كاتب الموضوع :
ترنيمه عشق
المنتدى :
الارشيف
رنوم اكتب التس ردي وانا لابسه برقعي من الفشيله قدامتس مستحيه منتس مررررررررررره
خاصه اني اقراء ابداعتس واول ماينزل البارت ولا ارد عليه وكاتبه مثلتس مستحيل يقراء الواحد لها ومايرد على ابداعها ويعلق عليه
وان ماقريتها الا من البارت تقريبن التاسع وخاصه اني قاريتها وانا باخر الحمل وماقدر اكتب الرد اللي يبرد خاطري
وكل بارت اقراه في بطني كلام وشكثر واقول برد ان شاءالله رد سنع واكون فاضيه له لكن مجرد مااحاول ارجع واكتب ماقدر اكتب ولا كلمه تبرد قلبي
واليوم قلت استحي يبنت مابدهاش الروايه بتخلص وانتي مارديتي الرد اللي تبين<<<<<فيس يقول مبسوطه من نفستس توتس تردين شين وقوة عين
ذي روايه ولا تحفه فنيه ولله يرنوم ان استمتاعي بقرائتها يفوق الوصف واللي يحليها زود ارتباطتس فيناوالتزامتس بتنزيل الاجزاءلاني ادري
ان كثير منكم يضغط على عمره عشان يلتزم مع القراءوالله مالتس
علي حلفان اني اقد الكاتبات اللي منذا النوع وغصب يكون لهم مكانه وقدر بقلبي واحتررررام
بحاول يكون ردي شامل ورايي في الاشخاص بما اني اول رد اكتبه في الروايه تحملي هذري
اول شخص بتكلم عنه شخصيه بصراحه عرفتي ترسمينها صح وتخلينا حنا القراء نحترمهااكثر من اهلها الشيخه حذام
رنوم قبل ماعلق عليها بعلق على اسمها وشذا الاسم الخقه روعه اسم حذام حطيتيه براسي انا بصراحه احب الاسماءالرنانه ولا ارتبطت بالرعد جد اسمائهم خقه
حبيت علاقتها بافراد اسرتها من عم وبنات عم واخوان كانت لهم صدر حنون ورحب الشكاويهم
بس تدرين حذوم شلت عليتس شوي بموقفتس من رعد فيه وحده تشوف احد يحبها كل ذا الحب وتشوف نفسها عليه
مادري انا من بديت القرائه وانا احستس تحبينه بس شوفتس اللهفته عليتس خلتس تكبرين عليه وتقولين اكيد اني احسن عنه واستاهل احسن
لكن ابو الرعود مايائس حاول لين خذتس
اعجبني كثير وصفتس اللقاء حذام ورعد بليلة زواجهم وكيف كان تعامل حذام مع رعد وكيف كانت بليلة زواجها اللي البنت تعمل لها الف حساب وتخاف منها خوف خيالي بينتي ثقة حذام وشلون كانت كبيره بنفسها
وغير كذا صورتي لقائهم بقمت الروعه فيه جرائه غير متصنعه مع حيا فطري غير مبالغ فيه بصراحه قمة في الابداع زود اعجابي فيتس اكثر واكثر
ورتباك رعد وحفوزه من لقاء حذام ولله انك سوالف يارجال ولا يوم شاف ان البنت ماربكها الا القاعه والزفه وشوفت الناس وان وجودها معه ولقائه به ماسبب لها اي خوف توقع ان البنت ابد ماعندها خلفيه عن الزواج
وانتي حذوم ماشاءلله عليتس خليتي الرجال يظن انتس قطه مغمظه ماتدرين بسوالف الزواج وردتس يبنت خطير بنت بسني ماتعرف الاشياء هذاي صدق سهلتي على ابو الرعود المهمه
سالفة جود وشهاب بجد خوفتني ماتوقعت الاغتصاب حتى بعد كنت متوقعه ان سبب لعبه بنات الناس وصياعته بتنقلب عليه في اخته لكن بجود المسكينه وخرب على خالد
