطت وقالت وش تقصدين
العنود هههههههههههههههههههه : اللي في بطنه ريح مايستريح
ام نواف : انتي تلايطي
ام خالد :انا ماقلت انتي بس انتي علمتي على عمرتس ..
ام نواف : انا ماقلت شىء
ام محمد : تسذبين انتي اللي قلتي لي كل هالكلام
ام خالد: ام نواف انا قلته ؟؟
ام نواف بتردد : ايه قلتيه
ام خالد : متى يأم نواف ؟ ادخلتس على الله متى قلته ؟؟ والله لو ماعلمتي بالصدق ان اعلم انا واقلب عاليها واطيها وانتي تعرفيني
ام نواف تكتف : يعني وش بتسوين ؟
ام خالد : بعلم نايف وبخليه يجمع اخوانه وانا بقول الكلام اللي انتي قلتيه وام محمد معي تقول اللي قلتيه لها .. وبنشوف وش رد الرياجيل ؟؟
ام نواف : تدخلون الرياجيل بحتسي الحريم ؟؟
ام خالد: الحين صارحتسي؟؟توشين حماتي علي وتقوليني كلام ماقلته ؟ وفوقها تدعين الدين ؟ انتي ماتخاافين من ربتس ؟ استحي على وجتس مره وش كبرتس تنقلين الحتسي من وحده لثانيه وتزودين وتألفين والله ماحصل لبناتس الا من سبة لسانتس الله ..اتقي الله
ام نواف تنفض ثوبها :انا متقيه الله من قبل لا اشوفتس
العنود : اللي يعرف الله مايوشين بين الناس ولا يفرق الاخوان عن بعضهم كلهم حسد وغل وحقد انتي تجين لنا بحتسي ماشلناه ولا قلنا قالت وقالت لكن تقومين منا وتنسبين الكلام اللي انتي قلتيه علينااا ..
العنووووود العنووود
العنود : هلا سعود
سعود : تعاااااالي والبسي جلالتس وبرقعتس
العنود : ليه ؟
سعود : خالد حماتس يبيتس برا
العنود اللي قلبها يرقع من الخوف
* كنت اهاوش من القهر من حركات ام نواف تحكي عندنا في ام محمد وتسبها ولا جت صارت مثل اختها واغلى بعد تقهرني هالحركه احس انها خبيثه ليه تسوي كذا وقطع علي سعود وفاجئني يوم قال خالد يبيس لبست برقعي وجلالي وطلعت له وانا اقول انه ماجاب ورقتي يبي فرقااي بسرعه طردتها من بالي قلت مو هذا اللي انا ابغاااه كم مره جاني بس انا رفضت ويوم صار الصدق تضايقت شفته واقف عند باب المجلس وعبدالله واقف جنبه وشفت حرمه عند الباب متكيه بعصاها استغرب ام ماجد هنااا !! وش عندهااا !!ضحكت بداخلي من السخريه هه ايه ترمي ورقت الطلاق بوجهي فرحانه بالنصر اللي صار لها تقدمت وانا حاسه رجولي رخوه سلمت عليهم وانا انتظر القرار فاجئني خالد بطلبه اني اروح معهم ناظرت فيه وانا مستغربه يعني مو جايين يعطوني ورقتي !؟قلت له وانا اتقطع في داخلي خالد انت عارف قراري قبل ماتجي صح
خالد: بس هالمره غير
العنود : لا مو غير انا مصره على رائيي
خالد : عشان ماجد
العنود من سمعت اسمه ونبرت صوت خالد حسيت قلبي يرقع بقوووه مدري ليه : ولا عشان ولد ماجد
رجعت بدخل حتى ماتخوني دموعي ونبرة صوتي صعدت الدرج بدخل البيت واناسابحه بخيالي وافكاري بماجد رجعت على واقعي ابغى اتاكد من اللي سمعته التفت بسرعه قلت : وشوووو
