بوهلال : امج ما خبرتج شي .. او ما عطتج فكره عن الموضوع اللي ناوي افاتحج فيه
مريم بنظرات استنكار: لا ابويه بس قالت انك تباني فشغله بتغير كل حياتي ويمكن تفرحني واطيرني للسماء
بوهلال وهو يهز راسه : لا حول ولاقوة الا بالله امج هذي دايم تعطي الامور اكبر من حجمها
مريم : انزين ابوي اقدر افهم الحين انته اشو بغيت من بالضبط .. وانا بحكم اذا امي تبالغ ولا لا
بوهلال : سمعي يابنيتي عمج دقلي اليوم وقال يباج حق ولده حمود ويبون يعرفون رايج
مريم بخجل : ابوي الراي رايك واللي تامربه انت اكيد بيصير
بوهلال بابتسامه : بس هذي حياتج وانتي اللي بتتواجدي فيها مش انا ..
مريم وويها صار احمر :..............................
بوهلال وهو يهز راسه ويضحك : صدقوا يوم قالوا السكوت علامة الرضى .. المهم في شرط
مريم بتوتر وبعصبيه : اشو شرطه
بوهلال باستغراب : مريم بلاج عصبتي جذا .. اول مره اشوفج تتصرفين بهالشكل
مريم وهي تحاول تدارك الموقف:اسفه ابوي ما قصدت شي بس تفاجئت يخطبون ويتشرطون هالشي يضايج الصراحه
بوهلال : انتي سمعيني وعقب افهمي اشو شرطهم .. وبعدين هالشرط بيسرج ما بيضايقج
مريم تقاطعه : انزين ابوي ممكن اعرف شو شرطهم
بوهلال بابتسامه : انتي طبعا عارفه انه حمود متزوج ومعاه عيال .. وعمج ما يبا زواجج من حمود يأثر على فاطمه او حتى على عياله عسب جذا بوحمود قال لو تسكنين انتي وحمود في بيت بروحكم يكون احس للكل
مريم فخاطرها : يا سلام واحينه عمي هذا ليش راز بوجهه احد اشتكاله اني بضايج من سكنتي معاهم .. انا اموت واعرف اشو مسويه هالفاطمه عسب تسيطر على عقولهم وكل اللي شاغل همهم رضاها وانا ولا على بالهم
بوهلال يقطعلها حبل افكارها : هاه مريم بلاج سكتي لا يكون الشرط ما عيبج
مريم بضيج : ابوي وليش ما يبوني اسكن معاهم .. انا ودي اعيش مبينهم .. ودي اشاركهم كل شي
بو هلال : يا مريم فكري بعقلج ولا تفكري بعواطفج .. انتي المستفيده في النهايه وبين فتره وفتره زوريهم واكسبيهم
مريم بتوتر : ابوي خلاااااص على امرك خبرهم اني وافقت على كل شروطهم
بوهلال بابتسامه : هذا العشم فيج يا بنيتي .. خلاص عيل خليني اردلهم خبر
مريم بخجل : تامرني بشي ثاني
بوهلال بابتسامه : لا فديتج سلامة راسج لا بغيتج زقرتج
مريم : عيل انا استأذن ..
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
نرجع لبيت بوحمــــــود
بو حمود وهو يبلغ عياله الخبر: مبروك يا حمود مريم وافقت على كل شروطنا ويوم السبت نسير ونخطبها
حمود وهو طاير من الفرح : الله يبارك فيك ابوي ... عقبال ما تفرح بفهد
فهد وهو يتنهد : لا الله يخليكم فكرة الزواج انا شايلها من راسي ..
مها بضيج : تصدق عاد احسن لك .. اخاف تتزوج وتظلم زوجتك
فهد باستغراب : اظلمها كيف يعني ما فهمت عليج
مها وهي تتنهد : انا افهمك يعني تتزوج وعقب ..............
