السلام عليكم ورحمة الله وبركاته

سلامي للغوالي والسموحه على التاخير

ومشكوووره على مروركم الدائم


الجزء التاسع عشر





قرب عتاب من ليث الي ابتعد عن المغاره وظل لحاله وحط يده على اكتافه التفت ليث لعتاب

عتاب:مهتويها يا خوووي؟؟

رجع ليث يناظر لقدام وهو ساكت

عتاب:زين لييـــ

ليث:ارجاااك يا عتاااب ماودي احجي بالسالفه ذي ...........حنا لزوم هالحين نرجع المعشوقه ونخلص من السالفه ذي كلها

عتاب:ودك ترجعها للشيخ حماد

ليث:تنقلع للشيخ حماد ولا للي تبيه ..المهم نعاود بالمعشوقه

قوته وهيه جايه من بعيد:ليـــــــــــــــــــــــث ياخوووي ياليييث الحرمه الحرمه مستوجعه كثييير كود انها تالد هالحيييين

التفت لها ليث وصرخ فيها:وش اتريديني اسوي لها تنقلع

قوته:يا خوووي هذا كله من فعايلك رميت الحرمه على الارض واستوجعت كثييير من الرميه

ليث:جعله وجع مايفارقها تنقلع

قوته وهي تلتفت عايده:عووووذه عووذه


ناظر عتاب ليث الي حس به يكتم رجفه بيديه ووجهه

عتاب:وش رااح نسوي؟

ليث:سو الي ترييده ياعتاااب سو الي تريده

بعدها راح ليث وركب فرسه وغااب


بالمغاره كانت شوق مرعوبه من الي يصير حواليها بالاوله صريخ ليث على البدور ورميته لها بالارض ومن ثم ونينها من الوجع الي جاها


ضبيه طردت قماد والشيخ من المغاره وقالت لهم ان الحرمه راح تولد وانقلعو برا حست شوق ان ودها هي بعد تطلع ولا تسمع الونين والبكا الي كانت فيهن البدور قامت ومن غير ماتشعر فيها الحريم طلعت الا ان ايدين قماد لقفتها اول ماطلعت للفضا

قماد:على ويييين يا عمتي الشييييخه؟

شوق وهي تبعد ايدين قماد وتوقف مقابلاه :ماودي اظل بالمغاره الحرمه ودها تولد وانا مقوء على سماااع ونينها

قماد:يا ويلي ويلااااه عمتي الشيييييخه قليبها ارهيف لالالا هذا ماخبرته ياعمه عاودي عاااودي ابرك لج من قبل ماتشوووفي شي مايسرج

شوق:ارجاااك ماودي

بصرخه:قلت عااااودي

بلعت شوق ريقها ورجعت للمغاره

قماد بابتسامه:والله انه دواااج

......................................


على وقت العصر وصلت العمه للديره الي بها فهاد والمها ويوم التقت بفهاد شافت حاله ماتسر

العمه:وش الي صاار يا فهاااد؟

فهاد بوجع:المها صارت طليقتي خذيت بثارها ياعمه

بان الالم بوجه العمه وهي تحط يدها على كتف فهاد:وش راااح اتسوي ياولدي وانت قايل لي انك متولع فيها وماتقدر على فرقاها

فهاد:وش السوااه ياعمه ؟؟مابه شي اسويه

العمه:ترجعها لعصمتك يا ولدي

فهاد:يا عمه يوم ان ابوي قال لي ليلتها اني لزوم اعاود بها لعصمتي حلفت عليه يومها انه ان خذيت بثارها ماتعود لعصمتي ابد...المها طير وطااار من يدي يا عمه

العمه:ودي اشوفها


لقيت العمه المها طريحة لفراش

العمه وهي تكلم ام هند وهند:وش حال ابنيتي؟

ام هند:والله ان حالها صعيبه وابد مافاااقت

العمه:ياجهد البلا ياجهد البلا


..................................



