روايه رائعه بكل ماتعنيه الكلمه من معنى


احاول القى شخصيه مفضله لدي لم اجد... تدرين ليه ؟؟

لان كل شخصيه رائعه ...مدري احس غير شخصيات رواياتك اللي قبل يعني مثلا ... اسى الهجران في شخصيات محدده احبها وفي شخصيات عادي

اما هذي الروايه غييييييييير

بس حبيت اقول شي :حلوه شخصية الرجل في روايتك يعني في شخصيته في العمل او مع الرجال او في الشارع حتى تشوفينه جلف شديد مغرور
لكن مع المرأه شخصيه ثااااااانيه ...احب النوع اللي كذا


نجي للتعليقات :
مزون : أنا متأكده انها بتاخذ غانم لانه من طرف كساب وهي تحاول ترضي كساب بأي طريقه ومو كذا بس لان في نظرها وافق على شغلها وبتقولين حتى فهد بعد وافق ..غانم غير لان غانم يشتغل معها وشايف طبيعة شغلها .


وضحى : حاسه في شعورها والله ..انا درايه انها ماتبي عبدالرحمن لكن صحيح شعور انك ترفض واحد كان مصر عليك وبعد فتره تلقاه طنشك واخذ ثاني شعور كريه جدا .


فهد : مدري مااحس بيصير له دور كبير في الروايه بس بروده يعجبني


بقول شي ولا تضحكين هو توقع مو اكثر :

باقي اثنين ..اثنين :علي ونايف ووضحى وشعاع

علي بياخذ وضحى يعني هو واخوه عدايل ونايف بياخذ شعاع لانها بتجيه من طرف عاليه حبيبته


اخر شي والاهم :
سالفة عبدالله : انا مدري ليه مصره تخلين فيها لغز مع ان بنفسك قلتي
حل اللغز شي بسيييط مو مثل توقعات البنات

في بنات قالو ان عبدالله حي مامات وانا اقول عبدالله مات وليش يصير حي اصلا بس في شي انا مستغربه منه انتي ليه خليتي هالشخصييه وسييييييم واساسا مالعب دور في الروايه كان بامكانك تخلينها شخصيه عاديه وخلاص لكن وراك مغزى ومدري وش اللي تبين توصلين له

انااقول بماان وزارة الخارجيه هي اللي مكلمه اهل عبدالله ومايبون يكلمون ابوه عشانك قلتي يوم تلقى خبر الوفاة كان مصدوم وماتحمل الخبر يعني السالفه بتكون والله اعلم انها تحقيق بقتل عبدالله يمكن كان مقتول والان اكدوا من ملابسات الجريمه وعرفو مين القاتل او شي ثاني وهذا بعيد ان عبدالله عنده ولد

مع ان عندي احساس ان عبدالله متزوج

وهذا توقعاتي البسيطه

احس طولت ترى ولامره توقعت بهذا التوقع الطويل

شكرا لك انفاس وروايتك تبعث لي امل وتحبب فيني التمسك بالعادات والتقاليد مع اني اكرهها ومااحبها ودايم انا واهلي هواش على مايسمى عادات وتقاليد .

السلام عليكم يا كاتبتنا العزيزه

صار لي مده طووويله اتابع كتاباتج و من اول جزء قريته في بعد الغياب حسيت ان اسلوب الكتابه و حبكه القصه غيــــر عن كل شي قريته قبل ..

حبيت المفاجات اللي كنتي تحطينها لنا و اللي ما اعتقد ان اي احد كان ممكن يتوقعها ...

حبيت طريقتج في تحبيب الناس في العادات الدينيه و اللي للاسف انها صارت تقل مع مرور الوقت مثل قيام الليل و الورد اليومي ..

حبيت اسلوبج في الوصف الغير مبتذل و اللي مثل ما قلتي ما تحطينه الا اذا كانت احداث القصه تستعدي انج تحطينها ..

اول شي ابغي اعلق عليه و اللي من زمان احس انه يقرقع في قلبي مع اني ادري انج ما تحبين المقارانات بس لا تعدينها مقارنه بل اوجه الشبه اللي لاحظتها في قصصج الثلاث
و اسفه مقدما على هذرتي و تفلسفي اللي ماله داعي :


في القصص الثلاثه كانت وحده من البطلات تعرضت لمشروع زواج فاشل جدا و هالشي اثر على زواجها الثاني في البدايه و اللي دايما يكون ناجح جدا عكس الاولي و في الثلاث حالات الازواج يكون هاي اول زواج لهم (( دلال و موضي و الحين جوزا ))

في القصص الثلاثه حطيتي شخصيه بطل يكون فاقد حاسه من حواسه سواء كانت حاله مؤقته او شي دائم (( سالم و مريم و تميم ))

في القصص الثنتين اللي سبقو "بين الامس و اليوم" كان فيهم شخص يضيع خارج الدوحه يا في العراق او الاردن و ما ادري ليش عندي احساس قوي يقول ان في هالقصه بعد بيضيع احد او بيكون مفقود طول الاجزاء اللي راحو و فجأه يطلع


و الحين نوصل حق بطلتنا هالسنه " بين الامس و اليوم " و اللي احب ارفع القبعه لج على هالعمل الرائع و اللي حبيته من كل قلبي .. حبيت عنصر المفاجأه فيه و اللي كان هالمره حاضر بشكل قوي .. ابطالنا و بطلاتنا كانو كلهم في سن زواج و كلهم عزابيه و كلهم اهل و معارف .. عشان جذي كان صعب ان نحدد من راح يكون من نصيب من ؟!! و هالشي ساهم في زياده التشويق و الغموض في القصه ..
و السبب الاكبر لاعجابي فيها .. ان هالقصه جزء كبيــر منها مشابه بشكل غير معقول لحياتي الواقعيه ..


