كاتب الموضوع :
راعية الفزعة
المنتدى :
القصص المكتمله
اللـــــحظة الثامنه وآلــثــــــلآثوووووووووون
::
::
الفصـــــل ألـــأـ ولــ
بوهلال بحزن : ما عليه خلونا نروح الحين نقوم بالواجب لا حقين على كل هذا
ام هلال : ساره حبيبتي سيري هاتي عباتي وعباتج ولحقينا السيارة
ساره كانت تصيح ودموعها اربع اربع وما انتبهت لكلام امها ميره كانت بنسبالها مميزه ودايم تحب تسولف معاها
ام هلال وهي تقطعلها حبل افكارها : ساره بلاج متصلبة مكانج اقولج سيري هاتي عباتي وعباتج
ساره وهي تمسح دمعتها وتنتبه على امها : ان شاء الله اميه ثواني وتكون عندج
::
::
فــــــــي المستشفـــــــــــــــــــى
حمود عقب ما خلص موقع على الأوراق سار صوب فاطمة بس قبل ما يدخل حصل نوف مستندة على كرسي جدام غرفة فاطمة .. مسح دموعه وسار يشوف شو سالفة هـ البنت وليش صار لها فتره قاعده هنيه .!!
حمود بحزن : عفواً اختيه !! منو انتي ؟!! صار لي فترة شايفنج قاعدة هنية !! بغيتي شي ؟!!
نوف بتوتر ممزوج بحزن: لا اخوي انا يايه عند فاطمه ..وقلت اتطمن عليها وعقب اتوكل..ما حبيت أخليها بروحها
حمود وهو مستغرب : ليش انتي من قرايبهم ؟!!
نوف بابتسامة : لا اخوي نحن ناس الله طرشنا فطريج فاطمه عقب ما صارت بلا بيت وبلا سند ونحن استضفناها فبيتنا
حمود يقاطعها : لحظة !! لحظة !! ليش فاطمة كانت عندكم ؟!!
نوف وهي مستغربه : هي اخوي !! صار لها كم يوم وهي يالسه عندنا ؟!! لا يكون عندك أعتراض !!
حمود قعد يتذكر كلام سالم وهو يقوله فاطمه عندهم .. وانها ما تبا تشوفه .. بعد ما سمع كلام نوف ضغط على أيده بقوة .. ليش أنه نوف قدرت تمحي كل هاللبس .. حمود ترخص منها بهدوء وراح عند فاطمه ودمعة أرتسمت على خده ..
بس نوف وقفته وتمتمت بحزن ودمعة أرتسمت على خدها : حمود صدقني .. ترى فاطمة مظلومة .. وانتوا بدال لا تسمعوا اللي عندها قسيتوا عليها .. زوجتك الحين محتاجتلك يا حمود .. لا تخلاها بروحها .. لا تسوى فيها شرات ما سووا فيها اهلك .. صدقني باجر راح تندمون على كل يوم بكيتوا فيه فاطمه .. ترى أحيان مو كل شي نشوفه هو الصح
حمود بحزن : لا تخافين اي مظلوم له رب .. وأكيد راح ينصره .. انتي لا تشغلين بالج وتقدري تسيري .. تعبناج معنا
فاطمه كانت قاعدة تصيح بحرقة وتشم يدينها – تشم الريحة اللي بقت لها من بنتها ميره
حمود اول ما شاف حالتها تم يتأملها من بعيد .. ما قدر يشوف كل هـ الحزن بعيونها .. و وقعد يصيح من خاطرة .. حس انه حمل فاطمة فوق طاقتها .. فاطمه اول ما نتبهت علية نزلت راسها .. وتمت تمسح دموعها بكل هدوء
حمود وهو يقرب صوبها ويرفع راسها وتمتم بحزن : فاطمة ليش يصير فينا كل هذا!! ليش بالذات نحن !!ليش مو غيرنا
فاطمه وهي تتنهد : نصيبنا يا حمود .. هذا نصيبنا .. قول الحمد لله .. ما ضنتي راح نخسر أكثر من اللي خسرناه
حمود قاطعها بألم : فاطمة انتي تلوميني انا بكل اللي قاعد يصير صح !!
فاطمه بسخرية : ليش !! لا يكون انت اللي طردتني من البيت !! ولا تسببت في موت ميره !!
حمود يقاطعها ودمعة أرتسمت على خده : نفس ما توقعت .. أنتي حاطة كل اللوم علي !!
فاطمة : .................................................. ..............
حمود بحزن :نزين قومي خلينا نسير الإجراءات جاهزة وفهد جهز كل شي يلا استندي علي. انتي مب قادرة حتى تمشين
:::
:::
فـــــــــــي بيت بو مشعل الأجواء بعد كانت متوترة ..
ميثاء كانت قاعدة تدور حوالين نفسها .. والتوتر كان ضاهر على ملامحها .. وأول ما شافت تلفونها ركضت صوبه
ميثا بتوتر : ألووو .. هلا ضاري .. بشر شو اللي صار
ضاري بسخرية : لا تحاتين كل شي تمام .. وحفضتها الدور عدل !!
ميثا وهي تعدل جلستها : انزين هي وين الحين
ضاري : من شوي كانت عندي .. في المطار طبعا .. والأمانة بعد كانت عندها !!
ميثا بابتسامه : ضاري متأكد انها وصلت لبلاد .. ترى هذي مسألة حياة او موت !! والغلط ممنوع ..
ضاري بابتسامة ممزوجة بخبث : صدقيني صار لها نص ساعه طالعه من عندي .. يعني شوي وبتوصل !!
ميثا وهي تتنهد : انزين خبرتها شو تقول .. مابا مشعل يشك في أاي شي .. ابا كل شي يطيح على راس هنادي
ضاري : ميثا صدقيني ما فيه شي اغلى منج .. ومستحيل اخلي اي شي يضرج او يلمس شعره منج انا علمتها وفهمتها
ميثا بابتسامه : مشكووور ضاررري .. انا بسير صوب امي وابوي الاجواء بينهم متوتره .. أكلمك عقب
ضاري وهو يتنهد : لو اني بشتاق لصوتج .. بس مب مشكلة !! أنا مقدر ظروفج .. المهم خبريني بالمستجدات
مشعل بضحكة ممزوجة بدلع : خلاااص ضاري صار .. باي باي !!
