خيالات أنها مجرد خيالات تلك التي تقيدنا وتسجننا بداخل اوهام نسميها أحلام ونغفل عن انها ليست سوى
احلام مستحيله يصعب تحقيقها
سألتفت الى احلام واقعيه أكثر يمكن لي ولك ولاي شخص بالحياه تحقيقها
فالوهم لايولد الا الوهم والاوهام قد توصلنا الى طريق مظلم لاحل له سوى الممات بعد اليأس
فكيف نعيش هذه الحياه بيأس يسببه حلم مستحيل يأسرنا الى يوم الممات ..هناك بالبعيد شمس تشرق وعصفوراً يغرد ..وموجاً يركض.. فل نتجه للجانب المشرق من الحياه ونجعل من احلامنا واقع ندرك بعقولنا تحقيقه
الفصل السابع عشر
الشرقيه سنة 1424 للهجره .. 11 رجب ..يوم الخميس
الساعه 7 المغرب ..
سوق الدمام ..شارع الحب بالتحديد ..
رفعت القماشه الموف ووجهتها لسحر : وش رايك فيها
سحر : عاديه مااحس فيها شي زود
لجين تناظر البياع: بكم هالقطعه
البياع وهو يسبل بعيونه للجين : هذي بـ 1100
لجين : بال ليه عاد وش فيها زود
البياع وهو مبتسم : عشان خاطر عيونك 850
لجين : بال كل هذا تخفيض
سحر وهي تندس عليها وبصوت واطي: شوفي كيف ناظرك ..ابتسمت : باين عليه معجب نزليها اكثر باخذها
لجين تبتسم بخبث : الحين اوريك فيه ..حطت كوعها على الطاوله الزجاجيه وسندت ذقنها بيدها وناظرت فيه بدهاء .. الرجال انسحر بعيونها الحلوه المكحله بعنايه
لجين بدلع: طيب والحين
البياع واللي راح فيها : هاه خلاص 700 ولا تزعلين
لجين بدلع اكبر: لاعاد شدعوه مانزلتني شي المفروض عشان خاطري بـ 500 والا مالي خاطر عندك
البياع واللي ينقاله فزعه : ياشيخه 500 ..500 عشانك خذيها لو بالمجان
لجين تسوي فيها ثقل: لا لا مااحب اخذ شي بالمجان .. هاتها ابيها
حط قطعت القماش بكيس وارفق ورقه عليها رقمه بالكيس بعد مادفعت الـ 500 طلعت مع صديقتها برا وفتحت الكيس: اقص يدي ان ماحط رقمه ..وهي تفتش بالكيس شافت الرقم ..ناظرت بسحر وهي تتبسم : ماقلت لك
فتحت الورقه البيضه اللي باين انها مأخوذه من دفتر ملاحظات .. فهد الـ...
ابتسمت وهي تهز الورقه بسخريه : لا واسمه فهد والرقم مميز ..حطت الرقم بشنطتها وضحكت : بخليه عندي يمكن يجي يوم احتاج قطعت قماش
سحر وهي تضحك : والله منتي بهينه
:
:
:
الرياض الزمن الحالي حيث توقفنا سنة 1426 للهجره يوم الثلاثاء والساعه تشير للـ 1:30 مساءً..
دور بكل الجوال ودور بأدراج الصاله وناظرها : انتي متأكده انه صور
العنود بخوف : لا سلمان ماادري
سلمان واللي مازال ماسك يدها : اقول امشي مااعتقد صور ولو صور بعد اللي سويته فيه يبي يمسح التصوير
العنود وهي تسحبه وتبكي : وقف سلمان
سلمان : وشو بعد
العنود : اخاف يكون مصور وبعد ماحرقت وجهه ينشر صوري
ناظر سلمان بالدرج : طيب تعالي ندور فوق
العنود : لا يمكن تاركهم برا البيت او شي
سلمان معصب : لاتخليني اروح اذبحه الحين وخلاص
العنود تمسكه بقوه : لا لا وقف بلا جنون
سلمان : اجل ياللا مشينا
مشى معاها الى ان طلع برا البيت ومشى مسافه الى سيارته وهو مازال ممسك بيدها كانت مرتبكه ومتوتره وتحاول تبعد يدها عن يده بس هو كان ممسكها بقوه كأنه ماسك شي خايف انه يضيع منه ..كان يمشي بثبات ومالتفت لها ولا مره ..اول ماوصل للسياره فتح لها الباب بيده الثاني : اركبي
العنود وهي تناظر تحت بيدها اللي هو ماسكها : كيف اركب
سلمان واللي اخذ باله من حركته ترك يدها بسرعه وارتبك : اسف
بعد ماترك يدها لف بسرعه لجهة السواق عشان يركب وهي فتحت يدها وهي تحس بحرارة جسم سلمان اللي تسللت من يده لها ناظرت بيدها اللي بجد صارت دافيه واستغربت هو معقوله جسمه كذا والا من الانفعال ارتفعت حرارته ..
