كاتب الموضوع :
#أنفاس_قطر#
المنتدى :
القصص المكتمله من وحي قلم الاعضاء
بين الأمس واليوم/ الجزء الخامس والتسعون
بسم الله الرحمن والرحيم
السلام عليكم ورحمة الله وبركاته
ياحياكم الله وياصباحكم خير ومسرات
خالص شكري وتقديري لكل القلوب الناصعة اللي تحاوطني بتشجيعها وتقديرها
الله لا يحرمني منكم
.
.
نبضات القلب جميع دام خير رب العالمين عليكم
أخوانكم في ليبيا محتاجين للتبرعات.. عندهم نقص كبير في المواد الغذائية والإمدادات الطبية..
والصدقة كما تعلمون تطفئ غضب الرب..
فاطفئوا غضب الله عز وجل... واساعدوا أخوانكم المحتاجين لمساعدتكم جعلها الله في موزايين حسناتكم
.
.
دعواتنا جميعا لولد شوشو السعودية بالشفاء العاجل شفاء من عند رب العالمين لا يغادر سقما
وحفظه الله لأمه وأفرحها برؤية أولاده إن شاء الله
.
.
يا نبضات القلب
ترا توقف الكلية عن العمل لا يستدعي استئصالها.. فرضا لو واحد عينه ماتشوف.. يشيلونها من مكانها :)
.
مثل حقيقي:
واحد من قرايبي سوى حادث سيارة جات الضربة على الكلية وانعطبت..
ولحد الحين موجودة ماشالها.. وحتى ما طول في المستشفى بعد الحادث.. خذ له كم يوم بس!!
وعايش حياة طبيعية جدا الحين..
.
اللي يحدث لما تنعطب أحد الكليتين إنها تضمر.. بينما الكلية الثانية سبحان الله يكبر حجمها قليلا وتقوم بمهام الكليتين بصورة طبيعية
سبحان الله ما أعظم قدرته.. وما أرحمه بعباده!!
.
.
بنات يسألون هل هزاع هل له دور قادم؟؟
يا بنات هو يعني يأما يتزوج أو ما يكون له دور :)
هزاع توه صغير وتوه سنة أولى في الكلية..
يعني فعلا الزواج غير وارد.. لكن هأنتم ترون أنه له دور ممتع متناسب مع حضوره في الرواية!!
أشياء أخرى اتركوها لسياق الرواية وأحداثها.. كشف الأوراق يسيء دائما للحدث :)
.
سؤال ثاني
خليفة بيرجع؟؟
نفس الجواب.. إذا كان بيرجع أو لا... هذا بتكشفه لكم أحداث الرواية..
.
.
اسم أخت نجلا (مها) بدون آل التعريف.. صالح عاد هاويها بآل التعريف
وانتظروا شوي تعليقات على الاسم المقصود جدا خصوصا من عالية وسميرة :)
.
.
معنى : أرد نفسي لهذا الشيء= أتنازل له وهو شيء لا يستحق التنازل
مثلا لو تشاجر الأطفال على قطع الحلوى تقبلين ذلك منهم؟؟
لكن لو اشترك في الشجار شخص راشد.. حينها ستقولين: أشلون رد نفسه لذا الشيء..
واضح المعنى ؟؟ :)
.
.
يالله الجزء 95
قراءة ممتعة مقدما
.
لا حول ولا قوة إلا بالله
.
.
.
بين الأمس واليوم/ الجزء الخامس والتسعون
" الحين أنتي وإياها مصبحيني من صبح عشان تغثوني..
قوموا فارقوا كل وحدة لبيتها ..
خلو أمي وأمي صافية هم اللي يجوني أبرك من مقابل وجيهكم..
الحين مسوين فيها قاعدين عندي.. وهل واجب..
قوموا فارقوا.. جعل عبدالرحمن وتميم يمسونكم الليلة بكفوف لين تقولون بس!!"
سميرة تهتف بمرح: علوي ظنش عيال أخيش ذولا فيه قرابة بينهم وبين الفيران..؟؟
عالية بمرح مشابه: لا لا حدش.. مهوب عيال أخي.. عيال أختش.. هذي جينات الفيران من عندكم!!
أخواني كلهم طوال..
سميرة وضعت كفها على خاصرتها بطريقة تمثيلية وباللهجة المصرية التي تعلكها بطريقة كوميدية: نعم يا أختشي .. نعم..!!
ما يحكمشي وإن حكم ما يأمرشي.. ئال فيران ئال!!
ثم أردفت بإبتسامة أوسع: ياحبيبة قلبي أمي جايبتنا كلنا حدود الاربعة كيلو..
ومهاوي وصلوح جابتهم 4 ونص.. شوفي الانتاج المتغذي ولا فراخ الجمعية!!
مهوب ذا الكيلو الطالع والنازل اللي عيال أخيش متمسكين فيه!!
وبعدين أنتو اللي تلزقون فينا.. الولد سميتوه على أخي.. والبنت سميتوها على أختي.. أصلا باقي اسم سميرة.. وتصير عايلتنا بالكامل عندكم!!
عالية بتأفف: وعيييييييه.. وش سميرة ذي؟؟ وش ذا الاسم السوفاج؟؟
أما عاد مهاوي لا تنسين إن صالح هو اللي طلب اسمها من عمي راشد..
