بومشعل : ولدي مشعل .. هو دفع المبلغ وقالي شو اسوي .. بس بعدني للحين ما فهمت عليج
هنادي تقاطعه : اها وصلنا لمربط الفرس .. خلاص انته خله يمسك الشركه بس الاوراق وكل الصفقات اللي بتصير انته اللي بتشرف عليها يعني يدير الشركه بس بافكاره وانته بتكون مسؤول وتوصلك اخبار الشركة وانته يالس فبيتك
بومشعل : يعني افهم من كلامج اني اخلي مشعل يشتغل ويشغل افكاره وكل الصفقات اللي بترسي على الشركه لازم ياخذ رائي فيها وما بيقدر يتصرف الا بموافقتي
هنادي بابتسامه : هذا اللي اقصده وبهالطريقه انته بترتاح وهو بعد بيرتاح ولا بيسويلك مشاكل بيلهي بشغله
بومشعل : تصدقين عاد والله رايج غاوي بس اخاف مشعل ما يوافق
هنادي بابتسامه : شوف انته خله يجي صوبك اليوم الشركه وقوله انك كنت تفكر طول اليوم ووصلت لحل يرضي
كل الاطراف وخبره عن الفكره وان شاء الله خير ..
بومشعل وهو يبوس هنادي على راسها : الله لا يحرمني منج ولا من افكااارج .. عيل خليني اروح الحين
هنادي وهي تتنهد : خلاص بو مشعل اللي يريحك .. انا بغير ملابسي والساعه 9 بالضبط بكون هنااااك زين
بومشعل بابتسامه : خلااااص حبيبتي اللي يريحج حتى لو بغيتي تاخذي اجازه مش مشكله
هنادي تقاطعه وبتوتر : لا لا مابا اجازه الله يخليك انا لما اكون قربك احس نفسي مرتاحه .. فلا تحرمني من هـ الشي
بومشعل : لا انتي اليوم رجعتيني اربعين سنه لورى .. انا ما استحمل كل هالدلع .
هنادي : انته تستاهل حبيبي وبعدين انته ريلي لو تبا عيوني ما تغلى عليك ..
بومشعل : تسلملي عيونج .. يالله الحين من رخصتج
هنادي : فحفظ الرحمن يا الغالي .. عسى الله يحقق كل اللي فبالك ويسهل عليك كل امورك
ام هنادي تقاطعها : خلاااص الريال راح فلا تعبين نفسج
هنادي : امايه بلاج اذا ما دعيت حق ريلي حق منو ادعي .. الله يهداج بس
ام هنادي : هنادي فهميني اشو غرضج .. ليش تبين بو مشعل ييلس فالبيت وولده يدير الشركه
هنادي باستغراب : امايه وانتي اشو دراج .. لا يكون يالسه تتنصتين علينا
ام هنادي : مش المهم الحين كيف عرفت كل اللي هامني اعرف اشو غرضج من هالموضوع
هنادي وهي تتنهد : اميه دام انج سمعتي الموضوع اكيد سمعتي بومشعل لما قال انه ام مشعل باديه تشك فيه ومشعل
يالس يزرع هالاوهاام براسها ويمكن فاي لحظة تصدق وتعرف كل السالفه وعقب انا وانتي نرجع للشارع وللبهدله
ام هنادي بخوف : قصدج انتي سويتي هالشي عسب تبعدين مشعل عن امه
هنادي : بالضبط ..هذا اللي كنت اباه انا مش مستعده ارجع للذل اللي عيشوني اخواني فيه بعد ما باعوا البيت اللي لمنا
ام هنادي بخوف : هيه والله زين سويتي.. بس الحين كيف بتقنعي بو مشعل يكتب هالبيت باسمج
هنادي:اميه للي صار كل شي حسب ما انا مفكره ومخططه صدقيني هالبيت ما بيلزمنا من رخصتج بسير اغير ملابسي
ام هنادي وهي سرحانه : خاطري اعرف اشو اللي ناويه عليه .. يوم عن يوم تخوفني بتصرفاتها .. الله يستر
~ ~ ~ ~ ~ ~ ~ ~ ~~ ~ ~ ~ ~ ~ ~ ~ ~ ~~ ~ ~ ~ ~
فــــــــــي بيـــــــت بو حمــــــود وتحديدا في غرفة حمود وفاطمه
حمود جان يالس يبدل ملابسه عسب يروح الدوام واول ما شافته فاطمه راحت صوبه
فاطمه بضيج : حمود اقدر اكلمك شوووي
حمود بابتسامه : قولي فاطمه امري .. رغم كل اللي صار وبيصير انتي بعدج للحين على ذمتي
فاطمه بتوتر : وهذا الموضوع اللي بغيت اكلمك فيه
حمود وهو يصد صوبها :فاطمه سمعيني اذا بتفتحين موضوع الطلاق انا ما مستعد اسمع اي نقاش بخصوص هالسالفه
فاطمه : حمود انا ما قصدت موضوع الطلاق .. يعني بعد ما تتزوج انته ومريم وين بتسكنها
حمود باستغراب : فاطمه بلا ج انا خذيتلها بيت خلااص .. لا تنسين الاسبوع الياي عرسنا ..
