كاتب الموضوع :
وحيدة واهلي كثيرين
المنتدى :
القصص المكتمله
الجزء السابع والثلاثين ..
ببيت اهل شهد ..
عمتها :آييه ..
شهد :مسسستحيل ..
عمتها: لامهوب مستتحيل ..
شهد : طيب مين زوجته ؟
عمتها : مهوب يهمك هالشي ..
شهد تنرفزت: وشو مايهمني وأنا زوجته .. يكون بعلمك لو تجبين المره قدامي مااصدقك بـ عبدالله لان عبدالله مستحيل يتزوج علي..قبل ماتقطين الكلام ياعمه أعرفي مع مين تقطينه ..!
عمتها ارتبكت وسكتت..
شهد :وبعدين ياعمه والله عيب عليك هالحركات شوفي وش كبرك وشو صغر عقلك ..!
حصة : شهههد ..
شهد بحده : عمه احشمي البيت اللي واطيه بساطه ..
عمتها: كأنك تطرديني من بيت أخوي ..
شهد : ماطردتك ولا لمحت لطردتك .. لو بغيت أقولك برآ قلتها ولاحزت(وقفت) بحلقي .....
قطع كلام شهد دخله عمتها هيله وجدتها .. :هلا والله ..
وقامت وسلمت عليهم .. :تفضلوا ..
جلسوا ..
جدتها :شهد وراتس تسذا..
شهد جلست : وراي ياجدة .. شايفه الحال وهوانه ..!
جدتها لمعت عيونها :بيرجع لتس إن ربي كاتب له حياة ..
شهد هلت دموعها: جعلني ماذوق حزنه ..
عمتها هيله بحنانها: ياشهد ماله غايب عنتس الا اسبوع وذا حالك لو طول وش بيصير فيتس .. يابنيتي وكلي امرتس للخالق وادعي له..
شهد : آه ياعمه محد حاس فيني .. أنتم كل واحد وله ناس يملون عليه حياته بس عبدالله مالي الا الله ثم هو ..
عمتها : لاكن يابنتي محد يرضى بحالتس ذا ..
شهد وقفت : بروح اجيب القهوة..
دخلت للمطبخ وهي تمسح دموعها .. حضرت القهوة وغسلت وجهها :ماري جيبي الحلا..
شالت شهد صينيه القهوة وطلعت ..
جلست وهي تصب لجدتها وعماتها القهوة ..
جدة شهد : وراتس ياحصة ماجيتي معنا ..
شهد ناظرتها وتالي ناظرت جدتها وقالت : تبي ياجده تقولي عن زواج عبدالله ..!
جدتها مستغربة : مين عبدالله ؟
شهد: عبدالله ياجدتي مافيه غيره ربي يرده بالسلامة ..
هيلة: عبدالله معرس ..!
شهد : معك حق ياعمه كل هالتعجب من هالخبر ..
هيلة: عبدالله ولد اخوي متزوج .. هو يالله طاع واعرس على شهد ..
حصة وقفت وبعصبيه وطلعت وهي مفتشلة من عمرها وكذبها ..
شهد تناظرها : عمه لو فيك ذره احترام لمين هو تحت الثرى (تقصد أبوها) ماكان تسوين ببنته كذا ..!
ركنت رجلها بالطاولة ومهيب درراية وهي تطلع ..
امها تناظر وهي طالعه : مهيب صاحية ..
شهد تناظر الباب وهو ينصك بقوة وباين انها متضايقة من تصرف عمها ..
عمتها هيله : شهد لاتكدر خاطرك والليلة ليله عيد ..
شهد بحزن: عيد .. مااحس هالعيد عيد ..
العيد جا والناس حولي سعيدين
الا انا ماحس للعيد فرحه !!
وشلون ابهنا العيد ياقرة العين
والقلب من غيبتك مفتوح جرحه..؟
الا بشوفك يصبح العيد عيدين
نهدم جدار الحزن ونهد صرحه
اليا.تعانقنا بليا (قوانين)
بلا شماااغ ولاعبايه وطرحه..!
الله اكبرياعناق المحبين
حتى الفرح في وقتهاااصعب شرحه
نشرب شراب الحب كاسين كاسين
في صحتك مرحا لها لحب مرحه
والله لوكل الخلايق سعيدين
في غيبتك.. ماحس للعيد فرحه
.
.
.
ببيت ماجد ..
ماجد يضحك على سوالف بنته لما تحكي له عن البنات ..