من زمان خاطره في الاسم!!
سميرة بذات المرح: زين صارت حلاوة.. بيسمي العايلة كلها مها...
وإلا عشان أختي مهاوي شقراء وتختوخة وتجنن تحسبون بنتكم الفارة السوداء بتصير مثلها..
بعيد عن شواربكم يا آل خالد الجياكر..
كان الحوار المرح مستمر بين الاثنتين منذ حضورهما معا.. لتغادر أم صالح التي كانت أصرت أنها من ستبات عند نجلاء..
كانتا تحاولان رسم الابتسامة على وجه نجلا التي كانت تعاني بالفعل من كآبة حادة.. وهما تعلقان على المولودين معا بذات الدرجة..
لكي توحيا لنجلا ان كلاهما سيعيش لها..
كلاهما لا يغادرها مرحها الفطري رغم أن حياة أي منهما لا تخلو من المشاكل..
فعالية بين ضغط عملها.. ووحمها .. وعدم تحسن حالة عبدالرحمن التي هي المؤثر الأكبر على نفسيتها المرهقة..
سميرة أيضا هي حالة خاصة.. زوجها ذكي.. لكنها أيضا ذكية!!
تميم قبلا كان يغار عليها الغيرة المعتادة التي ترضي غرور أي امرأة!!
لكنها ما أن بدأت تشتكي من عمله.. حتى بدأ هو يزيد من عيار الغيرة لدرجة بدأت تضايقها...
وكأنه -بطريقة قد تكون فعلا غير مقصودة- يعطيها مثالا أن هذا ماسيحدث كلما بقي معها وقتا أطول..
لأنه سيزيد من تركيزه عليها..
وكأنه يقول (ارتاحي مني يا بنت الحلال أحسن!!)
بينما سميرة ابتسامتها دائما حاضرة ( خبيث ياتيمو.. بس تراني لو بغيت أصير أخبث!!
وعلى قولت خالي هريدي الفصيح : إن كنت ريحا فقد لاقيت إعصارا )
*****************************************
صحا من نومه.. وهو يشعر بشعور أشبه بالصداع..
فهو لم يستطع أن ينام جيدا.. وهي السبب.. دائما هي السبب!!
البارحة أصر أن يأخذها خارجا ليتعشيا لأنها لم تتناول أي شيء طوال اليوم..
شهيتها كانت شبه مسدودة فعلا..
وهو عاني بطريقته العصبية في إقناعها أن تأكل.. فهو يعلم أنها عانت من مرض انسداد الشهية ويخشى أن يعود لها بسببه..
ومنذ عادا لغرفتهما.. وهو عاجز عن رفع عينيه عنها بطريقة مؤذية لمشاعره.. وجارحة لرجولته!!
وهو يحاول أن يكتم رغباته وينحيها في نقطة عميقة في داخله!!
ولكن هذه الرغبات بدأت تتسع في داخله إلى حد العجز عن كتمانها..
وهي تكاد تفيض من جوانحه بقسوة....
أجبر نفسه إجبارا قهريا على التمدد قبلها.. وإغلاق عينيه حتى يتوقف عن مراقبتها..
وهاهو يصحو الآن بعد نومته غير المريحة..
ليتفاجأ بوجود مخددة ممدة بينها وبينه!!!
" نعنبو ذي صاحية وإلا خبلة ؟؟
يعني المخدة بتحميها مني!!"
ألقى المخدة خلفه بعصبية.. ثم نقر كتفها بخفة.. جلست بجزع وهي تتلفت حولها..
هتف بعصبية: سور الصين العظيم اللي حطوه عشان يحمي الصين.. يسلم عليش!!
جميلة تلفتت بحرج للمخدة الساقطة خلفه.. وتهمس بذات الحرج : ماقصدت شيء!!
فهد بغضب يتزايد بغير منطقية ولا سبب: إلا قصدتي ونص.. قصدتي تجرحيني.. وتحرجيني..
وش تقصدين؟؟تبين تبينين إنش خايفة مني أو عايفتني..؟؟
ليش يعني ؟؟.. حلال عليه وحرام عليّ.. ليش يعني هو حق له يقرب.. وأنا تبين تبعديني بأي طريقة..
جميلة بصدمة: فهد أنا الحين اللي أبي أبعدك.. والكلام اللي قلته لي من ثاني يوم عرسنا.. نسيته؟؟
فهد بقسوة: لا تفتحين دفاتر ما أبي أفتحها.. أنا مانسيت.. بس أنتي نسيتي وأنتي تسوين حركات البزارين ذي..
أنتي منتي بمحتاجة شيء يحميش مني.. قلت لش إني أنا نفسي تردني...
وخلصنا جميلة.. ما أبي أقول شيء يضايقش.. لأنه يدي ما تمر على مكان مرت عليه يد غيري..
آلمها حتى عمق العمق.. ألا لأنه بدأ يضعف نحوها يجد ذلك مبررا لطعنها الطعنة تلو الطعنة!!
هذا وهو لا يريد أن يضايقها.. فما معنى المضايقة عنده هذا المخلوق المعدوم الإحساس..؟؟
وهو بالفعل وحقيقة كان يظن أن كلمته غير جارحة...!!