حبيت اعلق على بعض الشخصيات اللي قريت عنها في قصتج :


كاسره

بطله الروايه عن جداره .. شخصيتها القويه وايد عجبتني مع ان في الكثير من الناس اللي انتقدوها على هالشي بس بالنسبه لي القوه شي اعتبره ميزه كبيره في الانسان لاني اكررره ضعف الشخصيه و الانقياد وراء الغير ..


مهاب

ابدا ما عجبني .. اكرره الرجل اللي ينفش ريشه على بنت و اهوا عارف انها ما تقدر تواجهه .. و هالشي سواه لما تعرض حق مزون في الكليه و لما ضرب خواته على سالفه الخطبه ..


زايد

ايضا من الشخصيات اللي ما حبيتها .. الحب اعماه مرتين .. مره حبه لمزنه اللي ضيع عمره و اهوا يحاول يحققه و بسببه ما قدر النعمه اللي الله عطاه اياها و اللي هي زوجته .. و المره الثانيه لما زوج خليفه صديقه لعفرا بدال اخوه و جميله بنتها لخليفه بدال علي .. ادري انج بتقولين ان هالشي وفاء بس بالنسبه لي العائله لها الاولويه في كل شي و المفروض الواحد يراعي هله و يفضلهم على اي حد ..


عاليه

عاد هاي اكثر شخصيه كرهتها في هالقصه ابدا ابدا ما حبيتها .. انسانه تافهه و سطحيه و سخيفه لابعد الحدود ..يمكن لاني اصادف مثلها وايد في حياتي عشان جي لما اقرا اسمها على طول اربطها فيهم .. من اول موقف مع خالها لما تزعل عليه حطيت عليها X بسبب تفاهه السبب .. و ثاني مره لما سوت المقلب في نجلا بدون ما تراعي شعورها كبر ال X اللي عليها .. ما تتصوين شقد ارتحت لما خطبها عبدالرحمن لان لسبب ما اعرفه ربطتها مع علي من بدايه ظهورها ..


كساب

ادري ان محد يحبه بس ابددددا ما الومه .. يزاها اخته و اقل من يزاها بعد بس الله يعيـــنه على كاسره اتخيلهم مثل البركان اللي ملاقي بركان ثاني ..


مزون

الانسانه السطحيه الانانيه و اللي دمرت مستقبلها و حياته اخوانها بسبب حلم قديم ما راعت فيه عاداتها ولا اهلها .. رمت الحب اللي كانت مغموره فيه في لحظه و اصرت على رايها على الرغم من اللي شافته من اخوانها و هالشي ما يسويه الا قليل الاصل ..


علي

شخصيه حبيتها وايد وايد وايــــــد يمكن لان اسمه يذكرني بانسان عزيز علي يحمل نفس الاسم و اطباعه اللي يغلب عليها الهدوء و المسالمه زادت من اعجابي فيه .. احس ان فيه اشيا وااايد تنتظره و خاصه من بعد تجربته مع جميله ..


تكلمت عن اكثر الشخصيات اللي كنت حابه اعلق عليهم و ان شا الله في الردود اليايه باتكلم عن الشخصيات الباقيه .. فيه العديد من ابطال القصه مثل شعاع و نايف اللي احس ان دورهم لي الحين ما وصل و ان في احداث راح يمرون فيها راح تغير من مجرى القصه ..

اخر شي باقول رايي في سالفه عبدالله << جني مصختها و طولت << احس ان عبدالله يا بيكون عايش لي الحين و ما مات او ان الاحتمال الاكبر انه كان متزوج هناك و عنده عيال ..


شكرا شكرا شكرا على كل شي قدمته انفاس قطر و على عطائهاالمستمر و طوله بالها مع القراء .. يزاج الله الف خير و ان شا الله ترتاحين في هالاجازه اللي بتاخذينها ..

تسلمين ياأنفاس ع البااارت الرائع .. وأنا من المتابعين لرواياتج واسلوبج الاكثر من رائع واحتواء رواياتج بالعادات والتقاليد والرقي الحواري فتبتعد عن الكلام البذي واللاإخلاقي .. وهذا مانفقدة للأسف في كثير من الروايات التي تهدم القيم والأخلاق ...سلمت أناملك ياانفاس قطر ومزيد من الابدااااع .

صباح الخير

تعليق بسيط على عبدالله انا ماتوقع عبدالله بعده عايش لانه لوكان عايش ماترك ابوه زوجته تحاد عليه وتتزووج هذا اولا

لان المتصل قال مانسيت الي صار لابوك يعني عبدالله اتوفاء لكن فيه شي اكتشفه ابوه بعد وفاته عرف منها كيف عاشت جوزاء معه ويمكن يكون عبدالله متزوج ثانيه

كمان جاء ببالي حوار فهد ومنصور لما طلب يروح لدورهومنصور رافض يحط اسمه من ظمنهم ولما سأل فهد منصور مين الي قال له سكت

فتوقعي ان عبدالله مات لكن المتصل راح يكشف شي من غموض موت عبدالله ومعاملته لجوزاء وسبب ان ابوه رفض يروح احد يجيبه

هذا التوقع جاء ببالي الحين يمكن يصيب او يخيب