مــــن آحـــــدآثـ آللحــــظة آلســـــآبعــــــة عشــــــرة ..


::::


::::


حمود بضيج \: عمي وايد يعزك وعرف انه حرمته وايد ظلمتكم وأهانتكم وحب يصلح هالموضوع انه ينسى بنته في المستشفى وشاركنا فرحتنا وحضر عرسي بس قلبه كان يعوره على بنته و كتم حزنه ودموعه عشاانك
بوحمود بضيج : اصيل يا بوهلال والله انك اصيل وانته من خبرك بكل هذا
حمود : ابوي مريم خبرتني وقالت اذا فرط فيها هـ المره بتروح من هالدنيا من غير رجعه .. وانته ما يرضيك انه اخوك يتعذب والسبب انته هو غلط وصلح غلطته وحظر زواجي وهو مكسور ولا بين لك اي شي

::::


هلال بضيج : فهد الله يخليك ممكن تبلغ اهلي يطلعون انا انتظرهم برع
فهد باستغراب : هلال اشو فيك وليش معصب
هلال وهو يدزه : قتلك خوز مالي خلقك
فهد بضيج : يا ربي اشو صاير فيه ..معقوله هلال جان يبا ياخذ خوله لا لا مستحيل اشو هالتخريف وراح صوب داخل



::::


مشعل وهو يقرب شفايفه على اذونها وبصوت واطئ: زين عرفتي هالشي .. المره الثانيه ثمني كلامج .. ولا تقولين كلام انتي مش قده اوكي يا حلوه .. بعدج ما عرفتيني عدل .........................................؟؟؟؟؟!!!! !


::::

