الجزء الاخير


دخلت اخر لبسة لي بجنطة السفر...وانا اسمع صراخ وحشرة تحت...بس طنشتهم..ما صدقوا خلص العزا وهم بدوا الضرابه..حد يسمع يضاربوا على الورث....امس كان ثالث يوم عزا...والمفروض اليوم هو يوم ملجتي على سعيد..بس انا يبت الموضوع من قاصره..لميت قشاري وبسافر عقب 4 ساعات...بس انا بسير المطار من اللحينه ..ما فيني على مشاكلهم هذوله...اول ما وصلت الطابق الارضي..جفت الدنيا مقلوبه فوقاني تحتاني..كل واحد يصارخ على الثاني..ركزت نظري على بنت عمتيه..يمكن شدني دموعها...وعمتي لاويه عليها...جفتهم كلهم صخوا لما جافوني...واستغربوا اكثر لما جافوا الجنطه...
العم:وحضرتج وين سايره
اسماء:سايره عند اخويه
العمه:شو ...ووصية يدتج
اسماء:مب مضطرين تنفذوا وصيتها
العمه:هاي وصية ميت...تعرفي شو يعني وصية ميت يا بنت لندن
اسماء:واذا الوصية تسبب كل ها المشاكل بلاها
العمه:مب على كيفج..طول عمري عشت وانا ابى رضى امايه..تين انتي بالنهاية تحرميني من رضاها وهي ميته..لا يروح فكرج لبعيد...مب من حبي لج...لا..بس يدتج رابطه عرسج برضاها ...
سمعت بنتها تصرخ بصوت عالي وتقول امايه بس يكفي
اسماء:ما ظنتي اليواز بالغصب
حملت جنطتي وسرت صوب الباب...على قولتهم ضربت بصراخهم عرض الحائط..بس قبل ما اوصل للباب...حسيت ايدي بتنجلع...منو الدفش الي زخني جي...لفيت راسي وجفته سعيد..شو تخبل ها...اشقايل ييود يدي ...
اسماء:قوم يدك من يدي...مالك حق تزخ يديه سامع
سعيد:بيكون لي حق عقب ساعه...
اسماء:شو عقب ساعه...اقول سير توكل ...وخلني اتوكل بحال سبيلي
سعيد:ها كله بحاسبج عليه عقب..بس شرا ما قالت عمتيه...اهم شي رضى يدواالله يرحمها اللحينه
اسماء:اللحينه بس تبون رضاها...وينكم وهي عايشه
سعيد:صخي..انتي اخر وحدة تتكلم بها الموضوع...طول عمرج عايشه بعيد عنها...ولما يتي ضيعتي الدنيا
انا فاهمه شو يقصد...قصده ضيعت من يده حبيبة قلبه...بس ولا على بالي
العم:قر بمكانج..وايد عاييبنج موضوع الكل يذل لج...خلصينا ..مب من حبنا لج
والله حاله..كل واحد يقول من صوب مب من حبنا لج...حو حد قالهم هذوله اني ميته عليهم...يودت مقبض الباب ويت ابطله...بس جفت عميه ياي صوبي وويه المليان كره وحقد...
العم:والله ..وان جفتج شابره بره ها الباب ...ليكون تجوفين شي ما جفتيه بعمرج كله ...سامعه يا بنت اخويه
بنت اخويه...انت تعرف يعني شو اخو...تعرف يعني شو عيال اخو...مب كنت يايه اعطى لتهديده اي اهميه ..لولا نظرة عمتيه وهي تترجاني..اعرف مب علشاني ...اعرف انها يالسه تتقطع من داخلها علشان بنتها...بس رضى يدوه...ويت صورة يدوه وهي ببالي ..وتذكرت انها حلفتني اني اوافق على شرطها ..اشقايل نسيت انها حلفتني بالمصحف..شكلها كانت عارفه اني مب يايه انفذ شي مب مقتنعه فيه...رديت ويلست على الكرسي...سمعت سعيد يقول لعمتيه ..انه الملجه اليوم بالليل وانه مستاجر شقه ...لانه بيته مب ياهز بعده...يعني شو.. الكلام لج يا جاره ...يا ربي شو هاي الوهقه...اشقايل بعيش مع واحد وانا متاكده انه يحب بنت عمتيه ...