ركبت السياره وبعد ماتحرك ناظرته وهي مستحيه : سلمان
سلمان بلا مبالاة : نعم
العنود : الله ينعم عليك بس بغيت اسألك
سلمان ببرود : اسألي
العنود : حرارتك مرتفعه
وقف بسرعه وهو يضرب بوري للرجال اللي قدامه والتفت لها بسرعه : وش قلتي
العنود بهدوء: اسألك حرارتك مرتفعه ؟
سلمان مرتبك : يعني
العنود : انت كذا يعني لما تنقهر والا تعبان
سلمان التفت لها يناظرها بفهاوه مايدري ليه ضربات قلبه مره سريعه مستغرب سؤالها والا حاس بخوفها والا مستغرب قربها منه مايدري ..حس بدوخه غريبه براسه سند راسه على الدركسون بحركه غريبه
العنود واللي خافت : سلمان شفيك
رفع راسه بتعب : مافيني شي ..ماادري يمكن بجد حرارتي مرتفعه
ناظرت بالشارع ولمحت سوبر ماركت من بعيد التفتت بسرعه لسلمان وهي تأشر على السوبر ماركت : تقدم الى هنا بشتري شغله
سلمان بتعب: طيب
مشى بسيارته الى ان وقف عند السوبر ماركت فتح بابه والتعب واضح على وجهه اللي تغيرت ملامحه فعلاً : وش تبين ؟
العنود تفتح بابها : انا بنزل
سلمان معصب : مافيه تنزلين انثبري
العنود بأصرار : انا هالمره اللي بعصب وبصر على رايي لأن معي حق بنزل دقيقه وبرجع ولاتسوي فضايح وافتح المرايا اللي قبالك وشف وجهك
نزلت للبقاله وهو يناظرها التفت ونزل المرايا اللي قدامه وناظر وجهه وهو يسأل نفسه : شفيك سلمان مهزوز لذي الدرجه
فتحت الباب وركبت السياره : صرت احسن
سلمان : مافيني شي
اعطته غرشة المويه وفتحت شنطتها طلعت اسبرين واعطته له : اشرب عشان تصير احسن والحين بس تروح البيت تغدى زين
سلمان بهدوء: طيب
العنود تسترسل : من يوم علمتك بالسالفه للحين وش اكلت
سلمان وهو يحرك السياره : مااكلت شي
العنود بتساؤل: ابد
سلمان : شربت شاهي
العنود حست بوجع ببطنها يوم قال شاهي وتغيرت ملامح وجهها وسكتت وماقالت ولاكلمه
سلمان يناظرها : شفيك
العنود بهدوء: مافيني شي
:
:
نفس التوقيت ومع فارق بسيط والساعه تشير للـ 1:35 الظهر
صوت جوالها راحت بسرعه للجوال : الو
بندر مبسوط : انا برا ياللا اطلعي
نوره : ياربي منك طيب بطلع
راحت غرفتها بسرعه لبست عبايتها ونزلت ..
قبل تطلع وقفتها ريم بنبره مستفزه: وين رايحه على الله
نوره تأشر لها روحي: انقلعي بس بجيب الغدا وقلت لماما مالك دخل
ريم تحط رجل على رجل وتكمل تصفحها للمجله كالعاده وهي تتحلطم: اعوذ بالله الواحد مايقول لهم كلمه
طلعت برا اول ماوصلت عند الباب الخارجي غطت وجهها وتنفست بصعوبه وفتحت الباب بيدين ترجف
بندر واللي كان واقف ورى الباب على طول تبسم اول ماشافها ..
نوره رجعت خطوتين لورى : وراك ناشب بالباب
بندر مفهي ويناظرها : هاه
نوره : اقول ليه ناشب بالباب
بندر وللحين مفهي ويناظرها بتمعن : ياويلي يازين صوتك كذا
نوره واللي استحت وارتبكت : جيب غداك قبل لايجي احد
بندر وهو يناظرها : لا لا مابي وحشتيني بعدين انتي ماتخليني اشوفك ولاتطولين وانتي تكلميني حارمتني من كل شي مو رايح
نوره تحاول تقفل الباب بس ماتقدر لأن بندر ماسكه بقوه ..
بندر يتبسم وبكل غرور : لاتحاولين
نوره بغرور اكبر : طيب خلك واقف هنا انا بدخل داخل ولا علي منك
بندر يكتف يدينه بلامبالاة : عادي روحي بس ان قطعوك بيتكم وخلوك كبسة الغدا لاتجيني
نوره بدلع : بندر ياللا عاد لاتصير بايخ
بندر يلف مرتين حول نفسه : ياويلي يازين اسمي بس يابنت وخري بدخل اخطبك من ابوك
نوره مستحيه : روح بس ماعندك سالفه
بندر : الا والله عندي بس لو ترضين
نوره : لو رضيت انا بابا مستحيل يرضى اشتغل بالأول
بندر بأصرار : طيب انا بشوف صرفه لأبوك
نوره بهدوء وهي ماده يدها : طيب جيب الغدا
بندر : نوره بشوف وجهك
نوره بعصبيه : ازعل ؟
بندر بسرعه : لا لا لا امزح امزح خذي غداك
اخذت اكياس الغدا الكبيره وهي تناظرها مستغربه
فتحت محفظتها عشان تطلع الفلوس ..
