كاتب الموضوع :
safsaf313
المنتدى :
القصص المكتمله
البارت السابع عشر
وين الصبــر؟؟
حتى الصبر
في ساعة ( الحاجه ) يخون!!
يوم المـــلـــكــه
شهد تغمض عينها : شوق حطي لي لون احمر واسود
شوق : اوكي بس لاتتحركين عشان مايتلخبط الشغل .. شوق هي اللي تعمل لهم المكياج لانها اخذت دوره تجميل ونجحت فيها
سمر ماسكه المشط وتكلم شوق : متى تسوين لي شعري
شوق وهي مركزة على شهد : افتحي شعرك من اللفات واتركيه اخلص من شهد وازبطه لك
سحر تدخل وتأخذ لفه : ويش رايكم فيني .. انا سويت شعري
شوق ابتسمت لها : لك مستقبل بالشعر .. بالله شوفي هنادي تلاقينها حايسه زبطيها حطيت لها آي شدو وبتروح تمسحه تقول على طبيعتي احلى
سحر : بروح اشوفها اخبره تسب ومعصبه
سمر : بروح معك اكيد بتحتاجين مساعده مع المفترسه
بعد ساعتين .. وصلت ريم وجهزوها وبعد صلاة العشاء اتجهوا مع عمهم وجلالي للاستراحه حقت ابو سيف اللي مخصصه للمناسبات والأعياد .. بعد ماوصلوا دخلوا الغرفه المخصصه لريم ..من الباب الخلفي
رغد تعبانه جلست على الكرسي : اوف تكسر ظهري بالمشغل وانا واقفه .. برتاح شوي
ريم متوتره : شوق شوق بالله اعطيني المانيكير ابي أمكر اظافيري
سحر برواقه : هدي روحك ياقلبي من الحين ترتجفين .. اقراء المعوذات وأيه الكرسي وانا بزبط اظافيرك حتى رجولك بحط لها
ريم تأخذ نفس طويل وتذكرت : اووف شهدوه بالله كلمي المصوره أكدي عليها
شهد وبحضنها مشاري تلعبه : لاتخافين كلمتها واحنا بالبيت وتقول .."تقلدها ".. حاضر حاضر دي العوسه ريم ان شاء الله من بدري حكون عندها
شوق طلعت صندوق خشبي لامع ونازل منه لولو ابيض وموف غامق وداخله ورد طبيعي وردي وابيض وموف ..وحطته على الطاوله الزجاجيه الفخمه .. ورتبت الطاوله وحطت المبخره الفضيه اللي اشترتها هديه لريم وجنبها طقم الصينيه وكاسة عصير متوسطه الحجم نفس المبخره ومصاص شفاف عليه فيونكه موف وحطت الصندوق جنبه
رغد : خليه ياشوق انا اكمل الطاوله لازم احط تحتها ورد وريش وخرابيط من تأليف سحر .. هيه انتي اتركي اللي بيدك وتعالي ساعديني
هنادي : ترى بخرب كل شي انا بطلع اشوف الامور واتطمن على كل شي واجي
سمر : خوذيني معاك
هنادي تشيك على شعرها وشكلها : تكفون حلو شكلي والا باين اني بويه
ريم طالعتها بتفحص : اخص حاطه ميك آب .. حركآآت توي أنتبهت
هنادي متحطمه مره : شكلي جيكره
ريم : اقسم لك تهبلين اول مره احسك بنت تهبلين
سمر تسحب هنادي من يدها بقوه : يالله يالله نطلع نشوف أهل سيف أفندي
سحر بتهديد : بدون مشاكل سامعات .. اعرفكم تعشقون المشاكل
هنادي تقرص سمر وبصوت واحد : أبد بنمشي جنب الحيط .. وطلعوا برى وخلوهم يكملون
اشغالهم وتجهيزاتهم ..
مشوا بالممر وكان فاضي مره .. لكن عاجبهم تصميم الاستراحه فخامه وستايل كلاسيكي يجنن
مشوا بالممر تبع غرفة ريم وشافوا مرايه وأطرافها زخرفه بالذهبي وجنبها جره ذهبيه كأنها نافوره بسيطه .. وطاوله زجاجيه عليها باقة ورد طبيعي .. كملوا طريقهم وطلعوا على صالة الاستقبال .. وكانت كبيره شوي وفيها كراسي على جنب .. ودرج جانبي وعليه ستاره وباب بالوسط قبله ثلاث درجات وهي الصاله الاساسيه
سمر بلقافه : خلينا نروح نشوف
هنادي تحمست : يالله .. وهم ماشين سمعوا صوت وراهم
...: مين أنــتـــم ؟!.
سمر وهنادي لفوا بسرعه .. وهم يشوفون بنت لابسه تنوره قصيره لنص الفخذ رمادي فيها كاروهات احمر وأبيض وحزام احمر وبدي حبل احمر وفيه خطوط خفيفه بالرمادي وسلسال طويل وجنب رقبتها ورده رمادي .. وشعرها قصير ناعم وشكله عشوائي بس لايق عليها وكانت في قمة الأناقه والنعومه
هنادي : احنا اخوات ريم
ساميه : أهـــا اخواتها .. ياهلا والله
سمر : هلا فيك .. بس انتي مين
ساميه بغرور : انا ساميه اخت سيف وأصغر العنقود
هنادي تدق سمر على جنبها وابتسمت بمجامله : ياهلا وغلا تشرفنا .. انا هنادي وهذي سمر
ساميه تقزهم من فوق لتحت وهي تشوف ملابسهم ( وي هذول اخواتها .. مبين عليهم بنات فقر حتى لبسهم مايعرفون ينسقون الالوان .. قرويات )
ساميه بنظرات استحقار : عن أذنكم .. ولفت
هنادي تمد لسانه وانقهرت منها : تفضلي .. وسحبت سمر واخذتها للمرايا
هنادي تشوف شكلها بالمرايا وتلف على الجنبين : بالله فينا شي غلط .. والا ماعجبنا الست ساميه
سمر : ماعليك فيها غيرانه هذي شفتي عيونها كيف شوي تأكلنا
هنادي كانت لابسه فستان ليموني قصير ناعم مره فيه تكسير بسيط وتحت الصدر شريطه ساتان ليموني .. وكانت مستشوره شعرها القصير ومسويه له نفخه بسيطه من فوق ومنزله خصله وحده على وجهها وحاطه شباصه على شكل فراشه ناعمه على جنب فوق اذنها
أمـــا سمر كانت لابسه بنطول برمودا جينز سماوي وفيه على الفخذ تطريز باللولو وبدي بدون حبال فيه فتحه بالظهر على شكل دمعه وكلها تطريز باللولو الابيض ..
هنادي : ماعندها سالفه امشي نكمل الجوله التفقديه
سمر : غريبه تاخروا عماتي
هنادي : على وصول .. تدرين هذي ساميه مادخلت قلبي نهائيا ولا أهل سيف كلهم ماني مرتاحه لهم .. الله يعين ريوومه شكلها بتعاني خصوصا من الحيه الرماديه << تقصد ساميه
سمر : ماعلينا منهم امشي نرجع
:::
:::
بالرياض
ابو رياض وقف وعلامة الصدمه على وجهه وبدت ملامحه تميل للعصبيه : ويش تقول انت .. انهبلت ؟!
فهد ببرود قاتل : يبه ماقلت شي يستاهل الهبال
رياض بعصبيه فظيعه : انت مستوعب اللي تقوله .. تخطب لحالك ماعليه لكن البنت ... وسكت
فهد اعطاه نظره حاده سكتت رياض وقف بثقه : أنــا ماجيت أشاوركم .. أنا جاي ابلغكم الخبر عشان تجون ديكور عند اهل البنت .. مهما كان افهم بالعادات والتقاليد ومابي اخالفها
ابوه جن جنونه وصرخ بأعلى صوته اللي هز اركان قصره الكبير : فــــــهـــــــــد ... اطلع برى .. جت ندى وامها على صوت صراخ ابو رياض
فهد مشى خطوتين .. بعدها لف على ابوه : أنا جيت وقلت اللي عندي .. تبون تجيون حياكم الله .. ماتبون تجون زواجي بيتم فيكم وبلاكم
ابو رياض جلس على الكنبه بتعب فهد يطلعه من طوره : حسبي الله عليك من ولد .. جننتني بسواياك ... وصلت فيكم تخطب وانا اخر من يعلم وجاي تعزمني على الملكه بعد وياليتها بنت وبعد مخطوفه ويش بنقول للناس .. طيحت راسي
فهد : كلام الناس ماعلي منه عمرك ماكان لك تواجد بحياتي .. لو جدي الله يرحمه حي كان ماشفتني هنا قدامك واقولك تجي تحضر ملكتي .. انا عايش بوجودك وبدونه
رياض نفسه يقتل اخوه كيف يفكر ويخطط.. وكيف ينفذ ولا يهتم بابوه اللي كل اعمامه واهله يخافون منه الا فهد اللي مايهتم فيه ولا يستشيره بشي ... رياض تزوج بنت عمه لانه يحبها ولان ابوه اختارها له .. وزوج خواته عيال عمهم غصب عنهم .. لكن فهد ماله سلطه عليه ابداً
وبالعكس فهد يجبر ابوه على اشياء مستحيله لكن اذا كان فهد هو مصدرها فهي تتنفذ بالغصب قبل الطيب ..
