السلام عليكم ورحمة الله وبركاته

الى كل الغوالي يسعدني دائما حضوركم والله لا يحرمني من هالحضور

محبتي للجميع




الجزء السادس عشر



كانت المها اتناظر فهاد وهي ماهي مستوعيه الحجي الي يقوله

فهاد:المها هو سعد متزوج؟

ناظرته:هااه وش اتقووول للا ...اشلون الولد ولد سعد اخوووي

فهاد:مدري الشيخ حماد اعترف من بعد ما واجهه رجال يدري ان الشيخ حماد ميجييب عيال وقاله وشلون انت متزوج وحرمتك حامل ومن عقبها قال

انه سعد ارسلها عنده لجل يحميها

مسكت المها راسها:يا ويييييلي هذا كلااام كبير يا فهااااد

فهاد:يمكن انه مهتويها

ناظرته بغضب:وش الي قاعد تقوله سعد رجال ومهو راعي السوالف ذي

فهاد:يكون تزوجها بالسر

المها:مدري مدري...حنا لزوووم نكلم الحرمه وندري وش السالفه

بعدها ابتسمت المها:فهاد على اني مدري وشلون هي السالفه الا اني احس بقليبي طاير

مسكت يده وحطتها قريب قليبها:يكووون عندي ولد اخو وانا مدري عنه حس بقليبي وشلوون يرفرف

غمض فهاد عيونه المجنونه وش قاعده تسوي

المها:فهاااد ارجاااك ودي اشوووف الحرمه

تمالك فهاد حاله وسحب يده من بعد ماتركتها:احمم الحرمه صارت اسيره عند عيال العطاوي

المها مصدومه:وش اتقووول وشلووون؟

فهاد:عيال العطاوي غزو ديرة الشيخ حماد لجل فرس اخووج المعشوقه والشيخ حماد طلع من الديره بالفرس وهم جو وخذوها اسيره عندهم لين مايغايضهم الشيخ حماد بالفرس وياخذ الحرمه

المها:الله يا خذه وشلووون يهج من الديره ويتركها لحالها...فهاد الفرس كانت مع سعد وسدحان السحومي هو سدحان وين راااح ؟ الحرمه تكون قريبه من سدحان

هزت راسها تعبانه من الي يصير:وش الي يصير يا فهاد؟

وقف فهاد وهو يناظرها:لا تاخذي هم قريب نعرف كل شي المهم نوصل للحرمه الي عند عيال العطاوي الشيخ حماد وده نكون معه بحربه ضد عيال العطاوي وعيال العطاوي من قبيلة امي الله يرحمها

انا ما ودي اخوض حرب معهم

وقفت المها:زيين وان كان سدحان السحومي هو واحدن منهم

ناظرها فهاد منصدم من كلامها

فهاد:قلتلج لاتاخذي هم ثارج راح اخذه حتى لو كان من عند عيال العطاوي...ارخصيلي هالحيين ودي اروح لمجلس الشييخ


طلع فهاد وراح ورجعت المها للمجلس الي كانت تجلس فيه الحريم وقبل لا تدخل سمعت حجي البنتين الي بالمجلس

عليا:اقول لج هو الي حجى لابوي الشيييخ وانا كنت قاعده معهم

هند:هي شرطت مايلمسها الالمن يجيب بثار اخوها انا اشهد انها مهي بصاااحيه حد يشرط على الشيييخ فهاااد

عليا:اسكتي تراااه داواااها تدري وش قال؟

هند:وش قال؟؟

عليا:قال ان شرطها راح ينفذه وباليوم الي ياخذ بثارها تراها طليقته

هند بحماااس:اي اي اي هذا هو الرجاااال انا اشهد انه رجال خلي عاد شرطها ينفعها هههههه

عليا:لو شفتيه يا هنوده وهو يقول لابوي الشيخ وشلووون رد عليها ذاك اليوم والله اني رجفت وتمنيت اني اقوم واحبه على خشمه

حست المها بالحجي الي يقولنه كاتم على صدرها اجل كذا يا فهاااد قاعد ومستمدح بالي صار بيننا باذن الله نلاقي سدحان ونخلص من السالفه ذي زيييين يا فهاااااد زييين

اعصابها انحرقت وهي تقعد معاهن وهن كل شوي تبادلن النظرات والهمسات حست ان ودها تنفجر لاكنها كتمت وعلى المسا تزينت بنت الشيخ واقنعت هند تعلل معها اليوم بمجلس الشيخ الي كان مابه حد غير الشيخ واخوه وفهاد واثنين من عيال القبيله الي هم ربع فهاد

..........................