وعقب ما صكرت فرت التلفون فوق الكرفاية وتمتمت بابتسامة نصر .. والحين الكوره بملعبي ولازم ألعبها صح !!
أحسن شي أسير صوب أمي وأبوي .. ولا سمعت الباب يدق أسير وأبطله .. مخبيه لهم مفاجأة ما تخطر على البال ..
:::
بومشعل بعصبية : ام مشعل انتي تخبلتي ؟!! مشعل توه ماسك الشركة بعده ما يعرف شي ؟!! صعب أسلمه كل شي !!
مشعل بعصبية : ابوي انته أشو فيك !! ليش مب راضي تفهم .. انا درست تجارة وعقليتي بعد تجارية !! وعندي شهادة في هـ المجال !! لأ واثبت لك اكثر من مره جدارتي .. وربحتك أكثر من الصفقة !! و انت مب راضي تفهم هـ الشي !!
بومشعل بعصبية : انا مالي كلام معاك !! كل كلامي موجه حق امك .. أمك هذي قاعدة تفكر بعواطفها .. وبعدين اي شهادة اللي تتكلم عنها !! من يوم ما تخرجت ونحن نسمع فيها .. بس ولا مره شفناها .. يعني شهادة بس بالكلام !! وهذا اللي أنت فالح فيه .. قاص على أمك بلسانك الحلو !! وحطها في بالك شغلك للحين ما عاجبني احس فيه شي غلط
مشعل يقاطعه : ابوي انته كبرت ولازم ترتاح .. أنته بس خلني امسك الشركة واوعدك سنة ولا سنتين بخليها في العلالي !! وبعدين بخصوص الشهادة انته ما خبرتني انك تبا تشوفها .. وهاذي هي مفروره في الدرج .. بس أنا ما صارت عندي فرصه عسب أجيبها لك !! وبعدين من اي ناحية شغلي مش عاجبنك .. صارحني يمكن أقدر أبرر لك موقفي !!
ام مشعل بعصبية : شوف بو مشعل انا وثقت فيك مره وغدرت فيني .. عسب جذا صعب أعطيك ثقتي مره ثانية .. عشان جذا خلني أجرب حظي عند مشعل وأعطيه ثقتي .. وبعدين مشعل هذا ولدي وما ضنتي بيغدر فيني نفس ما سويت انت !
ام مشعل بعصبية : شوف بو مشعل انا وثقت فيك مره وغدرت فيني .. عسب جذا صعب أعطيك ثقتي مره ثانية .. عشان جذا خلني أجرب حظي عند مشعل وأعطيه ثقتي .. وبعدين مشعل هذا ولدي وما ضنتي بيغدر فيني نفس ما سويت انت !
مشعل وهو يبوس راسها : امية انته على راسي من فوق .. ومستحيل اسوي شي يضرج .. او يخربلج احلامج بالعكس بسوي اللي تامريني عليه وشايفة البيت اللي عايشين فيه راح اخليه قصر بس انتوا عطوني فرصه عشان اثبتلكم هالشي
ام مشعل وهي تمسح على خده : فديتك يا مشعل .. ادري فيك .. انت كل اللي يهمك راحتي .. الله لا يحرمني منك
بومشعل بقهر : ام مشعل سمعيني !! انا ما راح اتنازل عن فلس احمر .. ولدج هذا ما يعرف كوعه من بوعه .. كل كلامه مبني على تخمينات .. وبعدين لنفرض اني كتبت كل الحلال باسمة !! علميني شو بتسوين اذا خسرنا كل هذا فطرفة عين !! منو بينفعنا حزتها .. ثقتج العمياء في ولدج .. انا قاعد اشوف أشياء أنتي معماية عينج عن شوفتها
ام مشعل بثقه : انا واثقه من ولدي ومستحيل يسوي شي يضرني او يكدر خاطري والله يبعد عنه عيون حساده
::
ميثا كانت واقفه تراقب من بعيد وأول ما سمعت الباب يدق أستانست وراحت صوبة ركض .. بوم مشعل كان قايم يسير يفتح الباب بس ميثاء قاطعته بابتسامة : ابوي خلك قاعد انا ببطله يمكن وحده من ربعاتي واول ما بطلت الباب ابتسمت
صوفيا : Haloo
ميثا بابتسامة ممزوجة بخبث : هلاوات !! تفضلي حياج .. تو ما نور المكان .. امري بغيتي شي
صوفيا وهي تتكلم عربي بصعوبة : مشئل وين ؟!!
ميثا وهي تقلدها : مشــــــئل داخل تفضلي .. وصدت صوب مشعل وتمتمت بسخرية .. مشعل فيه وحده شقراء تسئل عليك ما ادري شعندها .. وعندها بنوتة مثل القمر ..!! تعال شوف شو تبا .. وأول ما خلصت كلامها أعتزلت في زواية
مشعل بتوتر : شقراء وتسأل علي انا !! منو هذي ..!!
صوفيا وهي تدخل وتجر بنتها بعربة وتمتمت بحمااااس : هاااي مشئل انا صوفيا معقولة انته في ينسى انا ..!!
بومشعل بعصبية : مشعل منو هذي ؟!!
مشعل أول ما شافها تصلب مكانه .. كان يتمنى الأرض تنشق وتبلعه .. تم منصدم وما قدر يعلق بأي كلمة .. كانت نظراته موزعة بين صوفيا .. والبنت اللي نايمة بكل هدوء وسكينه فجلاستها ..
صوفيه راحت صوب مشعل وتمتمت بابتسامة وهي تهزه : انا زوج مال مشعل !! مشعل ليش ما يخبر أهلك !!
ام مشعل أول ما تكلمت صوفيا دارت فيها الدنيا .. ما كان ودها تصدق اللي سمعته .. مشعل كان فنظرها الملاك الطاهر .. اللي مستحيل يغلط ويضرها .. وكلها لحظات وفاقت من صدمتها وتمتمت بقهر وهي تحط يدينها على راسها : ووووا حسرتي ........ متزوج وحده اجنبية يا مشعل .. هذا جزات تعبي وتربيتي !! انته تبا تقتلني ناقصة عمر ولا شو بالضبط
مشعل حس أنه في خطر .. وقرر أنه يتصرف .. وراح صوب أمه وتمتم بابتسامة ممزوجة بخبث : ابوي امية الله يهداكم معقولة صدقتوا اللي قالته من شوي !! تراكم فاهمين السالفه غلط !! هاه وحده اجنبية تعرفت عليها برع يوم كنت ادرس تجارة .. وما بينا شي .. خلوني اتفاهم معها اكيد فية شي غلط بالموضوع وبعدين انا ما تزوجت هذي اكيد تتبلى علي ..