فاطمه وهي تتنهد وهي تداري دمعتها : احد ينسى موعد موووووته
حمود بضيج وفخاااطره : سامحيني يا فاطمه انتي خليتيني اتصرف بهالطريقه انتي جرحتيلي كرامتي وطعنتيني فشرفي
فاطمه : المهم حمود بس بغيت اعرف يعني بعد ما تتزوج مريم بتسامحني وبتقدر تعيش معاااي كزوج وزوجته
حمود بتوتر : فاااطمه اشو قصدج .. تتوقعين اني انا اتصرفت جذا وخلقت كل هالمشاكل بس عسب اتزوج مريم
فاطمه : انا ماقلت جذا .. بس انته بروحك قلت واعتررفت الحين ..
حمود بضيج : فااطمه الله يخليج خليني فحالي لين ذاك اليوم يحلها الف حلال ..
فاطمه بضيج : حمود الله يخليك اسمعني انا خايفه ..
حمود باستغراب : اشحقه خااايفه .. انا شفت بعيني كيف غدرتي فيني وطعنتي فشرفي وما سويت فيج شي
فاطمه بضيج : انته شفيك كل ما اناقشك فموضوع قلت خنتيني قتلك انا ما خنتك ومستحيل اسوي هالشي الا على جثتي
حمود وهو يتنهد : الكلام فهالموضوع خلاص نهيناه من زمان .. ولحد ما تثبتين صحة كلامج ساعتها بفكر شو اسوي
فاطمه وهي توقف جدامه : حمود حط عينك فعيني ..وقول الصدق انته ما تحبني صح و مصدق كل اللي شفته فالتلفون
حمود اول ما حط عينه بعينها دمعت عينه بس ادارك الوضع وشل غترته وطلع برع
فاطمه بابتسامه ممزوجه بحزن:الحمدلله سكوتك يثبتلي انك للحين تحبني ومش مصدق اني خنتك وزواجك من مريم
مجرد نزوه واكيد مصيرها فيوم تنتهي ومريم بتنكشف على حقيقتها .. وساعتها يا ترى بقدر انا اسامحك وانسى كل
اللي سويته فيني وانك فلحظة شكيت فيني وطعنتني فشرفي حسبي الله ونعم الوكيل على اللي كان السبب الله لا يوفقه
مها تقطع تفكيرها : هااااي فطاممي صباااح الخير حبوبه
فاطمه وهي تمسح دموعها : هلا مهوووي حدري بلاج واقفه برع
مها وهي تتنهد : فطامي حياتي ما يحتاج تخبين ادموعج اللي بيصير اليوم مزعل الكل ولا حد راضي فيه
فاطمه بابتسامه : صدقيني على كثر ما انا زعلانه بس احمد الله اني للحين على ذمته انا خايفه من الجاي

مها بضيج : والله ما تنلامين مريم قويه .. ويمكن فاي لحظة تخلي حمود يطلقج الله يفكنا من شرها
فاطمه وهي تتنهد : لا حبيبتي ان شاء الله ما يصير اللي فبالها بعدين هي فبيت وانا فبيت فمالها شغل فيني
مها فخاطرها : الله يسمع منج فطووم ولو اني حااسه فيوم انها بتعيش فوسطنا .. وبتشاركنا في كل شي
فاطمه بضيج : مهوووي بلاج ساكته انتي عارفه شي ومخبيتنه علي ..