وتين : هذيك تقرص خدي ..حتى شوف بابا ..(توريه خدها)
ماجد يضحك: خلاص بكرة راح اعاقبها ..
وتين : واشترو لي حلاو ..
ماجد: آييه هم طيبات ..
وتين : وخلوني العب.. لا هذيك خلتني العب ..
ماجد: نجد ..
وتين: ماعرف اسمها..
ماجد: كنتي بالمكتب معها وجالسة على الكرسي..
وتين: آييه ..
ماجد : اسمها نجد .. وتين تجين ننام ..
وتين :لا..
ماجد :فيني النوم من الصبح كرف ..
وتين :طيب بنام ..
ضحك ماجد على بنته ..وشالها لاجل يروحون ينامون..
ماجد يغطيها..
وتين : بابا متى راح تجي ماما..
ماجد :وتين ماما مشغولة كثثثير ماتقدر تجي ابدا ..
وتين :أبي ماما ..
ماجد ماقدر يقول كلام بنته متعلقه حيل بأمها وصغيره اهتدى انه يحتويها..
.
.
.
اليوم الثاني ..
عيد الاضحى ..
المزرعة ..
الكل كان طالع عدا شهد رفضت الطلعة ..
عناد :يمه لولا زعلك ماكان جيت.. اجل اخلي شهد وحدها..
امه: شهد برضاها .. ولازم تكون معنا .. ماصدقت ياعناد ماعندك رحلات وتعيد العيد لو مره معنا..
عناد باس راس امه : ولاتزعلين يالغالية ..
أبوبندر:بنت أخوك مفروض انها تطيع وتطلع ..
عناد: مالك بشهد .. هي حره نفسها ..
بندر قام لاجل غاده تدق عليه ..
أبوه: وين أنت رايح ؟
بندر: شوي وراجع..
راح لزوجته من جهه المزراع.. وكانت نجد جالسة لانها تكلم أبوها وتتطمن عليهم ومعها أخوانها طلال وزياد..
وبنفس المكان بندر وزوجته ..
بندر :ههههههههه لاتخافين لما تتعبين راح اشيلك؟
غاده تضحك: لا بندر بلاش تهور ..
بندر باسها وهو حاط يدينه على خصرها ويمشي معها .. :متى راح تشرف هالحلوه؟
غاده: خلاص هانت كلها كم يوم او سبوع الله يعين كل يوم احس اني راح اولد ..
بندر حط يده على بطنها : تقومين لي بالسلامة ..
.
.
.
سكرت نجد من أبوها وهي مشوشه فكر من سمعته ضحكته وكلامه وغزله لغاده ..
شفتك مع اللي صار عقبى حبيبك
واحتارت العبرة بعيني وصديـت
مدري هي الصدفة لدربي تجيبك
مدري أنا اللي في دروبك تحريت..
بس مشت الوضع لاجل ماتبكي وأخوانها حولها لانهم كلموا أبوهم كلهم ..
ياحبيبي يابو القلب الجليييد
كلّ عآم وإنت ناسيني \ وانا
كلّ عآم اذْكرْك وابدا من جديد
وكل ّ عآم اعيّد \ بجرح وعنآ
آآآخ .. ياطعم الحزن .. واليوم عيد
ودي ابكي { لكن اخواني .. هنآ ..!
طلال شايل ولده : عزوز ليه توصخ ثوبي ؟
ضحك عزوز..
طلال : يالدب ..
زياد : اقول رح بدل لاجل الناس اللي راح يجون على الغدا ..
ضحك طلال: ماعندي ثوب بروح اخلي وجن تغلسه الله يعينها..وتعال شف ثوبك كله دم ..
نجد ابتسمت: لا ياقلبها جابت لك ثوب وجن..
طلال ابتسم ومشى هو وولده ..
زياد: ريحه الدم لو تشوفه العنود حرقتني ..
ضحكت نجد ..
زياد ناظرها ومستغرب:نجد شفيك احس وجهك متغير ..
نجد ابتسمت: ولاشي .. تدري احس العيد ناقص بدون أبوي ..
زياد :ايو الله .. الله لايبين غلاته ..
نجد: آمييين ..
زياد :بروح اخذ شاور عقب هالذبايح ..
ضحكت نجد على اخوها :اوكي ..
مشى أخوها وهي تقدمت لناحية الحيونات الموجودة لاجل تشوفها..
.
.
.
غرفة زياد ..
دخلت العنود :هلا زيود..