مريم بعصبيه : الحقيره صكرت في ويهي .. اراويج اليوم اتزوج حمود وباجر اطردج من البيت انتي وعيالج
فاطمه وهي تتنهد : اه يا حمود سويت اللي براسك بس مب مشكله تبون تلعبون معاي انا جاهزه بتم يالسه على قلبها ونفس ما تقهرني بقهرها وبنشوف انا والا هي اراويج
مريم : ما عليه يا فطووم وربي لا اخلي حياتج عذاب وبتتمنين الموت الف مره بعدج ما تعرفين مريم منو
فاطمه بضيج : وانته يا حمود تكذب الكذبه وتصدقها انا بثبتلك انه مالي يد بكل اللي صار وساعتها كل شي بيننا راح ينتهي .. يكفي انه للحين صابره عليك لكن ما عليه ملزومه اتحمل عسب اعرف منو وراء كل اللي يالس يصير
حمود بدون نفس : بلاها الحلوه يالس تتكلم بروحها .. الظاهر انه خبالج فمرحله متطور ه
فاطمه : شوف والله اذا انا خبله خبرني انته شووو .. اذا حرمه يالسه تمشيك ومخليتك شرات البقره
حمود وهو يصكها كف : لا عاد تراج وايد مصختيها .. الحين راح اعرفج منوا لبقره يالواطيه يالخاينه
ميره واميره يصارخن : بابا لا بابا حرااام خلي ماما في حالها بابا الله يخليك
حمود وهو يطالعهن ويطالع فاطمه بنص عين : الايام بينا وبسبة هـ الكلمه ما بخليج تشوفين يوم حلو فحياتج
فاطمه وهي تحضن ميره واميره : خلااص حبايبي لا تخافن بابا بس معصب علي شوي ولا ترى هو وايد طيب
اميره : ماما بابا صاير شرير ليش يكفخج
فاطمه وهي تبوس راسها : لا حبيبتي هو تعبان شوي وبعدين بيرجع يتأسف انتي لا تشغلي بالج
ميره بخوف : ماما بس بابا شكله صار يخوف
فاطمه بضيج : خبرتكم انه تعبان يالله احينه سيرن اتغدن يالله حبايبي ولا تخبرون احد باللي صار
ميره واميره : ان شاء الله ماما
فاطمه وهي تمسح على خدها : الظاهر انه ايدك طايله هالكم يوم الظاهر انه مريم يالسه تلعبها صح
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
فـــــــــــي بيـــــــــــــت بو خـــــــــــآلد
خالد كان توه راد من الدوام : مساكم الله بالخير
روضه كانت يالسه تتغداء : مسااك الله بالنور تعال اتغداء
خالد : ايه والله حدي يوعان الا وين ابوي بعده في الشركه
روضه : توني متصله فيه وقال عنده شغل وبيتاخر ويمكن يرجع ع الساعه 10 بالليل
خالد : اووووه شكله بيطول وايد عيل خلينا نتغداء ويلس يدور على ام محمد وينها خالتي
روضه وهي تضحك : هههه يحليلها اول ما عرفت انه ابويه بيتأخر خذت محمد واحمد وسارت صوب اهلها
خالد : غريبه متعوده ما تسيرهناك الا اذا ابويه معاها تعرفي لزوم الضيافه
روضه : ضنتي اليوم ما بتاخذلهم ضيافه وكل هذا بس عسب تمشي كلامها علي
خالد : ليش اشو صاير بعد