ابوه يأشر على الباب : اطلع برآآ .. اطــلــع
فهد : طالع .. واللي عندي قلته .. أتجه للباب وطلع وسكره وراه
ام رياض : ويش السالفه يابو رياض
ابو رياض : آآه من هالولد بيموتني ناقص عمر .. هذا مو ولد هذا ابليس
ندى : يبه بيتزوج صدق ؟
ابو رياض وقف وبسكوت راح لمكتبه بدون اي كلمه ينطق فيها
:::
:::
بعد ماوصول المعازيم وامتلت صالة الاستقبال .. وبدأت حفلة الخطوبه واشتغل الدي جي
شهد : ريم انتبهي لميشو ترى نايم
ريم : اوكي بأنتبه له
شوق : انا بجلس شوي عند ريم .. انتي ورغد روحوا استقبلو مع مها وعماتي
رغد : ايه تأخرنا بالطالعه يالله شهد نروح
شهد : يالله .. لفت على ريم بتعيد وصيتها
شوق تقاطعها : قلت لك انا باجلس راح انتبه له روحي خلاص
شهد بنظرة شك : ويش تبين تقولين لها
شوق : سر بيني وبينها ممكن
رغد تسحب شهد وتبتسم : اوكي خذوا راحتكم . وطلعوا لبرى
شوق تلف على ريم وجلست جنبها على الكرسي ضمت يد ريم بين يديها : ريومه بقولك شي
ريم : ويش ؟!
شوق : بعد التصوير انا راح اطلع لاني بكون معك .. وبتجلسين مع سيف لحالكم .. لاتخلينه يقرب منك .. حتى بوسات حاولي ماتعطيه مجال اكيد فاهمتني انتي ؟!
ريم حمرت خدودها : أيه فاهمتك بس انا خايفه ياشوق بموت من الرعب
شوق : لا تخافين صح هو زوجك بس الحرص واجب ياقلبي
ريم : لا تتركوني وصحابتي اذا جوا دخليهم اوكي
شوق ابتسمت ووقفت بتروح : ان شاء الله .. انتبهي لميشوو لاتقتلنا شهد
ريم : خلي سيرنا تجي عندي عشان لو احتاج شي
شوق : بقول لعمتي تخليها تجي عندك . واي شي تبينه كلميني على جوالي
ريم ابتسمت وبداخلها ميته خوف من التجربه الجديده عليها ما مرت فيها قبل بس تحاول تتمالك نفسها وتتحكم بأعصابها : اوكي
شهد ورغد شهقوا : كوثر !!
كوثر بمثل صدمتهم : ايش جايبكم هنا
رغد : انتي ويش جايبك هنا
كوثر بقهر : هذي خطوبة ولد عمي سيف
شهد تغيرت ملامحها : اللي كنتي تحبينه ؟!
كوثر بتحطم : ايه اللي كنت .. رفعت راسها .. وانتم ويش جايبكم
رغد رفعت حاجبها : والله سيف خاطب ريم اختي ..
كوثر انصدمت وانشلت عن الكلام ما نطقت بحرف ومعالم الصدمه باينه عليها
رغد بقوه : مافي مبروك على الاقل
كوثر بدون نفس : مبروك الله يوفقهم
شهد تبي تقهرها : امين يارب .. ويكفيهم شر العواذل
كوثر : استاذن بشوف بنت عمي .. وراحت
رغد : هههههه عجبتيني يابنت
شهد : ولو انها تحزن وكانت تحبه بس كل شي قسمه ونصيب ... امشي ندخل
هديل تقلب عيونها في شلة بنات على الطاوله اللي قبالها : بالله شوفوا هذولك قاهراتني يأشرون علينا ويضحكون
حنين : وقحات لما رحت لوحدي على المرايا اسمعهم يقولون اذا هم كذا اجل العروس تفجع
سحر بقهر : بالله مايشوفون اشكالهم الله لا يبلانا كأنهم من الحبشه استغفر الله
هنادي تضرب يديها ببعض : آآخ بس لو أمسك وحده على جنب واعطيها كم كف ابرد حرتي فيهم
لينا : ماعليكم طنشوهم هذي الاشكال الغيره شابه بقلوبهم .. شايفين كل وحده تقول الزين عندي .. ومقهورات
تهاني : صدقتي اقسم بالله ... لفت تهاني بتشوف امها وين بتروح لها .. ولمحت مها
تهاني بشهقه : مــهــا
هنادي ابتسمت : هذيك اختي الكبيره .. بس كيف تعرفينها
تهاني عقدت حواجبها : مها تصير اختك
سحر : ايه .. ليش ؟
تهاني : لانها زوجة اخوي بندر
انصدموا البنات ... عادآ لينا اللي تجهل القصه
حنين : الحين بندر اخوك متزوج مها بنت خالي
هنادي توقف وتركض لمها : هيه يا مس مها
مها : نعم ياقليله التهذيب .. وت هبنت ؟!
هنادي : بندر زوجك اخته تهاني
مها تضحك : يس افكورس ماي هازبنت توتو ستتروه
هنادي : ابوكِ ياللغه عربي على عنقليزي .. بس تدرين ان تهاني صديقتنا المصون
مها فتحت عيونها على الاخير : صدق توي ادري
هنادي : والله من دلاختك يا مس مهاوي .. اقول اقول لفي بشوف .. قسم انك صاير بطه
مها ترجع شعرها على ورى : بس ويش رايك فيني
هنادي تصفر : لالا كسرتي توقعاتي بس لو خليتي الشقار لباريس هليتون وطقتها ..
مها كشرت : يعني الاشقر ماهو لايق علي
هنادي تبتسم بخبث : شوفي تبين الصدق اول ماشفتك داخله مع الباب
مها ابتسمت وتحمست : ايه ويش كان انطباعك عني ؟!
هنادي : تذكرين فاطمه اللي كانت تشتغل عندنا اول ذكرتيني فيها
مها وجهها صار احمر من العصبيه : انقلعي ياحماره .. الشرهه علي اخذ رايك اصلا انتي ويش عرفك بالموضه حدك السعوديه سبوورت وانتي تطورتي ابو ظبي ودبي سبورت
هنادي عرفت انها قهرت مها وجلست تضحك وراحت للبنات .. وهي ميته ضحك
مها كانت لابسه فستان طويل ناعم وردي فاتح جدا .. وصابغه شعرها اشقر وطالعه كيوت مره
شهد تطالع المعازيم واشكالهم جديده عليهم : رغد احس اني تايهه مره
رغد تمسك يد شهد ويمشون بالممر متجهين لطاولة البنات
جود تصفر : ياهوووو من هذولا البنات كأنهم من كوكب ثاني
ساميه بتفحص : ما اعرفهم .. غريبات عني
كوثر بدون نفس : شهد ورغد خوات ريم يصيرون صديقاتي بالجامعه
جود فتحت عيونها على الاخير : جد ..بس مايشبهون للي على الطاوله بتاتا
كوثر : لالا شهد تشبه لاختها هذيك اللي لابسه منجاوي( تقصد سحر )
ساميه تدقق : ايه صح فيهم شبه كبير
ضحى : بس شوفوا اجسامهم كأنهم عارضات ازياء مو حنا يا حظي
خلود : شهد تعالي اجلسي اشتقت لك يادوبه
شهد تبتسم : حتى انا الاختبارات ماخلت لنا مجال
هديل : كيف ريم وينها
البنات : بالغرفه
هنادي توقف : ايش رايكم نروح لها الحين نسولف تلاقونها طفشانه
لينا وتهاني : ايه يالله ..
