مها : يا سلام وليش ان شاء الله لا يكون انا امها لا حبيبتي يا تشبهج انتي يا تشبه ابوها انا مالي شغل فيكم
اميره تقاطعها : عموه انتي ليش معصبه ماما وعموه قالوا شي يزعل
مها : انتي شو تشوفين
اميره : ما ادري اوقات احسج تشبيهن شخصيه من افلام الكرتون .. هي نفس تصرفاتج بالضبط
مها وهي اونها معصبه : لا حول ولا قوة الا بالله سلمنا من امها والظاهر ما بنسلم منها ميروتي طالع فلم كرتوني روعه اشو رايج تسيري تشوفيه ميروه يالسه اتابعه من زمان
اميره وهي تحط ايدها على ثمها : اااااااوووووه .. نسيت .. طالعه ريمي بسير اشوفها
مها : الحمدلله لو خليتها جان بيلس لحد الصبح وانا اجاوب على اسئلتها .. هالبنت حشريه ما ادري طالعه على منو
ويلست اطالع خوله و فاطمه وهنه كاتمات ضحكتهن .. ما يحتاج تسون بروحكن جذا اضحكن عارفه اكيد طالعه علي
وسمعن احد يدق الباب خوله بحماااس اكيد هااي روضه مهوي سيري بطليلها وانا وفطوم شوي وننزل
مها : تمام بس لا تتاخرن يالله اترياكن ..
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
فــــــــــي بيت بو هـــــــــــــــــلآل
بو هلال :هاه بو حمود نتوكل على الله ونقراء الفاتحه
بوحمود : والله مدام حمود ومريم وافقوا خلونا نتوكل على الله
بو هلال : يالله عيل بسم الله ...............
مريم وهي طايره من الفرح : ساروه انا فحلم ولا فعلم .. حمود خلاااص بيصير ريلي على سنة الله ورسوله
ساره بابتسامه : الف الف مبروك اختيه . عسى الله يوفق بينكم ويجمعكم على الخير
مريم : الله يسمع منج حبيبتي تعالي خيلنا نروح نيلس عند خالتي ام حمود اووووه اقصد عموتي ام حمود
ساره وهي تتنهد : هيه اشعليج بالاول جانت خالتج والحين بتستوي عمتج .. يالله الله يهني سعيد بسعيده ..
مريم هي اطقها ع كتفها : اقول انطمي اشو سعيد وسعيده ما حصلتي اسم ثاني
ساره وهي اتحط ايدينها على خصرها : يا سلام وشوفيه اسم سعيد
مريم : ما ادري ما احبه مب شرات اسم حمود فديته حتى حروفه كلاسيك وبعدين انتي شو لج فاسم سعيد
ساره بتوتر : لا ما شي خيلنا نروح تاخرنا وايد
وفــــي بيت بو خـــآلد
مها : حي الله من يانا تو ما نور البيت ..
روضه بابتسامه : منور باهله حبيبتي شحالج وشمسويه عسى مبسوطه ومستانسه
مها : الحمدلله انا بخير وسهاله انتي شحالج
روضه : انا بخير شو بتخلينا واقفين عند الباب
مها وهي تضحك : هههه تصدقين نسيت اقولج تفضلي لانه البيت صار بيتج من اليوم ولازم تتصرفين فيه براحتج
روضه : مشكوووره فديتج ها من طيب اصلج الا وين الربع
مها : شوي وبينزلون خلينا نروح صوب داخل ..
خوله بابتسامه : يقولون الطيب عند ذكره ولا شو رايج فطامي
فاطمه بابتسامه : خوالي الظاهر انه عمرنا طوويل
روضه : انزين سلمن بالاول وعقب تمن اهذرن على كيفكن اشحالج خوالي
خوله وهي تباوسها : يوه الظاهر انه لسانج طوويل انا بخير انتي شحالج
روضه : الحمدلله مدام انه نشوف هالوجوه السنعه اكيد بنكون بخير ونعمه
فاطمه وهي تسلم عليها : الخير في ويهج حبيبتي اشحالج وشخبار اخوانج
روضه بابتسامه : الحمدلله حبيبتي كلهم بخير وسهاله .. يسلمون عليج
فاطمه : جان يبتيهم معاج يتونسون شوي ويلعبون مع البنات
روضه : لا خواني محترمين مالهم سوالف مع البنات يمشوا ع العجين وما يلخبطوه
مها وهي تضحك من خاطر : اونج عاااد وايد مغتره باخوانج .. الا صدق شحقه ما يبتيهم
خوله تقاطعها : رواضي ترى مهووي تموت في اليهال المره الثا نيه لا تنسي تجيبيهم معاج
روضه وهي تتنهد : كيف ايبيهم وانا ما اشوفهم الا فترة المساء خالوه دومها مطيحه عند اهلها وتاخذهم معاها
خوله بابتسامه : الظاهر انه خالوتج قويه .. والتعامل معاها مش سهل ولا ؟؟!!!!!!!!!
روضه:اها زين عرفتي عسب من احين تحاولي تكوني قريبه منها وتسوي اللي يرضيها وعقب بتحبج وبتشتري رضاج
مهووي بابتسامه : انزين رو رو اشو رايج نروح ناكل شي خفيف ترى حدي يوعانه
روضه بابتسامه : يالله مب مشكله انا بعدني توني صغيره ولا عشت حياتي ومابا احد يلتهمني وانا حيه
مهوي : ما عليه هالمره بنطوفها حقج بس المره الثانيه
روضه تقاطعها : مهووي حبيبتي خلينا فهالمره لا حقين نفكر اشو بيستوي فالمره الثانيه يالله خلينا نروح ناكل
وتمن يسولفن ويضحكن وعقب يلسن يتعشن
روضه : مهوووي ما كنت ادري انج طباخه ماهره
مها بكبرياء : احم احم .. عسب تعرفين اني مب هينه اطلبي اللي تبيه وانا حاظره باللي تامريني عليه
روضه بابتسامه : لا فديتج بصراحه اليوم ما قصرتي خليها المره اليايه وانا بدلع وبطلب اللي اباه زين
مها بابتسامه: خلاص فديتج اللي تامرين فيه انا حاظره
روضه : خواالي حبيبتي خالد ما دقلج
خوله بخجل : هيه فديتج دقلي العصر وطمني عليه .. المعرض باجر بيبداء وجان شوي متوتر بس انا هديته