يلست اتجوف من شباك غرفتيه...الله مناظر وجو يرد الروح للواحد....الله لو كان ها الجو والخضره ببلادنا جان ما شبرنا بلادهم....تولهت على بلادي وعلى اهلي...وعلى يرانا ..وعلى كل شخص ببلادي...اثريها الغربه مب حلوه من غير الاهل ...يودة صورة اهلي الي حاطتنها حذال شبرتيه ...يلست اجوف صورة ميعاد..شو يالسه تسوي اللحينه ...اليوم ثالث يوم من سارت بيت ريلها ...تذكرت اشقايل زياد يلس يقنعها يمكن حوالي ساعه ..علشان تسير بيت ريلها ...وبين كل كلمة وثانية يذكرها بسلطان وانه يتيم ويلس يذكرها بجوري...وانها كانت يتيمة واشقايل امايه ربتها وكسبت اجر عظيم ...وقالها مب لازم تحتكين بريلج اللحينه تفاهمي وياه ..وخذوا وقتكم لحد ما تتاقلموا مع بعض ..واذا ما تفاهمتوا لج حرية الراي ...وشكلها يلست طول الليل تفكر لانه باليوم الثاني قررت تسير بيت ريلها ...سمعت صوت مسج من تلفوني توقعتها اميرة ...كنت ناويه اقول لحمد يجوف صرفة معاها ..لانها حتى وي معانا بالسفرة هالكتني بنغزاتها ..انا مطنشتنها بس وايد زودتها ويبالها حد يوقفها عند حدها...جيكت المسج وجفته مب من عند اميرة ..كان حمد ..ومطرش...ارحمي على قلب ما عشق غيرج ..وما رقد الا على ذكراج...مب لازم تتكلمين يكفي علي اسمع صوت انفاسج...ملجتنا كانت امس ...كانت عائليه...صج لبست فستان وتكشخت تقولوا عرس مب ملجه..بس مب مني من حنة سارة وجوري وميعاد.....والمفروض انه حمد يدخل بس انا رفضت ما ابى احتك فيه اللحينه ..ورانا مشوار طويل يا حمد لحد ما اتقبلك...حتى واحنا بالمطار ما تكلمت معاه ...كنت مع البنات ...بس متجنبه اميرة كليا ...كنت شويه اصفعها هي وخليفه الماصخ...ما رديت على حمد...ويلس يرن لحد ما سكر ...ووصلني مسجات متواصله ...بس يلست اكمل تاملي للطبيعية ...وطنشت المسجات

شكلها ماخذه بخاطرها مني لحد اللحينه..حاولت اكلمها من امس بس هي مب راضيه ترد...لا على اتصالاتي ولا على مسجاتي..ما ادري تغلى ..ولا بعدها زعلانه...امس كنت اسعد مخلوق بالدنيا ...اخيرا جمان صارت لي ...لو تزعل عشر سنوات جدام مب مشكله اهم شي تزعل وهي معاي ...لاني اقدر اراضيها بطريقتي...حتى بالمطار حاولت اكلمها بس هي ضلت تتهرب مني جني باكلها ..كنت ناوي اسير اكلمها باي طريقة ..بس لما جفت خليفة...كنت ناوي اصكه بكس...بس سرت صوبه ..وبالغصب سيطرت على اعصابي ...تصدقون لما واجهته ..قال وبقواة عين ...اني كنت منافسه الوحيد بالكلية ...لحضه يعني هو كان يبى يكون اكاديمي ..معيد بالكلية ...بس انا كنت الاول بالدفعه..بس انا كنت مستحيل اصير اكاديمي ...مب من النوعية الي اقدر اوصل المعلومة للطرف الثاني بسهولة...وكان يبى يشغلني بمشكلة جمان ..وانسى الدراسة ..بس تجري الرياح بما لا تشتهي السفن لاني وبالرغم من الحالة النفسية الصعبة الي كنت امر فيها الا انها ما اثرت على دراستي...حتى لما حصلت اوفر اني اكون معيد رفضت ...وهو اختاروه من عقبي لانه هو الي كان الثاني على الدفعة...حشى مب اوادم وحوش..ومب عالم عايشينه غابة...حتى اميرة احسها وايد يالسه تتمادى بتعاملها مع جمان..يالسه تستفزها..بس هاي اعرف اشقايل اتعامل معاها...باجر عقب الكورس بكلمها..وبعطيها شغلها ...قصورها تغلط على جمان وانا حي....