زياد :اشتقت لتس ..
العنود جلست :هع ادري .. بس زياد بليز يعني خلك بعيد ليه كل ملابسك دم ..
زياد : لان كنت اذبح الاضاحي اضحيتنا واضحيه اهلي ..
العنود وسعت عيونها زود: أنت تذبح ؟
زياد ينزل ثوبه :آييه أنا .. منيب معبي عيونك ..
العنود: تعرف؟؟
زياد: آييه..ترى حنا بدو ..
العنود : ياهوو ..
ضحك :بجلس اهذر معك رميت الثوب بعيد لان كله دم..
العنود: بس ريحتك دم ..
زياد : لا عنود مافيه .. بجلس معتس وبهذر ..
ضحكت ..
اتفتح باب غرفتهم .. وكانت نورة :يؤ سوري مادريت ..
العنود كانت موسعه عيونها وتناظرها باحتقار ولاراحت النظرة حتى لما سكرت الباب ..:خير وش تحس فيه ؟
زياد يناظرها: ماعليك منها ..
العنود: لا علي.. خيرك تناظرك كذا..
زياد : وش يعرفني عنها ..
العنود: قله حيا وربي..
زياد لمها :بسس ريلاكس..
العنود بعدته عنها ومسكت يده : تقهر..
زيادابتسم وقال وهو يناظرها وعيونه بعيونها..
البنات ياحلوتي صلصال طين
وانتي..من جمال الطين العبقري!
بالحسن..مالك شبيه ولا وزين
مثل ماصاغ الجواهر ..جوهري!
بالحلاوه والغلاوه تفرقين
مثل ما يفرق فقير عن ثري !
اختصرتي في الجمال كل زين
يوم غيرك في جماله مهتري !!!
العنود ابتسمت له عقب ماارضى غرورها ..
زياد قرب لها أكثر ..
العنود :زيااااااااااااد..
زياد بجنون: هااا ..
.
.
.
جانب المزرعة ..
لمح بندر زولها وعرفها كيف يتوه عنها وهي مرسومة بخياله بكل تفاصيلها .. حس هاللحظه أنه مشتاق لها بجنون نسى انه متزوج وان نجد ماعادت تحل حتى لو ناظرها نظر بس ..
بندر: غاده حبيتي روحي للحريم بروح للرجال تلاقين الوالد يحتريني
غادة: اوكي ..
مشت معه الين قرب فيها للحريم داخل المزرعة ..وتالي رجع لنجد وشافها جالسه على اطراف رجولها وتأكل الارانب.. تردد وغالب شعور بداخله يقول خلها وابعد عنها البنت مهيب لك بس شعور ثاني عكس وغلب شعوره..
شهقت نجد لما حست بشخص مسك يبدها وقومها ..
بندر : بجد بجد بجد مشششششتاق لك ..
نجد كانت ترجف وصوتها يرتجف: بــ ـ ـعـ ـد ..
بندر قربها لصدره أكثر: ليه ترجفين ؟ أنا أبيك ولازالت احبك..
نجد دفته بس مقدر: بعععععععععععععد ..
بندر بهدوء: محد راح يسمعك ..
نجد دمعت: بندددر أنت غبي ماتفهم فكني ..
بندر بجنون بعش وله شوق حب :لا مافهم لاني طلقتك ..
نجد : مالنا نصيب مع بعض ..
بندر: لا انكتب لنا نصيب مع بعض بس أنتي رفضتي عقب السالفة..رفضضضتي ..
حط يده على رقبتها وثبتها وجهه بوجهها ..
نجد صرخت فيه :لاآآآآآآآآآآآآآآ ..
بندر ماسمع لها ولا لصراخها ورجفتها وبكاها وتقطع صوتها اللي كتمه بأنفاسه .. بعد عنها وهو يأخذ نفس:آخيراً
نجد تهاوت من يدينه على الارض وهي تبكي وتمسح فمها بتراب من قرفها منه ..
بندر سحب يدينها :نجججججد خير تمسحين بتراب..
نجد بقرف وهي تصرخ فيه :لاننننننك نجسسسس حقير خاين كذاب ..
بندر: آييو كملي..
نجد تدفه وتضربه على صدره بيدينها المليئة تراب : حقققير كثثير وواطي ..
بندر مسك يدينها وقرب منها : لييه كل ذا ..!
نجد وقفت ونفضت يدينها من التراب ومنه : جعلك تشوفها بأغلى ناسك..
