كاتب الموضوع :
#أنفاس_قطر#
المنتدى :
القصص المكتمله من وحي قلم الاعضاء
السلام عليكم رحمة الله وبركاته
إلى الكاتبة المبدعة أنفاس قطر
" ترا الرد بتاعي طويل ممكن تقريه على مراحل "
ده هتبقي أول مرة في حياتي أكتب رد على بارت وتعليق عليه
وأول مرة أتواصل مع كاتبة من الأساس
لأني في الحقيقة من أكبر موردي الكسل في العالم
الحقيقة من زمان بسمع عن الكاتبة أنفاس قطر إنها مبدعة ورواياتها حلوة
فقلت لنفسي لازم أقرأها
فجيت أقرأ رواية بعد الغياب
بصراحة أنا أول ما لقيت البطلة في الثلاثينات لأ ويقولولها أم عبد العزيز جالي اكتئاب
توقفت عن قراءة القصة
وبعدين نسيت الموضوع ده
وبالصدفة بعد كده لقيت ع النت الناس برضه بتمدح تاني في الكاتبة أنفاس
قلت مش معقول كلهم بيمدحو وأنا اللي مش عاجباني؟
خلاص خليني أقرأ في أسي الهجران
أول ما لقيت واحدة متجوزة وجوزها مش بيحبها وعندها أربع عيال
والتانية بتنضرب والراجل بيدرس في أمريكا وشكله هيحب له واحدة هناك
قلت لأ واضح إن القصص ده أصلا مش تبع القصص الرومانسية وأنا مش عايزة أتعقد
وسكت فترة بعدين لقيت برضه الناس بتمدح
أول ما لقيت الناس اللي أنا وهم بنحب نفس القصص ومعجبين بنفس الكاتبات بيمدحوا في الكاتبة أنفاس قلت طيب أنا هأقرأ أول قصة للآخر وأشوف
فقرأت بعد الغياب وعجبتني
صحيح حسيتها مش دسمة في الأحداث والشخصيات بس كانت حلوة
جيت بعد كده لأسى الهجران
ده اللي كانت رائعة
وأكثر من رائعة
فعلا كانت قنبلة
عجبتني جدا وعجبني فيها تدين الناس
وإنها جايبة الجانب المحترم لأني مش بحب القصص اللي بتطلع البنات بيكلموا الشباب عادي والواحدة بتهزر مع ابن عمها كأنه أخوها
لأني الحقيقة مش ده الوسط اللي أنا تربيت فيه
ففعلا أبهرتني
واللي عجبني أكثر ذكرك لجانب الإعاقة وإزاي التغلب عليها
يعني مريم كفيفة وفضلت كفيفة مفتحتش في آخر القصة
بس كملت حياتها
وناصر تغلب على إعاقته وصبر عليها
ما شاء الله لا قوة إلا بالله
فعلا أبهرتيني
قرأتها مرتين
جت دلوقت قصة بين الأمس واليوم
الحقيقة ده أول قصة أقرأها من غير ما تكمل ليكي
بس عجبتني جدا برضه
وجعني قلبي على وسيمة وبكيت عليها جدا وعلى حرقة قلبها من الغيرة
فرحت إن فهد هياخد جميلة
بس مش عشان يبطلها دلع
لأ هي اللي هتبطله خشونة
الحقيقة هم الاتنين هيربوا بعض
بس هي تقريبا بطلت أنانية
هو اللي هيتغير التغيير الأكبر
بالنسبة لحب علي
الحقيقة غريبة عندكم إن الواحد ميشفش زوجته المعقود عليها
يعني الواحد ميعرفش شكل زوجته إلا في الفرح ؟
طيب والرؤية الشرعية قبل الخطبة؟
الحقيقة غريبة
عندنا الواحد بيشوف الواحدة لما ييجي يخطبها رؤية شرعية
وبعد العقد بيشوفها بس طبعا من غير خلوة يعني في حضور أهلها وفي البيت عندهم أو لوحدهم في الصالون بس يعني عصير طالع وشاي داخل
كل عشر دقايق حد ناطط لهم يعني
نيجي بقي لكساب
بما إنك بتقولي إنه خيال وأكشن
وأنا أصلا بحب الأكشن
وانت فاتحة باب التوقعات
فهقول توقعاتي
هو وهو بياخد الماستر برا
لقا اتنين بيتخانقوا مع بعض أو واحد بيطارد حد وواحد منهم شكله عربي
فهو ساعد العربي وبعدين اتضح له إن العربي شغال في المخابرات القطرية
وقعد يساعده أو أصلا الراجل مات ووصاه يكمل المهمة بداله ويتواصل مع المخابرات فهو كملها
المهم بطريقة ما ساعدهم وهم عرفوا ذكائه الخارق وفدائيته وتفانيه في حب الوطن " مااا علينا هههههه" فعرضوا عليه ينضم ليهم ودربوه وكده وبقي تبعهم
وااااااااااااو أكشن
أما إنه يطلق كاسرة فمش عارفة
بس بجد هم معقدين هم الاتنين
أنا مش عارفة هتحلي مشكلتهم إزاي
بس أنا واثقة في إخراجك
قبل ما أنسي بتضحكني جدا سميرة وخالها هريدي
ههههههههههههه
بجد مش عارفة اشمعني هريدي
بس هو اسم تحفة
مع إني مشفتش حد قبل كده اسمه هريدي إلا في الأفلام بتاعتنا
اوعوا تكونوا فاكرين إن كل المصريين اسمهم هريدي
إلى الأمام دائما
وفي انتظار الجزء الجديد
ثواني
برضه عاجبني في قصصك جدا ذكرك للقيام كأنه من الأشياء الطبيعية اللي بيقوم بها الإنسان
"أنا هأصلي القيام وأنام"
أو "صحيني قبل الفجر أصلي القيام "
ربنا يجعله في ميزان حسناتك
أنا متأكدة إن في ناس بتقرأ قصتك وهتبدأ تصلي القيام بفضل تشجيعك المبطن.
|
14-02-11, 09:15 PM
والرواية كم جزء لها وشكراَ
جديد مواضيع قسم القصص المكتمله من وحي قلم الاعضاء
العرض العادي