سرحان بعالمي وافكر بالي معايه بالبيت..الي كل تعاملها مع سلطان وانا جني الا لوح من بينهم...حتى سلطان اول من يت ميعاد وهو ما يسال عني ...اما هي جنها جسد من غير روح..جنها روبورت يتحرك م من غير مشاعر...حتى شغلها قدمت استقالتها ..ما اعرف ليش كل ها..ما توقعتها ضعيفه جي وتهتم بكلام الناس...اذا انا بروحي سامعهم يتكلموا عنها بسوء...والي زاد عليها ..انه كل القضايا الي كانت ميودتنهم ...انسحبوا اصحابها وساروا عند محاميين ثانيين...علشان جي هي استقالت...وايد راحمنها..نفسي اخفف عنها ...مهما كان هي حرمتيه...صج اني ما اكن لها اي مشاعر غير الاحترام...بس عندي احساس اني راح احبها لو هي عطتني مجال..لانها تنحب..والدليل حب سلطان لها...بس هي بغرفتها نادرا ما تظهر منها ...تبدل لسلطان وتاكله وتلعبه وترد غرفتها ...مرة وحدة بس نزلت تحت..وامايه غسلت شراعها لحد ما قالت بس...وانج خطفتي ولديه ..ومن ها الكلام...وهي على طول سارت غرفتها....حاولت افهم امايه واقنعها انه مب جي ..تراها في النهاية حرمتيه وانا اخترتها واخذتها بارداتي ...مب هي الي خطفتني وما ادري شو ...رفعت راسي اجوف الي يالس جدامي..والله حالة متيميعن انا وهو ..وكل واحد لاهي بعالمه...انا بعالمي مع ميعاد...وهو بعالمه مع بنت عمته ...
سالم:حو يا الاخو...وين وصلت
سعيد:مب مكان..جاني يالس جدامك
سالم:يقولوا انك يالس جدامي...بس عقلك ما ادري وين
سعيد:تصدق سالم...ما احس عمريه عرست...طول عمري حاط ببالي الي بتكون حرمتيه هي بنت عمتيه ... اشقايل احذفها من هنا ..واشر على قلبه
سالم:بتقدر تنساها...صدقني وانا اخوك...بس انت لا تفكر فيها كثير وبتنساها...الا بسالك بتسكن بيت اهلك
سعيد:اتخيل عمريه ساكن بيت اهلي ...امايه وخواتيه طول اليوم بيتناقروا معاها ..ولا هي قالب ثلج ...ما راح تتاثر...فبريح عمريه من صدعة الراس..وباجر شقه..تعرف البيت بعده مب جاهز باقله التشطيبات النهائية
سالم:خير ان شاء الله...انت بس تفائل بالخير...
سعيد:الله كريم...

خذيت جنطيتي ..سرت معاه للسيارة ...سرت وانا احس بشعور غريب..شعور بالوحدة...باليتم....طول عمريه اتمنى اخويه يكون معاي بهاي اللحضه...سندي بالدنيا ..بالرغم من كل شي سواه فيني الا اني اباه اللحينه ...اباه يكون معاي...وصلنا لعند بنايه وسمعته يقول وصلنا ولا تبيني افتحلج الباب مدام اسماء...
طنشته ..ويت اخذ جنطتي..بس هو سفهني وشل الجناط...سرت وراه...واول ما وصلنا الشقة حتى ما مداني اجوف عليها ..قال اباج بكلمة...
سعيد:اباج تفهمين شي واحد...انه بنعيش مع بعض شرا اي زوجين بينا الاحترام...الاحترام فقط..اما الحب فها شي صعب نوصله على الاقل من طرفي...واهم شي اباج تفهمينه ..اني ما ابى يهال اللحينه ...يمكن عقب سنه ..ويمكن مب من
وقطع كلامه...كمل عادي...على بالك بتاثر فيني ..ولا على بالك اني بصيح علشانك ما تحبني..انا عشت مواقف اصعب عن جي..وها شي متوقعتنه منك..بس دامك جي مب طايقني وتبى قرب حبية القلب...ليش تبانى نعيش شرا غيرنا من الازواج...
اسماء:وبما انك تبى عيال من الي بالي بالك...ليش تبانى نعيش شرا غيرنا من الازواج..عادي عقب ثلاثة شهور طلقني وسير خذها ..وانا برد عند اخويه
سعيد:وايد تحلمين انج تسيرين صوب اخوج...وبعدين ها حقي وانا حر اتنازل عنه ولا ...وانا تعبان وابى ارقد ...
حمل الجناط وسار صوب غرفة كانت على يميني شكلها غرفة النوم..سير ارقد وحد ميودنك...بسير استكشف الشقة شو ورانا ..بس سمعته يزقرني ويقول مطوله وانتي تتاملني الشقة ...