همست حينها جميلة بحزن شفاف: ماتبي تقول شيء يضايقني؟؟
أنت أساسا من يوم تزوجتني ماتعرف إلا الكلام اللي يذبح.. هذي المضايقة مرتبة أنت تعديتها من زمان!!
أنا أبي أعرف وش الدين اللي تعرفه أنت؟؟.. الدين عندك صلاتك ووردك بس..
اللي أعرفه إن الدين المعاملة..
واللي أنا أعرفه إنه زوجات الرسول صلى الله عليه وسلم كلهم مطلقات وأرامل إلا السيدة عائشة..
مرت قبل يده الشريفة أيادي وأيادي.. ولا عمره جرح وحدة منهم بكلمة..
إلا إذا أنت شايف نفسك أحسن من الرسول عليه الصلاة والسلام؟؟
فهد انتفض بجزع وهو يقفز ويستغفر: أعوذ بالله من غضب الله.. فيه حد يتطاول على الرسول كذا.. أنتي صاحية!!
جميلة ماعادت قادرة على الصمت.. مثقلة بالوجيعة حد التخمة..
أ يوقظها من نومها ليتمتع بتجريحها؟!! أي مخلوق وحشي وهذا؟!!
انهمرت بيأس:
الحين أنا اللي تطاولت على الرسول وإلا اللي شايفني زبالة عشاني كنت لرجال قبلك.. ؟؟
الله عز وجل يقول : (عسى ربه أن طلقكن أن يبدله أزواجا خيرا منكن مسلمات مؤمنات قانتات تائبات عابدات سائحات ثيبات وابكارا)..
وقدم الثيب على البكر.. لكن أنت لا هامك كلام رب العالمين.. ولا رسوله...
أنت واحد معدوم إحساس.. ولا فيك ذرة إنسانية..
وأنا تعبت منك والحياة خلاص مستحيلة بيننا..
وأنا ترا بطبعي ماني بصبورة.. بس صبرت عليك واجد عشان ما اصير مطلقة مرة ثانية..
لكن أكرم لي أصير مطلقة عشرين مرة.. ولا القعدة مع واحد مثلك ذالني على شيء مالي ذنب فيه..
فهد تراجع بصدمة كاسحة.. فهو لم يقل لها ما يستحق أن تقول له من اجله كل هذا؟؟
لم يتخيل أنها قد تصف كل هذا الحديث لتصل في النهاية إلى هذا الطلب الموجع كنتيجة منطقية لكل ما يحدث بينهم!!
رصفت الحديث رصفا.. وهي كل حجر تضيفه تضعه فوق صدره حتى أصبح عاجزا عن التنفس وهي تقيم البناء كاملا على جسده..
أ لم يعلم أن المعول الذي كسرت به الحجارة لتقيم بنائها.. كان هو من غرزه في صدرها..؟؟
قسوته جعلتها تنتزع المعول من صدرها ومكانه ينزف طوفانا من وجع ودم.. لتستخدم ذات المعول لتبتعد عنه!!
***********************************
بعد أربعة أيام
.
.
" صالح الله يهداك ماعاد شفناك.. تقعد في المستشفى أكثر من البيت!!"
صالح يميل ليقبل رأسها ثم يجلس جوارها على السرير ويهمس بحنان:
أنا بعد حبيبتي قلت لش .. خلش عند أمي وإلا أمش
أنتي لزمتي ما تنفسين إلا في بيتش!! عشان كذا صرتي تضيقين من القعدة..
نجلا تزفر: أصلا أنا من البداية قلت لك إني باتنفس في بيتي.. لا هو أول ولا ثاني..
وأمي وأمكم يا الله كل وحدة تقوم بروحها.. وأنا هنا خداماتي عندي..
ومدارس عيالي قربت..
وهذا أساسا مهوب موضوعنا.. يعني أنا هنا من قبل أمس.. كل ماكلمتك لقيت جوالك مسكر دريت إنك عند البنت..
صالح بتأفف حنون: شأسوي ما يخلوني اشوفها إلا شوي.. فاضطر اروح وارجع واروح وارجع..
نجلا تتنهد: زين صالح خلك منطقي.. قعدتك عندها كل ذا وش بتفيدها؟؟
أنا وعيالك اللي محتاجينك أكثر الحين..
صالح زفر بغضب: لا هي محتاجتني أكثر.. أنتو في بيتكم ولا عليكم قاصر..
بس هي محتاجة تحس إنه فيه حد جنبها ويبغيها..
نجلا زفرت بيأس: أشلون بتحس.. من ورا القزاز..؟؟
وعلى العموم دامنا جبنا طاري البنت.. أبي أقول لك.. قبل ما تخلص أوراقها
إني ما أبي اسم المها..
صالح بصدمة: ليش احنا كنا متفقين خلاص..
نجلا بضيق متأفف: مايصير صالح هي بعد مها.. كفاية أختي أنت سميتها وإبي طاعك من غلاك عنده.. وعشانه عارف إنك مشتهي بنية..
بس خلاص هي كفاية.. أبي أدور لبنتي اسم ثاني!!
صالح وقف وهو يهتف بحزم: انتي سميتي غانم وما اعترضت.. والحين اسم البنت لي أنا..