واتجهوا كلهم عند ريم عدآ شهد ورغد اللي جلسوا يسولفون مع بعض ويعلقون
بالغرفه
شوق : حياكم تفضلوا
لينا وتهاني وسحر : الف الصلاة والسلام عليك ياحبيب الله محمد .. كلووووووش
هنادي ترقص بخبال : ومباركين عرس الاثنين ليله ربيع عين وقمره .. ياسيف اذبح دجاجتين
الكل : هههههههه
شوق : استغفر الله دجاج .. الله يخلف عليك
ريم تكشر وتلف على الجهه الثانيه : تتريقين علي بيجيك يوم
لينا تبوس ريم وتبارك لها : ماعليك هذي دفشه .. وتغمز لهنادي
تهاني : مبروك يا ريومه الف مبروك
ريم بحياء نزلت راسها : الله يبارك فيك .. عقبالكم
هديل : امين يارب
شوق : انا طالعه خذوا راحتكم مع ريم ...
سحر : اوكي دربك خضر ..
وجلسوا كلهم حولها اللي على الطاوله واللي على الارض يسولفون ويضحكون على شكلها الخايف ويعطونها نصايح ..
شوق وقفت قبال المرايا وتشوف شعرها ولبسها .. سمت بالله بعد ماقالت الاذكار ومشت لجهة الصاله الكبيره
ام سامر : هلا شوق .. خلصتي من ريم
شوق : ايه خلاص كل شي تمام
مها : شوق ويش رايك نروح نرقص
شوق تبعد عن مها لانها عارفه بتسحبها غصب عنها : لالا مابي ارقص استحي
مها : اقول امشي حتى رغد وشهد بيرقصون .. يالله تكفين خلينا نروح نرقص
شوق باصرار : لالا روحي ارقصي وانا اصفق لك .. ماكملت كلمتها الا شلة البنات وراها
حنين : شوق بلا دلع يالله خلينا نروح نرقص
هديل وهنادي : يالله شوق
شوق : لا يعني لا
سحر : ماهو بكيفك يالله غصب عنك .. سحبوها للكوشه وطلبت المشرفه على الدي جي تشغل اغنيه ياغداره ..
شوق : يالله انتم ارقصوا وانا الحين ارقص بس اكلم شهد .. راحت وهي تشوف البنات يرقصون ويضحكون حتى اهل سيف .. والكل يشجع ومبسوط وفرحان
رغد تجرها : تعالي يابكاشه غصب بترقصين على مين الحركات ذي ... وخلتها ترقص معها
شوق وجهها احمر : لحد هنا وبس ما اقدر ارقص اكثر استحي ..
جلست بالكوشه تصفق جنب هنادي اللي تصفر وتشجع بحماس لاخواتها وبنات عمها وتشاركها تهاني وهديل وخلود
حنين تلعب بشعرها وترقص بجهتهم : ويش رايكم
كلهم بصوت واحد : عــلـــيـــهـــــم .. عـــــآشوآ
شوق تضحك من قلب على خواتها اللي متحمسين مره وهي تشوف االسعاده والابتسامه على وجيههم همست لهنادي : عسى دوم الفرحه .. وربي احس بموت من الفرح
هنادي تضحك : امين يارب .. بس شوفي كيف يطالعون الحونشيات ذولك
شوق كشرت : بنت عيب استحي
هنادي تتصنع الخوف : خلاص سكتنا بس احسهم يكرهوننا
شوق : واذا يكرهونا احنا همنا الوحيد ريم وسعادتها صح
هنادي باقتناع : والله صدقتي اهم شي ريم
شوق توقف : بروح اشوف عمتي اشوفها تأشر لي
مشت والعيون كلها تعلقت فيها جمالها ساحر وملامحها حاده وتأسر الكل
كانت لابسه فستان طويل لونه نيلي وفيه بروش فضي على شكل فيونكه بالوسط تحت الصدر والظهر مفتوح للنص وشعرها ناعم على طوله ومنزله خصل على وجهها .. سمعت همسات
..: مـــيـــن تــكون هذي . بســم الله عليــه تهبل
..: حرام عليك كل هالزين وماتشوفينه .. محد يعجبك ابداً
..: شوفي الجسم والا الشعر .. والا بياضها ويديها .. اللي كأنها قطنه
..: عيونها تجنن والا ضحكتها .. كلها نعومه ..مشاء الله تبارك الخالق
..: والله حرام كل الجمال هذا ومخطوفه وكمان مغتصبه .. صدق الزين مايكمل
بعد هذي الكلمه وقف قلبها .. وارتجفت كل خليه بجسمها الكلمه هزتها من الأعماق .. ليش كل ماتروح مكان يلاحقها الماضي الاسود .. ليش ما يتركها تشوف حياتها وتعيشها بدون منغصات ليش هي تدفع ثمن ماكان الخيار بأردتها كان ظلم وتجبر على ضعفها وهوانها .. كل ماتبي تضحك للحياه تقفل أبوآبها بوجهها .. كل يوم تكره من كان السبب باللي صار
كل يوم يزيد حقدها وبغضها له .. صارت الدنيا بعينها سوداويه مستحيل تكون بيضاء نقيه
تشوهت صورة الحياه بعينها .. جروحها تــألمــها والى هذي اللحظة ما ألتأمت ..
ألم . بيني وبين نفسي .!!
يقول لي .. عطــــــني آمــالک وخـــذ يـآسـي
وســـــوي من بقايا الحزن في ليـلـک
قصايد / تصبح وتمسي ..!!
وودعهم بعدــه الناس .. تراهم / ما يحبونک .!!
ترى / ماعاد يبـونــک
لأنــــک .. تختـــلف عــــنهـم
وتلبس ثوبــک الأسود ..!!
مطرَّز بــ الحزن .. والخوف
لأنك تنظر لــ أبعد .. من حدود الـــنظر .. والشـــــوف
وأقـــــــول أحسـن ..!!
أودِّع ناس }
وتبــــکِ نــآس
لأن عيون .. بعـــض الناس
ماتبــــکِ ..!
حست بمعنى هذي الابيات .. لازم ترحل لعالم ثاني حتى ترتاح من ملاحقة الماضي الأليم لها
بجهه ثانيه من الصاله ..
قرت المسج والحزن بدأ يكتسيها .. هدوء طغى عليها رحلت البسمه وحل مكانها الضيق
شهد انتبهت لتغيرها المفاجئ وسكوتها الغريب : رغد .. علام وجهك كذا
رغد : مافي شي ..
شهد بنظرة تفحص حست ان فيها شي وباين التوتر عليها من طريقة مسكتها لجوالها اللي تلعب فيها وتهز رجلها بأرتباك : كيف مافيكِ شي .. قولي الصدق
رغد حطت عينها اللي لمعة الدمع واضحه فيها بعين شهد .. وعقدت حواجبها
شهد همست لها : عبدالله السبب ؟!
هزت راسها بالأيجاب بعد سكوت ثواني : راسل رساله .. ونزلت راسها حتى تداري دمعتها اللي تحاربها عشان ما تنزل زاد ضغطها على جوالها حتى تتمالك نفسها
شهد : انسي شوي لاتخربي فرحتنا .. أجلي كل شي للبيت .. تعالي نرقص ونغير جو
رغد توقف : امشي يالله ..وقفوا يرقصون وكانوا اهل سيف يرقصون
ساميه تأشر بعينها عليهم : جود شوفي المغرورات جوا يرقصون
ضحى بضحكه شيطانيه : شوفي ويش بسوي .. وصارت ترقص مع ساميه وتتكلم وبحركه مقصوده دفت شهد اللي كانت بتطيح لو ما مسكتها هنادي زين
هنادي بنظرات شر .. طالعتها من فوق لتحت وقالت بصوت يخوف : انتبهي المره الثانيه لا اطلع عيونك من راسك
ضحى بلا مبالاه : اسفه ما شفتها
خلود تحاول تهدي الوضع : اوكي حصل خير .. هنوو شهوده تعالوا اجلسوا
شهد ترجع شعرها اللي مجعدته مثل ميريام فارس وبنظره ناريه : غبيه .. مسكت هنادي وجلسوا
لينا مقهوره : أخ بس قسم بالله يرفعن الضغط
بعد ساعه
شوق تشيك على ريم وتعطي مشاري لسيرنا عشان تطلع فيه برآ وتزبط كل شي قبل دخول سيف للتصوير
ريم بخوف أسر كيانها : شوق خايفه مره .. مرتبكه
المصوره تخفف عنها : ماتخفيش ياحبيبتي .. كل البنات كذا بس حتكون تجربه حلوه في حياته ماتضيعي احلى لحظات عمرك بالخوف والرعب .. دآ جوزك
شوق تضحك : مايحتاج اقول اكثر من اللي قالته .. لاتتوتري واذكر الله .. والخوف ماله داعي
ريم : ان شاء الله بحاول
المصوره : يالله ريومه بأخذ لك كم صوره لوحدك ... واخذت لها كم لقطه لو حده وبحركات حلوه وكلاسيكيه
ريم بحياء : لو سمحتي بقولك طلبي
المصوره : تفضلي ياحبة عيني اؤؤلي
ريم : لا تحرجيني بحركه جريئه خليها حركات عاديه اوكي
المصوره وشوق يضحكون عليها وعلى تفكيرها البريء..