بندرناظر فيها ومسك المحفظه بسرعه :وش تسوين
نوره بهدوء: بعطيك فلوس الغدا
بندر سحب المحفظه بسرعه وفتح واحد من اكياس الغدا وهو معصب رماها بداخله وناظرها بعيون وضحت فيها العصبيه: انا يوم اقول لك كم عندك كان قصدي عشان اهلك لايسألونك من وين لك تعزمينا.. تدرين انتي بحركتك هذ ي خليتيني احس اننا بجد اثنين مو واحد نفس ماكنت متصور..مشى لسيارته وهو مقهور بدون لايلتفت لها
نوره بصوت واطي خايفه احد يسمعها: بندر بندر اصبر
حرك سيارته بسرعه لدرجه وضح ان سايق هالسياره معصب او متهور
قفلت الباب اخدت الاكياس ودخلت البيت ..
عهود تناظرها : وراك طولتي برا
نوره : السواق الغبي خلاني اطلع اخرها ماوصل انتظرت شوي الى ان وصل وبس
عهود تاخد الاكياس منها وهي تشم الريحه: ياسلام ريحة الأكل حلوه مره
نوره تسحب واحد من الاكياس من جهه وحده: اصبري باخذ محفظتي ..حطت يدها بالكيس اخذت محفظتها وراحت بسرعه عند الدرج بحط عبايتي بالغرفه وبجي لاتاكلون اصبرو بيجي سلوم وعزمت العنود
عهود تضحك: مو مصدقه انها عازمتنا على غدا مالت بس
نوره راحت غرفتها بسرعه فسخت عبايتها ودقت على بندر اول مره مارد عليها ثاني مره عطاها بزي ..دقت للمره الثالثه وبرضو عطاها بزي ..انقهرت وهي تفكر: ياربي بندر والله ماقصدت انا بعد مااقدر اخذ الغدا وانت دافع قيمته بكل دم بارد استحي
عهود بعد مافتحت الباب: مجنونه تكلمين نفسك
نوره بدون نفس: وش تبين
عهود : ياللا نتغدا وصلت العنود
نوره بتساؤل: وسلوم
عهود: لاباقي ماوصل بس ماما قالت بتخليه يتغدا مع بابا عشان العنود معانا
نوره: لابابا يتأخر ومرات مايجي على الغدا تجلس العنود معانا بدون لاتشيل عبايتها
عهود مستغربه: تاكل من تحت الغطا
نوره تمسكها وتمشي معاها: هي من متى غطت وجهها عن سلوم دايم يشوفها يعني جات على اليوم
عهود تضحك: والله انك صادقه بس ماما يمكن مايعجبها
نوره: امشي انا بقنعها
بعد ماجلسو على الطاوله بحول 7 دقايق ..
دخل البيت كان لونه مخطوف وواضح عليه التعب ناظرت فيه غصب عنها وحست بخوف لما شافت وجهه الشاحب ..
حط رجله على اول درجه والكل يناظره..
نوره مستغربه: سلمان شفيك
سلمان يحاول يكون طبيعي: مافيني شي..تبسم وبكل هدوء : سلامتك
نوره: تعال تغدا
سلمان: لالا مابي
نوره بسرعه: تعال طلبتك انا عازمتكم حرام تكسفني
ناظر بالعنود اللي منزله راسها على الصحن وناظر بأمه
ام سلمان: تعال بجنبي ياوليدي
نوره راحت له بسرعه مسكته من يده وسحبته: ياللا تعال تغدا
مشى معاها بهدوء واول ماجلس وناظر بالغدا :والله حركات كم دافعه فيه
نوره بأرتباك: اكل وانت ساكت مابي اقول
سلمان يناظرها بطرف عين: من وين لك الفلوس شاحذتهم من ماما اعترفي
نوره بثقه وبكل غرور: لافلوسي
سلمان مستغرب: من وين لك مكافأتك يادوبه؟ لاتقولين تجمعين فلوس ..وضحك
نوره تسوي زعلانه : بايخ
سلمان ابتسم رغم الألم اللي حاس فيه وناظر بالأكل وهو يفكر:لاانا اكلمك جد الغدا هذا ..حط يده عند ذقنه وناظر بأمه : فيه غير الموجود ع الطاوله
ام سلمان: ايه فيه بالمطبخ
سلمان يسوي بيدينه حركه تعني (تقريباً): يطلع له حول 700 ريال
العنود بكل برود: هذا ان ماكان اكثر لاتنسى السلطات والمقبلات وغير البيبسي
نوره تدوس على رجل العنود: بلا فلسفه
العنود متألمه: امزح شدعوه
سلمان بأقتناع: لاكلام العنود صح ..رفع الشوكه بعصبيه تظهر تعبه: بنت منين لك