قبل الساعات الاولى من الصباح جلس ليث قريب من البدور النايمه واخذ يناظرها وناظر حوله وشاف ان الكل نايم

همس قريب من اذنها:البدوور ياالبدوور

حركت اجفونها بشوي اشوي وفتحت عيونها تناظر من جنبها واول ما شافته جلست بسرعه

ليث:اششششش هذا انا

ناظرته بتوتر وكان قريب حيييل منها

البدور بهمس:وش اترييد؟

طلع ليث الطاسه الصغيره وفيها الحليب

ليث:حليب النوق مثل ماتريدي

ارتجفت من الي يسويه واخذت تناظره

ليث وهو جالس قريب منها يناظرها ويده الثانيه تلعب بخصايل شعرها:ما ودج الحليب

البدور بهمس:للا ما ودي

ليث ونظراته اربكتها:ذوقيه والله انه من خيار النووق

البدور وهي تحس بعبره تخنقها:ليييه تسوي كذا؟؟

ليث وهو يحاول يكون معها جدي:انتي تريدي من حليب النوق ولزوووم تشربي لجل تكون صحتك زينه ترا ورانا دروب لزوم نقطعها وشلوون ودج تقطعيها وانتي بالحال ذا

ناظرته وهي تحاول ان دمعتها ماتنزل:ما ودي اقطعها معك

ليث وهو يسحب نفسه:زييين اشربي الحليب

بيد ترجف مسكت الطاسه وهو كان ماسك فيها وقربتها من فمها وبدت ترشف منها

ومن حلات الحليب شربت الطاسه كلها وليث ابتسامته تتسع


ليث:تريدي بعد؟

هزت راسها بنعم وقام بسرعه وزاد الطاسه حليب رجع وقعد قريب منها اكثر وهو يساعدها تشرب الحليب شربت نصف الطاسه

وشهقت وهي تحس برفسه قويه ببطنها حطت يدها على بطينها وناظر ليث لبطنها وابتسم

ليث:يا ويييييلي وكاد انه انتعش يوم جااه الحليب

غصبا عنها ضحكت لكلامه وحس ليث بقلبه يطييير من الوناااسه وهو يشوفها تضحك

الرفساات زادت حطت يدها على بطينها وكتمت ضحكتها:الله ياااخذك بس

ليث منصدم:ليييييه لييه تدعي عليييه هو وش سوااابج

ناظرته وهي ساكته

مد يده وحطها على بطينها:وكاد انه ايريد من الحليب ازود

ابتسم ليث اول ماحس بالرفسه

ليث:يا رجااال اهدا هالحييين اخليها تشرب الي بقي من الحليب

كانت ادموعها تنزل بغزاره ناظرها وتعجب من حالها:ما ودج تشربي الحليب له؟

البدور وهي تحط ايديها على وجهها وتنتحب:انت وش ترييييد مني اتركني بحاااالي

قام ليث وهو متضايق من حالها الي تبدل فجئه وطلع من المغاره

بعد ما بكت وهديت حطت راسها وهي تفكر يكوون حاسس انه ابووه بس اشلوون لزوووم مايدري



.......................................


ام شوق:يا شووق يا شوووق قومي يا بنيتي ودنا نرحل جنب ديرت ابوي عمتي صيته مريضه وودي ارووح لها

شوق وهي تقلب بفراشها وكانت طول الليل صاحيه مانامت:ارجاااج يمه ترا انا عيني ماغمضت الا هالحييين


حاولت ام شوق مع شوق تقوم لين مازهبو كل شي وهي بعدها نايمه وشوق ماسمعت امها يوم قالت لها انها من بعد ماتصحى تروح وتجلس ببيت العمه ولا عند ابوها ابو طايل الشيخ

طلعت ام شوق ورجلها طايل وتوكلو لديرة عربانهم من غير مايدري حد ان شوق ظلت بالديره

واول ماقامت شوق ما كانت مقتنعه ان امها وابوها راحو وتركوها ويريدوني اقعد عند العمه والله ان امي مهي بصاحيه