نجلا اعتدلت جالسة وهي تنفث غضبها: والله المعروف إن البنت اسمها عند امها..
وبعدين تعال وش معنى ذا الاصرار على اسم مها..
ليش مها بالذات؟؟
صالح لم يرد عليها وهو يشد أنفاسه ويخرج!!
******************************************
" حبيبي.. وش فيك تاخرت الليلة؟؟ مهوب عوايدك؟؟"
علي يناولها غترته ويبتسم : إيه متعودة أوقع حضور من بدري..
كنت عند مزون.. سهرت شوي عندها أنا وكساب..
ولولا إنه كنا نبيها تنام وإلا كان قعدنا للفجر!!
ابتسمت شعاع برقة وهي تطوي غترته لتضعها في سلة الغسيل:
الله لا يحرمها منكم.. ولا يحرمكم منها.. مابعد شفت أخوان يحبون أختهم مثلكم..
كانت شعاع متجهة لغرفة الملابس وهي ترى عليا متجه للميزان.. ابتسمت وهي ترفع صوتها: لا تحاتي.. نفس وزنك البارحة!!
ضحك حين رآها تخرج عائدة له: كله منش.. طول اليوم تزغطيني أكل..
كساب ومزون استلموني تعليقات.. يقولون ضعيف وطلع لك كرش!!
وكساب لقاها فرصة يبي يسحبني معه للنادي!!
شعاع باستنكار: وين الكرش حسبي الله على أبليسهم..؟؟
ماعليك منهم.. أنت عاجبني على كل حال!!
**********************************
" ها ياعروس كيف استعدادش لبكرة؟؟ "
مزون التفتت لوالدها بخجل لا يخلو من ثقة: عادي.. فديتك!!
مار على رأسي اللي أعسر من سالفة العرس بواجد..
وأنت أدرى!!
زايد يشدها ليحتضنها .. ويطيل في احتضانه لها وهي تستكين بين ذراعيه وعبرة تلقائية تقفز إلى حنجرتها..
لا يتخيل البيت غدا يخلو من وجودها وخطواتها .. يشعر منذ الآن بخواء هائل يخترم روحه إلى أقصاها..
همس في أذنها بحنان: أخوانش جاووش.. أشوفهم الليلة كل واحد منهم يتسحب ورا الثاني..
وكني داري وينهم رايحين.. قلت خلني أنا عقبهم..
مزون باختناق: جاوني فديتهم.. وقعدوا عندي أكثر من ساعتين!!
حتى البنات كانوا يبون يجوني.. تعذرت منهم.. قلت الليلة لاخواني..
قالوا أول مرة نشوف وحدة تسهر الليلة اللي قبل عرسها مع أخوانها..
الله لا يحرمني منكم جميع.. ويديمكم فوق رأسي جميع..
زايد أفلتها ليشدها ويجلسها ويجلس جوارها وهو يهتف بحنان خالص:
مايحتاج أوصيش في رجالش.. وأبيش تبيضين وجهي عند جماعتش..
مزون همست بتأثر: لا تحاتيني يبه فديتك.. بيقولون زايد ربى..
مسح على خدها بتأثر: كان ودي إن أمش تشوفش بكرة..
كانت دايم دعوتها لش من يوم جابتش.. جعلني أشوفش عروس..
الدعوة اللي ماعاد سمعتها منها آخر سنة عاشتها..
مزون عادت لترتمي في حضنه وهي تمنع نفسها من البكاء لأنها لأول مرة ترى والدها بهذا التأثر:
أنت أمي وإبي.. ولا شفتني أنت بعينك كن العالم كلهم معي!!
أبعدها قليلا ليقرص أنفها بمودة وهو يبتسم: حتى كساب يا النصابة؟ !!
ضحكت مزون ضحكة مختنقة بالدموع: لا تمسك على الكلمة.. وخل كساب على صوب!!
.
.
.
هاهو يعود أخيرا إلى غرفته.. بعد أن قضى وقتا طويلا عند ابنته..
مطلقا لم تشعر بأي ضيق.. حين أطلت عليهما لأنها كانت تريد أن ترتب بعض الأغراض لمزون.. وعلمت حينها أنه هناك..
وعادت لجناحها دون أن تزعجهما...
كل ماشعرت به هو تأثر شفاف.. بالغ الشفافية..
فهي أيضا كانت وحيدة والدها.. وتعرف كيف يكون ارتباط الوحيدة بوالدها .. وارتباطه بها !!
ولكن مابات يضايقها هو زايد ذاته.. هل التغيرات التي تنتابه هي لتأثره من زواج مزون؟؟
وماعلاقة زواج مزون بتجاهله المهذب الرسمي لها نهارا... ثم ارتعاشه كالمحموم بين ذراعيها ليلا وهو يهذي باسمها بطريقة موجعة!!
يثقلها ببروده نهارا.. ثم يشعل مشاعرها لهيبا في الليل..
والمؤلم لكبريائها أنها تتمنى من بين شفتيه كلمة واحدة كالتي أغرقها بها في الايام الاولى من زواجها.. ولكنه لم يخطئ ولو لم مرة واحدة في قولها..