مها بابتسامه:لا فديتج بس كنت افكر كيف بستحمل مريم تكون حرمة اخوي وفنفس الوقت اخت زوجي الله يصبرنا بس
فاطمه بضحكه ممزوجه بحزن : ههههااي الله يقطع سوالفج خلينا نروح صوب خوله اكيد مضايجه وخاطرها متكدر
مها بابتسامه : هيه والله صادقه .. اكيد الحين مسويه فلم هندي
خوله كانت توها ناشه من رقادها وكانت مضايجه طول الليل دمعتها ما نشفت وقايمه من النوم وعيونها مورمه
مها وفاطمه دشن عليها الغرفه وحصلن عيونها مورمه وتمن يضحكن عليها من خاطر
خوله وهي تتنهد : بسم الله الرحمن الرحيم انتوا من وين طلعتوا
مها بابتسامه : خوالي بلاها عيونج متنفخه جذا لا يكون فيه دبور باسج فيها
خوله بضيج : وليه مهوووي والله اللي فيني مكفيني مب ناقصه حق سوالفج
فاطمه سارت ويلست حذاها : حشا خوالي كل هذا حب .. يا بختك يا خالد عرفت تنقي وتختار
خوله وهي تتنهد :ما ادري كيف بقدر استحمل ما اشوفه اسبوعين .. كل ما اذكر هالموضوع اضايج
مها بابتسامه : لا حبيبتي صدقيني بتقدرين .. بس اشغلي نفسج بتحضيرات عرسج والايام بتعدي بسرعه
خوله بضيج : اه على موضوع العرس .. لازم نسير عند امي وابوي بيت عمي هلال مالي خلق
مها وهي تتنهد : انا بصراحه ما بسير ... ترى بيسيروا امي وابوي شحقه انا وانتي نروح
فاطمه وهي اداري دمعتها : بس هذي فرحة اخوج يا مها ويبا كل اللي يحبهم يشاركوه فرحته
خوله بضيج : فطوووم الله يخليج اي فرحه هذي ؟؟!!!!! ريال مخلي زوجته وعياله وراح يتزوج وحده ثانيه
مها بضيج : اووف اقول خلونا نصكر على هالموضوع .. والله مالي خلق اسمع طاااري مريم
فاطمه وهي تتنهد : خوله مها .... اذا علي انا صدقوني ما بزعل .. فلو اطيعن شوري وتروحن يكون افضل
خوله بحزن : حتى وهو يبا ياخذ عليج وحده تنغس حياتج تفكرين فيه وفي راحته
فاطمه : هذي عشره .. وما ينسى العشره الا ولد الحرااام
مها وهي تبوسها على خدها : اصيله فطاااامي وربي انج اصيله
وعنـــــد حمــود وام حمــود وبو حمـــود
بو حمود : هاه حمود جاهز ؟؟!!!! الليله ان شاء الله بنروح وبنخطبلك مريم.
حمود وهو منزل راسه : هيه ابوي جااهز .. وحدد الوقت اللي يناسبك
ام حمود وهي تتنهد : حمود انته متاكد من قرارك اللي اتخذته ؟؟!!! اخاف تتزوجها وعقب تندم
حمود يقاطعها وبضيج : امايه الله يخليج اللي فيني مكفيني .. حاولي تفهميني قتلج احبها احبها احبهاااااااا
ام حمود بتوتر : حمود ما قصدت شي .. خلاااص اذا مرتاح ومقتنع توكل على الله .. والله يوفقك ويسعدك
حمود وهو يتنهد : سامحيني امايه رفعت صوتي عليج بس اعصابي تعبااانه افهميني من رخصتكم
ام حمود تقاطعه : حمود ايلس كمل ريوقك للحين ما كليت شي
حمود بضيج : خلاااااص امايه والله اني شبعت من رخصتكم الحين
ام حمود وهي تهز راسها : لا حول ولا قوة الا بالله .. اشو صاير على هالريال احواله ما تسر لا عدو ولا صديق
بو حمود : تصدقين ام حمود انا خايف من شغله ..
ام حمود بتوتر : اشو قصدك بو حمود من شو خاااايف !!!!!!!!!!!!