حبيت تعامله مع جود حلو انه ياخذ كل كلامها مزح ويصر على رايه معها صدقيني لو عاملها وخوف عليها وراعا مشاعرها وانكسر من كلامها ماراح يصلح حالهم
اتوقع حياة جود وشهاب في الغربا بتربطهم في بعض اكثر وبتخلي جود تعلق بشهاب وتحبه خاصه اذا تكررت حالته اللي شافته وعرفت قصته
خايفه نهاية حمدان الموت ياخوفي يخبي حمدان عن اهله الدم اللي يطلع من اثمه ويستفحل المرض ولا يعرفون فيه الا اذا تمكن منه
تدرين رنوم ان اتوقع ان حمدان تفاجاء من شهد يوم شافها في الملكه يمكن يكون شافه في المكان اللي كانت تشتغل فيه او حصل بينه وابينها موقف وهي ماتذكرت عشان كذا مابغى الزواج الا لين يتاكد من شكوكه
ياترا هل الورقه اللي ارسلها حمدان الشهد هي ورقة طلاقها ولا استفسار منه الشهد عن وضعها السابق بشغلها يسئلها ويشوف بتكون صادقه وتجاوبه ولا بتغبي عليه
تدرين رنوم اصلح شخص يتزوج شهرزاد هو خليفه لا ادهم ولا يوسف
اول ادهم ابد مهوب جوها الرجال يبيله مره تقول له لبيه وان شاءالله وتمشي على شوره وغير كذا هو يشوف ان شهرزاد بنته اكثر من انها بنت عمه يعني اكس عليه مايصلح زوج
يوسف ابد مايصير اول شي انه يحب موزه ومايقدر ياخذ غيره وثاني شي الفرق المادي بينه وبينها وخاصه انها بنت شايفه نفسها وماراح ترضى ان واحد مثل يوسف يكون زوجها
نجي الخليفه بصراحه هو افضل واحد يكون زوجها خاصه ان الكل يمدح فيه وهو اللي يرضي غرورها مركز وجاها وفلوس ويمكن شخصيته تكون قويه وتنجذب له خاصه ان اللي عجبها في الادهم هو شخصيته القويه
بالعربي شهرزاد تتعلق وتفكر بكل رجال يكون له دور بحياتها وخليفه بيحتل اكبر دوربحياتها وراح تتعلق فيه وتشوفه لا ادهم ولا يوسف
لبي قلب البرائه اللي ذبحوها وينتس يعجوز قريح عقيتي البنت على الرجال ثم راح دورتس يالله حليها الرجال بيتزوج حنان ويكسر قلب ذا الضعيفه ولا شكل حنان بتوريها بعد كيد الحريم رايحه لها تقول ان الرجال مايحبون البنت اللي ترقص الله ياخذتس هذا وانتي مابعد جيتي عنده في بيته وشفتي تعامله معها تدر ين رنوم تمنيت انتس بينتي ردة فعل فهد
يوم قالت له ريما كلام حنان يوم الزواج وشكان رده يعني واضح في كلامها اللي قالته قمة الحقد والحسد منها
لبي قلب ريوم قطعت قلبي بنت بلادي حبيتها وحبيت طفولتها وبرائتهاوذكائها وملحها اللي معطي الروايه طعم خاص ذبحوها وهي حيه
واولهم وليد والعجوز لا تقعد تلوم الرجال على اللي سواه انا ابد مالوم فهد اللي اوله شرط اخره نور هو من البدايه قال لهم اذا تزوجت ريما تعطوني عقب حنان وافقدت الجده على كلامه بس اللي عبته عليه ليش ماقال الكلام هذا الوليد المفروض انه قال الوليد انه بيتزوج حنان وان جدته اعطته القبول يعني الامر مفروغ منه