ربما لو كان لم يقل لها شيئا إطلاقا.. لقالت هكذا طبعه ولا بأس.. فهناك رجال لا يحبذون قول كلمات الغرام..
ولكنه أغرقها بقاموس من كلمات الغرام لم يخطر يوما حتى على أبعد مخيلاتها..
ثم ...صمت..
صمت كما لو كان نضب.. بئر ونضبت!!
والأعمق والأغرب.. أنها لا مانع لديها من إكمال حياتها كلها دون أن تسمع الكلمة التي تنتظرها..
فوجودها جواره يغنيها عن كل شيء..
ولكن ليتها تفهم فقط ما الذي يمر به الآن.. ليتها تفهم.. حتى ترتاح وتريحه!!
*************************************
" آه..." بالكاد صدرت عنها هذه الآهة الخافتة ليقفز جالسا وهو يتحسسها بقلق: وش فيش؟؟ شيء يوجعش؟؟
جوزا تنقلب على جنبها ناحيته وهي تهمس بعفوية: لا حبيبي بس كنت أبي أنقلب على جنبي الثاني.. وتعرف مع الثقل القلبة هذي صعبة!!
عبدالله يزفر وهو يعود للتمدد: روعتيني الله يهداش.. أنا من عقب اللي صار مع أم خالد.. وأنا صاير معي فوبيا خوف عليش..
جوزاء ابتسمت وهي تمسح على شعره: مافيني إلا الخير.. مسوية عشرين فحص.. هو بيبي واحد وسليم إن شاء الله ووزنه ممتاز...
ابتسم عبدالله بخبث لطيف: وجنسه؟؟
ضحكت جوزا: اللي هو.. أنا وأنت عادي عندنا ولد وبنت.. مهوب مثل أخيك اللي استخف على بنته وقعد..
ثم أردفت بجدية: تصدق حبيبي بديت أحس إن نجلا متضايقة من تعلقه الغريب ببنته...
عبدالله باستنكار: لا لا تقولين كذا.. بس تدرين مهما كان النفاس تتعب نفسيتها... وهي مسكينة والد بعملية وعيالها أوزانهم صغيرة..
وبنتها في الحضانة..
وصالح الله يهداه لازم يعطيها وجه شوي..
جوزا برجاء: زين قل له تكفى.. نجلا كاسرة خاطري..
تنهد عبدالله: أنا قلت له من نفسي.. وصدقيني عشانه موب عشانها هي بس..
البنت قلبها تعبان.. وصالح متعلق فيها بشكل غير طبيعي..
أبيه يفك منها شوي بس هو مايسمع ولا يطيع..
ثم أردف بابتسامة: الله يعين على ذا الأخوان.. واحد كل يوم ساحبني للمستشفى عشان أشوف بنته من ورا القزاز..
ويقول لي قصايد غزل في جمال بنته وهي حتى ملامحها مهيب باينة..
والثاني ساحبني من فجر للمطار.. ما أدري ليه ما يستلمون دلوعة أمي هزيع شوي..
جوزاء بتساؤل: إلا غريبة فهد طلب منك تجيه.. ما طلب من عمه يجيه عشان مرته تاخذ راحتها!!
عبدالله هز كتفيه ببساطة: يمكن استحى يطلب من منصور يجيهم الفجر..
************************************
يجلسان متجاورين في الطائرة..
وشتان بين مشاعر كل منهما.. كما كانا دائما !!
هو يريد أن يقتنص منها نظرة.. وهي لا تريد أن تنظر نحوه حتى!!
فبعد انفجارها فيه قبل عدة أيام.. سكتا كلاهما تماما.. انقطع الحوار تقريبا بينهما إلا في حدوده الدنيا الضرورية..
يذهب لتدريبه.. ثم يعود فورا لها.. يخرجان معا.. يتغديان.. يتعشيان.. كما لو كانا سائحين التقيا دون سابق معرفة..
لم يعودا للتناقش في أي شيء..
فالجرح بينهما بات أكبر من أي نقاش..!!
طوال جولاتهما يمسك بكفها.. وهي لا تعترض على شيء.. فما الفارق الحاصل؟؟
ولكن ما أن يعودا لغرفتهما.. لا يقترب منها إطلاقا.. ولا بأي صورة..
حتى حينما تأخر في الحجز.. وزواج ابنة خالتها أصبح في الغد.. لم تسأله عن شيء.. لم تقل له حتى هل سنعود أو لأ؟؟
وحين فاجأها البارحة بخبر توجهما للمطار.. لم تعلق أيضا..
كانت تريد جمع ملابسها.. لكنه رفض.. طلب منها أن تاخذ أغراضها الثمينة فقط وتترك الملابس حتى يعودا.. لأنه لا وقت لديهما لحزم حقائبها..
مع أنه تقصد تماما أن يخبرها في ذلك الوقت.. حتى لا تجد الوقت لأخذ أغراضها..
وكأنه يخشى حين تأخذ كل شيء أن ترفض العودة معه..!!
ثم طلب من عبدالله أن يستقبلها في المطار.. لم يطلب من منصور..
شعر بألم عميق أن يرى منصور وهي معه.. وكأنه يقول له: أنا لم أستطع المحافظة على أمانتك..