بو حمود : ما عليه كل شي بوقته حلوووو .. خليني اروح الحين صوب شغلي وايد تاخرت
ام حمود وهي تتنهد : الله يسهل عليك الغالي .. والله يجيب العواقب سليمه .. الواحد ما يدري الايام شو مخبيتله
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
فـــــي بيــــــــــت بو هـــــلآل
ساره كانت توها ناشه من الرقاد وسارت صوب الصاله وحصلت هلال يتريق
ساره بابتسامه : صبااااااح الخيررر هلول
هلال بابتسامه : هلا الغاليه بلاج ناشه بدري
ساره وهي تتنهد : والله مالي خلق ارقد ..
هلال : مضااايجه من شي
ساره بضيج : شوف هلال يمكن مريم تتحسب اني ما احبها واني مفضله فاطمه عليها .. بس كل هالكلام ما فيه شي من الصحه .. كل ما في الموضوع فاطمه كاسره خاااطري واللي تسويه مريم حرااام .. وخايفه بعدين تندم
هلال بابتسامه : ساروه حبيبتي كافي من كثر ما تفكرين في غيرج فكري فنفسج شووي ومريم خذت قرارها وهي تتحمل عواقب هالشي انتي لا تشغلين بالج .. الا ما خبرتيني ما فيه اخبار عن سعيد
ساره بابتسامه : والله حسب ما اعرف انه سعيد ربيعك واكيد كل يوم تشووفه .. فليش تسألني انا عنه
هلال يقاطعها : لا والله تصدقين صارلي زمان ما شفته .. نفس ما انتي شايفه المشاكل ما تخلص
ساره بضيج : وانته صادق .. من كثر المشاكل مب قادره احدد موعد حق سعيد واهله عسب يزورونا في البيت
هلال بابتسامه : انزين ساروه شحقه ما تخليهم يزرونا باجر .. لحد متى بتمي تاخرين الموضوع
ساره بتوتر : الله يهداك هلال خل مريم تتزوج بالاول وعقب يصير خير وانا مش مستعجله على شي
هلال : والله عاد بكفيج هذي حياتج وانا مالي كلمه فيها المهم تاخرت وايد على شغلي يالله اشوفج بعدين
ساره بابتسامه : الله يوفقك يالغالي وعسى الله يفتحلك ابواب رزق من حيث لا تحتسب
مريم وهي يالسه تتثاوب : حشا حق منو كل هالدعاوي !!!!!!!!! تصدقي علينا شوي وعطينا نصيب من دعواتج

ساره وهي تهز راسها : الله يهداج مريوم يعني تتحرين انه مالج نصيب من دعواتي
مريم وهي تيلس : عاد والله ما ادري انتي وضميرج ..
ساره : مريم انتي اختي الوحيده وهلال بعد فصدقيني غلاتكم وحده .. ونفس ما ادعيله ادعيلج
مريم بابتسامه : انزين اذا تبيني اصدقج ادعيلي انه الله يوفقني عند حموود ويخلي ايامنا سعااده
ساره بابتسامه : عسى الله يوفقج ويقر عينه فيج .. ويسخره لج ويرزقكم الذريه الصالحه ويغنيكم بحلاله عن حرامه
مريم وهي ترفع ايديها : آآآآآآآآآمين .. الله يسمع منج
ساره بابتسامه : بس عسب تعرفين انج غاليه .. وانه ما فيه فرق بينج وبين هلال
مريم : خلااااص فديتج بعد هالدعوه الطيبه اقتنعت بكل كلمه قلتيها حقي ..
ساره وهي تتنهد : عسى دوووم ان شاء الله اشوفج مرتاحه ومستانسه وما فيه شي تتكدرين عشانه
مريم بابتسامه : آآآآآمييين الله يسمع منج.. انزين ساروه بتسيرين معايه الكوافير ابا اتكشخ
ساره تقاطعها : حشا مريوم البارح كنتي هناااك .. ماله داعي اليوم تروحي
مريم تقاطعها وبكبرياء : لا حبيبتي اليوم بالذات لازم اتم فالصالون طول اليوم .. حبيبتي اللي بيزورنا اليوم حمود مش حي الله احد .. وانتي اكثر وحده تعرفين شكثر انا كنت انتظر هاليوم .. واخيرا اللي حلمت فيه بيصير ..