وبعدين ياوليد باي حال من الاحوال البنت المفروض ماتزوجها بذا العمر ابد وش يضر لو صبرتو عليها اقل شي سنتين ثلاث لين تصير 14او15 كثير مثلها فتحو بيوت وهم بذا العمر وريما صدقني راح تنجح خاصه انه سابقه عمره بس البنت الا الان مابعد بلغت ولا تعرف فذا الامور
اتوقع ان فهد ماراح يتقبل حنان خاصه انها نقيض ريما ثقيلة طينه وريما مرحه بيشوف الفرق بين حياته مع ريما وشلون حلوه ومعطيه لها طعم وحياته مع حنان اللي بتكون ممله وبيزود عليها انه بيكتشف الجانب السيء فيها اللي ماكان يعرفه لانه بتبين له غيرتها من ريما وبتحاول تسع في طلاقها
لكن اللي بيصدم فهد ريما الا كبرت اتوقع في الفتره اللي بتغيب فيها ريما عند اخوها بتتغير بكم شهر وتظهر عليها علامات الجمال
بعد البلوغ اللي بتبهر فهد اذا شافها وفذا الحاله ياللى ياريوم املي شروطتس على فهيدان وجدة فهيدان
حلوه شخصية شباب العائله حبيت خفة دمهم ولله ان ملحهم غطا على البنات بجد رنوم ليش عيالهم اخف دم من بناتهم حارب وخالد وسعود بصراحه روعه احب سوالفهم خاصه اذا قام كل واحد منهم يذب على الثاني
ياترا رنوم من راح تزوجين غزلان سعود ولا ناصر ولا وليد لا وليد راح ياخذ اسيل مع اني متمنيه له غزلان بما انه سعودي التربيه فانا راح اخطب له
تدرين عليتس انتي رنوم ولادهم طلعات يمكن تزوجون ناصر غزلان عشان تعدلونه ولله ماينقال عليكم
الله يعين قلبك ياحارب على الدلوعه رهف ولله اني متمنيه لك وحده اركد واعقل بس وشنسوي فيك انت واخوك بتمتون على بنات محمد
اتوقع حياتك ماراح تكون اللي انت تبي لان البنت تفكيرها سطحي الا اذا وفقتها في اللي تبي وغيرت لبسك وطريقتك ورحت معها للاماكن اللي تبي يعني بالعرب صرت دجاجه كشخه لانك بصراحه منتب جوها
اللي صار الرهف من زايد اهنيتس رنوم على التطرق المثل هذا الموضوع لان ولله كثير مايدرون ولا ينتبهون كثير انتشر زنا المحارم بشكل ماتتخيلين زوجي يعرف واحد في المحكمه يقول ان واحد معتدي على خالته
وهي متزوجه لانها جت البيت زايره اختها وعليها لبس اغرا الولد وامه وخواته مهوب موجودين وصار اللي صار والخبله علمت زوجها وهي توها عروس والرجال شكاه في المحكمه ويوم خذ الولد جزاه طلق البنت البنت تسرعت انها علمته المفروض استرت على نفسها وعلى ولد اختها وخلت احد احكم يحل الموضوع في النهايه اخسرت حياتهالان زوجها قال معاد اقدر اعيش معها اتذكر فعلة ولد اختها الله يستر علينا وعلى بناتنا يارب
رنوم الله يوفقتس يارب ويجزاتس خير على الروايه اللي بصراحه روعه قليله عليها اهنيتس على الروايه من ثقافه ومواضيع مطروحه فيها وحوار روعه يجذب القارء
ومع هذا كله الالتزام الكبير اللي ممتعتنا فيه على زود استمتاعنا لله درتس يبنت زايد على ذا التفوق الكبير حبي وتقديري الشخصتس رنوم احبك فالله <<<<<فيس يقول خلاص البنت استحت من مدحتس
وانا اقول للفيس تستاهل اكثر
|
01-10-10, 12:36 PM
جديد مواضيع قسم الارشيف
العرض العادي