روضه بابتسامه : زين سويتي فيه .. هالمعرض بيغير اشياء وايد فحياته
خوله بابتسامه : الله يوقفه .. ويرده سالم غانم
روضه : خوالي الا خالد ما خبرج بالصور اللي بيفتتح فيها معرضه
خوله : لا ما قالي .. وانا ما اعرف وايد فهالامور
روضه : شوفي بيني وبيبج .. انا لمحت لوحه وجان راسم فيها عيونج وكانت تهبل
خوله بخجل : افهم من كلامج انه راسم صورتي ..
بروضه تقاطعها : بالضبط بس لا تحاتين هي مش صوره بس عيونج وفيها جم خصله نازله من شعرج وخالد قال بس بيفتتح فيها معرضه لاكن ما بتكون معروضه للبيع .. صدق انه الحب يسوي بلاوي
خوله تقاطعها : روضه اشو رايج ايبليج صور الملكه ما ضنتي شفتيها
روضه وهي تتنهد : وانا صارتلي فرصه عسب اشوفها يالله سيري هاتيها شوقتيني
خوله بابتسامه : خمس دقايق واكووون هنيه يالله من رخصتج
فاطمه بابتسامه : خوالي لحظة بيي معاج ابا اشوف مايد اذا جان بعده للحين راقد
مها بابتسامه : رواضي انا مسويه جم شغله في المطبخ يعني نتسلى فيها
روضه وهي تضحك : مهوي خافي الله تونا متعشيين ما لحقنا
مها : والله عاد انا شفتج وحده شرات الخيزرانه .. فقلت اسويلج كم اكله تخليج تستوين دبدوبه يالله خلينا اروح اجيبهم
روضه وهي تضحك : خلاااااص حبيبتي اللي يريحج بس لا تكثرين اوك
مها وهي اتصارخ : زين زين يصير خير
روضه وهي تضحك : ههاي صدق يا خالد عرفت تختار ناس محترمين وعارفين الواجب عدل ولا حسسوني اني غريبه
فهد جان توه ياي من برع ويالس يغني ودخل الصاله وهو مش منتبه لروضه
روضه بتوتر : ياربي هالصوت مش غريب علي .. وحطت ايدها ع قلبها .. ها صوت فهد .. انا متاكده وصدت صوبه ويلست تتأمله من بعيد .. اخيرا شفت ملامحه بالاول جان خيال بس الحين صار خياله حقيقه
فهد جان يالس يتحلطم : وليه اميه وابوي شكلهم للحين ما ردوا .. لا الظاهر بيرقدون هناك
روضه قامت وحاولت تروح صوب مها بدون مايحس فيها فهد وجانت منزله راسها وبدون ما تحس ضربت ففهد
روضه وهي قافطه : انا اسفه ما انتبهت
فهد وهو يبا ينفجر ضحك بس سكت واكتفى بابتسامه : عادي اختيه انتي اللي سمحيلي تحريت محد فالبيت
روضه وهي ترتجف وفخاطرها : ياربي انا شو سويت لو تميت يالسه مكاني اشو كنت بخسر زين احينه صدق فشله
فهد بابتسامه : اختيه اعذريني ما كان قصدي احرجج
روضه وهي تتنهد : لا ما عليه اخوووي حصل خير انا الغلطانه.. يوم سمعت صوتك ارتبكت وكنت ابا اسير المطبخ صوب مها وصار اللي صار .. يعني انا الغلطانه مش انت .. لا تشغل بالك
فهد وهو يتنهد وفخاطره : يحليلها مستحيه حتى ما مخليتني اشوف ملامح ويها .. احسن شي اروح صوب غرفتي
روضه بتوتر : ياربي هاه بلاه واقف وربي شوي وبطيح من وقفتي