بندر كان جالس وقف :الله يانجد كل ذا لاني بس سويت كذا ..!
نجد : صرت اكرهك كثر اليهود..
بندر ابتسم بثقه: كذابه مابقلبك غيري ..
نجد باحتقار : أنت من بقايا الامس .. وكان باقي لك آثر بسيط بذاكرتي بس وأشكرك خالص الشكر الجزيل انهيت كل شي بداخلي لك ..
يا بقايا الامس دام إني نسيت
ما أبي يبقى اثر من ليل فات
ودي اكمل دربي اللي قد بديت
بالأمل اشوف فيه الفرح آت
صورته بالعين نادني وجيت
رافقتني في طريق الامنيات
كل صبح احيا في نوره لقيت
يمسح النسيان سود الذكريات
كم ليلٍ بالأمل خلاه ميت
وكم من الخطوات تحير مقبلات
يا بلابل رددي في كل بيت
رددي ليل الألم والخوف مات
بندر كان يناظرها وهي تتكلم .. دفته وكملت: يكون بعلمك مافيك ذره رجولة دامك رضيت تتصرف هالتصرف ببنت عمك وهي محرمه عليك حسافتي بس أنك كنت بيوم تعني لي شي وعديتك شي وأنت ولاشي..!
مشت عنه وهي تمسح دموعها وتنفض التراب من وجهها لانها ارتضت التراب وحفتنه على وجهها اهون من شي من بندر عليها ..!
بندر جلس على الارض وهو ساند ظهره للشبك ويناظرها ..اختفت عن نظره وجلس يفكر وهو مضيق عيونه ويسترجع اللي سواه لها جلس وقت واستوعب سواتها :ليييييييييه سويت كذا ..!(قالها وهو يضرب بيده التراب بقوة ) ..
.
.
.
دخلت نجد مع باب الفيلا الخلفي وتسللت لغرفتها بسرعة لاجل محد يلمحها ..دخلت وصكت الباب أكثرمن مره بالمفتاح وهي تبكي وركضت لاجل تغسل وجهها .. غسلت وجلست وهي تبكي وترجف من تصرفه الامبالي ..
.
.
.
بريطانيا ..
كانت سارة مع أبوها اللي وصل للصبح للندن ..
أبو طلال: اجلس يافارس ..
جلس فارس وكان أبو طلال مقابلهم ..: ممكن اعرف وش اللي فيكم ؟
سارة : هو السبب..
أبوها : طيب السبب بـ وشو ..
سارة ناظرته: تكلم ..
فارس خزها..
أبو طلال: كل واحد منكم يحترم الثاني وش هالكلام والنظرات بينكم..
فارس: هي عنيده..
سارة : وهو لسانه يجرح ..
أبو طلال : كيف يافارس هي عنيدة؟
فارس: اقول أي شي تسوي عكسه .. آخرها امس اقولها بدلي الملابس لانها مهيب مناسبة ورفضت ..
سارة : وأهو كل مره يمد يده ..
فارس : لانك أنتي حديتي ..
سارة: والمره اللي فاتت.. يابابا صار يضرب على أي شي..
أبو طلال : أولا مفروض ياسارة تطيعين زوجك .. وحاولي تناقشينه سبب رفضه للشي ذا .. وأنت يافارس تشوف أنه حل تضربها تصرفك غلط وأكبر من غلط سارة ..
فارس: هي تستفزني ..
عمه: كيف تستفزك ؟
فارس: زود على العناد امس قالت لي تخسى ولاجل كذا عصبت وضربتها ..
سارة : وناسي كلامك قلت اني مو متربية ..
أبو طلال يناظرهم وكل واحد يقط كلام الثاني عليه والمشكلة محد منهم منكر كلامه او متأسف عليه ..
أبو طلال : تبون الصدق كلكم غلطانين .. سارة عنيده ولسانك مفروض ينمسك لان هذا زوجك .. وفارس مأخذ قوتك وتضربها .. اهجرها ببترك عنادها ..
فارس :اصلن كلن منا بحاله ..
أبوطلال مستغرب: كيف كلن منكم بحاله ؟!
فارس: لي غرفتي ولها غرفتها ..
أبو طلال ناظرهم شوي وقال: مدري احد لاعب عليكم ..!
فارس حس عمه يتطنز عليهم :ليه؟
أبوطلال: الحين ليه كل واحد بغرفة .. ماتستحون على هالحركات ..
