يسلمووووووو على البارت الروعه

واخيرا العاجي رضى وكان عندي من زمان امل ان مقرن يجمع طيبت الكون كلها بس اللي فيه جرح كبير لاب من اول فرحته وعاجيته ما اسمحت له يحتوي ولده او يتفهمه وبانتظار الباقي بشوووق

عناد ردة فعله قويه وشلون لودرى ان امه الغيوض
اتوقع الحاله اللي مر فيها بتأدي الى مرض يمكن موب خطير بس مرض لانها من قبل جاته
ملوووك فرحيه وقوليله انش حامل والله يعين قلب ياسر على الصدمه

كنت ابي اكتب الرد من امس بس النت عندي فصل ويوم رجع الا الكتابه كلها انج وانا ماحب ارد الا بالعربي احس الرد اسهل واقرب لنفس

وبانتظارش على نارررررر

تسلميييييييييييين

يالغوالي..,
مسائكم مطر=)
البارت بكرا ان شاء الله مسائي..,
.
.
.
>>شوشو اشتقت لك..>>تشوفها ب المشاهده
.
.

مساء الخير ضمضم .............. مساء الطلة الحلوة ............ مساء التعقيبات العسل .......... كيفك ياقلبي وربي نور المتصفح ورجعت فيه الروح برجوعك ............. اشتقنا لك موت وربي لك وحشة فضيعة ..........

تسلم ايدك يالغلا على البارت الرائع بس كل ماقربت ساعة رفع الستار كل ماحسيت قلبي يدق بقوة من اللحظة الي بتطيح فيها عين الغيوض على عناد والعكس احس البارت بيكون موجع ومن الحين بنجهز الكلينكس جنبنا



وبعدين ضمضوم مايصير كذا نجوم وحركات تراني توقعت انو عناد بتجيه الحالة الي جاته لما شاف رهف لما يشوف الصورة ماابي ابي قلوب مابي نجوم خخخخخخخخخخخخخخ والله تستاهل ام الوليد مو بس نجوم الا دروع ماشاء الله عليها عسل هي وردوها وتوقعاتها موشي غريب عليها والله


المهم نجي للبارت تصدقي اكثر شي وجع قلبي كذب الجدة هيا توقعتها تدور فرصة تكفر عن ذنبها بحق الغيوض وولدها اتاريها مصرة على جرمها وماهمها كلام جسار اي قلب تحمله هالحرمة حراااااااااااااام عليها بدل ماتحسن خاتمتها تنهي عمرها بجريمة كبيرة بحق ام ماضرتها بالعكس هي الي انضرت منها ومن ولدها ليه هالشر والحقد الي بقلبها مهما كان الي صار مو من حقها الي سوته ...........موهي كانت تبرر انو الغيوض ماتت في حادث وانو ماله داعي فتح هالموضوع هذا جسار اكد لها انو شافها وهي انكرت بس ياويلها من ردة فعل عناد


آردف\يمه قولي لي عنه ...انامتأكد ان لي اخو مخطوف..بس ليش ماتبون تعلمونا عنه..!
الجده بتصنع لـ الهدوء \مالك اخو مخطوف ولآشي...لك اخو صح...بس مات من سنين..
جته حمى وماقدر جسمه يتحمل ومات...
من قال لك عن ها الولد..!
جسار\ امه الغيوض....هي الي قالت لي عن [عساف...!]

ياويلك من ربك ياهيا اجل مات بالحمى بس ليت الحمى تشلك على هالمفاول جالسة تتفاولين على الولد وهو عندك ويحمل لك مشاعر مايحملها لام جسار الي على اساس انها امه ياصدمة عناد فيك ياجدة هيا خيبته كبيرة وجرحه مايداويه اكبر دكتور بالعالم

جسار\شفتها وخلصنا..ليه ماقالو لك الدنيا صغيره...؟
الجده بحده\قلت لك وين شفتها تكلم معي زين لـهذا الفنجال احطه بين عيونك يالي ماتحشم كبير...
جسار\يمه...شفتها..وعلى صدري دموعها مانشفت...
تسئل عن ولد لها...!
مدري تعرفينه او مع ها السنين جهلتيه...
عساف حي...!
وانت تقولين لي الحين قصه ماقالتها...
هي تقول انخطف بليلة عرسها..
وانتي تقولين محموم ومات...
الولد له آكثر من ثلاثين سنه....
وهي مثل الي البارح مخطوف من بين ضلوعها...!
وش الحقيقه هنا...
الحقيقه شفتها بعيونها يمه....
شفت عيون ام....انخطف منها نظرها...