حمود يقاطعها : مها بلاش هالحركات واذا بتوجهين اي كلام وجهيه حقي ما يحتاج تتكلمين بالالغاز
مها بتوتر : انا ما قصدتك .. واللي على راسه بطحها يتحسس عليها عن اذنك يا عريس
فهد بضيج : لا تلومها يا حمود زواجك من مريم صعق الكل ويبالهم وقت لحد ما يفهمون ويستوعبون
حمود بعصبيه : وانا شو يخصني هذي حياتي وانا حر فيها اتزوج حتى اربع كيفي يا اخي
خوله بضيج : ليش بتتزوج يا حمود انا عمري ما شفت فاطمه مقصره وكانت تبديك على نفسها في كل شي
حمود بعصبيه : اوهو بلاكم انتوا كل واحد يالس يحن على راسي من صوب .. ادري فاطمه ما قصرت معاي بس شو اسوي انا احب مريم وحاولت احب فاطمه بس ما قدرت ليش ما قادرين تفهموني
خوله بتوتر : دام السالفه جذا الله يوفقك يا اخوووي
فاطمه كانت واقفه وسمعت كل شي وراحت صوب حمود حاولت اداري دمعتها بس ما قدرت ونزلن بدون ما تحس وقربت من اذنه وكلمته بصوت واطئ : الف الف مبروك يابو مااايد منك المال ومنها للعيال .. بس لو خبرتني من البدايه انك ما تحبني .. كنت جنبتك كل هالشوشره هذا وانا شاكره لك هالتضحيه اللي قدمتها عشاني واللي هي انك
خليتني على ذمتك بس على شان عيالك .ولو اشكرك لين باجر ما بوفيك حقك والله يوفقك مع مريم
حمود في خاطره : اه يا فاطمه انتي شفتيني اخونج مع مريم وانتي سرتي وسويتي نفس الشي مع سالم .. ودي اصدقج بس صورتج اكبر دليل المشكله اني سمعت باذني وشفت بعيني .. حاولت اسامحج بس ما قدرت
~ ~ ~ ~ ~ ~ ~ ~ ~ ~ ~ ~~ ~ ~ ~ ~ ~~ ~ ~
مـــــرت آلآيآآآم بسرعه ويوم الخميس وتحديدا الساعه 6 المغرب .. الكل جان متجمع في بيت بو حمود خالد واهله وبوهلال والعايله الكريمه ....
مها بابتسامه : خوالي حياااتي يالله ابويه يترياج تحت عسب المطوع يبا يسمع موافقتج
خوله بتوتر : يعني حانت اللحظة اللي بستوي فيها حرمة خالد
مها وهي تمسكها من ايدها : هيه يالله لا تاخرينا لا تنسي ورانا حفله الساعه 8
خوله وهي تضحك : انزين شوي شوي علينا يالله خلينا ننزل
فاطمه اول ما شافت خوله راحت صوبها : هاه خوله ازغرد ولا ننتظر شوي
مها بابتسامه : لاحقين خليها توافق بالاول وتوقع على وثيقة الزواج وساعتها لكل حادث حديث
خوله بخجل : انزين يالله اخاف نتأخر على الجماعه
مها راحت صوب الميلس ودقت الباب وفهد بطل الباب وهو يبتسم : هاه خوله جاهزه

مها اول ما دشت البيت يلست تزغرد : الف الف الف الف مبروووك خوله استوت حرمة خالد خلااص
روضه على طول راحت وحضنتها : الف مبروك خوالي .. الله يسعدكم ويجمع بينكم على خير
خوله : مشكووره حبيبتي ما تقصرين عقبال ما نفرح فيج
ساره بابتسامه : خوالي الف مبروك حبيبتي وربي تستاهلين كل خير
خوله وهي تبوس ساره على خدها : مشكوووره ساروه يالله عاد شدي حيلج وفرحينا
ساره وهي تضحك : ان شاء الله انتي عرسي بالاول وعلى طول انا وراج
خوله : ان شاء الله يارب من بؤك لباب السماء ههههههههه
فاطمه وهي تحضنها : اه خوالي واخيرا شفتج عروسه الله يسعدج حبيبتي
خوله : مشكووره فطاااامي .. عقبال ما تفرحين بعيالج
فاطمه وهي تضحك : لاحقين .. المهم تعالي سلمي على امج ترى يالسه من الصبح تصيح
خوله بخوف : تصيح ليش عسى ما فيها شي
فاطمه تقاطعها : لا حبيبتي ما فيها الا كل خير بس من كثر فرحتها فيج يلست تصيح يعني تقدري تقولي دموع فرح
خوله وهي تتنهد : يحليلج امايه انا حاسه فيها .. هي عمرها ما تصورت انه في يوم يمكن اتزوج واكونا سره .. وتبين الصدق انا بعد ما توقعت هالشي يصير .. الحين الوحده لو فيها مرض بسيط مثل السكر محد يباها ولا يقرب صوبها .. فما بالج بوحده عاشت طول طفولتها وهي عمياء لا والقهر انه في واحد اغتصبها
فاطمه تقاطعها : خوالي كافي حبيبتي هذي انتي ظليتي متفائله ولا يأستي من رحمة الله .. يمكن تعبتي في البدايه بس في النهايه نلتي .. والله مع الصابرين
خوله وهي تتنهد : الحمدلله على كل حال وديني صوب امي ..