ام ماجد : ماجد تعباااااان وفي العنااايه
حسيت الدنيا تدور فيني غمضت عيوني وجلست على ركبي بسرعه قلت لها: انتي وش تقولين
جاء لي عبدالله يركض بسرعه مسكني : العنود انتي طيبه
رفعت نظري له وانا حاسه نفسي في دوامه ماكن مصدقه اللي اسمعه ولا ابغى اصدقه:ماجد وينه ؟
ضمني عبدالله لصدره وقال لي بنبره هاديه بنروح نشوفه حركة راسي بالموافقه وانا موحاسه بنفسي لبست عباتي بسرعه وطلعت مع عبدالله بسيارته حسيت ان المسافه طووووووووويله مره
دخلت عليه شفت الاجهزه حوليه موصله حطيت يدي على فمي امنع شهقتي مسكت يده البارده وصرت احرك اصابع يدي في كفه حاولت اناديه بصوتي العادي لكن عبرتي غلبتني بسته من فوق اللفه اللي على راسه همست بصوت مبحوح اشتقت لك حيل كنت انتظر منه حركه او شىء يثبت لي انه حس فيني بوجودي لكن للاسف دخلت علي الممرضه وطلعت منه وانا تعبانه اكثر شفت خواته كلهن عند الباب ينتظرون مني بشاره انه تحرك وحس فيني لكن ماكان مني الا اني ارتمي في حضن اخوي اللي مسكني وصار يمسح على ظهري يهديني ..آه كنت احسب الفرقا هينه لكن الحين يصعب فراق الغالي مستعده ارجع له ومن هالحظه بس يعيش ارتفع صوتي وانا ابكي ابي عبدالله يطمني بس عبدالله ماكان احسن مني صار يضمني بقوه ويقول بهمس ادعي له اادعي له
..
توني حسبت حســاب بعدك وفرقاك
توني دريت إنــي بـــدونك ولاشـــيء

خليـتـنـي مابيــن طيــفــك وذكرااااك
عذبـت حـــالي ليـش ماتــرفق شوي

إرجــع ولو تــآمـر على الـــروح تفداك
إرجــع تراني شفت موتي وأنــا حي !!
ــــــــــــــــ


* شفت الحزن والضيقه بعيون اخوه اء لنا في بيتنا صحيح انا ما احب ماجد لكن ما اكرهه انا كره زواجه من العنود ..يمكن اكون غلطان بتفكير ويمكن اكون متخلف لاني اتبع العادات والتقاليد لكن هذا اللي تعودنا عليه من حنا صغار وهم يقولون البنت بس لعيال عمها حتى القبيله ما ياخذن منها الا اللي يكونون نفس الفخذ تربيت على هالشىء وكبرت عليه تشبعت من هالكلام فجأه اختي تضرب هي وابوي بالعادات والتقاليد عرض الحايط قهرني هالشىء نفرني من ماجد لكن عمري ماكرهته لكن اليوم بعد اللي شفته تمنيته يعيش لزوجته وولده شفت اخوه وهو يحاول يداري نفسه حتى ماتنزل دموعه ولهفة ابوه على سماع خبر يسره من العنود شفت العنود تقبل بخطوا ثقيله ارتمت بين يديني في حضن كانت تبي مني كلمات تهديها بس انا ماقدرت ماقدرت دموعها وصوتها الباكي ونظراتهم ولهفتهم على اي خبر منها عنه اضعفني قوتي اللي متعود تبخرت مع هالمشاعر والوضع اللي انا فيه صوتها وهي تبكي وتبي مني عزم لها ماقدرت لساني ثقل وصوتي ما اسعفني مع نظرات اللي حولي ودمع المتجمع في محاجرها وشهقات البعض منهن اللي اطلق العبره وانين البكاء حسيت صوتي مايساعد ولساني ثقل حركت شفايفي قلت بصوت خافت ادعي له ادعي له ..