ياليت يام سطام حطيتي ببالك انو فعلا الدنيا صغيرة ورب العباد لابد يوم وينصر المظلوم على الظالم فمابالك بأم قلبها محروق تمنيت لما تسمعي كلام جسار تنهاري وتحني على المسكينة وتدعين ربك انو يغفر لك لكنك مصرة تكبرين الذنب ............. والله مااقول الا ياخسارة حب عناد لك انت بالذات


شفت عيون ام....انخطف منها نظرها...
الجده\ها الحرمه مريضه...ومرضها كايد...فيها حاله نفسيه...!
هم ماخبروك بهذا الشي....؟
ولدها ميت من سنين وسنين....
بس هي عشانها مريضه تحكي حكي مجانين..!
اجل لك اخو حي وماخبرناكم عنه..!
اجل لك اخو مخطوف ومادورنا عليه....
مات ................... حرام عليك بعد تتهمين المرة بالجنون ياويلك من عقاب ربك بيكون شي عسير وبتذوقي من نفس عذاب ام عساف الي موتيه وهو حي يمشي بين عيونك ومثل ماحرقتي قلب امه عليه ربي بيحرق قلبك انتي عليه بعد وبتعرفين كيف يكون شعور الام ولها على الدنيا وهي تتهم بالجنون بس لانو احساس الام عطاها هالمصداقية


الجده\اجل انا الي اكذب...كذب امك هيا احسن..قم انقلع عن وجهي ولاعاد اشوفك تذكر ها الكلام لـ احد....
والله والله ان احط بقبري وانا لساني مايخاطبك..,
جسار بصدمه وهو يقف ومنصدم تماما من ردة فعلها...
شد نفسه لـ انسحاب منها...
ومتعهد ب المضي قدما ب موضوع اثاره جداً...!

ام سطام مادرت انها بردة فعلها هذي اكدت انها تكذب وبشدة وانو في سر بالموضوع وجسار مابيتراجع عن معرفة الحقيقة الي بتظهر وبتكشف ام سطام وولدها


سطام بحده\جالسه تهدديني..!
سآره ب تعب\لآ...بس جالسه اذكرك بحقوق انت ناسـيها...آذا انت مفكر انه في يوم بسمح لك تذوقني من نفس الكاس الي ذاقته الغيوض ولو بشكل ثاني ..فـ انت غلطان...
ولدي ريان اذا مانام الليله في الجناح الي مقابلني...
صدقني يا سطامـ...
عناد ب المقابل...يمكن ماعاد تشوف رقعة وجه...!

كنت متوقعة هالموقف بين ام جسار وابوه على موضوع ريان وعناد وسره بيكون نقطة ضعف سطام لانو سارة مستحيل ترضى تعيش نفس عذاب الغيوض ولانها طرف فيه

سآره\انت وش القلب الي بين ضلوعك وش هو ب الضبط مثل قلوبنا ولا مخلوق من حجر...
آذا انت هان عليك ولدك يعيش بهذا الشكل فـ انا ماهو هاين علي ريان يبعد عني ويعيش بعيد...
ولو كلفني هذا الشي الغالي والثمين...
ريان حشاشة الجوف...آذا انت ماتعرف هذا الشي..ويجهلك..!