روضه بابتسامه:تعرف اليوم خلصت اختبارات وقلت باخذهم السوق يشترون بدل وعقب نروح الملاهي وهي عصبت وقالت مالج شغل في عيالي عاد انا خبرتها انه رايها ما يهمني كل اللي يهمني راي ابوي وبس واذا وافق مايهمني شي
خالد وهو ميت ضحك : ههههه وسوت كل هذا بس عسب هالموضوع ما ادري اوقات احس عقلها صغير
روضه : يالله شو نسوي عاد هذي حرمة ابوي وملزومين نحترمها
خالد : انزين يعني اليوم ما بتروحين السوق . ما باقي شي الا يومين ما بتلحقين
روضه وهي تتنهد : والله ما اعرف اروح السوق بروحي اتملل بسرعه فملزومه ااجل الموضع لحد باجر
خالد بابتسامه : افا روضه وانا وين سرت خلاص ولا يهمج انتي تغدي وريحي جم ساعه وعقب بنروح انا وانتي وما بنرجع البيت الا واغراضج كلها مخلصه
روضه وهي طايره من الفرح : والله من صدقك خلود
خالد : هيه من صدقي تتحريني يالس اقص عليج ولا شو بالضبط
روضه وهي تبوسه على راسه : فديتك والله جان زين اخلص شغلي اليوم تعرف الصالون بروحه لعوزه وما يمديني اسوي شي ؟.. انزين وبدلات محمد واحمد منو بياخذلهم
خالد ": تاخذلهم خالوه هي اللي راكبه راسها ورافضه انهم يروحون معاج خلاص تصطفل
روضه وهي تتنهد : بس محمد واحمد مالهم ذنب
خالد : انتي لا تشغلين بالج اصلا هي بتاخذلهم بدل بس عسب ما يروحون معاج وبذكرج
روضه : معقوله ؟؟؟ حشا ما توقعت انها تحبني لهالدرجه
خالد : هيه من جهة الحب ما شاء الله خالوه كلها حنيه وطيبه
روضه وهي ميته ضحك : ههههه خلود الله يخليك اسكت اخاف اغص وعقب اموت وتسوي حفله
خالد : اسم الله عليج ان شاء الله يومها قبل يومج .. المهم خبريني ما دقيتي لخوله
روضه بابتسامه : لا دقيتلها البارحه والحمدلله هي بخير وتقول هي بعد للحين ما جهزت شي
خالد : حشا اسبوعين وما مداها تجهز شي
روضه وهي تتنهد : مسكينه خوالي تعرف ما تقدر تخلص امورها بروحها ومها جان عليها اختبارات واليوم خلصت
خالد : ما عليه خلصت ولا لا اهم شي انها بتصير زوجتي بعد يومين
روضه : الله يوفقكم اخويه بصراحه خوالي طيبه وما في منها .. والله يديم المحبه بينكم
خالد : الله يسمع منج روضه .. صح اني فرحان ومستانس بس خايف لما تدخل القاعه والكل يعرف انها عمياء ..
روضه تقاطعها : خالد من هالناحيه لا تشغل بالك صدقني محد بينتبه
خالد : ان شاء الله .. الله يسمع منج .. بس اليوم او باجر مصيرهم يعرفون
روضه وهي تضغط على ايده : خلود كلام الناس ما يخلص وهالامور خلها اخر اهتمامك اوك
خالد بابتسامه : الله لا يحرمني منج ولا من نصايحج اللي تنور درب الواحد
روضه : شسوي واجبنا واذا ما وقفت معاك انت مع منو بوقف يالله خلنا نروح نريح عسب نلحق على السوق
خالد : هيه والله على رايج يالله عيل توكلنا