فهد بابتسامه : يالله اختيه انا بروح صوب غرفتي واسمحيلنا عااااد
روضه بتوتر : .............................
مها اول ما شافت فهد ركضت صوبه وبعصبيه : فهود على اساس بتتأخر .. ليش راد البيت بدري
فهد : والله عاد خلصنا بدري وقلت ارجع وانتي ما خبرتيني انه عندج ضيوف
مها وهي تتنهد : هيه هذي روضه اخت خالد زوج خوله
فهد وهو يتذكر سالفة الكيك وتم يضحك فخاطره : يحليلها هاي ثاني مره اخوفها .. اخاف المره اليايه اخليها تنجلط
مها وهي اتصاصخه : فهود يالله سير غرفتك البنت مستحيه طالع ويها صار فيه سته وستين لون
فهد بابتسامه : روضه خبريني ما فيه اخبار عن خالد
مها تقاطعه وهي اتصاصخه : فهوود بلاك اقولك مستحيه وانته يالس تتسئل
روضه بتوتر : الحمدلله بخير وسهاله كلها جم يوم وبيرجع ان شاء الله
فهد : الله يوفقه ويسهل عليه كل خطوه وع العموم حبيت اعتذر لما شفتيني اول مره ما جان قصدي اخوفج
روضه لما تذكرت الموقف ابتسمت وفهد انتبه وهو بعد ابتسم وراح صوب غرفته
روضه فخاطرها : اووووف ما بغيت والله شوي وقلبي جان بيوقف
فهد بابتسامه وفخاطره:ما ادري هالبنت اول ما شفتها ارتحتلها احس تصرفاتها قريبه من بنت عمي ساره اه يا ساره
كل العذاب اللي انا عايش فيه انتي سببه ما ادري كيف بقدر اكمل حياتي وانا بعيد عنج الله يصبرني على بعدج
يالله بطني يصوصو احسن شي اسير المطبخ وادور شي اكله .. ما بقدر ارقد وانا مب ماكل شي
مها بابتسامه :/ رواضي اعذريني حبيبتي والله ما دريت انه بيرجع بدري ولا كنت بخبره يدش من الباب الخلفي
روضه بابتسامه : لا تشغلين بالج نحن صرنا اهل .. وبعدين انتي اشو دارج انه ما بيتأخر
مها : على قولتج المهم تعالي ساعديني انا جهزت الاكل .. ولا اقولج انتي سيري المطبخ وانا بسير ازقر فاطمه وخوله ما ادري ليش تاخرن هالكثر .. ما بتاخر عليج البيت بيتج
روضه بابتسامه : اوكي حبيبتي اترياج في المطبخ لا تتاخرين وسارت صوب المطبخ
فهد بابتسامه: حشا يا كثر هالاكل منو بياكله والله لو امي تدري جان هزبتهم بس مب مشكله انا باكله وتم ياكل بشراهه
روضه دشت المطبخ وحصلت فهد وجان شكله متخيس بالكريما ويلست تضحك من خاطر وعقب استحت ونزلت راسها
فهد وهو اونه يطنز : وانتي بتمين ورااي وراااي ..
روضه بتوتر : لا والله انته كنت ساير غرفتك اشو يابك هنيه يعني انت الغلطان مش انا
فهد بابتسامه : خلاااص السموحه بس والله حدي يوعاااان وما قدرت اقاوم ريحة الاكل
روضه فخاطرها:ياربي ما توقعت اني اشوفه جدامي واحط عيني بعينه..خايفه اكون حبيته بس قلبي ليش يدق بهالشكل
فهد بابتسامه : روضه شوفي اباج تساعديني زين