أو ربما كان أكثر ما يخشاه أن تصر على الذهاب مع منصور..أرادها أن تذهب معه إلى بيته أولا.. لتعلم أن هذا مكانها ولا مكان لها سواه..
وبالفعل هاهما الآن في سيارة عبدالله متجهان لبيته مع خيوط الشمس الأولى وهو يشعر بارتياح ما..
لذا كانت صدمته الكاسحة التي فجرت غضبا كتمه في روحه.. حين سمع الصوت الواثق الرقيق القادم من الخلف:
أبو حسن لو سمحت... الظاهر فهد نسى يقول لك إني أبي بيت هلي أول..
لم يفت ذكاء عبدالله ذلك.. لذا هتف بحزم: أبشري.. أصلا فهد قال لي وحن داخل المطار..
جميلة شعرت بحرج كبير.. أن يكون فعلا فهد قد قال ذلك لأخيه بينما هي ظنت فيه ظن السوء.. واضطرت إلى إحراج نفسها أمامه..
ولكن مايهم أنها لن تعود معه..فهي لن تحتمله حتى لدقيقة واحدة!!
الصمت حل في السيارة.. حتى الحوار بين الشقيقين توقف لأن عبدالله كان يعلم أن فهدا يشعر بغضب بدا واضحا في ارتعاش كفيه!!
حين وصلوا إلى بيت منصور.. جميلة نزلت.. وفهد نزل لينزل حقيبتها..
وحملها للداخل..
ما أن فتحا باب الصالة.. حتى خلعت جميلة نقابها وشيلتها وألقتها على المقعد وتريد الركض للاعلى...
ولكن فهد شدها وهو يثبت ظهرها لباب الصالة.. ويهتف بغضب متفجر كتمه بين ارتعاشات صوته: ممكن أعرف أشلون تسوين فيني كذا؟؟
أشلون تصغريني قدام أخي..
جميلة بصدمة: ليه أنت ماقلت له أصلا..؟؟
ثم بترت عبارتها وهي تهمس بمرح ميت: قلت لك إنك غشيم.. حتى تغطية أخيك عليك ماعرفت تستغلها..!!!
أنا كنت حاسة بالذنب إنك فكرت فيني وأنا مافكرت فيك..
بس مشكور جزاك الله خير إنك علمتني.. أنا اساسا استغربت ذا اللطف اللي نزل عليك!!
فهد بغضب حقيقي: وأنا ما أحتاج حد يغطي علي بالكذب..
أنا أساسا كنت بأجيبش هنا بنفسي.. بس كنت أبيش تسلمين علي هلي أول وعقبه اقعدي عند هلش كثر ماتبين..
جميلة تحاول تخليص كتفيها المثبتتين بدون فائدة وهي تهمس بغضب:
أسلم على هلك لو كنت مقررة أكمل حياتي معك.. بس خلاص لين هنا وخلاص انتهينا..
وشو الله أحرج نفسي وأروح أسلم على هل اللي بيطلقني..
فهد تراجع بصدمة: أطلقش!! استخفيتي أنت..
جميلة تشعر بغضب متصاعد.. فهي باتت تكتم طويلا ثم تنفجر مرة واحدة:
استخفيت لو بأكمل معك.. خلنا نتطلق من سكات وبدون فضايح..
قبل ما أقول لعمي منصور كل اللي سويته فيني..
وأظني علاقتك بمنصور أهم من علاقتك مني.. فما في داعي تخرب علاقتك فيه عشاني!!
فهد عاود شدها من معصمها بقوة وعيناه محمرتان لشدة غضبه:
صحيح منصور عزيز وغالي.. بس لا تهدديني فيه.. لأنه مستحيل أطلقش لو مهما صار.. ولا حتى عشان منصور نفسه..
أنا ما تزوجتش عشان أطلقش..
جميلة بغضب مشابه: لا.. تزوجتني عشان تحطني على كفوف الراحة اللي معيشني عليها من يوم تزوجنا..
فهد أفلت معصمها بحدة: الحين خلش عند هلش .. بس حطي في بالش إن طيارتنا بكرة..
جميلة بحزم: سافر بروحك... الله يحفظك..
فهد يفتح الباب وهو يلتفت نحوها ويهتف بحزم: يحفظني أنا وإياش وحن مسافرين سوا..
فهد فور أن ركب السيارة هتف بحزم دون أن ينظر لعبدالله: عبدالله رجاء لا تسألني عن شيء؟؟
عبدالله هتف ببساطة باسمة: لا راح أسأل عن شيء ولا كني عرفت شيء!!
بأقول كلمة وحدة.. عشان ما أغص فيها يأخيك..
بنية في عمر مرتك إذا أنت يالدبش العود ماقدرت تفر مخها في يومين... فهذا من خبالتك!!
*********************************
" كاسرة.. وين بتروحين بدون ما تقولين لي؟؟"
كاسرة التفتت لكساب الذي اعتدل جالسا من نومه وتختلط بوجهه علامات النوم والغضب..
همست بهدوء: خاطري مرة أسوي شيء وأنت نايم ولا تصحا..
رايحة الدوام طال عمرك!!