على المسا عااود ليث ولقي الجماعه جالسين قدام المغاره وهم شاعلين النار ناظرهم باستفسار

ليث:وش الي صااار؟

لاكنه ما انتظر حجيهم وهو يسرع بخطاويه للمغاره اول مادخل ناظر لمكانها وشافها جالسه ناظرته بنظرة عتب ورجعت تناظر لتحت

قربت منه قوته وناظرها:صار شي؟

قوته :للا مير الحمدلله جانا يومن عصيب وعدا على خيير توجعت ياحبة عيني كثير والوجع مافارقها الا من قبل كم ساعه

رجع ليث يناظر البدور وبعدها التفت وطلع

ومرت عليهم ثلاثة ايام فيها جافى ليث البدور وماقام يقرب منها ومايسال عنها وانشغل مع عتاب وقماد بيجاد حل للي هم فيه وانشغلو بامور ثانيه كان كل يوم واحد يظل بالمغاره واثنين يغيبون

عتاب مسك قوته بثاني يوم من جيتها وحط راسه على حجرها

قوته:انت وش اتسوي؟

عتاب:ايييه تراني رجلج ياحبة عيني وانتي ماتدرين بالعله الي صابتني من فراااقج

قوته:ماظنتي

عتاب:ليييه يا نظر عييني؟

قوته:ارفع راااسك ياعتااااب وتراني بعدني زعلانه

اعتدل عتاب جالس:وش الي يزعل دقات القلب من القلب

قوته:ماخبرتك ياعتاااب اتحجي كذا وش الي صااار

وناظرت حينها قوته ناحية عبله الي تمشي من بعيد

عتاب:انتي اتحسبين اني انا الي احجي هذا قليبي هو الي يحجي

نزلت قوته راسها لتحت خجلانه وهي ترفع نظرها وترمش بعيونها له

وقام رايح وهو يقول:يا وييييييييييلي

شوق بعد لاحضت نظرات قماد وابتساماته لعبله كل مامرت من قدامه وحست حينها بضيقه

بثالث يوم عزم الشيخ وضبيه على الرحيل ورفضت عبله انها ترافقهم بحجة ان ودها تظل قريبه من البدور

انكتت يومها قوت وهي جالسه قريب من شوق بجلوس عبله

ناظرها عتاب الي دخل عليهم:انتي ياحرمه وش فيييج وش الي قاااعده تقولينه

قوته:الحرمه ذي ليييه ودها تجلس لييه ماودها تفااارق

عتاب:ودها تعاونج انتي والي معج

قوته:للا ماودي اياااها خلها توكل معهم

ابتسم عتاب :وانتي وش عليييج قعدت ولا راااحت

قوته:مهب زييين خلها توكل

عتاب وهو طالع:لييث وده اياها تقعد

ناظرتهم البدور من سمعت طاري ليث ورجعت تناظر الثوب الي بيدها ماتدري لييه حست انها فقدت تواجده جنبها


..............................................


فهاد قرب ينجن وهو كل يوم يسال عن المها ويقولو له ان حالها مثل ماهو

كان جالس بمجلس الشيخ يوم قربت منه هند وجلست قريب منه

هند:مسيك الله بالخير

فهاد وعيونه عند النار:الله يمسيج بالخير

بعدها التفت ناحيتها:وشلونها ؟؟

هند:باذن الله قريب تتشافى ..اليوم عمتي رتعه جابت لها دوا واسقيناها اياه وتقول انها باكر بالصباح تكون بخير

فهاد:باذن الله

عاود فهاد وناظر لقدام وهو يحس بحرقه تخنقه

هند:انت يافهاد الي حالك مهب ببخير

فهاد:وهو الي تفارقه روحه ترجين انه يكون بخير

حست بنار تشتعل فيها وقهر:لزووم تعرس يافهاااد لجل تشغل قليبك عن هواها

فهاد:رمااااد قليبي من بعدها صار رمااااد

هند:خله ينزل تحت سمانا وانا اوعدك انه يكون عشب وزهر

قام فهاد وهو كاره جرئتها وحجيها: ودي اروح امسي وصلي سلامي للعمه


................................


جلس قماد قريب من شوق وبيده صحن فيه الزاااد

قماد:وشلووونها عمتي؟

ناظرته شوق وهي تحس انها صارت ماتستحمل حجيه معها وقهره لها

قماد:لييه تردي صحن الزااااد

ظلت ساكته وتناظر لمكان ثاني ...مسكها قماد من وجهها ولفها ناحيته

قماد ومن بين اسنانه:لزوووم تاكلي وان ماكليييتي راح ااكلج بنفسي

هزت راسها باييه وانها موافقه للي يبيه

قرب قماد الصحن وحطه قدامها وظل يناظرها منتظر تمد يدها بارتعاشه مدت يدها وخذت لقمه وقبل لاتوصلها لفمها وقفها قماد