روضه باستغراب : عفوووووووووووووا
فهد : شوفي اذا عرفت مها اني كليت الكيك وربي لا تعصب علي وتهزبني عسب جذا ساعديني وقولي انج انتي كليتيه
روضه بدون ما تحس : يا سلام وانا شو يخصني انته سويت عملتك وتباني انا اتحملها ليش ان شاء الله
فهد فخاطره : بل طلعت قويه .. وانا اتحسبها هاديه ورقيقه
روضه بتوتر : اسفه وربي ما جان قصدي ارد عليك بهالشكل اعذرني عن اذنك
فهد : ياربي يعني انا متى بتادب وبصير ريال .. يالس اسولف معاها جنها اختي اخاف البنت تاخذ عني فكره غلط
روضه بتوتر : اكيد احين بيقول هذي رازه بويها .. وانا ما شاء الله قاطه معاه صك وحنك .. صدق اني ما استحي
مها بابتسامه : رواااضي بلاج يالسه ترمسين مع نفسج فيه شي مكدر خاطرج
روضه بتوتر : لا بس يالسه اقول اني وايد تاخرت ولازم ارد البيت
مها وهي تشدها من ايدها : يا سلام جي شو الشغله على كيفج .. يعني انا حق منو مسويه الكيك تبين امي تذبحني
روضه بتوتر : بـــــــــ .................ـــــــــــس
مها تقاطعه وهي مبطله حلجها : ياربي اشو مستوي هنيه .. وصدت صوب روضه رواضي لا تقوليها
روضه بتوتر : هاه والله ما كليت شي انا اصلا ما دشيت المطبخ صدقيني
مها وهي تضحك : عيل محد غيره هالخبيث انا اوريه .. مو على ساس ساير يرقد ما عليه فهود صبرك علي بس
فهد جان ورى الباب :طالع هذي صدق انها خاينه على اساس متفقين تقول هي كلت الكيك واحينه تخون العهد اللي بينا
مها بضيج : شوفي انتي خليج هنيه وانا ثواني وراجعه .. هالولد يباله هزاب عسب ما ياكل شي مش له ثواني اوك
روضه وهي تتنهد : خلاااص حبيبتي بس لا تتاخرين ابا ارجع البيت زين
مها وهي تاشرلها وتركض صوب غرفة فهد : ثووواني بس ما بتأخر ..
فهد طلع من ورى الباب وسوى روحه معصب : مو على اساس متفقين تخبريها انج انتي اللي كليتي الكيك
روضه بخوف : بسم الله الرحمن الرحيم انته من وين طلعتلي زيغتني
فهد وهو يتمصخر : ههههااي كسرتي خاطري ليش تخوني العهد اللي قطعناه بينا
روضه وهي اطالعه من فوق لتحت : يا سلام ومن متى بينا معاهدات اخ فهد .. ذكرني يمكن نسيت
فهد وهو اونه معصب : انا وانتي اتفقنا تخبرين مها انج انتي كليتي الكيك مش انا .. اشحقه ما خبرتيها جذا
روضه بمصخره : شو ف انا مش متعوده اكذب وانا ما كليت كيك ليش تباني اتحمل ذنب شي انا ما سويته
فهد بمصخره : يا شيخه اونج عااد .. وبعدين هاي جذبه بيضاء .. لو كذبتي كنتي بتكسبين اجر فيني
روضه وهي اطالعه بنص عين : يا سلام ومنو خبرك اني ابا اكسب اجر خصوصا منك انت
فهد وهو اونه معصب : وشو فيني انا هاه .. ما تارس عينج يالله فهميني
روضه بطنازه : طقني بسطار شو يالس تترياء .. وبعدين انا ما اسمحلك ترفع صوتك علي فاهم
فهد وهو يتمصخر عليها : ومنو انتي يعني اشو تتحرين نفسج الليدي ديانا
روضه بطنازه : واحسن بعد واذا ما عايبك طق راسك بالطوفه فاهم ولا تباني افهمك بلغه ثانيه يمكن ما تفهم عربي
فهد : تطنزين حظرتج !!؟؟؟
روضه بكبرياء : والله عاد هالشي يرجعلي انا .. انته مالك شغل فيني فاااهم
فهد اول ما شاف مها يايه توتر:هذي مها !! روضه عشان خاطري طلعيني من هالمصيبه الله يخليج عشان خاطري
روضه بكبرياء : اول شي تعتذر على الاهانات والكلام الفاضي اللي قلته من شوي
فهد بتوتر : اسف والله اسفه بس خلصيني من هالمصيبه
روضه بابتسامه : اوووك الحين صرت برستيج خلاص ولا يهمك انا بطلعك منها بطريقتي
مها وهي اتنافخ وبعصبيه : ما حصلته ما ادري هالدب وين راح
روضه بابتسامه : انتي نسيتي ادورين فالمطبخ يمكن مستخبي هنيه ولا هناك دوري عدل
فهد فخاطره : ياربي هالبنت اشو ناويه عليه .. مو على اساس بتساعدني بس معذوره حرمه والحريم كل يوم براي
مها : هيه والله صدقج انا كيف ما دورت فالمطبخ اشو رايج تساعديني
روضه بابتسامه : انزين مهووي اذا حصلتيه اشو بتسوين فيه
مها:وربي لاكسر البيت على راسه صبرج علي بس يعني انا اتعب وهو ياكل ع الجاهز انابعلمه كيف يحترم املاك غيره
مها مسكت الباب وجانت تبا تشوف منو وراه فهد بخوف : جاك الموت يا تارك الصلاه وصكر عيونه
روضه وهي تشدها من ايدها:مهوي فهد ماله شغل؟!بصراحه من حلات الكيك انا ما قدرت اترياج وكليت بشراهه اسفه
مها وهي تضحك : روضه من صدقج .. انتي اللي مسويه كل هذا .. وليش ما خبرتيني
روضه وهي منزله راسها : بصراحه مفتشله منج
مها بابتسامه : وليش مفتشله هالكيك جان حقج والحمدلله انج انتي اللي كليتية مش فهد وربي كنت بذبحه يالله تغسلي والحقيني خوله وفطوم صارلهم ساعه برع يترينج لا تتاخرين اوك !! ولا تخافي ما بخبر احد بالسالفه ههههههههه
فهد بابتسامه : مشكوره ما راح انسى لج هالخدمه ابد .. انتي انقذتيني من براغيث الموت
روضه وهي ميته ضحك عليه وما بينت وتصرفت بكبرياء:عسب تعرف قيمتي وما تقارني بديانا وغيرها من رخصتك