ظلت بالبيت لين ماقررت تطلع بالفرس والشيخ طايل ابوها يوم راح يدور قماد لجل يعتذر منه مالقاه

ظلت شوق على الفرس رايحه وجايه لين مالمحت من بعيد فارس على ظهر فرس كانت مستغربه من حركاته على ظهر الفرس ترددت بالبدايه انها تروح له وهو كل ماشافها تقرب ناحيته يبتعد اكثر لين ما صابها الفضول وظلت تتبعه اكثر ويوم شافت انها بعدت كثير

قررت انها ترجع للديره وهي ناويه ترجع سمعت صوت الفارس ينادي بصوت عاااالي

قماااد:يااااااااااااااعممممممممتيييييييييي هذا انا قماااااااااد الرااااااااااعي

التفتت شوق بالفرس وهي تناظره ولوح لها بيده وهو رايح الا ان فضول شوق صار اكبر وقررت انها تلحقه

ابتسم قماد وهو يشوفها تلحقه وزاد من سرعته وش اتريييد اتسوي فيييني البنت ذي

التعب هد حيلها ووقفت بالفرس والتفتت وراها وش الي يصير انا وش اريييد منه الحقه ووين انا انا اشهد انه خسيييس

لفت بالفرس اترييد ترجع وماعرفت من وييين هي جت

شوق:الله ياخذه انا وييين هالحييين؟

وناظرت اتدور له على اثر وماشااافته

شوق:وش الي قااااعد ايصيييرلي وشلوون انا تبعته وليييه ؟!!!؟؟الله ياخذه

صرخت فجئه شوق وهي تسمع طلق البارود وارتجفت حييييل وهي تشوف الفرس الي هي فوقها تطيح وتطيحها على الارض الفرس انصابت بطلق البارود

كانت فاتحه عيونها وماهي متخيله الي يصير حواليها

شوق:يا ويييييييلي وش الي قاعد ايصييير؟

ابتعدت شوق عن الفرس الي كانت ترجف قبل لاتودع الحياه التفتت ليها تناظرها وهي مصدومه ورجعت ودها تبتعد عن المكان لاكنها اصتدمت بشخص واقف قدامها وهو من غير غتره على راسه كان هو قماد الي كانت نظراته مهيب مفهومه بالبدايه حست شوق ان ودها تحتمي فييه لاكن نظرة عيونه هوبتها وظلت تناظره وهي ترجف من الخوووف



......................................................


كان عتاب واقف مع حارس المغاره يوصيه وش يسوي وقف ليث وراه

ليث:وش صاير يا عتاااب

التفت عتاب لليث:ودنا نهي سالفة المعشوقه ارسلت مراسيل للشيخ حماد لجل ايقايضنا بالمعشوقه

ليث:وش الي قاعد تقوله ومن ودك ترسل؟


عتاب وهو يعابل بالفرس الي قدامه:قووته قووته هي الي رااح تكون بدال حرمة الشييخ

ليث:وشلوون ترسلها انت مهب خايف لا يقتلها

عتاب بضيقه:وش اترييييدني اسوووي حنا لزوووم ننتهي من السالفه ذي لزوووم نعرف الديره الي غدرت بديرتنا وين هي والحل راح يكووون في المعشوووقه

خلا نعييش مثل باقي مخاليق ربنا ودنا ننهي الثار ونعيش بديرتنا مكرمين ومعززين ولنا طارينا ومانهاااب من حد


ليث:لا تستعجل يا خوووي كل شي بالتروي زييين وش يدريك وش راااح يسوي الشيخ حماد ان دري ان ذي مكيده

عتاب:خله يسوي الي يريده المهم المعشوقه تكون عندنا وقوته هي الي اقنعتني ارسلها تقول ان الامر بسيط تراها داهيه وانحذفت علينا خلنا نستفييد منها

طلعت قوت الي لفت عليها عباه كبيره تسترها بالكامل:اني جاااهزه يا عتاااب

ليث:انتي انجنيتي

قوته:تر الامر بسيط يا خوووي وانت راح اتشوووف قوته وش راااح تسوي

ليث وهو يفكر"رميتي حالج وسط عيال العطاوي وماغلبج هذا الشي وكاد ان الامر عندج بسيط