قماد:انتظري ياعمه انتظري

ناظرته مستفسره

اخذ اللقمه من يدها واكلها وطلع صره صغيره من جيبه وفتحها:نسيييت ياعمه نسيييت انتو وشلون تاكلون الزاااد

نثر من حبات الرمل على طعامهاوهو مبتسم بخبث وناظرها:وهالحييين ياعمه بالعاااافيه كلييه

ناظرته باحتقار للي سواه وهو يدري انها ماكلت من يومين شي وبالاخير ينثر الرمل بطعامها

اول ماقام قماد والتفت خاطي خطوه سمع صوت الصحن الي الطمته شووق وسوا صوت وهو يبتعد

عاود لها بالسرعه وهو غاضب ومسكها من وجهها:وش الي سويتيييه؟؟

غمضت عيونها ولزمت السكوووت وهو يحس بارتجافها من مسكته

تركها وقام وهو يقول:خسيييييسه

مشي خطوتين وعاود لها وهو بعده مقهور واشار لها للي كبته

قماد:والله الي بعالي سماااه ان عاودت ولقيت حبه من الزاد اني اخليييج تاكلينه من القاااع

التفت عنها وطلع وهو بعده يحس بغيض عليها

قربت قوته منها:هو وش الي يصير معكم؟

التزمت شوق بالسكوت وهي ترجف من القهر

ولان الليله كان الجو بارد بالخارج الكل دخل الاقماد الي طلب يكون هو الي يحرس المكان

اشعلو النار وجلس عتاب وليث قريب منها البدور وهي جالسه بمكانها كانت تناظر ليث الي ابد صار مايناظر ناحيتها

قربت قوته منهم:عتااب

التفت ناحيتها

قوته:الاجراب معاااد فيها مي ودي املاااها ...نروووح انا والعبله جنب الغدير

وقف عتاب:للا اروح انا معج

طلع عتاب وقوته وبعدها بشوي دخل قماد الي كان يضحك وتلاقت نظراته بنظرات ليث:ويين ودهم يروووحو

ضحك حينها ليث وابتسمت البدور من ضحكته

قماد وهو يجلس قريب من ليث:والله ان اخووي مهب هين يقول وده يملي لجراااب ههههههه

التفت حينها قماد لشوق وشاف ان الي طلبه ماتنفذ حينها تملكه غضب وقااام وهو يسحبها بالقوه لجل توقف قباله:وش الي انا قلته لج وماسويتيييه ليييه... اتحسبي حجيي حجي من دووون فعل

صرخت شوووق وهي تريييد تخلص حالها من يده

جلسها قماد بالقو للارض وهو يحاول يقرب وجهها للزاد المرماي وهي تقااااوم وتصارخ

مسك ليث قماد بالقو وثبته بجدار المغاره:وش الي قاااعد اتسويييه يا اسود الوجه

قماد وهو ثاير :اتركني ياليييث ومحدن له دخل بالي ودي اسويييه هي عصتني ولزووووم تاخذ جزاااتها

ليث:اتخسي ان عاااد مديت يدك عليها والله ان معاااد يمنعني عنك حي

وقرب عليه وهو يهمس بغيض:تراهاا من ريحة الغوالي وما اسمح لحد ياذيها

فك قماد حاله من ايدين ليث وناظرها بغيض وطلع من المغاره

انكمشت شوق على حالها وهي تبكي وعاود ليث لمكانه وهو يحس بالم بصدره قربت منه عبله وجلست تناظره:وش فييك ياخووي

ناظرها :موجوووع الوكاد ان الجرح نزف وكان يشير لصدره

عبله:يا ويييلي انت تنزف صحيح

خلع ليث ثوبه لجل ايناظر الجرح الي بصدره وهي طعنة البدور له

عبله:لزوووم نطهر الجرح بالمي والملح ثواااني واجيييب قطعة قماااش

راحت عبله لطرف المغاره وين الاغراض والملابس مركونه وعاودت بقطعة قماش وطاسة مي

تساند ليث على صخره قريبه من النار وقربت منه عبله وبدت تطهر الجرح

البدور حست بنااار تشتعل فيها وماتدري ليييه مير الي يصير قدامها ابد ماهو عاجبها وماحست بحالها وهي تشق ثوب العيل بين ايديها