مــــن آحـــــدآثـ آللحــــظة آلعـــــــــــشرون ..







ღ ♥ღ ♥ღ ♥ღ ♥ღ ♥ღ ♥
ღ ♥ღ ♥ღ ♥ღ ♥ღ ♥ღ ♥

فاطمه وهي اتصيح:سويتها يا حمود وتزوجت..بعتني وشريت مريم .. اه شكثر بتحمل هالضيم .. لما توفوا امي وابوي
حسيت ا ني خسرت الدنيا وما فيها بس صبرت وقلت باجر الله بيعوضني وفعلا صبرت والله عوضني فيك يا حمود بس
كل هالسنين مرت بسرعه ما لحقت اتهنى فيك يا حمود .. وهذا انت خليتني نفس ما ابوي وامي خلوني .. انا مالي احد
الكل باعني وتخلوا عني .. الكل قام يشووف مصلحته ولا يهمه اذا هالشي بيضر غيره .. ما اقول غير الله يسامحك حمود .. والله ينصرني على من ظلمني واقدر اثبت براءتي جدامك .. ياربي تساعدني وتيسرلي كل اموري ..

ღ ♥ღ ♥ღ ♥ღ ♥ღ ♥ღ ♥
ღ ♥ღ ♥ღ ♥ღ ♥ღ ♥ღ ♥

.....: هلا اخوي مطر شحالك
مطر بابتسامه : هلا شو كل شي يصير نفس ما خططناله
....: لا تخاف حبيت بس ابلغك بهالخبر وانه كل شي يالس يصير نفس ما نحن نباه بالضبط
مطر وهو يضحك : اوووكي المهم بيكون بينا اتصال وبنتفاهم على الخطوه اليايه
...: خلااص انتظر اتصالك .. ونحن جاهزين باللي تامرونا عليه


ღ ♥ღ ♥ღ ♥ღ ♥ღ ♥ღ ♥
ღ ♥ღ ♥ღ ♥ღ ♥ღ ♥ღ ♥



ساره اول ما سمعت صوت مريم طاح التلفون من ايدها وبطلت عيونها : مـــــــــــريم
مريم وهي تاخذ التلفون من الارض وتعطيها : هيه مريم انا كنت شاكه انه ورى هالاتصالات سالفه جايده وجايده بعد
ساره بتوتر : بس هو يباني بالحلال ..
مريم بطنازه : هذا وانا امدح فيج وفاخلاقج وفي النهايه طلعتي وحده ..............................؟؟؟؟؟؟؟؟؟؟؟؟؟؟؟؟؟!!!


ღ ♥ღ ♥ღ ♥ღ ♥ღ ♥ღ ♥
ღ ♥ღ ♥ღ ♥ღ ♥ღ ♥ღ ♥