ــــــــــــــ
* طلبو مني اروح للبيت وارجع لجاء وقت الزياره الثانيه رفضت وقعدت في وحده من الغرف القريبه منه كانت فاضيه ودخلتنا فيها عهود انا وساره ومها ونوف والهنوف نوف كان متشبثه فيني بقوه وتقول لا تخلينا عمي بحاجتك كن اطالع فيها وانا ما اشوفها زين من الدموع كنت بفتح فمي بقولها انا بعد بحاجته بس حسيت بعبره تحنقني خفت اطلع صوت وازيد عليهم اللي هم فيه بلعت عبرتي وضميت البنت لصدري وحاولت اهديها ..مر علينا الوقت ببطء الساعه كأنها ماصدقت جاء وقت الزياره رحت بسرعه لغرفته فتح الباب بهدوء كأني خفت اصحيه قربت منه وشفت صدره مكشوف والغرفه بارده رفعت الشرشف عليه وغطيته حتى احاول ادفيه قربت من راسه وقلت له كلام كان يقوله لي لاصحى قبلي رحت اعيد نفس الكلام له قلت له انا ومحمد ولدك ننتظرك تقوم لنا بالسلامه حطيت يدي على خده وجلست اتحسسه همست له ولهت عليك مشتاقه اسمع صوتك ..تدري وش جابني هنا امك ..ايه امك هي اللي طلبت مني ارجع لك تقول لي ماراح تتدخل بحياتنا وعدتني انها ماعاد تتدخل فينا بس انت اصحى ..ماقدرت اكمل عبرتي غلبتني وصوتي تهدج من البكاء لست شوي وبعدها كملت كلامي ..ماجد انا بحاجتك فتح عيونك شفني جنبك مو كنت تقول انك بحاجتي جنبك شفني جنبك ماجد اصحى شوفني هنااا
طلعت منه بسرعه ماقدرت اقعد خفت تفلت اعصابي واحركه ويصير فيه شىء لاقدر الله طلعت منه وانا تعباااانه حاسه نفسي قايمه بمجهود كبير جاء عبدالله لي وقال كلام مدري وشو بس جلسني وشفته دخل غرفة ماجد شوي وطلع نزل لي اشوف شفايفه تحرك بس مدري وش يقول ما اسمعه احس فيه اصوات بس ما اشوف احد حتى عبدالله اختفى ماصرت اشوف حسيت بظلااام ..ليت الوجع بعروق قلبي
ولافيك
وليت التعب غلطان
ساهي ولاجاك
لو الشفا بضلوع صدري
لاداويك
الله من شرالمقادير
يحميك
والله يحفظك ياحبي
ويرعاك
ــــــ
اليوم الثاني
حمدلله على السلامه
العنود تناظر حولينها رفعت راسها :آخ راسي ..الله يسلمك ..ريم الساعه كم ؟
ريم : الساعه تسع ونص
العنود :وشلون ماجد اليوم ؟
ريم : في رجاء الله
العنود بضيقه : من رجاء الله ماخيب رجاه ..تحركت بتقوم من السرير
ريم : هييي انتي وين قايمه مهبوله ناظري بيدتس
العنود : ليه حاطين فيني مغذي وش صار لي امس ؟؟
* كسرت خاطري العنود ماتدري باللي يحصل حولها حتى اللي صار لها امس ماتذكر وش صار!البارح طول ليلها وهي تناديه وتهمس بأسمه آه يالعنود الله يصبر قلبتس بعد صمت قلت لها امس تعبت ودختي عليهم ماتذكرين قالت اذكر قلت من دختي شالتس عبدالله وحطتس في غرفة الكشف وقالت الدكتور انتس تعرضتي لانفعال وجسمك منهك وتعبان لانتس ماتغذيتي زين وانتي نفاس هذا خلاتس تفقدين الوعي حطولتس مغذي وكلم عبدالله على خالد وعلمه وجيت عندتس سئلت عن عيالي قلت ابوهم عندهم والخادمه وقلت لها ان امي وابوي ومحمد بيجون عندنا..
ــــــــــــــــ
انت من جدك تكلم ؟؟
: ليه هذا فيه مزح ؟
/من متى صار هالكلااام
: امس الساعه 12 في الليل
/لاحول ولاقوة الا بالله ..وش بتسوون ؟
:بروح لهم اخته من دخل المستشفى وهي عندهم هي والعيال
/ الله يعينهم
:آمين ..بتروحين معي يأم عبدالرحمن
ام عبدالرحمن : لااامو الحين بعدين..