نوره بهدوء: ماجبتو المبلغ صح ومن مطعم للثاني تفرق بعدين عندي مبلغ ومن زمان ناويه اغديكم على حسابي بعدين اكل ورح نام شكلك مرهق
سلمان بأيجاب : أي والله
بعد مابدا ياكل بشوي حس برجفه بجسمه طاحت الملعقه من يده وبان التعب عليه اكثر
ام سلمان التفتت له بسرعه: بسم الله عليك
سلمان اخذ الملعقه بتعب وتبسم لأمه ابتسامه باهته: شفيك ماما عادي طاحت الملعقه
ام سلمان تناظره : لالا وجهك مخطوف اكيد فيك شي
العنود مرتبكه وودها تقول لهم انها من حول ساعه وهي حاسته تعبان
ريم بصوت خافت: بدا عاد تدليل الولد الوحيد مالت بس
سلمان كمل اكله بهدوء: ماعليك مافيني شي
ام سلمان بعدم اقتناع : طيب
اكل ملعقه زياده وحط الملعقه بالصحن رفع يده الثانيه لراسه غمض عينه بسرعه وبصوت واطي: مدري شفيني
ام سلمان حطت يدها على كتفه: اقول لبابا يجي ياخذك المستشفى انت ماتقدر تسوق
سلمان وهو حاط يده على بطنه:لا مافيني شي
وقف وراح للحمام(وانتم بكرامه) فتح الباب وانصفق الباب بالجدار لأنه كان رامي كل جسمه عليه ..اول ماوصل للمغسله طلع كل اللي ببطنه ..غسل وجهه وهو ياخذ انفاسه بسرعه ..
كل اللي على الطاول وقفو متخرعين وام سلمان راحت له تركض ..دايم كان سلمان بالنسبه لهم القوي ونادر مايشوفونه تعبان و فيه شي طول عمره مثل الجبل صامد ثابت مايهزه ريح..
طلع وامه ماسكته وهو موقادر يفتح عيونه وكل خطوه تجر الثانيه اول ماوصل عند الدرج اللي يتسوط المسافه بين الحمام وطاولة الطعام ..رمى جسمه على اول درجه وسند راسه على سور الدرج..
ام سلمان قربت جلست بجنبه ومسحت على راسه بخوف: ياويلي الولد نار ..مسكت يده تضغط عليها: كل جسمه نار
العنود بسرعه: بدق على السواق يجي بسرعه
سلمان بكل تعب: لاتدقين
العنود بقهر وهي ناسيه كل الموجودين : لابدق ماتشوف حالتك كيف
ام سلمان: بدق على ابو سلمان
العنود بعد مادقت وهي حاطه سماعة الجوال بأذنها: لالاتخرعينه
وبسرعه: الو .. تعال بسرعه بيت بابا ابو سلمان بسرعه تفهم
قفلت الجوال وناظرت بنوره : روحي البسي عبايتك عشان تجين معي
ام سلمان توقف: انا بعد بجي معكم
العنود: ايه احسن عشان تمسكونه شكله ماراح يقدر يوقف
بعد مالبسو عباياتهم سمعت العنود صوت البوري ناظرتهم بسرعه: ياللا
لفت نوره يد سلمان حول كتفها وامها سوت نفس الشي باليد الثانيه .وقفوه بصعوبه ..كان يمشي بتعب راسه منزله على تحت بأهمال وبدا العرق يتصبب من جبينه..
اول ماوصلو عند السياره فتح السواق بابه ووقف: سلامات سلامات ايش فيه
العنود بعصبيه: افتح باب الراكب بسرعه واسدح الكرسي ..
حطو سلمان بالكرسي اللي قدام ..وتزاحمو الثلاث بالكرسي اللي ورى ..
لما وصلو للمستشفى صارخت العنود على السواق: روح جيب كرسي
راح السواق جاب كرسي وحط سلمان فيه وهي راحت ومعها نوره للرسبشن سجلت اسمه ودفعت تكاليف دخوله ..بعد مادخل الطوارىء وقفو برا ينتظرونه بخوف ..وكلها دقايق وطلعت الممرضه بيدها اوراق : هذا مريض في يحتاج أبره ومغدي ادفع بالرسبشن
العنود اخذت الأوراق بسرعه :الحين ادفع بس علمينا شفيه
السستر: حراره ارتفاع 40 الحين بعد ابره يصير زين
العنود : ياربي 40 ان شاء الله يصير احسن..ناظرت بنوره : تعالي معي
:
:
:
الساعه 4 العصر ..
جالسين قبال التلفزيون يشوفون mbc من سيربح المليون..
بعد ماجابت لهم العصير حطته على الطاوله وجلست لصق احمد ..