ميثا على طول خافت وتمتمت بخاطرها : وليييه !! الظاهر مشعل بيقلب السالفه .. عسى ضاري يكون فهمها الدور عدل
صوفيا بعصبية وهي تأشر على بنتها : مشئل انتة زوجي .. انا يجي من امريكا عشان يخبر .. انه هذا بنتك !!
ام مشعل وادموعها اربع اربع : وهذي بنتك بعد !! اللهم يا كافي .. اللهم صبرني .. كثر شو انا بستحمل !!
ميثا وهي تحضن امها وتمتمت بخبث ممزوج بنظرات حنان : اميه الله يهداج هدي شوي . ما تسمعين مشعل شو يقول ؟! يعني في لبس في الموضوع !! ولازم نصبر لحد ما تتوضح الصورة عدل .. يمكن هي تكذب عليه ما يندرى !!
صوفيا وهي تصارخ على ميثا : انا ما فيه يكذب ..!! هذي بنت مشان مشعل .. وانا يجيب مشان هو يربي !! انا ما يريد !
مشعل وهو يصك صوفيا بكف وتمتم بعصبية :انتي شو اللي يابج هنيه هاه ؟!! ليش كل ما احاول ابتعد عنج تقربين مني !! وبعدين أنا ما خبرتج من قبل !! كل اللي صار بينا كان مجرد نزوة لأ أكثر ولأ أقل !! إنسي مشعل خلاص أنسي ..
صوفيه وادموعها اربع اربع : انا يجي مشان بنت مال أنته .. انا لسه صغير ما يريد بيبي ..
مشعل وهو يشدها من شعرها : وكيف عرفتي مكا ني هاه .. انا موصي كل ربعي محد يخبرج عن مكاني !! يالله تكلمي
بومشعل وهو توه مستوعب الموضوع وتمتم بقهر ممزوج بدمعة : مشعل يعني انته متزوج صدق !! وهذي زوجتك ومعها بنتك .. يا ألله شو اللي قاعد يصير .. كنا نتحسبك تدرس .. وأنته حظرتك كنت تراكض وراء الحريم !!
مشعل يقاطعه بعصبية : كنت متزوج !! خفت اطيح في الحرام وتزوجتها .. وقبل ما ارد لبلاد طلقتها وخبرتها تعيش حياتها !! بس الظاهر انها ما فهمت كلامي !! والحين انا بفهمها عدل .. هذي تبا تقص علي وتقول انه هـ البنت تصير بنتي أنا !! واالله حالة .. أصلا هذي اللي واقفة جدامكم كل يوم عند واحد !! يعني بنت ليل .. وانا تزوجتها بس لأني أعتبرتها نزوة وراح تنتهي بسرعة .. بس الظاهر طلعت مش هينه !! لا والحين ياية وبكل وقاحة و تبا تقنعني انه هذي وأشر على البنت الصغيرة .. تصير بنتي !! تغلط الغلطة وتبا تقط بلاها علي !! تتحراني اصغر عيالها وبتمشي علي لعبتها .. لا يا ماما شيلي الوصخ مالج وطلعي برع .. انتي فنظري وحده رخيصة !! وبتمي طول عمرج رخيصة فاهمه !!
صوفيا بخوف وهي تقرب صوبه وتمسك إيده : مشعل انا يحب انته بس .. هذي بيبي انته !!
مشعل وهو يبطل يدها من ياده بقو : وانا ما أطيقج .. أكرهج .. أستحب أشوف كلــــ ......... أسود ولا أشوف ويهج .. والحين قبل لا افش غلي فيج خبريني منو اللي خبرج عن مكاني هاه ؟!!!!!!!!!!! وانا راح أراوية شغل الله فيه !!
صوفيا بخوف : انا يدور انته من زمان بس واحد اسمه هند هو يخبر مكان أنته .. هو ما يحب أنته
ميثا بعصبية فخاطرها ممزوجة بتوتر : مالت على هـ الوجة .. بدال لا تقول هنادي قاالت هند .. أحسن شي أدخل قبل لا يخترب كل اللي بنيته .. وتمتمت بضيج .. مشعل يمكن تقصد هنادي !! وع حسب ما قتلي أنك وايد قسيت علىها يوم عرفت أنها متزوجة ابوي .. الظاهر انها حبت تردلك الضربه اللي سويتها فيها .. بضربة اقوى منها يعني وحده بوحده
صوفيا وهي تشوف ميثا : يس .. نيم مال هو هنادي .. هـ نـ ا د ي .. يس هنادي
بومشعل : لا حول ولا قوة الا بالله رجعنا على طاري هنادي .. البنت وطلقناها بس خلاص خلوها في حالها .. وراح صوب صوفيا وتمتم بقهر .. وانته هـ الكثر عايبج الاسم وقاعده ترددية في الطالعه والنازلة ..!!
ام مشعل وهي تروح صوب مشعل وتصكة بكف : اخس عليك يا مشعل .. من شوي كنت امدحك بس الحين سودت ويهي .. عقب كل اللي سمعته من هذي اللي ما تتسمى تباني أصدقك !! انته من يوم وساير مش ولدي .. والحين اطلع برع بيتي .. لا وبالملابس اللي عليك !! مابا اشوفك هنيه .. اطلع برع .. انته ميت بنسبالي واعتبرني انا بعد ميته .. أطلع برع .. برع .. برع..ومسكت راسها وجلست ع الأرض وتمت تصيح بحرقة .. ميثا ابتسمت أبتسامة أنتصار وراحة صوب امها
ميثا وهي تهديها وتمسح دموعها : اميه مشعل غلط واعترف بغلطتة .. وهذا ولدج .. ضناج .. لا تتخلي عنه بسهولة ..لا تعالجي الغلط بغلط اكبر عنه .. هدي نفسج اماية .. وفكري عدل .. ومشعل بيضل ولدج حبيبج .. المدلل
ام مشعل وهي أدز ميثا وتمتمت بعصبية : هذا مو ولدي !! ولدي مات خلاص .. مات !! هذا اللي واقف جدامك واحد أناني .. بلا مشاعر !! فضل الاجنبية على بنات بلاده وتزوجها !! لا والقهر جايب منها بنت ويبا يتخلى عنها !!