التفت عتاب لقوته :هاتي القربه الي بقيت عندج ياقووته

ابتسمت قوته وهي تخبي الي بقي بيدهاورا ظهرها:مابقيت جربه

عتاب وهو يوقف ويناظر ناحيتها:اجل وش الي وراااج؟

قوته :اممممم ملااابس

رفع حواجبه:ملااابس!!!؟

قوته:ودي اتحمم

ابتسم عتاب:سوا؟؟

ناظرته بخجل ونزلت راسها:اييه سوا

ناظرها وهو مبلم:وش قلتي؟؟

قوته بجديه وهي تطلع الجربه الي ورا ظهرها:اقووول يا عتااب املا الجربه وخلنا نعاااود وكاد هم هالحييين استبطونا

اعطته الجربه وقربت من لجراب الثانيه لجل تحمل الي تقدر عليه هز عتاب راسه ورجع يملي الجربه ودها تجنني القوته ذي


..............................


ليث:اتعبتج معي

ابتسمت عبله:للا مابه تعب

قامت البدور وتحركت من مكانها وبالعاده ماتقوم من مكانها لاي مكان ثاني وقربت من النار وجلست جنبها على مسافه بسيطه منهم

مع انه حس بشي تحرك بصدره الا انه ظل على جلسته ونظره عند العبله الي كانت جالسه قريب منه حيييل

قام ليث :ودي ارووح اشوفلي ثوب ثاني

خلاهن وطلع من المغاره

التفتت البدور لعبله:خسيييييسه

عبله:وش قلتي؟

البدور:قلت خسييييسه وش له تجلسي جنب الرجال وتلامسي صدره وهو من غيير ثوب انتي ماتستحي

انصدمت عبله من حجي البدور

عبله:هو انا الي ما استحي ولا الي مادرينا ولدها من ابوه لين هالحييين

عبله قالت الي قالته ومادريت بالي مسكتها من شعرها وهي تشده بحيل

سمع ليث صريخ عبله وهو ناوي يدخل واسرع لهن

مسك شعر البدور وهو يجلس قريب منها

ليث:اتركي شعرها

البدور وهي تدور بعيونها عليه:اتركني بالاوله

ليث:انتي الي بديتي اتركيها بلاول

ليث ماكان شاد شعر البدور بقوه وهو يهددها تترك شعر عبله ..شدت البدور شعر عبله اكثر وزاااد صريخها

صرخ ليث عليها:قلتلج اتركيها

البدور:هذي مسودة الوجه

ليث بتعجب:تركنا بياض الوجه لج اتركيها

شدت شعرها بكل طاقتها وتركته وبعض الشعيرات بيدها

عبله وهي مستوجعه:الله يااااخذج الله يااااخذج

البدور وليث بعده ماسك بشعرها:انقلعي ياقليلة الحيا

لف وجهها ناحيته:وش الي سوته لجل اتثوري عليها

البدور:اتركني وانت مسود الوجه معها

ليث انصدم من حجيها وخلصت حالها وهي تقوم رااايحه لمكانها مافهم وش الي كانت تعنيه

وقف وقرب منها:تراااني احذرج مرتن ثانيه ان مديتي يدج عليها قطعتها لج

جلست بمكانها وهي ماتعطيه وجه

دخل عتاب وقوته الي التفتت لعبله وهي تبكي

قوته:يا وييييلي وش الي صاااار؟

عبله وهي تبكي:تغااار عليه وهي الي حااارقه قليبه مايدري من ابو العيل ولجله ناظري وش سوت فيه

ناظر كل من ليث والبدور الثاني متفاجئ من الحجي الي قالته عبله ليث اصدمته كلمة تغااار وهي اصدمتها ان قليبه منحرق لجلها حس اثنينتهم بشي غريب يسري بجسادهم ونزلت البدور راسها لتحت

بينما قام ليث وطلع من المغاره وهو يكلم حاله انها محااال تغار عليه وان عبله الي فهمته مهو صحيح وكاد انها بس تريد اتغيضه

البدور بعد ظلت جالسه تفكر هل هو صحيح محروق قليبه بمعنى انه يودها ...يودها من بعدكل الي صار بينهم

.....................................