ساره وهي تتنهد : خلاااص فديتج اللي يريحج .. حددي الساعه والوقت اللي يناسبج وانا بكون جاهزه
مريم تقاطعها وهي طايره من الفرح: يعني بتسيرين معاي
ساره بابتسامه : دام هالشي يرضيج انا جاهزه وتحت امرج .. انتي امري وتدللي
مريم راحت صوب ساره وتمت تباوسها .. ساره وهي تضحك .. مريوم خلااص فديتج عارفه انج تحبيني وميته علي
ام هلال : يا سلام اشو هـ المنظر الحلو .. عسى دوم ان شاء الله اشوفكم مستانسين .. وقلوبكم على بعض
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~~ ~ ~ ~ ~ ~ ~
فــــــي بيــــت بو خـــــآلد
روضه كانت يالسه تتريق واتصلت فيها مها
روضه بابتسامه : صباااح الخير هلا بالغاليه
مها : يا شيخه قصي علي بكم كلمه حلووه شحالج يا عسل
روضه:والله من عقب ما سافر خالد متملله خالوه طول اليوم تيلس في بيت اهلها وتاخذ حمود وحماده واتم بروحي
مها وهي تضحك : بيبني وبينج مش بس انتي المتضررة من سفرية خالد؟؟ فيه ناس دموعهم قامت ما توقف
روضه وهي تضحك : يحليلها خوالي ما تنلام توها عروس ما لحقت تستانس
مها : هيه والله تخيلي من الصبح يالسه تصيح مسويه فيلم هندي .. الله يصبرنا عليها ويرد خالد بالسلامه
روضه : الله يسمع منج .. البيت بلا خالد ما فيه ولا ذرة حياااه ..
مها : الله يرده بالسلامه ان شاء الله .. انزين رواضي اشو رايج تزورينا اليوم بنتسلى مع بعض
روضه بابتسامه : اها ممكن اعرف شو المناسبه من ورى هالعزيمه ..
مها : ما شي مناسبه اميه وابوي بيتعشون مع عمي وبنتم بروحنا في البيت .. ونباج تزوينا عسب ننشغل باي شي
روضه بابتسامه : خلااص فديتج بخبر ابوي عقب صلاة المغرب بجي صوبكم
مها : خلااااص الغاليه نترياج ولا تتاخرين
روضه: خلااص فديتج صارر ما بتأخر
مها : على خير ان شاء الله يالله اشوفج على خير
روضه بابتسامه : اوكي حبيبتي باااي وصكرت وحصلت ميثا تتصل فيها ... اووه هذي ميثا .. هلا ميثوه
ميثا : هلا رواضي شحالج عاش من سمع هالصوت
روضه : حرام عليج اخر مره مكلمتنج جان قبل يومين
ميثا وهي تضحك: ما عليه ..بس كنت اسوي سوالف المهم منو كنتي ترمسين صارلي مده ادقلج واحصله انتظار
روضه بابتسامه : هذي مهوووي اخت خوالي حرمة اخويه خالد
ميثا فخاطرها : ما شاءالله صارله بس كم يوم من امتلك عليها لحقتي ادلعيها..الله يسامحك يا خالد فظلت الغريبه علي
روضه وهي مستغربه : ميثوووه بلاج ساكته ..
ميثا بتوتر : ها هلا فديتج اسمعج .. المهم انا عازمتج اليوم عندي على عشاء اشو رايج ..
روضه بضيج : سمحيلي الغاليه توها مهوي داقه علي وعزمتني وانا وافقت وبسير معها عقب المغرب
ميثا بقهر:انزين اتصلي فيها وخبريها انه صار معاج ظرف وما بتقدرين تروحي صوبهم عشان خاطري مشتاقتلج
روضه بتوتر : اسفه ميثاني ما تعودت اعطي احد كلمه وارد فيها نخلي عزيمتج فوقت ثاني
ميثا بقهر : اها يعني انتي دايم تعطيني كلمه وتخلفينها اشحقه هذي لازم تكوني قد كلمتج معاها يعني ناس وناس
روضه وهي تتنهد : ميثاني هذي تصير حرمة اخوي وخالد قالي احط بالي عليها وبين فتره وفتره اروح صوبها عسب اطمنه عليها .. يعني انا مجرد عبدا مأمور .. بس صدقيني فوقت ثاني بي وبتعشى معااج واعتبريه وعد مني
ميثا وهي تتنهد : خلااص حبيبتي قالوها قبل من لقى احبابه نسى اصحابه
روضه بضيج : ميثووه لا تزعلين غناتي صدقيني فاقرب فرصه بيي صوبج
ميثا : تمام اللي يريحج هذي حرمة اخوج وما فيه شي يزعل لازم تتقربين منها عسب تتعرفين عليها اكثر بخليج الحين
روضه بتوتر : ميثوه قبل لا اتصكين احلفي انج مب زعلانه علي ولا ماخذه فخاطرج
ميثا وهي تتنهد : لا حبيبتي من هالناحيه تطمني يالله باااااي
روضه بتوتر: بااي ... حشاا بلاها عصبت وصكرت في ويهي انا قلت شي يزعل الله يهديج ميثاني..