: على راحك بس الحين بحاجه لوقفتك معهم
ام عبدالرحمن : ماعاد باقي الا انت ياسلطان تعلمني الواجب !!
سلطان : انا اذكرك ياام عبدالرحمن
السلام
سلطان وام عبدالرحمن : عليكم السلام
عبدالرحمن : يمه برقد ساعه وبعدها قوميني عنده شغله مهمه
ام عبدالرحمن : ان شالله
صعد بسرعه لغرفته ورفع جواله يتصل :اوووووف هالزفت وينه من امس وانا ادور لابغيت مالقيته وان مابغيت نط بخلقتي ..سمع صوت ضحك ..هذي جواهر خبله تضحك لحالها !!ههههه يمكن خزنه عندها بروح اشوفها ..تسحب بهدوء لغرفة جواهر
جواهر وهي تضحك : لا ياعمري
....
جواهر : اممممم صعبه
...........
جواهر : حبيبي الحين ما اقدر
...
جواهر : انا عارفه انهم مشغولين عني مع عمتي بس حتى ولو انا ما احب احد يلقى علي غلطه
.........
جواهر : حبيبي وليد تشك في غلاتك عندي ؟
...
جواهر وهي تضحك :يابعد عمري انت خلاص اليوم ارد لك متى اقابلك .آآآآآآآآآآآآآآآآه
هاتيه يالحقيره يالووواطيه الووووووووووووووووووياكلــ ياابن الكلـ.. رد علي رمى الجوال على الجدار بأقوى ما عنده
تقولين ماجد يكذب هاااااااااه يكذب انا اوريك الحين مسكه من شعرها يركلها من جنبها وهي تتلوى وتطلق صرخات دخل سلطان وامه عليهم ابعده خلني عليها ابذبحهاااااااااا ياسلطان السااااااااافله الواطيه الحقيييييره تكلم من ورانا تكلم
سلطان ارخى يديه يسمع كلام عبدالرحمن اللي نزل عليه مثل الصدمه : انت وش تقول ؟
عبدالرحمن والشرار يتطاير من عيونه : الملعــــ.. تكلم تعرف وش معنى تكلم يعني تخونااااااااااا لاقينها في استراحه مع شباااااااااب والحين تكلمه تواااااعده
التفت سلطان بقوه وصار يضربها ويركلها ويطلق اسوء الكلمات
شهقات متتابعه اعلنتهاام عبدالرحمن سقطت على اثارها
ــــــــــــــــ
ضغط الجرس
ريم انتي : وش فيتس تطقين الجرس ؟
العنود : بروووح زهقت الحين الظهر وانا مازرت ماجد
ريم : بس الزياره ممنوعه عليه
العنود فزت : انتي وش تقولين
ريم : الزياره ممنوعه عليه
العنود ودموعها تنزل: ليه تعبااان ؟
ريم ....