باليوم الثاني تعافت المها وطلبت من العمه انهم يرحلو جنب ديرتها لجل اتعاااود لعمها

فهاد فرح يوم دري انها تعااافت وجهز الخيووول الي ودهم يروحو عليها كان معه عايض والصقر خويه والعمه وهو وبنفس الوقت كان حاسس انه يمشي بجنازته

قبل وقت العصر طلعت العمه والمها الي كان باين الحزن بوجهها وكان فهاد وربعه واقفين معه ودعو الشيخ والي كانو معه وكانت هند ميته من الحسره لان فهاد ما اعطاها فرصه تتمادى معه

تالم فهاد كثير اول ماشاف المها الي كانت تحاول ماتجي عينها بعينه



بعد ما مشي فهاد والي معه انغزت الديره الي كانو فيها وكانو طلابين ثار لجل ولدهم الي وصلتهم لعلوم عن الي صار له بالديره ذي

وبعد ماعاثو فيها من الفساد والخراب وقتلو الشيخ طلبو الي قتل ولدهم وخبروهم انه غادر الديره من كم ساعه حينها جهزو عدتهم مره ثانيه ولحقو فيهم تاركين وراهم الحريم تصيييح وتولول للي صار ومن بينهم هند الي انحرق قليبها على ابوها واخوها "عثرتي يالمعاثوره"ا



التفت عايض على فهاد :فهاااد يا خوووي ..شايف القوووم الي ورانا؟!!!!؟؟

التفت فهاد ومن خبرته فهم انهم ناس جايه هاااده

دار بالفرس:عايض ياخوووي خذ الحريم للجبل الي هو قريب من اهنيا وانا وصقر ودنا نشوف وش السااالفه

عايض:فهاااد خلنا سو نحتمي للجبل تراااني خايف عليييكو منهم

فهاااد:توكل توكل ياعااايض مابه وقت وحنا بذن الله نلحقكم


عايض اسرع بامه والمها للجبل بينما فهاد اتخذ مع صقر مكان يقدر منه ايوقفهم بطلق البارود ويشوف وش يريدو

لاكنه ماقدر لهم حيله وهم يطلقو النار ببواريدهم لين ماانصاب فهاد بكتفه

صقر:خلنا نحتمي بالجبل يافهاااد اعدااادهم تزيييد ياخوووي


وبالفعل احتمو بالجبل مع عايض والعمه والمها وكل واحد فيهم اتخذله مكان العمه خذت واحد من البواريد وانضمت لهم وهي محتميه من ورا الصخره المها من بعد ماشافت العمه خذت لها باروده وانضمت لهم ناظرها فهادوارفعت الباروده اتورجيه كيف هو علمها فاشار لها براسه انها تكمل ماكان خايف عليها لان الطلق الي يجي من تحت ماكان يوصل لاهدافه بينما وهم من اعلى الجبل قدرو يصيبو اعدادكبيره منهم وظلو يقاومو الي طالبين الثار لين مافنو عدد كبير منهم ولين ماشافوهم انسحبو لبعيد الا انهم ظلو ومافااارقو المكان

عايض سحب فهاااد للمغاره الصغيره والي كانت مكشوفه كثير ومدده عند امه والمها الي وقف قليبها وهي تشوفه بالحال ذا

العمه وعااايض قاموبالاسعافات وطلعو الرصاصه ولفو كتف فهاد بقطعة قماش شقتها الها من شالها فهاد ماكان نايم لاكنه كان مغمض عيونه ويوم فتحهن شافها وحس بروحه ترفرف من شوفتها مير انه شاف دموعها مغرقه وجهها التفت للناحيه الثانيه

العمه:وش القوووم ذي ياولدي؟؟

فهاد بصوت تعبان:والله ماني داااري عنهم ياعمه تقولي يطلبونا بطلابه ابد ماقدرنا انحجي معهم

العمه:الله يعيين ياولدي الله يعيين

فهاد التفت لعااايض:عااايض لاتترك الصقر لحااله ولا اقووول خذني معك لزووم نوقف بوجيههم خوفي انهم يعاااودو مرتن ثانيه

المها:انت بعدك مستوووجع يافهااد تريح

فهاد وهو يلتفت ناحيتها"والله اني ماهقيت اني اسمع صووتج مرتن ثااانيه ولا عيني تجي بعييينج يا وييييييلي قربج يالمها هو دواااي "

كان يحجي مع نفسه ومن نظرة عيونه ارتبكت المها

ونزلت راسها لتحت وقااامت وابتعدت عنهم لمكان بعيد اشوي

ظلو ملازمين الجبل وكل ماحاولو الي غارو عليهم يصعدو الجبل يحصلو من يتصدى لهم وظلو محاصرين فيه لليوم الثاني