دنقوا اثنيهم وسكتوا..
أبوطلال: اكبروا عن هالحركات كل واحد بغرفة وكلن واحد يقط كلام مايثمنه وكل واحد يضرب .. صغار أنتتتم ..أنا مازوجتك يافارس الا ومتأكد أنك من خيار الرجال وراح تحفظ سارة وشف اني زوجتك وخليتها تسافر معك لاجل مطمئن عليها دامك زوجها .. وأنتي ياسارة ذا زوجك قدريه واحترميه ماعتقد شفتي أمك تعاند معي هالعناد والتصرفات.. اسمحولي أنتم الاثنين تصرفاتكم تصرفات مراهقين ..!
محد منهم تكلم ..
أبو طلال: اسمعوني أولا اساس كل شي الاحترام احترموا بعضكم مهما يكن .. راح تقولون من هالكلام مانحب بعض الحب مايجي كذا الحب يتولد مع العشرة الطيبه .. ثانيا كل واحد منكم بغرفة مايرضاها الله سبحانه وتعالى وعليكم ذنب واثم غرفة النوم الرئيسة اللي ناقل منها يرجع لها .. مين اللي طلع منها للغرفة الثانية ..
فارس يأشر عليها ..
أبو طلال: سارة كل أغراضك ترجع للغرفة وتطيعين زوجك اتركي العناد يابوي ..
سارة: هو السبب .. بابا مايبيني ..
فارس بسرعة: ورب البيت أبيها وأحبها ..
سارة : آيييه بس قدام البابا ..
أبو طلال : سارة قومي انقلي الاغراض لغرفتكم الرئيسة ..
سارة:لا..
أبوها :سارة قومي يابوي ..
سارة: اصلن مابيه خلاص برجع للرياض..
أبوها : يابوي الدنيا مهيب من أول هوشه تروحين للرياض ..يابوي الحياة يبي لها صبر وطولة بال ..وتوكم ببداية حياتكم ..اصبروا على بعضكم أول سنة زواج لازم يكون فيها صدام بالشخصيات بس الناس الركداة تعرف كيف تكسب بعضها .. قومي يابوي انقلي كل أغراضك لغرفتكم ..
ماقامت وتكتفت وهي مرجعة ظهرها على الصوفا ..
أبوها :افا ياسارة ماتطعين البابا..
فارس انقهر منها ومن عنادها ودلعها والادهي تدليع عمه لها..
أبوها: سارة ..قومي يابوي ..
قامت بعد وقت ..
أبوها: شاطرة بنيتي .. فارس قوم ساعدها ..
فارس قام معها ..
أبو طلال :الله يهديكم ..
بالغرفة ..
سحب فارس الشنطة ولمت سارة بعض أغراضها وحطوها بغرفة نومهم الرئيسة ..
أبو طلال وقف وهو يشوف باقي أغراض ونقلها لغرفتهم ..
سارة :خلصنا..
أبوها ابتسم: الحين اقدر اقول بداية حياة ..
دق جواله وقعد يكلم ومن كلامه قال ان رحلته العصر..سكر..
سارة :بابا راح تسافر؟
أبوها مسك كفها:آييه يابابا ..لاجل عبدالله الليلة عمليته وودي اكون متواجد ..
فارس يمشي مع عمه ويجلسون بالصالة: الا كيف عبدالله؟
عمه: نقول ان شاء الله انه بخير والليلة مع العملية ان شاء الله يصحى..
فارس: ان شاء الله..
سارة : طيب وين العملية؟
أبوها: بالراس ..
سارة: الله يحفظه..
فارس كان يناظرها وهي عناد فيه تتعمد تتكلم عن عبدالله ..
فارس:سارة ماراح تضيفين عمي ..
سارة ناظرته وقامت..
أبو طلال انتظر الين دخلت للمطبخ وقعد يتكلم مع فارس بينهم :ياولدي تصرفك وضربك لسارة لاتكرره .. مهما يكن لو غلطت عليك كلمني أنا وراح اكلمها أو أجي لكم.. طول بالك وأنت الرجال.. وترى سارة متعوده على الدلع مني ومن أخوانها وامها ..
فارس: لاتزعل مني ياعم ..وآخر مرة ان شاء الله ..
ابتسم أبو طلال لفارس وكبر بعينه اعتذاره عن غلطه واعترافه فيه..
.
.
.
|
12-10-10, 07:44 PM
جديد مواضيع قسم القصص المكتمله
العرض العادي