غريبه زياد لحد اللحينه ما قال شي ...ولا تصرف تصرف يدل انه ياي يبى ياخذ حور...بس الي عرفته من سارة انه حرمته اجهضت ثلاث مرات وقالولها انه عندها مشاكل بالرحم فمن الصعب انها تحمل مرة ثانية...ورجوعهم بعد ما اجهضت بشهر دليل انهم يايين ياخذوا حور...خاصة على كلام المحامي انه حضانتي لحور تسقط مجرد ما عرست ...كل يوم ارقد على كابوس واصحى على كابوس...ومن يوم ما يى زياد البلاد ..وانا ارقد حور معاي...بس هي لازم كل ليلة تنش وتصيح تبى سعود...وهو يى وياخذها ويرقدها بغرفته....الحمد لله انه زياد استاجر شقه ولا انا كنت اتجنب كليا السيرة لبيت اهليه ..ما ابى اجوفه...الله يستر ..سمعت سعود يزقرني ويقول سرينا ...سايرين بيت اهليه ...بسير ابارك لسارة ...اخيرا قررت تحمل..والحمد لله انها حامل ..عاد لو تجوفون فرحة ناصر ..تقولون اول بيبي ...وصلنا البيت بس جفنا سيارة زياد...شكله هنا ...جفت سعود يجوف علي ..بمعنى صعدي فوق ...سرت صوب غرفة سارة بس قبل ما اصعد فوق ..جفت زياد وحرمته بالصالة ..حور اول ما جافت ابوها سارت صوبه ...اما انا سلمت وصعدت فوق...وانا يالسه اسولف مع سارة ..سمعنا صوت الباب وكان ناصر ..شكله ياي من برة..انا استاذنت ونزلت تحت ..بس سمعت صوت صراخ وحشرة...نزلت ركض ..وسمعت الصوت ياي من الميلس...ها صوت سعود وزياد ...بس شو ها الكلام الي اسمعه ...يلست اجوف عليهم من باب الميلس المفتوح شويه..جفت سعود زاخ ناصر وراصنه على اليدار ...
سعود:انت شو ما تستحي...ياي بقواة عين تقول طلق جوري
زياد:طلقها ...ترى اذا ما طلقتها ...بطالب ببنتيه ...وانت متاكد انها ما تقدر تعيش من غير بنتها
سعود:انت واعي شو يالس تقول يا الهرم...تباني اطلق حرمتيه علشان تاخذها..شو ما كفتك المرة الاولى ...تتذكر يوم يتك واترجاك ..انك ما توافق على الملجه واني احبها ..واباها ...تتذكر شو قلت...ولا ناسي..طبيعي تنسى ..مب انت الي خذوا منك روحك...خذوا منك الي كنت تحبها..تتذكر شو رديت علي ...قلت ابى اشرد من البلاد باي طريقة...حتى ولو على حسابك وحساب جوري...وتتذكر لما قلت...ما حد قالها تعيش معاكم..وهي مب فرد من العائله ...تتذكر قلتلك اني بكلم عمي ابو ناصر ..تذكر هددتني انك بتقول انا نحب بعضنا من زمان...و حتى لساني مب رايم ينطق الكلام الي قلته...تذكر اليوم الثاني شو قلت لعميه بو سالم...اشقايل شوهت صورتي عنده...وطلعت خالتيه ام سالم سامعه كل شي دار بينك وبين عمي...ومن بعدها جفت الويل على يدها ومن غير حتى ما تتاكد ...طلبت من عميه يبلغ الشرطه علي ....وانت سافرت بنفس الليلة بعد ما دمرتني نهائيا ..دمرتني من كل صوب ..حرمتني من الي كنت احبها..وضيعت صورتي بنظر هلي...اباك تحلف ..انك جفتني معاهم لما ذبحوا الياهل ..جفتني بعينك ..ولا مجرد افتراء ...ولا كنت تبى تشرد من البلاد باي ثمن ...انا صج كنت مرابعنهم...بس ها مب معناته اني كنت معاهم لما ذبحوه...انا اصلا ما كنت اعرف انهم جي ...ولما شكيت باخلاقهم وبتصرفاتهم..كنت مودرنهم من شهر قبل الحادثه...بس ما حد صدقني ..حتى عميه الا رباني ما رضى يصدقني...عشت طول عمريه ...وانا اسمع كلام شرا السم من خالتيه بالرغم من اني برئ...ولما الزمن ضحك لي ...وخذيت الي اباها ...تبى تحرمني منها...ها في احلامك ...سامع يعني شو باحلامك