المصوره : ماتشيلي هم يا حبيبتي ..
دق جوال شوق وكان عمها بيقول لها ان سيف بيدخل بعد عشر دقائق
شوق : يالله تجهزي بيدخل سيف ..
ريم بانت عليها علامات الخوف والرعب : ياويلي ... ويش اسوي ...
وقفت ومشت للجهه الثانيه بعدها رجعت وجلستها شوق على الكرسي .. لبست شوق عبايتها وتغطت زين ووقفت على جنب وأندق الباب .. وفتحت شوق كانت اخت سيف الكبيره ام محمد
سيف كان ورى الباب : احم احم .. ياولد
ام محمد تبتسم لشوق : اقوله يدخل
شوق : ايه ايه خليه يتفضل .. انا تغطيت
ام محمد : تفضل ياسيف .. مافي احد الا عروستك بسم الله عليها .. وطالعت ريم بنظرات أعجاب وحب وهي تتفحصها وميته عليها وعلى نعومتها وجماله الرباني
سيف اول ما دخل كان مستحي ومنزل راسه للأرض : السلام عليكم
الكل : وعليكم السلام
ام محمد : تفضل تفضل ياخوي سلم على زوجتك ...
رفع راسه وهو يشوف ملكه جالسه على الكرسي اللي لازق بكرسيه .. وقف بمكانه وهو يتأمل خجلها وراسها اللي مارفعته من أول مادخل .. كلهم استغربوا وقوفه المفاجئ
المصوره : ياباشا لو سمحت سلم على العروسه والا حتفضل كدآ وقت طويل
سيف صحى من سرحانه اللي قاطعه صوت المصوره .. وده يكفخها ويشوتها بعيد خربت عليه احلى لحظة لحظة طاحت عيونه على وجهها الملائكي ..
سيف كشر وبصوت عالي : طيب لا تنفخين ..
قرب من ريم اللي نبضاتها تزداد بكل خطوه يخطيها تقرب بينهم المسافه .. قلبها شوي ويطلع من صدرها من الخوف والحياء اللي مقطعها ..
سيف مد يده : السلام عليكم .. وقفت بسرعه وردت السلام وهي تفكر تمد يدها والا لا .. سحب يدها بقوه وباسها على راسها وارتبكوا الاثنين
ام محمد وشوق :ههههههههههه
ام محمد بشويش على البنيه ما بتطير
سيف جلس على الكرسي من الارتباك مايدري ويش يقول .. وجلست ريم على كرسيها ونفسها تضحك او تبكي من الاحراج .. وخدودها اعلنت حاله الانفجار وتحولت للون الاحمر
المصوره : نبدا التصوير دلوقتي حت تاخذوا راحتكم
ريم تطالعها شوي وتبكي ( يرحم اهلك لا تقولينها اجلسوا على قلوبنا )
سيف ابتسم هو يفكر كيف يبدأ معها الكلام هو غريب عنها وهي غريبه عنه ( بسرعه خلصينا ياغثك ياختي .. وبعد تشاورنا .. اووف بس الله يصبرني عليها شكلها بتطلع روحي ) << الأخلاق صفر
بالصاله
البنات : هههههههههههه
هديل بصوت عالي : تعيشين وتأكلين غيرها
هنادي ميته ضحك ماهي قادره تتكلم .. ولينا وسحر يتريقون على ساميه اللي كانت تطالعهم بأحتقار وما أنتبهت للدرج وطاحت .. قدام الكل ..
رغد تضحك : الغرور يسوي اكثر من كذا اللهم لا شماته
شهد تضحك وبحضنها مشاري : احسن تستاهل
سحر ميته ضحك : الله لا يبلانا اصحاب العقول براحه ويش سوينا لها عشان تسوي كذا
الكل : الله اعلم
رغد تهمش لشهد : شهوده عبدالله رسل مسج ثاني
شهد ركزت على رغد وعيونها : هاتي بقرأ المسجين
رغد تمد الجوال لها : خوذي بس لاحد يشوف المسجات اوكي
شهد : لاتخافين .. محد بيشوف بس خذي ميشو بحضنك
حنين : تكفين شهد هاتي ميشو بنلاعبه ياناس يهبل
لينا تهمس لسحر : هذا اللي قلتي لي قصته
سحر : ايوه هذا اللي جابته شهد
لينا تاخذه من هنادي : وي بسم الله مشاء الله خدوده تزنن ... وجلسوا يلاعبونه وبعضهم يرقصون
عند ريم وسيف .. بعد التصوير والعصير
ام محمد : نخليكم على راحتكم
شوق : الف مبروك ... عقبال الزواج يارب
سيف : امين يارب
ريم ولع وجهها .. زاد عليها لمست سيف ليدها .. طلعوا ام محمد وشوق وخلوهم لحالهم
سيف لف على ريم .. ومسك يدها وباسها : الف مبروك ياريم .. مبروك علينا الأثنين
ريم بصوت خافت ومتقطع : الله يبارك فيك
سيف يبي يحرجها : أيش فيك مستحيه .. ارفعي راسك
ريم بدى قلبها تزيد نبضاته (ناوي يموتني ذا .. ياربي ليش تركونا لحالنا .. اووف بس )
سيف حط يده تحت دقنها ورفع وجهها وعيونها تعلقت بعيونه متفاجئه من حركته اللي قطعت تفكيرها وتذمرها من وحدتهم
سيف: ليش تخبين عني هذا الوجه ..
ريم متقطعه من الحيا : ماخبيته ..
سيف : اجل سولفي علامك ساكته ..
ريم : ماعندي شي اقوله .. وسكتت .. طول سكوتهم الى ربع ساعه
سيف ( خلوني اخربها .. انا انتظر هاليوم بفارغ الصبر حتى اقولها لها )
سيف : ريم ... أحــــــــبـــــــــــكـ
:::
:::
:::
شاف الباب مفتوح ويده الحبل مفتوح عنها .. كانت لحظة مناسبه له .. مناسبه لهروبه بعيدا عنها .. وبعيد عن ذكرى الماضي اللي تجدد مع دخولها لحياته .. ذكرى مرتبطه بألف ذكري عنده .. .. حرر نفسه من الحبال بسرعه ما تخيلها ابداً .. وطلع من البيت كله وكأنه جبل وانزاح عن صدره ... صحى من سرحانه على صوت القزاز
فهد : كم الحساب ..
..: 20 ريال ... اعطاه الحساب .. ومشى بسيارته ..
شغل سي دي كان عنده من زمان ما عمره سمعه ... دخله بمكانه .. وظغط على ok وبدأ السي دي يشتغل .. جاء صوته الهادي
دارت الدنيا وتبيني [ أعذرك ] !
نامت عيوني وعينك > ساهره
إنت لي ماضي ومابي أذكرك
و الغلط وياك ماني مكرره
قلت لك إحذر غروركيكسرك
ومن يحبّك واجب إنت تقَدّره
قبل لا تفكّر تهاجر بأهجرك
وعدّني غيمة حنان مهاجره
مثل ماجَمّعتك أقدر أنثر ك
يعني راسك لو رفعته أكسره
كنت لك مثل المواني ~ أنطرك
لين طاحت من عيوني الباخره
لا تظن أبكي عليكوأخسرك
إللي مثلك ( لازم ) إني أخسره
يا القليل الباقي طاحوا أكثرك !
في بحر - دمع العيون - الطاهره
أبقى أكبرشخص مر ب ناظرك
وتبقى أصغر <~ من نويت أكبّره
في فراقك ماحزنت آآبشرك :
وكانت الفرحه معاك مسافره !
كيف ألوّح لك وأجبُر خاطرك
وإنت إحساسي مكسّر خاطره
أشكر أعدائي كثير ~ و أشكرك
من سبايبكم .. فقدت الذاكره
دارت الدنيا وتبيني [ أذكرك ] !
شفت منّك خير لأجل أتذكره؟
إكتب الشطر الأخير بـ دفترك ،
القلوب البيض .. جداًنادره !