ام حمود اول ما لمحت خوله يايه صوبها قامت وحضنتها وتمت تصيح
مها : امايه لا تصيحين طالعي خوله الحين بتصيح وبيخترب ميكبها هدي شوي
ام حمود : الف مبروك خوالي ما تتصورين شكثر دعيت لج في كل صلاه والحمدلله الله استجاب وشفتج عروسه
خوله وهي تبوسها على راسها : عارفه امايه ومتأكده انه كل الخير اللي انا فيه سببه انتي ودعواتج الطيبه .. عسى الله يديمج فوق راسي ولا يحرمني منج ابد وياعسى يومي يكون قبل يومج
ام حمود تقاطعها : فال الله ولا فالج .. اليوم حفلتج ولازم تتسانسين
مها بابتسامه : هيه والله صادقه امايه والكوافيره فوق تتريا تبا تضبطلها شوية امور .. وانتي امايه سمعيني اخذي ميره واميره وميود وخلي ابويه يوديكم صوب الصاله ونحن كلها ساعتين بالكثير وبنكون هناك
ام حمود : خلاااص فديتج بس لا تتأخرون ..
فاطمه وهي تبوسها على راسها : ان شاء الله عموه كلها ساعتين بالكثير وبنكون هناك انتي لا تشغلين بالج
مريم كانت تراقب فاطمه من بعيد : طالع هذي تحريتها محتره لانه حمود بيتزوج عليها وهي ولا على بالها مستانسه
لا ومتكشخه بعد .. بس مب مشكله خلها تعيش هالكم يوم مرتاحه .. وعقب يصير خير
ساره وهي تتنهد : حوه انتي بلاج اطالعين فاطمه بهالشكل شوي وبتاكلينها
مريم وبغرور : وعععععع انا اكلها هاي شكلها يلوع ..
ساره : انزين خوله اليوم فرحانه ولازم تشاركيها فرحتها وانتي حظرتج ما تنزلتي تقوليلها كلمة الف مبروك
مريم وهي تطنز : تصدقين عاد انا للحين مستغربه شاب مثل خالد وبالمركز هذا يطالع خوله .. صدق شي يغث ويقهر
ساره بضيج : لا حول ولا قوة الا بالله بدينا بالحسد
ام هلال تقاطعهم وبنفس خايسه : صادقه بنيتي يعني هو بمركزه هذا الف بنت تتمناه ما حصل غير هالدعله خوله
ساره بضيج : الظاهر ما شي فايده منكن وع فكره هلال ينتظر برع صارله ساعه فلو تروحون يكون وايد احسن
ام هلال : حشا بلاها هذي عصبت .. بالله عليج انا قلت شي يزعل
مريم : خليها امايه .. ساره طول عمرها رقيقه وتفكر بغيرها .. مب عارفه انه فهالزمن اذا ما كنتي خبيثه ما بتوصلين لاي مكان .. بس مب مشكله باجر تعرف واكيد بتتعلم والحياه تجارب
ام هلال بتوتر : لا عاد ما توصل لمرحلة الخبث الله يكافينا شره .. انا ما ربيتكم على جذا
مريم وهي تتنهد : اقووول خلينا نروووح هلال صارله ساعه يتريانا برع .. وانا ابا ابدل ملابسي ما عندي وقت ..
فـــــــي آلصـــآله الكل رقص وستانس وحانت اللحظة اللي يجتمع خالد بخوله وخذاها لافخم مطعم بالمنطقه ..
خالد وهو يشبك ايده في ايدينها : الف مبروك يا اغلى حب وارق قلب واحلى بنت في هالكون كله ..
خوله بخجل : خالد لا تبالغ مب لهالدرجه عاد
خالد : تصدقين خوالي اول ما شفتج حسيت ا ني مب قادر اوقف على ريولي دوختيني الله يسامحج
خوله وخدودها صارت حمراء علقت على كلامة بابتسامه خفيفه ..
خالد : تصدقين عاد احلى شي فيج لي صاروا خدودج حمراء
خوله تقاطعه : خالد خلاص اسكت والله استحي
خالد بضيج : ياربي احينه انا ريلج صح ولا لا
خوله باستغراب : هيه صرت ريلي وكلها كم شهر وبتصير ابوا عيالي بس ليش ما فهمت عليك .
خالد يقاطعها : اها توج تقولين بصير ابو عيالج يعني بلاش هالرسميات
خوله وهي تضحك من خاطر : خالد صدق انه ما عندك سالفه تحريت فيه شي مهم
خالد : فديت هالضحكه والله .. الله يديمج فوق راسي يالغاليه .. يا ام نووور
خوله باستغراب : امممم وليش بذات ام نوووور
خالد : لانج اول ما دشيتي حياتي حولتيها من ظلمة للنور فاتمنى اسم بنتي يكون نور
خوله بابتسامه : فديت روحك حبيبي بس تصدق الاسم وايد حلوو واحسه مترابط بينا .. انا قبل لا اشوفك او اعرفك كنت اعيش فظلمه كنت عايشه فهالدينا بس ما كان لها طعم واول ما عرفتك على طول قلبي نبض باسمك وقدرت فلحظات بسيطه تحول حياتي من ظلمة للنوووور ما ينطفي
خالد وهو يبوس ايدها: فديتج حبيبتي يعني خلاااص من هاليوم بسميج ام نور موافقه