صادقة ياسارة الضنى دايم حشاشة الجوف وفقده وبعده شي فوق التحمل هذا وانتي تقدرين تسافري عنده لو بعد وتسمعين صوته بس مو قادرة تتحملي اجل ايش تقولي عن الغيوض الي تحس بولدها عايش بس ماتدري عن مكانه ولاتدري انو عند ابوه وفوق كذا هي الي اتهمها سطام بضياعه يعني عذاب مضاعف


سطام بحفيف\وعناد نظر عيوني الي فيها اشوف اذا انتي تجهلين هذا الشي...
كل عيالي بكفه...وهو بكفه.. عناد لو يدري بشي...ب آنهار تفهمين ب انهار...
وياويلك وياسواد ليلك لو جربتي تقربين خطوه من الاوراق القديمه..!
آفلتت عضديها منه لـتزفر بضيق\ياويلك من ربك ياويلك من ربك معيش الولد في كذبه من يومـه صـغير...
لآتامن طرد الفجر لليل...لآتامن طرد الفجر لليل..!

ياترى ليه عناد بكفة يا سطام اكيد بسبب الجريمة الكبيرة الي سويتها بحقه وبحق امه ياويلك من ربك ياسطام موبس عناد الي بتفقده وبتنهار له اعتقد حتى عيالك الثانيين بيوقفون مع اخوهم خصوصا لما ينهار ويتعب وينصدم من السالفة كلها والي مبررها جدا جدا ضعيف


هذا عناد من شوفة صورة اخوه انهار وحالته كانت بالويل ومستحيل تلاقي لها تفسير عضوي لانو هالشي داخلي يتعلق بدواخل الانسان بعض الاحيان هالحالات تصير للتؤام لما يفرقوهم او يتعب احدهم بس عناد فيه رابط خفي وداخلي بأمه الغيوض نفس ماقلب الغيوض يدق ويحس بقرب عناد منها ونفس الحالة الي صابتها لما كان قربها في سيارته وهي مالمحته بشكل دقيق ............. بس الصورة الي بدرج سيارة عناد هل هي الي بتكشف السر لما يشوف شخص معين او بتنسى الين تظهر الحقيقة

هل من الممكن ليلة زواج جسار تكون الليلة الحاسمة هل بيكون للغيوض تواجد وتتواجه مع ام جسار والجدة هيا او تواجد عناد بمجلس الرجال مع عبد المجيد بيككون فضح للسر مثل ماكشفها ياسر من خلال الشبه او عناد مابيكون موجود بهذي الليلة والله الخيوط تفرعت لاغلب الاشخاص بس مين الي بيحط النقاط الاخيرة للاحجية كلها ؟؟؟؟؟؟


.
لـثواني معدوده التهم الصمت المكان...
.
.
لـيردف بعد ابتلاع ريقه الجاف..
و
عينيه تتأمل الـصوره..و...صآحبها...!
دفـئ ما..!
سـرى ب الروح لـيحلق بها بعيداً...
عنآد\يشبهني كثيـر..!

تصدقي ضمضم كنت متمنية انو احمد عايش مامات واشوف اللحظة الي يتلاقى مع عناد وجه لوجه اذا صورة حركت سواكن القلب ومجرى الدم وحس بحنين رابطة الدم بدون مايعرف هوية صاحب الصورة كيف لو كان اللقاء بالاجسام والانفس اكيد بيكون اللقاء رهيب ويوقف الانفاس

عنآد يـلقي الصوره ب حجر ملـوك...
و
هو يشعر ب انقباض ب الـصدر...!
.
.
.
حآول شد آلآنفاس...!
لـتبتعد بعيداً عنه...!
.لم يستطتع مجرد التنفـس..!
ف
كأن الانفاس حلقت مبتعده اميال عنه...
شـرع الباب ..
لـيسقط على ركبتيه...