[ لأحـــمـــد الــصانــع ]
مشى بسرعه جنونيه بشوارع الرياض المزحومه جدا ... كانت بحالة الا وعي .. قفل السي دي وبدت الافكار تتلاطم في عقله كالامواج وقت هيجانها
:::
:::
:::
الــــف الصــــلاة والــســـلام علـيـك ياحبــيـــب الله محمد
كــــــــللللــــوووش
تسلط الضوء على الباب .. وسمت بالله ودخلت وهي مرتبكه من انظار الحضور اللي تعلقت فيها .. كانت لابسه فستان ماسك على صدرها لونه موفي وابيض لؤلؤي من عند البطن شفاف وظهرها كلها مفتوح .. وفيه تطريز على شكل فراشات وورد ناعم .. كانت مسويه شعرها كله ملفلف وفيه نفخه من قدام هاديه وعليها تاج فضي .. كانت بقمه النعومه والاناقه وبارزه ملامحها وجمالها الطفولي
بدأ الشعر يرتفع صوته ويعلي
ياريمً سـحرها غازل خجلها
واجتمع مع حسنها زينالخصايل
اشـغلتني والـزعل عـني شغلها
مـاوصل مـن عنده رد الرسايل
الـعيونالـهايمه للشوق ولـها
وانـتثر لـيل السهر فوق المثايل
تـغري الـقلب المولع فيغزلها
و الزعل من شيمة نفوس الأصايل
بـالغلا لـك منزله ما احد وصلها
منغرامك شفت با الحب الهوايل
مـا تصدق فيك روحي من عذلها
ومـا نـدور فيك يا شوقالبدايل
صـدقيني يـامنى روحي وأملها
خـاطرك كانه على شايل
وصوت الزغاريط والصراخ امتلي بالصاله .. مشت بخطوات بطيئه متجهه للكوشه .. بعد ماجلست وبدوا البنات يرقصون قدامها .. وهنادي وس ولينا وتهاني وعبير يستعبطون عليها
رغد وشهد يبوسون ريم كل وحده من جهه ويمسكون يدها ويقرصونها
ريم بصوت خافت : هيه انتم اهجدوا عورتوني
رغد : ياعيني بالله سؤال كم مره حطيتي روج لان لما جينا من المشغل كان لونه بيج والحين وردي
ريم ولعت خدودها : هين يا رغيد .. شغلك عندي بس بالبيت
شهد ميته ضحك على وجهها اللي انصبغ باللون الأحمر : ياحليلها تستحي يابنت عادي زوجك بس بالبيت تهلين لنا السوالف من الالف الى الياء
ريم تغمض عيونها بقهر وهي تبتسم حتى ما تبين شي : انقلعوا ارقصوا يانبيله عبيد وفيفي عبدو
رغد وشهد يوقفون لانهم استفزوها وماسكين نفسهم لا يضحكون : حـآضر .. وراحوا يرقصون
هنادي وعبير كانوا بعيدين عن الكل ويرقصون بالممر قالت بصوت واطي : بشري ويش سويتي
هنادي : لي مستعجله اصبري انا انشغلت بملكة ريم وبالاختبارات .. أمـــا الحين فضيت وعدادي 300
عبير ترفع حواجبها بفرح : ياخطير بس تكفين لا تسوين شي الا بشوري
هنادي : تدرين انهم يجتمعون بحوش عزابيه
عبير طلعت عيونها قدام : ايه .. بس وين ؟
هنادي : والله مدري بس بحاره بعيده مررره .اتوقع بالعزيزيه
عبير : اوف بعيد مره عنا
هنادي تبتسم بخبث : السياره تقرب البعيد ياحلووه .. ولا بعد يشيش الاخ ماجد
عبير تضحك : الحين مقهوره انه يشيش وانتي لا
هنادي تمد فمها وتضغط على شفتها السفليه : والله ابو طربوش فاتح بابه .. اروح اعسل واجي عادي .. بس المكله اني ما اطيقه .. بس انا اوريك فيهم والله لا اجيب له جراك هديه
على كيف كيفك
عبير بنظره تفحص : براسك شي ماهو هين
هنادي تسحبها للكوشه وتجلسها بعد ماخلصت الاغنيه .. وكلهم يسلمون على ريم
ام هديل : الف مبروك ياقلبي ..
ريم بحيا : الله يبارك فيك ياعمتي
جت ام سيف ومعها جدته اللي من اول ماشافتها وهي تذكر الله
الجده : مبروك يابنتي الف مبروك ..
ريم تبوس راسها : الله يبارك فيك ياجدتي
الجده : مشاء الله مشاء الله .. عرف سيف يختار ... الله يوفقكم يايمه ويسعدكم
الكل : امين
ام سيف اتجهه للمسؤله عن الدي جي وطلبت اغنيه خاصه اهداء منها للريم وسيف .. ودخلت ساميه واخواتها بعربيه ملكيه .. تحتوي على هدايا منها طقم ذهب وعطورات وملابس وهدايا ثانيه ..
وقفت ام سيف ووقفت ريم ولبستها عقد الذهب .. وباستها .. ورقصتها هي وبناتها
سحر : شوفوا مسوين فرحانين
رغد : امه وخواته فرحانات عدا الحيه ذي ساميووه
شهد : امشوا نرقص مو بس هم يرقصون .. حرام عشان ريم ... ودخلوا كلهم للكوشه اللي انزحمت والكل يرقص ومبسوط وسعيد
..: ائـــــهههههـــئ قلت لك مابي ماتفهم انت
..: هاتي طيب فلوس .. دبررررررررري لي سامـــعـــــه
..: روح قول لابوي .. انا ماعندي
..: وابوي من وين له فلوس .. هاتي انتي من مكافئتك
..: انت الرجال المفروض انت تصرف علينا مو احنا نصرف عليك
.. اعطاها كف وشد شعرها : انتي ماتفهمين .. قلت لك ابي فلووس
..: ائههئ .. يبــــــــــه شوف ولدك ذبحني ..
..: ههههه ابوي يجي يفكك مني .. مايقدر نسيتي انه مشلول
..: حررام عليك حرام .. ربي ينتقم لنا منك ياواطي انت ما انت اخ انت عدو
:::
:::
:::
بــعد الملكه .. وبالبيت
مها تبوس يد ابوها وهي بحضنه وتبكي : الله لايحرمنا منك يبه .. سامحني انا غلطت وابي السموحه منك
ابو مها : مسامحك يايبه انتي بنتي والظفر عمره مايطلع من اللحم .. وقلبي مايقسى على بنتي وظناي
مها تبعد عن حضن ابوها وتمسح دموعها : الله يخليك لنا يبه حنا بدونك نضيع
شوق تمسح دموعها : الحمدلله ان عمي رضا عليك .. ورجعتي لنا
هنادي تلطف الجو : خساره لو في كاميرا وصورنا عز الله بناخذ جائزة الاوسكار على هالمسلسل
الكل : ههههههه
رغد : حسبي الله عليك بعز حزننا تخربين علينا
ابو مها : هههههه والله زين انها تخرب علينا
هنادي : احم احم عشان تعرفون قيمتي
ابو مها يضحك : على فكره يا شوق لك عندي خبر
الكل : ويــــــش ؟!
شهد : الله لا يبلانا قال شوق مو كلكم لقافه
شوق : ويش الخبر ياعمي
ابو مها : اللي خطبك.. دق علي اليوم وقال انه بيجي هو واهله ويملك عليك اخر الاسبوع
ارتجفت وبانت عليها معالم الرعب والخوف .. وقفت بسرعه وأتجهت لغرفتها بدون اي كلمه
مها : ههههههه مستحيه
هنادي تفكر (لايكون شوق ماتبيه ابوي غاصبها .. لالا ما اتوقع اكيد فيها شي )
سحر : بس يبه ما كأنه بدري ومستعجل
ابو مها : الولد كبير .. عمره 30 ويبي يلح على عمره مابقى بعمره كثر ماراح
شهد : عقبال الكل يارب
ابو مها : امين يابنتي اشوفكم متهنين وسعيدات مع ازواجكم
شهد تدق رغد وتهمس لها : مع عبودك يابطه
رغد تغمض عيونها وبقلبها ( امين يارب اجمعني فيه بالدنيا وبالاخره انت القادر على كل شي )
شهد تطالعها وتضحك وتهمس لها بصوت واطي : على طول تدعين .. الله لا يذوقنا اللي تذوقينه
رغد : يارب اشوفك ميته ومتعذبه بالحب
شهد : يرحم امك لا لا تدعين .. مابي حب ولا خرابيط
رغد بتقهرها : بدعي حتى وانا ساجده امشي نروح الغرفه .. وشالت شهد مشاري .. واتجهت للغرفه
:::
:::
:::
يارب
لما فكرت بكتمان حزني ..