العمه قربت من عايض الي كل حييين يقرب من فهاد لجل يتطمن عليه

عايض:وش علوومه يامه

العمه:زينه باذن الله ...عايض ياولدي المغاره ذي هقوتي ان كان فيها ناااس من قبل لقينا بثنايا الصخر صندوق وكله بواريد

عايض:صحييح يامه

العمه:اييه ياولدي مير مندري هي زينه ولا خاااربه

عايض:اشوووفها يامه

راح عايض للصندوق الي كان قريب من المها وفتحه وساعدته المها بتطليع السلاح وتفكيكه وهي بدورها تذكرت وشلون علمها فهاد تفك السلاااح

اول مافتح فهاد عيونه شافهم وهم يحجو سوا حس ان راسه بدا يوجعه ازود وغمض عيونه ونااام ما وده يشوووف الي قدامه


........................

بالصباح الباكر والكل بعده نايم كانت شوق صاحيه وقامت ناويه تطلع لخارج المغار

قماد كان فوق صخره قريب باب المغاره انتبه لشوق وهي منتبهت له اعتدل وظل ساكت وده يشوف وش ودها تسوي

ظلت شوق تمشي وهي تشوف ان الضباب حاجب عنها الشوفه تلفتت حواليها وكان قماد مستخبي ورا الصخره وحينها مشت اكثر مبتعده عن باب المغاره بعدها اسرعت خطاويها نازله من الجبل وقماد مبتعد لاحقها بس بعيد عنها ويوم وصلت لاسفل الجبل التفتت تناظر الجبل وبعدها عقدت الهمه انها تبتعد اكثلر التفتت لجل اتكمل مسارها وكان واقف قدامها وخبطت فيه

ناظرته وهي مرعوبه وهو يناظرها بابتسامه

قماد:عمـــــــــــــتي عقلج ويييين ياعمه اتحسبي دار ابوج قريب من اهنيا للا يابنت الشيييييخ انتي بعيييد بعيد حيييييل عنه

شوق:ارجااك عاود بي وانا اوعدك اني مجيب طاري انك خطفتني

قماد باستهبال زايد:لييييه هو انا خطفتج

نزلت دموعها:انت وش اترييييد مني

مسكها من يدها وجرها وراااه صاعد بها الجبل

فوق الجبل قريب النار الي كان دخانها بعده طالع جلسها قماد وغاب ثواني وعاود وهو جايب المقلاه والقهوه

قماد:ودج تعاااودي بلاوله زيني لقهوه

شوق بقهر:اني مهب امقهوجيه ازين لقهوه

قماد بضحكه:ولا قماد العطاوي امقهوجي

شوق:انت لحالك كان ودك مير انا ماودي

قمااد:قلـــــــــــــــــت زيني لقهوه

برجفة قهر مسكت شوق المقلاه وحط لها قماد لقهوه واعطاها المحماس وابتسم

قماد:زينيها يابنت الشييييخ زينيها

كانت اتحمس بقهر وحبات لقهوه كل شوي تتطاير من المقلاه

قماد بغضب:وش الي راح يبقي بعد ماتخلصي زيني لقهوه زييين وبتمهل ولاتراني حطيت اعيونج بدالها وحمستهن

كتمت شوق قهرها وظلت تحمس لقهوه لين مازينتها قرب منها قماد

قماد:ايه ايه يازييييييين ريحتها والله انج تصلحي تكوني مقهوجي قماد العطاوي

قلبت شوق المقلاه بالنار وتطايرت عيون قماد فيها

الا ان الصريخ الي سمعوه خلاه يقوم بسرعه مبتعد عنها وطلع بنفس الوقت ليث وعتاب

عتاب:وش الي يصير

رجع الهم قماد

هذا يا خوووي الحارس ومعه ناااس كثير

عتاب:سود الله وجهه دلهم على مكانا

ليث:وش السوااه

قماد:انتظرو ماهقيت انه يخون العشره كذا خلني ياعتااب اروح له خو رفيقي وما اضنتي انه ياذيني

عتاب:ودك اتخاطر بحالك ياخوووي انت نسيت ان الحرمه عندنا

قماد:هو يناااادي علينا ماهقوتي انه ناااوي على شر

ليث:زين رح له وشف وش مطالبه وعااود لنا من قبل لاتقول له شي

قماد وهو يهز بارودته :زييين

كانت شوق تناظرهم من قريب "هـــــــــم عيال العطااااوي يا شوووق هم"