مشعل بحزن وهو يقرب صوبها أكثر ويجلس يمها : اميه والله سويت هـ الشي على شان احافظ على نفسي !! هناك بنت الحرام وايد .. وأنتي أكثر وحده تعرفي عن الأمراض .. ودومج كنتي تنصحيني وتقولي عف نفسك يا مشعل ..!!
أم شمعل بسخرية : خوز عني !! انا مش أمك ولا أعرفك !! وبعدين يوم قتلك عف نفسك .. قصدت تاخذ لك وحده عارفة أصلك وفصلك .. عارفه اللي يسرك ويضايقك .. مو وحده مثل هذي .. بلا دين ولا أخلاق
مشعل تمتم بحزن : اماية بس قبل ما أرجع للبلاد طلقتها !! اكيد هذا ابوي متفق عند هنادي عشان .....................؟!!
وقبل لا يكمل كلامة صكة ابوه بكف وتمتم بعصبية ممزوجة بقهر : جب ولا كلمة !! صدق انك واحد واطي وبلا شرف .. تبا تقط بلاك علي هاه ؟؟!!! ياخسارة يا مشعل .. يا خسارة كل ريال صرفته عشانك .. طلعت مو كفو .. أخص عليك
مشعل بعصبية : تضربني انا بكف !! على شان وحده ما تسوى .. بس ما عليه دواكم عندي انا اراويكم
بومشعل بعصبية : سوى اللي تباه .. واحينة يلا فارق .. روح من جدامي .. يوم عن يوم تسود وجهي .. شو بقول للناس الحين هاه !! متزوج من ورانا لا وعندة بنت والأم ما تبيها .. يا حسافة تربيتي فيك ويا حسافة كل بيسه صرفتها عليك
مشعل وهو يطالع ابوه من فوق لتحت وتمتم بسخرية وهو يضحك من خاطر : هههههه لا يا بابا !! انا رجعت لك كل بيسها صرفتها علي .. عشان جذا انت اخر واحد يحقلة يحاسبني ..هههه بالاول يا ريت لو تحاسب نفسك !! والمصاريف اللي بذرتها وانت تربع وراء البنات اللي قد بنتك .. أستحى على شيبتك !! ههههههه يا خسارة هالشيب فيك !!
::
::
بو مشعل دارت فيه الدنيا .. معقولة هذا مشعل الطيب اللي كان يحبه واعتبره سند يقول عنه جذا .. ما كان وده يصدق اللي سمعه من شوي .. بس جدران البيت بدت تردد صدى كلام مشعل .. هنيه بو مشعل ما قدر يستحمل وكان يبا يصك مشعل كف بس مشعل مسكلة ايدة ورد علية بعصبية : هالحركة ما تكررها مره ثانية فاهم .. ولا والله .................؟؟!!!
ميثا تقاطعة بخوف : مشعل اتقي الله .. هذا ابوك مب زين اللي تسواه فيه .. مهما قال تأكد هالشي قالة لمصلحتك !!
مشعل وهو يطالع ابوه وتمتم بقهر ممزوج بعصبية : ما راح أخلي السالفه تبرد ..وكلها ثواني وراح ابرد حرتي فيك .. وفي غيرك .. وراح تقول مشعل قال .. وصد صوب صوفيا وتمتم بعصبية .. هاتي بنتج ولحقيني برع .. وبسرعه فاهمه
بو مشعل وهو يستند ع الكرسي ويصيح بحرقه : انا شو قصرت معاه عشان يعاملني جذا ويرفع صوتة علي بهالشكل
ميثا تقاطعة وهي تمسح دموع عينه وباست له راسه : ابوي ما عليك منة .. مشعل طول عمره جذا .. أنته لا تكدر خااطرك .. مصيره يرجع ويبوس راسك ويعتذر .. هو اصلا ماله أحد غيرك ..
ميثا تقاطعة وهي تمسح دموع عينه وباست له راسه : ابوي ما عليك منة .. مشعل طول عمره جذا .. أنته لا تكدر خااطرك .. مصيره يرجع ويبوس راسك ويعتذر .. هو اصلا ماله أحد غيرك ..
ام مشعل وادموعها اربع اربع : طول عمري احلم ازوجة واختار له بنت قبايل الكل يتواصف فيها وبأخلاقها .. بس الحين خلاص .. مشعل ضيع كل شي .. و ما ضنتي فيه وحده بترضى تاخذ واحد خدع اهلة وتزوج اجنبية .. لا واللي يقهر اكثر عنده بنت !!! أأأأأأأأأأأأأأأأأأأأأأأأه يا رب .. أنا شسويت بدنياي عشان يصير فيني كل هذا ,,,,,,,,,,!!!!!
ميثا وهي تهدي امها: اميه زين انج عرفتي مشعل على حقيقتة ..مشعل واحد متهور وكان بيضيع حلج وحلالج بخرابيطه
بومشعل : فهميها .. طول عمري أقولها انه ولدج هذا مب راعي مسؤولية .. بس انتي ما صدقتي ركبتي راسج ومشيتي وراه .. وطالعي لحد وين وصلنا معاه !! هذا متيجة الدلع .. تزوج بنت وياب منها بنت .. لا ومب راضي يعترف فيها
ميثا ": ابوي الله يخليك هدي شوي !! ترى اللي فيها مكفيها .. امية قومي خليني اوديج حجرتج يمكن تهدين شوي
:::
مشعل جان ماسك صوفيا بقو : انتي ليش رجعتي هاه !! بسبتج خسرت كل اللي كنت احلم فيه !! لا وانطردت من بيتي
صوفيا وهي ترتجف : مشعل انا ما يريد البيبي .. شيل انته وربي .. هذي بنت مال انته
مشعل وهو يدزها ع الارض : والله محد قالج تحتفظي بالجنين من البداية !! ليش ما نزلتيها وفكيتينا من شرها !!