قربت منه اكثر وبصوت واطي :جدتي تحب هالبرنامج جرب تبدله ..وضحكت
احمد بصوت عالي : بايخ جورج قرداحي مانبيه ..بدل القناة بعد جملته
ام سالم بسرعه: ياوليدي ليه بشوف البرنامج ياللا بسرعه ..وبكل عصبيه : وراك للحين ياللا بسرعه لايفوتنا شي
احمد وهو يضحك: متابعه الوالده ماشاء الله
لجين بعد ماحطت رجل على رجل : ماقلت لك
ناظر ببيجامتها الشورت القصيره ودفها بقوه..
لجين تناظره وهي عابسه وجهها: آي عورتني شفيك
احمد بصوت واطي: ماتستحين تلبسين هاللبس قدام جدتك
لجين ببرود: لاعادي كنت البس هاللبس ببيتنا بعدين جدتي ماتركز
احمد بقهر: طيب وانا ..عيب البنت تلبس هاللبس قدام ابوها
لجين بغرور: اسمح لي الا بهالشغله انا احاول اخذ راحتي بالبيت واذا ع اللبس انت زوجي يعني مهوب عيب لو لبست كذا وانت بعد لاتناظر شيل عيونك
احمد التفت للتلفزيون وهو مقهور ..ولجين بدورها تحاول قد ماتقدر تخفي ضحكتها
قربت منه مره ثانيه وهي تضحك : شف هذا وشلون يسوي وهو يجاوب..قالت جملتها بدون لاتشيل عينها من التفلزيون
احمد واللي شم ريحة عطرها القويه حط يده تحت ذقنها لف وجهها بقوه ناظرها بحده: انتي وش تبين وش هدفك من هالحركات
لجين تبعد يده وتسوي مستغربه: أي حركات شفيك احمد جدتي تناظرنا
احمد بصوت واطي : ليه حاطه غرشة العطر كلها
لجين تضحك: عادي انا كذا بعدين هذي حريه شخصيه مافيه بابا يحط باله على عطر بنته
احمد وقف وباين القهر بوجهه: صح عليك انا بروح ارتاح شوي تعبان
لجين بلا مبالاة : نوم العوافي بابا
احمد حط الريموت على الطاوله وهو مقهور..
ناظرت فيه وهو يرقى الدرج بسرعه وكانت مبتسمه وبينها وبين نفسها: باقي ماشفت شي ياأحمد
:
:
:
الساعه 4:30 العصر بتوقيت السعوديه 7:30 الصبح بتوقيت أمريكا..
بعد ماغسل وجهه وفرش اسنانه توضى ..صلى صلاة الصبح ورفع يدينه يطلب اللي عينه ماتنام يرحمه ويفكه من بلاه ..سجد بحزن وبصوت مسموع: يارب سامحني انت اعلم بحالي..بعد مارفع جسمه عن الأرض كان فيه صوت بداخله يقول له معقوله مجموعة مهابيل يسيطرون عليك انت لازم تشوف حل..وبصوت مسموع: طيب شسوي ملاحقيني بكل مكان ويهددوني ..رد عليه نفس الصوت اللي بداخله: كل شي وله حل ..بدل ملابسه بسرعه وهو حاس بصداع هالصداع اللي ملازمه غير التركيز اللي فاقده ويحاول يسيطر على وضعه قد مايقدر اخذ محفظته ناظر فيها وابتسم ورماها على السرير بسخريه وبداخله: مايحتاج اخذها وهي مافيها ولادولار واحد..
اول ماوصل لباب الشقه وفتحه دخلت لجين وهي تترنح ريحة الخمره كانت تفوح من فمها وخطواتها اللي تتمايل كان صعب عليها تتوازن..
ناظر فيها بأحتقار كانت تجيب الاشمئزاز بملابسها الفاحشه وضحكتها العاليه..
قبل لايطلع من باب الشقه نادته : هي انت
مشعل بطفش: نعم شتبين
نجلاء وهي تتمايل وتتكلم بصعوبه: بدي مصاري كلم بابا
مشعل بقهر: اكلم بابا وش اقول له كذا بابا راح يحس
نجلاء رافعه اصبعها تهدد: مابيخصني تكلم بابا او مابعطيك الأبره
مشعل يضحك بسخريه: لاعاد تكفين ..انا كم مره قلت لك اتركيني مثل الكلب ان شاء الله اموت المهم اتخلص من هالسم
نجلاء بقهر وباقي تترنح: اسمع بدك تختار بتخبر بابا أو بدي انا خبرو وبفرجيه ياللي عندي
مشعل بسرعه: وش قلتي لا ألا هذي
نجلاء: انا مني فاضيتلك بدي مصاري
مشعل يمسح خشمه بعنف ويأشر لها روحي : طيب طيب انقلعي بدور لي حجه
:
:
:
الرياض الساعه 5 المغرب ..المستشفى بالتحديد..