أرعبني قولك ( وابيضّت عيناه من الحزن فهو كظيم ) ..
وكلما فكرت بالبوح بصوت مرتفع ..
تذكرت قولك ( وبشر الصابرين ) ..
فيرعبني ان يُضَّيـَّع بوحي أجري وبشارتي ..!!
يـارب ..
أنت عالم وقادر
اللهم إني أسألك صـبراً لا نسـيان فيه
اللهم إن كان لي عـوض عـلى صـبري
فاجعل اللهم عـوضي فيه
بعد ما خلصت صلاتها ودعاها طوت سجادتها وجلست على سريرها ودمعها على خدها .. ولكن قوت اكثر بعد ألتجائها الى الله .. ودعائها اللي زادها أيمان وقوه ..
طلت بمرايتها .. وهي تشوف وجهها شاحب حزين .. تبدل فرحها الى حزن والآلم ..
دخلت عليها هنادي وهي تلمحها بسرعه تمسح دموعها .. قفلت الباب وراها
هنادي : شوقه ليش زعلانه ماتبين تتزوجين ؟!
شوق حطت عينها بعين هنادي : انتي تدرين مين اللي خطبني
هنادي : لا بس اللي اعرفه انه غني .. وشاب
شوق : احب اقولك انه فهد يا هنادي فهد الجابر
هنادي انصدمت طلعت عيونها قدام : هذاك اللي ... وسكتت
شوق نزلت دمعه حاره على خدها : ايه ايه هو اللي ..وجلست تشهق وتبكي بصوت عالي
هنادي تحط يدها على كتفها : يمكن بيعوضك ويكفر عن غلطه
شوق تضحك بألم : يكفر !! هذا شيطان ماتعرفينه كثري ..
هنادي تواسيها : ما اتوقع ياشوق اكيد حاسس بالذنب وحن قلبه عليك وعلى حالتك
شوق عقدت حواجبها : مابيه يحن علي ابي اشوفه يتعذب قدامي يذوق عذاب السنين اللي ذقتها وانا اعاني لحالي ... مستحيل يكون ندمان ولا تدافعين عنه الحقير
هنادي بأستغراب : طيب ليش وافقتي عليه اذا ماتبينه
شوق لفت عليها وبعونها شر : لسبب خاص فيني .. ممكن تتركيني لحالي
هنادي وقفت وأتجهت للباب : بخليك .. بس ليش انتي متناقضه فكري زين ياشوق قبل تندمين
شوق تصخ عليها : اطــــــلـــعي
طلعت وسكت الباب وهي مستغربه من شوق وتفكيرها وتناقضه الملحوظ
:::
:::
:::
عبدالله يرمي جواله بعصبيه : ليش تقول لي كذا .. انا بويش أذيتها
يوسف يهديه : اهدى ياعبدالله يمكن البنت حست بالذنب
عبدالله يطالعه بنظره بارده : والحل يا يوسف احلف بالله اني احبها واموت فيها .. ما أتخيل حياتي بدونها .. غد هي حياتي اللي ما عرفت قيمتها الا بوجودها
يوسف يجلس قباله ويصب له كأس مويه : والله فاهمك يا عبود .. انت ماتدري عن ظروف البنت هي اكيد بتخاف على سمعتها .. ومابتثق بعلاقة جوال ومكالمات .. وناسي انها بنت وعواطفها تتحكم فيها .. لو ماتحبك ماكان قالت لك تعال اخطبني
عبدالله : انا ماني زعلان علشان السبب التافه هذا .. بالعكس انا اللي مزعلني مسجاتي اللي ماترد عليها
يوسف : يمكن انشغلت مع اختها .. خلاص يا عبدالله اهدئ شوي .. مايصير اللي تسويه
عبدالله : صدق الايام اللي عشتها بدونها عرفتني قيمتها .. انا بكلم اهلي بسافر لهم
يوسف يضحك : لاتستعجل على رزقك .. كل شي يجي بوقته لحاله اذا كانت من نصيبك بتأخذها
عبدالله يبتسم : ان شا الله ما أحد بيتزوجها غيري .. وانا اللي حبيتها وانا اللي لازم اتزوجها
يوسف : بدعي لكم .. بصلاتي
عبدالله : لا ياخي فكنا من دعواتكم يمكن تدعي علينا بالغلط ههههههههه
يوسف : هههههههه ايه اضحك خلك انسان فري
:::
:::
:::
كانت تقرأ مسجه
( الــف مبروك لأختك وعقبالنا .. بس ما ظنتي اذا انتي تتهربين مني .. )
فتحت المسج الثاني
( رغد ليش تغيرتي فجأه .. لا مسجاتي تردين عليها ولا اتصالاتي .. ليش الهروب ؟! )
قفلت جوالها وحطت على الكمودينه جنبها .. ونامت على جنبها الثاني .. وهي تتذكر كلامه لها وحبه وأحساسه الصادق .. نزلت دموعها .. وحن قلبها عليه ترددت تكلمه او لا
رغد : لا لازم يعرف اني عند كلمتي ..يايخطبني يا ننهي كل شي .. انا ماني لعبه عنده
صحى مشاري من نومه وبدأ يصيح بأعلى صوته
قامت رغد وشافت الساعه كانت الاعه 3 ونص الفجر .. شالته من سريره وطلت فيها للصاله .. تلاعبه وتأكله ..
رغد : ياحليوووه .. اسووو أغــآ .. وه فديتك ياميشو المزيون انا خطبتك لبنتي ان شاء الله وين بنلاقي احلى منك .. بكره تفلق قلوب العذارء ... ابتسم وهو يشوف حركاتها
رغد : يابو عين طويل من الحين تضحك على كلامي .. أكيد تفهمني صدق العيال مالهم أمان
دخلت عليها مها اللي ماجاها نوم من فرحة رضا ابوها عليها : رغوده انا ما سألتكم مين هذا
رغد لفت عليها : معقوله وكالة ال بي بي سي ماقالوا لك
مها تضحك : قصدك هنادي وسمر
رغد : احد غيرهم يعني
مها : لا ماقالوا لي .. بس ايش أسمه اول شي
رغد تبوسه بقووه : ميشووو .. مشاري يؤبرني أبر
مها : طيب حكيني القصه يالله ..
:::
:::
:::
خالد : الــوو وينك ياعم ...
فهد : انا بالرياض الحين
خالد متفاجئ : بالرياض ويش تسوي هناك
فهد : سالفه طويله انا جاي لجده اليوم طيارتي الساعه 8 الصباح
خالد : توصل بالسلامه .. بس لازم تكلمني عشان لنا جلسه طويله
فهد : اوكي بالليل نتقابل بالشاليه .. واقول لك كل شي
خالد : والله يافهد احس وراك مصيبه ماهي هينه وناوي على شي
فهد يضحك : محد يفهمني غيرك يا خالد ..
خالد : آآه منك .. يصير خير لما نتقابل ونشوف ويش وراك
فهد : اوكي سيووو ابو ميسا
خالد يضحك : ميسا هيه لاتجيب اسم زوجتي على لسانك
فهد : اقل اهجد بس .. قول لها تسوي لي حلى بيتي ابي اذوق طبخها
خالد : شحاذ ويتشرط .. بقول لها يارب ترفض
فهد : والله لو تسويه لها عندي هديه معتبره
خالد : لا بالله تعال طق حنك معها
فهد : اقول يالله باخذ لي غفوه قبل اروح المطار .. باي
خالد : باي
:::
:::
:::
وقفت مصدومه : ويش تقولين!! اهله تركوه
رغد : ايه تركوه ياعيني عليه .. وشهد جابته ما قدرت تخليه قلبها يألمها عليه
مها تأخذه بحضنها : لاحول ولا قوة الا بالله .من اي طينه اهله كيف يتركونه
رغد : ما ادري عنه بس احنا مابنقصر عليه
مها : ان شاء الله .. انا رايحه انام
رغد : طيب وانا بنوم ميشو وانام ..
جلست لحالها تفكر بينها وبين نفسها وبحلمها اللي شافته البارحه تعوذت من الشيطان وشالت مشاري على اكتافها وأتجهت لغرفتها ونامت
بــــعــد أربع أيــام
ريم ماسكه جوالها وتضحك : وي فديت عيونه أنا ...