نادى عتاب الحارس لجل يمشي معه

ليث:ما ودك اكون معكم

عتاب:للا خلك انت اهنيا مع حرمة الشييخ وتر قماد ارسل انه اليوم جاي وانا باذن الله استلم المعشوقه واعاود

ليث:انتبه يا خوووي يا عتاااب وانتبه لاتكووون مكيده بعد من الشييخ حماد

عتاب:لا تااخذ هم يا خوووي وانتبه انت على حالك


طلع عتاب وقوت والحارس متجهين للمكان الي تواعد فيه مع الشيخ حماد للاستلام

كان يناظر قوته الي كان مبين عليها ان الامر عااادي "وش الحرمه ذي معقوووله انها مهب خااايفه ولا هي كذا ماتدري وين الله حاطها


رجع ليث للمغاره وانصدم انه ماشاف البدور بمكانها ركض بسرعه لهناااك

ليث:البدووور ...البدووور

البدور:انا اهنيا

التفت عليها بسرعه:انتي وييين كنتي

مشت البدور وهي ترمي بالملابس الي بيدها للطرف

البدور:كنت اغير ملابسي

وناظرت للملابس الي هي لابستها

البدور:الملابس ذي كثييير كاتمه علي

كان يناظرها ومنتعش من شوفها والثوب عليها ضيق

البدور:انت ليييه تناظرني كذا

قرب منها ولف حولينها

وبعدها جثى قدامها ومسك طرف الثوب:ودج اياني اشقه لجل يستاسع

خطت خطوه لورا بسرعه وهي تشد الثووب:للا

ظلت تناظره ابتسم وقام واقف:وش فيييج ودي اوسع عليييج

البدور:ما ودي ...كذا زييين

مشت عنه وراحت للطرف الي تجلس فيه دووم واول ماقعدت تضايقت من الثوب الي عليها ورجعت توقف

قرب منها ليث ومسك ايديها ووثقهن برباط وهي تصرخ عليه لجل يتركها وخايفه من الي وده يسويه


........................................


ناظرت شوق قماد الي ظل يناظرها

شوق:انت !!انت!! انت وش اتسوي اهنيا؟

قماد ونظرته بعدها غريبه دار حوليها وهو يناظرها

شوق وهي مرعوووبه:انت وش فيييك ؟؟؟ الفرس الفرس من الي صوبها؟؟

ابتسم والتفت ومسك لجام الفرس الي كان راكب عليه وقربه منها

قماد:تفضلي يا عمه اركبي

ظلت تناظره ومتعجبه من امره..بعدها ركبت الفرس ونط قماد معاها فوق الفرس وتحكم بلجامها وهو يحيط بيده وسطها

شوق وي تمسك ايده تريد تبعدها:بعد اييييدك انت وش اتسوي

مارد عليها الا بضحكه واستحكام اكثر بوسطها

اخذت شوق تناظر وتناظر الطريق الي سلكه طريق غير عن الطريق الي كانت تمشي فيييه

شوق:انت وش اتسوي لويييين ودك تاخذني

قماد:ياعمه اهدي ....ودي اخذج لعمي الشيييخ طايل

سكتت شوق وقليبها يدق بقو واعتقدت انه بالفعل راح ياخذها لابوها بديرة عرب امها لاكن اشلووون وكيف ياخذها كذا من غييير مايقول لها بلاول لجل تاخذ حجاتها ولييييه تروووح بالاصل معه لحالها

مسكت شوق ايد قماد الي ماسكه لجام الفرس وطلبت منه ايوقف الفرس

الا انها حست انه بدا يتملكها اكثر وهو يشد على وسطها بيده ويضمها لصدره حاولت تقاومه وتقنعه يوقف لاكنه كان شديييييد بمسكته حست شوق انها مصدوووومه حييييل من الي قاااعد يسويييه


......................................