واقفه على راسه تمسح بشعره: بسم الله عليك ياوليدي وش جاك
سلمان بتعب: مافيني شي ماما شوية سخونه وراحت
ام سلمان بحزن : ماتمنيت اشوفك كذا انا حتى وانت صغير كان يهزني مرضك
سلمان يبوس يدها: الله يخليك لي يالغاليه
نوره بحماس: سلامتك يااسد وبلا دلع كلها شوية حراره
سلمان بأبتسامه باهته: ياليتها فيك عشان تحسين
نوه بسرعه: بسم الله علي بحس فيك بدون لاترتفع حرارتي هذي 40 مهيب لعبه
العنود بهدوء وبعد تردد: سلامتك
سلمان وبعد مااختفت ابتسامته: الله يسلمك
سحب امه له قرب فمه من اذنها : بابا مو هنا مين دفع حساب المستشفى
ام سلمان بصوت واطي: العنود
سلمان بقهر وبصوت واطي: ليه مادفعتي انتي
ام سلمان : نسيت شنطتي من الربكه
نوره ناظرت بأمها وناظرت بالعنود وفكرت انها تخترع لحظه مسكت امها من يدها وسحبتها برا الغرفه: تعالي ابيك بشي
ام سلمان وهي تمشي : وش تبين
نوره : بروح الكفتيريا
ام سلمان: مامعي فلوس خل نرجع بس
نوره : انا معي ياللا بس
:
:
بالغرفه كانت متوتره رغم الغطا اللي يحجب وجهها الا ان ارتباكها يزيد..
سلمان بدون نفس : بس اطلع من هنا بعطيك فلوسك
العنود بهدوء: لاشدعوه وش اللي فلوسك وفلوسي
سلمان : هي عاد كذا
العنود بعد تردد: سلمان اللي صار لك من وراي؟
سلمان سكت شوي وبعدها تكلم بضيقه وبكل هدوء: عنود انسي ان عندك ولد خال اسمه سلمان وانه كان مثل الغبي يحبك مشكلتك وحليتها ابيك تنقلعين من حياتي نهائي ولاابي اشوف رقعة وجهك حتى بالصدفه
العنود بحزن : بس سلمان انا
سلمان يقاطعها: مابيك تبررين لي شي لانه بصراحه مايهمني انتي بالنسبه لي كنتي حبيبه كنتي حلم وهالحلم مات بداخلي وكلام ثاني ماعندي
العنود واللي خنقتها العبره: طيب
طلعت من الغرفه وهي حاسه بوجع بصدرها بيدها ضيعة كل شي ..شرفها نفسها ضحكتها ..ضيعة انسان كان راح يحطها مكان عينه وعمره مايزعلها ..بدت دمعاتها تسيل على خدها ..سرعت بخطواتها وهي تبكي حسرتها على خسارتها كانت تحس ان المستشفى فاضي ومافيه أي شخص حولها حست انها بالفضى الدنيا تدور فيها ورجلينها تاخذها للسياره بدون احساس
:
:
الساعه 6المغرب ..
بغرفتها متوتره هذي المره المليون اللي تدق عليه مايرد هو قالها اول ماتطلع العنود بيدق عليها معقوله للحين العنود معاه بعدين حتى لو ياسر لما يكون مشغول يرد عليها يقول لها بكلمك بعدين ..
ارسلت له مسج
:
ياسر وينك ليه ماترد علي
:
انتظرت وانتظرت وماجاها رد وبصوت مسموع: لاهذا اكيد فيه شي عمره ماسواها بعدين انا لو حبيبه تنتظر زواج بتوقعها منه ياسر نذل بس انا خويته وصحبه معه من زمان لااكيد فيه شي لازم اشوف لي طريقه اطلع من البيت..
طلعت للصاله ومثل العاده ماكان فيه ولاواحد من اخوانها اغلب الوقت يسهرون برا البيت ومايرجعون الا متأخر ..
راحت عند امها: ماما بروح للعنود بجيب منها ملزمه للجامعه وبجلس معاها شوي
ام سعود: مين بياخذك
نوف: هي بتجيب سواقهم
ام سعود ببرود: روحي بس لاتتأخرين
راحت غرفتها بسرعه ودقت رقم عبد العزيز واحد له وضع يشبه وضع ياسر..
عبد العزيز: هلا والله بالغلا
نوف بدلع: عزوز وينك
عبد العزيز : قريب اجيك
نوف: ايه بسرعه بروح عند العنود
عبد العزيز بحماس: ونلف لنا شوي
نوف : لاياقلبي هالمره ماينفع اخوي بيجي ياخذني وهو راجع من بيت خويه وماراح يتأخر
عبد العزيز يسوي زعلان: طيب اجهزي دقايق وانا عندك
لبست بنطلون وتي شرت حطت لها رشتين عطر لبست عبايتها واخذت شنطتها طلعت من البيت بسرعه ..