ميثا بعصبيه : اراويج لانها بتستوى حرمة اخوج صارر كلامها لازم يتنفذ ووممنوع الواحد يخلف !!! صبرج علي بس
مشعل بابتسامه : ميثوه بلاج معصبه جذا .. روضه ما طاعت تتعشى معانا
ميثا بعصبيه : وانته شو دراك لا يكون يالس تتنصت علي

الفصـــــــل آلــــثــــآآآآنـــــيـ


::

::

مشعل وهو سرحان : هيه والله كيف راحت علي هالشغله ويقولون الميل يبداء بخطوه
هنادي بتوتر : هاه مشعل اشو قلت
مشعل بمصخره : سمعي انسه هنادي فكرتج حلوه بس ممكن اعرف ليش هامج اني ادير هالشركه
هنادي وهي تتنهد :والله مالي مصلحه بس كلمة الحق تنقال انا اشوفك انك اكفاء لادارتها من ابوك خصوصا انك متعلم
مشعل بخبث : بس عشان جذا ولا فيه شي ثاني يدور فبالج
هنادي بقهر وفخاطرها : الله يصبرني بس !!!!!!!! صدق انك واحد واطئ ودنيئ وبلا شرف
مشعل وهو يقرب منها : بلاه الحلو سرحاااااااااااااااان
هنادي وهي تتنهد : مشعل انا قلت كل اللي عندي وعاد انته بكيفك سوى اللي يناسبك
مشعل:تمام هنادي تصدقين اول مره اعرف انه امري يهمج .. المهم عشان خاطر بس هالعيون انا موافق من رخصتج
هنادي وهي تتنهد: الحمدلله اخيرا كل اللي اباه بيصير .. بس ان شاء الله يستوي نفس ما انا مخططه وانتقم من مشعل
الخسيس .. وعقبها ضحكت بسخرية وتمتمت بهالكلمات يقول انه امره يهمني .. صدق انه واحد فاشل وينقص عليه ..
مــــر آلوقت بســــرعه وياا وقت المغرب في بيت بوحمود ..بوحمود وزوجته وحمود ساروا يخطبون مريم حق حمود وتمت خوله ومها وفاطمه في البيت وفهد جان رامس برع يالس عند سعيد وهلال ..
مها وهي تتنهد : اوف واخيرآ خلصنا .. بسير اجهز نفسي روضه شوي وبتوصل
خوله بابتسامه : بصراحه ما قصرتي اول مره اعرف انج راعية بيت وطباخه ما هرة
مها وهي تضحك : حبيبتي هذا كله عشان هلال .. لما ياخذني اباه يقول والنعم فيها !! ويتم طول الوقت ياكل من ايدي .. مب شرات حريم هاليومين يخلون الخدم يطبخون حق ازواجهم .. صدق انهم ما يستحون
خوله بضيج : عسى الله يوفقكم ونياله اللي بياكل من ايدج .. بس احيآنآ ظروفنا تكون اكبر منا وتجبرنا نعتمد ع الخدم
مها بتوتر : خوله انا اسفه والله ما جان قصدي اقلل من قيمتج وبعدين انتي نفس ما قلتي من شوي معذوره
خوله وعينها تدمع : مهوي انتي ما غلطي للاسف هذي هي الحقيقه المره بتم طول عمري وانا معتمده على غيري
مها وهي تبوسها على راسها : يالله انا ليش قلت جذا الله يسامحني صدق اني غبيه
خوله ودموعها اربع اربع : تصدقين مهوي اوقات احس خالد انه ما يحبني يمكن شفقان علي .. يعني واحد كامل ومكمل اشو يبا فوحده عاجزه .مثلي . مب قادره تعتمد حتى على نفسها .. كيف بعدين بيقدر يعتمد علي
مها وهي تحضنها وبالم : سامحيني الغاليه .. بس ما اباج تقولين جذا خالد يحبج وانا شفت الحب مشعشع فعيونه ..