العنود وهي تبكي : ليه ماقلتي لي انه تعباااان لييييه
دخلت الممرضه : ايوه يالعنود
العنود : تعالي فكي المغذي
الممرضه :لسى ماخلص
العنود : تفكينه والا نتقته ؟؟
الممرضه : وشوووو
ريم : فكيه لها والا بطلعه بالقوووه
الممرضه : خلااااص هدي
العنود بعصبيه : اذا فكيتيه يالبااااااااارده بهدىء
الممرضه بسرعه راحت وشالت المغذي من يدها ..قلت بصوت الله يعين ماجد عليك
طالعتها العنود وقامت لبست عباتها بسرعه وراح لغرفة العنايه وريم تلحقها يارب هذي وحده توها والد بتذبح نفسها بها الطريقه
* من قالت لي ريم ان ماجد تعبان عجزت امسك نفسي حاسه انه بحاجتي تذكرت كلامه لي وهو يقول انا بحاجتك لاتتركين بس ماطعته كابرت عشان كرامتي ما ابي اخسرها لكن الحين قاعده اخسر زوجي وابو لدي اخسر الغالي مشيت له شفت اهله عند الباب اللي واقف وساند ظهره على الجدار واللي جالسه على الكرسي و محاوطه يدينها براسها واللي جالس بزاويه ومقرب ركبه لصدره ومحاوطها بيدينه ومرخي راسه على ركبه شفت عمي يطلع من غرفته اسرعت له بسئله عن حالته لكن سبقتني دمعته حسيت قلبي بطلع من مكانه من قوو الرجف فيه طلبت منهم ادخل عليه قبلهم ماعارضو كانو مستسلمين لرغبتي دخلت عليه كان وجهه اصفر ذابل
قربت منه وسلمت عليه دخلت يدي ببكفه وصرت احركها مثل كل مره اجيه فيها همست له ماجد حنا في حاجتك انا وولدك ..كنت اعبر له عن حبي وشوق له ..قلت له اني بدونك اضيع لاتتركني وحيده محمد ولدنا بحاجتك محد راح يربيه غيرك ..سمت صوت الجهاااز حق القلب نطت الممرضه اللي كانت معي بالغرفه وانا ماشفتها وطلعت تركض اربكتني تعلق في يده خفت انه يتركني جاء الدكتور وطلب مني الخروج ماقدرت رجولي ماشالتني اصلن ما احس فيها بس احس نفسي بردااااانه جرتي ممرضه وطلعتني برى وجلست مثل البلهاء كانو كلهم يطلون مع النافذه الزجاجيه واسمع همهمتهم وبكاهم وانا ماقدرت رافض اقبل فكرت اني اعيش بدونه مستحيل اصلن اعيش بدونه اطلقت صرخات متتابعه لااااا لاااااااا ..
ــــــــــــــــــ
انت وش تصير لك المريضه ؟
عبدالرحمن : امي وش فيها
الدكتور : المريضه مصابه بجلطه
عبدالرحمن انربط لسانه من الصدمه
سلطان : وشلون حالتها الحين
الدكتور : الحمدلله الحين وضعها مستقر مضطرين نحطها بالملاحظه كم يوم حتى تستقر حالتها اكثر ..لكن الجلطه اثرت على النطق والحركه ..
سلطان : لاحل ولاقوة الابالله
عبدالرحمن : يعني بتموت امي ؟
الدكتور : لا ان شالله بس في غرفة الملاحظه لمتابعة حالتها وللاطمئنان اكثر عليها
ـــــــــــــــ
ماحسيت الا بطبطبه على خدي العنود وكان صوت عهود تصحيني تبغاني اقوم قمت مفزوعه واردد اسم ماجد قالت لي انه صحى ماتكلم انا مدري وش حسيت فيه حسيت اطرافي بارده و حسيت نفسي مدري اضحك من الفرحه والا ابكي منها بس اللي عرفته اني حمدت ربي وشكرته قمت بروح له حاولت تمنعني عهود بس ما قدرت ابغى اشوفه وهو متعاافي دخلت عليه سلمت عليه وقلت له حمدلله على السلامه حسيت او تهيألي انه ابتسم مدري من الفرحه اظن صرت موسوسه آه يارب تمم لي شفاه وعافه لي الظاهر اني طلعت صوت وانا ادعي لان يده جت على يدي اللي كنت متكيه عليها وانا اكلمه بأذنه فرحت بها الحركه حسيت روحي رجعت لي
..طلعت من عنده وانا فرحاااانه حيل باللي صار بعد ما انتكست حسيت روحي بموت لو فقدته بس الحمدلله اللي رد الغالي لي الحمدلله ماحسيت الابشخص ارتمى في حضني طالعت فيه لقيتها نوف تبكي وتتكلم مافهمت وش تقول كلامها كان ملخبط
حطيت يدي على فمها وقلت لها خلاااص لا تبكين هو الحين بخير ..رفعت راسها وقالت هو حس بوجودك جنبه لاتتركينه مره ثانيه كفايه اللي صارله من قال لي هالكلمه حسيت نفسي انانيه فكرت في نفسي ونسيته فكرت بكرامتي وجرحته خليته رفعت راسها خلاص ماراح اتركه وعد ماراح اتركه رجعت ضمتني وهي تبكي ..ياربي ارحم حالي
ــــــــ



اليوم الثاني
اسمعي يالكلـــ ابغا منك رقم الكلـــــــ وليدوه الحين
جواهر : ما اعرفه ؟
عبدالرحمن : لا ماتعرفينه شكل اللي جاك امس ما اكفاك
جواهر بخوووف : لالالالالالالالا اعرفه اعرفه وبعطيك رقمه بس لاتطقني
عبدالرحمن : بسرعه قوليه قبل ما اذبحك يالوسخه
جواهر :**********
عبدالرحمن : وش اسمه
جواهر : وليد فهد ال ..