شو الي يالسه اسمعه...يعني سعود كان يحبني من زمان...والحادثة الي قالها زياد لي ...كانوا ربع سعود...بس هو مودرنهم من زمان ...ليش يتهم زور ...ليش جي يا زياد حرام عليك..دمرتني ودمرت سعود...كل ها علشان تشرد من البلاد...وسعود الي تحمل ظيم خالتيه ام سالم وهو برئ ...عمره ما رفع صوته عليها ...عمره ما حاول يدافع عن عمره ...يا الله ...ابى اشم هوا ...طلعت للحوي ...يلست على الكرسي...بس قبل ما ايلس ...حور وين ...ما جفتها بالصالة ....يت اسير صوب باب المدخل ...بس جني جفت بنية تركض صوب الشارع ولابسه فستان احمر ...فستان احمر ...هاي حور ...صرخت بصوت عالي .........حور ..........حور ..مب رايمه اركض مب رايمه اسير صوبها ...حسيت عمريه انشليت ...جفت سعود وزياد وناصر ...يركضوا صوب الشارع ...وسعت صوت بريك قوي ..ومن بعدها ما حسيت بالدنيا

يا ربي شكلي تاخرت على المحاضرة ...شو ها الكورس الي كله محاضرات وباليوم الاخير بس عملي ....البنات الي ويايه سارن المحاضره ...وانا بعدني مب جاهزه...احس باحساس غريب ..بضيقه ....طلعت من الفندق وييت اركب الباص ..بس شو هاي الزحمة ...غريبه شو السالفه ..من غير ما اركز على رقم الباص ركبته ...لانه هو باص واحد دوم يى هنا ....ومكان كورسي هو اخر وقفه بالباص ..فكنت ماخذه راحتي بالافكار ...بس سمعت راعي الباص يكلمني ويقول ها اخر وقفه للباص واني لازم انزل...شو اخر وقفه ..بس هاي منطقه مقطوعه ..وشكلها تخوف ..جي حنا وين ...سالت راعي الباص ..بس هو قال انه اليوم هم عندهم اضراب ...ومب كل الباصات شغاله ..يعني انا ركبت باص غلط...اول مرة اعرف اني غبيه ...ليش ما ركزت على رقم الباص وركبته جي...يلست اترجى راعي الباص يردني للفندق ..بس هو قال انه ما بيرد ..كل شي مسكر اللحينه بسبب الاضراب ..وانا شو بسوي هنا ...هاي المنطقه تخوف ...سميت ونزلت ...وجفت شلة شباب متيمعين ...شكلهم يخوف ...لا وبعد سكارى...يا رب سترك...يا ربي الهمني اتصرف التصرف الصحيح...ركضت ابى ابتعد عنهم باي طريق..ابى تاكسي ...بس ما حصلت تكاسي...انا خايفه ...يالسه ارتجف...شو اسوي ..انا حتى ما اعرف اسم المنطقة الي انا فيها ...ولا عندي انترنت علشان اجيك كيف اوصل لمنطقتي ...شو اسوي يا ربي..يى حمد ببالي ...يا رب

هاي وينها كل الشعب وصلوا الا هي...سرت اسال وحده من البنات عنها ...بس جفت اميرة واقفه حذاها..اول ما جافتني نزلت راسها وسارت...شكله كلام امس ياب مفعوله معاها ...سالتها عن جمان ..هي قالت انها تاخرت وتي بروحها ...اشقايل بتي بروحها واليوم عندهم اضراب وكل الشوارع زحمة ...حتى صعب تحصل تاكسي بعد ربع ساعة من اللحينه ...يلست اترياها بره القاعة...بس تاخرت ..مر نص ساعة هذه وينها ...ييت اتصل ..بس تلفوني رن قبل ...وكانت هي المتصلة ..اول ما رديت عليها ...سمعت صوت صياحها ...وتقول حمد انا ضايعه ما اعرف انا وين وفي شلة شباب سكارى هنا ...حمد تعال ...حمد انا خايفه...شو ضايعه ..وشلة شباب ...يا الله سترك ...يلست اهديها ..وانا من داخلي ميت خوف عليها ...شو هاي المصيبة ...
حمد:جمان..حبيبي ..جوفي اي لوحة مكتوب عليها اسم المنطقة الي انتي فيها ..والا سالي اي احد من الماره..وابتعدي عن شلة الشباب
جمان:حمد ...انا سرت بعيد عنهم بس هم شكلهم مستقصديني ...حمد تعال...حمد اباك ..انا خايفه
حمد:حبيبي انا بييج يالس ادور على تاكسي ...بس ابى اسم المنطقة حياتي ...ركزي معاي ..جمونتي ..سالي اي حد تجوفينه بالدرب
سمعتها تكلم واحد وتساله عن اسم المنطقه وهي تصيح...اول ما عطتني اسم المنطقة ..يا ربي بعيده يبالي ربع ساعة علشان اوصل لعندها ...يا رب سترك...وصلنا جريب من المنطقة بس المشكله انه راعي التاكسي يقول انه ما يقدر يوصلني للمنطقة بالضبط ..يقول الطرق مسكره بسبب الاضراب ...سرت ركض صوب المنطقة الي هي فيها ...اول ما وصلت عندها ..جفت شلة شباب يايين صوبها كل واحد منهم يتمايل ولا داري عن دنياه..جي وحنا صبح وانتوا سكارى ..وهي اول ما جافتني يت ركض لعندي ولوت علي ويلست تصيح صياح يقطع القلب...اما شلة الشباب يوا لعندي وقالوا انهم كانوا يبون يساعدونها لانها كانت تصيح....سيروا توكلوا انتوا مب رايمين تساعدوا اعماركم علشان تساعدونها ...حاولت ابعدها ابى اجوف ويها اطمن عليها ...بس هي لوت علي وبقوة ...شكلها مب بوعيها ...مشينا انا وهي لحد ما حصلنا تاكسي ..طلبت منه يوصلنا لفندقي...فندقي بعيد عن منطقة كورسنا ..اصلا حاجزنه مرة وحده لشهر عسلنا ..لاني متفق مع ناصر انه بعد الكورس انا وجمان بنسير شهر العسل ..وبسويه مفاجاه ...وصلنا فندقنا ...ورقدتها على شبريتي ..وهي على طول رقدت وبشيلتها بعد..سرت صوب الصالة...بسير اصلي ركعتين شكر انه كل شي عدى على خير ...