خوله بضيج : خبريني اشو اسوي ؟؟!! واحد فمستواه ومكانته كيف بيقدر يواجه الناس لما يعرفون اني وحده عمياء
مها تقاطعها : لا خوالي الله يخليج .. بعدين لا تنسي انتي بتتعالجين واكيد بتشوفين مره ثانيه
خوله بضيج : للاسف الكل يواسيني بهالكلمتين بس اللي ما تعرفيه انه الدكتور قال حق ابوي نسبة اني اشوف 1%
مها بتوتر : هالكلام صار من زمان .. واحينه الطب تطور .. اهم شي تتفائلي
خوله بضيج : انا من لما جان عمري 12 سنه وانا متلعوزه مع الاطباء الكل يقول ما فيه امل .. واخاف الحين بعد
مها تقاطعها : خوالي الله يخليج لا تكملي .. اللي يباه الله اكيد بيصير لا تتضايجي حبيبتي خليج متفائله
خوله وهي تنتهد : صدقيني لو ما الامل اللي بداخلي كبير كنت الحين ورده ذابله وميته من زمان
مها بضيج : فال الله ولا فالج .. بلاج متشائمه جذا .. قفلي على هالموضوع وياليت ما تفتحيه مره ثانيه
خوله بابتسامه ممزوجه بحزن : لا تشغلين بالج انا راضيه بحكمة الله .. والحمدلله على كل حال
مها بابتسامه : اها جذا صرنا حلوين .. اهم شي ايمانج بالله كبير .. يالله خلينا نروح نبدل ملابسنا وبعدين فاطمه من الصبح يالسه تصيح خلينا نبدل وعقب نروح صوبها ونطلعها من الحاله اللي اهي فيها ..
خوله بضيج : هيه والله صدقج نحن التهينا بالمطبخ ونسينا هالمسكينه يالله عيل خلينا نبدل بسرعه ونروح صوبها
فاطمه كانت يالسه عند عيالها وتخبرهم بالموضوع ..
ميره وهي اتصيح : ماما يعني بتصير معنا ماما ثانيه
اميره بعصبيه : لا ما فيه ماما ثانيه .. انا عندي بس ماما وحده
فاطمه وهي تحضنهن : فديت روحكن والله .. كل اللي اباه منكن الحين انكن تحترمنها وتعاملنها زين ولا تزعلن عليها
ميره وهي تبوس امها : ماما انزين انتي مضاايجه صح
فاطمه وهي اداري دمعتها : لا حبيبتي وليش اضايج بالعكس دام ابوج فرحان ومستانس انا بعد بفرحله
اميره بعصبيه : ماما انا ما احب بابا .. لانه تزوج وخذ وحده غيرج هو بعد ما يحبج
فاطمه بالم : اميره كثر ما سمعت هالرمسه مابا اسمعها مره ثانيه .. بعدين ابوج بيزعل عليج
اميره وهي تصارخ : خليه يزعل انا صرت ما احبه خلاث .. وبعدين قوليله ما يكلمني
فاطمه بتوتر : اميرتي حبيبي خليج شاطره وسمعي كلامي
اميره وهي تركض صوب برع وتصارخ : مابا اسمع شي .. بابا ما يحبنا ما يحبنا مابا اكلمه خلاث
مها : خوالي تصدقين طالعه كشخه ..يالله خلينا نروح صوب غرفة فطوووم وما كملت كلامها الا وتسمع اميره تصارخ
خوله بتوتر : ياربي هذي اميره بلاها تصارخ جذا
مها بتوتر : والله ما ادري علمي علمج .. خلينا نروح نفهم السالفه
فاطمه وهي تركض وراء اميره : اميره حبيبتي وقفي الله يخليج خليني افهمج تعالي
مها بتوتر : فطوم اشو مستوي ليش اميره تصارخ بهالشكل