موقف فضيع لابعد درجة وموقف دقيق جدا بالوصف وكأننا نشاهد صورة حية للموقف ابداع لامتناهي وصورة جدا مؤثرة اذا الصورة حركت المشاعر الداخلية وردة فعلها متعب اجل كيف اذا التقى بأمه ياالله احس يبغي لنا مجهود اضافي علشان نتعمق بكل حرف وكل حركه وكل انهيار وكل نبضة ............ ننتظر هاللحظة بكل شوق

سطام شاف حالة ولده المذهلة وهو ماعرف الحقيقة مجرد صورة عفست حاله اجل كيف بيقدر يشوف حالة عناد لما ينصدم بالي سواه فيه هو والجدة هيا ساعتها ولااشعة الدنيا ولا كثر التحاليل راح تنفعه

ملوك ب ارتباك\والله ياعمي كلآم عادي الي بينا مايستدعي ها الحاله الي دخل فيها...
كنا نتكلم عن صورهـ..كانت معي...
وكانت تخص اخ لـ زوجة يآسـر ولد عمتي...
وصآحب الصوره يشبه عناد بـشكل كبير جداً...
هو شآفها...
وسئلني اذا فعلاً تشبه او يخيل له هذا الشي...؟
ومن بعدها حسيت وجه صآر آسود...
وصآر الي شفته..!
سطام ب استغراب\غـريبه...!
من ثم اردف ب اهتمام طبيعي\وين الـصوره ابي اشوفها...؟
شدة ملوكـ حقيبتها لـتبحث عنها...

يمكن كان من حسن حظ عناد انو سطام ماشاف الصورة ولا انو يعرف مين ابو زوجة ياسر يمكن لحكمة من رب العالمين هالشي والله كان سطام وامه بدو يحيكون خطة جديدة يبعدون عناد عن امه بقية عمره مع انو الجدة صار عندها خبر بس يمكن ماتوقعت قربها لهالدرجة

ملوك بتهدئه\عمي هو فعلاً الان بخير...اتركه يطلع وانا بكون معه لآتقلق فديتك...

يعني ملوك غيرت رايها وبترجع لعناد بعد ماشافت حالته او كانت مقررة من البداية انها ترجع لبتها بعد ماعرفت عن حملها الي شكله ممكن يتضرر بسبب جماعة يوسف بدون مايفرح فيه عناد

عناد احس جايته ايام الله العالم بس بحاله فيها ........... سالفة امه لحالها تهد جبال كيف وبعد لما تتعرض ملوك لخطر من يوسف والعلل الي معاه لانو بتكون نقطة ضعف عناد ودامهم مراقبين البيت كل الاوقات وعارفين انو البيت مو مأمن بيعيدون الكرة بالدخول بس يمكن ملوك ساعتها تفاجئ الكل بردة فعلها وتستخدم السلاح لحماية نفسها ويمكن انقاد عناد بعد


اما فلك احس حياتها بتتغير بعد طيحتها بالمستشفى اتمنى انو بتال يراعي حالتها ووضعها على الاقل الين تولد وبعدين يحطون النقاط على الحروف لازم يجلسون جلسة صريحة ويتفقون على مجرى حياتهم القادم على الاقل علشان الولد الي من حقه يعيش حياة اسرية شبه مستقرة

لانو مستحيل حياتهم تكون مستقرة بشكل طبيعي وعنده غيرها ثنتين وحياته مقسومة بينهم ........... بس ياخوفي تنجبر فلك على العيش بنفس بيت مقرن لانها هناك بتضيع بين مناير ومناهل لانها مو ند قوي لهم مهما تغير موقف مقرن منها بس مستحيل يلغي الي زرعه في قلوبهم طول هالسنين


ببحه\مافـي ام ماتبي ضناها..
بتال ب استغراب\انتي ماتبينه..تصرفاتك تقول مابيه..ماتاكلين زين..ماترتاحين عشانه..
متعبه نفسك والي حولك..
واخر شـي تبينه مايتعب ولآ يتأثر...عجيب امرك..!