بعد مرور 7 اشهر ...
ميعاد:يله يا سالم...تاخرنا
سالم:صباح الخير حبيبتي ...ليش جي مستعيله
ميعاد:تاخرت على جوري ...بتاكلني جمان بقشوري
سالم:اجوفها بس تلمس شعره منج ..جان ما عطيتها شغلها
استحيت....وايدي يت على بطني ...جفته حط يده على بطني وقال
سالم:متى بي ..تعبنا نترياه ...
ميعاد:ليش جي مستعيل....لاحق على صياحه ..وودع الرقاد من اللحينه
سالم:يفداه الرقاد...يلة حبيبتي ..بسير احر السيارة ....
باس يبهتي وسار ...يا الله يا سالم..ما توقعتك تطلع جي طيب ..ما توقعت اني بحبك بسرعة..يمكن طيبته وتعامله معاي ..هو الي خلاني احبه بسرعة...الحمد لله الي عوضني بسالم ...

جمان:حمد ترى والله متاخرين...اكيد كلهم عند جوري الا انا
حمد:ما بتشبر بره هاي الغرفة..لحد ما تتذكري انتي شو ناسيه تسوين
جمان:ما اتذكر يا حمد...بس مب وقته لما بني ذكرني
حمد:وانا بنتظر لحد ما نرد من عند اختج...لا يا حلوتي ...مب ياي اذكرج ...تذكري بروحج يا حبيبة ريلها ...يا عيونه
جمان:حمد
حمد:لا تقولين انج لحد اللحينه تستحين مني ...عيل كنت ناوي اطوف بس ..حلاتج وانتي مستحيه..يله تذكري واشر على خده


يا الله مب رايمه اتحرك من ثقل البيبي ...شكلي عيزت ...جفت ناصر يضحك علي ويقول
ناصر:شو ياينها عيوزنا
بوزت ...
ناصر:فديتج وانتي مبوزه...
سمعنا صوت تلفونه يرن ...
ناصر:ها سعود..شكلنا تاخرنا
سرت اتجهز...ويلست افكر بذاك اليوم الي يى ناصر وهو حزين ...ويلس يقول انه اليوم يايبين عندهم بالطوارى حادث ولما سار يعالجهم ..طلعوا الي مسويين الحادث ام شيخه ...ولما عرفت بموت بنتها ...يلست تصارخ شرا المينونه ..وتضرب ويها وتقول ها عقاب من ربي..وطلبت انها تجوفني ..مب كنت ناويه اسير ...بس ناصر حن علي اسير ..ولما سرت عندها يلست تستسمح مني وتقول انهم كانوا سايرين صوب حرمه تسوي سحر وكانت ناويه تسحر ناصر علشان يطلقني ...وياخذ بنتها ...بس ربي عاقبهم بالدنيا قبل الاخره ...الله يسامحج ويسامح بناتج...انا ما ضريتكم بس انتوا الي كنتوا تبون تدمرون بيتي ...