بعد ما قدر ليث يوثق رباط البدور

ليث:انتي لييييه عنيده كذا اهدي يا حرمه ما ودي اسوي شي انا ودي بس اوثق رباطج لاني راح اتركج لحالج واروووح اقضي حاجه وراجع

البدور:ولييييه تربطني

ليث:لجل ماتهجي بعد ما روووح

البدور:فك ربااااطي فكه تراااني كثيييير مستوجعه من رجووولي وظهري

ليث:ماني بمتاخر الديره الي ودي اروووح لها قريبه من اهنيا باذن الله


ظلت البدور لحالها وهي تفكر ليييه ليث راااح ووين راحو البقيه وتركوهم لحالهم كانت حييييل متضايقه من الثوب الي عليها

بالديره الي كانت قريب والي قصدها ليث تسلل لها كالعاده وسحب ملابس الحريم الي تركتها الحريم على الشجر لجل تنشف واول مانوء يرجع لفت نظره شي رجع وخذااه ورجع للمغاره الي ترك فيها البدور


دخل المغاره وهو يلهث من التعب بذل طاقته انه مايتاخر عليها وكان سريع بالروحه والجيه

ظل واقف قدامها يسحب انفاااااسه ورمى بصره كبيره قدامها وبعد ماشرب من المي وتريح اشوي قام وفك رباطها وكان اول حاجه سوتها انها خذت تضربه وهي معصبه عليه بالي سواه

توجع ليث من الضرب الي ضربته ورفعت ايديها بسرعه واخذت تناظره وتنتظر وش راااح يسوي بعد ما حط يده على صدره

ليث:ترفقي بحالي ترا جرحي بعده مابري

نزلت ايديها وابتعدت عنه وهي تلتفت للجهه الثانيه ليث نزل على الارض وفك الصره الكبيره ورفع لها واحد من الثيبان

ليث:وش رااايج بالثوووب ذا وكاد ان مقاسه راح يكون كبير علييج وتقدري ترتاااحي فيييه

التفتت ناحيته واخذت تناظره مصدوووومه

ليث بتردد:ودج تشوفيييه

قرب منها :خذييي

بتردد مدت يدها ومسكت الثوووب

ونزل هو لجل يرفع لها واحدن ثاني:ولا وش راااايج بذا

ناظرت الثوب الي بيدها وشافت انه هو الاحسنوبخطوات متردده راحت لطرف المغاره تتدارى ورا حجر كبير ولبست الثوب الي حست براااحه كبيره فيييه"يا ويييلي منك يا ولد العطاااوي

التفت ليييث اول ماحس انها جت ناحيته وانبهر باللون الي لبسته وهو عليها كان يحس بقلبه تزيييد دقااااته

بتردد قرب منها ورفع ايييده لشعره وحكه متردد من الي وده يقوله:الثوووب طلع زوووين

سكتت عنه وماردت عليييه

"وش فييييك يالييييث منت قاااادر تقووول لها زييين وش رااااح يصيييير"

ليث:اقووول

ناظرته البدوروهي تحس ان وده يقووول شي

ليث وهو يطلع شي من جيييب ثوبه:خذي ذا بعد

حطه بيدها ومشي عنها كم خطوه

ناظرت البدور الكحل الي بيدها وهي تحس برجفه قويه ترجفها وكااااد انه جن

ما قالت شي وكملت خطواتها لمكانها جلست فييه وهي تحس براااحه كبيره بالثوب ذا اما لييث فسكوتها خلاه يرتاااح رجع للصره مره ثانيه وسحب منها حاجه وعاود يجلس قريب منها


........................................

دخل فهاد على المها الي طلبت تشوفه

فهاد:وش اتريييدي يالمها

المها:ودي اعااااود للديره

ناظرها فهاد:بعدنا ما انتهينا

المها:وكاااد اننا ماراااح ننتهي وانت جالس اهنيا ماتحرك

فهاد:وانتي وش يدريييج اني متحرك اسوي شي

المها:انا ما ودي اجلس اهنيا ودي اعااااود لديرة عمي الشيييخ ابو طايل ويوم انك تنهي الثااار حينها اعاااود لديرتنا

فهاد:وش الي مهب عاااجبج اهنيا

المها:اشتقت للعمه احس اني ما اقدر على فراااقها

اخذ فهاااد يناظرها باستغراب:ما تقدري على فرااااقها اجل وش راااح تسوي باااكر يومنج تفارقيها لديرتكم

وقفت المها وبتحدي:وكاد ان العمه شوقها لي يخليها تاصلني

وقف فهاد وهو يصرخ عليها:الزمي حدج يالمهاااااهذا حجي كبييير وفيييه مقاااصد كثيييره وش انتي شايفتني قدااااامج

المها:قلتلك ما ودي اجلس اهنيا ودي اعاااااود للديره وانت بكيييفك تفهم الي ودك تفهمه

فهاد بغيض يحاول يكتمه :زييين يالمها زيييين

خلاها وطلع والناااار تشتعل ازود وازووود


..............................