صوفيا بتوتر : مشعل هذا بنت انته .. وأنته لازم يشيل ..
مشعل بعصبية : شيلي بنتج وفااااااارقي .. يلا اشوه .. انا مش فاتح ملجأ
صوفيا وهي تصيح من خاطر : مشعل أنته ليشي سوي كذا ..
مشعل وهو يشد شعرها وتمتم بعصبية : سيري من جدامي لأ أكس حرتي فيج وفي بنتج .. يلأ أشوف رووحي
صوفيا وهي أدز بنتها ودمعه أرتسمت ع خدها : أوك مشعل انا يروح .. بس هذي بنت لازم يموت
مشعل قاطعها بسخرية : وخليها تموت !! انا شعلي منج ..
صوفيا تمت واقفة مكانها وتصيح وما علقت : ........................
مشعل وهو يشد شعره على وراء ويطلع سيجارة ويدخنها : اراويج هنادي تبين تلعبين معاي انا جاهز وفر السيجاره صوب صوفيا وطاحت فرجلها واحترقت وتمت اتصارخ بس مشعل ما عبرها ركب سيارته وحركها بقوه وسااااار
::
وكانت في عيون تراقب من بعيد .. وأول ما حرك مشعل سيارتة .. راح هو صوب صوفيا
صوفيا أول ما شافته أبتسمت إبتسامة خبث وتمتمت بحماس : هاااي ضاري
ضاري بخبث : هايات .. يلا يا حلوه أركبي السيارة.. ونزل ومسح على شعر البنت وتمتم بابتسامة : شخبارها بنت أخوي
صوفيا بابتسامة : فاين ..
ضاري بحماس : يلا هاتي غدير وخليني أوديج صوب الشقه .. أتمي فيها لحد باجر .. والساعة 4 ترجعين بلادج
صوفيا وهي تاخذ غدير وتمتمت بابتسامة : فلوس وين ؟!!
ضاري وهو يتنهد : لا تحاتي كل شي أتفقنا عليه راح يتنفذ .. يلا أشوف أركبي وخلصينا ..!! أخاف أحد يشوفنا ..
:::
::
فـــــــــــــــي بيــــــــــــــــــــــــ آم هنــــــآدي ـــــــــــــــــــــــــت
هنادي كان عندها مكالمة مهمة وأول ما خلصت راحت صوب أمها .. وكانت حزينة بس أخفت ملامح الحزن .,
هنادي وهي تبوس راس امها : اميه المكان هنيه امان .. والبيت مريح كلها جم يوم وتتعودين عليه
أم هنادي بابتسامة وهي تمسح على راس هنادي : أهم شي بيت يلمنا يا بنيتي .. نحن ما نبا نبطر على نعمة ربج
هنادي بعد تردد طويل : أماية أنا لازم أروح الشركه !! في شغلة ضرورية ولازم أخلصها ..!!
ام هنادي بخوف : تروحين الشركة !! عقب كل اللي سووه فيج بتروحيلهم وبرجولج .. لا قري مكانج ما شي روحة
هنادي وهي تتنهد : اميه الله يهداج ترى خوفج ماله داعي !! كلها نص ساعه اخذ اعراضي وبرد ما راح اتاخر..ولمياء خبرتني اذ ماجيت اليوم !! بيفروا اغراضي في الزباله .. وفي اوراق ضروريه ما تنفع تنفر اميه .. الله يخليج قدري موقفي .. أنا ما ودي أطلع عن شورج .. ولا ودي أروح هناك بس والله مجبورة .. يلا اجيب عباتي وبسير زين
ام هنادي وهي تشدها من ايدها : هنادي اول ما توصلين دقي علي ولا طلعتي من هناك هم بعد دقي علي ..عشان أتطمن
هنادي وهي تبوس راسها : فديت اللي يحاتون.. ان شاء الله يا الغاليه .. كل شوي بتصل عليج وبطمنج لا تشغلين بالج
ام هنادي : الله يوفقج يا بنيتي ويردج سالمه غااانمه ..
وفــــــــي آلشركه ..
مشعل كان توه واصل وراح صوب لمياء وتمتم بحقد والشر طالع من عيونه : هاه لمياء شو قالت بتي ؟!!
لمياء بتوتر ممزوج بخوف : هيه قالت كلها ربع ساعة وبتكون هنية
مشعل فخاطره : ما عليه هنادي حابه تلعبين معااي مب مشكله انا جاهز راح انتقم منج ومن ابوي مره وحده ..
اليوم بس راح تشوفين مشعل على حقيقتة !! حسبالج انا هين .. لا يا ماما أنا مش بومشعل وبتقصي عليه بجم كلمه
:::
:::
فـــــــــــــــــي بيت بو حمـــــــــود
مها كانت دموعها اربع اربع وماسكة المصحف ويالسة تقراء خوله بعد كانت يالسه تقراء وام حمود تسمعها لانها كانت تحب صوت خوله يوم ترتل وبدت اعصابها تهدى شوي شوي يوم سمعت كلام الله وحست نفسها مرتاحه
ساره اول ما وصلت راحت صوبهم ومها اول ما شافتها حضنتها وتمت تصيح بحرقه ساره تمت تمسح على راسها وتهديها : مهوووي حبيبتي اذكري الله .. و هذا عمرها .. والحمد لله طلعت من هـ الدنيا نظيفة بلا اي ذنوب
مها ما قدرت ترد على ساره وتمت تصيح بحرقه خوله اول ما سمعت مها تصيح تكدر خاطرها وهي بعد انهارت
ام حمود وهي تحضنها : خوله حبيبتي شو اللي صار عليج !! توج كنتي قويه وقدرتي تهدينا ليش انهرتي مره وحده
خوله وهي تصيح بحرقه : اميه انا وايد ضعيفه .. حاولت اكون قوية بس ما قدرت الله يصبرنا على فراقها .. هذي الغاليه امية .. كل ما أتذكر أنه خسرناها قلبي يعورني .. ع الأقل أنتوا شفتوها بس اللي عاش في الظلمة وما شافها !!
ام حمود وهي تحضنها وتمتمت بحزن : آآآآآآآآخخخخ يا الغاليه بسج عورتي قليبي !!