دخلت هنادي وهي تقزها : ويش فيك تتفدينه .. يابخته ميته عليه
ريم : مرسل لي صورته .. مصور نفسه عشاني
هنادي وسمر بلقافه : جد .. نبي نشوفه تكفين
ريم تضم الجوال على صدرها : اول شي اذكرو الله
هنادي وسمر : مشا الله .. اللهم لا حسد .. ومدت لهم الجوال
هنادي شهقت : وووووووووووع
سمر تغمض عيونها : يمه الحقيني .. هذا رجال والا غوريلا
ريم بزعل تسحب الجوال : غوريلا تجي فوق راسك وتكسره .. والله انه مزيون غصب عن الكل
هنادي ميته ضحك : صدق المثل اللي قال القرد بعين امه غزال
سمر بزعل : والله ماتستاهلينه اقسم بالله انتي احلى منه مليون مره ظلمتي نفسك صراحه بكره عيالك شلون يجون خليطي
هنادي ماهي قادره تعلق على الصوره لانها توقعت سيف ابيض ووسيم لكنه خيب أمالها اسمراني بس مملوح وماتت ضحك على كلام سمر اللي يحطم
شهد دخلت وهي تضحك على ميشو اللي يلعب : دوم الضحك بس ويش السبب
سمر : شوفي سيف افندي وتعرفين السبب
شهد تطالعها بنظره حاده : وعلامه سيف رجال ومافيه شي
سمر : شكله يجيب الهم صراحه اكيد ميت عند ريومه شايفها قشطه وتجنن مو مثله ومثل اهله
ريم وقفت وصرخت على سمر : هيه ما اسمح لك تتكلمين عليهم وربي انهم يسوونك
هنادي : سمر ماقالت شي بالله شفتي اخواته واهله يلوعون الكبد .. اللهم جدته اللي حلوه ملامحها .. اما هو صراحه غسلت يدي منه
ريم بقهر : بالنسبه لي والله انه احلى من توم كروز
انفجروا البنات بالضحك على كلامها وطريقتها اللي قالتها بقهر وتحطم
شهد تضحك : لالا عاد ويش جاب توم كروز عنده ظلمتي توم ياريم سيف مملوح بس مو احلى من توم ..
ريم نزلت دمعتها لان كلامهم جرحها وراحت لسحر بالغرفه
سمر : يؤؤؤ ماتوقعت تبكي .. ماهي للدرجه هذي
هنادي : ماعليكم منها ماخذه مقلب بسيف خلوها تصحى صجت راسي فيه بالاخير وربي احسبه دراغولا خرعني
شهد بحده : انتي وهي شفتوا لو تسبونه قدامها ياويلكم مهما كان هذا زوجها وماترضى عليه احد يتكلم ويسبه .. على بالكم زيكم متبلدات الاحساس
سمر : طيب طيب انتي . المهم خلاص بكره بيجي اللي خطب شوق
شهد : يس ومها حايسه بالمطبخ وشوق تنظف .. قوموا ساعدوهم
هنادي توقف وتبتسم .: اكيد يبون اغراض من السوبر ماركت .. امشي سمر نروح نعرض خدماتنا
سمر توقف معها ويتجهون للمطبخ ..
شهد : ياربي من هالبنتين قسم بالله انهم سوسات
بالمطبخ
هنادي : شو عم بتعملووا
مها : اقول روحي ارتاحي انتي وهي
سمر تدق شوق : فرحانه هاه
شوق ومزاجها متعكر مره : اقول وربي لو ماتروحوا عن وجهي ماصير خير لكم
هنادي : افرحي ياختي بكره ملكتك المفروض ترتاحي واحنا نشتغل بدالك
شوق ترمي المكنسه من يدها وبحده استغربوها : طيب يالله اشتغلي انتي وهي
وطلعت لغرفتها ورمت نفسها على سريرها وهي تفكر بنفسها وكيف متوتره وقلقانه
شوق : آآآه ويش سويت فيني يافهد كرهت الدنيا كلها .. وبكره كيف بيكون .. يارب كون بعوني مالي ملجأ الا لك
دخلت مها ورغد عليها ..
رغد : قومي يالله سوي بخار
شوق : ما أبغى ..
مها بتتجنن من عنادها : ياشوق خلي الجنان عنك .. يالله انا زبطت كل شي ومجهزة الاغراض بكره الولد بيشوفك ماتبين تكوني حلوه بعيونه
شوق تجلس : يكفي اني حله بعيني .. وماعلي برائي الناس حولي
رغد شهقت : مجنونه ... مسكت يدها وسحبتها .. يالله بس عن الكلام الزايد جهزنا لك كل شي راح نخليك ورده .. ونطلعك قمر
شوق كشرت : اوف منكم بسوي وامري لله ..
مها : ترى جحزت الكوافيره بتجي العصر بكره .. وفستانك اخذه جلالي يسوي له كوي بالبخار
ويش كمان ايه بندر تكفل يجيب لك مسكتك على ذوقه
شوق استحت : ليش كلفتي عليه مو لازم
رغد تشد شعرها : هيه انتي ويش صاير لك تستهبلين ... الناس جايين من سفر وماتبين تكوني احلى من القمر ... ياربي على تفكيرك الغبي
شوق : احس ماله داعي كل اللي سويتوه
مها تجلس وتحط رجل على رجل : لا ياشيخه اجل لو اقولك اني حجزت المصوره هديه مني لك
شوق تفاجئت ما حسبت حساب التصوير : ليش .. لــــيـــــش سويتي كذا ؟!
مها : ياربي منك ... قومي قومي .. خلينا نبدأ بالشغل .. سحبت رغد من يدها
مها شهقت : يؤؤؤ لا يكون تبيني اسوي لك بخار وانتي لابسه هالبجامه الطويله
شوق بنص عين : أجل شلووون ...
رغد : هههههههه طلعي لك شي قصير ياعبيطه
شوق وجهها حمر : لالالا وجع استحي
مها تفتح الدولاب تدور شي قصير : على بالها فهد .. اقول اسكتي ولا تعارضين .. رغد سوي اللازم وانا بلحقك
رغد تضحك : من عيوني .. الحين اسوي كل شي .. واخذت شوق بيدها
ريم : مقهوره منهم ياسحر .. ائههههئ
سحر : ماعليك منهم اهم شي انتي وقلبك اللي يحبها .. ولا يهزك شي هم ينكتون عليك
ريم : بس ليش يقولون غوريلا .. معقوله شكله مو حلو
سحر :هههههه والله بينرفزونك .. اما سيف وربي حلو والولد مايعيبه شي اهم شي انتي بعيونه ملاك
ريم اقتنعت : ايه صح ... وربي ياسحوره يقولي كلام ماعمر سمعته الا منه
سحر زاد اهتمامها : ويش يقوول
ريم تزبط جلستها وتقلده : احبك ياريومتي .. ماتتصوري فرحتي اننا صرنا زوجين ... كيف بتحمل بعدك عني
سحر : ياهووو.. والله في تطورات مادرينا عنها .. ايوه كملي
:::
:::
الـــيـــوم اللي بـــعـــده
المغرب
الكل متجهزين .. يستنون وصول فهد وأهله
ريم : مشا الله تهبلين ياشوقه عمري ماشفتك بالشكل هذا ..
شوق واقفه قدام المرايا : احس اني علبه الوان ..
مها : اسمعوا الغبيه ايش تقول .. وقسم تجنني .. وبعدين الفستان الاحمر طالع توحفه عليك
شهد تدخل مع الباب تزغرط : كلووووووووش الف الصلاة والسلام عليك ياحبيب الله محمد
جت هنادي وبيدها صينيه تدق فيها : قولو اسم الله على غزال الظبي قولوا اسم .. يازين شوقه ام العيون السود يازين شوقه .. وهلا باللي زهى بلبس الحرير مورد الخدين حلوه الشفه .. تعالي تعالي حياك الله ياشوقه تعالي ...
سحر وريم ومها يرقصون بخبال .. وشهد ترفع ميشو وترقص فيه
سمر : عليهم عليهم ... عــــآآآآآشـــــوآآ
شوق تبتسم : الله يرجك ياهنوو ضحكتيني
هنادي تجيب الكرسي وتجلس عليه وتدق بالصينيه : سبحانوه وقدروا عليهم .... وسكتت لانها نست التكمله
الكل : ههههههههههههه هديل تدخل : كلووووش كلوووش دقووا يالله برقص ..
حنين : اووويـــــهـآ
وكلهم اتجمعوا عند شوق يضحكون ويرقصون حولها
مها : الاستريوا جهزته بالغرفه اللي راح يدخلها فهيدان
شوق بان الارتباك عليها : خلوني لحالي باقرا قرآن
طلعوا كلهم ولبوا رغبتها .. وبعد نص ساعه وصل فهد ومعه ابوه وخالته واخواته وخالد صديقه
ام هديل : ياهلا وغلا .. نورتوا المدينه بجيتكم
ام رياض : النور نوركم ..