ناظرت البدور للثوب الصغير بيد لييث كان ثوب صغييير حيييل لعيل مولود جديييد ماتدري ليييه حست بشي اول مره تحس فيييه وهي تناظر الثوووب

مدث يدها للثوب وناظرت لييث:يا ويييييلي

بدت الدموووع تكثر بعيونها وتحجب الي تشوووفه احساااس انها راااح تكون ام وهي رااافضه ذا الشي من البدايه طغي عليها وحست حالها تبكي من غييير ماتحس


البدور:صغييير الثوووب صغييير

ابتسم ليث :ليييه تبكي

البدور:راح يكووون كبر الثوووب ذااا يا ويييلي

ضمت البدور الثوب لوجهها واخذت تبكي احتاااار ليث معاها هي وش فيها كله تبكي

ليث:تريييدي تعاااودي لرجلج؟؟


!! !!
!! !!
!! !!

وديمـــــــــــــــــــه

رائعه كعادتك وديمه

قماد خيرر وش عندك ما اخذ شوق وش نيتك الله يستر منك

ليث يدوررر رضا البدورر ومااعتقد يلقاه


قوته الداهيه وش راح تسوي لاوصلت عند الشيخ حمااااد
مها وفهااد يزين الغيررره لعبت بكم لعب

مشكوورررره وديمه على الجزء ارائع

موب صاحي قماد أخذ شوق!!! بعدين فاد يشوفه عندهم ووهو موب ناوي يقاتلهم الحين غصب عنه بيقاتلهم..

والله غن عيال العطاوي مهويين كل واحد جايب له مره ولعبت بعقله

أجل ليث ياحول يجيب له حليب نياق وملابس ومشطط لا ويقوله تبين ترجعين لرجلك من جد حالته كسيفة كنه يدري إن العيال عياله وهي اللي متأكدة إنهم عياله ماتبيهم

تدرين أنا خايفة من فعلت قماد حسيته متهور بس أحسن أغديه يربي هالشوق عاد هي دلخه مصدقته وتتبعه حقه وماجاءه وش هالدلاخة الزايدة عن الحد..

قوت انتبهي لحالك عشان عتاب موب حب لك ههههههه<<ما أدري ليش ماهضمته هالقوته يمكن لإنه فاهمه وقاعدة تلعب على عتاب

وش أسوي أحب عيال العطاوي ودي يصيرون الكل في الكل وما أحد يهك عليهم هع

حماااااس
وش بعقلك ياااقماد هاه وش تفكر بس لاتصير بتهجبه

قوته خطيرررررررره ذكيه بعد وش براسه لاتصير تخطط لذهب هههههه
من قبيله العطاوي هههههههه حراميه يازينهم

ليث يااقلبي شكله شاك هه
ولا من حبه لبدور
بدور وش بتجاوب بتقول ايه ابروح لرجلي ولا انت رجلي


بنتظاااااارك

اخ قفله قويه

قمااااااااااد ياناس اخيرا تحرك خطفها ههههههههههه ودومه بعد عمري اشكرتس من اعماق قلبي خله يعلمها السنع قاهرتني ذا الدلوعه

ليث وبدور رحمته جايبلها كحيله يبي يشوف عيونها اويلااااااااه ياوديمه ابداع ياختي حني عليه وعلميه او الولد ولده والله ذا الولد حي قلب زي ابوه خخخخ يلعب كراتيه الظاهر وهي مسكينه والله حره صارت سبيه لا وحامل بس كانها بدت تلين ههههههه مب هين عتوبي راعي حركات * ^

عتاب ماهقيت انك تفرط في قوت حبيبة البي

قوته شناويه عليه يالخبله خايفه عليتس انا ترفقي عليه وديم تكفين لايجيها شي ترا فيها قبايل قوته ذي ميب اي احد

والمها وفهاد هههههههههههههههه تغار احسن والله ماحد قالها تشرط شرطها قدام مخاليق ربي والله انه فهاد خاق بس مغبي بس هي غبيه مفروض تحس انه رايح في خرايطها


وديمه انت روعه ماشاء الله عليتس افكار واسلوب بس ماعندي كلام يوصفتس مشكوره حبيبتي جد الله يعطيتس العافيه