اللحينه بنكمل سبعة اشهر ..وانا وهو عايشين بعالمين مختلفين...كل واحد عايش بدنياه...هو عايش بعالمه الخاص..عالم بنت عمتيه ..وانا عايشه بعالم اني ابى اسافر لندن....واليوم اتخذت قراري النهائي ..بطلب منه يطلقني ...ما اقدر اسمع كلام امه وخواته الي شرا السم...صج اطنش ولا اهتم ...بس لحد هنا وكفايه ...جفته ياي من بره اصلا انا ما اساله وين ساير ولا من وين ياي ..ولا هو يسالني عن شي...
اسماء:سعيد...اباك بسالفة
ومن غير ما يقول شي يلس على الكرسي واشر علي بعيونه يعني خير
اسماء:اباك تطلقني ...اعتقد 7 اشهر مدة كفايه اني اطلق فيها ...وتاخذ بنت عمتك
سعيد:والله انا لو ابى اخذ بنت عمتيه بيوزها من غير شورك ولا من غير ما اطلقج
كنت متوقعه منه ها الرد..بستخدم اخر سلاح بيدي ...
اسماء:سعيد انا كلمت اخوي..وهو بي باجر ..وهو الي بيتفاهم معك..حتى لو وصل الموضوع للخلع
جفته عصب ويى صوبي وزخ يدي
سعيد:عيدي الي قلتيه ..ما سمعته ...
اسماء:لا سمعته...وما يحتاي اعيده
سعيد:اقول سيري رقدي
اسماء:بهواك...تفاهمك بيكون مع اخويه
جفته صخ ...وقال
سعيد:ما عليه يا اسماء تبين الطلاق مب مشكله ..حاضرين بنطلق بس بعد ما اكلم اخوج
وسار الغرفة ...يلست بالصالة...وانا افكر بسامي ..اتصلت عليه امس ..وطلبت منه بس يى البلاد ويطلب من سعيد يطلقني ..ومن عقبها عادي لو ينساني ...ما كان جدامي غير ها الحل ..لاني تعبت منهم كلهم...سمعت سعيد يزقرني وبصارخ
سعيد:ممكن تفهميني شو ها
يا ربي كيف نسيته ...
سعيد:احنا على شو اتفقنا ...ما قلتلج ما ابى عيال منج
اسماء:ومنو الي قالك اني ابى عيال منك...
سعيد:عيل ها شو ...
وكان ميود تيست الحمل بيده
اسماء: جوف انا بروحي منصدمه ...بس ها ما راح يغير من وضعنا شي
سعيد:لا يا حلوه بيغير..ويغير كثير...انا عيالي ما يتربوا بعيد عني
اسماء:لا يا الطيب...وانا ما اتنازل عن البيبي بسهوله...انسى انك عرست وان لك بيبي وعيش حياتك مع حبيبة قلبك
سعيد:انتي ليش قلبج جي جاسي...تبين تحرمين طفل انه يعيش حياته شرا غيره من العيال ..بين ام واب
اسماء :وشو الفايده..يعيش بين اثنيه مب متفاهمين عايشين مع بعض ..بس عقولهم مب مع بعض
سعيد:جوفي يا اسماء في فرق انه طفل يعيش مع امه..وطفل يعيش بين ابوين صج مب متفقين بس مب بينهم مشاكل
لحد هنا وكفايه...فقدت التحكم على نفسي...سرت صوبه ويلست اضربه على صدره...واقوله
اسماء:شو تعريف المشاكل عندك..شو ..قول ..وشو يعني متفقين ...فهمني شو معنى كلمة متفقين ...شو معنى الكلمة بقاموسك...تقصد انهم ما يتضاربون ...انت شو ما تحس ..ما عندك احساس ...يا اخي ارحمني...مب ملزم فيني...صدقني انا الي بعفيك من هاي المهمة واعفيك من وصية يدتيه
جفته مبقق عيونه ..ويحاول يصد ضرباتي الي يايه على صدره ...
سعيد:اهدي...اسوم اهدي..ليش جي معصبه ..مب زين لج ...