ماادري بتال غبي والله يستغبي يعني مايعرف مين سبب تعب فلك وليه من الناحية النفسية اما من الناحية الجسدية في ناس تتعب اكثر من فلك بالحمل لانو شي مرهق من جميع النواحي في ناس ماشاء الله اول حمل مايتعبهم ابد وفي ناس يهدهم هد ضعف دم وهبوط بالضغط ونزول بالوزن وغيره وغير ه ماتولد الحرمة الا هي منتهيه من جميع النواحي والله يعين فلك الين تولد وترتاح وتشوف ضناها ساعتها بس الام تنسى تعب الحمل وساعات الولادة المميته الي مهما تكلمت الام عنها ماتقدر توصفها لانو الشعور ماينوصف بس لمى تلمح الام الي سكن بأحشائها تسع شهور كل شي يتحول لحلم غريب ولذيذ ........ والله لو جلست اوصف هالشعور مابخلص كل ام مجربة اكيد بتأيد كلامي وعقبال كل وحدة تتمنى هالشعور الله لايحرم اي انثى هالاحساس


زيارة مقرن كنت متوقعتها من بعد التغير الي صار لمقرن بالعزا ولما عرف انو البيبي الجاي حفيد ذكر وصار حلمه وهمه هو عد الايام لاستقبال هالولد ومااستبعد انو لو عرف انو فلك بالولادة يجي عند غرفة الولادة ينتظر ظهور هالولد للنور بعد سنين الانتظار

بس كلامه للاسف جاء متأخر حيل لفلك يمكن لو كان من اول زواج بتال لها مرة ثانية ماصار الي صار بين بتال وفلك ............ السنين الي راحت ماراح ترجع خلاص راحت وانتهت بس لايتوقع انو فلك بيوم بتنسى الي صار لها بسببه مهما سوى ومع وجود بكيزة وزغلول راح تذكرها لو حاولت تنسى ومقرن ما يستاهل من يسامحه مهما كانت مبرراته لانها جدا عقيمة ومالها اي قيمة بس فلك بتحاول علشان ضناها تتعايش مع وضعها


ياسر توني بقول ماله طله الله يهديه جاي لخالته وهي بوضعها وريحة الدخان متشبعة بملابسة بس شكله بيتوب منها على يد رهف اذا حملت وتوحمت وصارت ماتتحمل هالريحة فيه خخخخخخخخخ


والله ياضمضم بالنسبة لمصداقية ابطال الرواية مو غريب هالصدف والتقارب بين الابطال والشخصيات الحقيقية المشابهة لها على ارض الواقع ............لانو احداث الرواية اصلا مو بعيدة عن الواقعية وهي من الاحداث الي تصير بكل بيت لانو الي نشوفه بزمننا صار يفةق الخيال الدنيا كل ماتطورت اخلاق الناس صارت تتراجع لورى والعادات الجميلة والتقاليد اندثرت وصارت قطيعه الارحام منتشرة والعداوات بين الاخوان زايدة والظلم واكل مال اليتيم والخيانة مو بس الرجال الي بس يخونون صار حتى الزوجات والاخت تخون اختها مع زوجها والصديق الوفي صار عملة نادرة وحالة الناس صارت متردية مهما حاولت الدولة تصلح من حال الشعب

دام التجار الجشعين على الارض لانرتجي خير هذا هم ماصدقو انو بعض الموظفين نزل لهم راتبين زادو الاسعار مو كأن هالزيادة بس للي يشتغلون ولشهر واحد مو على طول هالزيادة ومواد البناء تضاعفت الي يشوف يقول كل العالم تبني يعني الى متى هالابتزاز مو من حق المواطن ينبسط بأي مكرمة الا يدفع ثمنها اضعاف بسبب هالجشع حسبي الله ونعم الوكيل اجل الي عايشين على معاش الشؤن والي من غير وظايف مثل الي نشوفهم يبيعون عند المحلات برة عطور واكسسوارات والي يبيع ذرة ومشروبات باردة وموية هذول ايش يسوون مع زيادة الاسعار ايش جاهم من من نزول الراتبين الي هي مرة وحدة بس مااقول الا وين المسؤلين الي بغرفة التجارة عنهم ليه عاطين لهم الحرية بالزيادة الي ينعطى لنا باليمين ياخذو هم بالشمال والله يعين هالفقراء وربي لما اشوف هالاولاد بعز الحر جالسين يبيعون عصاير وغزل البنات علشان بس يطلعون مصاريف المدرسة يعورني قلبي وتنسد نفسي عليهم


ضمضم عاد متعودة انتي على هذرتي بس تعودنا انو متصفحك متنفس لنا وصدرك متسع لكل حروفنا مهما طالت هالحروف ............. في انتظار البارت القادم بكل شغف