عبدالرحمن : حافظته وحافظه اسمه تفل عليه وطلع (تكرمون)
<<دق على وليد
السلام عليكم
وليد: وعليكم السلام
عبدالرحمن : الاخ وليد؟
وليد: نعم
عبدالرحمن : اخوي فيه موضوع مهم ابغاك فيه
وليد: من انت
عبدالرحمن : انا اخو جواهر
وليد : من جواهر
عبدالرحمن : ماتعرف جواهر !!
وليد تقصد : جوجو ؟
عبدالرحمن يصك على اسنانه بعد يدلعها : ايه جوجو
وليد : وخير يا اخو جوجو
عبدالرحمن :الخير بوجهك انت عارف و ابي
وليد : كم تبي ؟؟
عبدالرحمن : كم ابي ؟؟
وليد : ايه كم تبي وتفكوني انت واختك
عبدالرحمن : تزوجها
وليد : تخسسسي
عبدالرحمن بغضب : تخسي انت
وليد :هييييييي انت مهبووول ماتعرف من انا وبعدين تبين اتزوج اختك اانت
عبدالرحمن : وش فيها اختي عشان حبتك حب شريف
وليد يضحك : حب شريف !! لا ياحبيبي هي حابه غيري اقصد على علاقه مع غيري تبغاني اخذ وحده مستعمله !! وحده قد شبعو منها غيري !!وحده تكون ام عيالي !!لاااااا
عبدالرحمن بعصبيه : انطم اختي اشرف منك يالنذل
وليد بسخريه : هه رح اسئلها من شافها بالاستلراحه ووش كانت لابسه ؟ امي عيالي مايشوفها احد غيري ولا يلمسها غيري امي عيالي ماتخون اهلها هذي خانتكم بأظمن ماتخوني لا تزوجتها !! .......اقول انت ضيعتي وقتي في شىء فاضي <وسكر الخط
عبدالرحمن صفق بالجوال على الجدار ومسكها من شعرها هذا جزاك يالخاااينه الواطي يقول من خانت اهلها ما امنها على بيتي ما الوووومه الومك انتي يالسافله وركلها برجله وطلع رجع وقال بصوت حاد : اسمعي يا السافله امي بيطلعونها بعد اسبوع ان استمر وضعها كذا لكن محد راح يقوم فيها غيرك فاهمه !!
ـــــــــــــ
قمت اليوم وانا حاسه بنشاط مو طبيعي بعد زيارتي الاخيره امس الساعه 8 كنت بقعد لين يمر الطبيب الساعه تسع بس رفضو لاني نفاس وتعبانه رجعت وانا كان نفسي اجلس اكثر .. تحممت بسرعه وحممت حبيبي وبدلت له ملابسه واعطيته الرضعه ولفيته بالمهاد ونومته بسريره
شفت امي جايه مشتطه ضحكت على شكلها وهي تأفف من الرياض تقول يجيب التكه مو مثل الديره الباب فاتح وهذا داخل وذا طالع مو هنا الجار ما يجي جاره الا برسميه والوحده مرتكزه وتحطي من طرف خشمها من التطور ..سئلتها وش فيتس يمه ؟ قالت انتي وشلون اصبرتي هنا الحين ريم لها فوق الشهر وجارتها ماجتها الامرتين !! يوه امحق ..قلت يمه كلن يدور راحته ..وكملت يمه انا بروح للمستشفى اشوف ماجد ماعارضت افطرت ورحت حتى امي زارته معي مدري وش خلاها تروح معي هالمره رغم انها ماتروح الا مع ابوي ومن وصلت غرفة العنايه فتحت الباب شفت ممرضه تلف الاسلاك حقت القلب قالت الممرضه متى وقت الوفاه قالت من نصف ساعه حركت نظري له شفته ممدد ومغطى بالشرشف تجمدت من المصيبه اللي سمعتها مااات خلاااص وقفت في مكاني وانا مو حاسه بنفسي نظري بس في اتجاهه هو كان نفسي ارتمي في حضنه وابكي واقوله يرجع لي بس رجولي ما اسعفتي ما احس فيهاا نهائي ..