مها : حياكم الله .. زارتنا البركه والله
ام ليان : هلا فيك ... كيفكم يابنات
الكل : الحمدلله بخير ..
ام دانا : مشا الله تبارك الله .. هذول اخواتك يامها
مها : خواتي وخوات شوق ..
ندى تهمس : دانا .. والله كلهم قدنا وناسه
دانا بفرح : ايه صح ..راح نستانس الليله احس
سحر : يالله يابنات نروح بالصاله
وقفوا كلهم .. عدآ ندى ودانا
ام رياض : روحي ياندى انتي ودانا معاهم
حنين : تفضلوا معانا .. واتجهوا كلهم للصاله
دانا تهمس : بيتهم متواضع مره
ندى : باين انهم ناس طيبين ...
دانا : والله حرام فهد يتزوج منهم يصلح له وحده تكسر راسه
ندى تضحك : يمكن البنت تجننه ماندري ..
دانا : ما اضن اخوك اللي هو خالي متوحش
ندى : اووش لاحد يسمعنا
هنادي بلقافه : انتي شقيقه فهد ياندى
ندى : لا والله هو اخوي من ابوي
خلود : وام دانا طيب اخته من ابوه كمان
ندى : ايوه كلنا اخوانه من ابوه هو وحيد امه الله يرحمها
الكل : الله يرحمها
شهد جات بالعصير : حيا الله ندو ودنو ... تفضلوا
دانا : ثانكس
شهد : يو آر ولكم
ندى : والله حبيتكم من اول نظره
سحر : حتى انا الله يشهد علي
رغد : ويش رايكم اجيب الاستريوا هنا عشان نرقص بعد الصلاة
خلود : ياليت والله
رغد توقف : امشي ياهنادي خلينا نجيبه
هنادي : اوكي اوكي
بالغرفه عندها
مها : يالله تجهزي الساعه 9 ونص
شوق ( آآه ياخوفي منه ... يارب كون معي .. خايفه منك يافهد خايفه )
مها تاشر لشوق : شوقه ايش فيك سرحتي
شوق : لا معاك حبيبتي
مها : طيب لفي على جنب .. بشوف التسريحه ثابته
شوق تلف وتشوف شكلها بالمرايا : متى توصل المصوره
مها : بعد شوي ... دخلت شهد وهي شايله الدفتر بين يديها
شهد : وقعي يا شوقه يقول عمي ... مدت الدفتر لها و القلم
شوق وهي متردده توقع او ترفض .. مرت خمس دقايق وهي محتاره
شهد بأستغراب : شوق ليش متردده
شوق توقع حتى تخلص من اسئلتهم : خلاص خذي رجعيه لعمي .. مامرت هالحركه على مها لكنها سكتت وراعة توترها
سحر وعبير : ياهووووووووووووو
دانا تجلس : تعبت انا من الرقص بأستريح
سمر : والله طلعتي رقاصه
ندى تضحك : ومو اي رقاصه ..
رغد تزغرط : كلووووووش وتمت المكله الحمد لله
الكل : كلوووووووش
بالمجلس
ابو مها : الف مبروك ياولدي
فهد : الله يبارك فيك
ابو رياض : مبروك ياولدي
فهد : الله يبارك فيك يا يبه
ابو مها : لا اوصيك عليها يافهد هذي امانتي عندك البنت ملتزمه ومحافظة على صلاتها .. حطها بعيونك تراها يتيمه
فهد يبتسم لعمه : ان شا الله ياعمي .. بحطها بعيوني
ابو رياض يهمس لولده رياض : عز الله بيخلفها فهد عن دينها ..
رياض يضحك بصوت واطي : هههه الله يهديه يبه ... بس الرجال طيب
ابو رياض : اي والله ناس طيبي وينشد بهم الظهر
ابو مها : يالله ياولدي ماتبي تشوف البنت
فهد يوقف : اكيد ياعمي
خالد يهمس له : انتبه يافهد لا تسوي شي لها
فهد يبتسم : لا توصيني
عندها
شوق وقفت بسرعه : ويش تقولين .؟!
سحر : ابوي يقولك تعالي بالمجلس .. الولد بيشوفك يالله
شوق مشت وهي تكلم مها : كيف شكلي
مها : قسم تجنني .. يالله روحي عشان بعدين ندخل احنا عندك مع اهله
مشت معها وطلعت بالصاله .. وشافوها ندى ودانا
ندى تأخذ دانا على : جنب .. مشا الله تهبل ..
دانا : خالي مزيون وهي مزيونه ايش بيجيبون
ندى : اسكتي بس
مها تمسكها قبل لاتدخل : سمي بالله قبل تدخلين .
شوق : طيب ...مشكت كالون الباب حست ان الدقايق تمضي ثقيله عليها
إنت يا / وجهي الآخر ~
يا اشتعال الدم فـ [ عروقي ] .. !
ليہ يحرقني برودڪ .. ؟
و
ليہ آحسڪ في خفوقي , { .. آلف طعنہ
................................, { .. آلف جرح
................................, { .. آلف نزف
................................, { .. آلف هـم
فتحت الباب بهدوء ودخلت وهي منزله راسها للأرض وما رفعته
كانت لابسه فستان احمر ساتان .. ناعم وفيه تطريز بسيط من عند الصدر بارز بياضها وخصرها وقوامها الرشيق ..
ام رياض : ادخلي ياحبيبتي .. مافي احد الا زوجك ..
ارتجفت من كلمتها اللي هزتها من الاعماق .. زوجها ترددت الكلمه على أذنها ..
زوجــــــك ..
زوجـــــــــــــك ..
زوجـــــــــــــــــــــــك ..
{... زوجـــــــــــــــــــــــــــــــــــــــــك ... }
ام رياض مسكتها مع يدها : ويش ياقلبي مستحيه ... تعالي اجلسي جنب زوجك
شوق ( آآآه ياهالكلمه .. تعذبني وما أحد يدري ..)
مشت معها وقلبها تزيد دقاتها .. لمحت ظله وهو يوقف قبالها ..
ام ليان : ايش فيك يافهد سلم عليها ..
فهد بهدوء تام : الســــــلام عليكم
ردت عليها بصوت خافت جدا .. وصوته يقتلها : وعليكم السلام ..
مسك يدها وجلسها جنبه وبداخلها نفسها تقتله وترتاح وجودها جنبه يقرفها .. فكرت بأيامها الجايه معها كيف بتتحمل .. تأكدت انها تهورت بأتخاذها للقرار ماقدرت ترفع عينها حتى تشوفه وتشوف لمعه الانتصار بعيونه .. خوفها مسيطر عليها .. والخوف من مستقبلها هو الطاغي اكثر واكثر .. لكن هو وينه ووين مشاعره واحاسيسه بالنسبه لها مبهمه وغامضه ماتدري ويش اللي يدور براسه .. ولايكمن أن تعرفها .. فهد هو اكثر شي مظلم في حياتها
مين فهد .. وكيف شخصيه فهد ... والمهم لها ويش غرضه من زواجه منها .. وأي انتصار حققه ..
ام دانا : يالله نخليكم لحالكم قبل توصل المصوره
طلعوا ومابقى احد غيرهم .. بدأ الجو يتكهرب من نظرته المتفحصه لها اللي حست فيها وحست بقربها منها أكثر وأكثر بدت تتوتر .. ارتعش جسمها لكن حافظت على هدئها القاتل
لف عليها وبصوت واثق : وأخيرا صار اللي براسي ياشوق ..
؛؛؛
؛؛
؛
الــــى هـــنــــآ تبدأ رحلتها لعالم اخر .. ياترى ماذا سيواجهها ؟!
وهو الغامض ماذا سيفعل .. لكي تنجلي سحابه الغموض عنه ؟!
زواج الثانئي الرائع متى وكيف وماذا سيحدث به ؟!
فراق قد يكون وقد لا يكون ... ولكن من المقصود بهذا ؟!
حب على عتبات الانتظار .. ينتظر الأذن والسماح ولكن مـــن ؟!
غموض اشخاص لم نعرفهم .. لهم حياتهم المختلفه وقصتهم المختلفه ايضاً من هم ؟!
رغــــد وتخوفاتها هل ستصدق ام ستكذب ؟!
ريم وحياتها الجديده ... هل ستكلل بالنجاح ؟!
شهد ... وكثير من المفاجئات ستكون بأنتظارها ؟!
هنـــادي .. كلمه قد تكون هي الحقيقه متهوره وماذا ستحصد نتيجه تهورها ؟!
|
10-04-10, 07:25 AM
جديد مواضيع قسم القصص المكتمله
العرض العادي