صباح كل شي مميز
صباح كل شي حلو
صباح العود والبخور


بداية اسلوبك وطرحك ماله شبيه او اي مقارنه والي لها خبرة بقراءة الروايات
تلاقي ان اسلوبك وطرحك متجدد ومتطور من بارت للثاني واكبر مثال على هالشي
انك كاتبه الروايه ومخلصتها تقريبا من قبل ماتنزلينها والى الان تجرين فيها تعديلات
قبل كل تنزيل حتى تناسب الوضع ووقته ففعلا تغلبتي على ابداعك بابداع افضل منه

عندي نقطه حابه اقولها بالنسبه للصحفيين وكلامهم وانا واثقه من الكلام الي اقوله عن
هالشخص .... فيه صحفي كبير في جريدة عندنا بالرياض انا كنت معجبه جدا باسلوبه
وطرحه واراءه وهو يتكلم في كل شي وينتقد الاخطاء الي تصير ويوجه المسئولين لهالاخطاء
بمقالاته فكان بيوم مسوي معه الاستاذ صلاح الغيدان لقاء ببرنامجه وكنت اتكلم عن هالشخص وقد
ايش انا معجبه بجراءته بالطرح والنقد سواء بالتلفزيون او بالجريده طلع الاخ كلاااااااام فاضي
وبالحقيقه هو اهمل شخص لانه طبعا عنده وظيفه ثانيه غير الصحافه ومايدري عن وظيفته الا
راتب اخر الشهر و التفصحن على الفاضي وطبعا عرفت هالشي من شخص معه بمجال عمله الثاني
وانا متاكده وواثقه فمو كل جسار جسار وانا طبعا ماامس كل الصحفيين بتكذيب كلامهم ولكني
حبيت ابين ان كل مجال فيه الصالح والطالح واننا محاسبين على الحرف الي نكتبه يوم القيامه
ومااظني ان ضمضم بتحط بذمتها كلام على لسانها وتتحاسب فيه علشان شهرة او اعجاب فهي
اكبر من كذا >> ادري جايه متاخرة شويتين بس والله كنت مشغوله مرة غير ان الاتصال كان
معلق معي ومارضت تفتح معي الصفحه الا متاخر فحسيت اني عايشه متاخرة وبقرن ثاني :graaam (288):

( >>شوشو اشتقت لك..>>تشوفها ب المشاهده )
حتى انا والله اشتقت لك ولبعض العيون مرة مرة مرة


عناد بحياته الغير مستقرة واحساسه بشي مجهول يربطه بعايلته معه غير عن اخوانه
الباقيين وفجاه شبيهه الشبه الغير طبيعي يكون بصورة تحت يده تعتبر صدمه كاسحه له
ومزلزله لكيانه وهالصورة الي انحطت بدرج السيارة بتنحط باليد الصح الي بتوصل جميع
الاطراف ببعضها البعض


اظن ان عناد بشوية تفكير وجلسه هاديه مع نفسه بيعرف ان هالصورة لها علاقه
مع حلمه الي يتكرر انا بصراحه ناسيه هل وضحتي شنو الحلم ولا لا عشان اربط الموضوع
صح بس متاكده ان تفسيره بيكون تحت يده لما يكتشف الحقيقه او لما يفكر عدل بالصورة
ومنو ممكن يكون شبيهه وليش هالشبه غير الموقف الي صار معه مع رهف سابقا كلها
مواقف لو ركز عليها وحاول يربطها ببعض بيتوصل للخيط المخفي


( قلبه ينزف قلق على ذاك الـذي متشبث ب اعماق الوريد.. )
ينزف على ذاك وام ذاك ايضا ياسطام فلو كان عناد باعماق الوريد فهو من غلا
ام عناد الي جوه القلب متربعه فيه وماخلت لغيرها مكان الا الاطراف