* تأخرت العنود داخل موبالعاده طليت مع النافذه شفتها موقفها جاامده طالعت في ماجد وشفت اللي ماكنت اتمناااااه قعدت ابكي ماعرفت وش اسوي رفعت الجوال وانا متردده دقيت على خالد بلغته بالخبر ابغاه يكون معي خفت ابلغ نايف ويرتفع السكر معه والا الضغط شوي وشفت السرير العنود شايلينها الممرضات وحطوها على سرير ماتحملت منظرها بكيت حال بنتي ترملت صغيره حتى حسيت ان حنجرتي تجرحت دق علي خالد وعلمته بالغرفه جالنا شافها متمدده حسيت من ملامحه الضيقه اللي تحتويه ..
*بلغتني امي بالخبر صدمتني فيه امس كنت عنده مافيه الا العااافيه والدكتور يقول حالته متحسنه كثير وانهم بيطلعونه اليوم من العنايه لكن ماتوقعت انهم يطلعونه ميت !اسرعت من مكتبي للمستشفى صرت اركض في ممراتها مثل التايه كلمتها وبلغتني وين مكانهم جيتها شفت العنود متمدده تذكرت ولدها اللي مافرح فيه ابوه ..تذكرت ضحكها امس وتعليقها على عيالي وولدها كانت تحكي امس اغلب الوقت فيه وماعلى لسانه الا هو ليت في يديني حل مابخلت به عليتس .
ــــــــ
هذولا وينهم ادق على الثابت مايردون والجوال مسكره جوالها
عهود : ايه تسكره لادخلت المستشفى عشان العنايه
خالد: طيب معناها انها هنااا
عهود : بس ماجت لي فتره ادق ومسكر !
تركي : يمكن فضى شحنه ؟
ماجد : دقي طيب على ريم او عمتي
عهود : عمتك ما اعرف رقمها
ماجد :طيب ريم
عهود : لحظه اظن ريم عندي ...اووف ما لقيته شكله طار من جهازي بعد ماغيرته
خالد : انا معي رقم رجلها
ماجد : وساكت الى الان؟! ياخي دق عليه
خالد : طيب هد اعصابك الحين ادق عليه ..رفع جواله يدور رقم ابونايف من بين الارقاام
في الجهه الثانيه خالد اخو العنود يطالع بالجوال رفعه وهو يتحرك بيطلع من غرفة العنود لاتسمعه : هلاا
خالد :السلام عليكم
ابو نايف : وعليكم السلام
خالد : ابونايف فيك شىء ؟
ابونايف (ذا شكله مايدري عن اخوه ياوالله الورطه ):هاه لا مافيني شىء
خالد : صوتك مهوب طبيعي
ابونايف : لا مافيني شىء بس يتهيأ لك
ماجد اللي من سمع ان فيهم شىء مد يده : عطنيه بكلمه
خالد : ابونايف خذ ماجد يبي يكلمك
ابو نايف : هااه
ماجد:الووو خاااالد
ابونايف : مااجد ؟
ماجد : وش فيك ؟
ابونايف : انت وينك فيه ؟
ماجد : في المستشفى ويني فيه يعني
ابونايف :بس اليوم جتك العنود و...