كساب باستغراب غاضب: دوام يوم عرس أختي.. ماقدرتي تأخذين إجازة اليوم يعني؟؟
كاسرة بذات الهدوء: عندي اجتماع مهم.. بأخلصه وأرجع بدري.. الساعة 10 أنا هنا إن شاء الله..
كساب بذات النبرة المحملة برائحة الغضب: حتى أنا كان عندي اجتماعات مهمة..
فيه اختراع اسمه إلغاء الاجتماع أو الاعتذار عنه...
كاسرة تنهدت: حاولت وما قدرت... فما فيه داعي تسويها سالفة كساب...
كلها ساعتين وراجعة..
كساب ينفض فراشه ويقف وهو يهتف بذات النبرة الحادة:
الحين أنا اللي سويتها سالفة وإلا أنتي ؟!!
اتصلي الحين واعتذري!!
كاسرة بحزم: ما أقدر.. قلت لك ما أقدر.. والموضوع مايستاهل الشد اللي أنت مسويه..
أنت بس تموت لو ماعصبت على كل شيء!!
كساب تنهد وهو يشد نفسه متجها للحمام..
فهو اليوم متوتر فعلا لزواج مزون وإحساسه بإبتعادها عنهم...
وهذه المخلوقة الكاسرة ستبقى عاجزة عن فهمه!!
كان يحتاجها لجواره بشكل عميق غير مفهوم..
لم يكن يريد معاناة كل هذا التوتر وحده..!!
ولكن هاهي تفضل عملها عليه..!!
فماذا يستطيع أن يقول أكثر !!
************************************
" حرام عليش جميلة.. فجعتيني هذي مهيب مفاجأة..
تهزين كتفي وأنا نايمة.. أفتح عيوني ألقاش نايمة جنبي!! "
كانت مزون تهذي بفرح حقيقي رغم مرور أكثر من نصف ساعة على رؤيتها لجميلة..
جميلة تتربع على سرير على مزون وهي تهمس بمرح: تدرين أمي فجعتها نفس الفجعة..
لأن عمي منصور كان طالع الزام بدري على أساس يرجع يرتاح قبل موعد عرسش..
وبعدين ماقعدت معها إلا نص ساعة.. وخليت السواقة تجيبني.. شفتي غلاش بديتش على زيودي..
يا الله قومي يا الكسلانة خل نرتب أغراضش..
مزون تتمدد في حضن جميلة وتضع رأسها على فخذها: أغراضي كلها مرتبة من أمس.. عمتي مزنة وبناتها ماخلوني احط يدي في شيء..
والحين تو الناس... علميني أنتي وش أخبارش..؟؟
جميلة حينها انطفئت ابتسامتها: زين.. ماشي الحال..
مزون اعتدلت جالسة وهي تهمس بقلق وترفع وجه جميلة ناحيتها:
عيونش ماتقول زين..
جميلة بسخرية مرة أقرب للبكاء: خلاص زفت..
حينها جلست مزون وهي تشد كف جميلة وتهمس بقلق متأثر:
ليش كذا جمول؟؟
جميلة حينها انفجرت في البكاء وهي تنكب وتدفن وجهها في حضن مزون وتهمس بصوت غير واضح.. مختنق من الشهقات ومن اختباء وجهها في حضن مزون:
لأني متزوجة رجّال زفت.. زفت.. بس تكفين ما أبي أمي تدري بشيء..
هي وعمي شايفين فهد شيء كبير ما أبي أكسره في عينهم..
عشانهم مهوب عشانه..
لأنه عمي منصور يحبه واجد.. ولو تأثر أمي بتتأثر معه!!
مزون رفعت جميلة من حضنها وهي ترفعها من كتفيها وتهمس بحزم:
قولي اللي وش صار بينش وبينه ولا تدسين علي شيء..
جميلة تمسح وجهها وتهمس بصوتها المختنق تماما: مزون سامحيني.. المفروض ما أخرب مودش وخصوصا اليوم.. خلاص حكي فاضي ماعليش منه..
مزون بحزم أشد : مودي مافيه شيء يخربه.. وخلصيني قولي لي..
لا تشغلين بالي كذا..
جميلة حكت لمزون كل شيء.. فهي كانت محتاجة للبوح ليس إلا..
فقد أرهقت سنوات عمرها القليلة بكتمان هو فوق طاقتها..
مزون كانت تستمع بذهول.. لم تتخيل أن جميلة المدللة قد تصبر على كل هذا.. وعلى أقل منه حتى..
ومع ذلك حين وصلت جميلة لموضوع الطلاق الذي حدث بينها وبينه قبل قليل..
انتفضت مزون بجزع: ومن جدش تبين تتطلقين؟؟
جميلة هزت كتفيها بيأس: تبين الصراحة؟؟ ما أدري... فهد ما ينتعاشر..
بس لو تطلقت للمرة الثانية وأنا ما كملت شهر.. تخيلي الكلام الي بيطلع علي..
وهم يا الله سكتهم زواجي من فهد عقب طلاقي من خليفة..
الحين ماراح يسكتهم شيء.. وتخيلي القصص اللي بتطلع علي.. تخيلي كل ما أروح أي مكان يتكلمون علي..
وإلا رفيقاتي في الجامعة يقولون لهم أهلهم لا تمشون مع ذا البنت.. الله أعلم وش شايفين عليها رياجيلهم..
