رجعت لكم مرة ثانية
الطلاق ابغض الحلال عند الله بس احيانا الانسان يلجأ له اذا تسكرت
كل الابواب والحلول للمشاكل ويمكن يكون احسن حل واريح لكلا الطرفين
الذكر والانثى مع ان له ااثاار نفسية للطرفين وللاولاد لو كان فيه
اولاد ياترى شنهي اسباب الطلاق وليش انتشر في مجتمعاتنا بكثرة
اذا ماصار الطلاق صار الخلع الى هذي الدرجه وصلنا للعجز عن حل مشاكلنا بشكل ودي وبشكل سلس الى هذي الدرجه النفوس اتغيرت وعدم القدرة على ايجاد الحب الحقيقي هل اهوا السبب الرئيسي مادري
اسباب الطلاق كثيرة وتختلف من شخص الى ااخر .
راح اعدد بعض الاسباب المنتشرة واللي نعرفها :اول سبب اهوا الزواج التقليدي لما يكون الزواج من اختيار الاهل يعني
الام اعجبت في بنت وفي شكل البنت وراحت اخطبتها لولدها والولد واثق في اختيار امه وماكانت فترة الخطوبة كافيه للتعارف فيتزوجون ويكتشفون الاثنين بعدين ان كل واحد مختلف عن الثاني سواء في التفكير
في الميول لان جمال الشكل ماهو كل شي فتحدث مشاكل ويمكن اسرع حل يفكرن فيه اهوا الطلاق .ثاني شي تدخل الاهل بين الطرفين لحل المشاكل فكل واحد من الاهل راح ينحاز لولده وتكبر المشكلة فما فيه حل الا الطلاق .ثالث شي من اسباب الطلاق اهوا اكتشاف العيوب من كلا الطرفين وانصدام
كل واحد بعيوب الثاني يعني ايام الخطوبة الرجال يظهر احسن صفاته
والمراة تبين احسن صفاتها بس متى تظهر هذي العيوب بعد الزواج كل واحد يكتشف عيوب الثاني وينصدم فيها ومايقدرون يتحملون وتصير مشاكل
ويختارون الانفصال بدل الاتفاق وحل المشاكل.رابع شي اهمال الزوجه لزوجها وبيتها وعيالها واهمال الزوج لبيته وعياله .
تشوف الام كله برى حفلات تجمعات مع صديقاتها روحات وردات كله في الاسواق وماتخللي عرس ماتحضره بس وين الزوج وش محله من الاعراب
ماتدري عنه .اكل والا شرب والا نام والا راح والا جى مريض صاحي
يمكن الخدامه تعرف عنه اكثر منها .
وبعد لما الزوج يكون اهوا اللي يهمل بيته ياإما في العمل والا نايم
والا مع ربعه واصدقائه وطلعات وسفرات بس وين الزوجه شنو اهتمامه فيها
عنده يكفي انه مو مقصر في المصروف عليها وعلى البيت بس وجوده وعدمه واحد.خامس شي من الاسباب ان الرجال يكون سيء الخلق يمكن يشرب خمر والعياذ بالله يمكن مدمن مخدرات وصايع ساعتها زوجته ماراح تستحمل وتطلب الطلاق
ويمكن بعد تكون المرأة سيئة الخلق ماراح اشرح كيف لانها واضحه للكل
فزوجها ينصدم فيها ويطلقها .وبعد من اسباب الطلاق اهوا النفور بين الطرفين وعدم تقبل كل واحد للثاني
حتى مع العشرة ماقدروا يحبون بعض في هذي الحاله الرجال راح يفكر يتزوج ثانيه ويمكن المراة تطلب الطلاق .ومن الاسباب بعد الخيانة
خيانة الزوج لزوجته مع نساء غيرها وياكثر القصص اللي سمعنا خيانة الزوج لزوجته حتى مع الخدامة في هالحالة اقرب حل للزوجه تفكر فيه اهوا الطلاق .ومن الاسباب ايضا اختلاف المستوى بين الطرفين سواء اقتصادي
او تعليمي يمكن يتزوج رجال عنده ماجستير او دكتوراه وزوجته ماعندها غير متوسط مثلا فيكون فيه اختلاف في التفكير ومافيه تفاهم ويمكن العكس
الزوجه عندها شهادات كبيرة والزوج شهادته متوسط او ثانويه فيكون فيه نوع من التحسس من الناحيه التعليميه.
اما بالنسبه للناحيه الاقتصاديه يمكن يتزوج رجل بسيط على قد حاله من
زوجه غنية جدااا متعوده على الاسراف والتبذير وان طلباتها كلها مجابه
فما يقدر الرجال على طلباتها الكثيرة فما فيه حل غير .......
بعد من الاسباب اهوا عمل المرأة خارج البيت احيانا وظيفتها تسبب لها مشاكل مع زوجها .
الزوج يبقي يجي من العمل يللقى زوجته تستقبله تهتم فيه مو يجي اهوا من العمل قبلها وتجي اهيا من العمل تعبانه ومالها خلق حتى للكلام
يعني ماراح تقدر توفق بين وظيفتها وبيتها فتصير مشاكل ويمكن تؤدي هالمشاكل الى ........
طبعا مانعممم ونقول كل الحريم اللي يشتغلون كذا عشان ماحد يزعل منا
احنا نقول البعض .وبعد من الاسباب انعدام الحب الحقيقي بين الرجل والمرأة يعتقدون انهم
ايام الخطوبة وبعد الزواج بيعيشون في جنه ويفكرون ان حبهم حقيقي
بس بعد مايتزوجون ويتملكون الجسد يكتشفون ان اللي بينهم حب جسد
ماهو حب روح ماهو حب حقيقي .
حب سريع وخطوبه سريعه وزواج سريع ومشاكل اسرع فطلاق اسرع واسرع
ومن الاسباب مرض احد الزوجين احيانا يكون الزوج عقيم مايقدر يجيب عيال فيقوم يطلق زوجته عشان تشوف حياتها
والعكس يمكن الزوجه اهيا المريضه وماتجيب عيال.ومن الاسباب بعد عدم تأقلم الزوجه مع اهل زوجها وعدم رغبتها في السكن
في نفس بيت اهل الزوج وتصير مشاكل كثيرة وكبيرة وهوشات مع ام الزوج
ويحتار الزوج مايعرف مع مين يوقف .
وهناك اسباب واسباب كثيره لاتعد ولاتحصى
هالحين هذرت كثيير لين اتذكر بعد وارجع اكتب
مشكوور اخووي المجنون وعذرا على الهذرة
تحيااااتي
وجه الصباح /اللبؤة