ماجد : ايه طلعوني اليوم الصباح الساعه 8 من العنايه
ابو نايف : الحمدلله كم رقم غرفتك ؟
ماجد : انا بالدور الرابع غرفه 411
ابو نايف : ان شالله شوي ونكون عندك
ماجد : حياكم الله
ــــــــ
*دخلت من الفرحه عشان ابلغ العنود بالخبر شفت امي تبكي على حال بنتها نزلت وحبيت راسها وبلغت بالخبر حسيتها ماصدقتني بس حلفت لها اني مكلمه وبقوم العنود نروح له قربت من سرير العنود وصرت انادي عليها العنود .. العنود ..ماكنت اسمع اي رد منها صرت اطبطب على خدها بخفها وانا اناديها ابغاا تصحى وابشرها بالخبر فتحت عيونها بخفه ..
* سمعت صوت كأنه انتشلني من بير عميق كان ينادي بأسمي فتحت عيوني وانا اتمعن بالوجه اللي قدامي قالي العنود ماجد كلم يبيس فتحت عيوني بقوه ابغى اصدقه ناظرت في امي شفتها تبكي وتحرك راسها كأنها تثبت لي ان كلامه صحيح رجعت اناظر في وجهه وكان راسم على وجهه احلى ابتسامه قال انا بروح لماجد بتروحين معي ؟ فتحت فمي بقوله يعني ماجد حي ما مــا.. وسكت ماقدرت اكملها خفت يكون حلم حرك راسه وقال ماجد ينتظرك هم طلعوه من العنايه واللي شفتيه مريض ثاني جاء مكانه وتوفى قمت بسرعه وخليتهم يفكون المغذي ولبست عباتي وانا متلهفه على شوفته رحنا بسرعه لغرفته دق خالد الباب ورد علينا تركي شفتهم طلعو ا كلهم حتى البنات كانو فيه اللي ماشفتهم معهم عمي وعمتي !..دخلت عليه بعد ماسلمت عليهم وطالعت فيه وانا حاسه بطير من الوناسه ماجد قدام وحي رحت له
و....
ــــــــــــ
اليوم مريت على ام عبدالرحمن بصراحه تكسر الخاطر
ساره : ضعيفه المسكينه
مها : الله يعينها
عهود: بنتها ماشفتها من يوم دخلت المفروض تكون مرافقه معها
ساره: ماتدرين عن الظروف
هنوف : خاله بترجعين لعمي عبدالرحمن بعد مرض جدتي ؟
مها : لاماراح ارجع له
ـــــــــــــــ
*بعد ثلاث اشهر من الاحداث *
*رجوع العنود لماجد كان له اثر كبير في حيات نوف اللي طلبت منها العنود انها تسكن معها في نفس البيت
* مها خلعت عبدالرحمن حتى ترتاح رغم محاولاته بأرجاعها
* عهود لاجديد ف حياتها
* سلطان &ساره .لاجديد ف حياتهم
* ام ماجد بعد قرار ابوماجد طلب منه ماجد انه يتراجع عن قراره وبعد محاولات اقتنع بس بشرط ماتعرض للعنود ووافقت
* ام نواف وام محمد (ادعو لهم من قلوبكم ان ربي يهديهن لانهن سببن مشاكل بين الاخوان لكن الحمدلله الى الان مافرقوهم وجعلهم مايتفرقون .. نعاني من تحريض ام نواف المستمر وتأليفها الكاذب ومن امثالها فعلآ فئه الله يعينا عليها ..)
* جواهر ونها يتها تمقتت او تمسخرت بحال جدت خزنه رفيقتها .واتهمت عرض العنود ..ونهايتها هي تشيل وتغسل امها في البيت بعد ماسحب الجوال منها ومنعت من الطلعه الا مع امها للمستشفى !
*خالد اجل زواجه بعد مرض اخوه ..
تــــــــمت
* الروايه من الواقع .. اظطررت للاستجال في اخر البارتات بناء على طلبكم حتى انهي الروايه قبل الامتحانات ..
ملاذ الرووح *