( كل عيالي بكفه...وهو بكفه.. عناد لو يدري بشي...ب آنهار تفهمين ب انهار... )
اكيد هو بكفه لحاله لانك داري ان بيجي يوم وبيعرف المستخبي ودايما الغير مضمون
له مكان ارقى واعلى من المضمون ... وبتنهار اكيد انك وقتها بتنفضح وبينكشف المستور
هذا غير ان الغيوض بتكتشف اي انسان مخادع وماله ضمير كانت متزوجته وانت اكيد
ماتبيها تكتشف هالحقيقه مادري ليش احس ان حبك لها اشد من حب ياسر لملوك وانك
ماطلقتها الا لشي قوي ومازلت متحسف على هالطلاق الى الان


( والله والله ان احط بقبري وانا لساني مايخاطبك.., )
وليش ياعجيز النار تحلفين هالحلف ماتخافين ان عناد لما يعرف هو الي يحلف هالحلف
عاد تدرين بعناد زعله كايد ومايرضى بالساهل وبزياده اذا صدمته من شخص يحبه
و يغليه مثل زعلته الاولى من جسار عاد انت غير عنهم كلهم فزعله منك بيكون مختلف
وغير شكل

( ومتعهد ب المضي قدما ب موضوع اثاره جداً...! )
احلى شي ان الموضوع انحط بيد صحفي محنك والحقيقه تجري مكان مجرى الدم
فهو مااثر فيه لاحلفها ولا كذبها لانه شاف الحق بعينه في عين ام عساف

بتال وفلك شكلهم خرفو وقامو يعيشون المراهقه متاخره يالله ماعاشوها بصغرهم
قالو نعوض على كبرنا ياربي وين راحت خبرة السنين وعقل الكبار
اذا تقابلو ياحافظ عين ام السعف والليف والسحليه الثانيه موجهه عليهم ماتخليهم
يتهنون بكلمتين مع بعض تدرين ضمضم خليهم علي وعطيني بتيل اوشوش له بكلمتين
باذنه وفلك امصع لها اذنها شوي وبينعدل حالهم وعد مني لك


( \آنت بس آبعد عني..ريحة الدخان فيك كتمتني .. )
بحقد عليك ياضمضم لو انتهت الروايه ويسوري يؤبر البي لسى يدخن

( وهو ينتبه لـ انسحاب ياسـر.. من ثم تعمد يآسـر منادة بتال..! )
يخلي لي اياك يازكي يافطين اجل تبيهم يتصافون برواق ومن غير اي تدخل

( يمكن ها الـصغير الي بيجي بيصلح اشياء كثـيره...يمكن ينور بجيته زوايا مظلمه.. )
اعتقد ان فلك صدت عنه وأأأأنت لانها حست قد ايش هي صغيرة جنبه وانها المفروض خلاص
تنسى الماضي وتبدا صفحه جديدة بس قبلها مو تطوي القديمه لا تقطعها وتمزقها وترميها
في اقرب زباله خلاص الماضي وراح والحين الحي ابقى من الميت على قولتهم


يتهيا لي ان يوسف بيتعرض لملوك بس يعرف عناد بالحقيقه وينكشف سره عندهم
عاد ملوك يااما بتصوب عليه المسدس او تتصل بجسار بناء على طلب عناد منها
المهم بيكون فيه مصاب يااما ملوك او يوسف وجسار بيركب سيارة عناد وبيفتح الدرج
يبي يسعف المصاب معه باي شي وبيشوف الصورة ومنها بيتجه للطريق الصح في
كشف الحقيقه الي مخبيها الجميع كلا لغرضه الخاص
ادري ردي مخربط ومو مجمع صح بس والله من الدوشه الي عندي هذا الي طلع معي


قربت الحقائق تنكشف وكل ماقربت كل مازاد حماسنا اكثر واكثر ......
شوقنا في ازدياد لمعرفة النهاية وكرهي يزداد لمعرفتها لان في معرفتها
نهاية للقاءتنا وحواراتنا ونهاية لروايه من اجمل الروايات الي قريتها
يعطيك العافيه ضمضم وينولك كل الي ببالك واكثر قولوا آآآمين

رابطـــــ ياســــــــــــــر ـــــــــة