ام هلال وهي تسلم على ام حمود : احسن الله عزج .. ان شاء الله اخر الاحزان .. والله يعوضكم خير
ام حمود وهي تمسح دموعها : فيج الخير ما تقصرين ادعيلنا بالصبر .. عسى الله يصبرنا ونتحمل فراقها
ساره بحزن : مهوووي هلال يبا يشوفج .. هو وايد يحاتيج وخايف لا يصير فيج شي
مها اول ما سمعت اسم هلال توترت وطنشت ساره وراحت تجلس يم امها .. سارة طبعا ما استغربت من موقفها ..
::
فاطمه كانت توها واصله وكانت مستنده على حمود لانه ما باقي شي الا ويجيبون ميره عشان يشوفها لاخر مره
مريم اول ما شافت فاطمه مستنده على حمود تضايجت وقالت حق ساره : مستغله موت بنتها وقاعده تتقرب من حمود
ساره بعصبية : مريم اشو هالرمسه ؟!! خافي ربج .. اللي راحت قطعه منها مش وحده من الشارع ..
مريم بعصبيه : انزين انا اشو قلت عسب تعصبين علي جذا .. هي مش اول ولا اخر وحده بنتها تموت .. عادي يعني
ساره ودمعة ارتسمت على خدها : يا حسافه يا اختية .. ما توقعت الحب راح يخلي قلبج أسود بهالشكل عن اذنج
ساره ودمعة ارتسمت على خدها : يا حسافه يا اختية .. ما توقعت الحب راح يخلي قلبج أسود بهالشكل عن اذنج
مريم بقهر : مو بس الحب اللي خلاني اوصل لهالمستوى .. عقمي بعد وكل ما اشوف اطفال احسد امهم وادعي عليها .. والله هـ الشي مو بيدي .. من يوم ما عرفت أني عقيم وأنا كارهه الدنيا باللي فيها .. حاسه أني ضايعة ومشتتة
خوله وهي تحضن فاطمه : فاطمه حبيبتي الله يعوضج لا تكدرين خاطرج فكري في اللي بطنج .. وفـ أميرة ومايد
فاطمه كانت الدمعه مرسومه على خدها وما ردت على خوله وقالت حق حمود يوديها صوب عيالها
مها تقاطعه : حمود هنيه حريم تقدر تروح انا بوصلها حجرتها انته لا تشغل بالك
خوله بحزن : حمود سير يا اخوي كلنا عندها وان شاء الله ما راح انقصر معاها ...
حمود بحزن : فاطمه نفس ما وصيتج كوني قويه عشان عيالج وفكري باميره عشان خاطري حاولي تصبريها
فاطمه اول ما سمعت اسم اميره ادموعها تمت تنهمر بس ما ردت عليه وراحت عند مها صوب حجرتها
مريم وهي تسير صوب حمود : حمود حبيبي طمني عليك عسى صرت احسن .. مشغول بالي عليك !!
حمود وهو يتنهد : ما بيدنا شي يا مريم غير نصبر .. الله يخليج حطي بالج على فاطمه واميه اخاف يتعبون مره ثانيه
مريم وهي تخفي قهرها : لا تخاف حبيبي امك وفاطمه في عيوني واكيد ما راح اقصر .. توكل وأنته مطمن
::
وكلها دقايق بسيطة وجات الأسعاف وفيها ميره .. حمود طبعا أول ما شاف ميره مغطاية بشرشف ابيض .. ما قدر يتسحمل وكان شوي بيطيح وع طول هلال راح وسنده وتمتم بحزن : أذكر الله يا خوي .. ما يصير اللي تسوية
حمود وهو ياخذ ميره ويضمها لصدرة ويشم ريحتها لأخر مره : لا تلومني يا هلال .. هذي قطعة مني
بوحمود خذ ميره من حضن حمود وتم يباوسها ودموعها كانت تبلل الشرشف الأبيض
فهد راح وباس أبوه على راسه وتمتم بحزن : أبوي أنته لازم تكون أقوى عن جذا .. كل اللي داخل يستمدون القوة منك .. يلا الحين سير داخل وخذ ميره معاك .. وخلهم يسلموا عليها .. أكرام الميت دفنه
حمود قاطعهم وهو ياخذ ميره من حضن ابوه بشكل غريب :هاتها ابوي انا بوديها داخل .. خلوني معها فهالدقايق الاخيرة
بوحمود باستلام : نحن بعد بني معاك .. فهد هلال تعالوا وراي
.......................
فاطمة كانت قاعده تصيح بحرقة وحاضنه أميرة ومايد وعيونها كانت مركزة ع صورة ميره
أميره أول ما شافت أمها تشوف صورة ميره .. راحت صوب الصورة وعطتها أمها
فاطمة وهي تمسح على خد أميرة : رغم كل الحزن اللي فيج .. خايفه علي وتحاتيني .. آآآه يا بنيتي ميره هذي توأمج .. ويمكن انتي تتألمين من داخلج أكثر عني .. بس شو نسوي يا بنيتي هذا قدرها وعمرها . .. مكتوب لها كذا
أميرة حضنت أمها وتمت تصيح بشكل غريب .. فاطمة تمت تمسح على راسها بكل حنان وحب
قاطعتهم خولة بحزن : فطام حبيبتي قووومي .. ميره صارت تحت
فاطمة اول ما سمعت اسم ميره فزت من مكانها .. وراحت تركض بشكل غريب وهستيري
خولة تمتمت بخوف : فاطمة وينج حبيبتي .........؟!! وقبل ما تكمل كلامها سمعت الطيحة يايه من تحت
فاطمة قبل ما توصل ومن كثر ما كانت تركض طاحت .. وعقبها تمت تزحف على رجولها لحد ما وصلت ميره ..
وخذتها من حضن حمود وضمتها لصدرها .. كانت ودها تصرخ بأعلى صوتها .. بس كانت تقول في قرارة نفسها !! لا تميت أصارخ هل راح ترجع لي بنتي .. أنا خسرتها خلاص خسرتها
حمود وهو يقعد يم فاطمة وتمتم بحزن : فاطمة إنتي بخير
فاطمة ما ردت عليه وتمت حاضنة ميره وتصيح .. وقاطعهم صوت من بعيد .. كانتت تصارخ ومنهارة ..!!