التفت لها عتاب:عاااودي لداااخل

التقت بها قوت عند الباب:وش الي يصير

شوق:مدري يقولو اعداااد كبيره محاوطه الجبل

الكل رفع راسه

تلاقى قماد مع الحااارس وكانت بينهم مسااافه

سعد:وشلووونك ياقماااااد

قماد:مثل متحيييدني ياخوووي

سعد بابتسامه:اشتقت لك ياقمااااد

قماد:وحنا اكثر

تلفت سعد قليل:قماااااد .....انت تري اني ماعدت اذكر شي من الي مضالي والشيخ حماااد يقول اني رفيقه وان الحرمه الي عندكو حرمتي والعيل ولدي

قماد:وش الي تريده؟؟

سعد:اريد الحرمه

قماد:وبالمقااابل

سعد:الي تريدووه

قماد:حنا ودنا بالمعشوقه

سعد:اجيييب لكم المعشوقه

قماد:زييين اجل انتظر لين ما اكلم الي بالمغاره

عاود قماد للمغاره وقال لهم بالي صااار

عتاب :للا للا خلهم يعاااودو ويمهلونا ايااام

ليث:لييه ياخوووي

عتاب:انت نسيييت يا لييث ان لمغاره ذي سلاحنا وذهبنا كله فيه ودك انسلمهم الحرمه ويغيرو علينا من بعدها وش الي يضمن لنا انهم مايسوها

ليث:صحييح


اتفق معاهم بعد ذالك قماد انهم يمهلوهم ايام لجل يصير التبادل بعدها

بالمغاره كانت احاديثهم ومشاوراتهم وترتيبهم لنقل السلاح والذهب وشلووون وكييف وفهمت البدور انهم ودهم يسلموها مقابل الفرس

عبله من يومها وهي تحاول تغيض البدور بجلوسها كثير جنب ليث وانها اتلبي له كل طلباته وهو ابد ماكاان يلتفت ناحيتها

البدور وهي تكلم حالها"وش الي حارق دمي لجله ينقلع هو وهي سوا"ّ




!! !!
!! !!
!! !!

موعدنا الياي باذن الله الاربعا القادم وسامحونيه عن تنزيل البارت يوم الاحد

وللي يمرون ويطلعون كلمه ولوجبر خاطر

محبتكم وديمه العطا

فديتك وديمة روعة البارت ابدعتي

والله وناسة الحين يتم التبادل

الله ياخذها البدور ليه ماتقول لليث انه
ا
ابوه اففففففف قهر والله بس طولت ماولدت كم اكره هالبنية

وشوق والله تستاهل حره على كبدها

عتاب مصدق نفسه يارجال استحي شوي

قلبي محروق على فهاد وكاد اللي صار ماهوب بهين

ياترى كيف رح يتخلص من الثار

وديمة مبدعة والله احداث لانتوقعها ابدا انا مااحب القصص البدوية لكن معك كل القصص له طعم خاص وصدقيني سأظل متابعة لك ولكل ابداعاتك حفظك الله يااروع كاتبة

[SIZE="5"]مساء الانوار يا وديمة... ابدعتي غاليتي .. بارت رائع رائع رائع

ياويل حالي على فهاد وش راح يصير له بعد ما دبسته هند الله ياخذها بثار ماله فيه .. متى راح ينتهى العذاب الي انت والمها فيه وترجعون لبعض .. لا طولينها عليهم وديمة

قماد بس خلاص خف على شوق يكفي الي جاها منك مع اني معك انها تستاهل بس الرحمة حلوة

ليث لمتى بتخبي عنك البدور ان الولد ولدك ولا سعد راح ترجع له ذاكرته ويعلمه بكل شئ ...

البدور ها كل هذي غيرة على ليث مع اني معج انه يحق لج تغارين عليه بس ليه ما تقوليله وتريحين حالج

عتاب ما خذ راحتك يا الاخو استح عاد انت مصدق ان قوت مرتك ولا هذا الي ودك يصير ..

ودومة يعطيج الله الف عافية وننتظرج يوم الاربعاء واجازة سعيدة << على الاقل تفتكين منا ومن حنتنا ههههههههههه[/SIZE]