شو الي ياينها اليوم...غريبه توقعت انها ما تحس..توقعت مالها قلب شرا الاوادم..سبعة اشهر ..ما جفتها تضحك ولا تصيح..لو اي وحده ثانية بمكانها جان انهارت من كلام امايه الجارح لها...كل ما نسير بيت امايه تطردها حتى قبل ما نوصل للصالة...وهي ولا على بالها ...تاخذ سويج السيارة من يدي وترد البيت ولا جنه شي استوى ...الفرق الوحيد الي من بينها وبين مها....انك تقدر تعتمد عليها ...انسانه قد المسؤوليه...اما مها احسها بعدها ياهل ..متربيه على الدلع...على كل شي تصيح وتحتج...حتى اتذكر مره مرضت حشرت عليهم البيت بصياحها ...وشكواها انه محد يحس فيها..بالرغم انهم كلهم كانوا حوالينها...عيل هاي شو تقول ..طول عمرها عايشه وهي وحيده...حتى حنان الاخ كانت محرومه منه...عاشت الغربه ...وعاشت اهمال اخوها ..وما اشتكت...هي يتراوالها اني ما اعرف شي عنها ..بس يدوه كانت تقول كل شي يخصها لي...شكلها الله يرحمها كانت مستقصده هاي الحركه علشان تشدني صوبها..ما انكر اني معجب بشخصيتها..وانها بالرغم من كل شي بعدها قويه...بس ما ادري شو صابها اليوم ...شكله هرمون الحمل...بالرغم من اني عصبت لما عرفت بحملها..الا اني بداخي فرحان...يى على بالي صورة سالم وهو يلعب ولده سلطان..واشقايل فرحان وهو يتريى البيبي الثاني ...بس اخفيت كل شي داخلي ..ما اباها تحس اني فرحان ...ما اعرف ليش كنت اتريى لحضه ضعف منها ..علشان اقولها اني معجب بشخصيتها ...وخل نفتح صفحة يديده ...نحاول نحب بعض وننسى الماضي الي يلاحقنا ...حظنتها بقوة


معقولة اليوم مر سبعة اشهر على وفاة حور ...يلست اصيح..كل ما اتذكرها اصيح..كل ما تي ببالي ...تنمحى كل الصور ..وتضل صورة وحده...صورتها وهي مليانه دم ..وهي بحضن ناصر ...وهو يجيس نبضها ...راحت ...انحرمنا كلنا منها ...لا اخذتها انا ولا زياد...بعد وفاة حور باسبوع زياد رد لندن ...رد وهو تعلم درس قوي ...رد وهو حزن العالم بعينه...اتذكر لما قال الدكتور انها توفت ...اصلا هي شكلها فارقت الحياة وهي بحضن ناصر...لاني جفت دموعه...جفته وقف يجيس نبضها ...بس كان عندي امل ...اتذكر انه ياني انهيار عصبي ..ضليت بالمستشفى اسبوعين..وطول ها الاسبوعين وسعود يرقد معاي بنفس الغرفة..كان يحاول يهديني ...بس لما كنت اجوف عليه..كنت احس بحزنه...كنت اعرف انه بداخله محطم...هو كان يحب حور ...لدرجه اني كنت احيانا اشك انه يحبها اكثر من انا ما احبها...في النهايه ..ها قدرها ...ها نصيبها بالدنيا وخذته...بس انا مب اقدر اكمل الحياة من غيرها ..هي كانت حياتي...استغفر الله..كل ما ايلس بروحي ..تيني هاي الافكار ...بسير اتجهز اليوم سعود عازم كل الاهل ...نزلت الاصالة وجفته يالس..وهو مسكر عيونه ..شكله يالس يفكر بشى..وشكله حس اني بالصالة..لانه قال
سعود:ليش تتسحبين شرا الحراميه...
دقتت على عيونه..جفتهم مليانين حزن ودموع...
جوري:سعود فيك شي...
سعود:احس اني بودركم اليوم
اول ما سمعته يقول جي..نسيت نفسي..نسيت الدنيا وما فيها ..وسرت صوبه ولويت عليه..انت الي باجي اللحينه ..وين تسير وتودرنيه
جوري:لا تقول جي ..انا ما اقدر اعيش من غيرك..مب كافي حور سارت
سعود: ما كنت ادري انه هاي الجملة تخليج تيين وتحضنيني ...جان قلته من زمان ...فديتج
احمروا خدودي..يت اقوم بس هو قال
سعود:وين سايره ...يلسي متوله عليج كبر الدنيا ...جوري تتذكريني الرسالة المكتوب فيها انا كلنا بنستوي دكاترة الا انتي
جوري:هى اذكرها ..بس انت شو دراك بالمكتوب فيها...لا تقول انت الي كتبتها
سعود:هى انا الي كتبتها ...لاني كنت اترياج كل يوم ..ومن بعد ما توفوا حرمتيني من عيونج..وما كان بيدي غير ها الحل ..وعطيته لناصر يحطه حذا غرفتج...جوري..انا احبج من وانا بالمدرسه ...احبج وانتي حبي الوحيد...كنت اتريى اني اصفي حسابي مع زياد..واعبر لج عن كل شي بداخلي ...احبج يا عيون سعود


تمت

همسة شكر...لكل من رد علي وتفاعل مع قصتي
همسة شكر:لكل من شجعني ..وقدمت لي نصيحه
همسة شكر:لكل من دعت لي..

وفقكم الله اينما كنتم











[/SIZE][/COLOR]