فاطمة أول ما صدت صوب الصوت شافت أميرة وهي تصارخ وتقول كلام مش مفهوم ..!!
فهد راح صوبها يركض وحضنها وتمتم بحزن : مميروتي حبيبتي ما يصير تشوفيها ؟!!!
أميرة طنشتها ودخلت من بين يدية وراحت تركض صوب أختها .. وأول ما شافت ميره نايمة تمت تهزها وتمتمت وهي تصارخ : ميرة ليش مب راضية تبطلين عيونج .. قومي بسج نوم قومي .. انا أميرة قومي لا تنامي !!
الكل تم يصيح وتأثر بموقف ميره .. حاولوا يبعدوها بس هي ما رضت وصدت صوب أمها وتمتمت بحز ن : يعني ما راح تقوم خلاص ..ّّ تم طول عمرها راقدة !!! باباتي صحيها قولها أني احبها وايد ..
حمود وهو يصيح بحرقة : .................................................. ...................
أميرة بضيج : باباتي ليشس ما ترد وراحت تركض صوب يدها وتمت تهزه : يدي صحيها .. ميروه تحبك وتسمع كلامك !! قولها ما يصير تنام هـ الكثر .. يوم كنا نرقد وايد انته ويدوه تعصبون علينا .. عصب عليها الحين يمكن تخافك وتقوم
بو حمود حضنها وتم يصيح بحرقة .......... أميرة دزت يدها وتمتمت بضيج : أنتوا ليش كله تصيحون .. ميره بس نايمة
قاطعهم صوت من بعيد : أخ حمود إجراءات الدفن كلها جاهزه .. خلونا نتوكل
حمود بضيج : خلاااااص خذوها
فاطمة تمت متمسكة فيها ومب راضية تبطلها .. حمود راح صوبها وتمتم بحزن : فاطمة خلاص .. ودعيها وخلينا ناخذها
أميرة وهي توقف جدامة ودموعها أربع أربع : ما راح تاخذوها .. ميره راح تنام عندي بحجرتنا ..
فاطمة باست ميره وعطتها مها وخوله عسب يسلمن عليها .. ام حمود طبعا ما قدرت تقرب صوبها .. بس بو حمود حضنها وخلاها تشوفها .. وأول ما شافت ميره .. حضنتها وباستها .. وأول ما يات توقف طاحت ..
فهد خذ امه ووداها صوب حجرته وحمود خذ ميره ووداها صوب الأسعاف ..
أميرة صرخت صرخة رجت المكان وتمتمت بحزن : وين بتاخذون أختي .. رجعوها .. هاتوا أختي !!
بس حمود مسك نفسه وراح صوب برع .. فاطمة راحت صوبها وحضنتها وتمتمت بقهر وهي تصد صوب سناتا : ليش نزليتها هاه ؟!! ما قتلج تمي معاها ؟!! زين الحين اللي صار فيها
سناتا ودموعها أربع أربع : .................................................. .................
فاطمة قاطعتها بقهر : ردي !! بلاج ساكتة ..!! انني ليش تكرهيني ؟!! أنا شسويتلج ؟!!
سناتا ما قدرت تستحمل وراحت صوب المطبخ .. هنيه مريم توترت .. شكت انه فاطمة يمكن عرفت شي .. خصوصا انها كانت عند غادة وتمتمت بخوف : معقولة فاطمه عرفت انه سناتا وراء كل شي ؟!! لا أنا لازم اتصرف
أميرة تأكدت الحين أنها راح تخسر أختها وللأبد .. والخوف من مريم بداء يسيطر عليها .. وكلها لحظات وطاحت !!
::
:::
::
فـــــي الشركة
هنادي كانت توها واصله وراحت صوب الشركه ولمياء اكدتلها انه لا مشعل ولا ابو مشعل في الشركه وهالشي طمنها
لمياء بابتسامه : هلا هنووووده تو ما نور المكان
هنادي وهي مخنوقه : لمياء الله يخليج ما وقته عطيني اغراضي وخليني اروح مالي خلق اشوف بومشعل ولا ولده
لمياء وهي تناولها الاغراض : هذي اغراضج .. عاد امانه لا تقطعينها
هنادي خذت الكرتون بسرعه وكانت وايد خايفه ومتوتره : ما عليه لمياء ان شاء الله ما بقطعج بينا اتصالات يالله باي
مشعل كان يالس ينتظرها برع واول ما ركبت سيارتها لحقها هنادي انتبهت عليه ومن خوفها زادت السرعه بس مشعل تم وراها وزاد سرعتة هنادي الخوف كان تارس قلبها وحست انه مشعل ناوي على شر .. وتمت تتعوذ من أبليس
هنادي وقلبها يدق بسرعه : يا ربي اشو تبا مني الحين مو كافي اللي سويته فيني ليش مب راضي تخليني في حالي
مشعل وهو يزيد السرعه : انا اراويج انتي حطيتي راسج براسي واحينه راح اخليج تدفعين ثمن هالشي غالي الظاهر انج ما تعلمتي وما عرفتي مشعل شو قادر يسوي وربي راح اخلي هذا اخر يوم تشوفين فيه النور .. ..
هنادي بخوف : لا هذا اكيد استخف بيروحنا حسبي الله عليه .. مشعل حرك السياره بقو وخلاها عرض وهنادي ما عرفت كيف تتصرف ولفت السياره بالاتجاه المعاكس وانحرفت عليها وما حست نفسها الا والسياره تطير فيها وفجأه تبطل باب السياره وطاحت هنادي بقو على الارض مشعل تم يراقب الموضوع من بعيد وطلع سيجارة وتم يدخنها والشر طالع من عيونه وراح صوب هنااادي وتم يطالعها بحقد : هذا جزات اللي يوقف بوجه مشعل
هنادي وهي تتكلم ببطء والدم تارس جسمها وبصوت متقطع : مشعل انته ليش تسوى فيني كل هذا
مشعل بعصبيه : انتي اللي تسببتي بهالشي وتحملي .. عن اذنج يا حلووه ودعي الشمس قبل لا تفارقي الحياه
هنادي بصوت متقطع : حسبي الله ونعم الوكيل .. حسبي الله ونعم الوكيل وفي وسط هالدوامه صكرت عيونها وما
حست الا بسواد يلف حواليها والالم يقطع جسمها وتنفسها صار ضيق
هنادي بصوت متقطع : حسبي الله ونعم الوكيل .. حسبي الله ونعم الوكيل وفي وسط هالدوامه صكرت عيونها وما
حست الا بسواد يلف حواليها والالم يقطع جسمها وتنفسها صار ضيق
::
::
مــــــر الوقت بسرعه ورضاء الكل بقدرة ونصيبة .. فقدر الله وما شاء فعل ..