وقفت كم دقيقه وجاها عبد العزيز فتحت الباب اللي قدام وركبت
عبد العزيز : وراك واقفه بالشارع
نوف: خفت ماما تقول لي اخوك وصل خليه يوديك بدال السواق
عبد العزيز يتبسم: اها وحشتيني حياتي
نوف تتبسم: وانت اكثر ياروحي
عبد العزيز يتنهد: ياليتني العنود بس
نوف تضحك بكل دلع: يازينك لوتكون العنود
عبد العزيز يسند راسه بحركه سريعه ويرجع يركز بالشارع: اموت بالضحكه انا
نوف: لالاتموت وصلني بالأول
عبد العزيز: بدال لاتقولين بسم الله عليك
نوف تضحك: بسم الله عليك
عبد العزيز بعد ماوقف عند بيت العنود: بعد وشو عموماً هذا انتي وصلتي وانا بموت
نوف تغمز له: لاتبي تنتظر اتصال مني
راحت عند باب بيت ابو مشعل واشرت له روح روح بعد مامشى راحت بسرعه عند بيت ياسر طقت الباب على خفيف ولاحظت ان الباب مفتوح فتحته بسرعه ودخلت ..اول ماوصلت للصاله صارت تصارخ: يـــــــــــــــــاسر يسووووووووووووور وينك
ياسر يحاول يتحرك ويحاول يصارخ بس بدون فايده قواه المنهكه صعبت الموضوع عليه وصوته كان واطي مره
فتحت باب المجلس وهي تتلفت وتصارخ: ياسر وينك وش فيك ليه الباب مفتوح ..اخيراً وصلت للمطبخ اول ماشافت حالته راحتله تركض وناظرت بوجهه المحترق وشهقت : ياويلي شفيك من سوالك كذا انا قلت فيك شي
حاولت تفك الحبل بس كان محكم جابت سكين وفكت الحبل بيدينه وبرجلينه واللي حول بطنه ..مسكته تحاول توقفه : بسم الله عليك تعال معاي ..مشى بمساعدتها للصاله جلس على الكنبه بتعب وهي راحت بسرعه جابت كاس مويه بما انها متعوده على البيت ..رجعت بسرعه ناولته كاس المويه بعد ماشرب سألته بسرعه: علمني من شوهك وسوالك كذا
ياسر بتعب وبصوت واطي منهك: هذي الحقيره العنود وواحد قريبها
نوف بقهر: هالخايسه ماتوقعتها تتجرأ تعلم احد الحقيره قويه حتى بهالشغلات عندها من يساندها ..قوم نروح المستشفى
ياسر بخوف وبتعب: لامورايح وش اقول مين مسوي فيني كذا وليه
نوف بسرعه: قوم نقول لهم واحد دعمك وانحاش أي شي
ياسر بتعب: لا مايحتاج الحرق ماراح يروح حتى لو رحت المستشفى والكدمات بخذ لها مرهم بعد مااخف
نوف : طيب روح تروش وانا بجهز لك اغراض من الاسعافات الاوليه نداويك مؤقت فيها
ياسر بتعب : برتاح شوي وبقوم
نوف : سلامتك وهالحقيره برد لها الصاع صاعين علي سوته فيك شوهت وجهك
:
:
:
الساعه 10 مساءً بتوقيت السعوديه 1 الظهر بتوقيت أمريكا ..
رجع البيت دخل غرفته وهو حاس بصداعه يزيد وتركيزه يقل حاس بحاجته لجرعة المخدر ..
دخل بنوبة غضب غريبه عليه مشعل طول عمره هادي مايعصب بسهوله ..
حس ببركان من الألم والقهر والعذاب تجمع بداخله بدا يصرخ بصوت عالي وهو يبكي متجرد من رجولته ..
كان يصرخ وهو يرمي ملابسه اغراضه بالتسريحه وبدولابه: ماابي ماابي ياربي ارحمني ياربي انت تدري وعالم بحالي انا هالطريق ماابيه ماابي هالسم يدخل لجسمي ضرب راسه بقوه وهو يحاول يسيطر على نفسه ويصارخ : مـــــــــــــــــاابي الموت ارحم مو قادر اتحمل الألم .. صار يضرب بأجزاء مختلفه بجسمه ويصارخ بطريقه هستيريه ..دخلت عليه نجلاء وهي ماسكه الأبره بيدها : مجنون تبي تموت افتح يدك بسرعه
دف الأبره بيده بكل قوته الى ان طارت من يد نجلاء ودف نجلاء من صدرها وهو يصارخ : انقلعي ياحقيره جننتيني ..وصار يبكي انا ابي ارجع لأهلي مااتحمل ..
نجلاء طلعت بسرعه وراحت عند باب الشقه وهي تصارخ : الياس الياس تعا لهون
جا البدي قارد المنتفخ العضلات ولحقها للغرفه مسك مشعل بقوه ورغم محاولات مشعل انه يفك يده فشل قربت منه فتحت يده واعطته الأبره وناظرت بألياس : اتركه
بعد الياس يدينه بهدوء وانهار مشعل على الأرض بحالة تخدر كامله
الياس يحرك مشعل برجلينه وهو مستغرب : مات ؟
نجلاء : موتت كلب هذول مابيموتو خليه بس
:
:
:
الرياض الساعه 11:30 مساءً ..