فـــــــــــي بيـــــت بو حمود
رايه بضيج : بوحمود انته من صدقك وافقت
بوحمود يقاطعها : رايه انا شو يالس اقول من الصبح كل هذا صار غصبآ علي
رايه بضيج : انزين وفاطمه ما فكرتوا فيهااااا
بوحمود : حمود يقول انه كلمها وهي تفهمت ووافقت
رايه بضيج : مستحيل .؟؟!!. هي عمرها ما قصرت معاه ليش يبا يتزوج عليها ويقهرها فاطمه ما تواطن مريم خير شر
بوحمود : والله يقول هو ما قادر يعيش بلا مريم ومدام حمود وفاطمه متفاهمين نحن مالنا شغل
ام حمود : اكيد ورااء هالسالفه شي فاطمه في الفتره الاخيره كله مضايجه ومتوتره يا ترى شو هالسر
بو حمود بضيج : انتي سيري زقريلي فاطمه وانا بفهم منها كل السالفه
ام حمود وهي تتنهد : الله يسامحك يا حمود بتظلم بنت الناس معاك عسب وحده باعتك برخص
بو حمود بتوتر : يا رايه لا تقلبين المواجع اللي فات مات سيري زقريلي فاطمه
ام حمود بضيج : على امرك كلها خمس دقاايق وبتكون معااك
فاطمه كانت يالسه تنيم مايد في الصاله
ام حمود : فاطمه من صدقج موافقه انه حمود يتزوج مريم
فاطمه وهي تتنهد : عموه اذا هالشي يريحه ليش اعارض
ام حمود بتوتر : بس هذا ريلج مب زين تفرطين فيه لا تفكري فالحين فكري في بعدين
فاطمه بضيج : عموه انا ما اقدر امنعه لانه هو خلاص مقرر وانا مابا اسوي شوشره من يوم شاف مريم وعلاقتي معاه من سيئ لاسواء فخليني الملم الباقي واحفظ بيتي وزوجي وعيالي
ام حمود وهي تمسح على راسها : دومج عاقله فطوووم وعسى الله يكملج بعقلج هاتي مايد وسيري صوب عمج يباج
فاطمه بتوتر : اشو ؟؟؟!!! عمي يباني انزين ما خبرج ليش
ام حمود \: لا تحاتين يبا يكلمج فموضوع حمود وزواجه من مريم
فاطمه وهي تتنهد وبصوت واطئ : الحمدلله تحريت شي ثاني
ام حمود باستغراب : فاطمه قلتي شي
فاطمه بتوتر : هاه ....!!! لا عموه لا تشغلين بالج الحين بروح
ام حمود وهي تتنهد : انا حاسه انه وراء هالسالفه شي والحين تأكدت بس شو هالشي اللي مخلي فاطمه توافق على زواج حمود وبدون حتى ما تبدي كلمة اعتراض .. يالله اذا ما عرفنا اليوم باجر بنعرف ..
فاطمه وهي ادق الباب : عمي انا فاطمه اقدر ادش
بو حمود بابتسامه : حيالله بشيخة البنات حدري يا بنيتي حياااج
فاطمه : عموه خبرتني من شوي انك تباني ؟؟ امر اشو فخاطرك
بوحمود : تعالي فاطمه وقعدي حذاي ابا اتكلم معاج فموضوع
فاطمه : ان شاء الله عمي على امرك .. وهذا ويلسنا امرني
بوحمود : فاطمه يا بنيتي انتي داريه انه حمود ناوي يكتب كتابه على بنت عمه مريم
فاطمه بضيج : داريه عمي .. وقتله يسوي اللي يمليه عليه ضميره
بوحمود : سمعيني يا بنيتي اذا انتي ما راضيه على هالشي صدقيني انا بتصرف وما بخلي الموضوع يتم
فاطمه وهي تتنهد : عمي صدقني انا مب زعلانه من يوم ما دشت مريم هالبيت حمود حن للماضي وعلاقتي معاه صارت وايد متوتره .. عسب جذا خله يتوكل على الله ويتزوج يمكن حالي معاه ينصلح
بو حمود باستغراب : فاطمه ما تلاحظين انه هذي مجازفه ويمكن بدال ما تكسبينه تخسرينه
فاطمه فخاطره : انا خسرته خلاص ومحد مصبرني غير عيالي وبعدين لو طلقني وين اروح
بو حمود : فاطمه بلاج سكتي يا بنيتي
فاطمه بضيج : ادري انها مجازفه يا عمي بس شو تباني اسوي هو كل حياته صارت مريم فخلوه على راحته
بوحمود : انزين بعد في موضوع ثاني اشو رايج انه مريم تسكن معاج فنفس البيت
فاطمه بضيج : ليش مريم تبا تسكن معاي فنفس البيت
بوحمود : تقول تبا تصير شرات اختج وما تبى تحس انها غريبه ..
فاطمه بضحكة سخريه وفخاطرها :قال اختي!والله يا عمي ما داري انه بنت اخوك هذي داهيه والله يصبرني على هبالها
بو حمود : فاطمه بلاج يا بنيتي كل ما سألتج سؤال سرحتي فيه شي مكدر خااطرج
فاطمه وهي تتنهد : عمي انته تعرف انه مريم ما تحبني ولا تواطني بعيشة الله فليش الحين تبا تستوي شرات اختي ما تلاحظ انه هالتصرف غريب .. انا اقول لو ياخذلها بيت احسن وبهالطريقه نبعد عن المشاكل
بوحمود بابتسامه : تاكدي يافاطمه انه قدرج معاي كبير واي شي تامرين به على طووول يمشي
فاطمه بابتسامه : مشكوووور عمي ما تقصررر فيك الخير .. تامرني بشي ثاني
بوحمود : لا يا بنيتي توكلي على الله .. وعسى مريم تكون عاقله شراتج
فاطمه : مشكوور عمي كلامك على راسي من فوق استأذن الحين
فاطمه ما قدرت اداري دموعها وراحت تركض صوب غرفتها
ام حمود بضيج : فاطمه بلاج يا بنيتي .. الله يعين هالبنت اول شي خسرت اهلها واحين زوجها الله يسامحك حمود
مها كانت سايره صوب غرفة خوله ولمحت فاطمه فوييها : فطووووم بلاج حبيبتي
فاطمه وهي تحضن مها : حموووود يا مها حموووود بيتزوج
مها كانت شاله قلاص ماي وطاح من ايدها : اشووووو اخوي حمود بيتزوج متى وليش ومنو بياخذ