خلاص مزون ما أقدر استحمل كلام مثل هذا..
وحتى لو ماهمني شيء.. أمي واجد هامتني.. أنا عذبت أمي معي كثير.. وخلاص أبيها ترتاح..
مزون باستغراب: زين ليش تطلبين منه الطلاق؟؟ لو سواها وطلقش؟؟
جميلة بثقة موجوعة: لأني فعلا ما أبيه.. وما أقدر أتخيل أشلون أرجع أعيش معه..
مزون همست حينها بحرج: ودامش شايفة موضوع علاقتش بخليفة شاغله.. ليش ماريحتيه وقلتي له الحقيقة..
يمكن كان تعدل معش..
حينها انتفضت جميلة بغضب: يخسى أقول له.. هذا واحد مريض وأفكاره مريضة مثله..
تبيني عقب اللي سواه فيني كله.. أقول له تعال يا الشيخ فهد.. تراك أول واحد في حياتي.. عقب ما تعامل معي كني زبالة..
خلاص وش يغير ذا في الموضوع..؟؟
أنا فعلا مرة مطلقة.. والمتوقع إنه صار بيني وبين خليفة علاقة مثل أي زوجين... وهو خذني وهو عارف ذا الشيء زين..
ليش الحين صرت كخة في عينه؟؟... كان خلاني من أولها.. كان كملت دراستي..
ويمكن بعدها لقيت الرجال اللي يخاف الله فيني..
لكن هو الحين خرب حياتي كلها.. وماخلا لي أي فرصة..
وأنا صدق عايفته وماني بمتخيلة يصير بيني وبينه شيء.. عقب ماهاني بذا الطريقة!!
***************************************
"جاي تطلعني من الدوام بنفسك.. وجهك وإلا القمر؟؟"
نايف يبتسم : لا طال عمرش.. وجهي.. القمر ماطالني!!
عالية تغلق بابها وتهمس بمرح: أخس يا النويف الدب.. والله الظاهر إنك تتعلم تصفصف حكي.. قرب عرسك..
نايف بمرح: أول شيء (الدب).. أملاك حصرية لرجالش ما نقربها..
ثانيا مافيها شيء نتعلم حكي.. اسمي معرس..
عالية تشعر كالعادة بسعادة لرؤية نايف: وينك تغط ذا الأيام.. اشتقت لك يا الخايس..
نايف بإبتسامة: أول شيء لاا أغط ولا شيء بس أنتي المشغولة.. وأنا مشغول شيء بين شغلي وشوي ترتيبات في بيتي.. وشوي مع نشبة خواتي..
وأنتي توش شفتيني عند أمش البارحة الأولة..
عالية هزت كتفيها بإبتسامة: بس لو مر يوم ماشفتك.. أشتاق لك يا المعفن..
نايف يضحك: أنتي احترمي نفسش... خايس ومعفن.. اللي يسمع يقول جاي لش من بلاعة..
عالية تتنفس رائحة عطره المنتشر في السيارة بطريقة مرحة: وين بلاعة.. إلا جاي من بركة عطور.. ريحة عطرك صكتني بصداع..
وش صاير؟؟ شكلك مغير عطرك؟؟
نايف بثقة مرحة: عريس ولازم أغير..
ها تبين أوديش بيتش وإلا بيت هلش..
عالية بمودة: لا بيت هلي فديتك.. وراي عفسة.. عشان عرس غانم الليلة!!
حوار تلقائي مرح يدور بين الاثنين..
فنايف تجاوز كثيرا من حدته القديمة ناحية موضوع وضحى.. فالأيام تُصغر المواقف..
وخصوصا وهو يرى تعامل تميم الطبيعي جدا معه.. فمادام تميم أخذ الموضوع ببساطة فهو لابد أن يأخذه كذلك..
ولكنه لا ينكر شعوره بالتوجس والحرج من شخصية زوجته..
وهو يقرر في داخله ألا يحاول اتخاذ مواقف مسبقة حتى يراها ويعرفها..
***********************************
" جميلة جات صدق؟؟"
عفراء تتلقى منصور بسعادة محلقة: إيه يا قلبي جات بس راحت لمزون وبترجع بعد شوي..
منصور باستغراب: غريبة إن فهد ما كلمني ولا حتى قال لي استقبلهم في المطار..!!
عفراء بعفوية: يمكن مايبي يشغلك.. وخصوصا هو مشغول الليلة بعرس ولد عمه..
منصور بذات الاستغراب: مشغول يوم كان في مصر يتصل لي ويبلغني بموعد جيتهم..؟!!
بأتصل له أشوف وش سالفته؟؟
#أنفاس_قطر#
.
.
.
تتشرف كل من
عائلة راشد آل ليث............وعائلة زايد آل كساب
بدعوتكن لحضور حفل زفاف
نجل الأولى/ غانم........على........كريمة الثانية/ مزون
وذلك يوم الخميس الساعة الواحدة والنصف ظهرا
في قاعة ليلاس بين جنبات رواية بين الأمس واليوم
وبحضوركن يتم لنا الأفراح والمسرات
.
.
.
|
01-03-11, 03:43 AM
جديد مواضيع قسم القصص المكتمله من وحي قلم الاعضاء
العرض العادي