قامت من فراشها لبست شبشب برجلها راحت عند التسريحه وتبسمت رشة عطر بالبيجامه الورديه وطلعت من غرفتها طقت باب غرفة احمد بسرعه وهي تصارخ : احمد احمد افتح
فتح الباب وهو مفزوع : خير لجين شفيك
لجين بخوف : احمد ماادري اسمع اصوات غريبه بالغرفه
احمد مستغرب : اصوات غريبه كيف يعني
لجين وهي قريب تبكي : ماادري احمد انا خايفه
احمد مسح على شعرها ومسكها من يدها : لاتخافين وانا معاك تعالي نشوف وش هالصوت
دخل معاها غرفتها تلفت يمين يسار راح عند السرير وراح للحمام وانتم بكرامه ماشاف شي راح عند الباب وبكل برود : مافيه شي قلبي خلاص روحي نامي
لجين تمسكه بسرعه من يده : وقف احمد لاتروح اخاف
احمد يضحك : بلا دلع ياجبانه ونامي
لجين وهي تهز راسها : لا لا تكفى اخاف اخاف
احمد : طيب والحل
لجين : نومني وروح
احمد يتنهد : امرنا لله
انسدحت على السرير وهو جلس بجنبها يمسح على شعرها : هاه بابا اقلك قصه بعد ؟
لجين بدلع : ياليت والله
:
:
:
يوم الأربعاء الساعه 6 الصبح للحين مانامت كل شوي تدق عليه ومايرد عليها
نوره بقهر: ياربي معقوله زعل لذي الدرجه ..
ارسلت له مسج
:
بندوري عشان خاطري رد علي
:
انتظرت 5 دقايق وماجاها رد..ارسلت مره ثانيه
:
نايم والا صاحي وماتبي تكلمني
:
ونفس الشي انتظرت وماجاها رد وبعد تفكير
:
طيب بدق الحين وان مارديت والله لقفل جوالي اسبوعين
:
انتظرت شوي ودقت ..وجاها رده البارد: الو وش تبين
نوره بسرعه: بندرشدعوه
بندر بجديه : الحين وش تبين
نوره بدلع: بندوري زعلان
بندر: مالك شغل
نوره بسرعه: الا انا اللي لي شغل كله ولازعلك
بندر يهز راسه: ايه صح مره مهتمه لزعلي
نوره بحزن: والله مهتمه شوف حتى ماقدرت انام
بندر بصوت حزين: يعني انا اللي قدرت انام
نوره: شفيك قلبي ليه تزعل وتكبر السالفه
بندر بحزن: لأنها كبيره انتي لو تحبيني ماسويتي هالحركه كنتي من داخلك راح تحسين اننا واحد واللي لي لك واللي لك لي ومافيه فرق بيننا جيوبنا وحده ارواحنا وحده وقلوبنا وحده
نوره بهدوء: والله بندر ماقصدت شي
بندر بهدوء: هي الحركات اللي بدون قصد تثبت اشياء كثيره
نوره بسرعه: بلا غباء انت حبيبي وانا احبك
بندر واللي خق مع الكلام: روحي انا زعلان
نوره تضحك: قلبي علمني وش يرضيك وبسويه
بندر: تحلفين
نوره: أيه والله اللي تبيه بسويه
بندر: خلاص من اليوم وطالع اللي اسويه ماتعترضين عليه ولو ادفع عنك مليون ماتتكلمين ولو اجي ارقى طوفة بيتكم كيفي ماتتكلمين
نوره بسرعه: لاوالله
بندر بقهر: شفتي كيف ياللا بس انقلعي لاتحبيني ولاشي
نوره تسوي مسكينه: خلاص خلاص مااتكلم بترقى الطوفه ارقى الطوفه براحتك
بندر: ايه لاتتمسكنين ماتنفع معي هالنبره
نوره تضحك: طيب نعسان
بندر: مررررررره بس كله منك طار النوم من عيني
نوره: اجل ياللا ننام
بندر بحب: طيب بس بشرط تتحلمين فيني
نوره تضحك: خلاص اتحلم فيك
بندر بحنان: نوره انا احبك هالكم ساعه اللي ماكلمتك فيها حسيت اني فقدت روحي انا مااقدر اخليك مردي لك حتى لو ازعل تدرين انتي لو تطنشين زعلي بجيك اقول لك انا غلطان وبعتذر ولاافارقك اكثر
نوره تبسمت وماعرفت وش ترد عليه: انا بعد احبك بندر ومايهون علي زعلك
بندر بهدوء:طيب تصبحين على خير
نوره: وانت من اهله
:
:
يتبع,,
15-03-10, 12:51 PM
جديد مواضيع قسم القصص المكتمله
العرض العادي