فاطمه ودموعها اربع اربع : بياخذ بنت عمج مريم .. سوت اللي فراسها وانا ما قدرت اوقف فوجها
مها : انا الحين اسير اكلم حمود واوقفه عند حده كلها كم سنه ويصك الثلاثين وصاير يتصرف شرات المراهقين
فاطمه وهي تمسكها من ايدها : خلااص يا مها الكلام الحين ما ينفع عمي كلم ابوها والعرس الاسبوع الياي
مها بضيج : ياربي ونحن مالنا رااي ليش يتصرفون من هواهم
فاطمه وهي تتنهد : مها انتي لا تدخلين فهالموضوع تذكري انها بتصير اخت ريلج فحاولي تكسبيها
مها بعصبيه : انا مريم ما تهمني اللي يهمني هلال وبس
فاطمه تقاطعها : مها انتي ليش تحرين نفسج اذا اخوج راضي انتي مالج كلمه هذي حياته وهو حر فيها
مها وهي تتنهد : يالله احس هالبيت بادي ينهار شوي شوي اذا بدايتها جذا الله يستر من الجااااي
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~~~~~~~~~~~~~~~~~~~~~~
فــــــي بيـــــت بـــوهلآل
بوهلال جان يرمس مع اخوه فالتلفون : انته من صدقك بو حمود
بوحمود وهو يتنهد : والله هذا قرار حمود وانا ما اقدر امنعه
بوهلال : بس انا توقعت انه هالقصه صارلها سنين منتهية !! وما توقعت تنفتح مره ثانيه
بوحمود : والله يابوهلال الظاهر الزمن تغير بس حب حمود لمريم بعده للحين مستمر
بوهلال : انزين زوجته اشو رايها في هالموضوع
بوحمود : لا تخاف انا كلمت فاطمه وقالت موافقه بس شرطها الوحيد انه مريم تعيش في بيت بروحها .. واعتقد هالشي يرضي الطرفين ولا انت اشو رايك
بوهلال : والله شو اقولك انا للحين بعدني ما استوعبت شي .. بس خلني اكلم مريم واشوف رايها وعقب اردلك خبر
بوحمود : على خير إن شاء الله
بوهلال بضيج : ياربي اشو اللي صاير فهالدنيا .. معقوله هالشي يصير
ام هلال : بوهلال اسم الله عليك بلاك يالس ترمس لحالك
بوهلال وهو يتنهد : بوحمود توه داق علي وقال يبا مريم حق ولده حمود
ام هلال وهي تزغرد : هذي الساعه المباركه .. وربي كنت حاسه انها من نصيبه
بوهلال باستغراب : ام حمود انتي من صدقج .. بالاول كنتي ما اطيقين تسمعين اسمه
ام هلال : هيه صدقك بالاول كان واحد حافي منتف بس الحين قدر يكون نفسه والحين صار يناسب بنتي الدكتوره
بوهلال : والله حاس انه هالزواجه مب ضابطه ولا راضيه تدخلي من راس
ام هلال بابتسامه عريضه : شوف انته لا تحرق اعصابك خلني اسير ازقرلك مريم وعقب تفاهموا وهذي حياتها
بوهلال : زين تسوين بوحمود يباني الليله اردله خبر عسب يحددون يوم ويزورونا
ام هلال وهي طايره من الفرح : ثواااااني بس ومريوم تكون عندك
مريم كانت يالسه تدرس ومش داريه باللي حواليها
ام هلال بابتسامه : اخبااااااااااااااااااااااارها عروستنا
مريم وهي تفصخ النظارة : عفوا امايه اشو قلتي من شووووي ما انتبهت
ام هلال : قلت عروستنا واحلى عروس بعد
مريم باستغراب : امايه بعدني ما فهمت شي ممكن توضحين اكثر شوي عسب اقدر استوعب
ام هلال : بوحمود توه داق وقال يبونج حق ولدهم حمود
مريم وهي تفز : امايه من صدقج عمي بوحمود دق وطلب ايدي حق ولده حمود
ام هلال وهي تهز راسها بالايجاب : ايه .. ايه .. ايه .. الف الف الف مبروووك حبيبتي اللي في بالج صار
مريم وهي تحضن امها : امايه واخيرا !!! صبرت ست سنين واحينه كل شي صااار نفس ما خططت له
ام حمود وهي تبعد مريم من حضنها : مريم اشو قصدج وشو اللي خططتيله بالضبط
مريم بابتسامه : ولا شي امايه بس فيه مره من المرات طلعت لحمود وسويت نفسي انه طالعه بالغلط وعقب يلس يطالعني تقريبا نص ساعه وانا استحيت ودخلت على طول ويمكن هالشي اللي حنن قلبه علي
ام هلال : زين طمنتيني تحريت فيه شي ثاني
مريم تقاطعها : ما علينا من هالرمسه الحين .. خبريني ابويه اشو رايه اكيد وافق صح
ام هلال : اوه نسيت اخبرج ابوج يقول يبا يتفاهم معاج على شوية شغلات وياخذ رايج في هالموضوع
مريم وهي تركض صوب تحت : موافقه امايه موافقه موافقه موافقه
ساره باستغراب : حوووه انتي بلاج خرفتي
مريم بدلع : حموودخطبني .. حمود خطبني .. فهمتي ليش انا حدي مستانسه
ساره بتوتر : يعني سويتي اللي براسج يامريم
ام هلال بابتسامه : هاه ساروه باركتي حق اختج اللي تمنته من ست سنين صار والحين بتتزوج حمود
ساره وهي تتنهد : ويعني بالله عليج امايه الحين هذا خبر يفرح .. الا يزعل ..
ام هلال بعصبيه : احينه انتي ليش محتره جذا .. معقوله غيرتج من مريم تخليج ما تتمنين لها الخير
ساره وهي تضحك بسخريه : محتره وعلى شو ان شاءالله ريال ومتزوج وعنده عيال خبريني ليش اغارر
ام هلال : سااره انتي هالايام تصرفاتج طايشه فاحسن شي تبطلين هالحركات وشاركي اختج فرحتها
ساره وهي تضحك اكثر : امايه مريم مش محتاجه لاحد يشاركها فرحتها يكفيها حمود وخلاص يالله من رخصتج
ام هلال : لا اكيد هذي البنت تخبلت .. انا اموت واعرف ليش كارهه اختها ولا تتمنالها الخير ..
مريم وهي اطق الباب على ابوه وبخجل : ابويه ممكن ادش ولا مشغول
بو هلال بابتسامه : حياج دكتورتنا تفظلي الغاليه
مريم بدلع : مشكووور ابوي هاه امرني خبروني انك مطرش علي امرني اشو بغيت