الساعه السادسة مساءا....
فاطمه كانت تصيح وحاضنه اميره وتمسح على راسها واميره بس تصيح ومب قادره تتكلم
فاطمه بحزن : اميره حبيبتي ادري اللي صار صعب !! وصعب على وحده في سنج تقدر تفهمه بس بعدج عن ميره اكيد راح يفهمج اللي صعب عليج تفهميه و اللي اباج تعرفيه انه ميره بتم معانا في قلوبنا .. انتي لا تكدرين خاطرج
اميره كانت يالسه اتصيح وما تررد وفاطمه كانت مستغربه من حالتها بس حزنها على ميره خلاها ما تهتم بالموضوع
::
ناصر وهو يسلم على فهد : احسن الله عزاك فهد .. والحمد لله على سلامتك
فهد ودمعه ارتسمت على خده : شو بيدنا نسوي !! من يوم ما رديت والبلاوي تتحذف علينا من كل صوب
خالد يقاطعه : اذكر ربك يا فهد .. ما يصير الصبر زين .. اصبر واحتسب
فهد : الحمدلله رب العالمين على كل حال ..
خالد وهو يذكر اخته روضه ودمعه ارتسمت على خده بدون ما يحس : فهد ع الاقل انتوا عرفتوا ميره وين راحت !!
لكن انا اللي صارلي شهور ادور على اختي وما محصلنها وما ادري .. حيه ولا ميته .. يوعانه ولا شبعانه
فهد بحزن : بتحصلوها يا خالد بتحصلوها ان شاء الله خلنا نروح صوب حمود
حمود كان يالس على الزاوية وساند راسه على للجدار ويتخيل ميره ويصيح بحرقه ........ وردت فيه الذاكره للوراء تذكر حفلة يوم ميلادها يوم طلب منها الكل تتمنى امنية والكل استغرب من امنيتها .. وضحك عليها
حمود بابتسامه : هاه ميروتي خبريني شو تمنيتي ..
ميره بضحكات ممزوجه ببراءه : بابا تمنيت باجر لا كبرت اصير مهندسه سيارات واصلح لك سيارتك عشان ما تخترب وتوقف علينا كل ما طلعنا مشوار .. وبعدين تيلس تصلحها وما نسير حديقة الالعاب
فاطمه بابتسامه : اوووووه البنت عايشة معاناه
فهد وهو ميت ضحك : ميروه بصراحة عليج افكار جهنمية .. ميكانيكية مره وحده صراحه طموحه البنت
خوله وهي تضحك : ما تنلام الفقيره حمود من يوم شرى هالسياره ما بدلها ولا بغوا يسيروا مشوار طلعوا من البيت الساعه خمس العصر وفنص الطريج توقف عليهم وما يوصلون مدينة الالعاب إلا ع الساعه 8 وما يمديهم
حمود وهو اونه معصب : خلااااص ما يصير نكسر بخاطر ميرهونبيعها .. هي قالت لا كبرت بتصلحها حقي صح باباتي
ميره بابتسامه : هيه انا بصلحها حقك .. وما بتوقف مره ثانيه
مها تقاطعهم وبابتسامه : اممممممم هذي أمنيت ميروه وامورتي الحلوه شو تمنت
اميره وهي تمسك يد ميره : تمنيت اني اعيش مع ميره لحد ما اكبر عشان نروح المدرسه مع بعض ونكبر مع بعض
والكل تم يضحك على كلام اميرة بس حمود عقب ما تذكر هالعباره تم يصيح بحرقه وفهد تم يطبطب عليه : حمود يا اخوي هدي نفسك .. شوف حالتك .. استغفر ربك .. والله بيصبرك ان شاء الله وبيعوضك خير
حمود وهو يتأمل زوايا البيت : لو بغيت اتناسى صوتها وضحكتها اسمعهم في كل زاوية .. مب مصدق اني ما راح اشوفها مره ثانية .. ولا راح اسمع كلمة بابا من شفايفها الصغيره حتى ريحتها انحرمت منها
خالد بحزن : حمود هذا مصير كل واحد فينا .. ما بيدك شي غير الصبر كل شي يروح ويرجع الا انسان ميت .. والله من علينا بالصبر والنسيان لازم تعود نفسك خلها فقلبك تراكم تعذبوها بهالشكل .. قوم توضى وصلى ركعتين
:::
::
وعنـــــــــــــــــد آلحـــــــــــــــــريم
خوله بحزن : اميه ما يصير من الصببح وانتي ع لحم بطنج لازم تاكلي شي ..
ام حمود ودموعها ما وقفت وبحزن : خوله خليني في حالي قتلج مالي خلق مابا اكل شي ومن له نفس في الاكل اصلا
ام هلال : خوله خليها يا بنيتي انتي تنصحين امج وبروحج ما ماكله شي
خوله تقاطعه : ما عليه خالوه بس امي عندها السكر لازم تاكل شي لا انخفض عليها مشكله
ام هلال : حتى انتي حامل ولازم تتغذين .. خليها على راحتها انا بتم عندها ولا بغت شي ما بقصر
ساره وهي تمسك خوله من يدها : خوالي غناتي تعالي خليني اوديج تاكلي شي ما يصير
خوله بحزن : ساره مالي خلق اكل الله يخليج وديني عند فاطمه ابا اتطمن عليها وعلى اميره ومايد
ساره : تعالي حبيبتي خليني اوصلج واشوف مريم فطريجي هي بعد متكدره ومصكره على روحها فحجرتها
ام هلال وهي اطالع مها : مها هلال صار له نص ساعه يترياج برع ما يصير سيري شوفي شو يبا
|
28-07-10, 07:47 PM
جديد مواضيع قسم القصص المكتمله
العرض العادي
